﻿


سرمایۂ لب


نوید صادق

جمع و ترتیب: اعجاز عبید









آئنوں پر زوال کے دن ہیں
شیشۂ  دل ، کمال کے دن ہیں

دوست وحشت میں یوں نہیں کرتے
زخم پر اندمال کے دن ہیں

وسعتِ شہر تنگ پڑنے لگی
دشت کی دیکھ بھال کے دن ہیں

خیریت پوچھتے ہو لوگوں کی
شہرِ دل میں ملال کے دن ہیں

کوئی سمجھائے دوستوں کو نوید
مہلتِ عرضِ حال کے دن ہیں
٭٭٭






ایک جگنو مری وحشت کا سبب ہوتا تھا
شام کے وقت مرا حال عجب ہوتا تھا

اک ستارہ تھا کہ روشن تھا رہِ امکاں میں
اک سمندر، مرے ادراک میں جب ہوتا تھا

میری وحشت مرے ہونے کے حوالے سے نہ تھی
میرا ہونا میری وحشت کا سبب ہوتا تھا

ایک خوشبو تھی کہ آغوش کشا تھی ہر وقت
ایک لہجہ تھا کہ تحسین طلب ہوتا تھا

ایک آہٹ تھی کہ ہر وقت مرے دھیان میں تھی
اک فسانہ تھا کہ سرمایۂ لب ہوتا تھا

اب وہ خوشحال زمانہ ہی نہیں ہے ورنہ
روشنی کا بھی کوئی نام و نسب ہوتا تھا

میں بھی ہوتا تھا نوید اپنے حوالے سے کبھی
اور ہمہ وقت سرِ بامِ طلب ہوتا تھا
٭٭٭



خود اپنی گواہی کا بھروسہ بھی نہیں کچھ
اور اپنے حریفوں سے تقاضا بھی نہیں کچھ

خود توڑ دئے اپنی انا کے در و دیوار
سایہ تو کجا سائے کا جھگڑا بھی نہیں کچھ

صحرا میں بھلی گزری، اکیلا تھا تو کیا تھا
لوگوں میں کسی بات کا چرچا بھی نہیں کچھ

اب آ کے کھلا، کوئی نہیں، کچھ بھی نہیں تھا
اور اس پہ کسی غم کا مداوا بھی نہیں کچھ

اب یوں بھی نہیں ہے کہ میں بیکار گیا ہوں
اب یوں بھی نہیں ہے کہ کمایا بھی نہیں کچھ

دیکھو تو کسی غم کی تلافی بھی نہیں کی
سوچو تو کسی زخم سے پایا بھی نہیں کچھ

وہ شکل مرے دھیان میں آئی بھی تھی سو بار
وہ رنگ مری روح میں اُترا بھی نہیں کچھ

ویسے مرے اطوار برے تھے کہ بھلے تھے
لوگوں سے کبھی میں نے چھپایا بھی نہیں کچھ

جس گھر کو مرے نام سے نسبت کی سند ہے
اس گھر میں مرے نام کا رکھا بھی نہیں کچھ

احباب مرے حق میں دعا کرتے ہیں، یعنی
دنیا میں ابھی آیا تھا، دیکھا بھی نہیں کچھ
٭٭٭






متاعِ حاصلِ یک لحظۂ  وصالِ دوست
دہانِ زخمِ طلب، سر بسر جمالِ دوست

عجیب رنگ ---- سرِ طاسِ خوئے بے خبری
عجیب حال ---- سرِ راہِ پائمالِ دوست

میں دھڑکنوں میں سمیٹوں کہ نذرِ خواب کروں
یہ رنگ رنگ جھلک، موجِ مستِ حالِ دوست

شعورِ صبحِ قیامت کسی کو ہو تو ہو
ہمیں عزیز شب و روز و ماہ و سالِ دوست

یہ آگ ہے جو سرِ دشت و کوہسار و چمن
کہیں نمود پہ آیا ہے پھر جمالِ دوست

نوید ایک ہمیں تو نہیں ہیں دیوانے
تمام شہر ہوا ہے فدائے خالِ دوست
٭٭٭



خود سے بہت خفا ہوں میں، خود سے بہت جدا تھا میں
دیکھا نہیں کہ کیا ہوں میں، سوچا نہیں کہ کیا تھا میں

ٹوٹ گیا، بکھر گیا، اپنے لئے تو مر گیا
تیری طرف تھا گامزن، خود سے کٹا ہوا تھا میں

کیجے ملاحظہ ذرا، دفترِ ماہ و سالِ دل
میرا اسیر تھا یہ دل، اس میں پڑا ہوا تھا میں

یاد نہ آ سکوں تو بول، زنگ پڑا دریچہ کھول
تیری گلی میں کون تھا، تیرے لبوں پہ کیا تھا میں

میرا ہی احتساب تھا، میں ہی تھا محتسب کہ رات
جرم عجیب ہو گیا، خود سے نکل گیا تھا میں

دیکھا، گلی میں کون ہے! کوئی نہیں ہے! آہٹیں!!
سنتا ہوں، چند سال قبل خود سے بچھڑ گیا تھا میں

شکوہ کروں تو کس کا میں، رنج کروں تو کیا کروں
کون سمجھ سکا مجھے، کس کو سمجھ سکا تھا میں

تو بھی خبر کی لہر میں بہتا چلا گیا نوید
تیرے لئے تو ٹھیک تھا، اپنے لئے برا تھا میں
٭٭٭



معجزہ

ہمارے ہاتھ کٹنے سے بہت پہلے
سُنا ہے، لوگ کہتے تھے
’یہاں اک شہسوار آئے گا
جس کی چاپ سے دیوارِ استبداد میں رخنے پڑیں گے
ملائک آسمانوں سے اُتر آئیں گے اُس کے ساتھ چلنے کو
وہ اپنے گُرزِ ہیبت ناک سے،تلوار سے
خوشحالیوں کے عہد کی بُنیاد رکھے گا‘

بہت ممکن ہے
اب بھی لوگ کہتے ہوں
’یہاں اک شہسوار آئے گا
جس کی چاپ ---- !!!!‘
٭٭٭




غمِ دیگر


میں جو گُم صُم سرِ سوادِ ذات
تار و پودِ سکوں سے اُلجھا ہوں
دیکھتا ہوں، ہوا میں لہراتے
مخملیں زرد رُو کنول کے پھول
ساحلِ خواب پر اُمنڈتی دھُند

جان لیوا سکوتِ صحرا میں
اپنے ہونے کی نفی کرتا ہوں
کش مکش کا سبب کسے معلوم
سایہ ابر میں مرا سایہ
کھو گیا ریت کی تہوں میں کہیں

جانتا ہوں، مگر نہیں کہتا
یہ غمِ کاہشِ وفا تو نہیں
شمع کی لَو کے اُس طرف کوئی
کتنے برسوں سے منتظر ہے مرا!!
٭٭٭



آخری نظم

رات تحلیل ہو گئی مجھ میں
صبح میرے عیوب کھولے کیا
میں کہیں دور دشتِ وحشت میں
اپنے سائے سے الجھا بٹھا ہوں

بے بسی حد سے ما سَوا ہے یہاں
صبح بے رنگ، شام ہے بے کیف
سانس کی لَے کے ساتھ اٹھتا ہے
دل میں ہنگامہ نبود و بود
گردشِ خوں سوال کرتی ہے
اور کب تک چلے گا یہ سب کچھ!؟

لمحہ لمحہ سوال کرتا ہے
میرے ہونے میں کون حائل ہے
میری سوچوں پہ کس کا پہرا ہے
وہ جو برسوں سے منتظر تھا مرا
کوئی اُس کی خبر نہیں دیتا

ہر نفس یہ پیام آتا ہے
آس کی تان ٹوٹ جائے گی
زندگی ہار مان جائے گی!!
٭٭٭




تکمیلِ شکست

مری نگاہوں پہ آئنہ ہے
وہ ایک منظر
کہ جب ہوا نے
گھنے شجر سے خراج لے کر،
مری برہنہ بدن زمیں کو
بہت سے پتوں سے ڈھک دیا تھا
۔۔۔
مجھے خبر ہی نہیں تھی شائد!
کہ ایک زہرِ زیاں طلب نے،
مرے لہو میں،
نمو کے پہلے ہی مرحلہ میں
ہزار رنگوں کی بے یقینی اُنڈیل دی تھی
وہ ایک خوابِ سفر
کہ جس کی بنا پہ دل نے ہزار قصرِ سکوں اُٹھائے
عقیدتوں کے، عبادتوں کے بھنور میں غرقاب ہو چکا ہے
۔۔۔۔۔
میں زادِ راہِ طلب پہ کس درجہ مطمئن تھا
مجھے خبر ہی نہ ہو سکی اور
مری انا کی شکستگی نے
فسردگی کا وہ روپ دھارا
کہ میرے تلووں کے آبلوں کو
اُجاڑ،بنجر زمیں نے بھی نہ گلے لگایا
۔۔۔۔۔۔۔
سخن سخن اضطراب آسا
وہ میرا ماضی
کسی سخی کی عطا نہیں تھا
وہ رنگ --- رنگِ کلیدِ حیرت
نگارِ شہرِ بقا نہیں تھا
کہ میں بھٹکنے سے باز رہتا
مجھے کسی کی نگاہِ خوش کُن کا آسرا تھا
مری شبوں کو وہ ایک پیکر اُجالتا تھا
کہ جس کے لمسِ گراں بہا سے
مجھے محبت کی رفعتوں پر یقیں ہوا تھا
۔۔۔۔۔۔
مگر وہ آنکھیں،
سیاہ آنکھیں،
مرے بدن کی طلب کے حیطے میں ہی نہ آئیں
مری نگاہیں یقیں کی انتھک مسافتوں میں
بھٹک گئیں تو۔۔۔۔۔۔
سرابِ تعبیرِ خوابِ ممکن،
تلازموں کے نئے جنم میں
مری شکستِ انا کو،
محروم جسم و جاں کو
نئے سلیقے، انوکھی جدّت سے
ایک لَے میں اُجالنے کو
مرے مناظر میں خیمہ زن تھا
۔۔۔۔۔۔۔۔
میں دونوں ہاتھوں سے چہرہ ڈھانپے
درونِ خانہ ،
یوں زینہ زینہ اُترتا آیا
کہ جیسے طفلِ جہاں گزیدہ
نئے سفر کی صعوبتوں کے مقابل آنے سے ڈر رہا ہو
بکھر رہا ہو
۔۔۔۔۔۔۔
مری نگاہوں پہ آئنہ ہے
وہ ایک منظر
کہ جب شکستہ بدن شجر نے
مری برہنہ بدن زمیں کو
بہت سے پتوں سے ڈھک دیا تھا!!
٭٭٭



آگہی کے طلسم کی حِس

طاقِ اُمید پر یہ بجھتا دیپ
رات کی آخری نشانی ہے
صبح کے اوّلیں ستارے نے
میری سوچوں کو منجمد پا کر
لوٹ لی روشنی نگاہوں کی
جیسے اس کو مری ضرورت ہو


اے مرا ہاتھ دیکھنے والے!
وقت برباد کر نہ باتوں میں
میرے چہرے کی جھرّیوں کو دیکھ
کتنی صدیاں پھلانگ کر میں نے
رات اپنا سُراغ پایا تھا


اور اپنے وجود کی پرتیں
کپکپاتی پلک سے کھولی تھیں
اور وہ منحوس صبح کا تارہ
میری آنکھوں کی روشنی لے کر
شہر سیراب کرتا جاتا ہے

آگہی کے طلسم سے بے حِس
لوگ دیوانہ وار آ آ کر،
اپنے حصّے کی تمکنت لے کر
بے تعیّن گلی محلوں میں
پھیلتے جا رہے ہیں سُرعت سے
اور میں صبح کے اُجالے سے
پوچھتا ہوں کہ اے فریب انداز!
میں کہاں ڈھونڈتا پھروں خود کو!؟
٭٭٭






کون آسیب آ بسا دل میں
کر لیا ڈر نے راستہ دل میں

اے مرے کم نصیب دل!کچھ سوچ
ہے کوئی تیرا آشنا دل میں

کم ہے جس درجہ کیجئے وحشت
گونجتا ہے دماغ سا دل میں

عکس بن بن کے مٹتے جاتے ہیں
رکھ دیا کس نے آئنہ دل میں

میں ہوں، ماضی ہے اور مستقبل
کم ہے فی الحال حوصلہ دل میں

آخر آخر نوید صادق بھی
آن بیٹھا، رہا سہا، دل میں
٭٭٭






کچھ دن سے جو گھر میں آ پڑا ہوں
میں اپنے قریب آ گیا ہوں

دنیا سے غرض بھی ہو تو کیوں ہوں
آپ اپنی ہنسی اُڑا رہا ہوں

میں نام کمانا چاہتا تھا
پہچان گنواتا جا رہا ہوں

جس موڑ پہ ہم بچھڑ گئے تھے
میں برسوں وہیں کھڑا رہا ہوں

کچھ ہو تو جواز دیکھنے کا
میں تیرا جہان دیکھتا ہوں!!

میں یعنی نوید صادق، اب تک
کچھ بیتے دنوں کو رو رہا ہوں
٭٭٭



ہر نفس مضطرب گزرتی ہے
زندگی کس کے بین کرتی ہے

دھیرے دھیرے، نفس نفس، شب بھر
ایک آہٹ مجھے کترتی ہے

زندگی! دیکھ میں بھی زندہ ہوں
تیرے قبضے میں کتنی دھرتی ہے؟

ایک خوشبو کہ پرکشش بھی ہے
دشتِ بے خواب میں اترتی ہے

میں ہوں اپنی طلب میں گم تو وہاں
بے خودی غم پہ نام دھرتی ہے

دوستو! بھائیو! خدا حافظ!
نبض امّید، اب ٹھہرتی ہے

کون جانے نوید صادق کے
دل پہ دن رات کیا گزرتی ہے
٭٭٭






پھر وہی ضد کہ ہر اک بات بتانے لگ جائیں
اب تو آنسو بھی نہیں ہیں کہ بہانے لگ جائیں

 تیری تکریم بھی لازم ہے شبِ اوجِ وصال
 پر یہ ڈر ہے کہ یہ لمحے نہ ٹھکانے لگ جائیں

کچھ نمو کے بھی تقاضے ہیں سرِ کشتِ خیال
 ورنہ ہم لوگ تو بس خاک اُڑانے لگ جائیں

 ایک لمحے کی ملاقات کے خاموش سفر!
ان کہے لفظ نہ اب شور مچانے لگ جائیں

 وہ رفاقت، وہ فسانہ، وہ تماشا، وہ خلوص
کوئی عنوان تلاشیں تو زمانے لگ جائیں

ہم سمجھتے ہیں ستم زاد قبیلوں کو نوید
 پیڑ سرسبز، گھنا ہو تو گرانے لگ جائیں
٭٭٭




نذر اقبال


خراب و خوار مثالِ درختِ صحرا ہوں
میں پائمالِ سرِ راہِ سختِ صحرا ہوں

مجھے بھی اپنی طرف کھینچتے ہیں آئینے
مگر میں سب سے گریزاں کہ بختِ صحرا ہوں

تو کیا یہ لوگ مجھے بھول جائیں گے یکسر
تو کیا میں صرف بگولہ ہوں، لختِ صحرا ہوں

تو میرے ساتھ کہاں چل سکے گا عہدِ نَو
کہ تو نقیبِ تغیر، میں رختِ صحرا ہوں

کھُلے کھُلے نہ کھُلے اُس پہ میرے جسم کی پیاس
"نظر ہے ابرِ کرم پر، درختِ صحرا ہوں"

یہ بات باعثِ صد افتخار ہے کہ نوید
ثبوتِ رمزِ تعلق ہوں، تختِ صحرا ہوں
٭٭٭




یہ روشنی کا جو ہے سلسلہ ہمارے ساتھ
تو چل رہا ہے کوئی آئینہ ہمارے ساتھ

یہ ہاتھ یونہی تکلف میں اٹھ گئے ورنہ
جو ہوتا آیا ہے ، ہوگا سدا ہمارے ساتھ

کسی میں کوئی ادا تھی کسی میں کوئی ہنر
پہ کون چار قدم چل سکا ہمارے ساتھ

مگر یہ بات ، کسی اور سے نہیں ‌کہنا
ہمارا ربط نہیں رہ سکا ہمارے ساتھ

ہمیں کسی سے شکایت نہیں کوئی لیکن
جو چاہیے تھا نہیں ہو رہا ہمارے ساتھ

گلی کے موڑ پہ سرگوشیاں ہوئیں کچھ دیر
اور اس کے بعد کوئی چل پڑا ہمارے ساتھ

ہمارا عہد غلط تھا کہ ہم غلط تھے نوید ؟
قدم قدم پہ ہوا سانحہ ہمارے ساتھ
٭٭٭



تصویر کا جو دوسرا رخ تھا، نہیں دیکھا
ہم نے کبھی امکان کا رستہ نہیں دیکھا

جس حال میں، جس جا بھی رہی، خود سے رہے دور
اک شخص بھی اپنی طرف آتا نہیں دیکھا

اک غم کہ ہمیں راس بہت تھا، سو نہیں ہی
مدت سے نمِ چشم کو رسوا نہیں دیکھا

اے نقش گرِ خواب! ذرا دھیان ادھر بھی
ہم نے کبھی تعبیر کا چہرہ نہیں دیکھا

قرطاسِ دلِ زار پہ یہ نقشِ شکستہ!
وہ کون تھا جس نے مجھے دیکھا، نہیں دیکھا

یہ روگ مرے فکر کی تجسیم کرے گا
سورج نے مرے شہر کا نقشہ نہیں دیکھا

کچھ تم بھی کہو، میری تو گویائی چلی بس!
کیا دیکھ لیا تم نے یہاں،کیا نہیں دیکھا

 چپ چاپ نوید اپنی حدوں میں پلٹ آؤ
ہم نے بھی کئی دن سے تماشا نہیں دیکھا
٭٭٭

ماخذ: اردو ویب ڈاٹ آرگ
تدوین اور ای بک کی تشکیل: اعجاز عبید
