حرفِ خاموش حمیدؔ ناگپوری

بِسمِ اللہِ الرّحمٰنِ الرّحیم

تر ی حمد و ثنا لفظ و بیاں میں آ نہیں سکتی
کمالِ عجز ہے یا رب جو ساکت ہے زباں میری

سکونِ دل نہیں انسان کو حاصل سواۓ زیرِ دامانِ محمدؐ

سِتم رسیدۂ اُلفت کوئ حمیدؔ بھی ہے زمانہ دے تمہیں فرصت تو یاد کر لینا

تعارف

میں کہ ایک شاعرِ گمنام فلاکت کا شکار جس کی تقدیر مشقّت کے سوا کچھ بھی نہیں زندگی جہد و کشاکش میں ہی گزری جس کی اور اس جہد و کشاکش کا صِلا کچھ بھی نہیں
سستی شہرت کی ہوس نے نہ خَریدا جس کو جس نے محبوبۂ فن کا کبھی سودا نہ کیا ہر مصیبت کا دیا جس نے تبسّم سے جواب طبعِ خُود دار کہ جس نے کبھی رسوا نہ کیا
جس کے افکار سے روشن ہیں محبت کے دیے جسکے نغمات میں کلیوں کے تبسّم رقصاں اور جو آتشِ احساس میں جلتا ہی رہا اپنے شعروں میں لئے مرہمِ زخمِ دوراں
شمعِ مینارِ محبت کو فروزاں کرنا
جس کا ارماں رہِ ہستی میں چراغاں کرنا
۔۔۔۔۔۔۔۔۔۔۔۔۔

جہان چھوڑا تھا تم نے وقتِ رخصت وہیں ٹھہرا رہا میرا زمانہ

۔۔۔۔۔۔۔۔۔۔۔۔۔

غزلیات

(۱)
ترے کرم سے تری بے رُخی سے کیا لینا
مرے خلوصِ وفا کو کسی سے کیا لینا
سکونِ قلب نہ آسایشِ حیات نصیب
یہ زندگی ہے تو اس زندگی سے کیا لینا
تو اپنی وضع کو رسواے٘ عرضِ حال نہ کر
کسی کو تیرے غمِ بے بسی سے کیا لینا

خَرابِ زیست ہوں لیکن تری خوشی کے سوا
ترے نثار مجھے زندگی سے کیا لینا
تو میری خوئے محبت بدل نہیں سکتا
زمانے مجھ کو تری بے رُخی سے کیا لینا
ستم ہے دم جو مری دوستی کا بھرتے تھے
وہ کہہ رہے ہیں تری دوستی سے کیا لینا
حمیدؔ اصل میں اک غم کو ہے ثبات یہاں
جسے دوام نہیں اس خوشی سے کیا لینا

(۲)
خود اپنے آپ سے ہم بے خبر سے گزرے ہیں
خبر کہاں کہ تری رہ گزر سے گزرے ہیں
نفس نفس ہے معطّر، نظر نظر شاداب
کہ جیسے آج وہ خوابِ سحر سے گزرے ہیں
نہ پوچھ کتنے گُل و نسترن کا رو پ لئے
بہارِ نو کے تقاضے نظر سے گزرے ہیں
بہارِ خُلد بہر گام ساتھ ساتھ رہی
ترے خیال میں کھوئے جدھر سے گزرے ہیں
اماں ملی بھی جو اُن کو تو تیرے دامن میں
وہ کارواں جو مری چشمِ تر سے گزرے ہیں
دلوں پہ چھوڑ گئے نقش اپنی یادوں کا
تمھارے درد کے مارے جدھر سے گزرے ہیں
حسیں ہو تُم کہ تمھاری کوئ مثال نہیں
حسین یوں تو ہزاروں نظر سے گزرے ہیں
حمیدؔ پوچھ نہ آشوب دہر کا عالم
ہزار فتنۂ محشر نظر سے گزرے ہیں

(۳)

فکر پابندیِ حالات سے آگے نہ بڑھی
زندگی قیدِ مقامات سے آگے نہ بڑھی
ہم سمجھتے تھے غمِ دل کا مداو ا ہوگی
وہ نظر پرسشِ حالا سے آگے نہ بڑھی
اُن کی خاموشی بھی افسانہ در افسانہ بنی
ہم نے جو بات کہی بات سے آگے نہ بڑھی
سرخوشی بن نہ سکی زہرِ الم کا تریاق
زندگی تلخئ حالات سے آگے نہ بڑھی
عشق ہر مرحلۂ غم کی حدیں توڑ چُکا
عقل اندیشۂ حالات سے آگے نہ بڑھی
ایسی جنت کی ہوس تجھ کو مُبارک زاہد
جو ترے حسنِ خیالات سے آگے نہ بڑھی
نگہِ دوست میں توقیر نہیں اُس کی حمیدؔ وہ تمنّا جو مناجات سے آگے نہ بڑھی

(۴)

افسانۂ اربابِ کرم کس سے کہا جاۓ
ہنسنا ہے تو پھر حال پہ اپنے ہی ہنسا جاۓ

آوارگی! الفت کا مقدر ہے ازل سے
اے وحشتِ دل کون سی دنیا میں بسا جاۓ

تُم دادِ ستم اُس سے بھی چاہو تو ستم ہے
بے درد کو بے درد بھی جس سے نہ کہا جاۓ
انجامِ مسرّت ہے ہر اک اشکِ چکیدہ
کیا ظلم ہے ہونٹوں کی ہنسی آنکھ میں آ جاۓ

یک ساعتِ قربت بھی تری حشر بداماں
اک پل کے لۓ دُور بھی تجھ سے نہ رہا جاۓ

گزری اِسی امّید میں اک عمرِ تمنّا
وہ بھُولنے والا بھی کبھی بھُول کے آ جاۓ

معصوم نگاہوں پہ گماں ہو نہیں سکتا بربادیِ دل کا کسے الزام دیا جاۓ

بے زار جو تُو ہے تو حمیدِؔ جگر افگار کہہ دے تری نظروں سے کہیں دُور چلا جاۓ

(۵)

غم نہیں تُو نے جو بے نام و نشاں رہنے دیا
ذِکر تو میرا شریکِ داستاں رہنے دیا
اِک تبسّم بھی بدل سکتا تھا عنوانِ حیات
تم نے لیکن زندگی کو خونچکاں رہنے دیا
ہر قدم پر ہم تو پا مالِ وفا ہوتے رہے
تیرے غم کو داستاں در داستاں رہنے دیا
اس نگاہِ برق ساماں کا یہ احساں کچھ نہ پوچھ
جس نے دل کو آ ج تک گرم و جواں رہنے دیا
سایۂ گیسو میں چاہا تھا سکونِ زندگی
یے خطاۓ شوق جس نے سرگراں رہنے دیا
یہ تو دنیا ہے یہاں کی عافیت کا ذکر کیا
خلد میں بھی وحشتِ دل نے کہاں رہنے دیا
وقتِ رخصت ان سے دادِ ضبط پا سکتے حمیدؔ سوزِ غم نے ایک آنسو بھی کہاں رہنے دیا

(۶)

وہ طُوفانِ غم کوئ کیوں کر چھُپاۓ
جو دل میں رُکے اور نہ آنکھوں میں آۓ
مرے ہر نفس میں وہ یوں مُسکراۓ
صبا جیسے کلیوں کے گھونگھٹ اُٹھاۓ

مٹے دل تو مٹ جاۓ راہِ وفا میں
محبت پہ الزام آنے نہ پاۓ
تری یاد اور شامِ غم کی اداسی
دیا جیسے جنگل میں کوئ جلاۓ
جھلک جاتے ہیں اب بھی آنکھو ں میں اکثر
شروعِ محبت کے رنگین ساۓ
یقیں ہے کہ آؤ گے لیکن یہ ڈر ہے
دِیا زندگی کا کہیں بُجھ نہ جاۓ
حمیدؔ ایک رُخ یہ بھی تھا زندگی کا
تبسّم میں دیکھے ہیں اشکوں کے ساۓ

(۷)

غم ترا زیست کا سہار ا ہے
عیشِ دنیا کسے گوارا ہے
آ کہ صدیاں گزر گئیں اے دوست
زندگی کب سے بے سہارا ہے
آج کیوں اِنتظار ہے اپنا
تُو نے شاید مجھے پکارا ہے
تیرے غم نے ہزار پہلو سے
میرے کردار کو سنوارا ہے

کچھ خبر بھی ہے آرزو نے تری
کتنے زخموں کا روپ دھارا ہے
اس افسانے کی روح کو سمجھو
جس میں کچھ تذکرہ ہمارا ہے
کیا شکایت کروں کسی کی حمیدؔ
مُجھ کو میری نظر نے مارا ہے

(۸)

خود اپنے جذبِ محبت کی انتہا ہوں مَیں
ترے جمال کی تصویر بن گیا ہوں مَیں
حدیثِ عشق ہوں افسانۂ وفا ہوں میں
بھُلا سکے نہ جسے تُم وہ ماجرا ہوں مَیں
مری سرِشت ہے ہنس ہنس کے زخمِ غم کھانا
کہ حادثات میں پل کر جواں ہوا ہوں مَیں
انہیں یقیں نہیں میرے خلوصِ اُلفت کا
وفا کا اپنی یہ اِنعام پا رہا ہوں مَیں
حمیدؔ جس نے مٹایا ہے بار بار مجھ کو اُسی فریبِ محبت میں مبتلا ہوں مَیں

(۹)

وہ نگاہِ غلظ انداز جدھر جاتی ہے
اک خلش بن کے ہر اک دل میں اُتر جاتی ہے
ایک موہوم سی ناکام سی اُمّید کی رَو
ڈُوبتے دل سے اُبھرتی ہے گزر جاتی ہے
حُسن خود دار اُدھر، عشقِ خود دار ادھر
نہ خبر آ تی ہے کوئ نہ خبر جاتی ہے
غم کے اشکوں سے جِلا پاتا ہے انساں کا ضمیر
زندگی درد و مصائب میں نکھر جاتی ہے
اُف یہ عالم کہ ترا نام بھی لیتا ہے کوئ
دل پہ اُفتاد سی اُفتاد گزر جاتی ہے
کچھ خبر بھی ہے تجھے حسرتِ جلوہ لے کر
کتنی مایوس ترے در سے نظر جاتی ہے
وضعداریِ بشر بھی ہے کوئ چیز حمیدؔ زندگی یوں تو گزرنے کو گزر جاتی ہے

(۱۰)

جستجو تری کیسی ہوش ہی کہاں اپنا
بے نیازِ منزل ہے شوقِ بیکراں اپنا
مختصر تھا افسانہ اپنی زند گانی کا
پھر گئ نظر اُن کی مٹ گیا نشاں اپنا
دیکھۓ کدھر سے ہو ربط و سلسلہ قائم
حُسن کم نظر اُنکا عشق بے زباں اپنا
مٹ گئیں تمنّائیں خون ہو گیا دل کا
لُٹ گیا سرِ منزل آج کارواں اپنا
حل ہوا کہاں جا کر راز حُسن و الفت کا
ڈھونڈ نے گئے اُن کو مل گیا پتہ اپنا
حادثاتِ عالم کا غم نہیں حمیدؔ اُس کو آدمی اگر رکھّے حوصلہ جواں اپنا

(۱۱)
ترے غم کو نشاطِ جاوداں کہنا ہی پڑتا ہے
خدا رکھے تجھے آرامِ جاں کہنا ہی پڑتا ہے
اسی محور پہ گردش میں ہے اک اک ذرۂ ہستی
محبت کو قرارِ انس و جاں کہنا ہی پڑتا ہے
محبت بے نیازِ دردِ عالم ہو نہیں سکتی
غمِ دل کو غمِ کون و مکاں کہنا ہی پڑتا ہے
یہ محرومی یہ ناکامی یہ دل سوزی یہ جانکاہی
محبت کو بلآخِر امتحاں کہنا ہی پڑتا ہے
یہاں سب ختم ہو جاتے ہیں جھگڑے کفر و ایماں کے
محبت کو بِناۓ دو جہاں کہنا ہی پڑتا ہے
محبت میں زباں پر حرفِ شکوہ لا نہیں سکتے
کوئ عالم ہو دل کو شادماں کہنا ہی پڑتا ہے
کوئ رمز آشناۓ حُسنِ فطرت ہو تو ایسا ہو حمیدِؔ خوش بیاں کو نکتہ داں کہنا ہی پڑتا ہے

(۱۲)
اگر ضمیر ہو روشن تو آدمی جانے
پرائ آگ میں کیوں جل رہے ہیں پروانے
رہے نہ تلخئ ایّام کا اثر ساقی
مۓ نشاط سے بھر دے دلوں کے پیمانے
اِسی روش پہ زمانہ رہا اگر قائم
ہنسی اُڑائیں گے آبادیوں کے ویرانے
دلِ خَراب کو بخشا سرورِ لا فانی
یہ کس نگاہ کا احسان ہے خدا جانے
نہ چھیڑ قصۂ حور و قصور اے واعظ
کہاں خَرابِ محبت کہاں یہ افسانے
تری نگاہِ محبت کا اعتبار کیا
دلِ تباہ یہ حُسنِ فریب کیا جانے
حمیدؔ رسمِ زمانہ سے ہم نہ تھے واقف کسے خبر تھی کہ اپنے بنیں گے بیگانے

(۱۳)

حسن، شاہد ہے حُسن ہی مشہود
عشق بدنام ہو گیا بے سود
دیر و کعبہ میں جستجو بے سود
تُو ہے خود اپنی منزلِ مقصود
روحِ آزاد اور قیدِ وجود
اﷲ اﷲ اشتیاقِ نمود
تو ہے آزاد فطرتاً آزاد
جُرم ہیں جُرم یہ رسوم و قیود
ناظرِ ذات حُسنِ بے حد ہوں
میرے فکر و نظر نہیں محدود
غم سے گھبرا کے بھاگنے والے
راستے ہیں فرار کے مسدود
فطرتِ حُسن کو سمجھ نا داں
التجا رائگاں دعا بے سوُد
تلخ کامیِ غم معاذ اﷲ
زندگی ہے سرابِ زہر آلود
یہ حجاباتِ رنگ و بُو معلوم
خود نمائ ہے حُسن کا مقصود
یہ بھی ہے اک اداۓ لطیف حمیدؔ شکوۂ جورِ نارَوا بے سود
(۱۴)
تبسّم میں نہ ڈھل جاتا گدازِ غم تو کیا کرتے
کہ یہ شعلہ نہ بن جاتا اگر شبنم تو کیا کرتے
لٹا دیتے نہ اپنی زندگانی ہم تو کیا کرتے
نگاہِ لطف کا ہوتا وہی عالم تو کیا کرتے
یونہی دیر و حرم کی منزلوں میں ٹھوکریں کھاتے
سہارا گر نہ دیتی لغزشِ پیہم تو کیا کرتے
حمیدؔ اچھا ہوا خوابِ طلسمِ آرزو ٹوٹا کہ یہ محفل نہ ہو جاتی برہم تو کیا کرتے

(۱۵)
حُسنِ فریبِ یار ہے وعدۂ دیدِ یار کیا
کیجۓ اِنتظار کیوں کیجۓ اعتبار کیا
رزم گہِ حیات میں جیت کہاں کی ہار کیا
چاہئے جرأتِ عمل، فکر و زیانِ کار کیا
سوز و گدازِ عشق سے دل جو ہو لُطف آشنا
جنتِ قربِ یار کیا دوزخِ اِنتظار کیا
غنچوں میں زندگی نہیں پھولوں پہ تازگی نہیں
اب کے چمن کا راستہ بھول گئ بہار کیا
عشقِ جنوں نواز کا یہ بھی کرم سہی حمیدؔ دل ہی فگار ہو تو پھر دامنِ تار تار کیا

(۱۶)

نہ وہ شبِ ماہ و صحنِ گلشن نہ موسمِ گُل کا وہ زمانہ
قفس کی دیوار و در میں ہے دفن میرا ہر خوابِ آشیانہ یہ خواب ہے یا نظر کا دھوکہ بتا تو اے گردشِ زمانہ
یہ کس کے جلووں سے رشک ایمن ہے آج میرا سیاہ خانہ نہ غم سے گھبرا جہانِ فانی کی کوئ شۓ مستقل نہیں ہے
خوشی کا موقع بھی بخشتی ہے کبھی کبھی گردشِ زمانہ وہ حسنِ معصوم و سادہ فطرت بڑھا گیا اور دل کی اُلجھن
لبوں پہ ہلکا سا اک تبسّم نظر میں نازک سا اک فسانہ نہ فکرِ انجامِ کار ہستی، ہلاکِ الفت خَرابِ مستی
خودی کی حد سے گزر کے دیکھو جنوں کا اندازِ والہانہ نظر سے کیا کیا حسیں نہ گزرے مگر تہیں آنکھیں اُنہیں کی جویا
ملے نہ تھے وہ تو جب بھی ان سے تھا خاص اک ربطِ غائبانہ عدم کی منزل نہ اپنی منزل نہ بزمِ ہستی مقام اپنا
ہم ایسے آوارۂ ازل کا نہ یہ ٹھکا نہ نہ وہ ٹھکانہ بِساطِ فکر و خیال پر یوں اُبھر رہے ہیں نقوشِ ماضی
کہ جیسے رہ رہ کے یاد آتا ہو کوئ بھُولا ہو ا فسانہ نزاکتِ حُسنِ شاعری ہے لطیف احساسِ غم کی حامل حمیدؔ اشکوں میں مسکراتے ہیں میرے جذباتِ شاعرانہ

(۱۷)
محبت کیا تمنّاۓ محبت کا صلہ کیا ہے
اسے کچھ ہم نے سمجھا ہے اسے کچھ ہم نے جا نا ہے
محبت مسکرا اُٹھی تھی اپنی کامیابی پر
تری محجوب نظرو ں کا وہ عالم ہم نے دیکھا ہے
سکون و ضبط کی سب کوشِسشیں بیکار جاتی ہیں
نظر آتے ہو اک لمحہ تو پہروں دل دھڑکتا ہے
زباں میری نہ حرفِ آرزو سے آشنا ہوتی
اگر تم پوچھ بھی لیتے کہ تیر ا مدعا کیا ہے
اُلجھ کر رہ گۓ اہلِ خِرد لفظ و معانی میں
محبت کو محبت کی نظر سے کس نے دیکھا ہے
حمیدؔ اُن کی نگاہِ لطف نشتر ہے رگِ جاں پر اداۓ دوستی یہ ہے تو طرزِ دشمنی کیا ہے

(۱۸)
چارۂ درد ترا نام نہ ہونے پاۓ
دلِ بیتاب کو آرام نہ ہونے پاۓ
دل پہ جو چاہے گزر جاۓ مگر غیرتِ غم
وہ نظر موردِ الزام نہ ہو نے پاۓ
قلبِ انساں میں جو حاصل ہو محبت کو فروغ
زندگی محشرِ آلام نہ ہونے پاۓ
حُسن خود اپنی نمائش کا ہے طالب ورنہ
ہر نظر صرفِ در و بام نہ ہونے پاۓ
یہ بھی قسمت دلِ بربادِ سکوں کی اے دوست
وجہِ تسکیں جو تر ا نام نہ ہونے پاۓ
حرف ناموسِ محبت پہ نہ آ جاۓ حمیدؔ دل میں پیدا ہوسِ خام نہ ہونے پاۓ

(۱۹)
قبول کر کے تیرا غم خوشی خوشی میں نے
ترے جمال کہ بخشی ہے زندگی میں نے
بس اک نگاہِ توجہ پہ اس طرح خوش ہوں
کہ جیسے دولتِ کونین لوُٹ لی میں نے
دھڑک رہا تھا مرے ہر نفس میں دل اُن کا
سنی قریب سے آواز دور کی میں نے
زمانہ تا اَ بد اُن کو بھر نہیں سکتا
جگر پہ کھاۓ ہیں وہ زخمِ دوستی میں نے
تیرے جمال کی سر مستیوں میں گُم ہو کر
ہر ایک ساعتِ ہستی گزار دی میں نے
خداۓ دو جہاں اس جُرم کو معاف کرے
اڑائ ہے لبِ گلرنگ کی ہنسی میں نے
حمیدؔ مجھ کو زمانہ بھلا نہیں سکتا
بنا لیا ہے محّبت کو زندگی میں نے

(۲۰)

عمر گزری شعلہ رخساروں کے ساتھ
مدتوں کھیلا ہوں انگاروں کے ساتھ
روحِ نغمہ رہ گئ دم توڑ کر
ساز کے ٹوٹے ہوے تاروں کے ساتھ
آ دِکھا دوں بارگاہِ حُسن میں
زندگی کا رقص تلواروں کے ساتھ
نا مرادیِ محبت کے سوا
کون ہوتا بخت کے ماروں کے ساتھ
حُسن جلتا کاش اپنی آگ میں
کھیل سکتے وہ بھی انگاروں کے ساتھ
کس طرح گزری ہے کیا کہۓ حمیدؔ درد سے بیگانہ غم خواروں کے ساتھ

(۲۱)

غم کے آنسو آگ برساتے رہے
داغِ دل شعلوں کو شرماتے رہے
زندگی کی ساعتیں کٹتی گئیں
غم کے ساۓ پاؤں پھیلاتے رہے
آج اس نے بھی نگاہیں پھیر لیں
زندگی بھر جس کے کہلاتے رہے
کیا کہیں حالِ خلوصِ دوستاں
ہم فریبِ دوستی کھاتے رہے
چند لمحے اُن کی قربت کے حمیدؔ زندگی بھر مجھ کو تڑپاتے رہے

(۲۲)
مجھے رہینِ غمِ جاں نواز رہنے دے
دواۓ دردِ جگر چارہ ساز رہنے دے
نہاں ابھی مری وحشت کا راز رہنے دے
نہ چھیڑ قصۂ زُلفِ دراز رہنے دے
فسانۂ غمِ ہستی سُناۓ جا ہمدم
دراز ہے جو یہ قصّہ دراز رہنے دے
رضاۓ دوست یہی ہے حریمِ اُلفت میں
جبینِ شوق کو وقفِ نیاز رہنے دے
نیاز مند ہوں تیرا اے بے نیاز مرے
نہ اپنے در سے مجھے بے نیاز رہنے دے

ٍ
(۲۳)

آ جا نشاط و کیف کی دنیا لیۓ ہوۓ
جوشِ شباب و مستیِ صہبا لیۓ ہوۓ
وہ ہیں کہ عذرِ وعدۂ فردا لیۓ ہوۓ
دل ہے کہ اضطراب کی دنیا لیۓ ہوۓ
پُوچھو نہ کس عذاب سے کاٹی ہے زندگی
نا کام حسرتوں کا سہار ا لیۓ ہوۓ
پھر کر رہا ہے ان کی نگاہو ں سے التجا
پھر دل ہے زندگی کی تمنّا لیۓ ہوۓ
ہر پھول میں ہے عکسِ رخِ یار جلوہ گر
رنگینیِ بہار کا پردہ لیۓ ہوۓ
پھر بے کسیِ شامِ جدائ میں تیری یاد
آئ ہے اِک ہجومِ تمنّا لیۓ ہوۓ
ہر نقشِ کائنات کا حیرت نما سکوت
میرا مذاقِ دید ہے گویا لیۓ ہوۓ
دنیا کی شورِشوں سے بہت دُور ہوں حمیدؔ اپنے تصوّرات کی دنیا لیۓ ہوۓ

(۲۴)

حُسن کی بارگاہ کیا کہیۓ
ہر نظر فرشِ راہ کیا کہیے
تلخ کامیِ زیست کا حاصل
زحمتِ یک نگاہ کیا کہیے
بے تعلق گزر نہیں سکتے
نگہِ گاہ گاہ کیا کہیے
اُٹھ ہی جاتی ہے حُسن کی جانب
بے ارادہ نگاہ کیا کہیے

غیرتِ عشق کے منافی ہے
اُن سے حالِ تباہ کیا کہیے
تابِ نظارۂ جمال کسے
جلوۂ بے پنا ہ کیا کہیے
کتنے نشتَر چبھو گئ دل میں
ایک سادہ نگاہ کیا کہیے
دوستی وجہِ دشمنی ہے حمیدؔ
کتنی مشکل ہے چاہ کیا کہیے

(۲۵)

رودادِ جذبِ شوق رہینِ بیاں کہاں میں کہہ سکوں جسے وہ مری داستاں کہاں

وہ سامنے ہیں چشمِ تمنّا ہے محوِ دید
اے عرضِ شوق! بات کا موقع یہاں کہاں

حُسنِ ازل کی جلوہ نمائ کہاں نہیں اپنا سرِ نیاز جھکاؤں کہاں کہاں

کیا نا مرادِ غم پہ خدا ہی کی مار ہے میرا جگر کہاں ستمِ دو جہاں کہاں

مدّت ہوئ کہ پھونک دیا لطفِ برق نے اب خاکِ آشیاں بھی نہیں آشیاں کہاں

میں اپنا حالِ زار سناؤں کسے حمیدؔ اس انجمن میں کوئ مرا ہم زباں کہاں

(۲۶)

اعتبارِ دوستی کھونے لگے
اشکِ غم داغِ وفا دھونے لگے میرا رونا تو ہنسی کی بات تھی
تم پہ کیا گزری کہ تم رونے لگے عمر گزری انتظارِ دوست میں
بخت جاگا اور ہم سونے لگے گِر کے آنکھوں سے کسی کے رُو برُو
اشک اپنی آبرُو کھونے لگے یہ نہ ہو اے شدّتِ طوفانِ غم
عاشقی بے آبرُو ہونے لگے کون سمجھے ایسے دیوانے کا غم
ہنستے ہنستے جب کوئ رونے لگے پھُول برسائیں گے کیا دشمن حمیدؔ
دوست ہی کانٹے اگر بونے لگے

(۲۷)

کیا خاک ہو چکا دل سوزِ غمِ نہاں سے
شعلے نکل رہے ہیں کیوں چشمِ خوں فشاں سے
آتا ہے کچھ زباں پر کہتا ہوں کچھ زباں سے
ظاہر ہے دل کی حالت بے ربطیِ بیان سے
یہ کس کی یاد آئ بے اختیار دل میں
یہ کس کا نام نکلا بے ساختہ زباں سے
آغازِ داستاں تھی کافر نظر کسی کی
افسانۂ محبت دیکھا جہاں جہاں سے
اے برقِ و باد طوفاں اب کیا بتاؤں تم کو
لایا تھا ہاۓ چُن کر تنکے کہاں کہاں سے
کس جا قیام ہو گا پھر اب کہاں ملو گے
اے کاش پو چھ سکتے یارانِ رفتگاں سے
صیاد کے سِتم کا احساں حمیدؔ مانو کنجِ قفس میں چھُوٹے ہم فکرِ آشیاں سے

(۲۸)
قرارِ یک نفس حاصل نہیں بے تابیِ دل سے
ہزاروں بجلیاں لیکر اُٹھا ہوں تیری محفل سے
ہواۓ شوق پھر گرمِ تقاضا ہوتی جاتی ہے
بھڑک اُٹھّے نہ پھر شعلہ کوئ خاکسترِ دل سے
نہیں آساں نگاہِ حُسن میں مقبول ہو جانا
مقامِ عاشقی انساں کے ہاتھ آتا ہے مشکل سے
نہیں بے وجہ اُن کا دیکھ کر گردن جھکا لینا
تعلق کچھ تو ہے آخِر مرے ٹُوٹے ہوے دل سے
یہ طوفانِ بلا تقدیر سازِ اہل ہمّت ہے
کوئ حق آشنا کہہ دے سُبک سارانِ ساحل سے
نہ جانے کس تباہی کی طرف لے جاۓ دنیا کو
کہ انساں دُور ہوتا جا رہا ہے ا پنی منزل سے
حمیدؔ اِس دور میں آسائشِ ہستی کسے حاصل سکونِ زندگی نا پید ہے انسان کے دل سے

(۲۹)

لطافت بڑھتی جاتی ہے خلش کم ہوتی جاتی ہے
محبت خود ہی زخمِ دل کا مرہم ہوتی جاتی ہے
محبت کار فرماۓ دو عالم ہوتی جاتی ہے
خوشی دونوں جہاں کی اب تیرا غم ہوتی جاتی ہے
یہ عالم ہے کہ اپنا آپ عالم ہوتی جاتی ہے
محبت بے نیازِ شادی و غم ہوتی جاتی ہے
بچھڑنے کا ترے صدمہ نہیں لیکن یہ صدمہ ہے
کہ منزل دُور ہے اور زندگی کم ہوتی جاتی ہے
فریبِ رنگ و رامش اُٹھتا جاتا ہے نگاہوں سے
طبیعت اِن دنوں آسودۂ غم ہوتی جاتی ہے
میں اپنے مقصدِ ہستی پہ جتنا غور کرتا ہوں
حقیقت زندگی کی اور مُبہم ہوتی جاتی ہے
حمیدؔ اب اُسکو کیا کہیۓ مٹا یا بار ہا جس نے وہی قاتل نظر ہمراز و ہمدم ہوتی جاتی ہے

(۳۰)

ہر ذرّہ چشمِ شوق سرِ رہگزر ہے آج
دل محوِ انتظار ہے اور کس قدر ہے آج گویا وہ جلوہ گر ہیں نگاہوں کے رُو برُو
اس درجہ اعتبارِ فریبِ نظر ہے آج مدہوشیِ جمال ہے یا حُسنِ اِلتفات
تمکیں سے بے خَبر نگہِ فتنہ گر ہے آج آہٹ پہ سانس کی تری آ مد کا ہے گماں
ہنگامۂ حیات بھی خاموش تر ہے آج جو رازِ دو جہاں ہے امانت ہے حُسن کی
حاصل مجھے وہ عظمتِ دردِ جگر ہے آج منزل کا مجھ کو ہوش نہ اپنی خبر ہے آج
وہ جانِ آرزُو جو مِرا ہم سفر ہے آج تحلیل ہو نہ جاۓ کہیں روحِ کائنات
ساقی جو یہ لطافتِ کیفِ نظر ہے آج محویّتِ جمال میں یاراۓ گفتگو!
اے عرضِ شوق! عالمِ نوعِ دگر ہے آج
سازِ الم بھی سوزِ طرب خیز ہے حمیدؔ
ہر اک نواۓ درد مری نغمہ گر ہے آج

(۳۱) (ایک دوست کے حالاتِ زندگی سے متاثر ہو کر)

تم کو جانِ عاشقی روحِ وفا سمجھا تھا میں
اے فریبِ آرزُو تم کیا تھے کیا سمجھا تھا میں

وہ بھی نکلی اک فریبِ آرزوۓ نا تمام
جس نظر کو زندگی کا مدعا سمجھا تھا میں
گردشِ چشمِ زمانہ کی مجھے پروا نہ تھی
تم بھی نظریں پھیر لو گے ایسا کیا سمجھا تھا میں
اِنتہا دیکھو کہ نکلا بحرِ نا پیدا کنارِ
قلزمِ الفت کو ساحل آشنا سمجھا تھا میں
کیا قیامت ہے وہی خود در پۓ آزار ہیں
جن کو اپنی زندگی کا آسرا سمجھا تھا میں
زندگی میری نہ کیوں کر تلخ ہو جاتی حمیدؔ یہ فریب ایسا نہ تھا جس کو وفا سمجھا تھا میں

(۳۲)
عشق کی سر خوشی کی کیا کہنا
ہاۓ اس زندگی کا کیا کہنا
تم اچانک نظر جو آ جاؤ
اُس خوشی ! اُس خوشی کا کیا کہنا
حُسن کا حُسن سادگی میں ہے
حُسن کی سادگی کا کیا کہنا
کر دیا سب سے بے نیاز مجھے
آپ کی دوستی کا کیا کہنا
ضبطِ گریہ سے آنکھ میں آنسو
بے بسی کی ہنسی کا کیا کہنا
جو میسّر ہو کاوشِ غم سے
ایسی نادر خوشی کا کیا کہنا
اب تمنّا نہیں خوشی کی حمیدؔ
غم کی آسودگی کا کیا کہنا

(۳۳)

مری تسلّیِ خاطر پہ آنکھ بھر لینا
کرم بھی عذرِ ستم ہے ترا اثر لینا
بہشتِ دل کو جہنّم بدوش کر لینا
ہنسی نہیں ہے محبت کا دردِ سر لینا
خوشا کہ درد کو جزوِ حیات کر لینا
نفس نفس میں ترے غم کا سوز بھر لینا
یہی ہے رسمِ محبت تو اس کو کیا کہیۓ
بلائیں سارے زمانے کی اپنے سر لینا
سِتم کہ عذرِ تغافل سے بھی ہیں بے پروا
خبر نہیں ہے کہ ہوتا ہے کیا خبر لینا
فریبِ نفس ہے زعمِ وفا پرستی بھی
نگاہِ حُسن میں آساں ہے را ہ کر لینا ؟
ستم رسیدۂ الفت کوئ حمیدؔ بھی ہے زمانہ دے تمھیں فرصت تو یاد کر لینا

(۳۴)
تیرا غم ہے تو پھر مجھے غم کیا
خلد کیا چیز ہے جہنّم کیا
دیر و کعبہ کی جنگِ پیہم کیا
مر چکا ہے ضمیرِ آدم کیا
فکر و احساس کے کرشمے ہیں
امتیازِ مسرّت و غم کیا
دیکھنا ہے رہِ محبّت میں
پیش آتی ہے آخِرِ دم کیا
بے ثباتیِ لالہ و گل پر
خون روتی رہے گی شبنم کیا ؟
اُن کی ہر جنبشِ نظر میں حمیدؔ
لاکھ عالم ہیں ایک عالم کیا

(۳۵)

آنکھوں آنکھوں میں دل کے راز و نیاز
ہاۓ آغازِ عشق کا آغاز
اُف ری مجبوریاں محبت کی
ناز میں پا رہا ہوں رنگِ نیاز
حالِ دل نغمۂ نشاط نہ تھا
کون سنتا غریب کی آواز
سوزِ اُلفت ہے یوں نہاں دل میں
ساز میں گُم ہو جیسے نغمۂ ساز
خاکِ دل کے حقیر ذرّوں کو
سوزِ اُلفت نے کر دیا ممتاز
مجھ کو مجبورِ شوق کر ہی گئیں
تیری آنکھیں بلا کی ہیں غمّاز
اُن کا وعدہ بھی ہے فریب حمیدؔ فطرتِ حُسن ہے بہا و ساز

(۳۶)

ہر زخم جگر کا ہے دکھے دل کی کہانی
اک فتنۂ بیدادِ محبت ہے جوانی
یاد آتی ہے یوں دورِ گزشتہ کی کہانی
جس طرح کوئ خوابِ فراموش جوانی
پاکیزگیِ حُسن و محبت کی کہانی
سنتا کوئ معصوم نگاہوں کی زبانی
پھر بربطِ ہستی کو ذرا چھیڑ دو آ کر
پھر تشنۂ مضرابِ محبت ہے جوانی
آنے کی خوشی اُن کے نہ جانے کا کوئ غم
آتی ہے تصوّر کو بھی تصویر بنانی
بے تاب ہے ساحل سے لپٹ جانے کی حسرت
ہر موج کے سینے میں تڑپتی ہے جوانی
اک عالمِ تصویرو تصوّر ہے نظر میں کیا کہیۓ حمیدؔ آپ کی رنگین بیانی

(۳۷)

وہ فصلِ گل وہ جشنِ بہاراں نظر میں تھا
کنجِ قفس میں ہم تھے گلستاں نظر میں تھا جلوہ ہر ایک ظاہر و پنہاں نظر میں تھا
جس جا گۓ وہ فتنۂ دوراں نظر میں تھا تھی بیخودی تو شعلہ سا رقصاں نظر میں تھا
آیا جو ہوش عالمِ حیراں نظر میں تھا نغمہ طراز فطرتِ شاعر کہاں نہ تھی
ہر منظرِ لطیف غزل خواں نظر میں تھا امواجِ حادثات سے کھیلا ہوں عمر بھر
ساحل پہ تھی نگاہ نہ طوفاں نظر میں تھا وہ رشتۂ لطیف نہ سمجھا سکیں جسے
اُن کی نظر سے سلسلہ جنباں نظر میں تھا چمکی جو برقِ حُسن بہ یک فرصتِ نظر
کُل عالمِ بسیط فروزاں نظر میں تھا تصویرِ دوست کھنچ کے نگاہوں میں رہ گئ
آنکھوں سے چھپ کے بھی وہ نمایاں نظر میں تھا
لغزیدہ گام ا برِ بہاراں نہ تھا حمیدؔ کاکل بدوش کوئ خَراماں نظر میں تھا

(۳۸)

قیامت تھی محبت کی اداۓ حُسن کارانہ
نگاہوں کا تصادم بن گیا عنوانِ افسانہ
نہ کعبہ اُسکی منزل ہے نہ مسکن اسکا بُت خانہ
کہیں ان رہ گزاروں میں ٹھہر سکتا ہے دیوانہ
سنبھل کر ا ے غمِ دوراں کہ نازک ہستیِ دل ہے
ذرا سی چوٹ لگتے ہی چھلک جاتا ہے پیمانہ
وہی اک عالمِ دل ہے کوئ جس رنگ میں دیکھے
نہ جلوہ ہے نہ پردہ ہے نہ کعبہ ہے نہ بتخانہ
محبت امتیازِ دوست و دشمن کی نہیں قائل
محبت کی نظر میں کون اپنا کون بیگانہ
حمیدِؔ خستہ جاں سے کیوں نگاہیں پھیر لیں تم نے تمھیں کہہ دو کو ئ ہوتا ہے یوں اپنوں سے بیگانہ

(۳۹)

کون یہ جلوہ گر ہے کیا کہیۓ
ذرّہ ذرّہ نظر ہے کیا کہیے
تھی رگِ جانِ زندگی جو نظر
اب وہی نیشتر ہے کیا کہیے
ڈھونڈتی ہے نگاہِ شوق کسے
کیوں پریشاں نظر ہے کیا کہیے
ناظرِ دو جہاں ہے جس کی ذات
مجھ سے وہ بے خبر ہے کیا کہیے
فصلِ گُل کی فریب سامانی
شامتِ بال و پر ہے کیا کہیے
آتشِ غم کی دھیمی دھیمی لو
آج کیوں تیز تر ہے کیا کہیے
اپنی محرومیوں کا حال حمیدؔ زندگی مختصر ہے کیا کہیے


(۴۰)

دوُر جب ستاروں میں چاند مسکراتا ہے
تیرے ہنسنے کا عالم مجھ کو یاد آتا ہے
دوست، تیرے وعدوں کا اعتبار کیا لیکن
بے قرار نظروں کو کب قرار آتا ہے
سختیاں زمانے کی جھیلتا ہوں ہنس ہنس کر
غم تری محبت کا حوصلہ بڑھاتا ہے
دل کا حال کیا کہیۓ ، جلوہ گاہِ جاناں میں
بے قرار جاتا ہے، بے قرار آتا ہے
اُن کے حُسنِ کامل کا عکس ہے یہ ہلکا سا
جو مرے تخیّل میں شعر بن کے آتا ہے
یہ حمیدؔ قسمت ہے ، زندگی کی راہوں میں عمر بھر کے ساتھی کا ساتھ چھوٹ جاتا ہے

(۴۱)

نہ دل ہے نہ وہ دل کی خود داریاں ہیں
یہ سادہ نگاہوں کی پُر کاریاں ہیں
پریشان ہے شیرازۂ نظمِ ہستی
یہ کس کی نظر کی فسوں کاریاں ہیں
یہ مانا عبادت میں ہے لطف زاہد
خطا کاریاں پھر خطا کاریاں ہیں
ترا ہر اشارہ ہے میرا مقدّر
نہ مجبوریاں ہیں نہ مختاریاں ہیں
حمیدؔ اب محبت میں رنگِ ہوس ہے نہ دل سوزیاں ہیں نہ غمخواریاں ہیں

(۴۲)

رگ رگ میں لہر دوڑ گئ اضطراب کی
اک برقِ بے پناہ تھی جنبش نقاب کی
نظارۂ جمال کی نوبت نہ آ سکی
ہم دیکھتے ہی رہ گۓ شوخی نقاب کی
وہ سامنے ہیں محوِ تماشا ہے چشمِ شوق
فرصت یہاں کسے ہے سوال و جواب کی
اندازۂ گناہِ محبت ارے ستم
کچھ انتہا بہی ہے کرمِ بے حساب کی
دیکھا کسی نے ایسی نگاہِ سوال سے
آنکھوں میں کھنچ کے آ گئ حسرت جواب کی
چھینا سکوں تو حوصلۂ غم بڑھا دیا
کیا کم عنایتیں ہیں نگاہِ عتاب کی
اُٹھّی نگاہِ لُطف مری سمت یوں حمیدؔ شبنم پہ جیسے پہلی کرن آفتاب کی


(۴۳)

تمہارے حسن کی افسوں گری معلوم ہوتی ہے
کہ چشمِ شوق میں ہر شے بھلی معلوم ہوتی ہے
ابھی سوزِ محبت میں کمی معلوم ہوتی ہے
ابھی آنکھوں میں اشکوں کی نمی معلوم ہوتی ہے
محبت نے بالآخر فطرتِ دل ہی بدل ڈالی
مصیبت کوئ آتی ہے خوشی معلوم ہوتی ہے
محبت ہی صداۓ اولیں تھی ساز ہستی کی
محبّت ہی صداۓ آخری معلوم ہوتی ہے
حمیدؔ اُن کی نگاہوں کے بدلنے کا اثر دیکھو نظر ہر ایک کی بدلی ہوئ معلوم ہوتی ہے

(۴۴)

وہ چال چل کہ زمانہ بھی ساتھ چلنے لگے
نگارِ زیست تری سمت رُخ بدلنے لگے
وفورِ یاس میں مژدہ ہے کس کے آنے کا
یہ آج کیوں سرِ مژگاں چراغ جلنے لگے
زمانہ پھیر لے آنکھیں تو کیا گِلا اِس کا
ستم تو یہ ہے کہ تم بھی نظر بدلنے لگے
مجھے یہ ڈر ہے بہ ایں وصفِ احترامِ وفا
نہ تیری چشمِ محبت کہیں بدلنے لگے
یہ داغِ سجدہ تو ننگِ جبیں ہے اے زاہد
اگر نہ سوزِ محبت سے دل پگھلنے لگے
نہ پُوچھ کس نگہِ خاص کا تصرّف ہے
قدم جو راہِ محبت میں خود سنبھلنے لگے
حمیدؔ شامِ غریبی کا کس لۓ شکوہ
وہ دیکھ جانبِ منزل چراغ جلنے لگے

(۴۵)

کیا سنو گے داستانِ زندگی
تلخ ہے شرح و بیانِ زندگی
سانس تک لینا مصیبت ہو گیا
سخت ہے کیا امتحانِ زندگی؟
زندگی کا کس سے رونا رویئے
کون ہے اب قدر دانِ زندگی
اُن کے غم نے اتنی فرصت ہی نہ دی
سوچتے سُود و زیانِ زندگی
دیکھ بہی لو، دل کے داغوں کی بہار
رنگ پر ہے گلستانِ زندگی
منزلِ مقصود کتنی دُور ہے
بول کچھ اے کاروانِ زندگی
تھا تِرے دم سے ہی اے جانِ حمیدؔ مٹ چکا نام و نشانِ زندگی

(۴۶)

عجب ان دنوں عالمِ دل ہے پیارے
ترا نام لینا بھی مشکل ہے پیارے
کسے فکرِ بربادیِ دل ہے پیارے
محبت، محبت کا حاصل ہے پیارے
محبت ہے بیگانۂ قید و منزل
یہ طوفان آزادِ ساحل ہے پیارے
چلا ہوں جدھر لے چلی ہے محبت
نہ منزل نہ احساسِ منزل ہے پیارے
زمانہ ہو ا تجھ سے مل کر زمانہ
ابھی تک وہی عالمِ دل ہے پیارے
اُداسی برستی ہے دیوار و در سے نہ محفل، نہ وہ رنگِ محفل ہے پیارے

(۴۷)

نیچی نظروں سے محبت کے پیام آتے رہے
بے قرارِ شوق شرماۓ سلام آتے رہے
ہم نشیں بیچارگیِ عشق کا عالم نہ پوچھ
چند آنسو دل کی بربادی میں کام آتے رہے
یادِ ایّامے کہ جب تھا حُسن مجبورِ کرم
وقت کی گردش میں کیا کیا صبح و شام آتے رہے
وہ اداۓ دل نوازی وہ شکستِ احتیاط
قہر کی نظروں میں اُلفت کے پیام آتے رہے
پرسشِ غم پر کسی کی آنکھ میں آنسو نہ پُوچھ
زندگی میں یوں تو نازک تر مقام آتے رہے
عالمِ ہستی کا ہر نظّارہ ساکن تھا حمیدؔ اُن کی آنکھوں کے مگر گردش میں جام آتے رہے


(۴۸)

شرمائ نظر اور پسینہ یہ جبیں پر
مجبور نہ کر اپنی محبت کے یقیں پر
ہے سینکڑوں صبحوں کا سماں رُوۓ حسیں پر
کرنوں کا تلاطم ہے کہ رقصاں ہے جبیں پر
اُس کی نگہِ مہر کا اُٹھنا ہی ستم تھا
بَل پڑ گۓ بے رحم زمانے کی جبیں پر
وہ اِک نگہِ خاص پسِ پردۂ تمکیں
یہ سچ ہے کہ الزامِ محبت ہے ہمیں پر
بے مہریِ عالم سے نہیں کوئ سروکار
زندہ ہوں تو بس تیری محبت کے یقیں پر
پُوچھو نہ حمیدؔ اُس نگہِ شوخ ادا نے کیا کیا نہ ستم توڑ دیۓ قلبِ حزیں پر

(۴۹)

شاعر ہوں غمِ نوعِ بشر میرے لیۓ ہے
سرمایۂ ا حساس و نظر میرے لیۓ ہے
ہر قیدِ روایت سے ہوں آزاد میں اے دوست
تو فکر نہ کر میری نظر میرے لیۓ ہے
آزاد روِ عشق ہوں یہ دیر و حرم کیا
ہر منزل و ہر راہ گزر میرے لیۓ ہے
فنکار ہوں معیارِ نظر حُسن ہے میرا
ہر عیب میں تکمیلِ ہنر میرے لیۓ ہے
صد پیکر و صد حُسن بہ ہر گاہ نگاہے
ہر جلوہ بہ اندازِ دگر میرے لیۓ ہے
دوشیزۂ شب چادرِ مہتاب دریدہ
وا گوشۂ دامانِ سحر میرے لیۓ ہے
لا ریب کہ میں ایک دُکھی دل کی صدا ہوں
الفاظ و معانی میں اثر میرے لیۓ ہے

(۵۰)
مرا قصّۂ نا تمامِ محبت
رہا بن کے نقشِ دوامِ محبت
ضرورت نہیں نامہ و نامہ برکی
محبت ہے خود ہی پیامِ محبت
نگاہوں سے آۓ نگاہوں سے پہنچے
پیامِ محبت بہ نامِ محبت
وہ رُک رک کے آنکھیں ملانا کسی کا
وہ جھُک جھُک کے میرا سلامِ محبت
جگر غم سے چھلنی لبوں پر تبسّم
ارے خندۂ تلخ کامِ محبت
خَبر کیا تھی اک اک تمنّاۓ دل سے
لیا جاۓ گا انتقامِ محبت
حمیدؔ اپنا مٹنا گوارا ہے مجھ کو سلامت رہے ننگ و نامِ محبت

(۵۱)

وہ کسی پر دل کا آنا یاد ہے
کیف پرور وہ زمانہ یاد ہے
وہ محبت کی نگاہِ او ّلیں
دل کا وہ ہاتھوں سے جانا یاد ہے
مسکرا کر وہ بصد نازِ حجاب
بجلیاں دل پہ گرانا یاد ہے
مہر کی نظروں میں اُلفت کے پیام
حوصلے دل کے بڑھانا یاد ہے
دفعتاً وہ میر ی جانب دیکھ کر
مسکرا کر سر جھکانا یاد ہے
اپنی جانب مجھ کو آتا دیکھ کر
مُنہ چھپا کر بھاگ جانا یاد ہے
عشق کی اُفتادگی صرفِ سجود
حُسن کا وہ سر اُٹھانا یاد ہے
مست آنکھوں میں جوانی کی شرا ب
بے پیۓ وہ جھوم جانا یاد ہے
وہ مرے اندازِ مدہوشی کے ساتھ
شعر میرے گنگنانا یاد ہے
آرزوؤں کی وہ رنگیں ساعتیں
حسرتوں کا وہ زمانہ یاد ہے
وہ خوشی کے دن ہیں اب خواب و خیال
اب فقط آنسو بہانا یاد ہے
زندگی تھی زندگی جس سے حمیدؔ یاد ہے ہاں وہ زمانہ یاد ہے

(۵۲)

زندگانی کا ہر اِک غم ہے گوارا مجھ کو
مل گیا تیری محبت کا سہار ا مجھ کو
موجِ یک خونِ تبسّم تو نظر آئ تھی
بحرِ غم کا نظر آ یا نہ کنارا مجھ کو
سرد مہریِ زمانہ کی شکایت کیسی
خود مرے حُسنِ طبیعت ہی نے مارا مجھ کو
زندگی بحرِ حوادث سے اُبھرتی نہ کبھی
تیری نظروں کا نہ ملتا جو سہارا مجھ کو
اُن کی مرضی میرا ایمانِ محبت ہے حمیدؔ وہ جو خوش ہیں تو ہر اک غم ہے گوارا مجھ کو

(۵۳)
جانے پھر تیر ی دید ہو کہ نہ ہو
بخت اتنا سعید ہو کہ نہ ہو
حسرتوں کے دیے تو روشن ہیں
گُل چراغِ امّید ہو کہ نہ ہو
جذب کر لوں تجھے نگاہوں میں
پھر یہ جذبہ شدید ہو کہ نہ ہو اپنے زخموں سے کھیل تو لیں گے
غم نصیبوں کی عید ہو کہ نہ ہو
اُف تیری دل نوازیِ پیہم
اہل اُس کا حمیدؔ ہو کہ نہ ہو
(۵۴)
نہ وہ دورِ بادۂ شوق ہے نہ وہ تلخئ غمِ یار ہے
مرا حالِ زار نہ پوچھیے نہ سکون ہے نہ قرار ہے
نہیں تجھ سے کوئ گلہ مگر یہ اداۓ حُسنِ ستم نہیں
جو قتیلِ خنجرِ ناز تھا غمِ زندگی کا شکار ہے
جو پیامِ دوست نہ لا سکے جو کلی نہ دل کی کھلا سکے
وہ نسیم کوئ نسیم ہے، وہ بہار کوئ بہار ہے!!

جسے دل سے تو نے بھلا دیا وہ حمیدؔ شاعرِ مبتلا جو مزاجِ شبنم زار ہے جو ضمیرِ برق و شرار ہے

(۵۵)

ہیں سر بُلند وضعِ غمِ بے بسی سے ہم
دب کر تو جیتے جی نہ ملیں گے کسی سے ہم اے دوست با خَبر ہیں تری بے رُخی سے ہم
کر لیں گے یہ ستم بھی گوارا خوشی سے ہم تیری نگاہِ لطف بھی کیا کام کر گئ
دنیا کا غم قبول نہ کرتے خوشی سے ہم وارفتگئ آمدِ محبوب دیکھنا !
یہ حال خود کو ڈُھونڈ رہے ہیں ابھی سے ہم قرباں ہزار جان محبت کی آن پر
وہ ہم سے ہیں خفا تو خفا زندگی سے ہم آنسو کسی کے رُوۓ نگاریں پہ دیکھ کر
کس درجَہ شرم سار ہیں اپنی ہنسی سے ہم جنبش نہ کھا سکے رگِ انسانیت حمیدؔ مایوس اِس قدر بھی نہیں آدمی سے ہم


(۵۶)
اک سرورِ محض اپنے آپ کو پاتا ہوں میں
جب تصّور میں ترے اے دوست کھو جاتا ہوں میں
جب کوئ تسکین کی صورت نظر آتی نہیں
یاد سے تیر ی دلِ مضطر کو بہلاتا ہوں میں
اب نہ وہ میں ہوں نہ وہ الفت کا احساسِ خودی
اب تو یہ عالم ہے خود کو بھولتا جاتا ہوں میں
ہر نفس عمرِ گذشتہ کا ہے صد محشر بدوش
سُن سکو تو قصّۂ ماضی کو دہراتا ہوں میں
دیکھتے ہی اُن کو کھو دیتا ہے صبر و اختیار
بس اسی عادت سے ظالم دل کی گھبراتا ہوں میں
حسرتِ دیدار رہ جاتی ہے آنکھوں میں حمیدؔ اُن کی صورت دیکھ کر تصویر بن جاتا ہوں میں

(۵۷)

عذرِ ستم گری ہے، احساس بے رُخی کا
آج اُن کو ہوش آیا، دل مٹ چکا کبھی کا پُوچھو نہ حال مجھ سے، دل کی شکستگی کا
اپنی نظر کا بسمل، کیا نام لے کسی کا تھا ضبطِ غم سے باہر احساس بے بسی کا
یہ اشکِ نا چکیدہ ، شکوہ نہیں کسی کا بربادِ شوق ہونا ، مقسوم عاشقی کا
محرومیاں جہاں کی، حاصل ہے زندگی کا حاصل سمجھ رہے تھے، ہم جس کو زندگی کا
اب کیا بتائیں تم سے انجام اِس خوشی کا اﷲ رے ضبطِ گریہ، وقتِ سفر کسی کا
جاں سوز کس قدر ہے، یہ رُخ بھی زندگی کا مانا حمیدؔ ہم نے، غم ہے سبب خوشی کا
لیکن سکون ہی جب ، لٹ جاۓ زندگی کا؟
اے دوست تیرا غم ہے شمعِ حیات لیکن
بے نور کیوں ہے اب تک ہر خواب زندگی کا ہم نے حدیں تو چھو لیں فردوسِ ارتقا کی
پھر بھی ہے نا مکمل افسانہ زندگی کا اس حادثے کو یوں تو عالم گزر چُکا ہے
اب بھی ہے دل میں تازہ زخمِ نظر کسی کا

(۵۸)

عشق واماندۂ منزل نہیں ہونے پاتا
سیلِ غم در خورِ ساحل نہیں ہونے پاتا
کوئ پیغامِ مسرّت ہو مگر کیا کہیۓ
غم وہ احساس کہ زائل نہیں ہونے پاتا
ہر قدم ایک نئ راہِ محبت ہے مجھے
ذوق آسودۂ منزل نہیں ہونے پاتا
رونقیں تھیں دلِ بربادِ وفا کے دم تک
اب وہ ہنگامۂ محفل نہیں ہونے پاتا
اپنی ہستی کا نہیں ہوش مگر حال یہ ہے
دل تری یاد سے غافل نہیں ہونے پاتا
جس کی معصوم نگاہی کا زمانہ بسمل
اُف وہ قاتل کہ جو قاتل نہیں ہونے پاتا
میری فطرت وہ ستم کوشِ محبت ہے حمیدؔ جس کو اندازۂ مشکل نہیں ہونے پاتا

(۵۹)
ملتفت نظریں سکونِ قلب سوزاں ہو گئیں
زندگی کی تلخیاں جنت بہ داماں ہو گئیں
میرا مشرب ، میرا مسلک، میرا ایماں ہو گئیں
ہاۓ وہ نظریں جو پیوستِ رگِ جاں ہو گئیں
زندگی گزری ہے کن کن مرحلوں سے کیا کہوں
کتنی موجیں غم کی اُٹھیں اور طوفاں ہو گئیں
ہر نفس کے ساتھ گردش کر رہی ہے کائنات
دھڑکنیں بیتاب دل کی نبض دوراں ہو گئیں
اک جہانِ رنگ و بو پیہم گل افشاں ہی رہا
ہاۓ وہ شادابِ غم آنکھیں جو ویراں ہو گئیں

آج تک جو بچ رہی تھیں دست بُردِ وقت سے
بھُولی بسری چند یادیں زیبِ مژگاں ہو گئیں
علم کا ہر زعمِ باطل جہلِ دانش ہی رہا
ظلمتیں اتنی بڑھیں تقدیرِ انساں ہو گئیں
چپکے چپکے پھونک ڈالا ہستیِ دل کو حمیدؔ کچھ دبی چنگاریاں تھیں شعلہ ساماں ہو گئیں

نظمیں

مہاتما گاندھی

مردِ حق آگاہ گاندھی ملک و ملّت کا وقار
جس کی پیشانی کی منّت کش کُلاہِ افتخار
انقلابِ دہر کو ٹھوکر کا جس کی انتظار
جو سمندِ وقت کا رُخ موڑ دے وہ شہ سوار
دبدبے سے جس کے دشمن لرزہ بر اندام تھا
امن و آزادی کا دنیا کے لیۓ پیغام تھا
ہیچ تھا جس کی نظر میں رنگ و خوں کا امتیاز
جس کی فطرت تھی نزاعِ کفر و دیں سے بے نیاز
صاحبِ علم و فراست ، نیک طینت پاک باز
نوعِ انسانی کو جس کی ذات پر تھا فخر و ناز
جس کا مذہب آدمیّت کے سوا کچھ بھی نہ تھا
جس کے سینے میں محبّت کے سوا کچھ بھی نہ تھا

کھول دے تقدیر کے بل جس کے ماتھے کی شکن
آنکھ سورج سے ملا سکتا تھا جس کا بانکپن
سوزِ حرّیت سے جس کا ہر نفس تھا شعلہ زن
مسکراتی تھی لبوں پر جس کے نصرت کی کرن
جذبۂ فکر و عمل سے جس کا دل بیدار تھا
وہ مجاہد جو اہنسا کا علم بردار تھا
سر نگوں تھا جس کے قدموں پر فرنگی سامراج
رکھ دیا بھارت کے سر پر جس نے آزادی کا تاج
امن و آزادیِ عالم کو تھی جس کی احتیاج
پیش کرنا ہے ہمیں جس کی عقیدت کا خراج

مادرِ ہندوستاں کی شان و عظمت کی قسم امتیازِ قوم و ملّت کو مٹا ڈالیں گے ہم

جانِ وطن ہے نہرو

اے جواہر ہے تو ہی روحِ روانِ مشرق
نیّرِ برجِ شرف عزّت و شانِ مشرق
زورِ بازوۓ وطن تاب و توانِ مشرق
تیری ہستی سے ہے وابستہ نشانِ مشرق

صاحبِ فکر و نظر پیکرِ ایثار ہے تو امن و آزادیِ عالم کا طلبگار ہے تو
زندگی تیری رگِ جانِ وطن ہے نہرو
ہر نفس تیرا نگہبانِ وطن ہے نہرو تیری ہر بات میں اک آنِ وطن ہے نہرو
تو میرا یوسفِ کنعانِ وطن ہے نہرو

وادئ ہند میں پھیلے ہیں اُجالے تجھ سے
مل گۓ جینے کے انداز نرالے تجھ سے
دیوِ تخریب کا قوموں نے تماشا دیکھا
خونِ انساں کا خود انسان کو پیاسا دیکھا
اپنی تہذیب کا کُچلا ہوا لاشا دیکھا
خاک بر سر جو تمدّن کا جنازہ دیکھا
قلبِ گیتی سے فلک بوس کراہیں اُٹھّیں
ساری دنیا کی تری سمت نگاہیں اُٹھّیں
پیاس باقی ہے وہی آج بھی خونخواروں میں
سیکڑوں سر ہیں ابھی نوک پہ تلواروں میں
مرثیہ امن کا تاریخ سیہ کاروں کی
یادگاریں ابھی تازہ ہیں ستمگاروں کی
چہرۂ وقت پہ باقی ہیں خَراشیں کتنی نقشِ فریاد ہیں جھلسی ہوئ لاشیں کتنی

جنت ارض تھی جس وقت جہنّم بہ کنار
جنگ کے خوف سے لرزاں تھا ہر اک شہرو دیار اہلِ بیداد ! سیاست کے نشے میں سرشار
کوئ سنتا ہی نہ تھا ظلم رسیدوں کی پکار
امن اور صلح کا پیغام سُنایا تو نے نسلِ انساں کو تباہی سے بچا یا تو نے
اہلِ مغرب تری بالغ نظری کے قائل
ایشیا ء کو تری دانش پہ یقینِ کامل عزم و ایثار میں تو آپ ہے اپنی منزل
رہبرِ ہند کا اعزاز ہے تجھ کو حاصل
عظمتِ گاندھی و آزاد نمایاں تجھ سے
شمعِ اخلاص و محبت ہے فروزاں تجھ سے

مادرِ ہند کے بے مثل جہاں تاب گُہر
تجھ سے قائم ہے حکومت کا نظامِ بر تر ظلمتِ غم میں تری ذات ہے پیغامِ سحر
تجھ سے پائ ہے نئے دور نے معراجِ نظر
قلبِ صد پارۂ جمہور کا درماں تُو ہے ناز جس پر ہے زمانے کو وہ انساں تُو ہے ***

رفیقۂ حیات کی موت پر (۱۹۳۰ء)

زندگی کی ساعتیں کٹتی گئیں
سوزِ غم سے دل پگلتا ہی رہا
تیری دوری کی سلگتی آگ میں وقت آنسو بن کے ڈھلتا ہی رہا


اے عائشہ۔ ۔ ۔

اے پیکرِ ناز و ادا
آرام جانِ مبتلا
اے مایۂ شرم و حیا
کیا تھی یہی شرطِ وفا
کیوں ہو گئیں مجھ سے خفا
آخِر کوئ میری خطا
اے عائشہ اے عائشہ!

اے چارہ سازِ بیکسی
داروۓ دردِ بے بسی
اے مونسِ در ماندگی
اے غمگسارِ زندگی
کس سے کہوں حالِ دلی
اپنے دکھوں کا ماجرا
اے عائشہ اے عائشہ!

کیا میری جانب سے کبھی
کچھ رنج پہچا واقعی
کچھ منہ سے بولو تو سہی
اچّھی نہیں یہ خاموشی
کہہ دو کہ ہوتا ہے کوئ
یوں جان سے اپنی خفا
اے عائشہ اے عائشہ!

یوں بھی کسی ناشاد کا
دل توڑ جاتے ہیں بھلا
اب تک نہ یہ عقدہ کھلا
حیرت میں ہے چھوٹا بڑا
کیوں کر یکایک آ گیا
افسوس پیغامِ قضا
اے عائشہ اے عائشہ!

میں اور جینے کی خوشی
اچّھی کہی اچّھی کہی
کیسی خوشی کس کی خوشی
حرفِ غلط ہے زندگی
دنیا مری جب لٹ گئ
جینے کا پھر کیا مدعا
اے عائشہ اے عائشہ!

تم جس کی زینت تھیں وہ گھر
اجڑا پڑا ہے سر بسر
سرمایۂ قلب و جگر
ہے نذرِ غم آٹھوں پہر
شاہد ہے میری چشمِ تر
ہم رنگِ خونِ مدعا

اے عائشہ اے عائشہ!

آوارۂ کون و مکاں
ہے جُستجوۓ رائگاں
جا کر تمہیں ڈھونڈوں کہاں
اے طائرِ خلد آشیاں
اتنی سبک پروازیاں
گم کردۂ وہمِ رسا
اے عائشہ اے عائشہ!

اے پیکرِ ایثار حیف
اے ہمدم و غمخوار حیف
اے محرمِ اسرار حیف
تسکینِ قلبِ زار حیف
اے کُشتۂ آ زار حیف
کیا کر گیا صیدِ قضا
اے عائشہ اے عائشہ!

اے گلستانِ رنگ و بُو
سردِ کنارِ آب جُو
اے زندگی کی آبرُو
مانندِ ابرِ تند خُو
برساۓ آنکھوں سے لہو
کب تک حمیدِؔ مبتِلا
اے عائشہ اے عائشہ!
٭٭٭

وطن ہے آزاد

(یومِ جمہوریہ پر)

آج غیروں کی غلامی سے وطن ہے آزاد جبرِ صیّاد سے گل چیں سے چمن ہے آزاد

ہم نے آزادیِ جمہور کے پرچم کے تلے
سرفروشی کی دبی آگ کو بھڑکایا تھا
دیکھ کر جذبۂ بیدارِ جوانانِ وطن خون آنکھوں میں حکومت کی اُتر آیا تھا
برق ساماں ستم و جور کے شعلوں کی لپٹ
دل جو پتّھر کے ہلا دیں وہ نظّارے دیکھے
حقِّ آزادیِ انساں کا اُٹھاتے ہی سوال
کتنے ہی خوں میں تڑپتے ہوے لاشے دیکھے
طوق و زنجیر تو اک کھیل تھا دیوانوں کا
غم و آلام کے طوفاں میں بھی ہنسے ہی رہے
راستہ روکے ہوۓ دار و رسن تھے لیکن
اپنی منزل کی طرف ہم تھے کہ بڑھتے ہی رہے
جبر و بیداد کے سیلاب میں نابود ہوا
خود فرعون صفت تاج و حکومت کا جنوں
ایک ہی ضربِ کلیمی سے شہیدِ حق کی
ٹُوٹ کر رہ گیا صدیوں کی غلامی کا فسُوں
آج پھر اپنے گلستاں کے محافظ ہم ہیں آج پھر اپنے مقدّر کی ہم ہی ہیں معمار آج ذرّوں سے جھپکتی ہے ستاروں کی نظر دیپ خوشیوں کے جلاتی ہوئ آئ ہے بہار
تا ا بَد خونِ شہیداں کی تب و تاب کے ساتھ مسکراتی ہی رہے دیش کے ماتھے پہ کرن صبحِ نو امن کا پیغام سناتی ہی رہے سبز و شاداب رہے میرا چمن میرا وطن

٭٭٭

اے میرے ہندوستاں

اے کہ تیری ذات ہے سرمایہ دارِ عزّ و شاں اے کہ تیرا درد ہے داروۓ قلبِ نا تواں تیرے عزّت کے لیۓ مٹ جاۓ گا ہر نوجواں سر نگوں ہونے نہ دینگے ہم کبھی تیرا نشاں
اے میرے ہندوستاں
تیری حرمت کی قسم ہے تیری عظمت کی قسم تیری شوکت کی قسم ہے تیری سطوت کی قسم جذبِ الفت کی قسم ہے عزم و ہمّت کی قسم ہر نئی منزل پہ ہوں گے اپنے قدموں کے نشاں
اے میرے ہندوستاں
تیری گنگا کی قسم ہے تیری جمنا کی قسم جو ہمارا پاسباں ہے اس ہمالہ کی قسم دل میں جو دہکی ہوئ ہے اس جوالا کی قسم شمعِ آزادی رہے گی یوں ہی روشن ہر زماں
اے میرے ہندوستاں
جذبۂ سوزِ وفا سے شعلہ زن ہے ہر دماغ گُل نہ ہونے دینگے ہر گز تیری عظمت کا چراغ خون سے دھو دیں گے اپنے تیرے پیشانی کے داغ گوشے گوشے کو بنا دیں گے تیرے جنت نشاں
اے میرے ہندوستاں
تُو جواہر کا وطن ہے غیرتِ خُلدِ بریں جنم بھومی گوتم و گاندھی کی تیری سر زمیں تُو ا ہِنسا کا اُجالا امنِ عالم کا امیں تیرے ہی دامن میں مل سکتی ہے دنیا کو اماں
اے میرے ہندوستاں
سر بلندِ عالم ایجاد کر دیں گے تجھے جس قدر ناشادِ غم ہے شاد کر دیں گے تجھے قیدِ نسل و قوم سے آزاد کر دیں گے تجھے نوعِ انسانی کرے گی ناز تجھ پر بے گماں
اے میرے ہندوستاں
یہ زبوں حالی تری کس دل سے دیکھی جاۓ گی نو جوانانِ وطن کو کیا نہ غیرت آۓ گی دیکھنا تاریخ اپنے آپ کو دہراۓ گی ذکر تیرا ہی رہے گا داستاں در داستاں
اے میرے ہندوستاں ٭٭٭

مطلعِ مشرق فروزاں ہو گیا
(عرب جانبازوں کے نام)
آفتاب عصرِ حاضر نُور افشاں ہو گیا
صبحِ نو سے مطلعِ مشرق فروزاں ہو گیا
پھُوٹ نکلی ذرّے ذّرے سے بغاوت کی کرن
سِل چکا ہے شام میں نمرود زادوں کا کفن
شاطرِ مغرب کے مہروں کی سیاست سو گئ
نیل کی وادی میں فرعونوں کی قسمت سو گئ
داستانِ رُوم صدیوں سے جو دہراتے رہے
وسطِ مشرق سے بھی آج ان کے جنازے اُٹھ گۓ
پھونک دی ہے وقت نے ہر سُو نفیرِ انقلاب
آخری ہِچکی پہ ہے دم توڑتی شاہی کا خواب

سامراج اپنی سیاست کا بدل ڈالے چلن
یہ زمیں سب کی زمیں ہے ہر وطن سب کا وطن
حاکم و محکوم کے فتنے اُبھر سکتے نہیں
سر فروشی جن کا مشرب ہے وہ مر سکتے نہیں

شاہراہِ ارتقا پر ایشیاء ہے گامزن
اپنے سینے میں لیۓ عزمِ جواں کا بانکپن
ضُو فشاں خونِ شہیداں سے ہے شمعِ رہگزر رنگِ آزادی جھلکتا ہے رُخِ جمہور پر
٭٭٭

ایک وطن دوست قیدی کا سوال
( ۱۹۴۲ء کی تحریک)
اے دوست وہی رنگِ چمن ہے کہ نہیں ہے
وہ سوزِ وطن شعلہ فگن ہے کہ نہیں ہے
اُبھری ہوئ ماتھے پہ کرن ہے کہ نہیں ہے
سینوں میں بغاوت کی جلن ہے کہ نہیں ہے
کیا مطلعِ مشرق ہے ابھی تیرہ و تاریک
ماتھے پہ ہمالہ کے کرن ہے کہ نہیں ہے
شبنم کے عوض آگ برستی ہے گلوں سے
لِپٹا ہوا شعلوں میں چمن ہے کہ نہیں ہے
بھُوکوں سے گڑھے قبر کے پٹ جاتے ہیں اب بھی؟
افلاس کے ماروں کو کفن ہے کہ نہیں ہے
احساسِ غلامی کے جگر سوز اثر سے
چھلکے ہوے اشکوں میں جلن ہے کہ نہیں ہے
کیا اب بھی وہی ہیں گُل و بلبل کے فسانے
بدلا ہوا اندازِ سخن ہے کہ نہیں ہے
وہ آنکھ نہ جھپکی جو کبھی موت کے ڈر سے
بیباک سرِ دار و رسن ہے کہ نہیں ہے
آزادیِ جمہور کا پیغام سُن دے
سینے میں جو بھڑکی ہے مرے آگ بجھا دے ٭٭٭

امن دے دعویدار

اہلِ مغرب امن کے یہ مدّعی
جنگ کے شعلوں کو بھڑکاتے رہے
کتنے بام و در کی رونق لوٹ لی
کتنے ایوانوں کو جھُلساتے رہے
آمریت کی خدائ کے لیۓ
آدمی کی کھال کھنچواتے رہے
دی ہیں کتنے زلزلوں کو دعوتیں
کتنے طوفانوں کو اُکساتے رہے
کتنے عارض کتنے کاکل کتنے لب
ظلم کے شعلوں سے جھُلساتے رہے
اپنی تکمیلِ مقاصد کے لیۓ
سازشوں کے جال پھیلاتے رہے
تن کے اُجلے من کے میلے کچھ نہ پوچھ
کتنے کالے ناگ لہراتے رہے
ایشیاء ہی ان سے خطرے میں نہیں یہ جہاں دوزخ نہ بن جاۓ کہیں

٭٭٭

برشگال

رات دن پھر اُن کے یاد آنے کا موسم آ گیا
ہر نفس دل کے دھڑک جانے کا موسم آ گیا
وہ گھٹا اُٹھی وہ پھیلی آسماں پر موجِ نور
گُل کدو ں میں آگ لگ جانے کا موسم آ گیا
نیچی نظریں پھر پیامِ زندگی دینے لگیں
حسرتوں میں جان پڑ جانے کا موسم آ گیا
ہر نظر کیفِ شباب و حُسن سے معمور ہے
بے پیے مدہوش ہو جانے کا موسم آ گیا
بے ارادہ حُسن پھر لینے لگا انگڑائیاں
خود بخود آنچل ڈھلک جانے کا موسم آ گیا
پھر حجاب آلودہ نظریں شوق ساماں ہو گئیں
پھر نقابوں کے سرک جانے کا موسم آ گیا
فکرِ دنیا کو ڈبو دو موجِ صہبا میں حمیدؔ
سر خوشی میں جام چھلکانے موسم آ گیا

قطعات

مہاتما گاندھی کے نام

اے شہیدِ امن و آزادی تجھے خون میں اپنے نہانا ہی پڑا موت کی آنکھوں میں آنکھیں ڈال کر زندگی کو مُسکرانا ہی پڑا

شاعر سے

شمعِ احساس جلا بزمِ جگر پید ا کر نئی دنیا ہے نئے شمس و قمر پید ا کر زندگی صرف محبت ہی نہیں زخم بھی ہے شعر گوئ کے لئے فکر و نظر پیدا کر

خستہ حالی سے نہ اس درجہ ہو بد دل کہ تجھے جاہ و ثروت نہ سہی دولتِ دل حاصل ہے حُسنِ کردار سے ہے عظمتِ انساں کو عروج خود پرستوں سے بہت دُور تری منزل ہے

شاعر

شعلہ کا جگر ہوں شرر آہ نہیں ہوں اُڑ جاؤں بگولوں میں پرِ کاہ نہیں ہوں دنیا مری ٹھوکر میں ہے قدموں میں زمانہ شاعر ہوں کو ئ سنگِ سرِ راہ نہیں ہوں
۔۔۔۔۔۔۔۔۔۔۔۔۔۔۔۔۔۔۔۔۔
دل میں ہو لاکھ حسرتوں کا ہجوم عشق ہوگا نہ خواہشوں کا اسیر اس سے بڑھ کر خوشی ہے کیا اے دوست تیرے غم سے جو مطمئن ہے ضمیر
۔۔۔۔۔۔۔۔۔
نہ آہیں لبوں پر نہ آنکھوں میں آنسو نہ وہ سوزِ دل کی شرر باریاں ہیں مٹا کر رہے گی مجھے غیرتِ غم یہی گر محبت کی خود داریاں ہیں

مفلسی

برق ناموسِ شرافت پہ گرا دیتی ہے عزّتِ نفس کا احساس مٹا دیتی ہے ہاۓ یہ لعنتِ افلاس ہے ایسی لعنت اپنی نظروں سے بھی انساں کو گرا دیتی ہے ۔۔۔۔۔۔۔۔۔۔۔۔۔۔۔۔۔
دین و اخلاق کا احساس مٹا دیتی ہے دامنِ زہد و تقدّس کو جلا دیتی ہے شمعِ ایماں و یقیں ہو کہ عقیدوں کے چراغ اک ہی پھُونک میں اِن سب کو بجھا دیتی ہے ۔۔۔۔۔۔۔۔۔۔۔۔۔۔۔
تجھے حاصل کہاں خود اعتمادی خود ی تیرے اسیرِ ما سوا ہے کبھی اپنی ظرف بھی دیکھ، تجھ کو زمانہ کس نظر سے دیکھتا ہے ۔۔۔۔۔۔۔۔۔۔۔۔۔
دل میں رہ رہ کے ہُوک اُٹھتی ہے یاد آتا ہے جب کوئ دم ساز جیسے گرمی کی پچھلی راتوں میں آۓ کوئل کی دُور سے آواز ۔۔۔۔۔۔۔۔۔۔۔۔۔۔۔۔۔۔۔۔۔۔

تُو نہیں ہے تو دل ہے بے قا بو اب کہاں میں، کہاں وہ لطفِ حیات یوں رواں سیلِ آتشِ غم ہے آگ برساۓ جس طرح برسات ۔۔۔۔۔۔۔۔۔۔۔۔۔۔۔۔۔۔

ہلکی ہلکی سی بارشِ انوار وہ تبسّم وہ پیار کی باتیں زلفِ شب گوں صبیح عارض پر جیسے برکھا کی چاندنی راتیں ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شبِ تیرہ میں بامِ گردوں سے گہ بہ گہ ٹُوٹتے ہیں یوں تارے جیسے چشمِ نگار سے ٹپکیں دامنِ ناز پر گُہر پارے ۔۔۔۔۔۔۔۔۔۔۔۔۔۔۔۔۔۔۔

فتنۂ حُسن جگاتا ہوا آتا ہے کوئ دیپ راہوں میں جلاتا ہوا آتا ہے کوئ اپنے قدموں کے نشانوں سے زمیں کا سینہ کہکشاں زار بناتا ہوا آتا ہے کوئ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رباعیات

(۱)

کس کو غمِ دوراں سے اماں ہے اے دوست ہر سانس پہ سولی کا گماں ہے اے دوست انکار محبت کے تقاضوں سے نہیں اتنی مجھے فرصت ہی کہاں ہے اے دوست
(۲)

کونین کی ہر چیز سے بیگانہ ہوں تُو بھُول چکا ہوں جس کو وہ افسانہ ہوں اپنی ہی سی کر میری شکایت پہ نہ جا دیوانہ ہوں دیوانہ ہوں دیوانہ ہوں
(۳)

ویرانۂ دل کو میرے آباد نہ کر نا شاد ہی اچھا ہوں مجھے شاد نہ کر اک حرفِ غلط مجھ کو سمجھ لے اے دوست ﷲ مجھے یاد نہ کر یاد نہ کر

(۴)

وہ کیف وہ مستی وہ مسرّت دیدے وہ فرصتِ جلوہ بہ فراغت دیدے ویران ہیں ترسی ہوئ آنکھیں کب سے مجھ کو وہ مرا عالمِ حیرت دیدے
(۵)

عالم جو گزرتا ہے گزر جاتا ہے خوش ہوں کہ ترا غم تو سنور جاتا ہے اے جانِ جہاں یاد جب آتی ہے تری سینے کا ہر اک داغ نکھر جاتا ہے
(۶)

شاعر ہوں مجھے طبعِ غنی ہے محبوب خود داریِ دامانِ تہی ہے محبوب غم اپنی تباہی کا نہیں ہے مجھ کو اے دوست مجھے تیرے خوشی ہے محبوب

(۷)

تُو وہ کہ ترا غم بھی عنایت اے دوست سر تا بہ قدم لطفِ نہایت اے دوست شاکی ہے تری کم نظری کا تجھ سے اک بندۂ بربادِ محبت اے دوست
(۸)

جز مرگ نہیں زیست کا حاصل ساقی ہستی کا ہر اک نقش ہے باطل ساقی کونین کو غرقِ مۓ عرفاں کر دے طوفاں سے رہے دُور نہ ساحل ساقی
(۹)

دنیا ہے ترے لطف کی سائل ساقی
خالی ہے مۓ شوق سے ہر دل ساقی
دے جام کہ کھُل جائیں خودی کے اسرار
انسان ہے ابھی آپ سے غافل ساقی

(۱۰)

سمجھا نہ مشیت کا اشارہ تُو نے عرفانِ خودی کیا ہے نہ جانا تُو نے اوروں کی طرف دیکھنے والے انساں کی؟ اپنی طرف بھی کبھی دیکھا تُو نے
(۱۱)
خطروں سے سمندر کے جو ڈر جاتے ہیں بے موت وہ ساحل پہ ہی مر جاتے ہیں ہے جن کو یقیں عزمِ جواں پر اپنے طوفان کے دھاروں سے گزر جاتے ہیں
(۱۲)

طوفانِ مصائب سے گزرنا سیکھو امواجِ حوادث سے اُبھرنا سیکھو گھبراؤ نہ آفاتِ جہاں سے ہر گز جینے کی تمنّا ہے تو مرنا سیکھو

(۱۳)

خطروں میں جیو خوف سے مرتے کیوں ہو مرنا ہی مقدّر ہے تو ڈرتے کیوں ہو اقرار کرو موت ہے پیغامِ حیات انسان کی عظمت سے مُکرتے کیوں ہو

(۱۴)

تفریق کی راہوں سے گزرنا کیسا
اُلفت میں یہ نفرت کا اُبھرنا کیسا اب تک یہ سمجھ ہی میں نہ آیا اپنی انسان کا انسان سے ڈرنا کیسا
(۱۵)

مسجد میں نہ مندر میں اماں ہے یا رب ہنگامۂ ناقوس و اذاں ہے یا رب طاری ہے وہی شیخ و برہمن کا جنوں اِس دور میں انساں کہیں ہے یا رب

(۱۶)

یہ تفرقۂ شیخ و برہمن کیوں ہے یہ برق دُوئ شامتِ گلشن کیوں ہے مذہب ہے اگر صدق و محبت کی دلیل انسان پھر انسان کا دشمن کیوں ہے
(۱۷)

ہر کام محبت سے بنانا سیکھو
انسان کا دُکھ درد مٹانا سیکھو
ہے جیت یہ مقصد تو دلوں کو جیتو
دشمن کو بھی سینے سے لگانا سیکھو
(۱۸)

نفرت کو محبت سے بدلنا سیکھو
سچّائ کی اس راہ پہ چلنا سیکھو
بہہ جاؤ نہ تنکوں کی طرح موجوں میں
جذبات کے طوفاں میں سنبھلنا سیکھو


(۱۹)
کردار ہے کیا چیز خبر ہو تو سہی
اس راز سے آگاہ بشر ہو تو سہی
دنیا سے بُرائ کا تصّور مٹ جاۓ
عیبوں پہ مگر اپنے نظر ہو تو سہی
(۲۰)

بیگانہ روی اپنی دِکھانے والو
رُعب اپنی امارت کا جتانے والو
ہو جاۓ نہ ہر دل جو خوشی سے معمور
وہ عید نہیں عید منانے والو

(۲۱)

راحت پئے مجبور نہیں ہے شاید
فطرت کا یہ دستور نہیں ہے شاید
رستے ہو ۓ زخموں کا مداوا کر لیں
یہ بھی اُسے منظور نہیں ہے شاید

(۲۲)

گُستاخ نہ ہو گا کوئ مجھ سا یا رب
میں اہل نہیں تیری رضا کا یا رب
شکوہ ہی کیا شکر کا موقع تھا جہاں
میں تیرے مشیت کو نہ سمجھا یا رب

(۲۳)

تاریخِ اُمم سامنے لاۓ کوئ
ہاں پردۂ ماضی کو اُٹھاۓ کوئ
شبیرؑ سا تسلیم و رضا کا پیکر
دیکھا ہے کیسی نے تو دِکھاۓ کوئ

متفرقات

٭ جہاں چھوڑا تھا تم نے وقتِ رخصت
وہیں ٹھہرا رہا میرا زمانہ
٭ میری آنکھوں میں مچلنے لگے اُمّید کے خواب
ایک مبہم سے تبسّم کا سہارا لیکر
٭ نہ جانے آج کیوں آنکھوں میں تیری دیکھ کر آنسو
تیرے دیوانۂ غم کو ہنسی بے اختیار آئ
٭ نہ جانے سبب دل کی بربادیوں کا
تمہاری نظر ہے کہ میری نظر ہے
٭ کوئ تمئیزِ خواص و عام نہیں
ہر نظر میں سماۓ جاتے ہیں
٭ بِلکتی رہی غیرتِ رُوحِ آدم
زمانے کی آنکھوں میں آنسو نہ آۓ

٭ ہر قدم پر دل کی بربادی کے ساماں کر دیۓ
بندہ پرور یہ تو اچھی عالم آرائ ہوئ
٭ خدا جانے کیا دل پہ اُفتاد گزرے
وہ پھر آج رہ رہ کے یاد آ رہے ہیں
٭ دیکھو تو فتنہ سازیِ چشمِ کرم نما
جیسے کسی کے دل کو دُکھایا نہیں ہنوز
٭ قرارِ یک نفس حاصل نہیں بیتابیِ دل سے
ہزاروں بجلیاں لے کر اُٹھا ہوں تیری محفل سے
٭ پیت نہیں ہے پاپ، تو غم کیا
جتنے مُنہ ہیں اتنی باتیں
٭ دل میں ہے وہی حسرتِ اظہارِ محبت
ہم نے یہ کہانی انہیں سَو بار سُنا دی
٭ آگ یہ کیسی چمن میں ہم سفیرو دیکھنا
بجلیوں کی زد میں کس کا آشیانہ آ گیا
٭ کونین پہ حاوی ہے میرا جذبِ محبت
نظروں میں مری اب کوئ بیگانہ نہیں ہے
٭ مجھ کو میری شدّتِ احساس نے مارا حمیدؔ
ہر نواۓ غم ہے آوازِ شکستِ دل مجھے
٭ ہر قیدِ تعیّن سے آزاد وہ جلوہ ہے
حیرت ہے نگاہوں کو آئینہ کو سکتہ ہے
٭ کیوں دُور ہوئ جاتی ہے اے صبحِ قیامت
کیا تُو بھی مری شامِ غریبی کی سحر ہے

٭ ازل سے وجد میں ہر تار سازِ ہستی ہے
نہ جانے کون سے نغمے سُنا دیئے تُو نے
٭ شمعِ راہِ اُلفت بن سوز آشنا ہو جا
غم سے دوستی کر لے پیکرِ وفا ہو جا زخمِ دوست و دشمن پر مرہمِ محبت رکھ
قلبِ نوعِ انساں کے درد کی دوا ہو جا
٭ خلوت گہِ خیال ہے معمورۂ جمال
طُوفانِ رنگ و بو میں بہا جا رہا ہوں
٭ وہ تمھارا مجھ سے یہ پُوچھنا کہ یہ رنگ کیوں ہے اُڑا اُڑا جو سوال خود ہی جواب تھا تمہیں یاد ہو کہ نہ یاد ہو

٭ میری عرضِ شوق کا اُن سے نہ بن آیا جواب
دیر تک گردن جھُکا کر مسکراتے ہی رہے
٭ ستار ے ہیں کہ گم گشتہ مسافر
شفق ہے یا غبارِ کارواں ہے
٭ شبِ وعدہ تو کچھ رونق در و دیوار پر ہوتی
نہیں معلوم آخِر کیوں یہ ویرانی نہیں جاتی
٭ رہ رہ کے آج دل میں تڑپتی ہے بجلیاں
کس پیکرِ جمیل کو یاد آ رہا ہوں میں

٭ اﷲ رے منّت کشِ احسانِ جراحت
دل نے دہنِ زخم سے قاتل کو دعا دی
٭ نگاہِ آشنا سے شکوۂ بے گانگی کیسا
محبت کی نظر بھی تم سے پہچانی نہیں جاتی
٭ صورتِ برق وہ آیا صفتِ ہوش گیا
حُسن کیوں منتظرِ دیدۂ حیراں ہوتا
٭ اک دعوۂ اُلفت کی خاطر کیا کیا نہ مصائب ٹوٹ گے ہم اور امینِ عشق و وفا یہ اُن کو گوارہ ہو نہ سکا
٭ تُو نے تصویرِ غمِ عشق تو کھینچی ہے حمیدؔ
اس میں کچھ خونِ تمنّا بھی نمایاں ہوتا
٭ وہ زیرِ لب کسی کارہ رہ کے مسکرانا
وہ بجلیوں کی زد میں تعمیرِ آشیانہ
٭ اک آس ہے کہ گوش بر آوازِ ناز ہے
آنکھیں تو ساتھ چھوڑ چکی انتظار کا
٭ اے نگاہِ التفاتِ دوست یہ کیا کر دیا
زندگی بھر کے لئے وقف تمنّا کر دیا
٭ موت سے بھی کیا غمِ ہستی کا ہو سکتا علاج
وہ تو کہئے دردِ الفت نے مداوا کر دیا

٭ کیا خَبر تھی حالِ دل اُن پر عیاں ہو جاۓ گا
آنکھ سے جو اشک ٹپکے گا زُباں ہو جاۓ گا
٭ حُسن اِن پردوں میں ہم آہنگ سازِ عشق ہے
اُن کی ہی آواز سُنتے ہے شکستِ دل سے ہم
٭ ہر بام طُورِ ناز ہے اُسکے لیے حمیدؔ
پہلے مذاقِ دید تو پیدا کرے کوئ شرمندۂ حجاب نہیں فطرتِ جمال
یہ نازِ دلبری ہے کہ پردہ کرے کوئ
٭ درندگی یہ درندوں میں بھی نہیں دیکھی
بشر ہی تھا کہ جو خونِ بشر سے کھیل چکا
٭ وفا کی شرم رکھ لی آج اُن محجوب نظروں نے
محبت سُرخ رُو لوٹی تمنّا کامیاب آئ
٭ اے دوست با خبر ہیں تری بے رُخی سے ہم
کر لینگے یہ ستم بھی گوارا خوشی سے ہم
٭ ہاۓ وہ عہدِ محبت کی اذّیت کوشیاں
عالمِ دل بے نیازِ گردشِ ایّام تھا
٭ تلخ کامیِ مہہ و سال گوارہ کر لوں
ایک لمحہ جو تری دید کا حاصل ہو جاۓ

٭ کھو یا ہوا عالم وہ کہاں ڈھونڈنے جاؤں
اب اُن کی نگاہوں میں جو پایا نہیں جاتا
٭ غم ساغرِ عشرت سے چھلک جاتا ہے اکثر
ہر اشک تبسّم میں چھُپایا نہیں جاتا
٭ آسُودۂ جمال بنا دو تو بات ہے
الزامِ یک نظر تو اُٹھا یا نہ جاۓ گا
٭ عارضِ شعلہ تاب سے حال ہے یہ نقاب کا
رنگِ شفق سے جس طرح سُرخ رداۓ شام ہو
٭ ہنگامۂ ہستی کی روداد بس اتنی ہے
اک لفظِ محبت ہے افسانہ در افسانہ
٭ ہر جرم سے ہیں پاک محبت کی نگاہیں
دل موردِ الزام ہے معلوم نہیں کیوں کیا عشق میں فطرت بھی بدل جاتی ہے دل کی
تکلیف میں آرام ہے معلوم نہیں کیوں
٭ یہ حُسنِ بیانِ محبت تو دیکھو
نہ اُس نے کہا کچھ نہ ہم نے سُنایا تمنّاۓ عشرت ہے کفرانِ نعمت
ترا درد پایا تو کیا کچھ نہ پایا
٭ حلاوتِ غم اگر نہ پاتے تو لطفِ ہستی کہاں اُٹھاتے
دیا ہے وہ درد زندگی بھر تمہارے حق میں دعا کرینگے
٭ مِرا ہونا تو دنیا میں نہ ہونے کے برابر تھا
نگاہوں نے تمہاری لاج رکھ لی زندگانی کی
٭ دبی چنگاریوں کو مشتعل کرتی بہار آئ
فروغِ رنگ و بُو نے آگ بھڑکا دی جوانی کی
٭ ڈھونڈنے آئ ہے کس کو صبحِ امّیدِ نشاط
میری شامِ غم کو نسبت کیا سحر کے نور سے
٭ کل چشمِ تماشا میں جو فردوسِ نظر تھا
وہ رنگِ چمن ہے، نہ وہ پھُولوں کا نکھار آج
٭ ذکر تو میری زبُوں حالی کا تھا
یہ تو کہیۓ آپ کیوں شرما گۓ
٭ وہ جشنِ بہاراں اب بھی ہے، وہ رونقِ محفل اب بھی ہے ویراں ہیں مگر یوں دیدہ و دل، جیسے کوئ ساتھی چھُوٹ گیا
٭ دل سے کیا ساز ہے خدا جانے
ناوکِ غم کبھی خطا نہ ہوا
٭ وہ بھی نکلی اک فریبِ آرزوۓ نا تمام
جس نظر کو زندگی کا مدّعا سمجھا تھا میں
٭ بیٹھ سکتا ہے کہیں چین سے وہ خانہ خَراب
آپ جس فتنۂ خوابیدہ کو انساں کر دیں

٭ گِلہ تجھ سے نہیں ساقی یہ قسمت اپنی اپنی ہے
کہ مجھ تک آتے آتے ختم دورِ جام ہو جاۓ ٹَھہر اے گردشِ ایّام کوئ آنے والا ہے
نہ ہو ایسا کہ صبحِ زندگی کی شام ہو جاۓ
٭ میں اور شکوہ سنجِ ستم ہاۓ روزگار
تم اور یہ شکایتِ بے جا لیے ہوۓ
٭ وہ لبِ رنگیں پہ ہلکا سا تبسّم ہاۓ ہاۓ
کتنے شرمندہ ہیں شرحِ آرزوۓ دل سے ہم
٭ ہواۓ دامنِ گُل اُس کو راس کیا آۓ
وہ دل جو لذّتِ خواب سحر سے کھیل چکا
٭ حمیدؔ پُوچھ نہ مجبوریِ وفا اُس کی
جو دل کا حال نگاہوں سے بھی سُنا نہ سکے
٭ دبی چنگاریوں نے صرصرِ غم کو ہوا دے دی
تمھاری سرد مہری سے تو دل ہی بُجھ گیا ہوتا
٭فروغِ جلوۂ رعنا حمیدؔ کیا کہیئے
جوابِ طُورِ ہے قسمت غریب خانے کی

٭ جلوۂ یک نگاہ کی خاطر
منّتِ صبح و شام کیا کہئے وہ زمانہ شروعِ اُلفت کا
ہر نظر اک پیام کیا کہئے
٭ پیکر خیال میں تھا عروس بہار کا
کنجِ قفس میں ہم نہ رہے آشیاں سے دُور
٭ حمیدؔ اس گھروندے سے باہر بھی نکلو
کہاں تک تمنّا کا جھُوٹا سہارا
٭ پھر کیا رہا جو حُسن کی فطرت بدل گئ
یہ کیا کہ تجھ سے دادِ وفا پا رہا ہوں میں

۔۔۔۔۔۔۔۔۔۔


ٹائپنگ: محمد ابراہیم، ان پیج سے تبدیلی اور تدوین: اعجاز عبید
ای بک: اعجاز عبید