عام آدمی کے خواب

(افسانے)

جلد اول رشید امجد

احوال واقعی

یہ اس کتاب کی پہلی جلد ہے۔ مکمل اصل کتاب میں سے دو طویل کہانیاں ’سمندر قطرہ سمندر‘ اور ’الف کی موت کی کہانی‘ اور ایک اور مختصر مجموعہ ’مرشد‘ کو نکال دینے کے بعد جو کتاب اور اس کی کہانیاں باقی بچی ہیں، ان کو دو جلدوں میں شایع کیا جا رہا ہے۔ یہ اس برقی کتاب کی پہلی جلد ہے۔
ا۔ ع۔

یہ کہانیاں ایک عام آدمی کے وہ خواب ہیں جو اُس نے زندگی بھر دیکھے، لیکن تمام تر جدوجہد اور خواہشوں کے باوجود تعبیر نہ پا سکے کیونکہ وہ ایک عام آدمی تھا، ایک عام آدمی کے گھر پیدا ہوا، جیا اور ایک عام آدمی کی حیثیت سے مر گیا، لیکن اُس نے خواب دیکھے اور خواب وراثت میں منتقل ہو جاتے ہیں ، وراثت میں منتقل کرنے کے لیے اُس کے پاس اور کچھ تھا بھی نہیں ، سو اُس نے اپنے خواب اپنے بیٹے کو جو اُسی کی طرح عام آدمی تھا، منتقل کر دئیے، اس امید کے ساتھ کہ جدوجہد ایک نسل سے دوسری، تیسری اور کئی نسلوں تک جاری رہتی ہے، یہ ایک امید ہے کہ شاید کسی دن ان خوابوں کو تعبیر مل جائے۔۔۔ یہ کہانیاں اسی خواہش کی مختلف تصویریں ہیں۔

رشید امجد

میں کیوں لکھتا ہوں

’’اور جس نے یہ دعویٰ کیا کہ میں نے اُس کو حقیقتاً پہچان لیا ہے، اُس نے اپنے وجود کو معروف کے وجود سے بھی زیادہ عظیم اور بزرگ تر کر لیا، کیونکہ جو شخص کسی چیز کو اُس کی حقیقت کی تہہ تک پہنچ کر پہچان لیتا ہے وہ دراصل اُس چیز سے بھی زیادہ قوی ہو جاتا ہے‘‘ حسین بن منصور حلاج کا یہ قول ’’طواسین‘‘ میں درج ہے۔ لکھنا بھی ایک اظہار ہے اور اس اظہار کی توفیق اُسی کو حاصل ہوتی ہے جو حقیقت کو پہچان لیتا ہے، مجھے لکھنے کا دعویٰ نہیں ، اپنے تئیں میں لکھنے کی کوشش کر رہا ہوں کہ میں حقیقت کو اس کی تہہ تک پہنچ کر پہچاننا چاہتا ہوں۔ یہ نامعلوم کی تلاش ایک ایسا سفر ہے جس میں اپنا آپ گم ہو جاتا ہے۔ زماں کیا ہے اور مکاں سے پہلے وہ کس صورت میں تھا؟وہ جو دور سرمئی دھند میں کہیں چھپا بیٹھا ہے، کیا ہے اور کون ہے؟ میرا اس سے تعلق کیا صر ف خالق اور تخلیق کا ہے یا اس اسرار میں ، میرا بھی کوئی کردار ہے، یہ وہ سوال ہیں جو مجھے لکھنے پر مجبور کرتے ہیں۔
اظہار ایک بنیادی شے ہے، ہر وجود اپنا اظہار چاہتا ہے اور اس اظہار کے لیے مختلف وسیلے تلاش کرتا ہے۔ میرا وسیلہ لفظ ہے چنانچہ میں لفظوں کو جوڑ کر وہ جملہ بناتا ہوں جو میرے باطن کو منکشف کرتا ہے۔ یہ ایک طویل ریاضت ہے، جس کا پہلا مرحلہ اپنے آپ کو جاننا ہے۔ اپنی شناخت اور پہچان کہ اس کے بعد ہی اگلا سفر شروع ہو تا ہے۔ سفر صرف خارجی نہیں ہوتا، خارجی سفر میں تو درمیانے یا اچھے درجے کا سفر نامہ ہی ہاتھ آ سکتا ہے، ایک سفر اندر کا بھی ہے، بہت ہی پر اسرار لمحہ لمحہ، قدم قد م چلتے جانا اور اس تجربے کو لفظوں کی مالا میں پُر و کر تخلیق بنا لینا، یہی لکھنے کی بنیاد ہے۔
میرے خواب، خواہشیں اور بے تاب تمنائیں وہ سامان ہیں جن سے میں لکھنے کا اہتمام کرتا ہوں۔ اور یہ میرے باطن سے بھی تعلق رکھتی ہیں اور خارج سے بھی، خارج سے یوں کہ میں جس معاشرے میں رہتا ہوں ، اس کے مسائل و معاملات میرے بھی ہیں۔ ان میں بہتری کی تمنا اور آئیڈیل کے خواب میری تحریروں میں آدرش بنتے ہیں ، لیکن میرا دائرہ صرف خارج تک محدود نہیں ، میرے اندر بھی ایک دنیا موجود ہے اور اُس کے سوالات مختلف ہیں۔ میری شناخت کی دو سطحیں ہیں جن کے اظہار کیلیے میں لکھتا ہوں ، اول یہ کہ اس معاشرے میں ، میں کہاں کھڑا ہوں ، کس طبقہ کا فرد ہوں اور اس طبقاتی تضاد کے ظلم سے خود کو اور اپنے عہد کو کیسے بچا سکتا ہوں۔ اس طبقاتی معاشرے میں کیا میری شناخت صرف میرا شناختی کارڈ نمبر ہے، یا میں اس معاشرے میں کہیں اور بھی وجود رکھتا ہوں۔ یہ میری تحریروں کا سماجی اور سیاسی پس منظر ہے، میں بار بار کیوں فتح کر لیا جاتا ہوں میری رائے کہاں ہے اور اس کی حیثیت کیا ہے؟میں اپنی لکھتوں میں اس کا جواب تلاش کرنے کی کوشش کرتا ہوں ، اسی لیے لکھتا ہوں ، لیکن یہ میرے ہونے کا خارجی لمحہ ہے، میری شناخت کا ایک داخلی اور باطنی لمحہ بھی ہے اور و ہ یہ کہ میں کون ہوں ؟اس عظیم کائنات میں میرا وجود کیا معنی رکھتا ہے، میں ہوں بھی یا نہیں ، یہ دائرہ در دائرہ سچ کا سفر کہاں ختم ہوتا ہے، ایک لمحہ ہے جہاں سر گشتگی اور تحیر کے سوا کچھ نہیں ، جو راز ہے وہ راز ہی ہے۔ میں اس لیے بھی لکھتا ہوں کہ یہ راز مجھ پر منکشف ہو جائے اور اس انکشاف سے مجھے جو مسرت اور سرشاری ملتی ہے میں اپنے قاری کو اس میں شریک کرنا چاہتا ہوں ، اسی لیے تو میں نے خرقہ اتار کر قلم سنبھال لیا ہے کہ سچ کی کوئی زبان، کوئی انداز، کوئی بھیس لباس نہیں ہوتا۔
میں عام شخص کے لیے نہیں لکھتا، میرا قاری مجھے خود تلاش کرتا ہے، میری لذتوں میں وہی شریک ہو سکتا ہو جو میرے تجربے کی اسراریت کو محسوس کر سکتا ہے۔ میں کہانی جوڑتا نہیں ، ٹکڑے اکٹھے نہیں کرتا۔ کہانی ایک خیال کی طرح میرے ذہن میں آتی ہے اور تخلیقی عمل سے گزر کر ایک وحدت کی طرح کاغذ پر بکھر جاتی ہے۔ میں اس کے لیے لفظ تلاش نہیں کرتا، یہ خیال اپنے لفظ خود لے کر آتا ہے، میری تخلیقی دنیا بہت سوں سے مختلف ہے، میرا تخلیقی عمل بھی مختلف ہے۔ میں جو کچھ لکھتا ہوں یہ میری باطنی واردات ہے۔ا س میں میرا ماحول اور معاشرہ بھی آ جاتا ہے کہ بہر حال میں اس کا ایک فرد ہوں ، لیکن میں اپنی پہچان ایک سماجی ماہر کے طور پر نہیں کرانا چاہتا، میں ایک تخلیقی فنکار ہوں اور جہاں فن آئے گا وہاں تکنیک بھی ہو گی۔ تکنیک اور فن ہو گا تو اسلوب بھی آئے گا یہ سب مل کر جو کچھ بنائیں گے اسے دو جمع دو چار کی طرح نہیں سمجھا جا سکتا، اس کی تفہیم کا طریقہ مختلف ہو گا۔
میں اس لیے لکھتا ہوں کہ مجھے اپنے ہونے کا احساس رہے، یہ میری مجبوری نہیں میرا اظہار ہے کہ اظہار کے بغیر کسی شے کا کوئی وجود نہیں ہوتا، جو وجود رکھے گا وہ اس وجود کا احساس بھی کرائے گا۔ جیسا میں نے کہا میرے اظہار کا ذریعہ لفظ ہے، میں لفظوں کو جوڑ جوڑ کر اپنے آپ کو منکشف کرتا ہوں۔ معاشرے میں میرا سفر ناک کی سیدھ میں نہیں ، جو کچھ نظر آتا ہے میرے تجربے، مشاہدے اور مطالعے کا حصہ بنتا چلا جاتا ہے، جب میں لکھنے بیٹھتا ہوں تو یہ تجربہ میری کہانی میں ایک خارجی معنویت پیدا کرتا ہے، اسے سماج سے جوڑتا ہے اور اس میں روح عصر اور جدید حسیت پیدا کرتا ہے۔ میرا باطنی سفر پیچ در پیچ ہے کہ یہاں کوئی منزل نہیں ، ایک سرمئی دھند ہے جس میں چلتے رہنا، چلتے ہی رہنا، ایک مبہم سی سچائی، ایک ایسا تجربہ جسے بیان کرنے کے لیے علامت اور استعارہ کی ضرورت پڑتی ہے، در حقیقت یہی میری کہانی کا اثاثہ ہے۔ یہ میری کہانی کا باطن ہے۔ اس کی اندرونی معنویت، جو اسے ماورائے عصر بناتی ہے۔
لکھنا۔۔۔ ادب لکھنا ایک پیچیدہ عمل ہے، ایک ایسا تخلیقی پراسیس جسے قطعیت کے ساتھ بیان کرنا بہت مشکل ہے۔ خیال کس عمل سے گزرتا ہے اور کیونکر ایک فن پارے کی صورت اختیار کرتا ہے، اس کے بارے میں قیاس آرائی ہی کی جا سکتی ہے، اور اس سے بھی زیادہ مشکل اس سوال کا جواب ہے کہ آپ کیوں لکھتے ہیں ؟بس میں لکھتا ہوں کہ مجھے لکھنا آتا ہے، شائد نہیں ، یہ جواب مکمل نہیں۔ میں لکھوں نہ تو اور کیا کروں کہ مجھے اور کچھ آتا ہی نہیں۔ اظہار کے راستے تو آدمی ڈھونڈ ہی لیتا ہے، اس لیے یہ بھی کوئی مناسب جواب نہیں تو پھر کوئی کیوں لکھتا ہیَ؟ شہرت کے لیے، کسی آدرش کی تکمیل کے لیے، صرف اپنی ذات کے اظہار کے لیے۔۔۔ میرا خیال ہے کہ یہ سب باتیں مل کر وہ اکائی بناتی ہیں جو لکھنے کا محرک ہوتی ہے۔ جس طرح کسی اچھے فن پارے کو ٹکڑوں میں نہیں بانٹا جا سکتا، کہ اچھا فن پارہ صرف خیال یا صرف اسلوب یا صرف تکنیک یا صرف جذبے کی بنیاد پر اچھا نہیں ہوتا بلکہ یہ سب جب ایک تناسب سے ایک اکائی میں ڈھل جاتے ہیں تو بڑا فن پارہ وجود میں آتا ہے۔ اسی طرح لکھنا بھی ایک مکمل عمل ہے۔ لکھنے والا اپنے سماجی عمل سے بھی وابستہ ہوتا ہے اور اس سے ماورا ایک اور حقیقت کو بھی تلاش کر رہا ہوتا ہے اگر وہ صرف سماجی اظہار تک محدود رہ جائے تو دوسرے درجے کا حقیقت نگار بن جائے گا، جس کے لیے سادہ بیانیہ ہی کافی ہے لیکن اگر وہ سماجیات کے ساتھ ساتھ اَن دیکھے کو بھی دیکھنا چاہتا ہے تو اس کے عمل میں پیچیدگی آ جائے گی جس کے اظہار کے لیے علامت اور استعارے کی ضرورت محسوس ہو گی۔ اب یہ ہر لکھنے والے کا اپنا ظرف اور استطاعت ہے کہ وہ اپنے آ پ کو کہاں رکھنا چاہتا ہے اور کن میں مقبول ہونا چاہتا ہے۔
لکھنے کے لیے ایک اضطراب اور بے چینی بہت ضروری ہے، یوں بھی نفس مطمئنہ کس کو ملا ہے، کشف کے بڑے سے بڑے تجربے کے بعد بھی ایک کسک، ایک بے چینی تو موجود رہتی ہے، لکھنا بھی ایک مکاشفہ ہی ہے۔ لکھنے والا مطمئن ہو جائے تو صورتِ حال کا غلام بن جاتا ہے، اس کے اندر دربار داری پیدا ہو جاتی ہے اور وہ اپنے لفظوں سے وہی کام کرتا ہے جو بھانڈ اپنی حرکتوں اور پھبتیوں سے کرتا ہے۔ تفریح اور حظ آفرینی میں ایک فرق ہے۔ لکھنے والا اپنی تحریر میں خود موجود ہوتا ہے۔ میں اپنے ہر کردار کے اندر بھی ہوں اور اس سے باہر بھی۔ ایک اضطراب مجھے لیے لیے پھرتا ہے۔ کسی ان دیکھے، نامعلوم کی تلاش میں ، یہ اضطراب ختم ہو جائے تو میرے اندر کا لکھنے والا مر جائے گا۔ کہتے ہیں کوئی درویش ہمیشہ یہ دعا مانگتا تھا کہ ’’اے خدا مجھے مضطرب رکھ‘‘ کسی نے کہا، ’’تو عجب شخص ہے، لوگ خدا سے اطمینان مانگتے ہیں اورتو اضطراب کا طالب ہے۔‘‘ درویش بولا،’’یہ اضطراب ہی تو میرے ہونے کی دلیل ہے‘‘ سو میں بھی ہمیشہ اضطراب کی دعا مانگتا ہوں کہ میرا بے چین ہونا، میری تحریروں کی زندگی ہے۔ میرے عہد کے جو لکھنے والے بے چینی کی دولت سے عاری ہیں ، وہ قصیدے لکھ رہے ہیں ، لطیفے سنا رہے ہیں اور تالیاں پٹوا رہے ہیں ، ان میں اور شو بز کے لوگوں میں کوئی فرق نہیں ، ان کی زندگی سٹیج پر پردہ گرنے تک محدود ہے۔ اس لیے ہر لکھنے والے کو انتخاب کرنا پڑتا ہے کہ وہ کہاں کھڑا ہونا چاہتا ہے۔ ویسے انتخاب کا مرحلہ تو ہر لمحے موجود ہوتا ہے اور اپنی مرضی کے مطابق چلنے کے لیے بہت کچھ قربان کرنا پڑتا ہے۔ غالبؔ اگر ذوقؔ کی راہ پر چلتے تو وقتی شہرت تو ضرور مل جاتی لیکن پھر وہ بھی اس طرح کے مصرعے کہتے:-
؎ شیر سیدھا تیرتا ہے وقتِ رفتن آب میں
وہ اس دکھ کا اظہار نہ کرتے
؎ گر نہیں ہیں مرے اشعار میں معنی نہ سہی
لیکن وقت سب سے بڑا نقاد ہے اس کی چھلنی میں سے گزر کر غالبؔ ہی زندہ رہتا ہے، ہر لکھنے والے کو اس نکتہ پر غور کرنا چاہئیے۔
میں اس لیے لکھتا ہوں کہ اپنا اظہار چاہتا ہوں ، اپنے عہد اور اس کے آشوب کو لفظوں میں زندہ کرنا چاہتا ہوں۔ ایک آدرش کی تکمیل چاہتا ہوں کہ کبھی تو وہ غیر طبقاتی آئیڈیل معاشرہ وجود میں آئے گا جہاں میں اور مجھ ایسے سب سر اٹھا کر چل سکیں گے، ہمیں کوئی فتح کرنے والا نہیں ہو گا، ہماری رائے کی اہمیت ہو گی۔ یہ خواب سہی، میری بے تاب تمنائیں سہی، لیکن میری تحریروں کا اثاثہ یہی خواب اور یہی تمنائیں ہیں۔ میں تو درویش بننا چاہتا تھا لیکن اس کا ظرف نہ تھا، دنیا دار اس لیے نہ بن سکا کہ دنیاداری کا سلیقہ نہ تھا، سو میں نے لکھنے والے کا بھیس اپنا لیا ہے کہ اپنا تماشا دیکھوں اور دوسروں کا بھی۔
’’ازل سے ابد تک ایک خواب، ایک پر اسرار سرمئی دھند جس میں کچھ دکھائی دیتا ہے کچھ نہیں ، اور میں جو وجود اندر وجود ایک چھوٹا سا جرثومہ ہوں کائنات کی وسعتوں کو دریافت کرنے چلا ہوں ، عظمت کی یہ تلاشا نا کی تسکین کے سوا اور کیا ہے؟‘‘
’’میں ہوں۔۔۔ ‘‘ یہی میرے لکھنے کا جواز ہے!
٭

میں اور میرے کردار

میں اور میرے کردار، ایک دوسرے کے ساتھ زندہ ہیں۔ کبھی یوں ہوتا ہے کہ یہ کردار مجھے اپنے سے باہر کہیں دکھائی دیتے ہیں ، آہستگی سے میرے قریب آتے ہیں اور پھر جست لگا کر میرے اندر کہیں گم ہو جاتے ہیں ، مدتیں گزر جاتی ہیں ، مجھے ان کی کوئی خبر نہیں ملتی، پھر کسی دن اچانک وہ میرے باطن سے نمودار ہو تے ہیں اور میری کسی کہانی میں لفظوں کا لباس اوڑھ کر اپنی ایک پہچان بنا لیتے ہیں ، کبھی یوں بھی ہوتا ہے کہ یہ کردار میرے اندر ہی کہیں جنم لیتے ہیں ، کسی دن اچانک باہر نکل کر ہجوم میں گم ہو جاتے ہیں ، میں انہیں تلاش ہی کرتا رہ جاتا ہوں ، ان کی پرچھائیاں میری کہانیوں میں بے نام کرداروں کی صورت ’دوسری ذات، کی تلاش بن جاتی ہیں۔
جس زمانے میں ، میں واہ کالج میں تھا تو روزانہ بس میں آنا جانا ہوتا، جاتے ہوئے اکثر ایک بوڑھا شخص مجھے اپنی جانب متوجہ کر لیتا، میلے کپڑوں ، پھٹی جوتی اور گندے صافے میں بھی اس کے چہرے کی جھریوں میں زمانے رینگتے نظر آتے۔ وہ عموماً ٹیکسلا موڑ پر اتر جاتا۔ ایک دن وہ کسی سے باتیں کر رہا تھا تو مجھے معلوم ہوا کہ وہ پتھر تراشتا ہے، ان سے ڈیکوریشن پیس اور مورتیاں بناتا ہے، کئی دن گزر گئے بس آگے پیچھے ہو جاتی تو میری اس سے ملاقات نہ ہوتی، ایک دن مجھے لگا کہ اس نے اپنی نشست سے جست لگائی ہے اور میرے اندر کہیں ڈوب گیا ہے۔ میں نے اسے تلاش کرنے کی بہتیری کوشش کی لیکن اس کا کوئی سراغ نہ ملا۔ عرصہ گزر گیا، ایک دن کالج سے واپسی پر بس ٹیکسلا موڑ پر رکی تو وہ بوڑھا بہت سے دوسرے لوگوں کے ساتھ میرے اندر سے نکل آیا۔ بس رک گئی، یا شاید چلتی رہی، سارا منظر بدل گیا۔
’’میرے اندر کوئی چیز تیزی سے پھیلنے لگتی ہے۔ بس نے رفتار پکڑ لی ہے۔ سڑک کے دونوں طرف کے مناظر تیزی سے دوڑ رہے ہیں ، میرا وجود سیٹ کی گرفت سے نکل کر بس میں پھیلنے لگا ہے۔ کوئی میرے قریب سے سرگوشی کرتا ہے۔ میں گھبرا کر چاروں طرف دیکھتا ہوں ، باہر سنسناتی ہوئی ہَوا مسلسل بڑبڑا رہی ہے:
’’ٹیکسلا۔۔۔ ٹیکسلا۔۔۔ ٹیکسلا۔۔۔ ‘‘
میرا وجود ساری بس پر چھا جاتا ہے۔ بس کے اندر کی ہر چیز اس میں سمٹ جاتی ہے۔ اب میں سڑک پر دوڑ رہا ہوں۔ کٹے پھٹے زخمی میدان تیزی سے پیچھے رہ رہے ہیں۔ چاروں اور دور دور تک زمین بنجر اور ویران ہے۔ اِکا دُکا درخت بھی نظر آ رہے ہیں۔ میرا وجود اب سڑک کی گرفت سے نکلنے کے لیے جد و جہد کر رہا ہے لیکن دونوں کنارے مجھے مضبوطی سے پکڑے ہوئے ہیں۔ میں کناروں کے ساتھ ساتھ کئی میل تک دوڑتا چلا جا رہا ہوں ، دفعتہً ایک طرف کا کنارہ کچھ ٹوٹتا ہوا محسوس ہوتا ہے۔ میں سمٹ کر جلدی سے اس کی راہ باہر نکل جاتا ہوں اور تیزی سے پھیلنے لگتا ہوں۔ اب کوئی حدبندی نہیں۔ میں پورے میدان پر چھا رہا ہوں۔ چٹیل پن ختم ہو رہا ہے اور اس کی جگہ گھنا لہلہاتا جنگل ابھر رہا ہے۔ میرا وجود پھر سمٹنے لگتا ہے۔‘‘
یہ اقتباس میرے افسانے ’’سمندر قطرہ سمندر‘‘ سے ہے۔ اس افسانے کا خیال مجھے اس ادھیڑ عمر نے سجھایا تھا جسے میں بس میں جاتے دیکھا کرتا تھا۔ لمبے گھیرے کی شلوار، کھلی بانہوں کا میلا کُرتا اور پاؤں میں پھٹی جوتی والا یہ بوڑھا میرے اندر اتر گیا تھا اور جب باہر آیا تو اپنے ساتھ بڑے مندر کی رقاصہ کوشلیا، کلاکار دیا شنکر، مدن موہن، پنڈت چندر، پروفیسر کلیم اور نجمہ محمود علی کو ساتھ لے آیا۔ یہ سارے کردار مجھے وقت کی قید سے نکال لے گئے۔ میں نے ٹیکسلا کی عظمتوں کو لشکارے مارتے دیکھا، پھر اس کے اجڑنے کا منظر بھی میرے سامنے آیا۔ اس کے کھنڈروں میں گائیڈ کی بات سنی:
’’جی ہاں ، یہ ٹیلہ کبھی مندر تھا جہاں گوتم کی داسیاں گیت گایا کرتی تھیں۔‘‘
عنائت اللہ نے مجھ سے کہا تھا۔۔۔ ’’موت کتنی بھیانک شے ہے۔ چیزوں کے چہرے مسخ کر دیتی ہے۔‘‘
اور میں نے جواباً کہا تھا۔۔۔ ’’ہاں ، وہ انسانوں کی طرح شہروں پر بھی نازل ہوتی ہے، عنائت ہمارے چہرے کتنے بدل چکے ہیں۔‘‘
اور پھر انہی کھنڈرات میں سے مَیں نے ٹیکسلا کو نیا جنم لیتے دیکھا تھا۔ وہاں ہیوی کمپلیکس بن رہا تھا۔ وہاں ایک بڑی اسلحہ ساز فیکٹری قدم جما رہی تھی۔ سارے علاقے پر چھائی دھوئیں کی چادر ٹیکسلا کی نئی زندگی کی نوید دے رہی تھی۔ مدتوں سے سویا ہوا یہ عظیم شہر آنکھیں مل رہا تھا۔ میں خوشی سے ناچنے لگا تھا۔ ٹیکسلا سانس لے رہا ہے۔۔۔ ٹیکسلا سانس لے رہا ہے، اور میرے سامنے کی سیٹ پر بیٹھا وہ بوڑھا زیر لب مسکرا رہا تھا۔ اس کردار نے مجھے ’’سمندر قطرہ سمندر‘‘ جیسا افسانہ عطا کیا تھا جسے میں اپنے بہترین افسانوں میں شمار کرتا ہوں۔
بوڑھے پراسرار کردار مجھے اکثر اپنی طرف متوجہ کر لیتے ہیں۔ ایک شام ایک دوست کو لینے بس اڈے پر انتظار کرتے مجھے اسی طرح کا ایک بوڑھا دکھائی دیا جو ایک بینچ پر بیٹھا چائے کی چسکیاں لے رہا تھا۔ میں اس کے قریب بیٹھ گیا۔ ہم دونوں نے ایک دوسرے سے کوئی بات نہ کی لیکن وہ مجھے اپنی کہانی سنا گیا۔ میری کہانی ’’پھول تمنا کا ویران سفر‘‘ انہی خوشبوؤں کی عطا ہے جو ہم دونوں نے اسی بینچ پر بیٹھے بیٹھے ایک دوسرے کے ساتھ اشتراک کی تھیں۔
بعض کہانیاں عجب طرح جنم لیتی ہیں۔ فتح محمد ملک کی کتاب چھپ رہی تھی۔ اس کی کتابت اعجاز کھوکھر نے کی تھی۔ ایک اتوار ان کے گھر غلطیاں لگانے کا کام ہوا۔ واپسی پر میں جڑی ہوئی کاپیاں ساتھ لے آیا کہ ایک نظر دیکھ لوں۔ لفافہ ٹیکسی میں رہ گیا۔ دو تین دن تلاش ہوئی لیکن مسودہ نہ ملا۔ اعجاز کھوکھر کو کتاب نئے سرے سے لکھنا پڑی لیکن مجھے ایک عجب کہانی مل گئی۔ اس کہانی کا عنوان ’’بانجھ لمحے میں مہکتی لذت‘‘ ہے۔
’’کیا بات ہے؟ کیا ہوا؟‘‘ بیوی اس کے شانے پر ہاتھ رکھتے ہوئے بولی۔۔۔ ’’خیریت توہے نا، تم ٹھیک ہو نا۔‘‘
وہ ایک لمحہ خالی نظروں سے اسے دیکھتا رہا پھر بولا۔۔۔ ’’کل رات میں خود کو ٹیکسی میں بھول آیا ہوں۔‘‘
بیوی نے لمحہ بھر کے لیے حیرت سے دیکھا لیکن اگلے ہی لمحے جھنجھلاہٹ اس کے سارے چہرے پر رینگنے لگی۔۔۔ ’’کیا‘‘
’’ہاں ‘‘ وہ رک رک کر کہنے لگا ’’ٹیکسی جب گلی کی نکڑ پر رکی تو بے خیالی میں مَیں خود کو پچھلی سیٹ پر ہی بھول گیا۔‘‘
بیوی نے سر پر ہاتھ مارا اور بولی۔۔۔ ’’تو یہ کون ہے؟‘‘
’’ارے واقعی یہ کون ہے؟‘‘ اس نے اپنے آپ کو اور پھر بچوں کو دیکھا جو حیرت سے منہ کھولے ان کی باتیں سن رہے تھے۔
’’واقعی یہ کون ہے؟‘‘
لمحہ بھر خاموشی رہی، پھر بولا۔۔۔ ’’ہو سکتا ہے یہ وہی ٹیکسی ڈرائیور ہو جس کی ٹیکسی میں مَیں گھر آ رہا تھا، یا پھر کوئی اور ہو۔۔۔ کوئی بھی‘‘
میرے پہلے افسانوی مجموعے ’’بے زار آدم کے بیٹے‘‘ میں تو بعض کردار اپنے اصلی ناموں سے بھی آ گئے ہیں۔ مثلاً سرور کامران، مظہر الاسلام وغیرہ اور کہیں یہ کردارا اور ب کی صورت میں نمودار ہوئے ہیں۔ ’’بے زار آدم کے بیٹے‘‘ کے یہ دونوں بنیادی کردار میں اور مظہر الاسلام ہیں۔ میںا ہوں اور مظہر ب ہے۔ یہ ہم دونوں کی سچائیوں کی تلاش کا سفر ہے جو شاید مکمل نہیں ہو پایا لیکن یہیں ’’ریت، رسی اور موت‘‘ بھی ہے جس کے کردار جمیلہ شاہین، سرور کامران اور میں اپنی شناخت کے ساتھ موجود ہیں۔ اسی مجموعے میں وہ لڑکی بھی ہے جسے تصویریں بنانے کا شوق تھا اور میں جب بھی اسے چھونے کی کوشش کرتا وہ رنگوں کی پیالی میں ڈبکی لگا جاتی۔ میں پہروں ان پیالیوں کے پاس بیٹھا اس کے باہر نکلنے کا منتظر رہتا۔ وہ باہر نکلتی تو یوں رنگوں میں لتھڑی ہوئی ہوتی کہ میری انگلیاں پھسل جاتیں اور پھڑپھڑا کر اُڑ جاتی۔۔۔ دور، بہت دور۔
یہ وہ دور تھا جب میں ان کرداروں کو اپنے آس پاس تلاش کیا کرتا تھا، مل جاتے تو میری باچھیں کھِل جاتیں۔ میں انہیں گھیر گھار کر اپنے تخلیقی سیلف کے حوالے کر دیتا جو ان کی تراش خراش کرتا رہتا اور پھر کسی دن بنا سنوار کر کسی کہانی کے طاق میں بٹھا دیتا۔ پھر میرے اندر کوئی ایسی تبدیلی آئی کہ میں نے کرداروں کو باہر تلاش کرنے کے بجائے اپنے اندر ڈھونڈنا شروع کر دیا کہ مجھ پر منکشف ہوا ہے کہ میرے اندر جو جہان ہے وہ باہر کی دنیا سے کہیں بڑا، پراسرار اور عظیم ہے۔
میں پہلی بار کراچی گیا تو اعجاز راہی مجھے سمندر دکھانے لے گیا۔ سمندر کو پہلی بار دیکھ کر مجھ پر ایک عجیب محویت طاری ہو گئی۔ میں نے اعجاز سے کہا۔۔۔ ’’میں پہلی بار سمندر دیکھ رہا ہوں ، یہ لمحہ کتنا عجیب ہے۔‘‘
دفعتہً کوئی کھلکھلا کر ہنسا۔ یہ سمندر تھا۔ مجھے حیرت زدہ دیکھ کر بولا۔۔۔ ’’میں تو ہمیشہ سے تمہارے اندر موجود ہوں ، یہ حیرت کس لیے؟‘‘
’’دن کے وقت سمندر میرے گھر سے تیرہ سو چھبیس کلومیٹر دور ہوتا ہے لیکن جونہی رات گھنی سیاہ پلکیں اٹھا کر شہر کے چوک میں اترتی ہے، سمندر رینگتا رینگتا میرے کمرے کی دیوار سے آ لگتا ہے اور نرم لچکیلی انگلیوں سے بند کھڑکی پر دستکیں دیتا اور میرا نام لے لے کر پکارتا ہے۔‘‘
(میلہ جو تالاب میں ڈوب گیا)
ایک دن میں نے رخسانہ سے کہا تھا۔۔۔ ’’میں مرنے سے پہلے مرنے کا تجربہ کرنا چاہتا ہوں۔‘‘
اعجاز راہی کے ساتھ سمندر کے کنارے کھڑے جب سمندر نے مجھے یاد دلایا کہ عرصہ سے، شاید ازل سے وہ میرے اندر ہے تو مجھے مرشد کی بات یاد آئی:
’’مرشد نے دونوں ہاتھ اٹھائے اور دعا مانگی۔۔۔ اے خدا مجھے احدیت کے سمندر کی گہرائیوں میں داخل کر۔‘‘
اس نے تاسف سے سر ہلایا۔۔۔ ’’لیکن میں تو ابھی دنیا کے سمندر میں بھی نہیں اتر سکا۔‘‘
مرشد مسکرایا۔۔۔ ’’دنیا بھی تو وہی ہے۔‘‘ (سمندر مجھے بلاتا ہے)
میرے افسانوں میں دو کردار جو کبھی سیّال اور کبھی ٹھوس صورت میں بار بار نمودار ہوئے ہیں میری بیوی رخسانہ اور بیٹی سعدیہ کے ہیں۔ سعدیہ جب دودھ پیتی بچی تھی تو میں اسے اپنے سینے پر لٹا کر اسی بڑے گنبد میں بیٹھ جاتا تھا جو میرے پرانے گھر میں تھا۔ یہاں بیٹھے بیٹھے میں نے انکشاف کے کئی درجے طے کیے۔ وقت کو کبھی ٹھہرتے اور کبھی پَر لگائے اُڑتے دیکھا۔ میری کہانیوں میں بیٹی کے سارے کردار سعدیہ کے گرد گھومتے ہیں۔
اپنی ایک ایک کہانی کا دروازہ کھولوں تو کرداروں کا ایک ہجوم ہے، جن میں سے کچھ پہچان رکھتے ہیں ، کچھ کے نام ہیں ، کچھ بے شناخت اور بے نام ہیں۔ میرے بعض کردار ایسے بھی ہیں جو اگرچہ انسانی وجود نہیں رکھتے لیکن میرے ساتھ ان کا برتاؤ انسانوں جیسا ہے۔ یہ کردار مجھے کہیں نہ کہیں مل جاتے ہیں ، مانوسیت ہوتی ہے تو ہمارا مکالمہ شروع ہو جاتا ہے۔ میرا گھر، میری گاڑی، سڑکیں ، دیواریں اور گلیاں میرے کردار ہیں۔ نانک پورہ میں مَیں جس گھر میں رہتا تھا، اس کی ایک ایک اینٹ سے میرا مکالمہ ہوتا تھا۔ جن دنوں ہم اس گھر سے نئے گھر میں منتقل ہونے کے پروگرام بنا رہے تھے اور سامان سمیٹ رہے تھے تو مجھے لگا، وہ مجھ سے روٹھا روٹھا سا ہے، مجھ میں اتنی ہمت نہ تھی کہ اسے الوداع کہتا، چنانچہ جس دن ہم نے اپنے نئے گھر گلستان کالونی میں منتقل ہونا تھا، میں علی الصبح گھر سے نکل گیا اور بیوی بچوں کو کہ گیا کہ دوپہر تک سامان سوزوکیوں میں لاد کر نئے گھر چلے جائیں اور چابی نیچے والوں کو دے جائیں۔ میں صبح سویرے ناشتہ کیے بغیر ہی چپکے سے نکل گیا کہ میں اس لمحے کا سامنا کرنے کی ہمت نہ رکھتا تھا جب اس گھر کو تالا لگا رہا ہوتا۔ شام کو میں نئے گھر پہنچا تو سب لوگ سامان سمیت وہاں آ چکے تھے۔ دو ایک دن تو سامان سنبھالتے اور نئے گھر کی خوشی میں گزر گئے لیکن تیسری رات عجب ہوا۔ شاید آدھی رات کو یوں لگا جیسے باہر کی گھنٹی بج رہی ہے۔ میں ہڑبڑا کر اٹھا، رخسانہ اپنی نیند میں مست تھی، بچے اپنے اپنے کمروں میں نیند کے مزے لوٹ رہے تھے، مجھے احساس ہوا کہ شاید یہ میرا وہم ہو، لیکن گھنٹی دوبارہ بجی۔ میں اٹھا، باہر آیا، گیٹ کھولا، کیا دیکھتا ہوں کہ نانک پورے والا گھر سامنے کھڑا ہے۔ مجھے دیکھ کر اس کے چہرے پر دکھ اور شکایت کا ایک تاثر ابھرا۔۔۔ ’’مجھے ملے بغیر کیوں چلے آئے؟‘‘ میں کیا جواب دیتا، میں نے چپکے سے اس کا ہاتھ پکڑ لیا اور ہم تا دیر ایک لفظ کہے بغیر ایک دوسرے کے جذبات کا جواب دیتے رہے۔
یہ غیر مرئی کردار میری کئی کہانیوں میں موجود ہیں لیکن میرے افسانوی مجموعے ’’کاغذ کی فصیل‘‘ کے اکثر کردار میری باہر والی دنیا سے تعلق رکھتے ہیں۔ ’’کاغذ کی فصیل‘‘ کی دونوں بہنیں ایک عرصہ تک واہ مین سبط علی صبا کے پڑوس میں رہیں۔ ان میں سے ایک ہماری کلاس فیلو تھی اور میں اور ایک اور دوست ہر ہفتہ انہیں ملنے واہ جاتے تھے۔ میں اس زمانے میں ورکشاپ میں کام کرتا تھا۔ چنانچہ یہ سارا افسانہ اسی ماحول میں پھوٹا اور یہی دو کردار اس کے مرکزی کردار بنے، البتہ ان کا بھائی جو افسانے میں بھی ایک فرضی کردار تھا، میرے تخیل کی پیداوار تھا۔ اسے میرے اندر کے افسانہ نگار نے تخلیق کیا تھا۔ اسی مجموعے کے ایک اور افسانے ’’مکھن کا بال‘‘ کا سارا منظر میں نے خود دیکھا تھا اور اس کے سارے کردار مجھے اس گاؤں ملے تھے جہاں میں اپنے ایک دوست سردار کے ساتھ ایک دن کے لیے گیا تھا۔
بعض اوقات کچھ تجربے اور کچھ مشاہدے بھی کرداروں کا روپ اپنا لیتے ہیں۔ شِکر دوپہر میں کوٹھے کوٹھے پیتل کے لوٹوں کو تلاش کرتے صحن میں وہ منظر جس نے مجھے پہلی بار جسمانی لذت کا احساس دلایا یا نیم تاریک ڈیوڑھی میں خوشبو کی اپنائیت ’’کاغذ کی فصیل‘‘ کے دو تین افسانوں میں موجود ہے۔ یہ اس دور کی کہانیاں ہیں جب ابھی میں نے علامت کی پُر اسرار دنیا میں قدم نہیں رکھا تھا۔ جنس اور لذت میرے لیے بڑے عجیب معنی رکھتے تھے۔ پھر جانے کیا ہوا کہ میں اس دنیا سے نکل کر ایک نئی دنیا میں چلا آیا۔ یہ علامت کی دھندلی دنیا تھی، ’’لیمپ پوسٹ‘‘ جو میرا پہلا علامتی افسانہ ہے، کچھ حقیقت اور کچھ تخیل سے مل کر وجود میں آیا ہے۔
’’لیمپ پوسٹ‘‘ کا کردار ہمیشہ میرے ساتھ رہا ہے۔ یہ کردار بھی کچھ حقیقت اور کچھ تخیل کی پیداوار ہے۔ اس افسانے کی ساری فضا میں جو اسرار ہے وہ میرے اندر کا اسرار ہے۔
میری کہانیوں کا ایک ایسا کردار ہے جس کا ذکر کئی کہانیوں میں ہے۔ یہ کون ہے میں نہیں جانتا، یہ ایک نسوانی کردار ہے، میں اسے اپنا آئیڈیل کہتا ہوں ، جسے میں تلاش کر رہا ہوں اور سچی بات یہ ہے کہ میں آج تک اسے اس کی مکمل صورت میں نہیں دیکھ سکا۔ مجھے اس کی آنکھیں نظر آتی ہیں ، کہیں ہونٹ، کہیں زلفیں ، کبھی میں اس کی آواز سنتا ہوں۔ یہ کردار میری کئی کہانیوں میں ہے۔ میں اس سے بچھڑا ہوا ہوں۔ اسی کے فراق کا دکھ اٹھا رہا ہوں۔ میری کہانی ’’ایک کہانی اپنے لیے‘‘ میں اس کی کئی پرتیں کھلی ہیں۔ مجھ سے کئی بار پوچھا گیا ہے کہ وہ کون ہے جس کے فراق کی کسک میری کئی کہانیوں میں موجود ہے۔ کیا یہ میری جوانی کا کوئی ناکام معاشقہ ہے۔ میں اس کا کوئی جواب نہیں دے سکتا۔ میرے پاس اس کا جواب ہے بھی نہیں۔ اپنی یادداشتوں میں ، میں نے اپنی محبتوں کا جو ذکر کیا ہے وہاں یہ لکھا ہے کہ میں کبھی کسی محبت میں سنجیدہ نہیں رہا، بس ایک ابال اور پھر خاموشی۔ یہ ٹھیک بھی ہے، لیکن یہ کردار کون ہے جو مجھے اکثر Haunt کرتا ہے، مجھے پکارتا ہے، اپنی طرف بلاتا ہے۔ کیا واقعی میری زندگی میں ایسی کوئی خاتون تھی۔ شاید ہو اور میں نے اپنے لا ابالی پن میں اس وقت تو اسے نظرانداز کر دیا ہو اور اب وہ میرے حواس پر چھا گئی ہو، لیکن یہ شاید درست نہیں۔ میں کچھ خواتین کے قریب ضرور گیا لیکن میرے مزاج میں جو جلد بازی اور اضطراب ہے اس نے مجھے کسی ایک جگہ ٹھہرنے نہیں دیا۔ اس لیے میرا خیال ہے کہ میرا یہ کردار دراصل میرے اندر کے اضطراب کی علامت ہے۔ اضطراب اور بے چینی میری زندگی ہے۔ اس درویش کی طرح جو خدا سے ہمیشہ مضطرب رہنے کی دعا مانگا کرتا تھا، میں بھی اضطراب کی تمنا کرتا ہوں۔ بے چینی میرا تحرک ہے اور یہ کردار، جو میری کئی کہانیوں میں کسی نہ کسی صورت موجود ہے اسی بے چینی کی علامت ہے۔ اسے میرے اندر کے اضطراب نے تراشا ہے۔ میں نے حقیقی دنیا میں عشق کا دکھ نہیں اٹھایا، اس لیے اس کردار کے ذریعے میں نے دکھ اٹھانے کی اس کیفیت اور لذت کو خود تخلیق کیا ہے۔ میں اس کے لیے تڑپتا ہوں۔ اسے یاد کرتا رہتا ہوں اور پہروں اداس رہتا ہوں۔ کبھی کبھی وہ مجھے چند لمحوں کے لیے کہیں مل جاتا ہے۔ بیوی کے ساتھ کسی سٹور سے نکلتے ہوئے، لمحہ بھرکے لیے اس کا سامنا ہوتا ہے۔ ٹھٹھک کر ایک دوسرے کو دیکھنا اور پھر اجنبی بن جانا۔ دیر تک اداسی کی لذت کو محسوس کرتے رہنا۔ یہ سب میرے اندر کی دنیا ہے۔ اپنے اندر بھی تو ہم بہت سے کرداروں اور ماحول کے ساتھ جی رہے ہوتے ہیں۔ یہاں وقت ایک سیل رواں نہیں۔ وقت ٹھہر بھی جاتا ہے، اور اس ٹھہرے ہوئے لمحے میں زمانے ایک ہو جاتے ہیں ، لمحہ بھر میں حال سے ماضی، ماضی سے حال اور مستقبل میں قدم رکھا جا سکتا ہے۔ میرے افسانے ’’تلاش‘‘ کی ساری بُنت اسی تصور پر ہے۔ یہاں یہ کردار صدیوں سے میرے ساتھ ہے۔ زمانے بیت گئے ہیں ، ظاہر کی چیزیں بدل گئی ہیں ، لیکن اندر کی دنیا نہیں بدلی۔ میں جب تک سوچتا ہوں ، میں ہوں اور جب تک میں ہوں میرا یہ کردار بھی موجود ہے۔
میرے کرداروں کی جنم بھومی جیسا کہ میں نے کہا، اندر اور باہر دونوں دنیائیں ہیں ، اور ان میں جو فرق ہے وہ ان دنیاؤں کے طور طریقوں کا فرق ہے۔ اندر کی دنیا کو دیکھنے اور جاننے بلکہ سمجھنے کے لیے بہت دور تک اندر اترنا پڑتا ہے لیکن یہ عجب بات ہے کہ جب آپ اپنے طور پر اندر کی یاترا کر رہے ہوتے ہیں تو آپ کائنات میں گھوم رہے ہوتے ہیں۔ معلوم نہیں اندر کی سرنگ سے ہوتے ہوئے آدمی خلاء میں کیسے پہنچ جاتا ہے۔ شاید باطن ایک دریچہ ہے جس کے دوسری طرف بے انت ہے۔ اسی لیے مجھے ذاتی طور پر وہ کردار زیادہ Haunt کرتے ہیں جو میرے اندر سے جنم لیتے ہیں ، یوں ہوتا ہے کہ میں اکیلا کہیں جا رہا ہوتا ہوں ، کہیں کسی موڑ یا اشارے پر گاڑی ذرا دھیمی ہوتی ہے تو کوئی کردار اگلا دروازہ کھول کر اچانک میرے ساتھ آ بیٹھتا ہے، مجھ سے باتیں کرتا ہے اور پھر غائب ہو جاتا ہے۔ مجھے معلوم ہے وہ غائب نہیں ہوا میرے اندر کہیں اتر گیا ہے اور کبھی یوں بھی ہوتا ہے کہ گاڑی پوری رفتار سے جا رہی ہے، اچانک احساس ہوتا ہے کہ کوئی میرے ساتھ بیٹھا ہے، میں اسے دیکھتا ہوں ، پہچاننے کی کوشش کرتا ہوں اور ہماری گفتگو شروع ہو جاتی ہے۔ مجھے معلوم ہے یہ میرے اندر کی دنیا سے باہر نکلا ہے۔ ممکن ہے کہ باہر سے ہی اندر گیا ہو، عرصہ تک اندر کی دنیا کی سیر کرتا رہا ہو اور اب میری کہانی میں داخل ہونے کے لیے باہر نکل آیا ہو۔ باہر کے کردار بھی تو اندر ہی کی دنیا میں پکتے ہیں۔ جیسے کمہار کچی مٹی کو اپنے چاک پر ایک صورت عطا کر کے اسے پکنے کے لیے رکھ دیتا ہے، کبھی کبھار میرے ساتھ یوں بھی ہوتا ہے کہ میں بھول ہی جاتا ہوں کہ میں نے کسی کو پکنے کے لیے اپنے تخلیقی سیلف میں رکھا ہوا ہے۔ یہ تخلیقی عمل ہے بھی تو عجب پُر اسرار، اس کی گہرائیاں کون ناپ سکا، اس کے اسرار کون جان سکا، کہانی بن جاتی ہے، کبھی تھوڑی سی محنت کر کے بنانا پڑتی ہے، کبھی بنی بنائی آ جاتی ہے اور کردار، وہ بھی کبھی چلتے چلاتے مل جاتے ہیں ، کبھی اندر سے باہر آ جاتے ہیں کہ اندر اور باہر دونوں دنیائیں اپنی اپنی معنویت، وسعت اور اسرار رکھتی ہیں اور مجھے یوں لگتا ہے کہ میرا اندر کا جہان باہر والے سے زیادہ پُر اسرار، بامعنی اور ہمہ جہت ہے اس لیے مجھے وہاں سے کردار تلاش کرنے اور انہیں اپنی کہانی میں سمونے میں زیادہ لطف آتا ہے۔
٭

گفتگو

محرک گفتگو: ڈاکٹر قرۃ العین طاہرہ

س لکھنے کی ابتدا کیونکر ہوئی۔ ابتدا میں کن مصنفین سے متاثر ہوئے۔ ادبی ذوق کے نکھار میں کن لوگوں کا حصہ رہا؟
ج یہ ۱۹۶۰ء کے آغاز کی بات ہے۔ میں ۵۰۱ ورکشاپ میں ٹائم کیپر کی حیثیت سے کام کرتا تھا۔ مجھے پڑھنے کا بہت شوق تھا لیکن میرے مطالعے کا موضوع زیادہ تر جاسوسی ناول اور ان کے تراجم تھے۔ دفتر میں حاضری کے فارم مکمل کرنے کے بعد میں فارغ ہو جاتا تھا چنانچہ ایک آدھ کتاب ساتھ لے جاتا تھا اور پڑھتا رہتا تھا۔ اسی سیکشن میں ایک اور نوجوان بھی اسی طرح کتاب پڑھتے دکھائی دیتا تھا اس کا نام اعجاز حسین تھا۔ ہم نے کتابوں کا تبادلہ شروع کر دیا۔ اس نے بتایا کہ وہ اعجاز راہی کے نام سے لکھتا ہے۔ ایک روز اس نے مجھے اپنی ایک کہانی پڑھنے کو دی۔ کہانی پڑھ کر میں نے اسے کہا کہ ایسی کہانی تو میں بھی لکھ سکتا ہوں۔ اس نے مجھے لکھنے کی ترغیب دی۔ سو دو ایک دنوں بعد میں نے اسے ایک کہانی لکھ کر دکھائی۔ اس نے کہا یہ تو افسانہ ہے اور تم اب باقاعدگی سے لکھا کرو۔ چنانچہ میں نے لکھنا شروع کر دیا اور اختر رشید ناز کے نام سے اس زمانے کے رومانی پرچوں (رومان وغیرہ) میں یہ کہانیاں بھیجنا شروع کر دیں۔ دو تین کہانیاں آگے پیچھے چھپ گئیں۔ مجھے لکھنے کی چاٹ لگ گئی۔ اسی دوران اعجاز راہی ایک شام تین چار دوستوں کو لے کر میرے گھر آن پہنچا اور بتایا کہ یہ سارے راولپنڈی کے نوجوان ادیب ہیں۔ ان میں نثار ناسک اور سلیم الظفر شامل تھے۔ میرے پاس انھیں چائے پلانے کے پیسے نہیں تھے نہ گھر میں کوئی ڈھنگ کی جگہ بیٹھنے کے لیے تھی چنانچہ ہم کشمیری بازار میں واقع پارک میں چلے گئے۔ نثار ناسک ہم میں بڑا تھا۔ اس نے نوجوان ادیبوں کے مسائل پر بڑی مبسوط گفتگو کی۔ تجویز دی کہ ہمیں ہر شام کہیں اکٹھا ہونا چاہیے اور ایک ادبی انجمن بھی بنانا چاہیے۔ چنانچہ بڑی بحث کے بعد ’’بزم میر‘‘ کے نام سے ایک انجمن کے قیام کا فیصلہ ہوا۔ مجھے اس کی مجلس عاملہ کارکن بنایا گیا۔ دوسرے دن شام سے ہم نے پنڈی ہوٹل (راجہ بازار) میں اکٹھا ہونا شروع کر دیا۔ یہیں میری ملاقات غلام رسول طارق سے ہوئی۔ ’’بزم میر‘‘ کے ہفتہ وار اجلاس بھی شروع ہو گئے۔ یہ اجلاس موچی بازار کے ایک ہوٹل میں ہوتے تھے۔ دوسرے تیسرے جلسے میں میں نے ایک کہانی پڑھی۔ جب جلسہ ختم ہو گیا تو غلام رسول طارق نے مجھے روک لیا اور کہنے لگے۔ یہ کہانی تم نے خود لکھی ہے۔ میں نے کہا، جی میں نے ہی لکھی ہے۔ کہنے لگے، کل دوپہر کو مجھے صدر بوہڑ ہوٹل میں ملنا میں صدر میں ایک پریس میں کام کرتا ہوں اور دوپہر کا کھانا اس ہوٹل میں کھاتا ہوں۔ میں دوسرے دن وہاں پہنچ گیا۔ طارق صاحب بڑی شفقت سے ملے اور کہنے لگے۔ دیکھ بچے تم میں کہانی لکھنے کی بڑی صلاحیت ہے۔ لیکن ایک تو فضول لوگوں سے بچو اور دوسرے کوئی ڈھنگ کا نام رکھو۔ یہ اختر رشید ناز اچھا نام نہیں۔ میں نے کہا تو آپ ہی کوئی نام رکھ دیں۔ تھوڑی سی گفتگو کے بعد طے پایا کہ اب میں رشید امجد ہوں۔ انھوں نے میری گزشتہ دن پڑھی کہانی میں ایک دو زبان کی غلطیوں کی نشاندہی کی اور کہا کہ اسے کسی اچھے پرچے میں بھیجو۔ میں نے یہ کہانی میرزا ادیب صاحب کو بھیج دی جو ’’ادب لطیف‘‘ کے مدیر تھے۔ ایک ہفتہ میں ہی میرزا صاحب کا خط آیا جس میں کہانی کی بڑی تعریف کی گئی تھی اور یہ مژدہ تھا کہ کہانی زیر ترتیب شمارے میں آ رہی ہے۔ سو رشید امجد کی پہلی کہانی ’’لیمپ پوسٹ‘‘ کے نام سے ادب لطیف کے ستمبر ۶۰ء کے شمارے میں چھپی۔ یہ کہانی اس وقت کچھ نیم استعاراتی سی تھی۔ مجھے یقین نہیں تھا کہ یہ کہانی ادب لطیف میں چھپ جائے گی، چنانچہ میں نے اس کے آخر میں لکھا تھا (ایک چینی کہانی سے ماخوذ)۔ اس کے بعد میں نے کئی کہانیاں لکھیں جو سادہ بیانیہ میں تھیں۔ ۱۹۶۵ء میں ، میں نے اسی کہانی کو دوبارہ لکھا اور یہی کہانی ’’لیمپ پوسٹ‘‘ ایک نئے علامتی انداز سے اوراق کے چوتھے شمارے (اکتوبر ۱۹۶۶ء) میں چھپی۔ یہ میرے نئے دور کا آغاز تھا۔ ستمبر ۶۰ء میں اختر رشید ناز سے رشید امجد برآمد ہوا تھا اور اکتوبر ۱۹۶۶ء میں اس رشید امجد میں سے ایک نئے رشید امجد نے جنم لیا جس نے علامت کو اپنا پیرایۂ اظہار بنایا۔ اس دوران جن لوگوں کو میں نے پڑھا ان میں منٹو اور بیدی دور تک میرے ساتھ چلے۔ میری ابتدائی کہانیوں پر منٹو کے خاصے اثرات ہیں ، خصوصاً موضوع کے حوالے سے، جنس ایک عمر میں سب سے پسندیدہ موضوع ہوتا ہے۔ میری ابتدائی کہانیوں کا محور بھی جنس ہے۔ ان میں منٹو جیسی نفسیاتی دبازت تو نہیں ، لیکن میں نے جنس کو معاشی بدحالی کے حوالے سے بیان کیا ہے۔ ’’بزم میر‘‘ کے بعد ’’حلقہ ذہن جدید‘‘ وجود میں آیا۔ اس کا سیکرٹری میں تھا۔ اس کے بعد ’’لکھنے والوں کی انجمن‘‘ وجود میں آئی۔ اب پنڈی میں نئے لکھنے والوں کا ایک مضبوط گروپ بن گیا تھا۔ نئی لسانی تشکیلات کی بحثیں زور و شور سے جاری تھیں۔ کچھ عرصہ بند رہنے کے بعد حلقہ ارباب ذوق کے اجلاس بھی شروع ہو چکے تھے لیکن سینئر لکھنے والے ہمیں گھاس نہیں ڈالتے تھے۔ اختر احسن اور مصطفی کمال نے ’’پنڈی کلچرل فورم‘‘ کے نام سے ادبی انجمن بنائی تھی لیکن نئے پن کے تمام تر دعووں کے باوجود یہ لوگ بھی ایک اسٹیٹس سے نیچے نہیں اترے تھے چنانچہ راولپنڈی اسلام آباد کے تمام نئے لکھنے والے منشا یاد، اعجاز راہی، سرور کامران، مظہر الاسلام، نثار ناسک، سلیم الدین سلیم، سلیم الظفر، بشیر مرنی مرحوم لکھنے والوں کی انجمن میں اکٹھے ہو گئے۔ کچھ عرصہ بعد ہمارے کچھ سینئر آفتاب اقبال شمیم، ماجد الباقری بھی انجمن کے جلسوں میں آنے لگے اس وقت ’’اوراق‘‘ اور ’’شب خون‘‘ نئے ادب کے ترجمان تھے۔ ڈاکٹر وزیر آغا تھوڑے تھوڑے عرصہ کے بعد پنڈی آتے اور انجمن کے جلسوں میں شریک ہوتے۔ اب ہم لوگوں نے حلقہ میں بھی جانا شروع کر دیا اور آہستہ آہستہ حلقے کے جلسوں میں نئے ادب کی بحثیں شروع ہو گئیں۔ میرے ادبی ذوق کے نکھار میں حلقہ ارباب ذوق، لکھنے والوں کی انجمن اور شخصیات میں سے استاد غلام رسول طارق کے علاوہ ڈاکٹر وزیر آغا اور ’’اوراق‘‘ کا بہت بڑا حصہ ہے۔ خصوصاً جدید فکری رجحانات اور رویوں کو نمایاں کرنے اور مجھے بطور ایک علامت نگار متعارف کروانے میں وزیر آغا اور’ ’اوراق‘‘ کے نام میرے لیے ہمیشہ محترم رہیں گے۔
س آپ کے علامتی افسانوں میں تمثیلی انداز نمایاں ہے۔ تمثیل ہماری اساطیری داستانوں میں بھی موجود ہے۔ یوں ایک طرف تو آپ کا شمار جدید علامتی افسانہ نگاروں میں ہوتا ہے۔ دوسری طرف آپ کا رشتہ قدیم داستانوں سے جا ملتا ہے۔ یہ کوشش شعوری ہے یا بات خود بخود بن جاتی ہے؟
ج میرے افسانوں میں علامت، تجرید اور استعارے کے ساتھ ساتھ تمثیل بھی موجود ہے۔ تمثیلی انداز ہمارے ادب میں نیا نہیں۔ ہماری داستانی روایت کا ایک حصہ ہے، اور اس طرح میرا ایک رشتہ داستانوں سے بھی قائم ہوتا ہے۔ پہلی بار مجھے اس کا احساس قاضی عبدالستار نے کرایا تھا۔ وہ ایک وفد کے ساتھ پاکستان آئے تھے۔ میری ان سے دو تین ملاقاتیں اکادمی کے جلسوں میں ہوئیں۔ انہوں نے مجھے کہا کہ آپ کے اسلوب کا مطالعہ رجب علی بیگ سرور کو ذہن میں رکھ کر ہونا چاہیے۔ اس وقت تو میں نے اس پر غور نہیں کیا لیکن بعد مجھے خیال آیا کہ میرا ایک گہرا تعلق اساطیر سے ہے، لیکن میرا انداز اور اسلوب اساطیری یا داستانی نہیں بلکہ میں نے اسے ایک جدید صورت میں استعمال کیا ہے جو اپنے عہد کی مروج زبان، محاورے اور انداز و مزاج کے دائرے میں اپنی ایک الگ شناخت بناتا ہے۔ یہ کوشش اگر شعوری ہو بھی تو اس کے پیچھے ایک لاشعوری رویہ ضرور موجود ہے جو میرے اسلوب کو روایت سے بھی جوڑتا ہے اور اسے نیا پن بھی عطا کرتا ہے۔
س کہا جاتا ہے کہ (چند ایک سے قطع نظر) سب سے زیادہ نقصان، ان افسانہ نگاروں نے جدید افسانے کو پہنچایا ہے جنہوں نے افسانہ نگاری کو شاعری سے قریب تر کرنے کی کوشش کی۔ آپ کے افسانوں میں بھی شعری فضا پائی جاتی ہے۔ آپ اس کی وضاحت کریں گے؟
ج مجھے آپ سے اتفاق نہیں کہ شعری فضا نے افسانے کو نقصان پہنچایا ہے۔ بات یوں ہے کہ علامت، استعارہ اور تشبیہ شعری وسائل ہیں۔ جدید افسانہ نگار نے ان شعری وسائل کو استعمال کر کے اپنی کہانی میں معنوی دبازت پیدا کی ہے اور اسے ہمہ جہت بنایا ہے۔ ان شعری وسائل کا استعمال انور سجاد کے یہاں بھی ہوا ہے لیکن انور سجاد کے یہاں شعری فضا پیدا نہیں ہوتی کیونکہ ان کے اسلوب کی خشکی اور حسابی ترتیب اس میں مزاحم ہے۔ یہ شعری وسائل ہر جدید افسانہ نگار کے یہاں موجود ہیں لیکن میرے یہاں ان کے استعمال کے طریقہ کار نے ایک ملائمت اور معنوی دبازت پیدا کی ہے۔ یہاں یہ بات واضح رہے کہ افسانے کو نظم سے قریب کرنا دیگر رویہ ہے اور شعری وسائل کا استعمال دوسرا رویہ ہے۔ میرے افسانوں میں یہ فضا اور وسائل Readability پیدا کرتے ہیں اور میرے اسلوب میں ایک ایسی روانی پیدا کرتے ہیں کہ کہیں معنوی ترسیل نہ بھی ہو رہی ہو تو بھی قرات میں رکاوٹ نہیں ہوتی۔ بعض افسانے (خاص طور پر ساٹھ کی دہائی میں ) تو پڑھتے ہوئے بار بار جھٹکا لگتا ہے۔ میرے اسلوب میں یہ بات نہیں۔ میں نے شعری وسائل کو معنوی دبازت پیدا کرنے کے لیے استعمال کیا ہے اور انہیں تخلیقی سطح پر اپنے اسلوب کا حصہ بنایا ہے، اس لیے ان کے استعمال میں شعوری کوشش شامل نہیں بلکہ یہ میرے مجموعی تخلیقی عمل کا ایک حصہ ہیں۔ پھر یہ کہ میرے تہہ دار شعور اور انکشافات ذات کے گہرے مطالعے اور بیان کے لیے ان کا استعمال ضروری تھا۔
س بے نام کردار اور بے چہرہ آدمی، آپ کی کہانیوں میں نمایاں ہیں۔ یہ بے نام کردار اور بے چہرہ انسان معاشرے کی بے معنویت کی طرف اشارہ کرتے ہیں یا ان بے نام کرداروں اور بے چہرہ انسانوں کے ہجوم میں آپ خود اپنے تشخص اور اپنی پہچان کے متلاشی ہیں ؟
ج سایہ دراصل جسم ہی کا ایک علامتی اظہار ہے۔ بے نام کردار اور بے چہرہ آدمی بھی اسی ہجوم کا ایک حصہ ہیں جو خود بے شناخت ہوا جا رہا ہے۔ ہمارا عہد ایک بڑے زوال کے تسلسل میں ہے اور زوال میں چیزیں بے چہرہ اور بے شناخت ہو ہی جاتی ہیں۔ ساٹھ کی دہائی کا افسانہ (The other) دوسری ذات کی تلاش کا افسانہ ہے۔ یہ زمانہ دروں بینی کا ہے جب افسانہ نگار باہر سے اندر کی طرف جا رہا تھا۔ خارج سے باطن کی طرف اس سفر کے پس منظر میں سیاسی زوال، سماجی زوال، مارشل لاء اور بہت سے دوسرے عوامل شامل ہیں۔ اندر کی شخصیت بے نام اور بے چہرہ ہے اس سارے حوالے سے میرے افسانوں میں شناخت اور تشخص ایک اہم موضوع ہے اور وقت کے ساتھ ساتھ اس میں ایک ارتقاء ہوا ہے۔ میرے پہلے مجموعے ’’بے زار آدم کے بیٹے‘‘ میں جنسی اور معاشی فرسٹیشن کا شکار ایک ایسا اینگری ینگ مین ہے جو جنس اور معاش کی کشمکش میں اپنا تشخص ڈھونڈ رہا ہے۔ اس کی بے شناختی بے انفرادی اور ہیجان خیز جذباتیت سے وابستہ ہے۔ لیکن آگے جا کے شناخت کا یہ مسئلہ طبقاتی کشمکش سے جڑ جاتا ہے۔ تیسرے مجموعے ’’سہ پہر کی خزاں ‘‘ میں میرے کردار سیاسی جبر میں اپنا چہرہ تلاش کر رہے ہیں۔ ’’بھاگے ہے بیاباں مجھ سے‘‘ میں شناخت کا یہ مسئلہ کائناتی ہو جاتا ہے جہاں ازل سے ابد تک کے سفر میں شناخت کا معاملہ روحانی ہو جاتا ہے اور اس میں مابعد الطبیعاتی رنگ آ جاتا ہے۔ شناخت کے ان مرحلوں میں میرے اسلوب میں بھی ایک تبدیلی آئی ہے اور شناخت کی ان پرتوں کے ساتھ ساتھ جیسے جیسے شناخت کی صورتیں بدلی ہیں میرے اسلوب و اظہار میں بھی جذباتیت اور غصہ کم ہوتا گیا ہے اور کشفی دبازت اور پہلو داری بڑھتی گئی ہے۔
س آپ کے افسانوں میں تشبیہی انداز کے بجائے استعاراتی فضا نمایاں ہے۔ بعض علامتوں یا بیشتر علامتوں سے آپ کے قاری واقف نہیں ہوتے اور یہ عمل ان کے لیے الجھن کا باعث ہے۔ آپ قاری کا امتحان کیوں لینا چاہتے ہیں ؟ آپ کے بعض افسانے پڑھ کر احساس ہوتا ہے کہ افسانہ لکھتے ہوئے آپ کے پیش نظریہ رائے ہوتی ہے کہ کہانی ایک حل طلب معمہ ہے اور اگر یہ معمہ نہ ہو تو قاری کے لیے اس میں کشش پیدا ہونا ناممکن ہے۔
ج میرے افسانوں میں صرف علامت کا استعمال نہیں بلکہ میں نے پیکر تراشی، استعارہ اور کہیں تمثیل سے بھی کام لیا ہے۔ بعض افسانے Absurd بھی ہیں۔ تجرید بھی ہے۔ علامت کا تعلق اسلوب سے ہے اور تجرید کا خیال سے۔ میں نے بعض جگہ ان سارے وسائل کو اکٹھا بھی کیا ہے۔ اچھی علامت تو اپنے ماحول سے پیدا ہوتی ہے، یہی صورت دوسرے وسائل کی بھی ہے۔ لیکن بہرحال علامت استعارہ یا اشارہ نہیں ہوتی اس کے معنوی تہہ تک پہنچنے کے لیے ذہانت کی ضرورت ہے۔ ساٹھ کی دہائی میں ذہین قاری کی اصطلاح بہت عام تھی، میں اس پر اصرار تو نہیں کرتا لیکن یہ بات بہرحال اپنی جگہ ہے کہ لکھا ہوا لفظ سب کے لیے نہیں ہوتا اور وہ لفظ جو کسی فن کے ساتھ جڑ جاتا ہے اس کا ترسیلی دائرہ اور بھی محدود ہو جاتا ہے۔ میرے چند افسانوں کو چھوڑ کر جو ساٹھ کی دہائی سے تعلق رکھتے ہیں ، ترسیل یا ابلاغ کا مسئلہ کبھی پیدا نہیں ہوا۔ میرا اسلوب اتنا رواں ہے کہ افسانہ خود کو پڑھواتا چلا جاتا ہے۔ نئے افسانے میں مجموعی طور پر ابلاغ کا کوئی مسئلہ نہیں۔ یہ بات چند افسانوں کی وجہ سے ہوئی اور بہت سے نقادوں نے جدید افسانے کو پڑھے بغیر اس کی رٹ لگانا شروع کر دی۔ ترسیل یا ابلاغ کے ضمن میں مجھے میرا جی کا یہ جملہ دوہرانا ہے کہ ’’ابلاغ ایک اضافی قدر ہے‘‘ ایک وقت میں کسی فن پارے کا عدم ابلاغ دوسرے وقت میں ہو جاتا ہے اور بعض اوقات اس کی خوبی بن جاتا ہے۔ پھر یہ کہ ابلاغ کی اپنی سطحیں ہیں جو قاری کی ذہنی سطحوں کے مطابق اپنے معنی وا کرتی ہیں۔ دوسرے یہ کہ نیا افسانہ بہرحال پرانے افسانے سے مختلف ہے نہ صرف ہئیت و بنت کاری کے حوالے سے بلکہ زبان و بیان کے حوالے سے بھی، اس لیے وہ قاری جس کے پڑھنے کی ٹریننگ پرانے افسانے کے حوالے سے ہوتی ہے، ابتداء میں نئے افسانے کو سمجھنے میں دقت محسوس کرتا تھا لیکن وقت کے ساتھ ساتھ نیا افسانہ اپنا دائرہ وسیع کرتا گیا۔ تیسرے یہ کہ ابتداء میں خود نئے افسانہ نگاروں کے یہاں بھی عجز بیاں کی وجہ سے کئی ابلاغی مسائل پیدا ہوئے جو آہستہ آہستہ دور ہوتے گئے۔ اس لیے اب نئے افسانے یا میرے افسانے کے بارے میں عدم ابلاغ کی بات کوئی معنی نہیں رکھتی۔
س بعض مرتبہ ایسا ہوتا ہے کہ کہانی کار اپنی کہانی کی ابتداء اس کے انجام سے کرتا ہے۔ اس کی تکنیک کے متعلق آپ کی کیا رائے ہے؟ کیا آپ اس سے متفق ہیں کہ کہانی کی ابتدا چونکا دینے والی ہو یا نہ ہو لیکن دلچسپ ضرور ہوتا کہ قاری کا تجسس اسے آگے پڑھنے پر مجبور کرے؟
ج ہر کہانی کا اپنا ایک ہیئتی یا تکنیکی ڈھانچہ ہوتا ہے جو ظاہری ڈھانچے کے اندر چھپا ہوتا ہے۔ آپ کے یہ دونوں سوال اس افسانہ نگار سے متعلق ہیں جو کہانی کے ٹکڑوں کو جوڑ کر ایک میکانیکی طریقے سے کہانی بناتا ہے۔ نئی کہانی اس طرح نہیں لکھی جاتی۔ میں واقعات کے ٹکڑے نہیں جوڑتا، مجھے پر پوری کہانی ایک اکائی کی صورت وارد ہوتی ہے، ہاں یہ ضرور ہے کہ لکھتے ہوئے یا بعد میں ایک آدھ جگہ کوئی تبدیلی کر لی جائے۔ میں نے اپنی اکثر کہانیاں ایک نشست میں لکھی ہیں۔ اگر پورا خیال اپنے ابتدائی جملوں کے ساتھ مجھ پر وارد نہ ہو تو میں کہانی نہیں لکھ سکتا۔ پرانا افسانہ نگار واقعات کو جوڑ کر یا کسی کردار کو تلاش کر کے اس کے گرد کہانی بنتا تھا۔ میری اکثر کہانیوں کی بنیاد Idea ہے۔ پوری کہانی ایک خیال کے گرد بنی ہوتی ہے۔ جس کی وجہ سے ٹھوس واقعات کی بجائے بعض اوقات سیال صورت پیدا ہو جاتی ہے۔ بہرحال یہ تو ہے کہ کہانی کا آغاز ہی ٹریپ کرنے والا ہوتا ہے۔ میری اکثر کہانیوں کہ پہلے یا ابتدائی چند جملے ایسے ہیں کہ قاری حیرت اور تجسس کے ساتھ کہانی کی دنیا میں داخل ہوتا ہے۔
س کہانی کی تخلیق کا سفر آپ اکیلے طے کرتے ہیں یا قاری کو ساتھ لے کر چلتے ہیں یا قاری بہت بعد میں شامل ہوتا ہے۔
ج زندگی کے معمولی واقعات میں سے غیر معمولی واقعات کا انتخاب کہانی کار کی باریک بینی اور زندگی کے گہرے مشاہدے کے ذریعے ہو سکتا ہے لیکن کبھی ایسا بھی ہوتا ہے کہ کہانی تب وجود میں آتی ہے جب اس واقعہ کا ذکر کیا جائے جو ابھی پیش آنا ہے۔
س آپ کا کیا خیال ہے اچھی کہانی وہ ہے جو پڑھنے والے کو اچھی لگے، یا جو تخلیق کار کو پسند ہو؟
س کیا آپ کہانی شروع کرنے سے پہلے غور و فکر کرتے ہیں ، کہانی کا موضوع اور خاکہ سوچتے ہیں اور کیا کہانی اس خاکے کے مطابق ہو جاتی ہے جو آپ نے سوچا ہے اور اسی طرح اپنے منطقی انجام کو پہنچتی ہے یا لکھتے ہوئے اصل موضوع سے ہٹ جاتے ہیں ؟
ج ان تین سوالوں کو میں اکٹھا کرنا چاہتا ہوں۔ میں نے ابھی عرض کیا ہے کہ میرے افسانے موضوعاتی نہیں ہیں۔ وہ تو کسی خیال یا Ideaپر لکھے گئے ہیں۔ میرا تخلیقی عمل یوں ہے کہ میرے ذہن میں ایک خیال آتا ہے یا کسی صورتِ حال کو دیکھ کر یا اس سے گزرتے ہوئے ایک Ideaپیدا ہوتا ہے۔ اس پر میرے ذہن میں ایک تخلیقی پروسیس شروع ہو جاتا ہے بعض اوقات فوراً اور بعض اوقات مہینوں یہ خیال اس تخلیقی پروسیس سے گزرتا رہتا ہے۔ میں لکھنے سے پہلے اس کی منطقی یا تکنیکی ترتیب قائم نہیں کرتا۔ یہ خیال اپنے ابتدائی جملوں کے ساتھ میرے ذہن کی سکرین پر واضح ہوتا ہے۔ اگر یہ ابتدائی جملے مناسب نہ ہوں تو میں اسے لکھ نہیں سکتا۔ اگر ایک جملہ لکھتا ہوں یا دو ایک جملے لکھ کر انہیں بار بار کاٹوں تو مجھے خود اس کا احساس جاتا ہے کہ یہ کہانی ابھی اپنے تخلیقی پروسیس سے پوری طرح نہیں گزری۔ میں اسے اسی طرح چھوڑ دیتا ہوں۔ لیکن اگر میں نے اس کے ابتدائی چند جملے لکھ لیے اور وہ میرے خواہش کے مطابق ہوئے تو کہانی آگے چل پڑتی ہے۔ کہانی شروع کرتے ہوئے میرے ذہن میں اس کا ایک دھندلا سا اختتام ہوتا ہے۔ بعض اوقات کہانی اس سے پہلے ہی ختم ہو جاتی ہے اور بعض اوقات آگے نکل جاتی ہے۔ اس اختتام کے بارے میں میری پلاننگ کم ہوتی ہے۔ بس مجھے کوئی چیز احساس کرا دیتی ہے کہ کہانی یہاں ختم ہونی چاہیے۔ کبھی یوں بھی ہوتا ہے کہ کہانی مکمل ہونے کے بعد میں جب اسے دوبارہ پڑھتا ہوں تو احساس ہوتا ہے کہ کہانی جہاں ختم کی گئی ہے اس سے کچھ پہلے مکمل ہو گئی ہے، چنانچہ میں بعد کا حصہ کاٹ دیتا ہوں یا کبھی یوں بھی ہوتا ہے کہ بات ابھی بنی نہیں سو دو چار جملے یا پیرا گراف اور لکھنا پڑتا ہے۔ یہ کام میرا تخلیقی سیلف نہیں بلکہ میرے اندر کا نقاد کرتا ہے۔ اب یہ بات شاید واضح ہو گئی ہے کہ میں کہانی لکھتے ہوئے کوئی خاکہ نہیں بناتا یا موضوع نہیں سوچتا نہ ہی اس کے آغاز، درمیان اور نقطہ عروج کی کوئی بات میرے ذہن میں ہوتی ہے۔ میری کہانی ایک مکمل اکائی کی شکل میں وارد ہوتی ہے۔ یہی وجہ ہے کہ میری اکثر کہانیوں میں پیچ ورک نہیں ہوتا۔ بہرحال ان کا ایک موضوع ضرور بنتا ہے ایک مرکزی خیال یا مرکزی رو بھی ہوتی ہے۔ میری اکثر کہانیوں کے موضوع ایسے ہیں جو ایک عام افسانہ نگار کے تخلیقی پروسیس کا حصہ نہیں بن سکتے اس لیے میرا تخلیقی عمل اور اس کا طریقہ کار قدرے مختلف ہے۔ یوں کہہ لیجئے کہ مجھے ایک خیال سوجھتا ہے جو کہانی کی صورت اختیار کرتا ہے میں کسی واقعہ میں سے خیال نہیں نکالتا۔ میرے یہاں شعری وسائل کا زیادہ استعمال بھی اسی سبب سے ہے کہ میرے خیال اور موضوع عام یا سیدھے سادے طریقے کے متحمل نہیں۔ میرے اکثر افسانے (ابتدائی افسانوں کو چھوڑ کر) ایک چھوٹی سی بات سے شروع ہوتے ہیں اور ازلی و ابدی صداقتوں کو جا چھوتے ہیں۔ میرے افسانوں کا مرکزی کردار بیک وقت کئی زمانوں میں سانس لے رہا ہے اور وہ حال کے لمحہ پر کھڑا ایک ہی جست میں کبھی ماضی اور کبھی مستقبل میں اتر جاتا ہے۔ لیکن پڑھنے والے کو زمانی جھٹکا نہیں لگتا۔
س کہا جاتا ہے کہ موپساں نے یوں افسانے تخلیق کئے جیسے صفائی سے زندگی کے ٹکڑے کاٹ لیے جائیں۔ کیا آپ کا ایسے افسانے لکھنے کو دل نہیں چاہتا۔ یا آپ کے خیال میں زندگی یا حقیقت جیسی کہ وہ ہے اسے اسی طرح پیش کر دینا افسانہ نگار کی سہل پسندی کو ظاہر کرتا ہے جس میں افسانہ نگار کا اپنا کوئی نظریہ کوئی فلسفہ کسی مخصوص اسلوب میں ظاہر نہ ہو؟
س ای ایم فاسٹر نے کہا ہے کہ زندگی فکشن میں دو سطحوں میں پیش ہوتی ہے:
ایک Life in Time، دوسرے Life in Values، آپ کا نظریہ کیا ہے؟
ج یہ دونوں سوال ایک دوسرے کے قریب ہیں۔ نیا افسانہ حقیقت نگاری نہیں بلکہ وہ اس دھند میں سے نکلتا ہے جو ظاہری حقیقت کے پیچھے ہے۔ اس دھند اور اس میں چھپی پر اسرار دنیا تو عام شخص نہیں دیکھ سکتا۔ اصل حقیقتیں یا سچائیاں اس سے مختلف ہیں جو ہمیں بظاہر دکھائی دیتا ہے۔ محض بیانیہ حقیقت نگاری یک سطحی ہوتی ہے۔ اب تو حقیقت نگاری کا رویہ بھی بدل گیا ہے اور وہ لوگ جو خود کو حقیقت نگار کہتے ہیں محض حقیقت بیان نہیں کرتے بلکہ اس سے کچھ آگے جاتے ہیں۔ صفائی سے زندگی کے ٹکڑے کاٹ کر کہانی بنا لینا بڑا فن نہیں۔ ہمارا مشرقی مزاج تو جزو میں کل اور قطرے میں دریا دیکھنے کا ہے۔ انسان وقت اور اقدار دونوں ہی میں زندہ ہے اور دونوں ایک دوسرے سے جڑے ہوئے ہیں۔ پرانے تنقیدی نظریے، کلیے یا رویے نئی کہانی کو اپنی گرفت میں نہیں لے سکتے۔ آج کی کہانی سماجی سیاسی رویوں سے متعلق ہوتے ہوئے بھی بڑے ازلی و ابدی سوالات سے جڑی ہوتی ہے۔ ایک مکمل فن صرف ناف سے نیچے، یا شکم تک، یا دل تک محدود نہیں ، اب اس میں ذہن بھی شامل ہے اور یہ کائنات کی تسخیر اور نت نئے انکشافات کا زمانہ ہے۔ ایک اچھے افسانہ نگار کے یہاں وقت، اقدار، سماج، سیاست حقیقت اور دھند، تجسیم و تجرید سب کچھ موجود ہوتا ہے، کبھی ملی جلی صورت میں ، کبھی انفرادی عکس کی شکل میں۔
س بانجھ لمحہ میں مہکتی لذت، بند ہوتی آنکھ میں ڈوبتے سورج کا عکس، گم راستوں میں کشف، فاصلے سے بچھڑا غم، منجمد موسم میں ایک کرن، بے راستوں کا ذائقہ، بے ثمر عذاب، بے دروازہ سراب، دھند منظر میں رقص، کھلی آنکھ میں دھند ہوتی تصویر۔۔۔ یہ عنوانات صرف ’’پت جھڑ میں خود کلامی‘‘ سے منتخب کئے گئے ہیں۔ یہ تمام عنوانات موجود کو غیر موجود، معنویت کو بے معنویت، روشنی کو دھند اور اثبات کو نفی میں تبدیل کرتے نظر آتے ہیں۔ کیا یہ روش انسان کی بے چارگی اور مجبوری کی دلیل نہیں اور اسے مایوسی کی طرف نہیں لے جاتی؟
ج ہمارا یہ موجود اصل حقیقت کا پرتو ہے۔ اعیان نا مشہود تک ہماری رسائی براہ راست ممکن نہیں۔ ہم جسے معنویت سمجھتے ہیں وہ دراصل بے معنویت ہے چنانچہ حقیقت کو سمجھنے کے لیے ہم کو ایک بار موجود سے نا موجود کی طرف جانا پڑتا ہے۔ روشنی سے دھند اور اثبات سے نفی کا یہ سفر بہت اہم ہے، اس لیے کہ ایک بار نفی کرنے کے بعد ہی اثبات کا اثبات ہو گا اور بے معنویت کے نقطے سے معنویت کا اشارہ ملے گا۔ صوفیاء اپنی نفی کے بعد اثبات کا سفر شروع کرتے تھے۔ موجود صورت میں حقیقت اور معنویت دونوں ہی اضافی چیزیں ہیں۔ کلی حقیقت اور کلی معنویت کا کوئی کلی تصور موجود نہیں۔ موجود سے نا موجود کی طرف جانا اور پھر اس نقطہ سے دوبارہ موجود کی طرف لوٹنا ایک کشفی عمل ہے۔ یہ سارے عنوانات اسی کشفی عمل اور مابعد الطبیعاتی پروسیس کی علامتی صورتیں ہیں اور اپنی اپنی کہانی کی مرکزی واردات کی نوعیت کا انکشاف کرتے ہیں۔ میری کہانیاں صرف زمینی وارداتوں یا حکایات تک محدود نہیں ، ان میں اٹھائے گئے سوال بڑے ہیں اور انسان و کائنات کی ازلی و ابدی حقیقتوں اور وارداتوں سے منسلک ہیں۔ اس لیے عنوانات بھی انفرادیت لیے ہوئے ہیں۔ میری کہانیوں میں شناخت اور تشخص کا عمل فرد سے شروع ہو کر اجتماع اور اجتماع سے پھر فرد اور فرد کے حوالے سے کائناتی ہو جاتا ہے۔ انسانی المیہ کئی سطحوں پر موجود ہے۔ طبقاتی معاشرے میں بے چارگی ایک معنی رکھتی ہے۔ پورے گلوب پر اس کے معنی دوسرے ہیں۔ خالصتاً فرد کی سطح پر اس کا احساس اور اظہار دوسرا ہے اور انسان کی تخلیق اور لمحہ ازل میں کل سے اس کی جدائی اور کائنات کے وسیع تر تصور میں اس کی بے چارگی اور تنہائی ایک بالکل ہی الگ چیز ہے۔ یہی صورت تنہائی کی بھی ہے۔ تنہائی کو ہمارے ادب میں ایک خاص اہمیت حاصل ہے۔ لیکن تنہائی کی کئی سطحیں ہیں۔ فرد کی انفرادی تنہائی، مجمع میں تنہائی اور روحانی و ازلی تنہائی۔ پھر اس کے اسباب بھی مختلف ہیں۔ انفرادی بے چارگی، طبقاتی و معاشی جبر، سماجی و سیاسی جبر اور ان سب سے مختلف ازلی و ابدی روحانی تنہائی ان سب کی کیفیت اور اسباب مختلف ہیں ، لیکن ان میں ایک ارتقائی سفر کی نشاندہی کی جا سکتی ہے، میرے فنی سفر میں شاید ارتقاء موجود ہے، چنانچہ یہ روش انسان کی بے چارگی اور مجبوری نہیں بلکہ حقیقت کی تلاش اور اس کو پانے جاننے کی معنویت سے عبارت ہے۔
س قبر، موت، جنازہ آپ کے افسانوں میں نمایاں ہیں۔ کبھی شہر میں جنازہ گم ہو جاتا ہے اور قبر لاش مانگتی ہے۔ کبھی بیوی کو بار بار یقین دلایا جا رہا ہے کہ میں مر چکا ہوں۔ کبھی گھر قبر اور قبر گھر معلوم ہونے لگتے ہیں۔ کبھی ماں کے مرنے کی دعا ہے۔ کبھی زہر پینے کے بعد موت کا انتظار تو کبھی اپنی قبر کھدنے کا انتظار۔ کیا موت آپ کے نزدیک ذریعہ نجات ہے؟
ج قبر، موت اور جنازہ مختلف ادوار میں مختلف معنویت کی علامت ہے۔ ’’بے زار آدم کے بیٹے‘‘ کی کہانیوں میں قبر اور موت خارج میں موجود ناموافق صورتحال سے پناہ کی جگہ ہیں۔ یہاں آ کر ایک سکون ملتا ہے۔ کچھ دیر کے لیے دشمن فضا سے جان چھوٹ جاتی ہے۔ یہ فرار انفرادی نوعیت کا ہے اور حقیقت سے آنکھ چرانے کے رویے سے عبارت ہے۔ یہاں فرد طبقاتی جبر اور معاشی ناہمواری کے بوجھ تلے دبا ہوا ہے اور کسی حد تک، کچھ نہ کر سکنے کے رویے نے اس کے اندر ایک غصہ پیدا کر دیا ہے۔ یہ غصیلا جو ان اشیاء اور قدروں کو توڑنا پھوڑنا چاہتا ہے۔ ان کے ہونے کا انکار کرتا ہے اور جب رد عمل شدید ہوتا ہے تو قبر اور موت اس کی پناہ گاہیں بنتی ہیں۔ یہاں کی دھند اور تاریکی میں اس کی شناخت اور پہچان ہوتی ہے۔ لیکن جب مارشل لاء کے جبر و تشدد میں شناخت اور پہچان مٹتی ہوئی دکھائی دیتی ہے اور اسے تلاش کیا جاتا ہے تو قبر، موت اور جنازہ سیاسی علامتیں بن جاتے ہیں (’’سہ پہر کی خزاں ‘‘ کے افسانوں میں ) لیکن جب شناخت اور پہچان کا یہ سفر روحانی ہو جاتا ہے اور مابعد الطبیعاتی سچائیوں سے ہم آہنگ ہوتا ہے تو قبر اور موت کی علامتیں اپنے معنی بدل لیتی ہیں (’’بھاگے ہے بیاباں مجھ سے‘‘ کے افسانوں میں )۔ یوں ان علامتوں میں ایک معنوی اور فکری ارتقاء بھی پیدا ہوا ہے جو میرے بنیادی موضوع شناخت اور پہچان کے تصور کے ساتھ جڑا ہوا ہے۔
س آپ کے افسانوی مجموعوں ’’کاغذ کی فصیل‘‘ بے زار آدم کے بیٹے‘‘ ’’پت جھڑ میں خود کلامی‘‘ اور دشت خواب‘‘ ان سب میں اسلوبی سطح پر فرق واضح ہے۔ اس میں قاری کی خواہش کا احترام شامل ہے یا پھر یہ تبدیلی غیر شعوری طور پر بدلتے ماہ و سال کے ساتھ ہوئی ہے؟
ج میرے افسانوں کا پہلا مجموعہ ’’بے زار آدم کے بیٹے‘‘ (۱۹۷۴ء) ہے لیکن ترتیب کے اعتبار سے پہلا مجموعہ ’’کاغذ کی فصیل‘‘ ہے جو بہت بعد میں (۱۹۹۳ء) میں چھپا۔ ’’کاغذ کی فصیل‘‘ سے ’’دشت خواب‘‘ تک اور اب تازہ افسانوں میں میرے اسلوب میں ایک تبدیلی آئی ہے، لیکن اس کی وجہ کسی کی خواہش کا احترام نہیں۔ میرے ابتدائی افسانے زیادہ تر جنسی حقیقت نگاری کی ذیل میں آتے ہیں۔ کہانی کی بنت اور موضوع کا تقاضا یہی تھا کہ انہیں اسی بیانیہ انداز میں لکھا جائے۔ لیکن یہ بیانیہ بھی بالکل سادہ نہیں بلکہ میرے بعد کے اسلوب کے اشارے اس میں موجود ہیں اور اس سادہ بیانیہ میں بھی استعارہ اور تشبیہ کی جھلکیاں موجود ہیں۔ ’’بے زار آدم کے بیٹے‘‘ میں ایک غصیلا نوجوان، طبقاتی اور معاشی جبر میں اپنی شناخت تلاش کر رہا ہے۔ یہ شناخت ذاتی ہے اور یہاں علامتیں بھی کہیں کہیں پرسنل ہو جاتی ہیں لیکن مجموعی فضا میں ان کے معنی موجود ہیں۔ اسلوب میں استعارہ سازی کا عمل پیکر تراشی سے مل کر ایک نیا انداز پیدا کر رہا ہے۔ ’’ریت پر گرفت‘‘ کے افسانوں میں تجریدیت زیادہ ہے اس لیے اسلوب میں دبازت، شعری و سائل کا استعمال، شعریت اور پیکر تراشی میں باطنی گہرائی نمایاں ہے۔ موضوع کی گنجلک اور دبازت کی وجہ سے اسلوب میں بھی ادقیت ہے۔ اس مجموعہ میں کسی حد تک ترسیل کا مسئلہ بھی موجود ہے۔ یہ افسانے ذہین قاری کا تقاضا کرتے ہیں ، لیکن اسی مجموعہ کا آخری افسانہ ’’ڈوبتی پہچان‘‘ ایک نئے ذائقے اور مزاج کی نشاندہی کرتا ہے اور یہاں سے اسلوب کی ایک نئی پرت شروع ہوتی ہے جس میں جملہ بظاہر سادہ ہے لیکن علامتی دبازت اور معنویت گہری ہے۔ ’’سہ پہر کی خزاں ‘‘ کی کہانیاں مارشل لائی جبر اور تشدد میں گھرے شخص کی کہانیاں ہیں جو اس جبر میں اپنی شناخت تلاش کر رہا ہے افسانوں کا اسلوب اپنی ایک الگ علامتی معنویت لیے ہوئے ہے۔ یہاں قبر، موت اور جنازہ اور کہیں قبرستان اور گٹر سیاسی فضا میں سی چنی گئی علامتیں ہیں۔ ’’پت جھڑ میں خود کلامی‘‘ کی کہانیوں میں شناخت کا عمل ایک وسیع تر سماجی پروسیس میں شروع ہوتا ہے اور اس کے ساتھ ہی اسلوب میں بھی ایک تبدیلی ہوتی ہے۔ ’’بھاگے ہے بیاباں مجھ سے‘‘ کی شناخت کائنات کے وسیع تر تناظر میں ایک کشفی روحانی عمل کا حصہ ہے، چنانچہ اسلوب میں ایک نئی طرح کی دبازت اور معنویت آ جاتی ہے۔ علامتیں آفاقی ہو جاتی ہیں اور ایک نیا کردار مرشد اپنی پہچان کراتا ہے۔ مرشد کے کردار کی ابتدائی جھلکیاں میرے شروع کے افسانوں میں بھی کہیں کہیں موجود ہیں لیکن اس کی واضح صورت اس مجموعے میں سامنے آئی ہے۔ اسلوب کی ساری صورتیں میرے مجموعی اسلوب کی مختلف پرتیں ہیں اور یہ میرے بنیادی موضوع شناخت اور پہچان کے ارتقائی تصور سے جڑی ہوئی ہیں۔
س ایک تخلیق کار کی حیثیت سے آپ کے نزدیک ماضی اہم ہے، حال یا مستقبل۔ آپ کا تصور وقت کیا ہے؟
ج میرے یہاں وقت کا تصور ماضی، حال یا مستقبل کے کسی ایک نقطے تک محدود نہیں۔ میں ماضی کو حال کے لمحہ موجود سے مل کر مستقبل کی طرف سفر کرتے ہوئے وقت کی قید سے آزاد ہونا چاہتا ہوں۔ ’’دریا‘‘ میرے یہاں ایک خاص استعارہ ہے جو بہتے ہوئے وقت کی تصویر بناتا ہے۔ اس میں ماضی و حال اور مستقبل ایک ہو جاتے ہیں۔ میرے پاس وقت کا تصور زمانی تقسیم کے بغیر ہے۔ ماضی حال بھی ہے اور مستقبل بھی۔ اصل اہمیت وہ جست ہے جو لمحہ موجود کو پھیلا کر وقت کا تسلسل بنا دیتی ہے۔ وہ تسلسل جو وقت کو زمانوں میں تقسیم نہیں کرتا۔ میرے افسانے ’’لمحہ جو صدیاں ہوا‘‘ (بھاگے ہے بیاباں مجھ سے) کا کرداریوں کہتا ہے:
’’شیخ کے ہونٹوں پر ایک معنی خیز پراسرار تبسم ابھرا، بولے ’’وقت ایک دریا کی مانند ہے جس کی لہروں کو الگ الگ نہیں کیا جا سکتا، اگرچہ دیکھنے میں وہ الگ الگ نظر آتی ہیں۔ ماضی کی گود سے حال، حال کی گود سے مستقبل اور مستقبل کی گود سے پھر ماضی طلوع ہوتا ہے۔ ایک دائرہ جس کا ایک مرکز ہے اور اس مرکزہ کی کوئی زبان نہیں نہ کوئی اس کا احاطہ کر سکتا ہے۔‘‘
ایک ہی لمحہ میں کئی جہانوں میں رہنے کی اذیت و لذت میرے تصور وقت کا ایک اہم پہلو ہے۔ ایک ہی لمحہ میں بیک وقت کئی حقیقتوں کی آگاہی کے نتیجے میں میرے تخلیقی عمل میں تہہ داری پیدا ہوئی ہے جس کی وجہ سے میرے اظہار میں بھی تہہ داری آئی ہے۔ ڈاکٹر نوازش علی نے اپنے ایک مضمون میں میرے بارے میں لکھا ہے کہ ’’تہہ دار شعور تضادات اور تقابل کے علاوہ بے یقینی کی صورت میں بھی ظاہر ہوا ہے۔ یہ بے یقینی عمل اور بے عملی کے درمیان لٹکتے رہنے کے نتیجے میں پیدا ہوتی ہے اس کے علاوہ بیک وقت دو انتہاؤں کی کھینچا تانی بھی تہہ دار شعور کو جنم دیتی ہے۔‘‘ لمحہ موجود میں مختلف طرح کے احساسات اور کیفیات کو گرفت میں لینے کی کوشش نے وقت کو ایک گزراں لمحہ بنا دیا ہے یوں وقت زمانے کی قید سے آزاد ہو کر صرف وقت رہ جاتا ہے۔ یہ مختلف احساسات کی درمیان حدوں کو توڑنے، ان میں یکجانی پیدا کرنے اور لمحہ میں ابدیت کا عکس دیکھنے، زمانے کی قید سے آزاد وقت میں زندہ رہنے اور مختلف زمانوں کے واقعات و تجربات کو بیک وقت سوچنے، محسوس کرنے اور اپنے آپ پر طاری کر کے ایک نئی فضا پیدا کرنے کی کوشش ہے۔ چنانچہ میرے پاس وقت کا تصور کسی زمانی قید تک محدود نہیں بلکہ ایک ہی لمحہ میں کئی لمحوں کی بازیافت ہے جہاں وقت زمانے کی قید سے آزاد ہو جاتا ہے۔
س ٹوٹی ہوئی دیوار (کاغذ کی فصیل) یہ کہانی تیس سال پہلے کی لکھی ہوئی نہیں بلکہ آج ہی کی معلوم ہوتی ہے۔ یہ کہانی کسی دیہاتی سکول کا منظر ہی پیش نہیں کرتی بلکہ مہذب شہر کے مہنگے سکول کی صورتِ حال بھی ایسی ہے۔ بحیثیت استاد آپ نظام تعلیم کو کہاں تک درست سمجھتے ہیں ، کیا تجاویز پیش کرتے ہیں ؟
ج یہ کہانی (ٹوٹی ہوئی دیوار) تیس سال پہلے لکھی گئی تھی، آج بھی صورتحال یہی ہے۔ ہمارے تعلیمی نظام کا زوال تو بہت پرانا ہے۔ بلکہ اس کا آغاز تو برصغیر میں مسلمانوں کے زوال کے ساتھ ہی ہو گیا تھا۔ ۱۸۵۷ء سے پہلے ہمارے مدرسے کسی بھی طرح کی سیاسی اور حکومتی مداخلت سے آزاد تھے۔ بادشاہ مدرسہ کو ایک بار جو جاگیر دے دیتا تھا، بعد والوں کے لیے ممکن نہ تھا کہ اسے واپس لے لیں۔ ہمارے ان مدرسوں میں دین کے ساتھ ساتھ اپنے زمانے کے علوم پر بھی توجہ دی جاتی تھی چنانچہ حدیث، فقہ اور تفسیر کے ساتھ ساتھ منطق، حساب اور فلسفہ بھی نصاب میں شامل تھا۔ انگریزوں نے اس نظام پر ضرب لگائی۔ جاگیریں چھین لیں اور مدرسوں کو زکوٰۃ اور چندے کے رحم و کرم پر چھوڑ دیا انگریزی ٹائپ کے مدرسے قائم ہوئے جن میں سے دین تقریباً خارج ہو گیا۔ ان مدرسوں کا مقصد انگریز حکومت کے لیے وفادار سرکاری ملازم پیدا کرنا تھا۔ مولانا شبلی نے علی گڑھ کے بارے میں کہا تھا ’’یہ ہر میجسٹی کے لیے وفادار ملازم پیدا کرنے کی فیکٹری ہے۔‘‘ اکبر الٰہ آبادی کو بھی یہی اختلاف تھا کہ مسلمانوں کو ہنر اور مختلف پیشے سکھانے کی بجائے ان تعلیمی اداروں کے ذریعے سرکاری وفادار ملازم بنایا جا رہا ہے۔ انگریزی تعلیم حاصل کرنے والوں کا اولین مقصد آئی سی ایس کرنا ہوتا تھا اور یہ نہ ہو سکے تو پھر کلرک بن جانا۔ یہ رویہ اور مقصد آج بھی موجود ہے۔ ہماری تعلیم کا مقصد صرف نوکری حاصل کرنا ہے اور سرکاری کی اطاعت کرنا۔ میکالے نے جو تعلیمی پالیسی بنائی تھی اسے جب منظوری کے لیے وائسرائے کے پاس بھیجا تو اس پر جو نوٹ لکھا وہ قابل غور ہے۔ اس نے لکھا، ’’ہم چند ہزار انگریز کروڑوں کی آبادی کے اس ملک پر اس وقت تک دیر تک حکومت نہیں کر سکتے، جب تک یہاں ایک ایسی جماعت وجود میں نہ آ جائے جو نسلاً ہندوستانی ہو اور ذہنی طور پر انگریز، مجھے یقین ہے کہ اس تعلیمی پالیسی پر عمل کر کے چند ہی برسوں میں ایسی جماعت وجود میں آ جائے گی۔‘‘ یہ تاریخ کا ایک عجیب و غریب واقعہ ہے کہ چند ہزار انگریز (جن کی تعداد پچیس تیس ہزار سے کبھی زیادہ نہیں ہوئی اور کسی وقت تو یہ دس ہزار سے بھی کم رہی) کروڑوں کی آبادی کے اس ملک پر نوے سال حکومت کر گئے اور اس دوران کوئی بڑا واقعہ یا ہنگامہ بھی نہیں ہوا۔ ایک شہر میں انگریز حاکم چار پانچ ہی ہوتے تھے۔ ایک کمشنر، ایک ڈپٹی کمشنر، ایک ایس پی اور ایک افسر مال اور ایک دو اور۔ باقی سارا انتظام یہی نسلاً ہندوستانی ذہنی انگریزی کرتے تھے۔ یہی وہ جماعت تھی جسے میکالے کے نظام تعلیم نے جنم دیا۔ یہی نظام تعلیم تقریباً اسی صورت میں آج بھی رائج ہے اور ہمارے حاکم عوام کو محکوم سمجھتے ہیں۔ ہمارا نظام تعلیم قومی مقاصد سے ہم آہنگ نہیں۔ ہم طالب علم کی ذہانت کا نہیں یادداشت کا امتحان لیتے ہیں۔ ہمارا معیار نمبر ہیں۔ ہم پروفیشنل کالجوں یا دوسرے اداروں میں داخلے کے لیے نمبروں کو معیار سمجھتے ہیں جس کا نتیجہ یہ ہے کہ مقررہ نمبروں سے ایک نمبر کم والا نا اہل ہو جاتا ہے۔ لیکن دوسری طرف جہاں داخلہ ٹیسٹ اور امتحان کا نظام ہے وہ بھی ہماری روایتی بددیانتی کی وجہ سے ناکام ہو گیا ہے۔ سیاسی مقاصد اور شہرت کے لیے غیر ضروری نصابی بوجھ بڑھایا گیا ہے۔ اسلامیات اور مطالعہ پاکستان کو انگریزی اور اُردو زبان کے نصاب میں ضم کیا جا سکتا ہے۔ اسی طرح بعض زبانوں کی غیر ضروری لازمی تعلیم بھی ایک بوجھ ہے۔ انگریزوں نے دینی مدارس اور دنیاوی مدارس کو الگ الگ کر کے مسلمان معاشرے میں جس تقسیم کا بیج بویا تھا وہ آج بھی قائم ہے۔ ادھر سے دنیا نکل گئی، ادھر سے دین نکل گیا۔ وہ ایک انتہا اور یہ دوسری انتہا ہو گئی۔ دین و دنیا کے اسی جھگڑے نے ہماری مجموعی دانش، رواداری اور قومی مزاج کو متاثر کیا۔ اب تک ہماری جتنی تعلیمی پالیسیاں بنی ہیں۔ وہ میکالے کے نظام تعلیم کے اصولوں پر ہی قائم ہیں۔ بنیادی تبدیلی نہیں کی گئی صرف انتظامی تبدیلیوں کے پیچھے سیاسی مقاصد اور کچھ لوگوں کو ملازمتیں دینا اور ان کے لیے نئے محکمے کھولنا رہا ہے۔ اگر ہم سنجیدگی سے اپنے تعلیمی نظام کی اصلاح چاہتے ہیں تو سیاسی وابستگیوں اور مفاد سے بالا ہو کر اس پر غور کرنا چاہیے۔ لیکن شاید یہ ممکن نہیں کہ ہم جس مجموعی زوال کے عمل سے گزر رہے ہیں اس میں صورتِ حال یہی رہے گی۔ جب کوئی قوم اپنے زوال پر فخر کرنے لگے اور زوال سے لطف اٹھانا شروع کر دے تو پھر اس کا اللہ ہی حافظ ہے۔
س آج قاری کی جگہ ناظر نے لے لی ہے۔ کیا یہ صورتِ حال ادب کے لیے نقصان دہ نہیں ؟
ج یہ تبدیلی تو دنیا بھر میں ہو رہی ہے۔ لیکن اس سے خوف زدہ ہونے کی بجائے خود کو اس کے مطابق تیار کرنا چاہیے۔ اب تو انٹرنیٹ پر بھی ادب فیڈ ہو رہا ہے۔ بنیادی بات تو اظہار اور قاری یا ناظر تک پہنچنے کی ہے۔ اگر یہ کام کتاب کی بجائے سکرین یا کمپیوٹر کا نیٹ ورک کر رہا ہے تو ٹھیک ہے۔ ہم زمانے کو تو واپس نہیں لے جا سکتے، خود کو اس کے مطابق تیار کر سکتے ہیں اور یہی ہمیں کرنا چاہیے۔
٭

لیمپ پوسٹ

اچانک میری آنکھ کھل گئی۔۔۔
اندھیرا گہری گہری سانسیں لے رہا تھا۔ میں نے ڈرتے ڈرتے کھڑکی کے پٹ کھول دئیے۔ گلی کے سرے پر لیمپ کی نحیف روشنی تاریکی کے دامن میں سسک رہی تھی اور چاروں طرف پھیلا ہوا سنّاٹا کروٹیں لے رہا تھا۔ میرا سانس دھونکنی کی طرح چلنے لگا۔ کھڑکی سے چھن چھن کر آتی نحیف کرنیں ہلا ہلا کر مجھے جگا رہی تھیں۔ سانس کے تار درست کرنے کی کوشش کرتے ہوئے میں نے گلی میں جھانکا، گلی کے سرے پر کھڑا، میرا دوست میری راہ تک رہا تھا۔ وہ ہر رات یوں ہی میری راہ دیکھا کرتا ہے، روشنی کی یہ لاغر کرنیں ہر رات یوں ہی مجھ سے لپٹ جاتی ہیں اور مجھے بے بس کر کے اس کے پاس لے جاتی ہیں۔
میں دبے پاؤں کمرے سے باہر نکلا، اندھیرے نے گلی کو تھپک تھپک کر سلا دیا تھا۔ میں نل پر آیا اور چلّو بنا کر یوں پانی پینے لگا جیسے چشمہ سے جل بھر رہا ہوں۔ ٹھنڈے پانی کے چند گھونٹوں نے ذہن سے چمٹی ہوئی سیاہی دھو ڈالی۔ میں نے دو چار چھینٹے منہ پر مارے اور گلی کے سرے پر آ گیا۔ لیمپ پوسٹ سنسان رات میں تنہا، اداس کھڑا میری راہ تک رہا تھا۔ مجھے دیکھ کر اس کے پیلے چہرے پر زندگی انگڑائیاں لینے لگی۔ میں اس کے پہلو میں بیٹھ گیا اور باتیں کرنے لگا۔
یہ لیمپ پوسٹ میرا سب سے پیارا دوست ہے، جو میرے دُکھ اور درد کو خوب سمجھتا ہے۔ میں نے اس سے گھنٹوں باتیں کی ہیں لیکن اس کے ماتھے پر سلوٹ نہیں آئی۔ وہ کبھی ضروری کام کا بہانہ بنا کر کھسکنے کی کوشش نہیں کرتا ہے۔ وہ میری باتیں توجہ سے سنتا ہے اور میرے غم پر آنسو بہاتا ہے۔ وہ ساری رات میرے غم میں اندھیرے کے دامن پر سر رکھے روتا رہتا ہے۔ اس کی سسکیاں سن کر میں اپنے کمرے سے نکل آتا ہوں اور اس سے لپٹ کر پہروں باتیں کرتا ہوں۔۔۔ اپنی باتیں ، گاؤں کی باتیں ، راحت کی باتیں۔
اپنے دوست کے سرد، محبت بھرے سینہ پر سر رکھے ایسی باتیں کرتے ہوئے میں کبھی کبھی رونے لگتا ہوں۔ میرے آنسوؤں سے اس کے برف ایسے ٹھنڈے سینہ میں زندگی کروٹیں لینے لگتی ہے اور وہ اندھیرے کے آنچل سے منہ نکال کر مجھے ٹک ٹک دیکھا کرتا ہے۔ روتے روتے میری ہچکی بندھ جاتی ہے تو وہ میری توجہ تاریکی میں ڈوبی ہوئی زخمی سڑک کی طرف مبذول کرا دیتا ہے۔۔۔ دور بہت دور کسی کے قدموں کی چاپ سنائی دیتی ہے۔ میں ہمہ تن متوجہ ہو کر آنے والے کا انتظار کرتا ہوں۔ آنے والے کا سایہ دور سے نظر آتا ہے لیکن جب وہ میرے قریب پہنچتا ہے تو مجھے احساس ہوتا ہے کہ وہ محض سایہ ہی ہے۔ میں اس کی طرف لپکنے کی کوشش کرتا تو میرا دوست۔۔۔ لیمپ پوسٹ میرا بازو تھام لیتا ہے۔ سایہ گزر جاتا ہے، لیکن قدموں کی چاپ دیر تک سناٹے میں گونجتی رہتی ہے۔ میں سوچتا ہوں کہ یہ کیسا سایہ ہے جس کا وجود نہیں لیکن قدموں کی چاپ اتنی وزنی ہے؟۔۔۔ یہ سائے روز آتے ہیں ، گزر جاتے ہیں۔ قدموں کی چاپ کچھ دیر گونجتی ہے پھر دم توڑ دیتی ہے۔ میں اور میرا دوست چپ چاپ یہ تماشا دیکھتے رہتے ہیں۔ جب کبھی بہت پریشان ہوتا ہوں تو میرا دوست اندھیرے کی چادر سے چہرہ نکال کر مجھے دیکھتا ہے، اس کے چہرے پر بکھری ہوئی محبت میرا خوف دور کر دیتی ہے اور میں اس کے سینہ پر سر رکھے سو جاتا ہوں۔
میرے دوست کی سمجھ میں نہ آنے والی باتیں کبھی کبھی مجھے الجھن میں ڈال دیتی ہیں۔ میں اس سے روٹھ کر گلی میں آ جاتا ہوں اور اونچی اونچی عمارتوں کو دیکھنے لگتا ہوں ، جن کی اینٹوں کی آنچ سے انسانی احساسات کے پھول جھلس کر رہ گئے ہیں۔ میرے چاروں طرف چمنیوں کا کثیف اور بدبو دار دھواں پھیلا ہوا ہے۔۔۔ دھواں ، جو انسانی ذہن کی گہرائیوں تک پہنچ چکا ہے۔ موٹی موٹی شیشے کی چار دیواریاں ہیں جن کے اندر دلوں کے آئینوں اور جوانی کے پھولوں کا کاروبار ہوتا ہے۔ لوہے کی زنجیروں کی طرح بکھری بکھری گلیاں ، جو کشاں کشاں زمانے کے تقاضوں کی طرف گھسیٹے لیے جا رہی ہیں۔ زرد زرد چہرے، گھٹی گھٹی زندگی، کھوکھلے قہقہے، دبی دبی ہچکیاں۔۔۔ بس زندگی کا نقد یہی ہے۔
گلی کے چہرے پر رَچی ہوئی سیاہی دیکھ کر میں اپنے کمرے میں بھاگ آتا ہوں۔ اس کمرے میں بھی گھٹن ہے۔ اس پورے مکان میں گھٹن ہے۔ بدنما، تکونا حویلی نما مکان۔۔۔ مجھے اس سے نفرت ہے۔ زمانے کے بوجھ سے ایک طرف کو جھکا ہوا، لاتعداد کمرے، اَن گنت تنگ و تاریک راہداریاں ، مہیب سناٹا، میرے دن تو اسی ادھیڑ بن میں گزرتے ہیں کہ زندگی جیسی لطیف شے کو اس ہیبت ناک مکان میں بھلا کیسے محفوظ رکھا جا سکتا ہے؟
میں سہم جاتا ہوں !
اور سوچتا ہوں راحت جیسی خوبصورت اور نازک مزاج لڑکی نے اس مکان میں بھلا اتنا عرصہ کیسے گزار لیا ہے۔ بوڑھے چوہدری صاحب اور ان کی بیوی تو خیر آج مرے کل دوسرا دن والی بات ہے، انہیں مکان کی خوبصورتی سے کیا غرض؟ یہی کیا کم ہے کہ اتنا لمبا چوڑا مکان انہیں ورثہ میں ملا ہوا ہے اور پھر چوہدری صاحب کو شاید قدرت نے ذہنی زاویوں کی مناسبت سے اس مکان میں رکھا ہے۔ مزاج ایسا کہ ان سے بات کرنے کے لیے صدیوں پیچھے لوٹنا پڑتا ہے۔ ضد اور بد مزاجی انہیں ورثہ میں ملی ہے۔ کسی صحیح بات کو غلط رنگ دینے کے لیے انہیں زیادہ دیر سوچنا نہیں پڑتا، جو بات کہہ دی پتھر کی لکیر ہو گئی۔
کبھی کبھی مجھے یوں محسوس ہوتا ہے جیسے میں اور راحت کبوتروں کا جوڑا ہیں جو بدقسمتی سے گدھوں کے گھونسلے میں آن پھنسے ہیں۔ یہ حقیقت ہے کہ اگر اس مکان میں راحت کا تصور نہ ہوتا تو میں کبھی کا یہاں سے بھاگ چکا ہوتا، چاہے مجھے بھوکوں ہی کیوں نہ مرنا پڑتا۔ چوہدری صاحب اور ان کی بیوی سے تو مجھے اسی حد تک دلچسپی ہے کہ ان کے گھر میں راحت کا تصور ہے ورنہ اپنے پھوپھا پھوپھی ہونے کی حیثیت سے میں کبھی ان کو اتنی اہمیت دینے کو تیار نہیں کہ وہ میرے حواس پر چھا جائیں۔ یہ درست ہے کہ میرے ماں باپ کی موت پر انہوں نے مجھے پالا ہے لیکن اس کا یہ مطلب تو نہیں کہ وہ میرے ذہنی زاوئیے ہی بدل ڈالیں۔
راحت کے پیار نے میرے ذہن سے ماحول کی تاریکیوں کا احساس ختم کر دیا ہے، لیکن رات کے سناٹے میں جب سب سو جاتے ہیں تو میرے دکھ جاگ اٹھتے ہیں ، میں پہروں سوچتا ہوں۔۔۔ میں ایک ہیرا ہوں۔
ایسا ہیرا جو بد قسمتی سے راہ گزر پر گر گیا اور لوگ روا روی میں اسے روندتے چلے گئے۔ اس سوچ کے ساتھ ہی۔۔۔
ذہن میں درد کا مینہ برس اٹھتا ہے اور میں گلی میں آ جاتا ہوں۔ میرا دوست۔۔۔ لیمپ پوسٹ بانہیں پھیلا کو مجھے آغوش میں لے لیتا ہے اور میں اس کے دامن پر سر رکھے پہروں سسکتا رہتا ہوں۔
چوہدری صاحب کو میرا اور راحت کا میل ملاپ پسند نہیں لیکن مکان کی ساخت کی وجہ سے وہ ہماری کسی ملاقات میں رکاوٹ نہیں بن سکے۔ سب کے کمرے الگ الگ ہیں۔ اس لیے میرے اور راحت کے راستے میں کوئی مشکل حائل نہیں۔ کبھی کبھی ہم دونوں چوہدری صاحب اور ان کی بیوی کو سوتا چھوڑ کر حویلی کی چھت پر چلے جاتے ہیں اور اُجلی اُجلی روشنی میں پہروں بیٹھے ایک دوسرے سے باتیں کرتے ہیں۔ حویلی کے سامنے بہتی ہوئی ندی کا نظارہ سرد جسموں میں بھی حرارت پیدا کرتا ہے۔
ایک رات۔۔۔
میں منڈیر سے ٹیک لگائے راحت کی خوبصورتی سے ماحول کا مقابلہ کر رہا تھا کہ منڈیر کی پشت سے سیاہ کیڑے نے سر اُبھارا، میرا رنگ پیلا پڑ گیا۔ یہ کیڑا کئی سالوں سے یونہی میرا خون پی رہا ہے۔ میں نے منڈیر سے الگ ہونا چاہا۔ لیکن میرا سارا جسم مفلوج ہو چکا تھا۔ سیاہ کیڑا میرے کندھوں سے ہوتا ہوا ذہن کی طرف بڑھتا رہا۔ ذہن کے قریب پہنچ کر اس نے پنجہ بڑھایا اور ذہن کے نرم نرم گودے میں گاڑ دیا۔ میرے سارے جسم میں درد کی ٹیس اٹھی۔ درد کی شدت کو دبانے کے لیے میں نے راحت سے پوچھا۔
’’اس ندی کا کیا نام ہے؟‘‘
’’ا س کا کوئی نام نہیں ، بس یہ ایک ندی ہے‘‘۔۔۔ راحت نے بغیر مڑے جواب دیا۔
سیاہ کیڑا دھیرے دھیرے دوسرا پنجہ بھی بڑھانے لگا۔ خود کو مصروف رکھنے کے خیال سے میں نے پھر سوال کیا۔
’’یہ ندی کہاں سے آتی ہے؟‘‘
’’کیا جغرافیائی باتیں پوچھ رہے ہو؟‘‘
’’پھر بھی۔۔۔ مجھے اس سے دلچسپی ہے‘‘۔۔۔ میں نے درد کی شدت کو دباتے ہوئے کہا۔
’’چوہدری صاحب کے قول کے مطابق یہ ندی چھوٹے چھوٹے نالوں سے مل کر بنتی ہے۔‘‘
’’یہ یہاں جاتی ہے؟‘‘
راحت نے مڑ کر میری آنکھوں میں جھانکا۔
’’یہ سب کیوں پوچھ رہے ہو؟‘‘
’’بس یونہی۔۔۔ ‘‘
’’لیکن کیوں ؟‘‘
’’بتاؤ نا۔۔۔ ‘‘
’’یہ ندی آگے چل کر ایک بہت بڑے دریا سے مل جاتی ہے۔‘‘
سیاہ کیڑے کا دوسرا پنجہ بھی ذہن کے گودے میں پیوست ہو چکا تھا اور وہ نوچ نوچ کر اپنی خوراک حاصل کر رہا تھا۔ درد کی شدت سے میری آنکھوں سے آنسو بہہ اٹھے۔
راحت گھبرا گئی اور پوچھنے لگی۔
’’کیا ہوا۔۔۔ کیا بات ہے؟‘‘
’’کچھ نہیں۔‘‘
’’کچھ تو ہے؟‘‘
’’سوچتا ہوں بڑی چیزوں کو چھوٹی چیزیں بُری کیوں لگتی ہیں ؟‘‘
میں نے کراہتے ہوئے جواب دیا۔ سیاہ کیڑا میرا ذہن کھائے جا رہا تھا۔ درد ناقابلِ برداشت ہو چکا تھا۔ میرے منہ سے چیخ نکل گئی، پھر مسلسل چیخیں گونجنے لگیں۔۔۔ چوہدری صاحب گرجدار آواز میں کانوں میں زہر انڈیل رہے تھے۔
چند گھنٹوں بعد مجھے اپنا بوریا بستر سمیٹنا پڑا۔
میں گلی سے باہر نکلنے لگا تو لیمپ پوسٹ نے میرا بازو تھام لیا اور پوچھنے لگا۔
’’کہاں جاؤ گے؟‘‘
میں نے حیرت سے اسے دیکھا۔
’’تو تمہیں سب معلوم ہے۔‘‘
وہ ہنسا، پھر میری پریشانی دیکھ کر افسردگی سے کہنے لگا۔
’’پگلے۔۔۔ مجھے تو یہ بہت پہلے سے معلوم تھا۔‘‘
’’تم نے مجھے بتایا کیوں نہیں ؟‘‘
’’تم نے پوچھا ہی کب تھا؟‘‘
کچھ دیر خاموشی رہی، پھر وہ پوچھنے لگا۔
’’کس سے ڈر کر بھاگ رہے ہو؟‘‘
’’چوہدری صاحب سے۔‘‘
’’کہاں جاؤ گے؟‘‘
’’جدھر کا راستہ مل گیا۔‘‘
’’اگر وہاں بھی کوئی چوہدری ہوا تب۔۔۔ ‘‘
میں نے کوئی جواب نہ دیا اور سڑک پر بھاگنے لگا۔ وہ مجھے آوازیں دیتا رہ گیا۔۔۔ وہ روتا رہا۔۔۔ سسکتا رہا۔ مجھے دور تک اس کی سسکیاں سنائی دیتی رہیں ، لیکن میں بھاگتا رہا۔ اس سے دور۔۔۔ بہت دور۔۔۔
میں کہاں جاؤں گا، کیا کروں گا؟ یہ باتیں میری سوچ سے بالا تر تھیں۔ سیاہ کیڑے نے میرے ذہن کو کھا لیا تھا، ماحول نے میری روح کو ڈَس لیا تھا۔ مجھے سوائے درد کے کوئی احساس نہ تھا۔۔۔ میں اگر کوئی بات جانتا تھا تو وہ یہی کہ مجھ سے زندگی چھین لی گئی ہے اور اب مجھے بغیر زندگی کے زندہ رہنا ہے۔
اسٹیشن پر ایک مانوس آواز نے مجھے چونکا دیا۔
’’ٹھہرو۔۔۔ ‘‘
’’تم۔۔۔ ‘‘
’’ہاں ہم دونوں ساتھ چلیں گے۔‘‘
’’مگر۔۔۔ ‘‘
’’مگر وگر کچھ نہیں۔۔۔ ‘‘
’’چوہدری صاحب۔۔۔ ‘‘
’’ان کا ذکر نہ کرو۔۔۔ ‘‘
اور پھر بغیر دیکھے، بغیر سوچے، قدم انجانی منزل کی طرف اٹھ گئے۔
کراچی میں تین سال گزر گئے۔
میں فیکٹری میں ملازم ہو گیا۔
میں تمام دن دھوئیں میں گھرا رہتا۔ یہ دھواں میرے سانسوں کی پگ ڈنڈی پر چلتا ہوا میرے پھیپھڑوں کی تہوں میں پہنچتا رہا۔ فیکٹری کے زنگ آلود ماحول نے میری ہڈیوں کو ڈس لیا تھا۔ لیکن میں پھر بھی خوش تھا، کیونکہ مجھے اس سیاہ کیڑے سے نجات مل چکی تھی، جس نے صدیوں میرے ذہن کا گودا کھایا تھا، برسوں میرا خون پیا تھا۔۔۔ وہ کیڑا دم توڑ چکا تھا۔ مجھے ذہنی آزادی ملنے ہی والی تھی۔
پھر میں نے ترقی کی طرف یکے بعد دیگرے کئی قدم بڑھائے۔ میں اپنے دوست کو بھول گیا، راحت کی چکا چوند بھی ماند پڑ گئی۔
لیکن۔۔۔ پھر، ایک دن کیڑے نے رینگنا شروع کر دیا، حویلی یاد آ گئی۔
میری نظروں کے سامنے لیمپ پوسٹ بھی اُبھر آیا۔۔۔ میری اندھیری راتوں کا دوست۔۔۔ وفادار، بے لوث اور خلوص سے پُر۔۔۔ میں نے سوچا کیوں نہ کچھ دنوں کے لیے چوہدری صاحب کے پاس چلا جائے، ان کا غصہ ٹھنڈا ہو چکا ہو گا۔ میں اپنے دوست سے بھی ملنا چاہتا تھا۔
اگلی صبح میں کراچی سے چل پڑا۔
شام ہو چکی تھی،
میرا دوست گلی کی نکڑ پر کھڑا سڑک کی طرف دیکھ رہا تھا۔ میں نے کار گلی میں پارک کی اور دوڑ کر اس سے لپٹ گیا۔ اس کے سینے سے لگ کر مجھے سکون مل گیا۔ میں چند لمحے اسے اپنے بارے میں بتاتا رہا لیکن وہ چپ رہا۔ شاید مجھے سے ناراض ہو گیا تھا۔ میں نے سوچا پہلے حویلی سے ہو آؤں پھر آ کر اسے منا لوں گا۔ اچانک میر ی نظر سڑک پر پڑی۔ کچھ لوگ مجھے یوں لیمپ پوسٹ سے لپٹتے دیکھ کر کھڑے ہو گئے تھے۔ مجھے بڑی خفت ہوئی اور میں جلد ی سے حویلی کی طرف بڑھ گیا۔
حویلی کے دروازے پر میں چند لمحوں کے لیے ٹھٹکا۔
میں نے سوچا، چوہدری صاحب کا رویّہ خدا جانے کیسا ہو۔
حویلی میں نیم تاریکی تھی۔ میں چوہدری صاحب کے کمرے کی طرف گیا۔ وہ پرانی کرسی پر چپ چاپ بیٹھے تھے۔
’’کون۔۔۔ ؟‘‘
میں گھبرا گیا۔
’’چوہدری صاحب۔۔۔ ‘‘
’’تم۔۔۔ ‘‘ ان کی گرجدار آواز گونجی، پھر انہوں نے حیرت سے میرے شاندار لباس کو دیکھا اور کہنے لگے۔
’’باہر گاڑی تم نے کھڑی کی ہے؟‘‘
’’جی۔۔۔ ‘‘
چند لمحے خاموشی رہی۔
’’چوہدری صاحب میں شرمندہ ہوں ، میں نے بغاوت کی ہے، اصل میں راحت۔۔۔ ‘‘
میں ابھی فقرہ پورا بھی نہ کرنے پایا تھا کہ چوہدری صاحب کہنے لگے۔
’’جس دن سے تم نے ہمیں چھوڑا، راحت چارپائی سے نہیں اٹھی۔ اس کی یہ حالت دیکھ کر اس کی ماں تو چل بسی مگر۔۔۔ ‘‘
مجھے تو ایک پل کے لیے سکتہ ہو گیا۔
میں راحت کے کمرے کی طرف بھاگا۔
وہ چارپائی پر تکیہ کے سہارے لیٹی کتاب پڑھ رہی تھی۔ میری آنکھوں کے سامنے دھُند سی چھانے لگی۔ وہ تو ہڈیوں کا ڈھانچہ تھی۔ اچانک مجھے یوں لگا جیسے میرے قریب سے گزر کر کوئی چارپائی کی طرف گیا ہے۔ ایک ہیولا سا چارپائی کی جانب بڑھتا نظر آیا۔۔۔ اور پھر مجھے یوں محسوس ہوا جیسے چارپائی پر وہی پہلی کی سی خوبصورت راحت لیٹی ہے۔۔۔ خوبصورت، صحت مند اور گداز۔۔۔
میں باہر کی طرف بھاگا اور اپنے دوست کے پاس آ کر جلدی جلدی سب کچھ کہہ سنایا، لیکن وہ چپ رہا۔ میں اس کے سینے سے لگ کر خوب رویا، مگر اس پر کوئی اثر نہ ہوا۔ روتے روتے مجھے محسوس ہوا کہ آج اس کے سینہ میں زندگی کی کوئی حرارت نہیں۔ میں نے اسے جھنجھوڑا، ہلایا۔۔۔ پُکارا، دوستی کا واسطہ دیا، لیکن وہ خاموش رہا۔۔۔ اور تب مجھ پر یہ اذیت ناک انکشاف ہوا کہ میں لکڑی کے لیمپ پوسٹ کو ہلا رہا ہوں ، بے جان، مردہ، لکڑی کے لیمپ پوسٹ کو۔۔۔ میں بوجھل قدموں سے حویلی کی سمت چل پڑا۔
ڈیوڑھی سے گزرتے ہوئے میری آنکھوں میں آنسو آ گئے۔
باہر سڑک پر لیمپ پوسٹ کی لاش پڑی تھی، اندر کمرے میں راحت تھی۔۔۔ صحت مند اور گداز۔۔۔
اور میں دہلیز پر کھڑا دونوں کو بِٹ بِٹ دیکھ رہا تھا۔
٭٭٭

ٹوٹے پَر، لمحہ لمحہ، زرد کبوتر

صبح آنکھ کھلتے ہی میں اپنے آپ کو بہت سی گالیاں نکالتا ہوں ، بستر سے نکلتے ہی مجھ پر غبار چھا جاتا ہے اور میں اسی کہر میں لپٹا اپنے آپ کو کوستا دفتر کی تیاری کرتا ہوں۔
گھر سے نکلتے ہی میں خود کو بھاگتے ہوئے اسی ہجوم میں پاتا ہوں جو ایک دوسرے کو نیچے گراتا ایک ہی سمت میں بھاگا چلا جا رہا ہے۔ لوگ ایک دوسرے سے ٹکرا ٹکرا کر نیچے گرتے ہیں اور فوراً ہی اٹھ کر پھر بھاگنے لگتے ہیں۔ ہم سب ایک ہی رفتار سے ایک ہی سمت دوڑ رہے ہیں۔ بس اسٹاپ پر بھی ہجوم ہے، ہر کوئی بے چینی سے موڑ کی طرف دیکھ رہا ہے۔ خدا خدا کر کے بس موڑ کی گلی سے نمودار ہوتی ہے۔ یہ بس بھی ہماری طرح دوڑ دوڑ کر تھک چکی ہے مگر پھر بھی دوڑے جا رہی ہے۔ بس کو دیکھتے ہی ہجوم میں حرکت ہوتی ہے اور چشم زدن میں سب بھوکے گدھوں کی طرح بس پر ٹوٹ پڑتے ہیں۔ ہر کوئی دوسرے کو گراتا، دھکے دیتا دوسرے سے پہلے سوار ہونا چاہتا ہے۔ میں بھی دوسروں کو بے رحمی سے دھکے دیتا سوار ہو جاتا ہوں ، بس میں تل دھرنے کی جگہ نہیں۔ لوگ ایک دوسرے پر چڑھے ہوئے ہیں۔ مجھے سب بھیڑ بکریوں کی طرح لگتے ہیں ، جنہیں ہانک کر مال گاڑی کے ڈبے میں بند کر دیا گیا ہو۔۔۔ میں ہانکنے والے کو تلاش کرتا ہوں ، وہ مجھے کہیں نظر نہیں آتا۔ میں اپنے ساتھ کھڑے ایک ادھیڑ عمر سے پوچھتا ہوں۔
’’وہ کہاں ہے؟‘‘
’’وہ کون۔۔۔ ؟‘‘
وہ حیرت سے مجھے دیکھتا ہے پھر کچھ نہ سمجھ کر دوسری طرف متوجہ ہو جاتا ہے۔ بس چل پڑتی ہے۔ لوگ دروازے کے ساتھ لٹکے ہوئے ہیں۔ کنڈیکٹر چیخ کر لٹکے ہوئے لوگوں سے اتر جانے کے لیے کہتا ہے مگر کوئی ٹَس سے مَس نہیں ہوتا۔ بس رک جاتی ہے لیکن لٹکے ہوئے بدستور لٹکتے رہتے ہیں۔ تنگ آ کر کنڈیکٹر سیٹی بجاتا ہے۔ بس گھسٹنے لگتی ہے۔ مجھے خیال آتا ہے، اگر لٹکے ہوئے لوگوں میں سے کوئی نیچے گر گیا تو۔۔۔ ؟ میں گھبرا کر پاس کھڑے ہوئے دبلے پتلے شخص سے پوچھتا ہوں۔
’’اگر ان میں سے کوئی نیچے گر گیا تو۔۔۔ ؟‘‘
وہ برا سا منہ بنا کر کہتا ہے۔
’’بس لیٹ ہو جائے گی اور کیا ہو گا۔۔۔ وقت پر دفتر نہ پہنچا تو وہ حرامی آج پھر بکواس کرے گا۔‘‘
میرے ذہن میں اپنے ہیڈ کلرک کی شکل گھومنے لگتی ہے۔ میں سوچتا ہوں ، ہر ماتحت کو اپنا انچارج حرامی نظر آتا ہے۔ اگر کوئی نیچے گر جائے تو واقعی بس لیٹ ہو جائے گی۔ مجھے بار بار خیال آتا ہے کہ ابھی کوئی نیچے گر جائے گا مگر کوئی بھی نیچے نہیں گرتا۔
کنڈیکٹر بغیر ٹکٹ کی صدا لگا رہا ہے۔ میں نے ابھی تک ٹکٹ نہیں لیا۔ کنڈیکٹر آواز لگاتا میرے قریب آ جاتا ہے لیکن میں چپ رہتا ہوں اور خاموشی سے دوسری طرف دیکھنے لگتا ہوں۔
اگلے اسٹاپ پر آگے بیٹھی ہوئی دو عورتیں کھڑی ہو جاتی ہیں۔ گزرنے کے لیے راستہ بالکل نہیں ، دروازے تک آدمی ہی آدمی ہیں۔ وہ مردوں سے ٹکراتی دروازے کی طرف بڑھتی ہیں۔ مرد اور پھیل کر بیٹھ جاتے ہیں۔ دونوں بڑی مشکل سے نیچے اترتی ہیں۔ اس وقت ان کی حالت لیموں کش سے نکلے ہوئے لیموں کی سی ہے۔ بس دوبارہ گھسٹنے لگتی ہے۔ میرے قریب کھڑے دو نوجوان ایک دوسرے کی طرف دیکھ کر مسکراتے ہیں اور آنکھوں ہی آنکھوں میں اترنے والیوں کے بارے میں باتیں کرتے ہیں۔
کنڈیکٹر ابھی تک بغیر ٹکٹ کی آواز لگا رہا ہے۔ میرے ساتھ کھڑے ادھیڑ عمر نے بھی ٹکٹ نہیں لیا۔ ہم دونوں کی نظریں ملتی ہیں اور ہم دونوں مسکراتے ہیں۔ اپنے اسٹاپ پر خاموشی سے اتر جاتا ہوں اور دفتر کی سیڑھیاں چڑھتے ہوئے ٹکٹ کے پیسوں کو جیب میں تھپتھپاتے ہوئے مسکراتا ہوں۔ صبح سے اب تک میں پہلی بار ہنسا ہوں۔
اپنی کرسی پر بیٹھ کر میں درازیں کھول کر فائلیں نکالتا ہوں اور انہیں یوں میز پر سجاتا ہوں ، جیسے دکاندار اپنا مال سجاتے ہیں۔ ہیڈ کلرک اپنی میز پر بیٹھا اخبار پڑھ رہا ہے۔ وہ ہر روز اخبار لے کر آتا ہے اور اس کی ایک ایک سطر پڑھتا ہے، پھر یہ اخبار اسسٹنٹ کے پاس چلا جاتا ہے۔ وہاں سے ساتھ والے سے ہو کر مجھ تک پہنچتا ہے اور میرے بعد چپڑاسی کی باری آتی ہے۔ دفتر میں سارا کام اسی طرح ہوتا ہے، حتیٰ کہ جھاڑ اور برہمی کا اظہار بھی اسی ترتیب سے ہوتا ہے۔ ہم سب میں سے چپڑاسی سب سے زیادہ صابر ہے کیونکہ وہ اپنا غصہ کسی پر نہیں نکالتا۔
اخبار پڑھنے کے بعد ہیڈ کلرک مجھے اپنے پاس بلا کر ایک فائل دیتا ہے اور اسے آج ہی ختم کرنے کی ہدایت کرتا ہے۔ میں میز پر آ کر کام شروع کر دیتا ہوں۔ ابھی تھوڑی ہی دیر گزرتی ہے کہ چپڑاسی آ کر صاحب کا بلاوا دیتا ہے۔ میں بھاگتا ہوا اندر جاتا ہوں ، صاحب اندر میز پر اخبار پھیلائے گم ہے۔ میں مؤدب کھڑا رہتا ہوں ،
’’جی سر۔۔۔ ‘‘
وہ سر اٹھاتا ہے۔۔۔ ’’آ، ہاں۔‘‘
پھر دراز کھول کر کاغذ نکالتے ہوئے کہتا ہے۔
’’بھئی یہ میرا ذاتی کام ہے۔۔۔ ذرا جلدی کر دو۔‘‘ وہ کاغذوں کا پلندہ میرے حوالے کر کے دوبارہ اخبار کی سطروں میں کھو جاتا ہے۔
میں اپنی میز پر آتا ہوں۔ ہیڈ کلرک کا دیا ہوا کام ابھی ادھورا ہے۔۔۔ میں اندر سے لائے پلندے کی طرف دیکھتا ہوں۔۔۔ دفتر کا کام میری ذمہ داری ہے۔۔۔ صاحب کا کام کرنا بھی میری ذمہ داری ہے۔۔۔ میں خود کو ذمہ داری کی دیوار کے نیچے دبتا ہوا محسوس کرتا ہوں۔
چھٹی ہوتے ہی میں پھر بس اسٹاپ کی طرف دوڑ تا ہوں اور دھکم پیل کرتا سوار ہو جاتا ہوں ، بھوک چمک اٹھی ہے، میں جلد سے جلد گھر پہنچنا چاہتا ہوں۔ اندر آتے ہی ماں سے پوچھتا ہوں۔
’’کیا پکا ہے؟‘‘
’’آلو وَڑیاں۔۔۔ ‘‘ وہ بے دلی سے جواب دیتی ہے۔
میری چمکتی ہوئی بھوک پر اوس پڑ جاتی ہے۔
’’رو ز ہی آلو وَڑیاں ؟‘‘
’’پیسے جو نہیں تھے۔۔۔ ‘‘ وہ روز کا دہرایا ہوا جملہ دہرا دیتی ہے۔ میں چوکی پر بیٹھ جاتا ہوں ، ماں روٹیوں کی چنگیر اور پلیٹ آگے رکھ دیتی ہے۔ میں کہتا ہوں ، ’’تمہارے پاس تو روز ہی پیسے نہیں ہوتے۔‘‘
اس کے چہرے پر سرخ دھاریاں ابھر آتی ہیں ، ’’تیرے باپ کی کمائی آتی ہے نا۔‘‘
میرے پاس کوئی جواب نہیں ، لیکن یہ آلو وڑیاں۔۔۔
میرا غصہ اسی طرح رہتا ہے۔
’’تمہیں خرچ کرنے کا سلیقہ ہی نہیں ہے۔‘‘
وہ چراغ پا ہو جاتی ہے۔
’’تو ہزار روپیہ دیتا ہے نا۔۔۔ شرم نہیں آتی، سوا سو میں اور کیا آئے گا۔ پتہ نہیں میں کیسے گھر کا خرچ چلاتی ہوں۔‘‘ پھر وہ روہانسی ہو جاتی ہے۔
میں خاموشی سے کھانا زہر مار کرتا ہوں۔ مجھے معلوم ہے، میری اس بات سے اسے بڑا دکھ پہنچا ہے۔ میرا باپ کئی سال پہلے مر گیا ہے۔ ماں نے صرف ہمارے لیے دوسری شادی نہیں کی۔ میں ہمدردی سے اس کی طرف دیکھتا ہوں۔
وہ ابھی تک بڑبڑا رہی ہے۔
’’تمھی لوگوں کے لیے میں نے اپنی زندگی برباد کر دی ہے۔‘‘
میں خاموشی سے باہر نکل جاتا ہوں۔
بازاروں میں بھیڑ ہے۔ میرے قریب سے دو صحت مند لڑکیاں گزرتی ہیں۔ میں مڑ کر انہیں دیکھتا ہوں ، میرا جی چاہتا ہے کہ ان کے پیچھے پیچھے چلوں۔ لیکن ان کے پیچھے نہیں جاتا کیونکہ میرے پاؤں بندھے ہوئے ہیں۔ میرے اوپر میری شرافت کا لبادہ پڑا ہوا ہے۔ میں چاہتا ہوں کہ جھنجھلا کر اسے اتار پھینکوں لیکن میں خاموشی سے دوسری سڑ ک پر مڑ جاتا ہوں اور بے مقصد چلتا رہتا ہوں۔
شام کے دھند لکے گہرے ہو گئے ہیں۔ میں چلتے چلتے تھک گیا ہوں۔ میرا جی چاہتا ہے کہ کسی جگہ بیٹھ کر گر م گرم چائے پیوں۔ میں اس مخصوص ہوٹل کی طرف چل پڑتا ہوں جہاں میرے دوست اکٹھے ہوتے ہیں۔ لیکن جونہی میں اندر جانے لگتا ہوں مجھے خیال آتا ہے اندر ابھی کوئی نہیں۔ اگر میں پہلے جا کر بیٹھ گیا تو مجھے بعد میں آنے والے سب دوستوں کو چائے پلانا پڑے گی۔
میں خاموشی سے باہر آ جاتا ہوں۔ اندر میزوں پر رکھی ہوئی پیالیوں میں سے نکلتی ہوئی بھاپ میرے اندر کسی چیز کو بار بار ابھارتی ہے لیکن میں خود پر جبر کرتا ہوں۔ مجھ پر پھر جھلاہٹ کا دورہ پڑتا ہے۔ مجھے محسوس ہوتا ہے جیسے کپڑوں نے میرے اندر کی کسی چیز کو جکڑ رکھا ہے۔ مجھے ہر شخص بندھا نظر آتا ہے۔ میں دانت کچکچاتا ہوٹل کے دروازے سے دور چلا جاتا ہوں۔
کچھ دیر کے بعد جب کچھ لوگ آ جاتے ہیں تو چوروں کی طرح جا کر ان کے پاس بیٹھ جاتا ہوں۔ دائیں کونے پر بیٹھا ہوا سانولے رنگ والا میرے لیے چائے کا آرڈر دیتا ہے۔ اس کے چہرے پر بیزاری کے آثار ہیں۔ وہ گفتگو میں صرف ہوں ، ہاں کر کے ہی اپنی موجودگی ظاہر کر رہا ہے۔ حالانکہ مجھے وہی موجود نظر آتا ہے، باقی سب غائب ہیں۔ اتنے میں ہمارا ایک اور دوست اندر آتا ہے۔ نئے آنے والے کو دیکھ کر اس کے چہرے پر نفرت کی لکیریں ابھرتی ہیں۔
میں سوچتا ہوں ، میری آمد پر بھی اس کے چہرے پر یہی لکیریں ابھری ہوں گی۔ مجھے وہ رسّی سے بندھا ہوا محسوس ہوتا ہے۔ اس کا قصور صرف اتنا ہے کہ وہ آج سب سے پہلے اندر آیا ہے۔ پہلے آ جانا بھی ایک گناہ ہے۔ میں بھی اپنے بہن بھائیوں میں سب سے پہلے آگیا ہوں۔ میں بھی رسی سے بندھا ہوں۔۔۔ مجھے ارد گرد بیٹھے ہوئے تمام لوگوں سے نفرت ہو جاتی ہے اور میں کسی سے کچھ کہے بغیر باہر نکل جاتا ہوں۔
رات بتدریج تاریکی کے تالاب میں ڈوب رہی ہے۔ میں فٹ پاتھ کے ساتھ ساتھ چل پڑتا ہوں۔ سامنے سے ایک جوڑا بانہوں میں بانہیں ڈالے ہنستا ہوا آ رہا ہے۔ میں بڑی حسرت سے عورت کی طرف دیکھتا ہوں۔ میرے اندر کوئی چیز مسلسل تڑخ رہی ہے۔ میں اداس ہو کر گھر کی طرف چل پڑتا ہوں۔
جب میں دہلیز سے اندر قدم رکھتا ہوں تو میرے نتھنوں میں آلو وڑیوں کی بو آتی ہے۔ میرا جی چاہتا ہے، زور زور سے چیخوں مگر میں چپ چاپ باورچی خانے میں جاتا ہوں۔ سب سو رہے ہیں۔ میں کھانا نکالتا ہوں ، سالن جما ہوا ہے۔ میں اسے گرم کرنا چاہتا ہوں مگر میں اسے گرم نہیں کرتا اور اسی طرح کھانا شروع کر دیتا ہوں۔
پھر میں بڑے کمرے میں آتا ہوں۔ سب سو رہے ہیں۔ مجھے ان سب پر غصہ آتا ہے۔ اتنی جلدی سونے کی کیا تُک ہے، ابھی تو صرف دس ہی بجے ہیں۔ اسی وقت ماں کی آنکھ کھل جاتی ہے۔ مجھے دیکھتے ہی وہ حسبِ معمول بڑبڑاتی ہے۔
’’اتنی رات گئے آیا ہے۔‘‘
میں کہتا ہوں۔۔۔ ’’دس بجے رات ہوتی ہے؟‘‘
وہ بھی جواباً غصہ سے کہتی ہے۔۔۔ ’’تو کیا سویر ہوتی ہے۔‘‘
میں جھنجھلا کر کہتا ہوں۔۔۔ ’’میں تواسی وقت آؤں گا۔‘‘
وہ بے بس ہو جاتی ہے اور روہانسی ہو کر جواب دیتی ہے۔
’’ہاں ہاں کیوں نہیں آئے گا۔۔۔ میرا کوئی زور ہے تجھ پر۔‘‘
پھر وہ بڑبڑاتی ہے۔
’’اسی دن کے لیے تو میں نے یہ دکھ سہے ہیں۔‘‘
مجھے اس پر بڑا رحم آتا ہے۔ میں خاموشی سے بستر میں گھس جاتا ہوں۔ بستر پر لیٹ کر میں سوچتا ہوں ، صبح پھر جلدی اٹھنا ہے۔ پھر فوراً ہی مجھے صاحب کا وہ کام یاد آتا ہے جسے میں ادھورا چھوڑ کر آیا ہوں۔ کل صبح جاتے ہی چڑھ جائے گا۔ میں بیزاری سے پہلو بدلتا ہوں۔ سامنے انور کی چارپائی ہے۔ صبح وہ پھر فیس کے لیے روئے گا۔ ماں نیند میں بھی بڑبڑا رہی ہے۔ مجھے اس پر ترس آتا ہے۔ میں سوچتا ہوں اس بے چاری نے صرف ہمارے لیے ہماری اپنی زندگی برباد کر لی ہے۔ اچانک مجھے ماں پر بے حد غصہ آتا ہے۔ اگر وہ دوسری شادی کر لیتی تو کم از کم میرا ایک بوجھ تو کم ہو جاتا۔ اچانک مجھے اپنے آپ سے نفرت سی محسوس ہوتی ہے۔ میں خود کو ایک گندی سی گالی نکالتا ہوں اور لحاف کو اوپر کھینچ لیتا ہوں۔
٭٭٭

ڈوبتے جسم کا ہاتھ

۔۔۔ اور سب راحتیں اسی کے لیے ہیں جو دائرے میں رہنے کا فن جانتا ہے۔
سرمئی رنگ کے اس دائرے میں ہم دو ہیں۔
ایک وہ جو تیز کلہاڑا لیے میرے پیچھے پیچھے آ رہا ہے اور دوسرا میں ، جو کلہاڑے کے ہر وار پر اپنے جسم کا ایک ٹکڑا اس کے حوالے کرتا ہے۔ اس دائرے میں صرف وہی جاگتا ہے کہ اس کے تیز کلہاڑے کی چمک، رنگت کے سرمئی پن کی خالق ہے اور میں سوتا ہوں کہ میرے لیے جاگنے کے لمحے صرف وہ ہیں ، جب میں اس کی امانت اسے لوٹاتا ہوں۔ وہ کہتا ہے جب سے میں نے سانسوں کا قرض لیا ہے وہ میرے ساتھ ہے لیکن میری پہچان کے دھند لکے اس موڑ پر آ کر میرا ساتھ چھوڑ جاتے ہیں جہاں اس نے مجھ پر پہلا وار کیا تھا۔
جماعت کے کمرے میں حسب معمول آخری بنچ پر بیٹھا بلیڈ بجا رہا تھا کہ ماسٹر جی نے میز پر زور سے ہاتھ مارا، ’’رول نمبر ۱۷۔‘‘
میرے ساتھ والے نے میری پسلیوں میں کہنی ماری۔ میں نے جلدی سے بلیڈ پر کتاب رکھ دی۔۔۔ ’’جی سر۔۔۔ جی سر۔۔۔ ‘‘
’’تیری فیس معاف ہے؟‘‘
میں نے دانت نکالے۔۔۔ ’’جی۔۔۔ جی سر۔‘‘
آگے بیٹھے ہوئے ایک لڑکے نے کہا۔۔۔ ’’یہ غریب ہے سر۔‘‘
میں نے جواباً پھر دانت نکالے، ماسٹر جی نے زور سے ہُوں کی اور کہنے لگے۔۔۔ ’’اوئے حرامی! تو پھر پڑھتا کیوں نہیں۔۔۔ فیل ہو گیا تو فیس لگ جائے گی سمجھا؟‘‘
میں چپ چاپ بیٹھ گیا اور ماسٹر جی کی نظر بچا کر پھر بلیڈ بجانے لگا۔
چھٹی کے بعد تپتی دوپہر میں گھر آتے ہوئے جب میں سنسان سڑک پر مٹکے میں سے پانی پی رہا تھا تو میں نے اسے دیکھا۔
وہ تیز چمکتا کلہاڑا لیے مٹکے کی اوٹ سے برآمد ہوا اور میرے سامنے آ کر کھڑا ہو گیا۔
میں اس کی اچانک موجودگی سے خوف زدہ ہو گیا اور میں نے گھگیا کر پوچھا، ’’تم کون ہو؟‘‘
وہ خوفناک ہنسی ہنسا۔۔۔ ’’میں۔۔۔ تمہارے وجود کا خدا ہوں۔‘‘
’’خدا؟‘‘
’’مگر خدا تو زمین پر نہیں اترتا۔‘‘
’’لیکن اب میں تمہارے سفر میں تمہارا شریک ٹھہرایا گیا ہوں۔‘‘
اس نے کلہاڑا اٹھایا اور وار کیا۔
گھر آ کر میں نے ماں سے کہا۔۔۔ ’’امی۔۔۔ آج میں نے اپنے خدا کو دیکھا ہے۔‘‘
’’خدا؟‘‘
’’ہاں جی۔۔۔ اس کے ہاتھ میں تیز چمکتا کلہاڑا تھا۔‘‘
اور میرے جسم نے کلہاڑے کی تیزی کی گواہی دی۔
’’کیا بکتا ہے۔۔۔ چل جا کر سو جا۔‘‘
لیکن سونا کہاں۔ میں نے تو اس کے ہونے کا اقرار کر لیا تھا۔
اٹھتے بیٹھتے اس کی تیز چمک میرے سر پر منڈلاتی اور میں رات رات بھر جاگ کر اس کے ہونے کی گواہی دیتا۔۔۔
دو ماہ بعد جب نتیجہ نکلا تو میں نے ماسٹر سے پوچھا، ’’سر جی۔۔۔ اب تو میری فیس نہیں لگے گی نا؟‘‘
انہوں نے زور سے میری کمر تھپتھپائی۔۔۔ ’’واہ! تو نے تو کمال کر دیا۔‘‘
اس کے کلہاڑے کا پھل سرخ ہو گیا تو میں نے اپنا جسم ہٹا لیا اور اطمینان کا سانس لے کر بھاگتا ہوا گھر آیا۔ اباجی نے میری کامیابی کا سن کر گلے لگا لیا۔ پھر بولے، ’’بیٹا اسی طرح محنت کرنا، یہ آخری سال ہے۔‘‘
میں نے ان کے سینے سے چمٹے چمٹے کلہاڑے والے کو اپنے پیچھے محسوس کیا۔
اس رات جب میں بستر پر لیٹا چادر کو انگوٹھے پر لپیٹ رہا تھا کہ وہ اندھیرے کے کواڑ کھول کر رات کے بطن سے باہر آیا۔
’’میں زمیں کی مسافتوں میں تمہارا گواہ ہوں۔‘‘
’’جاؤ، جاؤ۔۔۔ مجھے سونے دو، اب میں تمہیں کچھ نہیں دوں گا۔‘‘
اس کی ہنسی رات کے ماتھے پر جھومر کی طرح چمکی، ’’میرا کلہاڑا پیاسا ہے۔۔۔ اپنے جسم کے چشمے کھول دو۔‘‘
میں نے اس کی پیاس بجھانے کے لیے اپنی راتیں اور دن اس کے حوالے کر دئیے۔ میر ی آنکھوں کے سیاہ حلقے پھیل کر گالوں کو چھونے لگے اور میرے کانپتے ہاتھ لفظوں کی حکومت میں سفر کرتے کرتے شل ہو گئے۔ تب ایک سال بعد سفر کا اختتام ہوا۔ میں نے اسے اپنا شریک ٹھہرائے جانے کے خراج کی قسط ادا کی۔
جس دن مجھے نوکری ملی، میں نے فضا میں بانہیں پھیلا کر قہقہہ لگایا، ’’اب تم کبھی نہیں آؤ گے۔۔۔ لینے بھی کیا آؤ گے؟‘‘
میں نے اپنے وجود کو تھپتھپایا، ’’ہاں۔۔۔ آج سے میرے تمہارے راستے الگ الگ ہیں ، سن رہے ہو۔۔۔ سنتے ہو نا؟‘‘
جواب میں ایک پُر اسرار خاموشی۔۔۔ گھپ اندھیرا۔
’’ہاں اب کیوں بولو گے؟‘‘میں نے قہقہہ لگایا۔
’’میرے چھنکتے قہقہوں کی عمر اتنی کم کیوں ہے؟‘‘ میں نے اسے قریب دیکھ کر سوال کیا، ’’آخر کیوں ؟‘‘ ’’اتنی قلیل تنخواہ میں کیا کیا ہو گا؟‘‘ ابا جی نے آج صبح ہی کہا تھا۔
’’ہاں۔۔۔ ہاں میں جانتا ہوں ‘‘۔۔۔ میں روہانسا ہو گیا۔
’’ایک اور وار۔۔۔ ہاں ایک وار اور۔‘‘
’’اُف۔۔۔ ‘‘
’’ہاں ! میں اپنے ہونے کا جزیہ ادا کروں گا۔۔۔ ضرور ادا کروں گا۔‘‘
دن رات پھر اپنی پہچان کھو بیٹھے۔۔۔ ایک۔۔۔ دو چار طویل سال، جن میں دن کے چہرے سے راتوں کا وجود الگ ہو گیا۔
’’اعلیٰ تعلیم کے بعد اچھی ملازمت کیوں نہیں ملے گی‘‘۔۔۔ اباجی نے مجھے تھپکی دی، ’’ملازمت بھی کرنا اور پڑھنا بھی۔۔۔ بھئی کمال کر دیا۔‘‘
نئی جگہ آنے کے بعد قسط کی ادائیگی فر ض ٹھہرا، ’’جاؤ اب کبھی نہ آنا‘‘۔۔۔ میرے لہجے میں حکم تھا۔۔۔
’’اب میرے تمہارے وجود ایک دوسرے کے لیے اجنبی پانیوں سے گزریں گے۔‘‘
اس نے اپنا حصہ اٹھایا، کلہاڑے کو فضا میں گھمایا اور واپس مڑ گیا۔
’’ہاں ہاں واپس جاؤ۔۔۔ یہ راستے میرے ساتھ تمہارے قدموں کے لیے حرام کر دئیے گئے ہیں ‘‘ اور میں نے قہقہہ لگایا۔
لیکن میرا یہ قہقہہ ابھی میرے ہونٹوں کے لمس سے آشنا ہی ہوا تھا کہ وہ پھر آ موجود ہوا۔
’’اب کیوں آئے ہو۔۔۔ کیوں ؟‘‘
’’بیٹا!میرے بعد اب تو ہی اس گھر کا باپ ٹھہرے گا۔‘‘ اباجی نے بستر مرگ پر آخری سانس لیتے ہوئے کہا۔
’’ہاں۔۔۔ اس گھر کی سرداری تیرا مقدر تھی، مقدر کے لکھے کو کون ٹال سکتا ہے۔‘‘
اس نے کلہاڑا کندھے سے اتارا اور ہاتھ میں لے کر اسے تولنے لگا۔
جاؤ بھوکے گدھ کی طرح میرے سر پر نہ منڈلاؤ۔۔۔ میں تمہیں اپنے وجود کا ایک ٹکڑا اور دے دوں گا۔۔۔
گھر میں جوان لڑکیاں ہوں تو انہیں رخصت کرنے کے لیے کئی ٹکڑے دینا پڑتے ہیں اور تم صرف ایک ہی کی بات کر رہے ہو؟ صرف ایک۔۔۔
ہاں ، ابھی مجھے صرف سب سے بڑی کی فکر ہے۔
اس نے سر ہلایا۔
تیز چمک نے رات کے سینے پر انگڑائی لی اور میں روتے روتے اباجی کے بے جان جسم سے لپٹ گیا۔
آؤ۔ اب ہم ہواؤں سے راستوں کی بھیک مانگیں۔
جانے والے کے لیے جانا مقدر ٹھہرایا گیا۔
اس کا رستہ میلا نہ کرو۔
اب قبیلہ کی سرداری میرا حصہ ہے۔
ہاں ہاں۔۔۔ ہر سردار کے ساتھ ایک کلہاڑے والا ہوتا ہے۔
’’امی۔۔۔ کلہاڑے والا آپ کے پاس بھی آتا ہے؟‘‘
’’کلہاڑے والا!‘‘
’’ہاں وہی۔۔۔ جو ہماری سانسوں میں ہمارا حصہ دار بنایا گیا ہے۔‘‘
’’بے چارہ۔۔۔ میرے بچے! باپ کا اتنا دکھ نہ کر۔۔۔ جا تھوڑی دیر سوجا۔۔۔ میرے لال۔‘‘
لیکن نیند کہاں ہے؟
اباجی۔۔۔ ہاں ان کا حصہ بھی میں ہی ادا کروں گا۔ بیٹا باپ کا وارث بنایا گیا ہے۔
لیکن کام کرنے والے جانوروں کی آنکھوں پر پٹی کیوں باندھ دیتے ہیں ؟ تا کہ صبح کا سانولا پن اور شام کی شفق بے رنگ دھبّوں میں بدل جائے۔ پھر یہ دھبّے پھیلتے پھیلتے گدلے بدبو دار تالاب بن جائیں۔ جن کا پانی رفتہ رفتہ سوکھے تو نمدار زمینیں اپنی آزادی دلدلوں کے ہاتھ بیچ دیں۔۔۔ دلدلیں۔۔۔ تہہ بہ تہہ۔۔۔ لمحہ بہ لمحہ دھنستے جانا، ڈوبتے جانا۔۔۔ ڈوبتے ہی جانا۔۔۔
’’بھائی ہو تو ایسا ہو۔‘‘ بارات رخصت ہوئی تو ماں نے میرا کندھا دبایا، ’’باپ کی کمی کا احساس نہ ہونے دیا۔۔۔ میرا بچہ۔‘‘
’’میں اس کا حصہ اس کے حوالے کر چکا ہوں امی۔‘‘
’’حصہ۔۔۔ کون سا حصہ؟‘‘ ماں نے حیرت سے دہرایا۔۔۔ ’’تجھے کیا ہو گیا ہے؟ اپنے آپ سے باتیں کرنے لگا ہے؟‘‘
’’ہاں ابھی ایک رہتی ہے، ابھی مجھے ایک ٹکڑا اور دینا ہے۔‘‘
ماں بڑبڑاتی ہوئی دوسرے کمرے میں چلی گئی۔
میں نے سرگوشی کی، ’’میں نے تمہیں دیکھ لیا ہے۔ تم دیوار کی آوٹ میں کھڑے ہو۔ آ جاؤ۔۔۔ ابھی میرا تاوان پورا نہیں ہوا۔‘‘
’’اب رہ بھی کیا گیا ہے۔۔۔ صرف تین سال‘‘
اس کے جانے کے بعد میں نے زور سے کہا،’’کیا؟‘‘ ساتھ والے بستر پر لیٹا ہوا چھوٹا بھائی چونک پڑا۔
’’ہاں ہاں ، تین سال ہی تو۔۔۔ دیکھو نا، دو ایک سال میں چھوٹی سے بھی فارغ ہو جائیں۔‘‘
’’تب تک تو میں بھی بی اے کر ہی لوں گا، کیوں بھائی جان؟‘‘
میں نے سر ہلایا۔
’’صر ف تین سال، اس کے بعد میں تمہیں ایک ذرّہ بھی نہیں دوں گا۔۔۔ ہاں اور میں نے خلا میں ہاتھ پھیلا کر اسے گندی گالی دی۔
صبح کنگھی کرتے ہوئے میں نے سفید ہوتے بالوں کو بیزاری سے گھورا۔ بال اتنی جلدی سفید ہو گئے ہیں۔ خیر خون تو نہیں ہوا نا۔ ہو بھی کیسے؟ میں تو ہر بار ایک ٹکڑا کاٹ کر اس کے حوالے کرتا ہیں۔
دفتر میں چائے پیتے ہوئے میرے ساتھی نے کہا۔۔۔ ’’شادی کب کر رہے ہو؟ عمر کافی ہو چکی ہے۔‘‘
میں خاموشی سے سگریٹ پیتا رہا۔
’’صرف تین سال‘‘
لیکن ان تین سالوں میں وہ بار بار آیا اور اپنی امانت وصول کرتا رہا۔ اس وقت غسل خانے کے ٹھنڈے فرش پر میرا بدن پھیل پھیل کر سکڑ رہا تھا۔
’’پھر آدمی ساری عمر کسی کام کا نہیں رہتا۔‘‘ وہ میرے سامنے تھا، ’’ہاں پھر آدمی سارا بیکار ہو جاتا ہے۔‘‘
اس نے اپنا حصہ اٹھایا اور چلا گیا۔
اگلے دن میں نے عہد کیا کہ میں خود کو بیکار نہیں ہونے دوں گا۔ اب میرا جسم کبھی نہیں کٹے گا۔ وہ ایک صدا۔۔۔ وہ ایک صدا۔۔۔
جوان عورتوں کے جوان جسم
مجھ سے یہ کہتے ہیں آؤ
ہمیں ان دھند لکوں سے آ کر نکالو
کہ محصور ہیں ہم
حصاروں کو توڑو۔
یہ ٹوٹیں تو چشمے اُبل آئیں گے نیلگوں زمزموں کے۔
کبوتر کئی پھڑپھڑائیں گے۔
مٹیالے جھاگوں کی بے انتہا دلدلوں میں سبھی۔۔۔ ہم سبھی ڈوب جائیں گے۔
یہ صدا۔۔۔ یہ آوازیں دن بھر اُڑ اُڑ کر میرے کانوں کے گھونسلوں میں جمع ہوتی رہتی ہیں اور غسل خانے کے ٹھنڈے فرش کو دیکھتے ہی پھڑپھڑا کر باہر نکل آتی ہیں۔
تب جسم پھیلتا ہے اور۔۔۔ وہ اپنا حصہ وصول کرتا ہے۔
تب یہ تین سال بھی گزر گئے۔ میں نے اس سے آخری بار کہا۔ آج میں تمہیں آخری ٹکڑا دے رہا ہوں۔۔۔ پھر کبھی نہ آنا، ہاں۔
اور اب کئی سال گزر چکے ہیں۔
میں بہت دنوں سے بیمار ہوں۔ میری بیوی اور بچے میرے قریب بیٹھے ہیں۔
اچانک میری بیوی پھوٹ پھوٹ کر رونے لگتی ہے، ’’آپ کو کچھ ہو گیا تو ہمارا کیا ہو گا؟‘‘
میں اپنے چھوٹے چھوٹے بچوں اور پھر روتی ہوئی بیوی کو دیکھتا ہوں۔۔۔ تب میری نظر اسی پر پڑتی ہے۔ وہ بڑی خاموشی سے جانے کب کا میرے پیچھے کھڑا ہے، اس کے ہاتھ میں چمکتا، تیز کلہاڑا اپنا حق مانگ رہا ہے۔
لیکن اب میں اسے کیا دوں ؟ میں تو پہلے ہی ایک ایک کر کے سب کچھ اس کے حوالے کر چکا ہوں۔
٭٭٭

دور ہوتا چاند

دائیں طرف بیٹھے ہوئے چھوٹے قد کے شخص نے، جس کے چہرے پر لمبی مسافت کی لکیریں نمایاں تھیں ، دونوں کو دیکھا اور کہنے لگا۔
’’آخر ہم کب تک اس کی راہ دیکھیں گے؟‘‘
دوسرے دونوں چپ رہے لیکن ان کے چہروں پر تائید کی چمک لمحہ بھر کے لیے اُبھری اور وہ دوبارہ اپنی اپنی پیالی کی طرف متوجہ ہو گئے۔ پہلے نے چسکی لی اور پیالی نیچے رکھ دی اور کہنے لگا،
’’میں اس کا انتظار نہیں کر سکتا، پتھر کے اس نصف دھڑ کے ساتھ میں کب تک اس کی راہ دیکھوں گا۔۔۔ ‘‘
اس پر اس کے ساتھ بیٹھے ہوئے نے سر ہلایا۔
’’ہاں ہم کب تک اپنے مفلوج جسموں پر اپنی داستانوں کا بوجھ لیے اس کی راہ تکیں گے، کب تک؟‘‘
’’ہمیں اپنی اپنی کہانی شروع کر دینی چاہئے۔‘‘۔۔۔ تیسرے نے سر ہلایا۔
پہلے نے اسے تحسین بھری نظروں سے دیکھا۔
’’تو پھر میں اپنی کہانی شروع کرتا ہوں ‘‘ اور اس نے اپنی کہانی یوں شروع کی۔
’’اے درویشو! میں جو پتھر کے نصف دھڑ کے ساتھ تمہارے سامنے بیٹھا ہوں ، پہلا درویش ہوں۔ میں اس پیلے جنگل کا سحر زدہ ہوں جو نیلے طوطوں کا مسکن ہے۔ یہ نیلے طوطے ہر آنے والے کو اپنی آنکھوں اور نوکیلی چونچو ں سے کھا جاتے ہیں۔ میں جب جنگل میں داخل ہوا تو چاند نصف قطر سے گزر کر دھیرے دھیرے آگے بڑھ رہا تھا۔ میں اپنے ہونے کا غم لیے سرد تاریک جنگل میں اترنے لگا۔ درختوں کی اوٹ میں پتوں کے پیچھے لاتعداد آسیب میری حرکتیں دیکھ رہے تھے۔ میں لمحہ بہ لمحہ آگے بڑھ رہا تھا اور آسیب قدم بہ قدم پیچھے ہٹ رہے تھے۔
سنسان ہوا سیٹیاں بجاتی شاخوں میں جھولا جھول رہی تھی اور پتے پُر اسرار لہجہ میں دبی ہنسی ہنستے ایک دوسرے سے لپٹ لپٹ رہے تھے۔ میں شاخوں کو ہٹاتا، سانپوں کی پھنکاریں سنتا آگے بڑھتا رہا۔ دفعتاً فضا میں سیٹی گونجی اور نیلا طوطا منڈلاتا ہوا، سیٹیاں بجاتا میرے سر پر سے گزر گیا۔ آسیب دور دور تک سمٹ گئے۔ شاخوں کے ساتھ جھولا جھولتی ہوا بھی ٹھٹک کر رہ گئی۔ میں نے خود کو خاموشی کی گہری دلدل میں محسوس کیا۔
میرے سامنے خوف کی دھند پھیلی ہوئی تھی۔ میں نے اپنے پاؤں کی طرف دیکھا، وہ الٹے تھے۔ خوف کی دھند۔۔۔ میں نے گھبرا کر اپنے وجود کو دیکھا۔۔۔ میرا وجود۔۔۔ نہیں یہ تو میرا جسم نہیں۔ اس کے نیچے کا وجود کسی دوسرے کا تھا۔۔۔ کس کا؟
میں نے اس اجنبی جسم کو چھوا تو وہ کھلکھلا کر ہنس پڑا۔ مجھے یوں لگا جیسے میرا نصف دھڑ پتھرایا جا رہا ہے۔
میں واپس بھاگ پڑا۔
دور سے طوطوں کی سیٹیاں لمحہ بہ لمحہ قریب آتی چلی جا رہی تھیں۔ میں شاخوں کو پھلانگتا ہوا شہر کی طرف بھاگتا رہا۔ جوں ہی میں جنگل سے نکلا، تیز روشنی نے چاروں جانب سے گھیر لیا اور میں نے دیکھا۔۔۔ میرا جسم میرے پاس تھا۔
میں خوشی سے ہنسا اور دونوں ہاتھ پھیلا کر ناچنے لگا۔
اسی لمحہ روشنی نے میرے ہاتھ میں آئینہ دے دیا۔
میں نے پوچھا۔۔۔ ’’کس لیے؟‘‘
اور پھر میں نے دیکھا۔۔۔ میری آنکھیں پھیل گئیں ، میرے جسم پر کسی دوسرے کا سر تھا۔‘‘
یہاں پہنچ کر پہلا درویش چپ ہو گیا اور اپنے ساتھ والے سے کہنے لگا۔
’’بھائی تمہارے پاس بیس پیسے ہوں گے؟‘‘
اس نے سر ہلایا۔۔۔ ’’ہیں تو۔‘‘
پہلے درویش نے تشکّر بھری نظروں سے اسے دیکھا اور بولا،
’’میرے لیے ایک کپ چائے اور منگواؤ۔‘‘
چائے آ گئی تو پہلے درویش نے چسکی لے کر اطمینان کا لمبا سانس لیا اور ادھوری کہانی کے سرے یوں جوڑے۔
’’اور اب میں شہر میں رہتا ہوں مگر میرا سرا ابھی تک نہیں ملا۔ چمکیلی آنکھوں اور نوکیلی چونچوں والے نیلے طوطے نصف رات گزرنے کے بعد آتے ہیں اور مجھ سے وہ جسم مانگتے ہیں جو میں پہلے جنگل سے چرا لایا ہوں۔ میں ان طوطوں کے خوف سے بستی بستی پھرتا ہوں مگر وہ ہر جگہ آ جاتے ہیں۔ آخر تنگ آ کر میں نے سمندر کی راہ لی اور چاہتا تھا کہ ایک پل میں چرائے ہوئے جسم کی امانت اس کی نیلاہٹ کے سپرد کر دوں کہ ایک مردِ توانا نے، جس کی بڑی بڑی مونچھیں تھیں ، مجھے شانوں سے پکڑ لیا اور کہنے لگا،
’’الّو کے پٹھے خودکشی کرتے ہو۔‘‘
میں نے گھگھیا کر کہا، ’’حضور غلطی ہو گئی، اس بار معاف کر دیں۔‘‘
اس نے لمبی سی ہُوں کی اور بولا، ’’جیب میں کتنے پیسے ہیں ؟‘‘
میں نے کہا، ’’حضور پیسے ہوتے تو پہلے چائے نہ پی لیتا۔‘‘
اس نے جواباً میری مرحوم ماں سے اپنے رشتے کا اعلان کیا اور بولا۔
’’دفع ہو جاؤ۔‘‘
سو، اے پیارے بھائیو! میں اس آفت زدہ شہر کی طرف آگیا، جہاں تم دونوں سے ملاقات ہو گئی۔‘‘
پہلا درویش چپ ہو گیا۔ چند لمحے گہرا سناٹا چھایا رہا۔ اس دوران بیرا خالی پیالیاں اٹھا کر لے گیا۔ تینوں چمکیلی میز پر کہنیاں ٹیکے اپنی اپنی سوچ میں گم تھے۔ اس خاموشی کو پہلے درویش کے ساتھ بیٹھے ہوئے موٹے نے توڑا۔ اس نے کھنکار کر گلا صاف کیا اور کہنے لگا۔
’’میں دوسرا درویش اپنی کہانی یوں شروع کرتا ہوں ، میں اندھیری راتوں کا مارا ہوا ہوں۔ جب شہر کے دو حصے ہوئے تو میں ہوا کے جنگل سے نکل کر روشنیوں کے مندر میں آگیا، جہاں رقص، خوشی اور پوجا جاری تھی۔ شیشے جیسی نازک لڑکی ناچ ناچ کر تھک چکی تھی اور شہر، خدا اور بندر تینوں مست ہو کر جھوم رہے تھے۔ دوسری جانب اس لمبی شاہراہ پر، جہاں کل تک روشنیاں جگمگایا کرتی تھیں ، ہوا کا راج تھا۔ شاہراہ کے ساتھ ساتھ الٹے لٹکے ہوئے انسان عکس، رقص اور خوشی سے بے نیاز چیخ کے لمبے سروں میں دفن تھے۔ مندر والے ان چیخوں سے دور رقص کی تانوں پر سر دھن رہے تھے، لیکن۔۔۔ ہاں میرا ایک کان شاہراہ پر رہ گیا تھا۔ دفعتاً شاہراہ کے برابر والے قبرستان کی قبروں کے منہ کھل گئے اور ان میں سے ایک ایک کر کے مردے نکلنے لگے۔
ایک شخص نے، جس کے منہ پر خون ملا ہوا تھا اور جس کے ناخن لمبے اور پاؤں الٹے تھے، بغل میں سے مُرلی نکالی اور بجانے لگا۔ مرد ے مُرلی کی تان پر مست ہو کر شاہراہ کے ساتھ ساتھ الٹے لٹکے انسانوں کے گرد ناچنے لگے۔
مُرلی والا ان سے بے خبر مُرلی بجانے میں مصروف تھا۔ شاہراہ کے ساتھ ساتھ شعلے رقص کرتے رہے اور پھر وہاں کچھ نہ رہا۔ مُرلی کی دھن تیز ہو گئی اور ناچ جوبن پر آگیا۔
مندر میں روشنی ہی روشنی ہے مگر میں اندھیری راتوں سے ڈرتا ہوں۔ اندھیری راتیں۔۔۔ جب وہ مُرلی والا مُرلی بجاتا میرے چاروں اور پھرنے لگتا ہے، اور۔۔۔
مردے۔۔۔ ‘‘
یہاں پہنچ کر دوسرا درویش خاموش ہو گیا۔
تیسرے درویش نے اپنی کہانی یوں بیان کی:
’’میں دریا سے خوف زدہ ہوں کہ دریا ان کا مسکن ہے جو ہر تیرنے والے کو کھا جاتی ہیں۔ میں خود کو بڑا تیراک سمجھتا تھا لیکن ایک دن میں ان کے چنگل میں پھنس گیا۔ وہ چاروں طرف سے مجھ پر حملہ آور ہوئیں اور میری آنکھیں ، ٹانگیں اور سر کھا گئیں۔ اب میرے جسم کی باری ہے۔ میں دریا سے بھاگ جانا چاہتا ہوں ، مگر دریا میرے چاروں جانب تا حدّ نظر پھیلا ہوا ہے۔‘‘
اس موقع پر ایک دبلا پتلا شخص اندر آیا اور ان کے پاس آ کر بیٹھ گیا۔
تینوں اسے دیکھ کر بیک وقت چلّائے، ’’تم آزاد بخت ہو؟‘‘
’’نہیں ‘‘ اس نے نفی میں سر ہلایا، ’’میں چوتھا درویش ہوں۔‘‘
یہ سن کر پہلے درویش نے مکّہ مارا۔
’’اتنی دیر سے کیوں آئے ہو؟‘‘
’’بس نہیں ملی۔‘‘
پہلا درویش دوبارہ میز پر ہاتھ مارنا چاہتا تھا کہ دوسرے درویش نے اس کا ہاتھ پکڑ لیا، ’’بیرا آ جائے گا۔‘‘
بیرے کا سن کر پہلے درویش کا اٹھا ہوا ہاتھ اوپر ہی رہ گیا۔
دوسرے درویش نے آنے والے سے کہا۔۔۔ ’’ہاں تو بھائی ہم تو اپنی اپنی بپتا سنا چکے۔۔۔
افسوس تم نہ سن سکے۔‘‘
چوتھے نے اطمینان سے سر ہلایا۔
’’کوئی بات نہیں ، کل سن لوں گا۔‘‘
اس دوران پہلے تینوں پریشانی سے ایک دوسرے کو دیکھتے رہے۔
چوتھے نے کہا۔۔۔ ’’بھائیو! پریشان ہونے کی ضرورت نہیں ، میرے پاس چائے کے پیسے ہیں۔۔۔ ‘‘
تینوں نے اطمینان کا سانس لیا۔
چوتھے درویش کے لیے چائے آ گئی تو کہانی شروع ہو ئی۔
’’ہاں تو، میں جب گھر سے نکلا تو لوگ بارش کی دعا مانگ رہے تھے کہ بارش اپنے ساتھ ہریالی کا زخم لے کر آئے گی۔ میں چلا تو میرے چاروں طرف چپ کا بیکراں سمندر پھیلا ہوا تھا اور میں بادبان پھٹی کشتی کی طرح بے مقصد لہروں کے ساتھ چلا جا رہا تھا۔ تا حدّ نظر سیاہ پھیلی بانہیں مجھے نرغے میں لینے کے لیے آگے بڑھ رہی تھیں۔ گلی گلی کرن زدہ تھی اور ہر قدم پر جھاڑیوں کے پیچھے موت تھی۔ جگہ جگہ بارود کی بو اور گولیوں کا شور تھا۔ اس لمحہ کسی کو نام و نشان پوچھنے کی فرصت نہیں تھی۔ میں بے ناموں کی اس بستی میں دھوئیں کی دیواریں پھلانگتا آگے بڑھتا رہا۔ مکانوں کی روشنیاں گل ہو رہی تھیں اور زمین سورج کا گھر بنی ہوئی تھی۔ میں راستہ بھول گیا۔۔۔ ہاں میں راستہ بھول گیا۔‘‘
چوتھا درویش چپ ہو گیا۔
کافی دیر چاروں اپنی اپنی سوچ میں ڈوبے رہے پھر پہلا بولا۔
’’آزاد بخت ابھی تک نہیں آیا۔ آخر ہم کب تک اس کی راہ دیکھیں گے؟‘‘
’’ہاں کب تک؟‘‘۔۔۔ دوسرا بڑبڑایا۔
تیسرے نے سر ہلا کر تائید کی۔
’’بہت دیر ہو چکی۔۔۔ آؤ اسے تلاش کریں۔‘‘
چاروں کیفے سے باہر نکلے۔ اسی صورت کوئی چیختا ہوا قریب سے گزرا۔
’’آزاد بخت کو اغوا کر لیا گیا‘‘
’’آزاد بخت کو اغوا کر لیا گیا‘‘
چاروں نے ایک دوسرے کو دیکھا اور کچھ کہے بغیر مختلف چار سمتوں میں چل پڑے۔
٭٭٭

بے چہرہ آدمی

آنکھ کھلتے ہی بد مزہ، کسیلی سی کوئی چیز منہ میں گھلتی ہوئی سی محسوس ہوئی۔ اس نے آنکھیں بند کئے ہی کھنکار کر گلا صاف کیا اور بلغم کا تھوبا فرش پر دے مارا۔ کمرے کی ساری چیزیں بھیگی، دھندلی روشنی میں بد ہیئت اور اُداس نظر آ رہی تھیں۔ ہر چیز پر معمول کی چھاپ لگی ہوئی تھی۔ اس نے منہ کے کسیلے پن کو پھر کھنکار کر صاف کیا اور برآمدے میں نکل آیا۔
ساتھ والے کمرے سے آواز آ رہی تھی،’’پرانی صداقتیں ہمارے لیے اپنے معنی کھو چکی ہیں۔‘‘
اس نے بے دلی سے سر جھٹکا اور غسل خانے میں گھس گیا۔ پانی کے کئی چھینٹے منہ پر مارنے کے بعد لمبا سانس لیا اور تازہ پانی کے کئی گھونٹ پی کر شَپ شَپ کرتا ساتھ والے کمرے میں آگیا۔
میز کے گرد وہ تینوں چائے کی پیالیاں سامنے رکھے گفتگو میں محو تھے۔ اس کے آنے پر انہوں نے لمحہ بھر کے لیے سر گھما کر اسے دیکھا، پھر مصروف ہو گئے، وہ کرسی کھینچ کر بیٹھ گیا اور خاموشی سے چائے بنانے لگا۔
’’صداقتیں تو اپنی جگہ موجود ہیں لیکن ہمارا دور اپنی بے معنویت کے سبب ان کا ادراک کرنے سے قاصر ہے۔‘‘
اس نے بے دلی سے سر ہلایا۔ لٹّو کی طرح کی کوئی شے اس کے ذہن میں مسلسل گھوم رہی تھی۔ اس نے تھوک نگل کر منہ کے کسیلے پن کو دور کرنے کی کوشش کی۔
’’صداقتیں۔۔۔ ؟‘‘
’’لیکن صداقت ہے کیا، تم سچائی کسے کہتے ہو؟‘‘اس نے سر جھٹک کر اشیاء کو پہچاننے کی کوشش کی، بھیگے ہوئے اسفنج کی سی کوئی نمدہ نما چیز اس کے چاروں طرف پھیلی ہوئی تھی۔ اس نے آنکھیں پھاڑ پھاڑ کر اس دھندلاہٹ سے جھانکنے کی کوشش کی۔
’’صداقت یہی ہے نا، ہر انسان اپنے مفاد کے لیے جو کچھ کہتا ہے وہ سچ ہے، ہے نا؟‘‘
اس کے اندر کوئی چیز بے تحاشا ہاتھ پیر مار کر اس دھند لے غبار کو چیرنے کی کوشش کر رہی تھی۔ اس نے سر جھٹک کر چیزوں کو پہچاننے کی کوشش کی۔
’’لیکن سچائی سڑک پر پڑی ہوئی کوئی شے بھی تو نہیں۔‘‘
’’اور میرے اندر بھی نہیں۔‘‘
’’سچائی یہ ہے۔۔۔ ارے نو بج گئے، اُف ! میرا تو پیریڈ ہے۔‘‘
’’نو؟‘‘۔۔۔ اس کے اندر کوئی چونکا۔ وہ غنودگی کے عالم میں اپنے کمرے کی طرف دوڑا۔ کچھ دیر بعد جب وہ کپڑے بدل کر باہر جانے لگا تو ساتھ والے کمرے سے آواز آ رہی تھی، ’’سچائی یہ ہے کہ ہم سب جھوٹے ہیں اور۔۔۔ اور۔۔۔ ‘‘
لفظ دور ہوتے گئے، وہ دوڑتا دوڑتا ہوا سیڑھیاں اترا اور تیزی سے سڑک عبور کرنے لگا۔
کلاس میں داخل ہو کر اس نے تھکا دینے والی اکتاہٹ کے ساتھ رجسٹر روسٹرم پر پھینکا۔ روزانہ کے دیکھے ہوئے بیزار چہرے، تھکی ہوئی آنکھوں سے گھور رہے تھے، اس نے رجسٹر کھولا۔ رول نمبر ون، ٹو، تھری۔۔۔ روزانہ کی بیزار کن تکرار اور ’’یس سر‘‘ کی مردہ آوازیں۔ آخری رول نمبر پکار کراس نے رجسٹر بند کیا اور انگلی سے میز بجاتے ہوئے بولا،
’’اچھا تو آج ہمیں کیا پڑھنا ہے؟‘‘
’’سچائی کی تلاش سر‘‘
’’سچائی کی تلاش‘‘ کوئی بڑبڑایا۔
’’کون سی سچائی‘‘ کسی نے چیخ کر پوچھا۔
’’سچائی۔۔۔ یہ ہے‘‘ اس نے تھوک سے گلا تر کیا اور مردہ سی آواز میں بولا، ’’سچائی یہ ہے کہ ہمیں سچ کو تلاش کرنا چاہئے۔۔۔ ‘‘ اور اس کا جی چاہا کہ کَس کر اپنے منہ پر ایک زناٹے دار تھپڑ مارے اور باہر نکل جائے۔
سٹاف روم میں واپس آ کر اس نے بے دلی سے رجسٹر میز پر پھینکا۔ کڑوی، بدمزہ، کسیلی چیز اس کے منہ میں مسلسل گھل رہی تھی اور بھیگے ہوئے اسفنج کی سی کوئی چیز مسلسل اس کے گرد پھیلتی جا رہی تھی۔ سُن ہوتے ہاتھوں کے ساتھ اس نے دروازے کو کھولا اور لڑکھڑاتے قدموں کے ساتھ باہر نکل گیا۔
شام کو جب وہ کیفے میں پہنچا تو سارے ایک نہ ختم ہونے والی بحث میں الجھے ہوئے تھے۔
’’روحِ عصر:۔۔۔ ہمارے دور کی روح عصر منافقت ہے۔‘‘
دوسرے نے یہ سن کر پہلے کو گھورا۔۔۔ ’’یہ دراصل انفرادیت پسندی ہے اور یہ بھی ایک نعرہ ہے۔‘‘
’’نعرے پر تمہیں سانپ کیوں کاٹ لیتا ہے؟‘‘
’’انفرادیت پسندی میں یہ نعرہ ہی تو نہیں۔‘‘
’’انفرادیت سے تمہارا کیا مطلب ہے؟‘‘ دوسرے نے غرّا کر پوچھا۔۔۔ ’’یہ کہ معاشرے سے آنکھیں بند کر کے نام نہاد ذات کے کنویں میں ڈبکیاں لگاتے رہیں اور ہر ڈبکی پر ریت اور کنکروں کی ایک مٹھی نکال کر پڑھنے والوں کے منہ پر دے ماریں۔۔۔ یہ ہے تمہاری انفرادیت۔‘‘
اور اسے محسوس ہوا جیسے اس کے دونوں ہاتھوں میں ریت اور کنکر ہیں۔ اس نے جلد ی سے اپنے ہاتھ کھول دئیے اور کہنے لگا، ’’ہمیں اپنی آنکھوں کھلی رکھنا چاہئیں۔۔۔ ‘‘ پھر اس نے اپنے آپ سے کہا۔۔۔ ’’میرے اندر تو سارے گہری نیند سو رہے ہیں۔‘‘
باہر ساری سڑک رنگ برنگی خوشبوؤں اور خوش صورت کھنکتے قہقہوں کے ساتھ جاگ رہی تھی۔ اس نے دوسرے کا ہاتھ دبایا۔۔۔ ’’یہاں آ کر معلوم ہوتا ہے کہ سارے مسئلے حل ہو گئے ہیں۔‘‘
کھنکتے صحت مند قہقہوں کا ترنّم۔۔۔ رنگوں اور آوازوں کا نہ ختم ہونے والا سمندر۔
’’ہاں یہاں کوئی مسئلہ نہیں۔‘‘
معاً اسے محسوس ہوا اس کی گردن اکڑ گئی ہے۔ اس نے زور سے اپنے سر کو جھٹکا دیا، ’’میری گردن پر بہت سا کلف لگا ہوا ہے۔‘‘
اور اس کی گردن یک دم اتنی ڈھیلی پڑ گئی کہ اسے خدشہ ہونے لگا کہ کہیں اس کا سر نیچے نہ جا گرے۔ اس نے دھندلائی ہوئی آنکھوں سے ابھرتے ڈوبتے رنگوں اور آوازوں کو سنا، ہر شے بے چہرہ ہوئی جا رہی تھی۔۔۔ بے آواز کڑوی کسیلی چیز اس کے حلق میں ابھری۔ اس نے زور سے منہ مارا، ’’بے چہرہ، بے نام۔‘‘
دوسرے نے چونک کر اسے دیکھا۔
’’ہر چیز اپنے پیچھے پہچان کی ایک لکیر چھوڑ کر غائب ہوئی جا رہی ہے۔‘‘
کڑوی شے اس کے سارے حلق میں تیزی سے پھیل رہی تھی اور چپکتی زرد دھند ہر طر ف جھپٹ رہی تھی۔ اس کے ساتھی ایک ایک کر کے رخصت ہو گئے تھے اور وہ اکیلا چوک میں کھڑا دم بدم بڑھتی سنسناہٹ کی گواہی دے رہا تھا۔ دکانوں کی روشنیاں ایک ایک کر کے بجھ رہی تھیں اور لوہے کے دروازے تیز، چیختی کرخت آواز کے ساتھ بند ہو رہے تھے۔ اس نے سنسان ہوتے بازار کو دیکھا اور یونہی بے مقصد ایک طرف چل پڑا۔
’’ہر شے بے مقصد ہے، دن کے بعد رات، پھر دن، ایک ہی دائرہ، بے مقصد دائرہ۔‘‘
اس نے اکتائے ہوئے انداز میں وقت دیکھا، ’’اُف، گیارہ بج گئے!۔۔۔ صبح اٹھنا بھی تو ہے۔‘‘
’’ہماری کوئی سمت نہیں۔ سارے راستے اسی دائرے میں واپس آ جاتے ہیں۔‘‘
کمرے میں آ کر اس نے بوٹ کو جھٹکے کے ساتھ اُچھالا اور لمبی کراہ کے ساتھ بستر گر گر پڑا۔
دوسرے نے کتاب سے نظریں اٹھا کر اسے حیرت سے دیکھا، ’’تھکے ہوئے نظر آ رہے ہو؟‘‘
’’تھکاوٹ۔۔۔ ؟‘‘
’’سو جاؤ۔‘‘ دوسرے نے ہمدردی سے کہا۔
’’ہاں۔‘‘ اس نے بیزاری سے کہا پھر اُچھل کر ساتھ والے کا ہاتھ پکڑ لیا اور راز دارانہ لہجے میں کہنے لگا، ’’تمہیں معلوم ہے کہ ہم سب ایک دوسرے کو قتل کر رہے ہیں ؟‘‘
دوسرے نے کتاب بند کر دی اور پُر تشویش نظروں سے اس کی طرف دیکھنے لگا۔ ’’کئی دنوں سے تم عجیب طرح سوچنے لگے ہو۔‘‘
’’ہاں ‘‘ اس نے آہستہ سے کہا۔
دوسرے نے کوئی جواب نہ دیا اور خاموشی سے کتاب پڑھنے لگا۔
اس نے دیوار کی طرف منہ کر کے آنکھیں بند کر لیں۔ زرد رنگ کے لاتعداد جالے اس کے چاروں طرف بکھر گئے۔ وہ انہیں علیحدہ علیحدہ کرنے کی کوشش کرنے لگا۔ لیکن جوں جوں وہ علیحدہ کرتا وہ اور اُلجھ جاتے۔ الجھتے ہی چلے جاتے۔۔۔ اس نے گھبرا کر آنکھیں کھول دیں اور کروٹ بدل کر پھر سونے کی کوشش کی۔ اب روئی کے چھوٹے چھوٹے گالے اس کے چاروں طرف تیر رہے تھے، وہ اچھل اچھل کر انہیں پکڑنے لگا۔ یکبارگی گالوں کی جسامت بڑھنے لگی اور وہ ایک ایک کر کے اس کے گرد جمع ہونے لگے، یہاں تک کہ وہ ان میں چھپ گیا۔ اس کا دم گھٹنے لگا، لمحہ بہ لمحہ دباؤ بڑھتا ہی چلا گیا۔۔۔ سانس رکنے لگا۔۔۔ اس نے بڑبڑا کر آنکھیں کھولیں۔
دوسرا سو چکا تھا اور دھندلی روشنی دم توڑ چکی تھی۔
’’مجھے نیند کیوں نہیں آتی؟‘‘
’’نیند کی بھی کوئی سمت نہیں۔‘‘
وہ اس بات پر خود ہی ہنسا۔ کروٹ بدلتے ہوئے اسے خیال آیا، ’’میرا معدہ خراب ہو گیا ہے، مجھے صبح ڈاکٹر کے پاس جانا چاہئے۔‘‘
ہاں میرا معدہ واقعی خراب ہو گیا ہے۔ مجھے صبح ڈاکٹر کے پاس ضرور جانا چاہئے۔
صبح جب وہ پیریڈ لے کر سٹاف روم میں آیا تو بحث زوروں پر تھی۔
’’تو پھر تمہارے خیال میں ان تمام مسائل کا حل کیا ہے؟ الٰہ دین کا چراغ !ہیں ؟‘‘ پہلے نے میز پر ہاتھ مارتے ہوئے کہا،’’خرابی جڑوں تک جا پہنچی ہے۔ اب تو جھوٹ کے اس سارے ڈھانچے کو بدلنا ضروری ہو گیا ہے۔‘‘
دوسرے نے اس کی بات پر افسوس سے سر ہلایا، ’’یہ سب کچھ ماضی سے منقطع ہونے کا نتیجہ ہے۔ سارے مسئلے حل ہو سکتے ہیں اگر ہم ماضی کی طرف لوٹ جائیں۔‘‘
پہلے نے اسے تمسخرانہ انداز سے دیکھا۔۔۔ ’’اور ماضی میں تو کوئی مسئلہ ہوا ہی نہیں کرتا تھا!کیوں ؟‘‘
’’مسئلہ۔۔۔ مسئلہ۔۔۔ مسئلہ، یہ سب نعرے بازی ہے، لوگوں کو گمراہ کرنے کا طریقہ، مجھے بتاؤ تو سہی تمہارے کتنے مسئلے ادھورے ہیں۔‘‘
’’میرا کوئی مسئلہ ہے؟‘‘ کسی نے سرگوشی کی۔
’’ہاں ہاں ہے‘‘ کوئی دوسرا زور سے چیخا۔
’’میرا تمہارا واقعی کوئی مسئلہ نہیں کہ ہم نے خود کو سجے ہوئے دائروں میں مقیّد کر لیا ہے۔ لیکن اس دائرے سے باہر بھی کچھ لوگ رہتے ہیں۔‘‘
اس بات پر دوسرے کی بھنویں تن گئیں ، ’’ساری بات بدمعاشی اور کاہلی کی ہے۔ یہ لوگ کام چور اور سست ہیں۔‘‘
’’ہاں ایک طبقے کا مؤقف یہی ہے،‘‘ پہلے نے غرّاتے ہوئے کہا، ’’اور جانتے ہو یہ طبقہ کون سا ہے؟ جس نے ذہنی بدمعاشی سے ہاتھ پیر ہلائے بغیر ساری چیزوں پر قبضہ کیا ہوا ہے۔‘‘
’’لیکن اس کا حل کیا ہے؟‘‘ تیسرا جو ابھی تک خاموشی سے ساری گفتگو سن رہا تھا، آہستہ سے بڑبڑایا۔
’’سچائی‘‘ اس نے سر ہلایا،’’اور سچائی یہ ہے کہ حقدار کو اس کا حق ملے۔‘‘
’’حق تو سب کو ملا ہوا ہے۔ کس نے کس کا حق چھینا ہوا ہے۔‘‘دوسرے نے آخری ٹکڑے پر زور دے کر کہا۔۔۔
’’ہاں ایک گروہ یہی کہتا ہے،حق کی بات نہ کرو کیونکہ ان کے دل بہت کمزور ہیں۔‘‘
اسی وقت گھنٹی سنائی دی، دوسرا اپنا رجسٹر اٹھا کر باہر نکل گیا۔ا س کے جانے کے بعد پہلے نے قہقہہ لگایا، ’’ماضی کا ٹھیکیدار! یہ سب اسی گروہ کے غلام ہیں۔‘‘ پھر اس نے اِدھر اُدھر دیکھ کر رازدارانہ لہجہ میں کہا، ’’تمہیں معلوم ہے اسے اسی کام کی باقاعدہ تنخواہ ملتی ہے۔‘‘
یہ دیکھ کر کہ اس کی بات سن کر دوسرے بے یقینی سے اسے دیکھ رہے ہیں ، وہ لہجے میں زور پیدا کرتے ہوئے کہنے لگا، ’’بھائی میں بالکل سچ کہہ رہا ہوں ، یہ واقعی پیڈ (Paid) آدمی ہے۔‘‘
’’اچھا!‘‘۔۔۔ بیک وقت سب کے منہ سے نکلا، ’’حیرت ہے؟‘‘
’’حیرت کی کیا بات ہے؟‘‘ پہلے نے انہیں گھورا، ’’بھائی ان کی تو نیندیں اڑ گئی ہیں ، اب اس جیسے چند لوگ ہی ان کی آخری امید ہیں۔ سو انہوں نے اپنے دروازے ان کے لیے کھول دیئے ہیں۔‘‘
’’لیکن سچائی کیسے آئے گی؟‘‘ اس نے اداسی سے کہا، ’’جھوٹ دیمک کی طرح ہمارے ذہنوں کو چاٹ رہا ہے، ہم میں سے کون سچ کے لیے اپنا ہاتھ کٹوائے گا۔‘‘
ہاں ،یہاں تو ہاتھ کھڑا کرنا اور ہاتھ کھڑے کروانا ایک کاروبار بن چکا ہے اور کاروبار کے لیے کھنکتے اور چمکتے سونے کی ضرورت ہے اور یہ کھنکتا، چمکتا سونا ان کے پاس نہیں جو سچ کو تلاش کرنا چاہتے ہیں۔
’’پھر۔۔۔ ؟‘‘ بڑے بڑے سوالیہ نشان اس کے گرد ناچنے لگے۔
’’ہاں پھر۔۔۔ ؟‘‘
’’ایک تبدیلی۔۔۔ بنیادی تبدیلی۔۔۔ سچ کو پہچاننے کے لیے اب تبدیلی لازمی ہے۔‘‘
’’لیکن یہ تبدیلی آئے گی کیسے ؟ پھر وہی پھر۔۔۔ ‘‘
’’تبدیلی لانے والے اس حد تک پیچھے دھکیل دئیے گئے ہیں کہ تیز روشنی میں آتے ہی چندھیا جائیں گے اور چمکتے سونے کی کھنک۔۔۔ ‘‘
’’لیکن نیند کی پری اب اپنے پر سمیٹ رہی ہے۔‘‘ کسی نے اس کے کان میں سرگوشی کی، ’’ہاں جگانے والا آ گیا ہے، وہ دیکھو۔‘‘
’’دیکھو لوگ اس کے انتظار میں بارش میں بھیگ رہے ہیں۔‘‘
’’ہاں ان کے دل سچ کے ساتھ ہیں ، وہ اس کے منتظر ہیں لیکن۔۔۔ ‘‘
اسے یاد آیا، انہوں نے کہا تھا، ہمارے دل تمہارے ساتھ ہیں لیکن تلواریں۔۔۔ افسوس ہم اپنی تلواریں بیچ چکے ہیں۔
اس نے گھبرا کر اپنی تلوار کو دیکھا۔
لیکن میرے پاس تو تلوار ہے ہی نہیں ، میری تلوار تو وہ پہلے ہی چھین کر لے گئے ہیں۔
اس کی مسکراہٹ بتدریج بجھتی گئی اور وہ منہ ہی منہ میں کچھ بڑبڑا کر رہ گیا۔
گہری نم آلود خاموشی ہر شے پر چھا گئی۔
کچھ دیر کے بعد جب وہ گھر جانے لگا تو تیسرا بھی اس کے ساتھ ہو گیا۔ سڑک پار کرتے ہوئے اس نے اس کے کندھے پر ہاتھ رکھا اور راز داری کے ساتھ کہنے لگا۔
’’تمہیں معلوم ہے یہ دوسرا بھی پیڈ(Paid)ہے؟‘‘
’’پیڈ!‘‘ اس نے حیرت سے دہرایا اور رُک کر اسے دیکھنے لگا، ’’میں تمہارا مطلب نہیں سمجھا۔‘‘
’’Paid‘‘تیسرے نے دہرایا۔ "Paid"کا مطلب ہے پی اے آئی ڈی۔‘‘
’’ہر چیز پر قیمت کی تختی آویزاں ہے‘‘ اس نے سوچا، ’’اور جو نہیں بکے انہیں کسی نے خریدا ہی نہیں۔‘‘
اور اس کا جی چاہا کہ کھلکھلا کر ہنسے، لیکن قہقہہ اس کے لبوں تک آتے آتے دم توڑ گیا۔ کڑوی کسیلی شے اس کے حلق میں سر اُبھار رہی تھی۔ وہ گھسٹتا ہوا کمرے میں آیا اور بغیر کپڑے اتارے بستر پر گر پڑا۔
کوئی آدھا دن ڈھلے کسی نے اسے جھنجھوڑ کر جگایا۔ اس کا ساتھی پریشانی کے عالم میں اس پر جھکا ہوا تھا، ’’تمہاری طبیعت ٹھیک ہے؟‘‘
’’کیا ہوا مجھے؟‘‘
دوسرے نے اس کے لباس کی طرف اشارہ کیا۔ وہ بغیر جوتے اتارے بستر پر پڑا تھا۔
’’اوہ۔۔۔ تھکاوٹ؟‘‘ اس نے جمائی لی۔
’’ہاں میں واقعی تھک گیا ہوں۔‘‘ اس نے چپ چاپ اپنے آپ سے کہا۔
دوسرا ابھی تک اس پر جھکا ہوا اسے حیرت سے دیکھ رہا تھا، ’’تم کچھ بیمار نظر آتے ہو۔۔۔ ڈاکٹر کو دکھا لو۔‘‘
اور اسے محسوس ہوا، نقاہت اس پر چاروں طرف سے ٹوٹ پڑی ہے۔ وہ دیوار کا سہارا لے کر اٹھا اور ٹیک لگا کر بیٹھ گیا اور اس سے کہنے لگا، ’’کھانے کے لیے کچھ ہے؟۔۔۔ میں نے آج کھانا کھایا ہی نہیں۔‘‘
دوسرے نے الماری کھول کر بسکٹوں کا ڈبہ اس کے ہاتھ میں دے دیا۔
دو تین بسکٹ کھانے کے بعد اسے تازہ دمی کا احساس ہوا۔ ڈبہ میز پر رکھ کر وہ بے ساختہ ہنس پڑا۔
’’کیا ہوا؟‘‘
فرنچ ریولوشن کی ایک بات یاد آ گئی ہے، روٹی نہ ملے تو کیک کھاؤ۔‘‘
اور اسے یاد آیا، چپڑاسی نے کل ہی اس سے کہا تھا، ’’جناب! اسّی روپے کا تو خالی آٹا بھی نہیں آتا۔‘‘
رات کو سونے سے پہلے اس نے دونوں ہاتھ اٹھا کر دعا مانگی، ’’اے خدا!۔۔۔ سچ کہا ں ہے؟ مجھے اس کی بشارت دے۔ اے خدا! مجھے بشارت دے۔۔۔ مجھے بشارت دے۔‘‘
اور جب اس نے آنکھیں بند کیں تو گہری سیاہی مائل دھند نے اسے اپنی آغوش میں لے لیا۔ کوئی تیز شے اس کے جسم کو کاٹنے لگی۔ کروٹ بدل کر اس سے چھٹکارا حاصل کیا، لیکن اب لمبی لمبی چونچوں والے اڑتے ہوئے پرندے اس کے گرد منڈلانے لگے اور نوچ نوچ کر اس کا گوشت کھانے لگے۔ تکلیف کی شدت سے اس کی آنکھ کھل گئی۔ اس کا سارا جسم پسینے میں بھیگا ہوا تھا۔ اس نے تھوک سے حلق تر کیا اور اپنے آپ سے کہنے لگا، ’’افسوس، دعا نے بھی اپنا کھو دیا۔‘‘
اندھیرا بہت گہرا ہو گیا تھا۔ دفعتاً اندھیرے میں دراڑیں پڑ گئیں ، اس کے اندر کسی نے سرگوشی کی،
’’سچ وہی ہے اور وہ آ رہا ہے، ہم اس کے لیے بارشوں میں بھیگیں گے۔۔۔ بھاگتے رہو، جاگتے رہو۔‘‘
اس نے سر ہلا کر تائید کی،’’جاگتے رہو۔۔۔ جاگتے رہو؟‘‘
٭٭٭

پونے آدمی کی کہانی

مجھے نہیں معلوم کہ میں اسے کب سے، کیسے اور کیوں جانتا ہوں ، میں نے اسے ایک دن اچانک ہی محسوس کر لیا۔ وہ جانے کب سے بُکل مار کے چھپا بیٹھا تھا۔ اپنے قریب کسی دوسری ہستی کا احساس ہوتے ہی میرے چاروں طرف خوف کی دھند پھیل گئی۔ میں کئی دن اسے چھپ چھپ کر، کبھی قریب سے کبھی دور سے دیکھتا رہا، وہ میرے ہی جیسا تھا لیکن چپ چاپ، بکل مارے کسی گہری سوچ میں گم۔ کئی دنوں کی تاک جھانک کے بعد میں بڑی ہمت سے دبے پاؤں ڈرتے ڈرتے اس کے قریب آیا۔ اس نے سر اٹھا کر مجھے دیکھا۔ اس کی آنکھوں میں اپنائیت کے گہرے بندھن تھے۔ خوف کی دھند رفتہ رفتہ چھٹنے لگی، ہم دونوں ایک دوسرے کے سامنے تھے۔
میں نے کہا۔۔۔ ’’میں تمہیں جانتا ہوں۔‘‘
اس کے ہونٹوں پر روشنی کی ایک لہر تڑپی۔
میں نے پوچھا۔۔۔ ’’تمہارا نام کیا ہے؟‘‘
اس نے میری آنکھوں میں جھانکا۔۔۔ ’’میرا کوئی نام نہیں۔‘‘
میں نے کہا۔۔۔ ’’نام تو ضروری ہے۔۔۔ ہم اپنے ناموں ہی کے ذریعہ پہچانے جاتے ہیں۔‘‘
’’نام۔۔۔ نام میں کیا رکھا ہے۔۔۔ ایک دوسرے کی موجودگی کا احساس ہی بڑی بات ہے۔‘‘
میں نے اصرار کیا۔۔۔ ’’نام تو ہونا ہی چاہئے۔‘‘
کہنے لگا۔۔۔ ’’دنیا میں پہلے ہی کروڑوں نام ہیں ، ایک میں نے نہ رکھا تو کیا ہو گا ؟‘‘
’میں نے کہا۔۔۔ ’’اپنا کوئی نام رکھ لو۔ اس کے بغیر ہم محض سائے ہیں۔‘‘
’’تو پھر تم ہی رکھ دو۔۔۔ زید، عمر، بکر کوئی سا نام۔‘‘
میں نے اسے بے نام کہنا شروع کر دیا۔
رفتہ رفتہ ہم گہرے دوست بن گئے۔ اس کی باتوں میں بڑا سحر تھا۔ میں پہروں ان کے جادو میں ڈوبا رہتا۔ شروع شروع میں اُسے تلاش کر کے اس کی باتیں سنتا۔ مگر دھیرے دھیرے میں نے محسوس کیا کہ میں اس سے نفرت کرنے لگا ہوں۔ میں اس سے دور بھاگ جانا چاہتا ہوں لیکن وہ میرے وجود کے صحرا میں ایسی کونپل تھا کہ میں اسے اکھاڑنا چاہتا تو میرا اَنگ اَنگ درد کی لہروں میں بہہ جاتا۔
لمحہ لمحہ یہ کونپل میرے پورے وجود میں پھیل رہی تھی۔ میں تنہائی کے ایک ایک پل کے لیے ترس ترس گیا تھا اور اب میری یہ پیاس خوف کی کالی چادر میں لپٹی چلی جا رہی تھی۔ وہ بھاری پتھر کی طرح میرے وجود کے گدلے تالاب میں گر پڑا تھا اور پانی اُچھل اُچھل کر باہر گر رہا تھا۔۔۔ مجھے اسے بچانا تھا ورنہ میں خالی ڈبے کی طرح لڑکھڑاتا پھرتا، مگر اسے میری اس بات سے اتفاق نہیں تھا۔ وہ تو اس گدلے تالاب کی گدلاہٹ دور کرنے پر تلا ہوا تھا کہ گدلاہٹ کی موت ہی گیان کی پہلی نشانی تھی۔ مجھے گیان سے کوئی دلچسپی نہیں تھی۔ مجھے تو اپنے کمرے کی کھڑکیوں کے ان سوراخوں سے دلچسپی تھی جن سے میں اڑوس پڑوس کی عورتوں کے مرمریں بدنوں کی قوسیں گنا کرتا تھا۔ کافی عرصے تک اسے ان سوراخوں کے بارے میں کچھ بھی معلوم نہ ہو سکا۔ میں ہمیشہ اس کی غیر موجودگی میں ان سوراخوں کے پاس اکثر اکڑوں بیٹھ کر اپنے جسم کے پھیلنے، سکڑنے کا تماشا دیکھا کرتا تھا۔
میں اسے اس راز میں شریک نہیں کرنا چاہتا تھا، لیکن ایک دن میں نے اسے اپنے ساتھ محسوس کیا۔ شرمندگی اور خوف سے میرا سارا جسم منجمد ہو گیا۔۔۔ وہ اُچک کر سوراخ کے قریب آیا اور دوسری طرف جھانکنے لگا۔۔۔ اور جھانکتا رہا۔ میں نے سوچا چلو روز روز کی بک بک ختم ہوئی۔ مگر یہ محض میرا وہم تھا۔ آدھی رات کو اس نے اچانک مجھ پر حملہ کر دیا۔ میں نے ہڑ بڑا کر آنکھیں کھولیں۔ وہ میرے سینہ پر چوکڑی مارے دونوں ہاتھوں سے میرا گلا دبا رہا تھا۔ میں نے بڑی مشکل سے اپنا گلا چھڑایا۔ اس نے ہاتھ تو ہٹا لیے مگر سینہ سے نہیں اترا۔ میں نے محسوس کیا، اس کا بوجھ اچانک بڑھ گیا ہے اور وہ دیو قامت پیکر کی طرح مجھے دبوچے ہوئے ہے۔
میں نے لرزتی ہوئی آواز میں کہا۔۔۔ ’’تم تو میرے دوست ہو۔‘‘
اس نے نفرت سے مجھے دیکھا۔۔۔ ’’میں کسی کا دوست نہیں۔‘‘
میں نے پوچھا۔۔۔ ’’میرا کیا قصور ہے؟‘‘
کہنے لگا۔۔۔ ’’تم کمینے اور کتے ہو۔‘‘
میں نے کہا۔۔۔ ’’تم بھی تو میرے ساتھ تھے۔‘‘
’’میں کسی کے ساتھ نہیں۔‘‘
میں نےا س کے نیچے سے نکلنے کی کوشش کی مگر اس کا بوجھ اتنا زیادہ تھا کہ اپنی جگہ سے ہل بھی نہ سکا۔ لمحہ بہ لمحہ بڑھتے بوجھ کے نیچے میں خود کو ریزہ ریزہ ہوتے محسوس کر رہا تھا، میں بڑی مشکل سے کہہ سکا۔
’’مجھے چھوڑ دو۔۔۔ مجھے معاف کر دو۔‘‘
وہ بڑی خوفناک ہنسی ہنسا۔
’’ہر انسان مرنے سے پہلے اپنے گناہوں کا کفارہ ادا کرنا چاہتا ہے۔‘‘
میرے اندر چھناکے سے چیزیں ٹوٹ رہی تھیں۔ سوراخوں کے رنگین منظر اور گداز جسم بکھر بکھر رہے تھے۔ میری اس کیفیت سے اسے بڑی خوشی ہوئی۔ دونوں ہاتھوں سے بچوں کی طرح تالی بجاتے ہوئے بولا، ’’ہوں ! تو تم واقعی کفارہ ادا کرنا چاہتے ہو۔‘‘
میں نے تڑپ کر نیچے سے نکلنے کی آخری کوشش کی مگر میرا وجود ناف ناف اپنے اعمال کی پتھریلی زمین میں گڑا ہوا تھا اور وہ دونوں ہاتھوں میں پتھر لیے میرے گرد ناچ رہا تھا۔ دفعتاً اس کا چہرہ آگ میں جلنے لگا، اس نے اچھل کر مجھے دبوچ لیا، میں درد کی شدت سے بلبلا رہا تھا۔۔۔ اپنے ہی ہاتھوں سے اپنا چہرہ نوچ رہا تھا اور وہ دور کونے میں بیٹھا مسکرا رہا تھا۔ لمحہ بہ لمحہ میرے آنکھیں گہرے پانی میں ڈوب گئیں اور گھپ خاموش اندھیرا دبے پاؤں چاروں طرف پھیلتا چلا گیا۔
اس دن کے بعد میرے دل میں اس کے لیے نفرت کی کالک گہری ہوتی چلی گئی۔ مگر اس نفرت کے ساتھ خوف کی چادر بھی تنی ہوئی تھی۔ ان دنوں میں اس سے زیادہ ہی متنفر تھا۔ وجہ یہ تھی کہ ان دنوں میں ایک لڑکی میں دلچسپی لے رہا تھا۔ مجھے معلوم تھا کہ وہ اس بات کو پسند نہیں کرے گا، اس لیے میں نے اسے راحت کے بارے میں کچھ نہیں بتایا۔ لیکن حسب ِ معمول اس سے یہ بات بھی چھپی نہ رہ سکی۔ ایک رات جب ہم دونوں الگ الگ کونے میں دبکے اپنی اپنی سوچوں میں گم تھے، اس نے مجھ سے کہا۔
’’تو تم بھی راحت کے طلب گار ہو۔‘‘
میں نے کہا، ’’کون سی راحت؟‘‘
اس نے مسکرا کر مجھے دیکھا۔۔۔ ’’کتنی کتابیں پڑھ چکی ہے؟‘‘
’’شاید آدھی۔‘‘
’’باقی آدھی بھی جلدی سے پڑھوا دو۔‘‘
’’کیوں ؟‘‘
’’تاکہ تم سفر سے واپس آ سکو۔‘‘
میں نے شانے ہلائے۔۔۔ ’’میں کہیں نہیں گیا، میںا پنی جگہ موجود ہوں۔‘‘
لیکن میں جھوٹ بول رہا تھا۔ میں واقعی بہت لمبے سفر پر نکل آیا تھا۔ یہ گھنے جنگل کا سفر تھا۔ روز بروز طویل ہوتا جا رہا تھا۔ پھر ایک دن وہ راہ چپکے سے میرے قدموں کے نیچے سے نکل گئی جس پر چل کر میں یہاں تک آیا تھا۔ دراصل راحت کیرئیر اِسٹ لڑکی تھی۔
میں جنگلوں میں اکیلا رہ گیا۔ میرے بے نام ساتھی نے مجھ سے پوچھا۔
’’اکیلے رہ گئے ہو؟‘‘
میں نے کہا۔۔۔ ’’ہاں میں اکیلے پن کے عذاب میں جل رہا ہوں۔‘‘
اس نے شانے اچکائے۔
مجھے اس کی بے رخی اچھی نہیں لگی۔ میں پھر گھنے جنگل میں بھٹکنے لگا۔
نسیم بٹ کی ناک چینیوں کی طرح تھی۔ تاریک سرد رات میں وہ مجھے سورج کی کرن کی طرح محسوس ہوئی۔ سفر دوبارہ شروع ہو گیا۔ لیکن اس سفر میں مَیں اکیلا نہیں تھا۔ عزیز الرحمن بڑا سیدھا سادا شخص تھا، مروّت اور خلوص کا مارا ہوا۔ اس نے چند ہی دن میں مجھے اپنے اور نسیم بٹ کے بارے میں سب کچھ بتا دیا، مگر میں نے اسے کچھ نہیں بتایا۔۔۔ میں مکّار اور ریاکار تھا۔
میں اور عزیز الرحمن ایک ہی پگڈنڈی پر چل رہے تھے۔ اس عرصے میں مَیں دانستہ اپنے بے نام ساتھی سے چھپ رہا تھا۔ مجھے معلوم تھا کہ وہ نظروں کا تند کلہاڑا لے کر مجھے تلاش کرتا پھر رہا ہے۔ مگر میں اس کا سامنا کرنا نہیں چاہتا تھا۔۔۔ میں بزدل اور ڈرپوک تھا۔ عزیز الرحمن خاموشی سے میرے ساتھ چل رہا تھا، وہ خود بھی کچھ نہیں کر رہا تھا۔ وہ مجھ سے بھی زیادہ بزدل تھا۔ میں اسے پھلانگ کر آگے نکل جانا چاہتا تھا مگر میں اسے نہیں پھلانگ سکا۔
میں چاہتا تو یہ چھلانگ لگا سکتا تھا مگر میرے بے نام ساتھی کا خوف میرے اعصاب پر عذاب کی رات بن کر آ گرا تھا۔۔۔ میں یہ عذاب برداشت نہیں کر سکا اور ایک رات عزیز الرحمن کو پگڈنڈی پر اکیلا چھوڑ کر چپکے سے گھنے جنگل میں اتر گیا۔
اس رات میرے چہرے پر زردی کا غلاف چمک رہا تھا۔
اس نے مجھے دیکھ کر سر ہلایا۔۔۔ ’’تو تم آ گئے ہو۔‘‘
میں نے کہا۔۔۔ ’’ہاں میں پگڈنڈی کی گرفت سے نکل آیا ہوں۔‘‘
اور میری آنکھوں میں آنسو آ گئے۔۔۔ وہ بڑا بے رحم تھا، مسکراتا رہا۔
میں اور میرا بے نام ساتھی گھنے تاریک سرد جنگل میں تنہا تھے۔
میں نے اپنے سفر کا آغاز اُجلے پانیوں اور کھلے پھولوں والی وادی سے شروع کیا تھا۔ ٹھنڈے گھنے سایوں تلے سفر کی لذتوں سے ہمکنار ہوا تھا اور اب میں سائے کے ایک ایک ٹکڑے کے لیے ترس رہا تھا مگر میرا بے نام ساتھی ان سب سے الگ تھا، اسے کسی بات کا غم نہیں تھا۔
معروفہ میں کوئی ایسی بات نہیں تھی جس کی وجہ سے کوئی اس کی طرف متوجہ ہوتا۔ میری ماں نے بچپن میں مجھے پچھلی پائیوں کے بارے میں جو کچھ بتایا تھا وہ اس کی زندہ شکل تھی۔ فرق تھا تو صرف اتنا کہ اس کے پاؤں الٹے نہیں تھے۔
میرے بے نام ساتھی نے مجھ سے کہا۔۔۔ ’’گرد کی دلدل میں ڈوب گئے تو کبھی نہ اُبھر سکو گے۔‘‘
وہ چپ ہو گیا۔ میں گرد آلود راستہ پر گرد میں لپٹا جا رہا تھا۔ راستہ سمندروں کا طالب تھا اور میں بارش کی ٹوٹی کنی۔۔۔ میں اس میں جذب ہونے کی بجائے اس کے اوپر جما رہ گیا۔ پھر تیز ہوا چلنے لگی۔ تیز ہوا گھنے بادل بھی لائی اور بارش ہوئی تو مجھے معروفہ کے سیدھے پاؤں میں الٹے پاؤں چھپے ہوئے نظر آ گئے۔
اس رات میں نے گھنے جنگل میں آگ جلائی اور اپنے گرد لپٹی ہوئی تاریکیوں کو کھرچ کر کندن ہونا چاہا۔ مگر گوشت جلنے کی بو مجھے کندن نہ بنا سکی۔ تھوڑی دیر بعد جب میں کراہتا ہوا راہ کی تلاش میں گھنے درختوں سے سر ٹکراتا پھر رہا تھا، میرے بے نام ساتھی نے میرے کندھے پر ہاتھ رکھا اور کہنے لگا۔
’’آؤ ان تمام پگڈنڈیوں کا ماتم کریں جو گھنے جنگلوں میں کھو گئیں۔‘‘
میں نے مڑ کر دیکھا، اس کی آنکھوں میں سائے تیر رہے تھے۔ میں نے محسوس کیا، ہم دونوں ایک ہی آگ میں جل رہے ہیں۔
٭٭٭

پچھلے پہر کی موت

ان سیڑھیوں پر چڑھتے ہوئے مجھے یوں محسوس ہوتا ہے جیسے میں خدا سے ملنے جا رہا ہوں۔
یہ بوڑھی، خاموش سیڑھیاں کئی سالوں سے یوں ہی اداس ہیں۔ زرد زینوں پر قدم رکھتے ہوئے خوف کی پرچھائیاں مجھ سے لپٹ جاتی ہیں۔ مجھے یوں لگتا ہے جیسے میرا وجود نیچے۔۔۔ بہت نیچے پہلے زینہ پر رہ گیا ہے اور میں ہوا کا لبادہ اوڑھے ان زرد سہمے ہوئے زینوں پر چڑھ رہا ہوں۔ ان زینوں پر دو موڑ ہیں۔۔۔ جو بے صدا ہونٹ لیے حیران،خاموش آنکھوں سے آنے والے کو بِٹ بِٹ دیکھتے رہتے ہیں اور جب آنے والا قریب آتا ہے تو اندھیرے کے ہاتھوں سے پکڑ کر اسے چپکے سے نگل جاتے ہیں۔ میں ان موڑوں سے بہت ڈرتا ہوں اور اکثر سوچا کرتا ہوں ، زینوں پر موڑ کیوں ہوتے ہیں اور یہی سوچتے سوچتے ان اندھے، بے صدا موڑوں سے ٹکرا جاتا ہوں۔ وہ اپنے اندھے ہاتھوں سے مجھے دبوچ لیتے ہیں۔ میں چیختا ہوں لیکن میری آواز کے دائرے ان موڑوں کی سرد، نم آلود دیواروں سے ٹکرا کر ٹوٹ جاتے ہیں اور سیڑھیوں سے لڑھکتے ہوئے نیچے اندھیرے کی دلدل میں گر جاتے ہیں۔ میں جلدی سے پاؤں بڑھاتا ہوں اور پہلا موڑ گزر جاتا ہوں ، میں اور اوپر چڑھتا ہوں۔۔۔ ایک، دو، تین، چار، پانچ۔۔۔ پانچ زینے۔ دوسرے موڑ کی کوکھ جلی ماں با نہیں پھیلائے مجھے دبوچنے کے لیے آگے بڑھتی ہے۔ میرا جسم لہو کی بوند بن کر رہ جاتا ہے۔۔۔ سرد جمے ہوئے لہو کی بوند اور خوف بلوری برف کے ٹکڑوں کی طرح میرے جسم سے چپک جاتا ہے۔۔۔ یہ کوکھ جلی ماں مجھے اپنے سینے سے لپٹانے کے لیے بے قرار ہے۔ میں سہم کر رُک جاتا ہوں اور دیوار کی برف ایسی ٹھنڈی سطح سے لگ کر اسے دیکھتا ہوں ، وہ اپنی سحر آلود آنکھیں مجھ پر جما کر سرگوشی کرتی ہے۔
’’میرے بچے! آ میرے سینے سے لگ جا۔‘‘
اس کی آواز میں خشک پتوں کی کھنک اور تیز ہوا کا شور ہے۔ میں قدم آگے بڑھاتا ہوں وہ اپنے بازو پھیلاتی ہے لیکن اس کے پاؤں۔۔۔ اس کے پاؤ ں الٹے کیوں ہیں ؟ اس کے پاؤں الٹے کیوں ہیں ؟ خوف کا پہلا قطرہ میرے ذہن میں گرتا ہے، میںا اندھیرے کے جالوں سے الجھتا دو چار زینے نیچے اتر آتا ہوں اور دیوار سے لگ کر اسے دیکھتا ہوں۔۔۔ وہ اندھیرے کی چادر کو اپنے چمک دار دانتوں سے بھنبھوڑتے ہوئے ہنستی ہے۔
’’ہی ہی ہی۔۔۔ ڈر گئے، ڈر گئے نا۔‘‘
اس کے دانت اندھیرے کی چلمن میں نیزے کی انی کی طرح چمکتے ہیں ، میں اندھیرے کی دھند میں لپٹا، دیوار سے چمٹا اسے دیکھتا رہتا ہوں ، اس کے کھلے بازو مجھے دبوچنے کے لیے اسی طرح پھیلے ہوئے ہیں ، اس کی آواز کے سائے میرے چاروں طرف منڈلا رہے ہیں۔ میں لمبی سانس لیتا ہوں اور اندھیرا سمٹ کر میرے سینے میں بھر جاتا ہے۔
میں چیختا ہوں۔۔۔ ’’روفی!‘‘
میری آواز دائرے بن کر کوکھ جلی ماں کے پہلوؤں سے نکل جاتی ہے۔
وہ ہنستی ہے۔۔۔ ’’ہی ہی ہی۔۔۔ ‘‘
چند لمحوں بعد موڑ کی اوٹ میں روشنی کی کرن پھوٹتی ہے، ساتھ ہی روفی کی آواز آتی ہے۔
’’کیا ہوا؟‘‘
میں بغیر جواب دئیے اوپر چڑھنے لگتا ہوں ، کوکھ جلی ماں روشنی کی اس کرن سے سہم کر دیوار سے لگ جاتی ہے۔ میں ہوا کی طرح اس کے پہلو سے گزر جاتا ہوں۔ دوسرے موڑ سے گزرنے کے بعد میں سانسیں درست کرتے ہوئے مڑ کر دیکھتا ہوں ، کوکھ جلی ماں موڑ کی اندھی گلی میں اکیلی کھڑی،بازو پھیلائے، الٹے پاؤں کا طلسم لیے شوک رہی ہے۔
زینوں کے اختتام پر صحن ہے، ویران صحن۔۔۔ جسے دیکھ کر مجھے یوں محسوس ہوتا ہے کہ کوئی بیوہ سفید ساری کا آنچل پھیلائے بیٹھی ہے۔ صحن کے بائیں طرف تکونا کمرہ ہے جس میں روفی رہتی ہے۔ وہ دہقان زادی ہے، اس کے جسم کے قوسوں میں نم آلود مٹی کی باس ہے، اس کے رنگ میں بھی مٹی ملی ہوئی ہے، لیکن اس کی آنکھیں بڑی چمک دار ہیں ، وہ مجھے آڈ کی طرح لگتی ہیں جس میں بہتا پانی سورج کی چمک سے دیکھنے والے کو آنکھیں مار رہا ہو۔۔۔ مجھے یوں لگتا ہے جیسے زینہ کے دونوں موڑوں کی ساری سیاہی اس نے اپنی آنکھوں میں سمیٹ لی ہے۔
روفی تکونے کمرے کے جس حصے میں رہتی ہے، وہاں زنگ آلود کھڑکی ہے جو چشمِ حیراں کی طرح ہر وقت کھلی رہتی ہے۔ سورج کی پہلی کرن اس کے زنگ آلود کواڑوں سے الجھ کر تکونے کمرے کی دیواروں سے ٹکراتی ہے اور گھائل ہو کر فرش پر لوٹنے لگتی ہے۔ روفی کو اس پہلی کرن کی موت کا منظر بہت اچھا لگتا ہے، وہ ساری ساری رات تاریکی کے دامن پر سر رکھے، اس منظر کے انتظار میں جاگتی رہتی ہے۔ صبح ہوتے ہی سورج کی کرن اس زنگ آلود کھڑکی سے تکونے کمرے میں داخل ہوتی ہے اور سرد یخ بستہ دیواروں سے ٹکرا کر فرش پر تڑپنے لگتی ہے، پھر یکے بعد دیگرے کئی کرنیں جلوس کی شکل میں اندر آتی ہیں اور اس پہلی کرن کے گرد اکٹھی ہو کر ماتم کرتی ہیں۔ دن بھر ماتم جاری رہتا ہے۔ یہاں تک کہ شام ہو جاتی ہے اور وہ اس پہلی کرن کی لاش کندھوں پر اٹھائے اسی زنگ آلود کھڑکی کی راہ باہر نکل جاتی ہیں۔
تکونے کمرے کی دیواروں پر صرف ایک تصویر آویزاں ہے جس میں ایک شخص اپنی بندوق سے نکلتے دھوئیں کو دیکھ رہا ہے، کچھ فاصلہ پر دشمن کا جسم پڑا ہے جس کے سینہ سے خون کا فوارہ اُبل رہا ہے۔ مرتا ہوا دشمن اَدھ کھلی آنکھوں ، بے آواز صداؤں سے پوچھ رہا ہے۔
’’تم نے مجھے کیوں مار دیا۔۔۔ تم تو میرے بھائی ہو؟‘‘
مجھے اس تصویر سے بڑی نفرت ہے، میرا جی چاہتا ہے اس شخص سے بندوق چھین لوں لیکن اس سے کیا ہو گا، مرنے والا تو مر جائے گا۔ خون کا یہ فوارہ یوں ہی ابلتا رہے گا کہ فوارے اُبلا ہی کرتے ہیں ، ان کی زندگی اسی میں ہے کہ ابلتے رہیں۔ روفی کو یہ تصویر بہت اچھی لگتی ہے۔ اسے ابلتے خون کے فوارے میں زندگی کے رنگ نظر آتے ہیں۔ وہ میرا ہاتھ پکڑ کر اس تصویر کے سامنے لے جاتی ہے اور بندوقچی کی طرف اشارہ کر کے کہتی ہے۔
’’دیکھو، اسے دیکھو، اگر دشمن کو نہ مارتا تو خود اس کے ہاتھوں مر جاتا۔‘‘
میں ہاتھ چھڑا کر بھاگ آتا ہوں اور پلنگ پر بیٹھ کر ہانپنے لگتا ہوں ، اس پلنگ کے سرہانے الماری ہے جس کی تین آنکھیں ہیں ،سب سے پچھلی آنکھ میں کتابیں ہیں جس کی جلدیں الٹی ہیں۔ میں نے کئی بار انہیں سیدھا کیا ہے لیکن روفی انہیں پھر الٹ دیتی ہے کہ اسے الٹی جلدیں ہی خوبصورت لگتی ہیں۔
دوسری آنکھ ویران ہے، اس میں بوسیدہ سے فریم میں قید کسی شخص کی تصویر ہے۔ یہ شخص اداس، ملول اور غم زدہ ہے اور آنکھیں بند کئے کچھ سوچ رہا ہے۔ روفی کہتی ہے، یہ تصویر میری ہے، لیکن میں اسے ماننے کے لیے تیار نہیں ، وہ ضرور مجھ سے مذاق کرتی ہے۔۔۔ یہ تصویر میری ہو ہی نہیں سکتی، لیکن وہ کہتی ہے کہ یہ تصویر میری ہی ہے۔ میں کسی دن اس کی نظر بچا کر یہ تصویر ساتھ لے جاؤں گا اور اسے زینوں کی اندھی دلدل میں پھینک دوں گا یا پھر کوکھ جلی ماں کو دے دوں گا کہ اس کا کھویا ہوا بیٹا شاید یہی ہے۔
الماری کی تیسری آنکھ میں پوڈر کے کئی ڈبے سلیقے سے سجے ہوئے ہیں۔ روفی کو پوڈر لگانے کا بڑا شوق ہے۔ آئے دن نت نئی قسم کے پوڈر خریدتی ہے۔ پوڈر کے ان ڈبوں کے ساتھ ٹوٹے ہوئے آئینہ کا ایک ٹکڑا پڑا ہے۔ روفی عجیب ہے، اتنے مہنگے پوڈر خریدتی ہے لیکن آئینہ نہیں لاتی۔۔۔ یہ آئینہ بھی میں اس کے لیے لایا تھا اور پھر ایک دن یہ میرے ہی ہاتھ سے گر کر ٹوٹ گیا۔ میں اس دن زینے کے اندھے موڑوں سے بہت ڈرا تھا۔ اوپر آیا تو روفی میرے چہرے کی پرچھائیں دیکھ کر کہنے لگی۔
’’ڈر گئے۔۔۔ تمہیں ڈر کیوں لگتا ہے؟‘‘
میں نے کہا، ’’میں کسی سے نہیں ڈرتا۔‘‘
روفی نے آئینہ میرے ہاتھ میں دے دیا۔
میں نے اپنی صورت دیکھی جس پر اندھے موڑوں کی سیاہی منقش ہو چکی تھی۔۔۔ میں نے اپنی آنکھیں دیکھیں جن میں کوکھ جلی ماں کی پرچھائیں کھلے بازو اور اُلٹے پاؤں کا طلسم لیے شوک رہی تھی۔۔۔ ’’ہی ہی ہی۔۔۔ ‘‘
آئینہ میرے ہاتھ سے چھوٹ کر ٹکڑے ٹکڑے ہو گیا۔
میں سسک پڑا۔۔۔ ’’یہ موڑ بہت اندھے ہیں۔‘‘
وہ ہنسی۔۔۔ ’’تم بڑے بزدل ہو۔‘‘
میں نے کہا۔۔۔ ’’ہاں میں بزدل ہوں ، میں واقعی بزدل ہوں۔ روفی! ان اندھے موڑوں کو روشنی دے دو۔‘‘
وہ خاموشی سے آئینہ کے ٹکڑے چننے لگی۔
میں اس کے لیے نیا آئینہ لانا چاہتا ہوں۔ میں نے کئی بار جگمگاتی دکانوں میں آنکھیں مارتے ہوئے آئینے دیکھے ہیں لیکن انہیں اٹھاتے ہوئے میرے ہاتھ لرز جاتے ہیں ، اگر کسی دن یہ بھی ٹوٹ گیا۔۔۔ اندھے موڑوں کی سیاہی میرے چہرے پر منعکس ہو جاتی ہے اور کوکھ جلی ماں ، کھلے بازوؤں اور الٹے پاؤں کا طلسم لیے، میری آنکھوں کی چلمن سے جھانکتے ہوئے ہنسنے لگتی ہے۔
ڈوبتے چاند کی ایک اداس رات میں روفی کے لیے دو کتابیں لایا۔ گیتوں اور کہانیوں کی کتابیں اس کی جھولی میں ڈالتے ہوئے کہا۔
’’یہ دونوں کتابیں ادھوری ہیں۔‘‘
اس نے میرے ہاتھ پکڑ لیے اور کہنے لگی۔۔۔ ’’یہ گیت تم نے لکھے ہیں ؟‘‘
میں نے کہا۔۔۔ ’’ہاں یہ ادھورے گیت میرے ہیں ، یہ ادھوری کہانی بھی میری ہی ہے۔‘‘ میں اس کے پاس بیٹھ گیا۔ وہ ادھورے گیت پڑھنے لگی، میں ادھوری کہانی سنانے لگا۔ ہم بڑی دیر یوں ہی بیٹھے رہے۔ پھر میں نے کہا۔۔۔ ’’میری ایک بات مانو گی۔‘‘
اس نے سیاہ آنکھیں اٹھا کر مجھے دیکھا۔
میں نے کہا، ’’یہ تصویر اتار دو۔۔۔ مجھے ابلتے ہوئے خون سے ڈر لگتا ہے۔‘‘
وہ تڑپ کر میرے پہلو سے نکل گئی۔
’’تم اتنے بزدل کیوں ہو؟‘‘
’’میں بزدل نہیں۔۔۔ لیکن یہ ابلتا خون۔۔۔ ‘‘
وہ تصویر کے سامنے جا کھڑی ہوئی اور اسے دیکھتے ہوئے بولی، ’’ابلتا خون اور سسکتا دشمن۔۔۔ کتنا پیارا منظر ہے۔‘‘
میں نے کہا۔۔۔ ’’تم بھی کوکھ جلی ماں کی طرح ہو، کاش تمہارے پاؤں بھی الٹے ہوتے۔‘‘ اس کا چہرہ لاش کی طرح زرد ہو گیا۔
کہنے لگی،’’نکل جاؤ یہاں سے۔۔۔ تم بڑے کمینے ہو۔‘‘
میں چپ چاپ باہر نکل آیا۔
زینے کی دلدل بہت گہری تھی اور میں اکیلا۔
میں اسی دلدل میں اترنے لگا۔ اترتا ہی چلا گیا۔۔۔ لیکن موڑ کہاں تھے۔ میں تیزی سے اترنے لگا۔ دور سے مجھے موڑ کی حیران آنکھ نظر آئی۔ کوکھ جلی ماں جانے کہاں چلی گئی تھیں۔ موڑ خالی تھا۔ میں نے بھاگ کر اس میں پناہ لی۔ وہ گلی بن گیا، جس کا دوسرا سرا نہیں تھا۔ اس کی دیواریں آسمان سے ملی ہوئی تھیں۔ میں تیزی سے چلنے لگا، دیواریں بھی میرے ساتھ چل پڑیں۔ میں بھاگنے لگا، دیواریں بھی میرے ساتھ بھاگنے لگیں۔میں چیخنے لگا، دیواریں بھی میرے ساتھ چیخ پڑیں۔ میں رک گیا تو دیواریں بھی میرے ساتھ رک گئیں۔ میں کئی منٹ ان کے درمیان کھڑا ہانپتا رہا۔ پھر تیزی سے دوڑنے لگا۔۔۔ چند لمحوں بعد میں نچلے زینہ پر پڑا تھا۔ میرے بازو اور ٹانگوں میں درد کی ٹیسیں اٹھ رہی تھیں۔ میں بڑی مشکل سے ڈیوڑھی میں آیا اور دروازہ کھول کر روشنی میں نہائی ہوئی سڑک پر گر پڑا۔
٭٭٭

نُچی ہوئی پہچان

دور سے آتی پروں کی پھڑپھڑاہٹ اب قریب آتی جا رہی تھی اور اس کے ساتھ ساتھ سانسوں اور پھنکارنے کی آوازیں بھی سنائی دینے لگی تھیں۔ ہم نے سر اٹھا کر ایک دوسرے کو دیکھا، سارے چہرے منجمد تھے اور آنکھیں خاموشی سے ایک دوسرے کو گھور رہی تھیں۔ ہمارے چہروں پر پھیلا ہوا سناٹا ایک تڑاخے سے ٹوٹ گیا۔ پروں کی پھڑپھڑاہٹ اور پھنکارنے کی آوازیں لمحہ بہ لمحہ قریب آ رہی تھی۔ ہم میں سے ہر ایک دوسرے کو مشکوک نظروں سے دیکھ رہا تھا۔ سب چپ تھے اور قریب آتی آوازوں کو سن رہے تھے۔ آوازیں اب قریب آ گئی تھیں ، یک دم گہری خاموشی چھا گئی۔ سب دم بخود نئی آواز کے منتظر تھے۔
دیوا رسے ٹکراتے پروں کی مدھم سرسراہٹ اور سانسوں کی گہری گہری آوازوں کے درمیان پرندے نے روشندان سے اپنی چونچ اندر کی اور باری باری ہم میں سے ہر ایک کو دیکھا، پھر اس کی نظریں ساتویں پر جا ٹھہریں۔ ساتواں اپنی جگہ سے اٹھا اور میز کے کونے کو دونوں مٹھیوں سے بھینچتے ہوئے کہنے لگا۔
’’تم گواہ رہنا، میں اپنی مرضی سے جا رہا ہوں۔‘‘
اور اس کی آنکھوں سے دو آنسو میز کی چمکیلی سطح پر بکھر گئے۔
پرندے نے چونچ باہر کھینچ لی۔ ساتواں اپنی جگہ سے باہر آیا اور آہستہ آہستہ دروازے کی جانب چلنے لگا۔ دروازے کے پاس پہنچ کر اس نے مڑ کر دیکھا، جہاں باقی چھ پتھرائے ہوئے چہروں کے ساتھ اسے ٹکٹکی باندھے دیکھ رہے تھے۔ وہ چند لمحے دروازے کے ہینڈل پر ہاتھ رکھے انہیں دیکھتا رہا۔ پھر ایکا ایکی تیز ی سے دروازہ کھول کر باہر نکل گیا۔ اس کے باہر نکلتے ہی پتھرائے ہوئے چہرے پگھلنے لگے اور منجمد آنکھیں تیزی سے حرکت میں آ گئیں۔ باہر کی ساکت فضا میں مسرت کی چیخ ابھری اور پھنکارنے کی آوازوں میں دبی دبی ہنسی کی آوازیں بھی شامل ہو گئیں ، پھر پروں کی سرسراہٹ کے ساتھ دبی دبی، گھٹی گھٹی چیخیں ابھریں ، سانسوں کی آوازیں تیز ہو گئیں اور پَر ایک بار زور سے پھڑپھڑائے اور پھر دھیرے دھیرے آوازیں اور پھڑپھڑاہٹ دور ہوتی چلی گئی۔
کمرے میں نم آلود خاموشی پر پھیلائے بیٹھی تھی۔ سب اپنی اپنی جگہ بیٹھے میز کی چکنی سطح کو گھور رہے تھے، جس پر گرے ساتویں کے دو آنسو اب بکھر کر لکیروں میں بدل گئے تھے اور ڈھلوان کی طرف بہہ رہے تھے۔
دفعتاً چھٹے نے سر اٹھایا اور کہنے لگا۔۔۔ ’’کیا وہ یوں ہی ایک ایک کر کے سب کو لے جائے گا۔‘‘
کسی نے جواب نہ دیا۔
چھٹے نے انگلی سے میز پر بہتی لکیریں صاف کر دیں اور کھڑے ہوتے ہوئے بولا۔
’’ہمیں اسے تلاش کرن چاہئے۔‘‘
کسی نے اس کی تائید نہ کی۔
’’اگر تم میں سے کوئی میرا ساتھ دینے کے لیے تیار نہیں تو میں اکیلا ہی جاؤں گا۔‘‘
اس بار بھی کوئی نہ بولا۔
چھٹا اپنی جگہ سے نکل کر دروازے کی طرف چل پڑا۔ سب کے چہروں پر ہچکچاہٹ کی تہیں نمایاں ہونے لگیں۔ وہ دروازے کے پاس جا کر ایک لمحہ کے لیے ٹھہرا اور مڑ کر کہنے لگا۔
’’تم گواہ رہنا۔۔۔ میں جا رہا ہوں۔‘‘
اور دروازہ کھول کر باہر نکل گیا۔
چند لمحے گہری خاموشی رہی، پھر میں نے، جو پانچواں تھا، باقیوں سے کہا۔
’’ہم میں سے کون اس کا ساتھ دے گا؟‘‘
چاروں چپ رہے۔
میں اپنی جگہ سے آگے آیا۔۔۔ ’’میں اس کی گواہی دوں گا۔‘‘ جب میں دروازے کی طرف چل پڑا تو وہ چاروں بھی میرے پیچھے پیچھے آئے۔
باہر گہرا سناٹا تھا اور ساری بستی دھند اور تاریکی کی بکل میں گہری نیند سو رہی تھی۔ چھٹا کچھ فاصلے پر کھڑا اندھیرے کو سونگھ رہا تھا۔ ہماری آواز سن کر اس نے مڑ کر دیکھا۔ بستی کے سارے مکان خاموش تھے اور ویران گلیوں میں سنسناتی ہوا، دروازوں پر دستک دیتی، ہماری جانب بڑھ رہی تھی۔ چھٹے نے ہاتھ اٹھایا اور کہنے لگا۔
’’ہمیں دیر نہ کرنی چاہئے، وہ زیادہ دور نہ گیا ہو گا۔‘‘
اس کی بات سن کر چاروں آگے بڑھے اور بیک زبان بولے۔
’’اس کی ایک آنکھ ہمارے اندر ہے اور سب کچھ دیکھ رہی ہے۔‘‘
چھٹے نے ان کی بات سن کر غصے سے ہوا میں ہاتھ پھیلائے اور چیخ کر بولا۔
’’یہ آنکھ ہمارے عقیدے کے ساتھ مر چکی ہے۔ مجھے میرے پاؤں نظر نہیں آتے، میں انہیں دیکھنا چاہتا ہوں۔‘‘
ان چاروں میں سے تیسرا آگے آیا۔۔۔ ’’ہمارے پاؤں کے نیچے دلدل ہے۔ تم اسے ننگا کر کے ہمیں مارنا چاہتے ہو۔‘‘
پھر اس نے باقی تینوں کی طرف دیکھا۔
’’یہ ہمارا دشمن اور اس زمین کا غدار ہے۔ ہمیں اس کا ساتھ چھوڑ دینا چاہئے۔‘‘
چاروں نے ایک دوسرے کو دیکھا اور چاروں کونوں میں پھیل گئے اور چلّا چلّا کر کہنے لگے۔
’’اے لوگو!اے بستی والو! اس کی بات نہ سنو، یہ گمراہ کرنے والا اور بد کردار ہے، یہ تمہیں عذاب میں مبتلا کرنا چاہتا ہے۔‘‘
ان کی آواز سن کر بستی یک دم ہڑ بڑا کر جاگ اٹھی اور لوگ ہاتھوں میں لاٹھیاں ، ڈنڈے لے کر گھروں سے نکل آئے اور چھٹے کو چاروں طرف سے گھیر لیا۔ بستی کا ایک سفید بوڑھا ہجوم کی دیوار توڑ کر سامنے آیا اور کہنے لگا۔
’’تم گمراہ کرنے والے ہو۔۔۔ تم ہمارے عقیدوں کو توڑنا چاہتے ہو، ہم تمہیں کبھی معاف نہیں کریں گے۔‘‘
مجمع میں سے تائید کی آوازیں ابھریں۔
چھٹے نے کچھ کہنے کے لیے منہ کھولا ہی تھا کہ دور سے پروں کی پھڑپھڑاہٹ اور پھنکارنے کی آوازیں سنتے ہی مجمع پر خو ف و ہراس چھا گیا اور لوگ تیزی سے اِدھر اُدھر دوڑنے لگے۔ چند لمحوں بعد بستی پھر دھند اور تاریکی کی بکل میں گہری نیند سو گئی۔
چھٹے نے دور تاریکیوں میں گھورا اور کہنے لگا۔
’’وہ پھر آ رہا ہے۔‘‘
ہم سارے چھٹے کے قریب جمع ہو گئے۔
پروں کی پھڑپھڑاہٹ اور پھنکارنے کی آوازیں لمحہ بہ لمحہ قریب آتی جا رہی تھیں۔
چھٹے نے کہا، ’’تم میں سے کون میرا ساتھ دے گا؟‘‘
تیسرا قریب آیا اور کہنے لگا، ’’ہم اس کی اطاعت کا حلف اٹھا چکے ہیں۔‘‘
اور وہ کمرے کی طرف مڑ گیا۔ باقی کے تین بھی اس کے ساتھ چلے گئے۔ میں اور چھٹا اکیلے رہ گئے۔
پروں کی پھڑپھڑاہٹ اور پھنکارنے کے شور سے کانوں کے پردے پھٹے جا رہے تھے۔ چھٹے نے میری طرف دیکھا اور چیخ کر بولا۔
’’تم گواہ رہنا۔۔۔ میں اس کی اطاعت سے منحرف ہوتا ہوں۔‘‘
اور چند قدم آگے بڑھ کر میدان میں آگیا۔
پرندہ ہمارے سروں پر منڈلا رہا تھا۔ دفعتاً اس نے غوطہ لگایا اور دھند کا سینہ کاٹ کر سامنے آگیا۔ اس کے پنجوں پر خون کے قطرے ابھی تک چمک رہے تھے۔ اس نے ایک نظر مجھے اور پھر چھٹے کو دیکھا اور دوسرے لمحے اس پر جھپٹ پڑا۔ میرے سارے بدن میں درد کی ٹیسیں دوڑ گئیں۔ وہ پرندے کے پنجوں میں تڑپ رہا تھا۔ میں نے درد سے تڑپتے، چیختے ہوئے پرندے پر چھلانگ لگائی۔ اس نے غرّا کر پَر جھٹکے، میں دور جا گرا۔ چھٹا ابھی تک اس کے پنجوں میں تڑپ رہا تھا۔ میں تیزی سے اٹھا اور پرندے پر جھپٹ پڑا۔ اس بار اس کی گردن میرے ہاتھوں میں آ گئی۔ پرندہ بار بار پر جھٹک رہا تھا۔ میرے سارے بدن میں ٹیسیں اٹھ رہی تھی لیکن میں پوری طاقت سے اسے دباتا رہا۔ دفعتاً زور دار دھماکا ہوا۔ کوئی روشن چیز ہمارے پاؤں کے نیچے سے ابھری اور تاریکی کو چیرتی ہوئی دوسری طرف بڑھی۔ روشنی کی لا تعداد کرنیں چاروں طرف پھیل گئیں۔ بستی میں زندگی کی لہر دوڑ گئی۔ رفتہ رفتہ دھند اور تاریکی چھٹنے لگی۔
پرندے کا بے جان جسم میدان کے کونے میں پڑا تھا۔ تاریکی پوری طرح چھٹ چکی تھی اور ہمیں اپنے پاؤں نظر آ رہے تھے۔ ہمارے پاؤں کے نیچے دور دور تک سر سبز زمین سانس لے رہی تھی۔۔۔ میں نے مڑ کر دیکھا، وہ کمرہ جس میں وہ چاروں گئے تھے، ملبے کا ڈھیر بن چکا تھا۔ میں نے چھٹے کو چھوا، وہ گہری سانسیں لے رہا تھا۔ میرے چھوتے ہی اس نے آنکھیں کھول دیں۔ میں نے اسے سہارا دے کر اٹھایا اور ہم دونوں لڑکھڑاتے ہوئے بستی کی طرف چل پڑے۔ ہمارے پاؤں کے نیچے دور دور تک پھیلی ہوئی سر سبز زمین ہمارے چاروں طرف ناچ رہی تھیں۔ گھروں کے دروازے کھلنے شروع ہو گئے تھے اور لوگ حیرت اور خوشی سے کبھی ایک دوسرے کو اور کبھی چاروں طرف ناچتی سرسبز لہلہاتی زمین کو دیکھ رہے تھے۔
٭٭٭

اُلٹی قوس کا سفر

جب سارے کالے طوطے ایک ایک کر کے اپنے گھونسلوں سے اُڑ گئے تو میں نے اپنے سفر کا آغاز کیا۔ میرے ساتھ وہ دو بھی تھے جنہیں یہ معلوم نہ تھا کہ ہمیں کہاں جانا ہے۔ وہ سر جھکائے چپ چاپ میرے پیچھے پیچھے آ رہے تھے۔ کالے طوطوں کی سیٹیاں ہمارے لیے راستوں کی لکیریں بچھا رہی تھیں اور آسمان پر سیاہی مائل پھیلی ہوئی دھند دھیرے دھیرے نیچے اتر رہی تھی۔ یکبارگی میں نے ان متعدد راستوں کو اور پھر مڑ کر ان دونوں کی جانب دیکھا اور چیخ کر کہا۔
’’ہاں مجھے اعتراف کر لینا چاہئے کہ میں راستوں کی پہچان کھو چکا ہوں۔‘‘
دونوں نے جھکائے ہوئے سر اوپر اٹھائے۔
میں نے کہا، ’’راستوں سے میرے رشتے ٹوٹ چکے ہیں۔‘‘
میں نے کندھے پر اٹھائے ہوئے بوجھ کو ٹٹولا۔ اس کے ہاتھ پیر ڈھیلے پڑ چکے تھے۔ میرے ٹٹولنے پر بھی اس میں کوئی حرکت پیدا نہ ہوئی۔ ہم نے اسے کئی دنوں کی مسلسل کوششوں کے بعد قابو میں کیا تھا۔ ہم بہت دنوں سے اس کی تاک میں تھے لیکن وہ کسی طرح قابو میں ہی نہ آتا تھا، ہمیشہ اپنے آپ کو سبزے میں چھپا لیتا۔ تب ہم نے اس کے کچھ ساتھیوں کو ورغلا کر سبزے کو کٹوانا شروع کیا۔ جب ساری پناہ گاہیں ٹوٹ گئیں اور سارے لہلہاتے کھیت دھوئیں کی زد میں آ گئے تو وہ ہمارے سامنے آگیا۔ اب چھپنے کی کوئی جگہ باقی نہ رہی۔ وہ چپ چاپ کھڑا سہمی نظروں سے راستہ تلاش کر رہا تھا۔ تب دھوئیں کی لکیر کٹے ہوئے کھیتوں سے بلند ہوئی۔ دھوئیں کی لکیر دیکھ کر اسے جھر جھری سی آئی۔ دفعتاً لکیر نے اس پر حملہ کر دیا۔ وہ خوف زدہ ہو کر اسی جھنڈ کی طرف بھاگ پڑا جہاں ہم گھات لگائے بیٹھے تھے۔ دھوئیں کی لکیر اس کا پیچھا کر رہی تھی۔ وہ درختوں سے چند قدم کے فاصلے پر رُک گیا۔ میں نے پھندے کو دونوں ہاتھوں سے دبا کر اس کی مضبوطی کا اندازہ کیا اور اپنی جگہ سے ایک قدم آگے کھسک آیا۔ دھوئیں کی لکیر قریب آ چکی تھی۔ وہ اس سے چھپنے کے لیے نیچے جھکا ہی تھا کہ اسی وقت میں نے پھندا پھینکا، پھندے کی گرفت میں آتے ہی وہ تڑپ کر اُچھلا لیکن میں نے اپنی جگہ سے جست لگا کر اسے دبوچ لیا۔ وہ دونوں تھیلا لے کر جھنڈ سے باہر آئے اور ہم نے اسے تھیلے میں بند کر لیا۔ آخری وقت تک وہ اچھلتا رہا لیکن جوں ہی تھیلے کا منہ بند ہوا، اس کی ساری مدافعت ختم ہو گئی۔ دھوئیں کی لکیر اپنی جگہ سے نکل کر واپس چلی گئی۔ میں نے تھیلے کو کندھے پر رکھا اور ہم اپنے سفر پر روانہ ہو گئے۔
کالے طوطوں کی قطاریں دور جا کر نقطوں میں بدل چکی تھیں اور ہم تینوں راستے کے بیچوں بیچ کھڑے ایک دوسرے کو دیکھ رہے تھے۔ سیاہی مائل دھند دھیرے دھیرے گہری ہوتی چلی جا رہی تھی اور راستے دھند لانے لگے تھے۔ دفعتاً ایک آواز چاروں طرف پھیل گئی۔ ایک مدھم سی نسوانی آواز، کوئی عورت کسی کو پکار رہی تھی۔ آواز سنتے ہی ہم سنبھل گئے۔ میں نے بوجھ کو مضبوطی سے تھاما اور چل پڑا۔ آواز مسلسل ہمارا پیچھا کر رہی تھی۔ یوں لگ رہا تھا جیسے آواز دینے والا سر پٹ بھاگا چلا آ رہا تھا۔ لمحہ بہ لمحہ آواز کے دائرے ہمارے گرد اپنی گرفت مضبوط کر رہے تھے۔ جوں جوں آواز قریب آنے لگی، ہمارے قدموں کی رفتار تیز ہو گئی اور پھر ہم تقریباً تقریباً دوڑنے لگے، جوں جوں آواز قریب آنے لگی، تھیلے میں بھی حرکت شروع ہو گئی اور وہ آہستہ آہستہ ہاتھ پیر مارنے لگا۔ میں نے تھیلے کے منہ پر گرفت مضبوط کر لی۔ آواز اب بہت قریب آ گئی تھی اور الفاظ دھند کے سحر سے نکل کر صاف سنائی دینے لگے تھے۔ کوئی عورت پکار رہی تھی۔ آواز کی قربت کے ساتھ ساتھ تھیلے میں بھی حرکت بڑھ گئی تھی۔ میں رک گیا اور مڑ کر چیختے ہوتے ہوئے بولا۔
’’اے عورت تو کون ہے؟ اور کیوں ہمارے پیچھے پیچھے چلی آتی ہے؟‘‘
ایک لمحہ کے لیے خاموشی چھا گئی، پھر تاریکی کا سینہ چیرتی ایک آواز اُبھری۔
’’اسے چھوڑ دو۔ اسے مجھے واپس کر دو۔‘‘
میں نے چیخ کر کہا، ’’یہ ناممکن ہے۔ تو واپس چلی جا۔‘‘
ہم نے پھر رفتار تیز کر دی۔
وہ مسلسل چیختی رہی، ’’اسے چھوڑ دو۔ اسے مجھے واپس دے دو۔‘‘
میں رک گیا اور چیختے ہوئے بولا۔
’’واپس چلی جا۔ ہم اسے واپس نہ کریں گے۔‘‘
جواباً ایک سسکی ابھری، چند لمحوں کے توقّف کے بعد بولی۔
’’آخر تم اسے کیوں لیے جا رہے ہو؟‘‘
’’ہم اسے کیوں لیے جا رہے ہیں ؟‘‘ میں نے خود سے سوال کیا۔
’’کیوں ؟‘‘
پھر میں نے باری باری ان دونوں سے پوچھا۔
’’آخر ہم اسے کیوں لیے جا رہے ہیں۔‘‘ میں بڑبڑایا۔ میں نے باری باری ان دونوں کو دیکھا اور تھیلے کو ٹٹولتے ہوئے اس سے پوچھا۔
’’تمہیں معلوم ہے ہم تمہیں کیوں لیے جا رہے ہیں ؟‘‘
لیکن وہ بھی چپ رہا۔
وہ پھر گڑگڑائی، ’’اسے مجھے دے دو۔ میں منت کرتی ہوں۔ اسے مجھے دے دو۔‘‘
میں نے چیخ کر پوچھا، ’’تمہیں معلوم ہے ہم اسے کیوں لیے جار ہے ہیں۔‘‘
وہ جواباً چپ رہی۔
میں نے کہا، ’’اگر تمہیں معلوم ہے تو بتاؤ۔‘‘
وہ پھر بھی چپ رہی۔
میں نے دونوں نے کہا، ’’اسے بھی معلوم نہیں۔‘‘
اور ہم دوبارہ چل پڑے۔
دھند اب اتنی گہری ہو چلی تھی کہ ہم اب سب سایوں میں بدل گئے تھے۔ ہمارے اپنے قدموں کی چاپ اور پیچھے آنے والی سسکیاں خاموشی کا سینہ چیر رہی تھیں۔ وہ کبھی دوڑنے لگتی کبھی رک جاتی اور چیخ چیخ کر اسے پکارتی۔ ہم یوں ہی چلتے چلتے ندی کے کنارے پہنچ گئے۔ میں نے اوپر سے دیکھا۔ دور ہوتے ہوئے نقطے اب نظروں سے اوجھل ہو چکے تھے۔ ہم تینوں ایک دم ہراساں ہو گئے۔ آواز بہت قریب آ چکی تھی۔ پہلے وہ دونوں اترے پھر میں نے بوجھ کو سنبھال کر پہلا قدم اتارا۔ جونہی میرے قدموں نے پانی کو چھوا، اس نے ایک زور دار چیخ ماری اور کہنے لگی،
’’میں کہتی ہوں ، رک جاؤ، مت لے جاؤ اسے۔‘‘
اس کی چیخ سنتے ہی تھیلے میں ایک دم ہل چل مچ گئی اور وہ میرے کندھے سے اچھل کر کنارے پر جا گرا۔ میں تیز ی سے اس کی طرف لپکا۔ لیکن میرے پہنچنے سے پہلے ہی وہ تھیلے کا منہ کھول کر باہر آیا اور سہمی ہوئی نظروں سے مجھے دیکھنے لگا۔ اس کے باہر نکلتے ہی دونوں چیخنے لگے۔ میں نے مڑ کر دیکھا۔ وہ بھنور میں پھنس چکے تھے اور رفتہ رفتہ ڈوب رہے تھے۔ میں کچھ دیر انہیں دیکھتا رہا۔ پھر اس کی طرف دوڑا۔ وہ کنارے پر سہما ہوا حیران حیران مجھے دیکھ رہا تھا۔ وہ بھی دوڑتی ہوئی قریب آ گئی اور ہانپتے ہوئے بولی،
’’چھوڑ دو اسے، اسے مجھے واپس کر دو۔‘‘
اسی وقت اس کی نظریں اس پر پڑیں۔ آواز سن کر وہ بھی مڑا۔ وہ قریب آ گئی اور اس کی پشت پر کھڑے ہو کر اپنے دونوں ہاتھ اس کے کندھے پر رکھ کر میری طرف دیکھے بغیر بولی،
’’تم کہاں چلے گئے تھے۔۔۔ مجھے چھوڑ کر کہاں چلے گئے تھے۔‘‘
میں دم بخود گھٹنے گھٹنے پانی میں کھڑا دونوں کو دیکھ رہا تھا۔
’’میری بانہیں کب سے تمہارے لیے بے تاب ہیں۔‘‘ اس نے جھک کر اسے بازوؤں میں سمیٹ لیا اور وہ سہمے ہوئے رستہ بھولنے والے بچے کی طرح اس کی گود میں سمٹ گیا۔ میں خاموشی سے آگے آیا اور جھک کر تھیلا اور پھندا اٹھا لیا جو اُس کے پاؤں میں پڑا تھا۔ پھر میں نے تھیلے کو کاندھے پر رکھا اور پھندے کو ہلاتے ہوئے پانی میں اتر گیا۔
کچھ دیر بعد جب دھند چھٹنے لگی تو میں نے اسے دیکھا، وہ اسی طرح مجھے بازوؤں میں لیے کھڑی تھی۔
میں نے کہا، ’’مجھے معاف کر دو۔‘‘
اس نے میری آنکھوں میں جھانکا۔ میں نے کہا، ’’مجھے معاف کر دو۔ میں تم سے الگ ہو ہی نہیں سکتا۔ میرا تمہارا رشتہ اٹوٹ انگ ہے۔‘‘
اس کی آنکھوں میں مسکراہٹوں کے دئیے جل اٹھے اور میرے شانوں پر اس کے بازوؤں کا دباؤ بڑھ گیا۔
میں نے جھک کر اس کے پاؤں چھوئے۔ اس کا اَنگ اَنگ مہک اٹھا۔ وہ میرے چاروں طرف پھیل گئی اور اپنی سوندھی سوندھی خوشبوؤں اور لہلہاتے سبزوں کے ساتھ میرے گرد ناچنے لگی۔ میں نے لمبے لمبے سانس لے کر اس کی سوندھی سوندھی خوشبوؤں کو سینے اور سبزے کو آنکھوں میں سمیٹ لیا۔ دھند چھٹ چکی تھی اور راستہ نظر آنے لگا تھا۔ میں نے ایک بار پھر جھک کر اس کے پاؤں چھوئے اور آہستہ آہستہ واپس چل پڑا۔
٭٭٭

ریت پر گرفت

ایک کسیلا بھیگا پن چاروں طرف پھیلا ہوا تھا۔ ہر شے چپکتی ہوئی سی، اپنے فوکس سے باہر نکلی ہوئی تھی۔ اس نے آنکھیں مَل مَل کر انہیں پہچاننے کی کوشش کی لیکن چیزیں پھیل پھیل کر اور بے ڈھنگی ہوئی جا رہی تھیں۔ اس نے دیوار کے سہارے اٹھنا چاہا لیکن لڑکھڑا کر گر پڑا۔ دیواریں تیزی سے پیچھے ہٹ رہی تھیں اور چھت گھومتی ہوئی اس کی طرف دوڑی چلی آ رہی تھی۔ اس نے ایک بار پھر کہنیوں کے سہارے اٹھنے کی کوشش کی لیکن اینٹھتے ہوئے جسم نے اس کا ساتھ نہ دیا اور وہ دوبارہ لڑکھڑا کر نیچے جا پڑا۔ اس نے پھیلتے ہوئے فرش کے کناروں کو اپنے بازوؤں میں سمیٹنے کے لیے بانہیں پھیلائیں لیکن کنارے اس کے بازوؤں کے حلقہ سے پھسل گئے اور وہ گھسیٹتا ہوا دوسری طرف چلا گیا۔ بھاگتی چیزیں سرسراتی آہٹوں کے ساتھ اس کے قریب آتیں اور تیزی سے پیچھے ہٹ کر زردی مائل دھند لکے میں غائب ہو جاتیں۔ اس نے اس زردی مائل جالے کو توڑ نے کے لیے دونوں بازو فضا میں پھیلائے لیکن زردی مائل دھندلکا اس کے ہاتھ نہ آیا۔ بے شمار بے نار چہرے، تھکی آنکھوں اور مردہ آوازوں کے ساتھ اسے مسلسل گھور رہے تھے۔ اس نے کراہ کر کروٹ لی اور دونوں ہاتھوں سے اپنا جسم ٹٹولنے لگا۔
’’اے خدا!مجھے اس اندھیرے میں بھٹکنے کے لیے اکیلا نہ چھوڑ۔ اے خدا میری مدد کر، میری مدد کر۔‘‘ لیکن لفظ بھیگی ہوئی پھلجھڑی کی طرح لمحہ بھر کے لیے چمک کر بجھ گئے۔
چہرے اور دیواریں ایک دوسرے کے پیچھے بھاگ رہی تھیں۔ اس نے چیخ چیخ کر کسی کو پکارا لیکن لفظوں کی ساری عمارتوں میں بڑی بڑی دراڑیں پڑی ہوئی تھیں۔
’’میں کہاں جاؤں ؟‘‘
’’میں کہاں جاؤں ؟‘‘
اس کا جسم بتدریج اینٹھتے ہوئے بے حرکت ہوا جا رہا تھا۔
’’ہر شے میرا ساتھ چھوڑ رہی ہے۔‘‘
اس نے اپنے چہرے کو چھوا۔
’’میرا چہرہ وہی ہے۔‘‘
’’کیا پتہ وہ نہ ہو؟‘‘ شعلہ چمکنے سے پہلے ہی بجھ گیا۔
’’میں وہی ہوں ؟‘‘
’’کیا واقعی؟‘‘لفظ پھر دھڑام سے نیچے آگرے۔ مڑے تڑے چہروں نے زردی مائل دھند کا جالا چیر کر اسے دیکھا مگر آوازیں باہر نکلتے ہی بے صدا ہو گئیں اور تاریکی میں سرسراتی ہوئیں اس کے گرد چکر لگانے لگیں۔
دھیرے دھیرے جب چیزوں کا زردی مائل دھندلا پن گہرا ہونے لگا تو اس نے ایک بار پھر آنکھیں پھاڑ کر چیزوں کو پہچاننے کی کوشش کی۔ لیکن چیزیں اس کی پہچان کے دائرے سے بدستور کھسکی ہوئی تھیں۔
’’مجھے کیا ہو رہا ہے؟‘‘
لیکن لفظ دوبارہ اپنی جگہ سے سرک گئے۔
اس نے ارد گرد ناچتے چہروں کو ٹٹولنے اور چھونے کی کوشش کی لیکن اس کے ہاتھ لگاتے ہی چہرے جگہ جگہ سے تڑخ گئے۔
اس نے طویل اُکتایا ہوا سانس لیا۔ یوں لگا جیسے ساری تاریکی اس کے اندر گھس گئی ہے۔ اس نے جلدی جلدی اس تاریکی کو اُگلنے کی کوشش کی لیکن چیزیں اور چہرے پھر بھی ٹوٹے ہی رہے۔ جیسے وہ کسی بہت ہی پرانے عجائب گھر سے گزر رہا تھا جہاں کوئی چیز پوری نہیں تھی۔ چہرے اور جسم ٹوٹے ہوئے اور آوازیں ادھوری اور بے لفظ تھیں۔
’’آج کیا دن ہے؟‘‘
’’آج کیا دن ہے؟‘‘
دن، ہفتے، مہینے اور سال ایک دوسرے کے پیچھے بھاگتے، قہقہے لگاتے، اس کا منہ چڑاتے زردی مائل دھند میں گم ہوئے جا رہے تھے۔
’’سب کچھ بدل رہا ہے؟‘‘
’’سب کچھ بدل رہا ہے؟‘‘
چیزیں اپنے پیچھے دھندلاہٹ چھوڑ کر گم ہو رہی تھیں اور دن ایک دوسرے کے پیچھے تیزی سے بھاگے چلے جا رہے تھے۔ روتے ہوئے دن، ہنستے ہوئے دن، ناچتے گاتے دن، اداس زرد رَو دن، سارے دن سر جھکائے ایک دوسرے کا ہاتھ پکڑے گزرے چلے جار ہے تھے۔
’’آج کیا دن ہے؟‘‘
اس نے انگلیوں پر گننے کی کوشش کی، ایک ہندسہ، پھر دوسرا ہندسہ، پہلا، پہلا اور دوسرا ہندسہ شاید دوسرا اور پہلا۔۔۔ پہلا، دوسرا یا شاید پہلا۔۔۔ یا شاید۔۔۔
ہندسے اس کی انگلیوں کو چھوتے ہی گیلی مٹی کی طرح گھلتے چلے جا رہے تھے۔
’’آج کیا دن ہے؟ ‘‘ اس نے چیخ کر کہا۔
اس کی اپنی آواز ایک سرسراہٹ، بے لفظ سرسراہٹ بن کر اس کے کانوں سے ٹکرائی۔
’’آج کیا دن ہے؟‘‘
اس نے ذہن پر زور ڈالا لیکن وہ اندھیرے، بھیگے ہوئے خلا میں ہاتھ مار کر رہ گیا۔
’’آج کیا دن ہے؟‘‘ وہ بڑبڑایا۔
چیزیں دھندلی ہوتی ہوتی نقطوں میں بدل رہی تھیں اور دھیرے دھیرے اپنی اپنی جگہ سے سرکتی چلی جا رہی تھیں۔ اس نے پھر ہندسے جوڑنے کی کوشش کی۔ ایک ہندسہ اور۔۔۔ اور۔۔۔ اگلا ہندسہ اس کے ہاتھ میں آتے ہی چُر مُر ہو گیا۔
’’آج کیا دن ہے؟‘‘ وہ روہانسا ہو گیا۔ منہ چڑاتا ہوا سوالیہ نشان اس کے گرد ناچنے لگا۔
’’آج کیا دن ہے؟‘‘اس نے اپنے آپ سے سرگوشی کی۔
لیکن کھویا ہوا دن لوٹ کر نہیں آیا۔ اس نے بے بسی سے دیوار پر لگے ہوئے کیلنڈر کو دیکھا اور اینٹھتے ہوئے جسم کو گھسیٹ کر کہنیوں کے سہارے اٹھنے کی کوشش کی۔ کھویا ہوا دن دور کھڑا مسکرا رہا تھا۔ اس نے چیخ کر اسے پکارنا چاہا لیکن لفظ اور ہندسے جگہ جگہ سے ٹوٹے ہوئے تھے اور سارے چہرے بے ڈھنگے اور فوکس سے نکلے ہوئے تھے۔ چیزیں اپنی جگہ چھوڑ چکی تھیں اور سرک سرک کر نیچے گر رہی تھیں۔ اس نے بے ساختہ ہاتھ پھیلائے، جیسے دور ہوتی کسی شے کو پکڑنا چاہتا ہو، لیکن پھسلتی ہوئی شے اس کے ہاتھوں سے نکل گئی۔ اسی کے ہاتھ ایک جھٹکے کے ساتھ نیچے گر گئے اور زردیلا بھیگا پن چاروں طرف سے اس پر جھپٹ پڑا۔
٭٭٭

بیزار آدم کے بیٹے

یہ بات میرے سوا اور کوئی نہیں جانتا کہ میں ۱ نہیں۔ ۱ اپنا جسم مجھے دے کر کہیں چلا گیا ہے۔ جاتے وقت اس نے مجھ سے کہا تھا، ’’کسی کو معلوم نہ ہو کہ میں چلا گیا ہوں اور میں نے اپنا جسم تمہیں دے دیا ہے۔‘‘
میرے یقین دلانے پر وہ اطمینان سے سر ہلاتا ہے، میرا شانہ تھپتھپاتا ہے، چند لمحے اپنے جسم کو دیکھتا رہتا ہے، پھر تاریکی میں گم ہو جاتا ہے۔
میں کچھ دیر تاریکی میں اسے نظروں سے ٹٹولتا رہتا ہوں ، پھر اس کے جسم کو اوڑھ لیتا ہوں۔
میرے ہوٹل میں داخل ہوتے ہی ب قہقہہ لگاتا ہے، ’’ہار گئے نا، میں پہلے ہی کہتا تھا، میرے ساتھ نہ دوڑنا۔‘‘
میں خاموشی سے بیٹھ جاتا ہوں ، میرا جی چاہتا ہے اسے بتاؤں کہ تمہارا دوست ا اپنا جسم مجھے دے کر کہیں چلا گیا لیکن مجھے اپنا وعدہ یاد آ جاتا ہے، میں سر ہلاتا ہوں۔۔۔ ’’کوئی بات نہیں ، پھر کبھی سہی۔‘‘
وہ اپنی مونچھیں پھڑپھڑاتا ہے۔۔۔ ’’تم دوڑنے کا تکلّف ہی نہ کیا کرو۔‘‘
ج اسے ٹوکتا ہے۔۔۔ ’’نہیں یار اسے دوڑنے دیا کرو۔ ذرا شغل ہی سہی۔‘‘
میں خاموشی سے باہر نکل آتا ہوں ، وہ دونو ں بھی میرے پیچھے لپکتے ہیں۔
کشمیر روڈ کی بتیاں جھلملا رہی ہیں۔ میں پان کی دکان پر لگے ہوئے آئینہ میں اپنا چہرہ دیکھتا ہوں۔ مجھے یاد آتا ہے۔ وہ بہت دور نکل چکا ہو گا۔ میں اس کے قدموں کی چاپ سننے کی کوشش کرتا ہوں لیکن سرسراتی ہوئی ہوا میرے چہرے کو تھپتھپاتی ہوئی گزر جاتی ہے۔ مجھے ۱ سے یہ پوچھنا یاد ہی نہیں رہا تھا کہ وہ دوڑ میں ہمیشہ ہار کیوں جایا کرتا تھا۔ وہ اگر ہار جاتا تھا تو ہر بار اس میں حصہ کیوں لیتا تھا؟
ب دس کا نوٹ نکال کر سگریٹ والے کو دیتا ہے، میں حیرت سے اسے دیکھتا ہوں۔۔۔ ’’مال کہاں سے آیا؟‘‘
وہ دیدے نچاتا ہے۔۔۔ ’’ماں نے بجلی کا بل جمع کرانے کے لیے دیا تھا۔‘‘
ج کہتا ہے۔۔۔ ’’اور اگر بجلی کٹ گئی تو؟‘‘
وہ بقایا لیتے ہوئے اطمینان سے سر ہلاتا ہے۔۔۔ ’’اللہ سبب کرنے والا ہے، کیوں ا ؟‘‘
میرا جی کہتا ہے اسے بتاؤں کہ میں الف نہیں ، لیکن، میرا وعدہ میرے لبوں پر آئے ہوئے الفاظ واپس دھکیل دیتا ہے، ’’ٹھیک ہے۔‘‘
’’کیا ٹھیک ہے؟‘‘ وہ میرے شانے پر ہاتھ مارتا ہے۔
’’یہی کہ ایک تمہاری نیلامی ہو گی۔‘‘
’’نیلامی؟‘‘
’’ہاں نیلامی، کس دن جب میں کمیٹی چوک پر پہنچوں گا تو تمہاری نیلامی ہو رہی ہو گی۔‘‘
وہ سر ہلاتا ہے۔۔۔ ’’یہ تو ہونا ہی ہے ایک دن، یار یہ تو بتاؤ تم کون سا حصہ خریدو گے؟‘‘
میں کہتا ہوں۔۔۔ ’’اگر تمہارے ساتھ میری بھی نیلامی نہ ہوئی، تو میں تمہاری مونچھیں اور ہونٹ خرید لوں گا۔‘‘
ج کہتا ہے۔۔۔ ’’اور میں اس کی وِگ خریدوں گا۔‘‘
اگلے چوک پر ج اچانک غائب ہو جاتا ہے، میں اور ب اکیلے رہ جاتے ہیں۔ میں پوچھتا ہوں۔۔۔ ’’اب کہا ں جائیں ؟‘‘
ب سوچنے لگتا ہے۔۔۔ ’’کہاں جائیں ، چائے پی پی کر تو بُرا حال ہو گیا ہے۔‘‘
ہم پھر چلنے لگتے ہیں۔ ب کہتا ہے۔۔۔ ’’ہم کون ہیں ؟‘‘
میں کہتا ہوں۔۔۔ ’’ہم ہم ہیں۔۔۔ تم ب اور میں ا ہوں۔‘‘
وہ کچھ دیر سوچتا رہتا ہے، پھر کہتا ہے۔۔۔ ’’یار اگر تم اور میں ب نہ ہوتے تو کیا فرق پڑتا؟‘‘
’’کیا فرق پڑتا؟۔۔۔ پھر شاید ہم ج اور د ہوتے یا ر اور س، بہرحال کچھ نہ کچھ ضرور ہوتے، یا شاید کچھ بھی نہ ہوتے۔‘‘
ب دفعتاً کہتا ہے، ’’تم کسی کو قتل کیوں نہیں کر دیتے؟‘‘
میں کہتا ہوں۔۔۔ ’’کسے قتل کروں ، کوئی مجھ سے قتل ہونا پسند ہی نہیں کرتا۔‘‘
وہ مایوسی سے سر ہلاتا ہے۔۔۔ ’’تو پھر اپنے آپ کو ہی قتل کرتے رہو۔‘‘
ہم پھر خاموش ہو جاتے ہیں۔
اگلے چوراہے پر وہ پوچھتا ہے۔۔۔ ’’کتنے بجے ہیں ؟‘‘
’’گیارہ۔۔۔ اب گھر چلیں۔‘‘
وہ نفی میں سر ہلاتا ہے۔۔۔ ’’ابھی نہیں ، ابھی میری ماں گدھ کی طرح کمرے میں منڈلا رہی ہو گی۔‘‘
مجھے یاد آتا ہے ا نے کہا تھا کہ اس کے گھر میں بھی کئی گدھ رہتے ہیں۔ میں خاموشی سے دروازہ کھولتا ہوں۔ نم آلود بو مجھ سے لپٹ جاتی ہے۔ میں آہستگی سے اندر داخل ہوتا ہوں۔ دیواروں کے ساتھ ساتھ کئی گدھ پروں میں سر دئیے اونگھ رہے ہیں ، میرے اندر جاتے ہی وہ پروں سے اپنی چونچیں باہر نکالتے ہیں۔ ان کی لمبی نکیلی چونچوں پر لہو جما ہوا ہے۔ جونہی میں کمرے کے وسط میں پہنچتا ہوں ، وہ مجھ پر ٹوٹ پڑتے ہیں اور میرا گوشت نوچنے لگتے ہیں۔ میں زمین پر گر پڑتا ہوں ، وہ شور مچاتے، پروں کو پھڑپھڑاتے مجھے نوچنے میں مصروف رہتے ہیں۔ میں دونوں ہاتھو ں سے انہیں پرے دھکیلنے کی کوشش کرتا ہوں لیکن میرے ہاتھ حرکت نہیں کرتے۔ رفتہ رفتہ مجھ پر غنودگی طاری ہونے لگتی ہے۔
اگلی صبح جب میں ہوٹل میں داخل ہوتا ہوں تو بیرا مسکرا کر مجھے دیکھتا ہے۔ میں اپنی خاص جگہ پر جا بیٹھتا ہوں۔ وہ بڑی نرمی سے میرے جسم پر رینگتی ہوئی آگ اتار لیتا ہے، مجھے سکون سا ملنے لگتا ہے۔
’’ہاں یہی میرا گھر ہے!‘‘ میں کرسی کی پشت سے ٹیک لگا کر سوچتا ہوں۔
کچھ دیر بعد ب آتا ہے اور تھکے ہوئے انداز سے کرسی پر گر پڑتا ہے، پھر اس کی نرمی محسوس کر کے ایک گہرا سانس لیتا ہے، ’’کیا سکون ہے یہاں۔۔۔ ہے نا؟‘‘ وہ میری طرف دیکھتا ہے۔
میں سر ہلاتا ہوں۔
’’پتہ نہیں کس بے وقوف نے کہا تھا کہ گھر جنت ہوتی ہے۔‘‘ وہ کچھ سوچتا رہتا ہے، پھر کہتا ہے۔۔۔ ’’یار ہم گھر سے اتنی نفرت کیوں کرتے ہیں ؟‘‘
’’ہاں واقعی‘‘۔۔۔ میں سوچنے لگتا ہوں۔
’’شاید اس لیے کہ وہاں گدھ رہتے ہیں۔۔۔ ہے نا ؟‘‘
’’شاید یہی وجہ ہو، یا شاید کچھ اور ہو۔‘‘
ہم بل منگاتے ہیں۔ پھر اپنی جیبیں ٹٹول کر چند سکے پلیٹ میں رکھ دیتے ہیں ، بیرا گنتا ہے، پھر بیس پیسے نکال کر میز پر رکھتے ہوئے کہتا ہے، ’’آج میں ٹپ نہیں لوں گا۔‘‘
ہم دونوں بیک وقت اس کی طرف دیکھتے ہیں۔
’’آج آپ کے پاس پیسے کم ہیں۔‘‘
میں کہتا ہوں۔۔۔ ’’لے لو یار ہماری خیر ہے۔‘‘
وہ نفی میں سر ہلاتا ہے۔۔۔ ’’نہ جی، آج آپ کے پاس پیسے نہیں ہیں۔‘‘
ب ٹپ کے پیسے جیب میں ڈال لیتا ہے اور مجھ سے کہتا ہے،’’میری ماں سے تو یہ بیرا ہی اچھا ہے۔‘‘ میں اس کی تائید کرتا ہوں۔۔۔ ’’بے شک یہ ہمارا باپ ہے، ہماری ماں ہے، ہمارا بھائی ہے اور یہ ہوٹل ہمارا گھر ہے۔‘‘
ہم دونوں باہر آ جاتے ہیں۔ سڑک روشنیوں کی رِم جھم میں نہا رہی تھی۔
ب کہتا ہے۔۔۔ ’’یار اگر میں ا ہوتا اور تم ب ہوتے تو کیا ہو جاتا؟‘‘
’’کچھ بھی نہیں ‘‘۔۔۔ میں جواب دیتا ہوں۔۔۔ ’’میری وِگ تمہارے سر پر ہوتی اور تمہاری وِگ میرے سر پر۔‘‘
’’یہ تو کوئی فرق نہ ہوا‘‘۔۔۔ وہ پریشان ہو جاتا ہے۔۔۔ ’’صرف وگیں بدلنے سے تو ہم الگ الگ نہیں ہو جاتے۔‘‘
ہم سوچ میں پڑ جاتے ہیں۔ بہت دیر بعد وہ پوچھتا ہے۔۔۔ ’’اگر میں ج ہوتا اور تم د ہوتے تو کیا ہوتا۔‘‘
’’اگر تم ج ہوتے تو تمہاری جیب میں دو کارڈ ہوتے، ایک دائیں بازو کا دوسرا بائیں بازو کا۔۔۔ اور اگر میںد ہوتا تو میری بیوی بھی ہر رات دیر سے گھر آنے پر میری عینک اتار لیتی اور مجھے خوب مارتی۔‘‘
ہم دونوں پریشان ہو جاتے ہیں۔
وہ کہتا ہے۔۔۔ ’’سمجھ میں نہیں آ رہا کہ اس بار بحث میں کون سا کارڈ استعمال کروں۔‘‘
میں کہتا ہوں۔۔۔ ’’بہت دیر ہو گئی ہے۔ میری بیوی آج بھی میری عینک اتار لے گی اور مجھے مارے گی۔‘‘
’’اب کیا کریں ؟‘‘
’’اب کیا کریں ؟‘‘
ہم ایک دوسرے کی طرف دیکھتے ہیں۔
دفعتاً ہمیں یاد آتا ہے کہ ہم تو ا اور ب ہیں۔
وہ کہتا ہے۔۔۔ ’’ہم تو خواہ مخواہ پریشان ہو جاتے ہیں۔ ہمارا نہ کوئی گھر ہے، نہ کوئی بیوی ہے اور نہ ہماری جیب میں کوئی کارڈ ہے۔‘‘
’’واقعی‘‘۔۔۔ میں کہتا ہوں۔۔۔ ’’ہم تو کچھ بھی نہیں ، صرف ا اور ب ہیں۔‘‘
وہ کہتا ہے۔۔۔ ’’چھوڑو اس بک بک کو۔۔۔ دیکھو کیا شاندار لڑکی ہے اور کیا جاندار ہے ہپ اس کی۔‘‘
میں کہتا ہوں۔۔۔ ’’کوئی شریف خاتون ہے۔‘‘
ب لال بھبھوکا ہو جاتا ہے۔۔۔ ’’تم یہ ایکٹنگ کس لیے کرتے ہو؟‘‘
میں سوچتا ہوں ، واقعی یہ اداکاری میں کس لیے کر رہا ہوں ، لوگ تو میری ایک ایک حرکت سے واقف ہیں ، کہیں میں اپنے آپ سے تو ڈرامہ نہیں کر رہا۔
ب کہتا ہے۔۔۔ ’’یار ا ! تم بھی زبردست ایکٹر ہو، تمہارا تو کہیں مجسمہ نصب کرانا چاہئے تا کہ آنے والی نسلیں تمہارے کارناموں سے آگاہ ہو سکیں۔‘‘
میں خاموش رہتا ہوں۔
وہ کہتا ہے۔۔۔ ’’اور سچی بات ہے تمہاری تاج پوشی بھی ہونا چاہئے، ٹھیک ہے نا؟‘‘
میں سر ہلاتا ہوں۔
دھیرے دھیرے روشنی سمٹنے لگتی ہے اور تاریکی سونگھتی ہوئی ہماری طرف بڑھنے لگتی ہے۔
میں کہتا ہوں۔۔۔ ’’صبح وہ ملی تھی۔‘‘
’’کون؟‘‘۔۔۔ وہ چونکتا ہے۔
’’وہی نیلے سوٹ والی جو اس دن فنکشن میں آئی تھی۔‘‘
’’پھر۔۔۔ ‘‘
’’بس باتیں کرتی رہی، میں نے کل اسے چائے پر بلایا ہے۔‘‘
اس کی بانچھیں کھل جاتی ہیں۔ ہم دونوں پھر ہوٹل میں آ جاتے ہیں۔
میں کہتا ہوں۔۔۔ ’’میں اسے یہاں نہیں لانا چاہتا، کوئی اور جگہ بتاؤ۔‘‘
وہ میری آنکھوں میں جھانکتے ہوئے پوچھتا ہے۔۔۔ ’’مال کتنا ہے؟‘‘
’’بیس۔‘‘
وہ اپنی جیب سے مختلف ہوٹلوں کے مینو نکال کر میز پر پھیلا دیتا ہے، پھر باری باری ایک ایک کو پڑھتا ہے اور نفی میں سر ہلا کر دوسری طرف رکھ دیتا ہے۔ کچھ دیر بعد وہ ایک مینو الگ نکال لیتا ہے اور اسے بغور پڑھتے ہوئے کہتا ہے،’’یہ ٹھیک رہے گا۔‘‘
میں مینو اس کے ہاتھ سے لے کر ہوٹل کا نام پڑھنے لگتا ہوں۔ وہ مینو میرے ہاتھ سے لیتا ہے اور کہتا ہے، ’’دو دروازے ہیں اس ہوٹل کے، تم دوسرے دروازے سے جانا اور بائیں طرف جو کیبن ہیں نا، ان میں بیٹھنا۔‘‘
میں سر ہلاتا ہوں۔
اگلے دن اس کا انتظار کرتے ہوئے مجھے اپنا آپ اس شکاری کی طرح محسوس ہوتا ہے جو جال لگائے بیٹھا ہو۔ کچھ دیر بعد وہ آ جاتی ہے۔
ہم چپ چاپ ہوٹل میں چلے جاتے ہیں۔
میں چند لمحے اسے غور سے دیکھتا رہتا ہوں ، پھر کہتا ہوں ، ’’تمہیں معلوم ہے تمہیں یہاں کیوں لایا ہوں ؟‘‘
’’باتیں کرنے‘‘۔۔۔ وہ ہنس کر کہتی ہے۔
’’میں تمہیں قتل کرنے کے لیے یہاں لایا ہوں۔‘‘
’’جی!‘‘۔۔۔ وہ چونکتی ہے۔
’’میں تمہیں یہاں قتل کرنے کے لیے لایا ہوں کیونکہ میں قصائی ہوں۔‘‘
’’جی!‘‘ حیرت اس کے لبوں سے لٹکنے لگتی ہے۔
’’میں سچ کہہ رہا ہوں ، میں قصائی ہوں۔ ب بھی قصائی ہے۔ ج اور د بھی۔۔۔ ا سے ی تک ہم سب قصائی ہیں۔‘‘
’’آپ کی طبیعت تو ٹھیک ہے نا؟‘‘۔۔۔ وہ تشویش اور ہمدردی سے مجھے دیکھتی ہے۔
’’میں بالکل ٹھیک ہوں۔۔۔ اور دیکھو میری جیب میں چھرا بھی ہے۔‘‘
’’چھرا‘‘۔۔۔ خوف اس کے سارے چہرے پر بہنے لگتا ہے۔
’’ہاں چھرا۔۔۔ میں تمہیں دکھاتا ہوں۔‘‘
میں اپنی جیبیں ٹٹولتا ہوں۔
وہ خوف زدہ ہو کر باہر بھاگ جاتی ہے۔
بیرا چائے لیے اندر آتا ہے اور کہتا ہے۔۔۔ ’’بیگم صاحبہ کو کیا ہوا؟‘‘
میں کہتا ہوں۔۔۔ ’’وہ قتل ہونے سے بچنا چاہتی ہے، لیکن کوئی نہ کوئی اسے ضرور قتل کر دے گا۔ باہر ب چھرا لیے کھڑا ہو گا۔ اس سے بچ گئی تو ج چوک پر ہو گا۔ اس سے بھی بچ گئی تو د ہو گا۔ا سے ی تک آخر وہ کس کس سے بچے گی۔‘‘
مجھے محسوس ہوتا ہے کہ ہم سب قاتل ہیں۔
میں باہر آتا ہوں۔
اردگرد پھرتے ہوئے لوگوں کی جیبوں سے چھرے جھانک رہے تھے۔ مجھے ان کے ہاتھوں اور چہروں پر خون جما ہوا نظر آتا ہے۔ میں نے اپنے اندر ایک ڈریکولا چھپایا ہوا ہے۔ میرے قریب سے ایک لڑکی گزرتی ہے۔ میرے اندر کا ڈریکولا پھڑ پھڑ کر باہر نکلتا ہے اور لڑکی پر جھپٹتا ہے۔ وہ چیخیں مارتی بھاگ جاتی ہے۔ میں گھبرا کر چاروں طرف دیکھتا ہوں کہ کسی نے مجھے دیکھا تو نہیں ، لیکن میرے چاروں طرف ہر شخص اپنے ڈریکولا کو چھپانے کی فکر میں ہے۔
میں ہنستا ہوں۔۔۔ ’’سب ٹھیک ہے، ہم سب ایک ہی جیسے ہیں۔‘‘
کچھ دیر بعد جب میں ب کو ساری بات بتاتا ہوں تو غصے سے اس کے نتھنے پھول جاتے ہیں۔ وہ جنگلی سؤر کی طرح اچھل کر میرا گریبان پکڑ لیتا ہے اور چیختے ہوئے کہتا ہے۔۔۔ ’’تم تو بہت ایماندار بنتے ہو، لیکن اندر سے تم پکے حرامزادے ہو۔‘‘
میں سر ہلاتا ہوں۔۔۔ ’’ممکن ہے یہ ٹھیک ہو۔‘‘
’’ممکن نہیں۔۔۔ تم واقعی ہو۔‘‘ وہ چیختا ہے۔
میں کندھے جھٹکتا ہوں۔۔۔ ’’میں کیا کروں ؟ اسے دیکھ کر مجھے اپنی ماں یاد آ گئی تھی۔‘‘
’’تمہاری ماں کی۔۔۔ ‘‘ وہ میری ماں کو بے تحاشا گالیاں دیتا ہے، پھر کہتا ہے۔۔۔ ’’تمہارا صرف ایک ہی علاج ہے۔‘‘
’’وہ کیا؟‘‘
’’تمہاری ماں مر جائے۔‘‘
’’لیکن کیسے؟‘‘ میں پوچھتا ہوں ، ’’میری زندگی میں تو یہ ممکن نظر نہیں آتا، وہ تو میرے لہو کا آخری قطرہ پی کر مرے گی۔‘‘
وہ جو اب نہیں دیتا، سوچتا رہتا ہے، پھر طویل وقفے کے بعد کہتا ہے۔۔۔ ’’آؤ مل کر دعا کریں۔‘‘
غیر شعوری طور پر ہمارے ہاتھ اٹھ جاتے ہیں۔
’’لیکن دعا مانگیں کس سے؟‘‘ ہم ایک دوسرے سے پوچھتے ہیں۔
اور ہمارے ہاتھ خود بخود نیچے گر پڑتے ہیں۔
ہم ہوٹل میں آ جاتے ہیں۔ میز کے گرد ج۔ د۔ س۔ ی۔ سبھی بیٹھے ہوئے ہیں۔ بحث زوروں پر ہے۔ زبان کی کمانوں سے لفظ اُڑ اُڑ کر ایک دوسرے کو زخمی کرتے ہیں۔ اخلاق، دیانتداری، حبّ الوطنی۔۔۔ لفظوں کا ایک سیلاب مجھے اپنے ساتھ بہائے لیے جاتا ہے۔ میں خاموشی سے بیٹھا سوچتا ہوں ، ’’لفظ کھوکھلے کیوں ہو گئے ہیں ؟‘‘
دفعتاً میں اچھل کر کھڑا ہو جاتا ہوں۔۔۔ ’’تم سب بکواس کرتے ہو۔‘‘
سب چپ ہو جاتے ہیں اور حیرت سے میری جانب دیکھتے ہیں۔ ب مجھے کرسی پر گھسیٹ لیتا ہے۔
’’کیا تکلیف ہے تمہیں ؟‘‘
’’تم سب فراڈ ہو۔‘‘
وہ ایک دم پیچھے ہٹ جاتے ہیں۔
ب کہتا ہے۔۔۔ ’’فکر کی کوئی بات نہیں ، تازہ ہوا میں جا کر ابھی ٹھیک ہو جائے گا۔‘‘
میں کہتا ہوں۔۔۔ ’’میں باہر نہیں جاؤں گا۔‘‘
وہ مجھے اٹھا کر سڑک پر لے جاتے ہیں۔ رفتہ رفتہ میں ٹھیک ہونے لگتا ہوں ، ہم چلتے رہتے ہیں رات کی سیاہی کے ساتھ ساتھ ایک ایک پل ٹوٹتا رہتا ہے۔ میں اور ب اکیلے رہ جاتے ہیں۔
اگلے چوک پر ب رک جاتا ہے اور کہتا ہے۔۔۔ ’’بہت دیر ہو گئی۔ اب میں اپنی قبر کی طرف جاتا ہوں۔‘‘
اس کے جانے کے بعد میں سوچتا ہوں ، ہماری قبریں اتنی دور دور کیوں ہیں ، لیکن میری قبر تو میرے ساتھ ہے۔ میں اپنے جسم پر ہاتھ پھیرتا ہوں ، میری قبر نے مجھے چاروں طرف سے لپیٹا ہوا ہے۔ چاروں طرف قبریں ہی قبریں ہیں۔ مجھے خیال آتا ہے، ب اب اپنی قبر کے قریب ہو گا، لیکن قبر کیوں ؟ وہ تو اس کا گھر ہے۔ ب گھر سے اتنا ناراض کیوں ہے؟ گھر اسے قبر کیوں نظر آتا ہے؟ میں ماں کے مرنے کی دعائیں کیوں مانگتا ہوں۔۔۔ ؟
چیزیں الجھنے لگتی ہیں ، گھر قبر کیوں بن گئے ہیں ؟ ہوٹل گھر کیوں ہو گئے ہیں ؟ مجھے کوئی جواب نہیں سوجھتا۔
ب ذہنی طور پر صحت مند ہے، کام کرتا ہے، پھر بھی اس کا گھر قبر ہے۔
کہیں نہ کہیں خرابی ضرور ہے، میں اشیا کو ایک دوسرے کے ساتھ جوڑنے کی کوشش کرتا ہوں ، لیکن ہر بار کوئی نہ کوئی رخنہ رہ جاتا ہے اور ب اس رخنہ سے باہر کھسک جاتا ہے۔ میں جھنجھلا کر ب کو پرے جھٹک دیتا ہوں۔
’’میں کیا ہوں ؟‘‘۔۔۔ میں خود سے سوال کرتا ہوں۔
میں کتنی خوبی سے ڈگڈگی بجاتا ہوں۔۔۔ ڈگڈگی تو ب بھی بجاتا ہے۔ دفعتاً مجھے خیال آتا ہے۔ ب ڈگڈگی تو واقعی خوب بجاتا ہے، لیکن سانپ کہاں ہے؟ وہ تو کبھی نکلا ہی نہیں۔ مجھے یاد آتا ہے ا نے جاتے وقت مجھے ایک پٹاری دی تھی اور کہا تھا کہ اس میں سانپ ہے، اسے کبھی نہ کھولنا۔ میں کانپتے ہوئے ہاتھوں سے اس کا ڈھکن اتارتا ہوں۔ سانپ پٹاری کے فرش پر بے حرکت پڑا ہے۔ میں پٹاری ہلاتا ہوں ، وہ ایک طرف جا پڑتا ہے۔ میں ڈرتے ڈرتے انگلی سے اسے چھوتا ہوں۔
مجھے ہنسی آ جاتی ہے۔۔۔ میں ہنستے ہنستے دہرا ہو جاتا ہوں۔
پٹاری میں سانپ کی بجائے ریشمی رسّی ہے۔
اب سمجھ میں آتا ہے کہ ا اپنا جسم مجھے کیوں دے گیا تھا؟ شاید اسے معلوم ہو گیا تھا کہ اس کی پٹاری میں سانپ نہیں۔ا سی لیے اسے گھر قبر اور ہوٹل گھر محسوس ہوتا تھا۔ تو کیا ب کی پٹاری میں بھی سانپ نہیں ، ج، د،س،ی، کسی کی پٹاری میں سانپ نہیں ؟
سب یونہی ڈگڈگی بجا رہے ہیں۔
میں ہنستے ہنستے سڑک پر لیٹ جاتا ہوں۔
اگلی صبح میں ب سے کہتا ہوں۔۔۔ ’’مجھے معلوم ہو گیا ہے کہ ہم سب کو کیا بیماری ہے۔‘‘
’’کیا ؟‘‘۔۔۔ وہ تجسّس سے آگے کھسک آتا ہے۔
’’ہم سب اندر سے کھوکھلے ہیں ، ہماری پٹاریوں میں سانپ ہے ہی نہیں۔‘‘
’’تمہیں کیسے معلوم ہوا؟‘‘ وہ میرے سامنے آ جاتا ہے۔
’’میں نے اپنی پٹاری کھول کر دیکھی ہے۔‘‘
وہ اچھل کر میرا گریبان پکڑ لیتا ہے اور کہتا ہے۔۔۔ ’’تم کون ہو؟‘‘
’’میں۔۔۔ میں ا ہوں ‘‘۔۔۔ میں گھبرا کر کہتا ہوں۔
’’تم ا نہیں ‘‘۔۔۔ وہ خونخوار نظروں سے مجھے ٹٹولتا ہے۔۔۔ ’’سچ بتاؤ تم کون ہو؟‘‘
’’میں۔۔۔ میں ا ہوں ‘‘۔۔۔ خوف مجھے اپنی مٹھی میں جکڑ لیتا ہے۔
’’نہیں تم ا نہیں ہو سکتے، ا کبھی اپنی پٹاری کھولنے کی جرأت نہیں کر سکتا، تم کوئی اور ہو۔‘‘
میں ہتھیار ڈال دیتا ہوں۔۔۔ ’’ہاں میں ا نہیں۔‘‘
وہ خونخوار نظروں سے مجھے ٹٹولنے کی کوشش کرتا ہے۔
’’میں ا نہیں ‘‘۔۔۔ میں اسے بتاتا ہوں۔۔۔ ’’ایک رات ا اپنا جسم مجھے دے گیا تھا، میں نے اس سے وعدہ کیا تھا کہ میں یہ راز کسی کو نہ بتاؤں گا، ب کو بھی نہیں۔‘‘
وہ کھلکھلا کر ہنستا ہے۔
میں حیرانی سے اسے دیکھتا ہوں۔۔۔ ’’اس میں ہنسنے کی کیا بات ہے؟‘‘
وہ ہنستا ہی چلا جاتا ہے، پھر کہتا ہے۔۔۔ ’’تمہارے خیال میں مَیں ب ہوں ؟‘‘
مجھے لفظ نہیں سوجھتے۔۔۔ ’’تو تم بھی۔۔۔ ‘‘
وہ ہنستے ہنستے مجھ پر گر پڑتا ہے۔ میں اسے دیکھے چلا جاتا ہوں۔ وہ سر ہلاتا ہے۔۔۔ ’’ب بھی ایک رات اپنا جسم مجھے دے گیا تھا۔‘‘
اس کا مطلب ہے، ج۔ د۔ س۔ا سے ی تک سبھوں کے جسموں میں دوسرے رہ رہے ہیں۔
مجھے محسوس ہوتا ہے، میرے چاروں طرف خالی پیپے لڑھک رہے ہیں ، سڑکوں ، گلیوں ، گھروں ، ہوٹلوں۔۔۔ ہر جگہ خالی پیپے بج رہے ہیں۔
کھوکھلا پن۔۔۔ کھوکھلا پن۔
ب ہنس رہا ہے، میں ہنسنے لگتا ہوں۔
ب لہک لہک کر گاتا ہے۔
ہم سب گنہگار ہیں۔
سب بے ایماں ہیں۔
سب ہیں منافقت کے سمندر کی مچھلیاں !
٭٭٭

پھیکی مٹھاس کا تسلسل

سنسان راستوں پر موت دبے پاؤں ہمارا تعاقب کرتی ہے۔
اور بڑھاپا قطرہ قطرہ ہم پر گرتا ہے۔
میں اور وہ ہر صبح جب آدم جی روڈ سے گزرتے ہیں تو ٹھیک سات بج کر پچاس منٹ پر ہلکے بادامی رنگ کی ایک گاڑی ہمارے قریب سے گزرتی ہے۔ گاڑی کی پچھلی نشست پر بیٹھی ہوئی ایک خوش شکل لڑکی، جس نے بڑے بڑے شیشوں کی کالی عینک پہنی ہوتی ہے، ہمیں دیکھ کر مسکراتی اور ہاتھ ہلاتی ہے۔ ہم اس کے بارے میں کچھ نہیں جانتے کہ وہ کون ہے؟ نہ ہی وہ ہمارے بارے میں کچھ جانتی ہے۔ اس ایک لمحہ کی تکون پر ہم ایک دوسرے کے سامنے آتے ہیں اور دوسرے لمحے کی بانہیں پھیلنے اور آنکھیں کھلنے سے پہلے پہلے متضاد سمتوں میں لڑھک جاتے ہیں ، لیکن اس کی مسکراہٹ ہمیں گود میں لیے، لوریاں دیتی ایک مقدس امانت کی طرح ایک لمحے سے دوسرے لمحے کے سپرد کرتی چلی جاتی ہے۔ ہم اپنی کمروں کے گرد لپٹے ہوئے سرخ کپڑے کھولتے ہیں ، جھاڑتے ہیں اور باڑے کے بڑے دروازے میں داخل ہو جاتے ہیں۔ بیل باڑے کے درمیانی پول میں ، نتھنے پھلائے کبھی ایک دیوار اور کبھی دوسری دیوار سے اپنا جسم رگڑتا ہے۔ ہمارے قدموں کی چاپ سن کر اس کے منہ سے کف بہنے لگتا ہے۔ درمیانی پول کے قریب پہنچ کر ہم ایک دوسرے کی آنکھوں میں لہراتی نمی کی تحریر پڑھتے ہیں اور کچھ کہے بغیر متضاد سمتوں کی طرف جا کر پول کے دروازے کھول دیتے ہیں۔ پھر ہم ان کھلے دروازوں میں کھڑے ہو کر اپنے اپنے سرخ کپڑوں کو فضا میں لہراتے ہیں۔ بیل اس ایک لمحہ کی گرفت میں آ کر ساکت ہو جاتا ہے اور باری باری ہم دونوں کو دیکھتا ہے۔ پھر اس کا جسم اس گرفت سے دھیرے دھیرے باہر نکلتا ہے، وہ سموں سے زمین کریدتے کریدتے دو قدم میر ی طرف بڑھتا ہے، رک جاتا ہے۔ دو قدم اس کی طرف بڑھتا ہے، رک جاتا ہے۔
کل رات وہ واپس آگیا۔
کئی دن پہلے اس نے رنگوں کی پیالی میں چھپ کر بیٹھی ہوئی لڑکی کے لیے خودکشی کر لی تھی، میں اس کی لاش کو کیلنڈر میں لپیٹ کر اس کی دیوار پر ٹانک آیا تھا، بہت دنوں بعد ایک دن وہ اپنی رنگوں کی پیالی سے باہر نکلی اور دیوار پر لٹکے ہوئے کیلنڈر کی تاریخ بدلنے لگی تو اس کی لاش زمین پر گر پڑی۔ پھر ہم نے مل کر اسے قبر میں دفن کیا اور اس کی قبر پر یہ کتبہ لگایا کہ یہاں وہ سو رہا ہے، جس نے رنگوں کی پیالی کی تہہ میں جھانکنے کی کوشش کی تھی، لیکن اس کا پاؤں پھسل گیا اور وہ اسی پیالی میں ڈوب کر مر گیا۔ اس کے مرنے کے بعد وہ تمام سڑکیں ، کیفے اور محفلیں سونی ہو گئیں ، جہاں ہم دونوں جایا کرتے تھے۔ اب شام کا دھند لکا پھیلتے ہی رات سمٹ جاتی ہے اور گھر اپنی بانہیں پھیلا کر مجھے دبوچ لیتا اور کمرے میں دھکیل دیتا ہے۔ کمرے کی دیواروں سے چپکی ہوئی اداسی اپنی زردی قطرہ قطرہ مجھ پر انڈیل دیتی ہے اور میں کتابوں کے ورق اوڑھ کر تنہائی کو چپکے چپکے اپنے اندر اتارتا رہتا ہوں۔
لیکن کل رات وہ واپس آگیا۔
میں کمرے میں اگی ہوئی اداسی اور تنہائی کی فصلیں کاٹ رہا تھا کہ وہ دبے پاؤں اندر آیا اور ہوا کے جھونکے کی طرح میری بغل میں سے ہوتا ہوا میرے سامنے آ کھڑا ہوا۔
’’تم۔۔۔ ‘‘ حیرت میرے لبوں سے چمٹ گئی اور لفظ تالو کے تالاب میں ڈبکیاں کھانے لگے۔
’’ہاں میں۔۔۔ ‘‘ اس نے شانے اچکائے، ’’میں اکتا گیا ہوں وہاں سے، شام ہوتے ہی سنسنی پھیل جاتی ہے۔‘‘
’’تو پھر۔۔۔ ‘‘
’’میں رات کو یہاں رہا کروں گا اور صبح ہوتے ہی چلا جایا کروں گا۔‘‘اور میرے جواب کا انتظار کئے بغیر ہی اس نے اپنا کفن اتارا اور بستر میں گھس گیا۔
اور اب وہ ہر رات، جب ساری چیزیں سیاہی کی بکل میں دبک جاتی ہیں ، چپ چاپ آتا ہے اور صبح کسی کے جاگنے سے پہلے پہلے چلا جاتا ہے۔ میں جب آدھے بستر پر اس کے پہلو میں لیٹتا ہوں تو اس کے جسم سے نکلتی مشک کافور اور عرق گلاب کی ملی جلی خوشبو مجھے اپنے اندر سمیٹ لیتی ہے۔ میں دھیرے دھیرے، رک رک کر اپنی انگلیوں سے اس کے جسم کو ٹٹولتا ہوں ، اس کے جسم پر رینگتی ٹھنڈک میری انگلیوں کو اپنے اندر کھینچتے لگتی ہے، خوف قطرہ قطرہ مجھ پر گرتا ہے۔ میں جلدی سے منہ موڑ لیتا ہوں ، میری پیٹھ اس کی پیٹھ سے ٹکراتی ہے۔ رینگتی ٹھنڈک پھسلنے لگتی ہے، میں اپنے آپ کو سمیٹ لیتا ہوں اور فاصلے کا دائرہ ہم دونوں کے درمیان پھیلتا چلا جاتا ہے۔
بیل مٹی کو اپنے سموں تلے روندتا دوڑا چلا آ رہا ہے، سرخ کپڑے سے کچھ فاصلے پر رُک جاتا ہے۔ نتھنے پھلا پھلا کر ہوا میں چھپے ہوئے لمس کو سونگھتا ہے، سینگوں کو گیلی مٹی سے رگڑتا ہے، پھر یک دم سیدھا ہو کر دوڑتا ہوا کپڑے میں گھس جاتا ہے۔ میرا جسم اچھل کر دیوار سے ٹکراتا اور رگڑ کھاتا ہوا زمین پر گر پڑتا ہے۔ میں تیزی سے پہلو بدل کر سیدھا ہوتا ہوں اور بیل کے مڑنے سے پہلے پہلے اس کے سینگوں سے لپٹا ہوا سرخ کپڑا کھینچ لیتا ہوں۔ بیل اپنے سموں پر پہلو بدلتا ہے، نتھنے پھلاتا اور ہوا کو سونگھتا ہے، پھر دھیرے دھیرے اپنی جگہ لوٹ جاتا ہے۔ چند لمحے خاموش کھڑا رہتا ہے، پھر آہستگی سے دوسری طرف مڑتا ہے، جہاں وہ سرخ کپڑا لیے وقت کی بانہوں میں پھڑپھڑا رہا ہے۔
ب مجھ سے پوچھتا ہے۔۔۔ ’’سارا دن اونگھتے رہتے ہو، رات کو کیا کرتے ہو؟‘‘
’’کچھ بھی نہیں۔۔۔ کچھ بھی نہیں۔‘‘ میں لفظوں کو جلدی سے اس پر انڈیل دیتا ہوں۔ میں اسے کیسے بتاؤں کہ مجھے ہر رات اس کے یخ جسم کے ساتھ، جس میں سے مشک کافور اور عرق گلاب کی ملی جلی خوشبو اٹھتی رہتی ہے، شراکت کرنا پڑتی ہے۔ یہ بات میں اپنی ماں کو بھی نہیں بتا سکتا، جو ہر صبح مجھ سے پوچھتی ہے کہ میں روز رات کو کس سے باتیں کرتا ہوں۔
میں نے اس سے کہا بھی تھا کہ ’’اب یہ کاروبار زیادہ دن تک نہیں چل سکے گا۔‘‘
’’کیوں ؟‘‘ اس نے مڑے بغیر پوچھا۔
’’میری ماں کو شک ہو گیا ہے، کہتی ہے رات کو تم کس سے باتیں کرتے ہو؟‘‘
’’پھر۔۔۔ ‘‘ وہ تیزی سے مڑا اور ہمارے درمیان پھیلی ہوئی ہوا کی تہہ کھل گی۔ اس کے جسم کی ٹھنڈک سرک کر میرے نیچے پھیل گئی۔
’’پھر کیا۔۔۔ ‘‘میں نے جسم کو سمیٹتے اور اس کے جسم سے رستی ٹھنڈک کو پرے کھسکاتے ہوئے کہا۔
’’میں نے اسے ٹال تو دیا ہے، لیکن اسے یقین نہیں آیا، اگر کسی دن ماں کمرے میں آ گئی تو دونوں کو گھر سے نکال دے گی۔‘‘
خاموشی دھند کی طرح سارے کمرے میں پھیل گئی۔
میں نے کہا۔۔۔ ’’یوں نہیں ہو سکتا کہ تم واپس چلے جاؤ۔‘‘
کہنے لگا۔۔۔ ’’بالکل نہیں ، مجھے وہاں وحشت ہوتی ہے۔‘‘ پھر میرے قریب کھسکتے ہوئے بولا، ’’اور یہ تمہارا قصور ہے، تم نے مجھے ایسے واہیات قبرستان میں کیوں دفن کیا؟‘‘
میں نے کہا۔۔۔ ’’یہ تمہاری ماں کی تجویز تھی۔ کہتی تھی، یہ قبرستان گھر سے قریب ہے، آنے جانے میں آسانی ہو گئی۔‘‘
وہ کھلکھلا کر ہنس پڑا اور ہنستا ہی چلا گیا۔
میں نے پوچھا۔۔۔ ’’کیا ہوا؟‘‘
کہنے لگا۔۔۔ ’’وہ زندگی بھر مجھے الّو بناتی رہی ہے، لیکن اب میں نے اسے بے وقوف بنا یا ہے۔‘‘
میری آنکھوں میں اگتا ہوا سوال چھلک پڑا۔
کہنے لگا۔۔۔ ’’وہ میری قبر پر جا کر فاتحہ پڑھتی اور آنسو بہاتی ہے، لیکن اسے معلوم نہیں کہ میں تو اس میں موجود ہی نہیں۔‘‘
پھر میرے کندھے پر ہاتھ رکھتے ہوئے بولا۔۔۔ ’’کہیں اسے بتا نہ دینا، ورنہ وہ میری تلاش میں قبرستان کی ایک ایک قبر کھدوا دے گی اور وہاں بہت سی قبروں میں کوئی ہے ہی نہیں۔‘‘
اب بیل اس کی طرف دوڑ رہا ہے، اس کے قریب پہنچ کر سرخ کپڑے کو سونگھتا ہے، پھر اس کی بغل میں سے ہوتا ہوا دوسری جانب نکل جاتا ہے، اس کا جسم فضا میں اچھلتا باڑے کی دیوار سے ٹکراتا اور پھر زمین پر آ گرتا ہے۔ بیل اپنے سموں پر آدھے دائرے کا چکر مکمل کرتا ہے۔ وہ بیل کو دوبارہ اپنی طرف بڑھتے دیکھ کر کہنیوں کے بل اٹھنے کی کوشش کرتا ہے، لیکن منہ کے بل زمین سے جا لگتا ہے۔ بیل اچھل کر اسے ٹکر مارتا ہے اور اسے سینگوں پر اٹھا کر دیوار کے ساتھ ساتھ دوڑنے لگتا ہے۔ خون کی لکیر دیوار کے سائے کو چاٹتی ہوئی اس کے ساتھ ساتھ دوڑنے لگتی ہے۔
میں نے کہا۔۔۔ ’’اب تو کچھ نہ کچھ کرنا ہی پڑے گا۔ معاملہ بہت خراب ہو گیا ہے۔‘‘
’’کیا ہوا؟‘‘ وہ اپنے حصے کے آدھے بستر پر پھیلتے ہوئے بولا۔
’’میری ماں کو یقین ہو گیا ہے، میرا خیال ہے وہ کل دروازے سے کان لگا کر سنتی رہی ہے۔‘‘ میں نے بستر پر بیٹھتے ہوئے کہا۔
اس کے ساتھ آدھے بستر پر لیٹتے ہوئے ہمیشہ یہ احساس ہوتا ہے کہ کسی نے مجھے مشک کافور کی ٹکیہ میں لپیٹ دیا ہے، میں جلدی جلدی اپنا ریپر اُتارتا ہوں اور منہ دوسری طرف کر کے لمبے لمبے سانس لینے لگتا ہوں ، لیکن جب سے وہ آیا ہے، کمرے کی ہوا بہت بھاری ہو گئی ہے۔ لگتا ہے جیسے ہوا کی بجائے پورا کمرہ میرے اندر چلا گیا ہے۔ ساری چیزیں الٹ پلٹ ہو جاتی ہیں ، شیلف اوندھے جا پڑتے ہیں اور کتابوں کے ورق اپنا دامن جھٹک جھٹک کر لفظ جھاڑنے لگتے ہیں ، میں اپنے منہ میں ہاتھ ڈال کر ایک ایک چیز کو باہر نکالتا ہوں ، کمرے کو باہر کھینچتا ہوں ، لیکن اس کے جسم کو اندر ہی رہنے دیتا ہوں۔ پھر میں کمرے کو اچھی طرح جھاڑتا ہوں ، صاف کرتا ہوں اور ایک ایک چیز کو اپنی جگہ رکھتا ہوں ، لیکن جب میں بستر پر لیٹنے لگتا ہوں تو وہ میرے منہ سے نکل کر بستر پر آ گرتا ہے اور اپنے حصے کا آدھا بستر مانگتا ہے۔۔۔ ؟
میں اسے کہتا ہوں۔۔۔ ’’کیا یہ نہیں ہو سکتا کہ تم کوئی اور قبر تلاش کر لو؟‘‘
وہ کندھے جھٹکتا ہے۔
میں کہتا ہوں۔۔۔ ’’تو پھر یوں کرتے ہیں کہ میں تمہیں کیلنڈر میں لپیٹ کر اسی لڑکی کے کمرے کی دیوار پر ٹانک آتا ہوں ، جسے تم بہت چاہتے ہو۔‘‘
وہ کچھ دیر سوچتا رہتا ہے، پھر کہتا ہے۔۔۔ ’’لیکن اگر اس نے پھر تاریخ بدلنے کے لیے کیلنڈر کھول لیا تو۔۔۔ ؟‘‘
میں کہتا ہوں۔۔۔ ’’میں تمہیں نیچے گرنے سے پہلے پہلے دوبارہ اسی کیلنڈر میں لپیٹ دوں گا۔‘‘
وہ رضامند ہو جاتا ہے۔
ہم اندھیرے کا کمبل اوڑھ کر باہر نکلتے ہیں اور چپ چاپ سنسان گلیوں کا وظیفہ کرتے ہیں ، اس کے گھر پہنچ کر میں آہستگی سے اس کے کمرے کا دروازہ کھولتا ہوں۔ وہ گہری نیند میں مسکرا رہی ہے۔ میں دیوار پر لٹکے ہوئے کیلنڈر میں اسے لپیٹ کر خاموشی سے باہر نکل آتا ہوں۔
جب میں کمرے میں لوٹتا ہوں تو اداسی کی گرد تہہ بہ تہہ چیزوں پر جم چکی ہے، اس کے حصہ کا آدھا بستر بانہیں پھیلا کر اسے پکارتا ہے۔ میں پائنتی پر بیٹھ جاتا ہوں اور اس کے حصے کے آدھے بستر پر ہاتھ پھیرنے لگتا ہوں۔ اسی وقت دروازے پر ہولے ہولے دستک ہوتی ہے، میں دروازہ کھولتا ہوں۔
وہ دہلیز سے لگا کھڑا ہے۔
’’تم۔۔۔ ‘‘
وہ شانے جھٹکتا ہے۔ پھر میری بغل میں سے ہو کر اندر آتا اور اپنے حصے کے آدھے بستر پر گر پڑتا ہے۔
میں دروازہ بند کر کے اس کی طر ف مڑتا ہوں ، ’’اب کیا ہوا؟‘‘
وہ چپ چاپ مجھے دیکھتا رہتا ہے۔
میں کہتا ہوں۔۔۔ ’’اس نے پھر تاریخ بدل لی؟‘‘
وہ نفی میں سر ہلاتا ہے۔
’’پھر کیا ہوا؟ کچھ کہو بھی۔‘‘ میں جھنجھلا جاتا ہوں۔
وہ خاموشی سے بِٹ بِٹ مجھے دیکھے چلا جاتا ہے، پھر کہتا ہے۔۔۔ ’’اس کیلنڈر میں کوئی اور بھی ہے۔‘‘
’’کیا مطلب؟‘‘ میں چونکتا ہوں۔
وہ مجھے دیکھتا رہتا ہے، پھر کھلکھلا کر ہنس پڑتا ہے۔
’’مطلب یہ کہ اس کیلنڈر میں میری طرح کوئی اور بھی لپٹا ہوا ہے، میں نے سوچا، شراکت کر کے ہی رہنا ہے، تو پھر تمہارے پاس کیوں نہ رہا جائے؟‘‘
میں خاموش کھڑا اسے دیکھتا رہتا ہوں۔
وہ کہتا ہے۔۔۔ ’’آ جاؤ۔ تمہارے حصے کا بستر تمہیں بلا رہا ہے۔‘‘
میں کچھ کہے بغیر اپنے حصے کے آدھے بستر پر لیٹ جاتا ہوں۔ اس کے جسم سے رستی ٹھنڈک میرے گرد لپٹنے لگتی ہے اور مشک کافور اور عرق گلاب کی ملی جلی خوشبو کی چادر تن جاتی ہے۔ میر ی پیٹھ اس کی پیٹھ سے مَس ہوتی ہے، ایک لمحہ کے لیے اس کے جسم کی ساری ٹھنڈک میرے اندر داخل ہو جاتی ہے، میں زور زور سے سانس لے کر آنکھیں بند کر لیتا ہوں۔
بیل ایک سینگ پر اسے اٹھائے اب میری طرف مڑتا ہے، میں خود کو ایک طرف کرنے کی کوشش کرتا ہوں ، لیکن میرا کپڑا اس کے سینگ میں الجھ جاتا ہے، بیل کپڑے سمیت آگے نکل جاتا ہے۔ پھر رکتا ہے اور مڑ کر مجھے دیکھنے لگتا ہے۔ اس کے ایک سینگ میں اس کا جسم پرویا ہوا ہے اور اس کا سرخ کپڑا اس کے جسم کے ساتھ لٹک رہا ہے، دوسرا سینگ خالی ہے۔ میں دائرے کے بیچوں بیچ تنہا کھڑا ہوں ، خون کی لکیر میرے گرد اپنی بانہیں سمیٹ رہی ہے۔ بیل سموں سے زمین کریدتا ہوا میری طرف بڑھتا ہے، پھر جھک کر میرے پیٹ پر اپنا دوسرا سینگ مارتا ہے اور میر ے جسم کو اس میں پرو کر سیدھا ہو جاتا ہے۔ ہم دونوں اس کے دونوں سینگوں میں پروئے ہوئے ہیں ، سرخ کپڑے ہمارے جسموں کے ساتھ لٹک رہے ہیں اور پیاسی زمین اچھل اچھل کر بہتے لہو کو چاٹ رہی ہے۔
ہم ہر روز صبح جب آدم جی روڈ سے گزرتے ہیں تو ٹھیک سات بج کر پچاس منٹ پر ہلکے بادامی رنگ کی ایک گاڑی ہمارے قریب سے گزرتی ہے۔ گاڑی کی پچھلی نشست پر بیٹھی ہوئی ایک خوش شکل لڑکی، جس نے بڑے بڑے شیشوں کی کالی عینک پہنی ہوتی ہے، ہمیں دیکھ کر مسکراتی اور ہاتھ ہلاتی ہے، ہم اس کے بارے میں کچھ نہیں جانتے کہ وہ کون ہے؟ نہ ہی وہ ہمارے بارے میں کچھ جانتی ہے، لیکن اس ایک لمحہ کی تکون پر ہم ایک دوسرے کے سامنے آتے ہیں اور دوسرے لمحے کی بانہیں پھیلنے اور آنکھیں کھلنے سے پہلے پہلے متضاد سمتوں میں لڑھک جاتے ہیں۔پھر۔۔۔
سنسان راستوں پر موت دبے پاؤں ہمارا تعاقب کرتی ہے،
اور بڑھاپا قطرہ قطرہ ہم پر گرتا ہے۔
٭٭٭

جَلا وطن

وہ کئی دنوں سے میرا پیچھا کر رہا ہے اور میں یہ بات اچھی طرح جانتا ہوں کہ جب بھی اسے موقع ملا اور میں تنہائی میں اسے مل گیا، وہ مجھے اغوا کر لے گا۔ اس سے بچنے کے لیے میں خود کو ہر وقت لوگوں کے اژدہام میں دفن رکھتا ہوں ، تا کہ وہ میرے جسم کو نہ دیکھ سکے۔ رات گئے جب سب ایک ایک کر کے رخصت ہونے لگتے ہیں تو میں بڑی عاجزی کے ساتھ ب سے کہتا ہوں کہ مجھے میرے گھر کی سیڑھیوں تک چھوڑ آئے۔ ب باقاعدگی سے میرے گھر کی سیڑھیوں تک میرے ساتھ آتا ہے اور جب میں دروازے کو اندر سے بند کر لیتا ہوں تو وہ زور سے خدا حافظ کہہ کر اندھیرے میں آگے بڑھ جاتا ہے۔ میں تیزی سے زینے پھلانگتا اوپر چڑھتا ہوں اور کمرے میں داخل ہو کر جلدی سے اپنی قبر میں گھس جاتا ہوں۔ کچھ دیر میں بے حس و حرکت پڑا رہتا ہوں ، پھر رفتہ رفتہ مجھے اپنے ہونے کا احساس ہونے لگتا ہے اور میں آہستہ آہستہ اپنے سارے جسم پر ہاتھ پھیرتا ہوں۔ دن بھر کے اڑے ہوئے پرندے ایک ایک کر کے واپس آنے لگتے ہیں اور شور مچاتے میرے گرد منڈلاتے ہیں۔ میں اپنے گوشت کے چھوٹے چھوٹے ٹکڑے کاٹ کر ان کے سامنے پھینکتا ہوں ، وہ اپنا اپنا حصہ لے کر دیوار کے ساتھ جا لگتے ہیں اور اونگھنے لگتے ہیں۔ میں اندر ہی اندر ہنستا ہوں ، لیکن دوسرے لمحے میری ہنسی ٹو ٹ کر میر ی گردن پر بہنے لگتی ہے۔ وہ بڑے سکون کے ساتھ میرے برابر لیٹا ہوا ہے، میں ہڑ بڑا کر آدھا اٹھ جاتا ہوں ، وہ پورے اطمینان سے مجھے دوبارہ اندر گھسیٹ لیتا ہے۔ چند لمحے مجھے دیکھتا رہتا ہے، پھر ٹھہرے ہوئے لہجہ میں کہتا ہے۔۔۔
’’میں کل شام تمہیں اغوا کر لوں گا۔‘‘
یہ کہہ کر وہ اچھل کر باہر بھاگ جاتا ہے۔ میں گم سم پڑا لکیر پیٹتا رہتا ہوں ، جب کوئی چیز میرے ہاتھ نہیں آتی تو میں گھبرا کر منہ لحاف سے باہر نکال لیتا ہوں۔ ساتھ والی چارپائی پر سوئی ہوئی میری بہن کے ہونٹو ں سے مسکراہٹ جھانک جھانک کر مجھے دیکھتی ہے، شاید وہ خواب میں کسی سے ہنس ہنس کر باتیں کر رہی ہے، لیکن کس سے ؟ مجھے یاد آتا ہے کہ آج صبح دودھ والے نے مجھے بتایا تھا کہ تمہاری بہن کوٹھے سے سامنے والے دکاندار کو اشارے کرتی اور رقعے پھینکتی ہے۔ مجھے اپنے کندھوں سے بوجھ سا ہٹتا ہوا محسوس ہوتا ہے، وہ اسے بھگا کر کیوں نہیں لے جاتا۔ میں کندھے جھٹکتا ہوں ، لیکن دوسرے لمحے میرے اندر سے وہ کود کر باہر آتا ہے اور چیختے ہوئے کہتا ہے۔۔۔
’’تم بڑے کمینے شخص ہو۔‘‘
میں سر ہلاتا ہوں۔۔۔ ’’ہاں ، میں واقعی کمینہ ہوں۔‘‘
’’تم کتے ہو!‘‘۔۔۔ وہ پھر چیختا ہے۔
میں تسلیم کرتا ہوں۔۔۔ ’’ہاں ، میں کتا ہوں !‘‘
اور میرے اندر بیٹھا ہوا کتا میرے ہونٹوں سے اپنی لمبی زبان نکال کر چپڑ چپڑ میرا منہ چاٹنے لگتا ہے۔ میں غرّاتے ہوئے اس کی طرف لپکتا ہوں ، وہ دوڑ کر میری ماں کے بستر میں گھس جاتا ہے۔
’’کمینے، ذلیل!‘‘وہ اچھل کر میرے منہ پر تھپڑ مارتا ہے، پھر کتابوں کا ایک ڈھیر لگاتے ہوئے کہتا ہے۔۔۔
’’کیا تمہیں پڑھایا نہیں گیا تھا کہ ماں کے پاؤں کے نیچے جنت ہوتی ہے؟‘‘
’’مجھے معلوم ہے۔۔۔ مجھے معلوم ہے‘‘۔۔۔ میں چیختا ہوں۔۔۔ ’’لیکن بوجھ سے میرے کندھے ٹوٹے جار ہے ہیں۔‘‘
دفعتاً مجھے احساس ہوتا ہے کہ کوئی غلط بات ہو گئی ہے، مجھے اپنے پاؤں کے نیچے سے جنت کھسکتی ہوئی نظر آتی ہے۔ میں جھک کر ماں کو پڑھنے کی کوشش کرتا ہوں ، دھیرے دھیرے ایک گہری دھند مجھے اپنے اندر سمیٹنے لگتی ہے۔
صبح ناشتہ کرتے ہوئے میں ماں سے کہتا ہوں۔۔۔
’’میں آج شام اغوا ہو جاؤں گا!‘‘
وہ سر اٹھائے بغیر کہتی ہے۔۔۔ ’’تمہاری تنخواہ کا کیا ہو گا، وہ تو ہر ماہ مجھے ملتی رہے گی نا؟‘‘
میرے بدن پر ایک لمبی دراڑ پڑ جاتی ہے۔ میں سبزی کاٹنے والی چھری سے اپنا ایک ہاتھ کاٹ کر ماں کی جھولی میں پھینک دیتا ہوں۔ وہ میری طرف دیکھے بغیر میرا کٹا ہوا ہاتھ اٹھا کر اپنے پرس میں ڈال لیتی ہے، پھر کہتی ہے۔۔۔ ’’تمہارا دوسرا ہاتھ بھی اچھا ہے، لیکن میرا یہ مقدر کہاں ؟‘‘
بہن کہتی ہے۔۔۔ ’’میرا کیا ہو گا؟‘‘
میں چند لمحے اسے دیکھتا رہتا ہوں۔ جی چاہتا ہے اس سے پوچھوں کہ سامنے والے دکاندار کا کیا حال ہے۔ لیکن کچھ کہنے کی بجائے میں دوبارہ چھری اٹھاتا ہوں اور اپنا دوسرا ہاتھ کاٹ کر اسے دے دیتا ہوں ، وہ میرا کٹا ہوا ہاتھ پر س میں رکھ لیتی ہے اور کہتی ہے۔۔۔
’’دوپہر کو تو گھر آؤ گے نا؟‘‘
میں جواب دئیے بغیر ساتھ والے کمرے میں چلا جاتا ہوں۔ دیواریں خاموشی سے مجھے گھورتی ہیں۔ میں ان کے قریب جاتا ہوں اور ٹیک لگا کر زمین پر بیٹھ جاتا ہوں۔ فرش مجھے اپنی گود میں سمیٹ لیتا ہے۔۔۔ باہر آنے سے پہلے میں برابر والے کمرے میں جھانکتا ہوں ، ماں پر س کو مضبوطی سے ہاتھوں میں دبائے مسکرا رہی ہے اور میری بہن کھڑکی میں کھڑی سامنے والے دکاندار کو اشارے کر رہی ہے۔ میں دوڑتا ہوا باہر نکل آتا ہوں۔
کچھ دیر بعد جب میں د کے دروازے پر دستک دیتا ہوں تو وہ کافی دیر کے بعد باہر آتا ہے، اس کی آنکھوں میں نیند تیر رہی ہے۔
میں کہتا ہوں۔۔۔ ’’میں آج شام اغوا ہو جاؤں گا۔‘‘
’’تومیں کیا کروں ؟‘‘۔۔۔ وہ جھلائے ہوئے لہجہ میں کہتا ہے۔ دفعتاً وہ چونکتا ہے۔۔۔ ’’کیا کہا تم نے؟‘‘
’’میں آج اغوا ہو جاؤں گا!‘‘
وہ کچھ دیر میری آنکھوں میں جھانکتا، پھر تشویش سے کہتا ہی۔۔۔
’’لیکن ہمارے الیکشن کا کیا ہو گا؟ تمہارے نہ ہونے سے ہمارا ایک ووٹ کم ہو جائے گا۔‘‘
میں کچھ دیر سوچتا رہتا ہوں ، پھر اپنی کھا ل اتار کر اس کے ہاتھ دے دیتا ہوں ، وہ دونوں ہاتھوں سے اسے سنبھالتے ہوئے کہتا ہے۔
’’اچھا، تو اور کیا حال ہیں ؟ چائے تو پیتے جاؤ۔‘‘
میں جلدی سے آگے نکل جاتا ہوں۔
قریب ترین بوتھ سے میں اُس لڑکی کو ٹیلی فون کرتا ہوں ، جس سے میں محبت کرتا ہوں۔
گھنٹی بجتی رہتی ہے، پھر اس کی اکتائی ہوئی آواز سنائی دیتی ہے۔۔۔
’’ہیلو!۔۔۔ کون ہے ؟‘‘
میں کہتا ہوں۔۔۔ ’’تم نے کیا سوچا ہے؟‘‘
وہ کہتی ہے۔۔۔ ’’میں نے تم سے کئی بار کہا ہے، ابھی میں نے کچھ نہیں سوچا۔‘‘
میں کہتا ہوں۔۔۔ ’’آخر اس میں دیر کیا ہے؟‘‘
وہ جھنجلا جاتی ہے۔۔۔ ’’تمہارے status کی بات ہے، تمہارے پاس نہ کار ہے نہ کوٹھی۔‘‘
میں کہتا ہوں۔۔۔ ’’اب سوچنے کی مہلت نہیں ، میں آج اغوا ہو رہا ہوں۔‘‘
وہ ٹیلی فون بند کر دیتی ہے۔
میں ٹیلی فون کے تار کو پکڑے پکڑے اس کے کمرے میں پہنچ جاتا ہوں۔ وہاں ایک اور شخص بیٹھا ہے جس سے وہ ہنس ہنس کر باتیں کر رہی ہے۔
وہ شخص کہتا ہے۔۔۔ ’’میں تو کسی کار کو زیادہ چلا لوں تو اُکتا جاتا ہوں ، بس اب نئی گاڑی لوں گا۔ آپ کو کون سا رنگ پسند ہے؟‘‘
وہ اس کے سامنے بچھی چلی جاتی ہے۔۔۔ ’’آپ کی شخصیت میں ایک عجیب دلکشی ہے۔‘‘
میں درمیان میں بول پڑتا ہوں۔۔۔ ’’یہ بات تو تم نے مجھ سے بھی کہی تھی۔‘‘
وہ مجھے پرے دھکیل دیتی ہے اور اس سے کہتی ہے۔۔۔
’’You are loveable.‘‘
’’یہ بھی تم نے مجھ سے کہا تھا‘‘۔۔۔ میں پھر درمیان میں آ جاتا ہوں۔ وہ دوبارہ مجھے پرے کر دیتی ہے۔ میں اس کی میز سے سیاہی کی شیشی اٹھا کر سامنے بیٹھے ہوئے شخص پر انڈیل دیتا ہوں اور دونوں ہاتھوں سے اس کا چہرہ کا لا کرنے کی کوشش کرتا ہوں ، لیکن کچھ بھی نہیں ہوتا۔ دونوں ہنس ہنس کر باتیں کرتے رہتے ہیں۔ میں جھنجھلا کر باہر نکل آتا ہوں۔ دروازے کے سامنے ایک کار کھڑی ہے، میں اس کے سارے شیشے توڑ دیتا ہوں اور ٹائروں میں بڑے بڑے سوراخ کر دیتا ہوں۔
کچھ دیر بعد جب میں ب کو ساری بات بتاتا ہوں تو وہ بڑے سکون سے میری طرف دیکھتے ہوئے کہتا ہے۔۔۔
’’تم اُلّو کے پٹھے ہو۔۔۔ میں نے پہلے ہی تم سے کہا تھا کہ وہ تمہیں بے وقوف بنا رہی ہے۔‘‘
میں خاموشی سے سر ہلاتا ہوں۔۔۔ ’’مجھے معلوم نہیں ہوتا کہ لوگ مجھے بے وقوف بنا رہے ہیں۔‘‘
دفعتاً میں چونکتا ہوں۔۔۔ ’’یار ب ! میں آج اغوا ہو جاؤں گا۔‘‘
’’اچھا!‘‘۔۔۔ وہ کندھے جھٹکتا ہے۔۔۔ ’’کسی دن تم اغوا ہو ہی جاؤ۔‘‘
مجھے اپنے پاؤں ٹوٹتے ہوئے محسوس ہوتے ہیں ، میں بھرائی آواز میں کہتا ہوں۔۔۔ ’’آج مجھے اکیلا نہ چھوڑنا !‘‘
وہ نفی میں سر ہلاتا ہے۔۔۔ ’’مجھے تو ایک لڑکی سے ملنے جانا ہے۔۔۔ ‘‘
میں کہتا ہوں۔۔۔ ’’مجھے اکیلے نہ چھوڑنا۔۔۔ ورنہ۔۔۔ ‘‘
وہ میری بات کاٹ دیتا ہے۔۔۔ ’’تمہارا دماغ تو خراب نہیں۔ بھئی میں نے اسے ٹائم دیا ہوا ہے، وہ میرا انتظار کر رہی ہو گی۔‘‘
میں کہتا ہوں۔۔۔ ’’تو مجھے بھی ساتھ لے جاؤ۔‘‘
’’ہیں۔۔۔ تمہیں بھی ساتھ لے جاؤں !‘‘۔۔۔ وہ چونکتا ہے۔۔۔ ’’یہ تو سارا طریقۂ واردات ہی غلط ہو جائے گا۔‘‘
دیواریں ، گلیاں اور سڑکیں تیز دھوپ میں بھیگی ہوئی ہیں ، میں ان کے درمیان اکیلا قدم قدم چلتا رہتا ہوں۔ سارے دروازے بند ہیں ، اندر سے قہقہوں کی خوشبوئیں رِس رِس کر باہر نکل رہی ہیں۔ میں ایک ایک دروازے کے سامنے رکتا ہوں ، ایک ایک کھڑکی کی جانب دیکھتا ہوں ، لیکن کوئی پٹ وا نہیں ہوتا۔ دھوپ کا سیلاب مجھے آگے بہائے لیے چلا جاتا ہے، میں دروازوں سے رِستی ہنسی کی خوشبوؤں کی رسّی تھامے قبرستان کے بڑے دروازے کی طرف بڑھتا ہوں ، اس کا بڑا دروازہ دونوں بانہیں کھولے مجھے پکارتا ہے۔ اندر جانے سے پہلے میں مڑ کر سڑکوں ، گلیوں اور بند دروازوں کو دیکھتا ہوں۔ بند دروازے، سنسان سڑکیں۔۔۔ کوئی آواز میرا تعاقب نہیں کرتی، میں کان لگا کر کچھ دیر سننے کی کوشش کرتا ہوں کہ شاید کوئی مجھے پکارے۔۔۔ پھر جلدی سے اندر چلا جاتا ہوں ، دروازہ کھلنے کی آواز سن کر میری ماں پچھلے کمرے سے چیختی ہے، ’’کون ہے۔۔۔ ؟‘‘
’’میں ہوں !‘‘۔۔۔ میں جواب دیتا ہوں۔ اچانک مجھے خیال آتا ہے۔۔۔ ’’کیا میں واقعی ہوں ؟‘‘
میں اپنے آپ کو ٹٹولتا ہوں ، اپنی آنکھوں ، اپنے ہونٹوں اور گالوں پر ہاتھ پھیرتا ہوں۔۔۔ ’’کیا میں واقعی ہوں ؟‘‘۔۔۔ میرے اندر کوئی بڑبڑاتا ہے۔ میں غور سے اپنے جسم کو دیکھتا ہوں ، دو تین قدم آگے چل کر۔۔۔
’’میں ہوں !‘‘۔۔۔ میں چیختا ہوں۔۔۔ ’’میں ہوں ‘‘
’’سُن لیا۔۔۔ سُن لیا‘‘۔۔۔ میری ماں جواباً چیختی ہے۔۔۔ ’’روٹی کھانی ہے تو سالن گرم کر لو!‘‘
میں ٹکڑے ٹکڑے ہو کر فرش پر بکھر جاتا ہوں۔ پچھلے کمرے میں میری ماں اور بہن ایک دوسرے سے جھگڑ رہی ہیں۔۔۔
ماں کہتی ہے۔۔۔ ’’اس سوٹ کے ساتھ یہ دوپٹہ میچ کرے گا۔‘‘
بہن کہتی ہے۔۔۔ ’’آج کل رنگوں کا تصور بدل گیا ہے، اس کے ساتھ یہ ٹھیک رہے گا!‘‘
میں تیلی چولہے میں پھینکتا ہوں ، شعلہ لپک کر مجھے چومنے کی کوشش کرتا ہے۔
بہن کہتی ہے۔۔۔ ’’امی، اب میں برقع نہیں پہنوں گی، کپڑوں کی ساری شو ماری جاتی ہے۔‘‘
شعلے لپک لپک کر پتیلی کو چاٹتے ہیں۔ تیز بو میرے نتھنوں میں گھستی چلی جاتی ہے۔ میری ماں ساتھ والے کمرے سے دوڑی ہوئی آتی ہے۔
’’سارا سالن جلا دیا۔۔۔ رات کو تیرا باپ پکائے گا دوبارہ؟‘‘
میری کچھ سمجھ میں نہیں آتا کہ کیا ہو رہا ہے۔ دروازے میں کھڑی ہوئی میری بہن خونخوار نظروں سے مجھے دیکھتی ہے، پھر پیر پٹختے ہوئے کہتی ہے۔
’’میں تو نہیں پکاتی اور۔۔۔ رات کو یہی کھانا سب!‘‘
’’ہم کیوں کھائیں گے۔۔۔ مرن جو گا!‘‘
دونوں منہ پھلائے واپس چلی جاتی ہیں ، میں گُم سُم شعلوں کو گھورتا رہتا ہوں۔ پتیلی میں سے بُو کی ایک لکیر اُوپر اٹھتی ہے اور دائرہ در دائرہ چاروں طرف پھیلتی چلی جاتی ہے۔
ساتھ والے کمرے سے بہن کی آواز آتی ہے۔۔۔ ’’تو امی، پھر یہ دوپٹہ ٹھیک رہے گا نا؟‘‘
میں باہر آ جاتا ہوں ، سُنسان گلیاں اور سڑکیں لپک کر مجھے اپنی گود میں چھپا لیتی ہیں۔ میں ان کی چھاتیوں سے چُوسر چُوسر دودھ پیتا ہوں ، میرے پاؤں ان کے نرم نرم پیٹوں پر مسلسل چلتے رہتے ہیں۔ وہ مجھے ایک آغوش سے دوسرے آغوش میں دے کر آگے بڑھ جاتی ہیں۔۔۔ میں ایک مقدس امانت کی طرح ایک سڑک سے دوسری سڑک پر ہوتا ہوا ہوٹل میں آ جاتا ہوں۔
ہوٹل سنسان پڑا ہے، میں چپ چاپ ایک کونے میں بیٹھ جاتا ہوں۔ بیرا پانی کا گلاس لا کر میرے سامنے رکھ دیتا ہے۔ میں خالی آنکھوں سے اسے دیکھتا رہتا ہوں۔
’’چائے ؟‘‘۔۔۔ وہ پوچھتا ہے۔
میں جواب دیئے بغیر اُسے تکتا رہتا ہوں۔۔۔ بس تکتا ہی رہتا ہوں۔ وہ کچھ دیر مجھے گھورتا رہتا ہے، پھر کہتا ہے۔۔۔
’’جناب ! ایک بات پوچھوں ؟‘‘
’’پوچھو!‘‘
وہ کچھ دیر تذبذب میں رہتا ہے، پھر کہتا ہے۔۔۔ ’’آپ کا گھر کہاں ہے؟‘‘
میں نفی میں سر ہلاتا ہوں۔
’’کسی دوسرے شہر میں۔۔۔ ؟‘‘
میں پھر نفی میں سر ہلاتا ہوں۔
’’کہیں بھی نہیں !‘‘۔۔۔ وہ بے یقینی سے کہتا ہے۔۔۔ ’آپ کے رشتہ دار تو ہوں گے کہیں نہ کہیں ؟‘‘
’’کوئی بھی نہیں ‘‘۔۔۔ وہ حیرت کی مٹھی میں پھڑپھڑاتا ہے۔
’’آپ کی ماں نہیں !‘‘
میں نفی میں سر ہلاتا ہوں۔
’’اور بہن بھائی۔۔۔ ؟‘‘
میں پھر نفی میں سر ہلاتا ہوں۔ وہ بھی سر ہلاتا ہے، لیکن مجھے معلوم نہیں ہوتا کہ وہ کیا کہہ رہا ہے۔ وہ کچھ کہے بغیر چلا جاتا ہے اور چائے کا کپ لا کر میرے سامنے رکھ دیتا ہے۔ مجھے محسوس ہوتا ہے، سارا شہر خالی ہے اور میں کھنڈروں اور عمارتوں میں اکیلا ہوں۔۔۔ بالکل اکیلا، خدا کی طرح۔۔۔
میں آسمان کی طرف منہ کر کے خدا کو پکارتا ہوں۔۔۔
’’اللہ میاں کیا حال ہے؟‘‘ وہ غم ناک نظروں سے مجھے دیکھتا ہے۔
میں کہتا ہوں۔۔۔ ’’اللہ میاں ہر وقت غم نہ کیا کرو، غم کرنے سے صحت خراب ہو جاتی ہے۔‘‘
دفعتاً سارا شہر جاگ اٹھتا ہے اور لوگ دیواروں ، دروازوں سے لاٹھیاں لیے نکلتے ہیں اور میرے پیچھے دوڑنے لگتے ہیں۔ میں آگے آگے دوڑتا ہوں اور چیختا ہوں۔۔۔
’’اُلو کے پٹھو۔۔۔ آنکھیں کھولو!‘‘
لیکن وہ آنکھیں بند کئے لاٹھیاں لیے میرے پیچھے دوڑتے رہتے ہیں اور لمحہ بہ لمحہ قریب آتے چلے جاتے ہیں ، میرے پاؤں لڑکھڑانے لگتے ہیں۔
بیرا کہتا ہے۔۔۔ ’’چائے تو ٹھنڈی ہو گئی، میں دوسری لا دیتا ہوں۔‘‘
وہ پیالی اٹھا کر چلا جاتا ہے۔ میں سوچتا ہوں ، شاید اس کی آنکھیں کھلی ہوئی ہیں۔ جب وہ چائے لے کر واپس آتا ہے تو میں اس سے کہتا ہوں۔
’’میں آج شام اغوا ہو جاؤں گا۔‘‘
وہ افسوس سے سر ہلاتا ہے۔۔۔ ’’یہ تو بہت بُرا ہو گا، ایک آپ ہی تو ہیں جو اتنی ٹِپ دیتے ہیں۔ یہ آپ کے دوست تو ایسے ہیں کہ بس چلے تو بل میں سے بھی دو چار آنے مار لیں۔‘‘
’’سب کی آنکھیں بند ہیں ‘‘۔۔۔ میں سوچتا ہوں۔۔۔ ’’سب کی آنکھیں بند ہیں۔‘‘
شام دھیرے دھیرے چائے کی پیالیوں میں گھل رہی ہے، اس کے قدموں کی چاپ دور سے سنائی دیتی ہے۔ میں ایک ایک چہرے کو ٹٹولتا ہوں ، سارے چہرے اپنے اپنے لفظوں کی چار دیواریوں میں قید ہیں۔ میں میز کے نیچے ہاتھ لے جا کر پورے دن کی پرتیں کھولتا ہوں ، آوازوں کی بے شمار چیونٹیاں میرے بدن پر رینگنے لگتی ہیں۔۔۔
’’ہمارے الیکشن کا کیا ہو گا ؟ تمہارے نہ ہونے سے ایک ووٹ کم ہو جائے گا۔‘‘
’’چند دنوں میں مَیں نئی کار لے لوں گا، آپ کو کون سا رنگ پسند ہے؟‘‘
’’میں تمہیں بھی ساتھ لے جاؤں ، یہ تو سارا طریقۂ واردات غلط ہو جائے گا۔‘‘
’’اس سوٹ کے ساتھ یہ دوپٹہ میچ کرے گا نا؟‘‘
’’ایک آپ ہی تو ہیں جو اتنی ٹپ دیتے ہیں۔‘‘
میں دن کو پورے میز پر پھیلا دیتا ہوں اور اس پر دوڑنے لگتا ہوں اور ایک ایک دروازہ کھولتا چلا جاتا ہوں۔ پہلے دروازے کے پیچھے میری ماں اور بہن ہنس رہی ہیں۔ میں دوسرا دروازہ کھولتا ہوں ، وہ اپنے کمرے میں بیٹھی اس سے ہنس ہنس کر باتیں کر رہی ہے۔
’’You are loveable.‘‘
میں جلدی سے یہ دروازہ بھی بند کر دیتا ہوں۔ تیسرے دروازے کے پیچھے وہ اپنے طریقۂ واردات میں مصروف ہے۔ میں ایک ایک کر کے سارے دروازے کھولتا ہوں اور بند کرتا جاتا ہوں۔ پھر دن کو تہہ کر کے جیب میں ڈال لیتا ہوں۔
سب کی آنکھیں بند ہیں اور سب ایک بے معنی بحث میں مصروف دوسرے سے بات چھیننے کی کوشش میں ایک دوسرے کو پرے دھکیل دیتے ہیں۔۔۔ میں ایک ایک کو دیکھتا ہوں ، قدموں کی چاپ لمحہ لمحہ قریب آ رہی ہے۔
’’میں کل شام تمہیں اغوا کر لوں گا۔‘‘
اس کے لفظ قطرہ قطرہ میرے کانوں میں ٹپکتے ہیں۔
’’مجھے یاد ہے،۔۔۔ مجھے یاد ہے‘‘۔۔۔ میں کہتا ہوں۔
آنکھیں بند ہیں اور گفتگو میں ایک دوسرے سے سبقت لے جانے کی تگ و دو شباب پر ہے۔ قدموں کی چاپ قریب اور قریب آتی چلی جاتی ہے۔
بند آنکھیں ایک دوسرے سے آگے نکل جانے کے لیے دھکم پیل۔۔۔ بند دروازے ہنسی ہنسی، رنگ میچنگ طریقۂ واردات میں اپنی جگہ سے اُٹھتا ہوں ، کسی کو میرے اٹھنے کا احساس نہیں ہوتا، سب آنکھیں بند کئے دوسرے سے آگے نکل جانے کے لیے ایک دوسرے کو گرا رہے ہیں ، میں بند دروازے کے کواڑوں پر ہاتھ پھیرتے ہوئے اس کی طرف دیکھتا ہوں۔
وہ سامنے درخت کے نیچے کھڑا مسکرا رہا ہے۔۔۔ مسکرائے ہی جا رہا ہے۔
٭٭٭

بے پانی کی بارش

’’اور اللہ کا قہر یہ نہیں ہے کہ بارش نہیں ہوتی اور قحط پھیل جاتا ہے، اللہ کا قہر یہ بھی ہے کہ وہ خوب بارشیں برساتا ہے، لیکن فصل پھر بھی نہیں اُگتی۔‘‘
(حدیث)

ساری ہی راتیں تاریک اور ڈراؤنی ہوتی ہیں ، لیکن وہ رات اتنی گھنی، سیاہ اور ڈراؤنی تھی کہ اُسے اپنے آپ سے بھی ڈر لگ رہا تھا۔ اس نے اپنے آپ کو سمیٹ کر ایک کونے میں ڈھیر کر لیا تھا اور اب اس خوف سے ہاتھ بھی نہیں ہلا رہا تھا کہ کہیں اس کے اپنے ہاتھ ہی اسے نہ دبوچ لیں ، حالانکہ بار بار اس کا جی چاہ رہا تھا کہ اپنے چہرے پر ہاتھ پھیر کر تسلی کر لے کہ اس کی گردن پر اس کا چہرہ موجود ہے۔ اسے یقین سا ہو چلا تھا کہ اس کے چہرے میں کوئی نہ کوئی تبدیلی ہو چکی ہے لیکن وہ اس کا اقرار کرنے کے لیے تیار نہ تھا۔ یہ بات اس کے بس میں نہیں تھی۔ ہوش سنبھالنے کے بعد وہ اپنے چہرے کو دیکھتا آیا تھا، اس سے پیار کرتا تھا اور اب وہ ایکا ایکی کس طرح یہ دیکھ سکتا تھا۔ نہیں ، وہ کبھی نہیں دیکھ سکتا۔ اس نے سوچا، کاش یہ گھنی سیاہ ڈراؤنی رات اتنی پھیل جائے کہ وہ کبھی اپنے چہرے کو نہ دیکھ سکے۔ لیکن ہر رات کی ایک صبح ہوتی ہے، اس اداس گھنی سیاہ ڈراؤنی رات کی بھی ایک صبح تھی اور وہ اس سے بچنا چاہتا تھا۔ یہ بھی عجیب بات تھی۔ وہ صبح کے تصور ہی سے کھل اٹھا کرتا تھا۔ لیکن یہ ایسی صبح تھی جس کے خیال ہی سے اس کا سر جھکا چلا جا رہا تھا۔
’’صبح ہم ایک دوسرے کو کیسے دیکھ سکیں گے؟‘‘ اس نے سوچا اور چہرے کو گھٹنوں سے رگڑنے لگا۔
گھنٹوں کی رگڑ سے چہرے کا سویا ہوا لمس جاگ اٹھا۔ بے اختیار اس کا جی چاہا کہ ہاتھوں سے چہرے کی ایک ایک پور ٹٹولے، لیکن خوف بوند بوند رات کے پیالے میں گھل رہا تھا اور سیاہی کی رسی اس کے ہاتھوں کے گرد لپٹتی ہی چلی جا رہی تھی۔ وہ صرف انگلیاں ہلا کر رہ گیا۔
اسے کئی دن پہلے اس سیاہ ڈراؤنی رات کے آنے کی بشارت مل گئی تھی اور اس نے شہر کے بڑے چوک میں کھڑے ہو کر، چیخ چیخ کر سب کو اس عذاب کی کہانیاں سنائی تھیں ، لیکن کسی نے اس کی بات نہ سنی، بلکہ ہنس ہنس کر اس کا مذاق اڑایا اور اب سب اسی کی طرح کونوں اور اوٹوں میں دبکے ایک دوسرے کو اپنا منہ دکھانے سے اجتناب برت رہے تھے۔ ان میں سے کسی میں یہ حوصلہ نہیں تھا کہ دوسرے کا چہرہ دیکھ سکے۔ بلکہ وہ اپنا چہرہ دیکھنے کی بھی سکت نہیں رکھتے تھے، کیونکہ ان میں سے ہر ایک کو یقین سا ہو چلا تھا کہ اس کے چہرے میں کوئی نہ کوئی تبدیلی ہو چکی تھی۔
’’صبح ہم ایک دوسرے کو کیسے دیکھ سکیں گے؟‘‘ اس نے پھر سوچا اور آنے والی پیلی اداس صبح تھرتھراتی ہوئی اس کی آنکھوں کی پتلیوں میں اترنے لگی۔ اس نے گھبرا کر پتلیوں کو سمیٹ لیا اور اندھے کونے سے نکل کر سڑک پر دوڑنے لگا۔ سڑکوں گلیوں اور بازاروں میں ویرانی گراں مارتی ہوئی ناچ رہی تھی۔ بند دروازوں پر لٹکی ہوئی ناموں کی پلیٹوں پر اداسی پھن پھیلائے شوک رہی تھی۔ وہ ویرانی کے ہاتھوں میں سے ہوتا ہوا بڑے چوک میں آ گیا۔ چمگادڑوں کی ڈار کی ڈار پَھڑپَھڑ کرتی قریب سے گزر گئی، دور سے کوئی الّو چیخا اور اداسی کا رقص اور تیز ہو گیا۔ وہ چبوترے پر بیٹھ گیا۔ ساتوں خواب ایک ایک کر کے اس کی آنکھوں کے ڈرامہ گھر میں اترنے لگے۔ یہ خواب وہ مسلسل دیکھتا رہا تھاا ور اس نے اسی چبوترے پر کھڑے ہو کر لوگوں کو ان کے بارے میں بتایا تھا، لیکن کسی نے اس کی باتوں پر کان نہ دھرے۔
ساتوں خواب ایک ایک کر کے اس کی آنکھوں کے ڈرامہ گھر میں اتر رہے تھے۔ پہلا خواب ایک بڑے کھیت پر پھیلا ہوا تھا۔۔۔ انہوں نے اپنے بیجوں کو منافقت کے پانی سے سینچا تھا۔ ان کے کھیتوں میں فصل کی جگہ دیواریں اگیں۔۔۔ صبح وہ دیر تک باتوں کے ٹوٹے سرے جوڑتا رہا۔ پھر بڑے چوک میں آ کر اس نے سرخ سبز سب بتیوں کے بٹن آف کر دئیے۔ ساری ٹریفک ایک لمحہ میں منجمد ہو گئی۔
وہ چبوترے پر چڑھ گیا اور چیخ کر کہنے لگا، ’’کیا تم جانتے ہو ہم کھیتوں میں منافقت بو رہے ہیں ؟‘‘
اس کے گرد جمع لوگوں میں سے کچھ تو اس کی بات سن کر ہنس پڑے‘ اور کچھ غصے میں بڑبڑاتے ہوئے اپنے اپنے راستوں پر چل دئیے۔ ٹریفک کا سپاہی ہجوم کی دیوار چیرتا ہوا اس کی طرف بڑھا اور اسے بازو سے پکڑ کر نیچے گھسیٹ لایا۔ کچھ دیر بعد جب اسے ٹریفک انسپکٹر کے سامنے پیش کیا گیا تو وہ اسی طرح بڑبڑا رہا تھا۔
انسپکٹر نے اس سے پوچھا۔۔۔ ’’تم نے ٹریفک کیوں روکی؟‘‘
وہ چند لمحے اسے دیکھتا رہا۔ پھر جھک کر اس کے کان میں کہنے لگا۔۔۔ ’’ہم اپنے کھیتوں میں منافقت بو رہے ہیں۔ دیواریں اگ آئیں تو ہم آدھے رہ جائیں گے۔‘‘
انسپکٹر نے اسے سر سے پاؤں تک دیکھا، پھر کھلکھلا کر ہنس پڑا اور سپاہی سے کہنے لگا، ’’اسے دھکے دے کر باہر نکال دو۔۔۔ الّو کا پٹھا۔‘‘
وہ سارا دن لوگوں کو یہ بتانے کی کوشش کرتا رہا، لیکن کسی کے پاس اتنا وقت نہیں تھا۔ ہر شخص اپنے اپنے راستے پر بھاگا چلا جا رہا تھا۔
پھر اس نے دوسرا خواب دیکھا کہ کچھ لوگ کھلیانوں اور کارخانوں میں بھوک بانٹتے پھر رہے ہیں۔ کسان اور مزدور اپنے کاموں میں بھوک کی بھیک لے کر ایک دوسرے کے گریبان پکڑ رہے ہیں اور بھوک بانٹنے والے ہنس ہنس کر دوہرے ہوئے جا رہے ہیں۔۔۔ اس دن چبوترے پر چڑھ کر اس نے چیخ کر کہا۔۔۔ ’’حق داروں کو ان کا حق دو، ورنہ ہم سب تباہ ہو جائیں گے۔‘‘
سپاہی اسے پکڑ کر پھر انسپکٹر کے پاس لے گیا، انسپکٹر نے اسے دیکھ کر پہلے تو دانت کچکچائے پھر سپاہی سے کہنے لگا۔۔۔ ’’اسے کان پکڑوا کر دس جوتے لگاؤ۔‘‘
آدھ گھنٹہ کان پکڑنے اور دس جوتے کھانے کے بعد وہ چپ چاپ تھانے سے باہر نکلا اور منہ ہی منہ میں بڑبڑاتا رہا، لیکن کسی نے اس سے یہ نہیں پوچھا کہ وہ آپ ہی آپ کیوں بڑبڑا رہا ہے۔ کسی کے پاس اتنی فرصت ہی نہیں تھی۔
پھر اس نے تیسرا خواب دیکھا کہ وہ ٹھاٹھیں مارتے بپھرے ہوئے دریا میں بغیر چپوؤں کی کشتی میں سفر کر رہے ہیں۔۔۔ اس صبح وہ دن چڑھنے تک اخبار کی سرخیاں چاٹتا رہا۔ پھر اخبار کی خبروں کو کندھوں پر لٹکائے سارے شہر میں پھر ا۔ پہلے وہ شہر کے پکے حصے میں گیا۔ وہاں بڑی بڑی خوبصورت عمارتوں پر ترقی کا ڈھول بج رہا تھا اور اس کے گرد لوگ سکے کھنکھناتے، ہنس ہنس کر دوہرے ہوئے جا رہے تھے۔ پھر وہ شہر کے کچے حصے میں گیا۔ وہاں بد صورت مکانوں پر اداسی کی پھوار پڑ رہی تھی۔ ڈھول دونوں طرف سے پھٹ چکا تھا اور پیلے ویران چہرے خالی کا سہ ہاتھوں میں لیے پھٹے ہوئے ڈھول کو حیرت اور اجنبیت سے دیکھ رہے تھے۔ وہ ایک کچے مکان کے تھڑے پر بیٹھ گیا اور اپنے آپ سے کہنے لگا، ’’جب تک ہمارے خالی کاسے نہیں بھریں گے، یہ ڈھول یوں ہی پھٹا رہے گا۔‘‘
وہ سر ہلاتا چبوترے کی طرف چل پڑا، لیکن سپاہی نے اسے چبوترے پر چڑھنے سے پہلے ہی بازو سے پکڑ لیا اور کہنے لگا۔۔۔ ’’ابھی تسلی نہیں ہوئی؟‘‘
اس نے ملتجی نظروں سے سپاہی کو دیکھا اور کہنے لگا۔۔۔ ’’دریا بپھرا ہوا اور ٹھاٹھیں مار رہا ہے اور ہمارے پاس چپّو ہی نہیں۔ ہمیں چپّو چاہئے، ورنہ ہم سب ڈوب جائیں ، سب ڈوب جائیں گے۔‘‘
سپاہی نے اسے ماں کی گالی دی اور اس کی پشت پر لات مار کر اسے سڑک کے دوسری طرف دھکیل دیا۔ وہ منہ کے بل زمین پر آ رہا۔
’’ہمیں چپّو دو۔۔۔ ہمیں چپّو دو۔‘‘ وہ بڑبڑاتا رہا اور چمکیلی تیز رفتار کاریں سیٹیاں بجاتی، سائیں سائیں کرتی اس کے قریب سے گزرتی رہیں۔
پھر اس نے چوتھا خواب دیکھا کہ کچے مکانوں میں رہنے والے سب لوگ چوہے بن گئے ہیں اور بلوں میں دبکے بیٹھے ہیں۔ موٹی تازی بلی ان کے بلوں کے باہر غرّاتی پھر رہی تھی۔
’’کسی کے منہ پر ہاتھ رکھ کر چیخ کوکب تک روکا جا سکتا ہے؟‘‘ صبح اٹھ کر اس نے خود سے کہا اور دوڑتا ہوا اپنے بل سے باہر نکل آیا۔ بلی غرّاتی ہوئی اس کے پیچھے دوڑی۔ وہ لپک کر دوسرے بل میں گھس گیا۔ پھر سارے چوہے ایک بل میں سے نکل کر دوسرے بل میں گھستے رہے۔ بلی بھاگ بھاگ کر ہانپنے لگی اور بے دم ہو کر گر پڑی۔
اس دن چبوترے کے گرد ایک کی بجائے کئی سپاہی تھے۔ ان کے ہاتھوں میں لاٹھیاں تھیں۔ اس نے کئی بار چبوترے کے قریب جانے کی کوشش کی لیکن سپاہیوں نے لاٹھیاں مار مار کر اسے دور بھگا دیا۔
پھر اس نے پانچواں خواب دیکھا کہ بھوک بانٹنے والے، کھیت کی منڈیر پر سر جوڑے بیٹھے ہیں۔ وہ دیر تک سر جوڑے سوچتے رہے، پھر انہوں نے پرانی بلی کو پکڑ کر ایک طرف کر دیا اور اس کی جگہ اسی جیسی لیکن دوسری بلی لے آئے۔ اس کے بعد وہ کھیت میں آئے اور انہوں نے بیچوں بیچ دیوار کھڑی کرنا شروع کر دی۔
ایک دیوار کی ایک طرف رہ گیا اور دوسرا دوسری طرف۔ دونوں ایک دوسرے کو نفرت سے دیکھنے لگے۔۔۔ اگلے دن وہ سارا دن اداس رہا۔ اخباروں کی سیاہ سرخیاں گلیوں اور بازاروں میں چیختی چلّاتی بین کرتی پھر رہی تھیں۔۔۔ بھائی بھائی کا گلا کاٹ رہا ہے۔
’’بھائی بھائی کا گلا کاٹ رہا ہے، لیکن چپّوؤں کی بات کسی کو یاد نہیں۔‘‘ اس نے سوچا۔۔۔ ’’اور کشتی کے پیندے میں سوراخ ہو چکا ہے۔‘‘
چھٹا اور ساتواں خواب اس نے ایک ساتھ دیکھے۔۔۔ کشتی کے پیندے میں سوراخ ہو چکا تھا اور پانی رفتہ رفتہ، بہت ہی آہستگی سے اندر آ رہا تھا۔ پھر بپھرتا،ٹھاٹھیں مارتا دریا، یک دم خون کے دریا میں بدل گیا۔ کنارے پر کھڑا روشنی کا مینار لڑکھڑا کر کشتی پر آ گرا، کشتی ٹوٹ کر دو حصوں میں بٹ گئی۔ چاروں طرف لاشیں ہی لاشیں ، ادھ موئے، مرتے چیختے انسان۔۔۔ ٹوٹے ہوئے کاسے۔۔۔
اُفق کی سرحدوں کی اوٹ سے گھنی سیاہ ڈراؤنی رات نے اپنا چہرہ نکالا اور دھیرے دھیرے چاروں طرف پھیلنے لگی۔۔۔ گھنی سیاہ ڈراؤنی رات، پَھڑ پَھڑ کرتی چمگادڑیں اور الّوؤں کی چیختی، نوحہ کرتی صدائیں۔
ساتوں خواب ایک ایک کر کے، اس کی آنکھوں کے ڈرامہ گھر میں اپنا اپنا تماشہ دکھا کر گھنی سیاہ ڈراؤنی رات میں ڈوب گئے اور وہ ویران، اداس چوک کے چبوترے پر بیٹھا یہی سوچتا رہا کہ صبح ان بدلے ہوئے چہروں کے ساتھ وہ ایک دوسرے کا سامنا کیسے کر سکیں گے؟
’’کاش اس رات کی صبح کبھی نہ ہو۔‘‘ خواہش نے سسکی بھری، لیکن راتیں کیسی ہی ہوں ، ہر رات کے بطن سے صبح کا شگوفہ ضرور پھوٹتا ہے۔ پر اس رات کی گود میں جس صبح نے آنکھ کھولی وہ اتنی پیلی اور اداس تھی کہ اس پر رات ہی کا گمان ہوتا تھا۔ ان کے ناموں کی دہائی دیتی یہ صبح جب شہر کے بڑے چوک میں ا تری تو وہ ایک ایک کر کے اپنی اپنی پناہ گاہوں سے باہر نکلے اور سر جھکائے اپنے اپنے کاموں پر چل دئیے۔ کسی میں اتنا حوصلہ نہیں تھا کہ دوسرے کی طرف دیکھے یا یہ پوچھے کہ یہ رات اتنی گھنی سیاہ اور ڈراؤنی کیوں تھی؟
کئی دنوں تک یہی ہوتا رہا کہ وہ ایک دوسرے سے نظریں ملانے اور بات کرنے سے ہچکچاتے رہے۔ دنوں کے بطن سے ہفتوں اور ہفتوں کے بطن سے مہینوں نے جنم لیا اور پھر بادل گھِر گھِر آئے آئے اور مدتوں بعد شہر کی سوکھی زمین اور پیاسی دیواروں پر بارش کا پہلا چھینٹا پڑا۔
اس دوران وہ اپنے گھر میں بند رہا تھا۔ اس نے اپنے کمرے کی ساری کھڑکیاں ، دروازے اور روشندان بند کر لیے تھے اور کتابوں کی قبر میں دفن ہو گیا تھا۔ جس دن بارش کا پہلا جھونکا آیا، اس نے کتاب کے صفحوں سے سر اٹھا کر روشن دان کے شیشوں پر ناچتی بوندوں کو دیکھا اور کتاب بند کر دی۔ پھر خوب تیز بارش ہوئی۔ میلے شیشے دھل دھل کر صاف ہو گئے اور چمکنے لگے۔ بارش کی ٹھنڈی ٹھنڈی پھوار بند دروازوں کی جھریوں سے گزرتی کمرے میں آنے لگی۔ اس نے سارے دروازے کھول دئیے اور باہر نکل آیا۔ لیکن باہر آتے ہی حیرت اس کی آنکھوں کے کٹوروں میں پھڑپھڑا کر رہ گئی۔ بازار، گلیاں اور سڑکیں جھلمل جھلمل کر رہی تھیں اور خوشیوں سے لدے ہوئے قہقہے روشنیوں کے سیلاب میں تیرتے پھر رہے تھے۔ اس نے حیرت اور پریشانی سے اپنے آپ کو دیکھا اور کہنے لگا، ’’کیا یہ میں ہوں ؟ اور کیا یہ وہی شہر ہے جہاں کچھ عرصے پہلے وہ گھنی سیاہ ڈراؤنی رات اتری تھی؟‘‘
اس نے راہ چلتے ایک شخص کو روکا اور اس سے پوچھا۔۔۔ ’’کیا یہ ہم ہی ہیں ؟‘‘
اس شخص نے اسے گھورا۔۔۔ ’’ہم کون؟‘‘
’’وہی۔۔۔ ‘‘اس نے بے چینی سے کہا، ’’وہی جنہوں نے اُس رات رو رو کر یہ عہد کیا تھا کہ اب اپنے کھیتوں میں منافقت نہیں بوئیں گے۔‘‘
اس نے غصے سے اسے دیکھا اور بغیر کچھ کہے آگے بڑھ گیا۔
اس نے اس رات پہلا خواب دوبارہ دیکھا کہ وہ پھر اپنے بیجوں کو منافقت کے پانی سے سینچ رہے ہیں اور ان کے کھیتوں میں فصل کی جگہ دیواریں اگ رہی ہیں۔
’’بھوک پھر بانٹی جا رہی ہے۔‘‘اس نے بڑے چوک میں اعلان کیا، ’’ہمیں تو کہا گیا تھا کہ بارش ہونے کے بعد بھوک بانٹنے والے بھی ہماری صفوں میں کھڑے ہوں گے۔‘‘
سپاہی اسے پکڑ کر انسپکٹر کے پاس لے گیا۔ انسپکٹر کچھ دیر اسے غور سے دیکھتا رہا، پھر سپاہی سے پوچھنے لگا۔۔۔ ’’یہ وہی ہے نا؟‘‘
سپاہی نے اثبات میں سر ہلا دیا۔
انسپکٹر نے زور سے ہُوں کی اور اس سے کہنے لگا۔۔۔ ’’کیا تکلیف ہے تمہیں۔۔۔ ؟‘‘
اس نے انسپکٹر کی آنکھوں میں جھانکا اور کہنے لگا۔۔۔ ’’میں نے پھر وہی خواب دیکھا ہے۔‘‘
’’اچھا تو تمہیں خواب نظر آتے ہیں۔‘‘ انسپکٹر نے مونچھوں کے سرے مروڑے اور سپاہی سے کہنے لگا۔۔۔ ’’اسے پچھلے کمرے میں لے جاؤ۔‘‘
پھر اس کی طرف دیکھتے ہوئے بولا۔۔۔ ’’اب تمہیں دن کو بھی خواب نظر آئیں گے۔‘‘
اگلے کئی دنوں تک وہ اپنی چوٹوں کو سہلاتے ہوئے یہ سوچتا رہا کہ انہیں پھر بے وقوف بنایا گیا ہے۔
’’ہمارے سکے پھر کھوٹے ہیں۔‘‘اس نے سوچا، ’’ہم ہر بار کھوٹے سکے ہی کیوں چنتے ہیں ؟‘‘
شاید وہ بہت ہی چالاک ہیں ، یا وہ ہر بار نیا روپ بدل کر آتے ہیں ، یا پھر ہم ہی اتنے بے وقوف ہیں کہ ہر بار دھوکا کھا جاتے ہیں۔ کچھ نہ کچھ تو ضرور ہے۔۔۔ کھلیانوں سے بھوک کاٹتے کاٹتے ہماری کمریں دوہری ہو گئی ہیں۔ کارخانوں سے بیماری سمیٹتے سمیٹتے ہمارے سینے چھلنی ہو گئے ہیں۔ لیکن ہماری عقلوں پر پڑے پتھر کسی طرح ہٹتے ہی نہیں۔
اس نے چبوترے پر چڑھ کر صدا دی۔۔۔ ’’فصلوں کی جگہ پھر دیواریں اگ رہی ہیں۔‘‘
اور جب سپاہی آیا تو وہ دوڑ کر گلیوں میں چھپ گیا اور گلیوں کے موڑ کاٹتا ہوا اگلے چوک میں آ نکلا لیکن اس کی ساری صدائیں بے اثر گئیں۔ لوگوں نے ہنستے ہنستے اس کی باتیں سنیں اور ہنستے ہنستے اپنی راہ چلتے بنے۔
لوگوں کے اس روئیے نے اسے گھیر گھار کر پھر کمرے میں دھکیل دیا۔ وہ کئی دنوں تک دروازے کھڑکیاں بند کر کے خواب دیکھتا اور کتابیں پڑھتا رہا۔ قوموں کے عروج و زوال کی کہانیاں تاریخ کے صفحات سے اُڑ اُڑ کر اس کے کمرے کی دیواریں پر اپنا آپ دہراتی ہیں۔ ایک شخص کے بانسری بجانے کی پاداش میں سارے شہر کو جلنا پڑا تھا، لیکن یہاں تو پوری قوم ہی بانسری بجانے میں محو تھی۔ اس کے سامنے کتابوں کے ڈھیر لگتے چلے گئے۔ لفظوں کا لبادہ اتار کر تاریخ نے اس سے پوچھا، ’’مجرموں کو سزا کب ملے گی؟‘‘
وہ بہت دیر سوال کے مختلف پہلوؤں پر غور کرتا رہا، پھر کہنے لگا۔۔۔ ’’لیکن کون کسے مجرم ٹھہرائے گا؟ یہاں تو ساری قوم ہی وعدہ معاف گواہ بنی ہوئی ہے۔‘‘
تاریخ کتابوں میں واپس چلی گئی اور وقت سر جھکائے باہر نکل گیا۔ وہ بھی اس کے پیچھے پیچھے باہر آیا۔ شہر اسی طرح تھا، رنگ برنگے قہقہے، روشنیوں کا سیلاب، ہر شخص بھاگتا ہوا، دوسروں کو گرا کر، آگے بڑھنے کی جستجو میں مگن۔
’’یہ وہی شہر ہے جہاں وہ گھنی سیاہ ڈراؤنی رات اتری تھی؟‘‘ اس نے وقت سے پوچھا۔
وقت مڑے بغیر آگے بڑھتے ہوئے بولا۔۔۔ ’’اور وہ گھنی سیاہ ڈراؤنی رات پھر آ رہی ہے۔۔۔ وہ دیکھو!‘‘
اس نے دیکھا، اُفق کے کناروں سے گھنی سیاہ ڈراؤنی رات آہستہ آہستہ نیچے اتر رہی تھی۔
وہ دوڑتا ہوا اپنے کمرے میں آیا اور اپنی ساری دانش کو لفظوں ، لفظوں کو کتابوں اور کتابوں کو الماریوں میں بند کرنے لگا۔ پھر اس نے دیواروں پر لگی ہوئی ساری تصویریں اتار کر انہیں الٹا لٹکایا اور شہر کے قریبی پہاڑوں کی طرف چل پڑا۔ سب سے اونچی چوٹی پر پہنچ کر اس نے مڑ کر شہر کی طرف دیکھا۔۔۔ مسجدوں کے گنبدوں ، درس گاہوں کے دروازوں ، کیفوں ، ہوٹلوں ، گھروں اور دفتروں ، ہر چیز پر منافقت کی چھاپ لگی ہوئی تھی اور منافقت کی چیلیں سارے شہر پر منڈلاتی پھر رہی تھیں۔۔۔ اس نے منہ پھیر لیا۔ شام کے قریب اسے چھوٹا سا غار نظر آیا۔ سورج کی ڈوبتی روشنی میں اس نے غار کو صاف کیا۔ جیب سے سارے سکے نکالے اور انہیں پھینکتے ہوئے بولا، ’’یہ سارے سکے کھوٹے ہیں۔ میں نے ہمیشہ ہی اپنی جیب میں کھوٹے سکے ڈالے۔ آج میں ان سے نجات حاصل کرتا ہوں۔‘‘
پھر اس نے کپڑے اتارے اور ننگ دھڑنگ غار میں گھس گیا۔
دو راتیں اور ایک دن وہ اندھیروں اور اجالوں سے لڑتا رہا کہ روشنی اور اندھیرے غار کے اندر بھی موجود تھے۔ وہ کہیں بھی جاتا، آنے والی گھنی سیاہ ڈراؤنی رات سے بچ نہیں سکتا تھا۔ تیسرے دن جونہی روشنی نے غار کی دہلیز پار کی، وہ باہر نکل آیا۔ اس کے کپڑے اسی طرح پڑے تھے۔ اس نے کپڑے پہنے، پھینکے ہوئے ایک ایک سکے کو اٹھایا اور انہیں دوبارہ جیب میں ڈالتے ہوئے بولا، ’’ہم نے جو بویا ہے وہ تو کاٹنا ہی پڑے گا، اور میں بھی تو انہی میں سے ایک ہوں۔‘‘
اس نے اُفق کی دہلیز کی طرف دیکھا۔
گھنی سیاہ ڈراؤنی رات زینہ زینہ نیچے اتر رہی تھی۔
اترتی ہی چلی آ رہی تھی۔
٭٭٭

ہابیل اور قابیل کے درمیان ایک طویل مکالمہ

سامان گاڑی میں رکھ دینے کے بعد قابیل، ہابیل سے پوچھتا ہے۔۔۔ ’’تم تو سچ مچ جا رہے ہو؟‘‘
ہابیل اس کی اداس آنکھوں میں جھانکتا ہے۔۔۔ ’’تمہیں اب بھی یقین نہیں۔‘‘
قابیل نفی میں سر ہلاتا ہے۔
ہابیل کہتا ہے۔۔۔ ’’میرے دودھ کے رشتے دھند لا گئے ہیں ، پرانی زمین نے میرے لیے اپنی بانہیں سمیٹ لی ہیں ، اب نئی زمینوں کے ذائقے مجھے پکارتے ہیں۔‘‘
قابیل بے یقینی سے اس کی طرف دیکھتا، پھر کہتا ہے۔۔۔ ’’تمہاری اپنی جڑیں کھوکھلی ہو چکی ہیں اور جب جڑیں کھوکھلی ہو جائیں تو زمین انہیں باہر اُگل دیتی ہے۔‘‘
ہابیل لمحہ بھر کے لیے خاموشی کی گرفت میں پھڑپھڑاتا ہے، پھر کہتا ہے۔۔۔ ’’شاید تم ٹھیک ہی کہتے ہو، لیکن دیوار میں دراڑ آ جائے تو پھر ٹوٹ جانا اس کا مقدر ہو جاتا ہے۔ بس میں اس لمحہ کو نہیں دیکھ سکتا، میں اس سے پہلے پہلے یہاں سے بھاگ جانا چاہتا ہوں۔۔۔ دور۔۔۔ بہت دور۔۔۔ جہاں میرا کوئی نام، کوئی چہرہ نہیں ہو گا۔‘‘
’’نام اور چہرہ تو دودھ کے رشتوں سے ہے اور جب تم یہ رشتے کاٹ رہے ہو تو تمہارا کوئی نام، کوئی چہرہ نہیں۔‘‘
پھر وہ غور سے ہابیل کے چہرے کی ایک ایک پور کو ٹٹولتا ہے، لیکن اس کے کاسے میں اجنبیت کے چند قطروں کے سوا اور کچھ نہیں گرتا۔
’’پھر بھی یوں چلے جانا تو کوئی تُک نہیں۔‘‘
’’تُک‘‘۔۔۔ ہابیل شانے اچکاتا ہے۔۔۔ ’’یہاں تو کسی چیز کی بھی کوئی تُک نہیں ، مثلاً ہم دونوں موجود ہیں ، کیوں۔ اس کی کوئی تُک نہیں۔ میں جا رہا ہوں اور تم مجھے چھوڑنے آئے ہو، اس کی بھی کوئی تُک نہیں۔۔۔ تُک، تُک، تُک۔۔۔ آؤ مل کر گائیں۔۔۔ تُک، تُک، تُک۔‘‘
’’یہ شخص کون ہے؟‘‘۔۔۔ قابیل اپنے آپ سے پوچھتا ہے، یقیناً یہ وہ شخص تو نہیں جسے وہ برسوں سے جانتا ہے اور جس نے کئی گرم دنوں اور ٹھٹھرتی راتوں میں اس کا ساتھ دیا ہے۔
’’تو پھر یہ کون ہے؟‘‘ وہ چپکے سے اس کے بدن کو چھوتا ہے، لیکن ہابیل اپنا آپ چرا لیتا ہے، قابیل کو اس میں سے وہ مانوس مہک نہیں آتی۔
’’تو پھر یہ کون ہے؟‘‘ وہ اس کی آنکھوں میں ابھرتی روشنیوں کو پڑھنے کی کوشش کرتا ہے، ان ویران، کھنڈراتی آنکھوں میں یہ روشنی کہاں سے آ گئی۔ وہ اس روشنی کو پکڑنے کی کوشش کرتا ہے، لیکن جب روشنی اس کے ہاتھوں میں آ کر نکل نکل جاتی ہے، تو وہ پوچھتا ہے۔۔۔ ’’تم نے یہ چمک کہاں سے لی؟‘‘
ہابیل ہنستا ہے، ہنستا ہی چلا جاتا ہے، پھر جب ہنسی کی گرد دھیرے دھیرے بیٹھنے لگتی ہے تو اس قوسِ قزح میں سے اداسی کا پہلا قطرہ گرتا ہے۔ وہ کچھ دیر چپ چاپ اسے دیکھتا رہتا ہے، پھر کہتا ہے۔۔۔ ’’ہوائیں اپنی پہچان کھو چکی ہیں ، اب بادلوں سے پانی کی بجائے بھوک برستی ہے اور شناسائی کے سارے پرانے رشتے ٹوٹ گئے ہیں۔ تم جانتے ہو،چراغ بجھنے سے پہلے پھڑپھڑا تا کیوں ہے؟‘‘
’’ہاں میں جانتا ہوں اور مجھے یہ بھی معلوم ہے کہ جنہوں نے اپنی آوازیں بیچ ڈالی ہیں وہ بند کمروں میں چیختے ہیں۔‘‘
ہابیل چابک کھائے ہوئے گھوڑے کی طرح بدک کر اس کی طرف دیکھتا ہے۔۔۔ ’’کچھ بھی ہو میں نے آواز کو ہمیشہ مقدس جانا ہے، تم جانتے ہو جب سب آوازوں کو نقرئی ڈبیوں میں بند کر رہے تھے، میں نے بجھے ہوئے الاؤ کو کریدا تھا۔‘‘
’’ہاں۔‘‘ قابیل اعتراف کرتا ہے۔ ہابیل کی زندگی کے سارے سانس لیتے اوراق اس کی آنکھوں میں پھڑپھڑانے لگتے ہیں ، وہ کَن اَکھیوں سے ہابیل کے چہرے کو چاٹتا ہے، لیکن اسے شنائی کی مٹھاس نہیں ملتی۔
یہ سپاٹ چہرہ کس کا ہے؟
دونوں چپ ہو جاتے ہیں ، خوف کی ابابیلیں ان کے چاروں طرف منڈلاتی ہیں اور جدائی کے کنکر ایک ایک کر کے ان پر پھینکتی ہیں۔
ایک بات بار بار قابیل کے ہونٹوں تک آ کر بے شباہت ہوئی جاتی ہے، آخر وہ پوچھ ہی لیتا ہے۔۔۔ ’’مال کمانے جا رہے ہو؟‘‘
ہابیل چند لمحے کے لیے ساکت رہ جاتا ہے، پھر کہتا ہے۔۔۔ ’’تم مجھے گدھ سمجھتے ہو جو پرانی لاش کو چھوڑ کر تازہ لاش کی تلاش میں جا رہا ہو۔‘‘
’’تو پھر کیوں جا رہے ہو؟‘‘
’’اب بادلوں سے ہریالی کی بجائے بنجر پن برستا ہے۔ میں اسے پیاس سے تڑپ تڑپ کر مرتے ہوئے نہیں دیکھ سکتا، میں اس سے دور بھاگتا رہا ہوں۔ اس کی چھاتیاں سوکھ رہی تھیں اور میں تتلیاں پکڑ رہا تھا، اس کی گود تو ہمیشہ میرے لیے کھلی رہی، میں ہی اس کے قریب نہیں گیا، مجھے جانے ہی نہیں دیا گیا۔ یقین جانو، میں اس کے قریب ہونا چاہتا تھا، لیکن میرے ارد گرد رنگین تتلیاں چھوڑ دی گئی تھیں۔ اور اب جب کہ اس کی چھاتیاں سوکھ گئی ہیں ، میں اپنا تڑخا ہوا چہرہ لے کر اس کے سامنے نہیں جا سکتا۔‘‘
قابیل اس کا ہاتھ پکڑ لیتا ہے۔۔۔ ’’اور بھی تو ہیں۔‘‘
ہابیل فوراً ہاتھ چھڑا لیتا ہے۔۔۔ ’’لیکن میرا عذاب یہ ہے کہ میں جانتا ہوں۔‘‘
خاموشی قطرہ قطرہ ان پر گرتی ہے، پھر دھیرے دھیرے خاموشی کا گھونگھٹ ہٹا کر پلیٹ فارم کا شور گراں مارتا ہوا باہر آتا ہے اور ان کے گرد بھنگڑا ڈالنے لگتا ہے۔ ہے جمالو۔۔۔ ہے جمالو۔۔۔ ہے جمالو۔۔۔ ’’جمالو بھی بے وفا نکلی۔‘‘۔۔۔ قابیل کی آواز سوکھتی چلی جاتی ہے۔
’’ہم بھول گئے تھے کہ جمالو نے بھی انہی بے وفا ہواؤں کا دودھ پیا ہے، اصل میں ہم ہی اندھے ہیں۔‘‘
اندھا پن، تاریکی اور خاموشی انہیں اپنی گود میں سمیٹ لیتے ہیں۔
گارڈ پہلی وسل دیتا ہے۔
قابیل کو یاد آ جاتا ہے کہ ہابیل جا رہا ہے۔
’’تو تم سچ مچ جا رہے ہو۔‘‘
’’ہاں۔۔۔ ‘‘ وہ اس کے کندھے پر ہاتھ رکھتے ہوئے کہتا ہے۔۔۔ ’’اور جانے سے پہلے میں اپنا نام اور چہرہ یہیں چھوڑے جا رہا ہوں۔‘‘
گارڈ وسل دیتا ہے۔
وہ دوڑ کر ڈبے میں چڑھ جاتا ہے۔
گاڑی سٹیشن کی گود سے پھسل کر اندھے فاصلوں کے پیٹ میں سرک رہی ہے۔
قابیل چیختا ہے۔۔۔ ’’لوٹ کر کب آؤ گے؟‘‘
لیکن فاصلے کا اندھا پن اس کی آواز اور ہلتے ہاتھ، دونوں کو نگل لیتا ہے۔
وہ آہستہ آہستہ جیسے کوئی خواب میں چل رہا ہو، گھر کی طرف چل پڑتا ہے۔ اداسی اور سنسناہٹ اس کے ساتھ ساتھ گھسٹ رہی ہیں۔
وہ سوچتا ہے، اگر لوگ اسی رفتار سے جاتے رہے تو ایک دن وہ اس شہر میں اکیلا رہ جائے گا۔
بالکل اکیلا،
الف اکیلا،
اوپر خدا، نیچے زمین
اور درمیان میں وہ الف اکیلا۔۔۔
وہ آسمان کی طرف منہ کر کے چلّاتا ہے۔۔۔ ’’آ جاؤ یار۔۔۔ نیچے آ جاؤ، اکیلے اداس ہو رہے ہو، آ جاؤ مل کر رہیں۔‘‘
ایک تیز رفتار کار سائیں سائیں کرتی، ہوا کے دائرے کاٹتی، اس کے قریب سے گزر جاتی ہے۔
کار والا کھڑکی سے منہ نکال کر چیختا ہے۔۔۔ ’’اندھے۔‘‘
وہ فوراً اپنے آپ میں لوٹ آتا ہے،
اسے یاد آتا ہے۔۔۔ ہابیل جا چکا ہے۔
فاصلہ دونوں کے درمیان اپنی بانہیں پھیلا چکا ہے۔
وہ دوڑ کر واپس آتا ہے، پلیٹ فارم ویرانی اور اداسی کی گود میں سر رکھے سو رہا ہے۔ چمکتی لائنیں گاڑی کو اپنی بانہوں میں اٹھا کر بہت دور چھوڑ آئی ہیں۔
وہ لائنوں کے ساتھ ساتھ دوڑتے ہوئے چیختا ہے۔۔۔ ’’ہابیل! مجھے قتل تو کرتے جاؤ، ہابیل! مجھے قتل تو کرتے جاؤ۔‘‘
لیکن اس کی صدا سنّاٹوں سے سر مار مار کر خالی جھولی لیے لوٹ آتی ہے۔
وہ قریب سے گزرتے ہوئے ایک شخص سے پوچھتا ہے۔۔۔ ’’تمہیں معلوم ہے، برسوں پہلے قابیل نے ہابیل کو کیوں قتل کیا تھا؟‘‘
وہ شخص اسے حیرت سے دیکھتا آگے بڑھ جاتا ہے۔
’’تمہیں معلوم نہیں۔‘‘ لفظ اس کے ہونٹوں کے پیالے سے قطرہ قطرہ ٹپکتے ہیں ، ’’لیکن میں جانتا ہوں ، شہر خالی ہو گیا تھا اور ان دونوں کے درمیان وہ آگیا تھا، جس کا کوئی نام نہیں۔ ایک دن موقع پا کر وہ ہابیل کے جسم میں گھس گیا اور قابیل نے ہابیل کو قتل کر دیا، لیکن اب وہ کہاں ہے؟‘‘
وہ اپنے آپ کو ٹٹولتا ہے۔
نہیں ، وہ میرے اندر نہیں اور وہ ہابیل کے اندر بھی نہیں تھا۔ تو پھر وہ کہا ں ہے؟
وہ چاروں طرف دیکھتا ہے، چھوتا ہے، چھکتا ہے، سنتا ہے، سونگھتا ہے۔ اب وہ کسی کے اندر نہیں گھستا، بلکہ باہر رہ کر چہروں پر جالے بُنتا اور ناموں کو دیمک بن کر چاٹتا ہے۔
ہابیل کے چہرے پر بھی اسی نے جالا بُن دیا تھا اور اب وہ میرے چہرے پر بھی جالا بُن رہا ہے تاکہ زمین میرے لیے بھی اپنے چشمے بند کر دے اور میں بھی چلا جاؤں۔ وہ ایک ایک کر کے سب کو بھگا دینا چاہتا ہے، تا کہ اکیلا رہ جائے اور ساری چیزیں اس کی جھولی میں سمٹ جائیں۔
’’لیکن میں باہر نہیں جاؤں گا۔‘‘ وہ دور گم ہوتی دھوئیں کی لکیر کی طرف منہ کر کے چیختا ہے۔۔۔ ’’ہابیل! میں تمہاری طرح نہیں بھاگوں گا۔ میں اسی تڑخے ہوئے چہرے کے ساتھ اس کے پاس جاؤں گا اور اس کی سوکھی چھاتیوں سے لپٹ کر۔۔۔ اس سے کہوں گا کہ وہ اپنے بند چشمے کھول دے۔‘‘
لیکن یہ چہروں پر جالے بُننے والا ہے کون؟
اس کا نام کیا ہے؟
٭٭٭

پھسلتی ڈھلوان پر نروان کا ایک لمحہ

اس نے اپنے چہرے کی خشک پتیوں میں سرسراتی ہوئی زردی کو آواز کے پیالے میں پھینٹتے ہوئے دوسرے کو دیکھا اور بولا۔۔۔ ’’وہ جگہ بڑی عجیب ہے، بارش کی کنیاں ایک ایک کر کے نیچے اترتی ہیں ، لیکن جب اوپر دیکھتے ہیں تو آسمان پر دور دور تک بادل نظر نہیں آتے۔ اسی لمحے اندھیرے کی بکل میں سے ایک عورت نکلتی ہے اور کہتی ہے۔۔۔ وے رانجھنا تو کہاں چلا گیا تھا اور۔۔۔ ‘‘
’’اور پھر۔۔۔ ‘‘
’’پھر یہ کہ اگلے ہی لمحے وہ عورت اپنی آواز کی طرح اندھیرے میں گھل جاتی ہے۔‘‘جملہ ختم کر کے اس نے اپنا سر اپنے اندر ڈال لیا اور چیخ کر پوچھا۔۔۔ ’’میں کون ہوں ؟‘‘
جواب ملا۔۔۔ ’’ایک خفیف ذرّہ‘‘
اس نے اپنی سوکھتی ٹہنیوں میں تازہ سبزہ دوڑتا محسوس کیا اور اپنا سر باہر نکال کر کہنے لگا۔۔۔ ’’جب وہ رانجھنا کہہ کر اندھیرے کے تہہ خانے میں اتر گئی تو میں اسے تلاش کرتا ہوا آگے بڑھا اور گھنے جنگلوں کا آنچل ہٹاتے ہوئے کھلے میدان میں نکل آیا۔‘‘
اتنا کہہ کر وہ اپنے جسم کی فصیل سے آدھا نیچے لٹک گیا اور بولا۔۔۔
’’لیکن۔۔۔ یہ میں ہے کیا۔۔۔ کیا میں ہوں ؟‘‘
درخت کی اس الگ تھلگ ٹہنی پر
جہاں پتیوں کی نحیف رگوں میں
موت زردی بن کر
سرسرا رہی ہے
جہاں اک اَن دیکھا سرد ہاتھ
جڑوں کو ریشوں سے جدا کر رہا ہے
جہاں زندگی کے نیون سائن کے سارے رنگ
جلنا بجھنا بھول کر
اک خاموش گھنیری چپ کی تسبیح پھیر رہے ہیں
وہاں۔۔۔ کیا میں ہوں
کیا میں ہوں
اس نے پھر کچھوے کی طرح اپنا سر اپنے اندر گھسیڑ لیا اور کچھ تلاش کرنے لگا۔ بہت دیر بعد جب اس نے سر باہر نکالا تو دوسرے نے پوچھا۔۔۔ ’’کچھ ملا؟‘‘ اس نے سر ہلایا اور بولا۔۔۔ ’’میرے دل کی جگہ ایک خلا ہے جس میں سے ہوا سرسراتی ہوئی گزرتی ہے۔ میں تو بس اس کی سن سناتی ہوئی سیٹیاں ہی سنتا ہوں۔‘‘
دوسرے نے اپنی آنکھوں کی کھڈی پر فکر کی موٹی چادر بُنی اور پھر اسے ادھیڑتے ہوئے کہنے لگا، ’’کہیں ایسا تو نہیں کہ تمہارا دل پنجرے کی طرح ہے، جس میں ایک ننھا سا پرندہ بند ہے۔‘‘
اس نے سر ہلا کر اقرار کیا اور آنسوؤں سے اپنا منہ دھوتے ہوئے آسمان کی طرف دیکھا اور بولا،
اے شہر کی ٹھنڈی ہواؤ
گھنے سیاہ بادلوں سے کہو کہ اپنے حاملہ پیٹ کھولیں
اور پانیوں کے تازہ بچے
ہماری کھلی گودوں میں ڈالیں
ہم جو بھیگنے کی دعائیں لے کر مسلسل چل رہے ہیں
ہمارے پاؤں کے تلوؤں میں
اک ایسی پھسلن چھپی بیٹھی ہے جو ہمیں
رکنے نہیں دیتی
اے بے مروّت بارشو
ہم پر برسو۔۔۔ خوب برسو
کہ ہمارے جسموں کی مٹی گھرنے لگے
اور ہمارے اندر چھپا ہوا
سنسان، تنہا کھنڈر باہر نکل آئے
اور اس میں چھپا
وہ ننھا سا خوب صورت پرندہ
پھڑپھڑا کر اُڑ جائے
آسمان کی نیلی وسعتوں کی سمت
اپنے گھر کی طرف۔۔۔ !
دوسرے نے اپنے ہاتھ نیچے گرا لیے اور بولا۔۔۔ ’’اسے رہائی مبارک ہو۔‘‘ اس نے اَن سنی کرتے ہوئے اپنی بات جاری رکھی، ’’میدان کے بیچوں بیچ ایک ٹیلے پر وہ مقبرہ تھا، میں آہستہ آہستہ اس کے قریب چلا گیا۔ دروازہ کھلا ہوا تھا، اندر جانے سے پہلے مجھے لگا میں کسی کھنڈر کی دہلیز پر کھڑا ہوں۔‘‘
یہ کہہ کر اس نے افسوس سے دونوں ہاتھ ملے اور کہنے لگا۔۔۔ ’’مجھے یوں محسوس ہوتا ہے جیسے میں ایک کھنڈر ہوں جس پر گوشت کی تہہ چڑھا دی گئی ہے۔۔۔ میں اپنے اندر سے کھوکھلا ہوں۔‘‘
اس نے پھر اپنا سر اپنے اندر ڈالا اور چیخ کر بولا۔۔۔ ’’اگر میں کچھ نہیں تو پھر وہ کیا ہے؟‘‘
’’وہ‘‘۔۔۔ دوسرے نے لفظوں کو اپنی بھو کی زبان سے چاٹا۔۔۔ ’’وہ۔۔۔ وقت ہے۔‘‘
جو موسموں کے تند کلہاڑوں سے ہمارے جسموں کو گودتا ہے کہ ہم اس کی تعریف میں گیت گائیں
اور پھر سیکنڈوں ، منٹوں اور گھنٹوں کی تیز چکّی میں پس کر
ریزہ ریزہ ہو جائیں۔
’’تو وہ بھی میری طرح شک کی مٹھیوں میں ہے۔‘‘ اس نے اپنا سر باہر نکالا اور بولا، ’’تو میں مقبرے کے اندر چلا گیا۔ ایک ویران سی قبر کے سرہانے وہی عورت بال کھولے کھڑی تھی۔ میں نے اس کی نظروں کے تعاقب میں اوپر دیکھا۔ مقبرے کا اوپر والا حصہ کھلا ہوا تھا۔ عورت مجھے دیکھ کر ہنسی اور قبر کی چادر ہٹا کر اندر چلی گئی۔‘‘
دوسرے نے اس کے خاموش ہوتے ہی سوال اس کے آگے پھینک دیا۔۔۔ ’’رشتوں اور چہروں کا آپس میں کیا تعلق ہے؟‘‘
رشتے اور چہرے
سبز مخملی کپڑوں میں لپٹی اس زمین پر
جڑواں بھائی ہیں
اور جدائی
سفر کی صورت
ایک پھسلتی ہوئی ڈھلوان ہے
’’جب وہ عورت قبر کی چادر ہٹا کر اندر چلی گئی‘‘ اس نے ٹوٹے ہوئے قصے کے تار جوڑتے ہوئے کہا۔۔۔ ’’تو میں آگے بڑھا۔ تازہ آسمان گنبد کے کھلے منہ میں سے جھانک رہا تھا۔ میں نے خود سے کہا۔۔۔ بھلا یہ گنبد کھلا کیوں ہے؟‘‘
عورت نے قبر کی چادر ہٹا کر منہ باہر نکالا اور بولی۔۔۔ ’’چھتیں ڈائنوں کی طرح ہیں جو آزادیوں کے نوزائیدہ بچوں کو کھا جاتی ہیں۔‘‘
’’کیا وہ خوب صورت تھی؟‘‘دوسرے نے پوچھا
’’ہاں ! حسن اس کے چہرے پر منجمد ہو گیا تھا۔‘‘
’’کیا وہ بھی حسن ہے؟‘‘ اس نے خود سے پوچھا۔۔۔ ’’اور کیا حسن بھی عمر کے گھوڑے پر سوار ہوتا ہے اور کیا وہ بھی فنا کی پھسلتی ڈھلوان پر ہے؟‘‘ اس نے افسوس سے دونوں ہاتھ ملے۔۔۔
جواں دہکتے چہرے لمحہ بھر کے لیے
ہمارے سامنے آتے ہیں ،
اور پھر بوڑھی زرد تھکاوٹ انہیں ہم سے
چھین کر لے جاتی ہے
اور پھر عمر کی بھٹی میں پگھلا کر
جب انہیں دوبارہ ہمارے سامنے لاتی ہے
تو وہ بنجر گوشت کا بانجھ لوتھڑا
ہوتے ہیں
’’تو اس کا مطلب یہ ہے کہ وہ حسن بھی نہیں ، وہ عمر بھی نہیں ، کہ عمر تو خود وقت کے ہاتھوں میں ایک پھسلتی ہوئی رسی ہے، تو پھر وہ کیا ہے؟‘‘
دوسرے نے شانے ہلائے اور بولا۔۔۔
شاید وہ خود زندگی کی آنکھ سے گرا
ہوا آنسو ہے
جو وقت کے موٹے کرتے میں جذب ہو گیا ہے
اور اب
ہماری سانسوں کی پتوار سے چپکا
ہم سے اپنے نام کی گواہی لے رہا ہے
اور ہمارے لفظوں میں
اپنے نام کے حرف ڈھونڈ رہا ہے
’’پھر یہ ہوا کہ میں قبر کے قریب چلا گیا۔‘‘
’’پھر‘‘۔۔۔ دوسرے نے تجسّس سے پوچھا۔
’’پھر میں نے قبر کی چادر ہٹا کر اندر جھانکا، اندر اندھیرا تھا۔ میں قبر کے اندر اتر گیا، سیڑھیاں تاریکی کے پیٹ میں نیچے تک گئی ہوئی تھیں ، میں ایک ایک کر کے نیچے اترتا رہا۔ پھر تاریکی نے اپنے بازو کھولے۔ درمیان میں ایک چبوترا تھا جس پر۔۔۔ !‘‘
وہ چپ ہو گیا۔
’’جس پر۔۔۔ ؟‘‘ دوسرے نے جلدی سے پوچھا۔
’’کوئی بھی نہیں تھا‘‘ لفظ اس کی زبان پر اٹک گئے۔۔۔ ’’قبر خالی تھی۔‘‘
’’کوئی بھی نہیں تھا؟‘‘ دوسرے نے بیتابی سے پوچھا۔۔۔ ’’پھر۔۔۔ ‘‘
’’میں نہیں جانتا، میں کچھ بھی نہیں جانتا۔‘‘
وہ چیخنے لگا۔۔۔ ’’وہ کیا ہے اور کہاں ہے، میں کون ہوں اور کیا ہوں ؟‘‘
دونوں زور زور سے چیخنے لگے۔ پھر دونوں چپ ہو گئے۔
بہت دیر بعد دونوں نے سر اٹھا کر ایک دوسرے کو دیکھا۔ ایک دوسرے کے قریب گئے۔ پھر انہوں نے ایک دوسرے کے ساتھ اپنے سر بدلے، اپنی آنکھیں بدلیں اور ایک دوسرے کو دیکھ کر مسکرائے۔
وہ بولا۔۔۔
وقت کے ہونٹوں کی ٹہنیوں پر ہمارے نام
کی کونپلیں پھوٹتی ہی نہیں
اس کی ونجلی کی لَے میں ہمارے جسموں کا شہد
گھلتا ہی نہیں
ہمارے لیے زندگی اب کورے کاغذ کی طرح ہے
کہ ہم جس بوڑھے شہر میں رہ رہے ہیں
اس کی ہوا بھی حاملہ ہو چکی ہے
اور اب
ہمارے سروں پر چیختے چنگھاڑتے
منڈلاتے ہوئے
آنے والے بچے کی اذیت کا دکھ سہہ رہی ہے
اور کہہ رہی ہے
ہم سب بانجھ چالاک لفظوں کی مملکت میں
اک بے چہرہ عصر کی بے صدا آوازیں ہیں
اور کچھ بھی نہیں
صدا اور زمانہ دونوں جڑواں بھائی تھے
لیکن اب دونوں کا رشتہ ٹوٹ چکا ہے
زمانہ اب میلے کاغذوں پر لکھا ہوا اِک بے معنی گیت ہے
جس کے ترنم کی سب طنابیں ٹوٹ چکی ہیں
اور آواز۔۔۔ آواز تو اب
مشینوں کے چلنے، بند ہونے کا ایک طے شدہ عمل ہے
جس میں زاویوں کے بدلنے، رنگوں کے پھیلنے
اور راتوں کے طشت پر ناچتے چاند کی کوئی کہانی نہیں ہے
اب سیاہ رات ایک بانجھ عورت کی طرح
روشنی کو حسد کی سلائیوں سے چھیدتی ہے
اور ہم
ہم جو یہ سب دیکھتے ہیں
شہادت کی انگلی سے ہونٹوں کے کھلے دروازوں پر چپ کی مہر لگا کر آنے والے لفظوں کی بصارت چھینتے ہیں۔
کہ ہونٹوں کی چلمنوں کے پیچھے چھپے ہوئے سارے لفظ
اب فاحشہ عورتیں ہیں
وہ چپ ہوا تو دوسرا بہت دیر تک سوچتا رہا، پھر بولا۔۔۔ ’’افسوس! میں نے تمہیں رہائی کی جو مبارک دی تھی وہ ضائع ہوئی کہ ہم تو ابھی تک اسی طرح قید ہیں۔‘‘
’’ہاں ‘‘۔۔۔ اس نے سر ہلایا۔۔۔ ’’ہم لفظوں کی اس مملکت میں ’’ہے‘‘ اور ’’نہیں ‘‘ کی بھول بھلیوں میں بھٹک رہے ہیں اور لفظ۔۔۔ لفظ تو اب فاحشہ عورتیں ہیں۔‘‘
اور وہ دونوں ایک دوسرے کے گلے لگ کر بلک بلک کر رونے لگے۔
٭٭٭

لا =؟

اس نے اپنے آپ کو سزا دی ہے،
کہ زہر کا پیالہ پی لے، یا جلا وطن ہو جائے، لیکن بزدلی بچپن ہی سے اس کے دل کے آنگن میں گداں مارتی چلی آئی ہے اور موت نے کئی بار اس کے گھر پر شب خون مارا ہے، اس لیے اس نے جلا وطن ہونے کو ترجیح دی ہے، لیکن جانے سے پہلے وہ رشتوں کی ان تمام ڈوریوں کو کاٹ پھینکنا چاہتا ہے، جن سے اس کی زندگی کی کشتی کا مستول بندھا ہوا ہے۔
وہ کئی سالوں سے سیدھی زندگی گزار رہا تھا کہ ایک دن ایک چیل اڑتی ہوئی آئی اور اس کے کندھے پر بیٹھ گئی۔ اس نے چیل کو اڑانے کی بہت کوشش کی، لیکن چکر کاٹ کر وہیں آ بیٹھی اور اپنی چونچ سے اس کے جسم پر بے اطمینانی کے بچے اگانے لگی۔ اس دن وہ ڈر سے باہر نہیں نکلا کہ لوگوں کی آنکھوں کی تسبیح میں پروئے ہوئے سوالوں کے جواب کہاں سے لائے؟ لیکن جب رات نے دیواروں پر دستک دے کر اندھیرے کے مشکیزے کا منہ کھولا تو اس نے چیل کو اڑانے کی ایک کوشش اور کی، لیکن چیل سیاہی کی چسکی لے کر وہیں آ بیٹھی، اس رات بے خوابی اس کے بستر پر ناچتی رہی۔ صبح جب روشنی نے رات کے ٹھٹھرتے بدن پر کرنوں کی چادر ڈالی تو اس نے دیکھا کہ چیل ساری رات اس کے جسم پر ناچتی کھودتی رہی تھی اور اب آلنا بنا کر اس کے دل پر بیٹھ گئی تھی۔
اس کی چونچ اس کے ہونٹوں پر
اس کے کان، اس کے کانوں میں
اس کی آنکھیں اس کی آنکھوں میں
اور اس کا جسم اس کے جسم میں رَچ بس گیا تھا
وہ بوکھلا کر باہر بھاگا
لوگوں کے جسموں میں دھوئیں کے تنور لگے ہوئے تھے اور ان کے مساموں سے بدبو دار شے رِس رہی تھی۔
اس نے اپنے جسم پر ہاتھ پھیرا۔۔۔ اس کے نتھنوں نے ایک نئے احساس کو سونگھا۔ اس نے قریب سے گزرتے ہوئے ایک شخص کو ٹھونگا مارا۔ اس شخص نے مڑ کر دیکھا اور ہنستا ہوا آگے بڑھ گیا،
اب تم ہی بتاؤ، میں کیا کروں ؟
اذیتیں میرے راستوں کے سبھی موڑوں پر چھپی ہوئی ہیں
گھات لگائی بیٹھی ہیں
اور میں قطرہ قطرہ مر رہا ہوں
میں اس شہر میں ، جہاں ہر شخص اپنی خوشبو چھوڑ چکا ہے
اپنے خوشبو دار جسم کے ساتھ کیسے رہوں ؟
کل وہ مجھے ملا تھا
میں نے پوچھا۔۔۔ ’’کیسے ہو؟‘‘
کہنے لگا، ’’چیل اڑ گئی ہے۔ وہ مجھے چھوڑ گئی ہے۔‘‘
خوف اور اذیت کے جہاز ساری رات اور سارا دن اس کی پلکوں کے رَن وے سے اپنے پہئے چھواتے رہتے ہیں اور اَن دیکھا دکھ کاک پٹ سے اچھل کر باہر نکلتا ہے۔ اس کے شور کی باڑیں پھلانگ کر اس کے وجود کے گلی کوچوں میں دوڑتا رہتا ہے۔
یہ جانے کتنی ویں رات ہے کہ اس کا جسم اسے بستر کی گور میں یوں اکیلا چھوڑ کر باہر نکل گیا ہے۔ ان ساری گزرتی ہوئی راتوں میں وہ اسی طرح خوف اور اذیت کے میدان میں فٹ بال کی طرح ایک ٹھوکر سے دوسری ٹھوکر پر ناچتا رہا ہے۔ ہر رات سونے سے پہلے وہ یہ عہد کر کے سوتا ہے، آج رات وہ اپنے جسم کو باہر نہیں جانے دے گا۔ لیکن آدھی رات کو باہر سے آواز آتی ہے اور اس کا جسم اسے چپکے سے ایک طرف کر کے باہر نکل جاتا ہے۔
اس نے مجھے بتایا ہے کہ آدھی رات کو وہی چیل اسے آواز دیتی ہے،
’’تو پھر اب تم نے کیا سوچا ہے؟ کیا اب بھی بیعت نہیں کرو گے؟‘‘
اس کے ہونٹوں میں پھیکی مسکراہٹ کا نغمہ پھوٹا اور وہ مری ہوئی آواز میں بولا۔۔۔ ’’میری آنکھوں میں ابھی دوسرے نہیں آئے۔‘‘
’’آواز گونجتی ہے تو زندگی جاگ اٹھتی ہے۔‘‘۔۔۔ یہ بات اس نے کئی دن پہلے مجھ سے کہی تھی۔
میں نے پوچھا تھا۔۔۔ ’’آجکل کہاں رہتے ہو، نظر نہیں آتے؟‘‘
وہ کچھ دیر سوچتا رہا، پھر بولا۔۔۔ ’’پتہ نہیں۔‘‘
پھیلے ہوئے بے سمت فاصلوں کے
اندھے پیٹ میں
وہ رفتار کی ٹھہری ہوئی سوئی میں پرویا
ہر روز اپنی چونچ سے اپنی قبر کھودتا ہے
اور اپنے پروں سے مٹی اڑاتا ہے
وہ مٹی
جو اس کے بدن سے لمحہ بہ لمحہ جھڑ رہی ہے
ہر نئی صبح کا سورج
زیرو کے بلب کی طرح، بے بسی سے
اس کے جسم کی گھنی تاریک راہداریوں میں
منٹوں ، سیکنڈوں اور گھنٹوں کی خیرات بانٹتا ہے
اسے ایک اور دن زندہ رکھنے کے لیے
سانسوں کا انجکشن لگاتا ہے
’’کسی سے خوف زدہ ہو؟‘‘
’’ہاں ‘‘
’’کس سے؟‘‘
’’میں نہیں جانتا، میں صرف اس کے قدموں کی چاپ سنتا ہوں۔‘‘
آواز۔۔۔ آواز۔۔۔ آواز
ہونہہ
اب تو آوازیں ردّی کاغذوں کی طرح بے اثر ہو چکی ہیں اور گندی ٹوکریوں میں دم توڑ رہی ہیں
زبانوں پر زہر کے سر کنڈے اُگ آئے ہیں
ہونٹوں کی بیلوں پر منافقت کی پیلی پتیاں کھِل اٹھی ہیں
مکانوں میں تو اب صرف سائے سر سرا رہے ہیں
اور بدنوں کی چار دیواریوں میں شک کے حمل ٹھہر چکے ہیں
’’تو اب تم شاعری کرنے لگے ہو؟‘‘
’’شاعری۔۔۔ یہ شاعری ہے، مجھے تو نہیں معلوم۔‘‘
’’آج کل کیا سوچ رہے ہو؟‘‘
اس نے کندھے جھٹکے۔۔۔ ’’پتہ نہیں ‘‘
خوف اور اذیت کا یہ کھیل اب دن کی روشنی میں اپنی پہچان کرانے لگا ہے۔ اس کا جسم اب دن کو بھی اس کا ساتھ چھوڑ دیتا ہے۔ وہ جب بھی اسے پکڑنا چاہتا ہے تو جسم ہاتھ پکڑ کر اسے پرے کر دیتا ہے اور کہتا ہے۔۔۔ ’’مجھے زندہ رہنا ہے اور زندہ رہنے کے لیے مجھے وہی کچھ کرنا پڑے گا جو دوسرے کرتے ہیں۔ ورنہ تم ہی کوئی راستہ بتاؤ۔‘‘
اس کے پاس کوئی جواب نہیں
کوئی راستہ نہیں
کہنے لگا۔۔۔ ’’اب تو یوں لگتا ہے جیسے ہر سانس کے ساتھ ہوا کی بجائے اذیت میرے اندر جاتی ہے۔‘‘
میں نے کہا۔۔۔ ’’تو بیعت کر لو۔‘‘
اس نے انکار میں سر ہلایا۔۔۔ ’’ابھی میں نے دوسروں کی آنکھوں سے دیکھنا اور دوسروں کے کانوں سے سننا نہیں سیکھا۔‘‘
سر کنڈوں میں بیٹھی ہوا
سیٹیاں بجا بجا کر پوچھتی ہے،
تم کون ہو۔۔۔ تم کون ہو؟
آؤ میرے ہاتھ پر بیعت کر و
چلو میرے ساتھ چلو
آؤ میں تمہیں منافقت کے دودھ میں
گندھی ہوئی روٹی کھلاؤں
اس گندے جوہڑ کا پانی پلاؤں
جہاں لمحہ بہ لمحہ رنگ بدلنے والے مگرمچھ رہتے ہیں
’’اب تم ہی بتاؤ، میں کہاں تک خود کو بچائے رکھوں۔‘‘
اس نے دونوں ہاتھوں سے میرے شانے پکڑ لیے اور بولا۔۔۔ ’’جب میں پیدا ہوا تھا تو میرے باپ نے میرے کان میں اذان دی تھی۔‘‘
پھر اس نے میری طرف دیکھ کر پوچھا۔۔۔ ’’تمہارے باپ نے بھی تمہارے کان میں اذان دی تھی؟‘‘
میں نے کہا۔۔۔ ’’مجھے تو یاد نہیں۔ اگر دی بھی تھی تو میں اسے بھول گیا ہوں۔‘‘
اس نے سر ہلایا۔۔۔ ’’لیکن میرے کانوں میں تو وہ آواز اب بھی گونجتی ہے، کہیں ایسا تو نہیں کہ میں ابھی ابھی پیدا ہوا ہوں۔‘‘
’’شاید یہ ٹھیک ہے، اسی لیے تمہیں آس پاس کی ہر شے اجنبی لگتی ہے یا پھر یوں ہے کہ تم پیدا ہوتے ہی مر گئے تھے اور اب پھر پیدا ہوئے ہو۔‘‘ اس نے میری آنکھوں میں جھانکا اور پوچھا۔۔۔ ’’کیا کوئی شخص ایک ہی زندگی میں دوسری بار پیدا ہو سکتا ہے؟‘‘
’’ہم ہر روز پیدا ہوتے ہیں اور ہر روز مرتے ہیں۔ میری دادی کہا کرتی تھیں ، آدمی جس روز پیدا ہوتا ہے، اسی روز اس کی قبر بھی کھد جاتی ہے اور ہر رات کو قبریں اپنے اپنے آدمی کو پکارتی ہیں اور کہتی ہیں ،
اے میرے محبوب
دیکھ میں تیرے فراق میں پہاڑ ایسی کالی راتیں
کسی بے کلی سے کاٹ رہی ہوں
آ میرے سینے سے لگ جا
’’آ۔۔۔ آ۔۔۔ آ۔۔۔ ‘‘
’’یار تمہاری دادی بڑی عقلمند عورت ہے۔ اب وہ کہاں ہے، میں اس سے اپنے بارے میں کچھ پوچھنا چاہتا ہوں۔‘‘
’’اس نے اپنی قبر کی آواز سن لی تھی۔‘‘
’’لیکن اب قبروں کی آوازیں کون سنے گا؟ اب تو سب نے اپنے کانوں میں پگھلا ہوا سیسہ ڈال لیا ہے۔‘‘
’’ہاں اب تو ہم دوسروں کے کانوں سے سنتے ہیں۔‘‘
’’اچھا ایک بات بتاؤ؟‘‘
’’پوچھو‘‘
’’کیا اس شہر کے سارے لوگ میلے پر آئے ہوئے ہیں ؟‘‘
’’کیوں ؟‘‘
’’کسی کو کسی چیز کی فکر ہی نہیں۔ دیکھو نا، رات سورج کا کلیجہ چبا کر اب اس کی ہڈیوں میں سرسرا رہی ہے، لیکن کسی کو اس کی پرواہ نہیں۔‘‘
’’ہم سب دوسروں کے BAT MAN(تابع مہمل ) ہیں۔‘‘
’’اور دوسرے‘‘
’’وہ پہلوں کے‘‘
’’اور پہلے‘‘
’’پہلے ان سے بھی پہلوں کے‘‘
’’گویا ہم سب دوسروں کے BAT MAN(تابع مہمل ) ہیں ‘‘
’’آؤ مل کر ہنسیں۔۔۔ ہاہاہا‘‘
’’ہاہاہا‘‘
’’رات، سورج کا کلیجہ چبا کر اب‘‘
’’اب اپنے پنجوں سے ہمارا گوشت نوچ رہی ہے‘‘
وقت کی تسبیح سے ہمارے ناموں کے دانے
ٹوٹ ٹوٹ کر نیچے گر رہے ہیں
ایک دو۔۔۔ تین چار
ایک دو۔۔۔ تین چار
ایک دو۔۔۔ تین چار، کئی طویل ٹھٹھرتی ہوئی راتوں کو آنکھوں کی گودیوں میں اتار اتار کر اس نے فیصلہ کیا ہے کہ وہ زہر کا پیالہ پی لے یا پھر جلا وطن ہو جائے۔
تو کیا وہ سچ مچ جلا وطن ہو جائے
اسے اس شہر سے بڑی محبت ہے، وہ اسے چھوڑنا نہیں چاہتا، کسی حالت میں بھی
تو پھر زہر کا پیالہ پی لے، لیکن بزدلی تو بچپن ہی سے۔۔۔ !
٭٭٭

منجمد اندھیرے میں روشنی کی ایک دراڑ

ریستوران کی سب سے اوپری منزل میں وہ چار تھے۔
کونے والی میز پر بیٹھا ہوا بوڑھا، اپنی پلکوں پر عمر کا سفید بت سجائے، برسوں کے گھسے ہوئے منکوں سے خبروں کا ورد کر رہا تھا۔ درمیان والی میز پر بیٹھی لڑکی، لذت کی تازہ اور میٹھی رَس بھری کھجوریں کھاتے ہوئے شوق کی گھٹلیاں ایک ایک کر کے اس کے وجود کے خالی ڈرم میں پھینک رہی تھی اور وہ خود جو اپنی خواہشوں کے تنور میں لگتی روغنی روٹیوں کی مہک تو محسوس کر سکتا تھا لیکن انہیں اتار نہیں سکتا تھا کہ اس کے ہاتھ جلتے تھے۔
ریستوران کی اس سب سے اوپری منزل میں وہ چار تھے۔
ایک وہ بوڑھا، جو عمر کے سوکھے ہونٹوں سے وقت کا سفید کف سیرپ چُسک کر رہا تھا۔ دوسری وہ لڑکی جو وقت کے ٹینس کورٹ میں عمر کے چھکّے سے نکلی ہوئی گیند کی طرح لذتوں کے ڈھلوان پر لڑکھڑاتی چلی جا رہی تھی اور وہ تیسرا وہ خود، جس کی آنکھوں کے چھجے سے لٹکی انتظار اور شوق کی بیلیں لٹکے لٹکے مرجھا بھی گئی تھیں۔۔۔ یہ ہوئے تین تو چوتھا کون تھا؟
چوتھا تھا تو ضرور، لیکن کس میز پر؟
اس کی آنکھیں میزوں کے شفاف اور ڈھلوان چہروں پر پھسلنے لگیں۔ شاید چوتھا آدمی میز کے نیچے گھس گیا تھا۔
تو یہ لڑکی۔۔۔ اس کمرے میں دوسری تھی، شاید جرمن تھی، یا سوئس یا پھر؟ کہیں کی بھی ہو، عورت کی کوئی جغرافیائی پہچان نہیں۔ بستر میں ساری عورتیں ایک سی ہوتی ہیں۔
لیکن اس کے پاس کیا تھا؟ اس شہر میں تو وہ پردیسی تھا، ایک ٹورسٹ، جو دنیا کو فاصلوں کی گرد سے نکالنے نکلا تھا۔ سفر کی لذتیں چکھنے کے لیے اس کے پاؤں مدتوں سے بے چین تھے اور اب کہیں جا کر اس کی یہ خواہش حقیقت کے رنگین لباس میں اس کے سامنے آئی تھی۔ا سے اپنے شہر سے نکلے کتنے دن ہوئے ہیں ؟ اس نے انگلیوں کے پوروں پر وقت کے تھان کو لپیٹنے کی کوشش کی۔ جتنے دن بھی ہوئے ہوں ، اس وقت تو وہ اس ریستوران کے سب سے اوپری منزل میں ان تینوں کے ساتھ بیٹھا تھا۔
’’لیکن چوتھا کدھر گیا؟‘‘۔۔۔ اس نے میزوں کے چمکتے ہونٹوں سے سوال کیا۔ پھر دوبارہ سب کو گنا۔۔۔ ایک وہ بوڑھا، جو سر پر عمر کی سفید کلغی سجائے اخباروں کی تہوں میں گزرے ہوئے سال ڈھونڈ رہا تھا۔ دوسری وہ لڑکی، جس کی آنکھوں میں پھدکتی شوق کی چڑیاں بار بار۔۔۔ اس کے جسم کی ٹہنیوں پر منڈلا رہی تھیں اور تیسرا وہ خود۔۔۔ کیا چوتھا ابھی تک میز کے نیچے ہی تھا؟ کیا اس کے پاس بل دینے کے لیے کچھ نہیں ؟
اس نے کندھے جھٹک کر ان پر بیٹھی ہوئی فکر کی چڑیوں کو اڑایا اور شیشے کی دیوار سے لٹک کر نیچے سڑک پر دوڑتی گاڑیوں کو دیکھنے لگا۔
لڑکی نے مینو ایک طرف کر دیا اور جھک کر اس کو دیکھنے لگی۔ لڑکی کی آنکھوں میں شناسائی کا چرخہ چل رہا تھا۔ اس کے گھوں گھوں سن کر وہ پرانے سوئیٹر کی طرح ادھڑنے لگا اور دھاگا دھاگا ہو کر اس کے دل کے تکلے پر لپٹنے لگا۔
بوڑھا ان دونوں سے بے نیاز اخبار کے کالموں میں تیر رہا تھا، لیکن چوتھا۔۔۔ ؟
لڑکی ذرا سا ترچھا ہو گئی۔ پھر اس کی آنکھوں نے کھلکھلا کر انگڑائی لی اور اس کی خواہشوں کے کھنگروں کی تال پر ٹھمک ٹھمک ناچنے لگی۔
ہنسی اس کے اندر ہی اندر پھیلی اور سمٹی۔ اس کی آنکھوں میں اگی ہوئی زبانیں شیشے کی دیوار سے پھسلتیں نیچے سڑک پر اتریں اور شوکیسوں میں سجی چیزوں اور بھاگتی کاروں کو بو سے دینے لگیں ، اسے نیچے جا کر بہت سی چیزیں خریدنا تھیں۔ لوگ باہر جاتے ہیں تو بہت کچھ لاتے ہیں ، وہ بھی واپسی پر بہت سی چیزیں ان شوکیسوں کی گود میں سے نکال لے جائے گا۔
لڑکی مینو سے کھیل رہی تھی، شاید بیرے کا انتظار ہو۔ لیکن بیرا اتنی دیر سے نچلی منزل میں کیا کر رہا تھا؟ کہیں اسے معلوم تو نہیں ہو گیا کہ چوتھا میز کے نیچے چھپا ہوا ہے؟ شاید وہ کسی اور کو بلا لائے۔
اس نے رک رک کر ساری کرسیوں کو گنتی کی تسبیح میں پرو دیا۔
چوتھا اس خوبی سے چھپا تھا کہ کسی کو نظر نہیں آ رہا تھا۔ اس کا مطلب ہے کوئی بھی اسے ڈھونڈ نہیں سکے گا۔
اس کے ذہن میں اطمینان نے کنڈل مارا اور وہ گنگنانے لگا۔ لڑکی کن آنکھوں کی چلمن سے اسے دیکھ رہی تھی وہ اچھل کر اس کی پلکوں کی ٹیرس سے لٹک گیا۔ پھر دھیرے سے اس کی آنکھوں کے برآمدے میں اترا اور ان میں جلتی خوشبوؤں کو اپنے بدن میں لپیٹ کر غڑم سے اس کے اندر کود گیا۔
یہ اجنبی لڑکی۔۔۔ اور یہ اجنبی شہر
اس اجنبی شہر کی تازہ ہوا، اس کے زنگ آلود پھیپھڑوں میں سانسوں کے پیانو پر زندگی کے نئے سروں کی دستک دے رہی تھی۔
یہ اجنبی شہر
جب تم پر پھیلی ہوئی زندگی کی شفیق بانہیں سمٹ جائیں تو ہجرت کرو
لیکن ہجرت کے لیے تو پاسپورٹ چاہئے، فارن کرنسی چاہئے، کرایہ چاہئے۔
اور۔۔۔ اور خدا جانے کیا کیا چاہئے۔
سیڑھیوں پر کسی کے چڑھنے کی آواز نے اسے خیالات کے مچان سے نیچے گرا دیا۔
شاید بیرا کسی کو لے کر آ رہا تھا؟
تو چوتھا۔۔۔
اس نے جلدی جلدی سر گھما کر چاروں کونوں کی خبر لی، چوتھا بڑی خوبی سے کسی میز کے نیچے چھپا ہوا تھا۔
شاید وہ اسے نہ پکڑ سکیں۔۔۔ یقیناً نہیں پکڑ سکیں گے
کھٹک۔۔۔
بل میز کی گود میں سے پھسلتا ہوا اس کی آنکھوں کی چار دیواری میں آ گرا۔ اس کے لرزتے ہاتھوں نے جیب کی اندھیری گہرائیوں میں چھپے ہوئے سکّوں کو آواز دی اور انہیں گنتی کی شباہت میں ڈھال کر بل کے کھلے منہ میں ڈال دیا۔
لڑکی آنکھوں کی پلیٹ میں لذت کے رَس گلے سجائے اسے دیکھ رہی تھی۔ شاید وہ پہلی لڑکی تھی جس نے اسے اپنی آنکھوں کے پنگھوڑے میں بٹھا کر یوں لوریاں دی تھیں۔ تو کیا وہ اسے چھوڑ کر چلا جائے!
اس نے کئی سفر ناموں میں اس مرحلہ کو بار بار پڑھا تھا۔ جب کہانی سنانے والا اپنے آپ کو جبر کی ہتھیلیوں میں مسلتے ہوئے اس لڑکی کو الوداع کہتا ہے جو اسے ایسی ہی میٹھی نظروں سے دیکھ رہی ہوتی ہے۔
تو اس کا مطلب ہے کہ اب الوداع کی گھڑی آن پہنچی۔
وہ اچھل کر کھڑا ہو گیا۔۔۔ ’’اچھا تو اے اجنبی لڑکی الوداع!‘‘
لڑکی نے اسے اپنی آنکھوں کے سایوں میں سمیٹا اور بولی۔۔۔ ’’کچھ دیر تو اور رکو۔‘‘
’’نہیں۔۔۔ مجھے جانا ہے۔‘‘
اس نے مڑنے سے پہلے سارے کمرے کو اپنی آنکھوں کے آنگن میں سمیٹا۔ عمر کے طوطے کو پچکارتا بوڑھا، عمر کی رنگین تتلی کے پیچھے بھاگتی لڑکی اور الوداع کی اَنی پر کھڑا وہ خود۔۔۔ اسے چوتھے کا خیال آیا۔
اس نے کمرے کی ایک ایک شے کو ٹٹولا۔۔۔ تو وہ ابھی تک میز کے نیچے چھپا بیٹھا تھا،
’’اچھا تو الوداع‘‘۔۔۔ وہ سیڑھیوں کی طرف بڑھا۔
سیڑھیاں اترتے ہی اسے بیرے کی آواز سنائی دی۔۔۔ ’’پتہ نہیں کہاں سے آ جاتے ہیں۔۔۔ ہونہہ۔‘‘
اچھا تو چوتھا۔۔۔ آخر بیرے نے میز کے نیچے تلاش کر ہی لیا۔
سیٹرھیوں کے آخری زینے نے اسے سڑک کی جھولی میں دھکیل دیا۔
’’ارے تمہاری تو آج درخواست آئی تھی کہ بیمار ہو۔‘‘
اس نے مڑ کر دیکھا، اس کے دفتر کا ایک ساتھی اسے کندھوں سے پکڑ کر جھنجوڑ رہا تھا۔
’’درخواست!‘‘۔۔۔ اس کے ہونٹوں کے کونوں پر بڑبڑاہٹ کی کونپلیں پھوٹیں ، پھر کچھ سوچتے ہوئے، جیسے اچانک کوئی چیز اس کی یاد کی جھولی میں آن گری ہو، بولا۔۔۔ ’’اچھا اچھا، سمجھ گیا۔ تم چوتھے آدمی کی بات کر رہے ہو، وہ اوپر ہے اور بیرے نے اسے پکڑ لیا ہے۔‘‘
٭٭٭

شام، پھول اور لہو

وہ ان میں سے ایک تھی، جنہیں مجھے قتل کرنا تھا،
وہ کل شام میرے بدن کی دیوار سے لٹک کر چیخنے لگا۔۔۔ ’’خدا کے لیے اسے قتل کر دو۔‘‘
میں نے کہا۔۔۔ ’’لیکن مجھے تو قتل کرنا آتا ہی نہیں۔‘‘
اس نے دراڑوں میں انگلیاں پھنسا دیں۔۔۔ ’’بس کسی طرح اسے قتل کر دو، ورنہ میں مر جاؤں گا۔‘‘
میں نے اس کی آنکھوں میں جھانکا۔۔۔ ’’بات کیا ہے؟‘‘
کہنے لگا۔۔۔ ’’میں جب صبح اٹھتا ہوں تو میرے منہ پر بالوں کی بجائے لڑکیاں اگتی ہیں۔‘‘
میں نے سر ہلایا۔۔۔ ’’تو اس میں خوفزدہ ہونے کی کیا بات ہے۔ کوئی اچھا سا بلیڈ استعمال کرو۔‘‘
اس نے شانے اچکائے۔۔۔ ’’وہ تو کرتا ہی ہوں۔ لیکن اب تو میری ہتھیلیوں اور انگلیوں کے پوروں پر بھی اُگ آئی ہیں۔‘‘
اس نے ہتھیلی پھیلا دی، میں نے دیکھا، چہرے اس کی ہتھیلی کی ریکھاؤں سے اگتے ہیں اور کھلکھلا کر بھاگ جاتے ہیں۔
’’دیکھا۔۔۔ دیکھا تم نے۔۔۔ ‘‘اس نے میرے بازو سے لٹکے لٹکے اچھل کر پاس سے گزرتی ہوئی خوشبو کو چاٹتے ہوئے کہا۔
میں نے باقی خوشبو کو اپنی انگلی پر لپیٹتے ہوئے اس کی طرف دیکھا۔۔۔ ’’لیکن میں کر ہی کیا سکتا ہوں ، میں تو خود اناڑی ہوں ، ایک بار قتل کرتے ہوئے خود قتل ہوتے ہوتے بچا تھا۔‘‘
اس نے میرے بازو کو دباتے ہوئے تیز سسکی بھری۔۔۔ ’’کچھ تو کرو۔‘‘
میں نے بے بسی سے سر ہلایا۔ مجھے اپنی عادت معلوم ہے کہ اسے بچاتا بچاتا میں خود مارا جاؤں گا۔ دلدلیں مجھے آوازیں دیتی ہیں اور جب تک ان میں پوری طرح دھنس نہیں جاتا، مجھے اندازہ ہی نہیں ہوتا۔
میں اس سے جان چھڑانا چاہتا تھا لیکن وہ سوال بن کر میرے ساتھ لٹک رہا تھا۔
آخر تنگ آ کر میں نے کہا، ’’تو چلو۔‘‘
اس کے چہرے سے چمٹی ہوئی اداسی دھل گئی۔ ہم دونوں ہجوم کے دریا میں اتر پڑے اور سڑک کی کشتی کو پاؤں سے کھیتے ایک چوک سے دوسرے چوک کو عبور کرتے رہے۔ لیکن جب بڑا چوک آیا تو دفعتاً مجھے احساس ہوا کہ وہ میرے ساتھ نہیں ہے، بلکہ میرے ہاتھ میں اس کی انگلی ہے۔ میں نے مڑ کر دیکھا وہ سرخ بتی سے چمٹا پچھلے چوک کے گرداب میں ڈبکیاں کھا رہا تھا۔
شام کو جب وہ آیا توا س کا چہرہ گرد بنا ہوا تھا۔
میں نے پوچھا۔۔۔ ’’کیا ہوا ہے؟‘‘
اس نے کندھے جھٹکے اور دانت نکوس کر صوفے پر گر پڑا۔
میں نے کہا۔۔۔ ’’چلو ٹیکسلا چلیں۔۔۔ سنا ہے وہاں آج کل ٹوٹے چل رہے ہیں۔‘‘
وہ اچھل کر میرے سینے سے لگ گیا اور دھاڑیں مار مار کر رونے لگا۔
حیرت میری آنکھوں کے پیالوں میں گھلنے لگی، ’’کیا ہوا۔۔۔ کیا ہوا؟‘‘
کہنے لگا۔۔۔ ’’میں وہاں گیا تھا، باہر بورڈ لگا ہے۔ نئی انتظامیہ، صاف ستھرے ماحول میں مع خاندان تشریف لائیں۔‘‘
’’پھر۔‘‘
’’پھر‘‘۔۔۔ اس نے آنسو پونچھے۔۔۔ ’’میں نے آہٹوں کو سونگھا اور جب انہیں پکڑنے کی کوشش کی تو وہ دیوار کی اوٹ میں چھپ گئیں ، اب تم ہی بتاؤ میں کیا کروں ، اب تو یہ کھنڈر بھی ہمارے نہیں رہے۔‘‘
میں نے کہا۔۔۔ ’’کتابوں میں یوں لکھا ہے کہ وہ گھات لگا کر پتھروں کی اوٹ میں بیٹھ گئے اور شمال سے اٹھتی ہوئی گرد کو دیکھنے لگے۔ جب گرد کا گنبد قریب آیا تو رنگوں کے چشمے صاف نظر آنے لگے۔ وہ نعرہ مار کر اپنی جگہ سے نکلے اور ان پر ٹوٹ پڑے، پھر انہوں نے ایک ایک رنگ کو اپنی پلکوں سے چنا اور اندھیرا پھیلنے سے پہلے پہلے جنگل میں اتر گئے۔‘‘
وہ دوبارہ دھاڑیں مار مار کر رونے لگا۔
میں نے پوچھا۔۔۔ ’’اب کیا ہوا ؟‘‘
اس نے اپنے سینہ پر دو ہتڑ مارا۔۔۔ ’’کل میں سارا دن اپنی کھڑکی سے لٹک کر پڑوس کے صحن سے رنگ چننے کی کوشش کرتا رہا۔ لیکن رنگ میری پلکوں سے چھوتے ہی اپنی خوشبو چھوڑ دیتے ہیں۔‘‘
پھر اس نے دونوں ہاتھ پکڑ لیے۔۔۔ ’’اسے قتل کر دو، ورنہ میرے سارے جسم پر چہرے اُگ آئیں گے۔‘‘
رات چنگھاڑتی ہوئی ہم پر ٹوٹ پڑی تھی۔
باہر سردی ننگی دیواروں سے لپٹ رہی تھی اور ساتھ والے کمرے میں وہ اسے قتل کر رہا تھا۔ اس کی چیخیں درمیان والے دروازے کی دہلیز سے نکل کر سارے فرش پر رینگ رہی تھیں۔ ہوا اس کے لہو کے رنگ کو ہاتھوں میں اٹھائے میرے چاروں طرف ناچ رہی تھیں۔ میں نے فرش پر رینگتی چیخوں کو دونوں ہاتھوں کے کٹورے میں بھرا اور پھر ایک ہی لمحہ میں انہیں اپنے منہ میں انڈیل لیا۔ چیخیں کرچ کرچ ہو کر میرے پیٹ کے اندھیرے میں ڈوب گئیں۔ پھر میں نے ہوا کے ہاتھوں سے اس کے لہو کے رنگ کو اپنے منہ پر ملا اور ایک نعرہ مار کر ساتھ والے کمرے میں جا گھسا۔ لاش پلنگ کے بیچوں بیچ پڑی تھی اور خون چادر پر اپنی تصویر بنا رہا تھا۔ میرا نعرہ سن کر لاش میں ایک لمحہ کے لیے حرکت ہوئی اور پھر وہ اسی طرح خون کے تھال پر تیرنے لگی۔
صبح جب سورج کی کرنوں نے دیواروں پر چپکی ہوئی سردی کو کھرچ کھرچ کر اتارنا شروع کیا تو لاش اپنے آپ کو سمیٹ کر باہر کی طرف دوڑی۔ ہم بھی اس کے پیچھے پیچھے بھاگے لیکن تیز روشنی نے اسے اپنے پیٹ میں نگل لیا۔ ہم بس دیکھتے ہی رہ گئے۔
کچھ دیر بعد وہ بولا۔۔۔ ’’چلو عجائب گھر چلیں۔‘‘
میں نے کہا۔۔۔ ’’فائدہ‘‘
کہنے لگا۔۔۔ ’’شاید وہاں ہمیں آنکھیں مل جائیں۔‘‘
میں شانے اچکا کر اس کے ساتھ ہو لیا۔
عجائب گھر میں ہم دونوں کے سوا کوئی بھی نہیں تھا۔
سارے مجسمے تاریکی میں ڈوبے ہوئے تھے۔ ہم نے بتی جلائی اور حیرت کی سسکی ایک ساتھ ہم دونوں کے لبوں سے لٹکنے لگی۔ سارے مجسموں کی آنکھیں نکلی ہوئی تھیں اور ناکیں ٹوٹی ہوئی تھیں۔
ہم نے ایک دوسرے کی طرف دیکھا
سارے مجسمے رو رہے تھے۔
کچھ دیر بعد جب ہم کیفے کی طرف جا رہے تھے تو اس نے میرے کندھے پر سر رکھتے ہوئے پوچھا، ’’آج روشنیاں کہاں چلی گئی ہیں ؟‘‘
میں نے شیشوں میں سے باہر جھانکا۔ چاروں طرف اندھیرے کا سمندر ٹھاٹیں مار رہا تھا اور ہماری گاڑی اندھیرے کی قبر میں اترتی جا رہی تھی۔
لمحے بوجھل پتھر بن کر ہماری گردنوں سے لٹک رہے تھے۔
اس نے میرے کندھوں کو جھنجوڑا۔۔۔ ’’ہم کب پہنچیں گے؟‘‘
میں نے اس کی آنکھوں میں ناچتے خوف کو سونگھا۔۔۔ ’’شاید کبھی نہیں۔‘‘
اس نے تلملا کر میری طرف دیکھا۔
’’ہاں شاید کبھی نہیں۔‘‘۔۔۔ میری آواز میرے ہونٹوں کی بجائے دور کہیں سے آ رہی تھی۔
ستارے شہر کے اندھیرے میں گم ہو گئے ہیں اور ہم جس لائن پر جا رہے ہیں اس پر کوئی سٹیشن ہی نہیں۔ ہم نے ایک دوسرے کو دیکھا لیکن چپ رہے کہ ہمارے نا کردہ جرم کی تحریر ہمارے چہروں کی تختی پر نیون سائن کی طرح جل بجھ رہی تھی۔
٭٭٭

یاہو کی نئی تعبیر

اندھیرا آنکھیں ملتا ہوا رات کے بستر سے کہنیوں کے بل اٹھ رہا ہے۔ اور کجلایا سویرا سمٹی سمٹائی دلہن کی طرح ملگجا گھونگھٹ نکالے دبے پاؤں سیڑھیاں اتر رہا ہے۔
پچھلی رات،
پچھلی ساری رات میں آنکھوں کی جھولی میں انتظار کے پھول لیے نیند کی نیلی چڑیا کی راہ تکتا رہا ہوں ، لیکن نیند کا جہاز میری پلکوں کی بندرگاہ میں لنگر انداز نہیں ہوا۔
ساری رات،
پچھلی ساری رات۔۔۔ میں اپنی خواہشوں کے پنجرے سے اڑے ہوئے پرندوں کو پکڑنے کی کوشش کرتا رہا ہوں ، لیکن سارے پرندے دھند میں لپٹی ہوئی زمین سے دور دور نکل گئے ہیں۔
کئی دنوں سے زمین کے چہرے میں چھپکلی اگ آئی ہے اور اس کی چھاتیوں میں سرسراتے دودھ میں خواہشوں کے گندے انڈوں کی لیس دار جاگ گھل گئی ہے۔ ایک زنگ آلود کالی روشنی میرے جسم کی کڑھائی میں وہ تبرک تل رہی ہے جس کا بپتسمہ صدیوں پہلے میرے جسم نے مجھے دیا تھا۔
میں کھڑکی کھول دیتا ہوں۔
صبح نے اپنا ملگجا گھونگھٹ اتار دیا ہے اور اب دیواروں سے اتر کر گلیوں اور بازاروں میں دوڑ رہی ہے۔ میں اپنے بدن کی ریلنگ سے لٹکے سارے پردے ہٹا دیتا ہوں اور کیلنڈر کے چکنے صفحوں پر چڑھ کر دنوں ، مہینوں اور سالوں کے صفحے الٹنے لگتا ہوں۔ دھندلا غبار میرے چاروں طرف پھیل جاتا ہے اور کیلنڈر کے خوشبودار صفحوں سے تاریخیں اڑ اڑ کر دور نیلاہٹوں کی جانب جانے لگتی ہیں ، میں ان کے ساتھ ساتھ دن، مہینوں اور سالوں کی گھنیری وادیوں میں سے گزرتا دور۔۔۔ بہت دور نکل آتا ہوں۔
یادیں اپنے پاؤں میں گھنگھرو باندھتی ہیں اور میرے وجود کے اجڑے کھنڈر میں چھن چھنا چھن ناچنے لگتی ہیں۔
’’یاہو‘‘۔۔۔ اس نے نعرہ مار کر سامنے پڑے ہوئے شخص پر جست لگائی اور اسے پنجوں میں دبوچ کر اس کے نرخرے میں دانت گاڑ دئیے۔ تڑپنے والے نے خر خر کرتے ہوئے نرم زمین کو مٹھیوں کی ڈھلوانوں پر روکنے کی کوشش کی لیکن زندگی نے اپنے پاؤں سمیٹ لیے اور گرم نمکین خون کا ذائقہ اس کے دشمن کے لبوں پر دستکیں دینے لگا۔
وہ کچھ دیر اس کے نرخرے کے پیالے سے ہونٹوں کے خشک کھیت کو سیراب کرتا رہا۔ پھر اس نے اس کے جسم کو نوچنا شروع کر دیا اور نرم نرم تازہ گرم گوشت اتار کر کھانے لگا۔
’’یا ہو‘‘۔۔۔ سب ہنس رہے تھے اور آنکھوں میں للچاہٹ کی شمعیں جلائے، گوشت سے اٹھتی بُو کو اپنے نتھنوں میں باندھ رہے تھے۔
اس کا اشارہ پاتے ہی وہ سب زمین پر پڑے ہوئے جسم پر ٹوٹ پڑے اور دیکھتے دیکھتے سارا جسم ہاتھوں کی کنڈیوں میں لٹکنے لگا۔ اس نے منہ سے لگے ہوئے خون کو کہنی سے صاف کیا اور لوگوں کو ایک طرف کرتا اس بڑی چٹان کی طرف بڑھا، جس کے ساتھ لگی وہ ہانپ رہی تھی۔
سارا جھگڑا اس کی وجہ سے ہوا تھا۔ بات اتنی سی تھی کہ اس کے جسم کے گداز ابھاروں نے اسے اشارہ کیا تھا۔ چنانچہ وہ اس کا ہاتھ پکڑ کر چٹان کی دوسری طرف اترنے لگا تھا کہ اس شخص نے آ کر اس کا ہاتھ پکڑ لیا۔ مگر اب وہ شخص کہاں تھا؟
اس نے مڑ کر دیکھا، زمین پر تو چند دھبّے ہی تھے۔ وہ شخص تو بوٹی بوٹی ہو کر مختلف ہاتھوں میں پہنچ چکا تھا۔
’’یا ہو‘‘۔۔۔ اس نے نعرہ لگایا اور سہمی ہوئی عورت کا ہاتھ پکڑ کر چٹان کی طرف چلا گیا۔
’’یا ہو۔۔۔ یا ہو‘‘
میں اپنے جسم کے لمبے لمبے سیاہ بالوں پر ہاتھ پھیرتا ہوں اور منہ سے نکلنے والی یا ہو کے پیچھے دوڑنے لگتا ہوں۔ فاصلوں کی گود میں بیٹھے ہوئے دیوتا مجھے پکارتے ہیں ، میں ان کے قریب چلا جاتا ہوں۔ سالوں کی تیز درانتیاں میرے جسم پر اُگے ہوئے لمبے بالوں کی کالی فصلیں کاٹ رہی ہیں۔
مجھے نیند آ رہی ہے، میں اونگھ رہا ہوں ،
سالوں کے جسموں سے رستی دھند مجھے لوریاں دینے لگتی ہے۔
پونتو خوس، تلوار میان میں ڈال کر باہر جانے لگا تو سارے غلاموں نے اسے دعاؤں کے ہاروں سے لاد دیا۔ ارنیا قریب ہی تھا۔ وہ ہوا میں دشمن کی بو سونگھتا پیدل ہی وہاں تک آیا۔ ارتیوس پہلے ہی آ چکا تھا اور اب ارنیا کی پیاسی مٹی پر کھڑا اس کی راہ تک رہا تھا۔ وہ بڑے وقار کے ساتھ اس کے سامنے آیا۔ دونوں نے اپنی اپنی تلواروں کو دن کی سفید روشنی کی سلامی دی اور چند قدم ہٹ کر ایک دوسرے کی طرف دوڑے۔
پونتوخوس نے وار کرنے سے پہلے اپنے منہ میں دیوتاؤں کے مقدس نام کا شہد گھولا اور کہنے لگا، ’’اے اپالو! اگر تو میری مدد کرے تو میں تیرے مندر میں ایک موٹی تازہ جوان گائے کی قربانی دوں اور ایک دوسری گائے کی چربی سے تیرے مندر کی آگ تیز کر دوں۔‘‘
اپالو اس کی تلوار کی نوک پر آ بیٹھا، ارتیوس اب صرف اپنا دفاع کر رہا تھا اور پونتوخوس کی تلوار کی نوک پر بیٹھا ہوا اپالوارتیوس کے نرخرے کا بوسہ لینے کے لیے بے تاب ہوا جا رہا تھا۔
ایک لمحے کے لیے جب ارتیوس کے پاؤں لڑکھڑائے تو تلوار کی نوک پر بیٹھا ہوا اپالو اسی کے نرخرے میں اتر گیا۔
گرم نمکین خون ارنیا کے پیاسے ہونٹوں کو گلابی بناتا چاروں طرف پھیل گیا۔
سب نے تالیاں بجا کر پونتو خوس کی بہادری کا گیت گایا۔ اس نے لمحہ بھر کے لیے زمین پر پڑے ہوئے ارتیوس کو دیکھا اور بازار کی طرف چل پڑا۔
وہ دونوں ایک دوسرے کے دوست تھے لیکن پچھلے چند دنوں سے ارتیوس کی نیک نامی اور شہرت کے پرندے سارے شہر پر منڈلانے لگے تھے اور یہ بات اسے کسی قیمت پر قبول نہ تھی۔ اس نے بہت دنوں سے یہ سوچ رکھا تھا کہ اس ارنیا میں وہ ارتیوس کی زندگی کا قالین لپیٹ دے گا۔
اور اب وہ تلوار پر چمکتے ہوئے لہو کے قطروں کو اچھالتا، ڈیانا کے بڑے معبد کی سیڑھیاں چڑھ رہا تھا۔
یور کلیا ڈیانا کے قدموں میں گھٹنوں کے بل بیٹھی ہوئی تھی۔ دونوں نے مسکراہٹوں کے طشت میں اپنی خواہشوں کے دئیے جلا کر ایک دوسرے کو پیش کئے۔
پونتوخوس نے جیب سے سکہ نکال کر مندر کی صنددقچی میں ڈالا اور یورکلیا کا ہاتھ پکڑ کر اسے پچھلے حصے میں لے گیا۔
میں اپنے جسم پر نظر ڈالتا ہوں۔ میرے جسم کے کھیت میں اگی ہوئی بالوں کی فصل کٹ چکی ہے۔ دور سے آتی روشنیاں میرے جسم پر استری کر رہی ہیں اور میرے بدن پر پڑی ہوئی سلوٹیں ایک ایک کر کے نکل رہی ہیں۔
نیند میری آنکھوں کے کٹوروں میں غنودگی گھول رہی ہے۔ میں لڑکھڑا کر سالوں کے پنگھوڑے میں گر پڑتا ہوں۔
ندی کا پانی گنگناتے ہوئے خاموشی سے چلا جا رہا تھا۔ بشن داس بھورے رنگ کی ایک چٹان سے ٹیک لگائے وینا بجا رہا تھا کہ امبا دبے پاؤں اس کے قریب آئی اور اپنی سریلی آواز کو وینا پر لپیٹتے ہوئے بولی۔۔۔
’’ہے رام۔۔۔ ! تم ابھی تک یہیں ہو؟‘‘
بشن نے وینا ایک طرف رکھ دی اور بولا۔۔۔ ’’کہاں جا رہی ہو؟‘‘
کیسری رنگ کی ساڑھی اور جوڑ ے میں گیندے کا پھول سجائے وہ اسے بڑی پیاری لگ رہی تھی، امبا نے اس کا ہاتھ پکڑ لیا۔۔۔ ’’شاکیہ منی کو دیکھنے نہیں جاؤ گے؟‘‘
بشن نے سر ہلایا اور اس کے پیچھے پیچھے چل پڑا۔
بڑ کے درخت سے پھوٹتا سورج آسمان کی وسعتوں میں چمک رہا تھا۔
وہ آلتی پالتی مارے بڑ کے نیچے بیٹھا تھا اور اپنی آواز کی طشتری میں سکون اور اطمینان کے ذائقے سجا کر سب کے کانوں میں ابدیت کا شہد ٹپکا رہا تھا۔
’’دھرم کرو۔۔۔ دھرم کرو‘‘
اس کی آواز بشن کے کانوں میں بیٹھے پرکھوں کی روایتوں کے جالے توڑنے لگی۔ اس نے کَن آنکھوں سے اسے دیکھا۔۔۔ ہاں ، اس نے اپنے شریر کو ریاضت کی آگ میں جلا کر اپنی آتما کو کندن بنا لیا تھا اور اب سراپا مسکراہٹ بنا بیٹھا تھا۔
اس کی آواز اس کے کانوں میں رَس گھول رہی تھی۔۔۔ ’’کسی کو دکھ نہ دو۔ سب روحیں ایک سی ہیں۔‘‘
ذات پات کے سارے رشتے تڑخ رہے تھے۔ ریزہ ریزہ ہو رہے تھے۔
وہ امبا کو وہیں چھوڑ کر چپ چاپ باہر نکل آیا۔
شام کو جب وہ امبا سے ملنے ندی کنارے جا رہا تھا تو دفعتاً کسی کا پاؤں اس کی گیروی دھوتی پر اپنا نشان ڈال گیا۔ اس نے مڑ کر غصے سے دیکھا۔ ارونی سہما ہوا ہاتھ باندھے کھڑا تھا۔
’’تم۔۔۔ ‘‘ اس کے اندر کا برہمن جست لگا کر باہر آگیا۔
’’تم نے مجھے بھرشٹ کر دیا۔‘‘
ارونی نے اپنی آنکھوں میں بے یقینی کے تھان کو لپیٹتے ہوئے اس کی طرف دیکھا اور بڑ کی طرف اشارہ کرتے ہوئے بولا۔۔۔
’’لیکن مہاراج، وہ تو کہتا ہے کہ اب کوئی شودر نہیں ، کوئی برہمن نہیں اور تم نے بھی تو اس کے سامنے اس کا اقرار کیا تھا۔‘‘
بشن پرے ہٹتے ہوئے بڑبڑایا۔۔۔ ’’دفع ہو جاؤ۔۔۔ کتے!‘‘
کچھ دیر بعد جب وہ ندی کنارے پہنچا تو امبا گھاس پر لیٹی ندی کی لہریں گن رہی تھی۔ اس نے پھول توڑا اور اس کے جوڑے میں سجانے لگا۔ امبا کے ہونٹوں پر مٹھاس کی بانسری بجنے لگی۔
بشن نے اسے اسی مسکراہٹ کی چادر میں لپیٹ لیا۔
بڑ کے نیچے آواز کی گھنٹیاں بج رہی تھیں۔
’’دھرم کرو، دھرم کرو۔۔۔ سنکھ بجاؤ، سنکھ بجاؤ۔‘‘
میرے جسم پر پھیلے ہوئے سیاہ دھبّے پوتر لفظوں کے لیپ میں چھپ رہے ہیں۔ میں اونگھتے اونگھتے مسکراتا ہوں۔۔۔ زمانے کے پنگھوڑے میں لیٹے لیٹے سالوں اور صدیوں کی چوسنی چوستے چوستے کئی خواب میری پلکوں کی چلمن پر دستک دیتے ہیں۔
دریا کی پھیلی بانہوں کو دیکھ کر قافلہ رک گیا۔
شمعون نے راحیل کے کان میں سرگوشی کی۔۔۔ ’’اب کیا ہو گا؟‘‘
راحیل نے ہونٹوں پر انگلی رکھ کر اسے خاموش رہنے کا اشارہ کیا اور دریا کی طرف دیکھنے لگی۔
دریا درمیان سے پھٹ چکا تھا۔
اور سارے دوڑتے ہوئے اسے پار کر رہے تھے۔ راحیل نے شمعون کا ہاتھ پکڑا اور دریا کی گود میں اتر پڑی۔ شمعون نے دوسرے کنارے کی طرف جاتے ہوئے بڑی عقیدت اور احترام سے اسے دیکھا جو سب سے آگے عصا ہاتھ میں لیے چلا جا رہا تھا اور کہہ رہا تھا۔۔۔
’’اب سب ایک دوسرے کی بانہیں ہیں۔‘‘
دوسرے کنارے پر پہنچ کر سب نئی وادیوں میں اتر گئے۔ یونتن پیچھے رہ گیا تھا، اس نے اسے آواز دی، جب یونتن رک گیا تو وہ بڑے سکون سے اس کے قریب آیا اور پھر اچانک اس نے یونتن کو نیچے گرا لیا۔ یونتن کے ساتھ اس کا خاندانی جھگڑا برسوں سے آج کے دن کا انتظار کرتا چلا آ رہا تھا اور آج اس نے یونتن کے گرم ابلتے نمکین خون کی سرخی کو دن کی روشنی دکھا کر اس کا فیصلہ کر دیا اور عصا ہاتھ میں لیے وہ کہہ رہا تھا۔
’’اب سارے ایک دوسرے کی بانہیں ہیں۔‘‘
میں لڑ کھڑا کر اگلے خواب کی طلسمی وادی میں جا گرتا ہوں۔
لمبے چوغے والے نے کتاب بند کر دی اور بولا۔۔۔ ’’تو یوں ہے کہ جو دوسروں کی غلطی معاف کر دے وہ مقدس باپ کی نظروں میں اتر گیا اور یوں سمجھو کہ اسے سب کچھ مل گیا۔‘‘
اس نے اپنے دل کی گہرائیوں میں ملائم سکون محسوس کیا اور بڑی عقیدت سے الٹے پاؤں باہر آ گیا۔ جب وہ گھر پہنچا تو رُتھ سو چکی تھی اور اس کا غلام پروینس حسبِ معمول جاگ رہا تھا۔ جونہی وہ اپنا کوٹ اتارنے لگا، پروینس نے اس کے کان میں سرگوشی کی۔۔۔ ’’مالک! امی جیرس آج پھر مالکن کے پیچھے پیچھے باغ میں گیا تھا۔‘‘
یہ بات سنتے ہی وہ اچھل کر کھڑا ہوا اور دوڑتا ہوا اسلحہ خانہ میں آیا۔ تلوار نکال کر اس نے اس کی دھار کو جانچا اور اسی رفتار سے خواب گاہ میں آیا۔ رُتھ مسکراہٹوں کی بگھی میں بیٹھی رنگین خوابوں کے پیچھے دوڑ رہی تھی۔
’’کتیا‘‘ وہ لفظوں کو دانتوں کے آرے میں کترتے ہوئے بڑبڑایا اور تلوار لہراتا امی جیرس کے گھر کی طرف دوڑ پڑا۔
میں چونک کر اسے دوڑتے ہوئے دیکھتا ہوں لیکن وہ فاصلوں کی دھند میں گم ہو جاتا ہے۔ دن، صدیاں ایک دوسرے کی بانہیں پکڑے میرے ساتھ لکن میٹی کھیل رہے ہیں۔
وہ دوسرے کمرے سے تلوار لے آئی اور اویس کو دیتے ہوئے ڈبڈبائی آنکھوں سے اس کی طرف دیکھنے لگی۔
اویس نے اس کا چہرہ اپنے ہاتھوں کے کٹورے میں سمیٹ لیا اور بولا۔۔۔
’’پگلی، ہم صبح ہونے سے پہلے لوٹ آئیں گے اور پھر۔۔۔ ‘‘
اس نے اس کے ہونٹوں کی گلابی قبر پر مخملی خواہشوں کے پھول چڑھائے۔
عائشہ نے اس کا بازو پکڑ لیا، ’’نہ جاؤ۔‘‘
اویس نے جھٹک کر اسے پرے کیا اور بولا۔۔۔ ’’تم چاہتی ہو سارا قبیلہ مجھے بزدل کہے۔‘‘
عائشہ نے پھر اس کا بازو تھام لیا۔۔۔ ’’لیکن شب خون مارنے کی کوئی وجہ بھی تو ہو۔‘‘
اویس نے غصے سے اسے گھورا، ’’یہ کیا کم وجہ ہے کہ وہ ہمارے کنوؤں کے پانیوں میں حصہ مانگتے ہیں۔‘‘ وہ کچھ کہنا چاہ رہی تھی کہ اذان کی آواز ہوا کے کندھوں پر سوار ہو کر فضا میں دوڑنے لگی۔
اویس نے نرمی سے ہاتھ چھڑا لیا اور عائشہ کو ایک طرف کرتے ہوئے بولا۔۔۔ ’’خدا حافظ، ہم فجر کی نماز واپس آ کر پڑھیں گے، انشا اللہ۔‘‘
تلواروں سے ٹپکتا گرم گرم لہو میری پلکوں پر گرتا ہے۔ میں جلدی سے آنکھیں کھولتا ہوں۔ سبز مخملی روشنی دھندلائی ہوئی ہے اور میری خواہش کا اندھا رتھ ساری زمین کو روندے چلا جا رہا ہے۔
لی یونگ چی نے سرخ کتاب بند کر کے گھٹنوں پر رکھ لی اور دور پھیلے فاصلوں کو دیکھتے ہوئے سوچنے لگا۔ اس کتاب کے لفظوں کی کوکھ سے پھوٹنے والی روشنی نے تو اسے مانجھ دیا ہے۔
اس کا انگ انگ لشکنے لگا ہے۔
اس نے فاصلوں کی دھند میں سے چانگ پو کے قدموں کی آہٹ کو سننا چاہا، جو صبح سے شہر گئی ہوئی تھی اور اپنے ساتھ خبروں کی تازہ فصل لانے کا وعدہ کر گئی تھی۔ آج ان کی چھٹی کا وقت تھا اور چانگ پوکمیون کے کچھ ساتھیوں کے ساتھ صبح سویرے شہر چل گئی تھی۔
اس نے کتاب کھولی۔
اس کتاب نے اس کی زندگی کے سارے رخ ہی بدل دیئے تھے۔ وہ ساتھیوں کے ساتھ کو رس لگاتا، قدم بہ قدم، شانہ بہ شانہ آگے بڑھا چلا جا رہا تھا۔
ایک سکون، ایک اطمینان۔
وہ دیوار سے ٹیک لگا کر اونگھنے لگا۔
شام کو چانگ پو اور دوسرے ساتھی واپس آئے تو ان کندھوں سے زرد کیڑے چمٹے ہوئے تھے۔
کچھ لوگ خیمے کو ٹڈیوں کی طرح کاٹ رہے ہیں ، ہمیں ان کا محاسبہ کرنا ہے۔
اس کے ہاتھوں کی گرفت بندوق پر مضبوط ہو گئی۔
زرد بخار کے جراثیم چاروں طرف پھیل گئے۔ سب ایک دوسرے کو شبہ کی کلہاڑیوں اور شک کی درانتیوں سے کاٹ رہے تھے۔
خون۔۔۔ گرم، ابلتا، نمکین خون،
میں اپنے ہونٹ چوستا ہوں۔
حیرت کے اہرام میں لپٹی میری آنکھیں سارے جسم کا طواف کرتی ہیں۔
میرے جسم پر ملائم شفاف چکناہٹ گنگنا رہی ہے۔
میں اپنی آنکھوں کو منہ کے راستے اندر اتار دیتا ہوں۔
اندر بڑی بڑی خوفناک چہروں والی سیاہ نوکیلی چٹانیں سر اٹھائے گا رہی ہیں۔
میری آنکھیں زخمی ہو جاتی ہیں۔
ان پر سیاہی جمنے لگتی ہے۔
باہر سے میں کتنا ملائم اور شفاف ہوں۔
لیکن اندر سے۔۔۔ ؟
’’یاہو۔۔۔ ‘‘میرے منہ سے نکلے ہوئے خوب صورت، ملائم اور لذیذ لفظ سامنے والے کے نرخرے میں گڑ جاتے ہیں۔ میں ہونٹوں کی طشتری میں گرم، ابلتے، نمکین لہو کا ذائقہ چکھتا ہوں۔
’’یاہو۔۔۔ یا ہو۔‘‘
میرے اندر اُگے ہوئے لمبے سیاہ بالوں کے جنگلوں میں کوئی سرسراتا ہے اور چپکے چپکے ہنستا ہے۔
٭٭٭

تشبیہوں سے باہر ایک پھڑپھڑاہٹ

جب ریل کار سٹیشن کی گود سے پھسل کر اندھے فاصلوں کی پھیلی بانہوں میں داخل ہوئی تو اس کے پہئے لانبی لانبی بھو کی زبانیں نکالے پٹڑی کے شفاف جسم کو چاٹ رہے تھے۔ لیکن جب انہوں نے شہر کا آخری پل عبور کیا تو اسے محسوس ہوا کہ ریل کے پہئے دھیرے دھیرے پٹڑی سے علیحدہ ہو رہے ہیں اور ڈبہ ہوا میں تیر رہا ہے۔ اس نے کھڑکی سے سر باہر نکال کر پہیوں کی طرف دیکھا۔۔۔ پٹڑی دور نیچے تیر رہی تھی۔ اس نے گھبرا کر سر اندر کر لیا اور دائیں ہاتھ والے سے کہا۔۔۔ ’’ہم تو ہوا میں سفر کر رہے ہیں۔‘‘ دائیں ہاتھ والے نے اخبار سے سر اٹھا کر اس کی طرف دیکھا اور بغیر کچھ کہے دوبارہ اخبار پڑھنے لگا۔ وہ دو ایک لمحے اس انتظار میں رہا کہ وہ جواب دے گا، لیکن جب اس نے اخبار سے سر نہ اٹھایا تو اس نے بائیں ہاتھ والے سے کہا۔۔۔ ’’بھائی زمین سے ہمارا رشتہ ٹوٹ گیا ہے۔‘‘
بائیں ہاتھ والے نے کتاب سے نظریں ہٹائے بغیر جواب دیا۔۔۔ ’’تو پھر کیا ہوا؟‘‘
اس نے گھبرا کر کھڑکی سے سر باہر نکلا اور جھک کر نیچے دیکھنے لگا، ریل کار ہوا میں اڑ رہی تھی۔
’’اب کیا ہو گا؟‘‘۔۔۔ اس نے سوچا۔۔۔ ’’میں گھر کیسے پہنچوں گا؟‘‘
’’گھر۔۔۔ کون سے گھر؟‘‘ سامنے بیٹھے ہوئے ایک شخص نے تمسخر سے کہا۔
’’میرے اپنے گھر۔‘‘ اس نے جلدی سے کہا۔ لیکن پھر فوراً ہی اسے خیال آیا کہ کیا اس کا کوئی اپنا گھر ہے؟
گھر۔۔۔ گھر۔۔۔ ریل کار کی آواز اس کے کانوں میں سیٹیاں بجانے لگی تو دائیں طرف والا اور بائیں طرف والا، دونوں ہی میری بات سننے کے لیے تیار نہیں اور یہ سامنے والا پوچھتا ہے کہ میرا گھر کون سا ہے؟
تو۔۔۔ تو پھر
اس نے بے بسی سے چاروں طر ف دیکھا۔
وہ بھی تو سامنے والی نشست پر ہی بیٹھی ہوئی تھی اور بڑی دیر سے اس کی آنکھوں میں توجہ کے سائبان تنے ہوئے تھے۔
تو یہ میری بات سمجھ رہی ہے۔
وہ اچک کر کھڑکی میں جھانکنے لگا اور جب اپنی سیٹ کی طرف مڑا تو اس نے سرگوشی میں اس سے کہا۔۔۔ ’’ہم ہوا میں سفر کر رہے ہیں۔‘‘
اس نے اپنی تائید مسکراہٹ کی مخملی پٹی میں لپیٹ کر اس کی طر ف پھینکی۔ وہ مطمئن ہو کر اپنی جگہ بیٹھ گیا اور تجسّس کے ننھے منے ہاتھوں سے اس کے سراپا کو ٹٹولنے لگا۔
جنگل کے ہرن سینگ میں سینگ پھنسائے اس کے سینے پر کلیلیں کر رہے تھے اور وہ بار بار پلکوں کی بالکونی سے جھانک جھانک کر اس پر شناسائی کے مسکراتے کنکر پھینک رہی تھی۔
اس نے سوچا، فرض کرو میں اس کا نام ’’ی‘‘ رکھ لیتا ہوں۔
تو ’’ی‘‘ مسکراہٹوں کے چپوؤں سے اس کے دل کی کشتی کو کھیتے ہوئے گہرے پانیوں میں لیے جا رہی ہے۔
دفعتاً اسے خیال آیا۔ اس کا نام ’’ی‘‘ ہی کیوں ؟ آخر اس سے پہلے بھی تو بے شمار حرف ہیں ، ان میں سے کوئی کیوں نہیں ؟
تو پھر کیا۔۔۔ کیوں نہ ’’الف‘‘ سے شروع کروں ؟
تو اس نے ’’الف‘‘ سے شروع کیا۔
لیکن ’’الف‘‘ تو مدت ہوئی بوڑھا ہو چکا ہے۔
’’ب‘‘ ویسے ہی بیمار ہے اور بستر پر لیٹا ہوا ہے۔
’’ج‘‘ کا آدھا حصہ ٹوٹا ہوا ہے۔
اس نے ایک ایک حرف کو اس کے گنگناتے بدن پر چسپاں کرنے کی کوشش کی، مگر سارے حروف بیمار اور کھوکھلے تھے۔
اب کیا کروں ؟
ہمارے تو حروفِ تہجی ہی بیمار ہیں۔
تو پھر ’’ی‘‘ ہی ٹھیک ہے۔
ہاں تو یہ ’’ی‘‘ اس کے ساتھ ہی سٹیشن سے سوار ہوئی تھی۔ کچھ دیر نشستوں کی Adjustment، آس پاس کے چہروں کی گنتی اور پھر دھیرے دھیرے دوسرے چہرے اس کی دلچسپی کی تسبیح سے ایک ایک کر کے کھسکتے چلے گئے اور لڑی میں بس ’’ی‘‘ کا ایک چہرہ رہ گیا، جسے اپنی آنکھوں کی پوروں سے اس نے اتنا چکنا کر لیا ہے کہ اب اس کی پلکیں اٹھتے ہی وہ پھسل کر اس کے دل کے آنگن میں آ گرتا ہے۔
تو یہ ’’ی‘‘ ہے،
اور میں۔۔۔ میں کون ہوں ؟
اسے خیال آیا، اسے اپنے لیے بھی کوئی حرف منتخب کر لینا چاہئے۔
لیکن ’’الف‘‘ سے ’’ی‘‘ تک سارے حروف تو بخار میں مبتلا ہیں۔
تو پھر۔۔۔ وہ میں ہی رہے،
تو میں فی الحال میں ہی ہوں ،
ہاں تو اس میں کو کہا جاتا ہے؟
انہیں تو کچھ بھی معلوم نہیں تھا۔ اتنے برسوں میں ان میں سے کوئی بھی یہ نہیں جان سکا تھا کہ برانچ لائن کون سی ہے اور مین لائن کون سی، ویسے کرنے کو مسلسل سفر کر رہے تھے۔
’’لیکن کیا ہم واقعی سفر کر رہے ہیں یا اتنے برسوں سے پلیٹ فارم پر ہی کھڑے ہوئے ہیں۔‘‘
اس نے دائیں ہاتھ والے سے پوچھا۔ دائیں ہاتھ والے نے اخبار سے سر اٹھا کر اس کی طرف دیکھا اور پھر جھک کر اس کے کان میں بولا، ’’میاں تم پلیٹ فارم کی بات کرتے ہو، مجھے تو لگتا ہے جیسے ہم ابھی تک اپنی ماں کے پیٹ ہی سے باہر نہیں نکلے۔‘‘
تو اصل مسئلہ یہ ہے کہ ہم ابھی پیدا ہی نہیں ہوئے،
اور مڑ کر ’’ی‘‘ کو دیکھنے لگا۔
’’ی‘‘ بہت خوبصورت تو نہیں تھی، لیکن اس کے گنگناتے بدن کے کچے آنسوؤں میں جوانی کے بہت سے لکّے کبوتر غٹرغوں غٹر غوں کر رہے تھے۔
’’تو کیا ہم سب جنم لے چکے ہیں ؟‘‘اس نے بائیں ہاتھ والے سے پوچھا،
بائیں ہاتھ والے نے کتاب سے سر اٹھایا، اس کی طرف دیکھا اور بولا۔۔۔ ’’یار تم سوال بہت کرتے ہو، ہاں تو کیا کہہ رہے تھے تم؟‘‘
اس نے کہا۔۔۔ ’’بھائی میں کہہ رہا تھا کہ کیا ہم سفر کر رہے ہیں ، لیکن ٹھہرو پہلے میں تمہارا نام رکھ لوں۔‘‘
بائیں ہاتھ والا اس کے کندھے پر سر رکھ کر رونے لگا، پھر بولا۔۔۔ ’’یہی تو المیہ ہے کہ میرا کوئی نام نہیں۔ ہم دوسروں کے ناموں کو اپنا سمجھتے ہیں ، لیکن حقیقت میں ہمارا کوئی نام نہیں۔ جب تک ہم ایک نا م کے حروف تلاش نہیں کرتے اسی پلیٹ فارم پر ہی بیٹھے رہیں گے۔‘‘
’’تو کیا ہم پلیٹ فارم پر ہی ہیں ؟‘‘ اس نے گھبرا کر سوال کیا اور اُچک کر کھڑکی میں جھانکنے لگا۔
’’میاں ہم تو پچھلے کئی سو سالوں سے اسی جگہ بیٹھے ہوئے ہیں۔‘‘ بائیں ہاتھ والے نے آنسو پونچھتے ہوئے اس کی طرف دیکھا۔
وہ دھڑام سے اپنی سیٹ پر گر گیا۔
تو میں کیا کروں ؟
کیا میرے مقدر میں یہی لکھا ہے کہ میں بھی اپنے سے پہلوں کی طرح اسی پلیٹ فارم پر مر جاؤں ؟
اس نے رحم طلب نظروں سے ’’ی‘‘ کی طرف دیکھا اور سرگوشی میں بولا، ’’اے اچھی لڑکی! کیا تو میری کوئی مدد کر سکتی ہے؟‘‘
’’ی‘‘ نے مسکرا کر اس کی طرف دیکھا اور اسی سرگوشی میں پوچھا، ’’کیسے؟‘‘
’’اس طرح کہ میرے پیدا ہونے میں میری مدد کرو۔‘‘
’’ی‘‘ کھلکھلا کر ہنس پڑی۔
پھر وہ کھڑکی میں سے باہر دیکھنے لگا۔
دور دور تک پھیلے کھیتوں میں کام کرتے کسان سیدھے ہو رہے تھے اور اپنی درانتیاں اوپر اٹھا رہے تھے۔
یہ سب کمزور ہیں ، انہیں دودھ کی ضرورت ہے۔
لیکن کون سے دودھ کی۔۔۔ ؟
تو دراصل یہ گاڑی چل نہیں رہی بلکہ ایک ہی جگہ کھڑی ہے۔
تو پھر کیا کروں۔
اس نے دائیں بائیں بیٹھے دونوں شخصوں کے کندھوں پر ہاتھ رکھے اور بولا۔۔۔ ’’آؤ نیچے اتر کر دیکھیں گاڑی چل کیوں نہیں رہی؟‘‘
دونوں نے بیک وقت حیرت اور استعجاب سے اس کی طرف دیکھا اور پھر غصہ سے بولے۔۔۔ ’’یہ ہمارا مسئلہ نہیں۔‘‘
’’تو پھر کس کا ہے؟‘‘ اس نے خود سے پوچھا۔
یہ ان دونوں کا مسئلہ نہیں۔
یہ ’’ی‘‘ کا بھی مسئلہ نہیں۔
تو پھر یہ مسئلہ کس کا ہے؟‘‘
’’ی‘‘ نے اب اخبار پڑھنا شروع کر دیا تھا اور اس دوران وقفوں وقفوں سے پلکوں کا گھونگھٹ اٹھا کر اس کی طرف دیکھ لیتی تھی۔
وہ بھول گیا تھا کہ گاڑی چل نہیں رہی،
اس کے دل کے گملے میں اب ننھے منے پودے سر اٹھانے لگے تھے اور ’’ی‘‘ کے بدن سے نکلتی خوشبوؤں کی ننھی منی کنکریاں اس کے نتھنوں کے صحن میں آ کر گر رہی تھی۔
تو اصل میں ہم سفر نہیں کر رہے۔
ایک لمحے کے لیے اسے پھر خیال آیا۔
لیکن جب اس نے دیکھا کہ اس کے آس پاس سارے مطمئن بیٹھے ہیں تو اس نے سر جھٹک کر اس خیال کو پرے پھینک دیا اور ٹانگیں پھیلا کر سیٹ میں گھس گیا۔
باہر اب تاریکی کی پھوار پڑ نے لگی تھی۔
’’ی‘‘ نے جھک کر سیٹ کے نیچے سے اپنے ٹوکری نکالی اور اس میں سے لفافہ نکال کر اسے کھولنے لگی۔ لفافہ کھولتے ہوئے وہ مسلسل کَن انکھیوں سے اس کی طرف دیکھتی رہی۔ پھر لفافہ میں سے اس نے کیک کا ٹکڑا نکالا اور اسے ہاتھ میں لے کر اس کی طرف دیکھنے لگی۔
اسے ایک دم ڈھیر ساری بھوک کا احساس ہوا۔
’’میں تو صدیوں سے بھوکا ہوں۔‘‘ اس نے سوچا۔۔۔ تو ’’ی‘‘ یہ ٹکڑا مجھے دے گی۔
وہ سراپا انتظار اور سوال بن کر ’’ی‘‘ کے سامنے پھیل گیا۔
’’ی‘‘ ایک یاد و لمحے تذبذب کی پینگ جھولتی رہی پھر اس نے اطمینان کا لمبا سانس لے کر کیک کے ٹکڑے کو منہ میں رکھ لیا اور لفافے میں سے ٹکڑے نکال کر کھانے لگی۔
تو اصل میں ’’ی‘‘ بھی اندر سے ایک کھوکھلا حرف ہے۔
ہم کریں بھی کیا
ہمارے تو سارے حروفِ تہجی ہی اندر سے کھوکھلے اور بیمار ہیں۔
’’تو اس میں میرا کیا قصور ہے۔‘‘۔۔۔ اس نے چیخ کر کہا۔
سارے اس کی طرف متوجہ ہو گئے۔
’’کیا بات ہے؟‘‘۔۔۔ دائیں ہاتھ والے نے برہمی سے پوچھا۔
ہمیں جو کچھ ورثہ میں دیا گیا ہے وہ سب کا سب کھوکھلا اور بیمار ہے اور یہ سارے حروف تہجی متعدی بیماریوں میں مبتلا ہیں۔
’’ی‘‘ نے کیک کھا کر لفافے سے انگلیاں صاف کیں اور لفافے کو کھڑکی میں سے باہر پھینک دیا۔
اس نے دیکھا، کھیتوں میں کام کرتے کسان درانتیاں لیے ایک جگہ اکٹھے ہو رہے تھے۔
’’ی نے مجھے کیک کا ٹکڑا کیوں نہیں دیا؟‘‘
اس کے اندر دکھ اور غم کی ایسی موسلا دھار بارش ہوئی کہ جل تھل ہو گیا۔
تھوڑی دیر بعد جب وہ اپنا اٹیچی لے کر نیچے اترا تو پلیٹ فارم پر اس کا دوست اس کا انتظار کر رہا تھا لیکن وہ اس کی طرف دیکھے بغیر آگے بڑھ گیا۔
اس کے دوست نے لپک کر اسے کندھے سے پکڑ لیا اور بولا۔۔۔ ’’عجیب آدمی ہو، میں تمہیں لینے آیا ہوں اور تم مجھے دیکھ کر بھی دوسری طرف چلے جا رہے ہو۔‘‘
اس نے جھٹکے سے کندھا چھڑا لیا اور بولا۔۔۔ ’’میں نے سفر ہی نہیں کیا، تم مجھے کیوں لینے آئے ہو؟‘‘
پھر یہ دیکھ کر کہ اس کا دوست حیرت سے اسے تکے جا رہا ہے، وہ اس کے کندھے پر ہاتھ رکھ کر کہنے لگا۔۔۔ ’’ہم سب تو اسی پلیٹ فارم پر کھڑے ہیں۔ ہم اس کے ایک دروازے سے باہر جاتے ہیں اور دوسرے سے پھر اندر آ جاتے ہیں اور یہ سمجھ رہے ہیں کہ ہم سفر کر رہے ہیں۔‘‘
پھر کچھ دیر بعد بولا۔۔۔ ’’دراصل ہمارے حروف تہجی ہی بیمار ہیں۔ جب تک ہم نئے حروف تہجی نہیں بنائیں گے اسی ناسفری کے آشوب میں گھلتے رہیں گے۔‘‘
دور کھیتوں میں جمع ہوتے کسانوں کی آوازیں اب اس کے جسم کے دروازوں پر دستکیں دے رہی ہیں۔
اس نے اپنا اٹیچی گھما کر لائنوں پر پھینک دیا اور بولا، ’’لعنت ہے مجھ پر۔ میں اتنا عرصہ ایک بے معنی اور بے مقصد بوجھ اٹھائے پھرتا رہا ہوں۔‘‘
’’ی‘‘ نے اب خوشبو کا نقاب اتار پھینکا تھا۔۔۔ ہاتھوں میں کیک کا ٹکڑا لیے رَس بھری نظروں سے اس کی طرف دیکھ رہی تھی۔
لیکن وہ اس کی طرف دیکھے بغیر چپ چاپ باہر نکل آیا۔
٭٭٭

تیز دھوپ میں مسلسل رقص

اوپر تیز بخار میں جلتا اور سورج
نیچے بھول بھلیاں ، راستہ بھٹکی سانسوں کے آبشار
لذت سے ہمکنار، لذت سے محروم فاصلے
پھیلے ہوئے سمٹے ہوئے فاصلے
جستجو کے پھڑپھڑاتے ہوئے پروں پر چمٹے ہوئے ہاتھ، خواہشوں کے گیلے پیڑ پر اُگے ہوئے ہاتھ، خالی اور بھرے ہوئے ہاتھوں کے درمیان تیزی سے گھومتی ہوئی رسی پر اچھل اچھل کر کبھی دائیں اور کبھی بائیں جانے کی کوشش میں الجھا ہوا وہ سر گھما کر چاروں طرف دیکھتا ہے۔
تیز دھوپ سے بچنے کی صورت
آنکھوں پر گہرے رنگ کا چشمہ
وہ صفحہ الٹ کر لفظوں کو چوسنے لگتا ہے۔
اندھیرے کی بانسری پر جھومتا ہوا سورج جب رینگ رینگ کر مشرقی منڈیر سے سر نکالتا ہے تو میونسپلٹی کی لاری اس کے مٹیالے منہ پر چھینٹیں مار مار کر اسے جگاتی ہے۔ وہ آنکھیں ملتے ہوئے اٹھ بیٹھتی ہے۔ اس کی پسلیوں میں سے پھوٹتی گلیوں کی نیم تاریکیوں سے لوگ ایک ایک کر کے باہر نکلتے ہیں اور اس کی چھاتیوں کو گدگداتے بڑے چوک میں گم ہو جاتے ہیں۔ اس کے دائیں طرف ایک لمبی خاموش دیوار ہے جو اس کی انگلیوں کی پوروں تک پھیلی ہوئی ہے۔ یہ دیوار مدتوں سے یوں ہی سکتے کے عالم میں ہے۔ بائیں طرف ایک دو۔۔۔ تین چار نیم تاریک گلیاں ہیں۔ جو سارا دن ابکائیاں لے کر لوگوں کو اس کی جھولی میں اگلتی رہتی ہیں۔ سر کی طرف بتی والا بڑا چوک ہے جس کے جبڑے صبح ہوتے ہی پھیل جاتے ہیں اور وہ نتھنے پھلا پھلا کر سارا دن بڑی چھوٹی گاڑیوں ، ٹانگے، سائیکل اور پیدل چلنے والے لوگوں کو اس کے منہ پر تھوکتا رہتا ہے۔ پاؤں کی طرف دو ڈھائی فرلانگ کے فاصلے پر ایک موڑ ہے جہاں پہنچتے پہنچتے اس کی شکل دھندلی دھندلی ہو جاتی ہے۔
ٹریفک کی زنجیر سارا دن اس کے سینے پر کروٹیں لیتی رہتی ہے اور وہ اس کے نیچے دبی، کبھی لمبے لمبے سانس لے کر اور کبھی رینگ رینگ کر اس بوجھ کو دائیں بائیں کرتی رہتی ہے۔ شام کی پھوار پڑتے ہی جب ٹریفک کی بھاری زنجیر ٹوٹتی ہے، وہ منہ میں تھکن کی چوسنی لیے اپنے دونوں کناروں میں سمٹ کر اونگھنے لگتی ہے۔ صبح سویرے جب سورج رات کے بند دروازوں پر دستک دے رہا ہوتا ہے، میونسپلٹی کی لاری بڑے چوک کے حاملہ پیٹ سے سر نکالتی ہے اور اس کے مٹیالے چہرے پر پانی کے چھینٹے مارتی، موڑ کی اندھی گلیوں میں گم ہو جاتی ہے۔
معمول کے ٹھکے ٹھکائے یک رنگ چوکھٹے میں پھنسا ہوا دن
طلوع اور غروب کے یکساں سانچے، وہ گہرے رنگ کا چشمہ لگا کر اگلا صفحہ پلٹتا ہے۔
تیز بخار میں ہذیانی رقص کرتا سورج، اس کے عین سر پر آ کھڑا ہوتا ہے۔
وہ جلدی سے صفحہ الٹتا ہے۔
لیکن اسی صبح جب پانی کے چھینٹوں کے انتظار میں کسمساتے اسے بہت دیر ہو گئی تو۔۔۔ اس نے اپنے کناروں سے سر نکال کر بڑے چوک کی طرف دیکھا۔ میونسپلٹی کی لاری بستی والے گھیرے سے لگی سہمی سہمی نظروں سے اسے دیکھ رہی تھی۔ پتھروں کا اونچا ڈھیر دونوں ہاتھ پھیلائے اسے روکے ہوئے تھا۔
وہ سر گھما کر دیکھتی ہے، پتھروں کے یہ پھوڑے اس کے سارے جسم پر پھیلے ہوئے ہیں اور درد اُس کی پور پور میں رینگ رہا ہے۔
یہ رات، اذیت کی رات۔
وہ آہ بھر کر انگڑائی لیتی ہے اور اس کی نظریں اس پر پڑتی ہیں ، وہ اپنے ڈگمگاتے قدموں پر جسم کا سارا بوجھ ڈالے اس کے کنارے کنارے چلا آ رہا ہے۔ وہ اَدھ کھلی نیم خواب آنکھوں سے اسے دیکھتی ہے اور اس کا جی چاہتا ہے کہ وہ کچھ دیر کے لیے اس کے پاس بیٹھ جائے۔ وہ اچک کر اس کے پاؤں پکڑنا چاہتی ہے لیکن وہ اس سے پہلے ہی پتھروں کے ایک ڈھیر کے ساتھ ٹیک لگا کر بیٹھ جاتا ہے۔ وہ پتھروں کے نیچے ہی نیچے سرک سرک کر اس کے قریب آتی ہے اور ڈھیر کی درزوں میں سے سر نکال کر اس کے ساتھ آ لگتی ہے۔
’’تو یہ شخص وہی ہے۔‘‘
وہ دھیرے سے اس کے پاؤں میں چٹکی لیتی ہے۔ لیکن وہ اسی طرح گم سم دور خلا میں کسی نامعلوم شے کو گھورتا رہتا ہے۔
’’تو یہ شخص وہی ہے۔‘‘
یہ شخص ہر صبح سات بجے گلی نمبر ۴ سے نکل کر بڑے چوک میں جاتا ہے۔ چار بجے انیس نمبر بس اسے دوبارہ چوک کی جھولی میں اگل جاتی ہے اور وہ اسی طرح خاموشی سے گلی نمبر ۴ میں لوٹ جاتا ہے۔ شام کو وہ ایک عورت اور بچے کے ساتھ باہر آتا ہے۔ عورت کھنکھناتا جسم، متجسّس آنکھیں ، خواہشوں کے لیسلے پیڑ پر اگے کانٹوں میں پھنسے زخمی ہاتھ۔
بچہ معصومی کی رنگین پینگ پر ہلا رے کھاتا، دھنک رنگوں کو پکڑنے کی کوشش میں مگن!
واپسی پر گلی میں داخل ہونے کی ترتیب۔۔۔ سب سے پہلے خواہشوں کے ہاتھوں رہن رکھی آنکھوں والی عورت، پھر جمائیاں لیتا بچہ اور آخر میں وہ جوہے اور نہیں بھی۔
وہ پتھروں کی درزوں میں سے سر نکال کر اسے غور سے دیکھتی رہتی ہے؟ یہ شخص پچھلے کئی سالوں سے اسی طرح زندگی کی وقت کی چرخی پر لپیٹ رہا ہے۔ صبح شام، صبح شام، پھر وہی رات اور اس کے بعد وہی صبح شام، صبح و شام۔ عورت اس سے قدرے مختلف ہے۔ اس کی آنکھوں کے طاقچے میں ہر روز نئی نئی شمعیں جھلملاتی ہیں۔ وہ کئی بار عورت کے پاؤں کے نیچے سرکتی گلی نمبر چار کے نیم تاریک دہانے تک آئی ہے۔ اس کا کئی بار جی بھی چاہا ہے کہ عورت کے ساتھ اندر جائے، لیکن دونوں کناروں کے اندر بندھے اس کے پاؤں راستہ روک لیتے ہیں۔ عورت جب بھی گلی سے نکلتی ہے وہ چوکنی ہو جاتی ہے اور دوڑ کر اس کے قریب آ جاتی ہے۔ جب عورت پہلی بار دن کے وقت اکیلی باہر آئی تھی تو وہ اس کے ساتھ ساتھ سبزی والے کی دکان تک گئی تھی۔ کچھ دنوں تک عورت کا یہ سفر گلی سے سبزی والے اور سبزی والے سے گلی تک محدود رہا پھر وہ دکان نمبر سا ت تک آنے لگی۔ یہ ایک چھوٹا سا جنرل سٹور ہے۔ شروع شروع میں عور ت جنرل سٹور کے شوکیس کے پاس کھڑے ہو کر سودا خریدتی ہے پھر رفتہ رفتہ وہ آگے اور آگے، سٹور کے پچھلے حصہ میں جانے لگتی ہے۔
یہ شخص تو چار بجے واپس آتا ہے جب عورت سٹور کے پچھلے حصہ کی سیر کر کے اور اپنی ٹوکری بھر کر گلی میں واپس جا چکی ہوتی ہے۔ وہ جلدی سے گلی میں داخل ہوتی ہے۔ شام کو وہی ترتیب، پہلے عورت پھر بچہ اور آخر میں وہ کنارے کنارے بڑے چوک تک۔ واپسی اسی طرح، پہلے عورت پھر بچہ اور آخر میں وہ اور اب یہ وہ پتھروں کے اس ڈھیر سے ٹیک لگائے کسی نامعلوم خوف کے پنجوں میں پھڑ پھڑا رہا ہے۔
وہ اچھل کر اس کے چہرے پر لکھے لفظ پڑھنے کی کوشش کرتی ہے۔ سارے لفظ بے ترتیب، بے ڈھنگے، لائنیں ٹیڑھی اور مٹی مٹی۔ اس کی آنکھوں میں کل رات کا منظر منجمد ہو جاتا ہے۔
ایک کار گلی نمبر چار کے قریب آ رکتی ہے۔ گلی سے پہلے عورت اور اس کے پیچھے بچے کو گود میں لیے وہ باہر آتا ہے۔ عورت جلدی سے کار میں بیٹھ جاتی ہے۔۔۔ وہ بچے کو گود میں لیے گم سم اسے دیکھتا رہتا ہے۔ کار تیزی سے مڑتی ہے۔ بچہ لپک کر عورت کو پکارتا ہے لیکن کار بڑے چوک کی گود میں گم ہو جاتی ہے۔ وہ جلدی سے گلی میں کود جاتا ہے۔ تھوڑی دیر بعد ایک ٹرک نمودار ہوتا ہے اور پتھروں کا ایک ڈھیر اس کے سینے پر پھینک کر چوک کی طرف بھاگ نکلتا ہے۔ پھر رات گئے تک پتھروں کے ڈھیر اس کے سارے جسم پر پھیل جاتے ہیں۔
وہ صفحہ پلٹنے سے پہلے گہرے رنگ کا چشمہ اتار دیتا ہے اور سر اٹھا کر تیز بخار میں جلتے، ہذیان بکتے سورج کو دیکھتا ہے، سورج اپنی ہتھیلیوں پر الاؤ جلائے پورے آسمان پر ناچ رہا ہے۔
تھتھیا تھیا تھیا۔۔۔ تھتھیاتھیا تھیا
گلی نمبر تین کی مسجد میں نماز ختم ہو گئی ہے اور اِکا دُکا نمازی گلی سے نکل رہے ہیں۔ وہ جلدی سے اٹھ بیٹھتا ہے اور پتھروں کے ڈھیر کے پاس کھڑا بے چینی سے بڑے چوک کی طرف دیکھنے لگتا ہے۔
وہ پتھروں کے ڈھیروں کے نیچے سرکتی سرکتی بڑے چوک کے قریب آتی ہے۔ کار چوک کے دوسرے سرے سے نکلتی ہے۔ پتھروں کے ڈھیر دیکھ کر چوک ہی میں رک جاتی ہے۔ عور ت باہر نکلتی ہے اور آہستہ آہستہ اس کے قریب آتی ہے۔ دونوں چپ چاپ ایک دوسرے کو دیکھتے ہیں اور کچھ کہے بغیر آہستہ آہستہ گلی نمبر چار کی تاریکی میں تحلیل ہو جاتے ہیں۔
کچھ دیر بعد ایک خوفناک چہرے والا انجن بڑے چوک کی طرف سے آتا ہے۔ اس کے پیچھے بیلچوں اور گینتیوں کی قطار ہے۔ انجن پھک پھک کرتا اس کے سینے پر آ چڑھتا ہے۔ بیلچے اور گینیتاں بھوکے گدھوں کی طرح اس کی لاش پر ٹوٹ پڑتی ہیں۔
وہ پھر گہرے رنگ کی عینک اپنے منہ پر چڑھا لیتا ہے۔ ہاتھوں میں حدّت اور چبھن کے برچھے لیے ہذیانی سورج اس کے عین سر پر ناچ رہا ہے۔ رفتار، بوجھ اور دکھ کا رقصِ مسلسل۔
وہ سر گھما گھما کر ایک ایک کو دیکھتا ہے۔ پھر کتاب کو زور سے دیوار پر دے مارتا ہے۔ کتاب کے مضمون پر ٹنگے حرف ٹوٹ ٹو ٹ کر تڑخ تڑخ کر نیچے گرتے ہیں۔
سوکھے ہوئے لفظ۔۔۔ تڑخے ہوئے لفظ
چوسے ہوئے لفظ۔۔۔ پھوکے لفظ
تیز دھوپ سے بچنے کی صورت
آنکھوں پر گہرے رنگ کا چشمہ
لیکن بدن پر رینگتی دھوپ، جسم تو اسی طرح جل رہا ہے!
٭٭٭

جاگتی آنکھوں کا خواب

اسے معلوم نہیں تھا کہ اس میز پر پڑے ہوئے اسے ایک لمحہ گزرا ہے، ایک سال یا ایک صدی۔ وہ تو بس لیٹا ہوا چھت کو اپنی آنکھوں میں پرو رہا تھا اور تنہائی کا ہانپتا کتا زبان باہر لٹکائے اس کے سارے جسم کو چاٹ رہا تھا۔ سورج نیچے اتر کر اس کے سر پر آ بیٹھا تھا اور اس نے اپنی ٹانگیں اس کے سینے پر پھیلا دی تھیں ، اس لیے اسے احساس نہیں تھا کہ وہ جاگ رہا ہے یا سو رہا ہے۔ کیونکہ یہ ساری چیزیں یا تو سو رہی تھیں یا اسی کی طرح وقت کی ٹوٹی ہوئی رسیوں سے لٹک رہی تھیں۔
ایک لمحہ۔۔۔ ایک سال۔۔۔ یا ایک صدی، جانے کب سے وہ اسی طرح تنہائی کی کھڈی پر سانسوں کی اُون سے اپنی زندگی کا قالین بُن رہا تھا۔ اب یہ بھی معلوم نہیں کہ یہ قالین تھا کہ دری، کیونکہ وہ جب بھی اس پر ہاتھ پھیرتا، کھردرا پن اس کی پوروں پر رینگنے لگتا اور وہ جھنجھلا کر دوبارہ میز پر آ گرتا۔ اسے آپریشن کے لیے اس کمرے میں لایا گیا تھا۔ ڈاکٹر نے کہا تھا کہ اس کا ایک گردہ خراب ہو گیا ہے۔ اس کے بدن کے کھلیان میں گندے خو ن کی قلم لگ گئی ہے۔ ہاں اسے یاد آیا، اسے گردے کے آپریشن کے لیے یہاں لایا گیا تھا، لیکن کب۔۔۔ ایک لمحہ، ایک سال، یا ایک صدی پہلے، جانے کب اسے یہاں لایا گیا تھا۔ شاید وہ پیدا ہی اسی میز پر ہوا ہو۔ اس نے ہاتھ اٹھا کر میز کو چھونا چاہا لیکن اس کے بازو میں درد کی گیند لڑھکنے لگی۔ اسے یاد آیا کہ ڈاکٹر نے اس کے بازو میں انجکشن لگایا تھا۔ دوا سوئی کی گود میں سے پھسل کر اس کے سارے جسم میں پھدکنے لگی تھی۔۔۔ پھر۔۔۔ پھر اس نے اپنی نظروں کی کمند کو سر پر لٹکتی ہوئی روشنی کی فصیل سے پرے پھینکا۔ اس کی بیوی دیوار سے لٹکی ہوئی تھی۔ اسے آنکھیں کھولتے دیکھ کر اس نے کلکاری ماری اور اُڑ کر اس کے سر پر لٹکتی روشنی کے تھال پر آ بیٹھی اور اس کے ساتھ یوں ہلنے لگی جیسے جھولا جھول رہی ہو۔
اس نے اپنی نظروں کو سمیٹا اور کہنے لگا۔۔۔ ’’تم یہاں کیا کر رہی ہو؟ بچوں کا کیا حال ہے؟ وہ کس کے پاس ہیں ؟‘‘
بیوی نے جھولتے جھولتے اپنی قمیض کا دامن اوپر اٹھایا، دودھ کی ایک دھار اس کے پیاسے منہ پر ماری۔ نمکین دودھ اس کے چہرے کے کٹورے سے پھسلتا ہوا قطرہ قطرہ اس کے ہونٹوں کی ٹرے میں اکٹھا ہونے لگا۔
ماں۔۔۔ اس کے ہونٹوں کے باجے پر گنگناہٹ ہوئی، لیکن دوسرے ہی لمحے اسے خیال آیا کہ وہ تو اس کی بیوی ہے۔ اس نے ہڑبڑا کر آنکھیں کھولیں۔۔۔ اس کی بیوی کا جسم پگھل رہا تھا اور بوند بوند اس کے سینے پر گر رہا تھا۔ اس نے اچھل کر پرے ہٹنا چاہا لیکن اس کے جسم کی گاڑی کے سارے پہیے پنکچر ہو گئے تھے۔
اس کی بیوی کا جسم قطرہ قطرہ اس کے سینے پر جمع ہو رہا تھا اور ٹھنڈک دھیرے دھیرے اس کے نیچے سرک رہی تھی۔ اسے یاد آیا، ڈاکٹر نے انجکشن لگانے کے بعد اس کے گردے کا آپریشن شروع کیا تھا۔ اس نے سر اٹھا کر دیکھنا چاہا لیکن اس کے سینے پر اس کی بیوی کے جسم کا ڈھیر لگا ہوا تھا، اس کا اٹھا ہوا سر پھر میز پر آ گرا۔
’’ڈاکٹر‘‘۔۔۔ اس کی آواز کا پرندہ پھڑپھڑا کر اڑا لیکن کمرے کی دیوار سے ٹکرا کر فرش پر آ گرا۔
’’ڈاکٹر‘‘۔۔۔ اس نے سرگوشی کی۔
ڈاکٹر کہاں ہے؟ اس نے سوچا۔
’’ڈاکٹر‘‘۔۔۔ اس کے ہونٹوں کے پنجرے سے آواز کے سارے پرندے پھڑپھڑا کر اڑے لیکن کمرے کا چکر لگا کر واپس آ گئے۔
ڈاکٹر کمرے میں موجود نہیں تھا۔
سرمئی ابابیلیں اس کے چاروں طرف منڈلا رہی تھیں اور تاریکی کی کنکریاں ایک ایک کر کے اس کے چاروں طرف پھینک رہی تھیں۔ اس نے آنکھیں پھاڑ پھاڑ کر نظروں کی کدالوں سے تاریکی کی ان چٹانوں کو چیرنے کی کوشش کی لیکن اس کی آنکھوں کے پیاسے کاسوں میں روشنی کی ایک بوند بھی نہ گری۔
پہچان کی ساری رسیاں ایک ایک کر کے ٹوٹ رہی تھیں اور چیزیں اور منظر اس کی آنکھوں کے کیمرے میں جل بجھ رہے تھے۔۔۔ جل بجھ رہے تھے اور وہ خود تنہائی کی زنجیر سے بندھا اس میز پر گھپ اندھیرے میں بھیگ رہا تھا۔
ایک لمحہ۔۔۔ ایک سال یا ایک صدی، جانے کب سے وہ اس میز پر پڑا وقت کی طنابوں کو انتظار کی کند چھری سے کاٹ رہا تھا۔ کوئی چپچپی سی چیز اس کی پیٹھ کے نیچے سرک رہی تھی۔ شاید ڈاکٹر اس کا آپریشن ادھورا چھوڑ گیا ہو، کیا معلوم اس کا گردہ باہر پڑا ہویا شاید ڈاکٹر اسے نکال کر ساتھ لے گیا ہو، کیا معلوم۔۔۔ کیا معلوم،
اس کے سوالوں کی ٹوکری میں سارے انڈے کچے تھے۔ وہ انہیں آنچ دے دے کر تھک گیا تھا لیکن جوابوں کے بچے نہیں نکل رہے تھے۔
سارے سوال منجمد ہو گئے تھے۔
تو ڈاکٹر چلا گیا ہے۔۔۔ اس نے اپنے آپ سے کہا۔
بے بسی کی ڈائن تنہائی کا چغہ پہنے کمرے کی دیواروں سے نکلی اور دھیرے دھیرے چلتی اس کے قریب آئی تو وہ سحر زدہ سا ان پتلیوں میں تیرنے لگا۔ وہ آہستہ سے جھکی اور پھر اس نے اپنے لمبے دانت اس کی گردن میں گاڑ دئیے۔۔۔ اور اداسی، مایوسی، تنہائی کا زہر قطرہ قطرہ اس کے بدن کے مشکیزہ میں ٹپکنے لگا۔
تو ڈاکٹر چلا گیا ہے۔
اس کے بدن کی کھلیان میں بے بسی، اداسی، تنہائی کی کونپلیں ، لہلہاتی فصلیں بن گئی تھیں اور مایوسی کی چڑیاں ان میں پھدکتی پھر رہی تھیں۔
وہ کٹے ہوئے درخت کی طرح میز پر پڑا ان بے شمار کیڑوں کو دیکھ رہا تھا جو اس کے وجود پر رینگ رہے تھے اور اس کے بدن کی نرم سندھوری مٹی میں اپنا گھر بنا رہے تھے۔
اس کا وجود اس فراموش کردہ دیوار کی طرح تھا جس میں مختلف کیڑوں اور پرندوں نے اپنے آلنے بنا لیے ہوں اور اب ہر کوئی اپنے گھر کو وسیع اور بڑا کرنے کے لیے اسے اندر ہی اندر کھودتا چلا جا رہا ہو۔
وہ کھوکھلا تنا تھا جس پر بے بسی اور مایوسی کی موٹی چھال تنی ہوئی تھی۔
اس کی آنکھیں بند دروازے کی چوکھٹ سے لٹکی ہوئی تھیں اور وقت کی مکڑی دروازوں کے پٹوں پر انتظار کے جالے بن رہی تھیں۔
ایک لمحہ۔۔۔ ایک سال۔۔۔ یا ایک صدی، وقت کی گھڑی کا ڈائل بجھا ہوا تھا اور سوئیاں ٹوٹ کر نیچے گر پڑی تھیں۔ اس لیے اسے معلوم نہیں ، ایک لمحہ، ایک سال یا ایک صدی۔۔۔ دروازہ آہستہ سے کھلا۔ اس کی پتھرائی آنکھوں میں پہچان کا شعلہ چمکا۔
ایک شخص سفید لباس میں اندر آیا۔ اس نے اپنی نظروں کی کمند پھینک کر اسے جکڑ لینے کی کوشش کی۔ اس شخص کے سر کے بال سفیدی چاٹ رہے تھے اور ہاتھ جھریوں کے دستانوں میں لپٹے ہوئے تھے۔ وقت کی مکڑی نے اس کے چہرے پر عمر کا جالا بُن دیا تھا۔ وہ چپ چاپ اس کے قریب کھڑا رہا۔ پھر کہنے لگا۔۔۔ ’’مجھے معاف کر دینا، میں بھول گیا تھا۔ آج میں ریٹائر ہو رہا ہوں۔ جانے سے پہلے میں اپنا دراز صاف کر رہا تھا کہ تمہارے کاغذات نکل آئے اور مجھے یاد آیا کہ تم تو آپریشن تھیٹر میں ہی پڑے ہو۔۔۔ مجھے معاف کر دو۔‘‘
وہ ندامت کے چند آنسو اس کے کانوں کے پیاسے کٹوروں میں ٹپکا کر باہر چلا گیا۔
دروازہ ایک بار پھر بند ہو گیا۔
ایک لمحہ۔۔۔ ایک سال۔۔۔ ایک صدی، وقت کبھی بھی اس کا دوست نہیں بنا تھا۔ اس نے ہمیشہ موقع کی مچان سے اس پر چھپ کر وار کیا تھا اور اس بار پھر اس نے اپنی تیز چھری سے اس کے خیمے کو کاٹنے کی کوشش کی تھی۔ دن اور لمحے تو اس سے چھین لیے گئے تھے اس لیے اسے معلوم نہیں تھا کہ ایک لمحہ، ایک سال یا ایک صدی بیت گئی ہے۔
وہ اسی طرح اپنی نظروں کے برمے سے بند دروازے کو چھیدنے میں لگا رہا۔۔۔ دروازہ پھر کھلا، ایک نوجوان شخص سفید لباس پہنے اندر آیا۔ چند لمحے اسے دیکھتا رہا، پھر کہنے لگا۔۔۔ ’’میں نیا ڈاکٹر ہوں ، پرانے ڈاکٹر نے تمہارے کاغذات ابھی ابھی مجھے دئیے ہیں۔‘‘ پھر اس کا شانہ تھپتھپاتے ہوئے بولا۔۔۔ ’’مجھے افسوس ہے، تمہیں اتنی تکلیف اٹھانا پڑی، میں ابھی آ رہا ہوں۔‘‘
دروازہ دوبارہ بند ہو گیا۔
تنہائی، اکیلے پن اور اداسی نے پھر اسے اپنی مٹھیوں میں جکڑ لیا، بے بسی اور مایوسی کی چڑیاں اس کے بدن کی آنتوں میں چوں چوں کرتی پھدکنے لگیں۔
ایک لمحہ۔۔۔ ایک سال۔۔۔ یا ایک صدی۔
بند دروازے کی طر ف دیکھتے ہوئے وہ سوچنے لگا، خدا جانے یہ ڈاکٹر بھی آئے گا یا پہلے کی طرح اسے آنے والے کے حوالے کر جائے گا۔
کون جانے۔۔۔ کون جانے
کمرے میں اڑتی آوازوں کی گرد دھیرے دھیرے نیچے بیٹھنے لگی اور خاموشی کی دیمک اندر ہی اندر اسے چاٹنے لگی۔
دفعتاً اس گھپ خاموشی سے خیال کے سانپ نے پھن اٹھایا اور اس کے سارے وجود کو چاٹنے لگا۔
سب لوگ اسے بھول گئے ہیں۔
اس کی بیوی اس کے محبت کے خیمے سے باہر نکل گئی ہے۔ اس کے بچے اس کے پروں سے پھسل گئے ہیں۔ وہ سب زندگی کی رنگا رنگیوں میں اپنے اپنے خیمے گاڑ رہے ہیں۔
سب اسے بھول گئے ہیں۔
اور اس کی آنکھوں میں منجمد چشمے پھوٹ بہے۔
٭٭٭

گمشدہ آواز کی دستک

وہ اس گھنے شہر میں ، جس کی جوان چھاتیوں پر رات سانس لیتی، اندھیرا کروٹیں بدلتا ہے، زمین کا ایک ٹکڑا خریدنا چاہتا ہے۔ اس کا کہنا تھا کہ اسے یہ زمین مکان بنانے کے لیے چاہئے۔ لیکن یہ بات کسی کو بھی معلوم نہ تھی کہ زمین کا یہ ٹکڑا وہ اپنی قبر کے لیے خرید رہا ہے۔ اس بات کا اقرار کرنے کے لیے وہ خود بھی تیار نہ تھا کہ موت اس کے جسم کی ٹوٹی شاخوں پر ابھی پوری طرح نہیں بیٹھی تھی لیکن اس نے کئی دوسرے جسموں کے کھنڈروں میں اسے منڈلاتے دیکھا تھا۔ ویسے بھی قبر کے بارے میں اس کا اپنا ایک تصور تھا۔ لوگ مکان کا ڈیزائن بڑی محبت اور پیسے خرچ کر کے بنواتے ہیں لیکن قبر کی طرف کوئی توجہ نہیں دیتا۔ یہ معاملہ ہر شخص دوسروں پر چھوڑ دیتا ہے۔ لیکن اس کا رویہ اس بارے میں مختلف تھا۔ وہ بچپن ہی سے اپنی قبر، اس کا ڈیزائن اور دوسری باتوں کے بارے میں اس طرح سنجیدگی سے سوچتا جیسے یہ اس کی زندگی کا سب سے اہم مسئلہ ہو۔ قبر سے اس کی دلچسپی اس وقت سے شروع ہوئی تھی جب وہ اپنے باپ کے جنازے کے ساتھ قبرستان گیا تھا یا شاید اس سے بھی پہلے ہو۔ لیکن اس کی یادداشت کی البم کی پہلی تصویر اپنے باپ کے جنازے ہی کی تھی۔
قبرستان پہنچ کر لوگوں نے نماز پڑھی تھی۔ پھر اس کے باپ کو قبر میں اتارا گیا تھا۔ جب سلیں رکھنے کی باری آئی تو اچانک کسی کو اس کا خیال آ گیا اور اس نے پکار کر اس سے کہا کہ آؤ آخری بار باپ کا چہرہ دیکھ لو۔ وہ لوگوں کے پیچھے دبکا کھڑا تھا، اس کا نام سنتے ہی سب اس کی طرف دیکھنے لگے۔ ایک بزرگ اسے بڑی شفقت سے پکڑ کر قبر کے قریب لے آیا۔ اس نے جھانک کر دیکھا، باپ کا چہرہ تو اسے نظر نہ آیا لیکن یہ احساس ضرور ہوا کہ قبر کچھ چھوٹی ہے اور اس کے باپ کا جسم اس میں پھنسا پھنسا سا ہے۔ پھر ساری رات اسے یہی احساس ہوتا رہا کہ اس کا باپ قبر کے چوکھٹے میں پھنسا ہوا ہے۔ اس کے پیر اور سر دونوں طرف کی دیواروں میں دھنسے ہوئے ہیں اور وہ دونوں ہاتھ ہلا ہلا کر اسے بلا رہا ہے۔ قبر کے چھوٹے ہونے اور باپ کے دھنسے رہنے کی یہ تصویر اس کے قد کے بڑھنے کے ساتھ ساتھ گہری اور واضح ہوتی چلی گئی۔ اس دوران اس کی ماں نے ان کے پڑوسی سے شادی کر لی اور وہ ہائی سکول میں پہنچ گیا۔ اس کا نیا باپ اس کی ہر ضرورت کا خیال رکھتا۔ لیکن وہ اس کی نفرت کی آگ پر پانی نہ ڈال سکا۔ وہ جب بھی اپنے نئے باپ کو دیکھتا، اسے قبر میں پھنسے ہوئے باپ کے پاؤں یاد آ جاتے۔ اس کی آنکھوں کے صفحوں پر وہ راتیں رینگنے لگتیں ، جب اس کا باپ رات کو کراہ کر پانی مانگا کرتا تھا۔ اس کی آنکھ کھلتی تو ماں موجود نہ ہوتی۔ وہ اٹھ کر باپ کو پانی پلاتا۔ پھر صحن میں آتا۔ لیکن سیڑھیوں میں پھیلی ہوئی آوازوں کے بھنور اسے واپس کمرے میں دھکیل دیتے۔ ایسی ہی ایک رات کو اس کے باپ نے پانی مانگا اور پھر ہمیشہ کے لیے چپ ہو گیا۔ اس کی ماں کہتی تھی کہ اس کا باپ اسی رات مرا ہے۔ لیکن اس کا خیال تھا کہ وہ اس سے کئی راتیں پہلے ہی مر گیا تھا، وہ تو اس کی لاش کو پانی پلایا کرتا تھا۔
اور اب کئی سال دیمک لگ لگ کر عمر کی ردّی کی ٹوکری میں گر گئے تھے لیکن اسے اب بھی سوتے ہوئے اپنے باپ کے پاؤں یاد آتے۔ پھر محسوس ہوتا کہ اسے بھی قبر میں اتار دیا گیا ہے۔ قبر چھوٹی ہے لیکن دفن کرنے والے اسے زبردستی ٹھونک ٹھانک کر اس میں فٹ کر گئے ہیں اور سلیں لگا کر بھاگ گئے ہیں۔ گھپ اندھیرے میں اسے اپنے پاؤں دیوار میں پھنسے ہوئے محسوس ہوتے۔ وہ ہل ہل کر انہیں سیدھا کرنے کی کوشش کرتا لیکن پاؤں اور پھنستے چلے جاتے۔ پھر جب اس کی بیوی اس کی بڑبڑاہٹ سن کر بتی جلاتی تو اسے معلوم ہوتا کہ اس کے پاؤں تو کمبل میں الجھے ہوئے ہیں۔ وہ چونک کر بیوی کو دیکھتا اور پھر اس سے پوچھتا۔۔۔
’’ہمارے دائیں طرف کون رہتا ہے؟‘‘
وہ کہتی ’’۔۔۔ آپا صدیقہ‘‘
وہ کہتا۔۔۔ ’’نہیں ،اس کے خاوند کا نام بتاؤ؟‘‘
وہ کہتی۔۔۔ ’’حاجی عبد الغفور‘‘
وہ پوچھتا۔۔۔ ’’اور بائیں طرف‘‘
وہ کہتی۔۔۔ ’’اچھن خان‘‘
اور پھر پوچھتا۔۔۔ ’’اور پچھلی طرف‘‘
وہ کہتی۔۔۔ ’’عبد المجید‘‘
’’اور سامنے‘‘
’’عبد المنان‘‘
’’اور اوپر‘‘
وہ جھنجلا کر کہتی۔۔۔ ’’خدا‘‘
لیکن وہ اس کی جھنجلاہٹ کو محسوس کئے بغیر اسی سنجیدگی سے پوچھتا،’’اور نیچے‘‘
ایک دو منٹ تک اس کی بیوی کو کچھ نہ سوجھتا پھر وہ غصے سے کہتی۔۔۔ ’’قبرستان۔‘‘
قبرستان کا لفظ سنتے ہی اس کے ذہن میں پہلے قبر اور پھر اپنے باپ کے پھنسے ہوئے پاؤں ابھرتے۔ اسے لگتا جیسے قبر کی دیواریں اسے چاروں طرف سے دبا رہی ہیں۔ وہ سکڑتا چلا جاتا، یہاں تک کہ قبر ہی قبر باقی رہ جاتی۔ وہ سوچتا، وہ ہے ہی نہیں اور ساری رات وہ اسی ہے اور نہیں کی کشمکش میں الجھا کبھی کئی سال پیچھے چلا جاتا اور کبھی کئی سال آگے نکل جاتا۔ اسے اپنی ماں یاد آتی اور اس کے ساتھ ہی میٹھے دودھ کی ایک پھوار اس کے پیاسے ہونٹوں کے بنجر کھیتوں کو سیراب کر جاتی۔ پھر سیڑھیوں پر پھیلے ہوئے بھنور اس کے کانوں میں بھوند بھوند سرگوشیاں ٹپکاتے اور قبر کی دیوار میں پھنسے ہوئے باپ کے پاؤں اس کے جسم میں داخل ہو جاتے۔ وہ آنکھیں بند کئے چپکے سے اٹھتا اور دوڑ کر بیوی سے لپٹ جاتا۔ ساری رات ’’ہے اور نہیں ‘‘ کی اسی کشمکش میں وہ کبھی دھندلاتے نقطے بنتا، کبھی گہرا ہوتے ہوتے سارے بستر پر پھیل جاتا اور ایک رات کے بعد دوسری رات اسی طرح جسم کی چادر پر گدگدیاں کرتے ہوئے گزرتی چلی جاتی۔
کئی بار اس نے سوچا، ساری خرابی اس بستر کی ہے جس میں داخل ہوتے ہی اسے قبر یاد آ جاتی۔ پھر کئی بار اس نے سوچا، ساری خرابی اس کی بیوی کی ہے جو سرِ شام ہی منہ لپیٹ کر سو جاتی ہے۔ کئی بار اس نے یہ سوچا کہ ساری خرابی اس کے بیٹے کی ہے جو کتابوں کے صحن سے باہر ہی نہیں نکلتا۔ یا پھر ساری خرابی اس مکان کی ہے جس کی دائیں طرف حاجی عبد الغفور، بائیں طرف اچھن خان، پچھلی طرف عبد المجید، سامنے عبد المنان رہتے ہیں اور اوپر۔۔۔ اوپر نہ جانے کیا تھا لیکن نیچے قبرستان ضرور تھا اور سارا مسئلہ قبر کے خیال سے گڑبڑاتا تھا۔ اس لیے وہ زمین کا ایسا ٹکڑا خریدنا چاہتا تھا جس میں وہ اپنی مرضی سے مکان بنوائے اور اس کے نیچے اپنی مرضی کی قبر۔
لیکن زمین خریدنا اس کے بس میں نہیں تھا۔ بس میں تو شاید کچھ بھی نہیں تھا۔ ساری زندگی دوسروں نے ہی اس پر حکومت کی تھی۔ پہلے وہ ماں سے ڈرتا تھا اب بیوی سے اور مرنے کے بعد فرشتوں کا خوف تھا جو قبر میں اس کا حساب لینے آئیں گے۔ خوف، خوف۔۔۔ خوف۔ اس نے زندگی کی ٹرے سے بس ایک ہی چیز چنی تھی، باقی ساری چیزیں تو اسے سیکنڈ ہینڈ ہی ملی تھیں۔ شوکیسوں میں لگی ہوئی چیزوں کو تو وہ للچا للچا کر دیکھ ہی سکتا تھا اور پھر جب یہی چیزیں پرانی ہو کر شوکیسوں سے نکل کر ہر مال دو دو روپے والی ریڑھی پر آتیں تو اس کے نام کی چٹ بھی نکل آتی۔ اس کے گھر کی ہر شے، جس میں اس کی بیوی بھی شامل تھی، سیکنڈ ہینڈ اور ہر مال دو دو روپے والی ریڑھی سے خریدی ہوئی تھیں۔
کبھی کبھی اسے خیال آتا، وہ اپنا باپ ہے اور اس کی بیوی اس کی ماں ہے۔ اس کی ماں ایک بڑے گھرانے کی بیٹی تھی۔ اس کی شادی اس غلط فہمی میں ہو گئی کہ اس کے باپ کے ظاہری رکھ رکھاؤ کے پیچھے ایک بڑی جائیداد ٹیک لگائے کھڑی تھی۔ لیکن اس کے باپ کے گھر میں قدم رکھتے ہی اسے معلوم ہو گیا کہ وہ تو سفید پوش ہے اور یہ بات وہ ساری زندگی نہ بھولی۔ وہ جب بھی لفظوں کو چوس چوس کر ان کا پھوگ اس کے باپ کے ننگے منہ پر مارتی تو اس کا باپ سہم جاتا اور قطرہ قطرہ زمین پر ٹپکنے لگتا۔ زمین پر گرتے ہی اسے معلوم ہو جاتا کہ یہ اس کا باپ نہیں بلکہ وہ خود ہے۔ پھر اس کی بیوی سارے کمرے میں ناچتی اور پہلوانوں کی طرح دونوں رانوں پر ہاتھ مار مار کر اسے مقابلے کی دعوت دیتی۔ وہ اٹھنے کی کوشش کرتا تو معلوم ہوتا کہ اس کے دونوں پاؤں تو قبر کی دیوار میں پھنسے ہوئے ہیں۔ پھر قبر سکڑنے لگتی۔ اس کے جسم کی ہڈیاں دیواروں کے بوجھ سے کڑکڑا کر ٹوٹنے لگتیں اور ایک اداس لَے اس کے ہونٹوں کی بانسری پر ابلنے لگتی۔۔۔ پھر سل رکھنے کی آواز، دوسری سل، تیسری سل اور پھر مٹی کا ایک ڈھیر۔
صبح جب وہ بستر سے اٹھتا تو سارا جسم مٹی میں لتھڑا ہوا ہوتا، پاؤں دیوار سے ٹکرا ٹکرا کر زخمی اور زمین کا ٹکڑا لینے کی خواہش کبوتر کی طرح اس کے دل میں پھڑپھڑانے لگتی۔
اور آنے والی رات بیوی سے وہی مکالمہ
ہماری دائیں طرف کون رہتا ہے؟
بائیں طرف کون ؟
اور اسی مکالمے کے دوران، جس کے لفظ ہمیشہ ایک ہی ہوتے، اس کا بیٹا سکول سے کالج میں پہنچ گیا۔ ڈرائنگ روم میں پرانی کرسیوں کی جگہ نئے ڈیزائن کے صوفے نے لے لی۔ دری کی جگہ قالین بچھ گیا۔ لیکن زمین خریدنے کی خواہش اسی طرح پھیلتی رہی۔ وہ ہر ایک ملنے والے سے کہتا، مجھے کوئی سستی سی زمین لے دو، میں مکان بنانا چاہتا ہوں۔ لیکن زمین کے ٹکڑے آسمان کے ٹکڑوں جتنے مہنگے تھے۔ ان کی قیمت سن کر اس کا دل نارسائی کی مٹھیوں میں سکڑنے لگتا اور ایک بھیگی تمنا ہونٹوں کی وادیوں میں ٹمٹمانے لگتی۔ زمین خریدنے کی خواہش دیمک بن کر اس کے جسم کو اندر ہی اندر کھوکھلا کئے جا رہی تھی۔ کئی بار اس نے کوشش بھی کی کہ خواہش کے اس پرندے کو پکڑ کر اس کے پَر نوچ ڈالے لیکن وہ جب بھی اسے پکڑنے کے لیے آگے بڑھتا، پرندہ ایک ڈالی سے اُڑ کر دوسری ڈالی پر جا بیٹھتا۔ دو ایک بار اس نے جھپٹا مار کر اسے دبوچنے کی کوشش بھی کی تھی۔ لیکن دو ایک پروں کے سوا اس کے ہاتھ کچھ نہ آتا۔
پرندہ اسی طرح پھدکتا رہا اور اس کی زندگی کی میز سے کئی اور سفید کاغذ لفظوں کے حمل سے کالے ہو کر وقت کی ویسٹ پیپر باسکٹ میں جا گرے۔ ایک صبح سے دوسری صبح تک وہی تکرار۔۔۔ وہی خواہش اور ہر رات سونے سے پہلے وہی مکالمہ،
ہماری دائیں طرف کون رہتا ہے؟
بائیں طرف
پچھلی طرف
سامنے
اوپر
اور نیچے
قبرستان کے ساتھ ہی قبر کا تنگ دہانہ اور دیواروں میں پھنسے ہوئے پاؤں
اور دن کے رسے پر ایک صبح سے دوسری صبح کو گود میں چھلانگ لگاتے ہوئے کئی باتیں اِدھر اُدھر ہو گئیں۔
ایک ایسی ہی صبح جب وہ ابھی جسم سے اندھیرے کی گرد جھاڑ کر ناشتہ کی میز پر آیا ہی تھا کہ اس کا ایک دوست آ گیا اور آتے ہی بولا۔
’’لو بھئی خوش ہو جاؤ، ایک بہت سستی زمین مل گئی ہے۔‘‘
اس نے کہا۔۔۔ ’’تو لے لو۔‘‘
دوست نے حیرت سے اس کی طرف دیکھا۔۔۔ ’’میں تمہارے لیے کہہ رہا ہوں۔‘‘
’’لیکن میں زمین لے کر کیا کروں گا؟‘‘۔۔۔ اس نے توس پر مکھن لگاتے ہوئے کہا۔
دوست حیرت کی پھلجھڑیوں کی چنگاریوں سے خود کو بچاتے ہوئے ایک دو لمحے اس کی طرف دیکھتا رہا پھر بولا۔۔۔ ’’خود ہی تو کہتے تھے کہ مکان بناؤں گا۔ یہ مکان تو کرائے کا ہے نا۔۔۔ ‘‘
وہ کچھ دیر چپ رہا پھر آہستگی سے کہنے لگا۔۔۔ ’’دراصل میں نے اسی مکان کے نیچے قبر بنا لی ہے، خوب لمبی چوڑی ہے۔ اتنی کہ اس میں آسانی سے اٹھا بیٹھا اور چلا پھرا جا سکتا ہے۔‘‘
٭٭٭

شناسائی، دیوار اور تابوت

جب ڈاکٹر اس کی آنکھوں کی مومی گلیوں میں منظروں کے لُک چھپ جانے کا تماشا کر چکا تو اس نے اسے یہ خبر سنائی کہ اس کی آنکھوں کی آرٹ گیلری میں زندگی کی رنگا رنگ تصویریں ابھی دھندلائی نہیں۔
ڈاکٹر کی بات سن کر وہ پنجوں کے بل کرسی کی گود میں سے نکلا اور کمرے کی دیوار پر چڑھنے لگا۔ پھر چھت سے لٹک کر اس نے کلکاری ماری اور کہنے لگا۔۔۔ ’’تو پھر میر ی بیوی میری بات کی تصدیق کیوں نہیں کرتی؟‘‘
’’کس بات کی تصدیق؟‘‘ ڈاکٹر اس کی آوا ز کے گیند کو دبوچتے ہوئے بولا۔
’’یہی کہ ہمارے گھر کی دیواروں پر بے رخی کی کونپلیں اگ آئی ہیں اور چھت سے اجنبیت کے ذرّے جھڑتے ہیں۔‘‘
ڈاکٹر کی آنکھوں میں حیرت کی شمعیں پھڑپھڑائیں۔۔۔ ’’میں سمجھا نہیں۔‘‘
اس نے کمرے کی چھت پر ایک چکر لگایا اور بولا۔۔۔ ’’آپ نہیں سمجھ سکتے کیونکہ۔۔۔ ‘‘
پھر دفعتاً اس نے چونک کر اپنے آپ کو آوا ز دی اور دوڑ کر ہونٹوں کے ہارمونیم پر آئے ہوئے باقی کے جملے کی گردن مروڑ دی۔ جملہ ٹوٹ کر فرش پر گر گیا۔ اس نے جھک کر اسے اٹھایا اور ٹوٹے ہوئے جملے کو ڈاکٹر کی جیب میں ٹھونس کر اسے حیرت کی گلیوں میں اکیلا چھوڑ کر باہر نکل آیا۔
بڑی سڑک پر زندگی بدستور گھسٹ رہی تھی۔ اس کے تلوؤں نے سڑکوں کی مانوسیت کو بوسہ دیا اور اس کے پاؤں خود بخود دفتر کی طرف چل پڑے۔ آج کل اسے بار بار احساس ہو رہا تھا کہ وہ ایک مشین کی طرح ہے جس کا کنٹرول سوئچ صبح نو بجے سے شام چار بجے تک دفتر کی عمارت میں ہوتا ہے۔ لیکن جب وہ دفتر کا موڑ مڑنے لگا تو خیال کی ریت اس کے ذہن کی خالی تھالی میں سر سرائی۔ کیوں نہ میں بیوی کو بتاتا چلوں کہ میری آنکھوں کے ڈربوں میں ابھی بے بسی کے کبوتر نہیں پھڑپھڑائے اور آج تو اس کی رسی بھی اتنی لمبی تھی کہ ڈاکٹر سے ہوتے ہوئے وہ کچھ دیر کے لیے کہیں بھی جا سکتا تھا۔
گھر کی طرف جاتے ہوئے اسے پھر ٹیڑھی دیواروں اور لمحہ بہ لمحہ سرکتی چھت کا خیال آیا۔ وہ جب گھر آتا تو اس کی بیوی کی گرم گداز بانہیں اس کے جسم پر بسی ہوئی دفتری بوریت کی تہوں کو کھرچ کھرچ کر اتار دیتیں اور اس کی بیوی کے بدن میں دہکتی ہوئی بھٹی، اس کے ذہن کے تالاب پر منڈلاتی خیالوں کی مکڑیوں کو پل بھر میں پگھلا دیتی، وہ اچھل کر بچوں کی طرح تالیاں بجاتے ہوئے ناچتا۔۔۔ اور ناچتے ناچتے نیند کی دلدلوں میں ڈوب جاتا۔
صبح کرنوں کی کرین اسے نیند کی گہری دلدلوں سے باہر نکالتی۔۔۔ جب وہ باہر جانے کی تیاری کر رہا ہوتا تو اس کی بیوی اپنی توجہ کا سائبان اس پر یوں تان دیتی کہ گھڑی کی سوئیوں کی ٹک ٹک اسے دیکھتی ہی رہ جاتی۔
اس کی بچی توتلی زبان میں اسے بار بار یاد دلاتی کہ واپسی پر اسے کیا کیا لانا ہے اور پھر جب نو کا ہندسہ سوئیوں کو اپنی گو دمیں سمیٹ لیتا تو وہ ہڑ بڑا کر سائبان میں نکل آتا، لیکن اس کی بیوی اسے پھر اندر گھسیٹ لیتی اور کہتی۔۔۔ ’’گھڑی تو دس منٹ آگے ہے۔ دس منٹ تو رک جائیے۔‘‘
اور وہ یہ جانتے بھی کہ گھڑی کی سوئیاں صحیح وقت کی گواہیاں دے رہی ہے، دس منٹوں کے لیے بیوی کے آنچل میں لپٹا رہتا۔ اس کی بیوی اور بچی اسے دروازے تک چھوڑنے آتیں اور جب تک وہ گلی سے باہر نہ نکل جاتا، ہاتھ ہلاتی رہتیں۔ اور یہ وہ زمانہ تھا جب اس کے گھر کی دیواروں سے خوشبو کے رنگ برسا کرتے تھے، لیکن ایک رات لیٹے لیٹے اس کی نظر دیواروں پر پڑی تو وہ چونک اٹھا۔ دیواریں ٹیڑھے پن کی بے رنگیوں میں ڈوب رہی تھیں اور چھت ان کے ہاتھوں سے سرک رہی تھی۔ اس نے گھبرا کر بیوی کی طرف دیکھا جو منہ دوسری طرف کئے سور ہی تھی۔
اسی رات تنہائی نے اس پر پہلا فائر کیا۔
ایک لمحے کے لیے اسے وہ راتیں یاد آئیں جب بستر پر لیٹتے ہی اس کی بیوی اپنے بدن کی چادر پھیلا دیتی تھی، لیکن اب اس کی بیوی لیٹتے ہی سو جاتی تھی۔
اس نے جھک کر بیوی کے چہرے کو کریدنا چاہا لیکن اس کے سپاٹ چہرے پر کوئی موڑ نہیں تھا۔ ہاں اب بہت دنوں سے اس کی بیوی کے چہرے پر کوئی موڑ نہیں۔ لیکن شروع شروع میں ان دونوں کے چہرے پر اتنے موڑ اور سلوٹیں تھیں کہ وہ پہروں ایک دوسرے کے چہروں کی انجان نیم تاریک گلیوں میں کھوئے رہتے تھے، لیکن اب اس کی بیوی کا چہرہ ایک ایسے میدان کی طرح ہے جس کا ایک ہی چکر کاٹ کر وہ اُکتا جاتا ہے۔ اور اس کا جسم۔۔۔ اس کی طنابیں اب ڈھیلی پڑ گئیں ہیں اور جسم کا خیمہ ڈولنے لگا ہے۔
اس کی گھر کی دیواروں کے گھونسلوں میں اجنبیت کے کبوتر غٹر غوں ، غٹر غوں کر رہے ہیں۔ گھر کی طرف جاتے ہوئے اسے پھر ٹیڑھی دیواروں اور لمحہ بہ لمحہ سرکتی چھت کا خیال آیا۔ اسے یاد آیا کہ جس رات اس نے پہلی بار دیواروں پر اجنبیت کے جلتے بجھتے نیون سائن کی تحریر پڑھی تھی، اس نے بیوی کو جھنجوڑ کر نیند کی گود میں سے باہر کھینچا تھا۔
وہ ہڑ بڑا کر اٹھی۔۔۔ ’’کیا ہوا؟‘‘
’’دیکھو۔۔۔ دیکھو۔‘‘ اس نے دیواروں اور چھتوں کی طرف اشارہ کیا، ’’ہمارے گھر کی دیواریں اپنے سائے سمیٹ رہی ہیں۔‘‘
بیوی کے چہرے پر بے یقینی کے آنچل نے ایک لمحہ کے لیے سایہ کیا، پھر وہ اسے بچے کی طرح تھپکی دیتے ہوئے بولی۔۔۔ ’’سو جاؤ۔ شاباش۔۔۔ سو جاؤ۔‘‘
کچھ دیر بعد وہ تو سو گئی مگر وہ ساری را ت اجنبیت کے پنگوڑے میں ہچکولے کھاتا رہا کہ کسی بھی لمحے چھت دیواروں کی بانہوں سے پھسل کر اس کی جھولی میں آن گرے گی۔ صبح اس نے پھر دیواروں کی چھت پر پھوٹتی ہوئی ٹیڑھے پن کی کونپلوں کا ذکر چھیڑا، لیکن اس کی بیوی نے بات کو سمیٹ کر صحن کی نالی میں پھینک دیا اور بولی۔۔۔ ’’دفتر سے دیر ہو رہی ہے۔‘‘
اس نے گھڑی کی طرف دیکھا، نو بجنے میں ابھی دس منٹ تھے۔
’’ابھی تو دس منٹ ہیں۔‘‘ اس نے گھڑی کی طرف اشارہ کیا۔
’’گھڑی پیچھے ہے۔‘‘بیوی نے گھڑی کی ٹک ٹک کو پہیے لگا دئیے اور اسے دروازے سے باہر دھکیل دیا۔
اور اب اس کی بیوی نو بجنے سے پہلے ہی اسے دفتر سے دیر ہو جانے کا احساس دلانے لگتی ہے اور اگر وہ دیواروں اور چھت کا ذکر کرتا ہے تو اَن سنی کرتے ہوئے بے شمار مسئلوں میں سے کسی کا ذکر چھیڑ دیتی ہے۔
ایک دن جب اس نے اصرار سے بیوی کو یہ سمجھانے کی کوشش کی کہ ان کے گھر کی دیواریں روز بروز اپنی جڑیں چھوڑتی جا رہی ہیں ، تو اس نے اسے مشورہ دیا کہ وہ آنکھوں کے ڈاکٹر کے پاس جائے۔ یوں بھی پچھلے کئی دنوں سے رات کو دیر تک جاگنے کی وجہ سے اس کی آنکھوں میں دئیے جلنے لگے تھے۔ اس لیے جب بیوی نے اسے یہ مشورہ دیا تو اگلے ہی دن وہ آنکھوں کے ڈاکٹر کے پاس چلا آیا۔ لیکن اب گھر کی طرف جاتے ہوئے اسے اچانک خیال آیا کہ کہیں ایسا تو نہیں کہ اس کی بیوی کی آنکھوں میں دھندلاہٹیں گنگنا رہی ہوں اور دیواریں اور چھت سچ مچ سرک رہے ہوں۔ یہ خیال آتے ہی اس کی مٹھیاں جوش کی پھسلن سے کھل گئیں۔۔۔ یقیناً یہی بات ہے۔ اس لیے اس کی بیوی کو دیواروں کا ٹیڑھا پن نظر نہیں آتا اور اسی لیے صبح نو بجے سے پہلے ہی نو کا اعلان کر کے اسے دفتر کی پیاسی، بھوکی بانہوں میں دھکیل دیتی ہے۔ اور شاید اسی لیے اس کے جسم کی چادر میں سے خوشبو کی گرم بھاپ نہیں اٹھتی، اسی لیے وہ بستر پر گرتے ہی سو جاتی ہے، اتنی جلدی کہ پہلے کی طرح اس کے سونے کا بھی انتظار نہیں کرتی۔
ہاں یقیناً اس کی بیوی کی آنکھوں میں دھندلاہٹ گنگنا رہی ہے۔
گھر کی دہلیز کو چھوتے ہی اس نے چیخ کر بیوی کو پکارا۔۔۔ ’’لو بھئی، میں تو دھندلاہٹ کے سیلاب سے نکل آیا ہوں ، اب تم۔۔۔ ‘‘
لیکن اس کا جملہ ٹوٹ کر گہری اجنبیت کی گود میں گر پڑا جس نے سارے گھر کو اپنی بکل میں دبا رکھا تھا۔ تنہائی نے مورچہ لگا کر اس پر چاروں طر ف سے فائرنگ شروع کر دی تھی۔ اسے وہ دن یاد آئے جب وہ گھر لوٹتا تو اس کی بیوی ڈیوڑھی میں اس کی منتظر ہوتی۔ کئی بار اس نے حیرت سے پوچھا بھی تھا۔۔۔ ’’تمہیں کیسے معلوم ہوتا ہے کہ میں آ رہا ہوں ؟‘‘
اس کی بیوی جواب دیتی۔۔۔ ’’جب تم گلی میں داخل ہوتے ہو تو مجھے تمہاری خوشبو آ جاتی ہے۔‘‘
اور اب وہ اکیلا ڈیوڑھی کے تابوت میں کھڑا اجنبیت کی اس دھند کو چیرنے کی کوشش کر رہا تھا کہ دفعتاً ایک سریلی آواز صحن کی دیواروں سے رسنے لگی۔ وہ لپک کر صحن میں گیا اور ٹھٹک کر رہ گیا۔
صحن کی دیوار پر ایک شخص بیٹھا ہوا تھا جس کے چاروں ہاتھوں میں مختلف ساز تھے۔ وہ ان سب کو بیک وقت بجا رہا تھا اور اس کی بیوی سارے صحن میں ناچتی پھر رہی تھی۔ اس نے اس کا چہرہ دیکھنے کی کوشش کی لیکن اس کے سارے جسم پر آنکھیں ہی آنکھیں۔۔۔ ہونٹ ہی ہونٹ۔۔۔ اور ہاتھ ہی ہاتھ تھے۔
وہ تو آواز تھا۔۔۔ سراپا آواز۔
تنہائی، دکھ، شرم اور شکست کے کئی ملے جلے احساسوں کی چیونٹیوں نے اس کے تلوؤں میں کاٹنا شروع کر دیا۔ اسے لگا کہ جیسے وہ لڑکھڑا کر دیوار سے جا لگا ہے۔ لیکن دوسرے ہی لمحے وہ اچھل کر پرے ہٹ گیا اور خاموشی سے باہر نکل آیا۔
دفتر جانے کی بجائے وہ سارا دن شہر کی سڑکوں پر لوگوں کے چہرے گنتا رہا۔ شام کو جب وہ معمول کے مطابق گھر آیا تو بیوی نے کھانا اس کے سامنے رکھ دیا۔ اس نے کَن انکھیوں سے دیکھا، بیوی کے چہرے پر کوئی غیر معمولی تاثر نہیں تھا۔ اس نے خاموشی سے لقمہ توڑا اور ایک لمحے کے لیے اسے وہ دن یاد آئے جب اس کی بیوی اس کے انتظار میں کھانا نہیں کھاتی تھی۔
کھانے کے بعد وہ خاموشی سے کمرے میں چلا گیا۔ اس کی بیٹی اسکول کا کام کر رہی تھی۔ وہ دیر تک اخبار کی سرخیاں کھرچتا رہا۔ اس دوران اس نے بار بار صحن کی دیوار کی طرف دیکھا، وہ خالی تھی۔ پھر اس نے گھرکی ایک ایک دیوار ٹٹولی، بے رخی کی کونپلیں اب لہلہا کر درخت بن گئی تھیں اور اجنبیت کی سفیدی موسلا دھار بارش کی طرح چھت سے گر رہی تھی۔
وہ بے دم ہو کر کرسی کی قبر میں گر پڑا۔
رات کو وہ جب سونے لگے تو بیوی نے پوچھا۔۔۔ ’’ڈاکٹر نے کیا کہا؟‘‘
’’ملا نہیں۔‘‘ اس نے آنکھیں کھولے بغیر کہا اور پہلو بدل کر آنکھیں بند کر لیں۔ لیکن نیند نہیں آئی۔ وہ ساری رات آنکھوں کے سامنے پھڑپھڑاتی ہوئی نیند کی لاش کو آنکھوں کے تابوت میں دفن کرنے کی کوشش کرتا رہا لیکن آوا ز کی رسی سے لٹکتی ہوئی نیند کھلکھلا کر بھاگ جاتی۔۔۔ پھر اس نے صحن کی دیوار پر بیٹھے ہوئے شخص کو پکڑنے کی کوشش کی۔ لیکن جونہی اس کی بانہیں اس کے قریب پہنچتیں ، وہ کبھی پھیل کر کبھی سمٹ کر۔۔۔ کبھی سمٹ کر کبھی پھیل کر۔۔۔ اس کی بانہوں کی پرکار سے باہر نکل جاتا۔
صبح جب اس کے جسم کا ڈبہ دفتر جانے والی لائن پر پھسلنے لگا تو بیوی نے اسے یاد دلایا کہ اسے ڈاکٹر کے پاس بھی جانا ہے، وہ جواب دئیے بغیر گلی میں آیا لیکن جب دفتر کامو مڑنے لگا تو خود بخود اس کے پاؤں گھر کی طرف اٹھ گئے۔
دہلیز پر کھڑے ہو کر اس نے اندر کی ایک ایک شے کو سونگھا، اس کا گھر اسی طرح اجنبیت کی بکل میں سر رکھے سو رہا تھا۔ وہ دبے پاؤں ڈیوڑھی میں آیا۔ آواز صحن کی دیواروں سے رِس رہی تھی۔
اس نے اندر جھانکا۔۔۔ وہ شخص صحن کی دیوار پر بیٹھا اپنے چاروں ہاتھوں سے مختلف ساز بجا رہا تھا اور اس کی بیوی سارے صحن میں ناچتی پھر رہی تھی۔
اس نے پھر دیوار پر بیٹھے ہوئے شخص کا چہر ہ دیکھنے کی کوشش کی، لیکن اس کا کوئی چہر ہ نہیں تھا۔ اس کے جسم پر ہونٹوں کی جھاڑیوں ، کانوں کے کاسوں ، آنکھوں کی کھڑکیوں اور ہاتھوں کے جنگل کے سوا اور کچھ بھی نہیں تھا۔
ایک لمحے کے لیے اسے خیال آیا کہ دوڑتا ہوا جائے اور دیوار سے گھسیٹ کر اس کا گلہ گھونٹ دے۔۔۔ لیکن دوسرے ہی لمحے اس کے اٹھے ہوئے قدم ہوا ہی میں منجمد ہو گئے، اگر کسی نے دیکھ لیا۔۔۔ وہ لوگوں کی آنکھوں کی عدالت میں تنہا کھڑا تھا۔
اس نے کوٹھے کی طرف دیکھا جس کی منڈیروں سے سناٹا جھانک رہا تھا۔ لیکن کیا معلوم عین اس وقت کوئی آ جائے۔۔۔ تو پھر، تو پھر وہ دبے پاؤں کوٹھے پر آیا۔
منڈیروں پر اٹھکیلیاں کرتی سورج کی کرنیں اسے دیکھ کر سایوں کے آنچل میں سمٹ گئیں۔ اس میں نے آہستہ سے سر نکال کر پڑوس والے صحن میں جھانکا اور اس کے ہونٹوں کے تابوت میں چیخ کی ممی پھڑپھڑا کر رہ گئی۔
ساتھ والے صحن کی دیوار پر بھی وہ موجود تھا اور پڑوس والے کی بیوی اس کی لَے پر ناچ رہی تھی۔
وہ دوڑ کر دوسری طرف گیا۔۔۔ تیسری طرف پھر چوتھی طرف۔۔۔ اس کے سارے جسم پر آنکھیں اور کان اگ آئے۔
آواز کے رنگ اِس سرے سے اُس سرے تک سارے صحنوں کی دیواروں پر آنکھ مچولی کھیل رہے تھے اور صحن صحن سبھی اپنے کانوں کے کاسے پھیلائے آواز کے شہد کو بوند بوند سمیٹ رہی تھیں۔
اس کے ڈگمگاتے قدم سنبھل گئے۔
تو میں اکیلا نہیں۔
اس نے سر ہلایا اور چپ چاپ باہر آگیا۔
شام کو جب وہ گھر آیا تو کھانا کھاتے ہوئے اس نے بیوی سے کہا۔۔۔ ’’ڈاکٹر نے کہا ہے کہ میر ی آنکھوں میں دھندلاہٹوں نے خیمے گاڑ لیے ہیں۔‘‘
بیوی نے تشویش سے اس کی طرف دیکھا۔۔۔ ’’تو آپ عینک لگوانے میں دیر نہ کرو۔‘‘
دوسرے دن جب وہ زیرو کی عینک لگا کر گھر آیا تو بیوی کے چہرے پر اطمینان کنڈل مارے بیٹھا تھا۔ کہنے لگی، ’’اب تو تمہیں ٹھیک نظر آتا ہے نا؟‘‘
’’ہاں ‘‘۔۔۔ اس نے ٹیڑھی دیواروں اور سرکتی ہوئی چھت پر اگی ہوئی بے رخی اور اجنبیت کی لہلہاتی فصلوں کو دیکھتے ہوئے کہا۔۔۔ ’’اب سب کچھ ٹھیک ہے۔‘‘
اور اس نے سر ہلایا۔۔۔ ’’ٹھیک ہے، شاید ٹھیک ہی ہے۔‘‘
٭٭٭

ڈوبتی پہچان

سورج جب قبرستان کے گھنے درختوں سے الجھتا رینگ رینگ کر اپنے بل میں گھسنے کی کوشش کر رہا تھا، مستری نے قبر کام کام مکمل کر لیا۔
پچھلے کئی مہینوں سے اس کی یہ خواہش تھی کہ ماں کی قبر پکی کرائے لیکن خالی جیبیں اس خیال کو تھپتھپا کر آنے والے دن کی جھولی میں ڈال دیتیں۔ وہ اندر اندر ہی سلگ سلگ کر خیالوں ہی خیالوں میں کبھی اینٹیں کبھی سیمنٹ کبھی ریت خریدتا، نام کی خوبصورت سی سل بنواتا اور سونے سے پہلے اس خیال کو پوری توجہ سے آنے والے دن کی جیب میں ڈال دیتا۔ بہت دن ہوئے اس کے ڈرائنگ روم میں ایک تصویر تھی۔ اس کا خیال تھا کہ یہ اس کی ماں کی تصویر ہے، لیکن کچھ کا کہنا تھا کہ یہ کوئی خیالی تصویر ہے۔۔۔ تصویر میں ایک عورت غم میں گندھی مسکراہٹ ہونٹوں پر سجائے خالی منظر کو گھور رہی تھی۔ خالی یوں کہ منظر میں جو وادی تھی، وہ اپنے دریاؤں کے باوجود دست بدعا تھی۔ وہ اس تصویر کے بارے میں جاننے کا شوق تو رکھتا تھا اور یہ جاننا چاہتا تھا کہ اس تصویر کی وادی اتنے سارے دریاؤں کے باوجود کسی بنجر دھند میں لپٹی ہوئی ہے۔ دریاؤں کا پانی سوکھ کیوں گیا ہے اور زمین کے ہاتھ خالی کیوں ہوئے جا رہے ہیں ؟ لیکن اس کے لیے اس نے کبھی لمبی چوڑی چھان بین نہیں کی۔ ایک دو بار ماں سے پوچھا مگر وہ کوئی تسلی بخش جواب نہ دے سکی، بلکہ الٹا اس سے پوچھ بیٹھی کہ وہ تصویر کے بارے میں اتنا متجسّس کیوں ہے۔
جب کبھی وہ ڈرائنگ روم میں اکیلا ہوتا، تصویر اس کے سامنے آ کھڑی ہوتی۔ وہ اس کے خطوط میں شناسائی کی روشنی تلاش کرتا۔ بہت پہلے جب وہ چھوٹا تھا، اس نے اپنے باپ سے بھی یہی سوال کیا تھا۔ باپ نے جواب دینے کی بجائے الٹا اسے تیز نظروں سے گھورا اور کہا۔۔۔ ’’تم اپنی پڑھائی میں دلچسپی نہیں لے رہے۔‘‘
جس دن اس کا باپ فوت ہوا، تصویر بلک بلک کر روئی۔ لیکن اس وقت اسے اپنا ہوش نہیں تھا۔ وہ خود چھلک چھلک کر رو رہا تھا۔ بعد میں دوسرے تیسرے دن جب لوگ ایک ایک کر کے رخصت ہو گئے تو اس نے ماں کو بتایا کہ تصویر بھی روئی تھی۔۔۔ ماں ہنس پڑی۔۔۔ ’’پگلے، کہیں تصویریں بھی روتی ہیں۔‘‘ ماں کی ہنسی گہرے غم میں گندھی ہوئی تھی۔ اسے یقین نہیں آیا۔ وہ کچھ کہے بغیر ڈرائنگ روم میں چلا آیا اور تصویر کے سامنے کھڑا ہو کر اس کی آنکھوں میں جھانکنے لگا۔ آنکھیں صاف دھلی ہوئی تھیں۔ اسے شبہ سا ہوا کہ ان میں نمی تیر رہی ہے اور منظر اپنی وادی سمیت بھوک کی دھند میں لپٹا اپنی پہچان کھو رہا ہے۔ وہ خاموشی سے کرسی پر بیٹھ گیا اور غور سے تصویر کو دیکھنے لگا۔ ایک عورت ہونٹوں پر غم میں گندھی مسکراہٹ سجائے سامنے کے منظر کو دیکھ رہی تھی۔ وادی جس کی راہیں خشک ہوئی جا رہی تھیں اور ہونٹوں پر نفرتوں کی پپڑیاں جم رہی تھیں۔ وہ اونگھ گیا۔
اس کی ماں مر رہی تھی اور تصویر بلک بلک کر رو رہی تھی۔ وہ ہڑ بڑا کر جا گ اٹھا۔ جس دن برسات کی پہلی جھڑی لگی، وہ ساری رات کروٹیں بدلتا رہا۔ بار بار خیال آتا کہ پانی قبر میں گھس گیا ہے اور ماں سردی سے ٹھٹھرتی دیوار سے لگی اسے آوازیں دے رہی ہے۔ صبح ہوتے ہی وہ بارش میں بھیگتا قبرستان آیا۔ قبر ٹھیک ٹھاک تھی۔ لیکن اسے شبہ رہا کہ پانی کہیں نہ کہیں سے رِس رِس کر اندر جار ہا ہے۔ وہ گورکن کی کوٹھڑی میں پہنچا۔ وہ چائے پی رہا تھا۔ اس کی بات سن کر اس نے مشکوک نظروں سے اس کی طرف دیکھا اور بولا۔۔۔ ’’فکر نہ کرو، پانی اندر نہیں جا سکتا۔‘‘
’’پھر بھی کسی اور طرف سے۔۔۔ میرا مطلب ہے نیچے ہی نیچے کہیں سے۔‘‘ گورکن دو تین لمحے اس کی طرف دیکھتا رہا، پھر کہنے لگا۔۔۔ ’’اچھا، بارش بند ہو جائے تو میں تھوڑی سی مٹی اور ڈال دوں گا۔ ‘‘
وہ اطمینان سے سر ہلاتا واپس آگیا۔ اگلے دن بارش پھر ہوئی اور زور و شور سے ہوئی۔ وہ بھیگتا بھیگتا صبح سویرے قبرستان آیا۔ بہت سی قبریں بیٹھ گئی تھیں مگر اس کی ماں کی قبر اسی طرح تھی۔ پھر بھی اسے شبہ ہوا کہ وہ بیٹھ رہی ہے۔ گورکن اس کی بات سن کر بولا۔۔۔ ’’تو پھر پکی کرالو۔‘‘ ’’ہاں یہ ٹھیک ہے۔‘‘ واپس آتے ہوئے اس نے اپنے آپ سے کہا۔ لیکن قبر پکی کرانے کے لیے اس کے پاس پیسے جمع نہ ہو سکے۔ بارشیں روز ہوتیں۔ وہ قبرستان جاتا، ہر روز کچھ اور قبریں بیٹھ جاتیں۔ اس کی ماں کی قبر بھی خاصی نیچی ہو گئی تھی۔ تاہم ابھی اس کی شکل و صورت قائم تھی۔ ساری رات اسے یہی احساس رہتا کہ پانی بوند بوند اندر جا رہا ہے اور اس کی ماں سردی سے ٹھٹھری دیوار سے لگی اسے آوازیں دے رہی ہے۔ تصویر نے بھی چپ سادھ رکھی تھی۔ غم میں گندھی مسکراہٹ پتھر ہو گئی تھی۔ شاید اس نے پیچھے مڑ کر دیکھ لیا ہے، لیکن پیچھے تو گہرا اندھیرا ہے اور آگے دھند ہی دھند۔۔۔ دھند۔ اس دھند میں سنبھل سنبھل کر قدم قدم چلتا، وہ گھوم پھر کر اس غم آلود مسکراہٹ کی چار دیواری میں لوٹ آتا۔ کبھی تو یہ مسکراہٹ غم کی قید سے آزاد ہو گی۔ وہ سوچتا اور ہر صبح تصویر کی دہلیز پر آ کھڑا ہوتا۔ لیکن مسکراہٹ اسی طرح غم آلود، سامنے کا منظر اداس، وادی کے بلکتے بھوکے چہرے، ویران مسکراہٹ غم آلود، منظر کا چہرہ اداس، ضرورتیں نوکیلے ناخنوں سے اس کے جس کو مسلسل ادھیڑ رہی تھیں۔ تھکی انگلیوں سے جینے کی موہوم امیدوں کو ٹٹولتا وہ بے دم ہو گیا اور سوچنے لگا کہ اگر تصویر بیچ ڈالے تو ڈھیر سارے روپے مل سکتے ہیں۔ ایک دوست نے ایک بار کہا تھا۔۔۔ ’’اس تصویر کو کوئی غیر ملکی مہنگے داموں خرید لے گا۔‘‘
تصویر بیچنے کا خیال شاید اسی دن پیدا ہو گیا تھا۔ یہ اور بات کہ اس وقت اسے یہ بات اتنی بری لگی کہ وہ اس دوست سے سچ مچ لڑ پڑا۔ مسکراہٹ غم آلود، سامنے کا منظر دھندلا، ضرورتوں کے ہاتھ لمبے اور لمبے ہوتے چلے گئے۔ اس نے ایک دن چپکے سے تصویر بیچ ڈالی۔
ڈھیر سارے پیسے ملے تو خالی ہاتھ سمٹ گئے اور آسائشیں خود بخود اس کی دسترس میں چلی آئیں۔ دن کی سختی میں نرمی آ گئی۔۔۔ لیکن رات کو تصویر کی خالی جگہ دیکھ کر اس کی ماں آ کھڑی ہوتی اور غم آلود مسکراہٹ کے ساتھ بڑی حسرت سے اسے دیکھتی رہتی۔ اس نے سوچا کہ اس کی وجہ جگہ کا خالی ہونا ہے۔ سو اس نے وہاں کیلنڈر لگا دیا۔ کیلنڈر لگنے سے دن اور مہینے اس کی مٹھی میں آ گئے۔ ماں اب خواب میں آنے لگی۔ وہی غم آلود مسکراہٹ اور حسرت بھری نظریں۔ اس نے سوچا شاید ماں قبر میں خوش نہیں۔ قبر پکی کروانے کا خیال پھسل کر اس کے پورے وجود پر چھا گیا۔ قبر پکی کرنے کا کام اگلے دن شروع ہو گیا۔ دو مستریوں نے شام تک کام کر لیا۔ نام کی سل بھی لگ گئی۔ اس رات وہ عجیب طرح کی نیند سویا۔ خواب میں اس نے دیکھا، وہ بہت بڑے کمرے میں دوڑ رہا ہے۔ دھند گہری ہو گئی ہے اور دیواریں ، فرش، چھت سب اس دھند میں گم ہوئے جار ہے ہیں۔ صبح سویرے اس نے اگر بتیوں کا پیکٹ لیا اور قبرستان کی طرف چل پڑا۔ قبر پر اگر بتیاں لگا کر جب اس نے دعا کے لیے ہاتھ اٹھائے تو اچانک ایک شبہ نے سر سرا کر اس کے ہاتھوں کو ڈس لیا۔ اسے احساس ہوا کہ یہ تو اس کی ماں کی قبر نہیں ہے۔ اس کی ماں کی قبر تو ساتھ والی ہے جو اسی طرح کچی ہے۔ یہ غلطی کس سے ہوئی۔ اس سے یا مستریوں سے۔ یقیناً یہ مستریوں کی غلطی ہے۔ وہ انہیں قبر دکھا کر چلا گیا تھا، انہوں نے غلطی سے ساتھ والی قبر پکی کر دی۔۔۔ اب کیا ہو۔۔۔ کیا ہو؟
سارا دن ماں بوند بوند اس کی آنکھوں کے کٹوروں میں اترتی رہی۔ دوسرے دن مستری ساتھ والی قبر پکی کر رہے تھے۔ شام کو اس نے غور سے قبر کا جائزہ لیا۔۔۔ ہاں یہ اس کی ماں ہی کی قبر ہے۔ اگلی صبح اگر بتیاں جلا کر وہ دعا مانگ کر واپس مڑنے لگا۔ تو شک رینگ رینگ کر پھر اس کے ذہن میں اتر آیا۔ یہ قبر بھی اس کی ماں کی نہیں۔ اس نے غور سے دونوں پکی قبروں کو دیکھا۔ دونوں میں سے کوئی بھی اس کی ماں کی قبر نہیں ہے۔ وہ تو ان سے اگلی قبر ہے۔ شک اور یقین کی اس دھند میں تیسری، چوتھی اور پھر پانچویں اور چھٹی قبر بھی پکی ہو گئی۔ لیکن اسے شبہ ہی رہا کہ ان میں کوئی بھی قبر اس کی ماں کی نہیں۔
اب ہر رات وہ خواب دیکھتا کہ قبر کی چھت بیٹھ رہی ہے۔ پانی بوند بوند رِس رہا ہے اور ماں سردی سے ٹھٹھر رہی ہے۔ تصویر کے منظر میں اداس میلے کبوتر اُڑ رہے ہیں۔ ان کی اُڑان میں شکست اور تھکاوٹ ہے۔ چہرے بلک رہے ہیں اور خوف جسموں پر دستک دے رہا ہے۔ جسم بھُر رہے ہیں۔ ریزہ ریزہ۔۔۔ ریزہ ریزہ
اس نے وہ ساری قطار پکی کروا دی۔ لیکن اب اسے یہ شبہ ہوا کہ اس کی ماں کی قبر اس قطار میں ہے ہی نہیں ، وہ تو اگلی قطار میں ہے۔ اب دوسری قطاروں کی قبروں کے پکے ہونے کا کام شروع ہوا۔ ہر روز ایک قبر پکی ہوتی۔ اگلی صبح اگر بتیاں جلا کر دعا مانگتے اسے خیال آتا کہ یہ اس کی ماں کی قبر نہیں ہے۔ وہ اس سے اگلی قبر پکی کروانے کا کام شروع کراتا، مطمئن ہو کر گھر جاتا۔ خواب میں تصویر کی غم آلود مسکراہٹ والی عورت اداس سوچ میں ، رہن رکھا منظر اپنی پرتیں کھولتا۔ اس کے ہونٹ ہلتے مگر آواز سنائی نہ دیتی۔ بھوک سے بلکتی وادی میں ٹھٹھرتے چہرے، اداس غم آلود مسکراہٹ، بوند بوند رستا پانی۔۔۔ سوالیہ نشان۔۔۔ سوالیہ نشان۔۔۔
ادھورے الجھے ہوئے نشان، دوسری کے تیسری اور چوتھی قطار کی قبریں پکی ہوتیں گئیں۔ لیکن اس کی ماں کی قبر اسی طرح کچی رہی۔ رات کو خواب میں تصویر کی غم آلود مسکراہٹ، قبر کی بیٹھی چھت، بوند بوند رستا پانی اور سردی سے ٹھٹھرتی ماں ، دھندلاتے دھندلاتے اداس خالی منظر میں گم ہو جاتے۔ جس دن قبرستان کی آخری قبر بھی پکی ہو گئی، اس نے اطمینان کا گہرا سانس لیا اور ساری پکی قبروں کی طرف دیکھتے ہوئے اس نے اپنے آپ سے کہا۔۔۔ ’’ان میں سے کوئی ایک قبر میری ماں کی بھی ہے۔ مجھے معلوم نہیں ، مگر وہ پکی تو ہو گئی ہے نا۔۔۔ ‘‘
اگلی صبح سورج ابھی مشرق کی چلمن سے جھانکنے کی تیاریاں ہی کر رہا تھا کہ اس نے بیوی اور بچوں کو جگایا اور کہا کہ وہ سب اس کے ساتھ ماں کی قبر پر فاتحہ پڑھنے چلیں۔ قبرستان پہنچ کر اس نے بیوی بچوں سے کہا کہ وہ سب قبروں پر پھول اور اگر بتیاں لگا دیں۔ اس کی بیوی نے حیرت سے اس کی طرف دیکھا تو وہ بولا۔۔۔ ’’بھئی یہ سب میری ماں کے پڑوسی ہیں۔۔۔ ‘‘ اور دل ہی دل میں اس نے اپنے آپ سے کہا۔۔۔ ’’سچی بات ہے مجھے معلوم ہی نہیں کہ ان میں میری ماں کی قبر ہے کونسی۔۔۔ ‘‘
قبروں پر اگر بتیاں لگیں تو سارا قبرستان خوشبو سے مہک اٹھا۔ انہوں نے دعا کے لیے ہاتھ اٹھائے۔ دعا مانگ کر سب نے ہاتھ نیچے کر لیے لیکن اس کے ہاتھ خلا میں ہی پتھر ہو گئے۔ اسے یاد آیا، یہ تو وہ قبرستان ہی نہیں جس میں اس نے اپنی ماں کو دفن کیا تھا۔ تو اس کی قبر ابھی تک کچی ہے۔۔۔ تصویر میں ایک عورت غم میں گندھی مسکراہٹ کے ساتھ خالی منظر کو دیکھ رہی ہے۔۔۔ قبر کی چھت دھیرے دھیرے بیٹھ رہی ہے۔ پانی بوند بوند رِس رہا ہے اور ماں دیوار سے لگی ٹھٹھر رہی ہے۔ جھکے ڈھلکے شانوں کے ساتھ سب سے پیچھے آئے ہوئے اس نے اپنے آپ سے کہا۔۔۔ ’’میں دوسرے قبرستان کی ایک ایک قبر پکی کر وا دوں گا۔‘‘
اسے خیال آیا اس شہر میں تو کئی قبرستان ہیں ، ’’کوئی بات نہیں ‘‘۔۔۔ وہ بڑبڑایا۔۔۔
’’میں اس شہر کے سارے قبرستانوں کی ایک ایک قبر پکی کرا دوں گا۔‘‘
اطمینان کے پرندے نے ایک لمحہ کے لیے رنگ برنگے پر پھڑپھڑائے اور دوسرے لمحے خالی منظر گم ہو گیا۔۔۔
اسے خیال آیا۔۔۔
’’کیا معلوم یہ وہ شہر ہی نہ ہو جہاں اس کی ماں دفن ہے۔‘‘
٭٭٭

گملے میں اُگا ہوا شہر

جنازے کا جلوس جب بڑی سڑک سے قبرستان والی بغلی سڑک پر مڑا تو کراہوں کے تیز نوکیلے ناخنوں نے فضا کے پرسکون چہرے کو نوچ نوچ کر لہو لہان کر دیا۔
اس نے گہرا سانس لے کر سینے پر بیٹھے ہوئے بوجھ کو ایک طرف کھسکانے کی کوشش کی اور اسی لمحہ معاً اسے احساس ہوا کہ جنازہ موجود نہیں ہے۔ اس نے ایڑیوں کے بل اُچک کر چاروں طرف نگاہ دوڑائی۔ آگے پیچھے، دائیں بائیں ، جنازہ کہیں نہیں تھا۔
’’جنازہ کدھر گیا؟‘‘ اس نے اپنے آپ سے پوچھا اور سر گھما کر ساتھ والے کی طرف دیکھا۔ اس کے دائیں بائیں کئی لوگ سر جھکائے، گہرے سانس لیتے سینوں پر رکھے بوجھوں کو اِدھر اُدھر کھسکانے کی کوشش کر رہے تھے۔ اس نے ایڑیوں کے بل اُچک کر پھر ایک نگاہ دوڑائی لیکن جنازہ نظر نہ آیا۔
’’بھائی صاحب۔۔۔ ‘‘ اس نے ساتھ والے کی طرف دیکھا۔۔۔ ساتھ والے نے سر اٹھا کر اسے گھورا اور منہ نیچے کر لیا۔
’’بھائی صاب۔۔۔ ‘‘ ساتھ والے نے اسے پھر گھورا۔
’’۔۔۔ جنازہ گم ہو گیا ہے۔۔۔ ‘‘ اس نے اٹکتے اٹکتے کہا۔
’’کیا۔۔۔ ؟ کیا گم ہو گیا ہے؟‘‘ ساتھ والے نے پہلے اس کی طرف دیکھا پھر سامنے دیکھا اور اس کا منہ کھلے کا کھلا رہ گیا: ’’ارے، جنازہ کہاں گیا۔۔۔ ؟‘‘
آس پاس کے لوگوں نے چونک کر ان کی طرف دیکھا اور پھر سامنے دیکھا۔۔۔ ’’ارے۔۔۔ ‘‘
’’جنازہ کدھر گیا۔۔۔ ؟‘‘
’’جنازہ کدھر گیا۔۔۔ ؟‘‘
افراتفری ایک ہی لمحہ میں جست لگا کر ان کے درمیان آن کھڑی ہوئی اور بال کھول کر دھمال ڈالنے لگی۔
آدھا جلوس بڑی سڑک پر اور آدھا بغلی سڑک پر۔ حیرانی کے فوکس میں قید چہرے، دائرے میں چکر لگاتے سوال۔
اس نے ذہن پر زور دے کر گزرتے لمحوں کی دوڑ پکڑنے کی کوشش کی۔۔۔ بڑے میدان میں مرنے والے کو سولی سے اتار کر جنازے کی ڈولی میں ڈالا گیا تھا۔ اس نے اچھل اچھل کر اردگرد کھڑے لوگوں کے سروں سے اوپر اٹھ کر خود اسے دیکھا تھا۔ انسانوں کے چاروں طرف پھیلے ہوئے سمندر میں ان گنت کندھوں سے ہوتا ہوا جنازہ بڑی سڑک پر جسے مرکزی شاہراہ نمبر ایک کہتے تھے لایا گیا تھا۔
اس نے آگے پیچھے مڑ کر دیکھا۔۔۔ لوگ گروہوں اور ٹولیوں میں بٹ گئے تھے اور ایک دوسرے سے پوچھ رہے تھے: ’’جنازہ کہاں گیا؟‘‘
اس نے نئے سرے سے لمحوں کو جوڑنا شروع کیا۔۔۔ لوگوں کو اس کی موت کی اطلاع صبح سویرے ہی مل گئی تھی۔ سرگوشیاں رقص کرتی سارے شہر میں پھیل گئی تھیں۔ دکانیں کھلی ہی نہیں تھیں یا صبح ہی بند ہو گئی تھیں اور سڑکیں سنسان۔ لوگ بڑے میدان میں جمع ہو گئے تھے۔۔۔ جب جنازہ اٹھایا گیا تو آہیں موسلا دھار بارش کی طرح سارے شہر پر برس پڑیں۔
دوسرے بازار تک تو اسے یاد تھا، شاید اس کے بعد بھی اس کی نظر جنازے پر پڑی ہو لیکن وہ ٹھیک سے یاد نہیں کر پا رہا تھا کہ آخری بار اس نے جنازہ کب اور کہاں دیکھا تھا۔
لوگوں کی ٹولیاں اور گروہ شہر کی گلیوں میں اور سڑکوں پر جنازہ تلاش کر رہے تھے۔
وہ پچھلی شاہراہ کی طرف چل پڑا۔۔۔ چوک چورا ہے، گلیاں ، نکڑیں ، ٹولیاں ، گروہ۔ بس جنازے کی گمشدگی کی باتیں۔۔۔ ہر کوئی اپنی اپنی کہہ رہا تھا۔
’’شاہراہ نمبر ایک کا موڑ کاٹتے تو میں نے خود دیکھا تھا۔۔۔
’’میں نے شاہراہ نمبر تین کے درمیانی چوک میں دیکھا تھا۔۔۔ ‘‘
’’میں نے بغلی سڑک کے موڑ سے سو گز ادھر دیکھا تھا۔۔۔ ‘‘
لیکن یہ کسی کو معلوم نہ تھا کہ جنازہ گم کہاں ہوا ہے؟
کیا معلوم، جنازہ اٹھایا ہی نہ گیا ہو اور لاش ابھی تک سولی پر ہی لٹک رہی ہو۔ اس کے دھیان میں آیا۔
کیا معلوم، یہ سب وہم ہو۔ سارا راستہ وہ سوتا آیا ہو اور اب جاگا ہو۔
یا پھر وہ اب جاگ رہا ہو اور جنازہ واقعی گم ہو گیا ہو۔
وہ بڑے میدان کی طرف بڑھنے لگا۔
اندھیرا شہر کو نرغے میں لے رہا تھا اور رات کوئی دم میں شہر پر ٹوٹ پڑنے والی تھی۔۔۔ اور لوگ بھاگ رہے تھے، دوڑ رہے تھے۔
’’کچھ پتہ چلا‘‘؟ کسی نے کسی سے پوچھا، اسے کچھ پتہ نہ چلا۔
’’نہیں۔۔۔ ‘‘ کسی نے کسی کو کہا، وہ کچھ جان نہ سکا
’’بڑے میدان میں تو اندھیرا بھرا ہوا ہے۔۔۔ ‘‘ اس نے سنا اور اس کے قدم رک گئے۔
دفعتاً بھاگتے دوڑتے لوگوں میں سے ایک، کوئی اس کی طرف مڑا: تم کون ہو؟‘‘
’’میں۔۔۔ میں ہوں !‘‘ پھر اس نے چپکے سے اپنے آپ سے پوچھا: میں کون ہوں ؟۔ مگر اسے کوئی جواب نہ ملا۔
’’میں۔۔۔ ‘‘ اس نے پھر کچھ کہنا چاہا۔ ذہن پر زور دیا مگر کچھ یاد نہ آیا۔ دھندلائیوں میں ہاتھ پیر مارتے ہوئے بس اتنا یاد آیا کہ لوگ ایک تابوت اٹھائے جا رہے تھے، اس تابوت میں۔۔۔
اس تابوت میں شاید وہ تھا۔ یا پھر شاید وہ نہیں تھا۔
اب بھی شک کے کلہاڑے سے ہاتھوں میں لیے ایک دوسرے کے پیچھے بھاگتے ہوئے۔ ان میں سے ہر ایک دوسرے سے پوچھ رہا ہے: ’’تم کون ہو؟‘‘
’’میں۔۔۔ میں۔۔۔ ‘‘ دوسرا جواب دینے کے لیے ذہن پر زور ڈالتا ہے مگر اسے کچھ یاد نہیں آتا۔ دھندلائیوں میں ہاتھ پیر مارتے ہوئے بس اتنا یاد آتا ہے کہ لوگ ایک تابوت اٹھائے جا رہے تھے، اس تابوت میں اس تابوت میں شاید وہ تھا، یا پھر شاید وہ نہیں تھا۔
۲
جوں ہی قبر کھودنے کا کام مکمل ہوا۔ ان کے چہروں پر جگمگا ہٹیں کروٹیں لینے لگیں۔
وہ پچھلے کئی مہینوں سے یہ قبر کھود رہے تھے۔۔۔ کبھی نیچے سے دلدل نکل آتی اور کبھی آسمان پانی بن جاتا۔ قبر کھودنے کے دوران انھیں معلوم ہوا، اندر ہی اندر شہر کی زمین دلدل اور آسمان پانی ہو چکا ہے۔ مگر انھیں ہر صورت میں قبر کھودنا تھی اور اب کہ قبر کھد چکی تھی۔ وہ مٹی کے ڈھیر کے پاس بیٹھے سستا رہے تھے۔۔۔ سلیں ترتیب سے ایک طرف پڑی تھیں۔ گارا بنانے کے لیے پانی سے لبالب بھری بالٹی بھی پاس ہی رکھی تھی۔ بس ایک جنازے کا انتظار تھا۔
لمحوں کے سلسلے سرکتے رہے، کھسکتے رہے اور آخر قبر کھودنے والوں کی آنکھیں قبرستان کی طرف بڑھتا ہوا راستہ دیکھ دیکھ پتھرا گئیں۔۔۔ ڈوبتا سورج اور خالی قبر۔
پھر پراسرار سناٹے کے تنے ہوئے خیمے سے دفعتاً ایک آواز گونجی۔۔۔ جنازہ گم ہو گیا ہے۔
سورج ڈوب گیا۔ سروں پر منڈلاتی رات نیچے اترنے لگی۔
قبر کھودنے والوں میں سے ایک نے دوسرے کی طرف دیکھا اور بھرائی ہوئی آواز میں کہا:’’۔۔۔ لیکن اب ہم دفن کسے کریں گے؟‘‘
’’دفن۔۔۔ ؟‘‘ دوسرا چونکا۔
’’ہاں قبر کھد جائے تو پھر لاش مانگتی ہے۔۔۔ !‘‘
سب نے ایک دوسرے کو مشکوک نظروں سے دیکھا۔۔۔ نیچے اترتی رات روشنی کو دبوچ رہی تھی اور خالی قبر اپنی جسامت سے کہیں بڑی دکھائی دے رہی تھی۔
’’۔۔۔ لیکن لاش کس کی؟‘‘ ایک بڑبڑایا۔
’’کوئی بھی لاش۔۔۔ کھدی ہوئی قبر تو بس مردہ مانگتی ہے۔۔۔ ‘‘
’’ایک لاش۔۔۔ ‘‘
’’کوئی بھی لاش۔۔۔ ‘‘
سرگوشیوں کے کندھوں سے سوال پھسلا۔ قبرستان سے نکلا اور رینگتا رینگتا سارے شہر میں پھیل گیا۔۔۔ چوک، چوراہے، بازار، گلیاں ، نکڑیں ، ٹولیاں ، گروہ۔ چپ چاپ ایک دوسرے کو تکتی ہوئی آنکھیں۔۔۔ رات نیچے اتر آئی تھی اور بال کھولے شہر میں پھر رہی تھی۔
ایک ایک کر کے ہر شخص سہمے ہوئے گھروں میں کھو گیا۔ جہاں بچے اور عورتیں پہلے ہی رو رو چپ ہو چکی تھیں۔
وہ شاید گھر میں تھا، یا پھر شاید گھر میں نہیں تھا۔
’’۔۔۔ اتنی دیر؟‘‘شاید اس کی بیوی نے کہا، یا پھر شاید اس کی بیوی نے نہیں کہا۔
’’کھدی ہوئی قبر تو بس لاش مانگتی ہے۔۔۔ لاش نہ ملے تو شہر تباہ ہو جاتا ہے۔۔۔ !‘‘ دونوں میں سے شاید کسی نے کسی سے کہا، یا پھر شاید دونوں میں سے کسی نے کسی سے نہیں کہا۔
’’کیا۔۔۔ ؟ ‘‘ شاید دونوں نے بیک وقت کہا، یا پھر شاید دونوں نے بیک وقت نہیں کہا۔
’’کچھ نہیں۔۔۔ ‘‘ دونوں نے شاید بیک وقت جواب دیا۔ یا پھر شاید دونوں نے بیک وقت جواب نہیں دیا۔
دونوں شاید ایک ساتھ ایک بستر پر تھے یا پھر شاید دونوں ایک ساتھ ایک بستر پر نہیں تھے۔۔۔ نیند شاید ان کی آنکھوں میں بھری ہوئی تھی، یا پھر شاید نیند ان کی آنکھوں میں بھری ہوئی نہیں تھی۔
باہر رات شاید اپنے بال باندھ رہی تھی، یا پھر شاید باندھ نہیں رہی تھی۔۔۔ سورج ایک آنکھ کھولے شہر کو دیکھ رہا تھا، یا پھر شاید شہر کو نہیں دیکھ رہا تھا۔
شاید اندھیرے میں شاید روشنی میں۔۔۔ یا پھر شاید نہ اندھیرے میں ، نہ روشنی میں ، کھدی ہوئی قبر اپنی جسامت سے بہت بڑی ہو گئی تھی اور لاش مانگ رہی تھی۔
شاید دن گزر گیا۔ یا پھر شاید نہیں گزرا۔
شاید رات پھر آ گئی، یا پھر شاید نہیں آئی۔
شک ان کے بدنوں کے ادھڑے بوسیدہ دروازوں پر دستک دے رہا ہے۔ خالی منظر ان کی بوڑھی نظروں کو نوچ رہا ہے۔ بھوک ان کی انتڑیوں کو بل دے رہی ہے۔۔۔ اور ایسے میں وہ سب، سب کے سب، ان میں سے ہر کوئی، وحشت زدہ آنکھیں پھاڑے کسی دوسری آنکھ کے جھپکنے کا منتظر ہے کہ کھدی ہوئی قبر تو بس لاش مانگتی ہے۔۔۔
٭٭٭

سناٹا بولتا ہے

معلوم نہیں یہ رات کا پہلا پہر ہے، درمیانہ یا پچھلا،
یا شاید دن ہے جس نے رات کے ہاتھ پر بیعت کر لیا ہے،
یا پھر شاید رات ہی ہے،
کوئی بات یقین سے نہیں کہی جا سکتی، خوفناک جبڑوں والا اندھیرا تھوتھنی اٹھا اٹھا کر بھونک رہا ہے،
’’وہ سہم کر میرے ساتھ لگ جاتا اور سرگوشی کرتا ہے۔۔۔ ماچس جلاؤں ؟‘‘
’’نہیں ، تیلیاں اس طرح ختم ہوتی رہیں تو۔۔۔ ‘‘
’’تو؟‘‘ اس کی آواز میں خوف سرسراتا ہے۔
’’۔۔۔ میں نہیں جانتا‘‘۔
شاید ایک دو یا اس سے بھی زیادہ دن، مہینے یا سال، یقین سے چھ نہیں کہا جا سکتا کہ ہم کب سے گٹر کی دیواروں کو ٹٹول ٹٹول کر باہر جانے کا راستہ تلاش کر رہے ہیں ، اتنا سا خیال آتا ہے کہ ہم گفتگو کرتے چلے جا رہے تھے۔۔۔ مین ہول کھلا ہو گا، وہ گرا، اسے نکالنے کی کوشش میں مَیں ، یا شاید میں گرا ہوں گا اور مجھے نکالنے کی کوشش میں وہ، پورے یقین کے ساتھ کوئی بھی بات نہیں کی جا سکتی،
رینگتے پانی کی سرسراہٹ، اندھیرا بار بار اپنے جبڑے کچکچاتا ہے اور لمبی کالی زبان نکال کر ہمارے منہ چاٹتا ہے، ہماری گالوں پر لیس دار رات کی چپچپاہٹ، وہ تیلی جلاتا ہے بیمار نحیف شعلہ سر اٹھا کر دو تین اکھڑے اکھڑے سانس لیتا ہے۔۔۔ گھپ اندھیرا،
زیادہ گہرے اور منظم اندھیرے میں تھوڑی سی غیر منظم روشنی اندھیرے کو اور دبیز کر دیتی ہے۔ اوپر سڑک پر بھاری تیز رفتار گاڑی گزرتی ہے،
میں کہتا ہوں۔۔۔ ’’اس کا مطلب ہے ہم ابھی بڑی سڑک کے نیچے ہی ہیں ‘‘۔
وہ ہنستا ہے۔۔۔ ’’اس صورت حال میں بڑی سڑک کے نیچے ہونے یا نہ ہونے سے کیا فرق پڑتا ہے؟‘‘
’’شاید کچھ نہیں ، لیکن یہ احساس بھی غنیمت ہے‘‘
’’اگر ہم اسی سیدھ میں چلتے جائیں تو شاید کوئی کھلا ہوا مین ہول نظر آ جائے‘‘
’’اس سیدھ میں تو شاید ہی ملے‘‘ وہ بڑبڑاتا ہے۔۔۔ ’’بہرحال چلے چلو‘‘
ہم ابھی دو چار قدم ہی چلتے ہیں کہ کوئی چیز میرے پاؤں سے لپٹ جاتی ہے، میں جھک کر چھوتا ہوں۔۔۔ ننھا منا سا ایک ہاتھ،
’’ماچس جلاؤ۔۔۔ جلدی ‘‘ میں چیختا ہوں ،
لرزتی روشنی میں ایک نوزائدہ بچہ میرے پہلو سے گزرتا آگے نکل جاتا ہے،
وہ کہتا ہے۔۔۔ ’’یہ تو میرا بچہ ہے۔۔۔ مگر یہ تو ابھی ماں کے پیٹ میں تھا‘‘۔
میں اسے تسلی دیتا ہوں۔۔۔ ’’شاید اس دوران اس کی ماں نے اسے جن دیا ہو‘‘
’’اور پھر کسی نالی میں پھینک دیا ہو‘‘ وہ بڑبڑاتا ہے۔۔۔ یا پھر یہ کہ اس کی ماں نے اسے کسی نالی ہی کے کنارے جنا ہو اور بہتا ہوا یہاں آگیا ہو‘’
ایک لمحہ کے سکوت کے بعد وہ دفعتاً چیختا ہے۔۔۔ میرے بیٹے۔۔۔ میرے بچے‘‘
جواباً رینگتے پانی کی سرسراہٹ اور لیس دار اندھیرے کی چپچپاہٹ،
’’میرا بچہ۔۔۔ میرا بیٹا‘‘ وہ پھوٹ پھوٹ کر رونے لگتا ہے:
’’صبر کرو۔۔۔ صبر‘‘ میں اس کے کندھے پر ہاتھ رکھتا ہوں۔۔۔ سارے بچے اب اسی طرح بہتے ہوئے یہیں آئیں گے کہ اب ساری مائیں اپنے بچوں کو یوں ہی نالیوں میں بہائیں گی‘‘۔
’’نالیوں میں کیوں ؟‘‘ وہ چپ ہو کر سوال کرتا ہے۔
’’دریا تو سارے خشک ہو گئے ہیں اور شہر میں قتل طفلاں کی منادی بھی ہو چکی ہے، مائیں بے چاری کیا کریں۔۔۔ چلو آگے چلیں ، کسی کھلے مین ہول کی تلاش میں ‘‘۔
وہ ایک ٹھنڈی سانس بھرتا ہے۔۔۔ ’’میری عمر اب چالیس سال ہونے والی ہے، اس سیلن زدگی، رینگتے پانی کی سرسراہٹ اور اس لیس دار اندھیرے کے جبڑوں میں پستے پستے چالیس سال ہو چکے ہیں ، معلوم نہیں میری زندگی کے اور کتنے سال باقی ہیں ، ان باقی سالوں میں کھلا میں ہول ملے گا بھی کہ نہیں ‘‘۔
’’کیا معلوم۔۔۔ ؟‘‘ میری آواز دم توڑ رہی ہے،۔۔۔ ‘‘ شاید ہمارے بچوں کو مل جائے، شاید وہ بھی ہماری ہی طرح ساری زندگی کھلے مین ہول کے خواب دیکھتے دیکھتے اسی گٹر میں بھٹکتے اندھیرے کے لیس دار جبڑوں میں پستے گزار دیں ‘‘۔
’’چلو آگے چلیں ‘‘ وہ میرا ہاتھ دباتا ہے۔
گہری گپ خاموشی، جس میں رینگتے پانی کی سرسراہٹ اور اندھیرے کے خراٹے گونج رہے ہیں۔
ہمارے سروں پر آوازوں کے بادل تیرتے ہیں۔
ایک آواز۔۔۔ ’’ میں تمہارے ساتھ کیا سلوک کروں ؟‘‘
دوسری آواز۔۔۔ ’’وہی جو ایک بادشاہ دوسرے بادشاہ کے ساتھ کرتا ہے‘‘۔
تالیاں ، نعرے، تحسین کا شور،
وہ کہتا ہے۔ ’’بادشاہ نے بادشاہ کے ساتھ جو سلوک کرنا تھا کر دیا، مگر ہم کہاں ہیں ؟ ‘‘
’’ہم۔۔۔ میں اس کاشانہ تھپتھپاتا ہوں۔۔۔ ’’بادشاہوں کے کھیل میں ہم کوئی چیز نہیں ہوتے، بس ہم تو کھلے مین ہول کے خواب ہی دیکھتے ہیں ‘‘۔
وہ پوچھتا ہے۔۔۔ ’’ہم میں سے پہلے کون گٹر میں گرا تھا‘‘۔
’’تم۔۔۔ ‘‘ میں اندھیرے میں اسے گھورتا ہوں۔
’’نہیں تم۔۔۔ ‘‘ وہ دو قدم پرے ہو جاتا ہے۔
’’نہیں تم۔۔۔ ‘‘
’’تم۔۔۔ ‘‘ وہ مجھ پر جست لگاتا ہے، ہم ایک دوسرے سے گتھم گتھا ہو جاتے ہیں ، اور ایک دوسرے کو گرانے کی کوشش کرتے ہیں ، جب تھک جاتے ہیں تو آمنے سامنے کی دیواروں سے ٹیک لگا کر ہانپنے لگتے ہیں۔
بہت دیر کی چپ کے بعد وہ ہانپتی ہوئی آواز میں کہتا ہے۔۔۔ ’’آگے چلیں ‘‘
’’چلو۔۔۔ ‘‘
چلتے چلتے ہم ایک کھلی سی جگہ پر پہنچ جاتے ہیں۔ سخت سے ٹکڑے ہمارے پاؤں سے ٹکراتے ہیں۔
وہ ماچس جلاتا ہے۔
چاروں طرف ہڈیاں اور انسانی پنجر پڑے ہوئے ہیں۔ وہ ایک ہڈی اٹھا لیتا ہے اور کہتا ہے۔۔۔ ’’یہ تو میرے باپ کی ہڈی لگتی ہے، اس کے جبڑے کی ساخت ایسی ہی تھی‘‘۔
میں انسانی پنجروں کو پہچاننے کی کوشش کر رہا ہوں۔
وہ کہتا ہے۔۔۔ ’’لو جی میں سمجھتا تھا میرا باپ مجھ سے اچھا تھا، اب معلوم ہوا کہ وہ بھی میری طرح ساری عمر کھلے مین ہول کے خواب دیکھتا رہا‘‘۔
دفعتہً اس کی آواز لرزنے لگتی ہے۔۔۔ ’’ہم بھی۔۔۔ ہم بھی۔۔۔ ‘‘
میں جھک کر دیکھتا ہوں ، سب کے منہ پر پلاسٹر ٹیپ لگے ہوئے ہیں ، کیڑے ان کا گوشت کھا گئے ہیں ، مگر ٹیپ اسی طرح ہیں ،
’’مگر ہم تو صرف اظہار کے حوالے سے ہی ایک دوسرے کو پہچانتے ہیں اور ان کے منہ تو بند ہیں۔۔۔ بند کر دیئے گئے ہیں ‘‘
پانی کی سرسراہٹ، بل کھاتی سیلن
ایک گوشت خور کیڑا اس کی ٹانگ پر چڑھ جاتا ہے، وہ چیخ مارتا ہے اور ٹانگ جھٹک کر آگے چل پڑتا ہے۔۔۔
ابھی دو چار ہی قدم اٹھتے ہیں کہ بہت سی ملی جلی آوازیں اندھیرے میں سے نکل کر ہمارے پاؤں پکڑ لیتی ہیں۔
وہ جلدی سے تیلی جلاتا ہے۔
ننگ دھڑنگ بچے، پانی میں شپ شپ کرتے دوڑے چلے آ رہے ہیں۔
’’یہ کون ہیں ؟‘‘ وہ میرے ساتھ لگ جاتا ہے۔
ایک بچہ جو جوانی کی دہلیز پر قدم رکھ رہا ہے آگے بڑھ کر پوچھتا ہے۔۔۔ تم کون ہو؟‘‘
’’ہم۔۔۔ ہم گٹر میں گر پڑے تھے‘‘۔
’’اور یہ کہ تمہارا پاؤں پھسل گیا تھا۔ وہ کھڑکھڑاتا ہے۔۔۔ سب یہی کہتے ہیں ‘‘۔
’’مگر تم کون ہو؟‘‘
’’ہم۔۔۔ ہم ربڑ کے غباروں میں پیدا ہوئے ہیں ، اس گٹر کے اندر‘‘
’’ربڑ کے غبارے‘‘
’’ہاں وہ غبارے جو لوگ استعمال کر کے گٹر میں پھینک دیتے ہیں ‘‘
وہ شور مچاتے ہمارے دائیں بائیں سے گزرتے ادھر ادھر نکل جاتے ہیں ، وہ کہتا ہے۔۔۔ ’’مجھے یاد آیا، ایک رات میری ماں نے بھی ایک غبارہ نالی میں پھینکا تھا اور اس میں میں تھا پر معلوم نہیں وہ شخص جو راتوں رات ہی چپکے سے چلا گیا تھا میرا باپ تھا کہ نہیں ‘’۔
’’اور شاید میں بھی اسی غبارے میں تھا اور وہ شخص، وہ ضرور ہمارا باپ تھا اور وہ ہماری ماں تھی۔۔۔ انھوں نے تو ہمیں بہت روکا تھا۔ مگر ہم خود ہی اس گٹر میں آ گئے۔ میں یا شاید ہمیں ورغلایا گیا تھا۔۔۔ سنہرے خواب دکھا کر، مگر یہاں آ کر معلوم ہوا یہ تو گٹر ہے۔۔۔ گٹر‘‘
اوپر اب آوازوں کی دستک میں بھاری پن اور تواتر پیدا ہو رہا ہے،
’’شاید اوپر صبح ہو چکی ہے‘‘ میں بڑبڑاتا ہوں۔
’’مگر ہمیں کیا؟‘‘ اس کی آواز بیٹھی ہوئی ہے
’’سورج کی شکل کیسی ہو گی؟‘‘ میں اس سے پوچھتا ہوں۔۔۔ ’’اس کی کرنوں میں گرمی تو ہوتی ہو گی نا‘‘
’’اب تو یاد بھی نہیں۔۔۔ اور میرے منہ پر تو ٹیپ لگا ہوا ہے، اور ایسی باتیں کرنا منع بھی ہے، میں تمہیں کیسے بتاؤں ، کیا بتاؤں ؟‘‘
ہم اس وقت کسی بڑی سڑک کے نیچے ہیں ، ہارنوں کی پوں پوں ، بریکوں کی رگڑ اور قدموں کی آوازیں۔۔۔
وہ تیلی جلاتے ہوئے اعلان کرتا ہے۔۔۔ ’’ صرف دو تیلیاں باقی ہیں ‘‘
لرزتی روشنی میں ایک عجیب سی سرسراہٹ محسوس ہوتی ہے
’’وہ حسرت سے اوپر دیکھتا ہے۔۔۔ کہیں بھی کوئی راستہ نہیں ‘‘
’’نقشوں میں ضرور ہو گا‘‘۔ میں سوچتا ہوں۔۔۔ ’’مگر نقشے تو صرف دیواروں پر لگانے کے لیے ہوتے ہیں ‘‘۔
’’یہ ہوا میں تازگی کیسی ہے؟‘‘ وہ چونکتا ہے۔
’’کیا معلوم یہ تازگی ہے بھی کہ ہم ہی اس سیلن زدگی کے عادی ہو گئے ہیں ؟‘‘
’’نیم روشنی، نیم تازگی۔۔۔ ہم بھی تو نیم زندہ ہی ہیں ‘‘
اوپر اب دوپہر گزر رہی ہو گی۔
اب سہ پہر۔۔۔ اب سانولی نمکین شام،
لوگ دفتروں ، دکانوں سے گھر آ رہے ہوں گے، دروازوں پر منتظر بیویاں مسکراہٹوں کے بوسے لیے ان کی راہ تک رہی ہوں گی۔۔۔ ابو ابو کرتے ننھے بچے اپنی توتلی زبانوں کے ساتھ انھیں پکار رہے ہوں گے،
تیلی جلاتے ہوئے وہ اعلان کرتا ہے۔۔۔ ’’بس ایک ہی تیلی باقی ہے‘‘۔
’’اسے مت جلانا۔۔۔ مت جلانا‘’ میں چیختا ہوں۔
’’کیوں ؟‘‘
’’بس اسے جلانا مت‘‘
’’کیوں نہ جلاؤں ؟‘‘ وہ ضد کرتا ہے۔۔۔ ’’وجہ بتاؤ‘‘
’’آخری لمحے میں ، جب ہم ایک دوسرے کی آخری تصدیق کریں گے تو اس وقت۔۔۔ اس وقت‘‘
اوپر نعروں کا شور۔۔۔ میری آواز ڈوب جاتی ہے
مقرر کی چیختی آواز، مگر لفظ فضا ہی میں رہ جاتے ہیں ،
وہ افسوس سے سر ہلاتا ہے۔۔۔ ’’کچھ بھی سمجھ میں نہیں آ رہا‘‘۔
’’معلوم نہیں لفظوں ہی میں سے معنی نکل گئے ہیں ، یا آوازیں کھوکھلی ہو گئی ہیں ، خدا جانے کہاں کیا گڑبڑ ہے‘‘۔
شور۔۔۔ چیختی آوازیں ،
پھر تڑتڑ۔۔۔ گولیوں کی تڑتڑ
سناٹا بولتا ہے،
وہ کہتا ہے۔۔۔ ’’ ہم شہر میں ہیں اور گٹر نیچے ہے‘‘
میں کہا ہوں۔۔۔ ’’ہم گٹر میں ہیں اور شہر اوپر ہے‘‘
اب معلوم نہیں ، یقین سے نہیں کہا جا سکتا کہ ہم گٹر میں ہیں یا شہر میں ، شہر میں ہیں یا گٹر میں ،
وہ کہتا ہے۔۔۔ ’’لو یہ جھگڑا چھوڑو، میں آخری تیلی جلانے جا رہا ہوں ‘‘۔
وہ تیلی کو ماچس پر رگڑتا ہے،
ایک دوسرے کو دیکھنے، شناخت کرنے اور ایک دوسرے کی گواہی دینے کا یہ آخری موقعہ، مجسم آنکھ بنے، آمنے سامنے۔۔۔ ٹک ٹک، ٹک ٹک
تیلی ماچس سے رگڑ کھاتی ہے،
ہمارا سارا وجود آنکھ میں ڈھل جاتا ہے
وہ تیلی کو ماچس سے رگڑتا ہے۔۔۔ رگڑتا چلا جاتا ہے
تیلی بغیر جلے، ٹوٹ کر نیچے پانی میں جا گرتی ہے
سرسراتے اندھیرے اور رینگتے پانی میں ، آنکھیں پھاڑے ہم ایک دوسرے کو دیکھنے، شناخت کرنے اور ایک دوسرے کی گواہی دینے کے انتظار میں پتھر ہوتے جاتے ہیں۔
٭٭٭

پت جھڑ میں خود کلامی

قبرستان کی آمنے سامنے کی دیواروں پر بیٹھے ہوئے وہ اور میں ،
درمیان میں چپ قبرستان،
یہ پت جھڑ کا موسم ہے،
پیاسے درختوں کے بنجر ہاتھوں سے وقفہ وقفہ سے پھسلتے پتے ویران قبروں پر خاموشی سے گرتے ہیں ، ہوا رکی ہوئی ہے اور فضا میں کبھی کبھی کسی اداس پرندے کی آواز لمحہ بھر کے لیے نشان بتاتی ہے ہے پھر ڈوب جاتی ہے۔
تھکاوٹ سے چور راستے قبروں کے درمیان چپ چاپ لیٹے ہوئے ہیں۔
وہ ایک لمبی تیز سسکاری جیسی آواز نکالتا ہے۔
’’کیا بات ہے؟‘‘ میں چیخ کر پوچھتا ہوں۔
’’کچھ نہیں ، میں صرف یہ دیکھ رہا ہوں کہ میں موجود تو ہوں نا‘‘
گہری چپ
مجھے اس پر رشک آتا ہے کہ وہ موجود ہے اور خود پر شبہ ہوتا ہے کہ میں موجود نہیں۔
میرے منہ سے بے ساختہ لمبی اُو نکلتی ہے۔
’’میں بھی موجود ہوں ‘‘ میں چیخ کر اسے بتاتا ہوں۔
سانولی نمکین شام آہستہ آہستہ ہمارے درمیان رات کا جالا بُن رہی ہے۔
میں دیوار سے کھسک کر آہستہ سے نیچے اترتا ہے۔
میں سامنے والی قبر کا کنبہ اٹھا کر آواز دیتا ہو۔۔۔ کوئی ہے؟‘’
میری آواز قبرستان کے دوسرے سرے سے واپس آتی ہے۔
وہ پکارتا ہے۔۔۔ ’’کوئی ہے؟‘‘
میں اگلی قبر کا کتبہ اٹھاتا ہوں
قطار در قطار ویران قبریں۔۔۔ خالی کھوکھلی آوازیں
میں قبرستان کی دوسری طرف نکل آتا ہوں اور آہستہ سے دیوار پر جا بیٹھتا ہوں۔
وہ بھی دیوار پر چڑھ جاتا ہے۔
قبرستان کے آمنے سامنے کی دیواروں پر بیٹھے میں اور وہ،
درمیان میں قبرستان،
یہ پت جھڑ کا موسم ہے
درختوں سے جھڑتے پتے اداس قبروں اور چپ راستوں پر لڑکھڑا رہے ہیں۔
شام کی جھولی میں سمٹا اندھیرا دبے پاؤں باہر نکل کر چپکے چپکے چاروں طرف پھیل رہا ہے۔
قبرستان کی آمنے سامنے کی دیواروں پر بیٹھے ہم دونوں دھندلا رہے ہیں ، مجھے وہ اب شام کے اندھیرے میں تحلیل ہوتا سایہ لگ رہا ہے،
میں آواز دیتا ہوں۔۔۔ ’’سامنے دیوار پر کون ہے؟‘‘
’’میں ‘‘اس کی آواز گونجتی ہے۔
پھر وہ آواز دیتا ہے۔۔۔ ’’سامنے دیوار پر کون ہے؟‘‘
’’میں ‘‘ میں جواب دیتا ہوں۔
ہم دونوں ایک دوسرے کا اقرار کر کے پھر کھسک کر دیوار سے نیچے اترتے ہیں اور دبے پاؤں ایک ایک قبر کا کتبہ اٹھا کر اندر جھانکتے ہیں۔
سنسان خالی قبریں بھاں بھاں کر رہی ہیں۔
ہم چکر کاٹ کر دیوار کے پاس لوٹ آتے ہیں اور اچک کر بیٹھ جاتے ہیں۔
تاریخ میں لکھا ہے۔
انھوں نے خوابوں ، چاہتوں اور جذبوں میں گوندھ گوندھ کر یہ شہر بنایا اور گیت گاتے ہوئے اس میں داخل ہوئے اور ایک دوسرے کو مبارکباد دینے لگے کہ ان کی قربانیاں رنگ لائیں ، پھر بعد چند دنوں کے وسوسوں نے انھیں آن گھیرا، کسی نے ان کے دل میں یہ شک ڈال دیا کہ دشمن ان کے شہر کو لوٹنا چاہتے ہیں ، انھوں نے شہر کی حفاظت کے لیے سپاہی رکھے اور اپنی روٹی میں سے حصہ کاٹ کر انھیں دینے لگے۔
گہرا اندھیرا چاروں طرف پھیل گیا ہے۔
قبرستان کے آمنے سامنے والی دیواروں پر بیٹھے ہم دونوں ایک دوسرے کو نہیں دیکھ سکتے۔
’’میں ہوں ‘‘ وہ ایک لمبی چیخ مارتا ہے۔
’’میں بھی ہوں ‘‘ میں جواب دیتا ہوں۔
ہم گھپ اندھیرے میں آوازوں سے اپنے ہونے کی تجدید کرتے ہیں ، آنکھیں پھاڑ پھاڑ کر اندھیرے میں دیکھتے ہیں ، تاریکی میں گم سم کھڑے درختوں کے پتے جھڑتے ہیں۔
ایک ایک کر کے،
ایک ایک کر کے،
میں دھیرے سے نیچے اترتا ہوں اور قبروں کے درمیان پھیلے ہوئے چپ راستوں پر چلنے لگتا ہوں۔
’’ابو آئے‘‘ میری بیوی پکارتی ہے۔
’’اکا۔۔۔ اکا‘‘ میری بیٹی واکر گھسیٹی دروازے کی طرف لپکتی ہے۔
تاریخ میں یہ بھی لکھا ہے۔
کہ سپاہی ان کے حصے کی روٹی کھا کھا کر خوب موٹے تازے ہو گئے اور ان کی تعداد شہر والوں سے زیادہ ہو گئی۔ وہ دشمن کا انتظار کرنے لگے لیکن جب بہت عرصہ تک کسی طرف سے دشمن دکھائی نہ دیا تو انھوں نے خیالی دشمن کی باتیں شروع کر دیں۔ مگر پھر بھی کام نہ بنا تو انھوں نے شہر والوں کو دشمن سمجھ لیا اور کہنے لگے کہ ہم شہر والوں سے شہر کی حفاظت کریں گے۔
گاڑھا اندھیرا اور گاڑھا۔۔۔ اور گاڑھا ہو گیا ہے۔
درخت قبریں ، راستے گم ہو گئے ہیں ،
جس دیوار پر میں بیٹھا ہوا ہوں وہ بھی کھو گئی ہے، مجھے اپنا آپ بھی نظر نہیں آ رہا میں صرف سوچ سکتا ہوں۔
میں چیخنا چاہتا ہوں ، مگر میری آواز اندھیرا ہے۔
میں بولنا چاہتا ہوں ، مکر میرے لفظ اندھیرا ہیں۔
میں سوچتا ہوں۔۔۔ میں ہوں
اس سے آگے اندھیرا گاڑھا اندھیرا۔
میں آنکھیں پھاڑ پھاڑ کر سامنے والی دیوار پر بیٹھے ہوئے اس کو دیکھنا چاہتا ہوں ، مگر چاروں طرف اندھیرا ہی اندھیرا،
اندھیرا ہی اندھیرا
لفظ گم۔۔۔ آواز گم۔۔۔ وجود گم،
اور تاریخ میں آگے چل کر یہ بھی لکھا ہے۔
ان کے سپاہی دشمن کو فتح کرنے کی تو سکت نہیں رکھتے تھے اس لیے اپنی بہادری کا بھرم رکھنے کے لیے خود ہی بار بار اپنے شہر کو فتح کرنے لگے اور شہر والے دشمن قرار پائے اور ان سے شہر کی حفاظت سپاہیوں کا مقدس فرض، سپاہیوں ی تعداد رفتہ رفتہ بڑھنے لگی، پھر دھیرے دھیرے یہ ہوا کہ شہر والے ایک ایک کر کے ختم ہو گئے اور صرف سپاہی ہی سپاہی رہ گئے، گلیان اور مکان سونے ہو گئے اور رفتہ رفتہ بھُربھُر کرتی قبریں بن گئے۔
گہرے اندھیرے میں قبرستان کی آمنے سامنے کی دیواروں پر بیٹھے میں اور وہ جانے کب سے یوں ہی بیٹھے ہیں۔
گھپ اندھیرے میں اُلو کی آواز اُبھرتی ہے۔
کچھ دیر کے لیے وقفہ ہوتا ہے۔
پھر اُلو کی تیز آواز مسلسل ہو جاتی ہے۔
درخت، قبریں اور راستے اس کی تیز آواز کے پروں میں پھڑپھڑا کر چپ ہو جاتے ہیں۔
گہرا گھور اندھیرا،
میری بیوی مجھے شانے سے پکڑ کر ہلاتی ہے۔۔۔ ’’اب سو بھی جائیں رات بہت ہو گئی ہے‘‘۔
میں خالی خالی نظروں سے اس کی طرف دیکھتا ہوں۔
’’آپ کیا سوچتے رہتے ہیں آج کل‘‘ وہ پریشانی سے پوچھتی ہے۔
میں جواب نہیں دیتا اور مڑ کر سوئی ہوئی بیٹی کو دیکھتا ہوں ، جو اندھیرے سے ہے خیر چوسنی منہ میں لیے مستقبل کے دھندلے زینے چڑھ رہی ہے اور نہیں جانتی کہ اس کے مستقبل کے سنہری خوابوں کے گرد خونخوار چہروں والے کتے غرا رہے ہیں۔
رات کے سناٹے میں اُلو کی تیز آواز گونجتی ہے۔
اندھیرے میں مسلسل گونجنے لگتی ہے۔
یہ پت جھڑ کا موسم ہے۔
گھپ اندھیرا، درخت اداس،
سنسان راستوں پر پتے ایک ایک کر کے جھڑتے ہیں ،
اور اُلو کی آواز مسلسل تیز۔۔۔ اور تیز۔۔۔ اور تیز!
٭٭٭

میلہ جو تالاب میں ڈوب گیا

دن کے وقت سمندر میرے گھر سے تیرہ سو چھبیس کلو میٹر دور ہوتا ہے، لیکن جونہی رات گھنی سیاہ پلکیں اٹھا کر شہر کے چوک میں اترتی ہے، سمندر رینگتا رینگتا میرے کمرے کی دیوار سے آ لگتا ہے اور نرم لچکیلی انگلیوں سے بند کھڑکی پر دستکیں دیتا اور میرا نام لے لے کر پکارتا ہے۔
میں سر اٹھا کر ساتھ والے پلنگ پر سوتی بیوی اور بیٹی کو دیکھتا ہوں اور آہستہ سے کھڑکی کھول کر ہاتھ سمندر کے ہاتھ میں دے دیتا ہوں اور اس سے کہتا ہوں۔۔۔ ’’اے سمندر تیرے کئی روپ ہیں ، انجانے دیسوں ، روشنیوں کے، تاریکی کے ان گنت راستے تیرے وجود سے طلوع اور غروب ہوتے ہیں ، مجھے بشارت دے کہ میں مرنے سے پہلے مرنے کا تجربہ کرنا چاہتا ہوں ‘‘۔
سمندر ہنستا ہے، کھکھلا کر ہنستا ہے۔۔۔ ’’مرنے سے پہلے مرنے کا تجربہ؟‘‘ میرے کمرے کی دیوار سے ٹیک لگا کر ٹانگیں پھیلا کر بیٹھا ہوا سمندر، کھڑکی میں سے سر نکالے میں ، شاید حقیقت کہیں اور ہے، ہم محض ایک تصویر، ایک عکس ہیں ، یا پھر ہم حقیقت ہیں اور عکس کہیں اور دہرایا جا رہا ہے۔
بڑبڑانے کی آواز سنائی دیتی ہے، میں سر موڑ کر دیکھتا ہوں ، میری دو سال کی بیٹی نیند میں بڑبڑا رہی ہے۔
مجھے آوازیں بہت سنائی دیتی ہیں۔ مگر جسم دکھائی نہیں دیتے۔ وقت ایک پر کٹے کبوتر کی طرح میرے کندھے پر بیٹھا ہوا ہے۔ میں اسے ہُش ہُش کر کے اڑانے کی کوشش کرتا ہوں۔ مگر وہ اڑنے کا نام ہی نہیں لیتا۔ میں ہُش ہُش کرتا رہتا ہوں۔ میری بیوی مجھے بڑی احتیاط سے تہ کر کے کتابوں کی الماری میں رکھ دیتی ہے لیکن میں اس کی نظر بچا کر چپکے سے باہر نکل آتا ہوں اور بڑے چوک کی طرف چل پڑتا ہوں لیکن میں بڑے چوک سے آگے نہیں جا سکتا کہ میرے پاس جو اجازت نامہ ہے اس کی حد یہیں پر ختم ہو جاتی ہے۔
اس شہر میں پھول اگانے کی بھی اجازت نہیں کہ کلی کا کھلنا بھی فحاشی کے زمرے میں آتا ہے۔
سارے کام اجازت ناموں سے ہوتے ہیں۔ مرنے کے لیے بھی اجازت لینا پڑتی ہے، اسی لیے میں مرنے سے پہلے مرنے کا ایک تجربہ کرنا چاہتا ہوں ،
میں نے کھڑکی پوری طرح کھول دی ہے اور سمندر کے کندھے پر پاؤں رکھ کر آہستہ سے نیچے اتر آیا ہوں۔ سمندر کے پھیلے جسم کے ساتھ کروٹ لے کر لیٹا ہوا ساحل سستا رہا ہے اور کن انکھیوں سے پر شور مہیب لہروں کو دیکھ رہا ہے اوپر سیاہ آسمان، چمکتے تارے اور چائے کی پرچ جتنا بے جان چاند، پیچھے تاریکی میں ڈوبا ہوا شہر اور سامنے انگڑائیاں لیتا سمندر
ایک آواز سنائی دیتی ہے۔
’’کون؟‘‘
’’ایک آواز۔۔۔ بغیر وجود کے ایک آواز‘‘
’’کون؟‘‘
’’ایک آواز۔۔۔ ایک آواز‘‘
آواز ایک چھناکے کے ساتھ ساحل پر گرتی ہے اور جسم میں تبدیل ہو جاتی ہے۔
’’کون؟‘‘
’’ایک وجود۔۔۔ بغیر آواز کے ایک وجود‘‘
’’کون؟‘‘
’’ایک وجود۔۔۔ ایک وجود‘‘
وجود دوڑ کر سمندر کے سینہ پر چھلانگ لگاتا ہے اور پھر آواز بن جاتا ہے۔
آواز سے وجود اور وجود سے پھر آواز بن جانے کا کھیل،
کمرے کی دیوار سے ٹیک لگا کر پاؤں پھیلا کر لیٹا ہوا سمندر اور کھڑکی میں آدھا لٹکتا ہوا میں۔۔۔ میں جو مرنے سے پہلے مرنے کا ایک تجربہ کرنا چاہتا ہوں ، مگر میری بیوی مجھے احتیاط سے تہ کر کے کتابوں کی الماری میں رکھ دیتی ہے۔ شیشوں کی الماری میں سماعت سے محروم میں صرف دیکھ سکتا ہوں ، بول نہیں سکتا، میں جلدی جلدی دو تین کتابوں کے پشتے ادھیڑتا ہوں ، اور کپڑے کی دھجیوں میں اپنے کان اور آواز کو لپیٹ کر پوری طاقت سے چوک کی طرف اچھال دیتا ہوں۔ شیشے چھنا سے سے ٹوٹتے ہیں اور میرے کان اور آواز چوک میں عین اس چبوترے پر جا گرتی ہے جس پر چڑھا شخص مجمع کی طرف منہ کر کے چیخ رہا ہے۔۔۔ ’’میں خود کشی کر رہا ہوں ‘‘
جن میں سے سسکاریاں ابھرتی ہیں ،
وہ شخص چبوترے کے درمیان لگے بجلی کے پول پر چڑھنے لگتا ہے۔ چکنے پول پر اس کے ہاتھ بار بار پھسلتے ہیں اور وہ چند فٹ اوپر جا کر پھر نیچے آ جاتا ہے۔ شمع کی نظریں اس پر جمی ہوئی ہیں۔ جونہی اس کے ہاتھ پھسلتے ہیں۔ مجمع اطمینان کا سانس لیتا ہے لیکن جب وہ پھر چند فٹ اور کھسکتا ہے تو مجمع کی سانسیں رک جاتی ہیں۔ وہ اوپر چڑھنے کی کوشش میں کئی قدم پھسلتا اور پھر دھڑام سے نیچے چبوترے پر، میرے کانوں کے قریب آ گرتا ہے۔ کپڑے جھاڑ کر اٹھتا ہے اور مجمع کی طرف منہ کر کے کہتا ہے۔۔۔ ’’میں خود کشی کر رہا ہوں ‘‘
مجمع کے منہ سے سسکاریاں نکلتی ہیں۔
لوگ دوڑ کر ساحل پر آتے ہیں اور سمندر میں کود جاتے ہیں۔ لہروں پر تیرتی آوازیں ساحل پر گر کر تپتی ریت میں وجود آشنا ہوتی ہیں اور چبوترے کے گرد پھر اتنا ہی مجمع جمع ہو جاتا ہے۔
چبوترے پر کھڑا شخص، لوگوں کی طرف منہ کر کے اپنے لفظ دہراتا ہے۔۔۔ ’’میں خود کشی کر رہا ہوں ‘‘۔
اور کھمبے پر چڑھنے، پھسلنے اور گرنے کا وہی عمل۔۔۔ ،
اس شہر کے لوگوں کو تاریخ بنانے کا بڑا چسکہ ہے مگر ان کا جغرافیہ روز بروز سمٹتا چلا جا رہا ہے۔۔۔ لیکن انھیں پرواہ نہیں۔ جغرافیہ رہے نہ رہے تاریخ ضرور بننی چاہیے۔ رات سے آدھی سے زیادہ بیت چکی ہے۔
سمندر کے چہرے پر ایک پراسرار مسکراہٹ رقص کر رہی ہے۔ میں ساحل کے ساتھ ساتھ چلتا اس دیوار تک آ جاتا ہوں جو سمندر کو شہر سے جدا کرتی ہے۔ میں سمندر کی طرف سے دیوار پر چڑھنے کی کوشش کرتا ہوں مگر میرے ہاتھ کائی زدہ چکناہٹ پر سے پھسل جاتے ہیں اور میں دھم سے سمندر کے قدموں میں آن گرتا ہوں ، پھر اٹھ کر شہر کی طرف چل پڑتا ہون جو تالاب میں بنا ہوا ہے۔
تالاب کے کنارے مزار کے گرد لگا ہوا میلا نشے میں جھوم رہا ہے، رنگ برنگی روشنیاں ، بھری ہوئی دکانیں ، سجے ہوئے پنڈال اور قہقہے لگاتے لوگ، میلا موج میں آ کر ایک بھرپور انگڑائی لیتا ہے اور اس کا پاؤں پھسل کر تالاب کے بھر بھرے کناروں پر آ پڑتا ہے تالاب بہت پرانا ہے اور اس کے کنارے اتنے بھربھرے ہو گئے ہیں کہ وہ میلے کے پھسلتے پاؤں کا بوجھ برداشت نہیں کر پاتے اور بیٹھ جاتے ہیں ، میلا اپنے آپ کو سنبھالنے اور پھیلے ہاتھوں سے آس پاس کی اونچائیوں کو پکڑنے کی کوشش کرتا ہے، مگر تالاب کے پرانے اور بھربھرے کنارے اسے سنبھلنے نہیں دیتے اور میلا اپنی رنگ برنگی روشنیوں ، بھری دکانوں ، سجے پنڈالوں اور قہقہے لگاتے لوگوں سمیت پلک جھپکنے میں تالاب میں جا گرتا ہے اور دیکھتے ہی دیکھتے ڈوب جاتا ہے، پھر کچھ عرصہ بعد تالاب سے یہ شہر اگتا ہے، اور میں نہیں جانتا کہ کب یہ شہر بھی پھسل کر کسی تالاب میں جا گرے گا، اسی لیے تو میں مرنے سے پہلے مرنے کا تجربہ کر لینا چاہتا ہوں۔
رات کے سیاہ بالوں میں اب چاندی پھولنے لگی ہے۔ میں اپنی کھڑکی میں واپس آ جاتا ہوں۔نیچے دیوار کے ساتھ ٹیک لگائے سمندر گہرے گہرے سانس لے رہا ہے۔ میں کھڑکی میں سیدھا ہو کر کھڑا ہو جاتا ہوں اور چاہتا ہوں کہ ایک ہی لمبی چھلانگ لگا کر سمندر کے سینہ پر جا پڑوں ، ابھی اپنے بازو کھولتا ہی نہیں کہ پیچھے سے میری بیٹی کی آواز آتی ہے۔۔۔ ’’ابو کا کر رہے ایں ؟‘‘
میں مڑ کر دیکھتا ہوں۔ میری بیٹی ادھ کھلی آنکھوں میں نیند لیتے بازو پھیلائے مجھے بلا رہی ہے۔ میں دھم سے بستر پر گر پڑتا ہوں۔ میں مرنے سے پہلے مرنے کا تجربہ نہیں کر سکتا اور اب تھوری دیر بعد رات کے سارے سر میں سفیدہ کھل جائے گا اور رات کے جوان مہکتے چہرے پر بڑھاپے کی جھریاں پڑ جائیں گی، سفید رتھ پر سوار دن دوڑتا ہوا آئے گا اور سمندر جو اس وقت میرے کمرے کی دیوار سے ٹیک لگا کر ٹانگیں پھیلا کر سستا رہا ہے، پھر کھسک کھسک کر میرے گھر سے تیرہ سو چھبیس کلو میٹر دور چلا جائے گا اور میں اس میلے میں جو اپنی رنگ برنگی روشنیوں ، دکانوں ، سجے پنڈالوں اور قہقہے لگاتے لوگوں سمیت پھسل کر تالاب میں ڈوب گیا ہے۔ پھر اکیلا رہ جاؤں گا۔
٭٭٭

کوڑا گھر میں تازہ ہوا کی خواہش

شام رات کے پیانو پر اندھیرے کا گیت بجا رہی ہے۔
سائن بورڈوں کی گود میں سوئی ہوئی روشنیاں آنکھیں ملتے ہوئے جاگ رہی ہیں۔
فٹ پاتھ پر قدم قدم چلتے ہوئے میں اس کے بارے میں سوچ رہا ہوں۔ وہ جو اگلے سٹاپ پر میری منتظر ہے۔
سیاہ برقعہ میں اس کا گدرایا بدن مجھے دور ہی سے اشارے کرتا اور سیٹیاں مارتا ہے۔
’’ہے‘‘۔
’’ہے‘‘۔
ہم چپ چاپ ایک بغلی سڑک پر مڑ جاتے ہیں۔
فٹ پاتھ کے ساتھ درختوں کی لمبی قطار گہری سوچ میں گم، سانس روکے سوکھے پتے۔ پاؤں کے نیچے چُر مر چُر مر کی بے صدا آوازیں اور ٹریفک کا شور، باغ کے ایک نسبتاً ویران حصہ میں خالی بنچ پر بیٹھ کر کتابیں اور رجسٹر بے دلی سے ایک طرف پھینکتا ہوں۔ وہ برقعہ کے اگلے دو بٹن کھول کر لمبا سانس لیتی ہے۔
گری ہوئی کتاب میں سے لفظ رینگ رینگ کر باہر نکلتے لگتے ہیں۔
لفظ۔۔۔ جو اس شہر کی الماریوں میں ، کتابوں کے پنجروں میں بند قید تنہائی کی سزا کاٹ رہے ہیں۔
لفظ جب باسی ہو جائیں تو بُو دینے لگتے ہیں۔
تعفن سے لبریز گندی بُو
میں جلدی سے کتاب بند کر دیتا ہوں۔
لفظ اپنے قید خانے میں سمٹ جاتے ہیں۔
وہ کہتی ہے۔۔۔ ’’کوئی بات کرو؟‘‘
’’کیا‘’
’’کچھ بھی‘‘
’’اچھا یہ بتاؤ یہ سڑک کہاں سے آتی ہے؟‘‘
’’معلوم نہیں ‘‘۔
’’یہ سڑک کہاں جاتی ہے؟‘‘
’’معلوم نہیں ‘‘
’’اچھا تو جو تمہیں معلوم ہے وہ بتاؤ‘‘۔
’’مجھے کچھ بھی معلوم نہیں ، میری تو یادداشت ہی کمزور ہے۔ میں ایک لمحہ پہلے کی بات بھی بھول جاتا ہوں۔ مجھے تو اس گزرتے لمحے کی بھی خبر نہیں ‘’۔
پت جھڑ کی سوکھی بانہوں میں جکڑا باغ، پتھر کی ٹھنڈی سِل، اور ایک دوسرے کے قریب بیٹھے ہوئے ہم دونوں ،
میں حاضری کا رجسٹر اٹھاتا ہوں۔
’’یس سر‘‘
’’یس سر‘’
تو دراصل ہم یس سر کی مجسم صورتیں ہیں۔
ہر روز ایک بینڈ ماسٹر ہمیں نئی دھُن پر ناچنا سکھاتا ہے، دھن تو وہی پرانی ہے، صرف ساز ہی نیا ہوتا ہے۔
بینڈ ماسٹر ہمیں پرانی دھن کے نئے انداز پر ٹرینڈ کرتا ہے اور جب خود ہی تھک جاتا ہے تو ساز کسی دوسرے کے حوالے کر کے چلا جاتا ہے۔
نیا بینڈ ماسٹر آتا ہے
’’یس سر‘‘
’’یس سر‘‘
’’کوئی بات کرو نا‘‘۔
میں اس کی کھڑکی کے نیچے کھڑا ہو کر سیٹی بجاتا ہوں ،
وہ نیم پٹ کھول کر سرگوشی کرتی ہے۔۔۔ ’’کوئی دیکھ نہ لے‘‘۔
’’ہاں کوئی دیکھ نہ لے‘’۔
دیکھ لیے جانے کا خوف آسیب بن کر پورے شہر پر منڈلا رہا ہے۔
کوئی دیکھ نہ لے۔
بند کمروں میں بھی دیکھ لیے جانے کا تشنج۔
’’کچھ تو کہو‘‘
دور کہیں سے گانے کی آواز ابھرتی مدھم ہوتی پت جھڑ میں ڈوب جاتی ہے۔
زندگی تو ایک گیت ہے اور ہم اس گیت کے بے وزن مصرعے ہیں۔
’’اچھا تو پھر تم نے کیا سوچا ہے؟‘‘
’’کس بارے ، وہ چونکتی ہے۔
’’میرے ساتھ بھاگ جانے کے بارے میں ‘‘
وہ ہنس پڑتی ہے،
’’اس میں ہنسنے کی کیا بات ہے؟ میں تمہیں اغوا کرنا چاہتا ہوں ‘‘۔
وہ چپ ہو جاتی ہے۔
گہری چپ
کائی کا خاموش سمندر چاروں طرف پھیلا ہوا ہے۔
میں سائلنسر اتری موٹر سائیکل پر پھٹ پھٹ کرتا آتا ہوں۔
آواز سن کر وہ کھڑکی میں طلوع ہوتی ہے۔
’’چلو بھاگ چلیں ‘‘۔
وہ سینے پر دونوں ہاتھ رکھ کر ہائے کہتی ہے اور کھڑکی میں ڈوب جاتی ہے۔
گہرا ہوتا اندھیرا میرے پاؤں میں گدگُدی کرتا ہے۔
’’تو سارا مسئلہ دانتوں کا ہے‘‘۔
وہ سر جھکائے ناخن سے ناخن کریدتی ہے۔
میرے سر پر رکھا ٹوکرا ایک دم وزنی ہو جاتا ہے۔
سب نے وزنی ٹوکرے اٹھا رکھے ہیں۔
کسی کو نہیں معلوم ان میں کیا ہے۔
کچھ بھی نہیں۔
اندر سے تو یہ کب کے خالی ہو چکے ہیں ، ہم تو صرف ان کی بوسیدگی کا بوجھ اٹھائے پھرتے ہیں۔
’’میں نے اس برقعہ کے نیچے جدید فیشن کا لباس پہنا ہوا ہے‘‘۔
’’مجھے معلوم ہے‘‘۔
یہ بات سارے شہر کو معلوم ہے لیکن پھر بھی سارے شہر سے برقعہ اوڑھا ہوا ہے۔
اپنے آپ سے بھی چھپنے کا شوق یا بیماری
میں کتاب اٹھا لیتا ہوں ، چند سطریں پڑھ کر بند کر دیتا ہوں۔
لکھے ہوئے سارے لفظ زنجیریں ہیں۔
اور جو لفظ لکھے نہیں گئے، انھیں لکھنے کی جرأت نہیں۔
ہر شخص نے کپڑوں کے نیچے زرہ بکتر پہنی ہوئی ہے۔
وہ آہستہ سے میرے پھیلے ہوئے ہاتھ کو دباتی ہے اور اٹھ کر روشنی کے ساتھ ساتھ چلنے لگتی ہے۔
باغ کے وسط میں فوارے کے حوض کے پاس رک کر جھک کر ہم پانی میں عکس دیکھتے ہیں۔
ہمارے چہروں پر دھندلاہٹوں کے نیلگوں جزیرے ہیں۔
ہوا اپنی سرمئی انگلیوں سے ہمیں گدگداتی ہے لیکن ہمیں ہنسی نہیں آتی۔ شہر میں ہنسنے پر پابندی ہے۔
ہم ہنسے بغیر پوری سنجیدگی سے اپنے اپنے عکس کی مضحکہ خیزی کا تماشا کرتے رہتے ہیں۔
ہمیں اس مضحکہ خیزی کا احساس بھی ہے۔
لیکن ہنسنے پر پابندی ہے۔
جانے میرے جی میں کیا آتا ہے۔ میں ہاتھ ڈال کر ٹھہرے ہوئے پانی کو ہلا دیتا ہوں۔ میرا اور اس کا عکس پھیل کر بکھر کر پانی ہو جاتا ہے۔
بس اتنی سی بات ہے۔
ہم جو صرف ہلتے عکس ہیں۔
وہ قریب سے گزرتے چنا جور گرم والے سے دو پڑیاں لیتی ہے۔
دانہ دانہ چگتے ہوئے ہم ٹکٹکی باندھے ایک دوسرے کو دیکھتے رہتے ہیں۔
دفعتہً وہ کھلکھلا کر ہنس پڑتی ہے۔
میں بھی ہنس پڑتا ہوں۔
ہنستے ہنستے ہم ایک دوسرے پر گر پڑتے ہیں۔
ہماری آنکھوں میں آنسو تیرنے لگتے ہیں۔
’’تو پھر‘‘
’’تو پھر اب چلیں شازیہ گھبرا رہی ہو گی‘‘۔
ابو۔۔۔ ابو کرتی شازیہ ننھے ننھے ہاتھوں سے میرے بند پپوٹوں پر دستک دیتی ہے۔
’’چلو‘’
تیز تیز قد اٹھاتے بس سٹاپ کی طرف جاتے ہوئے میں مڑ کر پت جھڑ میں لپٹے درختوں پر ایک نظر ڈالتا ہوں ، اور پھر اس کی طرف دیکھتا ہوں۔
میں اس عورت کو۔۔۔ جو میری بیوی ہے اغوا کرنا چاہتا ہوں۔
لیکن۔۔۔ ؟
٭٭٭

ریزہ ریزہ شہادت

جس وقت وہ پہنچا گھوڑا پسلیوں کے بل فٹ پاتھ پر گر چکا تھا اور دو وردیوں والے تتلی پکڑتے باغ میں داخل ہو رہے تھے۔ وہ وہاں پہنچنے والا چوتھا شخص تھا۔ پہلے تینوں گھوڑے کے ارد گرد کھڑے حیرت و تجسس اور دکھ کے ملے جلے جذبوں سے اسے دیکھے جا رہے تھے۔ گھوڑے میں ابھی جان تھی اور وہ اپنی درد بھری آنکھوں سے باری باری تینوں کو دیکھ رہا تھا۔ وہ بار بار ایک پاؤں اٹھانے کی کوشش کرتا پھر تیزی سے نیچے گرا لیتا۔ باغ میں جو دو آدمی تتلی پکڑنے گئے تھے۔ انھوں نے جال نکالا اور اس کے سرے، ڈوریاں ٹھیک کرنے لگے۔
اس نے باری باری تینوں کو دیکھا لیکن و ہ سر جھکائے گھوڑے کی جانکنی کا تماشا کر رہے تھے ’’کیا ہوا؟‘‘ اس نے سوال کیا۔
سامنے والے نے جواب دینے کی بجائے کندھے جھٹکے اور دوسری طرف دیکھنے لگا۔ باقی تین بھی شانے اچکا کر رہ گئے۔ فٹ پاتھ کی دہلیز کے ساتھ رگڑ کا لمبا نشان پھیل کر سڑک تک آ گیا تھا اور گھوڑے کی پسلیوں سے بہتا خون اس میں رنگ بھر رہا تھا۔ گھوڑے نے ٹانگیں ہلا کر اٹھنے کی کوشش کی مگر بے دم ہو کر اسی پہلو زمین پر آ رہا۔
باغ میں گئے دونوں آدمیوں نے پھولوں کے گرد جال پھیلایا اور کونے میں بیٹھ کر تتلی کا انتظار کرنے لگے۔ اس نے جھک کر گھوڑے کی پسلیوں سے نیچے دیکھنے کی کوشش کی۔ زخم تو نظر نہ آیا البتہ رستے خون کی رفتار اس کے پھیلاؤ اور گھیراؤ کو ظاہر کر رہی تھی۔خون کا دھبہ اب سڑک کے درمیان آ گیا تیزی سے آتے سائیکل سوار نے خون دیکھ کر بریکیں لگائیں۔ ’’کیا ہوا‘‘۔ وہ سائیکل سے اترتے ہوئے بولا۔ چاروں چپ رہے۔ گھوڑا جانکنی کے عالم میں تھا۔ اس کی آنکھوں میں موت کی غنودگی پھیل رہی تھی۔
باغ کے کونے میں بیٹھے ایک نے دوسرے سے کہا۔۔۔ ’’تتلی کہاں ہے؟‘‘
’’خاموش رہو‘‘ دوسرے نے سرگوشی کی۔
دو راہ گیر بھی وہاں رک گئے۔
’’کیا ہوا‘‘
کیا ہوا؟
جواباً اچکتے شانے اور گہری خاموش چپ۔ گھوڑے نے پسلیوں کے بل اٹھنے کی کوشش کی۔ اس کی ساری پسلیاں پھڑپھڑائیں۔ ٹانگیں ہلیں ، جسم ذرا سا اوپر اٹھا اور پھر دھپ سے نیچے جا گرا۔ اس کے ذہن کے خیمہ میں خون میں نہایا گھوڑا آن کھڑا ہوا۔ پیاسا میدان اور خون خون خیمے۔
خون، خون۔۔۔ خون،
سرخ، گرم، ابلتا خون،خون کا دائرہ پھیل کر سڑک کے بیچو بیچ آ گیا۔ ایک گزرتی کار چیختی بریکوں کے ساتھ فٹ پاتھ سے آ لگی۔ ’’کیا ہوا‘‘؟ کار والا بڑے نخرے سے نیچے اترا گھوڑے کے قریب آ کر اس نے ترحم سے اسے دیکھا اور بولا۔۔۔ ’’ oh poor soul‘‘
پھر کار کی طرف منہ کر کے بولا۔۔۔ ’’گھوڑا مر رہا ہے‘‘۔
’’ہائی۔۔۔ میں نے آج تک کسی گھوڑے کو مرتے نہیں دیکھا‘‘ کار میں سے نسوانی آواز آئی۔ کار والے نے سامنے کھڑے ایک شخص کو کندھے سے پکڑ کر ایک طرف ہٹایا اور بولا۔۔۔
’’پلیز، ذرا ایک طرف ہو جائیے، بے بی گھوڑے کو دیکھنا چاہتی ہے‘‘۔۔۔
بے بی نے کار میں سے منہ نکال کر گھوڑے کو دیکھا۔ ’’What Exciting Scene‘‘ ''oh poor soul" دوسری عورت نے جو عمر کی آدھی سے زیادہ سیڑھیاں پھلانگ چکی تھی۔ اس کے شانوں سے جھانکا۔۔۔ ’’What a Scene‘‘
گھوڑے نے پتلیاں پھیر پھیر کر ایک ایک کو دیکھا، اس کے نرخرے سے نکلتیں خرخر کی آوازیں قدرے اونچی ہو گئیں۔ ’’تتلی‘‘ باغ میں بیٹھے ہوئے ساتھ والے نے کہا۔
’’ہاں تتلی، دوسرے سے سرگوشی کی۔
تتلی اوپر ہی اوپر منڈلا نے لگی۔
ایک اسکوٹر والا کار سے ذرا پیچھے اسکوٹر روک کر فٹ پاتھ پر آ گیا۔۔۔ ’’کیا ہوا؟‘‘ اس نے کار میں بیٹھی عورتوں کو دیکھ کر ہونٹوں پر زبان پھیری فٹ پاتھ کی سلیں خون پی کر ہونٹ چاٹنے لگیں۔ ان سب کو دو دو چار چار قدم پیچھے ہٹنا پڑا۔ ان کے ہٹنے سے فضا قدرے خالی ہوئی تو گھوڑے نے لمبا گہرا سانس لیا اور موت کی غنودگی کو سمیٹتا ہوا پوری آنکھیں کھول کر ارد گرد دیکھنے لگا۔ اس کی گردن دو تین لمحے تنی رہی، پھر نڈھال اور بے دم ہو کر زمین پر گری اور پسلیاں ٹوٹی ہوئی کمانوں کی طرح پھڑپھڑا کر رہ گئیں۔
تتلی نیچے اور نیچے اترنے لگی۔ دونوں نے معنی خیز نظروں سے ایک دوسرے کو دیکھا۔ دو اور راہ گیر ان میں شامل ہو گئے۔
’’کیا ہوا؟‘‘
’’کیا ہوا؟‘‘
گھوڑے نے ان کی آوازیں سن کر ایک لمحے کے لیے آنکھیں کھولیں ، پھر بند کر لیں اور موت کے گہرے گہرے سانس لینے لگا۔ خون کا دائرہ گداں مارتا سڑک کے دوسرے کنارے کو چھونے کی کوشش کرنے لگا۔ تتلی نے ایک ادھورا چکر کاٹا اور پھول پر آ بیٹھی۔ دونوں کے سانس زبانوں پر آ رکے، ہاتھوں میں پھڑپھڑاہٹ اور ڈوری پر ان کی گرفت مضبوط ہو گئی۔
اس کی آنکھوں کی کربلا میں بھوکے پیاسے خیمے ابھر آئے، پیاسے خیموں سے گھوڑا باہر نکلا اور اپنے سوار کو لے کر خون خون میدان میں قدم قدم آگے بڑھنے لگا۔
کار والے نے ناک سکیڑی۔۔۔ ’’یہ گھوڑے کے خون کی بو بھی عجیب ہے، ’’Not Tolerable‘‘ اور دو قدم پیچھے ہٹ گیا۔
کار میں بیٹھی عورتوں نے پرس کھول کر معطر رومال نکالے، خوشبو کے چھوٹے چھوٹے نقطے خون کی مہک کو گدگدانے لگے، اسکوٹر والے نے کار کی طرف دیکھتے ہوئے پھر ہونٹوں پر زبان پھیری اور وہ دو قدم پیچھے ہو گیا۔
خون کا دائرہ پھیل گیا۔۔۔ انھیں چند قدم اور پیچھے ہٹنا پڑا۔ دونوں نے بیک وقت ڈوری کھینچی۔۔۔ تتلی پھڑپھڑائی، اڑنے کی ایک ناکام کوشش کی۔
گھوڑے نے آنکھیں کھول کر چاروں طرف دیکھا، اٹھنے کی آخری کوشش کی۔ اس بار اس نے دونوں ٹانگیں جوڑ کر اٹھنا چاہا۔ مگر ذرا سا اٹھ کر دھپ سے نیچے جا گرا۔
انھوں نے ہاتھ بڑھا کر تتلی کو پکڑا، احتیاط سے ڈبے میں بند کیا، جال سمیٹا اور چپ چاپ سڑک پر آ گئے۔ اس کے ذہن میں ساحل سمندر سے لگا گھوڑا ابھر آیا جو سموں سے ساحل کی ریت کریدتا آگے اور آگے بڑھنے کے لیے مچل مچل گیا۔ آگے سمندر۔۔۔ گہرا نیلا سمندر۔۔۔
گھوڑا الوداعی ہچکیاں لینے لگا۔ کار والے نے کار کی طرف واپس جاتے ہوئے ترحم سے اس کی طرف دیکھا۔۔۔ ’’oh poor soul ‘‘
’’گھوڑے کے خون کی بو خاصی ناگوار ہے‘‘ اس نے کار اسٹارٹ کرتے ہوئے ساتھ والیوں سے کہا۔۔۔ کار خون کے دائرے کو کاٹتی ہوئی آگے نکل گئی۔ اسکوٹر والے نے کار کی طرف دیکھ کر پھر ہونٹوں پر زبان پھیری۔۔۔ اسکوٹر اسٹارٹ کیا اور کار کے کاٹے ہوئے دائرے میں سے ہوتا ہوا کار کے پیچھے چلا گیا۔۔۔ گھوڑے کی آنکھیں بند ہو گئیں ، پاؤں خاموش، صرف پسلیوں کا ارتعاش دھیمے سروں میں جاری رہا۔ راہ گیر ایک ایک کر کے اپنے اپنے راستوں پر ہو لیے، سڑک پر پھیلا خون جم کر لوتھڑے کا چوغہ اوڑھنے لگا، سامنے والے کھمبے کا بلب بھی تھک کر دھندلا پڑ گیا وہ گھوڑے کے پاس اکیلا رہ گیا۔
پیاسے خیموں سے نکلتا خون میں ڈوبا گھوڑا، سموں سے ریت کریدتا گھوڑا۔۔۔ سب ایک ایک کر کے ذہن کے دھندلکوں میں گم ہونے لگے۔
گھوڑا خاموشی سے چپ چاپ مر رہا تھا، اس کا جسم ساکت اور آنکھیں بند تھیں۔ پسلیوں کا ہلکا سا ارتعاش جاتی زندگی کے آخری سانس گن رہا تھا۔
سڑک دور دور تک سنسان ہو گئی۔ اس نے سگریٹ سلگایا اور پاس پڑے ایک پتھر پر بیٹھتے ہوئے بولا۔۔۔ ’’کم از کم ایک آدمی تو ایسا ہو جو آخری سانس تک اس کے پاس رہے۔۔۔ ‘‘
٭٭٭

٭٭٭خوا ا ب سے اپاہچہ فضا ا سرانڈ

سہ پہر کی خزاں

اس نے لمبا سانس لیا اور کہنے لگا۔ ’’میں زندہ رہنا چاہتا ہوں ‘‘۔
ب کے ہونٹوں پر عجیب پراسرار مسکراہٹ نے آنکھ کھولی۔ ’’زندگی اک ست رنگا کبوتر اس کے سارے رنگ کس نے دیکھے‘‘۔
اس نے چٹکیوں سے چاندنی کو پکڑنے کی کوشش کی، بہتی چاندنی اس کی انگلیوں سے پھسل کر ادھر اُدھر نکل گئی۔
’’ایک خواب۔ محض ایک خواب‘‘
ب نے ہنکارا بھرا۔ ’’خواب مگر اکیلے کا نہیں ‘‘۔
وہ تیزی سے مڑا۔ ’’دوسرا کون؟‘‘
ب مسکرایا۔ ’’وہی جسے دکھانے کے لیے ہم سب کچھ کرتے ہیں ؟‘‘
’’یہ تو ہے‘‘۔ وہ مسکرائی ’’تم باہر کیوں نہیں نکلتے؟‘‘
’’باہر نہیں تو کہاں ہوں ؟‘‘
وہ کھلکھلا کر ہنسی۔۔۔ ’’باہر آنے کے انتظار میں ‘‘۔
’’اور انتظار ایک کڑوا پھل ہے‘‘۔ ب نے اس کے کندھوں پر کھڑے ہوتے ہوئے اعلان کیا اور دیوار کے دوسری طرف کود گیا۔
چاند گہرے گہرے سانس لے رہا تھا اور اندھیرا پاؤں کے نیچے چُرمرا رہا تھا۔
وہ تھوڑی دیر پہلے توڑے گئے پھول کو پتی پتی کرنے لگا۔
وہ پتیوں پر پاؤں رکھتی ہوئی آئی۔۔۔ ’’ہائی‘‘۔
’’ایک گھنٹہ تین منٹ لیٹ‘‘۔
اس نے بے پرواہی سے شانے جھٹکے اور بولی۔ ’’شاپنگ کے لیے نکل گئی تھی‘‘۔
اس کے چہرے پر بہت سے رنگ آنکھ مچولی کھیلنے لگے۔ ’’میں ‘’
’’مجھے معلوم تھا تم انتظار کر رہے ہو گے‘‘۔ وہ ہنسی ’’تم اور کر ہی کیا سکتے ہو؟‘‘
’’تم میری توہین کر رہی ہو‘‘۔
’’میں تو صرف دیر سے آنے کی وجہ بتا رہی ہوں ‘‘۔
’’وجہ۔۔۔ خود کو محفوظ رکھنے کی ایک ڈھال۔۔۔ ہونہہ‘‘
وہ اس کے قریب بیٹھ گئی اور نرمی سے بولی۔ ’’تم لفظوں سے کھیلتے ہو‘‘۔
’’لفظ تو ٹوٹی ہوئی کمانیں ہیں ‘‘۔ ب نے آہستگی سے اس کا کندھا دبایا‘‘۔ اور ہم تو صرف تعمیل کرتے ہیں ‘‘۔
وہ اپنے آپ میں سمٹنے لگتا ہے۔ سمٹتا ہی چلا جاتا ہے۔
اس کے سامنے کھڑی وہ اس کی آنکھوں میں آنکھیں ڈالے دیکھتی رہی۔ پھر لفظوں کو چبا چبا کر بولی بغیر مانگے کبھی کچھ نہیں ملتا‘‘۔
اس کی آنکھوں میں لہر سی اچھلی، لیکن دوسرے لمحے ڈوب گئی۔ ’’میرے پاس مانگنے کے لفظ نہیں ‘‘۔
ب نے اس کے سر پر شفقت سے ہاتھ پھیرا اور بولا۔ ’’کبھی کبھی ایسا بھی ہوتا ہے کہ بغیر مانگے ہی مل جاتا ہے، مگر عموماً ایسا نہیں ہوتا۔ طلب ایک تیز رفتار گاڑی ہے جو دوڑتی ہی رہتی ہے، کبھی نہیں ٹھہرتی‘‘۔
اس نے کندھے جھٹکے۔۔۔ ’’لیکن میں دوسروں کی طرح اس گاڑی کے پیچھے نہیں دوڑ سکتا‘‘۔
ب مسکرایا۔ ’’دوڑ تو تم اب بھی رہے ہو‘‘۔
’’ہم الگ ہوتے ہوئے بھی دوسروں کے اندر ہی ہوتے ہیں ‘‘۔
وہ اچھل کر کھڑا ہو گیا۔ ’’میں کسی کے اندر نہیں ، اپنا چہرہ خود بنانا چاہتا ہوں ‘‘۔
ب ہنسا، دیر تک ہنستا رہا، پھر بولا۔ اپنا چہرہ ہم خود تو بنا سکتے ہیں ، لیکن اسے شناخت دوسرے ہی کرتے ہیں۔ اپنی شناخت کے لیے ہمیں دوسروں کے پاس جانا پڑتا ہے۔
’’نمبر‘‘ بوڑھے اکاؤٹنٹ نے عینکوں کے دھندلے شیشوں میں سے اسے گھورا۔
اکاؤنٹنٹ نے پے رول پر نشان لگایا اور تنخواہ کا ٹوکن اس کی طرف لڑھکا دیا۔ نوٹ گنتے ہوئے اس نے آنکھوں ہی آنکھوں میں لین دین کے پورے صفحے کو جلدی جلدی جمع تفریق کیا اور دس دس کے دو نوٹ نکال کر پتلون کی پچھلی جیب میں رکھ لیے۔
’’تو آج تمہیں تنخواہ ملی ہے‘‘۔ وہ مسکرائی۔
’’ہاں اور میں بڑی مشکل سے بیس روپے بچا سکا ہوں ‘‘۔
’’تم بے وقوفی کی حد تک صاف گو ہو‘‘۔ وہ آہستہ سے بولی۔ ’’اور یہ اچھی بات نہیں ‘‘۔
بیرا چائے لے آیا۔ اس دوران وہ چپ چاپ اسے دیکھتا رہا۔ بیرا چائے اور کباب رکھ کر چلا گیا تو وہ بولا ’’مجھ میں بہت سی اچھی باتیں نہیں ہیں ‘‘۔
’’ہاں ‘‘ اس نے منہ دوسری طرف کر لیا۔ ’’تم ڈیڈی سے نہ ملنا نہیں ایسے لوگ ذرا بھی اچھے نہیں لگتے‘‘۔
کیبن کی چھت میں بڑا سا سوراخ ہو گیا اور تیز جلتا سورج عین اس کے سر پر ناچنے لگا۔
’’اپنی شناخت کراؤ‘‘ ب نے سسکاری لی اور قریب سے گزرتی ایک عورت کو دیکھ کر ہونٹوں پر زبان پھیرنے لگا۔
عورت کچھ دور جا کر بس سٹاپ پر کھڑی ہو گئی اور مڑ مڑ کر ان کی طرف دیکھنے لگی۔
ب نے چٹخارہ بھرا۔ اور بولا۔ ’’اس عورت نے اپنی شناخت دو منٹوں میں کرا دی ہے اور تم دو سال سے مل رہے ہوں مگر ابھی تک یہ بھی نہیں جان سکے کہ وہ تمہیں سمجھتی کیا ہے؟‘‘
’’تم مجھے کیا سمجھتی ہو؟‘‘
’’میں۔۔۔ میں تمہیں۔۔۔ بس اچھا آدمی‘‘۔
’’صرف اچھا آدمی‘‘ اسکے چہرے پر گھنے سیاہ بادل چھا گئے۔
’’نہیں میرا مطلب ہے‘‘۔
’’کیا؟‘‘
’’یہی کہ تم اچھے آدمی ہو مگر۔۔۔ ‘‘
’’مگر کیا؟‘‘
وہ ہنسی‘’ یہ کہ تم ضرورت سے زیادہ اچھے اور۔۔۔ ‘‘
’’اور ایسے لوگ تمہارے ڈیڈی کو پسند نہیں ‘‘۔
’’ہاں ‘‘ اس نے سر ہلایا۔
’’اور تمہیں ‘‘۔
وہ کچھ دیر ناخن سے ناخن کھرچتی رہی پھر آہستہ آہستہ، بہت ہی آہستہ سے بولی۔ ’’میں بھی تو اسی دنیا میں رہتی ہوں ‘‘۔
گھنی سیاہ رات سارے جنگل میں پھیل گئی۔ گہرے گھپ اندھیرے میں وہ سر سے پاؤں تک بھیگ گیا۔
بہت دیر بعد وہ جنگل سے باہر نکلا۔ ’’واقعی تم اسی دنیا میں رہتی ہو‘‘۔
ب چپ چاپ اسے چائے پیتے دیکھتا رہا۔ اس نے پیالی میز پر رکھ دی اور ڈوبی ہوئی آواز میں بولا۔۔۔ ’’اس کے بعد ہم چپ چاپ اٹھے، خاموش سے باہر آئے اور کچھ کہے بغیر اپنے اپنے راستوں پر ہو لیے‘‘۔
ب اب بھی چپ رہا۔
’’میں کیا کروں ؟‘‘
ب کے ہونٹ اس کے چہرے میں دفن ہو گئے۔
’’میں کیا کروں ؟‘‘
گہری الف خاموشی،
اس نے ب کو کندھوں سے پکڑ کر جھنجوڑا۔
ب کچی مٹی کے کھلونے کی طرح بھرکر زمین پر بکھر گیا۔
سنسان ویران سڑک پر دھند چپ چاپ قدم قدم چل رہی ہے۔
سلاخ دار کھڑکی کے پیچھے پتھر ہوتی آنکھوں سے، دور سے کسی کے آنے کی تمنا میں وہ دیر سے یونہی کھڑا ہے۔
ملازم آتا ہے اور کہتا ہے۔۔۔ ’’بیگم صاحبہ کھانے کی میز پر آپ کا انتظار کر رہی ہیں ‘‘۔
’’آ رہا ہوں ‘‘۔ وہ جانے سے پہلے پھر ویران سنسان سڑک کو دیکھتا ہے۔
یہ سڑک کتنی ویران اور اداس ہے۔
اسے خیال آتا ہے کہ دس سال پہلے ہوٹل والے واقعہ کے دوسرے دن جب وہ اس کے ڈیڈی سے ملنے آیا تھا تو یہ سڑک!
وہ سلاخوں میں سے باہر جھانکتا ہے۔
سنسان ویران سڑک پر دھند اکیلی ہی قدم قدم، قدم قدم چل رہی ہے۔
٭٭٭

دھوپ میں سیاہ لکیر

اوپر غیر دوستانہ انداز میں ایک دوسرے کے پیچھے بھاگتے بادل، نیچے شرماتی لجاتی شام، وہ ایک نظر بادلوں پر، دوسری شام پر ڈالتا ہے، کک اور زن سے گلی سے نکل کر سڑک پر آ جاتا ہے، چوک میں اسے دائیں طرف مڑ کر ریستوران میں جاتا ہے، جہاں روز شام کو بیٹھتا ہے۔ دائیں طرف کی بتی سرخ ہے، وہ غیر ارادی طور پر بائیں مڑ جاتا ہے۔
ساری زندگی یوں ہی غیر ارادی طور پر نہ چاہے راستوں پر چلنے کی مجبوری، کئی بار باگ چھڑا کر بھاگنے کی کوشش کرتی ہے، مگر ہاتھ بدل جاتے ہیں ، باگ نہیں چھوٹتی، کئی ہاتھ، مختلف چھوٹے بڑے، سخت نرم ہاتھ۔۔۔ دائیں طرف مڑنے کی تمنا، مگر بائیں چلنے کی مجبوری۔۔۔ بائیں چلنے کی خواہش، مگر دائیں مڑنے کی مجبوری، خواہش تو ہاتھ میں پھسلتی ریت،
اندھیرا اور اوباش لڑکوں کی طرح سیٹیاں بجاتا شرماتی شام کے پیچھے لگا ہوا ہے، شام چھجوں ، سائبانوں اور کونوں میں سمٹ رہی ہے، وہ ان کے درمیان سے گزرتا، مرکزی شاہراہ پر آ گیا ہے۔ دور دھندلاتے پہاڑ اشارے کرتے، نام لے لے پکارتے ہیں۔ وہ ایک لمحہ کے لیے سپیڈ کم کر کے واپس مڑنے کے لیے پیچھے نظر ڈالتا ہے، مگر رکے بغیر آگے نکل جاتا ہے۔
گھوڑا دونوں ٹانگیں اٹھا کر ہنہناتا ہے، باگ توڑ کر نکل جانا چاہتا ہے، مگر؟ زندگی کے راستوں پر کبھی ماں ، کبھی باپ ٹریفک سپاہی کے روپ میں ، سرخ بتی،
’’میں ‘‘۔۔۔ ’’میں ‘‘، لیکن ہمیشہ ’’وہ‘‘۔۔۔ ’’وہ‘‘
تانگے میں جتا گھوڑا۔۔۔ کوچوان ہنستا ہے، سواریاں کھلکھلاتی ہیں ،
غیر ارادی طور پر ایکسی لیٹر پر اس کے ہاتھ کا دباؤ بڑھتا چلا جاتا ہے۔
دروازے میں کھڑی اس کی بیٹی کہتی ہے۔۔۔ ’’ابو، ایک شاپنر، ایک پنسل، ایک ربر۔۔۔ ‘‘
بیٹی کے پیچھے کھڑی بیوی۔۔۔ ’’جلدی آ جانا‘‘
موٹر سائیکل مرکزی شاہراہ پر اڑتی چلی جا رہی ہے، بھورے پہاڑ رات کی گود میں چھپ گئے ہیں ، ٹھنڈی ہوا اس کی گالوں پر چٹکیاں لیتی ہے وہ مڑنے کے لیے سپیڈ کم کرتا ہے، مگر بڑھا دیتا ہے۔
شہر اندھیرے کے تالاب میں ڈوبے کنکر کی طرح لہر کی صورت اس کے ذہن میں پھیلتا سمٹتا ہے۔ سردی اس کے انگ انگ میں انگڑائیاں لیتی ہے۔
’’میں کہاں جا رہا ہوں ؟‘‘
کھوئی آنکھوں کے سامنے پھیلی سڑک، واپس مڑنے کا ارادہ، موٹر سائیکل بھاگتی چلی جاتی ہے۔ اوپر بادل ایک دوسرے کو بوسہ دیتے ہیں۔ بارش کی پھوار اس کے چہرے کو بھگو دیتی ہے۔ آس پاس کا سارا منظر اندھیرے کی بُکل میں۔۔۔
’’میں کہاں جا رہا ہوں ؟‘‘
’’ابو ایک شاپنر، ایک پنسل، ایک ربر‘‘
’’جلدی آ جانا‘‘
دھندلائے چہرے، دھندلائی آوازیں ‘
سڑک کی ویرانی اس کے ساتھ ساتھ سمٹ رہی ہے، شہر دور۔۔۔ بہت دور تالاب میں ڈوبے کنکر کی طرح۔۔۔
موٹر سائیکل جھٹکے لیتا ہے، غیر ارادی طور پر اس کا ہاتھ ریزرو کو آن کر دیتا ہے۔
سامنے گیارہویں میل کا پتھر۔۔۔
گھر ابھی تک اس کی بانہوں کے دائرے میں۔۔۔ مڑنے کی خواہش پھر اس کی آنکھوں میں چمکتی ہے، مگر موٹر سائیکل رکے بغیر پھر رفتار پکڑ لیتا ہے،
بارھواں میل۔۔۔
تیرھواں۔۔۔
چودھواں۔۔۔
بارش کے موٹے موٹے قطرے۔۔۔ سردی ماہر شکاری کی طرح اس پر جال پھینکتی ہے پانی کوٹ، سویٹر اور قمیص سے رستا ہوا اس کے بدن پر ٹھنڈی انگلیاں پھیرتا ہے۔
جھرجھری۔۔۔
پندرھواں میل۔۔۔ سولھواں ، پھر سترھواں ، اٹھارواں ،
سر جھٹک کر، جھرجھری لے کر، خود کو سنبھالنے کوشش
ریزرو کی گنجایش اب ایک دو میل اور۔۔۔
ایک دو میل،
مایوسی کی ننھی چڑیا اس کے کندھے پر پھدکتی ہے اور دیکھتے ہی دیکھتے خوفناک پرندے کی شکل اختیار کر لیتی ہے۔
اب چڑھائی شروع ہو چکی ہے۔ مشین کی طرح اس کا پاؤں گیئر بدلتا ہے۔
گھر دور۔۔۔ ایک موہوم نقطہ کی طرح،
’’ابو، میرے لیے ایک شاپنر،ایک۔۔۔ ایک‘‘
’’جلدی گھر آ جانا۔۔۔ جلدی، جلدی۔۔۔ جلدی‘‘
شفاف صاف آسمان پر نیلی چڑیا اڑ رہی ہے، دفعتاً بلندیوں سے شکرا۔۔۔ چونچ نکالتا ہے، پنجے پھیلا کر جھپٹتا ہے۔۔۔
بارش اس کے بدن پر دریاؤں کی طرح بہہ رہی ہے۔۔۔ سردی ریڑھ کی ہڈی پر لمبی نکیلی چونچ مارتی ہے۔۔۔ مارتی چلی جاتی ہے،
دوسرا گیئر، موٹر سائیکل اب پہاڑ پر جانے والی سڑک پر دوڑے جا رہی ہے۔
شہر کی روشنیاں۔۔۔ دور، جھلملاتی۔۔۔ تیرتی، تیرتی۔
’’میں کہاں جا رہا ہوں ؟‘‘
گھر۔۔۔ سونے کا کمرہ، ہیٹر کے آگے دری پر اس کی بیٹی، بیوی، درمیان میں چلغوزوں کی ٹرے۔۔۔ بیٹی ایک چلغوزہ چھیل کر اس کے منہ میں ڈالتی ہے اور کُلے میں جھول جاتی ہے۔۔۔ ’’ابو جی‘‘
بیوی اس کے کندھے سے ٹیک لگائے چلغوزے چھیل رہی ہے،
ہیٹر کی تمازت۔۔۔ لمس، گرم لمس، وجودوں کا، سانسوں کا۔
بارش تیز ہو گئی ہے۔
سردی ہاتوں میں گینتی لیے اس کے جسم پر اس کی قبر کھود رہی ہے۔
اندھیرا گپ
’’میں کہاں۔۔۔ ؟؟‘‘
بارش کا پانی آنکھوں میں اتر رہا ہے،
منجمد ہاتھ۔۔۔
دفتر میں ہیٹر کے سامنے خوش گپیوں کی سرسراہٹیں ، گرم چائے کا لمس،
موٹر سائیکل کی آواز اور رفتار میں کپکپاہٹ۔۔۔ ریزرو بھی ختم ہو رہا ہے۔
اوپر اندھیرا اور اندھیرے سے برستا منوں پانی۔۔۔
’’ابو جی میرے لیے۔۔۔ ‘‘
’’جلدی۔۔۔ ‘‘
گھوڑا باگ تڑوانے کی کوشش میں دائیں بائیں سر مارتا ہے، سموں سے زمین کریدتا ہے۔۔۔
اس کے وجود کی ڈائری سے لکھے ہوئے، کٹے ہوئے بے شمار ورق پھڑپھڑا کر نکلتے ہیں اور اڑتے اڑے، پرزہ پرزہ ہو جاتے ہیں۔
ایکسی لیٹر پر اس کے ہاتھ کانپ رہے ہیں ،
واپسی، ایک خواہش جس کے پر ٹوٹے ہوئے ہیں ،
موٹر سائیکل جھٹکے لیتا ہے۔۔۔ ریزرو بھی ختم ہو رہا ہے۔
وہ بے بسی سے ادھر اُدھر دیکھتا ہے۔۔۔ سڑک کے دونوں طرف گھنا جنگل،
’’ابو جی۔۔۔ ‘‘
موٹر سائیکل ایک جھٹکے کے ساتھ بند ہو جاتی ہے، اس کے ساتھ ہی ہیڈ لائٹ کی روشنی بھی۔۔۔
گپ اندھیرا،
سردی نکیلی چونچوں سے اس کا سارا جسم ادھیڑ رہی ہے۔ موٹر سائیکل سے اترنے کی کوشش میں لڑکھڑا جاتا ہے۔ موٹر سائیکل لڑھک کر سڑک کے درمیان جا گرتی ہے۔ وہ اٹھتا ہے، سنبھلتا ہے، گر پڑتا ہے۔۔۔ درد کدال ہاتھ میں لیے اس کی قبر کھود رہی ہے۔۔۔ سردی بھوکے گدھ کی طرح اسے نوچ نوچ رہی ہے۔۔۔
اندھیرا تیرتا اندھیرا۔۔۔
شہر، روشنیاں ، گھر۔۔۔ دھندلائی شبیہیں ،
آنسو اور بارش کا پانی،
’’ابو جی۔۔۔ ‘‘
وہ بند ہوتی آنکھوں کو کھولنے کی کوشش کرتا ہے۔
’’ابو میرے لیے۔۔۔ ‘‘
’’جلدی آ۔۔۔ جلدی،۔۔۔ ‘‘
مسکراتے چہرے دھیرے دھیرے پیچھے ہٹ رہے ہیں ،
آنکھوں کو کھلا رکھنے کی ناکام کوشش،
اندھیرا، بارش اور سردی ایک دوسرے کے ہاتھوں میں ہاتھ ڈالے اس کے گرد ناچ رہے ہیں ،
دور نیچے۔۔۔ شہر کے ایک گھر میں ہیٹر کے سامنے چلغوزے چھیلتے ماں بیٹی سے کہتی ہے۔۔۔ ’’اب سو جاؤ میری جان‘‘
بیٹی جواب دیتی ہے۔۔۔ ’’ابو آئیں گے تو سوؤں گی۔۔۔ شاپنر، پنسل اور ربر۔۔۔ لائیں گے میرے لیے‘‘
دور پرے۔۔۔ ویران سڑک پر گرا ہوا موٹر سائیکل، فاصلہ پر بارش میں بھیگتا، سردی کے پنجوں میں پھڑپھڑاتا ایک شخص۔۔۔ بند آنکھوں میں خواب، خوابوں میں آوازیں ،
دھندلے خواب، دور ہوتی آوازیں ،
’’ابو جی۔۔۔ میرے لیے‘‘
’’جلدی آ جانا۔۔۔ آ۔۔۔ آ‘‘
’’ابو جی۔۔۔ ابو۔۔۔ اب‘‘
٭٭٭

بانجھ ریت اور شام

آسمان کا طشت اندھیرے سے لبالب بھرا ہوا ہے۔
اور الف ننگی رات ہاتھوں میں خوف کے چابک لیے گلیوں اور سڑکوں پر ناچ رہی ہے،
خار دار باڑوں اور بے بسی کے جبڑوں میں دبا ہوا شہر،
غراتے کتے تھوتھنیاں اٹھا کر ہوا میں سونگھتے ہیں ،
غراتے ہیں ،
ہوا اور رات الف ننگی ہو کر،
ہاتھوں میں دہشت اور خوف کی چابکیں لیے سڑکوں ، گلیو ں میں دوڑتی ہیں ،
یہ خوف کی رات ہے،
مجسم رات،
صبح سے شام اور شام سے صبح تک رات ہی رات
اس رات، اندھیرے کی پھوار میں بھیگتا وہ چند لمحوں کے لیے ٹھٹھکتا ہے، تاریکی میں چھپے ڈراؤ نے خواب، پیچھے سے دبے پاؤں آتے اور حملہ کرنے والے کی چاپ، ٹھنڈک اس کی گالوں پر نرم نرم انگلیاں پھیرتی ہے، ہوا اس کی پسلیوں میں ٹھوکا دیتی ہے، اسے اپنے اندر کسی چیز کے پھیلنے، سکڑنے کا احساس ہوتا ہے، لڑکھڑاتے منظر آنکھوں کی انگلیوں سے پھسل جاتے ہیں۔
دروازہ کھولتے اس کی بیوی پُر اسرار نظروں سے اس کی طرف دیکھتی ہے،
چپ دریا میں سانس کی لہریں ،
وہ کہتی۔۔۔ ’’میں نے سنا ہے۔۔۔ ‘‘
’’وہاں ‘‘وہ بات کاٹتا ہے ’’کوئی ہے ضرور جو دبے پاؤں آتا ہے اور پیچھے سے اچانک وار کر دیتا ہے‘‘۔
’’تم نے دیکھا اسے‘‘ بیوی اس کی آنکھوں پر دستک دیتی ہے۔
’’میں۔۔۔ میں کیسے دیکھ سکتا ہوں ، تمہیں کیسے خیال آیا؟‘‘
’’ویسے ہی۔۔۔ ویسے ہی‘‘
کچھ دیر بعد پھر وہی سوال۔۔۔ وہی بات۔۔۔
’’سنا ہے وہ دبے پاؤں آتا ہے اور اچانک پیچھے سے وار کر دیتا ہے‘‘۔
’’ہاں ‘‘
’’وہ ایک اور شہر اتنا بڑا، آخر کوئی اسے پکڑتا کیوں نہیں ، کچھ کہتا کیوں نہیں ؟‘‘
’’کون کہے، ہر کوئی دوسرے سے اس کی توقع کرتا ہے‘‘۔
بے معنی گفتگو، پھوکے لفظوں کی چھینٹیں ،
گہری خاموشی سہمے ہوئے لوگوں کے درمیان سرسراتی ہے،
سوال آنکھیں ملتا سر اٹھاتا ہے،
’’ہے کون جو دبے پاؤں پیچھے سے آتا ہے اور اچانک وار کر جاتا ہے‘‘۔
بڑبڑاہٹ۔۔۔
’’تم نے دیکھا اسے‘‘ ساتھ والی میز سے آواز آتی ہے۔
’’میں نے۔۔۔ نہیں تو، تم نے۔۔۔ ‘‘
’’میں نے بھی نہیں ‘‘۔
ٹی ہاؤس کی میز پر لفظ بکھرے ہوئے ہیں ، وہ انھیں جوڑتا ہے، جھکے ہوئے سر اور جھُک جاتے ہیں ،
’’تو کیا یہ مقدر ہے کہ وہ اچانک وار کرے اور ہم۔۔۔ ایک ایک کر کے، ایک ایک کر کے‘‘۔
وہ جانے والوں کے نام گنتا ہے، ہندسے ختم ہو جاتے ہیں ،
اندھیرا آسمان کے طشت میں بوند بوند جمع ہو رہا ہے، یہاں تک کہ آسمان کا طشت لبالب بھر جاتا ہے، تاریکی کی پھوار میں بھیگتا وہ سر سے پاؤں تک اندھیرے میں لتھڑ جاتا ہے،
ڈراؤنے خواب کھلکھلا کر ہنستے ہیں ،
پیچھے آنے والا ناچتے شعلے کی طرح پھڑپھڑاتا، گلی کی نکڑ سے نمودار ہوتا ہے۔ اسے اپنے اندر کسی شے کے پھیلنے، سمٹنے اور پھر پھیلنے کا احساس ہوتا ہے،
لڑکھڑاتے ہوئے بہت سے منظر۔۔۔ بہت سے منظر،
بہت سے منظر،
وہ سر اٹھاتا ہے تو ناچتا شعلہ گزر چکا ہے،
آسمان کے طشت کے کناروں سے چاند منہ نکال کر اسے آنکھ مارتا ہے
بیوی دروازہ کھولتے ہوئے کوئی سوال نہیں کرتی،
بیٹی کو گود میں اٹھاتا ہے تو ٹافیاں نہیں مانگتی،
کھانے میں سے کچے گھی کی ہمک نہیں آتی،
دیواروں سے سیلن کی بو بھی نہیں ،
بستر کی سختی چبھتی نہیں ،
کوئی سوال نہیں۔۔۔ کوئی جواب نہیں ،
صبح دفتر جاتے ہوئے مسکراہٹیں ، ٹاٹا کی چہکار،
دفتر میں میز پر کوئیPendingفائل نہیں ،
مسکراہٹیں ہی مُسکراہٹیں ،
واپسی پر ٹی ہاؤس میں میز صاف ستھری، کوئی بکھرا ہوا لفظ نہیں ،
گھر آتے ہوئے جب وہ گلی کی نکڑ پر پہنچتا ہے تو دائیں ، بائیں پھر مڑ کر دیکھتا ہے اور کھلکھلا کر ہنس پڑتا ہے،
بیوی مسکراہٹ کے چراغ جلائے دروازہ کھولتی ہے،
بیٹی دوڑ کر ٹانگوں سے لپٹ جاتی ہے،
اور سرمئی دھند کے دوسری طرف اس کی بیوی تعزیت کے لیے آنے والوں کو بتا رہی ہے ہ پرسوں رات گھر آتے ہوئے جب وہ گلی کی نکڑ پر پہچا تو اچانک اس پر دل کا دورہ پڑا، اور۔۔۔ اور۔۔۔ اور پھر وہ پھُسک پھُسک کر رونے لگتی ہے!
٭٭٭

طناب ٹوٹا خیمہ

یہ شہر بہت پراسرار ہے یہاں لوگ جاگ رہے ہیں پھر بھی سور ہے، سو رہے ہیں پھر بھی جاگ رہے ہیں۔
سڑک کے بیچو بیچ اس منڈیر پر جو اس چوڑی سڑک کو دائیں بائیں تقسیم کرتی ہے، پنجوں کے بل توازن درست کرتی۔ ایک عورت، ایک مرد، ان کے درمیان ایک گول مٹول بچہ۔۔۔ سڑک پار کرنے کی کوشش میں ایک قدم اٹھاتے ہیں لیکن سنسناتی گاڑیوں کی سیٹیاں انھیں پیچھے دھکیل دیتی ہیں۔
چوک میں ٹریفک کا سگنل سرخ ہوتا ہے۔
دونوں بچے کو بازوؤں سے پکڑ لیتے ہیں اور ڈولی ڈنڈا۔۔۔ ڈولی ڈنڈا کرتے سڑک کی پھیلی بانہوں میں اتر جاتے ہیں۔
بچہ بازوؤں میں جھولتے ہوئے ہنستا ہے۔۔۔ غوں غوں غوں۔
ایک اونچے ٹیلے پر چڑھ کر پھولی سانسوں کو ٹھیک کرتے ہوئے وہ دور تک پھیلے خلا، میں نظر دوڑاتا ہے۔ دائیں ہاتھ ٹیلے کے ساتھ جڑے پانچ چھ کیکر کے درخت ہیں۔ اوپر سے یہ کئی دکھائی دیتے ہیں لیکن نیچے جا کر ایک ہو جاتے ہیں۔ زمین دور دور تک کٹی پھٹی ہے۔ اونچے نیچے ٹکڑے، گندم کی سبز بالیاں جن میں پھیلاہٹ جھلملا رہی ہے۔ بائیں طرف درختوں کا ایک خاموش جھنڈ کھیتوں کے درمیان خاموش سوئی ہوئی پگڈنڈی۔
تینوں سڑک کے دوسری طرف پہنچ گئے ہیں۔ بچے کو فٹ پاتھ پر کھڑا کر کے مرد گزرتی ٹیکسیوں کو ہاتھ دے رہا ہے۔
ایک ٹیکسی ان کے قریب رک جاتی ہے۔
وہ بچے کو بازوؤں میں جھلاتے ٹیکسی کی پچھلی سیٹ پر بیٹھ جاتے ہیں۔
بچہ اُچک اُچک کر کھڑکی سے باہر دیکھنے کی کوشش کرتا ہے۔
ٹیکسی کی رفتار تیز ہوتی ہے پھر کم ہونے لگتی ہے۔
برابر کی گلی میں سے بھینسوں کا ایک قافلہ نکلتا ہے اور سڑک عبور کرنے لگتا ہے۔
مرد ہنستا ہے۔
عورت اس کی طرف دیکھتی ہے تو کہتا ہے۔ ’’اس سڑک پر چھٹی اور بیسویں صدی ساتھ ساتھ چل رہی ہیں ‘‘۔
ٹیکسی بھینسوں کے درمیان سے راستہ بنانے کی کوشش میں ایک اور گاڑی سے رگڑ کھاتی ہے۔
دونوں ڈرائیور نیچے اتر آتے ہیں اور ایک دوسرے کو قصور وار ٹھہرانے کے لیے زور زور سے بولتے ہیں۔
پیچھے دور تک ٹریفک رکی ہوئی ہے۔
بھینسوں والا بڑے مڑے سے۔۔۔ ہو ہو کرتا چلا جا رہا ہے۔
ٹیلے کے چاروں طرف ایک پراسرار خاموشی ہے۔
اکا دُکا درختوں کے ساتھ چلتی پگڈنڈی ڈھلوان کی طرف مڑنے لگتی ہے اس سے آگے گہری کھائی ہے۔ اتنے سالوں میں بھی اس پر پل نہیں بن سکا۔ کھائی کے دوسری طرف جرنیلی سڑک ہے جس پر سارا دن ٹرک، بسیں اور کاریں دوڑتی رہتی ہیں۔ کھائی سے اس طرف خاموش کھیت ہیں ، جہاں رات پستی ہوئی آئی ہے اور پاؤں پسار کر لیٹ جاتی ہے۔ صبح آنکھ کھلتے ہی سورج گھر کے آنگنوں میں جھاتیاں مارنے لگتا ہے۔
کُکو۔۔۔ کُکو کی آواز وقفوں وقفوں سے چاروں طرف گونجتی ہے۔ ایک ہی لے۔۔۔ ایک ہی سُر میں۔
ٹیکسی ایک چھوٹی سڑک پر دوسری گاڑیوں کے ہجوم میں گھری قدم قدم چل رہی ہے بچہ اُچھل اُچھل کر کھڑکی کی طرف لپکتا ہے۔
’’دیکھو، دیکھو شیشے سے سر نہ ٹکرا جائے‘‘۔ مرد عورت کو خبردار کرتا ہے،
اونچے ٹیلے پر بیٹھا وہ سامنے والے کھیت میں کام کرتی ایک عورت اور اس کے بچے کو دیکھ رہا ہے عورت چھولئے کے پکے پودے توڑ رہی ہے اور بچہ انھیں گڈیوں میں باندھ رہا ہے۔
سورج کی کرنوں میں جوانی کا گرم خون دوڑنے لگا ہے، وہ جسموں میں چٹکیاں لینے لگی ہیں۔
پسینے میں ڈوبی ہوئی عورت اور بچہ۔
چھولئے، مسور اور گیہوں کی مسحورکن خوشبو
اور مسلسل۔۔۔ کُکو۔۔۔ کُکو
ٹیکسی آگے پیچھے کے رش میں اب تقریباً رُک گئی ہے۔
بچہ شیشے میں سے جھانکتے ہوئے مسلسل، غوں غوں۔۔۔ غوں غوں کر رہا ہے۔
عورت کہتی ہے۔۔۔ ’’جان دیکھو منا باتیں کرنے کی کوشش کر رہا ہے‘‘۔
بچہ یہ سن کر۔۔۔ ’’ اُکاں۔۔۔ کناں۔۔۔ کاں ‘‘ کرتا ہے۔
’’دیکھا۔۔۔ دیکھا۔۔۔۔۔۔ عورت خوشی سے پھولے نہیں سماتی۔
مرد مسکراتا ہے۔ ایک گہری پر اسرار مسکراہٹ
’’بس بولنے کا چاؤ ہی ہوتا ہے‘‘۔ وہ مسکراتا رہتا ہے۔ ’’ہم بول سکتے ہیں مگر کیا واقعی بول سکتے ہیں ؟‘‘
بچہ اس بات سے بے نیاز، شیشوں میں سے جھانکتے ہوئے۔۔۔ غوں ، غاں ، آکناں۔۔۔ کاں کا‘‘ کرتا رہتا ہے۔
آگے ایک ٹانگے والا بد کے ہوئے گھوڑے کو رام کرنے کی کوشش کر رہا ہے۔
پیچھے مسلسل پُوں پُوں میں پروئی ہوئی لمبی گاڑیوں کی قطار۔
ایک موٹر سائیکل ٹیکسی کے برابر آ کر رکتی ہے موٹر سائیکل پر ایک نوجوان جوڑا بیٹھا ہے لڑکے نے جین کی جیکٹ اور پتلون پہنی ہوتی ہے۔ لڑکی نے پتلون نما پائجامہ،
سٹیئرنگوں کے پیچھے بیٹھے سارے مرد اسے دیکھتے ہونٹوں پر زبان پھیرتے اور مزے سے ہارن بجاتے رہتے ہیں۔
سڑک کے دوسری طرف فٹ پاتھ پر دو عورتیں سفید ٹوپی دار برقعہ پہنے سڑک پار کرنے کی جستجو میں کبھی ادھر کبھی ادھر جاتی ہیں۔ ان کے لمبے خیمہ نما برقعے ان کے لیے مصیبت بنے ہوتے ہیں اور بار بار ان کے پاؤں میں الجھتے ہیں۔
ٹیلہ پر بیٹھا وہ خاموش چپ نظروں سے چاروں طرف دیکھتا ہے، عورت اور بچے نے چھولئے کی گڈیاں سروں پر رکھ لی ہیں اور وہ مزے مزے پگڈنڈی پر چلے جا رہے ہیں۔
گھوڑا تانگے والے کی مسلسل کوششوں کے باوجود تہیں مان رہا۔ سٹیئرنگ کے پیچھے بیٹھے سارے پوں پوں کر رہے ہیں۔ برابر کی سڑک میں ایک بیل گاڑی نکل کر ٹیکسی کے دوسری طرف آن کھڑی ہوتی ہے۔
بچہ شیشوں میں سے جھانکتے۔۔۔ ’’اُکاں۔۔۔ کاں کاں ‘‘ کر رہا ہے۔
بدکا ہوا گھوڑا
اس کے پیچھے گاڑیوں ، بیل گاڑیوں ، موٹر سائیکلوں کی قطاریں رفتہ رفتہ ساکت ہوتی چلی جاتی ہیں۔
ایک پُر اسرار شور
شور ہی شور
دفعتاً ٹیکسی ڈرائیور کو احساس ہوتا ہے کہ پچھلی سیٹ پر گہری خاموشی ہے۔
وہ تیزی سے مڑتا ہے۔
پچھلی سیٹ خالی ہے۔
وہ حیرت سے ادھر اُدھر دیکھتا ہے اور اس کی نظر دکانوں پر لگے سائن بورڈوں پر جا رکتی ہے
عورت چائے کے ایک اشتہار پر چپکی ہوئی ہے۔
مرد سگریٹ کے ایک اشتہار پر کھڑا ہے۔
اور بچہ۔۔۔ دودھ کے ایک اشتہار پر گلاس ہاتھ میں لیے کچھ کہہ رہا ہے۔
یہ شہر بہت پر اسرار ہے یہاں لوگ جاگ رہے ہیں ، پھر بھی سو رہے ہیں ، سو رہے ہیں پھر بھی جاگ رہے ہیں۔
٭٭٭

پیلا شہر سراب

بڑی غیر متوقع اور عجیب رات ہے۔
یوں لگتا ہے جیسے بھری دوپہر میں رات نے گھات لگا کر حملہ کیا ہے اور آناً فاناً سارے شہر کو اندھیرے کی بُکل میں لپیٹ لیا ہے۔
آسمان پر گھنے سیاہ بادلوں نے شب خون مارا ہے۔۔۔ !
بادلوں کے آگے آگے دوڑتے ستارے جان بچانے کی کوشش میں دور گہرائیوں میں ڈوب ڈوب گئے ہیں۔
بڑی سڑک پر دکانیں بند ہو رہی تھیں۔
شٹروں کے گرنے، شوکیس کے کھینچنے کی اکا دکا آوازوں کے درمیان، ہوائی سرسراہٹ کا مسلسل احساس اور ایک عجیب بے یقینی کی کیفیت میں ڈوبا تیز تیز چلتا وہ، تعاقب کرتی آہٹ کا ایک ہی روم۔
وہ شخص اس کے پیچھے پیچھے چلے آ رہے ہیں۔
ہوا میں سرسراہٹ، بوند بوند گرتی ہے یقینی۔
اس کے قدموں میں تیزی آ جاتی ہے۔
تعاقب کرتی آہٹ کا روم وہی،
وہ دونوں اس کی رفتار کا برابر ساتھ دے رہے ہیں۔۔۔ !
’’تعاقب‘‘ خوف پہلو سے بل کھاتا نکل جاتا ہے۔
وہ تیز ہو جاتا اور مڑ مڑ کر پیچھے دیکھتا ہے۔
وہ بھی تیز ہو جاتے ہیں۔
سامنے چوک۔ سمت کا انتخاب۔
پیدل کراسنگ کی بتی سرخ ہے لیکن وہ ٹریفک کی پروا کیے بغیر دوڑ پڑتا ہے اور گاڑیوں سے بچتا بچاتا ہانپتا کانپتا دوسری طرف نکل جاتا ہے۔
پیچھے آتے وہ دونوں سڑک کے درمیان پہنچ چکے ہیں۔
’’تو تعاقب‘‘۔۔۔ وہ دوڑ پڑتا ہے۔۔۔ دوڑتا رہتا ہے۔
دکانیں کب کی بند ہو چکی ہیں ، لوگ گھروں کو جا چکے ہیں اور وہ اس تنہا اکیلی سڑک پر، ہانپتی ہوا کے ساتھ قدم قدم چل رہا ہے۔
وہ میرا پیچھا کیوں کر رہے ہیں ؟
’’کیوں ؟‘‘
فضا میں شعلہ لپکتا ہے، ہوا بجلی کے تاروں کو جھولے کی رسی کی طرح گھما رہی ہے۔
تار سے تار ٹکراتی ہے تو شعلہ لپکتا ہے اور پھر گھور اندھیرا۔۔۔
اگر تار ٹوٹ کر مجھ پر آ گریں ؟
وہ جست لگا کر سڑک کے بیچو بیچ آ جاتا ہے۔
یہ انتہائی تاریک رات ہے۔
یوں لگتا ہے جیسے اندھیرے نے روشنی کی ایک ایک کرن کو چُن چُن کر نگل لیا۔
وہ سڑک کے بیچو بیچ چل رہا ہے۔
اُڑتی مٹی سے آنکھوں کو بچاتے، اسے خیال آتا ہے اگر اچانک کوئی تیز رفتار گاڑی آ جائے تو۔
تو۔۔۔
وہ سمٹ کر دوسری طرف کی فٹ پاتھ پر آ جاتا ہے۔
ہوا تیز ہاتھوں سے سائن بورڈوں کو ڈھول کی طرح بجا رہی ہے۔
اس کے سر پر سائن بورڈوں کی قطار ہے۔
ہوا پھنکارتی ہے، خوف کا کتا اس کے گرد چکر لگاتا، بھوں بھوں کر رہا ہے۔
اکر کوئی سائن بورڈ مجھ پر آن گرے تو۔۔۔
تو۔۔۔
وہ اچھل کر سڑک کے بیچو بیچ آ جا تا ہے۔
یہ بڑی ڈراؤنی سرد رات ہے۔
کھمبوں پر لگے ہوئے بلب تھک کر پیلے پڑ گئے ہیں اور ٹمٹماتے ہوئے آخری ہچکیاں لے رہے ہیں۔
وہ رک جاتا ہے۔ جیب سے سگریٹ کا پیکٹ نکالتا ہے اور سڑک پر تقریباً اوندھا ہو کر سگریٹ سلگانے کی کوشش کرتا ہے۔ مگر ہوا ہاتھوں میں تیر کمان لیے نشانے لگا رہی ہے۔
وہ سڑک کے درمیان بیٹھ جاتا ہے اور گھٹنوں میں سردے کر ماچس جلاتا ہے۔ دفعتاً اسے خیال آتا ہے اگر ایسے میں کوئی گاڑی اس کے اوپر سے گزر گئی تو۔۔۔
تو۔۔۔
وہ اتنی تیزی سے اچھلتا ہے کہ سگریٹ منہ سے نکل کر دور جا گرتی ہے۔
یہ رات ٹوٹ ٹوٹ کر اندھیرے میں ڈوبی ہوتی ہے۔
گہرا گاڑا اندھیرا تارکول کی طرح چیزوں کے منہ پر بہہ رہا ہے۔
ایک طرف کی فٹ پاتھ پر بجلی کی تاریں اور تیز طوفانی ہوا۔
دوسری طرف کی فٹ پاتھ پر سائن بورڈ اور ہانپتی کانپتی پاگل ہوا۔
سڑک کے بیچو بیچ شاں شاں کرتی تیز گاڑیاں۔
’’گھر۔۔۔ ‘‘
کہیں دور تاریکی میں ڈوبا ہوا گھر عکس کی طرح ہلتا جھلملاتا ہے۔
تیز ہوا، ڈراؤنی شکلیں بناتے بادل۔
نہ ختم ہونے والی ہیبت ناک رات اس کے چاروں طرف پھیلی ہوئی ہے۔
چیزیں اندھیرا
آواز اندھیرا
پہچان اندھیرا
رنگ اندھیرا۔۔۔ اندھیرا ہی اندھیرا
وہ سڑک کے بیچو بیچ کھڑا کبھی مڑ کر دیکھتا ہے کہ کوئی پیچھا تو نہیں کر رہا۔ کبھی ایک طرف کی فٹ پاتھ پر نظر ڈالتا ہے جس کے اوپر بجلی کی تاریں ہوا کے زور سے پھڑپھڑا رہی ہیں۔ ان کے ٹکرانے سے بجلی کا شعلہ لحظہ بھر کے لیے اندھیرے میں چمکتا ہے۔ پھر تیز رگڑ اور موت کی سیٹی کا مسلسل شور دوسری طرح کی فٹ پاتھ پر بڑے بڑے سائن بورڈ ہل ہل کر اپنی اپنی میخوں میں ڈھیلے ہو کر جھول رہے ہیں۔
سر پر گہرے گھنے اُمڈتے بادل اور دل ہلانے والی گڑگڑاہٹ۔
سڑک کے بیچو بیچ تیز گاڑیوں کے نیچے آ کر کچلے جانے کا خوف آگے گھورا اندھیرا جس میں ڈوبے ہوئے گھر کا تصور۔۔۔ ایک خواب محض ایک خواب۔
اس خواب کے پیچھے قدم قدم چلتا وہ کبھی رُک جاتا ہے چل پڑتا ہے پھر رُک جاتا ہے۔ آگے پیچھے دائیں بائیں دیکھتا ہے پھر چل پڑتا ہے۔
بادل پورا زور لگا کر چیختے ہیں اور بارش کا ایک بھرپور تھپڑ اس کے منہ پر آ کر لگتا ہے کھمبے کے اوپر زور دار دھماکہ ہوتا ہے۔ شعلہ چمکتا ہے تو سڑک دور دور تک روشن ہو جاتی ہے لیکن دوسرے لمحے بتاشے کی طرح اندھیرے میں بیٹھ جاتی ہے۔ ایک سائن بورڈ چرچراتا ہے اور دھماکے سے نیچے آن گرتا ہے۔
وہ کبھی دائیں کبھی بائیں اور کبھی درمیان ہونے کی کوشش میں سر سے پاؤں تک بھیگ جاتا ہے۔
عمریں بیت جاتی ہیں۔
برف سر اور برف بھنوؤں کے ساتھ گھر کے دروازے پر دستک دیتے ہوئے اسے لگ رہا ہے جیسے ٹھنڈک اس کے بدن پر ننگی ننگی انگلیاں پھیر رہی ہے۔
دروازہ کھُلتا ہے اس کی بیوی لپک کر کہتی ہے۔ ’’ شکر ہے آپ‘‘۔
پھر ذرا گھبرا کر پیچھے ہٹ جاتی ہے۔۔۔ ’’کون ہیں آپ؟‘‘۔
’’میں۔۔۔ میں ‘‘ وہ تتلا کر رہ جاتا ہے۔
اندر سے اس کی بیٹی کی آواز آتی ہے۔۔۔ ’’امی کون ہے؟‘‘
پتہ نہیں کون ہے، اس کی بیوی خوفزدہ سی آواز میں کہتی ہے اور جلدی سے دروازہ بند کر لیتی ہے۔
یہ بڑی غیر متوقع اور عجیب رات ہے۔
یوں لگتا ہے جیسے بھری دوپہر میں رات نے گھات لگا کر حملہ کیا ہے اور آناً فاناً سارے شہر کو اندھیرے کی بکل میں لپیٹ لیا ہے۔
یہ بڑی غیر متوقع اور عجیب۔۔۔ !
٭٭٭

دھند ریت

ٹیکسی شہر جانے والی لمبی سرک پر مڑی تو اسے برسوں پہلے کی وہ رات یاد آ گئی۔ جب وہ ائر پورٹ آیا تھا۔ باہر جانے کے تجسس کے ساتھ ساتھ شہر چھوڑنے کا دکھ بھی اس کے دل میں چٹکیاں لے رہا تھا۔ وہ شہر سے بہت پیار کرتا تھا لیکن اس کی خالی جیبیں اور ضرورتوں کے بھیانک عفریت اسے دھکیل کر ائر پورٹ لے آئے، جہاز میں بیٹھنے تک وہ مڑ مڑ کر دور دھندلکے میں گم شہر کو دیکھتا رہا۔ سیڑھیاں چڑھتے ہوئے اسے محسوس ہوا جیسے شہر کی سیمیں کلائی اس کے ہاتھ سے چھوٹی جا رہی ہے وہ سیڑھیوں کے درمیان رک گیا اور ڈبڈبائی آنکھوں سے مڑ مڑ کر دیکھنے لگا۔ شہر کی سرمئی کلائی اس کے ہاتھوں سے چھوٹ گئی۔ شہر کی کچی، سوندھی خوشبو دور دور ہوتی گئی۔
اس کا دل بیٹھ گیا۔ اس نے آنکھیں بند کر لیں اور امڈتے آنسوؤں کو اندر ہی اندر چوسنے لگا۔ ٹیکسی لمبی سڑک پر بھاگتی چلی جا رہی تھی۔ راستے کی ملی جلی روشنیاں آنکھیں مارتیں اسے گدگدا رہی تھیں۔
وہ برسوں بعد واپس آیا تھا۔
یہ طویل برس اس نے مشقتوں کے پہاڑ چڑھتے گزارے تھے۔ نئے شہر کی رنگ برنگی روشنیوں میں اسے کئی بار اپنا شہر یاد آیا۔ پھر دھیرے دھیرے وہ آس پاس کے شور کا عادی ہوتا گیا۔
ٹیکسی شہر جانے والی لمبی سڑک پر تیزی سے دوڑی جا رہی تھی۔ سڑک کے کنارے بھاگتے کھمبوں کی روشنی دھندلاہٹوں میں تیر رہی تھی۔ ان طویل برسوں میں اپنے شہر سے اس کا رابطہ دوستوں عزیزوں کے خطوں یا اخباروں کے تبصروں اور خبروں تک محدود رہا تھا۔
ٹیکسی کے شیشوں سے سڑک کی ڈھلوانوں پر اگے گھنے درختوں کو دیکھ کر اسے مٹیالی دیواروں والا ہوٹل یاد آگیا۔
کھرچتے اور تھکے قدموں گھر لوٹ جاتے۔
’’وہ مٹیالے نام والا ہوٹل تو وہیں ہے نا‘‘
ڈرائیور نے مڑ کر حیرت سے اس کی طرف دیکھا۔۔۔ ’’کون سا ہوٹل؟‘‘
’’وہ‘‘۔۔۔ وہ چپ ہو گیا۔۔۔ ’’کچھ نہیں ‘‘
ڈرائیور نے مشکوک نظروں سے اس کی طرف دیکھا۔
ٹیکسی پل سے گزر ہی تھی۔
وہ اس ٹوٹے پل سے کئی بار گزرا تھا۔ اس رات بھی جب وہ شہر چھوڑ کر جا رہا تھا۔ ٹیکسی پل کی ناہموار سطح سے اچھل اچھل پڑی تھی۔ وہ ڈر سا گیا تھا کہ کہیں ٹیکسی اچھل کر ندی میں نہ جا گرے۔
وہ سنبھل گیا۔
ٹیکسی خاموشی سے گزر گئی۔
’’تو پل بن گیا ہے‘‘۔
’’کیا‘‘
’’کچھ نہیں۔۔۔ کچھ نہیں ‘‘
ڈرائیور نے شانے جھٹکے اور چپ چاپ ون سکرین میں دیکھنے لگا،
ٹیکسی شہر جانے والی لمبی سڑک پر دوڑے جا رہی تھی۔
’’سڑک اتنی لمبی کیوں ہو گئی ہے؟ ‘‘ اس نے اپنے آپ سے پوچھا، اور مشکوک آنکھوں سے ڈرائیور کی طرف دیکھا۔
’’یہ مجھے کہیں اور تو نہیں لے جا رہا‘‘
راستہ سنسان اور طویل
شہر کتنی دور ہے؟
دھندلاتی روشنیاں گہری تاریکی میں تبدیل ہوتی جا رہی تھیں اور سڑک کے آس پاس کا منظر پہچان کھو رہا تھا۔
ٹیکسی اندھیرے میں رک گئی۔
’’کیا ہوا؟‘‘ اس نے جلدی سے پوچھا۔
’’شہر آگیا ‘‘
’’شہر۔۔۔ کہاں ہے شہر‘‘
ڈرائیور نے مڑ کر اس کی طرف دیکھا۔۔۔ دیکھتا رہا، پھر بولا۔۔۔ ’’یہ شہر نہیں تو اور کیا ہے؟‘‘
اس نے شیشوں سے باہر جھانکا۔
دھند۔۔۔ دھند، دھند
ڈرائیور دروازہ کھول کر باہر آگیا۔
اس نے سوچا اترنے سے انکار کر دے۔ ڈرائیور شاید اس ویرانے میں اسے لوٹنے کا ارادہ کر رہا ہے لیکن پھر سوچا اندر بیٹھنے سے بھی کیا۔
وہ بھی باہر آ گیا۔
’’کہاں ہے شہر؟‘‘
’’یہ اور کہاں ؟‘‘
’’کہاں ‘‘
ڈرائیور ایک دو لمحے اس کی طرف دیکھتا رہا، پھر بولا۔۔۔ ’’تم پاگل تو نہیں ‘‘
’’پاگل۔۔۔ پاگل تو تم ہو‘‘
’’بابا میری جان چھوڑو۔۔۔ چودہ روپے بنے ہیں ‘’
’’لیکن شہر‘‘
’’کون سا شہر۔۔۔ یہ شہر نہیں تو اور کیا ہے؟‘‘
’’ک۔۔۔ کہاں ؟‘‘
’’یہ بازار۔۔۔ دکانیں اور روشنیاں ، یہ کیا ہے؟‘‘
’’کون سا بازار۔۔۔ کہاں ہیں دکانیں ؟‘‘
’’اوہ خدا یا کس پاگل سے واسطہ پڑ گیا ہے؟‘‘ ڈرائیور ماتھے پر ہاتھ مارتے ہوئے بولا۔۔۔ ’’بھائی مجھے چودہ روپے دے دو میری جان چھوڑو‘‘
’’لیکن شہر‘‘
’’شہر، شہر۔۔۔ یہ شہر نہیں تو کیا میرا سر ہے؟‘‘
’’کہاں۔۔۔ ؟‘‘ وہ چیخ اٹھا۔۔۔ ’’مجھے پاگل سمجھ رکھا ہے، کہاں ہے شہر؟‘‘
’’جہنم میں ‘‘ ڈرائیور غصہ سے بولا۔۔۔ ’’میرے چودہ روپے دو‘’
’’میں نہیں دوں گا، پہلے مجھے شہر لے کر چلو‘‘
ڈرائیور دو تین لمحے چپ چاپ اسے دیکھتا رہا، پھر گھوم کر اسی کے سامنے آ گیا۔ اور غور سے اس کی آنکھوں میں دیکھنے لگا۔ پھر اس نے ہاتھ اٹھا کر اس کی آنکھوں کے سامنے لہرایا۔
’’کیا کر رہے ہو؟‘‘ وہ غصہ سے بولا۔
’’دیکھ رہا ہوں تم اندھے تو نہیں ‘‘
’’اندھا میں۔۔۔ اندھے تم ہو‘‘ وہ دو قدم آگے بڑھ آیا۔
ڈرائیور کی نظر میں ابھی تک اس کے چہرے پر جمی ہوئی تھیں۔ اس کے آگے بڑھنے سے وہ ہڑبڑا کر دو قدم پیچھے ہٹا تو اس کی نظریں اس کے پاؤں پر پڑیں۔
وہ چونک پڑا۔
دہ تین لمحے سکوت، پھر وہ بولا۔۔۔ ’’تم زمین پر تو کھڑے ہی نہیں ، تمہیں شہر کیسے دکھائی دے؟‘‘
’’کیا؟‘‘ اس نے بوکھلا کر اپنے پاؤں کی طرف دیکھا۔۔۔ ‘‘ اگر میں زمین پر نہیں کھڑا تو کیا ہوا میں ہوں ؟‘‘
’’اور کیا‘‘
’’کیا بکواس کرتے ہو؟ مجھے شہر لے کر چلو‘‘
ڈرائیور نے آگے بڑھ کر اسے کندھوں سے پکڑ لیا اور زمین کی طرف دباتے ہوئے بولا۔۔۔ ’’ابھی تمہیں شہر نظر آتا ہے‘‘۔
’’یہ کیا کر رہے ہو۔۔۔ نیچے گرا کر میرا بٹوہ نکالنا چاہتے ہو‘‘
اگلے لمحے وہ ڈرائیور سے گتھم گتھا ہو گیا۔

(۲)

جب وہ ایئرپورٹ کے کمپاؤنڈ میں داخل ہوا تو دوسری ٹیکسیاں سواریاں لے کر نکل رہی تھیں ؟ جہاز آئے دیر ہو چکی تھی۔
بے دلی سے سگریٹ سلگا کر، وہ مرجھائی نظروں سے بڑے گیٹ کو دیکھنے لگا۔ بڑا گیٹ سنسانی کی سیٹیاں بجا رہا تھا۔
اس کا جی چاہا، کبھی وہ بھی اس گیٹ سے نکلے، ہاتھوں میں چمڑے کے سوٹ کیس، چیزوں سے، کپڑوں سے، ڈالروں سے بھرے ہوئے سوٹ کیس۔
وہ رعب سے آواز دے۔۔۔ ’’ٹیکسی‘‘
’’ٹیکسی‘‘
’’جی صاحب‘‘
گاڑی شہر جانے والی لمبی سڑک پر رواں ہوئی تو اس نے کن انکھیوں سے سواری کا جائزہ لیا، پشت سے ٹیک لگائے یہ شخص تیزی سے دوڑتے منظروں کو حیرت سے دیکھ رہا تھا،
اس نے سوچا، یہ لوگ ضرورتوں کی منہ زور چڑیلوں سے بھاگ کر شہر چھوڑ جاتے ہیں ، باہر جا کر محنت کی چکیوں میں پستے ہیں اور پھر جب واپس آتے ہیں تو ان کے بٹوے پھولے ہوئے ہوتے ہیں۔
’’بزدل‘‘
’’کیا‘‘
’’کچھ نہیں ‘‘ وہ سنبھل گیا۔
ایک گہری چپ
اس جہاز سے آنے والی سواریاں عموماً منہ مانگا کرایہ دیا کرتی ہیں ، اسی لیے وہ اس وقت ایئر پورٹ آ جاتا ہے اور دن بھر کی چخ چخ ایک ہی پھیرے میں دور ہو جاتی ہے، لیکن آج معاملہ قدرے مشکوک محسوس ہو رہا ہے۔ ڈکی میں چمڑے کے دو سوٹ کیس،
چیزوں سے، کپڑوں سے، ڈالروں سے بھر ے ہوئے سوٹ کیس،
ایک دن وہ بھی ان سوٹ کیسوں کے ساتھ آئے گا۔۔۔ ابھی تو وہ صرف ٹیکسی چلا رہا ہے،
بی۔اے کرنے کے بعد بھی ٹیکسی
دفتروں کی خاک چھان چھان کر، کورا روکھا جواب سن سن کر آخر یہ ٹیکسی
خواب، خواب۔۔۔ خواب
سوٹ کیس۔۔۔ چیزوں سے، کپڑوں سے، ڈالروں سے بھرے ہوئے سوٹ کیس،
آج کام کچھ پھیکا ہے
’’کوئی بات نہیں ‘‘ اس نے اپنے آپ سے کہا۔۔۔ ’’میں جھگڑا نہیں کروں گا‘‘۔
ٹیکسی شہر کی حدود میں داخل ہو گئی۔
اس نے کن انکھیوں سے اس کا جائزہ لیا۔۔۔ ’’یہ شخص ٹھیک نہیں ، پر میں کرائے کا جھگڑا کروں گا ہی نہیں ‘‘
ٹیکسی شہر کے بیچو بیچ آ گئی۔
ایک گہری اداس، نم آلود چُپ،
اس نے فٹ پاتھ کے ساتھ ٹیکسی روک دی۔
پھر بھی ایک اداس، غم ناک، بھیگی بھیگی ٹھنڈی چُپ،
’’شہر آ گیا‘’
’’شہر۔۔۔ کہاں ؟‘‘
’’کیا کہاں ؟‘‘
’’شہر‘‘
’’شہر‘‘۔۔۔ یہ شہر ہی تو ہے‘‘ وہ نیچے اترتے ہوئے بولا،
پیچھے بیٹھا ہوا وہ چند لمحے سوچتا رہا، پھر وہ بھی نیچے اتر آیا۔۔۔ ’’کہاں ہے شہر؟‘‘
’’یہ اور کہا؟‘‘
’’کیا یہ شخص کرایہ نہ دینے کے لیے، یہ سب کچھ کر رہا ہے۔ اس نے جھک کر میٹر دیکھا، چودہ روپے بنے تھے،
یہ بازار، دکانیں ، روشنیاں۔۔۔ اسے کچھ بھی نظر نہیں آ رہا؟
اسے یقین ہو گیا کہ اس شخص سے کرایہ بھی وصول نہیں ہو گا، آخری کوشش کے طور پر اس نے پھر کرائے کا مطالبہ کیا تو اس کی وہی رٹ۔۔۔ ’’مجھے شہر لے کر چلو‘‘
وہ گھوم کر اس کے سامنے آ کھڑا ہوا، اور غور سے اس کا جائزہ لینے لگا۔
یہ کیا۔۔۔ یہ شخص تو زمین پر کھڑا ہی نہیں
تو کیا شہر اسی لیے اسے نظر نہیں آ رہا،
اسے تو آگ ہی لگ گئی۔۔۔ تم زمین پر تو کھڑے ہی نہیں ، تمہیں شہر کس طرح نظر آئے،
’’کیا۔۔۔ کیا‘‘ وہ بوکھلا گیا۔۔۔ ’’مین زمین پر نہیں تو کیا ہوا میں کھڑا ہوں ‘‘۔
’’ہاں۔۔۔ ہوا ہی میں کھڑے ہو‘‘ وہ لفظوں کو چبا چبا کر بولا۔۔۔ ‘‘ بالکل ہوا میں کھڑے ہو،
دوسرے شخص نے ایک لمحہ تک سٹ پٹاہٹ کے بھنور میں غوطہ کھایا، پھر فوراً سنبھل کر غصہ سے بولا۔۔۔ بکواس کرتے ہو، مجھے لوٹنا چاہتے ہو‘‘۔
’’کیا۔۔۔ کیا‘‘
اگلے لمحے دونوں گتھم گتھا ہو گئے۔

(۳)

وہ اندر داخل ہوا تو اس کی بیٹی بھاگتی ہوئی آئی۔۔۔ ’’ابو میری ٹافیاں ‘‘
وہ جیب سے دو ٹافیاں نکال کر اس کے ہاتھ میں رکھ دیتا ہے۔
’’ابو۔۔۔ سچ‘‘
’’بیٹے بس‘‘
اس کی بیٹی دونوں ٹافیاں ایک ساتھ منہ میں ڈال کر ننھے ہاتھ پھیلاتی ہے۔۔۔ ’’ابو۔۔۔ اور‘‘
وہ بے بسی سے بیٹی کے خالی ہاتھوں کو دیکھتا ہے۔۔۔ ’’میں جب باہر جاؤں گانا تو اپنی بیٹی کے لیے ڈھیر ساری ولایتی ٹافیاں لاؤں گا۔۔۔ ہے نا‘‘
پھر جیب سے دن بھر کی ریزگاری نکال کر بیوی کے پھیلے ہوئے ہاتھوں میں رکھتے ہوئے، دھیمے، سست لہجہ میں کہتا ہے۔۔۔ آج ایئر پورٹ سے خالی ہی آنا پڑا ہے‘‘۔
بیوی پیسے گننے لگتی ہے، لیکن وہ اسی طرح کھڑا رہتا ہے‘‘۔
’’کیا بات ہے؟‘‘ بیوی سر اٹھا کر تشویش سے اس کی طرف دیکھتی ہے۔
وہ ہچکچاتا ہے، پھر رکتے رکتے کہتا ہے۔۔۔ میں زمین پر ہی کھڑا ہوں نا‘‘
’’کیا مطلب ‘‘ بیوی حیرت سے کہتی ہے۔
’’کچھ نہیں۔۔۔ کچھ نہیں ‘‘ وہ تیزی سے ساتھ والے کمرے میں چلا جاتا ہے!
٭٭٭

چپ فضا میں تیز خوشبو

ریکارڈنگ ہال کی تیز روشنی میں ساری چیزیں تیرتی ہوئی دکھائی دے رہی ہیں ، اس کا اپنا آپ وجود کی تنگنائے سے نکل کر اوپر اٹھنے کی کوشش کر رہا ہے۔
سامنے والا کیمرہ مین ٹرالی کو آگے پیچھے کر کے زاویے درست کرتا ہے۔ دو نمبر کیمرہ نے اس کے ساتھ والے کو کور کرنا ہے، تین نمبر کیمرے نے لمبے شاٹ لینے ہیں اور ٹائٹل کو کور (Cover) کر کے منظر ایک نمبر کیمرے کو منتقل کر دینا ہے، پروڈیوسر باری باری تینوں کیمروں کے فوکس سے ان کی ترتیب ٹھیک کرنے کے لیے کرسیوں کو آگے پیچھے سرکاتا، میز کو ذرا ٹیڑھا کرتا ہے، پھر کہتا ہے۔۔۔ ’’آپ سمجھ گئے نا، جب ایک نمبر کا کیمرہ مین انگلی سے دائرہ بنائے گا تو پروفیسر صاحب آپ گفتگو شروع کریں گے، بالکل نیچرل طریقہ سے، بغیر کسی تمہید کے، ٹائٹل کے لانگ شاٹ کے فوراً بعد دو نمبر کیمرہ آپ کا کلوز اپ لے گا، لیکن آپ نے براہِ راست کیمرہ کی طرف نہیں دیکھنا۔‘‘ پھر بائیں طرف والی روشنی کو دیکھ کر نفی میں سر ہلاتا ہے۔۔۔ ’’اسے نوّے کے زاویے پر لائیں۔‘‘
نیلی وردی والا روشنی میں لمبی سی چھڑی سے لائٹ کو آگے پیچھے کر کے زاویہ درست کرتا ہے۔
پروڈیوسر ایک نمبر کیمرے سے ان کی ترتیب چیک کرتا ہے اور اس کی طرف منہ کر کے کہتا ہے۔۔۔ ’’پروفیسر صاحب! آپ نے کرسی کے ہتھوں کو اتنی مضبوطی سے کیوں پکڑ رکھا ہے۔‘‘
وہ کیسے بتائے کہ اگر اس نے ہتھیاں چھوڑ دیں تو اس کا سارا جسم کرسی کی گرفت سے نکل کر فضا میں تیرنے لگے گا، لیکن وہ کچھ کہے بغیر گرفت ڈھیلی کر دیتا ہے اور پاؤں پر بوجھ ڈال کر زمین کو پکڑنے کی کوشش کرتا ہے۔
پروڈیوسر اطمینان سے چاروں طرف دیکھتا اور کہتا ہے۔۔۔ ’’میں کنٹرول روم میں جا رہا ہوں ، جب ایک نمبر کیمرہ مین انگلی سے دائرہ بنائے تو پروفیسر صاحب آپ۔۔۔ ‘‘
وہ سر ہلاتا ہے۔
پروڈیوسر کنٹرول روم میں چلا جاتا ہے۔
ایک منٹ۔۔۔ دو منٹ۔۔۔
پھر تین آوازیں ایک ساتھ گونجتی ہیں۔
Silent Silent Silent
ریکارڈنگ ہال میں سے زندگی رینگ رینگ کر باہر نکل جاتی ہے اور موت دبے پاؤں اندر داخل ہو تی ہے۔
گہری گھپ خاموشی
وہ تھوک سے گلا تر کرتا ہے
لمحہ لمحہ گزرتا ہے۔۔۔ ٹک، ٹک، ٹک،
نمبر ایک کا ہاتھ آہستہ آہستہ بلند ہوتا ہے، انگلی اٹھتی ہے، دائرہ بننے لگتا ہے، وہ بولنے کے لیے منہ کھولتا ہے۔
لیکن۔۔۔ لیکن آواز نہیں نکلتی۔
پسینے کی لہر سارے جسم کو اپنے اندر لپیٹ لیتی ہے۔
وہ منہ کھولتا ہے۔۔۔ جملہ یاد کرنے کی کوشش کرتا ہے، کیا عمدہ جملہ سوچا ہوا تھا، مگر ایک لفظ یاد نہیں آتا، منہ سے آواز ہی نہیں نکلتی۔
تیز روشنیاں چاروں طرف سے ٹوٹے پڑ رہی ہیں۔
لمحہ لمحہ گزر رہا ہے۔
بولنے کی کوشش۔۔۔ آواز نہیں۔
گفتگو اس نے شروع کرنی ہے، پھر ساتھ والے سے سوال کر کے اسے شامل کرنا اور پھر تیسرے ساتھی سے سوال۔۔۔ لیکن بات شروع ہو تو تب نا۔
بولنے کی ایک اور کوشش۔۔۔
تھوک سے گلا تر کر کے ٹوٹے پھوٹے جملوں کو جوڑنے کی کوشش
لیکن آواز نہیں
کَن انکھیوں سے ساتھ والوں کو دیکھتا ہے، دونوں اس کی طرف دیکھ رہے ہیں ،
لیکن آواز؟
سارا زور لگا کر ایک بے ربط سا جملہ بولنے کی کوشش،
لیکن ہونٹ سر سرا کر رہ جاتے ہیں۔
پروڈیوسر ابھی دوڑتا ہوا آئے گا۔۔۔ ’’یہ کیا ہو رہا ہے؟‘‘
بس آتا ہی ہو گا۔
چیزیں آتی جاتی رہتی ہیں ، کائنات کا سلسلہ بھی عجیب ہے، چیزیں جنم لیتی ہیں اور پھر کسی بلیک ہول میں گم ہو جاتی ہیں ، ہر روشنی کے پیچھے ایک بلیک ہو ل ہے، ہر سانس بھی ایک بلیک ہول ہے کہ ہر سانس کے پیچھے موت کی دستک ہے، چھوٹی چھوٹی دستکیں اور پھر ایک لمبی اونچی دستک۔ وقت بھی ایک بلیک ہول ہے جو بالآخر ہر شے کو اپنے اندر سمیٹ لیتا ہے۔
وہ بولنے کے لیے منہ کھولتا ہے لیکن آواز
لفظ گم ہو گئے ہیں۔
بیوی کہتی ہے۔۔۔ ’’پروگرام کا چیک اوپن کرا لینا، دس بارہ روپے رہ گئے ہیں اور ابھی تو چار پانچ دن باقی ہیں۔‘‘
بیٹی ماں کے پہلو سے سر نکالتی ہے۔۔۔ ’’ابو! گڑیا۔۔۔ چابی والی۔۔۔ آپ نے وعدہ کیا تھا نا، اب پروگرام ملے گا تو۔۔۔ ‘‘
بیٹا توتلی آواز میں کہتا ہے۔۔۔ ’’ابا۔۔۔ ابا‘‘
وہ آنکھیں جھپکاتا ہے،
ریکارڈنگ روم میں موت کی سی خاموشی ہے،
موت تو ایک خوشبو ہے، جو دھیرے دھیرے ہر چیز پر نشہ طاری کر دیتی ہے اور اس نشہ کے عالم میں ہم چپکے سے ایک دائرے سے نکل کر دوسرے دائرے میں داخل ہو جاتے ہیں اور یہ عجیب بات ہے کہ سارے حصے فوری طور پر نہیں مرتے۔ بعض حصے موت کے کئی دن بعد تک زندہ رہتے ہیں۔ بال اور ناخن قبر میں بھی بڑھتے رہتے ہیں۔ کہتے ہیں ، ذہن کے بعض حصے بھی موت کے کئی کئی دن بعد تک اپنا کام کرتے رہتے ہیں۔ یہ بھی کیا عذاب ہے کہ آدمی مر چکا ہے لیکن اس کے ذہن کے کچھ حصے کام کر رہے ہیں اور وہ خود اپنی آخری رسوم کو دیکھ رہا ہے، اچانک یا حادثاتی موت کی شکل میں تو بہت سے حواس اور کبھی کبھی وجود کا سرمئی ہیولا بھی کئی کئی دن تک موجود رہتا ہے، لیکن پھر ایک چپ۔
گہری چپ۔۔۔
وہ چپ کے پنجوں سے نکلنے کے لیے پھڑپھڑاتا ہے، بولنے کی کوشش کرتا ہے لیکن آواز نہیں نکلتی۔
آغاز کے لیے کیا عمدہ جملہ سوچا ہوا تھا، وہ جملہ کیا تھا؟ تو کوئی اور جملہ۔۔۔ لیکن لفظ تو اس سے دور بھاگ گئے ہیں۔
بولنے کی کوشش۔۔۔ آواز؟
پسینے کے قطرے سارے چہرے پر پھیلتے جار ہے ہیں۔
عینک کے اوپر سے لڑکوں کو دیکھتا ہے۔
کائنات بھی ایک جسم ہے، جیسے ہمارا یہ جسم، جس کے اندر کئی دنیائیں آباد ہیں ، جراثیموں سے بھری ہوئی دنیائیں۔ اور ہمارا ذہن ان سب کو، پورے جسم کو کنٹرول کرتا ہے۔ کائنات بھی ایک جسم ہے اور ہم اس کے اندر چھوٹے چھوٹے جراثیم ہیں ، اس کا بھی ایک ذہن ہے۔۔۔ ایک ماسٹر مائنڈ۔
گھنٹی کی آواز کے ساتھ ہی لڑکے کندھے جھٹک کر اس کی باتوں کو واپس اس کے منہ پر دے مارتے ہیں۔
سٹاف روم میں ایک ساتھی کہتا ہے۔۔۔ ’’یار ذرا حساب کر کے تو بتاؤ، نئے سکیلوں سے کتنا فرق پڑے گا؟‘‘
’’نئے سکیل؟‘‘
’’آ ج کا اخبار نہیں دیکھا، پے کمیشن کی سفارشات۔‘‘
’’لیکن یہ تو صرف سفارشات ہیں ، اصل تو خدا جانے کیا ہو گا؟‘‘
’’تو کیا۔۔۔ دل خوش کرنے میں کیا نقصان ہے؟‘‘
پروڈیوسر کہتا ہے۔۔۔ ’’پروفیسر صاحب بات آپ شروع کریں گے، جونہی ایک نمبر انگلی سے دائرہ بنائے آپ۔۔۔ ‘‘
وہ بولنے کی مسلسل کوشش کر رہا ہے، لیکن آواز نہیں نکلتی۔
معلوم نہیں آواز گم ہو گئی ہے یا لفظ ختم ہو چکے ہیں۔
آواز ایک پرندہ ہے۔
لفظ اس کی چہکار
سوچ ہفت رنگ فضا
نہیں شاید۔۔۔
لفظ ایک پرندہ
آواز چہکار
سوچ۔۔۔
نہیں نہیں۔۔۔ شاید یوں
سوچ ایک پرندہ
لفظ اس کی چہکار
اور آواز۔۔۔ ؟
آوا ز نہیں نکلتی، کوشش کے باوجود آواز نہیں نکلتی۔
بھاری غرارے والی خاموشی ریکارڈنگ ہال میں ٹہل رہی ہے۔
تیز روشنیاں۔۔۔ کیمروں کی آگے پیچھے ہوتی بے آواز ٹرالیاں۔
فضا ایک انتہائی حساس مووی کیمرے کی طرح ہر حرکت، ہر آواز کو ریکارڈ کر رہی ہے۔ فضا میں ازل سے ابد تک کی ہر حرکت، ہر آواز محفوظ ہے اور اپنے آپ کو دہراتی رہتی ہے۔ کیا معلوم اس لمحہ کائنات کے کسی حصے میں اس کی تصویر بھی ری کاسٹ ہو رہی ہو اور یہ بھی کیا معلوم کہ اس لمحہ جو کچھ ہو رہا ہے، اس پر بیت رہا ہے وہ ری کاسٹ ہو اور اصل منظر کہیں اور ہو۔۔۔ ہزاروں نوری سالوں کے فاصلہ پر کسی جگہ، وہ اس لمحہ یا اس سے ہزاروں سال پہلے موجود ہو اور یوں ہی بولنے کی کوشش میں بار بار منہ کھول رہا ہو اور آواز نہ نکلتی ہو، لفظ بے وفا ہو گئے ہوں۔
وقت کے ساتھ ساتھ تو سب کچھ بے وفا ہو جا تا ہے، عمر بھی، دن بھی، یادیں بھی۔ بس سب کچھ پاس سے گزر جاتا ہے۔۔۔ اور آدمی ہاتھ بڑھا بڑھا کر ہی رہ جاتا ہے۔۔۔ لیکن پروگرام کے بعد اسے چیک ضرور اوپن کرانا ہے، کسی کے سامنے نہیں ، بس کسی بہانے سے کچھ دیر کے لیے رک جانا ہے اور جب دوسرے دونوں چلے جائیں تو۔۔۔
لیکن پروگرام ریکارڈ ہو تو تب نا۔۔۔ پروڈیوسر تو ابھی کنٹرول روم سے چیخنے ہی والا ہے۔۔۔ ’’یہ کیا ہو رہا ہے، آپ بولتے کیوں نہیں ؟‘‘
وہ پھر بولنے کے لیے کچھ کہنے کے لیے منہ کھولتا ہے،
پہلی میں ابھی چار دن باقی ہیں بلکہ پانچ دن، تنخواہ تو دو ہی کو ملے گی نا،
اور چیک اوپن۔۔۔
لیکن بولنے کی ہر کوشش بے کار۔
آواز ساتھ چھوڑ گئی ہے۔۔۔ بے وفا ہو گئی ہے۔
کیا کہے؟۔۔۔ کیسے کہے؟
کتنے عمدہ عمدہ جملے سوچ کے آیا تھا۔
ابھی گفتگو شروع کرنا ہے اور اختتام بھی۔۔۔
پروڈیوسر نے کہا تھا۔۔۔ ’’جب آخری دو منٹ رہ جائیں گے تو نمبر ایک دو بارہ انگلی سے دائرہ بنائے گا، بس آپ بات نیچرل طریقہ سے اُچک لیں اور پانچ چھ اختتامی جملے کہہ کر ختم کر دیں۔‘‘
لیکن ابھی تو ابتدائی جملے بھی نہیں کہے گئے، اختتام کب اور کیسے ہو گا؟
وہ پھر بات کرنے کی کوشش کرتا ہے۔
مسلسل بولنے کی کوشش میں ہونٹ پھڑپھڑانے لگے ہیں۔ ایک آخری کوشش کے طور پر وجود کا سارا زور لگا کر، ساری توانائیاں اکٹھی کر کے بولنے کے لیے منہ کھولتا ہے۔۔۔ لیکن آواز نہیں نکلتی، ہونٹوں کی سرسراہٹ کے ساتھ ساتھ اس کا وجود سکڑنے لگتا ہے۔ ریکارڈنگ ہال چھوٹے سے بلیک ہول کی طرح اسے اپنے اندر گم کر رہا ہے۔۔۔ اسے تیزی سے اپنے اندر سمیٹ رہا ہے۔ وہ ہاتھ پیر مارتا ہے، خود کو اس کی کشش سے بچانے کی کوشش کرتا ہے لیکن بے سود، بلیک ہول اسے تیزی سے اپنی طر ف کھینچے چلا جاتا ہے، ایک گھنی تاریکی تیزی سے اس کے قریب آتی جاتی ہے۔ تیز روشنیاں پلک جھپکنے میں بجھ جاتی ہیں اور ریکارڈنگ ہال مختلف آوازوں سے گونجنے لگتا ہے۔ پروڈیوسر بھاگتا ہوا اندر آتا ہے اور کہتا ہے۔
’’واہ وا۔۔۔ کمال ہو گیا، بہت اچھی ریکارڈنگ ہوئی ہے، یہ پروگرام تو ہٹ جائے گا۔‘‘
اور وہ بِٹر بِٹر اس کا منہ دیکھے جاتا ہے!
٭٭٭

سہ پہر کا مکالمہ

صبح سب سے پہلے بیوی نے دیکھا کہ وہ بستر پر نہیں ہے۔
کچھ دیر انتظار کرنے کے بعد کہ باتھ روم میں نہ ہو، اس نے سارے کمرے دیکھ ڈالے۔ باہر والا دروازہ اندر سے بند تھا۔ دوبارہ ایک ایک کمرہ دیکھا، پھر بڑے بیٹے کو جگایا۔
’’کیا بات ہے؟‘‘بڑا بیٹا ہڑ بڑا کر اٹھا۔
’’تمہارے ابو!‘‘ آواز رندھ گئی۔
’’کیا ہوا۔۔۔ کیا ہوا؟‘‘ بیٹا اچھل کر کھڑا ہو گیا۔
’’تمہارے ابو۔۔۔ گھر میں نہیں ہیں۔‘‘
بڑے بیٹے نے بے یقینی اور جھنجھلاہٹ سے اس کی طرف دیکھا، ’’کیا مطلب؟‘‘
’’میں نے ایک ایک کمرہ دیکھ لیا۔ وہ کہیں نہیں۔‘‘
گفتگو سن کر بیٹی بھی اٹھ گئی، ’’تو پھر کہاں ہیں ؟‘‘
’’باہر والا دروازہ بھی اندر سے بند ہے۔‘‘ اب آنسو رکے نہیں رکتے۔
چند لمحے عجیب پُر اسرار سکوت۔۔۔
پھر وہ سب اپنے اپنے بستروں سے نکل کر اسے تلاش کرتے ہیں۔ باتھ روم میں ، سونے کے کمروں میں ، ڈرائنگ روم میں ، باورچی خانے میں ، اسٹور میں۔
بڑا بیٹا کہتا ہے، ’’کہیں صبح سویرے باہر نہ نکل گئے ہوں۔‘‘
ماں جھنجلا کر کہتی ہے، ’’لیکن دروازہ اندر سے بند ہے۔‘‘
چھوٹا بیٹا چند لمحے سوچتا رہتا ہے، ’’کیا معلوم رات ہی کو گھر نہ آئے ہوں ؟‘‘
بیٹی نفی میں سر ہلاتی ہے، ’’میں نے خود دروازہ کھولا تھا، جب انہوں نے گھنٹی بجائی تھی۔‘‘
چھوٹا بیٹا اسے گھورتا ہے، ’’تم تو ہر وقت اپنے ہی خیالوں میں رہتی ہو، کیا پتا وہ باہر ہی رہ گئے ہوں اور تم نے دروازہ بند کر لیا ہو۔ یا وہ گھنٹی ہی بجاتے رہے ہوں اور تم نے دروازہ کھولا ہی نہ ہو۔‘‘
بیٹی غصے سے اسے دیکھتی ہے، ’’تم تو ہر وقت میرے ہی پیچھے رہتے ہو۔‘‘
ماں بستر پر ہاتھ پھیرتی ہے، ’’رات کو وہ یہاں سوئے تھے۔‘‘
بڑا بیٹا مشکوک نظروں سے ماں کی طرف دیکھتا ہے، ’’کیا معلوم؟‘‘
چھوٹا بیٹا کہتا ہے، ’’مجھے ساری رات باہر کھڑ کھڑ سنائی دیتی رہی ہے۔ میرا خیال ہے وہی ہوں گے۔ وہ ضرور رات کو باہر ہی رہ گئے ہیں ؟‘‘
’’کیا معلوم وہ گھر ہی میں کہیں ہوں ؟‘‘ ماں بڑبڑاتی ہے۔
وہ پھر اسے تلاش کرنے گھر کے کونے کونے میں پھیل جاتے ہیں۔
ایک ایک کمرہ دیکھتے ہیں۔
’’رات کو انہیں کھانا کس نے دیا تھا؟‘‘ بڑا بیٹا ماں اور بہن کی طرف دیکھ کر سوال کرتا ہے۔ ماں کو یاد آتا ہے اس نے انہیں کھانا دیا تھا۔ پھر یاد آتا ہے شاید اس نے نہیں دیا تھا۔ بیٹی کو یاد آتا ہے شاید اس نے یا شاید اس نے نہیں۔
دونوں ایک دوسرے کی طرف دیکھ کر چپ رہتی ہیں۔
’’سوال ہے، اب انہیں کہاں تلاش کیا جائے؟‘‘ بڑا بیٹا بڑبڑاتا ہے۔
’’کیوں نہ ان کے سارے دوستوں کے گھر فون کیا جائے، شاید دیر ہونے کی وجہ سے کہیں رک گئے ہوں۔‘‘ چھوٹا بیٹا رائے دیتا ہے۔
بیٹی جھنجلا کر کہتی ہے، ’’میں نے خود دروازہ کھولا تھا، وہ رات کو گھر آئے تھے، کیوں امی؟‘‘
ماں کو کچھ یاد نہیں آتا۔ کبھی خیال آتا ہے وہ آئے تھے، اس نے ان کے لیے کھانا گرم کیا تھا۔۔۔ کھانا کھاتے ہوئے وہ باتیں کرتے رہے تھے، پھر کتاب۔۔۔ کبھی خیال آتا ہے وہ آئے ہی نہیں ، وہ ساری رات انتظار اوڑھ کر ان کی راہ تکتی رہی ہے۔
’’کیوں امی؟‘‘
’’لیکن فون کرنے میں کیا حرج ہے؟‘‘
’’دروازہ اندر سے بند ہے۔‘‘ بڑا بیٹا بڑبڑاتا ہے، ’’اس کا مطلب ہے وہ آئے ہی نہیں اور اگر آئے ہیں تو پھر کہیں گئے نہیں۔‘‘
تو پھر کہاں ہیں ؟
وہ پھر اسے تلاش کرنے کے لیے گھر کے کونے کونے میں پھیل جاتے ہیں۔
ایک ایک کمرہ، ایک ایک کونا، ایک ایک الماری۔
’’میرا خیال ہے وہ رات کو آئے ہی نہیں۔‘‘ بڑا بیٹا صوفے میں گرتے ہوئے مایوسی سے کہتا ہے، ’’امی آپ بتائیں نا۔‘‘
ماں کو کچھ یاد نہیں آتا۔ کبھی خیال آتا ہے اس نے کھانا گرم۔۔۔ کبھی نہیں ، ساری رات انتظار۔۔۔
’’مجھے کچھ پتا نہیں ، کچھ معلوم نہیں۔‘‘ وہ روہانسی ہو جاتی ہے۔
بیٹی آگے بڑھ کر اسے سنبھالتی ہے۔ چھوٹا بیٹا فون کی طرف بڑھ جاتا ہے۔
بڑا بیٹا کہتا ہے، ’’میں ذرا باہر تو دیکھ لوں ، کہیں وہ ابھی تک دروازے پر ہی نہ کھڑے ہوں۔‘‘
وہ باہر جاتا ہے۔ پھر اندر آ کر مایوسی سے سر ہلاتا ہے۔
ماں اب رونے لگتی ہے، ’’وہ کبھی رات کو باہر نہیں رہے۔ یہ پہلی رات ہے۔‘‘
خالی بستر پر شکنیں ہیں بھی اور نہیں بھی۔
وہ رات کو سوئے تھے یا شاید نہیں۔
تھوڑی دیر بعد چھوٹا بیٹا منہ لٹکائے آتا ہے، ’’وہ کسی دوست کے یہاں بھی نہیں۔‘‘
’’تو پھر کہاں گئے؟‘‘ اب بیٹی کی آنکھوں میں بھی آنسو جھلملانے لگے ہیں ، ’’کہیں میں نے واقعی انہیں باہر چھوڑ کر دروازہ بند نہ کر لیا ہو؟‘‘ کبھی یاد آتا ہے، وہ آئے تھے۔ گھنٹی کی آواز سن کر اس نے دروازہ کھولا تھا، انہوں نے اسے پیار کیا تھا، پھر اس کے پاس سے گزر کر اپنے کمرے کی طرف چلے گئے تھے، وہ دروازہ بند کر کے اپنے کمرے میں آ گئی تھی۔ کبھی یاد آتا ہے گھنٹی کی آواز سن کر اس نے دروازہ ہی نہیں کھولا تھا۔ گھنٹی بار بار بجتی رہی تھی مگر اس نے۔۔۔
’’نہیں نہیں ، وہ اندر آئے تھے۔۔۔ وہ اندر آئے تھے۔‘‘ وہ ہذیانی انداز میں چیختی ہے، ’’وہ نہیں آئے تھے۔۔۔ نہیں۔۔۔ نہیں۔‘‘
ماں اور بڑا بیٹا اسے شانوں سے پکڑ کر صوفے میں دھکیل دیتے ہیں۔
چھوٹا بیٹا بڑبڑاتا ہے، ’’وہ آئے ہی نہیں۔ اس نے دروازہ ہی نہیں کھولا ہو گا۔‘‘
بڑا بیٹا اسے ڈانٹتا ہے، ’’چپ رہو۔‘‘
خود وہ رات گئے تک ناول پڑھتا رہا تھا۔ کبھی یاد آتا ہے کہ گھنٹی کی آواز آئی تھی اور کسی نے دروازہ کھولا تھا اور کوئی اندر آیا تھا۔ کبھی یاد آتا ہے کہ گھنٹی بجی ہی نہیں۔
چھوٹا بیٹا اصرار کئے جاتا ہے، ’’رات کو کوئی ضرور باہر تھا۔ ساری رات کھڑ کھڑ ہوتی رہی ہے۔‘‘
اسے کبھی یاد آتا ہے کہ ساری رات کوئی دیواروں ، کھڑکیوں اور دروازوں پر دستکیں دیتا رہا ہے۔ کبھی یاد آتا ہے کہ وہ ساری رات مزے سے سویا رہا، ذرا بھی آواز نہیں آئی۔
’’تو وہ گھر کے اندر بھی نہیں ہیں اور باہر بھی نہیں۔‘‘ ماں افسوس سے سر ہلاتی ہے۔
دنوں ، سالوں اور مہینوں کے بعد کئی بند تھان خود بخود کھلتے چلے جاتے ہیں۔ رنگ برنگی کھٹی میٹھی تصویریں۔۔۔ ذائقے، کڑواہٹیں ، مٹھاسیں ، دکھ سکھ کے کئی لمبے سال سمٹ کر سوئی کے ناکے میں سما جاتے ہیں۔
’’تو وہ نہیں ہیں۔‘‘ وہ چیخ مار کر بیٹی سے لپٹ جاتی ہے۔
دروازہ اندر سے بند ہے، یا شاید نہیں ہے۔
کسی نے دروازہ کھولا، شاید نہیں کھولا۔
وہ ساری رات باہر ہی کھڑے رہے، یا اندر آ گئے۔
شاید۔۔۔ یا شاید نہیں۔
وہ سارے ڈرائنگ روم میں صوفوں میں دھنسے اپنے اپنے جہنم کو سمیٹ رہے ہیں۔ کوئی کچھ نہیں بولتا، بس کبھی کبھی سر اٹھا کر ایک دوسرے کو دیکھ لیتے ہیں اور دوسرے ہی لمحے مجرموں کی طرح سر جھکا کر اپنے اپنے طوقوں میں دبک جاتے ہیں۔
ایک عجب پر اسرار خاموشی۔
اور ان سب سے الگ وہ۔۔۔ جسے یہ سارے تلاش کر رہے ہیں ، لکھنے کی میز پر بیٹھا سر جھکائے کتاب پڑھے جا رہا ہے۔ کبھی کبھی سر اٹھا کر ان کی بوکھلاہٹیں ، اداس چہرے اور مایوس باتیں سنتا ہے اور پھر سر جھکا کر پڑھنے لگتا ہے۔
یہ کہانیاں بھی کم بخت عجیب ہوتی ہیں۔ کبھی شروع ہونے سے پہلے ہی ختم ہو جاتی ہیں اور کبھی شروع ہو کر ختم ہونے کا نام ہی نہیں لیتیں۔
٭٭٭

بانجھ لمحے میں مہکتی لذت

سالگرہ کا کیک کاٹتے ہوئے دفعتاً اسے یاد آیا کہ پچھلی رات ٹیکسی سے اترتے ہوئے وہ خود کو پچھلی سیٹ پر بھول آیا ہے۔
اس کی بیوی اور تینوں بچے ہیپی برتھ ڈے ٹو یو کرتے تالیاں بجا رہے تھے اور وہ چھری ہاتھ میں پکڑے بوکھلائی نظروں سے انہیں دیکھے جا رہا تھا۔ تالیاں بجاتے بجاتے اس کی بیوی کو دفعتاً اس کی بوکھلاہٹ کا احساس ہوا تو اس نے پوچھا۔۔۔ ’’کیا بات ہے؟ تم ٹھیک تو ہونا؟‘‘
وہ منہ کھولے بِٹ بِٹ دیکھتا رہا۔
’’کیا بات ہے۔۔۔ کیا بات ہے؟‘‘ اب بچے بھی متوجہ ہو گئے۔
اس نے بغیر کیک کاٹے چھری میز پر رکھ دی اور کرسی پر بیٹھ گیا۔
’’کیا بات ہے؟ کیا ہوا؟‘‘ بیوی اس کے شانے پر ہاتھ رکھتے ہوئے بولی، ’’خیریت تو ہے نا، تم ٹھیک ہونا؟‘‘
وہ ایک لمحہ خالی نظروں سے اسے دیکھتا رہا، پھر بولا۔۔۔ ’’کل رات میں خود کو ٹیکسی میں بھول آیا ہوں۔‘‘
بیوی نے لمحہ بھر کے لیے حیرت سے دیکھا، لیکن اگلے ہی لمحہ جھنجلاہٹ اس کے سارے چہرے پر رینگنے لگی۔۔۔ ’’کیا؟‘‘
’’ہاں۔۔۔ ‘‘ وہ رک رک کر کہنے لگا، ’’ٹیکسی جب گلی کی نکڑ پر رُکی تو بے خیالی میں مَیں خود کو پچھلی سیٹ پر ہی بھول گیا۔‘‘
بیوی نے سر پر ہاتھ مارا اور بولی۔۔۔ ’’میرے خدایا، اگر تم خود کو بھول آئے ہو تو یہ کون ہے؟‘‘ اس نے اس کے بازوؤں کو دبایا۔۔۔ ’’یہ کون ہے؟‘‘
’’ارے واقعی یہ کون ہے؟‘‘ اس نے اپنے آپ کو اور پھر بچوں کو دیکھا جو حیرت سے منہ کھولے ان کی باتیں سن رہے تھے۔
’’واقعی یہ کون ہے؟‘‘
لمحہ بھر خاموشی رہی پھر بولا۔۔۔ ’’ہو سکتا ہے یہ وہی ٹیکسی ڈرائیور ہو جس کی ٹیکسی میں مَیں گھر آ رہا تھا، یا پھر کوئی اور ہو۔۔۔ کوئی بھی۔‘‘
’’تمہارا تو دماغ چل گیا ہے۔‘‘ بیوی غصہ سے بولی۔۔۔ ’’اٹھو کیک کاٹو، بچوں کو بھی پریشان کر دیا ہے۔‘‘
’’نہیں ، یہ میں نہیں ہوں۔‘‘ وہ آہستہ سے بڑبڑایا۔
’’تو پھر یہ کون ہے؟‘‘ اس نے اپنے آپ سے پوچھا۔۔۔ ’’اس کے وجود میں یہ کون ہے؟‘‘
کوئی اجنبی۔۔۔ لیکن کون ؟
’’اٹھو کیک کاٹو۔‘‘ بیوی نے ہاتھ پکڑ کر اسے اٹھایا۔۔۔ ’’دیکھو بچے پریشان ہو رہے ہیں۔‘‘
اس نے ویران نظروں سے بچوں کو دیکھا جو منہ کھولے اسے دیکھے جا رہے تھے، ’’تو ان کو بھی معلوم نہیں کہ یہ میں نہیں ہوں۔ عجیب بات ہے، یہ میری خوشبو بھی نہیں پہچانتے، بالکل اپنی ماں کی طرح ہیں اور یہ عورت یہ جان کر بھی کہ یہ میں نہیں ہوں کیک کاٹنے کی ضد کئے جا رہی ہے۔‘‘
وہ بے دلی سے اٹھا اور کیک کاٹنے لگا۔
بچوں اور بیوی نے ہیپی برتھ ڈے ٹو یو کا کورس شروع کیا لیکن اب ان کی آواز میں پہلے کی سی کھنک نہیں تھی۔
کیک کاٹتے ہوئے وہ مسلسل سوچتا رہا کہ وہ کہاں اپنے آپ کو بھولا تھا۔
ٹیکسی مورس تھی اور ڈرائیور چھوٹے قد کا، جس نے کالی جیکٹ پہنی ہوئی تھی۔ وہ پچھلی نشست پر بیٹھا تھا۔ اس کے اترنے کے بعد شاید ڈرائیور کی نظر پچھلی نشست پر پڑی ہو اور اسے معلوم ہو گیا ہو کہ وہ وہیں رہ گیا ہے۔ یا کیا معلوم ڈرائیور نے مڑ کر دیکھا ہی نہ ہو اور اسی طرح ٹیکسی بند کر دی ہو۔۔۔ یا۔۔۔ ؟
ساری رات اسی بے چینی میں گزری، بار بار خیال آتا کہ کیا معلوم ڈرائیور نے مڑ کر دیکھا ہی نہ ہو اور وہ اسی طرح پچھلی نشست پر ہی پڑا ہو، پھر خیال آتا کہ شاید ڈرائیور نے مڑ کر دیکھ لیا ہو، لیکن کس لیے؟ یہ بھی ہو سکتا ہے ڈرائیور نے غیر اہم سمجھ کر کہیں پھینک دیا ہو اور وہ ابھی تک کسی ویران سڑک کے کنارے پڑا ہو۔ سردی اور ویرانی اس کے بدن پر رینگنے لگیں۔ اس نے کروٹ بدل کر گہری نیند سوتی بیوی کو دیکھا۔۔۔ ’’یہ عورت کتنی عجیب ہے، یہ جان کر بھی کہ یہ وہ نہیں ہے، کتنے اطمینان سے سوئی ہوئی ہے۔۔۔ کتنے ہی برس بیت گئے لیکن اس عورت میں کوئی تبدیلی نہیں آئی، اسی طرح بالکل اسی طرح، اس کے خوابوں اور خیالوں سے بالکل مختلف۔‘‘
صبح ناشتہ کی میز پر بھی وہ چپ چپ تھا، بچے ایک دوسرے سے سلائس چھین رہے تھے، بیوی نے چائے بنا کر پیالی آگے کی اور بولی۔۔۔ ’’کس سوچ میں ہو؟‘‘
وہ ایک لمحہ چپ رہا پھر بولا۔۔۔ ’’معلوم نہیں اب وہ ٹیکسی ملتی بھی ہے کہ نہیں۔ تھی وہ مورس اور ڈرائیور۔۔۔ ‘‘
بیوی نے غصے سے گھورا۔۔۔ ’’تو تم ابھی تک اسی پاگل پن میں ہو۔۔۔ یہ تمہیں کیا ہوتا جا رہا ہے۔۔۔ کچھ عرصہ سے عجیب عجیب باتیں کر نے لگے ہو۔‘‘
ناشتہ کر کے اس نے بچوں کو سکول چھوڑا اور اسی جگہ آن کھڑا ہوا جہاں سے ٹیکسی پکڑی تھی۔ بس دھند لا دھند لا یاد تھا کہ مورس تھی اور ڈرائیور نے کالے رنگ کی جیکٹ پہن رکھی تھی۔ لیکن فوراً ہی خیال آیا کہ شاید مورس نہیں سَنی تھی، یا نہیں یہ بھی نہیں۔۔۔ شاید۔۔۔ اور ڈرائیور نے کالے رنگ۔۔۔ یا شاید نہیں ؟
ساری چیزیں عجب طرح دھند لا گئی تھیں اور ایک دوسرے میں گڈ مڈ ہوئی جا رہی تھیں۔ بے خیالی اور دھند لائی آنکھوں سے ایک ایک ٹیکسی کو دیکھتا رہا۔ کئی ٹیکسیوں پر شبہ بھی ہوا۔ دوڑ کر پہنچا، کئی ڈرائیوروں سے پوچھا، لیکن۔۔۔ ؟
دن کروٹ لے کر شام کی گود میں سو گیا لیکن وہ اسی طرح پاگلوں کی طرح ٹیکسیوں کے پیچھے بھاگتا رہا۔ رات گئے گھر آیا تو بیوی بچے پریشانی سے اس کے منتظر تھے۔
’’اتنی دیر۔۔۔ ‘‘
’’ابو آپ کہاں تھے؟‘‘
’’ابو۔۔۔ ‘‘
’’ابو۔۔۔ ‘‘
تھکاوٹ، بے چینی اور اداسی چاروں طرف منڈلا رہی تھی۔
بار بار خیال آتا کہ ابھی تک ٹیکسی کی پچھلی نشست پر ہی نہ پڑا ہو، دھند چاروں طرف پھیلی ہوئی تھی اور چیزیں ایک دوسر ے کی اوٹ میں چھپ گئی تھیں۔
’’یہ میں نہیں ہوں۔‘‘ اس نے اپنے بدن پر ہاتھ پھیرا۔۔۔ ’’یقیناً یہ میں نہیں ہوں لیکن کسی کو اس کا احساس نہیں۔ بچوں کو بھی نہیں ، بیوی کو بھی نہیں۔‘‘ اس نے مڑ کر دیکھا۔۔۔
’’کس مزے سے سو رہی تھی۔ یہ جان کر بھی کہ یہ وہ نہیں ہے۔‘‘
کروٹیں بدلتی رات چپکے سے صبح کے روشن بطن میں اتر گئی۔ اس کے اداس اترے ہوئے چہرے کو دیکھ کر بیوی نے پوچھا۔۔۔ ’’تو تم ابھی تک اسی چکر میں ہو۔‘‘
اس نے سر ہلایا لیکن کچھ کہا نہیں۔ کہتا بھی کیا۔۔۔ مکالمہ کے لیے دونوں طرف کے سیٹوں کی فریکیونسی ایک سی ہونا چاہئے ورنہ آواز کی بجائے شاں شاں ہی سنائی دیتی ہے۔۔۔
اس دن بھی وہ چوراہوں پر مختلف ٹیکسیوں کے پیچھے بھاگتا رہا۔ یہ ہو، شاید یہ۔۔۔ نہیں یہ نہیں۔۔۔ شاید وہ۔۔۔ ؟
اب اسے بالکل یاد نہیں آ رہا تھا کہ وہ ٹیکسی کس ماڈل اور مارکہ کی تھی، مورس، سَنی، ٹیوٹا، یا ڈرائیور چھوٹے قد۔۔۔ نہیں لمبے قد، شاید درمیانہ، جیکٹ کالی، بھوری، نیلی۔۔۔ یا۔۔۔
سب کچھ گہری دھند میں گڈ مڈ ہو گیا ہے۔
کچھ یاد نہیں ، بس یاد ہے تو اتنا کہ پچھلی سیٹ پر وہ، اپنے وجود کی ساری خوشبوؤں ، تمناؤں اور خوابوں کے ساتھ اس لفافہ میں تھا۔ دفعتاً اسے خیال آیا تھا کہ لفافہ پر پتہ تو تھا، شاید ڈرائیور نے اسے پوسٹ کر دیا ہو۔ یہ خیال آتے ہی خوشبوؤں ، تمناؤں اور خوابوں کے لذت بھرے لمس اس کے سارے وجود پر پھیل گئے۔ لمبی لمبی غلافی آنکھوں ، مسکراتے سرخ ہونٹوں اور کھلے گلاب ایسے روشن چہرے کے ساتھ وہ لمحہ بھر کے لیے اس کی آنکھوں میں آئی۔۔۔ کیا معلوم خط اسے مل ہی گیا ہو اور اس وقت وہ اپنی آرام کرسی پر نیم دراز مزے مزے سے اسے پڑھ رہی ہو۔
لیکن کیا معلوم ؟
کوئی جواب بھی تو نہیں آیا۔۔۔ ؟
٭٭٭

لاشیئت کا آشوب

اندھیرا جونہی شام کی طنابیں توڑ کر رات کے خیمے سے باہر نکلتا ہے، وہ دبے پاؤں اندر داخل ہوتے ہیں اور کہتے ہیں۔۔۔ ’’چلو، ہمارے ساتھ چلو۔‘‘
وہ اپنے جسم کے ملبے سے خوشبو کی صورت اٹھتا ہے۔
وہ کہتے ہیں۔۔۔ ’’چلو بستر اٹھاؤ اور ہمارے ساتھ چلو۔‘‘
وہ نفی میں سر ہلا کر کہتا ہے۔۔۔ ’’نہیں ، پہلے مکالمہ ہو گا۔‘‘
وہ ہنستے ہیں۔۔۔ ’’وقت اور موت کبھی مکالمہ نہیں کرتے۔‘‘
وہ ان کی بات سنے بغیر ضد کئے جاتا ہے۔۔۔ ’’نہیں پہلے مکالمہ، پھر میں تمہارے ساتھ چلوں گا۔‘‘
وہ جواب نہیں دیتے اور کمرے میں پاؤں پسار کر لیٹے سنّاٹے میں سما جاتے ہیں۔
وہ کھڑکی کے نیچے بہتے دریا کا ہاتھ پکڑ کر نیچے اتر آتا ہے اور کنارے کنارے چلنے لگتا ہے۔ دریا اس کی پرواہ کئے بغیر چپ چاپ بہتا رہتا ہے۔ چند لمحے اس کی توجہ کا انتظار کرنے کے بعد جھنجلا کر کہتا ہے۔۔۔ ’’تم مجھے پہچانتے کیوں نہیں ؟‘‘
دریا کھلکھلا کر ہنستا ہے۔۔۔ ’’وقت اور دریا کسی کو نہیں پہچانتے۔‘‘
’’لیکن میں۔۔۔ ‘‘ اس کی آواز میں گئے دنوں کی کائی اور زمانوں کا زنگ جم جاتا ہے۔
’’تمہیں یاد نہیں ، میں کبھی یہاں سے گزرا تھا، کس طمطراق کے ساتھ، تم میرے قدموں میں جھکے تھے۔‘‘
دریا چپ رہتا ہے۔
’’اور میں نے تمہارے کناروں پر اپنے قدموں کے کتنے ہی نشان ثبت کئے تھے۔‘‘ تاسّف اس کی آواز میں سرسرانے لگتا ہے۔۔۔ ’’تب فتح میرے قدموں سے قدم ملا کر چلتی تھی اور اب۔۔۔ ‘‘
سامنے اس کا مقبرہ ہے،
سنسان، خاموش، دبیز سناٹا اس کے گرد کنڈل مارے بیٹھا ہوا ہے۔ وہ آہستہ آہستہ چلتا مقبرے کے احاطہ میں آ جاتا ہے۔ سامنے اس کی قبر ہے۔ بیمار دیا دق کے مریض کی طرح ٹھہر ٹھہر کر، کانپ کانپ کر قبر کے سرہانے کھانس رہا ہے۔
’’تو یہ میری قبر ہے۔‘‘
اداسی احاطے میں بوند بوند ٹپک رہی ہے۔
’’میں۔۔۔ جس کے لیے وقت رک جایا کرتا تھا، جس کے نام کے بغیر تاریخ نے آگے بڑھنے سے انکار کر دیا تھا۔۔۔ تو یہ میں ، اب اس ٹوٹی قبر کی صورت باقی رہ گیا ہوں ، شاید مدتوں سے کسی نے فاتحہ بھی نہیں پڑھی۔‘‘
وہ دریا کی سمت آن کھڑا ہوتا ہے۔
دریا اسے دیکھ کر مسکراتا ہے،
’’تو تم مجھے پہچان گئے ہو۔‘‘ اس کے لبوں پر مسکراہٹ کا بور آنکھ کھولتا ہے۔
دریا ہنکارا بھرتا ہے۔۔۔ ’’وقت اور دریا کسی کو یاد نہیں رکھتے۔۔۔ اور تم۔۔۔ تمہیں تو تمہارے اپنے بیٹے بھی بھول گئے ہیں۔‘‘
وہ مڑ کر دریا کے دوسرے کنارے سے لپٹے شہر پر نظر ڈالتا ہے، نیند میں بڑبڑاتے لوگ کروٹ بدل کر سو جاتے ہیں۔ سارے دروازے اندر سے بند ہیں ، لیکن گلیوں اور سڑکوں پر اس کے قدموں کے نشان اب بھی ہمک رہے ہیں۔ دن بھر ڈیزل چھوڑتی بسیں ، ٹرک، کاریں ، ٹانگے اور سکوٹر فرش کو کھر چ کھرچ کر اس کے نشانات مٹانے کی کوشش کرتے رہتے ہیں ، لیکن جونہی اندھیرا رات کے خیمے سے اَڑیل گھوڑے کی طرح بدک کر باہر نکلتا ہے، یہ نشان سر اٹھاتے ہیں۔ وہ رینگ رینگ کر ان نشانوں سے نکلتا ہے اور اندھیرے میں گردن گردن ڈوبی گلیوں اور سڑکوں پر گھومنے لگتا ہے۔ ایک ایک دروازے پر دستک دیتا ہے۔
’’کون؟‘‘
’’میں۔۔۔ دروازہ کھولو۔‘‘
لیکن کوئی دروازہ نہیں کھلتا۔
وہ پھر دستک دیتا ہے۔
’’کون؟‘‘
’’میں۔۔۔ دیکھو میں تمہارا نام ہوں ، تمہاری پہچان ہوں۔۔۔ دروازہ کھولو۔‘‘
جواباً گہری گھنیری چپ۔۔۔
’’تو کیا میں نہیں ہوں۔‘‘۔۔۔ وہ اپنے آپ سے پوچھتا ہے، پھر اپنے سارے وجود پر ہاتھ پھیر کر اطمینان کرتا ہے کہ وہ ہے۔
’’دیکھو میں ہوں۔۔۔ میں اب بھی ہوں۔‘‘
مگر وہی گہری گھنیری چپ۔۔۔
اور نہ ہونے کی رات۔۔۔
ہو کر بھی نہ ہونا۔۔۔
لا حاصلی کا عذاب۔۔۔ بوند بوند اس پر گرتا ہے۔
جب رات اپنے بادبان کھولتی ہے اور اندھیرا ہمک ہمک کر باہر نکلتا ہے تو اس نہ ہونے کی رات کے پاؤں پھیل جاتے ہیں۔
میں ہوں بھی کہ نہیں۔۔۔
ایک کھنڈر، جس کے در و دیوار پر وقت چمگادڑوں کی بیٹھوں کی صورت نقش کندہ کرتا جاتا ہے۔
دریا اور وقت نہ کسی کا ساتھ دیتے ہیں ، نہ کسی کے لیے رکتے ہیں اور نہ کسی کو پہچانتے ہیں۔
تو میں کوئی بھی نہیں۔۔۔
اگر کوئی تھا بھی تو اب کچھ نہیں۔
فرش ٹوٹے احاطے میں ، جہاں ہر وقت سناٹا پاؤں پسارے خراٹتا رہتا ہے، ایک شکستہ قبر ہے، جس کی لوح پر لکھی تاریخ اپنے واقعات سمیت سمٹتی جاتی ہے۔۔۔ ایک ٹوٹا دیا، جس کا تیل اور بتّی دونوں اتنے بوڑھے ہو گئے ہیں کہ ہر سانس پر کھانستے ہیں۔
لا حاصلی کا عذاب
ہو کر بھی نہ ہونا
نہ ہونے کی رات۔۔۔ ہر رات
اور ہر رات جب اندھیری رات کے کوزے میں قید جن کی طرح آزاد ہوتا ہے تو وہ آ جاتے ہیں اور کہتے ہیں۔۔۔ ’’چلو بستر اٹھاؤ اور ہمارے ساتھ چلو۔‘‘
تب وہ دیکھتا ہے کہ کمرے کی چھت اور دیواریں بوسیدگی کے پنجوں میں پھڑپھڑا رہی ہیں۔
’’اب میرے لیے جانے اور نہ جانے میں کیا فرق باقی رہ گیا ہے؟‘‘
لیکن وہ اصرار کئے جاتے ہیں۔۔۔ ’’چلو‘‘
وہ کہتا ہے۔۔۔ ’’آ ؤ پہلے مکالمہ کریں۔‘‘
لیکن مکالمے سے وہ بہت گھبراتے ہیں ، سارا شہر ہی مکالمے سے گھبراتا ہے۔ وہ سب کچھ بغیر مکالمے کے کرنا چاہتے ہیں ، ان کا کہنا ہے موت اور وقت کبھی مکالمہ نہیں کرتے۔
لیکن اس نے تو وقت سے مکالمہ کیا تھا اور موت۔۔۔ موت تو تب اس کے سائے کے پیچھے چھپتی پھرتی تھی۔
مگر اب موت دندناتی اس کے تعاقب میں چلی آتی ہے اور وقت مکّار عورت کی طرح دیدے نچا نچا کر کہتا ہے۔۔۔ ’’میں کسی سے مکالمہ نہیں کرتا۔۔۔ ‘‘
اب وہ کھوکھلے درخت کی طرح ہے جس کے تنے میں پرندوں نے آلنے بنائے ہیں۔ یہ درخت اپنی عمر گزار چکا ہے، اب ان پرندوں کے سہارے جی رہا ہے اور یہ دریا۔۔۔ اب اسے دیکھ دیکھ کر ہنستا ہے۔ کبھی کہتا ہے میں تجھے نہیں پہچانتا اور کبھی پہچان کی چٹکیاں بھر کر اس کے نیم مردہ جسم میں گدگدی کرتا ہے۔۔۔ اور یہ قبر، وہ پھر قبر کے پاس آ کھڑا ہوتا ہے۔۔۔ یہ قبر اب فاتحہ کے لیے ترستی ہے، ٹمٹماتا دیا آخری ہچکیاں لے رہا ہے۔
تو یہاں اب کوئی فاتحہ پڑھنے نہیں آتا۔
شاید کوئی آئے گا بھی نہیں۔ کسی کو اب اس قبر کی یاد نہیں ، شاید ضرورت بھی نہیں۔
سب اپنے اپنے خوابوں میں گم ہیں
اور قبریں تو ہمیشہ اکیلی اور تنہا ہوتی ہیں ،
اکیلی اور تنہا
اور ماضی صرف میوزیم اور کھنڈروں میں باقی رہ جاتا ہے۔
وہ چند لمحے سوچتا رہتا ہے، پھر خود بخود اس کے دونوں ہاتھ اوپر اٹھ جاتے ہیں اور وہ جو فاتحوں کا فاتح تھا، اپنی قبر پر خود ہی فاتحہ پڑھنے لگتا ہے۔
٭٭٭

بند ہوتی آنکھ میں ڈوبتے سورج کا عکس

اس کے گھر کا دروازہ گم ہو گیا ہے اور اب اندر جانے کا کوئی راستہ نہیں۔
وہ اس جگہ، جہاں اس کے اندازے کے مطابق دروازہ ہونا چاہئے تھا، حیرانی، پریشانی کے بوجھ تلے دبا کھڑا ہے۔ یاد آتا ہے کہ صبح جب وہ دفتر جانے کے لیے نکلا تھا تو دروازہ موجود تھا، بیوی ڈیوڑھی تک آئی تھی۔ بیٹے نے بسکٹوں کے ڈبہ کی فرمائش کی تھی، بیٹی نے کاپیوں کے لیے کہا تھا۔ اور اب بسکٹوں کا ڈبہ ہاتھ میں پکڑے وہ گم سم اس جگہ کھڑا ہے جہاں اس کے اندازے کے مطابق دروازہ ہونا چاہئے تھا، لیکن دروازہ نہیں ہے۔ بس ایک سنگین حصار ہے جس نے سارے گھر کو اپنے کنڈل میں دبایا ہوا ہے۔ اس نے دیوار کو کئی جگہ سے ٹٹول کر، چھُو کر، دبا کر دیکھا ہے مگر کہیں راستہ نہیں ، بس ایک مضبوط دیوار ہے جو اوپر اٹھتی چلی گئی ہے اور گھر اس کے اندر، کہیں اس کی بُکل میں دبکا بیٹھا ہے، اس نے آوازیں بھی دی ہیں مگر آواز دیوار سے ٹکرا کر واپس منہ پر آ لگتی ہے۔ تو اب کیا کرے؟
اندھیرا تھکے ہوئے پرندے کی طرح تیزی سے زمین کی طرف گرتا چلا آ رہا ہے اور اس کے پیچھے پیچھے سردی رتھ میں سوار دوڑی چلی آتی ہے۔
تو وہ کیا کرے؟
اندر جانے کا راستہ گم ہو گیا ہے۔
اور وہ اس جگہ، جہاں اس کے اندازے کے مطابق دروازہ ہونا چاہئے تھا، حیرانی کی چادر میں لپٹا خاموش کھڑا ہے۔
ایک عجیب خوفناک، لمبوترے چہرے والا خوف دبے پاؤں گلی میں چلا آتا ہے۔ اس کے بیوی بچے کہاں ہیں ؟
گھر کہاں ہے؟
یہ دیوار ہے تو گھر کدھر ہے؟
گھر ہے تو دروازہ کہاں ہے؟
صبح دروازہ یہاں تھا، گھر بھی، دروازہ بھی،
بیوی ڈیوڑھی میں آئی تھی، بیٹے نے بسکٹ لانے کے لیے کہا تھا، بیٹی نے کاپیاں۔ وہ گلی میں ہوتا، سلام دعا کرتا، بڑی سڑک تک آیا تھا، بس میں بیٹھ کر دفتر پہنچا تھا، دن بھر فائلوں پر لفظوں اور قوانین کی شطرنج کا کھیل۔
مگر اب گلی کے ہونٹ چپ ہیں ، چہرے بے پہچان،
وہ کبھی ایک طرف، کبھی دوسری طرف جاتا ہے، لیکن اندر جانے کا راستہ نہیں ملتا۔ اس کے اندازے کے مطابق جس جگہ دروازہ ہونا چاہئے تھا، وہاں کچھ بھی نہیں ، بس ایک دیوار سی ہے جو اوپر اٹھتی چلی گئی ہے۔ دستکیں دے دے کر اس کے ہاتھ شیل ہو گئے ہیں ، دیوار سے کان لگا کر سننے کی کوشش کرتا ہے۔۔۔ گہری خاموشی۔
مڑ کر گلی میں دیکھتا ہے۔۔۔ گہری خاموشی۔
اور اس گہری چپ خاموشی میں وہ اندر جانے کی تمنا میں قطرہ قطرہ گھلتا جا تا ہے۔
اندھیرا اور سردی بھوکے شکاری پرندوں کی طرح چاروں طرف سے ٹوٹ پڑے ہیں۔
دروازہ گم۔۔۔
اور گلی سنسانی کے دریا میں ڈبکیاں کھا رہی ہے۔
اسے خیال آتا ہے کہ صبح سے اس نے سوائے چائے کے کچھ نہیں کھایا۔۔۔ اندر، گھر کے اندر۔۔۔ باورچی خانہ میں اس کی بیوی گرم گرم روٹیاں اتار رہی ہو گی، دونوں بچے چوکیوں پر بیٹھے سبق یاد کر رہے ہوں گے۔۔۔ سالن کی پتیلی سے اٹھتی ذائقہ دار گرم خوشبو چٹخارہ۔۔۔ بھوک اس کی انتڑیوں میں سیٹیاں بجاتی تیز تیز چلتی ہے۔
وہ بسکٹ کے ڈبے کو کھولتا ہے۔ رک جاتا ہے۔۔۔ یاد آتا ہے کہ بیٹے نے بڑے اصرار سے بسکٹ لانے کے لیے کہا تھا، رک کر سوچتا ہے اور دروازہ تلاش کرنے کے لیے دائیں بائیں جاتا ہے۔ پتھر کی خنک دیوار اوپر اٹھتی چلی گئی ہے، وہ اس خنکی کو پوروں پر محسوس کرتا ہے، پھر زور زور سے بیوی اور بچوں کو آوازیں دیتا ہے۔
شوکتی سردی اور بھونکتا اندھیرا منہ چھپا کر اندر ہی اندر ہنستے ہیں۔
بھوک اب اس کے سارے جسم میں دوڑتی پھر رہی ہے۔
پیکٹ کھولتا ہے، بسکٹ نکال کر منہ میں رکھنے لگتا ہے، رکتا ہے، پھر جلدی سے منہ میں ڈال لیتا ہے۔
گاڑھا اندھیرا آسمان کی طرف منہ کر کے بھونک رہا ہے، سردی شور مچاتی ساری گلی میں کِکلیاں ڈال رہی ہے۔
وہ ٹھٹھر کر دیوار کے ساتھ لگ جاتا ہے۔
بیوی کا مسکراتا چہرہ، بچوں کی میٹھی باتیں
وہ اب کھانا کھا کر سونے کے کمرے میں چلے گئے ہوں گے۔
گرم بستر
اس کی آنکھوں میں ایک لہر سی اٹھتی، بیٹھ جاتی ہے۔
سونے کا کمرہ تو گلی کی طرف ہے، شاید اس کی آواز اُن تک پہنچ جائے۔۔۔ مگر کیا معلوم سونے کا کمرہ دوسری طرف ہو۔
ذہن میں گھر کے نقشے کو مرتّب کرنے کی کوشش،
ڈیوڑھی کے سامنے صحن،دائیں طرف سونے کا کمرہ، بائیں طرف ڈرائنگ روم، سونے کا کمرہ بائیں طرف۔۔۔ نہیں بائیں طرف تو سٹور ہے اور دائیں طرف۔۔۔ نہیں سونے کا کمرہ بائیں۔۔۔ دائیں ، ڈرائنگ روم، سونے کا کمرہ، باورچی خانہ۔۔۔ دائیں بائیں۔۔۔ نہیں بائیں دائیں۔۔۔ دائیں بائیں۔۔۔ بائیں دائیں۔
تو جس جگہ وہ اس وقت ہے اس کے قریب سونے کا کمرہ ہو بھی سکتا ہے اور نہیں بھی۔
کیا خبر ہو ہی؟
شاید اس کی آواز سن لیں ،
آواز دینے کے لیے منہ کھولتا ہے مگر۔۔۔
نام۔۔۔ لفظ۔۔۔ بیوی کا نام ہی یاد نہیں آتا،
بیٹے اور بیٹی کا نام یاد کرنے کی کوشش کرتا ہے
ان کے نام بھی یاد نہیں آتے۔۔۔
بیوی۔۔۔ بیٹا، بیٹی۔۔۔ نام، لفظ۔۔۔ ایک گہری چپ۔
’’میں۔۔۔ میں ‘‘ وہ چیختا ہے۔
مگر فوراً خیال آتا ہے۔۔۔ ’’میں کون؟‘‘
نام بے نشان، بے پہچان
لفظ بے معنی، بے چہرہ
سمندوں سے بھی گہرا اندھیرا اور موجیں مارتی سردی،
رات پینجے کی طرح تیزی سے اندھیرے کو دھنک رہی ہے،
اندھیرے کے ڈھیر کے ڈھیر لگ گئے ہیں۔
منجمد ہوتا جسم، خواہشوں کے بھنور
ڈوبتے ہوئے۔۔۔ ابھرنے کی تمنا
کسی طرح دیوار میں سَن لگائی جائے۔
تیزی سے جیبیں ٹٹولتا ہے، مگر بال پوائنٹ کے سوا کچھ ہاتھ نہیں آیا۔۔۔ ایک رومال، چند سکے، بسکٹوں کا خالی ڈبہ اور دو کاپیاں ،
وہ لکھتا ہے۔۔۔
میرا نام۔۔۔ میرا نام کیا ہے؟
میری پہچان۔۔۔ میری پہچان کیا ہے؟
میرے بیوی بچے۔۔۔ میری بیوی بچے کہاں ہیں ؟
میرا گھر۔۔۔ میرا گھر کہاں ہے؟
اندر جانے کی تمنا۔۔۔ مگر راستہ نہیں ، راستہ کہاں ہے؟
ہر جملہ کے بعد ایک سوالیہ نشان۔۔۔ بال پوائنٹ کی سیاہی ختم ہو جاتی ہے۔۔۔
لفظ بے ترتیب۔۔۔ نام بے چہرہ، بے پہچان
دیوار کے ساتھ ساتھ گھسٹتا دھم سے زمین پر گر پڑتا ہے،
بھوک کی چنگاریوں میں شعلے بھڑکنے لگے ہیں ،
اکڑتے جسم کو ہلانے کی کوشش میں وہ لڑکھڑا لڑکھڑا کر کھڑا ہوتا ہے۔
گھسٹ گھسٹ کر دیوار کو ٹٹولتا ہے
کبھی اس طرف، کبھی اُس طرف
بیوی بچوں کے نام یاد کرنے کی کوشش
نام یاد نہیں آتے،
آواز دینے کے لیے منہ کھولتا ہے،
آواز نہیں نکلتی
نہ لفظ ہیں۔۔۔ نہ آواز۔۔۔ نہ پہچان،
بس ایک سنگین، ٹھنڈی دیوار ہے، سنسان اندھیری گلی اور شوکتی ہوئی سردی۔
وہ ناخنوں سے دیوار کو کھرچتا ہے۔
ذہن میں گھر کا نقشہ اور کمروں کی ترتیب یاد کرتا ہے۔
سونے کا کمرہ بائیں یا دائیں
ڈرائنگ روم اِدھر یا اُدھر
اندر جانے کا راستہ۔۔۔ ؟
اس کے اندازے کے مطابق جہاں جو ہونا چاہئے تھا وہ وہاں نہیں ہے۔ بس ایک دیوار ہے۔۔۔ یا شاید وہ بھی نہیں ہے۔
رات بیتتی جا رہی ہے۔
شاید نصف بیت گئی ہے یا شاید نہیں۔
شاید صبح ہونے والی ہے یا شاید نہیں ہونے والی،
صبح ہونے تک وہ شاید۔۔۔ یا شاید نہیں۔
کچھ معلوم نہیں۔۔۔ کوئی بات یقینی نہیں ،
بس دور دور تک پھیلا ہوا اندھیرے اور سردی کا تنبو ہے، منجمد کرتی سردی اور کلباتی بھوک بھونک بھونک کر اسے بھنبھوڑ رہی ہیں ، بھنبھوڑ بھنبھوڑ کر بھونک رہی ہیں اور پرانے سوئیٹر کی طرح تیزی سے ادھڑتے ہوئے وہ نہ کچھ سوچ رہا ہے، نہ دیکھ رہا ہے، نہ سن رہا ہے۔
بس تیزی سے اُدھڑتا ہی چلا جا رہا ہے۔
ادھڑتا ہی چلا جاتا ہے۔
٭٭٭

گم راستہ میں کشف

انکشاف کا یہ لمحہ،
یہ عجب بے ڈھنگے چہرے، سوکھی لٹکتی زبان والا لمحہ،
موڑ مڑتے ہی دفعتاً احساس ہوتا ہے کہ اس کے پیچھے کوئی نہیں ہے،
تیزی سے گھوم کر دیکھنا، بریکوں پر پاؤں کا دباؤ،
پاؤں پسارے لیٹی سڑک پر کاروں ، رکشاؤں ، بسوں اور سکوٹروں کی قطاریں ایک دوسرے کا ہاتھ تھامے رینگ رہی ہیں۔
وہ دور دور تک کہیں دکھائی نہیں دیتی۔
سڑک کے بیچوں بیچ یوں یکدم رک جانے سے رینگتی قطاریں الٹ پلٹ ہو جاتی ہیں۔
ہارن کی مسلسل آوازیں ، گھورتی آنکھیں اور بڑبڑاتے لب۔۔۔ وہ تیزی سے موٹر سائیکل فٹ پاتھ کی طرف گھسیٹتا ہے۔
پچھلے اشارے تک تو وہ ساتھ تھی، شاید کوئی بات بھی کی تھی۔
نہیں پچھلے اشارے پر وہ اس کے ساتھ نہیں تھی
اس سے پچھلے اشارے پر۔۔۔ شاید نہیں
ٹریفک کا لہریں مارتا دریا کسی نامعلوم منزل کی طرف رواں ہے
کیا معلوم وہ جب کسی اشارے پر چند لمحوں کے لیے رکا ہو تو چپکے سے اتر گئی ہو؟
یا کہیں جھٹکا لگا ہو اور وہ گر گئی ہو؟
کیا معلوم؟
شاید وہ ابھی تک پچھلے اشارے پر ہی کھڑی ہو؟
یا جہاں گری ہو وہاں پڑی ہو اور موٹریں ، رکشا، بسیں اور سکوٹر اس کے اوپر سے گزر رہے ہوں۔
موٹر سائیکل موڑتا ہے۔
پچھلے اشارے پر چند لمحوں کے لیے رکی ٹریفک زبان باہر نکالے ہانپ رہی ہے، اس کی بھوکی نظریں بے چینی سے منظر کو چاٹتی ہیں۔
شاید اس سے پچھلے اشارے پر۔۔۔
پچھلے اشارے سے اس سے بھی پچھلے اشارے تک، منظر کرچ کرچ بکھرا ہوا ہے۔ اس کی ٹٹولتی آنکھیں ایک چہرے سے دوسرے چہرے کی سیڑھیاں چڑھتی اور اترتی ہیں۔ دن ورق ورق کھلتا ہے۔
صبح وہ ایک ساتھ گھر سے نکلے تھے،
گلی کا موڑ مڑتے ہوئے اس نے کہا تھا۔۔۔ ’’پہلے ذرا درزی کی طرف۔‘‘
درزی کی دکان کے سامنے وہ اتری تھی، دکان کے اندر بھی گئی تھی، لیکن باہر نکلنا؟
شاید وہ درزی کی دکان سے باہر ہی نہ آئی ہو اور وہ اس کے بغیر ہی وہاں سے چل پڑا ہو؟
نہیں۔۔۔ وہ سر جھٹکتا ہے۔ بڑی سڑک پر جب وہ بس سے آگے نکلنے کی کوشش میں ایک کار سے ٹکراتے ٹکراتے رہ گیا تھا تو اس نے کندھا دباتے ہوئے کہا تھا۔۔۔ ’’اتنی تیزی کیوں دکھاتے ہو؟‘‘
کیا معلوم عین اسی وقت جب وہ بل کھا کر کار کی زد سے بچا تھا، وہ سڑک پر گر گئی ہو؟
لیکن پھر یاد آیا کہ آگے جا کر وہ پٹرول پمپ پر رکا تھا، وہ نیچے اتری تھی۔
تو کہیں وہ پٹرول پمپ پر ہی نہ رہ گئی ہو۔۔۔ وہ اسے بٹھائے بغیر وہاں سے چل پڑا ہو؟
لیکن پھر فوراً خیال آتا ہے کہ اس کے بعد انہوں نے ایک جنرل سٹور سے کچھ سامان بھی خریدا تھا۔
تو شاید وہ جنرل سٹور میں۔
کیرئیر پر سامان کا تھیلا رکھا ہوا ہے، شاید وہ تھیلا اٹھا لایا ہو اور اسے وہیں چھوڑ آیا ہو اور وہ ابھی تک۔۔۔
لیکن سٹور سے باہر نکل کر اس نے ایک بھکاری کو روپیہ دیا تھا۔
تو شاید وہ اسی بھکاری کے پاس کھڑی ہو۔
نہیں۔۔۔ نہیں ، اس کے بعد، اس کے بعد بھی
تو پھر
تو ہم کہاں جا رہے تھے
شاید وہ راستہ میں کہیں اتر کر پہلے ہی وہاں پہنچ گئی ہو۔
بہت سوچتا ہے۔۔۔ کچھ یاد نہیں آتا کہ وہ جا کہاں رہے تھے، گھر سے کیوں نکلے تھے، کسی کے پاس جانے کے لیے، پٹرول ڈلوانے کے لیے، جنرل سٹور سے کچھ خریدنے کے لیے، بھکاری کو روپیہ دینے کے لیے۔۔۔ معلوم نہیں وہ گھر سے کیوں نکلے تھے اور گھر، گھر کہاں ہے؟۔۔۔ کچھ یاد نہیں آتا۔
تو یہ بھی معلوم نہیں کہ کہاں سے آ رہے تھے اور کہاں جا رہے تھے؟
ایک عجب طرف کی دھند ہے کہ جس میں دکھائی بھی دیتا ہے اور نہیں بھی دیتا۔ کوئی جگہ ضرور ہے جہاں انہوں نے جانا تھا۔ لیکن کہاں ، یہ معلوم نہیں۔ گھر بھی کہیں ہے جہاں سے وہ آ رہے تھے، مگر کہاں ہے یہ معلوم نہیں ؟
ایک عجب طرح کی دھند ہے۔
دوپہر ڈھل کر سرمئی شام میں گھلتی جا رہی ہے۔ وہ اسی طرح فٹ پاتھ کے ساتھ موٹر سائیکل ٹکائے کھڑا کا کھڑا ہے۔
وہ راستہ میں کہیں ؟
درزی کی دکان پر، جنرل سٹور میں ، پٹرول پمپ پر آگے، پھر آگے یا پیچھے، بہت پیچھے، شاید پچھلے اشارے پر یا اس سے پچھلے، یا اس سے بھی پچھلے۔
سر جھٹکتا ہے اور شروع سے دن کی تہیں کھولنے لگتا ہے۔
گھر سے نکلتے ہوئے، درزی کی دکان، جنرل سٹور، پٹرول پمپ
سرمئی شام گہرے اندھیرے میں ڈھلتی جا رہی ہے
سڑک آہستہ آہستہ ویران ہو گئی ہے اور سردی دبے پاؤں اس کے بدن پر قدم قدم چلتی ہے۔ دن کی تہیں کھلتی ہیں ، بند ہوتی ہیں پھر کھلتی ہیں
لیکن دن تو جا چکا ہے
اب ٹھنڈی انگلیوں والی رات اس کے بدن کو ٹٹول رہی ہے۔
شاید وہ ابھی تک سڑک کے کنارے، یا درزی، یا جنرل سٹور۔۔۔ یا،
رات نے اپنے چہرے پر پڑا گھونگھٹ الٹ دیا ہے، سردی بال کھولے، بازو پھیلائے اس کے چاروں طرف ناچ رہی ہے۔
ویران سڑک۔۔۔ تھوڑے تھوڑے وقفہ سے ایک آدھ گاڑی یا سکوٹر گزرتا ہے تو لمحہ بھر کے لیے روشنی پھیلتی، پھر مرجھا جاتی ہے۔
گھپ اندھیرا۔۔۔ اور ناچتی ٹھنڈ،
وہ اسی طرح کھڑا کا کھڑا، دن کی تہیں کھولتا، لپیٹتا، پھر کھولتا ہے۔
سردی نے اب اسے اپنی بانہوں میں بھینچ لیا ہے۔
کانپتے جسم، بجتے دانتوں اور یخ ہوتے ہاتھوں سے وہ دن کی تہیں کھولنا چاہتا ہے، لیکن اس کے سامنے دھند۔۔۔ چیزیں سمٹنے مٹنے لگتی ہیں۔
دھندلی یادوں۔۔۔ صبح گھر سے نکلنا، درزی کی دکان، جنرل سٹور، پٹرول پمپ، پہلا، دوسرا، تیسرا۔۔۔ اور پھر دھند۔۔۔ ایک عجب دھند، جس میں دکھائی دیتا بھی ہے اور نہیں بھی،
اور آتش دان کے سامنے بیٹھی ٹی وی دیکھتے ہوئے وہ سوچتی ہے۔۔۔ آج پھر اس نے دیر کر دی ہے، کھانا پھر ٹھنڈا ہو جائے گا۔
٭٭٭

قافلے سے بچھڑا غم

قدموں کے نشان شہر کی ناف تک تو آتے دکھائی دیتے ہیں ، آگے پتہ نہیں چلتا۔ بس ایک خراٹے لیتا سناٹا ہے کہ چوکڑی مارے بیٹھا ہے اور وہ جو قافلہ سے بچھڑ گیا ہے شہر کے بیچوں بیچ اکیلا کھڑا سوال پہ سوال کئے جا رہا ہے۔ سنسان سڑکیں اور ویران گلیاں اس کے سوال سن کر بِٹر بِٹر دیکھتی ہیں اور خالی جھولیاں اس کے سامنے الٹ دیتی ہیں۔
منظر یہ ہے۔۔۔
دکانوں میں چیزیں سجی ہیں ، کاؤنٹر کھلے پڑے ہیں ، لیکن آدمی نظر نہیں آتے
ہوٹلوں میں میزوں پر کھانے کی چیزیں ترتیب سے رکھی ہیں ، لیکن نہ کوئی کھانے والا ہے، نہ کھلانے والا،
بس سٹاپ خالی پڑا ہے، بس کھڑی ہے، انجن سٹارٹ ہے، لیکن نہ ڈرائیور ہے نہ کنڈیکٹر، نہ کوئی سواری،
سڑک پر کاروں ، بسوں اور سکوٹروں کی لمبی قطار ہے، انجن سٹارٹ ہیں ، لیکن آدمی کوئی نہیں ،
اس شہر کے لوگ کہاں گئے ہیں ؟ وہ اپنے آپ سے پوچھتا ہے اور بڑے چوک کی طرف چل پڑتا ہے۔
اشارہ بند ہے، سرخ بتی زبان باہر نکالے ہانپ رہی ہے۔
تو یہ ٹریفک اسی طرح بند رہے گی، لیکن لوگ۔۔۔ لوگ کہاں گئے ہیں ؟
شاید گھروں میں بند ہیں ؟
دستک
خاموشی
دستک۔۔۔ کوئی ہے؟
خاموشی
وہ دروازہ کھول کر اندر چلا جاتا ہے، باورچی خانے میں چولہا جل رہا ہے، دیگچی میں سالن پک رہا ہے لیکن کوئی دکھائی نہیں دیتا۔۔۔ ڈرائنگ روم، بیڈ روم، سٹور، کہیں بھی کوئی نہیں ،
یا خدا یہ کیا طلسم ہے کہ گھر سجے سجائے، دکانیں بھری پُر ی، سڑکیں کاروں ، بسوں اور سکوٹروں سے ٹھسا ٹھس، لیکن آدمی کوئی نہیں۔ خوف اس کے بدن پر رینگنے لگتا ہے،
وہ بغیر کسی ارادے کے، بغیر کسی سمت کا تعیّن کئے دوڑ پڑتا ہے،
دوڑتا رہتا ہے۔۔۔ ہانپنے لگتا ہے تو رُک جاتا ہے،
یہ تو کوئی سکو ل ہے
شاید یہاں کوئی ہو۔۔۔ یہاں ضرور کوئی ہو گا۔
کوئی ہے؟
کوئی ہے۔۔۔ کوئی ہے؟ اس کی اپنی آواز چاروں طرف سے اس پر ٹوٹ پڑتی ہے، وہ نڈھال ہو کر چند قدم پیچھے ہٹ جاتا ہے۔۔۔ بہت دیر اسی طرح کھڑا رہتا ہے، پھر اپنے آپ کو اکٹھا کر کے آگے بڑھتا ہے۔۔۔ کلاس روم میں ڈیسکوں پر بستے کھلے پڑے ہیں ، کاپیاں کھلی ہیں ، بلیک بورڈ پر سوال لکھا ہوا ہے، لیکن نہ پڑھانے والا موجود ہے نہ پڑھنے والے، ایک گہری چپ ہے،
یا خدا یہ کیا جادو ہے۔۔۔ لوگ اس شہر سے کہاں گئے ہیں ؟
ہلکی سی آہٹ ہوتی ہے
کون۔۔۔ اس کے اندر تجسّس کی پو پھٹتی ہے،
آہٹ قریب محسوس ہوتی ہے، ہلکی سی چڑچڑاہٹ۔۔۔ ایک چوہا گردن باہر نکالتا ہے، چوہا آہستہ سے سامنے آتا ہے، چند لمحے اس کی طرف دیکھتا ہے، پھر دوڑتا ہوا سامنے کے دروازے سے باہر نکل جاتا ہے،
تو کیا شہر کے سارے لوگ چوہے بن کر زمین کے نیچے چلے گئے ہیں ؟
منظر وہی ہے،
سڑکوں پر کاریں ، بسیں ، سکوٹر اور سائیکل اپنی روانگی کی حالت میں ہیں ، لیکن نہ کوئی چلانے والا ہے، نہ سفر کرنے والا، بس انجن چل چل کر آپ ہی آپ بوڑھے ہوئے جا رہے ہیں۔
گھروں میں چولہے جل رہے ہیں ، سالن اور روٹیاں پک رہی ہیں ، لیکن نہ کوئی کھانے والا نہ کھلانے والا،
ہوٹلوں کی میزوں پر کھانے سجے ہوئے ہیں لیکن۔۔۔
دفتروں میں فائلیں میزوں پر کھلی پڑیں ہیں ، لیکن کرسیاں خالی ہیں
تو کیا شہر کے سارے لوگ چوہے بن کر زمین کے نیچے چلے گئے ہیں ، تو کیا اسے بھی۔۔۔ اسے بھی
کوئی چیز اس کے اندر اُچھلتی ہے،
بانسری کی مدھم آواز آہستہ آہستہ ابھرتی ہے اور لمحہ بہ لمحہ تیز ہونے لگتی ہے۔ کونوں کھدروں سے چوہے سیلاب کی طرح اچھل اچھل کر باہر نکلتے ہیں اور بسوں ، کاروں ، سکوٹروں ، گھروں ، دفتروں ، ہوٹلوں اور درس گاہوں میں پھیل جاتے ہیں۔ بانسری کی آواز اب چاروں طرف پھیل گئی ہے۔۔۔
رکی چیزیں دفعتاً چل پڑی ہیں ،
اس کے پیٹ کی گہرائیوں میں کوئی چیز اچھلتی ہے اور پھسلتی ہوئی اس کے حلق میں آن اٹکتی ہے۔ وہ منہ کھول کر اسے اگل دینا چاہتا ہے، لیکن اچھلتی شے باہر نہیں نکلتی، اندر ہی اندر اُچھلتی رہتی ہے۔ وہ چیختا ہے، چیخ آدھی باہر نکلتی ہے اور منجمد ہو جاتی ہے۔
آدھی اندر، آدھی باہر
حلق میں اٹکی شے اندر ہی اندر گھومتی ہے
وہ اچھل اچھل کر منہ سے بے ہنگم آوازیں نکالتا ہے،
اردگرد کھڑے لوگ ہنستے، تالیاں بجاتے ہیں اور جیبوں سے سکے اور نوٹ نکال نکال کر اس کے سامنے پھینکتے ہیں۔
٭٭٭

کھلے دروازے پر دستک

شام کی بانسری سے نکلتی اندھیرے کی تان گہری ہوتی جاتی ہے۔
سامنے والی دیوار اور اس پر بیٹھا کبوتر دھیرے دھیرے روئی کے گالوں ایسے نرم اندھیرے میں ڈوبے جا رہے ہیں۔ نیچے صحن کی کھردری اینٹوں پر بے چینی سے اِدھر اُدھر آتی جاتی بلی پنجوں سے اینٹیں کریدتی ہے، اس کی تیز غرّاتی میاؤں میاؤں سن کر کبوتر چوکنّا ہو کر چاروں طرف دیکھتا ہے، دیوار کی اونچائی پر نظر کرتا ہے اور پھر دبک کر بیٹھ جاتا ہے۔ بلی صحن میں بے چینی سے پھر رہی ہے۔ دیوار پر چڑھنے کی کوشش کرتی ہے، لیکن چند فٹ کے بعد پھسل کر واپس صحن میں آ جاتی ہے۔ سر اٹھا کر کبوتر کو دیکھتی، ہونٹوں کو سسکارتی میاؤں میاؤں کرتی ہے۔
صحن کے سامنے والے کمرے میں بیڈ پر لیٹا وہ کھلے دروازے سے سارا منظر دیکھ رہا ہے۔ اس نے کئی بار ہش ہش کر کے بلی کو بھگانے کی کوشش کی ہے لیکن بلی کچھ دیر کے لیے اِدھر اُدھر ہوتی ہے، پھر چند ہی لمحوں بعد کبوتر کے گرم خون کی مہک اسے صحن میں واپس کھینچ لاتی ہے۔ وہ صحن کی کھردری اینٹوں کو پنجوں سے کریدتی میاؤں میاؤں کرتی ہے۔ کبوتر اس کی بھوکی میاؤں میاؤں سن کر چوکنّا ہوتا، اِدھر اُدھر دیکھتا، پھر مطمئن ہو کر پروں میں سمٹ جاتا ہے۔ شام کی بانسری سے نکلتی اندھیرے کی تان گہری ہو گئی ہے۔
کبوتر اور دیوار تاریکی کی نرم دبازت میں ڈوب گئے ہیں۔ کبوتر کا سفید ہیولہ بس ایک نشان سا ہے۔
اسے خیال آتا ہے۔۔۔ کبوتر صبح سے پہلے کہیں جائے گا اور یہ بلی۔۔۔ بلی مایوس ہو کر غصے سے چکر کاٹتی ہے۔ اس کی بھوک سے لتھڑی میاؤں میاؤں میں چیر پھاڑنے والی غرّاہٹ شامل ہوتی جا رہی ہے۔
بیڈ پر لیٹے لیٹے اسے اپنا آپ کبوتر میں تبدیل ہوتا محسوس ہوتا ہے۔ تیز پنجوں اور چمکیلی آنکھوں والی بلی دبے پاؤں اس کے پیچھے آتی ہے۔ وہ سمٹ سمٹ کر دیوار کے ساتھ لگ جاتا ہے، ساتھ والے پلنگ پر سوئی اس کی بیوی اس کے بوجھ سے گھبرا کر کروٹ لیتی ہے۔ وہ کہنی کے بل بستر پر گر جاتا ہے۔ چند لمحے یوں ہی پڑا رہتا ہے پھر صحن میں نکل آتا ہے۔ کبوتر سامنے والی دیوار پر سفید دھبّا بنا دبکا بیٹھا ہے۔ بلی اسے دیکھ کر صحن سے غائب ہو جاتی ہے۔ پانی پی کر وہ واپس بیڈ پر آتا ہے اور ٹکٹکی باندھے صحن کو دیکھتا رہتا ہے۔ بلی جا چکی ہے اور ابھرتی چاندنی میں سامنے دیوار پر بیٹھا کبوتر صاف نظر آ رہا ہے۔
دیوار کے اختتام پر ایک اور اوپر اٹھتی دیوار ہے جس کے بعد ساتھ والوں کی چھت ہے۔ وہ سوچتا ہے بلی کا وہاں پہنچنا ناممکن ہے۔ ساتھ والوں کا دروازہ بند ہو چکا ہے اس لیے ان کے کوٹھے تک بلی نہیں پہنچ سکتی اور اگر پہنچ بھی جائے تو سیدھی دیوار پر وہ اتنا نیچے نہیں اتر سکتی،
لیکن بلی ہے کہاں ؟
وہ اٹھ کر صحن میں آتا ہے، بلی کہیں دکھائی نہیں پڑتی۔ اوپر دیوار کو اور پھر چھت کو دیکھتا ہے اور بستر پر آ گرتا ہے۔
موت بلی کی طرح نفس کے کبوتر کا تعاقب کرتی ہے۔ کبوتر لاکھ بچنے کی کوشش کر کے کبھی نہ کبھی، کہیں نہ کہیں اس کی جھپٹ میں آ ہی جاتا ہے۔ گرم خون بھی کیا چیز ہے؟ چیزیں بھی کیا ہیں ، کوئی بلی کوئی کبوتر۔۔۔ کبوتر، بلی ہوتا تو کیا اور اگر بلی کبوتر ہوتی تو پھر بھی کیا؟
دفعتاً اس کی آنکھ کھل جاتی ہے۔ سارا صحن چاندنی میں نہایا ہوا ہے۔ دیوار پر بیٹھا کبوتر پروں میں سر دئیے گہری نیند کے سپنوں میں ہے۔ وہ چاروں طرف نظر گھماتا ہے۔ اچانک ساتھ والوں کی چھت پر ہیولہ سا دکھائی دیتا ہے۔ وہ ہڑ بڑا کر دروازے میں آتا ہے۔۔۔ ساتھ والوں کی چھت پر بلی بڑی آہستگی سے اِدھر اُدھر پھر رہی ہے۔۔۔ وہ حیرت سے سوچتا ہے، یہ اوپر کیسے پہنچی؟ کیا دروازہ کھلا تھا؟ وہ ڈیوڑھی میں جاتا ہے۔ دروازہ بند ہے۔ تو پھر۔۔۔ شاید کسی نالی سے یا۔۔۔
وہ گھبرایا سا صحن میں آتا ہے۔ بلی ساتھ والوں کی چھت پر ٹہل رہی ہے۔ وہ چھت سے دیوار کے زاویے اور اونچائی کا اندازہ کرتا ہے اور نفی میں سر ہلاتا ہے۔ بلی نیچے کبھی نہیں پہنچ سکتی۔۔۔ بالکل نہیں۔۔۔ ممکن ہی نہیں۔ کچھ دیر صحن میں کھڑے رہنے اور دیوار و چھت کا اندازہ کرنے کے بعد بستر پر آ لیٹتا ہے اور تکئے کو ذرا سا ٹیڑھا کر کے کبوتر پر نظریں جما دیتا ہے۔ کبوتر بلی کی ان ساری کارروائیوں سے بے خبر مزے سے دیوار پر بیٹھا کسی خوشبو دار خواب کے سحر میں ڈوبا ہوا ہے۔ آہستہ آہستہ نیند اس کے پپوٹوں کو سہلانے لگتی ہے۔ نیند کی نرم نرم سیڑھیاں اترنے سے پہلے وہ نیم وا غنودتی آنکھوں سے اوپر بلی اور نیچے کبوتر کو دیکھتا ہے اور آہستہ سے نفی میں سر ہلاتا ہے۔۔۔ ناممکن !
جبر اور ظلم طاقتور مقناطیس کی طرح چیزوں اور ماحول کو اپنی طرف کھینچ لیتے ہیں اور انہیں اپنے پنجوں میں دبا کر توڑ پھوڑ دیتے ہیں۔ یہ تو ایک کیفیت ہے جو دکھائی نہیں دیتی، صرف محسوس کی جا سکتی ہے۔
بلی کی آنکھوں میں بھی ایک مقناطیس ہوتا ہے اور وہ۔۔۔ !
اسے لگتا ہے کوئی چیز اس کے سینہ پر کودی ہے۔ ہڑبڑا کر اٹھتا ہے۔ سامنے دیوار پر بلی کبوتر سے تھوڑے سے فاصلے پر بیٹھی آخری چھلانگ کی تیاری کر رہی ہے۔ اس کا منہ کھلے کا کھلا رہ جاتا ہے۔ حیرت سے پھڑپھڑاتی آنکھوں سے کبھی چھت کو کبھی دیوار کی اونچائی اور کبھی کبوتر اور بلی کو دیکھتا ہے۔ کبوتر کی گردن اس کے پروں میں ہے اور بلی چمکیلی آنکھیں اس پر جمائے قدم قدم آگے کھسک رہی ہے۔۔۔ اسے سانس رکتا سا لگتا ہے۔ خیال آتا ہے کہ زور سے چیخے اور بھاگ کر کوئی چیز اٹھا کر بلی کی طرف پھینکے، لیکن فاصلہ۔۔۔ اونچائی۔۔۔ نہ اس کے منہ سے آواز نکلتی ہے، نہ پاؤں حرکت کرتے ہیں۔
بلی ایک انچ اور آگے سرک آئی ہے اور اب ایک ہی لمحہ میں کبوتر پر جست لگانے والی ہے، بس ایک ہی لمحہ۔۔۔ اور عین اسی لمحہ کبوتر ایک دم آنکھیں کھولتا ہے اور چشم زدن میں لمبی اڈاری مار کر اندھیری فضا میں گم ہو جاتا ہے۔ بلی کے اٹھے پنجے فضا ہی میں معلق رہ جاتے ہیں۔ وہ بچوں کی طرح اچھلتا اور ہنستا چلا جاتا ہے لیکن اگلے ہی لمحے دھاڑیں مار مار کر رونے لگتا ہے۔ رونے کی اونچی آواز سن کر اس کی بیوی جاگ پڑتی ہے۔ ساتھ والے کمرے سے بچے دوڑے آتے ہیں کیا ہوا۔۔۔ کیا ہوا؟ خیر تو ہے۔ وہ روتے روتے ایک لمحہ کے لیے حیران بیوی بچوں کو دیکھتا ہے اور بھرّائی ہوئی آواز میں کہتا ہے۔۔۔ ’’کبوتر کو تو اس کی چھٹی حِس نے بچا لیا۔۔۔ میری تو چھٹی حِس بھی ختم ہو چکی ہے۔‘‘
اور وہ دو بارہ دھاڑیں مار مار کر رونے لگتا ہے۔
٭٭٭

تشکر: مصنف جنہوں نے اجازت دی اور سید زبیر جنہوں نے فائل فراہم کی
تدوین اور ای بک کی تشکیل: اعجاز عبید