﻿



سکوت




نزہت عباسی






انتساب


والدین کے نام







چھایا ہے اک سکوت سا اس کائنات میں
برپا ہے پھر بھی شور یہاں شش جہات میں


مجموعہ تخیل



ثنائے ربی

چھایا ہے اِک سکوت سا اس کائنات میں
برپا ہے پھر بھی شور یہاں شش جہات میں

تیرا ہی ایک جلوہ نگاہوں میں ہے مری
تیرا ہی ایک ذکر میری بات بات میں

تجھ سے الگ تو میرا کوئی بھی نہیں وجود
داخل ترا ہی نور ہے اس میری ذات میں

اک رُخ تری خدائی کا شبنم کے اشک ہیں
پھولوں کی آنکھ رہتی ہے نم خود بھی رات میں

تیرے سوا کچھ اور تصور میں اب نہیں
اک تیرا ہی خیال جو رہتا ہے ساتھ میں 


مدحتِ نبی

میں مدح و ثنا نورِ لولاک کروں کیسے
ذرہ ہوں میں سورج کا ادراک کروں کیسے

جب آپ کے جبّے میں پیوند ہوں اے آقا
میں ریشم و اطلس کو پوشاک کروں کیسے

پلکیں تو مری گردِ جادہ سے ہوئیں بوجھل
نظروں کو اب میں سوءے افلاک کروں کیسے

ہے آپ کی رحمت سے امید بہت مجھ کو
عارض کو بھلا اپنے نمناک کروں کیسے

حد درجہ سخاوت کا دریا ہے تری ہستی
میں دامنِ عصیاں کو پیراک کروں کیسے


ہزاروں راستوں میں بٹ گئی ہوں
خود اپنے آپ ہی سے کٹ گئی ہوں

ہوں گُم گشتہ خلا کی وسعتوں میں
کہ میں محور سے اپنے آپ ہٹ گئی ہوں

سفر میں موڑ جب کاٹا تھا تم نے
وہیں دیکھو تو میں بھی کٹ گئی ہوں

رکاوٹ ہے نہ سدّ راہ کوئی
کہ تیرے راستوں سے ہٹ گئی ہوں

فنا مجھ کو کرے گی کیا عداوت
کہ تیرے پیار ہی میں لُٹ‌گئی ہوں

خود اپنی بھی نہیں پہچان باقی
غبارِ زیست میں یوں اَٹ گئی ہوں

میں دریا تو نہیں جو پھیل جاؤں
مثالِ آبِ جُو میں گھٹ گئی ہوں

مٹانا چاہتے تھے سو وہ آخر
انھی کے واسطے میں مٹ گئی ہوں




وہ کون سی شے ہے جو تقسیم نہ ہو پائے
اب کون سے جذبے میں ترمیم نہ ہو پائے

مجرم بھی وہی ہیں جو منصف ہیں بنے بیٹھے
ان جیسے خداؤں کی تعظیم نہ ہو پائے

سوچوں میں تراشے ہیں لفظوں کے کئی پیکر
کیوں جانے مگر ان کی تجسیم نہ ہو پائے

مبہم سے ہوئے آخر رشتوں کے معانی بھی
آسان سی باتوں کی تفہیم نہ ہو پائے

بے سود نظریے ہیں ، بے سود نتیجے ہیں
اغیار کے مکتب میں تعلیم نہ ہو پائے



اس نے کیا احسان کیا
ہم نے جیون دان کیا

پہنی رشتوں کی زنجیر
گھر ہی کو زندان کیا

اتنا ہی ٹوٹا ہے من
جس پہ جتنا مان کیا

غم کا اتھاہ سمندر تھا
خود کا بھی جب گیان کیا

کوئی نہیں بس پُروا تھی
آہٹ پہ جب دھیان کیا



"ہمارے عہد کی سچائیاں بھی جھوٹی ہیں"
خیال و فکر کی دانائیاں بھی جھوٹی ہیں

وجود و ذات کی بحثیں اُٹھا رکھیں اے دل
ابھی تو وقت کی آگاہیاں بھی جھوٹی ہیں

گلوں میں رنگ ، نہ ہے بادِ نو بہار کا رقص
کہ اب چمن کی یہ رعنائیاں بھی جھوٹی ہیں

اکیلے ہوکے بھی ہر دم ہجوم رہتا ہے
تمہاری یاد کی تنہائیاں بھی جھوٹی ہیں

مجھے بھی اپنی نگاہوں پہ کوئی شک سا ہے
تمہارے درد کی پرچھائیاں بھی جھوٹی ہیں

جہاں میں حُسن کی صورت نہیں رہی ویسی
تمہارے عشق کی سچائیاں بھی جھوٹی ہیں

ہے اب خیال کو کچھ اور وسعتوں کی طلب
مرے شعور کی پہنائیاں بھی جھوٹی ہیں


اپنی یادوں کی کہیں پر اک کڑی گُم ہو گئی
شہر سب باقی رہا بس وہ گلی گم ہو گئی

جانے کیوں پہچاننے میں ہو گئی تاخیر کچھ
گھر کی جب آرائشوں میں سادگی گم ہو گئی

جانے کتنے سائلوں نے اپنے دامن بھر لیے
میری جانب آتے آتے ہر خوشی گم ہو گئی

میری تنہائی نے میری ذات کو افشا کیا
محفلوں کی رونقوں میں بے خودی گُم ہو گئی

جب تلک تھے بے خبر یہ آرزو تھی جان لیں
آنکھ جب روشن ہوئی تو روشنی گم ہو گئی

موت ہاتھوں میں اُٹھائے رو رہے ہیں لوگ سب
میرے شہروں میں کہاں پر زندگی گُم ہو گئی

زندگی کے پیچ و خُم میں دل اُلجھ کر رہ گیا
یاد بھی تیری نہ جانے کس گھڑی گُم ہو گئی




منزلیں کچھ اور تھیں اور راستے کچھ اور تھے
قربتیں کچھ اور تھیں وہ فاصلے کچھ اور تھے

یہ تو مانا زندگی کے کم نہیں آزار کچھ
مسئلے کچھ اور تھے اور حوصلے کچھ اور تھے

ختم ہی تو ہو گئے تھے چاہتوں کے وہ سفر
یاد کے لیکن رہے جو سلسلے کچھ اور تھے

منصف و مختار تم لیکن ہمارے واسطے
قاعدے کچھ اور تھے اور ضابطے کچھ اور تھے

ساتھ رہنے سے تو کچھ کم ہو نہ پائے فاصلے
جو دلوں کو جوڑ دیں وہ رابطے کچھ اور تھے




زمیں بھی گم ہے یہاں آسمان بھی گم ہے
زماں بھی گم ہے اور اس میں مکان بھی گم ہے

نہ راستے کی خبر ہے نہ منزلوں کا پتہ
ستارہ گم ہے سفر کا نشان بھی گم ہے

وہ سامنے جو کبھی ہم کو آ رہا تھا نظر
وہ ایک شہر وہ اپنا مکان بھی گم ہے

نہ جانے کیوں کوئی الہام اب نہیں ہوتا
اثر وہ شعر کا ، لطفِ بیان بھی گم ہے

اسی خیال میں سارے خیال پنہاں ہیں
اسی یقین میں سارا گمان بھی گم ہے


گو کہ اک عمر رائیگاں کی ہے
یاد تیری تو جاوداں کی ہے

دولتِ غم کہاں چھپا رکھتے
صرف یہ بھی کہاں کہاں کی ہے

دوسری بار مل بھی جائے تو کیا
زندگی وقفِ دیگراں کی ہے

حالتِ غم وہی ہے یا کہ نہیں
اپنی آنکھوں سے جو عیاں کی ہے

منزلیں اپنی دیکھ لیں ہم نے
جب نظر سوئے آسماں کی ہے

یہ جہاں تو نہیں ٹھکانہ مرا
جستجو کون سے جہاں‌کی ہے

یہ کوئی نقشِ آبِ جُو تو نہیں
موج یہ بحرِ بیکراں کی ہے

پھر نہ واپس پلٹ کے جائیں گے
راہ ہر سمت بے نشاں کی ہے 


دشت میں کیوں دلِ بے تاب لیے پھرتا ہے
کس لیے دیدہ بے خواب لیے پھرتا ہے

آپ ہی اپنا وجود اس میں ڈبو کر جیسے
اپنی ہستی ہی میں گرداب لیے پھرتا ہے

بانٹتا جاتا ہے اشکوں کے خزانے ہر سُو
آنکھ میں گوہرِ نایاب لیے پھرتا ہے

زندگی جاگتے رہنے کی سزا ہو جیسے
وہ سزاؤں کے بھی آداب لیے پھرتا ہے

بیٹھنے دیتا نہیں مجھ کو کنارے پہ کبھی
مجھ میں پوشیدہ یوں سیلاب لیے پھرتا ہے

جس گھڑی قلب ہوا تھا میرا پارہ پارہ
اسی پل کو دلِ سیماب لیے پھرتا ہے

کون کرتا ہے رگِ جاں میں لہُو کو گردش
کون سانسوں میں یہ زہراب لیے پھرتا ہے



دل پہ کس طرح اعتبار کریں
کیا جنوں ہی کو اختیار کریں

تیرے غم سے ہو کیوں گریز ہمیں
اک تعلق تو استوار کریں

آپ کا وصفِ دوستی ہے عجب
جس کو چاہیں اسی پہ وار کریں

تجھ سے پہلے نہ بعد میں کوئی
کون ہے جس کا انتظار کریں

ہے ابھی ابتدا بہاروں کی
دل کے زخموں کا کیا شمار کریں

اپنی آنکھوں کے آنسوؤں کی چمک
کیوں زمانے پہ آشکار کریں




خود شناسی بھی اک ملال ہی تھی
اپنی ہستی ابھی سوال ہی تھی

یاد اچھا ہوا کہ بھول گئی
جیتے جی جان کا وبال ہی تھی

وہم تھی یا گماں تھی کیا تھی وہ
تیری صورت بھی کیا خیال ہی تھی

ان کے ترکش میں تیر تھے کتنے
صبر کی میرے پاس ڈھال ہی تھی

ان کی باتوں پہ روئے کیوں اتنا
بات کیا کوئی حسبِ حال ہی تھی

مجھ پہ احساں کا بوجھ ڈالا تھا
یہ بھی اپنوں کی ایک چال ہی تھی



کب اپنی ذات کا کوئی ہم کو سرا ملا
اس کی نگاہ سے تھا ذرا سلسلہ ملا

کچھ دوستی کے داغ تھے ، کچھ دشمنی کے زخم
اب تجھ سے کیا کہوں مجھے کس کس سے کیا ملا

جب تک وہ باخبر تھا ، سو اپنی خبر رہی
وہ اجنبی ہوا تو نہ اپنا پتہ ملا

لمحے کی نیند تھی سو کہیں خواب ہو گئی
آنکھوں میں ہم کو اپنی فقط رتجگا ملا

اُکسا رہی ہے مجھ کو یہ عزمِ سفر پہ پھر
یہ اک خلش ہے جس سے سدا حوصلہ ملا




دل کہ آسودہ منزل نہ ہوا
راستہ کوئی بھی حاصل نہ ہوا

ہم نے تنہا ہی لڑی جنگ اپنی
کوئی بھی مدّ مقابل نہ ہوا

سارے الزام میرے سر ہی گئے
جو تھا قاتل وہی قاتل نہ ہوا

دل تھا آزادہ روی کا قائل
کبھی پابندِ سلاسل نہ ہوا

اس کی رحمت جو رہی شاملِ حال
کام مشکل کبھی مشکل نہ ہوا 


شاید وہیں سکون کی دنیا ملے مجھے
رکھنے ہوں دوسروں سے جہاں فاصلے مجھے

آیا نہ تھا جدائی کا ہر گز خیال بھی
اور توڑنے پڑے تھے وہیں سلسلے مجھے

صحرا نوردیوں نے چلو یہ سکھا دیا
سب ریت کے تھے لوگ جو اکثر مجھے ملے

ہاتھوں سے جو اُٹھائی تھی دیوار گر گئی
بربادیوں ہی میں ملے سارے صلے مجھے

ازبر ہے آج تک مجھے اس کا کہا ہوا
غم کے سبق سے کتنے ملے حوصلے مجھے

ناکامیوں کو میں نے کیا اپنی کامیاب
جینے کے راس آئے ہیں کیا ولولے مجھے

رستوں پہ یہ غبار نظر آ رہا ہے کیوں
شاید کہ ڈھونڈتے ہوں کہیں قافلے مجھے


مکیں کو مکاں تو بدلنا پڑے گا
نئے راستوں پر بھی جانا پڑے گا

نہ آگے تمہیں پھر پکارے گا کوئی
صدا پہ ابھی اس کی رکنا پڑے گا

سمندر کی وسعت نہیں ہے جو دل میں
تو پھر آب جُو سا سمٹنا پڑے گا

سر آب یاں بلبلے اس قدر ہیں
گہر کو صدف میں ہی چھپنا پڑے گا

عجب وقت آیا ہے پندار پر یہ
نہ ٹوٹے اگر ہم تو جھکنا پڑے گا

تمنا کا حاصل فریب مسلسل
فریب مسلسل پہ رہنا پڑے گا

یونہی کار دنیا میں مصروف رہ کر
تمہیں یاد کرنا ، بھلانا پڑے گا




کتنا بڑا وہ شخص یہ احسان کر گیا
مجھ پہ ہی میری ذات کا عرفان کر گیا

اس کے ہی دم سے رونقیں ہر سمت گھر میں تھیں
وہ کیا گیا جہاں کو ہی ویران کر گیا

میرے ہر ایک قطرہ خوں میں ہے اس کا پیار
خود تھا بہار مجھ کو گلستان کر گیا

چادر وفا کی اوڑھ لی تربت میں ہو کے خاک
دل تھا صحیفہ ، جسم کو جزدان کر گیا

اس شہر بے اماں میں اسی کی تھی اک اماں
جو دھوپ میں بھی جینے کا سامان کر گیا 



پہروں یونہی سوچتے رہنا اچھا لگتا ہے
تیری یاد میں روتے رہنا اچھا لگتا ہے

ساری عمر بس ایک کسک سی ہوتی رہتی ہے
دل میں درد کا بستے رہنا اچھا لگتا ہے

تنہائی سے گھبرا کے اب آنکھ کناروں سے
دریاؤں کا بہتے رہنا اچھا لگتا ہے

لمحہ لمحہ اپنی صورت مٹتی جاتی ہے
خود سے غافل ہوتے رہنا اچھا لگتا ہے

خون میں بہتی یادوں کے ہر قاتل ذرّے کا
خار کی صورت چبھتے رہنا اچھا لگتا ہے



کوئی منصف تجھے ملا کہ نہیں
اور مرا فیصلہ ہوا کہ نہیں

ساری دنیا کو کھوجنے کے بعد
آج تک وہ تجھے ملا کہ نہیں

کیا خبر آنسوؤں کی بارش میں
زخمِ دل رات بھر دھُلا کہ نہیں

تو بتا ہے یہ چند لمحوں میں
ہم میں صدیوں کا فاصلہ کہ نہیں

کیا ترے دل میں نام کا میرے
ایک در آج بھی کھلا کہ نہیں




ربط و گریز کیا ہے یہ سوچیں گے ایک دن
حاصل وفا کا کیا ہے یہ پوچھیں گے ایک دن

غیروں میں کوئی بھی ہمیں دشمن نہیں ملا
اپنی ہی آستیں کبھی دیکھیں گے ایک دن

مُدّت کے بعد بھی وہی اجڑا ہوا ہے گھر
تم نے کہا تھا یاد ہے ٹھہریں گے ایک دن

راہ فنا ہے کیا ذرا معلوم تو کریں
مہلت دے زندگی کبھی بیٹھیں گے ایک دن

تھا ہوش ہی کہاں کہ جھلک تو ذرا سی تھی
تھا شوق کس قدر تمہیں دیکھیں گے ایک دن


خدا کرے دل سادہ کو کچھ پتا نہ لگے
سوادِ شہر کی اس کو کبھی ہوا نہ لگے

وہ اپنے دل میں سمندر چھپائے پھرتا ہے
کہ جس کی آنکھ میں آنسو بھی اک روا نہ لگے

یہ فاصلے بھی عجب کچھ فریب دیتے ہیں
ملا نہیں ہے جو صدیوں سے وہ جدا نہ لگے

ہم اس طرح سے چلو راستہ بدل جائیں
بچھڑتے وقت کسی کو بھی کچھ برا نہ لگے

یہ ایک جبرِ مسلسل کہاں تلک میں سہوں
کہ آئینہ بھی جو دیکھوں اسے بھلا نہ لگے

ہمارے نام پہ سارے گناہ لکھ ڈالو
تمہارے نام پہ اب بھی کوئی خطا نہ لگے

ہمارا حال وہی کر دو جو کہ عبرت ہو
دعا بھی مانگیں تو ہم کو کوئی دعا نہ لگے



سر رہ کہیں وہ ملا نہیں
کبھی حادثہ یہ ہوا نہیں

مجھے زندگی سے نکال کے
کبھی تو بھی شاد رہا نہیں

میں نے زندگی کو برت لیا
مجھے اب کسی سے گلہ نہیں

جو نہ چاہا تھا وہ تو ہو گیا
جو تھا چاہا وہی ہوا نہیں

مرے دل نے اس کو سمجھ لیا
جو بھی تو نے لب سے کہا نہیں

وہی چاہ دل میں رہی کہاں
کوئی شکوہ اب تو رہا نہیں 



میں نے اس کو یاد رکھا
خود کو یوں برباد رکھا

دنیا کے ہر رشتے سے
جان و دل آزاد رکھا

دل کا حال بتائیں کیا
شاد رکھا ناشاد رکھا

جس کا زہر ہے نسلوں تک
ظلم وہ کیوں اجداد رکھا

احساں ہے اس مالک کا
میرا وطن آباد رکھا

قصہ تجھ کو بھولنے کا
ہم نے کیسے یاد رکھا




فیصلہ تو ہوا کے ہاتھ میں تھا
کوئی پتھر صدا کے ہاتھ میں تھا

جب دوا بھی اثر نہ کر پائی
سلسلہ پھر دعا کے ہاتھ میں تھا

ساری سمتیں بدل کے رکھ دی ہیں
راستہ رہنما کے ہاتھ میں تھا

کتنی اونچی ہوئی ہیں دیواریں
شہر سارا انا کے ہاتھ میں تھا

پھر تو خوشبو کا اک سفر تھا وہ
ہاتھ جب بھی صبا کے ہاتھ میں تھا

اب جو ہاتھوں پہ تیرے نام سے ہے
رنگ کب یہ حنا کے ہاتھ میں تھا




گو کہ وعدہ کوئی وفا نہ کیا
کیا حسیں اس نے ہر بہانہ کیا

صرف تیرا ہی دکھ نہیں ہم کو
دل کو وقف غم زمانہ کیا

بات سچ تھی مگر نہیں بولے
دوستوں کو کبھی خفا نہ کیا

آج پھر ہم نے تیری یادوں سے
اپنا روشن غریب خانہ کیا

دل جو آباد ہے تو سب کچھ ہے
غم نے ویرانہ آشیانہ کیا

دستکیں ہاتھ اس کے دیتے رہے
گھر کا دروازہ ہم نے وا نہ کیا 




جفا کے فیصلے اچھے نہیں تھے
وفا کے مرحلے اچھے نہیں تھے

جنہیں خود دعوی پندار غم تھا
انہی کے حوصلے اچھے نہیں تھے

یوں ملنے میں بلا کی شدتیں تھیں
دلوں کے فاصلے اچھے نہیں تھے

پھر آگے تک نہ کوئی راستہ تھا
وفا کے سلسلے اچھے نہیں تھے

چمک آنکھوں کو زخمی کر گئی تھی
نظر کے آبلے اچھے نہیں تھے




اچھے دنوں کی یاد میں آنکھیں برس گئیں
اپنوں کی صورتوں کو یہ کیسے ترس گئیں

پھولوں سی نرم نرم زمانے کی دھوپ میں
دل کی وہ خواہشیں تھیں کہ ساری جُھلس گئیں

جلتا رہا میرا تصور بھی رات دن
یادیں ہزار بار تری آ کے ڈس گئیں

خاموشیوں نے قید سزا کو بڑھا دیا
زنجیریں میرے ہاتھ کی کچھ اور کس گئیں

ویران تو رہی نہیں خوابوں کی بستیاں
آزادیوں کے خواب مسلسل سے بس گئیں







ہر طرف جیسے نور نور ہوا
آپ سے سامنا ضرور ہوا

تیرا وعدہ بھی دل کے جیسا تھا
ایک شیشہ تھا چُور چُور ہوا

ٹوٹ کر جو گرا ہے پلکوں سے
وہی آنسو چراغ طُور ہوا

ہر خوشی کر گئی اداس مجھے
درد ہی باعث سرور ہوا

آپ کی مہربانیوں کے طفیل
اپنی تقدیر کا شعور ہوا

جو تھا چاہا وہی تو ہو نہ سکا
جو نہ چاہا وہی ضرور ہوا




غم سوا ہے خوشی نہیں باقی
زیست میں زندگی نہیں باقی

کھیل سانسوں کا ختم ہو جائے
اس میں کچھ دلکشی نہیں باقی

چھُپ گیا آج چاند بھی جلدی
اس میں بھی روشنی نہیں باقی

ایسا بدلا ہے کائنات کا رنگ
اب لبوں پہ ہنسی نہیں باقی

کتنی بنجر سی ہو گئیں آنکھیں
اب تو ان میں نمی نہیں باقی

ڈھل گیا ہے سکوت میں سب کچھ
خامشی بھی نہیں رہی باقی 




دل مرا سوگوار اب بھی ہے
ہاں ترا انتظار اب بھی ہے

آج بھی کوئی بس نہیں چلتا
دل یہ بے اختیار اب بھی ہے

نہ گیا اضطراب کا عالم
کس قدر بے قرار اب بھی ہے

کیا میرے بعد تذکرہ میرا
شامل بزم یار اب بھی ہے

درد تھمتا نہیں کسی صورت
آنکھ یہ اشکبار اب بھی ہے

دشمنی ساری ہم سے کی لیکن
دوستوں میں شمار اب بھی ہے




مجھ سے پوچھو نہ اب پتہ میرا
جانتا ہے مجھے خدا میرا

آخری بار خود کو دیکھا تھا
کب یہ ٹوٹا تھا آئینہ میرا

ایک آواز اب بھی آتی ہے
کوئی تکتا ہے راستہ میرا

کر دیا ہے کھڑا کہاں مجھ کو
کوئی بھی اب نہیں رہا میرا

وہ جھکا تو نہیں سکا لیکن
دیکھ لے اب وہ ٹوٹنا میرا

اس کو منصف بنا کے دیکھ لیا
نہ ہوا کیسے فیصلہ میرا





دل کو پھر بنانے میں وقت چاہیے کچھ تو
کرچیاں اٹھانے میں وقت چاہیے کچھ تو

ساتھ وہ نہیں پل کا عمر بھر کا لگتا تھا
اس کو اب بھلانے میں وقت چاہیے کچھ تو

ہو سکے تو ہم سے بھی سن سکو تو سن لو تم
بات پھر سنانے میں وقت چاہیے کچھ تو

کیا نگہ کی سیرابی ، کیا نظر کی شادابی
آنکھ کو اٹھانے میں وقت چاہیے کچھ تو

فاصلے بڑھانے میں دیر کتنی لگتی ہے
اور قریب آنے میں وقت چاہیے کچھ تو

اس قدر نہیں آساں ، جتنا ہم نے سمجھا تھا
حال دل بتانے میں وقت چاہیے کچھ تو

سب خطائیں ان کی ہم بھول بھی تو سکتے ہیں
پر گلے لگانے میں وقت چاہیے کچھ تو

دیر آشنا تم ہو ، اس قدر بھی جلدی کیا
ہم کو پھر مٹانے میں وقت چاہیے کچھ تو

دردِ دل بڑھانے کو ایک لمحہ کافی ہے
دردِ دل گھٹانے میں وقت چاہیے کچھ تو

تنکا تنکا چُن چُن کر ہم نے جو بنایا تھا
آشیاں جلانے میں وقت چاہیے کچھ تو

زخم جو پرانے ہیں ، ان کو ہم رفو کر لیں
پھر فریب کھانے میں وقت چاہیے کچھ تو

آنکھ کا سمندر سے کچھ عجیب رشتہ ہے
سیلِ غم بہانے میں وقت چاہیے کچھ تو

خاک میں ملانے کا گر ارادہ رکھتے ہو
آسماں گرانے میں وقت چاہیے کچھ تو

نیکیاں ہی کرنے میں عمر جو لگی تم کو
اس کو پھر جتانے میں وقت چاہیے کچھ تو

پھر پلٹ کے جانے کی ہم نہ رکھیں خواہش بھی
کشتیاں جلانے میں وقت چاہیے کچھ تو

جب وجود کا رستہ حد پہ موت کی پہنچے
پار اس کے جانے میں وقت چاہیے کچھ تو

اب لہو کے چھینٹوں کا اس قدر ہے چرچا کیوں
زخم کو چھُپانے میں وقت چاہیے کچھ تو












مری سوچ میں تو نہ آسکیں ، تری نفرتوں کی وہ شدتیں
ترے دھیان میں نہ سما سکیں مری خواہشیں مری چاہتیں

تری آستیں پہ لہو نہیں ، نہ ملال کوئی نگاہ میں
مرے خوں کی پھر بھی گواہ ہیں سبھی کائنات کی وسعتیں

جو بنا گئے ہیں تجھے خدا ، ہیں انہی کے دم سے خدائیاں
کہ مری جبیں کے طفیل ہیں تری سجدہ گاہ کی رفعتیں

مری ذات میں نہیں گھل سکیں ، میرے ذہن پر نہیں کھل سکیں
تری بے جواز عنایتیں ، تری بے جواز عداوتیں

وہی درد جو بھی کسک بنا ، اسے تیرے نام لگا دیا
اسی طور ہم نے تلاش کی ہیں یہ زندگی کی مُسرتیں



عجب کچھ واہموں میں گھِر گئے ہیں
بہت سے دشمنوں میں گھِر گئے ہیں

تلاش ذات بھی باقی نہیں ہے
انا کے بت کدوں میں گھِر گئے ہیں

سیاست دور تک پھیلی ہوئی ہے
گھروں کی سازشوں میں گھِر گئے ہیں

سفینے آملے ساحل سے لیکن
ہوا کے راستوں میں گھِر گئے ہیں

خرد کی منزلیں طے کر چکے جب
جنوں کے مرحلوں میں گھِر گئے ہیں

بہت مختار ہو کے ہم نے دیکھا
بہت مجبوریوں میں گھر گئے ہیں

نہیں کہہ سکتے ہم دشمن بھی جن کو
کچھ ایسے دوستوں میں گھر گئے ہیں


لکھی ہے اس نے بھی جو تقدیر انوکھی
ہم نے بھی اب سوچی ہے تدبیر انوکھی

جس میں کوئی در ہو اور نہ کوئی دریچہ
کر دیں گے اک دن ہم وہ تعمیر انوکھی

دل کے خوں سے رنگ رکھا ہے ہاتھوں کو
بنتی ہے اب دیکھیے کیا تصویر انوکھی

جس نے جا کے روح کو بھی زخمی کر ڈالا
اتری ایسی دل میں اک شمشیر انوکھی

آزادی کی خواہش کیسے کر پائیں گے
باندھی ہے ہم نے بھی تو زنجیر انوکھی

چاک گریباں تک آنے سے کیا حاصل ہے ؟
جوش جنوں کی ہوتی ہے تشہیر انوکھی

خواب بھی آنکھوں تک آنے سے ڈرتے ہیں
کرتے ہیں وہ کچھ ایسی تعبیر انوکھی



پیش ان کے جب مطالب ہو گئے
سارے خدشے جیسے غائب ہو گئے

پہلے تو مقتول کے سب ساتھ تھے
پھر گواہی سے ہی تائب ہو گئے

کس نے دیکھیں قتل کی سچائیاں
سارے منصف اس کی جانب ہو گئے

فیصلوں سے کوئی خوش ہو یا نہیں
فیصلے یہ بھی مناسب ہو گئے

جان دے کر ہی ادا کرتے انھیں
ہم پہ جو احسان واجب ہو گئے

جن کو منصب کی کبھی خواہش نہ تھی
جانے کیسے وہ بھی طالب ہو گئے

پھِر گئے ہیں ہم پھِر تنزل کی طرف
جب توہم ہم پہ غالب ہو گئے

اس سے آگے پھِر کبھی سوچا نہیں
قائل اس لمحے کے صاحب ہو گئے

کس قدر وہ دسترس سے دور ہیں
چاند سورج یا کواکب ہو گئے



محبت میں کمی سی رہ گئی ہے
کہ بس اک بے بسی سی رہ گئی ہے

نہ جانے کیوں ہمارے درمیاں یہ
فقط اک برہمی سی رہ گئی ہے

عجب کچھ سانحہ گزرا ہے ہم پہ
ترے غم کی خوشی سی رہ گئی ہے

سمندر کتنے آنکھوں میں اتارے
دلوں میں تشنگی سی رہ گئی ہے

نہیں چڑھتا ہے اب یادوں کا دریا
مگر اک بے کلی سی رہ گئی ہے

خلش دل میں کوئی باقی ہے اب تک
کہ آنکھوں میں نمی سی رہ گئی ہے

وہی اک بات جو کہنی تھی تم سے
وہی تو ان کہی سی رہ گئی ہے



رفاقتوں کا نیا تم نے خواب کیوں دیکھا
نئے جہان کا روشن سراب کیوں دیکھا

چمن چمن جو کھلے تھے وہ خواب دیکھ کے بھی
مری نگاہ نے تازہ گلاب کیوں دیکھا

سلائی پھیر دے آنکھوں میں یہ سزا دے دے
مری نگاہ نے یا رب وہ خواب کیوں دیکھا

یہ حیرتیں مری آنکھوں میں بس گئیں کیسے
ثواب کو بھی بدلتے عذاب کیوں دیکھا

نگہ نے راز کو اپنے چھپا لیا ہوتا
سوال کر نہ سکے تو جواب کیوں دیکھا






تیری یادوں سے دوستی کر لی
کتنی بے چین زندگی کر لی

تیرے جانے کے بعد ہم نے بھی
خود اندھیرے سے دوستی کر لی

کیا ہوا گر ہمیں قرار نہیں
تو نے تو اپنی ہر خوشی کر لی

پھر کسی در پہ سر جھکا ہی نہیں
آپ کی جب سے بندگی کر لی

ہم نے اپنی خودی کو پا کے ہی
کیسی حاصل یہ بے خودی کر لی




تو جب سے گیا ہو گیا ویران یہ گھر بھی
ہوتا ہے بہاروں میں ہی گر جائے شجر بھی

رہنے کو تو رہتے ہیں کہیں ایک ہی گھر میں
ہوتی ہے مگر اس کو کہاں میری خبر بھی

کھو جائے کسی موڑ پر اے کاش تری یاد
اب یاد تری زہر کا رکھتی ہے اثر بھی

ہر موڑ پہ سوچا تھا کہ واپس ہی چلے جائیں
باقی تھے مگر دل میں بہت شوق سفر بھی

تنہائی کی جھیلوں میں کھلے اب تو کوئی پھول
مل جائے رفاقت کا کوئی ہم کو ثمر بھی 






کربِ تنہائی زیادہ نہیں ہونے پاتا
مجھ کو احساس تمہارا نہیں ہونے پاتا

تجھ کو بھولوں تو یہی آتا ہے رہ رہ کے خیال
میرے زخموں کا مداوا نہیں ہونے پاتا

میرے اندر کا اندھیرا یہ کہاں آ پہنچا
تیری یادوں کا اُجالا نہیں ہونے پاتا

یہ تو ممکن ہے تری آنکھ کبھی بھر آئے
ہم سے ہی دکھ یہ ہمارا نہیں ہونے پاتا

ہر نئی رہ نئی راہوں کا پتہ دیتی ہے
مجھ سے رستوں کا اعادہ نہیں ہونے پاتا




اپنے گنہ کا کس کو یہاں اعتراف ہو
کس کا بیان آج خود اپنے خلاف ہو

دامن ہی آج سب کا یہاں ہے رنگا ہوا
کس کا ضمیر ہے کہ جو شفاف و صاف ہو

ڈھالا ہے خود کو آج زمانے کے رنگ میں
اس راز کا وجود پہ کیا انکشاف ہو

کب درد بن کے اپنی سکونت بنائے گا
وہ تیر جس سے دل میں ہمارے شگاف ہو

اپنے سوا کچھ اور نظر آئے گا کہاں
آنکھوں پہ جن کی لپٹا ہوا اک غلاف ہو

ان سے عداوتوں کے مراسم بڑھا لیے
جن سے ذرا سی بات پہ کچھ اختلاف ہو 





ہم نے خود کو بدل کے دیکھا ہے
سب سے آگے نکل کے دیکھا ہے

ہو گئے اب پرانے سارے خیال
نئے سانچے میں ڈھل کے دیکھا ہے

اس کی ٹھنڈک میں آگ ہے کتنی
ہم نے بارش میں جل کے دیکھا ہے

شمع کے ساتھ ساتھ ہم نے بھی
رات بھر کیوں پگھل کے دیکھا ہے

یہ نہ بھٹکا دے ہم کو منزل سے
راستہ ہم نے چل کے دیکھا ہے

ڈوب جائیں نہ ان کی آنکھوں میں
ہم نے کتنا سنبھل کے دیکھا ہے 


خود کو اس طرح آج شاد کریں
تم کو بھولیں تمہی کو یاد کریں

تم سے ملنا نہیں قیامت تک
فیصلہ یہ بھی آج صاد کریں

رنگ کتنے ہیں تیرے چہرے کے
کس حوالے سے تجھ کو یاد کریں

کر کے احسان ہم پہ نا حق ہی
ہم سے وابستہ وہ مفاد کریں

آگ گھر کی انہیں بھی یاد رہے
شہر میں جو کبھی فساد کریں

آج خود سے ذرا سی دیر ملیں
آج پوری چلو مراد کریں

یاد میں ایک مرنے والے کی
آج محفل کا انعقاد کریں


درد و غم کو زندگی سے یوں شناسا کر دیا
زہر امرت کو کیا ، ہر کرب دونا کر دیا

اب کبھی بہتے نہیں آنکھوں سے میرے اشک غم
قطرہ قطرہ کر کے اس نے دل کو دریا کر دیا

اس نے بخشی ہر سفر میں مجھ کو اک آشفتگی
ہر قدم پر راستے کو اس نے صحرا کر دیا

ہم نے تو دل میں بسائے تیری یادوں کے نگر
تو نے لیکن شہر میں یادوں کو تنہا کر دیا

دوستی کے سارے حق تھے جس کے ہاتھوں میں سدا
دشمنی کا حق بھی اس نے آج چُکتا کر دیا




ضرور کیا وہ تمہیں راز فاش کرنا تھا
کہ اس طرح سے یہ دل پاش پاش کرنا تھا

تمہارا طرزِ تکلم کچھ اور کیا کرتا
لہو کو زہر بدن قاش قاش کرنا تھا

تمہارے دستِ مسیحا کا معجزہ شاید
دل و جگر کو سپردِ خراش کرنا تھا

تمام عمر یہی سوچ کر بسر کر دی
سکونِ جاں کو کہاں پر تلاش کرنا تھا

وہ ایک کام جسے ہم یونہی اٹھا رکھتے
کبھی نہ اس کو کیا جس کو کاش کرنا تھا




یہ اور بات جگر لخت لخت ہو جاتا
اس ایک پل کے لیے دل بھی سخت ہو جاتا

حضورِ شہ سرِ تسلیمِ خم جو کر دیتے
بنا ہے آج جو تختہ وہ تخت ہو جاتا

نصیب کاتبِ تقدیر ہی تو لکھتا ہے
ہمارا لکھا ہوا کیسے بخت ہو جاتا

پھر اس کے بعد سبھی منزلیں ہماری تھیں
یہ حوصلہ ہی سفر کا جو رخت ہو جاتا

اسے بھی چوس گئی زرد بیل فرقت کی
محبتوں کو وہ پودا درخت ہو جاتا 




میری نیندوں میں اُجالے ہیں ترے خوابوں کے
دل میں گُلشن سے مہکتے ہیں تری باتوں کے

سرمئی شام میں رونق سی ہوئی جاتی ہے
قافلے گھر میں اُترتے ہیں تری یادوں کے

میرے ہونٹوں پہ سہی جبر پر اتنا تو بتا
باندھ کے رکھے بھلا کس نے یہ پر سوچوں کے

جانے کس کس سے ہیں آسودہ نگاہیں تیری
درمیاں میں تو نہیں شہر میں ان چہروں کے

جن کے لہجے میں کئی رنگ بدلتے ہی رہے
کیا رہیں گے وہی پابند کبھی وعدوں کے




دل میں تمہارے عکس ہمارا نہیں رہا
ہم کو بھی اب خیال تمہارا نہیں رہا

سود و زیاں کا دونوں کو رہتا رہا خیال
اپنی شکست میں بھی خسارا نہیں رہا

اک بار دیکھنے سے ہی بینائی چھن گئی
اچھا ہوا یہ جرم دوبارہ نہیں رہا

کچھ پر خلوص لوگ بھی راہوں میں مل گئے
رستہ تمہاری یاد میں سارا نہیں رہا

اب زندگی کو تیری ضرورت نہیں رہی
اچھا ہوا کسی کا سہارا نہیں رہا




پیروں میں ہیں زنجیریں ، ہیں لب پہ مرے پہرے
اک خواب تمنا کے ہیں زخم بہت گہرے

انجان نہیں لیکن یہ دوست نہیں میرے
میں ان کو سمجھتی ہوں پڑھ رکھے ہیں سب چہرے

طوفان سے کیا ڈرنا ، طوفاں ہی تو اپنا ہے
ساحل سے کہیں بہتر دریا یہ مرے گہرے

شاید کہ خریدے ہیں احباب نے سب میرے
اک روز نمائش میں رکھے تھے کئی چہرے

بینائی جو دی ہے تو کر چاک سبھی پردے
اس ایک تماشے پر کیا میری نظر ٹھہرے



آپ جب ہم کلام ہوتے ہیں
حوصلے سب تمام ہوتے ہیں

زندگی کے ہزار ہنگامے
رات دن ، صبح و شام ہوتے ہیں

سب کو ہم ایک جا نہیں رکھتے
سب کے اپنے مقام ہوتے ہیں

یاد آتے ہیں کچھ کے کوشش پہ
کچھ کے ازبر بھی نام ہوتے ہیں

خاص ہوتی ہیں بعض باتیں ہی
ورنہ چہرے تو عام ہوتے ہیں

وہی ہاتھوں میں بھی پہنچ پائیں
گردشوں میں جو جام ہوتے ہیں 




اس کا چہرہ کس قدر غم دیدہ تھا
دل تو اپنا بھی بہت رنجیدہ تھا

مل نہ پایا ایک بھی جس کا گواہ
جرم جو بھی ہو گیا پوشیدہ تھا

کون سنتا رمزِ بیداری کی بات
شہر کا ہر آدمی خوابیدہ تھا

وقت سے بھی جو سلجھ پایا نہیں
مسئلہ ایسا بھی کیا پیچیدہ تھا

ایک ہم ہی تو فقط روئے نہ تھے
جو بھی تھا اس شہر میں نم دیدہ تھا

رات کی تنہائی میں تھا خوف کیا
جسم کا اک اک رواں لرزیدہ تھا




ہمارے واسطے گھر میں کہیں اماں بھی نہیں
کہ آستاں بھی نہیں کوئی آشیاں بھی نہیں

"کسے گواہ کروں کس سے منصفی چاہوں"
بجُز خدا کے میرا کوئی رازداں بھی نہیں

یہ میرے دردِ طلب کی ہے کون سی منزل
کہ یہ جہاں بھی نہیں اور وہ جہاں بھی نہیں

انہیں یہ شوق کہ ہر شے کو کر دیں خاکستر
میں خوش ہوں آج میرا کوئی گلستاں بھی نہیں

مقام وہ نہیں آیا کہ میں بھی سچ کہہ دوں
میں بے زباں سہی اتنی تو بے زباں بھی نہیں

تم اپنے قہر کو چاہے بڑھا بھی دو کتنا
یہ وقت اتنا کسی پر تو مہرباں بھی نہیں

روا ہے ظلم کی بستی میں زندگی کرنا
یہ جبرِ صبر نیا کوئی امتحاں بھی نہیں

ان کے تیور بدل گئے ہوں گے
تیر و نشتر بدل گئے ہوں گے

ان کی نظروں کے اک بدلنے سے
کتنے منظر بدل گئے ہوں گے

اتنی مدت کے بعد جانا کیا
وہ گلی گھر بدل گئے ہوں گے

گردشیں ایک سی نہیں رہتیں
سارے محور بدل گئے ہوں گے

جو اُٹھاتے صلیب کاندھوں پر
ہاں وہی سر بدل گئے ہوں گے

اس نگر میں عجیب وحشت ہے
اب مرے ڈر بدل گئے ہوں گے

کر رہے ہوں گے اب بھی وہ سجدے
ہاں مگر در بدل گئے ہوں گے 



ظلمتوں سے نکالتے کیسے
رنگِ ہستی اُجالتے کیسے

یہ بھی اِک پتھروں کی دنیا ہے
شیشہ دل سنبھالتے کیسے

اتنے راہوں کے پیچ و خم اُلجھے
ہم قدم کو سنبھالتے کیسے

ہر خوشی کو سنبھال کر رکھا
پھر اسے غم میں ڈھالتے کیسے

درد کوئی نیا تو دے جاتے
ایک ہی غم کو پالتے کیسے




بات کھونی ہے تو لب پہ بات کا لانا بھی کیا
تنگ جب گھر ہو گیا تو شہر میں رہنا بھی کیا

اب چلو چلتے ہیں ایسے جنگلوں میں جس جگہ
سوچتے رہ جائیں ایسی زیست کا کرنا بھی کیا

وصل کی ہے اب خوشی باقی نہ صدمہ ہجر کا
اب ترا آنا بھی کیا اور اب ترا جانا بھی کیا

خود ہی اپنے آپ کو تنہا نہ کر لینا کہیں
دل کی باتوں کو کسی کے سامنے کہنا بھی کیا

جو کھلے تھے واسطے تیرے محبت کے وہ در
ہو گئے ہیں بند ان پر دستکیں دینا بھی کیا



حکایتیں نہ داستاں ، بچا نہیں کوئی نشاں
انا کے کھیل میں دلوں کا ہو گیا بہت زیاں

نہ جانے بات کیا ہوئی جو آ گئی یوں درمیاں
کہ پھر کبھی نہ چھُٹ سکا غبارِ دل غبارِ جاں

کمالِ درد ہے مگر یہ خامشی عذاب ہے
ملا ہے ایسا غم جسے نہ کر سکیں کبھی بیاں

مُکر گیا تھا وہ تو یوں کہ بن گئی تھی جان پر
کہ مصلحت کے سامنے بدل گیا تھا وہ بیاں

مجھے لہُو رُلائے گی تمام عمر اک خلش
تجھے بھی یاد آئے گا رفاقتوں کا وہ سماں

کبھی تو تم بھی دیکھتے کبھی تو تم بھی سوچتے
یہ جان کیوں سُلگ اُٹھی یہ دل ہوا ہے کیوں دھُواں

جسے کہا تھا زندگی ، جسے کہا تھا ہے خوشی
وہ زندگی وہ اک خوشی نہ بن سکی قرارِ جاں



اپنوں میں مجھے کوئی بھی اپنا نہیں ملتا
اب درد تو ملتا ہے مسیحا نہیں ملتا

دیکھا ہے بہت غور سے ہر شخص کو میں نے
حیراں ہوں بھرے شہر میں تجھ سا نہیں ملتا

قدموں تلے جلتی ہوئی ریتلی زمیں ہے
تپتے ہوئے صحرا میں ہی سایا نہیں ملتا

ملنے کو تو ملتے ہیں کئی لوگ جہاں میں
دل جس سے ملے ایسا شناسا نہیں ملتا

ڈُوبیں تو اُبھرنے کی تمنا نہ ہو پیدا
ایسا بھی کسی ذات کا دریا نہیں ملتا



کیا حسین یادیں تھیں ، کیا حسین باتیں تھیں
کیا عجیب سپنے تھے کیا عجیب راتیں تھیں

کیسا اک تماشا تھا آنکھ نے جو دیکھا تھا
جیت کس طرف کی تھی کس طرف کی ماتیں تھیں

کیسے فاصلے سارے اس طرح سمٹ جاتے
رنگ و نسل کی ساری درمیان ذاتیں تھیں

کیسے ان کو کہہ دیتے ، کیسے ان کو لکھ پاتے
جو چھپائی تھیں ہم نے راز کی وہ باتیں تھیں

ہر محاذ پر تنہا خود کو ہم نے پایا تھا
دشمنوں کی ہر جانب سو طرح کی گھاتیں تھیں



شرار و برق سے ہم تو نئی بنیاد رکھیں گے
کہ خار و خس یونہی ہم کو سدا برباد رکھیں گے

نئی طرزِ ستم وہ بھی اگر ایجاد رکھیں گے
تو ہم اب کے نئی لے نالہ و فریاد رکھیں گے

ہمارے خوں سے لکھی جائے گی تاریخ گلشن کی
ہمیشہ یاد ہم کو دیکھنا صیاد رکھیں گے

رہے امید دل میں یہ بھی کیا ان کا کرم کم ہے
کبھی وہ لطف ہم پر اور کبھی بے داد رکھیں گے

قفس میں یہ نیا آئیں ہمارے بعد ہی ہو گا
کہ بلبل کو اسیری میں بھی وہ آزاد رکھیں گے

کہ سارے فیصلے اپنے انہیں کے ہاتھ میں ہوں گے
کبھی وہ شاد رکھیں گے کبھی نا شاد رکھیں گے

خزاں کا رنگ ہو گا کیوں بھلا فصلِ بہاراں میں 
کہ دل کو ہم تری یادوں سے جب آباد رکھیں گے

وہ جو حادثوں سے سنور گیا
مرا دل بھی کیسے نکھر گیا

تری بات تھی تری یاد تھی
مرا دل جہاں میں جدھر گیا

کوئی خواب تھا کہ عذاب تھا
مری چشمِ تر میں اتر گیا

تری گفتگو میں وہ زہر تھا
ترا لہجہ دل میں اتر گیا

وہ جو ساتھ ہم بھی گزارتے
وہی وقت سارا گزر گیا

یونہی بے سبب تھیں مسافتیں
یونہی رائیگاں وہ سفر گیا

وہی لمحہ ایک جدائی کا
وہی آنکھ میں جو ٹھہر گیا



زیست سے ہم خفا نہ تھے ایسے
کبھی محوِ دعا نہ تھے ایسے

رو دیے کیسے بات بات پہ آج
ہم تو بے حوصلہ نہ تھے ایسے

دشت کی خامشی یہ کہتی ہے
پہلے گھر بے صدا نہ تھے ایسے

ڈوب جائیں ہماری سوچیں بھی
سیل دریا نما نہ تھے ایسے

خامشی مصلحت ہماری تھی
ویسے ہم بے نوا نہ تھے ایسے 






کوئی خواہش کوئی حسرت بھی نہیں
زندگی تیری ضرورت بھی نہیں

بادباں کھول کے بیٹھے ہیں مگر
پار اترنے کی اجازت بھی نہیں

عشق کی آگ جلے بھی کیسے
جب کہ جذبوں میں حرارت بھی نہیں

لوگ ہنستے ہیں ہمارے غم پر
آپ کی اتنی عنایت بھی نہیں

درد اس درجے زیادہ کیوں ہے
اتنی تو ان سے رفاقت بھی نہیں





لکھتے ہوئے قلم بھی جو بے باک ہو گیا
پردہ ہی ان کے چہرے کا سب چاک ہو گیا

ہم حادثے کی زد سے تو محفوظ ہو گئے
اچھا ہے وقت پہ ہمیں ادراک ہو گیا

شیریں سخن کہا تھا جسے ہم نے بھی کبھی
اس کا بھی طرزِ گفتگو سفاک ہو گیا

آئی نہ راس اس کو نئی وضع بھی کوئی
خاکی تھا جسم آج وہی خاک ہو گیا

دل کو یہ آج کس کے دُکھوں نے رُلا دیا
کیسی وہ یاد تھی کہ جو غم ناک ہو گیا




وہ مجھ کو دھوپ میں اک سائبان گر دیتا
اذیتوں کا نیا کوئی پھر سفر دیتا

اُجالا جو مرے دل کی زمیں پہ کر دیتا
اک ایسا مہر ، اک ایسی بھی وہ سحر دیتا

نہ جانے کب سے یونہی پھر رہے ہیں رستے میں
کہ رہ نما کو کوئی جا کے یہ خبر دیتا

میں اس کو بھولنا چاہوں مگر بھلا نہ سکوں
مری دعاؤں میں یا رب تو یہ اثر دیتا

یہ اک شجر جو مرے صبر کی علامت ہے
کبھی تو اس پہ بھی یا رب کوئی ثمر دیتا




سارے چہرے سارے رشتے سارے در انجان ہوئے
ہم تو جیسے اپنے گھر میں آپ ہی اب مہمان ہوئے

سارے منظر چُپ چُپ ہیں اور ساری فضائیں ہیں خاموش
شہر کی ساری گلیاں سونی رستے سب سنسان ہوئے 

ایک زمانے تک جو میرے زخموں کا ناسور بنے
وہی حوالے کیا اب میری ذات کی سب پہچان ہوئے 

ریزہ ریزہ چُن چُن کر ہی جن کو ہم نے رکھا تھا
خوابوں کے وہ آنکھ دریچے یکدم ہی ویران ہوئے

زخم ہی مرہم بن جاتے ہیں جتنے زیادہ ہوتے ہیں
درد لگا کر دل سے رکھے درد ہی سب درمان ہوئے




دل کے زخموں کی ہے صورت کیسی
مل گئی ہے ہمیں دولت کیسی

غم ہی اک زندہ حقیقت اے دل
قصہ کیسا یہ حکایت کیسی

ہم بچھڑ جائیں تو اچھا ہی ہے
ساتھ رہنے سے محبت کیسی

تو نے منہ پھیر کے دیکھا بھی نہیں
آ گئی تجھ میں مروت کیسی

سانس لیتے ہوئے ڈر لگتا ہے
ہو گئی ہے مری حالت کیسی







اپنی زباں سے جب بھی ادا حرفِ حق ہوئے
چہرے پھر ان کے دیکھیے کس طرح فق ہوئے

ہیں موشگافیاں جو بہت قال و قیل کی
آساں سے فلسفے بھی ہمارے ادق ہوئے

اب پڑھ کے کیا کرے گی انہیں نوجوان نسل
اسلاف کے اُصول تو کہنہ ورق ہوئے

وہ جن کے دم سے رونقیں بزمِ طرب کی تھیں
وہ آج مل گئے ہیں تو وجہ قلق ہوئے

چہرے پہ جیسے قوس ِ قزح سی بکھر گئی
آنکھوں کے رنگ آج مثالِ شفق ہوئے



کسی طرح تو درِ دل پہ دستکیں دیتے
خیالِ سوق کو کچھ اور وحشتیں دیتے

ترے خیال ، تری چاہتوں کی خواہش میں
خود اپنے آپ کو ہم تو اذیتیں دیتے

بھلا ہو ا کہ اُجڑ ہی گیا یہ گوشہ دل
تمہاری یاد کو کب تک یہ زحمتیں دیتے

مٹا دیا ہے بھلا نقشِ پا کو کیوں اپنے
ہمارے سجدے اسے اور عظمتیں دیتے

کچھ اور رنگ بہاروں کا بھی نکھر جاتا
ہم اپنے خون سے گلشن کو رونقیں دیتے



نیند بھی ایک خواب ہے اب تو
اک مسلسل عذاب ہے اب تو

یہ اندھیروں میں بھی چمکتا ہے
اشکِ غم آفتاب ہے اب تو

کوئی لمحہ خوشی کا کیا ہوتا
ایک اک پل عذاب ہے اب تو

کیا کریں جان کر بھی اب کچھ اور
آگہی بھی عذاب ہے اب تو

اک کسی کا فریب کیا کھائیں
اپنی ہستی سراب ہے اب تو

الجھے الجھے سے لفظ ہیں سارے
زیست مبہم کتاب ہے اب تو

اک مرے پاس سب سوالوں کا
خامشی ہی جواب ہے اب تو


اچانک ایسے جل تھل ہو گئے کیوں
کہ صحرا سارے جنگل ہو گئے کیوں

قدم اس طرح سے شل ہو گئے کیوں
سہارے اتنے بوجھل ہو گئے کیوں

نہیں تخفیف ان میں اک ذرا سی
یہ غم اتنے مسلسل ہو گئے کیوں

تری قربت کے وہ سارے زمانے
سمٹ کر ایک ہی پل ہو گئے کیوں

انہیں اتنے دنوں کے بعد دیکھا
خوشی میں پھر یہ بے کل ہو گئے کیوں 




آسرا ایک پر کا باقی ہے
حوصلہ تو سفر کا باقی ہے

دھوپ ہی دھوپ تو نہیں رہتی
ایک سایا شجر کا باقی ہے

مل ہی جائے گا اب نشان کوئی
رنگ اُجڑے کھنڈر کا باقی ہے

نہ مٹائے ہوا کے قدموں نے
نقش ہر رہ گزر کا باقی ہے

بات کا زخم بھر گیا لیکن
داغ اب بھی جگر کا باقی ہے

آس اب بھی نہیں گئی دل کی
اک ستارہ سحر کا باقی ہے



تمہارے ساتھ سفر کی صداقتیں بھی گئیں
جنونِ عشق کی ساری حکایتیں بھی گئیں

تمہارے بعد رہی رُت عجیب گلشن کی
وہ چھاؤں بھی تو گئی وہ تمازتیں بھی گئیں

قدم قدم پہ تھیں بکھری پڑی ہوئی یادیں
چلی سموم تو دل کی امانتیں بھی گئیں

عجیب قحط پڑا اب کے سال ہم پر بھی
بصارتیں بھی گئیں اور سماعتیں بھی گئیں

ہر ایک رشتہ ہر اک ربط تم سے ٹُوٹ گیا
محبتیں بھی گئیں وہ عداوتیں بھی گئیں

کہ منزلوں کا کوئی بھی نشاں نہیں ملتا
سفر میں رائگاں اپنی مسافتیں بھی گئیں

تمہاری دید کا منظر بدل گیا جب سے
تمہاری ذات کی ساری شباہتیں بھی گئیں

) بہ زمیں سحر انصاری(


کہاں پہ چاک گریباں کو ہم رفو کرتے
کہ اس طرح سے یہ دل اور بھی لہو کرتے

سراغ اپنا کہیں ہم بھی جا کے پا لیتے
تمام عمر گئی یہ ہی جستجو کرتے

بصارتوں نے لبوں کو سکوت بخشا ہے
کہاں تھی تاب کبھی ان سے گفتگو کرتے

نمازِ عشق بھلا وہ ادا بھی کرتے کیا
تمام عمر ہی گزری جنہیں وضو کرتے

کہ عکس اس کا بھی حیران ہی تو رہ جاتا
گر آئینے کو بھی ہم اپنے روبرو کرتے

سفر حیات کا اب تو تمام ہو جاتا
کہاں تک اس کی طلب اور کو بہ کو کرتے

یہ ایک زخمِ تمنا سدا ہرا رکھے
اسی کی ہم تو رہے خواہش نمو کرتے

ہمارے اپنے قلم نے ہمیں زباں دی ہے
"زبانِ غیر سے کیا شرحِ آرزو کرتے" 


صحرا میں چھاؤں کا کوئی منظر نہیں ملا
یادوں کی ریت تھی کہ سمندر نہیں ملا

یوں تو ہزار سائے رہے اپنے ساتھ ساتھ
خواہش تھی جس کی دل کو وہ پیکر نہیں ملا

محرومیوں کے راستے اس درجہ سخت تھے
سایا بھی دھوپ کا کوئی سر پر نہیں ملا

کیسے یہ قربتوں میں رہے اتنے فاصلے
اک شخص آج بھی مجھے مل کر نہیں ملا

حاصل رہی ہے دشت نوردی کی زندگی
گھر ہی میں رہ کے ہم کو کبھی گھر نہیں ملا

یہ وار کس طرح سے کیا تو نے ہمنشیں
تیرے تو ہاتھ میں کوئی خنجر نہیں ملا

جو خود ہوا بلند ستم گر کے سامنے
پھر اس کے بعد تن پہ وہی سر نہیں ملا

سارے چہرے بھول چکے ہیں ایک وہ چہرہ یاد رہا
یاد کا جنگل ، غم کا بادل ، دکھ کا صحرا یاد رہا

اپنی ساری باتیں تو میں اک اک کر کے بھول چکی
اس کی صورت اس کی باتیں اس کا لہجہ یاد رہا

سارے رستے جاتے جاتے اور طرف کو جا نکلے
اس کی جانب جانے کا پھر کوئی نہ رستہ یاد رہا

جو بھی اس نے گھاؤ دیے ہیں رکھا ان کو اپنا کر
جو بھی اس نے وار کیا ہے زخم وہ گہرا یاد رہا

خون کے رشتے زہر میں بجھ کر دل میں اترتے جاتے ہیں
کتنے رشتے یاد تھے لیکن کون سا رشتہ یاد رہا

خاک اُڑتی ہے یادوں کی اب دل کے سونے آنگن میں
خالی گھر کے سناٹے کو تیرا جانا یاد رہا

اب تو یہ بھی یاد نہیں ہے بھول گئے ہیں کیا کیا کچھ
تم اب پوچھنے کیوں آئے ہو ہم کو کیا کیا یاد رہا


بہتے ہوئے پانی میں روانی ہی کہاں تھی
بیتے ہوئے موسم کی نشانی ہی کہاں تھی

ہجرت کا وہ اک دور جو آغاز ہوا تھا
اس میں کششِ نقل مکانی ہی کہاں تھی

اظہار کا یہ کھیل تو الفاظ کا نکلا
اس بحث میں تشکیل معانی ہی کہاں تھی

اک تندی سیلاب کا باعث بھی جو ٹھہری
آنکھوں کی فقط اشک فشانی ہی کہاں تھی

اک خواب کا عالم تھا کہ وہ عرصہ ہستی
ہم یاد بھی رکھتے وہ کہانی ہی کہاں تھی

جس بات کا سننا تمہیں منظور نہیں تھا
ہم کو بھی وہی بات سنانی ہی کہاں تھی




کہاں ہوں میں اور کہاں نہیں ہوں
جہاں ہو تم میں وہاں نہیں ہوں

وجود سے میرے ہو نہ منکر
میں اک یقیں ہوں گماں نہیں ہوں

میں حوصلہ ہوں خود زندگی کا
میں کوئی بارِ گراں نہیں ہوں

سکوں کی منزل ہے دل سراپا
میں کوئی آتش فشاں نہیں ہوں

نہ گوشوارے میں مجھ کو لکھو
حسابِ سود و زیاں نہیں ہوں

مرے ہی دم سے شعورِ ہستی
فقط میں رنگِ جہاں نہیں ہوں



اس طرح کیوں اداس ہے کوئی
تجھ سے ملنے کی آس ہے کوئی

جس کو سایہ سمجھ رہے ہیں ہم
دھوپ کا یہ لباس ہے کوئی

یہ جو دیوار گھر میں اُٹھی ہے
فاصلوں کی اساس ہے کوئی

وہ بھی اک تھا خیال کے جیسا
یہ بھی اپنا قیاس ہے کوئی

میری آنکھوں میں اس کے آنسو ہیں
اس طرح دل کے پاس ہے کوئی

درد کے اک سبق سے ہستی کے
اخذ یہ اقتباس ہے کوئی

باریابی نہ پا سکے شاید
پیکرِ التماس ہے کوئی

زندگی کے صحرا میں کچھ نشاں نہیں ملتے
راستے تو ملتے ہیں کارواں نہیں ملتے

مامتا کی چھاؤں کی قدر جو نہیں کرتے
دھوپ ان کو ملتی ہے سائباں نہیں ملتے

عمر بھر سفر ہی تو پھر نصیب ہوتا ہے
گھر سے جب نکل جائیں آشیاں نہیں ملتے

اپنی اپنی دنیا میں کھو گئے ہیں ہم دونوں
تم جہاں پہ ملتے ہو ، ہم وہاں نہیں ملتے

دین ہو کہ یہ دنیا رائیگاں ہی ٹھہرے ہم
مفت میں تو یہ آخر دو جہاں نہیں ملتے

فیصلے کے لمحے میں عدل کرنا مشکل ہے
چشم دید لوگوں کے کیوں بیاں نہیں ملتے

درد کی کتابوں میں ، ہاتھ کی لکیروں میں
ہم نے پا کے دیکھا ہے غم کہاں نہیں ملتے

مجھے گنوا کے سدا وہ بھی وحشتوں میں رہا
خود اپنی ذات کی ویران خلوتوں میں رہا

نہیں کسی کو نہیں اپنے حال سے نسبت
نہیں شریک کوئی بھی صعوبتوں میں رہا

یہ بات طے تھی کہ اک دن بچھڑ ہی جانا ہے
تمام عمر یہ دل کیسی حسرتوں میں رہا

کسی کے دھیان میں کھو کر گنوا دیے لمحے
کہ فرقتوں کا کوئی قرض قربتوں میں رہا

نظر میں ٹھہر گیا عکس جاوداں بن کر
وہ ایک چہرہ جو اک پل بصارتوں میں رہا

وہ اک خیال سے آگے مثال کی دنیا
کہ نقشِ وہم ہی رہبر تھا ، راستوں میں رہا

وہ مجھ کو بھول کے زندہ رہا تو یہ جانا
کہ بھولنا تو سدا اس کی عادتوں میں رہا

رات دن گردشوں میں رہتے ہیں
کچھ عجب سلسلوں میں رہتے ہیں

اک کرن بھی نہیں اُجالے کی
کس طرح ظلمتوں میں رہتے ہیں

فاصلے کس قدر ہوئے پیدا
جب سے ہم قربتوں میں رہتے ہیں

اپنی خوش فہمیوں میں ہیں جیتے
ہم سبھی جنّتوں میں رہتے ہیں

گھوم پھر کر وہیں پلٹ آئیں
ایسے کچھ دائروں میں رہتے ہیں

خود سے آگے نظر نہیں آتا
ایسے کچھ منظروں میں رہتے ہیں

بے گھری ہی ہمارا گھر ٹھہری
ہم بھی اپنے گھروں میں رہتے ہیں



زخموں کی تحریروں کو ہم بھی پڑھتے ہیں
یادوں کے ان پھولوں کو ہم بھی چنتے ہیں

ماضی کے افسانوں کو ہم بھی سنتے ہیں
بھیگی بھیگی شاموں کو ہم بھی روتے ہیں

روشن روشن لمحوں کو ہم بھی گنتے ہیں
خوابوں کی تعبیروں کو ہم بھی لکھتے ہیں

اپنے پرائے چہروں کو ہم بھی تکتے ہیں
درد کے خونی رشتوں کو ہم بھی سوچتے ہیں

جھوٹے سچے وعدوں کو ہم بھی ہنستے ہیں
تیری ساری باتوں کو ہم بھی روتے ہیں





چمن چمن کوئی یادِ بہار باقی ہے
کہ اب تو ایک دلِ بے قرار باقی ہے

چلی یہ کیسی ہوا ، آس کے چراغ بُجھے
اس ایک دل میں ابھی انتظار باقی ہے

دلوں کا راستہ بھولی ہوائے عجز و وفا
یہاں پہ اب تو جفا کا غبار باقی ہے

ہمارے گھر میں تو چھائی ہے ایک وحشت سی
ہمیں ہے کیا جو چمن میں بہار باقی

تیرے خیال کو تیرے لبوں پہ آنے تک
نہ جانے کتنا ابھی انتظار باقی ہے




ہر درد یہ کہتا ہے ، دوا بن جاؤں
ہر زخم یہ کہتا ہے ، شفا بن جاؤں

آہیں نہ رہیں مری اثر سے خالی
ہر حرف یہ کہتا ہے ، دعا بن جاؤں

پیاسا نہ رہے کوئی مسافر سرِ دشت
ہر اشک یہ کہتا ہے ، گھٹا بن جاؤں

مظلوم کے لب پر نہ رہے قفلِ سکوت
ہر لفظ یہ کہتا ہے ، نوا بن جاؤں

انسان کی طینت ہے جدا سب سے یہاں
ہر شخص یہ کہتا ہے ، خدا بن جاؤں





دکھ سے خوشیاں کشید کرنا ہے
اس طرح ہم کو عید کرنا ہے

اپنے ہاتھوں سے دیں گے خود ہی کفن
خود ہی دل کو شہید کرنا ہے

اس کا کہنا ہے مدّتوں کے بعد
نئے وعدے وعید کرنا ہے

تجھ سے ملنا ہے اب خیالوں میں
تیری خوابوں میں دید کرنا ہے

اتنی جلدی نہ کر مروت میں
ظلم مجھ پہ مزید کرنا ہے




چمن چمن پہ وہی حیرتیں سی ہیں طاری
خزاں کے بعد بہاروں کا سلسلہ جاری

چمکتے ہیں سبھی چہرے مگر نہ جانے کیوں
خلوص سے ہیں یہاں پر تمام دل عاری

تمہاری جیت پر ہم خوش ہوئے مگر بازی
جو سچ کہو تو بھلا آج کس نے یوں ہاری

چلو سناتے ہیں تم کو ذرا یہ رات کٹے
کہ آج دل پہ ہے اک بوجھ سا یہ کیوں بھاری

لبوں پہ بات نہیں آئی اور نہ آئے گی
کہ اپنی ذات کسی پر ہے ہم نے کیوں واری




یہ دستِ دعا اتنا بھی حیران نہیں تھا
شاید کہ اثر کا کوئی امکان نہیں تھا

لمحے تو سبھی زہر کے تیروں میں بجھے تھے
یوں پہلے پہل بھولنا آسان نہیں تھا

دنیا نے تو دانست میں اپنی یہی سمجھا
پتھر جو ہوا ہے کبھی انسان نہیں تھا

تو یاد بھی کرتا یہ گوارا ہی کہاں ہو
میں خوش ہوں مری ذات پہ احسان نہیں تھا

خوشیوں کے اترتے تھے کبھی قافلے یاں بھی
اس طرح سے گھر میرا تو ویران نہیں تھا



ہم سفر کہیں جس کو اجنبی سا لگتا ہے
اک پل کا قصہ بھی اک صدی سا لگتا ہے

وہ جو اک رفاقت تھی اب کہاں رہی باقی
عمر بھر کا رشتہ بھی دو گھڑی سا لگتا ہے

جیسے اک تھکن کوئی جسم و جاں میں اتری ہے
قربتوں کا اک اک پل تشنگی سا لگتا ہے

کیسا یہ اندھیرا سا چھا گیا ہے آنکھوں پر
روشنی کا ہر رستہ تیرگی سا لگتا ہے

خود کو میں نے پایا ہے اپنے آپ کو کھو کر
بے خودی کا ہر لمحہ آگہی سا لگتا ہے

بس اسی میں جی جائیں اور اسی میں مر جائیں
موت کا نظارہ بھی زندگی سا لگتا ہے 




خاموش نظر آتے ہیں کیوں سر و سمن آج
خوابیدہ سا لگتا ہے یہ پورا ہی چمن آج

تاریک فضائیں ہیں مرے گلشنِ جاں کی
بھولے سے بھی آتی نہیں کوئی بھی کرن آج

ہر بات پہ اپنی جو مُکر جاتے ہیں ان کے
دیکھے ہوئے ہم نے تو ہیں سارے ہی چلن آج

سمجھے تھے جنہیں مرگِ تمنا کی علامت
پیرایہ ہستی ہیں وہی دار و رسن آج

یونہی رہیں باقی مرے گلشن کی بہاریں
شاداب رہے کل بھی میرا ہے جو وطن آج

راہیں تو ہیں دشوار مگر دل کو یقیں ہے
لے جائے گی منزل پہ جو دل میں ہے لگن آج





اب تو ہر غم ہی ردا ہو جیسے
ورنہ توہینِ وفا ہو جیسے

در کے کھُلتے ہی یہ محسوس ہوا
سامنے تُو ہی کھڑا ہو جیسے

ہے وہ ملنے سے گریزاں شاید
مجھ سے ہی کوئی گلہ ہو جیسے

کتنی مبہم ہے تری خاموشی
ایسا لگتا ہے خفا ہو جیسے

چاک ہوتی رہی رفتہ رفتہ
زیست کانٹوں کی قبا ہو جیسے




زخم آنکھوں میں اتر آئے ہیں گہرے کیسے
خواب دیکھے تھے کبھی ہم نے سنہرے کیسے

یہ بھی کیا بات ہے سچ ان کو سنانا مشکل
آئینہ دیکھ بدل جاتے ہیں چہرے کیسے

بال و پر سارے کتر کے وہ ہمارے خوش ہیں
سوچ پہ پھر بھی بٹھا پائیں گے پہرے کیسے

اب تو غیروں کی شکایت بھی نہیں کر سکتے
زخم اپنوں کے لگے دل پہ یہ گہرے کیسے

زیست کا کربِ مسلسل بھی عطا ہے اس کی
دل کسی بات پہ ٹھہرے بھی تو ٹھہرے کیسے




بے صدا سوز سے یا ساز سے کیا کرنا ہے
ہم کو اس درد کی آواز سے کیا کرنا ہے

تم کو ہے ہی نہیں انجامِ گلستاں کی خبر
اتنے ہنگامہ آغاز سے کیا کرنا ہے

جبکہ آزادی کی صورت ہی نہیں ہے کوئی
صرف اک حسرتِ پرواز سے کیا کرنا ہے

وہ تو کر ہی نہیں سکتی ہے ہماری پُرسش
پھر تری چشمِ فسوں ساز سے کیا کرنا ہے

جب ترے دل کو ہی احساس نہیں ہے کوئی
پھر پشیمانی کے انداز سے کیا کرنا ہے

جو کبھی وجہ سکوں ہی نہ بنے تو اے دل 
ہم کو اس دیدہ غمّاز سے کیا کرنا ہے



کبھی جب اپنا وہ لہجہ ذرا بدلتا ہے
مرے خیال کا اک سلسلہ نکلتا ہے

یہ ظلمتیں ہیں ، یہ آخر کبھی تو کم ہوں گی
یہی اندھیرا تو پھر روشنی اُگلتا ہے

اک آگ سی کوئی آنکھوں میں جل رہی ہے کیا
کہ آنسوؤں سے میرا دل بھی اب پگھلتا ہے

یہ راستہ تو ہے تنہائیوں کا اب لیکن
نہ جانے کون مرے ساتھ ساتھ چلتا ہے

بس ایک چہرہ تری یاد کا جو ہے باقی
سو وہ بھی اب تو مرے آنسؤں میں ڈھلتا ہے

بساطِ عشق پہ بازی ہمیشہ ہے اس کی
وہ اس کمال سے چاہت کی چالیں چلتا ہے




روشنی سے ہو گی اب تابندگی کیا
زندگی کو مل سکے گی زندگی کیا

کر گئی ہے اجنبی لوگوں سے سارے
ہم کو اک یہ شہر کی باشندگی کیا

چاند سورج مل کے بھی تو کر نہ پائے
ایک تارے سے رہے رخشندگی کیا

ہے مسلسل جہد کا باعث حیات
ایک کوشش سے ملے پائندگی کیا

کیا مداوا کر سکیں گے اشکِ غم
زخم دھو دے گی تری شرمندگی کیا

ہو گی اب ثابت مری لوحِ جبیں پر
ایک سجدے کے نشاں سے بندگی کیا




بے سبب اشک بہانا کیا ہے
اس طرح دل کو دکھانا کیا ہے

چاند کو یوں نہ مسلسل دیکھو
اپنی آنکھوں کو تھکانا کیا ہے

رتجگوں سے بھی ہوا کیا حاصل
نیند راتوں کی گنوانا کیا ہے

ایک پھیکی سی ہنسی ہنس کر ہی
بھید یوں دل کا چھپانا کیا ہے

کتنے موسم تھے کہ اب جا بھی چکے
اب صدا دے کے بلانا کیا ہے

جبکہ ملنی ہی نہیں منزلِ شوق
خاک رستوں کی اُڑانا کیا ہے





مجبور براہین و دلائل نہ ہوا تھا
دل اپنا کسی بات پہ قائل نہ ہوا تھا

یوں دیکھے ہیں اس دل نے زمانے کے بہت رنگ
لیکن یہ کسی رنگ پہ مائل نہ ہوا تھا

ہے پھول میں یہ کیسی چبھن کون بتائے
پہلے تو کبھی خار سے گھائل نہ ہوا تھا

چاہا تھا بہت ہم نے مداوائے غمِ دل
کیا تھا اثرِ زہر کہ زائل نہ ہوا تھا

ساحل پہ ہوئے آج یہ کیوں غرق سفینے
طوفاں تو کوئی سامنے حائل نہ ہوا تھا

یہ سوچ کے آتا ہے ترے در پہ زمانہ
در سے ترے واپس کوئی سائل نہ ہوا تھا 





جب ہم کو اپنے قتل کے دعوے قبول تھے
پھر قاتلوں کے کس لیے چہرے ملول تھے

تھا جھوٹ بھی تو جن کے لیے مصلحت کا نام
ان کی منافقت کے بھی اپنے اصول تھے

چلتی ہوا کے ساتھ کہیں ہو گئے تھے گُم
جو راہ میں ملے تھے وہ راہوں کی دھول تھے

جن کو شمار کرتے رہے مدتوں سے ہم
وہ سارے لمحے وقت کی جیسے کہ دھول تھے

کل تک جو خود بہار کا موسم بنے رہے
دامن میں ان کے آج نہ کانٹے نہ پھول تھے




قطعہ

مرا سکوں مرا صبر و قرار تم سے ہے
مری حیات مرا اعتبار تم سے ہے
تمہی کو دیکھ کے آنکھیں مری ہوئی روشن
مرے حسین چمن کی بہار تم سے ہے


قطعہ

غمزدوں کا قرار کون بنے
بے کسوں کی پکار کون بنے
جس میں اندیشہ خزاں ہی نہ ہو
وہ مکمل بہار کون بنے




چھایا ہے اک سکوت سا اس کائنات میں
برپا ہے پھر بھی شور یہاں شش جہات میں





۔۔۔۔ اختتام ۔۔۔۔۔

ٹائپنگ: سیدہ شگفتہ، پروف ریڈنگ اور ای بک کی تشکیل: اعجاز عبید
