صلصلۃ الجرس

عمیق حنفی

صلصلۃ الجرس (سیرۃ النبوی پر طویل نظم)

لولاک کما خلقت الافلاک

بِسمِ اللہِ الرَحمٰنِ الرَّحِیم

اِنَّ اللہ وَ مَلٰئِکَتِہ یُصَلّوٗنَ عَلَی النَبِیّ یَا اَیُّھَا الَّذِینَ اٰمَنُوا صَلُّو عَلَیہِ وَ سَلِّمُو تَسلِیمَا

یہ دھواں دھواں دھند یہ چیخیں یہ کراہ
دنیا نظر آنے لگی اک لوحِ سیاہ
لکھ دے خطِ انوار سے اے خامۂ برق
لَاحَولَ وَلَا قُوَّۃَ اِلّا بِاللہ ۴

سیاہ کف در دہاں سمندر
ہر ایک موسم میں رنگ و آواز مختلف
ہر ایک موسم میں راگ اور ساز مختلف

سیاہ کف در دہاں سمندر
شکستہ ساحل کی لمحہ لمحہ بکھرتی چٹّان
فصیلِ کہنی کے جیسے پتھّر
سیاہ کف در دہاں سمندر
بہاؤ میں ہے یقین کی اینٹ اینٹ دیوار، الگ الگ در
بدن کے باہر بکھرتے منظر
بکھرتے منظر بدن کے اندر

سیاہ کف در دہاں سمندر
بکھرتی سمتوں کے رخ پہ جس کی صدائیں چھینٹے
بکھرتی سمتیں ہیں جس کے لقمے
کناروں کی بستیاں نگلتا اُجاڑتا ہے
کھجور کے سر بلند پیڑوں کو جڑ سے جیسے اکھاڑتا ہے
تناوروں کو پچھاڑتا ہے
ادھڑتے مجروح بادبانوں کے پھیپھڑوں سے نکل نکل کر
ہوائیں ان کے سیاہ خوشوں کو نوچتی ہیں
زمین اپنی سنہری فصلوں کو آپ ہی کھا رہی ہے

سیاہ کف در دہاں سمندر
نہنگ جس کے ہزار حلقے
سیاہ اجلا ڈراؤنا جال ڈالتا ہے
تڑپتی مچھلی کی طرح جس میں پھنسا ہوا ہے سارا عالم
تمام عالم پکارتا ہے
بچانے والا نہ آۓ ہونٹوں پہ اس کا پیارا سا نام تو آۓ
سیاہ کف در دہاں سمندر
ہر ایک دہلیز پر کھڑا ہے
مہیب وہم و گماں کا طوفاں
امڈ پڑا ہے

وہ دور اک تختہ بہہ رہا ہے سہارا جس کا سفینۂ روح سے بڑا ہے ۳۵

یہ نیم اسرار وادی سے نکل کر کون آتا ہے

گماں کی گرد چھٹتی جا رہی ہے
سنکتی سنسناتی گولیاں
فضاؤں میں پگھلتی جا رہی ہیں
سرنگوں میں بچھی بارود آتش بازیاں بن کر
سیاہی پر اجالوں کی کشیدہ کاری کرتی جا رہی ہے
یہ کن خوش لمس پیروں کی رگڑ کھا کر
کبھی چنگاریوں جیسی کبھی برفیلی ریگِ بے یقینی
روپہلی اور سنہری روشنی کے پھول بن کر
نچھاور ہو رہی ہے
یہ قصوا اور جدعا کے نقوشِ پا
سیاہی پر چھڑکتے جا رہے ہیں روشنی کا عود و عنبر
سوار ان کا
دل و جاں کا امیرِ کارواں ہے

بدن دل جان عقل ایمان
یہاں اور پھر یہاں کے بعد جیتے رہنے کے ارمان
بہم یک جان
گھڑی کی سوئیاں غائب
تو کیلنڈر سے اس کی روشنائی مائلِ پرواز
حروف اعداد کی پیشانیوں میں موجزن ذوقِ نماز ۵۵

خیر الانامؐ خیر الانامؐ

خیر الانامؐ تم پر صلوٰۃ خیر الانامؐ تم پر سلام
آتے ہی لب پہ سرکار نام آتی ہے ہاتھ دل کی لگام
تبدیل ہونے لگتا ہے گویا احساس و فکر کا کُل نظام
تحلیل ہونے لگتے ہیں باہم صبح و الوانِ شام

یہ نام شمعِ بزمِ حیات یہ نام مشعلِ کائنات
یہ نام رحمتِ شش جہات یہ نام اصلِ حرفِ دوام

ریگِ شکوک خاکِ عجاب گردِ مہاب دشتِ جماد
پاتے ہیں لفظ کُن کا سراغ بنتی ہے سانس بادِ مراد
پوتا ہے ریشے ریشے کے نام علم الیقیں کا تازہ پیام

یہ نام صلحِ کل کا پیام، یہ نام امن کا آبشار
ہوتی ہے چشمِ کثرت شمار یہ نام سن کے وحدت شعار
اس نام پر ہیں دل سے نثار کیا خاک و باد کیا نور و نار
سرما کا مہرِ تاباں یہ نام، یہ فصلِ گُل کا ماہِ تمام ۶۹

ہر ایک چہرا سادہ بیاضِ مشق نگارشِ ماہ و سال
ہر اک جبیں تختیِ حال پر اک شکن ہے سطرِ سوال
سامانِ عیش و عشرت زیاد، لیکن سکونِ خاطر محال
تہذیبِ عصرِ حاضر عجیب، اِس پل عروج اُس پل زوال
یہ عہد ایک پاگل سوار، رہوارِ جس کا ہے بے زمام

ہر چند حکمتِ آدمی کی زد میں ہیں آج ماہ و نجوم
ذرے کے قلب قطرے کے دل کو طے کر چکے ہیں پاۓ علوم
نفسِ خرد سے بادِ بہار کی شکل پکڑے بادِ سموم
صحرا و دشت وادی ع شہر ہر گاہ بڑھ رہا ہے ہجوم
ہر شہر رشکِ شہرِ دمشق، ہر ملک رشک یونان و روم
لیکن تمام کاغذ کا کام، کاغذ بساط کاغذ خیام

عادت کی طرح رو میں تمام کیا فقر و عجز کیا رعب و داب
عادت خرام عادت قیام عادت کلام عادت کتاب
عادت حلال عادت حرام عادت ثواب عادت عذاب
یک رنگ عیش یک رنگ فکر یک رنگ حرف یک رنگ باب
ہر شخص و شے کو دامن میں لے کے بڑھتی ہے آگے موجِ سراب
اتنی حسین اتنی حسین جتنے حسین ہوتے ہیں خواب
غرقاب جوۓ رفتارِ تیز گم کردگانِ راہ و مقام ۸۷

انسان ریزہ ریزہ ہے لیکن اس پر ہے وقت کا ارتکاز
دنیا میں تا بہ گردن ہے غرق دنیا کے راز پھر بھی ہیں راز
اس نجد میں نہیں کوئی قیس لیکن ہزار لیلیٰ نواز
اہلِ فسوق کی آستیں کا خنجر ہے منطقِ خانہ ساز
خوابِ گناہ کرتا ہے پیشِ تعبیر سے بھی پہلے جواز
ذوقِ غنا و شوقِ قمار و شغلِ نشاطِ پیمانہ باز
بازار و بزمِ رونق فزا سے آتا ہے یاد سوق العکاز
موجِ سرور و موجِ شِرور و موجِ فجور ہر موجِ

ہر سمت آج خبط الحواس مشرق ہے لاف مغرب گزاف
ذہنوں کو ڈھانپتے جا رہے ہیں تاریکیوں کے بھاری لحاف
حکمت خلا کی سجدہ گزار مرّیخ و زہرا جس کے مطاف
ہو جائیں شہر کے شہر خاک قوّت ہے ایسی خارہ شگاف
اس نور کی ہے پھر سے تلاش ہر تیرگی تھی جس کے خلاف
وہ نور جس سے تھا تار تار ظلمِ جہول کا ہر غلاف
وہ نور جس سے اصنام صاف اوثان صاف انصاب صاف
تھے زیرِ خاک لاۃ و مناۃ عزّیٰ و ودّ ہبل و اساف
پھر ہو طلوع مثلِ ہلال خنجر یقین کا بے نیام ۱۰۴

اس نا مرادیوں کے جہان کو خونِ دل کی کتنی ہے پیاس
اذہان پر ہیں طاری شکوک اعصاب پر ہے طاری ہراس
وہ شخص فوقِ فطرت ہے آج قائم رکھے جو ہوش و حواس
دورِ جدید، عہدِ تضاد، کرتا رہا ہے اکثر اداس
الجھی ہوئی ہے شعلوں میں فکر، لیکن نہیں ہے دل صرفِ یاس
بھڑکے ہوۓ ہیں پھر شعلہ زار جن کے کنارے خوش، ذونواس
ایمان والے ایندھن ہیں خشک جن کے بدن کے ریشے ہیں گھاس
اس کا ہے شعلہ شعلہ وجود، اس کا ہے شعلہ شعلہ لباس
ہونے لگا ہے ایسا گمان سارا جہاں ہے شعلہ اساس
شب کے دھوئیں میں گھٹتی ہے صبح، دن کی چِتا میں جلتی ہے شام

سیلِ زماں پہ کشتی مکاں ہے، ظاہر بہاؤ باطن جمود
کھینچے خرد کی جھنجھلاہٹوں نے دشتِ عدم میں پاۓ وجود
مشکل ہے نیک و بد کی تمیز، گڈمڈ ہوۓ ہیں ایسے حدود
نیلے سمندری پانیوں پہ چھایا ہو جیسے چرخِ کبود
آبِ رواں پہ مثلِ حباب، تہذیبِ نو کی نام و نمود
تہذیبِ نو ہے ایسا چراغ جس کو ملا ہے فانوسِ دود
چھوتا ہے علمِ مرّیخ و ماہ لیکن ہے دور اصلِ شہود
ایماں نہ ہو تو مشقِ حساب تحقیق عالمِ ہست و بود
مدّت کے بعد، مدّت کے بعد پیشانیوں میں تڑپے سجود
ہوتے گئے تھے ہم تم سے دور اور کتنی دور! تم پر درود
ٹوٹے ہوۓ ہیں سارے قیود لب پر تمہارا آیا ہے نام

خیر الانامؐ تم پر درود، تم پر صلوٰۃ، تم پر سلام ۱۲۶

بگولے رقص کرتے ہیں

برے اچھے خبر ناموں پہ ٹپکے ہے رگِ تاکِ چکیدہ سے کشیدہ بے نیازی
حروفِ آب کی صورت پگھلتی جا رہی ہے پکّی روشنائی
فضاؤں میں ڈبو دیتی ہے ہر دم چیختے چنگھاڑتے خبروں کے جسموں کو
جنونی سرگموں مجذوب لے دیوانہ تالوں پر تھرکتی خواہشیں اپنے پہ خود مغرور ہونے کی

بگولے رقص کرتے ہیں
تموّج ہے خیالوں میں، نہایت مضطرب ہیں ان کی موجیں
بہا کر لا رہی ہیں مختلف رنگوں کے منظر خواب زاروں میں
کناروں سے ہزاروں سیپیاں جن میں نہیں موتی
لہو جو آنکھ سے ٹپکا، نہ فن پاروں سے ہی چھَلکا
کروڑوں سنگ ریزوں کے دلوں سے پھوٹ پڑتا ہے
وہ فرعونوں کی، چنگیزوں کی لاشوں کے عناصر فتنہ خو ذرّے
سیاست کی جنوں خیزی، تجارت کی ہوس ناکی کے جِن جِن میں اسیر
اڑا دیتے ہیں جو لاکھوں کروڑوں جانداروں کو بنا کر بھاپ
مئے گلفام میں تر قہقہے یوں چھوٹتے ہیں جیسے آتش بازیاں ہوں
بدن اک دوسرے کے نشّے میں ڈوبے ہوۓ ہیں ۱۴۳

بگولے رقص کرتے ہیں
ہزاروں لاکھوں بلکہ اربوں انسانوں کا چیونٹی دل
اٹھاۓ اپنے اپنے حصّے کا بارِ گراں دن رات محنت میں مگن
مقدر دم بدم دن کی مشقّت، رات کی بھاری تھکن
یہ دھرتی اور کاغذ پر ہلوں کو کھینچنے والے
مشینوں پر فسانے، خواب، نغمے ڈھالنے والے
کروڑوں پیٹ سر دل پالنے والے
نہایت سادہ ہیں ان کے عقیدے، سادہ جذبے، خواہشیں سادہ
انہیں مطلب نہیں، کیا ہو رہا ہے اور کیا ہو گا
انہیں منظور ہے بھٹّی میں جلنے کے لئے سر سبز ہونا، پھولنا، پھلنا
بالآخر خشک ہو کر شعلہ بننا، راکھ ہو جانا

بگولے رقص کرتے ہیں
زباں پر حرفِ تضحیکِ وجودِ حق، لبوں پر کلمۂ انکار
دلوں میں بعل و عزّیٰ کے لئے ہر گام سو سجدے
تصور میں ہبل کا بت بناتے ہیں کہیں حرص و ہوا کے ابخرات
کہیں۔۔۔۔ آبادیوں سے دور۔۔۔ آثارِ قدیمہ۔۔۔۔۔۔۔
یقیں کے گنبد و مینار محراب و ستوں طاق و در و دیوار کے ملبے
در و دیوار کے ملبے فضاؤں کو غبار آلود کرتے ہیں ۱۶۱
نئ دلّی کے جن پتھ پر رواں کرّے مثلّث مستطیل اہرام
دلوں میں خواہشوں کو اک نئی ترتیب دیتے ہیں
بہت بے باک ہے منظر، بڑی گستاخ ہیں نظریں
وسیع القلب ہیں پروردگانِ دانشِ حاضر
حجابوں سے انہیں مطلب نہیں ہے
حجابات آدمی کو نا مرادی کی گھُٹن میں مبتلا جو کرتے رہتے ہیں!
بہر ہنگام پہلو میں نیا ہم دم نئی لذت
نہ کوئی معترض اِس پر نہ کوئی معترض اُس پر
رقابت، ہجر، پیمانِ وفا بے مغز حرفوں کی عبارت
یہ جن پتھ ہے کہ چورنگی کہ چوپاٹی کا منظر ہے
یہ پیرس ٹوکیو لاہور لندن قاہرہ نیو یارک برلن روم ہے، کیا ہے؟

بگولے رقص کرتے ہیں
یہ صحراۓ شبِ تاریک میں چھوٹی بڑی ٹولی بنا کر
کدھر یہ آہوانِ دشت رم کرنے لگے ہیں
اندھیرے میں بھی ان کے جسم زینت کدے جگ مگ اجاگر
کہ نخلستان میں تاروں کی چھاؤں میں تلہٹی تال، ٹیلے، گھاٹیاں، میداں، جزیرے
یہ آرائش یہ زیبائش یہ اظہارِ وفورِ جذبہ و خواہش
نمائش جن کے ایک ایک نکتے کی
نگاہوں میں، اداؤں میں، لبوں پر ناچتی دعوت
نشاطِ عام کے رنگین شعلوں میں پگھلتی رشتوں کی عصمت ۱۸۱
مچلتی آتشِ سیّال کی بے تاب موجوں میں یہاں بیوی وہاں شوہر
نہ اِس کو اعتراض اُس پر، نہ اُس کو اعتراض اِس پر
بدن کی حکمرانی، بے حجابی کی فراوانی، صلاۓ عام
یہ جب پتھ سے گزرتی لڑکیاں
وہ کھجراہو کی دیواروں پہ ابھری شوخ مدرائیں
وہ امرء القیس کی امِ ربابی اور عنیزہ اور فلاں بنتِ فلاں
بدن تحریر اور تصویر کے اعصاب پر شہوات کی لذّت
خطوط و رنگ و صوت و انگ میں یکسانیِ حدّت
کہاں سے اُمڈے آتے ہیں کئی شعراۓ عہدِ جاہلی کے
ابھی تو میں مکاں میں تھا
زماں کے فاصلے طے ہو گۓ کیسے
درِ تاریخ پہ دستک نہ دی تھی اپنا ماتھا کھٹ کھٹایا تھا

بگولے رقص کرتے ہیں
نگاہوں میں پرندے ہیں سوالوں کے
بتانِ سنگ ہاتھوں میں لئے ہیں تیر فالوں کے
ستاروں اور برجوں میں، قمر کی منزلوں اور زائچوں میں
مقدر کا نوشتہ آدمی اور جہانِ آدمی کا
مشینوں کی بلی ویدی پہ قلب و روح کی قربانیاں دے کر
بشر زادوں کا ریوڑ خاک اڑاتا جا رہا ہے
بتانَ آتش و آہن نے چھوڑے ہیں یہ راکٹ (تیر فالوں کے)
خلا پیما پرندے ہیں سوالوں کے ۲۰۲

بگولے رقص کرتے ہیں
فضاۓ عصر کی لَے بے تحاشا بھاگتی ہے
صدا کو سست ٹھہرا کر اجالے کی رفاقت چاہتی ہے
بہت ہی تیز ایقاعات ہیں لیکن خیال و لفظ اب تک سست رو ہیں
کہ اتنی تیز لَے میں جسم ان کا پارہ پارہ ہو رہا ہے
خیال و لفظ کی ترتیب معنی یا اثر کچھ بھی سلامت رہ نہیں سکتا
فقط لے تال کی تیزی صداۓ شور، وحشی قہقہے، چیخیں
فقط بے جسم آوازیں، فقط بے روح آوازیں
سماعت کے مقدّر میں فقط بے چہرہ جسموں کے ہجومِ مضطرب کی شور پیمائ
اڑا کر نغمگی کی دھجّیاں
سُروں کے خون میں تر لَے کے پہیے گھومتے ہیں تیز تر
کتر ڈالے نے ہیں حسنِ ذوق کے کس مسخرے نے پَر؟

بگولے رقص کرتے ہیں
یہ نخلستان اور یہ حرطۂ غسّان
حنا و یاسمیں کی مسندِ برگ و گلِ تازہ پہ جبلہ ابنِ الایہم
چنیدہ ساتھیوں کے درمیاں مصروف دادِ عیش دینے میں
کبھی دورِ مئے احمر، کبھی دورِ مئے اصفر
ادھر بربط پہ گاتی پانچ یونانی حسینائیں
ادھر ہے پانچ حیرائی پری زادوں کی ٹولی
لبوں پر جن کے بابل دیس کے گانے
وہ بدوی لڑکیاں ابیاتِ مکہ گا رہی ہیں
ظروفِ سیم و زر میں مشک و عنبر ۲۲۴

بگولے رقص کرتے ہیں
شکاری لشکرِ سیروس شاہِ فارس
نہیں۔۔ یہ مغ بچہ کب ہے،،، یہ شاہی گارد کا چھیلا جواں
چمکتی جگمگاتی قرمزی جس کی قبا
بنفشہ رنگ بیلیں حاشئے پر
وہ برق انداز ہاتھوں پر سجاۓ باز!
ادھر نازک کمر چیروں کو ریشم ڈوریوں میں باندھے اک دستہ
بلوریں عطر دانوں سے چھڑکتے جا رہے ہیں خوشبوئیں وہ خاصہ دار
شکاری فوج کی ہیں مطربائیں پیشوا
بڑی شعلہ نوا، روشن ادا، جادو مزا
غبار و گرد کے پردے کے پیچھے اہرمن ہے آگ جو یزداں کی بیٹھا تاپتا ہے

بگولے رقص کرتے ہیں
بزنطینی عساکر روندتے ہیں سر زمینِ مصر و شام
گلی کوچوں میں ذوقِ بحثا بحثی عام
’’بکارت بی بی مریم کی رہی قائم جنم کے بعد بھی عیسیٰ کے! کیسا معجزہ تھا‘‘
’’خبر بھی ہے کہ مریم تیسرا قنوم ہیں تثلیث اقدس کا‘‘
’’عدم سے کیسے ابن اللہ نے پایا وجود؟‘‘
’’بتاؤ کیا عقیدہ ہے تمہارا مادّے میں ہے قدامت یا ہے جدّت!‘‘
’’خدا کیا ہے؟ فقط راس المثلّث!!‘‘ ۲۴۳

حلیف قیصرِ روما بزنطینہ کا شاہنشاہ
مسیحی سجدہ ریزوں نے رگڑ کر گھس دۓ پاۓ بتِ پطرس
حجاز و نجد کے صحرا نشینوں نے ستاروں کی پرستش ترک کر کے
چنے چقماق کے پتھر
درِ کعبہ پہ دیکھو تو ہبل کا بُت کھڑا ہے
وہی اعرابِ مکہ کا خدا ہے
کہیں انصاب یا چقماق کی اقلیدسی شکلیں
کہیں اوثان یا انسان صورت پتھّروں کی مورتیں
کہیں اصنام یعنی دھات یا لکڑی کے بت، انسان صورت
غذاۓ ریگ ہے نو زائیدہ بچی
مگر لاۃ و مناۃ و عزّیٰ ان کی دیویاں سچّی
حقیقت کی خبر ہی ہے نہ قدرِ آدمی ہے
پرستش آدمی صورت بتوں کی ہو رہی ہے ۲۵۶

بگولے رقص کرتے ہیں
گزشتہ عہد کی رنگینیاں گویا پلستر تھیں، ادھڑتی جا رہی ہیں
امارت، دولت و سطوت کے گنبد اور محرابیں
اٹھاۓ ہیں جو دیوار و ستوں تہذیب کے وہ سب کے سب
غلاموں کاشتکاروں دستکاروں کے سر و شانے پہ استادہ
ہر اک پتھر انہیں کے گوشت کا ٹکڑا
انہیں کے منہ نظر آتے ہیں دیواروں کے بیچ
وہی اشراف کی نظروں میں ٹھہرے ہیں ہمیشہ نیچ
ہر اک بدوی کو فخر اس پر کہ وہ ہے مالک الاسود
ہر اک شیخِ حجاز اس بات پر نازاں کہ کعبے میں ہیں اس کے سینکڑوں معبود
کہ اس کے کاروانوں کی پہنچ شام و یمن تک
کہ الطائف ہے اس کا موسمِ گرما کا مسکن
جہاں تربوز، کیلے، شید، شفتالو کی بہتات
جہاں زیتون اور انجیر اور انگور کی افراط
جہاں کا ہر گلاب اک طبلۂ عطّار
ہر اک بدوی کو فخر اس پر کہ وہ اس شیخ کا منجملۂ خدّام ۲۷۲

بگولے رقص کرتے ہیں
ہلالِ راس سرطانی عرب کے مہ پرستوں کو
بلا لایا ہے کعبے میں کہ کعبہ چاند کا مندر
حرم کا حجرِ اسود چاند کا ٹکڑا
جسے چھو کر ہر اک زائر لبوں سے چوم لیتا ہے
ہر اک ہے دیوتا کے رو برو ننگا
عقیدت، انکسار اور عاجزی کی اک علامت
حرم میں اس کی مادر زاد حالت
طوافِ کعبہ کے ہیں تیز چکّر تین پہلے اور پھر آہستہ چار
زمین پر سات سیّاروں کی رفتار
خدا ان سیٹیوں اور تالیوں سے سخت بیزار

بگولے رقص کرتے ہیں
مکان و لا مکاں کا تار سے باریک تر خطِّ وصال
لرزتا ہے کہ جیسے نور کی زنجیر ہلتی ہے
ازل سے حق و خیر و حسن کا جو عشق رکھتے ہیں
انہیں ان ارتعاشوں سے نویدِ دید ملتی ہے
یہ دنیا جامدوں کو جس نے صدیوں سے خدا مانا
یہ دنیا اپنی روح النفس کا پیغام پاتی ہے

فضا ہے پھر ثنا بر لب، ہوا پھر حمد گاتی ہے بگولے رقص کرتے ہیں

سنہری بالیوں میں چوگنی فصلیں دمکتی ہیں
چمن میں پھول ہیں اتنے کہ سمتیں تک مہکتی ہیں
کہیں باغوں میں خوشوں سے لدی بیلیں لچکتی ہیں
سرِ ریگِ رواں آئندہ کی شکلیں چمکتی ہیں
زمیں اپنے مقدّر پر بہت اٹھلاۓ جاتی ہے
نزول برکتِ حق کا صبا پیغام لاتی ہے

بڑے غیض و غضب سے مکہ پر اصحابِ فیل آۓ
مگر طیراً ابابیل ابر بن کر یک بیک چھاۓ
پکی مٹی کی کنکریاں وہ چونچوں میں دبا لاۓ
وبا تھی، جن کے آگے حملہ آور رک نہیں پاۓ
تعجّب بت کدے کو قوّتِ حق کیوں بچاتی ہے
خزاں کی اوٹ سے بادِ بہاری مسکراتی ہے

دشائیں ہند و ایران و فلسطیں کی کتابوں کو
پلٹتی ہیں کہ دیکھیں پھر سے بھولے بسرے خوابوں کو
درست آہنگ کرتی ہیں عقیدت کے ربابوں کو
سرکتا دیکھتی ہیں نور و ظلمت کے حجابوں کو
عناصر سے اذاں کی پر کشش آواز آتی ہے
خدائ اپنے مرکز کی طرف سب کو بلاتی ہے

’’زمیں نے ایک سوئ سا نیا انکھوا نکالا ہے
عناصر نے غذا بن بن کے اس انکھوے کو پالا ہے
ملی قوّت تو اس نے نال پر خود کو سنبھالا ہے
دلِ دہقاں نشاط و کیف سے لبریز پیالا ہے
حسد کی آگ اہلِ کفر کا تن من جلاتی ہے‘‘
کہ وادٍیِ غَیر ذِی زَرعٍ میں کھیتی لہلہاتی ہے
بگولے رقص کرتے ہیں ۳۱۷

پرد ۂ مشرق کے پیچھے ہے فصل ربیع کی صبحِ امید

ہے پسِ مطلع حدِّ ادب میں منتظرِ آمد خورشید
خانۂ زہرا میں داخل ہونے کو ہے خورشیدِ بہار
دریا ایک قدم کا کیا ہے، میدانِ مرّیخ ہے پار
کس کے لئے بے چین چاند ہے، کس پہ لگی ہے اس کی نگاہ
تھوڑی کمی تکمیل میں جو ہے دیکھ رہا ہے کس کی نگاہ
نام محمّدؐ ۔۔۔ اس کے پہلے کس کو ملا یہ پیارا نام
صلی اللہ علیہ و سلم، دونوں عالم بھیجیں سلام
’’سورج ہے یہ جس چھوٹا دیکھ رہی ہے دور سے آنکھ
قرب جو پاۓ تو خیرہ ہو جاۓ اس کے نور سے آنکھ‘‘
ریت کا ساگر ریت کی لہریں سنگِ حرم اور خاکِ حریم
کنکریوں کے بیچ میں جگ مگ دُرِّ یتیم اک دُرِّ یتیم ۳۲۹

سیپ نے کھول دیا منہ اپنا

ذرے ذرے میں سحر در آئ
گونج اٹھی وسعتِ صحرا میں صداۓ فیکون
ریت آئینہ بنی
ریت کا کرّۂ بلّور بنا
عکس آئندہ حقائق کا نظر آنے لگا
دور تک ممبر و محراب نظر آنے لگے
ریت میں خواب نظر آنے لگے
قرطبہ، قاہرہ، بغداد و دمشق
آگرہ، دلّی و لاہور، بخارا و سمر قند
بلخ و شیراز نظر آنے لگے
طاقِ کسریٰ پہ ضیا بار ہوئ شمعِ حرم
تختِ جمشید پہ قرآن کھُلا
الف لیلیٰ کو حقیقت کا ملا پیراہن
ہو گیا جمنا کی پلکوں پہ کھڑا تاج محل
قصرِ الحمرا سے شرمانے لگی سطوتِ روم ۳۴۵

مصر و یونان و فلسطیں کے دماغوں کو نچوڑ
ہند و ایراں کے خیالات کا عطر
علمِ عرفان سے ایمان سے عرفان بہم شیر و شکر
وہ عمامہ و سرابیل و عبا پوش فلاطون و ارسطو کا نزول
ریت کے کرۂ بلّوریں میں
وقت کے آئینے میں عکس نظر آنے لگے ۳۵۱

یہ بنو سعد کی ہے خیمہ گاہ

نیلگوں آسمان حدِّ نگاہ
دامنِ دشت ہے کہ طشتِ نجوم
کہکشان ہے یہاں کی اک اک راہ
ہیں ہوا میں فرشتوں کے انفاس
چشمۂ معرفت ہے چاہ بہ چاہ
صل کھجوروں میں ہے سنہرا شہد
تازہ مکھّن سے پُر ہے سینیِ ماہ
سبزہ حورانِ خلد کی پوشاک
ٹیلے فردوس زادگاں کی کُلاہ

بزمِ فطرت سے ہے رضاعت خواہ
دین و دنیاۓ حق کی مشعلِ راہ
یہ حلیمہ و حارث و شیما
جن پہ ہے مہربان بارِ الٰہ
جان و دل سے ہیں لاڈلے پہ نثار
دیدہ و دل ہیں ان کے فرشِ راہ ۳۶۳

ہیں حلیمہ خلوص کی تصویر
سر بسر ممتا ممتا جن کی نگاہ
دودھ میں جن کی چاندنی اور دھوپ
جن کا آنچل ہے مہر و ماہ پناہ
سیدھی خوشیاں ہیں اور سیدھے درد
سیدھے موسم کے لمسِ گرم و سرد
یہ کھُلا آسمان پھیلی زمین
پرورش پاتے ہیں یہاں پامرد
سختیاں سادگی و نظم و ضبط
جسم میں ڈھالتے ہیں دشت نورد
وسعتِ دشت تختۂ تصویر
اور تصویر نگر غبار و گرد
نقشِ تجرید چھینٹے سرخ و سبز
اور زمیں کالی، نیلی، بھوری، زرد
گردشِ روز و شب ہوئی ہے تیز
بیتے جاتے ہیں پل میں گرم و سرد
رو نما ہو رہے ہیں وہ حالات
ہکّا بکّا ہیں خاندان نکے فرد

اہلِ حبشہ کا کارواں سالار
کھینچ کر اپنی اونٹنی کی مہار
جانے کیوں سب کے ساتھ اتر آیا
اک تجسس ہے آنکھ میں بیدار
مرحبا مرحبا پکارتے ہیں
کر رہے ہیں نشانیوں کا شمار
’’یہ ہے موعود، اسے ہمیں دے دو‘‘
کرتے جاتے ہیں بار بار اصرار

دو ہیولے سے شخص نور آثار
پیکر انوار، پیرہن انوار
عرش سے اترے اور آۓ قریب
رک گئے تھے جہاں وہیں سرکار
کر کے سرکار کو زمیں پہ دراز ۴۰۶
چیر کر سینہ کھول ڈالا غار
ننھے سینے میں ڈھونڈھتے کیا ہیں
جھانکتے ہیں درونِ دل سو بار
اسمِ اعظم تلاش کرتے ہیں
یا دلِ کائنات کے اسرار

ننھے سینے میں ماضی رخشندہ
ننھے سینے میں وقت پائندہ
ننھے سینے میں اک دلِ زندہ
ابتدا انتہا سرائندہ ۴۱۷

سبز دامنِ جیاد

آسماں کھلا ہوا
گنبد اک زمین پر رکھا ہوا
بے ستون ہے فصیل!
چڑھ کے اس پہاڑ پر
دیکھئے ملی ہوئ ہے آسمان سے زمین
کتھّئی سیاہ بھوری اجلی لال بکریاں
چَر رہی ہیں گھاس اور پتیّاں ببول کی
کر رہی ہیں چھاؤں میں جگالیاں
اور ان کا گلّہ بان
سوچتا ہے کون ہے جہاں کا پاسبان
کس کے حکم سے ٹکا ہوا ہے آسمان
کس کے حکم سے بہاؤ آب و باد میں
کس کے حلم سے جماؤ خاکِ خور نژاد میں
کس نے رکھ دۓ ہیں فرشِ خاک پر پہاڑ
کس کے حکم سے برس رہی ہیں بدلیاں
کس کے حکم سے سمندروں کی سمت بہہ رہی ہیں ندّیاں ۴۳۴
کس کے حکم سے سفر میں ہیں مہر و ماہ
کس کا ہے ستاروں میں اشارۂ نگاہ
دور تک چلا گیا ہے سوچ کا یہ سلسلہ
ہے تہِ غبار اک کڑی سے دوسری کڑی ملی ہوئ
اک سرے پہ ابنِ آذر اور دوسرے پہ آپؐ
صاحبانِ عہد نامہ ہا بھی گلہ بان
صاحبِ زبور بھی
صاحبان وید و گیتا بھی تھے گلٓہ بان
دور تک چلا گیا ہے سلسلہ ۴۴۳

ایک دن سوچا کہ گلّہ چھوڑ کر

شہر کی شب دیکھیں صحرا چھوڑ کر
شہر کے ہنگاموں سے بہلائیں جی
چپ کی چوپانی کی دنیا چھوڑ کر
سوچ کو آیا ہے کیا، اور سو گیا
بے نیازِ عیش و مستی ہو گیا

سرگمیں پگھلی ہوئ چاندی کی رو
لے دھڑکتی خواہشوں کے تار پو
شہر کا جشنِ عروسی عیش گاہ
عشرتیں تازہ بہ تازہ نو بہ نو
کون ہے یہ جو یہاں بھی سو گیا
بے نیازِ عیش و مستی ہو گیا

زلف کا گھنگھور بادل چھا گیا
عارض و رخ جامِ مے چمکا گیا
ہاتھ لہراۓ کہ لچکی شاخِ برق
پاؤں کیا تھِرکے کہ بھونچال آ گیا
کون ہے یہ جو یہاں بھی سو گیا
بے نیازِ عیش و مستی ہو گیا

دو جزیرے وجد فرمانے لگے
دو سمندر ان سے ٹکرانے لگے
پنڈلیاں چمکیں کہ اُچھلیں بجلیاں
لفظ اپنے جال پھیلانے لگے
کون ہے یہ جو یہاں بھی سو گیا
بے نیازِ عیش و مستی ہو گیا

دل رُبا، دل گیر، دل آویز بزم
رقصِ شعلہ بار، نغمہ ریز بزم
سر بسر ہیجان اعصابی نظام
اشتعال انگیز دعوت خیز بز،م
کون ہے یہ جو یہاں بھی سو گیا
بے نیازِ عیش و مستی ہو گیا

فکر ہنگاموں سے غافل ہو گئ
نیند پردہ بن کے حائل ہو گئ
آرزو جو لے کے آئ تھی یہاں
خود بہ خود سینے سے زائل ہو گئ
مردِ حق آگاہ پل میں سو گیا
بے نیازِ عیش و مستی ہو گیا ۴۷۹

سر زمینِ شام کے لمبے سفر پر چل پڑا

شہر مکہ سے ابی طالبؓ کا ننھا قافلہ
قافلے والوں میں اک بارہ برس کی جان ہے
سختیوں دشواریوں والا سفر ہے دور کا
سرخ اجلی ریت کا تپتا ہوا پھیلاؤ ہے
نجد سے تا بادیات الشام صحرا ہے بِچھا
جیسے دوزخ سے اڑی چنگاریاں ذرّاتِ ریگ
لو کے جھکّڑ سانس جیسے چھوڑتا ہو اژدہا
ایک چشمہ دوسرے چشمے سے کالے کوس دور
جھوٹی جھیلیں تپتے صحرا میں دِکھاتی ہے ہوا
اس سفر کی زحمتوں میں بھی چھُپی کچھ رحمتیں
ہر قدم پر اک سبق، ہر لمحہ تازہ تجربہ
درد کی تصویر عبرت ناک آثارِ ثمود
داستاں خاموش وحشت ناک وادی القریٰ
بدّوؤں کی خیمہ گاہیں اور قبائل کے پڑاؤ
گاؤں ریگستان میں کانٹوں کے بن میں پھول سا
سادہ و پر کار و شیریں ان کی عربیٌ مبین ۴۹۶
جس کے اک اک لفظ پر نکلے ہے دل سے مرحبا
پینٹھ بازاروں میں اہلِ شوق کا اظہارِ فن
شاعری کا لطف، قصّوں کی طلسماتی فضا
شام ۔۔۔ سبزہ زاروں باغوں گلشنوں کا ملک شام
بیل بوٹے پھول پھل چشمے مقامِ پُر فضا
راہ میں پلکیں بچھاتی شاخِ زیتوں کا سلام
شید کی نہروں کے لب پر شادمانی کی دعا
سر زمینِ شام کی شادابیاں جنّت نظیر
شہد و شیر و رنگ و نور و رقص و نغمہ جا بجا
ثنویت، تثلیثیت سے محوِ بحثِ ہست و بود
بحث میں دونوں فریقوں کے دلائل کا مزا
یہ مجوسی، وہ نصاریٰ، یہ یہودی، وہ عرب
کوئی ہے مرہم سخن تو کوئ ہے ہے شعلہ نوا
شاعری، جادو گری، فنِّ خطابت، ساحری
ذہن و دل سے بات کرنے کی مؤثر ہر ادا
حجرہ ہے راہب بحیرا کا نظر کے سامنے
سرحدِ لُبوا پر آ کر رک گیا ہے قافلہ
بوڑھے راہب کی نظر ہے سب سے چھوٹے فرد پر
جس پہ اک پیڑ اور بادل نے ہے سایہ کر دیا
حال و ماضی کی حکایت قافلے والے تمام
صرف بارہ سال کا یہ فرد مستقبل نما
بحیرا سُن رہا ہے
پرِ جبریل کی آوازِ برق انداز
جو اٹھائیس برسوں بعد ان کانوں میں گونجے گی

بحیرا کی نگاہوں میں ہے وہ سورج
چمکتا ہے جو دو شانوں کے بیچ
پرانے راہبوں کے مصحفوں کی روشنی میں
نشاناتِ کمالِ بشریت کی جگمگاہٹ

بحیرا سن رہا ہے
غبار آلود قدموں سے چمکتی بجلیوں میں
چھپی عیسیٰ کے اک موعود کی آہٹ

بحیرا دیکھتا ہے
غبار آلود قدموں سے چمٹ کر
زمیں ریزے مہ و خورشید سے آنکھیں ملاتے ہیں

بحیرا سن رہا ہے
مکان و لا مکاں، سمتیں موذّن بن گئ ہیں
اذانِ قرطبہ کو بخشتی ہے گونج ملکِ چین کی دیوار

بحیرا دیکھتا ہے
منوّر جسمِ اطہر پر نبوّت کی ہر اک پہچان
دمکتا ہے دلِ پر سوز کے سورج کی کرنوں سے
جبینِ صندلیں کا چاند
الوہی آیتیں گویا کتابِ رُخ پہ لکھی ہیں

بحیرا ہے دعا بر لب
علاماتِ نبوت سے مزیّن جسمِ مطہر پر
یہودی سود خوروں کی نگاہیں پڑ نہ جائیں
مبادا وہ انہیں تکلیف پہنچائیں

موند لیں آنکھیں اجالا پتلیوں میں گھیر کر
اور اپنی دھُن میں پھر بوڑھا بحیرا کھو گیا
قافلہ بہرِ تجارت ساتھ میں لایا تھا مُشک
مشک بھی وہ مُشک جو جانِ جہاں مہکا گیا
شام کا پہلا سفر تو ہے سفر کی ابتدا
زندگی کے سامنے پھیلا ہے لمبا راستا
اس سفر کی ابتدا دنیا تو عقبیٰ انتہا
از مکاں تا لا مکاں ہے دور تک یہ سلسلا ۵۵۰

روح کی طرح گہرا ہے غارِ حرا

دامنِ فکر اپنا سمیٹے ہوۓ
سال ہا سال رمضاں گزرتے رہے
نقش بن بن کے مٹتے رہے
ذہن اسرارِ حول اور ماحول پر غور کرتا رہا
روح پر انکشافات ہوتے رہے
خانۂ کعبہ کی مورتیں
بے حسی اور جہادات کی صورتیں
ریزہ ریزہ ہوئیں اڑ گئیں، بہہ گئیں
غار میں سوچتے ذہن کی فکر آتش فشاں مادّہ بن گئ
چاند، سورج، شب و روز، موسم یہ کہتے رہے
کوئ ہے، کوئ ہے
کس کے احکام کے ہم مطیع و وفا دار ہیں
آ گئی لیلۃ القدر کی وہ مبارک گھڑی
نور کا اک ہیولہ مشکّل ہوا
غار کا گوشہ گوشہ منوّر ہوا
خاک کا ذرہ ذرہ منور ہوا
سارے اعصاب مبہوت
مرعوب سارے حواس
نطق و گویائ و دید پر سکتہ طاری
اک فرشتے کی بجلی کے لپکے کی مانند آواز گونجی
اس نے ریشم کا زرّیں خریطہ دکھا کر کہا
’یہ پڑھو‘
کانپتی۔ کپکپاتی، لرزتی اک صدا نے کیا اک سوال
’کیا پڑھوں؟‘
ہاتھ اس نے دبا کر کہا
’یہ پڑھو‘
’کیا پڑھوں؟‘
’یہ پڑھو‘
’اس میں کیا میں پڑھوں؟‘
اور فرشتے نے ریشم کے زریں خریطے پہ لکھی ہوئ
شعلہ شعلہ عبارت پڑھی
’نام اس رب کا لے کر پڑھو جس نے پیدا کیا
جس نے انسان کو منجمد خون کی ایک پھُٹکی سے پیدا کیا
ہاں پڑھو، رب تمہارا ہے اکرم
علم جس نے دیا بالقلم
اور انسان کو وہ سبھی کچھ سکھایا اسے جس کا سان و گماں بھی نہ تھا‘
یہ عجیب آیتیں اُس فرشتے کے ساتھ آپؐ نے بھی پڑھیں ۵۸۸
بار بار ایک بجلی چمکتی رہی
دل پہ یہ آیتیں خامۂ برق لکھتا رہا
گونجتی گھنٹیاں گونج کے دائروں میں بہت دیر تک گنگناتی رہیں
جو حرم میں محجّر تھی ایمان کی نغمگی
حمMحمد
مد بن کر فضاؤں میں بہنے لگی
لات و عزّیٰ مناۃ و ہبل بھاپ بن کر موحّد کے ایمان میں گھُل گئے
ہو گیا آفتابِ رسالت طلوع
چوندھیا سی گئ خود نگاہِ رسول
ختم جب کیفیت اس وحی کی ہوئ
جسم میں کپکپی
ہر بنِ مو عرق ریز
تازہ آیات بجلی کے چابُک
جِسم کا ہر رُواں اپنے اپنے سِرے پر کھڑا
دھڑکتا ہوا دل کی مانند داغِ حرا
تمتماۓ ہوۓ سرخ تانبے سے رخسار
اور پیشانی ابرِ گُہر بار
تیز قدموں نے گھر کی طرف رُخ کیا
ہانپتے کانپتے گھر پہنچ کر کہا
’زملونی
ڈھانپ لو اے خدیجہ مجھے ڈھانپ لو
جلد چادر میں مجھ کو لپیٹو مجھے ڈھانپ لو
گونجتی گھنٹیاں گنگناتی رہیں
گونجتی گھنٹیاں موج در موج نغمے سناتی رہیں
گونجتی گھنٹیاں روشنی کے بھنور چادرِ آبِ شب پر اُٹھاتی رہیں
گونجتی گھنٹیاں خواب میں بھی فرشتے کی آمد کا منظر دکھاتی رہیں
گونجتی گھنٹیاں وہ دکھاتی رہیں دیکھ کر جس کو تھرّا گیا تھا وجُود
جس نے بیدار کی آرزوۓ سجود
گونجتی گھنٹیوں نے لٹاۓ اجالوں کے پھُول
بن گیا آج اللہ کا عبد اس کا رسولؐ

ایک دن جب حرا کی طرف جا رہے تھے
وسط میں اس پہاڑی کے پہنچے تو پھر پردۂ گوش پر
ضرب کرنے لگی گونجتی گھنٹیوں کی صدا
جس جگہ رک گئے بس کھڑے کے کھڑے رہ گئے
سہمی سہمی نگاہیں فلک کی طرف جب اٹھائیں
تو وہی جگمگاتا ہیولیٰ، خدا کا مقرّب فرشتہ
آدمی کی شباہت میں تھا آسماں پر کھڑا
سوچا بچ کر نکل جائیں۔۔۔ لیکن کہاں؟
ہر طرف تو فرشتہ کھڑا تھا
رات میں اس فرشتے نے آ کر کہا:
’اے مدثّر! رِدا میں لپٹ جانے والے سنو
اب اٹھو اور لوگوں کو آگاہ کر دو
اور اللہ اکبر کی سچائ ان کو بتا دو ۶۳۰

طلسمِ عناصر تمام

زمیں کی کشش خام بہر گام بکھرے ہوۓ ہیں دِشاؤں کے دام

فرشتوں نے پھر کھول ڈالا بدن
کیا آبَ زمزم سے صاف اندروں
دھلے لوحِ دل سے
جو بھی اکّا دُکّا نشاں جاہلی عہد کے بچ گئے تھے
گھلے کفر و تشکیک کے جو بھی ساۓ کہیں تھے
ملبّب سنہرے پیالے میں شاید
وہ محلول عرفان و ایمان کا تھا
جسے ان فرشتوں نے سینے کے اندر انڈیلا
فرشتوں نے کیا ایثرائے ہیں قلب و جگر
کہ طے ہو خلائی سفر؟

سواری
بدن اسپِ تازی کا چہرا کسی حور کا
دھنک رنگ شہپر
کسی چست، طرّار چیتے کی نازک کمر
رگ و پے میں پگھلی ہوئی بجلیاں
یہ برّاق برقِ مجسّم
شعاعیں لگام
بھرا ایک ڈگ اور طے ہو گیا عرصۂ صبح و شام

بیک جست بیت المقدّس میں لے آئ برّاق
سلیمانؑ کے ہیکلِ خاص پر
براہیمؑ و موسیٰؑ شریک نماز
رفیقِ سفر جبرئیلؑ

زمیں کو فلک سے ملانے لگا ایک زینہ
فلک جیسے چاندی کا فرش
ستارے سبک زر کی زنجیر میں کہکشانوں ہی لٹکے ہوۓ
کیا جدِّ اوّل کو بڑھ کر سلام
نظر آئ مصروفِ تسبیح مخلوق جس کا نہیں کچھ شمار

سلیمانؑ و داؤدؑ و یحیٰ و نوحؑ
براہیمؑ و ہارونؑ و موسیٰؑ
ملاقات ان سب سے ۶۶۳
فرشتہ وہیں موت کا
شرر بار۔۔۔ ایک آنکھ سے دوسری آنکھ کا فاصلہ یوم ستّر ہزار
فرشتے ہیں اک لاکھ اس کے جلو میں
دفاتر کھلے ہیں
دفاتر میں ہیں اندراجاتِ موت و حیات

فرشتہ ہے اک تیسرے منطقے پر
خطاؤں پہ انسان کی جو ہمیشہ بہاتا ہے آنسو
یہ اک تیسرا ہے عذاب و سزا کا فرشتہ
بدن جس کا تپتے ہوۓ سرخ تانبے کی مانند

فرشتہ ہے یہ ایک اور
بدن نصف ہے برف کا، نصف ہے آگ کا
پگھلتے نہیں آگ سے برف تو برف سے آگ بجھتی نہیں

زمیں سے زیادہ وسیع اک فرشتہ
کہ سو جس کے ستّر ہزار
ہر اک سر میں منہ بھی ہیں ستر ہزار
ہر اک منہ میں اس کی زبانیں بھی ستّر ہزار
زباں محوِ حمد و ثنا، ہر زباں پر دعا ہے جُدا

رُکے،،، سدرۃ المنتہیٰ آ گیا
کروڑوں فرشتوں کے ساۓ میں عرشِ بریں پر
ادھر ایک لبریز دریا کے پار
کئی منطقے ہیں
یہ ہے نور و ظلمات کا
یہ ہے آگ کا اور وہ آب کا
ہوا کا ہے وہ آخری منطقہ
بہم پانچ سو سال کے فاصلے پر

نظر آ رہا ہے حجابِ جمال
حجابِ جلال اور حجابِ کمال
ٹھٹھک کر کھڑے ہو گئے جبرئیلؑ
کہا یہ ہے حدِّ ادب
بڑھیں آگے حضرت اکیلے ہی اب

اٹھے سب حجاب
قریب آ گیا عرش، اب فاصلہ قاب قوسین کا بھی نہیں
کہ گویا مقامِ فنا آ گیا
وہ سیلابِ انوار۔۔ سورج بھی شرما گیا
کئی لاکھ سورج
مگر روشنی چاندنی مثلِ کافور
نہ ٹیڑھی ہوئ وہ نگاہ
نہ حد سے تجاوز کیا
لگا جیسے دو ہاتھ دل اور شانے کی جانب بڑھے
مشاماتِ جاں میں پگھلنے لگے برف کے کوہسار
سکون اور راحت کا یہ انتہائ مقام
سفر وہ مکاں کا زماں کا
سفر لا مکاں کا

ہوئ ریزہ ریزہ رصد گاہِ ادراک
ہوۓ ذرہ ذرّہ تمام آئینہ خانہ ہاۓ حواس
بہر گام بکھرے ہوۓ ہیں دِشاؤں کے دام
زمیں کی کشش خام
طلسمِ عناصر تمام

جو لوٹے تو کیا دیکھتے ہیں کہ بستر ابھی گرم ہے ۷۱۲

کر کبھی فرصت میں اے ذہنِ فساد

باز خوانیِ زوالِ قومِ عاد
ایک آندھی چل پڑی چلتی رہی
سات راتوں آٹھ دن تک ہر گھڑی
تاش کی مانند گھر اڑتے رہے
بال کی مانند سر اُڑتے رہے
اس قدر اڑتا رہا گرد و غبار
بن گئی ساری فضا تاریک غار
خود سری کے پھل نے کر ڈالا ہلاک
آپ تھا انجام کتنا درد ناک
آدمی بکھرے گرے نزدیک و دور
گر پڑے ہوں جیسے دھرتی پر کھجور
اَنَّھُم اعجَازُ نَخلٍ خَاوِیَہ
دیکھ اس آیت میں جو ہے زاویہ ۷۲۶

مرا ماحول کہتا ہے

درختوں کو گرا دوں
کہیں چمنی کہیں سکائی سکریپر اگا دوں
پرندوں کو اڑا دوں
گراموفون پر گانا بجا دوں
چمکتے معدنوں کو ہضم کر لوں
دھوئیں سے پھیپھڑے بھر لوں
رگوں کو کیمیائی زہر کی نہریں بنا لوں
صحیفوں کو جلا دوں
کتابیں جنس، جاسوسی، تشدد کی سجا دوں
عقیدت، عشق، پیمانِ وفا کو
خدا کے ساتھ آیاتِ خدا کو
عمل کے علم کے ہر رہنما کو
ادب، تاریخ، فکر و فن کو محفل سے اٹھا دوں
بلا کر ساد، کیسا نووا، زیرو زیرو سیون کو بٹھا دوں
لپیٹوں جا نماز ، اخبار پر گردن جھکا دوں
مشینوں کا تو اب یہ دل پرانا آشنا ہے
بہت سے معدنوں کو میرا معدہ جانتا ہے
دھوئیں کا ذائقہ یہ پھیپھڑے برداشت کر لیتے ہیں میرے
رگوں میں زہر کر لیتا ہے پھیرے
نہیں ہے ٹیپ، گراموفون بھی مرا دشمن
زوال آمادہ سمتوں نے بڑھا دی میری الجھن

یہ نا آسودگی کی گرد، کہرا نا مرادی کا
دھواں محرومیوں کا درمیاں، اپنے سوا کچھ بھی نہیں رکھتا

یہ منزل کون سی ہے کس سے پوچھوں
کوئ منزل کی پوچھے تو خلا کی سمت دیکھوں ۷۵۲

مرے ہم نواؤ

چلو ہم بھی الفاظ کی بس پرستی سے دامن بچائیں
علامت پرستی سے پیچھا چھڑائیں
علامت کو بس ہم علامت ہی مانیں
علامت فقط راستہ ٹھہرا، منزل نہیں ہے
لہو کو تموّج ہے، یہ دل نہیں ہے

چلو ہم بھی اس معنویّت کو ڈھونڈھیں
جو الفاظ کی شکل میں مومیائ ہوئ ہے
جو حرفوں کی صورت محجّر پڑی ہے
عبارات میں منجمد ہو گئی ہے
علامات کے پیکروں میں ڈھلی ہے
جو اصلِ حیات و زمان و مکاں ہے
بدن، ذہن، دل، روح میں جو رواں ہے

دبی ہو گی کوئ تو چنگاری اس راہ کے ڈھیر میں
کسی تودۂ ریگ کو تو ملی ہو گی توفیق آئینہ بننے کی خاطر
کسی مرغِ قبلہ نما میں تو ہو گی یہ قوت، کہ رفتار کی سمت دکھلاۓ ۷۶۸

چلو کھنڈروں کے لبوں پر جمے ہیں جو الفاظ، پگھلائیں ان کو
مقیّد ہیں جو لفظ جز دان میں، کھول دیں بند اس کے
صدائیں جو سینے میں اس کے چھپی ہیں، فضا میں بکھیریں

چلو شور و غل کے بھنور کے دلِ زار میں نغمہ ڈھونڈھیں
غبارِ زماں میں شرارِ یقیں ڈھونڈھنے کی سعی کر کے دیکھیں
شرر کر شرر، گرد کو گرد رکھنے کی فطرت غبارِ زماں کو ملی ہے
ہٹا کر وہ کہرا جسے چمنیوں نے بکھیرا
موذّن کی آواز کی چاندنی چھا رہی ہے

چلو چل کے اس ماہِ تاباں کو ڈھونڈھیں
خلاؤں سے اتریں
زمیں میں ہے برداشت کی کتنی قوّت، ذرا غور کر لیں
تہِ گرد ہوں گے نقوشِ سجود
عجب کیا کہ بخشے ہمیں وہ یقینِ وجود ۷۸۱

ورق تاریخ کے پلٹے

یہ خالد کے بہادر
قُراقِر سے سوا کے راستے پر
بہت دشوار صحرائ مسافت
نہ پانی
نہ پانی کا نشاں
یہ رافع۔۔۔ رہنماۓ لشکرِ تشنہ لباں
بڑھانا چاہتا ہے حوصلہ لیکن
دہکتی ریگ کے آئینے سے سورج کی کرنیں
پلٹ کر آگ برساتی ہیں دیدوں پر
اجالا آتشیں نیزے چلاتا ہے
چپک جاتی ہیں پلکیں
مگر چشمِ یقیں یَنظُر بِنُورِ اللہ
تہِ ریگِ رواں پانی کا چشمہ ڈھونڈھ لیتی ہیں

پکار اٹھتا ہے رافع
کہیں عوسج کا پودا ہو تو دیکھو
سپاہی ڈھونڈھ لیتے ہیں
کھدائ کرتے ہیں اس کی جڑوں کے آس پاس
نمیدہ ریگ ہوتی ہے نمو دار
نکل پڑتی ہے جلتی ریت سے پانی کی ٹھنڈی دھار
کنٹیلی جھاڑی عوسج کی دہکتے دشت میں پانی کی تابندہ نشانی

ملا ہے لَا سے اِلاّ کا پتہ اہلِ یقیں کو ۸۰۳

زمین کا نور بھی خدا، آسمان کا نور بھی خدا ہے

یہ بات کچھ اس طرح ہے گویا کہ طاق ہے جس پہ اک دیا ہے
دیا ہے فانوس میں تو فانوس موتی ایسے ستارے سا ہے
دیا یہ وہ ہے جسے مقدّس شجر سے روشن کیا گیا ہے
شجر وہ زیتون کا جو پورب سے اور نہ پچھم ہی سے اگا ہے
یہ روغن از خود چمک رہا ہے کہ آگ نے کب اسے چھوا ہے
خداۓ بر حق کا نور ہے عام، نور پر نور چھا رہا ہے
جسے خسا چاہتا ہے اس کا وہ جانبِ نور رہنما ہے

حواس کے طاق پر ہے نفسِ مدرّکہ کا چراغ روشن
لطیف نفسِ مخیّلہ جس کے گرد فانوس سی مزین
شجر ہے زیتون کا وہ نفسِ مدللہ جس کا زرد روغن
جو نفسِ فوق المدرّکہ کی عنایتوں سے چمک رہا ہے
وہ روغن از خود چمکنے والا، جسے کبھی آگ چھو نہ پائی
وہی نبوّت کا جوہرِ قلب ہے، رسالت کا خاصّہ ہے
جو اس کے ہر طاق پر ہزاروں چراغ جلتے ہیں مظہروں کے
نظر میں ہیں جھلکیاں تو لیکن، جو اصلیت ہے، وہ ماورا ہے
دلیل اسراء نے پیش کی ہے، ثبوت معراج نے دیا ہے
زمین کا نور بھی خدا، آسماں کا نور بھی خدا ہے

اک خدا ہے دوسرا کوئ نہیں

آپ اپنا نام اپنی ذات اپنی کائنات
وہ سدا بیدار، جاری اور ساری
وہ عمل روحِ عمل سمتوں پہ طاری
سوچئے تو دور حدِّ منطق و ادراک سے
کیجئے محسوس تو وہ ہے رگِ جاں کے قریب
جو بھی کچھ ارض و سما میں ہے، اسی کا ہے
ابتدا و انتہا و وسط کا داناۓ کل
اس کی کرسی ہے زمین و آسماں گھیرے ہوۓ
وہ زمین و آسماں کا پاسبانِ بے تکان
عرشِ اعظم سے رگِ جاں تک ہے اس رب کا مکان
وہ خداۓ ہر زمان ۸۳۳

یہ قریش کے بڑے عمائد، بزرگ قائد، بڑے خفا ہیں

کہتے ہیں : ہم بتوں کے آگے سجدہ و قربانی کرتے ہیں
تاکہ یہ بت جن روحوں کے مظہر ہیں، وہ ہم سے خوش ہوں
کیوں کہ وہ روحیں تختِ خدا کی ہم سایہ ہیں
ان کی سفارش خدا ذرا جلدی سنتا ہے
اور بتوں کو سجدا کر کے قربِ خداوندی ملتا ہے

کہتے ہیں: یہ شخص ہمارے دین کا دشمن بنا ہوا ہے
کہتے ہیں: یہ شاعر ہے، اس کے قبضے میں رئ ہیں
کہتے ہیں: یہ کاہن ہے، اس کے سر پر جن کا سایہ ہے
کہتے ہیں: یہ ساحر ہے، جادوگر ہے دیوانہ ہے
کہتے ہیں: ہذیان ہے جس کو یہ الہام و وحی کہتا ہے
کہتے ہیں: بس یہ دنیا ہے اور یہاں مرنا جینا ہے
چھوڑو جنت کا ہر سپنا، اور جہنم سے نہ ڈرو
کہتے ہیں: ہر شے ہے یہیں، مے بھی ہے، حور و غلماں بھی
جنت و دوزخ محض فسانے، کھاؤ پیو اور عیش کرو

آپ کی راہ میں کوڑا کرکٹ اور غلاظت
روز ابو لہب کی بیوی لا کے بچھاتی رہتی ہے
آگ لگاتی رہتی ہے
آپ حرم میں سجدہ ریز ہیں
عقبہ ابنِ معیط نے اپنی جہالت کی لمبی چادر کو رسّی کی صورت بل دے کر
آپؐ کی گردن میں اس کا اک پھندا ڈال دیا
اور پھر اس کو اتنا کسا ہے، گھٹنوں کے بل آن پڑے ہیں

آپ حرم میں محوِ دعا ہیں
عقبہ اونٹ کی اوجھ اٹھا لایا ہے
جیسے ہی سجدے میں گئے ہیں اوجھ کو پیٹھ پہ لاد دیا ہے

لعن، طعن۔ کج بحثی، گالی
استہزا، غنڈہ گردی
ڈستے کانٹے، تپتی ریت، نوکیلے پتھر، گند غلاظت اور نجاست
یہ انعام رسالت کے ہیں، یہ حق گوئ کی ہے قیمت ۸۶۲

یہ بلد الامین

یہ کوہِ صفا
یہ حق کی صدا
’’اگر میں کہوں
کہ اس کوہ کے پیچھے جرّار لشکر چھپا ہے
تو کیا تم مری مان لو گے‘‘
’’یقیناً!!! کہ تم نے کبھی جھوٹ بولا نہیں
کہ تم الامین‘‘
’’تو میری سنو
مجھے میرے رب نے تمہارے لئے ایک تنبیہ سونپی ہے
کہ تم سب مرے اقربا ہو
مگر جب کبھی آخرت کا عذاب آۓ گا
یہ رشتہ بھی تم کو نہ ہر گز بچا پاۓ گا
اگر لا شریک اور واحد ضدا پر نہ ایمان لاۓ تو مٹ جاؤ گے
اگر خیریت چاہتے ہو تو میری سنو اور مانو
نہیں کوئ معبود اللہ کے ما سوا‘‘

سنی یہ صدا تو ابی لہب کا تن بدن جل اٹھا
’’ہمیشہ رہے تو تباہ‘‘ اس نے کہا

بشارت خدا نے مگر دوسری دی
’’ابی لہب کے ہاتھ ٹوٹے، سدا کے لئے ہو گیا وہ تباہ
نہ کام آۓ گا اس کا مال و متاع
اسے عنقریب آگ کھا جاۓ گی، بھسم ہو جاۓ گا
اٹھاۓ گی خود اس کی بیوی چِتا کے لئے خشک ایندھن
گلے میں پڑی ہو گی اس کے
کھجوروں کے پتوں کے ریشوں کی چبھتی ہوئی سخت رسّی‘‘ ۸۸۷

کسی کی آواز چشم و دل کو مہیب منظر دکھا رہی ہے

گمان ایٹم بموں کے پھٹنے کا ہو رہا ہے
یہ جسم و جاں کا جہان ہے ابخرات بن کر جو اڑ رہا ہے
رواں فضاؤں میں سات رنگوں کے اونی گالے
کبھی پہاڑوں کے نام سے جو کھڑے ہوۓ تھے
اجالوں اور ابخرات نے ایک سانپ کی چھتری کھول دی ہے

نہیں یہ ایٹم بموں کے پھٹنے کا جانا پہچانا لمحہ کب ہے
یہ ساعت اس سے مہیب تر ہے
یہ پیش منظر ہے تب کا، جب اشتعال سا ہے
عناصرِ کائنات کے جوہروں کے ایک ایک دل کے اندر
ہر ایک ذرّے میں کوہِ آتش فشاں سے زائد تباہ کاری کی قوتیں ہیں

زمین جیسے سفید میدے کی سرخ روٹی
زمین بیلی ہوئی پڑی ہے
نہیں کوئ راز اس کے سینے میں، جو بھی کچھ تھا۔ ۔ ۔ ابل کے باہر نکل پڑا ہے
پہاڑ غائب کہ جیسے کوئ طلسم ٹوٹا
کسی کی اک ضرب نے کیا چوٗر اور پَل میں اُڑا دیا ۹۰۳

تو دھوپ سورج سے اڑ گئ ہے
نقاب الٹ دی ہےحسن نے خود تو آئینوں کی نہیں ضرورت
یہ جھینی جھینی یہ نیلی نیلی فلک کی چادر
الگ الگ تار تار جس کی بناوٹوں کا ہر ایک ٹکڑا
چھُپے ہوۓ تھے جو راز پردوں میں، سامنے ہیں
برس رہی ہے گھٹا دھواں دھار
الٹ الٹ کر قبور لاشیں اگل رہی ہیں
ہر ایک عجب الذنب ہے بیج اس سے اگ رہے ہیں بشر کے کاہ و گیاہ جیسے
سمندروں کا تمام پانی ابل پڑا ہے
تمام ارضی نشان ڈوبے ہوۓ پڑے ہیں

پتنگوں کی طرح لوگ بکھرے ہوۓ پڑے ہیں
برہنہ پا ہیں، برہنہ تن اور غیر مختون
بہم قریب اتنے جتنے جسموں سے پیرہن ہوں
مگر ہے وہ ہولناک منظر ۹۲۴

کسی کو ذوقِ نظر نہیں ہے کسی کو تابِ نظر نہیں ہے
گروہ یہ کیسے لوگوں کا ہے کہ آگ سایہ بنی ہوئ ہے
جہاں یہ جاتے ہیں آگ بھی ساتھ جا رہی ہے
یہ کھانا کھاتے ہیں، آگ بھی ساتھ، کھا رہی ہے
ی8ہ سو رہے ہیں تو آگ بھی ساھ سو رہی ہے
جہاں بھی کرتے ہیں صبح یہ لوگ، آگ بھی آنکھ مل رہی ہے۔

ابھی ہے آوازِ راجفہ ہی فضا میں تازہ
کہ رادفہ کی صدا فضاؤں میں بال و پر تولنے لگی ہے
فرشتے ہیں بے شمار
کھڑے ہیں باندھے ہوۓ قطار
اٹھاۓ ہیں آٹھ اپنے شانوں پہ عرش کا بار

جہنم اپنے کروڑوں شعلوں کی لال جیبھیں نچا رہا ہے
غضب کا ہے درجۂ حرارت کہ جس کو سورج سے ناپئے تو
پرخچے سورج کے پَل میں اڑ جائیں
کھلے ہوۓ سات در جہنّم کے بھیجتے ہیں ہجوم اندر
دھوئیں کے بادل سیاہیوں کو فضا میں پھیلا رہے ہیں ہر سو
لباس شعلے، اساس شعلے، سروں پہ شعلے، قریب و دور، آس پاس شعلے
جلا جلا کر اگائی جاتی ہیں جسم پر بار بار کھالیں
دہکتے لوہے کے سرخ گرزوں کی مار اوپر سے پڑ رہی ہے ۹۴۴

ہزار پارہ ہے کاسۂ سر، شگاف سے مغز بہہ رہا ہے
نہ مُردوں میں ہے نہ زندوں میں ہے
دعائیں مرنے کی مانگتے ہیں
کھڑا ہوا ہے فرشتۂ موت سامنے پھر بھی مرنا مشکل

درختِ زقّوم سے غذائیں گناہ گاروں کو مل رہی ہیں
درختِ زقّوم، آگ سے جو اُگا ہوا ہے
گناہ سے جیسے اس کی لذّت کا سبزپودا اُگا ہوا ہو
غذا یہ ان کے بطون میں پگھلے تانبے جیسی ابل رہی ہے
مریض اونٹوں کی پیاس!
درختِ زقّوم کی غذا کھا کے پی رہے ہیں ابلتا پانی
درختِ زقّوم نفسِ امّارہ سے اُگا ہے
تہِ جہنم جڑیں ہیں اس کی
کہ نفس، امّارہ کا جہنم ہے استعارہ

ہمارے اندر جو کالی آواز گاہے گاہے پکارتی ہے
درِ جہنم کی چرچراہٹ سے اپنا لہجہ سنوارتی ہے ۹۵۹

کھول دی ہے پیشانی پر سجدوں نے تیری آنکھ

پار افق کے بے پتلی بے دیدہ دیکھتی آنکھ
اشکِ ندامت صاف چمکتے پانی کی اک جھیل
چادرِ آب پہ کہرا کہرا باغ کا عکسِ جمیل
شعلہ شعلہ ریت کے بیچ میں، جھیل جھیل میں باغ
ایسا عجیب کہ جس کا تصور کر نہ سکیں دل اور دماغ
ٹھنڈے ٹھنڈے ساۓ کا ہے سبزہ سبزہ فرش
پتّی پتّی کلی کلی آئینۂ حسنِ عرش
گاتی خوشبو، ناچتے رنگ
مطرب پیڑ اور شاخیں چنگ
پھیلا ہوا حدِّ خیال کے آگے تک چمنِ لذات
پھر بھی وہم و گماں شہوات
بار آور شاخیں جیسے سجدے میں سرِ تسلیم
ایک طرف کوثر کی موجیں، ایک طرف تسنیم
جوۓ شہد و شیر میں رقصاں نور
چشموں میں پگھلا کافور
پیمانوں میں زنجبیل اور طشتِ زر میں کباب
جتنے جسم ہیں سر تا سر ہیں پیکرِ حسن و شباب
عیش، سکینت، چین، آرام کے ہیں پیغام النّاس
رنج و خوف و فکر نہ پاس نہ شک نہ کوئ وسواس
قربِ خوباں کا ہر لمحہ سدا مہکتا پھول
پر نہیں مارتا بیچ میں کوئ حرفِ فضول
پھیلا ہوا ہے سینکڑوں کوسوں تک ہر ایک مکان
اپنے آپ میں ایک جہان
ایک دیوار سے دوسری تک جب دوڑے کوئ رہوار
تو چالیس دنوں میں پہنچے گر ہو بجلی کی رفتار
چاند ستاروں کے نغمے کے دودھ کی گنگا کاہکشاں
آئینہ چشموں کا ترنم، لحنِ طیور کی جوۓ رواں
آگ کے گھر میں آب ہے اور ہے آب کے گھر میں آگ
تاریکی بھی رنگ سہانا، خاموشی بھی راگ
پلکوں پر خوابوں کی بجاۓ دھنک رنگ تعبیر
آرزوئیں تصویرِ حقیقت، اور دعا تاثیر
پھول ہیں رنگ و بو کے کٹورے جن کی ہے میخوار ہوا
لطفِ سکوں ہر موجِ ہوا کے بوسے کی ہے عطا
کامل اطمینان میں ڈوبے ہوۓ ہیں پانچ حواس
قربِ خدا کا ہر حس کرتی ہے تازہ احساس
عرشِ مبیں کی راہ میں جگ مگ قدموں کے وہ نشان
جن کو رگِ جاں پر پا کر تھے دیدہ و دل حیران ۹۹۷

پہاڑوں سے پیامِ حق سنایا تین نبیوں نے

مگر ان کی صدائیں خشک صحراؤں نے پی ڈالیں
صفا سے جو صدا آئ وہ چٹانوں سے ٹکرائ
پلٹ کر آئ تو سنگِ ملامت ساتھ میں لائ
نہ مانے اہلِ مکہ کے عمائد بات ایماں کی
بہت کج بحثیاں کرتے رہے، لکھتے رہے ہجویں
کیا شعبِ ابی طالب میں کھانا بند پانی بند
قیامت کے بیانوں پر کسے فقرے، ملامت کی
قیامت کلمہ گویوں پر مگر سو سو طرح ڈھائی
لٹایا ریت پر ان کو، تو برساۓ کبھی پتھر
درختوں سے کبھی باندھا، کبھی شاخوں پہ لٹکایا
غیض وہ کون سا ایسا ستم ہے، جو نہیں ڈھایا
بتانِ کعبہ ابراہیمؑ کے مکے میں بیٹھے ہیں
مگر کرتے ہیں مکّہ ترک ابراہیم کے پیرو ۱۰۱۱

شہر مکّہ ایک وادیٍ غیر ذی زرع یہاں

تخمِ ایماں سے کوئ انکھوا نہ پھوٹے گا ابھی
اور تپنا ہے ابھی اس خاک کو
اور ابھی رونا ہے مردہ خاک پر افلاک کو
کاشت کے قابل ابھی بننا ہے ان قطعات کو
تب یہاں ایمان کی کھیتی ہری ہو گی

حکمِ ربّی ہے کہ اپنے بد نصیب آباء کا شہر
جس کو ہونا ہے کبھی بلد الامین
شہرِ مکہ چھوڑ کر یثرب چلیں

جس جگہ سچ بولنا بھی جرم ہو
اور سچّی بات کا سننا گناہ
جس جگہ کے لوگ اڑائیں کلمۂ حق کی ہنسی
آدمی کو ریت کی بھٹی کا جو ایندھن بنائیں
تختۂ مشقِ ستم ہوں جن کی نخوت کے یتیم
سود میں بیواؤں سے کالی کھجوریں چھین لیں ۱۰۲۶

شہر گونگا بہرا اندھا ہو گیا ہے
پھر بھی اپنے اقتدارِ اعلیٰ پر اس کا غرور
ظلم کی حد سے تجاوز کر چکا ہے

شہرِ مکہ مرکزِ دینِ مبیں
ہاں مگر یہ اہلِ ایماں کے ابھی قابل نہیں
چل بھی اے جدعا یہاں سے جلد چل

بیعتِ عقبہ نے سایہ کر دیا ہے راہ پر
ہو گئے صدیقِ اکبرؓ ہم سفر
چھوڑ کر چپ چاپ اک شب اپنے گھر
چل پڑے دونوں یمن کی راہ پر
ثور نامی غار میں چھپ کر گزارے تین دن
غار کے اطراف عامر بن فہیرہ بکریاں اپنی چراتے
بھون لاتے گوشت تازہ، دودھ بھی لا کر پلاتے
اور ان ’اگیات واسی‘ مالکوں کے واسطے پانی بھی لاتے

جب محمدؐ کو نہ پایا بوکھلا اٹھّے قریش
ہر طرف دوڑا دۓ شمشیر زن
اک قریشی نو جواں آیا دہانِ ثور تک
دیکھتا کیا ہے
غار کے منہ پر ہے اک موٹا درخت
جس کی شاخیں ڈھانپ کر سکرا دہانہ غار کا
جا بجا پھیلی ہوئ ہیں
سر بسر سر پوش
غار کے منہ پر ہے بیت العنکبوت
جو محمدؐ کی ولادت سے بہت پہلے کا ہو گا
اور دو جنگلی کبوتر
آشیانے میں ہیں جن کے انڈے بھی ہیں ان کے ساتھ
غار کے اندر بچھی ہے خشک گھاس
مطمئن، مایوس لوٹا وہ قریشی نو جواں

جب پریشاں سے نظر آۓ رفیقِ غار تو بولے رسولؐ
دو نہیں ہم، تیسرا بھی ہے ہمارے ساتھ
پاسباں کون و مکاں کا وہ ہمارا رہنما
وہ محرک ہے سفر کا، اور وہی ہے مدّعا ۱۰۵۸

اللہ کا وہ عبد کہ ہے قرّۃ العین
وہ مجمعِ اوصاف، وہ مرجُ البحرین
خاتِم بھی وہی اور وہی خاتَم بھی
ہیں بوسہ زنِ مہرِ رسالت قطبین

سو شمسوں کا اک شمس، ضیا بار یہ مُہر
کونین کا اک نقشِ پُر اسرار یہ مُہر
منجملۂ اوصاف و روایاتِ رسل
اک بارِ امانت کی نشاں دار یہ مُہر

ہر چند کہ ہے شخصیتِ لا ثانی
تقویمِ بدن سر تا پا انسانی
البتّہ یہ پتلیوں میں سورج پا کر
ہوتا ہے گمانِ پیکرِ نورانی

سنجیدہ و با وقار انداز کا رعب
مردانہ و پاٹ دار آواز کا رعب
انجام دکھا دیتا ہے آئینے میں
ہر کلمۂ شایستۂ آغاز کا رعب

معقولیت و نرمیِ گفتارِ رسولؐ
آتا ہی نہیں لب پہ کبھی حرفِ فضول
کونین کے دامن میں بکھر جاتے ہیں
تاروں سے چمکتے ہوۓ الفاظ کے پھول

پیشانی کشادہ ہے کتابِ انوار
گنجان بھی، باریک بھی، ابرو خمدار
اللہ کا جیسے ہو الف لکھّا ہوا
دو ابروؤں کے بیچ میں اک رگ کا ابھار

پلکیں ہیں دراز اور ہیں آنکھیں کالی
آنکھوں کے حواشی میں ہے چھٹکی لالی
گوشے سے نگاہوں کا وہ اٹھنا چپ چاپ
صہباۓ حیا جیوں ہو چھلکنے والی

رخ گول، مگر دائرے میں آ نہ سکے
چوکور جسے فریم میں بٹھلا نہ سکے
چہرے کی وہ ساخت کہ اقلیدس چپ
صورت وہ خط و رنگ جسے پا نہ سکے ۱۰۹۰

وہ گندمی رنگت ہے سفیدی مائل
کچھ ورثے میں، کچھ تقوے سے کی ہے حاصل
یہ رنگ ہے صحرا کی شبِ ماہ کا رنگ
جس میں ہیں کڑی دھوپ کے اجزا شامل

چاندی سے ڈھلا جسم تناسب کا کمال
یا احسنِ تقویم میں ڈھلنے کی مثال
اس شخصیتِ یکتا میں دو پہلوۓ حسن
وہ ماہِ جمال اور وہی مہرِ جلال

ہیں انگلیاں لمبی تو کلائ بھی دراز
وسعت میں ہتھیلی کی سخاوت کے جہاز
جو ان کی ہتھیلی سے ہوئ ہے منصوب
وہ نرمی نہ ریشم میں ، نہ مخمل میں گداز

قامت ہے میانہ تو گٹھیلا ہے بدن
گیسو ہیں کہ انگور کی بیلوں کا چمن
چوڑا ہے بہت سینہ، دہن بھی ہے فراغ
ال پتلی صراحی سی ہے لمبی گردن

چلنے میں ہے آگے کی طرف تھوڑا جھکاؤ
رفتار گھٹاتا نہیں، قدموں کا جماؤ
چلتے ہیں تو قدموں سے لپٹتی ہے زمین
للہ قدم سینے سے میرے نہ ہٹاؤ

کرتی ہے صداقت کو اُجاگر تنویر
اس طور سے بڑھ کر ہے یہ سیرت دلگیر
کھینچے ہوۓ اک ہالہ ہے تاریخ کی دھوپ
ہیں آپ حقیقت کی مجسم تصویر ۱۱۱۴

دائرہ در دائرہ کون و مکاں کے اصل مرکز کی طرف
یگنیہ کنڈوں سے اشارہ کرتے
منتر میں ڈوبے ہوئے سر مست شعلوں کا جلال

جو کبھی بجھتی نہیں، اس آگ کی
زعفرانی روشنی کا
مغ بچوں کی صندلی پیشانیوں ہر
جال پھیلاتا جمال

نغمۂ داؤد کی ایمان پرور روشنی
طور کو سرمہ بنانے والا نور
جیوتی بیج اس خون کے قطرے
وہ صلیبِ خشک سے ٹپکے تو پائ
بانجھ نے اولاد
کان بہروں نے
اور نا بیناؤں نے بینائ
سینکڑوں سورج ہزاروں چاند
ہر تپوون، ہر گپھا، ہر دشت و صحرا کے الاؤ
ان گنت پیغمبروں کی صورت و سیرت کی آب و تاب کا یکجا رچاؤ

ایک مرکز پر حقیقت اور اس کی ہر مثال
روشنی سے روشنی محوِ وصال
کیا زمیں کیا آسماں کی روشنی
اِس جہاں اور اُس جہاں کی روشنی
ایک پیکر، ایک صورت بن گئی
شمعِ وحدت بن گئ
آیۂ ختمِ رسالت بن گئ ۱۱۳۹

ایک دن حضرتِ علی نے کہا
کیا ہے سرکار سنّتِ اکبر
تب ہوۓ گویا یوں رسول اللہؐ
اے مرے عم زاد، جانِ جگر
معرفت ہے مری عطاۓ عزیز
عقل ہے میرے دین کا جوہر
عشق۔۔ بنیاد میرے مذہب کی
مرکب شوق پر ہے میرا سفر
میرا مخزن ہے اعتماد مرا
حزن۔۔ میرا رفیقِ شام و سحر
علم۔۔ تیر و تبر ہے میرے لئے
مجھ کو ڈھانپے ہے صبر کی چادر
ہے غنیمت کا مال میری رضا
فخر ہے مجھ کو فقر و فاقے پر
زہد۔ حرفت، یقین۔۔ قوت ہے
میرا احساب۔۔ طاعتِ اطہر
خُلق میرا جہاد اور نماز
قرّۃ العین، جانِ قلب و جگر ۱۱۵۷

اہلِ مکہ کے ستم کی بھٹیوں کے تیز شعلوں میں

ضبط کا لوہا بنا فولاد
ضبر کے سندان پر
بن گیا فولاد سیف
اور پھر یہ ذو الفقار
دم بہ دم کرتی رہی دو لخت
بدر کے میدان میں اہلِ ستم کی ریڑھ کا ہر جوڑ

سامنے جیش القریش
اک ہزار
بالمقابل تین سو افراد!

خیمۂ سالارِ یثرب
یعنی سبز و زرد پتّے پتّیوں کا جھونپڑا!
کہہ رہا ہے ظلم سہنے والوں کا سالار:
’’اے ابی بکرؓ اب نہ سوچو، فکر چھوڑو
خواب میں دیکھی ہے میں نے
حضرتِ جبریل کے دستِ مبارک میں
ایک گھوڑے کی لگام
جس کے نتھنوں پر جمی ہے دن کی تازہ دھول‘‘ ۱۱۷۵

جیشِ مکّہ کا یہ اک جاسوس
کہہ رہا ہے رعشہ بر آواز
تین سو ہیں یوں محمدؐ کے رفیق
لیکن ان کے ساتھ
قافلے یثرب کے، جن پر ہے لدا اسبابِ موت

وہ کھجوری جھونپڑی سے تیر کی مانند نکلا
حوصلہ، ہمت، یقین، ایمان کا پیغامبر
چند کنکریاں اٹھائیں
دشمنوں کی فوج پر پھینکیں
اور بولا:
’’اے پریشاں خاطری، اے ابری، اے انتشار
اس ہجومِ جاہلاں کا کر شکار

چل پڑی اک کالی آندھی
جھکّڑوں میں تیرتے ہیں اجلے شملے
ان گنت جگ مگ فرشتوں کے عماموں کے
صف بہ صف ہے گرد باد
یا خدائ فوج
اور یہ طوفانِ برق و باد
تیز بارش
یہ بشر، خیر البشر، منذر، مبشر اور بشیر
کوئی جادوگر نہیں،کاہن نہیں، ساحر نہیں
ایک باغی جو خدایانِ عرب کے چہروں سے جھوٹے ملمع کو کھُرچنے پر مُصر
ضد، جہالت، بربریّت کے خلاف
اک صداۓ احتجاج
ایک غصّہ ولولہ سرکش امنگ
تنگ آمد ہر کسے آمد بجنگ
امرِ ربّی نے رکھی ہے تھام
اسپِ قوّت کی لگام!!

دیکھ کر اپنے مقابل
حوصلہ، ہمّت، یقین
اعتماد، ایمان
موت سے آنکھیں ملانے کی تمنّاؤں کا اک طوفان
خوف کے مارے قریشی فوج کی ہے ضیق کے عالم میں جان
ہوش گُم، بھولے ہوۓ ہیں فنِّ حرب
جوڑتے ہیں تو لگا جاتے ہیں ضرب
نور کے سیلاب میں
ڈوبتے جاتے ہیں ظلمت کے جزیرے ۱۲۱۲

صداۓ بوق اور ناقوس کی آواز کے ہمراہ
یہ کیسی رعب دار آواز پھیلی ہے فضاؤں میں
نیا دلکش بلاوا لے کے آوازِ بلالؓ آئ
کشش ایسی کہاں ہے مردہ دھاتوں کی صداؤں میں
جب آتی ہے تو تو تن من پران کی جگ موہنی بن کر
عقیدے ہی عقیدت تیر جاتی ہے ہواؤں میں
نوا۔۔ یہ ان نواؤں میں سے ہے جو جان و دل چھو لیں
لپکتا شعلۂ سوزِ دروں ہے جن نواؤں میں
ہمیشہ درس تعلیم و رضا کا دیتی رہتی ہے
یقیں کی گونج بھر دیتی ہے روز و شب خلاؤں میں
سویرے نیند کی شبنم ڈھلک جاتی ہے پلکوں پر
گھٹن محسوس دل کرتا ہے خوابوں کی رِداؤں میں
اذاں دو پہر میں ہر محویت کو چیر جاتی ہے
کہ وہ بھی چونک اٹھیں جو گُم ہیں دنیا کی اداؤں میں
اسی نے ڈوبتے سورج سے کی شمعِ یقیں روشن
یہی ابھری رہی ہے ڈوبنے والی صداؤں میں
اندھیرے میں کڑکتی برق کی مانند کوندی ہے
لکھا اللہ اکبر نور سے تیرہ فضاؤں میں
ہوائیں شانتی کے منتر سن کو جھوم اٹھتی ہیں
تڑپ اٹھتی ہیں بھکتی کی کئی لہریں دِشاؤں میں
جبیں پر ذوقِ سجدہ دستکیں دیتا ہے رہ رہ کر
گنہگاروں کو لاتی ہیں اذانیں پارساؤں میں ۱۲۳۴

دو ہزار اسلامیاں

آگے آگے ناقۂ قصوا پہ میرِ کارواں
چل پڑے کعبے کے عمرے کے لئے
موجزن سینے میں بیت اللہ کا ذوقِ طواف
اور س مولود کی یاد

عمرے کے شیدائیوں میں فاتحوں کی شان
شہرِ مکّہ کے قریشوں کے دِلوں میں خوف سے ہیجان
دیکھ کر ایمان کی چڑھتی ہوئ امواج
عشق کا جوش و خروش
نور کی افواج
کفر ہے رو پوش
بت ہیں بے یار و مدد گار اڑ گئے ہیں کاہنوں کے ہوش
نعرۂ لبیک سے لرزاں خدایانِ قریش

اہلِ مکہ کے تحیّر کی کوئ حد ہی نہیں
دو ہزار اعراب کا یہ اجتماع
نے غناۓ رقص، نے مے، نے زنا
ذوق و شوق و عیش کی کوئ شے نہیں
کعبہ عمرہ سنگ اسود کا طواف
جانی پہچانی رسوم اور جانے پہچانے رواج
ہر پرانی شے نئے مفہوم سے معمور
قوّتیں جو تھیں بتانِ کعبہ سے منسوب، سب کافور

دور آتی ہے نظر رہوارِ مستقبل کی ٹاپوں کی اُڑائ خاک
فرشِ راہِ افلاک
آئینۂ ادراک ۱۲۵۹

کہہ رہا ہے خدا

دیکھنا چاہتے ہو ہمارے نشاں
دیکھ لو
بادلوں سے برستا ہے آبِ حیات
سانس لیتی ہے پھر
قحط خوردہ و مُردہ زمیں
رحمتوں نعمتوں برکتوں کے کئ خواب لادے ہوۓ
از کراں تا کراں کے ممالک کا سباب لادے ہوۓ
پانیوں ہر چلاتے ہیں سِل کوہ پیما جہاز
سینۂ بحر اپنے خزانوں کے منھ کھول کر
غوطہ خوروں کو تقسیم کرتے ہیں گوہر
وسعتوں میں زمیں کی ہیں پھیلے ہوۓ
کتنے انواع و اقسام کے جان دار
رُخ بدلتی ہواؤں کی موجیں
درمیاں آسماں ور زمیں کے
مسخر سحابوں کا دل کش سماں
عقل والو یہ سب کتنے روشن نشاں
ہم ہی تو رات کی کوکھ سے کھینچ لیتے ہیں دِن
ہم نے طے کر دی ہیں چاند کی منزلیں
پھانک سے اس کا بن جانا پھل
اور گھٹنا تو رہ جانا اک منحنی ٹیڑھی میڑھی سی شاخ

دیگر الفاظ میں
مردِ حق آشنا
ناپ لے آسماںچھان لے یہ زمیں
دل میں روشن رہے شمعِ علم الیقین

کھال اپنی ادھیڑ
جسم کا گوشت چھیل
ہڈیوں کی سرنگوں میں گھوم
روح کے ہونٹ چوم
اپنے اندر کی دنیا کا بن سند باد
اپنے باہر کی دنیا میں کر اجتہاد ۱۲۹۱

کعبۃ الکونین

کیا یہی وہ لوگ ہیں؟
تیرا دامن ہو گیا تھا جن پہ تنگ

قبلۃ الکونین
کیا یہی ہیں وہ غریبان الوطن
جو تری سچی محبت کے لئے برداشت کر کے آۓ ہیں صدماتٕ ہجر

مسجد الشٓرفین
ہیں انہیں پیشانیوں پر وہ سجود
جو ہوۓ تھے تیری مٹی سے طلوع

معبد الغربین
یہ وہی دل ہیں جنہوں نے گُل نہیں ہونے دۓ
تیری بے پایاں عقیدت کے دۓ

مرجع القطبین تو انہیں پہچان لے دور رہ کر بھی رہے قبلہ نما

اے مکانِ لا مکاں
لوٹ آۓ تیرے بچھڑے کارواں
تیرے شیدائ عرب کے گوشے گوشے سے کھنچ آۓ

رحمۃ اللعالمینؐ آۓ ہیں کرنے ادا حجّ الوداع آج ہونے والی ہے تکمیلِ دین

یاد گارِ دینِ ابراہیمؑ دیکھ پھر ہے آتشِ نمرود سرد سارے غیر اللہ گرد

دیکھ یہ عرفات کا میدان اپنی قصوا پہ سوار خطبہ فرما ہیں رسولؐ

’’اے مری امت کے لوگو!
غور سے سن لو کہ میرا آخری خطبہ ہے یہ
اب نہ آئندہ برس آۓ گی ملنے کی گھڑی
تم گواہ
اور میرا رب گواہ
میں نے اپنا فرض پورا کر دیا

ہاں یہ سچ ہے ختم شیطاں کی عبادت کا رواج
لیکن اکثر صرف اطاعت سے بھی خوش ہو جاتا ہے اس کا مزاج
اس لئے وسواسِ شیطانی سے رکھو دور دینی کام کاج

تم سبھی ہو امّتی
ہے اخوّت لازمی
تا قیامت جان و مال اک دوسرے کا ہے حرام اک دوسرے پر

روزِ اوّل
جب خداۓ عزّ و جل نے یہ زمین و آسماں پیدا کئے
وقت اسی نقطے پہ واپس آ گیا ہے

(وہ عناصر کی نمو کا وقت تھا
جب ملا تھا مادّے کو حکمِ اظہارِ وجود
آج ہے رازِ ازل احیاۓ ایماں کے لئے)

ہاں گرہ میں باندھ لو
چھوڑ کر جاتا ہوں دو اسناد
ایک قرآنِ حکیم اور دوسری سنّت

تم اگر ان کی ہدایت پر رہے ثابت قدم
تو نہ کھاؤ گے کبھی ٹھوکر
دونوں دنیاؤں میں ہو گے اور رہو گے سرخ رو‘‘

یہ مقامِ صخّرات
یہ نزول آیۂ تکمیلِ دیں
(جھومتا ہے آسماں اور وجد کرتی ہے زمیں)

’’دین اکمل کر دیا
اتمامِ نعمت کر دیا
اسلام تم سب کے لئے ہم نے کیا ہے انتخاب‘‘ ۱۳۴۸

بہت تیز شعلے بھڑکنے لگے ہیں
شبِ ظلم کی طرح فتنے امڈتے چلے آ رہے ہیں
’’خدا کی قسم
تمسّک نہ کرنا کسی اور شے سے
سوا میرے فرمان کے
خدا کی قسم میں نے جو کچھ کیا ہے حلال
وہ قرآن ہی کے مطابق کیا ہے
نہیں حکمِ ربّی و حکمِ رسالت میں کوئ تضاد
وہ قومیں جو نبیوں کی قبروں کو مسجود ٹھہرائیں
ملعون ہیں‘‘

یہ الفاظ ہیں اس نبی کے
جو ختم الرسل ہے
نہ جس نے خدائ کا دعویٰ کیا
نہ جس نے حلولِ خدا کا فسانہ کہا
نہ جس نے کہا "میں مشکّل خدا یا مجسّم خدا زادہ ہوں"
جو خیر البشر تھا مگر تا بہ آخر بشر ہی رہا

محمدؐ کی سورت ہے قرآن میں:
’’کہ (اے اس کی امت کے لوگو)
کرو صرف الہ کی راہ میں جو بھی کچھ ہے تمہارا
مگر تم میں سے کچھ بخیل
خسارے میں اپنی ہی روحوں کو ڈالے چلے جا رہے ہیں
غنی صرف اللہ ہے اور ہم سب فقیر
اگر تم پلٹ جاؤ گے تو خدا دوسری قوم کو بخش دے گا تمہارا مقام
مگر دوسری قوم تم سی نہ ہو گی‘‘

’’مرے دل کبھی بھولنا مت تباہیِ قومِ ثمود
ہمیشہ رہے یاد بربادیِ قومِ عاد
رہے یاد حشرِ گو سالہ پرستانِ قومِ یہود ۱۳۷۵

ہزاروں گھنٹیوں کی گونج میں لپٹی ہوئی آواز آتی ہے
’’خدیجہ ختم عہدِ نوم و راحت
مجھے دنیا کو دینا ہے یہ دعوت
کرو معبود واحد کی عبادت‘‘

زمانے کی رِدائیں چیر کر آواز آئ
محمدؐ کی عبادت کرنے والوں کو خبر ہو
محمدؐ جا چکے ہیں
خدا کی جو عبادت کرنے والے ہیں، انہیں معلوم ہو
خداۓ لا یموت و حی و قیّوم"

غبار و گرد کے پردوں سے اک آواز آتی ہے
’’مرے ابّی کی بوۓ قبر آ جاۓ میسر جس کسی کو
زمانے میں کوئ خوشبو پسند اس کو نہ آۓ گی
مقدّر نے جدائ کا جو صدمہ مجھ کو دے ڈالا
دنوں کو جھیلنا پڑتا یہ صدمہ تو یقیناً
شبِ تاریک میں تبدیل ہو جاتے ابد تک‘‘ ۱۳۹۰

کھنکتی گھنٹیوں کی نقرئ آواز کے گھیرے
سماوی سرمدی آواز کے گھیرے
غبار و گرد کا کہرا ہٹاۓ جا رہے ہیں
فضائیں اس مزمّل کی صدا کے دائرے میں رقص کرتی ہیں
جو استغراق کے عالم کا گرویدہ رہا ہے
کئ راتیں گزاریں جس نے اپنی سرخ آنکھوں میں
کہ آدم زادگاں کفر و جہالت کی سیاہی چیر کر ابھریں
کہ اس کے نام لیواؤں کی آنکھوں کو ملے خوابوں کی جنّت
جو پتھر پیٹ پر باندھے ہوۓ پھرتا رہا
کہ اس کے کلمہ گویوں کو غذاۓ جسم و جاں آۓ میسر ۱۴۰۰

نہ کچھ بعدِ مکانی ہے
نہ کچھ فصلِ مکانی ہے
سفر آرام دہ آسان راہیں ہیں
سفر کا منتہا گم ہے
مسافر کو ملی زائد نگاہیں ہیں
مگر قبلہ نما گم ہے
بلا رفتار پہیے گھومتے ہیں
عطاۓ صنعتِ امروز فرصت اور فراغت
مگر بے چین ہیں ارصاب، دم ہیں بے سکینۃ

مرے احساس کے صحرا میں فکرِ نجد پیمانے
یقیں کا سبزہ زار و لیلیِ ایماں کی خیمہ گاہ آخر ڈھونڈھ لی ہے
تصوّر وادیِ بے آب، جس میں ریت کے تودے ہی تودے
مؤذّن بن گئے ہیں عوسجِ افکار کے پودے
تو نخلستانِ ماضی کی اذاں میرے وجودِ کل سے ٹکرا کر
مرے اندر بکھرتی ہے
ادھڑتی جا رہی ہے کائ چودہ صدیوں کے پانی کی چادر پر
نئے پَر آ گئے ہیں پھر یقیں کے طائرِ قبلہ نما پر ۱۴۱۷

کتاب و سیرت و سنت کے پردوں سے مجھے آواز دیتا ہے
مہ مومنؐ، مستقیمؐ و مستطاب و صاحبِ تقویٰؐ
وہ مسلمؐ، صاحبِ قوّت، اولو العزم و جواں ہمت
وہ محسنؐ، صاحبِ درد و کریم النفسؐ و عالی ظرفؐ
حراۓ دل میں غرقِ فکر ہے کوئی مدثّرؐ
مرے احساس کے یثرب میں ہے کوئی مہاجرؐ
نقوشِ پاۓ جدعا اور قصوا سے رگِ جاں میں چراغاں
مرے باطن کے کعبے میں ہے کوئ فاتحِ مکہ، مبشّرؐ

فضا میں اڑ رہی ہے روشنی دھنکی ہوئی سی
ہزاروں گھنٹیوں کی گونج سے پیدا صداؤں کے بھنور
صداؤں کے بھنور کے قلبِ محزوں میں
طمانیّت، سکینت، شاد مانی کا بسیرا
پسِ حزن و ملال و اضطراب اک انقلاب
بکھرتے ٹکڑے میرے خاکداں کے ایک ہوتے جا رہے ہیں
قدم جمتے ہوۓ معلوم ہوتے ہیں
مرے قدموں کے نیچے پھر زمیں بچھنے لگی ہے
مرے سر پر کھُلا پھیلا ہوا اک آسماں لحسوس ہوتا ہے

مصائب کے سمندر سے کہاں سے ڈھونڈھ لایا دل
ستارہ، بادباں، پتوار، کشتی، ناخدا، ساحل
وہی قبلہ نما ، ایمان محکم، ہستیِ کامل
مبارک دم قدم سے جس کے حق آیا، گیا باطل

جہانِ جاں سے غیر اللہ کا ڈر دور ہوتا ہے
روانی اور حرارت سے لہو معمور ہوتا ہے
سفر آمادہ پھر میرا دلِ معذور ہوتا ہے

مرے احساس میں اک روشنی سی پھیل جاتی ہے
سکوتِ موت پر اک نغمگی سی پھیل جاتی ہے
کھنکتی گھنٹیوں کی نقرئی آواز آتی ہے ۱۴۴۳

لِیَخرَجَ الَّذِینَ آٰمَنُوا عَمِلُو الصَّالحِٰتِ مِنَ الظُّلُمَاتِ اِلَی النُّور

حواشی

عنوانِ نظم: مشکوٰاۃ۔ حارث بن ہشام کے پوچھنے پر کہ وحی کیسے آتی ہے، رسول اللہؐ نے فرمایا
اَحیَاناً یٓاتِینِی مِثلَ صَلصَلَۃُ الجَرَس
۳۱۱ تا ۳۱۵: قرآن: ۲۹: ۴۸
۳۲۶ تا ۳۲۷: قصیدہ بردہ از امام بوصیریؒ
کَالشَمسِ تَظہَرُ لِلعِینُ مِن بُعدٍ
صَفِیرۃً وَ لِکُلِّ الظّرَفَ مِن اُمَمٍ
۵۸۳ تا ۵۸۷: قرآن: ۹۶: ۱ تا ۵
۶۲۸ تا ۶۲۹: قرآن ۷۴: ۱ تا ۳
۶۳۰ تا ۷۱۲: مشکوٰۃ، سیرۃ ہشام
۷۰۰ تا ۷۰۱: قرآن ۱۷: ۵۳
۷۱۳ تا ۷۲۶: قرآن ۴۱:۴۱۔۴۲، ۴۴: ۱۸ تا ۲۲، ۷:۵۹
۸۰۴ تا ۸۱۱: قرآن ۲۳:۲۵
۸۱۲ تا ۸۲۱: امام غزالیؒ
۸۸۲ تا ۸۸۷: قرآن ۱۱۱: ۱ تا ۵
۸۸۷ تا ۹۹۷: قرآن، مشکوٰۃ، انجیل، دانتے، ملٹن
۱۱۴۴ تا ۱۱۶۱: المعرفت راس المالی والعقل اصل دینی
والحب اساسی والشوق مرکبی
وذکر اللہ انیسی والثقتہ کنزی
والحزن رفیقی والعلم سلاحی
وابصر ردانی والرضا غنیمتی
والفقر فخری والزہد حرفتی
والیقین قوتی والصدق شفیعی
والطاعۃ حسبی والجہاد خلقی
وقرۃ عینی فی الصلوٰاۃ
۱۲۶۰ تا ۱۲۸۰: قرآن ۲:۱۶۴، ۳:۱۹، ۱۲:۱۷ ، ۴۶:۳۰، ۳۱:۳۱، ۲: ۲۰ تا ۲۳، ۴۱: ۳۹۔۴۰
۱۳۴۶ تا ۱۳۴۸: قرآن ۳:۵
۱۳۴۹ تا ۱۳۵۸: حدیث
۱۳۶۶ تا ۱۳۷۲: قرآن ۳۸:۴۷
۱۳۷۷ تا ۱۳۷۹: حدیث
۱۳۸۱ تا ۱۳۸۴: صدیق اکبرؓ
۱۳۸۴ تا ۱۳۹۰: فاطمۃ الزہرا
نظم کے مصرعوں کی تعداد ۱۴۴۳ ہے، یہ تعداد اس رعایت سے کہ امسال ۱۳۹۰ھ میں جب یہ نظم پایۂ تکمیل کو پہنچی، قمری حساب سے ۱۴۴۳ میلادی چل رہا ہے

***
ٹائپنگ، پروف ریڈنگ، ای بک کی تشکیل: اعجاز عبید