صدیوں پھیلی پیاس

ماہئے، ہائیکو، دوہے

خاور چودھری

دوہے

رُوپ ترا ہے چاندنی ، بال ہیں سونا تار
گوری تیرے کارنے ، جاؤں جیون ہار
***

گوری گائے گیت رے ، سجنا من کی آس
کو سوں پھیلی دُوریاں ، صدیوں پھیلی پیاس
***

ماٹی موری ذات ہے ، میں ماٹی کا پوت
کھشتری ہو تو پارسا ، پاپی جو ہو چھوت
***

دھرتی موری آگ ہے ، میں دھرتی کی آگ
میں بھولا ہوں ماترے ، بھولا دیپک راگ
***

میرے من کی آگ پر ساون بھادوں روئے 
گہری ندیا آنکھ کی ڈوب نہ جائے کوئے 
***

ماٹی کو سونا کہے ، مورکھ جھوٹ کمائے 
تن اگنی کی ساڑ سے ، من بگیا جل جائے 
***

جوت بجھی من آنگنا ، کاری ہے ہر سوچ
مار نہ جی کو لاٹھیاں ، نا اپنا منہ نوچ
***

بات سُریلی بانسری ، رُوپ سجیلا چاند
چھیل چھبیلی ناریاں ، تو رے آگے ماند
***

کملے خاور دھیان سے چل جیون یوں کاٹ
ماشہ اُوپر نا تلے ، سیدھا ہو ہر باٹ

ہائیکو

ہاتھ کی لکیروں میں  تجھ کو ڈھونڈتے رہنا  مشغلہ ہمارا ہے  ***

کہرے کی چادر  پربت غم کے ٹوٹ پڑے  شعلے اٹھتے ہیں  ***

اہتمام کر لینا  سورجوں کی بستی میں  رات نے اُترنا ہے  ***

اندھیر سراؤں  درد کھلا دل کا  پھر شام کی بانہوں میں  ***

رات دسمبر کی  آنکھوں میں تصویر ہوئے  پہلے پہل کے دُکھ  ***

پیلا سرخ گلاب  میری آنکھ میں چھوڑ گیا  اپنے جلتے خواب  ***

بارش کا یہ ساز  رہ رہ کر یاد آتی ہے  گھنگرو کی آواز  ***

قریہ قریہ دھوپ 
میٹھے جھرنوں کا پانی 
قصّے بُنتا ہے ! 
***

کالے موسم میں  وعدوں کی زنجیر کٹے  مشکل ہو آسان  ***

رفتہ فردا کیا  حال میں رہنا سیکھ لیا  ہم دیوانوں نے  ***

صحرا صحرا یاد  میری آنکھوں میں اتری  اشکو ں کی بارات  ***

جھینگر، جگنو، رات  جذبوں کی سرگوشی سن  دیپک راگ نہ چھیڑ  ***

زخمی زخمی خواب  بادل، برکھا، ساون رُت  تنہائی کی آگ  ***

خودسے ڈر جاؤں  چاند کی روشن را تو ں میں  سایہ ساتھ چلے  ***

راز چھپائے کو ن  دوست سپولے بن بیٹھے  ہاتھ ملائے کون  ***

زندہ آنکھیں تو  منظر روز ہرا چاہیں  ڈھونڈ نیا اک میت  ***

منظر، منظر دھول  اجلے چہرے ، کالے لوگ  مشکل ہے پہچان  ***

جینا جیسے موت  جلتی ریت میں زندہ ہے  بھٹیارن کا دکھ  ***

کاگا، یاد، منڈیر  دل تاریک کنوئیں جیسا  آنکھیں بول پڑیں  ***

ہونٹ ترے شہتوت 
میں صدیوں کا پیاسا ہوں 
دیکھ!نہ کر انکار 
***

صدیوں پھیلی پیاس  لمس کی خوشبو پینے دے  خالی میرا جام  ***

قرنوں پھیلی پیاس  برف کی دیوار کٹے تو  چکھوں تیرا لمس  ***

ایسے جیتا ہوں  پیاس کی شدت بڑھ جائے  آنسو پیتا ہوں  ***

کیسا آبِ حیات  میری پیاس بجھے جانوں  تیرے دریا ہیں  ***

شہرِ خواب اُجڑا تو  ماند پڑ گئی جیسے  روشنی ستاروں کی  ***

وقت تو گزرتا ہے  چھوڑو وصل کی باتیں  خود سے کیوں اُلجھتے ہو  ***

جب شکوک بڑھ جائیں  اعتماد کی چڑیاں  پر سمیٹ لیتی ہیں  ***

دل گھر پھونک تماشا مانگے 
غم تو خود رو پودا ہے 
ٹھہرو، ٹھہرو مت سلگاؤ 
***

خواہشوں کا خوں دوڑے  پربتو ں کے ریشوں میں  کوہکنوں کے تیشوں میں  ***

رکھ دیا اندھیروں میں  شبنمی اُجالوں کو  تیرے سب حوالوں کو  ***

کوئی خواب، نہ عکس کوئی ہے 
"جن میں پیار کا شہر بسا تھا 
وہ آنکھیں ویران ہوئی ہیں " 
***

خُوب سنبھالو اشکو ں کو تم 
اب تو ہلکی آنچ ہے پیارے 
تب پھر شعلے بھی اُٹھیں گے 
***

ہجر کا موسم پھیل گیا ہے 
اور زخموں پہ کھرنڈ آئے ہیں 
یاد کے ناخن بڑھتے جائیں 
***

بھُوک طواف کرے جتنا بھی 
دست سوال دراز نہ کیجے 
اپنا تو منشور یہی ہے 
***

نومیدی کی چادر پھینکو 
حُسن کی کرنیں جاگ اٹھی ہیں 
گُھور اندھیر دریچوں میں 
***

جتنی دُور چلوں میں پیارے 
عمر کا رستہ بڑھتا جائے 
امرت دھارا کیسے پاؤں 
***

آگ پہاڑوں پر جلتی ہے 
سُوکھ گئیں خواہش کی ندیاں 
راکھ ہوئے وعدوں کے تارے 
***

تیرے نام نکھرتے موسم 
اپنی تو تقدیر ہوئے ہیں 
دھُوپ کی چادر، برف کا بستر 
***

ایک مہرباں سورج  روشنی اُگاتا ہے  اپنی آگ جلتا ہے  ***

کھولو کچھ اسرار  رات کی بنجر چھاتی میں  میری نیند اُگے  ***

جب تم یاد آئے  گونگے خواب ہی کاشت کیے  بنجر آنکھوں میں  ***

پھول ہوئے سب راکھ  سچ کا کڑوا زہر پیا  زخمی میرے ہونٹ  ***

تجھ کو سوچا تھا  اور دل جلنے کی آواز  شہر میں پھیل گئی  ***

تجھ کو دیکھا تھا  کلیاں ساری پھول ہوئیں  کتنا وقت ہوا  ***

اندھوں کا ہے راج  تاریکی ہم راز ہوئی  جگنوجیسے آگ  ***

من میں پھول کھلا  خوشبو آخر قید ہوئی  میری سانسوں میں  ***

ایک بریدہ شاخ  جاتے موسم کا بوسہ  پیڑ کے سینے پر  ***

ہاتھ سنہری ہے  موت کے سوداگر نے پھر  تتلی پکڑی ہے  ***

پاگل کو ن نہ ہو  ٹھنڈا سورج تنہائی  اور سلگتا من  ***

غربت، بے کاری  کمرے کی چھت سے لٹکے  ایک جواں کی لاش  ***

بانجھ بدلیوں نے پھر  گھول کر پیا سورج  سانس ہو گئی ٹھنڈی  ***

عہدِ وفا چھوڑو  جب انجیر کے پیڑوں پر  پھول نہیں کھلتے  ***

ماہیے

گھور اندھیروں میں  عمر گزرتی ہے  بارود کے ڈھیروں میں  ***

کچھ آس نہیں رکھنا 
بانجھ شجر سے تم 
ہاں !پیار بہت کرنا 
***

گندم کی ہری بالی  میرے مقدر کی  ہر سیپ رہی خالی  ***

کچھ کام نہیں ہوتا  عشق تمھارے میں  آرام نہیں ہوتا  ***

وہ نین جو ملتے تھے  پھول خزاں میں بھی  ہر ڈال پہ کھلتے تھے  ***

پیپل کی گھنی چھاؤں  شہر کی رونق میں  وہ بھول گیا گاؤں  ***

کھیتو ں میں کھلی سرسوں  تیرے لیے پیارے  روتا میں رہا برسوں  ***

کھو جاؤں جو یادوں میں  دیر تلک چمکے  جگنو کوئی آنکھوں میں  ***

وہ چاند سی پیاری ہے  جان چھڑکتی ہے  اک ایسی بھی ناری ہے  ***

رنگوں سے بھرا موسم  بیت چکا ساون  کیا اشک بہائیں ہم  ***

سچ شہد سے میٹھا ہے  رس ترے ہونٹوں کا  انعام وفا کا ہے  ***

ہم آہ نہیں بھرتے  دردِ محبت کی  تشہیر نہیں کرتے  ***

زلفوں کو سنورنے دو  روز اُلجھتے ہو  کچھ کام بھی کرنے دو  ***

سجنی کاحسیں گہنا 
روٹھ گئے ہم تو 
آواز نہیں دینا 
***
شاعر کی اجازت اور تشکر کے ساتھ
تدوین اور ای بک کی تشکیل: اعجاز عبید