تختی

صادقین

رباعیات کا انتخاب جمع و ترتیب: محمد وارث، اعجاز عبید

قرطاس پہ جب نقش بنایا میں نے
تو عمر کا سرمایہ لگایا میں
اک جال لکیروں کا بنا اور اس میں
اڑتے ہوئے لمحوں کو پھنسایا میں نے
٭٭

اس صنف پہ عاشق تھا گواہی دو نجوم
تختی پہ لکھا کرتا تھا جب تھا معصوم
طفلی میں رباعیاں کئی تھیں مجھے یاد
کیا لفظ غزل ہے یہ نہیں تھا معلوم
٭٭

بچپن میں تجھے یاد کیا تھا میں نے
جب شعر کا کب لفظ سنا تھا میں نے
اس پر نہیں موقوف رباعی تجھ کو
ہر روز ہی تختی پہ لکھا تھا میں نے
٭٭

شب میری تھی، شام میری دن تھا میرا
آیا ہوا خود مجھ پہ ہی جن تھا میرا
کتنی ہی رباعیاں تھیں لکھ کر پھاڑیں
اٹھارہ برس کا جبکہ سن تھا میرا
٭٭

مکھڑے کی تو تنویر سے باتیں کی تھیں
اور زلف کی زنجیر سے باتیں کی تھیں
کل اک تری تصویر بنا کر میں نے
پھر کچھ تری تصویر سے باتیں کی تھیں
٭٭

ایک بار میں ساحری بھی کر کے دیکھوں
کیا فرق ہے شاعری بھی کر کے دیکھوں
تصویروں میں اشعار کہے ہیں میں نے
شعروں میں مصوری بھی کر کے دیکھوں
٭٭

کیں لغزشیں شاعری میں' واپس آیا
پھر کوچہ بت گری میں واپس آیا
تصویروں نے سینے سے لگایا مجھ کو
جب شہر مصوری میں واپس آیا
٭٭

وعدہ جو کیا نور سحر سے میں نے
مقتل میں وہ وفا کیا سر سے میں نے
جلاد کا کرنے کیلیے استقبال
چھڑکاؤ کیا خون جگر سے میں نے
٭٭

اے شیخ، حجابات برآمد ہوں گے
لاہوتی خیالات برآمد ہوں گے
قشقہ مٹا، درد میرے ماتھے سے
سجدوں کے نشانات برآمد ہوں گے
٭٭

پھر کیا کیا کچھ شیخ جو آئے میں نے
خیمے کے وہ باہر ہی بٹھائے میں نے
اور جلدی سے ماتھے پر بنا کر قشقہ
سجدوں کے نشانات چھپائے میں نے
٭٭

یہ تو نہیں قدرت کا اشارہ نہ ہوا
میں پھر چلا سوئے کفر، یارا نہ ہوا
اسلام سے بندے کا مشرف ہونا
اسلام کے مفتی کو گوارا نہ ہوا
٭٭

تن کیلیے احکام دقیقہ بھی سناؤ
غسل مخصوص کا سلیقہ بھی بتاؤ
نظریں برا کام کر کے طاہر ہوں، مجھے
اے اہل شریعت! وہ طریقہ بھی بتاؤ
٭٭

دن رات ہو جب شام یا پو پھٹتی ہے
کنی میرے ہاتھوں سے نہیں چھوٹتی ہے
پھر کام سے دکھ جاتا ہے اتنا مرا ہاتھ
روٹی کو جو توڑوں تو نہیں ٹوٹتی ہے
٭٭

تم ماہ ہو ہالے میں بھی آ جایا کرو
اوشا کے اجالے میں بھی آ جایا کرو
جب باغ میں آتی ہو تو اس ٹیلے پر
سادھو کے شوالے میں بھی آ جایا کرو
٭٭

دنیا کو اٹھا تھا میں دکھانے کیا کیا
دنیا ہی سے بیٹھا ہوں چھپانے کیا کیا
قالین کے اوپر ہیں صحیفے لیکن
قالین کے نیچے ہے نہ جانے کیا کیا
٭٭

دل کی مرے دنیا کہ بڑی ہے کالی
باتوں میں مری' چھائی ہوئی ہریالی
جس شخص کو دیتا ہوں میں دل میں گالی
کہتا ہوں زبان سے "جناب عالی"
٭٭

وہ حسن نمایاں ہے بدن سے تیرے
ہر چیز درخشاں ہے بدن سے تیرے
اک تو جو نہ ہوتی تو اندھیرا ہوتا
خلوت میں چراغاں ہے بدن سے تیرے
٭٭

کھلتی ہوئی کلیاں ہیں، چمن کی تیرے
رنگیں سی روشنی ہے، تن کی تیرے
خلوت کی ہر اک شے پہ ہے ہلکی ہلکی
چھٹکی ہوئی چاندنی، بدن کی تیرے
٭٭

ہم حسن پرستی کے قرینوں کے لیے
ہو جاتے ہیں معتکف مہینوں کے لیے
تصویر بناتے ہیں خود اپنی خاطر
اور شاعری کرتے ہیں حسینوں کے لیے
٭٭

عاشق کیلیے رنج و الم رکھے ہیں
شاہوں کیلیے تاج و علم رکھے ہیں
میرے لیے کیا چیز ہے؟ میں نے پوچھا
آئی یہ صدا لوح و قلم رکھے ہیں
٭٭

کرتا ہے یہ شور و شین، آیا کیوں ہے؟
کیا اس کو نہیں ہے چین، آیا کیوں ہے؟
خیّام نے سرمد سے یہ پوچھا، آخر
اِس کُوچے میں صادقین آیا کیوں ہے؟
٭٭

ہو شغلِ مے و جام میں، آوارہ ہو
لگ جاؤ کسی کام میں، آوارہ ہو
اے سیّدِ صادقین احمد نقوی
کیوں کوچۂ خیّام میں آوارہ ہو
٭٭

جاناں کے جمال کا جو کچھ ہو ادراک
ہو جاتی ہے اظہار کی صورت بیباک
لیلائے خیالات کا تن ڈھانپنے کو
ہیں طغرہ و تصویر و رباعی پوشاک
٭٭

میں خانۂ زر دار سجاؤں کیسے؟
افسانہ، حقیقت کو بتاؤں کیسے؟
موجود ہیں زندہ خار، آخر تصویر
اِن کاغذی پھولوں کی بناؤں کیسے؟
٭٭

ہم اپنے ہی دل کا خوں بہانے والے
اک نقشِ محبّت ہیں بنانے والے
عشرت گہِ زر دار میں کھینچیں تصویر؟
ہم کوچۂ جاناں کو سجانے والے
٭٭

خون اپنا بہانے کو ہے حاضر فنکار
اِس بات پہ لیکن وہ نہیں ہے تیّار
جاسوس جہاں کھیل رہے ہوں پتّے
ہو ایسی کمیں گاہ میں اُس کا شہکار
٭٭

کر کے کوئی تدبیر نہیں کھینچنے کا
نقش ایسا یہ دلگیر نہیں کھینچنے کا
رانی کی بناؤں گا کہ مہ وش وہ ہے
راجہ کی میں تصویر نہیں کھینچنے کا
٭٭

ہر نقش میں تھا جلوۂ ایماں ساقی
آ کر ہوئے مایوس و پریشاں ساقی
کل میری نمائش میں بڑے مولوی آئے
یہ سُن کے کہ تصویریں ہیں عریاں ساقی
٭٭

حرفِ غیرت مٹا گیا ہے پانی
نقشِ وحشت بنا گیا ہے پانی
سُن کر مری تصویروں کے دو اک عنوان
ملّاؤں کے منہ میں آ گیا ہے پانی
٭٭

میں نے، تھی جگہ خالی، تو لکھّیں آیات
دیکھیں لٹیں جب کالی تو لکھّیں آیات
آیات کو دیکھا تو بنائے مکھڑے
مکھڑوں پہ نظر ڈالی تو لکھّیں آیات
٭٭

دیکھا قد و گیسو میں کمالِ محبوب
اُف کتنے حسیں ہیں خد و خالِ محبوب
یہ طغرہ و تصویر نہیں لوحوں پر
ہے سایۂ سایۂ جمالِ محبوب
٭٭

یہ دیکھ کے، رکھتا ہے خیالاتِ جدید
اس کو زر و دینار سے نفرت ہے شدید
پھر رُوح القدس کے ہاتھ بھیجی تھی مجھے
ابجد کے خزانے کی مشّیت نے کلید
٭٭

منہ میں لیے اک چاندی کا چمچہ ساقی
دشمن ہوا اک قصر میں پیدا ساقی
اور چٹکی میں ابجد کے خزانے کی کلید
میں لے کے ہوں آفاق میں آیا ساقی
٭٭

مہ پاروں کے گھیرے میں بھی لکھ سکتا ہوں
شام اور سویرے میں بھی لکھ سکتا ہوں
مکھڑوں کے تصوّر کے جلا کے میں چراغ
زلفوں کے اندھیرے میں بھی لکھ سکتا ہوں
٭٭

لو وادیِ الہام میں آ پہنچا ہے
لو، مملکتِ جام میں آ پہنچا ہے
مانی بھی اُسی شوخ کا جلوہ کرنے
اب کوچۂ خیّام میں آ پہنچا ہے
٭٭

ہیں گیسو و ابرو کے یہی خم اے یار
خامے میں ہے موقلم کا عالَم اے یار
عرفی کم و بیش تھا مصوّر جتنا
اتنا ہی میں شاعر ہوں کم از کم اے یار
٭٭

دو دن کو ہوں اس شہر میں اشعار کے میں
جو کچھ ہے چلا جاؤں گا سب ہار کے میں
کرتا ہوں نگارِ شعر، تیری خاطر
معشوقۂ تصویر کا حق مار کے میں
٭٭

تخلیق میں معتکف یہ ہونا میرا
اب تک شبِ ہستی میں نہ سونا میرا
خطّاطی ادھر ہے تو ادھر نقّاشی
وہ اوڑھنا میرا یہ بچھونا میرا
٭٭

وعدہ جو کیا نورِ سحر سے میں نے
مقتل میں وفا کیا وہ سر سے میں نے
جلّاد کا کرنے کے لیے استقبال
چھڑکاؤ کیا خونِ جگر سے میں نے
٭٭

روٹھا جو جمال ہے منایا میں نے
اک جشن وصال ہے منایا میں نے
اس عمر عزیز کا رباعی کہہ کر
چالیسواں سال ہے منایا میں نے
٭٭

یہ تیرا پری! پیار ہے؟ جس میں' میں ہوں
اک کرب کی دیوار ہے جس میں' میں ہوں
بے چینی کی اک کھوہ ہے جس میں دل ہے
تنہائی کا اک غار ہے جس میں' میں ہوں
٭٭

جھاڑو سے وہ صاف کر کے آنگن آئی
رکھ کے روٹی، پکا کے سالن آئی
گھر کا سب کام کاج پورا کر کے
سادھو کے شوالے میں سہاگن آئی
٭٭

سختی سے چٹانوں کی نہ ہمت ہارا
پھر موم سے بھی نرم تھا سنگ خارا
پھوٹا وہیں فوارۂ آب شیریں
کل سنگ پہ پھاؤڑہ جو میں نے مارا
٭٭٭

ماخذ:
http://www.urduweb.org/mehfil/threads/%D8%A7%D8%B1%D8%AF%D9%88-%D8%B1%D8%A8%D8%A7%D8%B9%DB%8C%D8%A7%D8%AA.12129/
http://muhammad-waris.blogspot.in/2010/06/blog-post.html
تدوین اور ای بک کی تشکیل: اعجاز عبید