﻿


شکستہ لہجوں میں



رفیق اظہر


جمع و ترتیب: اعجاز عبید










تھک گیا زندگی کی راہوں میں
جا کے رہتا ہوں بیٹھ قبروں میں

ہے یہ موت و حیات کا برزخ
ہم نہ زندوں میں اور نہ مُردوں میں

مرنے والا بھی مرثیہ خواں بھی
اڑ گئے سب کے سب ہواؤں میں

چاند سورج یہاں کے دیکھ لئے
یہ بھی ہیں ڈوبتے خداؤں میں

کششِ ثقل کھینچتی ہے کوئی
روح بولے شکستہ لہجوں میں

بیٹھ کر موت کے پروں پہ کوئی
ہوا معدوم کائناتوں میں




یہ جو ماتم کدہ جہاں کا ہے
ایک منصوبہ آسماں کا ہے

دھوپ آنکھوں سے ہو گئی اوجھل
ذکر کیا عمرِ رائیگاں کا ہے

ہم اچانک نہیں یہ مل بیٹھے
یہ کراں سے سفر کراں کا ہے

کون اَرجُن کماں پہ ہے بیٹھا
سب پتا تیر کو نشاں کا ہے

روز چلتی ہے موت کی آندھی
جا بجا شور نوحہ خواں کا ہے

کئی ارواح آتی جاتی ہیں
یہ جو رستہ سا کہکشاں کا ہے

گِر نہ جائے خلا میں یہ دھرتی
ڈر مجھے تیرے خاکداں کا ہے

رُوح قیدی ہو جسم کی کیسے
یہ پرندہ تو لامکاں کا ہے




موت میں ہے سکوں قرار بہت
وہ سکوں جو ہے پائیدار بہت

اتنا پانی کہاں سے آتا ہے
آنکھ رہتی ہے اشک بار بہت

راستہ بھُول بھُول جاتا ہوں
آنکھ رہتی ہے پُر غبار بہت

مرگ و ہستی کی دھُند میں بیٹھا
دیکھتا ہوں میں آر پار بہت

باغِ دنیا جسے کہے ہے خلق
جھاڑیاں ہیں یہ خاردار بہت

شہر سے دور مقبروں سے گزر
خامشی ہے یہ پُر وقار بہت

کسی اپنے عزیز کا ماتم
چھیڑتا ہے غموں کے تار بہت




میں اسے زندگی سے ڈسواتا
کاش ہوتا اجل کا اِک بیٹا

تن کو بھونا زمیں کے شعلوں پر
میں نے دوزخ سے اپنا رزق لیا

یہ زمیں گندگی کا ڈھیر بھی ہے
تو فقط باغ میں پھرے بہکا

"لہو اپنا پیوں ہُوں جیتا ہوں"
میں نے چھاتی کو میر* سے کُوٹا

زندگی ہے کہ چھاؤں کیکر کی
جل گیا ہوں میں سائے میں بیٹھا

میرے حصّے کی ہے زمین کدھر
اے اَجل رہنمائی تو کرنا

گھُورتی ہے خدا کی آنکھ مجھے
میں نے آدم کا مرثیہ لکھا

* میر تقی میر





قبر کا کوئی در نہ دروازہ
کیا سنے گا وہ میرا آوازہ

کِھنڈ گئی تن پہ موت کی زردی
زندگانی ہے عارضی غازہ

مَر کے بیمار نے کیا آرام
طے ہوا کشمکش کا خمیازہ

دفن کرتے ہیں موتیوں کو لوگ
داب آئے ہیں ہم گُلِ تازہ




ہر نئی موت پر ہی ڈر جائیں
کیوں نہ سب ایک بار مر جائیں

رفتنی ہیں یہاں کے لوگ تمام
رفتہ رفتہ گزر گزر جائیں

مانگتے ہیں کوئی خلا خالی
تا یہ وحشی بکھر بکھر جائیں

مانگ لیتا ہوں پھر کوئی صحرا
جب یہ دیدے لہو سے بھر جائیں

غم ترے ہیں چمکتے سیّارے
جن دلوں پر بھی یہ اتر جائیں

تو ہی کہہ تیرِ نیم کش کے ترے
اب یہ زخمی ہرن کدھر جائیں

دفن تو تعزیہ ہوا کب کا
اب عزا  دار اپنے گھر جائیں






ہر گھڑی جاں بلب ہی رہتا ہے
دل دھڑکتا نہیں تڑپتا ہے

ہے قبیلے پہ بے حسی طاری
جیسے مردہ ہے اور سنتا ہے

پاؤں زخمی تلاشِ گندم میں
سانپ یہ ایڑیوں پہ ڈستا ہے

ہے اجل گھات میں ترے بھی اب
تُو جو پیہم شکار کرتا ہے

صبر آتا ہے صبر کرنے سے
دل سنبھالے ہی سے سنبھلتا ہے

کوئی آنکھوں سے دے گیا پانی
قبر پر پھول لہلہاتا ہے




ہیں کھنڈر میں کمال کی اینٹیں
دیکھ عہدِ زوال کی اینٹیں

مقبرے ہوں کہ سانس لیتے گھر
ہیں یہ خواب و خیال کی اینٹیں

کرے مجنوں خطاب دنیا سے
پھینکتا ہے سوال کی اینٹیں

تن ہے دیوارِ گریہ کے مانند
لال آنکھیں ، ملال کی اینٹیں

ہاتھ سے پیٹتا ہوں زانو کو
میں نے ڈھالی ہیں کھال کی اینٹیں

ہے یہ تھیٹر گزرتی دنیا کا
ہم تو ہیں ماہ و سال کی اینٹیں

گاڑ کر خاک میں تنِ مردہ
جوڑتا ہوں وصال کی اینٹیں






زندگی کی اساس کچھ بھی نہیں
یہ جو ہے آس پاس کچھ بھی نہیں

پھول مرجھا گئے محبت کے
اب کسی شے کی باس کچھ بھی نہیں

سو گئی ہے کہ مر گئی قُمری
نم زدہ آج گھاس کچھ بھی نہیں

کبھی اہلِ جنوں بنے سنورے
کبھی تن پر لباس کچھ بھی نہیں

ہر یقین و گماں ہے لاحاصل
واہمہ ہے قیاس کچھ بھی نہیں

پھروں روٹھا ہوا ہی کعبے میں
اب سپاس ، التماس کچھ بھی نہیں




مر گیا ہوں میں ایک فرضی موت
غم ترا ہے مجھے تو آدھی موت

ہنستے ہنستے گری پہاڑی پر
رات بارش میں تھی چمکتی موت

ہم تو آگے مَرے سے پھرتے تھے
غم نصیبوں کو ہے یہ دہری موت

اڑتا پھرتا ہے راکشس کوئی
جہاں چاہا وہاں پہ تھوکی موت

کاٹ ڈالے سروں کے سر پَل میں
نیشکر آدمی، درانتی موت

تُو نے پتھر سے بھائی کو مارا
میں نے بندوق سے چلائی موت

مِلے آدم کا مقبرہ جو کہیں
جا کے دیکھوں میں اپنی پہلی موت




اے خدا پاؤں ڈال دوزخ میں
آگ دنیا کی ہم یہ کیا پھانکیں

کھلیں آنکھیں ہزار سال کے بعد
آؤ مل کر حنوط ہو جائیں

روتے روتے کبھی تو وہم اٹھا
پھر سمندر میں ہم نہ مِل جائیں

مار ڈالے اگر اجل کو، تُو!
اے خدا تیرے پاؤں بھی دابیں

موت کو موت آئے گی اِک دن
آپ اہلِ زمیں نہ گھبرائیں

آؤ کرتے ہیں موت کی باتیں
غم کے پاتال میں ذرا جھانکیں

کریں خالی مکان یہ اپنا
لامکاں کو کہیں نکل جائیں

گھڑی کھولیں کلائی سے اپنی
اور زماں کے بھنور میں پھینک آئیں

اب کے ٹوٹے شہابِ ثاقب تو
اُس کے پیچھے ہوا میں اڑ جائیں

اب کے آتش فشاں پھٹے تو کہیں
موت کی روٹیاں پکا کھائیں

میٹھے کڑوے یہاں کے پانی کو
آخری گھونٹ کیوں نہ پی جائیں

زہر پی کر امر ہوا اک شخص
کیوں نہ ہم بھی کوئی پُڑی پھانکیں

ہم نے مر مر کے زندگی کاٹی
ہم سمجھتے ہیں موت کی گھاتیں

کوئی سویا، تو رہ گیا سوتا
بس کہ لمبی ہیں موت کی راتیں

کئی گولی کی زد میں آ کے مرے
چار جانب بکھر گئیں لاشیں

اک صدا سینی ٹوریم سے اٹھی
پانچ نمبر کو آؤ داب آئیں

بہہ گیا پانیوں میں کوئی جہاز
لے کے کمپاس ڈھونڈتا راہیں

مرنے والے نے سادھ لی ہے چُپ
ہم تو زندہ ہیں ہم تو کُرلائیں



یہ تو ہونا ہی ہے کبھو نہ کبھو
پہلے میں چل بسوں کہ پہلے تُو

گوندھی جائے گی پھر تری مٹّی
پھر کسی چاک پر چڑھے گا تُو

دوستی، دشمنی کے سنگ پلے
ہائے یہ اختلاف کے پہلو

سر پہ گزرے گی دلّی کی بپتا
میر صاحب بہائیں گے آنسو

غم و لالچ کے درمیاں آ کر
کوئی غالب لکھے گا دستنبُو

جا! نہیں مانتے اہنسا کو
مار ڈالا ہے قوم نے باپو

انگلیوں سے جدا کیے ناخن
پڑ گیا نام اجل کا گستاپو

کوئی منصف مجھے تلاش کرے
میں نے چہرے پہ مل لیا ہے لہو

کوئی مارا گیا کہ آپ مرا
چھوڑنا ہے جہانِ رنگ و بُو

دیکھ مینار یہ سروں کا ہے
وقت کے جبر سے مگر ڈر تُو


٭٭٭
ٹائپنگ: فرخ منظور
اردو محفل
تدوین اور ای بک کی تشکیل: اعجاز عبید	
