پھول نظمیں

عبد اللہ جاوید

جمع و ترتیب: اعجاز عبید

(۱)

پھول حوالہ ہے تخلیق کی صورت میں خالق کا اجالا ہے ٭٭٭

(۲)

پھول محمّد کا اللہ کا ہر فرماں معمول محمدّ کا ٭٭٭

(۳)

پھول اشارا ہے رنگ و بو کا صورت گر بھی کتنا پیارا ہے ٭٭٭

(۴)

پھول کے درشن کو جانا ہو تو اُجلا رکھنا اپنے تن، من کو ٭٭٭

(۵)

پھول کھِلے جب اندر
اس کی خوش بو اتنی پھیلے
پہنچے سات سمندر
٭٭٭

(۶)

پھول کھِلا دیکھا خواب میں کوئی دل دل سے مِلا دیکھا ٭٭٭

(۷)

پھول کھِلا اے دل
جس سے مِلنا ناممکن ہے
اس سے مِلا اے دل
٭٭٭

(۸)

پھول کو اپنانا آساں تو ہے لیکن پہلے جاں سے گزر جانا ٭٭٭

(۹)

پھول پہ شبنم ہے آنسو ہو یا موتی عمر بہت کم ہے ٭٭٭

(۱۰)

پھول سے مت کھیلو پتّی پتّی ہونے کا دکھ پہلے جھیلو ٭٭٭

(۱۱)

پھول ہے رنگ و بو
دونوں ہیں اُڑ جانے والے
کیا میں اور کیا تُو
٭٭٭

(۱۲)

پھول سی جس کی صورت دل کے سُونے آنگن کو ہے اس کی سخت ضرورت ٭٭٭

(۱۳)

پھول ہنسا کیوں ہے
جھوٹی سچّی باتوں میں
یار پھنسا کیوں ہے
٭٭٭

(۱۴)

پھول کے افسانے
کانا پھوسی کرنے والے
راز نہیں جانے
٭٭٭

(۱۵)

پھول ہے پانی میں شاید لڑکا ڈوب گیا پریم کہانی میں ٭٭٭

(۱۶)

پھول کتابوں میں
رکھ کر لڑکی ، کھو مت جانا
اپنے خوابوں میں
٭٭٭

(۱۷)

پھول دریچے میں آج اگر غفلت کر لی تو دھُول دریچے میں ٭٭٭

(۱۸)

پھول کے چوکیدار رنگ و بو پر پہرے وہرے سب کے سب بیکار ٭٭٭

(۱۹)

پھول کا اِترانا ڈالی سے جب ٹوٹ گیا تو مٹّی ہو جانا ٭٭٭

(۲۰)

پھول کھِلا ہے تازہ
اُس نے کب دنیا دیکھی ہے
اُس کو کیا اندازہ
٭٭٭

(۲۱)

پھول نہ کمھلاتا یا اس سے پہلے میں خود مر جاتا ٭٭٭

(۲۲)

پھول کو توڑو گے پھر اس ڈالی پر کس کو جوڑو گے ٭٭٭

(۲۳)

پھول نہیں کھِلتا پھر بھی اک معصوم فرشتہ مٹّی میں مِلتا ٭٭٭

(۲۴)

پھول ہے بالوں میں مسجد کے اندر بھی آیا یار خیالوں میں ٭٭٭

(۲۵)

پھول کھِلا جی میں
اپنے پیارے کے بارے میں
رکھ نہ گِلا جی میں
٭٭٭

(۲۶)

پھول کا دیکھا حال دنیا داروں کے نرغے میں نازک دل پامال ٭٭٭

(۲۷)

پھول اندھیرے کا کتنے لمحے اور رُکے گا چاند، سویرے کا ٭٭٭

(۲۸)

پھول کی دی سوغات اس نے سوچا کنگلے کی اتنی تھی اوقات ٭٭٭

(۲۹)

پھول کڑے موسم کا اپنی کالی رات کا تارا کبھی کبھی چمکا ٭٭٭

(۳۰)

پھول بھی کھِلتا ہے
برف کی بارش بھی تھمتی ہے
یار بھی مِلتا ہے
٭٭٭

(۳۱)

پھول پہ رکھ کر پاؤں
جب واجاؔ نے مونچھ مڑوڑی
رویا سارا گاؤں
٭٭٭

ماخذ: تسلیم الٰہی زلفی کی کتاب ’شاعرِ صد رنگ‘
تشکر: جناب سردار علی (شعر و سخن ڈاٹ کام) جن کے توسط سے اس فائل کا حصول ہوا
ان پیج سے تبدیلی، تدوین اور ای بک کی تشکیل: اعجاز عبید