اردو پلے (یک بابی اسٹیج ڈراموں کا انتخاب)

حصہ اوّل

پروفیسر سید معز الدین احمد فاروق

 
کمپوزر : محمد رفیع الدین
کمپیوٹر کمپوزنگ : ساحل کمپیوٹرس، حیدری روڈ، مومن پورہ، ناگپور

انتساب

اپنے مخلص دوست
محمد امین الدین
مدیر ’قرطاس‘
پرنسپل اسلامیہ جونیئر کالج آف سائنس، ناگپور
اور
اپنے تمام اساتذہ کے نام

فہرست

انتساب 2
پیش لفظ 5
مقدمہ 10
ترکی حور 25
بیگم کی بلی 45
مامتا کی چوری 55
اس منجدھار میں 68
انجام بخیر 112
دروازہ 119
بیکاری 133
نقل مکانی 142
محل سرا 176
سچ کا زہر 209
تماشا اور تماشائی 226
خوابوں کا سوداگر 261
پڑوسن کا کوٹ 287

  بسم اللہ الرحمن الرحیم

پیش لفظ

ڈراما یونانی زبان کے لفظ ’’ڈراؤ‘‘ سے مشتق ہے۔ جس کے معنی ہیں عمل یا ایکشن، ہر ملک اور ہر زبان کی تعریف کے مطابق ڈراما انسانی زندگی کی عملی تصویر مانا گیا ہے۔ قدیم زمانے سے لے آج تک فنی اصطلاح میں ڈراما کا اطلاق اس صنف ادب پر ہوتا ہے۔ جس کے الفاظ میں گفتار کی متحرک قوت اور کردار میں عمل اور ارادہ کی کیفیت موجود ہے۔
آج اردو ڈراما کا تذکرہ کرتے ہوئے صرف ماضی کی داستان اور قدیم اسٹیج اور تھیٹر کی کہانیاں دہرائی جاتی ہیں۔ اس کا سب سے بڑا سبب اسٹیج اور تھیٹر کی عدم موجودگی ہے۔ کیونکہ ڈراما صرف لفظی و کاغذی پیرہن سے مکمل نہیں ہوتا۔ یہ آرٹ زندگی کی سچی نقالی ہے اور اس کی تشکیل و تکمیل کا دارومدار نقل و حرکت پر ہے۔ یعنی ڈراما کی برکت اسٹیج اور تھیٹر کی تمثیلی حرکت ہی سے ہے۔
ڈراما خواہ اسٹیج کا ہویا ریڈیو کا جہاں تک فنی لوازم و عناصر کا تعلق ہے اس کے ترکیبی اجزا سوا معدودے چند ہیئتی تبدیلیوں کے یکساں ہوتے ہیں۔ جب ہم فن ڈراما کا ذکر کرتے ہیں تو لازمی طور پر ہمارے سامنے تھیٹر اور اسٹیج کی تشکیل ہوتی ہے۔ ہر ڈرامے میں حسب ذیل اجزا یا عناصر ترکیبی کا ہونا ضروری ہے۔ اگر ان میں سے ایک بھی کمزور یا غائب ہو تو وہ ڈراما مکمل شکل اختیار نہیں کر سکتا۔
۱۔ کہانی کا مرکزی خیال یا تھیم
۲۔ پلاٹ
۳۔ آغاز
۴۔ کردار و سیرت نگاری
۵۔ مکالمہ
۶۔ تسلسل، کشمکش اور تذبذب
۷۔ تصادم
۸۔ نقطہ عروج و کلائمکسClimax) )
۹۔ انجام
سید معز الدین فاروق صاحب نے جس ماحول میں آنکھیں کھولی وہ گھرانہ ایک تعلیم یافتہ اور نہایت ہی مہذب گھرانہ ہے۔ انھوں نے موروثی وضعداری کو قائم رکھا اور ایم اے (اردو) کا امتحان امتیازی حیثیت سے کامیاب ہو کر ناگپور مہاودیالیہ (ماریس کالج) میں بحیثیت لکچرار ملازمت کا سلسلہ شروع کیا۔ بچپن سے مطالعہ کا شوق رہا اس لئے مختلف اصناف ادب کا مطالعہ رہا لیکن خصوصیت سے ان کا رجحان فن ڈراما پر رہا۔ آپ کے حقیقی ماموں جان محترم سید رفیع الدین صاحب(سابق صدر شعبۂ اردو و عربی، ناگپور مہاودیالیہ) بھی فن ڈرامہ پر کافی دسترس رکھتے ہیں۔ انھوں نے کئی سال قبل ڈرامہ ’’کشمکش‘‘ لکھا۔ جو زیور طباعت سے آراستہ ہو کر قبول عام کی سند حاصل کر چکا ہے اور ناگپور یونیورسٹی کے بی اے کے نصاب میں شامل بھی رہا ہے۔ حال ہی میں آپ کا دوسرا ڈرامہ ’’زہر و تریاق‘‘ بھی کتابی شکل میں شائع ہوا ہے۔ اسی زمانے میں فاروق صاحب کے بھی دل میں یہ بات گھر کر گئی تھی کہ ڈرامے پر ایک کتاب منظر عام پر آ جانا چاہئے اور یہ خواب ’’بس اسٹاپ‘‘ کی صورت میں شرمندہ تعبیر ہوا۔ اس کے بعد یکے بعد دیگرے ’’اسٹیج ڈرامے ‘‘(اردو کے یک بابی ڈراموں کا انتخاب)، ’’اسٹیج پلے ‘‘ (ایک ایکٹ کے منتخب اردو اسٹیج ڈرامے)، ’’اردو اسٹیج‘‘(معرکۃ الآراء منتخب ہندوستانی یک بابی ڈراموں کے اردو تراجم) اور ’’ہندی ڈرامے ‘‘ (منتخب ہندی یک بابی ڈراموں کے اردو تراجم) کی اشاعت عمل میں آئی جوان کی تالیفات ہیں۔
فاروق صاحب ڈرامہ لکھنے اور ڈرامہ اسٹیج کرنے کی فکر میں رہتے تھے کہ ان کی ملاقات جناب سندر بوٹانی صاحب سے ہوئی۔ سندر بوٹانی اس وقت A. G. Office میں ملازم تھے اور کامیاب ڈراما ڈائرکٹر کی حیثیت سے مشہور تھے۔ فاروق صاحب نے ان کی صحبت سے بہت کچھ سیکھا، ڈراموں میں کچھ فنی خامیاں انہیں نظر آتیں تو وہ بوٹانی صاحب سے مشورہ کر کے اسے دور کرنے کی کوشش کرتے۔ ناگپور مہاودیالیہ ایک گورنمنٹ کالج ہونے کی وجہ سے فاروق صاحب کا تبادلہ اور نگ آباد گورنمنٹ کالج میں ہو گیا۔ جہاں آپ کی ملاقات ڈاکٹر عصمت جاوید(صدر شعبہ اردو) اور صفی الدین صدیقی صاحب (صدر شعبہ نفسیات) سے ہوئی۔ نیز ان دونوں صاحبان کی نگرانی میں انہیں کے ڈرامے مرزا جنگی(عصمت جاوید) اور اخبار کا دفتر (صفی الدین صدیقی) فاروق صاحب نے پہلی مرتبہ اسٹیج کیا۔ اس طرح ’’کشمکش‘‘ محرک بنا۔ بوٹانی صاحب نے فن ڈرامہ پر آپ کی رہنمائی فرمائی اور ڈاکٹر عصمت جاوید و صفی الدین صدیقی صاحب کی رہنمائی میں انھوں نے پہلا ڈرامہ اسٹیج کیا اور اسی دن سے اس فن کو جلا بخشتے رہے آپ کی یہ کوشش کتابی صورت میں آپ لوگوں کے ہاتھوں میں ہے۔
کہتے ہیں کہ ’’اندر سبھا‘‘ اردو کا پہلا ناٹک یا منظوم ڈراما اس لحاظ سے تسلیم کیا جاتا ہے کہ وہ سلیس و فصیح اردو کی تصنیف ہے۔ فن ڈراما پر کام کرنے والوں میں جن جن قلم کاروں کے نام لئے جاتے ہیں ان میں آغا حشر کاشمیری، امتیاز علی تاج، مرزا ہادی رسوا، محمد حسین آزاد، عبدالحلیم شر ر، منشی پریم چند، علی سردار جعفری، اوپندر ناتھ اشک، خواجہ احمد عباس، کرشن چندر، سعادت حسن منٹو، عصمت چغتائی، راجندر سنگھ بیدی، ڈاکٹر محمد حسن و اقبال نیازی وغیرہ قابل ذکر ہیں۔
’’بس اسٹاپ‘‘ آپ کی پہلی تصنیف ہے اس کے بعد آپ نے شہرۂ آفاق ڈرامہ نگاروں کے منتخب ڈراموں کا ایک انتخاب ’’اسٹیج ڈرامے ‘‘ کے نام سے مرتب کیا۔ اس کتاب میں کل ۲۵ ڈرامے ہیں۔ ان ڈراموں کے انتخاب کو مرتب کرنے کا ان کا مقصد یہ تھا کہ بعض کتب نایاب ہو چکی ہیں۔ جو ڈھونڈنے سے بھی نہیں ملتی۔ ایم اے کے نصاب میں ایک پرچہ ڈرامہ اور فکشن پر ہوتا ہے۔ جس کے لئے طلباء و طالبات کو دشواریوں کا سامنا کرنا پڑتا ہے۔ اگر اس طرح کا ایک انتخاب منظر عام پر آ جائے تو طلباء و طالبات ایک بڑی پریشانیوں سے نجات پا جائیں گے۔ اس طرح ’’اسٹیج ڈرامے ‘‘ زیور طباعت سے آراستہ ہوئی۔ اسٹیج ڈرامے کی اشاعت پرداد و تحسین کے خطوط موصول ہوئے۔ جس سے فاروق صاحب کو حوصلہ ملا۔ اس طرح انھوں نے اس کام کو آگے بڑھاتے ہوئے مزید ایک کتاب ’’اسٹیج پلے ‘‘ کے نام سے چند برس پہلے مرتب کی اس کتاب میں کل ۳۷ ڈراموں کا انتخاب شامل ہے۔ یہ وہ ڈرامے ہیں جو اسٹیج ڈرامے میں شریک نہیں ہو پائے تھے۔ کتابی صورت میں شائع کی۔
ڈراموں کے انتخاب پر کام کرتے کرتے چند ایسے بھی ڈرامے آپ کی نظروں سے گزرے جن کا تعلق مختلف زبانوں سے ہے اور ان ڈراموں کو مقتدر قلم کاروں نے اردو کے قالب میں ترجمے کر کے ایک بے بہا اور گرانقدر اضافے کئے ہیں۔ انھیں ڈراموں میں سے چند ڈراموں کا انتخاب ’’اردو اسٹیج‘‘ میں آپ نے شریک کیا ہے۔ اس کتاب میں کل ۳۲ ڈراموں کا انتخاب شامل ہے۔ جن کا تعلق سنسکرت، ہندی، مراٹھی، پنجابی، بنگالی، گجراتی، تیلگو، کنٹر اور اڑیا زبان سے ہے۔ یہ تمام ڈرامے اپنی اپنی زبان کے شہرہ آفاق ڈرامے تصور کئے جاتے ہیں اور ان کے مترجم بھی کوئی معمولی حیثیت کے فنکار نہیں ہیں۔ انھوں نے ان ڈراموں کے ترجمہ میں زبان و بیان کا خاص خیال رکھا ہے اور اس کی روح کو مجروح نہیں ہونے دیا۔ زبان صاف سادہ اور رواں دواں ہے۔ ’’اردو اسٹیج‘‘ کو مرتب کرتے وقت آپ کے خیال میں یہ بات بھی آئی کہ مختلف زبانوں کے تراجم کے ساتھ چند ایسے بھی ڈرامے شریک کئے جائیں جو اردو زبان کے مشہور و معروف ڈرامے شمار کئے جاتے ہیں۔ آپ کی نظر انتخاب ڈاکٹر محمد حسن صاحب ڈرامہ ’’ضحاک‘‘ اور سید رفیع الدین صاحب کے ڈرامہ ’’زہر و تریاق‘‘ پر رکی اور اس طرح آپ نے ان ڈراموں کو اردو ڈراموں کی نمائندگی کے طور پر بھی شامل کتاب کیا ہے۔ ڈاکٹر سید رفیع الدین کا ڈرامہ زہر و تریاق ایک طویل ڈرامہ ہے۔ اس لئے اس کی تلخیص شامل کی گئی ہے۔
جن ہندی ڈراموں کے ترجمے فاروق صاحب نے کئے ہیں ان کے ڈراموں کے انتخاب میں وی این انسٹی ٹیوٹ شعبہ ہندی کے پروفیسر حضرات پروفیسر بی این کلکرنی صاحب اور صدر شعبہ ہندی محترمہ رینو بالی صاحبہ اور وی این انسٹی ٹیوٹ کے سابق طالب علم اور ترپوڑے کالج میں ہندی لکچرار جناب پرمود شرما صاحب نے تعاون کیا۔
آپ ان مختلف زبانوں کے تراجم کو پڑھئے اور لطف اٹھائیے۔ اس کام کو پایۂ تکمیل تک پہچانے کے لئے میں فاروق صاحب کو دل کی گہرائیوں سے مبارک باد پیش کرتا ہوں۔ ’’ہندی ڈرامے ‘‘(منتخب ہندی یک بابی ڈراموں کے اردو تراجم) اسی سلسلہ کی ایک کڑی ہے۔ آپ نے ہندی کے مشہور و معروف ڈراموں کے اردو ترجمے خود کئے ہیں اور اس بات کا خیال رکھا ہے کہ کسی بھی طرح ان ڈراموں کی روح مجروح نہ ہو۔ امید کرتا ہوں کہ فن ڈرامہ کی ترویج و اشاعت میں وہ مزید دل جمعی سے کام کر کے اسے مزید استحکام پہنچائیں گے۔
اشاعتی مراحل میں ان کا اگلا قدم ’’اردو ڈرامے ‘‘(یک بابی ڈراموں کا انتخاب) ہے جس میں کل ۲۷ ڈرامے شریک کئے گئے ہیں۔ یہ تمام ڈرامے بھی ان شہرہ آفاق ڈرامہ نگاروں کے ہیں جنھوں نے اس فن کو عروج کی منزلوں تک پہنچانے میں کسی قسم کی کوئی کسر نہیں چھوڑی ہے۔
مجھے امید ہی نہیں یقین کامل ہے کہ ’’اردو ڈرامے ‘‘ بھی ان کی دیگر تالیف کی طرح قبول عام کی سند پائیں گی اور اردو ادب کی اس صنف سے رابطہ رکھنے والوں کے لئے تفریح طبع اور تفنن طبع کے لئے دل بستگی کے مواقع فراہم کرے گی۔
میری نیک خواہشات جناب فاروق صاحب کے ساتھ ہے۔ اس امید و یقین کے ساتھ کہ قارئین ضرور اس کتاب کو پسند کریں گے۔
ناگپور محمد امین الدین
۳۰!اپریل ۲۰۰۶ء؁ ایڈیٹر قرطاس، ناگپور

  مقدمہ

ڈراما یونانی زبان کا لفظ ہے جس کے معنی ’’کرنا‘‘ یا کر کے دکھانا ہے۔ اسے ’’زندگی کی نقل‘‘ اور ’’انسانی زندگی کی عملی تصویر‘‘ بھی کہا گیا ہے۔ چونکہ اس عملی تصویر کو اسٹیج پر دکھایا جاتا ہے۔ اس لئے اسٹیج سے اس کا بڑا گہرا تعلق ہے۔ اس کی صحیح تعریف یہ ہوئی کہ ’’ڈراما‘‘ ایک ایسی صنف ہے جس میں زندگی کے حقائق نقل کے ذریعہ اسٹیج پر ابھارے جاتے ہیں۔ نیلمس نے زندگی کے مادی حقائق سے ڈرامے کے ربط کو حسب ذیل خاکے میں واضح کیا ہے۔ (ڈاکٹر محمد حسن)
ڈراما عالمی ادب میں ایک امتیازی مقام رکھتا ہے اور فنون لطیفہ کی قدیم ترین شکلوں میں سے ہے۔ کہا جاتا ہے کہ ڈرامے کی تاریخ دو ہزار سال پرانی ہے۔ یہ بھی کہا گیا ہے کہ ڈرامے کا وجود دنیا کے وجود کے ساتھ ساتھ ہوا ہے۔ وحشیوں کا جنگلوں اور پہاڑوں میں لباس و آرائش سے بے نیاز ہو کر آگ روشن کرنا، ناچنا، گانا اور اپنی بولیوں میں آوازیں نکالنا ڈراما ہی تھا ا ور ان کے حالات، زندگی اور وقت کا آئینہ دار تھا۔ جیسے جیسے انسانی تہذیب ترقی کرتی گئی ویسے ویسے وحشت، جہالت اور ظلم کم ہوتا گیا اور دیومالا اور ناٹک کتھاؤں کو رواج ملا۔ مذہبی جوش نے دلوں کا متاثر کیا۔ تہذیب ترقی کے زینے چڑھنے لگی اور اس دور میں دھارمک یا مذہبی تشکیل عمل میں آئی۔ جس وقت پڑھنے کا رواج نہ تھا، دلی جذبات کا اظہار موزونیت کے ساتھ ہوتا تھا اور اپنے اپنے انداز میں مطلب کا اظہار زبان و عمل سے کیا جاتا تھا۔ اس سے ہم سمجھ سکتے ہیں کہ ہر انسان فطری طور پر اداکار ہے۔ یا یہ کہ ڈراما انسانی زندگی کا جزو ہے۔ اس زمانے میں جب کہ پتھر کی رگڑ سے آگ پیدا کی جاتی تھی انسانی زندگی آج سے کہیں زیادہ ڈرامائی تھی۔ صدیوں پہلے انسانی زندگی اور کردار کو پیش کرنا ایک کھیل تھا۔ زندگی کی اسی نقل کا نام بعد میں ڈراما ہوا۔ (عشرت رحمانی)
قدیم ڈرامے پانچ قسم کے ہیں۔ تریجی کومیڈی، میلو ڈرامہ، فارس، برا سک اور اوپیرا۔ عشرت رحمانی نے ڈرامے کی اقسام کو ذیل کے خاکے سے واضح فرمایا ہے :
ڈراما
(الف) اعلیٰ (ب)ادنیٰ
ٹریجیڈی کومیڈی

(ٹریجی کومیڈی) میلو ڈراما فارس برا سک اوپیرا
اعلیٰ ڈرامے کے دو مخصوص اصناف ہیں۔ تریجیڈی یا حزینہ اور کومیڈی یا طربیہ:
ٹریجیڈی یا حزینہ:
ڈبلو شلگل کا قول ہے ’’ٹریجیڈی تخیل کی معراج ہے۔ ‘‘ اسی لئے یہ صنف بھی ڈرامے کی معراج ٹھہری۔ جے ایس کلٹف نے اس صنف کی حسب ذیل تعریف کی ہے :
’’ٹریجیڈی کا تعلق انسانی فطرت کے عمیق اور گہرے مگر حقیقت آشنا پہلو سے ہے۔ زندگی کے مختلف شعبوں میں جو مصائب ظہور پذیر ہوتے ہیں انہیں عملی طور پر دکھا کر ہمدردی اور دلسوزی کے جذبات کو ٹریجیڈی کے ذریعہ متحرک مشتعل کیا جاتا ہے۔ ‘‘
کومیڈی یا طربیہ:
یہ ڈرامے تفنن اور تفریح طبع کا سامان ضرور مہیا کرتے ہیں۔ لیکن طنز و مزاح میں سنجیدگی اور متانت کا ہونا شرط ہے۔ تا کہ ظرافت سطحی کامیڈی نہ بن جائے۔
ٹریجی کامیڈی:
ان ڈراموں میں ٹریجیڈی (حزن) اور کامیڈی(طرب) دونوں شامل ہوتے ہیں۔
میلو ڈرامہ:
ان ڈراموں میں مختلف واقعات کی کڑیاں کھینچ تان کر جوڑی جاتی ہیں۔
فارس:
ان ڈراموں کا مقصد عامیانہ تفریح و تفنن سے زیادہ نہیں ہوتا۔
برا سک:
ان ڈراموں کا مقصد ادنیٰ درجے کی تفریح تفنن اور ہنسنے ہنسانے کا سامان مہیا کرنا ہے۔
اوپیرا:
منظوم ڈراموں کو کہتے ہیں۔
ڈرامے کے عناصر ترکیبی حسب ذیل ہیں :
۱۔ پلاٹ
۲۔ کہانی کا مرکزی خیالTheme) )
۳۔ آغاز
۴۔ کردار
۵۔ مکالمہ
۶۔ تسلسل، کشمکش اور تذبذب
۷۔ تصادم
۸۔ نقطہ عروج و کلائمکسClimax) )
۹۔ انجام

ارسطو کے قول کے مطابق ڈرامے کے عناصر حسب ذیل ہیں :
۱۔ کہانی
۲۔ کردار
۳۔ الفاظ
۴۔ خیال
۵۔ آرائش
۶۔ موسیقی
مغرب نے یونان کی تقلید کی اور مشرق نے ہندوستان کی اس لئے سنسکرت اور قدیم ہندی ڈراموں کے عناصر ترکیبی کو جاننا بھی ضروری ہے۔ قدیم ہندی یا سنسکرت ڈراما کا خاکہ حسب ذیل ہے :

(۱) (۲) پلاٹ (۳) (۴)
دیج(بیچ) بندو(بوند) پتاکا پرکاری کاریہ(انجام)
(واقعہ جس پر قصہ کی بنیاد ہو۔ یعنی مرکزی خیال) (اصل داستان کے فروعی واقعات جن کے بیان سے تسلسل پیدا کیا جاتا ہے۔ ) (جھنڈا زیبائش یا زیب داستان کے لیے وضاحت و تفصیل) (اصل داستان کے وہ ٹکڑے جن میں بڑے کردار شریک نہیں ہوتے) (ڈراما کا اختتام)

خاکہ نمبر ۲:کاریہ انجام کی تکمیل کے لیے جن شرائط کو ملحوظ رکھا گیا ہے اس کی تشریح ذیل کے نقشہ سے ہوتی ہے :

آرمبھ(ابتدا) تین پراپتی آشا فی یا تاپتی پھلاگم
(انکشاف) (کامیابی کی توقعات) (درمیانی کڑیوں کو جوڑنے اور ربط و تسلسل قائم رکھنے کے لیے رکاوٹوں کو دور کرنا) (اختتام)
(عشرت رحمانی)
اسٹیج اور تھیٹر کے لوازمات میں :
۱۔ تھیٹر کی عمارت اور ڈیکوریشن
۲۔ تماشائی
۳۔ ڈائرکٹر اور پرومپٹر
۴۔ اسٹیج کی اداکاری
۵۔ میک اپ
۶۔ موسیقی
۷۔ روشنی اور آرائشی سامان ۔ ۔ ۔ اور ۔ ۔ ۔
۸۔ سین و سنیری
بنیادی اہمیت رکھتے ہیں۔
ماہرین کی تقسیم کے مطابق اسٹیج کمپوزیشن کا خاکہ حسب ذیل ہے۔ (ڈاکٹر محمد حسن)
اوپری بایاں دروازہ اوپری وسطی دروازہ دروازہ عقبی اوپری

وسطی دایاں

بایاں اوپری بایاں
اوپری
دروازہ (۲) اوپری وسطی (۳) اوپری دروازہ
دایاں عقبی اوپری
دایاں
بایاں دروازہ نچلا بایاں
(۴)
نچلا بایاں دروازہ نچلا وسطی
(۵) دروازہ عقبی دایاں نچلا
(۶)دایاں دروازہ عقبی نچلا
دایاں
فٹ لائٹ
---------ہال---------

اس مسئلے میں اختلاف ہے کہ ڈرامے کا وجود پہلے ہندوستان میں ہوا یا یونان میں پروفیسر مسعود حسن رضوی ادیب لکھتے ہیں :
’’ہندوستان میں ناٹک کا وجود بہت قدیم زمانے سے ہے۔ اب سے صدیوں پہلے جب دنیا کے بہت سے ممالک ناٹک یا ڈرامے کا نام بھی نہ جانتے تھے۔ ہمارے ہندوستان میں بھاس، کالی داس، سری ہرش اور بھوبھوتی کے سے ڈرامہ نگار موجود تھے۔ ‘‘
ہندوستان میں صدیوں تک فنکاروں نے وہ شاہکار پیش کئے ہیں جن کے بغیر ڈرامے کی تاریخ نامکمل رہے گی۔
کالیداس کا ڈرامہ ’’شکنتلا‘‘، گلشن ادبیات ہند کا’’ سدا بہار پھول‘‘ ہے۔ اگر کالیداس ڈرامہ نویسی کا دل ہے۔ تو شکنتلا اس دل کا درد ہے۔ ولیم جونز نے اس ڈرامے کا انگریزی میں ترجمہ کیا ہے۔ گونئے بھی اس ڈرامے سے بے حد متاثر ہیں۔ اس کے علاوہ شری ہرش کے ڈرامے۔ رتناولی اور ناگ نندابھوبھوتی کے ڈرامے۔ مالتی دیو، ہنومان بہت مشہور ہیں۔
ہندوستانی ادب میں ڈرامے کی مضبوط روایت رہی ہے۔ کالی داس، دگن تگ، وساکھ دت اور بھاس جیسے ڈرامہ نگار ہماری ادبی تاریخ میں موجود ہیں۔ جن کے ڈراموں کو دنیا کی ادبی تاریخ میں معیاری ڈراموں کا درجہ حاصل رہا۔ تعجب ہے کہ ان ڈرامہ نگاروں کے دور میں ہمیں مختصر ڈرامے بھی مل جاتے ہیں جبکہ اس زمانے میں یک بابی ڈراموں کا وجود نہ تھا۔
ہندوستانی ادب میں ڈرامہ کے لئے ’’ناٹک‘‘ کی اصطلاح استعمال کی جاتی ہے۔ ’’ناٹک‘‘ لفظ ’’نٹ‘‘ سے بنا ہے اور ’’نرتیہ‘‘(ناچ) بھی اسی لفظ سے مشتق ہے۔ ناچ عملی طور پر پیش کیا جاتا ہے لیکن ناٹک عملی طور پر اسٹیج پر پیش کئے جانے کے ساتھ ساتھ لکھا بھی جاتا ہے۔ اس طرح ’’ناٹک‘‘، ’’ناچ‘‘ سے ہٹ کر ادب کی اصناف میں شامل ہو گیا ہے۔ لیکن اسٹیج پر پیش کئے جانے کے باعث وہ ادب کی دوسری اصناف سے منفرد ہو جاتا ہے۔
ہندوستان میں ڈرامے کی مضبوط و مستحکم روایت رہی ہے لیکن پندرہویں سے انیسویں صدی تک بعض سیاسی اور سماجی وجوہات کے سبب یہ صنف فروغ نہ پا سکی اور شمالی ہند میں تو ڈرامہ بھانڈوں اور نقالوں سے آگے نہ بڑھ سکا۔ صدیوں بعد بیداری کی نئی لہر کے ساتھ جہاں ہندوستانی ادب نے فروغ پایا وہاں ڈرامے نے بھی ترقی کی۔ لیکن ڈرامے کا تعلق چونکہ ’’ٹیم ورک‘‘ سے ہے اس لئے اس کی ترقی کی رفتار دیگر اصناف ادب کی بہ نسبت سست رہی۔
اس مسئلہ میں محققین کی ایک رائے نہیں ہے کہ پہلا ڈرامہ اردو میں کون سا لکھا گیا۔ ڈاکٹر مسیح الزماں نے آغا حسن امانت کے ڈرامے ’’اندر سبھا‘‘ کو اردو کا پہلا ڈراما قرار دیا ہے۔ پروفیسر مسعود حسن رضوی ادیب واجد علی شاہ کے رہس ’’رادھا کنھیا کا قصہ‘‘ کو اردو کا پہلا ڈرامہ مانتے ہیں۔ عشرت رحمانی کی رائے میں نواب واجد علی شاہ کا ڈراما اردو کا پہلا ڈراما ضرور ہے لیکن وہ ڈراما ’’افسانہ عشق‘‘ ہے ’’رادھا کنھیا کا قصہ‘‘ نہیں۔
تحقیق سے یہ بات ثابت ہے کہ واجد علی شاہ کا ڈراما ’’رادھا کنھیا کا قصہ‘‘ اردو کا پہلا ڈراما ہے جو ۱۸۴۲ء اور ۱۸۴۳ء کے درمیان لکھا گیا۔ اس ڈرامے میں چونکہ موسیقی اور ناچ گانوں کی کثرت ہے اس لئے اسے (Dance Drama) کہتے ہیں۔ اس ڈرامے میں پلاٹ کے ساتھ ساتھ ظرافت کا رنگ بھی ہے۔ ماحول سے تحریک پا کر سید آغا حسن امانت لکھنوی نے ۱۲۶۸ھ میں ڈراما ’’اندر سبھا‘‘ لکھا۔ چونکہ اسے پہلی مرتبہ عوام کے سامنے اسٹیج پر پیش کیا گیا اس لئے ڈرامے کی تاریخ میں اس کی اہمیت بہت بڑھ جاتی ہے۔ ۱۸۴۶ء میں بمبئی میں گرانٹ روڈ تھیٹر قائم ہوا۔ جواس شہر میں ڈرامے کے عروج کا باعث ہوا۔ جب ’’اندر سبھا‘‘ اسٹیج کیا گیا تو اردو ڈراموں کی ترقی کے امکانات واضح ہو گئے۔
’’اندر سبھا‘‘ کا اسٹیج ہونا ان پارسیوں کے ڈراما کلب اور ناٹک منڈلیوں کی کاوشوں کا نتیجہ ہے جواس وقت بمبئی میں سرگرم کار تھیں۔ پارسی وکٹوریہ کمپنی کے علاوہ جن تھیٹر کمپنیوں نے معیاری اردو ڈرامے اسٹیج کیئے ان میں :
۱۔ اوریجنل تھیٹریکل کمپنی۔
۲۔ وکٹوریہ ناٹک کمپنی۔
۳۔ الفریڈ تھیٹریکل کمپنی۔
۴۔ نیوالفریڈ تھیٹریکل کمپنی۔ ۔ ۔ ۔ اور ۔ ۔ ۔
۵۔ اولڈ پارسی تھیٹریکل کمپنی۔
کے نام قابل ذکر ہے۔ ان کے علاوہ حسب ذیل ڈرامہ کمپنیاں مشہور تھیں :
۱۔ راجپوتانہ مالوہ تھیٹریکل کمپنی(جودھ پور)
۲۔ لائٹ آف انڈیا تھیٹریکل کمپنی(آگرہ)
۳۔ بے نظیر اسٹار آف انڈیا تھیٹریکل کمپنی(علی گڑھ۔ آگرہ)
۴۔ انڈین امپیریل تھیٹریکل کمپنی(فتح پور)
۵۔ دی مون آف انڈیا تھیٹریکل کمپنی(حیدرآباد۔ دکن)
۶۔ میڈن تھیٹرز لمیٹیڈ(کلکتہ)
۷۔ شیکسپیئر تھیٹریکل کمپنی(بمبئی)
۸۔ جمعدار تھیٹریکل کمپنی
۹۔ امپیریل تھیٹریکل کمپنی
۱۰۔ انڈیا امپیریل تھیٹریکل کمپنی(دھول پور)
۱۱۔ پارسی الگزینڈر تھیٹریکل کمپنی(دہلی)
۱۲۔ البرٹ تھیٹریکل کمپنی آف پنجاب(پنجاب)
۱۳۔ حیدرآباد ڈرلیٹک کلب(حیدرآباد۔ دکن)
۱۴۔ بیاکل بھارت تھیٹریکل کمپنی(میرٹھ)
۱۵۔ بال روم تھیٹریکل کمپنی(حیدرآباد۔ دکن)
۱۶۔ دال منڈی تھیٹریکل کمپنی(حیدرآباد۔ دکن)
۱۷۔ انڈین شیکسپیئر تھیڑیکل کمپنی(آغا حشر کاشمیری)
۱۸۔ سوراج ناٹک کمپنی(بریلی)
۱۹۔ گلوب تھیٹر آف پنجاب(لا ہور)
۲۰۔ پریم پرچارلی ناٹک منڈلی(پنجاب)
۲۱۔ سیتارام تھیٹر
۲۲۔ مہاراجہ چرکھاری کی کمپنی(چرکھاری)
۲۳۔ پنجاب ریفارمنگ تھیٹریکل کمپنی(لا ہور)
اور
۲۴۔ سرکاری تھیٹریکل کمپنی(ٹونک)
اس دور میں ونایک پرشاد طالب بنارسی کا ڈراما ’’لیل و نہار‘‘ بھی بہت مشہور ہوا۔ ونایک پرشاد کا تعلق وکٹوریہ تھیٹریکل کمپنی سے تھا۔ جسے سیٹھ بالی والا پارسی نے قائم کیا تھا۔
اردو ڈرامے کی تاریخ میں یہ پہلے ڈراما نگار ہیں۔ جنھوں نے منظوم مکالموں کی جگہ نثر کودی اور ہندی گانوں کی جگہ اردو گانوں کو۔ اس دور کے ڈراما نگاروں میں سید مہدی حسن احسنؔ لکھنوی اور پنڈت نرائن پرشاد بیتاب کے نام قابل ذکر ہیں۔ مہدی حسن احسنؔ کا تعلق الفریڈ تھیٹر سے تھا۔ جسے ایک پارسی ایکٹر کاؤس جی نے قائم کیا تھا۔ آپ کے ڈراموں میں ہیملٹ، چندراوتی، چلتا پرزہ اور دلفروش مشہور ہیں۔ احسن کے بعد پنڈت نرائن پرشاد بیتاب الفریڈ کمپنی سے وابستہ ہوئے اور رامائن، مہابھارت اور گورکھ دھندا جیسے ڈرامے، اس ڈراما کمپنی نے پیش کئے۔ آغا حشر کاشمیری کو اردو کا شیکسپیئر کہا جاتا ہے۔
آغا حشر کاشمیری الفریڈ ناٹک منڈلی بمبئی سے بھی وابستہ رہے ہیں۔ اس کے علاوہ اور ڈراما کمپنیوں نے بھی آپ کے ڈرامے اسٹیج کئے۔ خود بھی تھیٹریکل کمپنی قائم کی جس کا نام شیکسپیئر تھیٹریکل کمپنی رکھا۔ چونکہ حشر نے تمام ڈرامے تھیٹریکل کمپنیوں کے لئے لکھے ہیں اس لئے عوام کے مذاق اور معیار کو ملحوظ رکھنا پڑا۔ یہی وجہ ہے کہ آپ کے ڈرامے فنی لحاظ سے بہت بلند نہیں کہے جا سکتے۔ ان کے ڈراموں میں عوام کے تفنن طبع کا سامان موجود ہے۔ مزاح عامیانہ اور مذاق سوقیانہ ہے۔ مکالموں میں تنوع پایا جاتا ہے۔ کہیں کہیں عبارت مقفیٰ ہوتی ہے۔ نثر کے ساتھ ساتھ اشعار کی کثرت ہوتی ہے۔ حشرؔ کی انداز تحریر خود حشر کی زبانی سنئے :
’’میں اپنے لکھنے کا طرز آپ کو بتاؤں گا تو آپ ہنسیں گے۔ مرثیہ نگاری کی طرح میں بھی ڈرامے کوکئی ٹکڑوں میں تقسیم کر دیتا ہوں۔ مرثیہ نگار کے ہاں، ساقی نامہ، تلوار کی تعریف، صبح کا سماں، گرمی کی شدت، سراپا، رجز، بین وغیرہ ہوتے ہیں اور میرے ہاں عشقیہ مناظر، فراق کاس ماں، دغا بازی، مکاری، عیاشی اور دربار داری ظرافت گانے وغیرہ ہوتے ہیں۔ ‘‘
حشر کے مشہور ہیں :سلور کنگ، آفتاب محبت، نیلی چھتری، دام حسن، خوبصورت بلا، خود پرست، یہودی کی لڑکی، بھارت منی، انوکھا مہمان، ہندوستان، ترکی حور، پہلا پیار، آنکھ کا نشہ، سیتا بن بانس، رستم و سہراب، سماج کا شکار اور دل کی پیاس وغیرہ۔
آغا حشر کا تعلق اس دور سے ے جب پارسی اور اردو اسٹیج پوری طرح ابھر کر ڈوب گئے تھے۔ ان کے ڈراموں کو چار ادوار میں تقسیم کیا گیا ہے۔ پہلے دور کے ڈراموں میں ’’اسیر حرص‘‘، دوسرے دور کے ڈراموں میں ’’سفید خون‘‘، تیسرے دور کے ڈراموں میں ’’یہودی کی لڑکی‘‘ اور چوتھے دور کے ڈراموں میں ’’ترکی حور‘‘ اور ’’ رستم و سہراب‘‘ ان کے مشہور ڈرامے ہیں۔ ان کے معاصرین میں بیتاب، عباس، ذائق، نشتر، شاد، نازاں، آغا شاعر، قزلباش دہلوی، محشر انبالوی، رحمت علی رحمت، مائل دہلوی، آرزو لکھنوی، نورالدین مخلص حیدرآبادی، آرزو بدایونی، نیر دہلوی اور متاخرین میں پنڈت رادھے شیام، ریاض دہلوی، شیر محمد خان، منشی ی اور علی اعظم، کشن چندر زیبا، بشمبر سہائے بیکل، سید دل اور شاہ دل لکھنوی، شمس لکھنوی، عرشی لکھنوی، منشی وحشی دہلوی، محمد اسماعیل، رامیشور ناتھ، مرزا رشید، ایم اے تائب اور حلیم احمد شجاع مشہور ڈراما نگار گزرے ہیں۔
۱۹۳۰ء کے آخر تک اردو اسٹیج زوال پذیر ہو گیا۔ اس دور میں جو ڈراما نگار ڈرامے کے فن سے گہری واقفیت رکھتے تھے۔ ان میں ایک احمد شجاع ہیں۔ جنھوں نے روایتی طرز کے ڈرامے لکھے اور دوسرے سید امتیاز علی تاج ہیں جنھوں نے ۱۹۲۲ء میں ڈراما ’’انارکلی‘‘ لکھا۔ یہ امتیاز علی تاج کا وہ شاہکار ہے جسے جدید دور کا نقش اول کہا گیا ہے۔ مکالمہ اور کردار نگاری غیر معمولی ہے۔ کرداروں کی سیرت فطرت انسانی کے عین مطابق ہے۔ اس ڈرامے کے کردار شہنشاہ اکبر، سلیم، انار اور دل آرام کو پیش کرنے میں ڈراما نگار نے فن سے گہری واقفیت کا مظاہرہ کیا ہے۔ واقعات کی ترتیب بہت خوب ہے اور کشمکش اور تصادم اپنے عروج پر ہے۔
ڈرامہ ’’انارکلی‘‘ کے متعلق امتیاز علی لکھتے ہیں :
’’جہاں تک میں تحقیق کر سکا ہوں تاریخی اعتبار سے یہ قصہ بے بنیاد ہے۔ میں کیا کروں، میرے لئے یہ ڈراما تاریخ نہیں ہے تاریخی واقعات کی صحت کی فکر مجھے تاریخ پڑھتے وقت ہوتی ہے۔ میرے ڈرامے کا تعلق محض روایت سے ہے۔ بچپن سے انار کلی کی فرضی کہانی سنتے رہنے سے حسن و عشق اور ناکامی و نامرادی کاجو ڈراما میرے تخیل نے مغلیہ حرم کی شوکت و تجمل میں دیکھا اس کا اظہار ہے۔ اب تک جن لوگوں نے اسے سنا ان کا اس امر پر اختلاف ہے کہ یہ ٹریجڈی سلیم اور انارکلی کی ہے یا اکبر اعظم کی لیکن انارکلی میں اتنی دل آویزی ہے کہ نام تجویز کرتے وقت کسی دوسرے امر کو ملحوظ رکھنا میرے لئے ناممکن تھا۔ ‘‘
گذشتہ چالیس سال کی مدت میں فلمی صنعت نے ڈرامے کے اسٹیج کو بے حد متاثر کیا اور اردو ڈرامے کا اسٹیج ایک مرتبہ پھر وقت کے سمندر میں ڈوب کر ابھرا۔
اس دور میں جن ڈراما نگاروں نے ڈرامے لکھے یا ترجمے کئے۔ ان میں پنڈت برج موہن دتاتریہ کیفی، نیاز فتح پوری، نواب جعفر علی خاں اثر لکھنوی، ڈاکٹر نور الحسن ہاشمی، عنایت اللہ دہلوی، سید ابن الحسن فکر، جگت موہن لال رواں، سجاد حیدر یلدرم، عزیز احمد، مجنوں گورکھپوری، پنڈت سدرشن، ساغر نظامی، روش صدیقی، قاضی عبدالغفار، سید احمد شاہ بخاری پطرس، ڈاکٹر عابد حسین وغیرہ کے نام قابل ذکر ہیں۔
ترقی پسند تحریک جس نے ہماری سوسائٹی کی بنیادیں ہلا دیں اور ہمارے قدامت پرست معاشرے کے کھوکھلے پن کو بے نقاب کیا ناممکن تھا کہ ڈرامے جیسی صنف کو متاثر نہ کرتی۔ انجمن ترقی پسند مصنفین کے تحت انڈین پیپلز تھیٹر اسوسی ایشن (IPTA) قائم کی گئی جہاں سردار جعفری کا ڈراما ’’یہ کس کا خون ہے ‘‘، بلراج سا ہنی کا ڈرامہ ’’جادو کی کرسی‘‘ اور خواجہ احمد عباس کا ڈراما ’’زبیدہ‘‘ جیسے ڈرامے اسٹیج کئے گئے۔ اسٹیج ڈراموں میں یک بابی ڈراموں کا آغاز ہوا جو مغربی اثرات کا نتیجہ تھا۔ یہ صنف بہت مقبول ہوئی کیونکہ کم سے کم وقت میں عوام کے شوق کی تکمیل کایہ موثر ذریعہ ثابت ہوئی۔
’’اردو ڈرامے ‘‘ یک بابی ڈراموں ہی کا انتخاب ہے۔ یک بابی ڈرامہ فن ڈرامہ کی ایک مستقل صنف ہے۔ جس کے آغاز کی تاریخ بہت دلچسپ ہے۔ مغربی ممالک میں طویل ڈراموں کے اسٹیج ہونے کے دوران جو وقفے ہوا کرتے تھے ان میں ناظرین کی دلچسپیاں قائم رکھنے کے لئے پردے کے سامنے یک بابی ڈرامے اسٹیج کئے جاتے تھے۔ جن کی حیثیت چٹکلوں اور لطیفوں سے زیادہ نہ تھی۔
ڈبلیو ڈبلیو جیکب کی ایک کہانی کی بنیاد پر لوئی این پارکر نے اسی نوعیت کا ایک یک بابی ڈرامہ منکیز پا (بندر کا پنجہ) لکھا جو ۱۹۰۳ء؁ میں لندن کے مشہور ویسٹ اینڈ تھیٹر میں طویل ڈرامے کے دوران وقفے میں اسٹیج کیا گیا۔ ناظرین اس مختصر یک بابی ڈرامے سے اصل طویل ڈرامے کی بہ نسبت زیادہ محظوظ ہوئے۔ اس ڈرامے کی کامیابی کے بعد ڈرامہ نگار اس صنف ڈرامہ کی طرف متوجہ ہوئے اور موثر یک بابی ڈراموں کے لکھنے کا سلسلہ شروع ہوا۔
اسٹیج ڈرامے اردو میں نا مقبول رہے۔ جس کی تین بڑی وجوہات ہیں :
۱۔ ہمارا معاشرہ نقالی کو معیوب سمجھتا ہے۔ جب کہ ’’اسٹیج ڈرامہ‘‘ کوری نقالی نہیں بلکہ اس سے ہٹ کر اور بہت کچھ ہے جسے سمجھنے کی ضرورت ہے۔
۲۔ ہمارا معاشرہ خواتین کو اسٹیج پر آنے کی اجازت نہیں دیتا۔
میرا مشاہدہ یہ ہے کہ ایک پختہ ڈرامہ آرٹسٹ خواتین کا رول نہایت کامیابی کے ساتھ پلے کر سکتا ہے اور یہی اس کے آرٹ کی کامیابی بھی ہے۔
اس طرح بغیر کسی تنازعے میں پڑے ہوئے اسٹیج کے اس مسئلے کو مستقل بنیادوں پر حل کیا جا سکتا ہے۔
جب اسٹیج کے لوازمات کو استعمال کئے بغیر صرف ہاتھوں کی جنبش کا علامتی انداز اختیار کیا جا سکتا ہے تو مرد عورتوں کے علامتی رول میں اسٹیج پرکیوں نہیں آ سکتے اور اب تو اپنے چہرے پرما سک لگانے کی تکنیک کے بعد یہ کام اور بھی آسان ہو گیا ہے۔
اگر پختہ ڈراما آرٹسٹ موجود نہ بھی ہو تو بھی علامتی لباس کو مخصوص کر لینے اور چہرے پرما سک لگا لینے کے بعد بلا تکلف مرد خواتین کے رول پلے کر سکتے ہیں۔ میرے دوست ڈاکٹر ہنومنت نائیڈو ہندی اسٹیج پراس کے کامیاب تجربے کر چکے ہیں۔ اب رہ جاتا ہے نسوانی آواز کا مسئلہ تو کوئی پختہ ڈرامہ آرٹسٹ اگر یہ آواز بنا لے تو کیا کہنے۔ ۔ ۔ ورنہ جب ہم ڈرامے میں خواتین کے رول کو علامتی رول مان چکے تو میری رائے میں فطری آواز کا تبدیل کرنا کوئی ضروری نہیں۔ خواتین کی مجلس میں ڈرامہ اسٹیج ہو تو مرد اور عورت دونوں کا رول خواتین پلے کر سکتی ہیں اور مردوں کی مجلس میں اسٹیج ہو تو یہ دونوں رول مرد پلے کر سکتے ہیں۔ اس طرح پروہ کا مسئلہ اسٹیج کے راستے کی رکاوٹ نہیں بنتا۔
۳۔ ڈرامہ اسٹیج کرنے کے لئے ا سکرپٹ(Script) بہ مشکل دستیاب ہوتے ہیں۔ جس کے باعث ڈراموں کے اس انتخاب کے مرتب کرنے کی ضرورت شدت سے محسوس کی گئی۔ ان تمام تفصیلات کے باوجود اگر ہم ڈرامہ اسٹیج نہ کرنا چاہیں تو بہرحال دیگر اصناف ادب کی طرح پوری دلچسپی کے ساتھ ڈرامہ کا مطالعہ تو کیا ہی جا سکتا ہے۔ اور ڈراموں کو شامل نصاب بھی کیا جا سکتا ہے۔ سائنس کی ایجاد نے ریڈیو اور ٹیلی ویژن ڈراموں کو رواج دیا۔
ریڈیو ڈراما سب سے زیادہ مقبول ہے۔ کیونکہ اسے پیش کرنے میں اسٹیج کی ضرورت نہیں۔ ٹیلی وژن ڈرامہ ریڈیو ڈرامے سے مختلف اور اسٹیج اور فلم سے زیادہ قریب ہے۔ لیکن نشری دائرہ عمل میں ریڈیو سے قریب ہے۔
ڈرامے کے جدید اصناف میں اسٹریٹ پلے بھی ایک صنف ہے۔ جسے اسٹیج اور اسٹیج کے لوازمات سے بے نیاز راستوں اور نکڑوں پر پیش کیا جاتا ہے۔ صفدر ہاشمی اسٹریٹ پلے لکھنے والوں میں ممتاز مقام رکھتے ہیں۔ جنھوں نے اسٹریٹ پلے پیش کرنے کے دوران ہی اپنی جان دی۔
جن جدید ڈراما نگاروں نے اپنی تصانیف سے اس فن کو فروغ دیا ان میں عظیم بیگ چغتائی(مرزا جنگی)، اشتیاق حسین قریشی(نقش آخر)، پروفیسر محمد مجیب (خانہ جنگی)، عصمت چغتائی(دھانی بانکپن)، ابراہیم جلیس(اجالے سے پہلے)، اوپندر ناتھ اشک (قید حیات، تولئے اور پڑوسن کا کوٹ)، خواجہ احمد عباس (انناس اور ایٹم بم)، کرشن چندر (دروازے کھول دو، کتاب کا کفن)، علی سردار جعفری(یہ کس کا خون ہے)، ڈاکٹر محمد حسن(میرے اسٹیج ڈرامے)، جاوید اقبال (گردش)، اصغر بٹ (امانت)، حبیب تنویر (آگرہ بازار)، امتیاز علی تاج(اف یہ بیویاں)، مرزا ادیب (شیشے کی دیوار)، آغا بابر(سیز فائر)، بانو قدسیہ(آدھی بات)، عشرت رحمانی (لال قلعہ کی شام)، ساگر سرحدی (خیال کی دستک)، ابراہیم یوسف(دھوئیں کا آنچل اور طنزیہ ڈرامے)، نور العین علی (بہو کی تلاش، سوچ لیجئے، کینسر) ممتاز ہیں ان کے علاوہ ڈاکٹر سید رفیع الدین صاحب کا ڈراما ’’کشمکش‘‘ اور ’’زہر تریاق‘‘، اقبال کے نظریہ کے ترجمان ہے اور غیر معمولی ادبی خوبیوں کے حامل ہیں۔
اردو کے متعلق یہ عام غلط فہمی ہے کہ اس میں اسٹیج ڈرامے نایاب ہیں۔ اس میں شک نہیں کہ ہندوستان کی دیگر زبانوں کی طرح اردو میں بھی یہ صنف ادب دیگر اصناف سے بہت پیچھے رہ گئی ہے، لیکن یہ بھی حقیقت ہے کہ اردو میں ایسے ڈرامے مل جاتے ہیں جس کی نظیر دیگر ہندوستانی زبانیں مشکل ہی سے پیش کر سکیں گی۔ ڈاکٹر محمد حسن کا ڈرامہ ’’ضحاک‘‘ اور ڈاکٹر سید رفیع الدین اشفاق کا ڈرامہ ’’زہر و تریاق‘‘ اور کرشن چندر کے ڈرامے ’’دروازے کھول دو‘‘ اور ’’کتاب کا کفن‘‘ اس کی روشن مثالیں ہیں۔
’’اردو ڈرامے ‘‘ اردو کے ایسے یک بابی ڈراموں کا انتخاب ہے جو معیاری ہیں۔ زندگی کے مسائل سے بحث کرتے ہیں۔ نصاب میں شامل کئے جا سکتے ہیں اور سہولت سے اسٹیج ہو جاتے ہیں۔
سید معز الدین احمد فاروق

اردو ڈرامے (یک بابی اسٹیج ڈراموں کا انتخاب)

کارل مارکس کی آواز
یہ علم و حکمت کی مہرہ بازی یہ بحث و تکرار کی نمائش
نہیں ہے دنیا کو اب گوارا پرانے افکار کی نمائش
تری کتابوں میں اے حکیم معاش رکھا ہی کیا ہے آخر
خطوط خمدار کی نمائش! مریز و کج دار کی نمائش
جہان مغرب کے بت کدوں میں کلیسیاؤں میں مدرسوں میں
ہوس کی خوں ریزیاں چھپاتی ہے عقل عیار کی نمائش
۔ ۔ ۔ علامہ اقبالؔ۔ ۔ ۔

آغا حشر کاشمیری

ترکی حور

ڈراما ترکی حور ۱۹۲۲ء؁ میں میڈن تھیٹرز لمٹیڈ کی اوریجنل پارسی الفریڈ تھیٹریکل کمپنی کے لیے تصنیف کیا گیا۔
پلاٹ : (قسطنطنیہ کے ایک امیر کبیر فرید بے کا داماد عارف، امیر زیاد کی صحت میں مے نوشی اور بے راہ روی کا عادی بن جاتا ہے۔ بدمستی کے عالم میں اپنی بیوی رشیدہ اور خسرو فرید بے کے ساتھ بدکلامی کرتا ہے۔ فرید بے اس پر خفا ہو کر عارف کو اپنے گھر سے نکال دیتا ہے لیکن نیک اور وفا شعار بیوی اس حالت میں بھی شوہر کا ساتھ دیتی اور باپ کو چھوڑ کر عارف کے ساتھ ہوٹل میں رہنے لگتی ہے۔ ایک دن عارف ہوٹل کے منیجر سے کسی بات پر لڑ پڑتا ہے اور پولیس کے ہاتھوں گرفتار ہو کر ہتھکڑی پہننے پر مجبور ہو جاتا ہے۔ عارف کو نمک حلال بوڑھا ملازم ایاز اس کے ضمانت کا انتظام کر کے حوالات سے چھڑاتا ہے۔ عارف کی آوارگی اور فضول خرچی بڑھتی جاتی ہے اور آخرکار بدخواہ و خودغرض دوستوں ناظم اور غانم کے مشورے سے ساری جائداد کوڑیوں کے مول فروخت کر دیتا ہے۔ یہ کل رقم بری صحبت میں برباد ہوتی ہے۔ اس عرصہ میں وفادار ایاز ۲۵ ہزار روپیہ کی رقم خاندان کو تباہی سے بچانے کے لیے عارف کی تجوری سے غائب کر لیتا اور کہیں چھپا دیتا ہے مگر عارف سوتے سے جاگ اٹھتا ہے اور ایاز کو پکڑ کر روپیہ طلب کرتا ہے۔ اس کے انکار کرنے پر ایاز کو ہنٹروں سے مارتا ہے اور پھر پولیس کے حوالے کر دیتا ہے۔ اس طرح بے گناہ ایاز کو چھ ماہ کے لیے قید با مشقت کی سزا بھگتنا پڑتی ہے۔
عارف کا دوست امیر زیاد، رشیدہ کو دھوکے سے بلا کر اس کی عزت پر حملہ کرنا چاہتا ہے مگر وہ مردانہ وار مقابلہ کرتی اور آبرو بچا کر وہاں سے نکل جاتی ہے۔ رشیدہ کا نیک دل بھائی بہن کو سمجھاتا ہے، کہ اس آوازہ منش شوہر کا ساتھ چھوڑ کر مصائب برداشت کرنے سے باز آئے اور ہمارے ساتھ آرام سے رہے۔ رشیدہ انکار کرتی ہے۔ عارف انور کو رشیدہ سے باتیں کرتے سن لیتا ہے اور اسے سخت سست کہہ کر گھر سے نکال دیتا ہے۔ بعد میں انور بہن کی مصیبتوں کو دیکھ کر عارف سے چوری چھپے رشیدہ کو خرچ کے لیے پانچ سو روپے دیتا ہے لیکن عارف ان روپوں کو دیکھ کر رشیدہ کے چال چلن پر شبہ کرتا ہے۔ اس دوران عارف ساری پونجی لٹا کر مفلس و قلاش ہو جاتا ہے اور رشیدہ محلہ والوں کے کپڑے سی کر تنگی ترشی سے گھر کا خرچ چلاتی ہے۔ عارف بیوی پر چھری سے حملہ کر کے اسے زخمی کر دیتا ہے، وہ بے ہوش ہو جاتی ہے۔ ایک لڑکی لیلیٰ کی مدد سے اس موقعہ پر پولیس بلا لی جاتی ہے۔ عارف کو گرفتار ہوتا ہے۔ مگر رشیدہ ہوش میں آ کر پولیس کو بیان دیتی ہے کہ مجھے عارف نے چھری نہیں ماری، ترکاری کاٹتے ہوئے لگ گئی ہے۔ عارف کو رہا کر دیا جاتا ہے۔ اس اثنا میں انور آ کر عارف کو پانچ روپیہ کے راز سے آگاہ کرتا اور لعنت ملامت کرتا ہے۔ عارف کی آنکھیں کھل جاتی ہیں۔ وہ بیوی سے معافی مانگتا اور بد چلنی سے توبہ کرتا ہے۔ اس موقعہ پر ایاز جیل سے رہا ہو کر آتا اور ۲۵ ہزار روپیہ کی رقم جواس نے کہیں زمین میں دفن کر رکھی تھی مالک کے قدموں میں ڈال دیتا ہے۔ اس کھیل کے چند اقتباسات ملاحظہ ہوں)

ایکٹ پہلا
سین دوسرا
محل فرید بے
(رشیدہ مغموم ہے ایاز اس کے پاس کھڑا ہے۔ )
ایاز :شب بھرکا جاگا ہوا چاند ستاروں کی روشنی گل کر کے سو گیا۔ رشیدہ بیٹی ساری رات آنکھوں میں گزار دی۔
رشیدہ :ایاز بابا!انتظار کرتے کرتے ستاروں کی آنکھیں پتھرا گئیں مگر وہ ابھی تک نہ آئے۔
ایاز :شام سے صبح ہو گئی۔ کب تک جاگو گی۔ جاؤ ذرا آرام کر لو۔
رشیدہ :آج تک کبھی ایسا نہیں ہوا، وہ رات کو کبھی گھر سے باہر نہیں رہے۔
ایاز :میری گود میں پل کر جوان ہوئے ہیں، مجھے ان کی نیکی اور شرافت پر بھروسہ ہے۔ گھبراؤ نہیں، کوئی کام ہو گیا ہو گا۔
رشیدہ :بابا! مجھے جاگتے میں ڈراؤنے خواب نظر آ رہے ہیں۔ جی میں ہول پھرتے ہیں، آخر وہ کہاں ہیں ؟
ایاز :کل شام گھر سے کس کے ساتھ گئے تھے ؟
رشیدہ :غانم کے ساتھ۔
ایاز :کیا کہوں، غانم آپ کا دور کا رشتہ دار ہے مگر مجھے اس کا چال چلن ٹھیک نہیں لگتا۔
رشیدہ :وہ تو اسے رشتہ دار ہی نہیں اپنا سب سے بڑا خیر خواہ دوست بھی سمجھتے ہیں۔
ایاز : (طنزیہ) دوست کے پردے میں دشمن۔ ۔ ۔ میں نے یہ بال دھوپ میں سفید نہیں کیے۔ عارف میاں کو خبردار بھی کر چکا ہوں کہ یہ غانم دوستی کے غلاف میں چھپی ہوئی تلوار ہے۔ آج جھک کر ملے گا اور کل گلا کاٹ کر الگ ہو جائے گا۔
(فرید بے آتا ہے۔ )
فرید بے :بس آج سب ختم ہو گیا۔ عزت آبرو خاک میں مل گئی۔
رشیدہ : (گھبرا کر کھی ہو جاتی ہے) ابا جان! کیا ہوا؟ بتائیے ؟
فرید :کیا نہیں ہوا۔
رشیدہ :وہ کہاں ہیں ؟ان کی کوئی خبر؟
فرید :میں دیوان خانہ کی کھڑی سے سڑک کی طرف دیکھ رہا تھا کہ ایک کار دروازے پرآ کر رکی۔
رشیدہ : اور ۔ ۔ ۔ پھر۔ ۔ ۔ ؟
فرید :کار کا پٹ کھلا۔ ۔ ۔ اندر سے پہلے غانم اترا، اور پھر اس نے ہاتھ پکڑ کر عارف کو اتارا۔
رشیدہ :یا اللہ خیر۔ ۔ ۔ ان کو کیا ہوا؟
ایاز :وہ آ گئے حضور؟
فرید :ہاں۔ ۔ ۔ آ گیا۔ ۔ ۔ مگر کس حال میں ؟
رشیدہ : (گھبرا کر) کس حال میں ؟ان کے دشمنوں کو کیا ہوا؟
فرید :عقل سے خارج۔ ۔ ۔ نشہ میں چور۔
رشیدہ/ایاز : (ایک ساتھ) کیا نشہ میں ؟
فرید :بد ذات غانم کی دوستی کاپہلا پھل۔
رشیدہ :ابا جان!وہ ایسا نہیں کر سکتے، شاید آپ کو شبہ ہوا ہے۔
(عارف لڑکھڑاتا ہوا اندر آتا ہے سب دیکھ کر رنج اور حیرت سے اسے تکتے ہیں۔ عارف لڑکھڑاتا ہے۔ ایاز آگے بڑھ کر اسے سنبھالنے لگتا ہے۔ )
ایاز :میرے آقا!
عارف : (نشہ میں) ہٹ جاؤ۔
فرید :افسوس!ان آنکھوں کو یہ دن بھی دیکھنا تھا۔
رشیدہ :ہائے میرے اللہ یہ کیا۔
عارف : (ہنس کر) سب کچھ گھوم رہا ہے۔ زمین آسمان۔ ۔ ۔ گھر۔ ۔ ۔ تم سب۔
فرید :عارف۔ مجھے امید تھی کہ دنیا میں ٹھوکریں کھانے کے بعد اب تم سنبھل کر چلو گے۔ مگر آج معلوم ہوا کہ بربادی کا آخری راستہ بھی اختیار کر لیا۔
عارف :جی ہاں !میں نے ریس میں دولت لٹائی۔ لیکن آپ کی نہیں وہ دولت میری تھی، بزرگ سمجھ کر معاف کرتا ہوں، آئندہ ایسے سخت الفاظ نہ کہئے گا۔
رشیدہ :یہ آپ کسے کہہ رہے ہیں ؟
عارف :آپ کے والد بزرگوار کو۔
(ہنستا ہے۔ )
فرید :کیا کہوں۔ ۔ ۔ کن لفظوں میں اس نالائقی پر ملامت کروں۔ نادان! بد چلن دوستوں کے نرغے میں تو نے عزت اور شرافت ڈبوئی۔ اپنی ہی نہیں اپنے ساتھ اس بے زبان کی زندگی بھی برباد کی۔
(رشیدہ روتی ہے۔ )
عارف :کیا فرمایا۔ میں تو کچھ نہیں سمجھا۔
فرید :میں نے شریف خاندان کا نیک فرد سمجھ کر اس کا ہاتھ تیرے ہاتھ میں دیا تھا۔ اگر جانتا کہ تو ایک دن دولت، عزت، شرم و حیا سب سے مفلس ہو جائے گا تو۔
عارف : (کھڑا ہوتا ہے) تو مجھ سے شادی کرنے کے بدلے کسی سونے کے بت کے ساتھ اپنی بیٹی کی شادی کر دیتے۔
رشیدہ : (چیخ کر روہانسی آواز میں) عارف۔ ۔ ۔ ہوش میں آؤ۔
فرید :ہوش کھو چکا ہے۔ نہ زبان قابو میں ہے نہ دماغ۔
ایاز :عارف میاں ! ہوش میں آئیے۔ یہ آپ کے بزرگ ہیں۔
عارف :میں رشتے اور بزرگی کا لحاظ کر رہا ہوں، انھیں اپنی عزت کا پاس ہے تو خاموش رہیں۔
فرید :خاموش ہی رہنا ہو گا، یہ حالت نہ دیکھ سکتا ہوں نہ برداشت کر سکتا ہوں، مگر ایک مرتبہ پھر کہتا ہوں کہ زندگی کے درخت پر زہر چھڑکنے سے باز آ۔
(جاتا ہے۔ )
(عارف ہنستا ہے۔ )

ایکٹ دوسرا
سین چوتھا
ہوٹل کا کمرہ
(رشیدہ خاموش غمگین بیٹھی نظر آتی ہے۔ پھر اٹھ کر کھڑکی کی طرف جاتی، باہر دیکھتی اور مایوس ہو کر پلٹتے ہوئے کہتی جاتی ہے۔ )
رشیدہ :’’زبان تھک گئی، لفظ ختم ہو گئے۔ آنکھوں کے چشمے آنسو بہا بہا کر سوکھ گئے، لیکن افسوس عارف نظر اٹھا کر اپنے خوف ناک انجام کی طرف نہیں دیکھتے۔ ابھی تک گھر نہیں آئے۔ جانے اس وقت کہاں ہوں گے۔ کوئی آ رہا ہے۔ شاید آ گئے۔ انھی کی آواز۔ یہ کس سے جھگڑا کر رہے ہیں۔ ‘‘
(عارف اور انور داخل ہوتے ہیں۔ )
عارف :اتنی دیر سے کان کھاتے رہے۔ کہہ دیا کہ میں اپنے برے بھلے کو خود سمجھتا ہوں۔ اب زبان سے چھری کٹاری برسانا بند کرو۔
انور :بھائی جان نصیحت اپنوں ہی کوکی جاتی ہے۔
عارف :یہ نصیحت کا نہیں اعتراض اور حملے کا لہجہ ہے۔
انور :آپ کی رائے بھی آپ کی طرح غلطی کے راستے پر ہے، میں جو کچھ کہتا ہوں محبت سے۔ دل کے دکھ سے اوب سے کہتا ہوں۔
عارف :جب تمہارے والد نے داماد اور بیٹی سے قطع تعلق کیا تھا، اس وقت آ کر انھیں نصیحت نہیں کی تھی، آج مجھے سمجھانے آئے ہو۔ میری نظر میں تمہاری نصیحت اتنی ہی حقیر ہے، جتنے تمہارے باپ بے رحم!
رشیدہ :عارف!
انور :آپ میرے بزرگ والد کی شان میں سخت اور کڑوے الفاظ استعمال کر رہے ہیں۔
عارف :سچے الفاظ کڑوے ہی ہوتے ہیں۔
انور :میرے صبر کا امتحان نہ لیجئے۔
عارف :میں اوپر سے فرشتہ اور اندر سے شیطان نہیں ہوں، میرا دل اور زبان ایک ہے، اگر تم صاف اور سچ سن سکتے ہو تو یہاں ٹھہرو، نہیں سن سکتے تو۔ ۔ ۔
رشیدہ :یہ کیا کہہ رہے ہو اور کس سے کہہ رہے ہو؟
عارف :رشیدہ میں دولت لٹاتا ہوں اپنی، جوا اور سٹہ کھیلتا ہوں اپنے پیسہ سے مجھ میں دنیا بھرکی برائیاں ہیں، اگر تم کو اس برے شوہر کے ساتھ جینا مرنا ہے تو جس طرح باپ کو چھوڑ دیا اسی طرح آج بھائی کو بھی چھوڑ دینا ہو گا۔
رشیدہ :میرے بھائی کا قصور؟
عارف :شوہر کا حکم!
انور :رشیدہ!یہ باپ سے منہ موڑنے کا نتیجہ ہے، ابھی اس سے بھی بد تر دن اور سخت حکم سنو گی!
عارف :تم محبت کو نفرت کا سبق پڑھا رہے ہو، میں کہتا ہوں یہاں سے چلے جاؤ۔
رشیدہ :بھائی جان! جو نصیب دکھائیں گے وہ دیکھنا ہو گا۔
انور :بدنصیب بہن!مصیبت آنے سے پہلے انسان کی عقل خراب ہو جاتی ہے۔ مجھے ڈر ہے کہ ایک دن یہ دیوانہ پن اس خاندان کی شرم، آبرو ڈبو کر تمہیں بھی اس گھر سے نکال باہر کرے گا۔
رشیدہ :بھائی!عورت بیاہ کا جوڑا پہن کر شوہر کے گھر میں آتی ہے، اور کفن پہن کر شوہر کے گھر سے باہر ہوتی ہے۔
انور :اچھا تو خدا کی مرضی۔ تم آنے والی مصیبتوں پر رونا اور بدقسمت باپ بھائی تمہاری بدنصیبی پر روئیں گے۔
(انور چلا جاتا ہے اور رشیدہ رونے لگتی ہے۔ )
عارف :آنسو بہا رہی ہو۔ بھائی سے جدا ہونے کا اتنا غم اور ان کے ہاتھوں شوہر کی بے عزتی کی کوئی پرواہ نہیں۔
رشیدہ : (آنسو پونچھتے ہوئے) یہ آپ کیا کہہ رہے ہیں ؟
عارف :ٹھیک ہی تو کہہ رہا ہوں۔
رشیدہ :خدا کے لیے ذرا انصاف کیجئے آپ کے حکم اور آپ کی عزت پر میں نے باپ، بھائی، اپنے بیگانے سب کا ساتھ قربان کر دیا اور اب بھی آپ یہ سوچتے ہیں ؟
عارف :پھر دکھ کا ہے کا ہے ؟ہنسو! خوش رہو! بلائیں ٹلیں۔
(ہنستا ہے۔ )
رشیدہ : (تلملا کر مضمحل انداز میں مسکراتی ہے) میں بہت خوش ہوں۔
(ایاز آتا ہے۔ )
ایاز : (عارف سے) حضور!یہ کیا؟ خود میاں انور سے سنا، پھر بھی یقین نہیں آتا۔ کیا آپ نے سچ مچ اپنے بھائی اور ہمدرد کو گھر میں آنے سے منع کر دیا؟
عارف :ہاں !وہ اسی سلوک کے قابل ہیں۔
ایاز :افسوس!آپ اپنے سچے خیرخواہوں، بزرگوں، عزیزوں کی نصیحت سے برا مانتے ہیں۔ جا گئے، خدا کے لیے جاگیے۔ باپ دادا کا مکان اور باغیچہ بیچ کر سوا لاکھ آئے تھے ان میں سے بھی چند دنوں میں صرف پچیس تیس ہزار باقی رہ گئے ہو ں گے۔ یہ بھی خدانخواستہ ان یار مار ساتھیوں کے غلط مشوروں سے ختم ہو جائیں گے۔
عارف :تمہاری بلاسے۔
ایاز :میرے منہ میں خاک، اس کے بعد باقی زندگی کس سہارے سے کٹے گی۔ یہ دولت کی جونک، دسترخوان کے کتے، دوست آشنا سب منہ پھیر کے بھاگ جائیں گے۔ عزت اور چین دونوں خطرے میں ہیں۔ اللہ کے واسطے (ہاتھ جوڑ کر) اب بھی مان جائیے بڑے حضور اور انور میاں کو منا لائیے اور ان کے مشورہ سے کوئی اچھا کاروبار کر لیجئے۔
عارف :بکو مت! میں سٹے کے سنہری کاروبار سے اپنی کھوئی دولت دوبارہ پیدا کرنا چاہتا ہوں، اور میرے ہمدرد، میرے غم خوار دو ست اس کوشش میں میرے ساتھ ہیں، مجھے کل کی کوئی فکر نہیں۔
(جاتا ہے۔ )
رشیدہ :جو تھا غلطی سے کھو چکے اور جو رہ گیا ہے وہ بھی غلط رائے اور جھوٹی امید میں کھو دینا چاہتے ہیں۔
ایاز :بہو بیگم، دعا کے سوا کوئی بس بھی تو نہیں۔
رشیدہ :ایاز بابا۔ ۔ ۔ تم گھرکے بزرگ ہو۔ خاندان کے خیرخواہ ہو۔ ۔ ۔ بچاؤ۔ اس تباہی اور مستقبل کی تاریکی سے بچاؤ۔
ایاز :انھوں نے بزرگوں کی نصیحت اور ادب سے منہ پھیر لیا۔ میری التجائیں ٹھکرا دیں۔ کچھ سمجھ میں نہیں آتا۔
رشیدہ :جس طرح ہو سکے یہ بچی کھچی پونجی بچاؤ۔
ایاز :اگر قسمت مہربانیوں کی قیمت مانگتی ہے تومیں تمہاری اور عارف میاں کی بہتری کے لیے اس دنیا کی کمائی ہوئی ساری نیکیاں اور اس دنیا کی جنت نذر کرنے کو تیار ہوں۔ میری بچی! کہو میں کیا کروں ؟
رشیدہ :میں کیا بتاؤں، جو ممکن ہو، جو تم سے ہو سکے۔
ایاز :اچھا!اب تم جاؤ، آرام کرو، میں اپنی سی کر گزرنے کی سوچتا ہوں۔
رشیدہ :خدا تمہارا مددگار ہو۔
(جاتی ہے۔ )
ایاز : (علیحدہ خود سے)’’شاید جو میں سوچتا ہوں، وہی یہ بھی چاہتی ہے۔ سب کچھ جا چکا ہے۔ ۔ ۔ تھوڑا وقت اور تھوڑی رقم جو باقی ہے، یہ بھی اڑ گئی تو اندھیرا ہی اندھیرا ہے۔ ۔ ۔ کیا کروں۔ ۔ ۔ بس یہی آخری راستہ ہے۔ ‘‘
(جاتا ہے۔ )
(پردہ)

ایکٹ تیسرا
سین چوتھا
خواب گاہ
(عاف سو رہا ہے، اس کے پلنگ کے پاس تجوری ہے۔ ایاز منہ سر لپیٹے اندر آتا ہے۔ آہستہ آہستہ چل کر چاروں طرف دیکھتا اور عارف پر نظر ڈال کر تجوری کی طرف بڑھتا ہے۔ عارف کروٹ بدلتا ہے۔ ایاز سہم کر ایک طرف بیٹھتا ہے۔ پھر اٹھ کر تجوری کھولتا اور نوٹوں کی گڈیاں، نکال کر رومال کی گٹھری بھر لیتا ہے، کچھ سوچتا ہے اور جلدی سے باہر چلا جاتا ہے۔ گٹھری باہر رکھ کر اندر آتا ہے، ایک گڈی نوٹوں کی لیے ہوئے ہے۔ گڈی تجوری میں رکھ کر اپنے آپ آہستہ آہستہ بڑبڑاتا ہے : ’’ارادہ تو تھا کہ لٹانے کے لیے ایک کوڑی بھی نہ چھوڑوں، مگر ڈر ہے کہ ناگہانی آفت سے ان کا دماغ نہ الٹ جائے اس لیے کچھ رقم واپس تجوری میں رکھ دیتا ہوں۔ ‘‘ ایاز تجوری بند کرتا ہے، کھٹ سے آواز ہوتی ہے۔ عارف کی آنکھ کھل جاتی ہے اور وہ اک دم گھبرا کر اٹھتا ہے۔ )
عارف :کون؟کون؟ چور۔ ڈاکو؟(ایاز کو دیکھ کر) ایاز!تو اس وقت یہاں ؟ (ایاز رک کر خاموش کھڑا ہے۔ عارف گھبرا کر پلنگ کے نیچے آتا اور لپک کر تجوری کھول کے دیکھتا ہے) یہ کیا۔ ۔ ۔ ؟ نوٹوں کی بیس گڈیوں میں سے تجوری میں صرف ایک گڈی۔ ۔ ۔ (گڈی باہر نکال کر ایاز سے) بتا!باقی نوٹ کہاں ہیں ؟ ایاز!۔ ۔ ۔ سنتا نہیں۔ ۔ ۔ میں پوچھتا ہوں کہاں ہیں نوٹ؟
ایاز :میں نہیں جانتا۔
عارف :سانپ کی طرح آ کر سوئے ہوئے مالک کو اندھیرے میں ڈسنا جانتا ہے۔ لیکن نوٹوں کا حال نہیں جانتا۔ بتا تجوری سے نوٹ کہاں گئے ؟
ایاز :تجوری میں ان لوگوں کے روپئے ہوئے ہیں جن کوکل کی فکر ہوتی ہے۔ اپنے نوٹ غانم کی جیب اور سٹے کے بازار میں تلاش کیجئے۔
عارف :نمک حرام۔ کمینے۔ تو نے میرے روپئے نہیں چرائے، بلکہ ڈوبتے کا سہارا، پیاسے کا پانی اور بیمار سے زندگی چھین لی۔
عارف : (جھنجھوڑتا ہے) آستین کے سانپ۔ ۔ ۔ زہر کی چھری۔ ۔ ۔ نوٹ نکال (تھپڑ مارتا ہے۔ ) معلوم ہوا کہ لوہے کو نرم کرنے کے لیے آگ میں تپانا ہو گا۔
ایاز :تمہیں میری خدمت کی لاج نہ ہو، لیکن مجھے تمہارے نمک کی شرم ہے مار ڈالو۔ ۔ ۔ میں اپنا خون تک معاف کرتا ہوں۔
عارف :کمینے ! ایسی ہی شرم ہے تو روپئے واپس دے دے۔
(رشیدہ آتی ہے۔ )
(عارف ایاز کو مارتا ہے۔ )
رشیدہ :کیا ہوا؟ارے۔ ۔ ۔ جس کی گود میں پلے اس سے یہ سلوک کیا کرتے ہو۔ ٹھہرو!
عارف :رشیدہ ہٹ جاؤ۔ اس نمک حرام نے ہمیں بھیک منگوانے کے لیے تمام روپئے چوری کر لیے۔
رشیدہ :چوری کی؟
عارف :ہاں !
رشیدہ :ایاز بابا نے ؟
عارف :ہاں ہاں ! اس شیطان نے فرشتہ کا چہرہ لگا کر ہمیں ٹھگ لیا۔
رشیدہ :ناممکن۔ ۔ ۔ ان کے دل میں دغا بازی نہیں آ سکتی۔
عارف :ابھی پتہ چل جائے گا، پولیس کا ہنٹر کھائے گا تو سب کچھ اگل دے گا۔ ذلیل۔ کمینے۔ چل!
(دھکے دیتا ہے۔ )
رشیدہ :ٹھیرو۔ عارف خدا کے لیے ٹھہرو۔ ۔ ۔ ایسا غضب نہ کرو۔
عارف :چپ رہو۔ اس نے جیسا کیا ہے۔ اس کی سزا بھگتنے دو۔
(عارف، ایاز کو پکڑ کے باہر لے جاتا ہے رشیدہ گھبراتی ہے۔ )
(پردہ)

ایکٹ تیسرا
سین چھٹا
عارف کا معمولی گھر
(مضمحل اور بیمار رشیدہ کپڑے سی رہی ہے۔ انور آتا ہے۔ )
انور :دکھوں کے بوجھ سے ہلکان نظر آ رہی ہو پھر بھی کہتی ہو کہ اچھی ہوں۔
رشیدہ :بھائی جان! جس حال میں بھی ہوں اچھی ہوں۔ بیٹھئے !
انور :میں اس گھر میں قدم نہ رکھنے کا عہد توڑ کر تمہاری محبت سے مجبور ہو کر آیا ہوں۔ اب بھی عقل سے کام لو، اور اس احمق شوہر کا ساتھ چھوڑ کر گھر چلو۔
رشیدہ :بھائی جان!معاف کیجئے، وہ کچھ بھی ہیں میرے لیے مذہب اور خدا کے نام کی طرح قابل عزت ہیں۔
انور :تم کبھی نہ سمجھو گی۔ قسمت نے تمہاری عقل پرتالا لگا دیا ہے۔ اچھا یہ لو۔
(ایک سو روپیہ کا نوٹ جیب سے نکال کر دیتا ہے۔ )
رشیدہ :یہ کیا ہے ؟
انور :یہ سو روپئے وقت اور ضرورت کے لیے رکھ چھوڑو۔
رشیدہ :معاف کرنا میں ان کی اجازت کے بغیر یہ نہیں لے سکتی۔ میری محنت کے پیسے میری ضرورت کے لیے کافی ہیں۔
انور :یہ کسی غیر کا روپیہ نہیں ہے، اسے لوٹا کر مجھے اور دکھ نہ دو۔ میں وقت بے وقت اسی طرح آ کر تمہیں دیکھتا رہوں گا۔ کیا کروں، مجبوری ہے، اچھا چلتا ہوں، پھر آؤں گا۔
رشیدہ : (اداس ہو کر) نہیں بھیا! مجھے معاف کیجئے۔
(نوٹ لوٹاتی ہے۔ )
انور :اسے رکھ لو رشیدہ!خدا حافظ۔
(جاتا ہے۔ )
رشیدہ :بھائی جان! سنئے، سنئے تو۔ ۔ ۔
(نوٹ کو دیکھتی ہے۔ )
(سوچتی ہے۔ )
’’اسے کیا کروں۔ کہاں سے آیا؟ کس نے دیا؟ میرے حکم کے بغیر کیوں لیا؟ ان کے غصہ کی گرج اور سوالوں کا کیا جواب دوں گی؟ نہیں ! یہ نوٹ ضرور واپس کر دوں گی!‘‘
(پلنگ کی طرف جاتی ہے اور تکیہ کے غلاف میں نوٹ چھپا دیتی ہے۔ )
رشیدہ : (جلدی سے سنبھل کر) خدایا! پھروہی حالت؟
عارف :لالچی، خودغرض، مطلب پرست، مجھے وہم بھی نہ تھا کہ سب کے سب طوطے کی طرح آنکھیں پھیر لیں گے۔ (پلنگ پر بیٹھتے ہوئے) اور وہ بے ایمان سچی دوستی کا دم بھرتا تھا۔ اب بات کرنے سے کتراتا ہے۔ شکایت کرو تو کہتا ہے ’’کیا تم چاہتے ہو کہ جیسے ایک اندھا دوسرے اندھے کی پیٹھ پر ہاتھ رکھ بھیک مانگتا ہے۔ میں بھی ویسے ہی تمہارے ساتھ اندھے بن کر ’’ایک روٹی‘‘ کی صدا لگاتا پھروں۔ ۔ ۔ ‘‘ بے شرم مکار!
رشیدہ :کس پر ناراض ہو رہے ہو؟
عارف :غانم اور اس کے سارے کمینے ساتھی۔ ۔ ۔ سب خودغرض۔
رشیدہ :شکر ہے آپ کو آج یہ معلوم تو ہو گیا۔
عارف :میں نے ان کو ہزاروں کھلائے پلائے، آج یہ مجھے منہ نہیں لگاتے۔
رشیدہ : اور آپ نے آج بھی پی لی، صبح میں نے منت کی تھی تو آپ نے وعدہ کیا تھا کہ اب نہیں پیوں گا۔
عارف :کیسے نہ پیوں ؟
رشیدہ :کیوں ؟
عارف :رشیدہ!شروع میں بھول سے پی لی۔ پھر دوستوں کی خوشی کے لیے پی، اس کے بعد زندگی کا مزا سمجھ کر پیتا رہا ہوں اور اب زندگی کا غم غلط کرنے کو پیتا ہوں۔ نہ پیوں گا تو مصیبت پاگل کر دے گی۔
رشیدہ : اور مجھے آپ کی یہ حالت دیوانہ بنا دے گی۔
عارف : (سر پکڑ کر) اف سر پھٹنے لگا۔ بہت درد ہے۔ کچھ پیسے ہیں تو دو۔
رشیدہ :پیسے کہاں سے لاؤں ؟گھر میں فاقہ ہے۔ بے چاری لیلیٰ ابھی کرتے لے کے جائے گی تو شام کو کھانے کو دام آئیں گے۔
عارف :بہانہ کیوں کرتی ہو، صاف کیوں نہیں کہتیں کہ مجھے شوہر پیارا نہیں پیسہ پیارا ہے۔
رشیدہ :یہ آپ کیا کہہ رہے ہیں ؟۔ ۔ ۔ آپ سے کون سی چیز بڑھ کر ہے۔
عارف :قسمت بدل گئی، دنیا بدل گئی اور اب دیکھتا ہوں کہ تم بھی بدلتی جاتی ہو۔
رشیدہ :خفا ہو گئے، کچھ پیسے پڑے ہیں، ابھی لائے دیتی ہوں۔
(جاتی ہے۔ )
عارف : (خود سے) یہ ہمیشہ تکیہ میں پیسے رکھا کرتی ہے، دیکھوں شاید بھول میں کچھ پڑے رہ گئے ہوں۔
(تکیہ کو جھاڑتا ہے، نوٹ گرتا ہے۔ )
(حیرت سے)
’’یہ کیا؟نوٹ؟ایک سو کا نوٹ؟ جس کے پاس تن ڈھانکنے کو کپڑا اور پیٹ بھر اناج کا بھی سہارا نہ ہو، اس کے پاس اتنے روپئے کہاں سے آئے ؟۔ ۔ ۔ سمجھ گیا۔ ۔ ۔ نیکی اور شرافت کا ملمع اتر کر بے وفائی کا کھوٹ ظاہر ہو گیا۔‘‘
(سر پکڑ بیٹھ جاتا ہے۔ )
رشیدہ : (آ کر) سرکا درد بڑھ جائے گا۔ دماغ کو آرام دو۔ اتنا کیوں سوچ رہے ہو؟
عارف :سوچ رہا ہوں کہ اندھیرے میں چھری مارنے والے دشمن اور پارسا بن کر بے وفائی کرنے والی بیوی دونوں میں سے کون بڑا قاتل ہے۔
رشیدہ :یہ اس وقت کیا دل لگی سوجھی آپ کو!
عارف : (کھڑا ہوتا ہے) دل لگی؟ عزت اور شرافت کا خون ہو جانے پربھی دل لگی کی سوچتی ہے۔
رشیدہ :ناراض نہ ہو، یہ پیسے حاضر ہیں۔
عارف :معصوم بننے کی کوشش نہ کر مکار، دغا باز۔
رشیدہ :حدسے گزرے ہوئے نشے اور غصے میں جس زبان سے کبھی ’’تو‘‘ کہہ کر نہیں پکارا۔ اسی زبان سے آج مجھے گٍا لیاں نکل رہی ہیں، ایسا کون سا قصور ہوا ہے۔
عارف :چاند پوری روشنی اندھیری رات میں اور بیوی کی پارسائی مفلسی میں ظاہر ہوتی ہے۔ قصور مجھ سے پوچھتی ہے۔ مجھ سے نہیں اپنے بے وفا دل سے پوچھ اور دل کسی دوسرے کے پاس ہو تو، اس کے دیے ہوئے اس نوٹ سے پوچھ۔
رشیدہ : (منہ پھیر کر خود سے) بھائی انور کا نوٹ؟ ہائے وہی ہوا، جس کا ڈر تھا۔
عارف :کیوں ؟چپ کیوں ہو گئی؟ابھی جھوٹی باتیں بنا کر مجھے پیسوں پر ٹال رہی تھی، پھر یہ سو روپیہ کا نوٹ کہاں سے آیا؟۔ ۔ ۔ جواب دے۔ ۔ ۔
رشیدہ :عارف! میں قسم کھاتی ہوں، وہم نہ کرو۔ ۔ ۔ یہ نوٹ میرے بار بار۔ ۔ ۔
عارف :جھوٹی قسمیں نہ کھا۔ گھر، سکھ، دولت سب کچھ کھو دینے کے بعد میرے پاس صرف بیوی کا پیار رہ گیا تھا، تو نے وہ بھی دوسروں کودے کر مجھے کنگال کر دیا۔ ۔ ۔ بے حیا۔ ۔ ۔ بے شرم۔ ۔ ۔ تیری اس زندگی سے موت بہتر ہے۔ ۔ ۔ تیری آنکھوں کی حیا اور دل میں وفا مر گئی، لے تو بھی مر۔
(دوڑ کر اپنے تکیے کے نیچے سے چھری نکالتا ہے۔ )
رشیدہ : (چیخ کر) سنو!عارف، تم غلط سمجھ رہے ہو۔ میں بتاتی ہوں۔
(عارف رشیدہ پر چھری سے وار کرتا ہے وہ زخمی ہو کر بے ہوش ہو جاتی ہے اور زمیں پر گرتی ہے۔ )
(انور داخل ہوتا ہے اور یہ حالت دیکھ کر گھبراتا ہے۔ )
انور :وحشی انسان۔ ۔ ۔
(عارف کے ہاتھ سے چھری چھین لیتا ہے۔ )
(رشیدہ کو دیکھ کر)
خدایا۔ ۔ ۔ یہ کیا۔ ۔ ۔ خون۔ ۔ ۔ ؟جنونی قاتل یہ تو نے کیا کیا؟
(لیلیٰ اندر آتی ہے اور یہ منظر دیکھ کر رشیدہ کی طرف دوڑتی ہے۔ )
لیلیٰ :ہائے اللہ۔ ۔ ۔ رشیدہ باجی۔ ۔ ۔
(عارف سے)
ظالم خونی یہ کیا غضب کیا؟
(باہر جاتے ہوئے)
ٹھہرئیے میں ابھی پولیس بلائے لاتی ہوں۔
(انور اٹھ کر عارف کی طرف آتا ہے اور اسے جھنجھوڑتا ہے۔ )
انور :ظالم۔ ۔ ۔ اس معصوم بدنصیب نے تیرا کیا بگاڑا تھا۔ خونی۔ بول!
عارف : (انور سے الگ ہو کر) غیر مرد سے روپئے لے کر شوہر کی عزت آبرو کا سودا کرنے والی بیوی معصوم نہیں کہلاتی۔
انور :تو کیا اس نے ایسا کیا؟
عارف :ہاں !
انور :ثبوت؟
عارف :یہ نوٹ۔
انور :جلد باز احمق! خرچ کی تکلیف دیکھ کر میں آج یہ روپئے اس کو زبردستی دے گیا تھا۔
عارف :یہ جھوٹ ہے۔
انور :نوٹ کی پشت پرمیرا نام لکھا ہوا ہے۔ (قریب جا کر نوٹ کی پشت دکھا کر) یہ دیکھ!
(پولیس افسر اور ایک سپاہی لیلیٰ کے ساتھ آتے ہیں۔ )
لیلیٰ :یہ ہے قاتل۔ ۔ ۔ انسپکٹر صاحب!
انور :یہ چھری ہے، جس سے اس نے اپنی بے گناہ بیوی کو مارا ہے۔
انسپکٹر :آپ مقتولہ کے کون ہیں ؟
انور :بدقسمت بھائی۔
انسپکٹر : (سپاہی سے) مقتول۔ ۔ ۔ گواہ۔ ۔ ۔ ثبوت۔ ۔ ۔ سب موجود ہیں۔ مجرم کو ہتھکڑی لگاؤ۔
انور :اس بدنصیب نے امیر باپ کی بیٹی ہو کر شوہر کی مرضی کے لیے سکھ، چین، باپ، بھائی سب کو چھوڑا۔ ۔ ۔ فاقے کیے۔ ۔ ۔ اور ناشکرے انسان نے اس کی محبت اور خدمت کا یہ صلہ دیا۔
انسپکٹر :افسوس ہے (سپاہی سے) مجرم کو تھانے لے چلو۔ ۔ ۔ مقتولہ کی لاش ہسپتال لے جانا ہو گی۔
(انور اور لیلیٰ رشیدہ کے قریب جاتے ہیں۔ لیلیٰ رو رہی ہے، رشیدہ کروٹ لیتی ہے۔ )
انور :یہ ابھی زندہ ہے ؟۔ ۔ ۔ رشیدہ!
لیلیٰ :رشیدہ باجی۔ ۔ ۔ باجی!
رشیدہ : (نحیف آواز میں) عارف۔ ۔ ۔ سنو تو۔ ۔ ۔ میں بتاتی ہوں۔
(آنکھیں کھول کر سب کو دیکھتی ہے۔ )
انور :رشیدہ!
رشیدہ : (اٹھ بیٹھتی ہے۔ )
(گھبرا کر اٹھتی ہے اور عارف کی طرف جاتی ہے۔ )
انور :قتل کے جرم میں۔
رشیدہ :قتل؟انھوں نے کیا؟۔ ۔ ۔ کیسے ؟
انسپکٹر : (دیوار کو دیکھتے ہوئے) جی ہاں ! آپ پراس نے چھری سے حملہ کیا ہے۔
رشیدہ :نہیں۔ ۔ ۔ یہ جھوٹ ہے۔
انور :رشیدہ! کیا ابھی تک شوہر کی وفاداری کا پاگل پن نہیں گیا؟
رشیدہ :لیکن بھائی جان!انھوں نے چھری نہیں ماری۔
انسپکٹر :پھر آپ زخمی کیسے ہوئیں۔ ؟
رشیدہ : (سوچ کر) میں اس چھری سے ترکاری کاٹ رہی تھی۔ بیماری میں کمزوری سے چکر آ گیا، گر گئی، چھری اچانک لگ گئی اور میں زخمی ہو گئی۔
انور :انسپکٹر صاحب!یہ شوہر کی جان بچانے کے لیے بہانہ کر رہی ہے۔ ۔ ۔ یہ بالکل جھوٹ ہے۔
انسپکٹر :میں سمجھتا ہوں۔ ۔ ۔ مگر مجبور ہوں۔ ۔ ۔ کچھ نہیں کیا جا سکتا۔ ۔ ۔ ہتھکڑی کھول دو۔
(سپاہی عارف کے ہاتھ سے ہتھکڑی کھولتا ہے۔ )
عارف :یہ جھوٹ بول رہی ہے !انسپکٹر صاحب! یہ خون میں نے کیا ہے۔ مجھے لے چلو۔
رشیدہ :نہیں، نہیں !یہ پریشانی میں بہک رہے ہیں۔
انسپکٹر : (سپاہیوں سے) آؤ چلیں (انور سے) معاف کیجئے، آپ کو تکلیف ہوئی۔
انور :شکریہ!تکلیف تو آپ کو ہوئی۔ خواہ مخواہ۔
انسپکٹر :یہ ہمارا فرض ہے۔
(جاتے ہیں۔ )
انور : (عارف سے) بدنصیب انسان! اب بھی آنکھیں نہ کھلیں ؟
عارف :کھل گئیں۔ ۔ ۔ بھائی!سچ مچ میری آنکھیں کھل گئیں۔ ۔ ۔ ہوش آ گیا۔ ۔ ۔ رشیدہ مجھے معاف کر دو۔
رشیدہ :میں آپ کی گنہ گار ہوں۔
انور :خدا تمہارا مددگار ہو!
(پردہ)
***
ماخذ: اردو ڈراما کی ارتقاء
عشرت رحمانی
ایجوکیشنل بک ہاؤس، مسلم یونیورسٹی مارکیٹ، علی گڈھ
 
امتیاز علی تاج

بیگم کی بلی

کردار :
امیدوار:جو نوکری حاصل کرنے میاں گھر آیا ہے۔
میاں :
بیگم:
دیور:

امیدوار :میاں یہ ہے وہ بلی۔
میاں : (غصے کی دبی ہوئی آواز میں) چپ احمق کہیں گا، اتنے زور سے بولتا ہے۔
امیدوار :زور سے بولا تھا؟میں !
میاں :پھروہی۔ ارے نامعقول آہستہ بول آہستہ۔
امیدوار : (آہستہ سے) بات کیا ہے ؟
میاں :تجھے بات سے کیا مطلب ؟جو کچھ کہا ہے کر دے۔
امیدوار :بلی تو کالی سیاہ ہو رہی ہے۔ تھی کہاں یہ؟
میاں :کوئلوں کی کوٹھری میں۔
امیدوار :دلالی کر رہی تھی وہاں ؟
میاں :نہیں مانے گا۔ ابے آہستہ آہستہ بول۔ کل رات ہم اسے بہت دور چھوڑ آئے تھے۔ لیکن واپس چلی آئی۔ کم بخت۔ اس کے واپس آنے کے بعد ہم چاہتے تھے اسے بیگم صاحبہ سے چھپا کر رکھنا، اس لیے کوئلوں کی کوٹھری میں بند کر دی تھی۔
امیدوار :تو بیگم صاحبہ کی بلی ہے یہ؟
میاں :بڑی چہیتی۔
امیدوار :بلی کو میاں کتنی ہی دور لے جا کر چھوڑو، گھر واپس آ ہی جاتی ہے۔
میاں :مگر اب کے تو نہ آئے گی۔ تو سمجھ گیا ہے نا اپنا کام؟
امیدوار :ہاں ہاں میاں سمجھتا کیوں نہ؟
میاں :مگر دیکھو زیادہ دکھ نہ پہنچائیو اسے۔ بڑی نرمی سے کام تمام کیجیو۔ مل سکے تو کوئی کلہاڑا حاصل کر لیجیو۔
امیدوار :کلہاڑا۔ ۔ ۔ اور اگر ۔ ۔ ۔
میاں :اگر مگر کچھ نہیں۔ پسیج نہ جائیو کہیں۔ ہم چاہتے ہیں اب کے یہ قصے ہی تمام ہو جائے۔
امیدوار : اور میاں کسی نے دیکھ لیا تو؟
میاں :ابے دیکھ لیا کے بچے !تو اس وقت سن لیا کی فکر رکھ۔ کسی نے بلی کی جان لیتے دیکھ لیا تو کون سا تجھے سولی پر لٹکا دے گا۔ ایسا ہی خوف ہے تو چل رات کو سہی۔
امیدوار : اور میاں اس کام کا انعام؟
میاں :۔ ۔ ۔ اٹھنی۔ ۔ ۔ یہ۔ ۔ ۔
امیدوار :اٹھنی۔ ۔ ۔ اٹھنی کے لیے یہ خون۔ نامیاں مجھے نہیں منظور۔
میاں : اور کیا اپنا سر لے گا۔ ایسی عام بلی کے لیے اٹھنی تھوڑی رقم ہے ؟
امیدوار :یہ بڑی عام بلی سہی۔ میرے سینے میں تو دل ہے۔ قیامت کے دن اللہ میاں کو منہ کیا دکھاؤں گا؟
میاں :ابے تو پھر بول بھی چک، لے گا کیا؟
امیدوار :میاں ایک تو ہوں میں انسان نرم دل۔ دوسرے قتل و خون میرا پیشہ نہیں۔ میں تو آپ جانیے باورچی گیری کی امید میں آپ کی خدمت میں حاضر ہوا تھا۔ سنا تھا آپ کو باورچی کی ضرورت ہے۔ اس معاملے میں آپ نے دے دیا ٹکا سا جواب۔ اس لیے اب اس خدمت کے لیے تو۔ ۔ ۔
میاں :ابے تو یہ بول کہ لے گا کیا؟
امیدوار :پانچ کا نوٹ دلوا دیجئے۔
میاں :پانچ کا نوٹ؟سر پھر گیا ہے ؟
امیدوار :نامیاں، بیگم صاحبہ کی بلی ہے۔ میں پانچ روپے سے کوڑی کم نہیں لینے کا۔
میاں :ارے مگر ۔ ۔ ۔ پانچ روپے۔ ۔ ۔
بیگم : (دور سے) اجی!کہاں گئے ؟
میاں : (گھبرا کر) بیگم صاحبہ آ گئیں۔ لے تو یہ پانچ ہی کا نوٹ لے لے اور بھاگ جا۔ بلی کو کپڑے کے نیچے چھپا لے۔ کسی کو اس کی جھلک بھی نظر نہ آنے پائے، اور دیکھ!نشان تک نہ ملے بلی کا۔ ادھر سے جا پچھلے راستے سے، ہمارے غسل خانے میں سے نکل جا۔
امیدوار :پر میاں، بجائے کلہاڑے کے اگر زہر سے کام کروں تو۔ ۔ ۔ ؟
بیگم : (دور سے) کہاں ہو؟
میاں : (بیگم سے) یہ رہا۔ (امیدوار سے) اب جا بھی چک کہیں۔
امیدوار :بس میں گیا۔ وہ میں نے کہا تو میاں میرے لیے کہیں نوکری کی سفارش۔ ۔ ۔ ؟
میاں :ابے پانچ روپئے لے کر بھی نوکری کی سفارش۔ بھاگ یہاں سے۔
(امیدوار جاتا ہے۔ میاں کھنکھارتا ہے۔ بیگم آتی ہے۔ )
بیگم : (آتے ہوئے) یہاں ہو؟چھپ کر بیٹھے ہو۔ ذرا خیال نہیں میرے صدمے کا۔
میاں :بس آہی رہا تھا۔ تمہاری طرف۔
بیگم : (آہ بھرکر) کیا کروں۔ میرا تو دل بیٹھا جاتا ہے۔
میاں :دل۔ ۔ ۔
بیگم :جس پرچ میں وہ دودھ پیا کرتی تھی، برآمدے میں اوندھی پڑی ہے۔ دیکھتی ہوں تو ہوکیں اٹھتی ہیں دل میں۔
میاں :واہ یہ بھی کوئی بات ہے صدمے کی؟
بیگم :جس ٹوکری کے اندر گدیلے پر آرام کیا کرتی تھی آج ویران پڑی ہے۔
میاں :تو معمولی بات ہے۔ اس ٹوکری میں تم۔ ۔ ۔ میں۔ ۔ ۔ مثلاً آلو رکھنے شروع کر دو۔
بیگم :دل دکھانے کی بات نہ کرو۔ مجھے اب تک امید ہے کہ وہ واپس آ جائے گی۔
میاں :امید۔ جی تو نہیں چاہتا کہ تمہیں مایوس کروں۔ لیکن کیا کیا جا سکتا ہے (آہ بھرکر) اس کی واپسی کی امیدخیال خام ہے۔
بیگم :کیا مطلب؟
میاں :ابھی ابھی بازار کا ایک آدمی میرے پاس ہو کر گیا ہے۔ اس نے ایک اطلاع دی ہے۔ تم اپنے آپ کو ایک افسوس ناک خبر سننے کے لیے تیار کر لو۔
بیگم :افسوس ناک خبر؟میرا تو دل دھک دھک کرنے لگا۔ کیا خبر ہے وہ؟
میاں : (رقت سے) ہماری غریب مسکین بلی ایک قصاب کی دکان کے سامنے کھڑی چھیچھڑوں کے خواب دیکھ رہی تھی، کہ بے رحم قصاب نے اسے عدم کا راستہ دکھا دیا۔
بیگم :ہے ہے۔ ۔ ۔ !
میاں : (رقت سے) ایک موٹر اس کا کام تمام کرتی ہوئی اس پرسے گزر گئی۔
بیگم :میرے اللہ۔ ۔ ۔ !
میاں : (آہ بھرکر) اطمینان کے لیے بس اتنی سی بات ہے کہ جس موٹر نے بلی کو کچلا وہ رولس رائس کار تھی۔
بیگم : (سسکیاں لیتے ہوئے) اور لاش کیا ہوئی دکھیا کی؟
میاں :لاش کہاں رہی بیگم اس کا قیمہ بن گیا۔ جو شخص خبر دینے آیا تھا۔ اس بے چارے نے خبر پہنچانے سے پہلے اس قیمے کو سمیٹ کو اپنی دکان کے پچھواڑے دفن کر دیا۔
(بیگم زور زور سے سسکیاں بھرنے لگتی ہے۔ )
میاں :جو شخص خبر دینے آیا تھا وہ غریب جب واقعہ بیان کر رہا تھا تو اس کی آنکھوں سے بھی آنسوؤں کی لڑیاں جاری تھیں۔
(بیگم اور زور سے رونے لگتی ہے۔ )
میاں :ہائیں ہائیں بیگم۔ حوصلہ کرو۔ اس کی قضا آئی تھی مر گئی۔ اللہ تعالیٰ کی مرضی تھی۔ مشیت ایزدی میں کس کو دم مارنے کی مجال ہے۔ ہائیں ہائیں۔ کسی نوکر نے روتے دیکھ لیا، تو کیا جی میں کہے گا؟نہ جانے دل میں کیا سمجھ بیٹھے ؟لو پونچھ ڈالو آنسو۔ کل تم کہہ رہی تھیں کہ آج صبح خرید و فروخت کے لیے بازار جانا ہے۔ مجھے اس وقت بیٹھ مضمون لکھنا ہے۔ کار خالی ہے۔ جاؤ بازار ہو آؤ۔
بیگم : (سسکیاں لیتے ہوئے) میں کیوں کر بازار جاؤں۔ جب۔ جب۔ جب میری بلی کا، کا۔ کا تو قیمہ۔ ۔ ۔
میاں :ارے تواب کیوں اسے یاد کیے چلی جا رہی ہو؟ایک بات تھی ہو گئی۔ اب بھول جاؤ بات کو۔ بھلا دیکھیں تو مسکراتی کیوں کر ہو! دیکھو یہ منہ چھپانا ٹھیک بات نہیں۔ اچھا اگر بازار میں خریدار کے لیے کچھ رقم بھی تمہاری نذر کر دیں تو۔ ۔ ۔ اے یہ لو نوٹ۔ ارے دیکھو یہ تو دس روپئے کا ہے۔ دس روپے کا۔ بولو تو بھلا ان دس روپوں کو لاؤ گی کیا؟بھئی یہ بات ٹھیک نہیں۔ تم تو بولتی نہیں۔ اچھا ہم بتائیں ان روپوں میں سے جناب ایک تو آپ لے آئیے سینٹ اور جناب من۔ ۔ ۔
بیگم :تو پھو۔ ۔ ۔ پھو۔ ۔ ۔ پھو۔ ۔ ۔
میاں :پھکنی لاؤ گی؟اچھی بات شوق سے لے آؤ۔
بیگم : (رونے میں ہنس پڑتی ہے۔ ) بڑے اچھے لگتے ہیں۔
میاں :ہنس پڑیں نا۔ یہ بات!
بیگم :بات ہی ایسی الٹی کرتے ہو۔ میں کہہ رہی تھی پھول لاؤں گی۔
میاں :پھول کیسے ؟
بیگم :بلی کی قبر پر چڑھانے کو۔
میاں :پھروہی بلی۔ ارے بھئی تھی۔ مر گئی۔ بھول جاؤ اب اس کو۔
(دیور داخل ہوتا ہے۔ )
دیور :آداب عرض ہے بھائی جان۔ مزاج شریف؟کیوں بھابی ارے کیا ہوا انھیں ؟
بیگم :بھئی میری بے چاری۔ ۔ ۔
میاں :تم جانے دو میں سنا دوں گا سارا قصہ۔ تمہاری بھابی اصل میں ایک واقعے سے بڑی مضطرب ہو گئی ہیں۔
دیور :کیا واقعہ ہو گیا؟
میاں :ابھی بتاتا ہوں۔ تو بیگم تم جاؤ بازار ہو آؤ۔ گھوم پھر کر آؤ گی تو طبیعت آپ سے آپ بحال ہو جائے گی۔ لو آؤ دروازہ تک چھوڑ آؤں۔
(دروازہ بند کرتا ہے۔ )
دیور :قصہ کیا ہے ؟
میاں :اماں کچھ نہ پوچھو۔ اس کم بخت بلی نے مصیبت ڈال رکھی ہے۔
دیور :بھابی کی بلی؟
میاں :ہاں !
دیور :تو کیا ہوا اسے ؟
میاں :امید ہے اب تک وفات پا چکی ہو گی۔
دیور :وفات۔ اور یہ ’’امید ہے ‘‘ کے کیا معنی؟
میاں :اندازہ ہے میرا۔
دیور :بے چاری بلی۔
میاں :اب جناب اپنی ہمدردی اسی بلی پر صرف نہ کیجئے۔ مجھ سے ہمدردی کیجئے۔ اسے اس گھر میں آئے ایک مہینہ کا عرصہ ہوا تھا۔ قسم لے لوجو اس سارے مہینے میں مجھے راحت کا ایک پل نصیب ہوا ہو۔
دیور :کیا باتیں کرتے ہیں بھائی جان!
میاں :باتیں ؟اماں اس کم بخت نے میرا جینا دو بھرکر دیا تھا۔
دیور :وہ کیوں کر؟
میاں :سب سے پہلے تو میری بیوی کو چھین کر اپنا بنا لیا۔ یعنی بخدا جب سے وہ سبز قدم گھر میں آئی تھی تمہاری بھابی کے لیے میں تو جیسے کوئی شے ہی نہیں رہا تھا۔
دیور :رہنے بھی دیجئے بھائی جان۔
میاں :تم سمجھتے ہو میں مبالغہ کر رہا ہوں۔ دیکھتے تو پتہ چلتا۔ کہیں بلی کو دودھ پلایا جا رہا ہے کہیں گوشت کے تکے کھلائے جا رہے ہیں، کسی وقت بلی کو گیند سے کھیلتا دیکھ رہی ہیں۔
دیور :ہو جاتا ہو گا دن میں ایک آدھ گھنٹہ یہ شغل!
میاں :ارے مگر شغل کے لیے کوئی بھلی مانس خاندانی بلی ہو۔ وہ تو ایک چھٹی ہوئی بلی تھی۔ پچھلے مہینے کم بخت نے ایک چوہا پکڑ کر میرے تازہ ترین افسانے کے اوراق پراس کا ناشتہ کیا۔
دیور :تو آپ جانور سے بھی عقل کی توقع رکھتے ہیں ؟
میاں :ارے بھئی عقل نہ ہو، تمیز تو ہو۔ کیچڑ میں سے گھوم کر آتی اور نہایت بے تکلفی سے میرے اجلے بستر پر چڑھ جاتی۔
دیور :تو پھر اب وہ ہے کہاں ؟
میاں :جہاں تک میری ناقص فہم تخمینہ لگا سکتی ہے، وہ مسماۃ اس وقت دوسری دنیا کی سیاحت کے لیے رخت سفر باندھ رہی ہے۔
دیور :وہ کیسے ؟
میاں :بات یوں ہوئی کہ کل ہم نے دل میں طے کر لیا تھا کہ بھئی بہت عرصہ صبر سے کام لیا۔ اب ہر چہ بادا باد۔ بلی اس گھر میں نہیں رہ سکتی۔ چنانچہ جناب من کل رات ہم نے اس بلا کر کو چپکے سے اٹھایا اور موٹر میں بٹھا کر دریا کا راستہ پکڑا۔
دیور :چنانچہ اب آپ کا خیال ہے کہ وہیں دریا کے کنارے بلی غالباً مر کھپ چکی ہو گی۔
میاں :کہاں مر کھپ۔ ۔ ۔ وہ کم بخت تو پھر نازل ہو گئی۔
دیور :سچ؟
میاں : اور کیا جھوٹ بول رہا ہوں۔ صبح صبح اندھیرے منہ میاؤں میاؤں کر یہ آواز سن کر آنکھ کھل گئی۔ اٹھ کر دیکھتا ہوں تو، دھری ہوئی ہیں۔ اب گھر کے دروازے تو بند تھے، غالباً کسی موری کے راستے گھس آئی تھی۔
دیور :پھر؟
میاں :پھر کیا، خون کے گھونٹ پی کر رہ گیا۔ صبح صبح سمجھ میں بھی تو نہ آتا تھا کہ کیا کروں اور کچھ تو سوجھا نہیں۔ میں بلی کے منہ پر رومال باندھ اسے کوئلوں کی کوٹھری میں بند کر دیا۔ سوچا منہ پر رومال بندھا ہونے سے اس کی آواز سنائی نہ دے گی۔ دن میں آرام سے سوچ سمجھ کر فیصلہ کریں گے کہ اس سے دائمی نجات کیوں کر پائی جائے ؟
دیور :تو بلی اب تک کوئلوں کی کوٹھری میں بند ہے ؟
میاں :جی بند رہی تھی۔ یہاں صبح سے سوائے اس فکر کے دوسرے کوئی فکر نہ تھا کہ جب بیگم صاحبہ کو صدمہ بھی پہنچا لیا تو اب ٹھکانے لگاؤں اس بلی کو۔ اتفاق کی بات تھوڑی دیر ہوئی، ایک ملازمت کا امیدوار آ گیا میرے پاس۔ اس سے باتیں کرتے کرتے اچانک خیال آیا کہ بلی کا کام اس کے ہاتھوں تمام کرانا چاہئے۔ چنانچہ جناب ابھی تھوڑی دیر ہوئی وہ بلی کو لے کر گیا ہے اور بیگم کو میں نے یہ کہہ کے ٹالا ہے کہ بلی موٹر تلے آ کر مر گئی۔
دیور :بھائی جان!سچ تو یہ ہے کہ آپ ے کسی قدر زیادتی کی ہے۔
میاں :بلی سے زیادتی؟ اور مجھ سے کیا ہو سکتا تھا بھلا!اس ایک بلی کی بدولت میرا گھر غلیظ تھا۔ میرا اطمینان قلب غارت تھا۔ میرے تعلقات ہمسایوں اور کئی دوسرے لوگوں سے تو کیا، خود اپنی بیوی تک سے کشیدہ سے ہو گئے تھے اور پھرکئی روپئے بھی تو اٹھ گئے میرے۔ پانچ روپئے۔ ۔ ۔
دیور :ا س شخص کودیے جوبلی کا ٹھکانے لگانے لے گیا ہے !
میاں : اور کیا؟کم بخت اس سے کم پر کسی طرح مانتا ہی نہ تھا اور پھر یہی پانچ تھوڑا اٹھے۔ تمہاری بھابی کا غم بہلانے کے لیے دس روپئے خود ان کی نذر بھی تو کرنے پڑ گئے۔ کل پندرہ اٹھ گئے۔ پر مجھے نہیں افسوس روپئے کا۔ پندرہ روپئے میں امن اور سکون کی زندگی سستی ہے۔
(میاؤں میاؤں کی آواز۔ بیگم بھاگی بھاگی اور خوشی کے جوش سے بے تاب آتی ہے۔ )
بیگم :میں نے کہا کہاں گئے ؟سنو تو۔ سنو تو۔ میں کار میں سوار ہو کر بنگلے سے نکل رہی تھی کہ دروازے پر ایک بھلامانس ملا۔ اس نے ہاتھ اٹھا کر کار روک لیا۔ ڈرائیور سے پوچھا۔ کار میں بیگم صاحبہ ہیں ؟اس نے کہاں ہاں۔ تو جھٹ کپڑے تلے سے ایک چیز نکال میرے لیے پیش کی۔ پوچھو بھلا کیا؟بلی اور بلی بھی کیسی؟ہو بہو میری مرحوم بلی کی تصویر۔ بس کسی کوئلے والے کے یہاں رہ کر کالی ضرور ہو گئی ہے۔ مگر نہا دھوکر بالکل مرحوم بلی جیسی ہو جائے گی۔
میاں :تو تم نے خدانخواستہ لے تو نہیں لیا اسے ؟
بیگم : اور کیا(دیور کی دبی ہوئی ہنسی)جو دس روپئے تم نے دیئے تھے اس سے بلی تو خریدی ہے۔
میاں :دس روپئے میں بلی!
بیگم : اور ساتھ بیچنے والے کو ملازم رکھ لیا۔
میاں :ملازم۔ ۔ ۔
(دیور کی ہنسی)
بیگم :بے چارہ بال بچے دار ہے۔ نوکری کی تلاش میں تھا۔ بے حد بھلا مانس ہے۔ ادھر کھڑا ہے۔
میاں :وہ بدمعاش!
امیدوار :سلام میاں !آپ نے تو سفارش کے ایک پرزے سے بھی جواب دے دیا تھا۔ اللہ بیگم صاحبہ کو خوش رکھے۔ ان کی مہربانی سے آپ ہی کے قدموں میں جگہ مل گئی۔
(میاؤں میاؤں۔ دیور کی ہنسی)
بیگم :سنا۔ بلی آتے ہی گھر میں ایسی بے تکلفی سے پھرنے لگی گویا عرصے سے یہیں رہی ہو میں بلاتی ہوں۔ پسی پسی پسی!
 
سعادت حسن منٹو

مامتا کی چوری

افراد :
مسٹر بھاٹیہ مسز بھاٹیہ گوپال(گوپو) مسٹر اور مسز بھاٹیہ کا کم سن لڑکا
چپلا گوپال کی استانی ڈاکٹر

(پانی میں ہاتھ دھونے کی آواز)
ڈاکٹر :بچے کو زبردست انفکشن ہو گئی ہے اگر اس کی اچھی طرح تیمار داری اور خبرگیری نہ کی گئی تو مجھے اندیشہ ہے۔ ۔ ۔
چپلا :نہیں نہیں۔ ۔ ۔ کسی بات کا اندیشہ نہیں ہے۔ آپ مطمئن رہیں ڈاکٹر صاحب اس کی اچھی طرح تیمار داری کی جائے گی۔ ۔ ۔ یہ لیجئے تولیہ!
(بچہ بخار میں ’’ہوں ہوں ‘‘ کرتا ہے)
چپلا :گوپو۔ گوپو۔ ۔ ۔ میں تیری استانی ہوں بیٹا۔ ۔ ۔ کیا تو آج سبق نہیں پڑھے گا مجھ سے۔ ۔ ۔ اور سیر کے لئے بھی تو جانا ہے ہمیں۔ نہیں، نہیں، کل چلیں گے۔ کل تو بالکل ٹھیک ہو جائے گا۔
ڈاکٹر :باتیں کرنے سے بچے کو تکلیف ہو گی۔
چپلا :بہت اچھا ڈاکٹر صاحب میں باتیں نہیں کروں گی۔ پر میں اس کے پاس بیٹھ تو سکتی ہوں۔ یہ خود چاہتا ہے کہ میں اس کے بیٹھی رہوں۔
ڈاکٹر :تو بھاٹیہ صاحب جو ہدایات میں دے چکا ہوں ان پر ضرور عمل کیا جائے۔
بھاٹیہ :بہت بہتر ڈاکٹر صاحب!
(چلنے کی آواز۔ ۔ ۔ پھر دروازہ کھلتا ہے۔ )
مسز بھاٹیہ :ڈاکٹر صاحب بتائیے۔ میرے بچے کا کیا حال ہے۔ ۔ ۔ بچ جائے گا خطرے کی کوئی بات نہیں ؟۔ ۔ ۔ اور ۔ ۔ ۔ اور ۔ ۔ ۔ اوہ۔ ۔ ۔ لیکن یہ کیا ظلم ہے کہ مجھے اس کے پاس جانے سے منع کیا جاتا ہے۔ (جذبات کی رو میں بہہ کر)کیا میں اس کی ماں نہیں۔ کیا وہ میرا بیٹا نہیں۔ ۔ ۔ وہ عورت کیا وہ عورت قاعدے کے چند حروف پڑھا کر اس کی ماں بن گئی ہے۔ ۔ ۔ چند روز باغ میں لے جا کر کیا اس عورت کے دل میں مامتا پیدا ہو گئی ہے ؟۔ ۔ ۔ میری اولاد پر اسے کیا حق ہے۔ کب تک وہ میرے ہی گھر میں میری چیزوں پہ قابض رہے گی۔ ۔ ۔ میں کب تک یہ اذیت برداشت کرتی رہوں گی۔
ڈاکٹر : (سنجیدگی کے ساتھ)بچے کی حالت نازک نہیں ہے لیکن وہ خطرے سے باہر بھی نہیں۔ بہت احتیاط کی ضرورت ہے۔ ۔ ۔ ہاں تو بھاٹیہ صاحب میں اب اجازت چاہتا ہوں۔
مسز بھاٹیہ : اور ۔ ۔ ۔ اور یہ سب احتیاط صرف وہی عورت کر سکتی ہے۔ ۔ ۔ میں بالکل ناکارہ ہوں۔ محض اتفاق ہے کہ میں اس کی ماں ہوں۔ ورنہ وہی عورت اس کی سب کچھ ہے (سسکیاں)۔ ۔ ۔ میں۔ ۔ ۔ میں کتنی رکھی ہوں۔
بھاٹیہ :ڈاکٹر صاحب آپ کا بہت بہت شکریہ۔ امید ہے شام کو آپ ضرور تشریف لائیں گے۔
ڈاکٹر :ایک ایک گھنٹے کے بعد دوا دینا نہ بھولئے گا اور وہ بھاپ بھی۔ ۔ ۔
بھاٹیہ :آپ مطمئن رہیں گوپال کی استانی ہوشیار ہے اسے سب کچھ یاد رہے گا۔
(دروازہ کھولنے اور بند کرنے کی آواز۔ ۔ ۔ ڈاکٹر چلا جاتا ہے۔ )
مسز بھاٹیہ :تم یہ جھگڑا ہی ختم کیوں نہیں کر دیتے۔ یہ نئی بلا جو تم نے پالی ہے اسی کے ہو رہو اور مجھے زہر دے کر ہلاک کر دو۔ یہ روز روز کی دانتا کلکل تو ختم ہو۔ میرا تو اس گھر میں ہونا نہ ہونا برابر ہے۔ یہ چپلا جب سے آئی ہے ایساجادو اس نے تم پرکیا ہے کہ میں کیا کہوں۔ اب تو گھر میں اسی کا راج ہے۔ میں کون، تین میں تیرہ میں سعی کی گرہ میں۔ ۔ ۔ تم تو خیراس کے ہو ہی گئے تھے۔ پراس موئی نے تو میرے بچے پربھی قبضہ جما لیا ہے۔ اب بتاؤ میں کہاں جاؤں ؟
بھاٹیہ : (بڑی متانت اور ٹھنڈے دل سے) میں تم سے بار بار کہہ چکا ہوں اور اب پھر کہتا ہوں کہ تم بہت بڑی غلط فہمی میں مبتلا ہو۔ یہ گھربار سب تمہارا ہے بچہ بھی تمہارا ہے جس عورت کا تم بار بار ذکر کرتی ہو وہ تمہاری نوکر ہے۔ ۔ ۔ تمہارے بچے کو اس نے دنوں میں سدھار دیا۔ ۔ ۔ اب بیماری میں وہ اس کی خبرگیری کر رہی ہے اس کے لئے
مسز بھاٹیہ :تم اس کی وکالت کیوں کرتے ہو؟۔ ۔ ۔ تم کیوں اس کی اصلی خواہشوں پر پردہ ڈالتے ہو۔ ۔ ۔ کیایہ جھوٹ نہیں کہ جب سے وہ اس گھر میں داخل ہوئی ہے تم مجھ سے بالکل بے پرواہ ہو گئے ہو۔ تم اب مجھ سے بات کرنے کے بھی روادار نہیں اور کیا یہ جھوٹ ہے کہ بچے کولے کر کئی کئی گھنٹے تم اس حرافہ کے ساتھ باغ میں ٹہلتے رہتے ہو؟جب وہ بچے کو سبق پڑھاتی ہے تو گھنٹوں تم اس کے پاس بیٹھے رہتے ہو کیا یہ غلط ہے کیا یہ سب اس چڑیل کی کارستانی نہیں۔ ۔ ۔ اس ذلیل عورت کو جو فاحشہ سے بھی بدتر ہے۔ ۔ ۔
مسٹر بھاٹیہ :پاربتی۔ ۔ ۔ بند کرو اس بکو اس کو(غصے کوپی کر) تم۔ ۔ ۔ تم۔ ۔ ۔ اب میں تم سے کیا کہوں۔ میری زندگی تم نے اجیرن کر دی ہے۔
مسز بھاٹیہ : (طعن آمیز لہجے میں) میں تو بہت سکھی ہوں۔ ۔ ۔ میری زندگی تو بڑے آنند میں گزر رہی ہے۔
مسٹر بھاٹیہ :بھگوان کے لئے اب یہ موہنا ٹھی ٹھی بند کرو۔
مسز بھاٹیہ :زور صرف مجھی پر چلتا ہے۔ لیکن سن لو جب تک یہ عورت گھر میں موجود ہے میری زبان چلتی رہے گی۔ مجھے دیکھ دینے کے لئے جب تم یہ عورت یہاں لے آئے ہو تو میں تمہیں ایک لمحے کے لئے چین نہ لینے دوں گی اور اس عورت۔ ۔ ۔ اور اس عورت کو پرماتما سزا دے گا۔ جس نے میرے بسے بسائے گھر کو برباد کیا ہے۔ جس نے میرا پتی دن دہاڑے مجھ سے چھین لیا ہے۔
مسٹر بھاٹیہ :میں اب دفتر جا رہا ہوں زیادہ باتیں کرنے کے لئے میرے پاس وقت نہیں تم چا ہو تو دوسرے کمرے میں اپنے لڑکے کے پاس جا سکتی ہو۔
مسز بھاٹیہ :میں نہیں جاؤں گی۔
مسٹر بھاٹیہ :یہ اور بھی اچھا ہے۔
(دروازے کھولنے اور بند کرنے کی آواز۔ بھاٹیہ چلا جاتا ہے۔ مسز بھاٹیہ چند لمحات تک اضطراب کی حالت میں ٹہلتی ہے۔ )
مسز بھاٹیہ :چپلا۔ ۔ ۔ چپلا۔
(دروازہ کھولنے کی آواز۔ )
چپلا :میں نے آپ کی آواز سن لی تھی۔ آپ نے دوسری مرتبہ زور سے پکارا گوپو جاگ پڑا۔
مسز بھاٹیہ :پھر سو جائے گا۔ کوئی حرج نہیں !
چپلا :بڑی مشکل سے بیچارے کی آنکھ لگی تھی۔
مسز بھاٹیہ :گوپو سے تمہیں بہت پیا رہے ؟
چپلا :جی ہاں۔
مسز بھاٹیہ :کیوں ؟
چپلا :مجھے اس سے پیا رہے۔ میں دل سے اسے چاہتی ہوں۔ ۔ ۔ کیوں ؟ اس کا میں آپ کو جواب دوں۔
مسز بھاٹیہ :کیا مجھے اس سے محبت نہیں ؟
چپلا :آپ کو مجھ سے زیادہ اس کا علم ہونا چاہئے۔
مسز بھاٹیہ :کیا میں اس کی ماں نہیں ؟
چپلا :آپ یقیناً اس کی ماں ہیں۔
مسز بھاٹیہ :تم اس کی کیا ہوتی ہو؟
چپلا :استانی، جس کو آپ نے مقرر کیا ہے۔
مسز بھاٹیہ :میں نے تمہیں مقرر نہیں کیا۔ میرے پتی نے تجھے نوکر رکھا ہے۔
چپلا :میں بھاٹیہ صاحب اور آپ میں کوئی فرق نہیں سمجھتی۔ میں آپ کی بھاٹیہ صاحب اور گوپو تینوں کی خدمت گار ہوں۔ میرا کام خدمت کرنا ہے۔
مسز بھاٹیہ :جیسی خدمت تم میرے پتی کی کر رہی ہو۔ اس سے پتہ چلتا ہے کہ تم اپنے فن میں ضرورت سے زیادہ مہارت رکھتی ہو؟
چپلا :میں آپ کا مطلب نہیں سمجھی۔
مسز بھاٹیہ :میرے منہ میں بھاٹیہ صاحب کی زبان ہوتی تو میرا مطلب فوراً تمہاری سمجھ میں آ جاتا۔ ۔ ۔ تم۔ ۔ ۔
چپلا :فرمائیے۔
مسز بھاٹیہ : (لہجہ بدل کر)دیکھو چپلا۔ میں عورت ہوں۔ تم بھی عورت ہو۔ ۔ ۔ آؤ کھل کر باتیں کریں وہ پردہ اٹھا دیں جو ہمارے درمیان حائل ہے۔
چپلا :آقا اور نوکر کے درمیان پردہ ہی کیا ہو سکتا ہے۔
مسز بھاٹیہ :انجان بننے کی کوشش نہ کرو۔ ۔ ۔ میں تم سے ایک التجا کرنا چاہتی ہوں۔ ۔ ۔ میں تم سے کچھ مانگنا چاہتی ہوں۔ مجھے مانگنے دو۔ التجا کرنے دو۔ ۔ ۔ دیکھو جب سے تم اس گھر میں آئی ہو۔ میری زندگی بالکل اجیرن ہو گئی ہے۔ میرا پتی مجھ سے چھین گیا۔ میرا بچہ بھی میرا بچہ نہ رہا۔ ۔ ۔ یہ سب کچھ تم نے لے لیا۔ ۔ ۔ وہ تمام چیزیں جن کی ملکیت سے عورت بیوی بنتی ہے۔ ایک ایک کر کے تم مجھ سے چھین چکی ہو اس گھر میں جو کبھی میرا تھامیں اجنبی مہمانوں کی سی زندگی بسر کر رہی ہوں۔ ۔ ۔ دیکھو تم عورت ہو ایک مظلوم عورت تم سے بھیک مانگتی ہے اس کو وہ تمام چیزیں بخش دو جو اتفاق سے تمہارے ہاتھ آ گئی ہیں۔
چپلا : (جذبات پر قابو پا کر)۔ ۔ ۔ آپ۔ ۔ ۔ آپ۔ ۔ ۔ اب میں آپ سے کیا کہوں، آپ ایک شریف عورت کو بدنام کر رہی ہیں۔
مسز بھاٹیہ : (چڑ کر)شریف عورت۔ ۔ ۔ آہ تمہاری شرافت۔ ۔ ۔ تم عورت نہیں ڈائن ہو۔ لیکن میں پوچھتی ہوں، کب تک تم ان چیزوں کو اپنی ملکیت بنائے رکھو گی۔ ۔ ۔ جن پر تمہارا کوئی حق نہیں۔ کب تک تم اس گھر میں فساد برپا کئے رکھو گی۔ ۔ ۔ کب تک۔ ۔ ۔ کب تک۔ ۔ ۔ کب تک تم ان بجلیوں سے بچی رہو گی جو آکاش میں تم ایسی ناپاک عورتوں پر گرنے کے لئے تڑپتی رہتی ہیں۔
چپلا : (کوئی فیصلہ کرنے کے انداز میں)آپ کیا چاہتی ہیں۔ میں چاہتی۔ ۔ ۔
مسز بھاٹیہ :میں تمہارے منہ پر تھوکنا چاہتی ہوں۔ ۔ ۔ میں چاہتی ہوں کہ یہ دنیا تمہارے وجود سے پاک ہو جائے۔ میں چاہتی ہوں کہ جو دکھ تم نے مجھے دیئے ہیں۔ تمہارے حلق میں ہچکی بن کر اٹک جائیں۔ ۔ ۔ میں بہت کچھ چاہتی ہوں۔ ۔ ۔ میں چاہتی ہوں کہ گوپال مجھے ماں کہے۔ میری بے چارگی دیکھو کہ میں کیا چاہتی ہوں۔
چپلا :گوپال کی ماں آپ کے سوا کون ہو سکتی ہے ؟
مسز بھاٹیہ :تم۔ ۔ ۔ تم۔ ۔ ۔ جس نے میری مامتا پربھی قبضہ جما لیا۔
چپلا : (معنی خیز لہجے میں)مامتا چرائی نہیں جا سکتی۔ آپ نے خود کہیں کھو دی ہو گی۔
مسز بھاٹیہ :میں تم سے بحث کرنا نہیں چاہتی۔ ایک سودا کرنا چاہتی ہوں۔ ۔ ۔ مجھ سے کچھ زیورات لے لو اور یہاں سے چلی جاؤ۔ ان سے کہہ دینا۔ ۔ ۔ میں اپنی مرضی سے جا رہی ہوں۔
چپلا :کیا اس سے آپ کا اطمینان ہو جائے گا۔
مسز بھاٹیہ : (خوش ہو کر) تومیں تمہیں زیور اور روپے لادوں۔
چپلا :جی نہیں، مجھے ان کی ضرورت نہیں۔ آپ نے مجھے نوکر رکھا اور اب نکال دیا اس میں سودا کرنے کی نوبت ہی کہاں آتی ہے میں آج ہی چلی جاؤں گی اور یہ افسوس ساتھ لیتی جاؤں گی کہ آپ نے مجھے شک کی نظروں سے دیکھا۔ ۔ ۔ گوپال آپ ہی کا ہے۔ پرماتما کرے کہ وہ تندرست ہو جائے اور آپ کی گود ہری رہے۔
(کلاک چھ بجاتا ہے۔ )
مسٹر بھاٹیہ : (اپنی بیوی کو آواز دیتا ہے) پاربتی۔ پاربتی۔ ۔ ۔
مسز بھاٹیہ : (روکھے پن سے)کیا ہے ؟
مسٹر بھاٹیہ :چپلا کہاں ہے۔ بچے کو اس نے دوا کیوں نہیں پلائی؟
مسز بھاٹیہ :مجھے کیا معلوم۔ اپنے کمرے میں ہو گی۔
مسٹر بھاٹیہ :کیا کر رہی ہے ؟
مسز بھاٹیہ :اندر جا کے دیکھ لو۔
مسٹر بھاٹیہ :دیکھتا ہوں۔
(چلتا ہے اور دروازہ کھول کر دوسرے کمرے میں جاتا ہے۔ )
بھاٹیہ :چپلا، تم کیا کر رہی ہو۔ ۔ ۔ یہ اسباب وغیرہ تم نے کیوں باندھا ہے ؟
چپلا :میں جا رہی ہوں۔
بھاٹیہ :کہاں ؟
چپلا :جہاں سے آئی تھی۔
بھاٹیہ :کوئٹے میں بھونچال کے بعد، تمہارا کون باقی رہا ہے۔
چپلا :کہیں اور چلی جاؤں گی۔
بھاٹیہ :تم نے تو وعدہ کیا تھا کہ گوپال کو چھوڑ کر کبھی نہ جاؤں گی۔ جانتی ہو۔ وہ تمہیں کتنا چاہتا ہے۔ ۔ ۔
چپلا :یہ اس کی غلطی ہے۔ اس کو اپنی ماں سے محبت کرنی چاہئے۔
بھاٹیہ : (تھوڑی دیر خاموش رہ کر)معلوم ہوتا ہے اس کی ماں سے تمہاری گفتگو ہوئی ہے لیکن اس سے تم نے یہ کہا ہوتا کہ ماں کو بھی اپنے بچے سے محبت کرنی چاہئے۔ ۔ ۔ تم نے اس سے پوچھا ہوتا کہ ماں بننے کا خیال اب ایکا ایکی اس کے دل میں کیوں پیدا ہو گیا ہے۔
چپلا :میں نوکر ہوں بھاٹیہ صاحب۔ ایسے گستاخانہ سوال میری زبان پر کبھی نہیں آ سکتے۔
بھاٹیہ :لیکن وہ عورت۔ ۔ ۔ لیکن وہ عورت۔ ۔ ۔ آہ۔ اس عورت نے مجھے کتنا تنگ کیا ہے۔ جب تم یہاں نہیں تھیں تو وہ سمجھتی تھی کہ میں نے باہر ہی باہر کئی عورتوں سے تعلقات قائم کر رکھے ہیں۔ اب تم یہاں ہو تو۔ ۔ ۔ تو اب میں تم سے کیا کہوں کہ وہ کیا سمجھتی ہے۔ ۔ ۔ میں بہت شرمندہ ہوں چپلا کہ میرے گھر میں تمہیں ایک بے وقوف عورت کے ہاتھوں دکھ پہنچا ہے۔
چپلا :انہیں شک ہے۔
بھاٹیہ :ہر چیز کوشک کی نظروں سے دیکھ دیکھ کراب وہ ناقابل برداشت حد تک شکی ہو گئی ہے۔ اس کی حالت قابل رحم ہے۔ وہ مریض ہے۔ وہم اس کو مرض بن کے چمٹ گیا ہے وہ لاعلاج ہے۔ شادی کے بعد دوسرے ہی ہفتے اس نے مہندی لگے ہاتھوں سے میرا منہ نوچنا شروع کر دیا تھا۔ میں ایک مصروف آدمی ہوں سارا دن دفتر میں سر کھپاتا رہتا ہوں یقین مانو تمہارے یہاں آنے سے پہلے میں گھر آتے وقت ڈرتا تھا بہت خوف کھاتا تھا اس کی دیوانگی کا اثر صرف میری ذات ہی پر ختم ہو جاتا تو شاید میں برداشت کر لیتا مگر اس کی بے وقوفیوں نے میرے بچے کا بھی ستیاناس کر دیا۔ اس کی عادات خراب ہو گئیں۔ میں نے پرماتما کا لاکھ لاکھ شکر ادا کیا کہ اس نے تم جیسی دیوی کو میرے گھر بھیج دیا۔ تمہارے آنے سے میری بہت سی پریشانیاں دور ہو گئیں بچے کو تم نے سنبھال لیا۔ اس کو پیار و محبت کی ضرورت تھی اور تم نے دونوں ہی اپنا گرویدہ بنا لیا۔ مگر اب تم جا رہی ہو۔ ۔ ۔
چپلا :جی ہاں۔ جا رہی ہوں !
بھاٹیہ :ٹھیک ہے مگر میرے بچے کا کیا ہو گا۔ وہ عورت تو مجھے اور اسے دونوں کو اپنی حماقتوں سے ہلاک کر دے گی(وقفہ) تم نہیں جاؤ گی۔ ۔ ۔ تم یہیں رہو گی۔ آخر اس گھر پر تو کچھ میرا بھی حق ہے میرے منہ میں بھی تو زبان ہے۔ اب تک میں نے اپنے اختیارات سے کام نہیں لیا۔ لیکن اب مجھے لینا پڑے گا۔
چپلا :بھاٹیہ صاحب۔ آپ اس جھگڑے کو طول نہ دیجئے۔ ۔ ۔ میں نہیں چاہتی کہ آپ میں اور ان میں میری وجہ سے کشیدگی پیدا ہو۔
بھاٹیہ :یہ کشیدگی اب پیدا نہیں ہوئی تمہارے آنے سے پہلے ہی اس گھر میں موجود تھی۔ ۔ ۔ میں تم سے درخواست کرتا ہوں کہ ابھی کچھ دیر ٹھہر جاؤ گوپو اچھا ہو جائے تو کیا پتہ ہے کہ اس کی ماں بھی سمجھ جائے۔ ۔ ۔ میں جانتا ہوں کہ اس کی باتوں سے تمہیں بہت دکھ پہنچا ہو گا اور ۔ ۔ ۔ اور تم کو زبردستی یہاں ٹھہرانے کا مطلب یہ ہے کہ مزید توہین برداشت کرنے کے لیے تمہیں مجبور کیا جائے۔ مگر ۔ ۔ ۔ مگر ۔ ۔ ۔ نہیں چپلا۔ تم نہیں جاؤ گی۔ تمہارے انکار سے ہمیں صدمہ ہو گا۔ ۔ ۔ کھول دو اپنا اسباب!
(دروازہ کھول کر دوسرے کمرے میں چلا جاتا ہے۔ )
بھاٹیہ :پاربتی تمہیں یہ سن کر خوشی ہو گی کہ چپلا اب نہیں جائے گی۔ اس نے اپنا ارادہ ترک کر دیا ہے۔
مسز بھاٹیہ : (طنز بھرے لہجے میں) مجھے بہت خوشی ہوئی ہے۔
بھاٹیہ : اور دیکھو۔ اگر تم نے اس کی توہین کی یا اسے اپنی وہم پسند طبیعت کا نشانہ بنایا۔ ۔ ۔
مسز بھاٹیہ : (تیزی سے)تو۔ ۔ ۔ تو کیا ہو گا۔ ۔ ۔ تم مجھے دھمکاتے کیا ہو۔ کیا کرو گے تم۔ ۔ ۔ مجھے دھکے مارکر باہر نکال دو گے۔ ۔ ۔ مجھے مار ڈالو گے ؟ کیا کرو گے ؟
بھاٹیہ :میں ایک بار پھر تمہارے لیے دعا کروں گا۔
مسز بھاٹیہ :مگر تم اس عورت کو نہیں چھوڑو گے اس کو ہمیشہ اپنے ساتھ رکھو گے۔ جو تمہارا دل نہ جانے کن اداؤں سے موہ چکی ہے جو کوٹھے میں بھونچال لا کر اب اس گھر میں زلزلہ برپا کر رہی ہے۔ مگر یاد رکھو۔ ۔ ۔
بھاٹیہ : (بلند آواز میں غصے کے ساتھ)پاربتی۔ اس بے۔ ۔ ۔ بے ہودہ بکو اس کو بند کرو۔ میں۔ ۔ ۔ میں۔ کچھ نہیں، پرماتما تمہاری حالت پر رحم کرے۔
(فرش پر اضطراب کے ساتھ ٹہلنے کی آواز)
بھاٹیہ :اب خوش ہو گئیں۔ کلیجہ ٹھنڈا ہو گیا۔ ۔ ۔ وہ عورت جس نے تمہارے خیال کے مطابق نہ جانے کن اداؤں سے میرا دل موہ لیا ہے تمہارے بچے پر اپنی جان قریب قریب فنا کر چکی ہے۔ اس کی زندگی اور موت میں اتنا وقت بھی باقی نہیں کہ وہ تمہارے ظلم و ستم کے خلاف آواز بلند کر سکے۔ تمہیں کوئی بددعا ہی دے سکے۔
مسز بھاٹیہ :میرا کیا قصور ہے ؟
بھاٹیہ :تم نے ہر وقت اس کی توہین کی۔ اس کی ہر نیکی، ہر اچھائی کو تم نے اپنی لعنتی نظروں سے دیکھا۔ اف!جب میں اس کا تصور کرتا ہوں کہ تم نے ایک پاک اور معصوم عورت پر کیچڑ اچھالی ہے تو میری آتما کانپ کانپ اٹھتی ہے۔ مگر تمہاری آتما کہاں ہے ؟تمہارا ضمیر کہاں ہے۔ ۔ ۔ جاؤ، جاؤ، میری آنکھوں سے دور ہو جاؤ۔ ۔ ۔ تم قاتل ہو۔ تمہارے ہاتھ مجھے اس بے گناہ عورت کے خون میں آلود نظر آتے ہیں۔
مسز بھاٹیہ :کیا پتہ ہے بچ جائے۔
بھاٹیہ :اب وہ کیا بچے گی۔ ۔ ۔ ڈاکٹر جواب دے چکا ہے۔ تمہارے بچے کو موت سے بچا کروہ خود اس کے منہ میں چلی گئی ہے۔ ۔ ۔ اب کچھ نہیں ہو سکتا۔ کاش!میں نے اسے اسی روز جانے دیا ہوتا۔ میرا اس پر کوئی زور تو تھاہی نہیں مگر وہ میرے کہنے پر رضا مند ہو گئی اس لیے گوپو سے اسے پیار تھا۔ وہ پیار جو تمہارے دل میں ہونا چاہئے تھا۔ گوپو کو اس کے دل میں نظر آیا۔ وہ بچ گیا اور وہ موت جو تجھے آنا چاہئے تھی۔ اسے آ گئی۔
گوپال : (روتا ہوا آتا ہے) پتا جی، پتا جی۔ ۔ ۔ استانی جی کہاں ہیں ؟
بھاٹیہ :گوپال جاؤ۔ تم باہر کھیلو، تمہاری استانی بیمار ہے۔
گوپال :میں بیمار تھا تو میرے پاس بیٹھی رہتی تھیں۔ اب میں ان کے پاس بیٹھوں گا۔ پتا جی!
بھاٹیہ :ہاں، ہاں۔ ۔ ۔ لیکن تم اب باہر جاؤ۔
(گوپال چلا جاتا ہے۔ ۔ ۔ کچھ وقفے کے بعد)
مسز بھاٹیہ :مجھے اجازت ہو تو میں چپلا کو دیکھنا چاہتی ہوں۔
بھاٹیہ :اس اجازت کی ضرورت تمہیں کیوں محسوس ہوئی۔ ۔ ۔ جاؤ۔ ۔ ۔ دیکھ آؤ۔ مگر تمہارے دیکھے سے کیا اس کا دل تمہاری طرف سے صاف ہو جائے گا۔ وہ خراشیں جو تم اس کے دل و دماغ پر پیدا کر چکی ہو۔ یوں ایک بار دیکھنے سے مٹ تو نہیں جائیں گی۔ ۔ ۔ جاؤ ممکن ہے وہ تمہیں معاف کر دے۔ تم نے اسے بہت دکھ پہنچایا ہے۔ میں تو خیر تمہاری حماقتوں کا عادی ہو چکا تھا۔ مگر ایک آفت رسیدہ عورت کے لیے جو اچھے دن دیکھ چکی ہو تمہاری ہیسٹریا کے دورے ناقابل برداشت تھے۔
(وقفے کے بعد دروازہ کھولنے کی آواز۔ ۔ ۔ مسز بھاٹیہ دوسرے کمرے میں جاتی ہے۔ )
مسز بھاٹیہ :چپلا۔ ۔ ۔ چپلا۔ ۔ ۔ میں آئی ہوں۔
چپلا : (مردہ آواز میں) آئیے۔ ۔ ۔ آئیے۔ ۔ ۔ مگر یہاں آپ کس جگہ پر بیٹھیں گی۔
مسز بھاٹیہ :میں یہاں تمہاری چارپائی پر بیٹھ جاؤ گی۔ ۔ ۔ تم اٹھنے کی کوشش نہ کرو۔ ۔ ۔ لیٹی رہو۔
چپلا :مگر ۔ ۔ ۔ مگر ۔ ۔ ۔ نہیں، نہیں، آپ کو میرے پاس نہیں بیٹھنا چاہئے۔ یہ بیماری چھوت ہے۔ نہیں، نہیں، آپ دور ہی کھڑی رہیں اور جلد ہی باہر چلی جائیں۔
مسز بھاٹیہ :مجھے کچھ نہیں ہو گا۔ اگر کچھ ہو بھی گیا تو مجھے افسوس نہ ہو گا۔ میں تم سے معافی مانگنے آئی ہوں۔
چپلا :معافی؟۔ ۔ ۔ کیسی معافی۔ ۔ ۔ آپ مجھے شرمندہ کر رہی ہیں۔
مسز بھاٹیہ :میں نے غلط فہمی میں تم سے کئی بار ایسی باتیں کی ہیں جن سے یقیناً تمہیں بہت دکھ پہنچا ہے۔ اب سوچتی ہوں اگر میں تمہاری جگہ پر ہوتی تو میرے دل کی کیا حالت ہوتی۔
چپلا :میری جگہ پر آپ ہوتیں تو۔ ۔ ۔ تو یہ حالات نہ ہوتے۔ ۔ ۔ لیکن آپ میری جگہ پرکیوں ہوتیں ؟ہر ایک آدمی کے لیے ایک جگہ مقرر ہے۔ میرے لیے یہی جگہ مقرر تھی جہاں آ کر مجھے اپنی زندگی کے سب سے بڑے پاپ کا پرایشچت کرنا تھا۔
مسز بھاٹیہ :پاپ۔ ۔ ۔ پرایشچت!
چپلا :میں اب سوچتی ہوں اگر یہاں سے میں اس روز چلی جاتی تو میرے من کی من ہی میں رہ جاتی۔ کوئی زمانہ تھا کہ میں بھی آپ ہی کی طرح تھی۔ میرا پتی تھا جو آپ کے پتی کی طرح بڑا شریف کاروباری آدمی تھا۔ مگر میری حاسد اور بات بات پر شک کرنے والی طبیعت کا برا ہو کہ میں نے اس کو ہمیشہ پریشان رکھا۔ وہ جی ہی میں کڑھتا تھا۔ میں ہر گھڑی اس کو جلی کٹی سناتی مگر وہ چپ رہتا۔ اس کو خاموش دیکھ کر میں سمجھتی۔ چونکہ یہ مجرم ہے اس لیے کوئی بات اس کی زبان پر نہیں آتی۔ ۔ ۔
مسز بھاٹیہ :یہ تو میری ہی کہانی ہے۔ ۔ ۔
چپلا :گوپال جیسا میرا بھی ایک بچہ تھا اور میری طرح اس کی بھی ایک استانی تھی جس پر میں شک کرتی۔ کئی جھگڑے ہوئے میں نے اپنے پتی اور اپنی دونوں کی زندگی کو نرک بنا دیا تھا۔ ۔ ۔ اور ۔ ۔ ۔ اور اس کا انجام یہ ہوا کہ اس معصوم عورت نے جو میرے بچے کو مجھ سے زیادہ عزیز سمجھتی تھی کچھ کھا لیا اور مر گئی۔ اس کے بعد بھونچال آیا اور بچہ اور اس کا باپ دونوں ہمیشہ کے لیے مجھ سے جدا ہو گئے۔ لیکن اب۔ اب میں بھی ان کے پاس جا رہی ہوں۔
مسز بھاٹیہ : (اشک آلود آواز میں)نہیں، نہیں، تم زندہ رہو گی۔ میں تمہیں اپنی بہن بنا کے اپنے پاس رکھوں گی۔ عین اس وقت تک جب کہ میری آنکھیں کھلی ہیں تم ان سے اوجھل نہیں ہو سکتی ہو۔
چپلا :میں بہت خوش ہوں کہ اپنی آتما کا بوجھ ہلکا کرنے کے ساتھ میں نے ایک اچھا کام بھی کر دیا۔ ۔ ۔ بھاٹیہ صاحب اور آپ دونوں خوش رہیں۔ آپ کی زندگی پرماتما کرے سورگ بن جائے۔ ۔ ۔ لیکن آپ جائیے زیادہ دیر یہاں نہ ٹھہرئیے۔ ۔ ۔ ایسا نہ ہو۔ ۔ ۔
(آواز ڈوب جاتی ہے۔ )
مسز بھاٹیہ :چپلا۔ ۔ ۔ چپلا۔ ۔ ۔
(درد ناک سروں میں ساز بجتا ہے۔ مسز بھاٹیہ کے رونے کی آواز آتی ہے۔ )
(فیڈ آؤٹ)
***
ماخذ: ’’کروٹ‘‘
ساقی بک ڈپو
اردو بازار۔ دہلی
 
سعادت حسن منٹو

اس منجدھار میں
(’’پھندنے ‘‘میں سے)
کردار :
بیگم: ماں
امجد:بیگم کے بیٹے شکستہ
مجید:بیگم کے بیٹے ثابت و سالم
سعیدہ:امجد کی نئی نویلی حسین بیوی
اصغری:خادمہ
کریم اور غلام محمد: نوکر

پہلا منظر
(نگار ولا کا ایک کمرہ۔ ۔ ۔ اس کی خوبصورت شیشہ لگی کھڑکیاں پہاڑی کی ڈھلوانوں کی طرف کھلتی ہیں۔ حد نظر تک پہاڑی نظر آتے ہیں جو آسمان کی خاکستری مائل نیلاہٹوں میں گھل مل گئے ہیں۔ کھڑکیوں کے ریشمی پردے صبح کی ہلکی پھلکی ہوا سے ہولے ہولے سرسرا رہے ہی۔ یہ کمرہ جیسا کہ سازو سامان سے معلوم ہوتا ہے مجلہ عروسی میں تبدیل کیا جا رہا ہے۔ دائیں ہاتھ کو کھڑکیوں کے پاس ساگوان کی مسہری ہے۔ اس کے ساتھ ہی ایک کونے میں شیشے کی تپائی جس پر بلور کی صراحی اور گلاس کے علاوہ ایک ٹائم پیس رکھی ہے۔ پیچھے ہٹ کر پیازی ٹفینے میں ملبوس صوفہ سیٹ ہے اس پر دو ملازم گدیاں سجا رہے ہیں۔ ۔ ۔ اس سے دور ہٹ کر ایک نوجوان خادمہ جو معمولی شکل و صورت کی ہے آتشدان پر سجائی ہوئی مختصر چیزوں کو اور زیادہ سجانے کی کوشش کر رہی ہے۔ کمرے کی فضا میں ایسی دوشیزگی ہے جو ذرا سی جنبش سے منکوحیت میں تبدیل ہو سکتی ہے۔ ۔ ۔ باہر سے ٹائلوں پر لکڑی کی ننھی ننھی ضربوں کی آواز آتی ہے۔ تینوں خادم ہلکے سے رد عمل کے بعد اپنے اپنے کام میں مشغول رہتے ہیں۔ ۔ ۔ دروازے سے ایک ادھیڑ عمر کی وجیہہ عورت بیساکھیوں کی مدد سے اندر آتی ہے اور کمرے کا جائزہ لے کر اپنے اطمینان کا اظہار کرتی ہے۔ )
بیگم صاحب : (بیساکھیوں کی مدد سے کمرے میں ادھر ادھر پھر کر تمام چیزوں کو صحیح مقام پر دیکھ کر اطمینان کا اظہار کرتے ہوئے) ٹھیک ہے !(ایک بیساکھی کو اپنی بغل سے الگ کر کے صوفے کے بازو کے ساتھ رکھ کر بیٹھنا چاہتی ہے، مگر فوراً ہی اپنا ارادہ ترک کر دیتی ہے۔ ایسا کرتے ہوئے اس کا ایک ہاتھ سہارے کے لئے صوفے کے بازو کی چمکیلی سطح کے ساتھ چھوا تھا اور اس پر نشان پڑ گیا تھا۔ اپنے دوپٹے کا ایک کونہ پکڑ کر وہ یہ خودبخود مٹ جانے والا نشان بجھا دیتی ہے اور پھر بیساکھی اپنی بغل میں جما کر نوجوان خادمہ سے مخاطب ہوتی ہے) اصغری!
اصغری : (فوراً متوجہ ہو کر) جی!
بیگم صاحب :ایک دم یہ محسوس کر کے کہ وہ بھول گئی ہے کہ اس نے اصغری سے تخاطب کیوں کیا تھا) میں کیا کہنے والی تھی؟
اصغری : (مسکراتی ہے)آپ یہ کہنے والی تھیں کہ آپ کا اطمینان نہیں ہوا۔ ۔ ۔ میں بھی یہی سمجھتی ہوں بیگم صاحب۔ ۔ ۔ دولہن بہت خوبصورت ہے۔ ۔ ۔ اس کمرے کی تمام سجاوٹیں اس کے سامنے ماند پڑ جائیں گی۔
(وہ آتش دان کے عین درمیان میں ریشمی ڈوریوں سے آویزاں، دولہن کی تصویر کی طرف دیکھتی ہے۔ )
بیگم صاحب : (مسکراتی ہوئی۔ ۔ ۔ آتشدان کی طرف آہستہ آہستہ بڑھتی ہے اور اپنی بہو کی تصویر کو غور سے دیکھتی ہے۔ ۔ ۔ خوش ہوتی ہے لیکن ایک دم گھبرا سی جاتی ہے۔ ) اصغری!
اصغری :جی!
بیگم صاحب :صبح سے میری طبیعت۔ ۔ ۔ کچھ گھبرا سی رہی ہے۔
اصغری :امجد میاں جو آ رہے ہیں اپنی دولہن کے ساتھ۔
بیگم صاحب : (اپنے خیالات میں کھوئی کھوئی) ہاں۔ ۔ ۔ بس آنے ہی والا ہے۔ ۔ ۔ کمال موٹر لے گیا ہے اسٹیشن پر۔
اصغری :اگلے سال مجید میاں کی شادی کر دیجئے۔ ۔ ۔ گھر میں رونق ہی رونق ہو جائے گی۔
بیگم صاحب :انشاء اللہ۔ ۔ ۔ وہ بھی انشاء اللہ اسی طرح بخیر و خوبی انجام پائے گی۔ ۔ ۔ (زیر لب) انشاء اللہ۔
اصغری : (دولہن کی تصویر کی طرف دیکھتی ہے اور اس کے حسن سے بہت متاثر ہوتی ہے) اللہ نظر بد سے بچائے۔
بیگم صاحب : (غیر ارادی طور پر قریب قریب چیخ کر) اصغری!
اصغری : (سہم کر) جی!
بیگم صاحب :کچھ نہیں۔ ۔ ۔ گاڑی کب آتی ہے کراچی سے ؟
اصغری :معلوم نہیں بیگم صاحب۔
بیگم صاحب : (ایک خادم سے) دیکھو کریم تم ٹیلی فون کرو اور پوچھو۔ ۔ ۔ لیکن گاڑی تو کل ہی کی راولپنڈی پہنچ چکی ہے۔ ۔ ۔ مجید کا تار جو آیا تھا۔
کریم :جی ہاں !
بیگم صاحب : اور میں نے کمال کوکس اسٹیشن پر بھیجا ہے۔ ۔ ۔ (گھبرا کر) خدا معلوم میرے دماغ کو کیا ہو گیا ہے۔ ۔ ۔ امجد میاں کورات راولپنڈی ٹھیرنا تھا۔ ۔ ۔ اپنے دوست سعید کے پاس۔ ۔ ۔ اور وہ تو میرا خیال ہے اب وہاں سے چل بھی چکے ہوں گے (دوسرے خادم سے) غلام محمد؟
غلام محمد :جی؟
بیگم صاحب :تم دیکھو کمال کہاں ہے۔ ۔ ۔ موٹر کہاں لے گیا ہے ؟
غلام محمد :بہت اچھا!
(چلا جاتا ہے۔ )
بیگم صاحب : (اصغری کے کاندھے کا سہارا لے کر) آج صبح سے میری طبیعت ٹھیک نہیں۔ ۔ ۔ چلنے پھرنے سے معذور نہ ہوتی۔ ۔ ۔ اس کم بخت ڈاکٹر ہدایت اللہ نے مجھے منع نہ کیا ہوتا تو میں دولہن کو ساتھ لاتی(دور سے ٹیلی فون کی گھنٹی کی آواز سنائی دیتی ہے) میرا خیال ہے شاید امجد میاں کے دوست کا ٹیلیفون ہے کہ وہ چل پڑے ہیں، جاؤ اصغری۔ ۔ ۔ بھاگ کے جاؤ۔
(اصغری دوڑی باہر جاتی ہے۔ )
بیگم صاحب : (کریم سے۔ ۔ ۔ اپنی افسردگی دور کرنے کی خاطر) بس اب آتے ہی ہوں گے امجد میاں۔
کریم :اللہ خیرخیریت سے لائے۔
بیگم صاحب : (قریب قریب چیخ کر) کیا مطلب تمہارا۔
کریم : (ڈر کر) جی یہی کہ۔ ۔ ۔ جی یہی۔ ۔ ۔
(اصغری کی چیخیں سنائی دیتی ہیں۔ ’’بیگم صاحب، بیگم صاحب‘‘)
بیگم صاحب : (سراسیمہ ہو کر) کیوں کیا ہوا؟
(اصغری سخت اضطراب کی حالت میں اندر داخل ہوتی ہے۔ )
اصغری :بیگم صاحب۔ ۔ ۔ بیگم صاحب۔
بیگم صاحب : (بیساکھیوں کو دونوں ہاتھوں سے مضبوط پکڑ کر) کیا ہے ؟
اصغری :جی۔ ۔ ۔ مجید میاں کا ٹیلی فون آیا ہے کہ گاڑی۔ ۔ ۔ گاڑی ٹکرا گئی ہے۔
بیگم صاحب : (بیساکھیوں پر ہاتھوں کی گرفت اور زیادہ مضبوط ہو جاتی ہے) پھر؟
اصغری :مجید میاں اور ان کی دولہن دونوں زخمی ہوئے ہیں اور اسپتال میں پڑے ہیں۔
بیگم صاحب : (ہاتھوں کی گرفت ڈھیلی پڑ جاتی ہے۔ ۔ ۔ بیساکھیاں بغل سے گر پڑتی ہیں۔ ایک لحظے کے لئے وہ یوں کھڑی رہتی ہے جیسے پتھر کا بت۔ ۔ ۔ پھر اس میں تھوڑی سی جنبش ہوتی ہے اور وہ دروازے کی جانب بڑھتی ہے) کمال سے کہو، موٹر نکالئے۔ ۔ ۔ ہم راولپنڈی جا رہے ہیں۔
(بیگم دروازے کی جانب بڑھ رہی ہے۔ ۔ ۔ غلام محمد اور اصغری دونوں حیرت زدہ ہیں۔ اصغری زور سے چیختی ہے۔ ۔ ۔ بیگم پلٹ کراس کی طرف دیکھتی ہے۔ )
بیگم صاحب :کیا ہے ؟
اصغری :آپ۔ ۔ ۔ آپ چل رہی ہیں۔ ۔ ۔ چل سکتی ہیں۔
بیگم صاحب :میں ؟(اپنی بغلوں میں بیساکھیوں کی عدم موجودگی کا احساس کرتے ہوئے) میں ؟۔ ۔ ۔ میں کیسے چل سکتی ہوں ؟
(ایک دم چکراتی ہے اور فرش پر گر کر بے ہوش ہو جاتی ہے۔ )
اصغری : (بیگم کے پاس جاتے ہوئے، غلام محمد سے) غلام محمد جاؤ ڈاکٹر صاحب کو ٹیلی فون کرو۔
(غلام محمد جاتا ہے۔ ۔ ۔ اصغری، بیگم کو ہوش میں لانے کی کوشش کرتی ہے۔ )
۔ ۔ ۔ پردہ۔ ۔ ۔

دوسرا منظر
(وہی کمرہ جو پہلے منظر میں ہے۔ ۔ ۔ ایسا معلوم ہوتا ہے کہ اس میں جو ساز و سامان پہلے پڑا تھا۔ اب اپنا نیا نویلا پن کھو چکا ہے۔ اب ہر چیز دیر کی استعمال شدہ معلوم ہوتی ہے۔ ۔ ۔ صبح کا وقت ہے۔ کھڑکیوں کے ریشمی پردے صبح کی ہلکی لپکتی ہوا سے سرسرا رہے ہیں۔ ۔ ۔ دائیں ہاتھ کی ساگوان کی مسہری پر دولہن سعیدہ کمل اوڑھے لیٹی ہے۔ ۔ ۔ شیشے کی تپائی پر پڑی ہوئی ننھی ٹائم پیس جس میں نو بجے ہیں، لندنا شروع کر دیتی ہے۔ ۔ ۔ ہلکی سی گھنٹی کی آواز پیدا ہوتی ہے۔ ۔ ۔ کمبلوں میں جنبش پیدا ہوتی ہے۔ ۔ ۔ سعیدہ کروٹ بدلتی ہے اور آنکھیں کھولتی ہے۔ جھک کر ننھی ٹائم پیس کی طرف دیکھتی ہے اور مسکراتی ہے۔ ایسا کرتے ہوئے اس کے خوبصورت چہرے پرچھائی ہوئی گھنی پلکیں پھڑپھڑاتی ہیں۔ ۔ ۔ کروٹ بدل کر وہ بستر میں تکیوں کا سہارا لے کر ذرا اوپر اٹھ آتی ہے اور باہر حد نظر تک پھیلی ہوئی پہاڑیوں کا دلکش منظر دیکھ کر بچوں کی سی مسرت محسوس کرتی ہے۔ ۔ ۔ پھر ایک دم ٹانگیں چلا کر کمبل اوپر سے ہٹاتی ہے اور ا چک کر مسہری سے اترتی ہے اور کھڑکی کا پردہ ہٹا کر باہر دیکھنا شروع کر دیتی ہے۔ ۔ ۔ کسی خوش الحان پرندے کی آواز سنائی دے رہی ہے۔ ۔ ۔ سعیدہ اپنے خوابوں میں محو ہے۔ وہ جز ان ہے۔ شب خوابی کا ڈھیلا ڈھالا ریشمی لباس بھی جواس کے بدن سے دور دور اپنی حریری دنیا الگ بسائے ہے، اس کے خوبصورت خطوط سے غافل نہیں۔ ۔ ۔ اور خود سعید کا ادراک بھی۔ ۔ ۔ اس کا سراپا حسین و جمیل ہے اور اپنے حسن و جمال سے آگاہ۔ ۔ ۔ اصغری کی کرخت آواز پرندے کی خوش الحافی کا تقابل پیش کرتی ہے۔ سعیدہ چونکتی ہے۔ )
سعیدہ : (نگاہوں ہی نگاہوں میں ’’کیا ہے ؟‘‘پوچھتی ہے۔ )
اصغری :مجید میاں ابھی ابھی ہسپتال سے آئے ہیں۔ کہتے تھے، جا کے دیکھو اب جگ گئیں یا نہیں ؟
سعیدہ :کیا خبر لائے ہیں ؟
اصغری :میں انھیں بھیجتی ہوں۔
(اصغری چلی جاتی ہے۔ سعیدہ کھڑکی کے پاس سے ہٹ کر سنگھار میز کے پاس آتی ہے۔ آئینے میں ایک لحظے کے لئے اپنے آپ کا جائزہ لیتی ہے۔ دونوں ہاتھوں سے اپنے بکھرے ہوئے بال سرسری طور پر ٹھیک کر کے مسہری کی طرف آہستہ آہستہ بڑھتی ہے۔ مسہری کے سرہانے اس کا جارجٹ کا سفید دوپٹہ لٹک رہا ہے۔ اسے اتارتی ہے اور بڑی بے توجہی سے اپنے کاندھوں پر ڈال لیتی ہے۔ ۔ ۔ باہر سے بوٹوں کی چرمی آواز آتی ہے، خفیف سے رد عمل کے ساتھ سعیدہ دروازے کی جانب دیکھتی ہے۔ ۔ ۔ مجید۔ ۔ ۔ سانولے رنگ کا متوسط نوجوان، جو مضبوط ہاتھ پاؤں رکھتا ہے اور جس کے چہرے کے خطوط عمر کے مقابلے میں زیادہ پختہ اور منجھے ہوئے ہیں، اندر داخل ہوتا ہے۔ )
مجید :سلام بھابھی جان!
سعیدہ :سلام۔
مجید : (صوفے کے پاس آ کر رکتے ہوئے) طبیعت کیسی ہے آپ کی؟
سعیدہ : (بے دلی سے)ٹھیک ہے (صوفے پر بیٹھ جاتی ہے) سنائیے کیا خبر لائے راولپنڈی سے ؟
مجید : (سعیدہ کے سامنے آ کر)کوئی خاص نہیں (آدھی سی آہ بھرکر) بس اب انھیں لے آئیں گے یہاں۔
سعیدہ :کیوں ؟
مجید :وہ تنگ آ گئے ہیں (ایک مونڈھا گھسیٹ کراس پر بیٹھتے ہوئے) ان کی جگہ میں ہوتا تو۔ ۔ ۔ بہت ممکن ہے میں نے خودکشی کر لی ہوتی۔
سعیدہ : (اٹھ کر کھڑکی کی طرف جاتے ہوئے)کیا معلوم تھا میری قسمت میں یہ لکھا ہے۔ ۔ ۔ اتنے آدمی مرے۔ ۔ ۔ میں بھی ساتھ ہی مر گئی ہوتی۔
مجید :مگر یہ اللہ کو منظور نہیں تھا۔
سعیدہ : (کھڑکی سے باہر پہاڑیوں کا منظر دیکھتی ہے)ہاں، یہ اللہ کو منظور نہیں تھا۔ ۔ ۔ اللہ کو یہ منظور تھا کہ میری ٹانگ پر ہلکی سی خراش آئے پر میری ساری زندگی زخموں سے چور چور ہو جائے (آنکھوں سے آنسو ٹپکنے لگتے ہیں۔ ۔ ۔ سفید دوپٹے سے وہ انھیں پر نزاکت طریقے سے ہولے ہولے خشک کرتی ہے) اللہ کو یہ منظور تھا کہ میرے سہاگ کی کمر ٹوٹ جائے اور میں ساری عمر ہوا میں کٹے ہوئے پتنگ کی طرح ڈولتی رہوں۔
(سسکیاں لیتی ہے۔ )
مجید ۔ : (اٹھتا ہے)بھابھی جان حوصلے سے کام لینا چاہئے۔ ۔ ۔ کیا پتا ہے وہ ٹھیک ہو جائیں۔
سعیدہ : (سرزنش کے طور پر) مجید، کم از کم تم تو مجھے دھوکا دینے کی کوشش نہ کرو۔ ۔ ۔ چھ مہینے ہو گئے ہیں انھیں ہسپتال کی چارپائی کے ساتھ لگے ہوئے۔ ۔ ۔ ڈاکٹروں کاجو فیصلہ ہے۔ میں اسے اچھی طرح جانتی ہوں۔ ۔ ۔ وہ کبھی ٹھیک نہیں ہو سکتے۔ ۔ ۔ ان کی دونوں ٹانگیں بیکار ہو چکی ہیں۔ ۔ ۔ لیکن۔ ۔ ۔ لیکن، میں ایک بات مانتی ہوں کہ ان میں بہت حوصلہ ہے۔ ۔ ۔ میں جب بھی ان کے پاس گئی۔ انھوں نے مجھے پاس بٹھا کر کہا، سعیدہ، کچھ فکر نہ کرو، میں بہت جلد تندرست ہو جاؤں گا۔ ۔ ۔ اور پھر میں تمہیں ان پہاڑیوں کی سیر کراؤں گا جن کا ذکر تم کراچی میں اتنی بار میرے منہ سے سن چکی ہو۔ ۔ ۔ مجھے ان پہاڑیوں سے پیار ہے۔ ۔ ۔ اتنا پیا رہے کہ تم ان کے متعلق اور سنو گی تو رشک کرو گی۔ ۔ ۔ اور وہ مجھے حوصلہ دینے لگتے کہ سعیدہ دنیا حادثوں کا دوسرا نام ہے۔ ۔ ۔ میں تو خدا کا شکر کرتا ہوں کہ میری جان نہیں گئی۔ ۔ ۔ ورنہ۔ ۔ ۔ پھر وہ ایسی بات کہتے کہ میرے رونگٹے کھڑے ہو جاتے۔
مجید :کیا؟
سعیدہ : (نمناک آنکھوں سے خلا میں دیکھتے ہوئے) کہ تم۔ ۔ ۔ کہ تم میرے بعد کسی اور کی ہو جاؤ گی۔ ۔ ۔ (کانپ جاتی ہے)۔ ۔ ۔ وہ۔ ۔ ۔ ایسی باتیں کیوں سوچتے ہیں مجید؟
مجید :معلوم نہیں۔
سعیدہ :تمہیں معلوم ہونا چاہئے (آہستہ آہستہ قدم اٹھاتی صوفے پر بیٹھ جاتی ہے۔ ۔ ۔ دوپٹہ ڈھلک آتا ہے۔ ۔ ۔ حریری لباس میں اس کا متلاطم سینہ ریشمی اتار چڑھاؤ پیدا کرتا ہے)تم مرد ہو۔ ۔ ۔ تم اس کے بھائی ہو۔ ۔ ۔ اگر اس حادثے کے تم شکار ہوتے۔ ۔ ۔ تو؟
مجید :میں کبھی ایسی باتیں نہ سوچتا جو امجد بھائی سوچتے ہیں ؟
سعیدہ :کیوں ؟
مجید :ہم دونوں مرد ہیں۔ ۔ ۔ دونوں بھائی ہیں۔ ۔ ۔ مگر دل اور دماغ کے اعتبار سے ہم دونوں بہت مختلف ہیں۔
سعیدہ : (بڑبڑاتی ہے)دل۔ ۔ ۔ اور دماغ۔
(اصغری داخل ہوتی ہے۔ )
اصغری :مجید میاں، آپ کو بیگم صاحب بلاتی ہیں۔
مجید :چلو، میں آتا ہوں۔
اصغری :انھوں نے کہا ہے جلدی آئیے۔
مجید :اچھا۔ ۔ ۔ (سعیدہ کی طرف دیکھ کر) میں ابھی آتا ہوں۔
(چلا جاتا ہے۔ )
اصغری : (فرش پر بچھے ہوئے رگ پر سعیدہ کے قدموں میں بیٹھ جاتی ہے اور اس کے پاؤں کی انگلیاں چٹخانا چاہتی ہے۔ )
سعیدہ : (پاؤں ایک طرف کھینچ کر) جانے دو اصغری۔
اصغری : (پاؤں سے قریب قریب لپٹ کر) نہیں دولہن بیگم۔ (انگلیاں چٹخانا شروع کر دیتی ہے)۔ ۔ ۔ کیا خبر لائے ہیں مجید میاں۔
سعیدہ :کہتے تھے، وہ یہاں آنا چاہتے ہیں۔
اصغری :یہ تو بڑی خوش خبری کی بات ہے۔
سعیدہ : (دکھ کے ساتھ) ہاں !
اصغری :پر بیگم صاحب تو بہت ناراض ہو رہی تھیں کہ اتنی دیر کیوں لگا دی مجید میاں نے۔
سعیدہ :کہاں ؟
اصغری :یہاں۔ ۔ ۔ آپ کے پاس۔
سعیدہ :میرے پاس؟۔ ۔ ۔ کیا کہتی تھیں بیگم صاحب۔
اصغری :کچھ نہیں۔ ۔ ۔ ان کا مزاج آج کل بہت چڑچڑا سا رہتا ہے۔ ۔ ۔ انھیں کوئی بات اچھی نہیں لگتی۔ ۔ ۔ انھیں۔ ۔ ۔ امجد میاں کا اتنا دکھ نہیں جتنا آپ کا ہے۔ ۔ ۔ ہر وقت آپ ہی کے متعلق سوچتی رہتی ہے۔ ۔ ۔ تو۔ ۔ ۔ امجدمیاں تھیک ہو گئے ہیں نا؟
سعیدہ : (چڑ کر، اپنا پاؤں ہٹا کر اٹھتے ہوئے) ہاں ٹھیک ہو گئے ہیں۔
(بیگم کمرے میں داخل ہوتی ہے۔ اصغری اٹھ کھڑی ہوتی ہے۔ )
سعیدہ :سلام خالہ جان!
بیگم صاحب :سلام بیٹا۔ ۔ ۔ جیتی رہو۔ (پاس آ کر سعیدہ کے سر پر پیار کا ہاتھ پھیرتی ہے) تمہیں معلوم ہو گیا مجید سے کہ۔ ۔ ۔
سعیدہ :جی ہاں !
بیگم صاحب :غریب تنگ آ گیا ہے وہاں ہسپتال میں۔ ۔ ۔ (اصغری کی طرف دیکھ کر) اصغری تم جاؤ۔
(اصغری چلی جاتی ہے۔ )
بیگم صاحب :اس کی۔ ۔ ۔ اس کی خواہش ہے کہ وہ تمہارے پاس رہے۔ ۔ ۔ اس نے مجھ سے کہا کہ اگر مجھے مرنا ہی ہے تو میری سعیدہ میری نظروں کے سامنے ہونی چاہئے۔ ۔ ۔
سعیدہ : (آنکھوں سے آنسو چھلک پڑتے ہیں۔ بیگم کے گلے سے لگ جاتی ہے۔ )
بیگم صاحب : (آنکھوں سے آنسو رواں ہیں) وہ۔ ۔ ۔ وہ تم سے بے اندازہ محبت کرتا ہے۔ ۔ ۔ لیکن۔ ۔ ۔ لیکن اس نے کہا تھا تم سے پوچھ لیا جائے کہ تمہیں اس کے یہاں آ کر رہنے میں کوئی اعتراض تو نہیں۔
سعیدہ :اعتراض۔ ۔ ۔
بیگم صاحب :ہاں بیٹا۔ ۔ ۔ ہو سکتا ہے، یوں تمہارے دکھ میں اضافہ ہو سکتا ہے۔
سعیدہ :وہ ایسا کیوں سوچتے ہیں۔ ۔ ۔ خالہ جان وہ ایسا کیوں سوچتے ہیں۔
بیگم صاحب :بیٹا، وہ کچھ ایسے ہی دل و دماغ کا آدمی ہے۔ ۔ ۔ اس کو دوسروں کا ہمیشہ خیال رہتا ہے۔
سعیدہ :آئیں۔ ۔ ۔ کیوں نہ آئیں (لہجے میں چیخ سی پیدا ہو جاتی ہے) وہ ایسی باتیں نہ کیا کریں۔
بیگم صاحب :ڈاکٹروں نے کہا ہے، اگر وہ خوش رہے تو انشاء اللہ ایک دو مہینے میں بیساکھیوں کی مدد سے چل پھر سکے گا۔ ۔ ۔ (ایک دم پھوٹ پھوٹ کر رونے لگتی ہے) بیساکھیاں۔ ۔ ۔ جواس کے گاڑی کے حادثے کی خبر سن کر میری زندگی سے الگ ہو گئی تھیں۔ ۔ ۔ مجھے معلوم ہوتا کہ یہ اس کی زندگی میں داخل ہونے والی ہیں تومیں ان کو مضبوطی سے پکڑ کے رکھتی۔ ۔ ۔ مگر بیٹا اس منجدھار میں جسے زندگی کہتے ہیں۔ مضبوط سے مضبوط کشتی لے ڈوبتی ہے اور ایک معمولی تنکا ہی کنارے لگا دیتا ہے۔ ۔ ۔ (توقف کے بعد) سعیدہ بیٹا، امجد نے مجھ سے ایک اور بات تم سے پوچھنے کا کہا تھا؟
سعیدہ :کیا خالہ جان؟
بیگم صاحب :کیا تم اس سے محبت کرو گی؟
سعیدہ : (بوکھلا کر)محبت۔ ۔ ۔
بیگم صاحب : (سعیدہ کے سر پر ہاتھ پھیرتی ہے)میں تمہیں زیادہ پریشان نہیں کرنا چاہتی۔ ۔ ۔
(چلی جاتی ہے۔ )
سعیدہ : (دوپٹے سے اپنے آنسو خشک کرتے ہوئے بڑبڑاتی ہے) محبت۔ ۔ ۔ محبت؟۔ ۔ ۔ دل و دماغ(آہستہ آہستہ قدم اٹھاتی، آتش دان کے عین وسط میں ریشمی ڈوریوں سے لٹکی ہوئی اپنی تصویر کے سامنے کھڑی ہو جاتی ہے)بتا۔ ۔ ۔ کیاتو اس سے محبت کرے گی؟
(ٹرے میں رکھی پیالیوں کی آواز آتی ہے۔ ۔ ۔ اصغری ناشتہ لئے اندر داخل ہوتی ہے اور پہیوں والی تپائی صوفے کے آگے لے جاتی ہے اور اس پر ناشتہ چن دیتی ہے۔ )
اصغری :دولہن بیگم، امجد میاں سے محبت نہیں کریں گی تو اور کون کرے گی؟
سعیدہ : (ایک دم چونکتی ہے) کیا کہا؟
اصغری :جی کچھ نہیں۔ ۔ ۔ ایسے ہی اپنے آپ سے باتیں کر رہی تھی۔ ۔ ۔ ناشتہ کر لیجئے۔
سعیدہ :تم جاؤ۔
اصغری :جی اچھا۔
(اصغری، ایک نظر سعیدہ کو اور ایک نظر اس کی تصویر کو دیکھتی باہر چلی جاتی ہے۔ سعیدہ آہستہ آہستہ سوچ میں مستغرق صوفے کی طرف بڑھتی ہے اور مسہری پر لیٹ جاتی ہے۔ )
سعیدہ : (چھت کی طرف دیکھتے ہوئے بڑبڑاتی ہے)دولہن بیگم، امجد میاں سے محبت نہیں کریں گی تو اور کون کرے گی۔ ۔ ۔ (اونچی آواز میں) اور کون کرے گی؟۔ ۔ ۔ اور کون کر سکتی ہے ؟
۔۔۔پردہ۔۔۔۔

تیسرا منظر
(نگار دلاسے ملحقہ باغیچہ۔ ۔ ۔ وسط میں پست قد ترشی ہوئی جھاڑیوں کے درمیان فوارہ ہے جس میں سے پانی کی پھوار دھڑک دھڑک کر باہر نکل رہی ہے، دھوپ کھلی ہے۔ آسمان نکھرا ہوا ہے۔ فضا میں عجیب سا کنوارا پن ہے۔ ۔ ۔ بے حجاب، ہر ذرہ نظارے کی دعوت لئے گویا قبولیت کا منتظر ہے۔ ۔ ۔ ایسا معلوم ہوتا ہے۔ ہوا چلتے چلتے ٹھیر سی گئی ہے کہ باغ کی بیلیں پھر سے اپنی زلفیں سنوار لیں، پھول اپنے گالوں کی سرخی درست کر لیں، اور بھنوروں کو جن کلیوں کا منہ چومنا ہے بے خوف و خطر چوم لیں۔ ۔ ۔ اس فضا میں گھاس کے ہموار قالین پر کرسیاں بچھی ہیں۔ ایک میں سعیدہ گلابی لباس میں ملبوس خود اپنا ہی عکس بنی بیٹھی ہے۔ دھوپ کی حدت سے اس کے غازے کے ہلکے سے غبار سے اس کی اپنی گلابیاں، سرخیاں بن بن کر باہر نکل رہی ہیں۔ دوسری کرسی میں مجید ہے جو ہولے ہولے سگریٹ کے کش لگا کر دھوئیں کے نیلے نیلے چھلے منہ سے نکال رہا ہے۔ اس کا چہرہ مطمئن ہے۔ سامنے امجد ہے۔ ۔ ۔ اپاہجوں کی کرسی میں۔ ۔ ۔ اس کے چہرے پر اپاہجوں کی کرسی والی کیفیت ہے جو کسی اور کی مدد کے بغیر نہیں چل سکتی۔ ۔ ۔ اس کا رنگ بہت زرد ہے مگر اس کی آنکھوں میں چمک ہے جو سعیدہ کے حسن و جمال کی بازگشت ہے۔ )
امجد : (اپنے دائیں بائیں دیکھ کر)آج موسم کتنا دلفریب ہے۔
سعیدہ : (فوراً متوجہ ہو کر) جی ہاں۔
امجد :مجید جاؤ، سعیدہ کو گھما لاؤ۔ ۔ ۔ ان پہاڑیوں کی سیر کرا لاؤ۔ ۔ ۔ (پیچھے مڑ کر دیکھنا چاہتا ہے) افسوس ہے، مجھ سے مڑا نہیں جاتا۔ ۔ ۔ مجید اٹھو۔ ۔ ۔ میری کرسی گھما کر ادھر کر دو۔ ۔ ۔ یہ منظر میری آنکھوں کے سامنے ہونا چاہئے۔
(مجید اٹھتا ہے۔ لیکن سعیدہ اس سے پہلے اٹھ کر امجد کی کرسی کا رخ پھیر دیتی ہے۔ اب تینوں کا منہ پہاڑ کی طرف ہے جو دھوپ میں۔ ۔ ۔ حد نگاہ تک اپنے منہ دھو رہی ہیں۔ )
امجد : (پہاڑیوں کے منظر کو اپنی نگاہوں سے پیتے ہوئے) سعیدہ، یہی ہیں وہ پہاڑیاں جن سے مجھے پیار ہے۔ ۔ ۔ اتنا پیار کہ میں بیان نہیں کر سکتا۔ ۔ ۔ (مجید سے) جاؤ، مجید، سعیدہ کو ساتھ لے جاؤ اور ان کی سیر کراؤ (سعیدہ سے)سعیدہ، جب تم ان پر چڑھتے چڑھتے ہانپنے لگو گی اور تمہاری سانس رکنے لگے گی تو تمہیں ایسا محسوس ہو گا کہ اس سے بڑھ کر دنیا میں اور کوئی لذت نہیں۔ ۔ ۔ میں مجید کو زبردستی ساتھ لے جاتا تھا۔ مگر یہ ایک چڑھائی کے بعد ہی ہمت ہار دیتا تھا۔ ۔ ۔ مجھ سے کہتا تھا، بھائی جان مجھے آپ کا یہ شغل پسند ہیں۔ ۔ ۔ یہ کیا کہ آدمی بیکار میں ہانپ ہانپ کر بے ہوش ہو جائے (ہنستا ہے) پہاڑیوں اور ان کو سر کرنے کا حسن اس کی سمجھ میں کبھی نہیں آئے گا۔ کیوں سعیدہ؟
سعیدہ : (مسکرا کر) جی ہاں۔
امجد : (مجید سے) جاؤ یار۔ ۔ ۔ سعیدہ کولے جاؤ۔ ۔ ۔ کبھی کام بھی کیا کرو۔
مجید : (سعیدہ سے) چلئے بھابھی جان۔ ۔ ۔ مگر شرط لگاتا ہوں، آج تو یہ چلی جائیں گی۔ لیکن پھر کبھی ادھر کا رخ نہیں کریں گی۔
سعیدہ :نہیں، نہیں۔ ۔ ۔ یہ آپ کیونکر کہتے ہیں ؟
امجد :اس لئے کہ یہ اور دل و دماغ کا آدمی ہے۔
سعیدہ :دل و دماغ؟۔ ۔ ۔ یہ کیا بلا ہے دل و دماغ؟
مجید :آپ کو ایک ہی پہاڑی چڑھنے سے معلوم ہو جائے گا۔
امجد : (ہنستا ہے) تم بکتے ہو مجید۔ ۔ ۔ سعیدہ کی زندگی کے سامنے تو ایک پہاڑ ہے۔ ۔ ۔ اگر یہ ایک معمولی سی پہاڑی کی چڑھائی ہی سے اکتا گئی تو۔ ۔ ۔
سعیدہ :چلئے مجید میاں۔
مجید :چلئے۔
(دونوں چلے جاتے ہیں۔ ۔ ۔ امجد مسکراتا ہے۔ ۔ ۔ اصغری داخل ہوتی ہے۔ ۔ ۔ اس کے ہاتھ میں پلیٹ ہے جس میں چھلے اور کٹے ہوئے سیب ہیں۔ وہ معنی خیز نظروں سے مجید اور سعیدہ کو دیکھتی امجد کی جانب آتی ہے اور اس سے مخاطب ہوتی ہے۔ )
اصغری :تھوڑے سیب کھا لیجئے۔
امجد : (جو سعیدہ اور مجید کو ڈھلوانوں میں اترتے دیکھ رہا ہے) کھالوں گا۔
اصغری : (انہی کی طرف دیکھ کر) آج دولہن بیگم کتنی خوبصورت دکھائی دے رہی ہیں۔
امجد : (ایک دم پلٹ کر اصغری کو دیکھتے ہوئے) دکھائی دے رہی ہیں ؟
اصغری : (خفیف سی بوکھلاہٹ کے ساتھ) جی۔ ۔ ۔ جی ہاں !
امجد : (پھر سعیدہ اور مجید کو دیکھتے ہوئے) خوبصورت ہے۔ خوبصورت دکھائی نہیں دیتی۔ ۔ ۔ ہونے اور دکھائی دینے میں زمین و آسمان کا فرق ہے اصغری۔
اصغری :جی ہاں۔ ۔ ۔ یہ توہے۔
امجد :لاؤ سیب۔
اصغری : (پلیٹ بڑھاتے ہوئے) حاضر ہیں۔ ۔ ۔ پر چھلے ہوئے ہیں۔
امجد :تمہارا مطلب؟
اصغری :چھلی ہوئی چیز سے کوئی بھی دھوکا کھا سکتا ہے (ہنس کر)۔ ۔ ۔ اس کے سرخ سرخ گال تو چھری سے اتر چکے ہیں۔
امجد : (ہنستا ہے) اصغری!۔ ۔ ۔ تم اب بہت شیطان ہو گئی ہو۔
اصغری : (سنجیدگی سے)شیطان؟۔ ۔ ۔ امجد میاں۔ ۔ ۔ آپ نے ایک بار مجھے بتایا تھا کہ شیطان خدا کا سب سے بڑا فرشتہ تھا، جس نے آدم۔ ۔ ۔ یعنی مٹی کے پتلے کے سامنے سجدہ کرنے سے انکار کر دیا تھا۔
امجد :ہاں ہاں۔ ۔ ۔
اصغری : اور فرشتوں کے اس ہیڈ ماسٹر کو اس کی سزا دی گئی تھی۔ ۔ ۔
امجد :درست ہے۔
اصغری :تو یہ بھی درست ہے۔
امجد :کیا؟
اصغری :کچھ بھی نہیں۔ ۔ ۔ درست آخر ہوتا کیا ہے ؟۔ ۔ ۔ وہی جسے آپ درست سمجھ لیں، یا درست سمجھنے کی کوشش کریں یاوہ غلطی جو آپ ایک دفعہ اس لئے کر لیں کہ آئندہ درست ہوتی رہے گی۔ یاوہ درستی جسے آپ غلطی میں تبدیل کر کے یہ سمجھتے ہیں کہ آپ پھر درست کر سکتے ہیں۔ ۔ ۔ لیکن یہ سب بکو اس ہے۔ ۔ ۔ میں ایک موٹی عقل کی عورت ہوں امجد میاں۔
امجد :تم آج کیسی باتیں کر رہی ہو؟
اصغری :میں ایک موٹی عقل کی عورت ہوں۔ ۔ ۔ لیکن ایک عورت ہوں امجد میاں۔
امجد :میں پھر نہیں سمجھا۔
اصغری : (سیب کی ایک قاش اٹھاتی ہے اور امجد کے منہ کے پاس لے جاتی ہے)آپ سیب کھائیے۔
امجد : (سیب کی قاش دانتوں میں لیتے ہوئے) تم پہلے کبھی ایسی باتیں نہیں کیا کرتی تھیں۔
اصغری :آج موسم ہی کچھ ایسا دلفریب ہے۔
امجد :کیا نہیں ہے ؟
اصغری : (سیب کی دوسری قاش اٹھا کر)کیوں نہیں۔ ۔ ۔ یہ لیجئے ایک اور قاش۔ ۔ ۔
(دوسری قاش امجد کے کھلے ہوئے منہ میں ڈالتی ہے۔ )
امجد : (سیب کھاتے ہوئے کچھ توقف کے بعد) اصغری!
اصغری : (جو پہاڑیوں کا منظر دیکھنے میں محو تھی، چونک کر) جی؟
امجد :تمہاری شادی کر دیں ؟
اصغری :شادی؟
امجد :ہاں۔ ۔ ۔ اب تمہاری شادی ہو جانی چاہئے۔
اصغری :کیوں امجد میاں ؟
امجد :شادی بڑی اچھی چیز ہے۔ ۔ ۔ دنیا میں ہر شے کی شادی ہو جانی چاہئے۔ ۔ ۔ زندگی میں شادی سے بڑھ کر اور کوئی خوشی نہیں۔ ۔ ۔ میں امی جان سے کہوں گا کہ اصغری کی جلدی شادی کر دیجئے۔
اصغری :نہ امجد میاں ؟
امجد :کیوں ؟
اصغری :مجھے ڈر لگتا ہے۔
امجد :کس سے ؟
اصغری : (سبزے پر بیٹھ جاتی ہے۔ لہجہ فکرمند ہوتا ہے)شادی سے۔
امجد : (ہنستا ہے) پگلی!
اصغری :سچ کہتی ہوں امجد میاں۔ ۔ ۔ مجھے واقعی ڈر لگتا ہے۔ ۔ ۔ اول تو ایک نوکرانی کی شادی ہی کیا ہے۔ ہوئی ہوئی، نہ ہوئی نہ ہوئی۔ ۔ ۔ کیا فرق پڑتا ہے۔ ۔ ۔ لیکن ہو گئی تو کہیں ایسا نہ ہو گاڑی پٹری سے اتر جائے اور ۔ ۔ ۔
امجد : (دکھ کے ساتھ) اصغری!
اصغری :کہے جاتی ہے)گاڑی پٹری سے اتر جائے اور اصغری قیمہ قیمہ ہونے سے بچ جائے۔ ۔ ۔ ایک ٹانگ سے لنگڑی، ایک بازو سے لولی اور ایک آنکھ سے اندھی ہو جائے۔ ۔ ۔ آدھی اصغری غائب ہو جائے۔ ۔ ۔ آدھی بچ جائے۔ ۔ ۔ نا امجد میاں۔ ۔ ۔ میری شادی کا نام نہ لیجئے۔ ۔ ۔ شادی تو ایک سالم چیز ہے۔ ۔ ۔ آدھی یا چوتھائی چیز کو شادی نہیں کہتے۔
امجد : (سوچتے ہوئے) اصغری!
اصغری : (گھٹی گھٹی آواز میں) جی!
امجد :تم ٹھیک کہتی ہو(آواز میں انتہا درجے کا درد پیدا ہو جاتا ہے) لیکن دیکھو مجھے رنجیدہ نہ کرو۔ ۔ ۔ میں خوش رہنا چاہتا ہوں۔ ۔ ۔ اپنی ان دو شکستہ ٹانگوں پربھی خوش رہنا چاہتا ہوں۔ ۔ ۔ مجھے نہ چھیڑو۔ ۔ ۔ میرے دل میں درد ہوتا ہے۔ ۔ ۔
اصغری : (امجد کے پاؤں پکڑ لیتی ہے) مجھے معاف کر دیجئے امجد میاں (آنکھوں میں آنسو آ جاتے ہیں) جانے میں کیا بک گئی۔ ۔ ۔ آپ خوش رہیں۔ ۔ ۔ خدا آپ کو خوش رکھے۔
امجد : (بہادری کے ساتھ) خدا کا نام نہ لو۔ ۔ ۔ اگر اس کو مجھے خوش رکھنا ہوتا تو مجھے اس حادثے کا شکار ہی کیوں کرتا۔ ۔ ۔ کیا تھا تو مار کر اپنے شکاری تھیلے میں کیوں نہ ڈال لیتا۔ ۔ ۔ اس کا نام نہ لو۔ ۔ ۔ میری اس کی دوستی ختم ہو چکی ہے۔ ۔ ۔ مجھے اگر خوش رہنا ہے تو اپنے رہے سہے وجود ہی کے سہارے خوش رہنا ہے۔ ۔ ۔ انہی ٹوٹی ہوئی ٹہنیوں پر چند تنکے چن کر مجھے اپنی خوشی کے آشیانے بنانا ہیں۔
اصغری :صرف اپنی خوشی کے ؟
امجد : (بہت زیادہ دکھ کے ساتھ) اصغری خدا کے لئے۔ ۔ ۔ تم اتنی کیوں ظالم ہو گئی ہو۔ ۔ ۔ تمہارے منہ میں اگر زبان پیدا ہوئی ہے تو کیا اسی لئے کہ تم میرے دکھ میں اضافہ کرو۔ ۔ ۔ میں تم سے درخواست کرتا ہوں کہ میری مدد کرو۔ ۔ ۔ ایک اپاہج کی مدد کرو کہ وہ اپنی ٹوٹی ہوئی زندگی جوڑ جاڑ کے چند دن۔ ۔ ۔ صرف چند دن گزارے۔
اصغری :آپ درخواست نہ کیجئے امجد میاں۔ ۔ ۔ میرا کلیجہ پھٹتا ہے۔ ۔ ۔ آپ مالک ہیں، حکم دے سکتے ہیں۔ ۔ ۔ میری زندگی حاضر ہے۔
(اس کے موٹے موٹے آنسو امجد کے سلیپروں پر گرتے ہیں۔ ۔ ۔ اٹھ کھڑی ہوتی ہے اور ایک طرف چلی جاتی ہے۔ )
امجد : (گردن جھکا کر اپنے سلیپروں کی طرف دیکھتا ہے جن پرسے اصغری کے آنسو لڑھک جاتے ہیں۔ ۔ ۔ گردن اٹھا کر اصغری کو دیکھتا ہے جو کہ جا رہی ہے)
(کوٹھی کی جانب سے بیگم نمودار ہوتی ہے۔ شال اوڑھے ہاتھ میں زیورات کے ڈبے لئے وہ امجد کے پاس آتی ہے۔ )
بیگم صاحب :امجد بیٹا۔
امجد : (جلدی سے اپنے پاؤں کمبل میں چھپا کر) جی!
بیگم صاحب :سعیدہ کے لئے جو زیورات تم نے پسند کئے ہیں تیار ہو کر آ گئے ہیں۔ لو۔ ۔ ۔
(ڈبے امجد کی گود میں رکھ دیتی ہے۔ )
امجد : (بچوں کے سے اشتیاق سے ہر ڈبہ کھول کر سارے زیورات دیکھتا ہے اور ابلتی ہوئی خوشی کا اظہار کرتا ہے) بہت اچھے ہیں۔ ۔ ۔ بہت عمدہ ہیں۔ ۔ ۔ بہت حسین ہیں۔ ۔ ۔ لیکن اتنے نہیں جتنی سعیدہ ہے۔ ۔ ۔ اصغری۔ ۔ ۔ اصغری!۔ ۔ ۔ ادھر آؤ۔
(اصغری جو ایک سرو کے ساتھ لگ کر کھڑی تھی۔ امجد کے پاس آتی ہے۔ امجد اسے تمام زیورات دکھاتا ہے۔ )
امجد :کہو کیسے ہیں ؟
اصغری :آپ خود کہہ چکے ہیں۔ ۔ ۔ حسین ہیں لیکن اتنے نہیں جتنی دولہن بیگم ہیں۔
امجد : (ماں سے) امی جان۔ کپڑے کب آئیں گے۔
اصغری :کل تک آ جائیں گے۔
امجد : اور وہ بائیسکوپ مشین۔ ۔ ۔ کیوں نہیں آئی ابھی تک۔
بیگم صاحب :بیٹا۔ ۔ ۔ مجید آرڈر دے آیا تھا۔ ایک دو روز میں آ جائے گی۔
امجد :اچھا(رک کر) امی جان!
بیگم صاحب :جی بیٹا۔
امجد :کچھ اور بھی منگوانا چاہئے سعیدہ کے لئے۔ ۔ ۔ میں اسے ایک لحظے کے لئے بھی اداس نہیں دیکھنا چاہتا۔ ۔ ۔ ہر روز اس کے لئے کوئی نہ کوئی نئی چیز ضروری ہونی چاہئے۔
بیگم صاحب :سب کچھ تمہارے اختیار میں ہے۔ جو چا ہو کرو۔
امجد :اختیار؟(رک کر) ہاں۔ ۔ ۔ تو۔ ۔ ۔ امی جان۔
بیگم صاحب :جی!
امجد :کمال کو بھیجئے۔ ۔ ۔ اسپورٹس کی دکان جائے۔ ۔ ۔ جتنے کھیل اسے مل سکیں لے آئے۔ ۔ ۔ سعیدہ اور مجید کھیلا کریں گے اور میں دیکھا کروں گا۔ ۔ ۔ اور دیکھئے۔ ۔ ۔ اس سے کہئے کچھ ایسے کھیل بھی لے آئے جو میں۔ ۔ ۔ میں بھی سعیدہ کے ساتھ کھیل سکوں۔
بیگم صاحب : (بے حد متاثر ہو کر امجد کا سر اپنے ہاتھوں میں لے کر) میرے بچے !
(امجد بلک بلک کر رونا شروع کر دیتا ہے۔ ۔ ۔ اصغری ضبط نہیں کر سکتی اور چیختی ہوئی ایک طرف دوڑ جاتی ہے۔ ۔ ۔ بیگم کی آنکھوں سے خاموش آنسو رواں ہیں۔ )
۔ ۔ ۔ پردہ۔ ۔ ۔
چوتھا منظر
(وہی کمرہ جو پہلے اور دوسرے منظر میں ہے۔ ۔ ۔ رات کا وقت، فضا بالکل خاموش ہے۔ بڑے بے ڈھنگے طریق پر مسہری پر سعیدہ تین چار گدگدے تکیوں میں اپنا نیم سنہرے بالوں والا سر دبائے کوئی کتاب پڑھنے میں مشغول ہے۔ ۔ ۔ نظریں کتاب کے حروف کے بجائے اس کے اپنے دل کی جانب معلوم ہوتی ہیں۔ سینے کے مقام پر کمبل کی سلوٹیں چغلیاں کھا رہی ہیں اور ننھے سے تالاب میں جزر کا نقشہ پیدا ہو رہا ہے۔ ۔ ۔ بائیں طرف لوہے کی ہسپتالوں جیسی چارپائی بچھی ہے۔ ۔ ۔ اس کے ساتھ اپاہجوں والی کرسی میں امجد بیٹھا ہے۔ اس کے ہاتھ میں کتاب ہے۔ وہ اسے یوں پکڑے ہے جیسے کوئی شیشے کی چیز ہے۔ اس کی نظریں پریشان ہیں۔ کتاب کے حروف سے اٹھ کر کبھی وہ سعیدہ کے ہاتھوں پر جا بیٹھتی ہیں۔ کبھی اس کے سنہرے بالوں والے سر پر جو تکیوں میں دھنسا ہے۔ ۔ ۔ آخر اس سے نہیں رہا جاتا۔ ۔ ۔ کتاب بند کر کے اپنی گود میں رکھتا ہے اور بڑی آہستگی کے ساتھ سعیدہ سے مخاطب ہوتا ہے۔ )
امجد :سعیدہ!
سعیدہ : (چونک کر) جی؟
امجد :میرا خیال ہے، اب سو جاؤ۔
سعیدہ : (کروٹ بدل کر امجد کو دیکھتے ہوئے)آپ سونا چاہتے ہیں تومیں غلام محمد اور کریم کو بلاؤں کہ وہ آپ کو لٹا دیں۔
امجد : (کھوکھلی آواز میں) لٹا دیں۔ ۔ ۔ نہیں سعیدہ۔ ۔ ۔ میں لیٹ لیٹ کے تھک گیا ہوں۔ ۔ ۔ آج یہیں کرسی پرسو جاؤں گا۔ ۔ ۔ تمہیں تکلیف نہ ہو تو اٹھ کے یہ بتی بجھا دو اور سبز بتی روشن کر دو۔
سعیدہ : (اٹھتی ہے)آپ بار بار میری تکلیف کا ذکر کیوں کرتے ہیں۔
امجد :میں خود تکلیف میں ہوں۔
سعیدہ : (چڑ کر) مجھے اس کا احساس ہے امجد صاحب۔ ۔ ۔ مگر بتائیے میں آپ کے لئے کیا کر سکتی ہوں۔ ۔ ۔ مجھ سے جوہو سکتا ہے، میں کرنے کے لئے تیار ہوں۔ ۔ ۔ مگر مصیبت یہ ہے کہ آپ کو ہر وقت میری تکلیف کی پڑی رہتی ہے۔ ۔ ۔ مجھے کوئی تکلیف نہیں ہوتی۔
امجد :سعیدہ، تم بہت اچھی ہو۔
(سعیدہ بتی اوف کرتی ہے۔ ۔ ۔ چند لمحات کے لئے اندھیرا چھا جاتا ہے۔ ۔ ۔ پھر کمرے کی ہر چیز ہلکی ہلکی سبز روشنی میں نہانا شروع کر دیتی ہے۔ )
سعیدہ :کاش میں اچھی ہوتی۔ ۔ ۔ اچھی ہو سکتی۔
(صوفے پر بیٹھ جاتی ہے۔ ۔ ۔ سینے سے اس کا اضطراب ظاہر ہے۔ )
امجد :اس سے زیادہ تم اور کیا اچھی ہو سکتی ہو، سعیدہ۔
سعیدہ : (تیزی سے) جی نہیں۔ ۔ ۔ آپ نہیں جانتے۔
امجد : (بہت ہی ملائم آواز میں) اگر کسی وجہ سے میں نے تمہیں ناراض کر دیا ہے تو مجھے معاف کر دو۔
سعیدہ : (امجد کی طرف دیکھتی ہے۔ ۔ ۔ اٹھتی ہے اور مسکراتی ہوئی اپنی لمبی لمبی انگلیوں سے امجد کے بالوں میں کنگھی کرتی ہے) سچ تو یہ ہے امجد صاحب کہ میں آپ کے لائق نہیں ہوں۔
امجد : (سعیدہ کا ہاتھ پکڑ کر)۔ ۔ ۔ یہ تمہارے دل کی اچھائی ہے اگر تم ایسا سمجھتی ہو، ورنہ حقیقت اس کے بالکل برعکس ہے۔
سعیدہ : (بالوں میں کنگھی کرتے ہوئے) سو جائیے۔ ۔ ۔ کئی راتوں سے آپ جاگ رہے ہیں۔ ۔ ۔ بلکہ جب سے یہاں آئے ہیں، ایک لحظے کے لئے بھی آپ کی آنکھ نہیں لگی۔
امجد :مجھے نیند نہیں آئی سعیدہ۔
سعیدہ :کیوں ؟
امجد :معلوم نہیں کیوں۔ ۔ ۔ بس ایسا لگتا ہے کہ نیند کبھی آئی تھی نہ آئے گی۔ ۔ ۔ میں تو وہ راتیں بھی یاد کرنا بھول گیا ہوں جب سویا کرتا تھا۔
سعیدہ :کاش، میں آپ کو اپنی نیند دے سکتی۔
امجد :نہیں سعیدہ۔ ۔ ۔ میں اتنی عزیز چیز تم سے نہیں چھیننا چاہتا۔ ۔ ۔ یہ تمہاری آنکھوں ہی کے لئے سلامت رہے جو نیند میں اور بھی زیادہ خوبصورت ہو جاتی ہیں۔ ۔ ۔ جاؤ، اب سو جاؤ۔
سعیدہ :میں کم بخت تو سو ہی جاؤں گی۔
امجد :ایسا نہ کہو۔ ۔ ۔ خدا تمہارے بخت بلند کرے۔ ۔ ۔ جاؤ سو جاؤ۔
سعیدہ : (چڑ کر)آپ کیوں میرے ساتھ اتنی نرمی سے پیش آتے ہیں۔ ۔ ۔ امجد صاحب، مجھے اس سے بڑی وحشت ہوتی ہے۔ ۔ ۔ خدا کی قسم آپ کی یہ نرمی، یہ حلیمی، یہ انکسار، ایک دن مجھے پاگل بنا دے گا۔
(جھنجھلا کر تیزی سے مسہری کی طرف بڑھتی ہے اور خود کو بستر میں گرا دیتی ہے۔ )
امجد :مجھے ایسا لگتا ہے کہ میرے منہ سے جو باتیں نکلتی ہیں، وہ بھی ٹوٹی پھوٹی ہوتی ہیں۔
(سعیدہ خاموش رہتی ہے۔ کروٹ بدل کروہ اپنا منہ دوسری طرف کر لیتی ہے۔ ۔ ۔ امجد اپنی گود میں سے کتاب اٹھاتا ہے اور اس کی ورق گردانی شروع کر دیتا ہے۔ ۔ ۔ سکوت کا عالم ہے۔ ہلکی ہلکی سبز روشنی میں یہ سکوت اور بھی زیادہ نحیف ہو گیا ہے۔ ۔ ۔ کافی لمبا عرصہ خاموشی میں گزرتا ہے، بڑی بے زار سی خاموشی میں۔ ۔ ۔ امجد کے چہرے پر روشنی قبروں کے سبز غلاف کی طرح چڑھی ہے۔ ۔ ۔ اس کی نگاہیں کتاب سے ہٹ کر بار بار سعیدہ کی جانب اٹھتی ہیں، اور شرمسار ہو کر دبے پاؤں لوٹ آتی ہیں۔ ۔ ۔ تھوڑی دیر کے بعد امجد بہت زیادہ مضطرب ہو جاتا ہے۔ )
امجد :سعیدہ!
سعیدہ :جی!
امجد :میں۔ ۔ ۔ میں تم سے ایک درخواست کرنی چاہتا ہوں۔
سعیدہ : (کروٹ نہ بدلتے ہوئے)کیا؟
امجد :کیا۔ ۔ ۔ کیا آج ہماری پہلی رات ہو سکتی ہے۔ ۔ ۔
سعیدہ : (بستر میں لرز سی جاتی ہے)
امجد :وہ رات۔ ۔ ۔ جو ابھی تک نہیں آئی۔
(سعیدہ خاموش رہتی ہے۔ )
(وقفہ)
امجد :سعیدہ۔
سعیدہ :جی!
امجد :کیا تم میری یہ درخواست قبول کر سکتی ہو؟
سعیدہ : (کروٹ بدل کر امجد کو دیکھتی ہے۔ ۔ ۔ اس کی آنکھوں میں سپردگی کی زخمی خواہش تیر رہی ہے) کیسے امجد صاحب!
امجد :جھوٹ موٹ۔ ۔ ۔ محض میرے بہلاوے کے لئے۔ ۔ ۔ تم یہ فرض کر لو کہ میں تمہارے پہلو میں لیٹا ہوں۔ ۔ ۔ میں یہاں فرض کر لوں گا کہ تم میرے پہلو میں لیٹی ہو۔ ۔ ۔ میں تم سے وہی باتیں شروع کروں گا جو پہلی رات کو مجھے تم سے کہنا تھیں۔ ۔ ۔ تم اسی طرح جواب دنیا، جس طرح کہ تمہیں دینا تھا۔ ۔ ۔ میرے لئے۔ ۔ ۔ کیا میرے لئے تم جھوٹ موٹ کا کھیل کھیل سکتی ہو سعیدہ۔
سعیدہ : (آنکھوں میں سپردگی کی زخمی خواہش کی بجائے رحم کے آنسو تیر رہے ہیں)میں حاضر ہوں امجد صاحب۔
امجد :شکریہ۔
(طویل وقفہ)
امجد :آج ہماری پہلی رات ہے سعیدہ۔ ۔ ۔ وہ رات جس میں جوانیاں ارضی جنت کی طرف پہلا قدم اٹھاتی ہیں۔ ۔ ۔ وہ رات جس کی تمام پہنائیوں میں دوجی غوطہ لگاتے ہیں اور ایک ہو جاتے ہیں۔ ۔ ۔ شرماؤ نہیں۔ ۔ ۔ یہ رات تو وہ ہے جب تمام پوشیدہ حقیقتوں کے گھونگھٹ اٹھنے کے لئے بیتاب ہوتے ہیں۔ ہلکی سی سرگوشی، نرم سی آہ، ایک چھوٹا سا لمس، پریدہ سانس کا ننھا سا ہلکورا بھی ان گھونگھٹوں کے پٹ کھول دیتا ہے۔ ۔ ۔ اس قدر آہستہ کہ بے معلوم سرسراہٹ تک بھی نہیں ہوتی اور آدمی، دیدار۔ ۔ ۔ پورے دیدار کے تمام مراحل طے کر جاتا ہے۔ ۔ ۔ یہ وہ رات ہے جب نگاہیں ٹکرا ٹکرا کر تارے جھڑتی ہیں اور افشاں دونوں زندگیوں کے ایک ماتھے پرچنی جاتی ہے۔ ۔ ۔ یہ وہ رات ہے۔ ۔ ۔ پہلی رات، سب سے پہلی، جب آدم کی پسلیاں چیر کر حوا نکالی گئی تھی۔ ۔ ۔ یہ وہ رات ہے جس کی درازیِ عمر کے لئے، شاعر دعائیں مانگ مانگ کر ابھی تک نہیں تھکا۔ ۔ ۔ یہ وہ رات ہے جس کے حصول کے لئے جوانی کی جائے نماز بچھا کر زندگی اکثر سجدہ ریز رہی ہے۔ ۔ ۔ یہ وہ رات ہے جس میں حجاب کی تمام گرہیں فطرت کے ناخن خود کھولتے ہیں۔ ۔ ۔ یہ وہ رات ہے جب قدرت کے تمام کارخانے صرف ایک ہی پرزہ ڈھال رہے ہوتے ہیں۔ ۔ ۔ وہ پرزہ جس نے کائنات کے ان تمام کارخانوں کو حرکت بخشی تھی۔ ۔ ۔ یہ وہ رات ہے جب تمام آوازیں واپس اپنے مخرجوں میں چلی جاتی ہیں کہ اس آواز کا جلوس انتہائی آرام و سکون سے گزر جائے۔ جس میں دکن کی گونج ہے۔ ۔ ۔ یہ وہ رات ہے جس کا ہر پردہ اجالے سے بنا ہے۔ ۔ ۔ یہ وہ رات ہے، ہر آنے والی رات جس کے حضور جھولی پھیلائے بھیک کی منتظر کھڑی ہے۔ ۔ ۔ یہ وہ رات ہے جب بدن کارواں رواں منہ کھول کے بولتا ہے اور کان کھول کے سنتا ہے۔ ۔ ۔ بڑے بڑے ان کہے راز۔ ۔ ۔ بڑے بڑے ان گائے راگ۔ ۔ ۔ (ایک دم چیخ کر) ڈھانپ لو۔ ۔ ۔ ڈھانپ لو۔ ۔ ۔ سعیدہ اپنا بدن ڈھانپ لو۔ ۔ ۔ یہ مجھے ڈس رہا ہے۔ ۔ ۔ اس کا ایک ایک خط تلوار کی دھار کے مانند میری لولی خواہشوں پر پھر رہا ہے۔ ۔ ۔ ڈھانپ لو۔ ۔ ۔ خدا کے لئے اپنا جسم ڈھانپ لو۔
سعیدہ : (ہلکی ہلکی سبز روشنی میں گھاس کی نرم نرم پتیوں سے بنی ہوئی لاش کے مانند لیٹی ہے۔ اس کا بدن لرز رہا ہے۔ ۔ ۔ ایک ایک انگ کانپ رہا ہے) جی؟
امجد : (بلک بلک کر رونے لگتا ہے) اپنا بدن ڈھانپ لو۔
(سعیدہ اپنا لرزتا ہوا بدن کمبل سے ڈھانپ لیتی ہے۔ امجد آنکھوں کے سامنے ہاتھ رکھے روتا رہتا ہے۔ )
۔ ۔ ۔ پردہ۔ ۔ ۔

پانچواں منظر
(نگار ولا سے ملحقہ باغیچہ۔ ۔ ۔ شام کا وقت۔ فوارے کا پانی کھل کھیل رہا ہے۔ سائے گہرے ہو چکے ہیں۔ پس منظر میں خاکستری پہاڑیاں شام کے دھندلکوں میں سنگینی اختیار کر گئی ہیں۔ آسمان نے ایسا لگتا ہے اپنے بدن پر بھبوت مل لی ہے۔ تختوں کے سینے پر سبزہ خاموش لیٹا ہے۔ کرسیاں خالی ہے۔ ۔ ۔ ساری فضا خالی ہے۔ اس فریم کی طرح جس میں تصویر جڑی جانے والی ہے۔ ۔ ۔ مجید اور سعیدہ کی ہنسی کی آواز آتی ہے۔ ۔ ۔ چند لمحات کے بعد دونوں ہنستے، بڑی مشکل سے اپنی تھکاوٹ کا بوجھ اٹھاتے داخل ہوتے ہیں۔ ۔ ۔ سعیدہ نڈھال ہو کر خود کو کرسی میں گرٍا دیتی ہے مجید اس کے پاس کھڑا رہتا ہے۔ )
سعیدہ : (رانوں پر مکیاں مارتے ہوئے)اف۔ ۔ ۔ ف!
مجید : (ہنستا ہے) آپ تھک گئیں۔ ۔ ۔ دبا دوں آپ کو؟
سعیدہ : (گھبرا کر) نہیں نہیں۔ ۔ ۔ اصغری کو بھیج دیجئے۔ ۔ ۔ مجھ سے تو اب دو قدم بھی چلنا دشوار ہے۔
مجید : (مسکراتا ہے) بہتر۔ ۔ ۔
(آگے بڑھ کر سعیدہ کے چہرے پر نیم سنہرے بالوں کی آوارہ لٹ انگلیوں سے اٹھا کر ایک طرف کر دیتا ہے۔ )
سعیدہ : (بہت زیادہ گھبراہٹ سے) میں جاتی ہوں اندر۔
(اٹھنے لگتی ہے۔ )
مجید : (ایک طرف دیکھ کر) لو، وہ اصغری خود ہی آ گئی۔ ۔ ۔ آؤ، اصغری۔ ۔ ۔ بھابھی جان کے پاؤں دبا دو۔
(اصغری داخل ہوتی ہے۔ ۔ ۔ اس کے ہونٹوں کے اختتامی کونے کپکپا رہے ہیں جیسے کچھ کہنے کے لئے تڑپ رہے ہیں۔ پاس آ جاتی ہے۔ )
اصغری : (سعیدہ سے) دولہن بیگم تھک گئیں آج؟
سعیدہ : (رانوں پر مکیاں مارتے ہوئے) ہاں !
اصغری : (گھاس پر بیٹھ کر، سعیدہ کی ایک پنڈلی دبانا شروع کرتی ہے۔ خطاب مجید سے ہے) یہ سب مجید میاں کا قصور ہے۔ ۔ ۔ اتنی بڑی سیر اور اتنی جلدی۔ ۔ ۔ (لہجے میں تیکھا پن ہے) ہر چیز دھیرے دھیرے ہونی چاہئے (ہولے ہولے دباتی ہے) اس طرح۔ ۔ ۔ ہولے ہولے (سعیدہ سے) کیوں دولہن بیگم۔ ۔ ۔ کچھ آرام محسوس ہوا آپ کو؟
سعیدہ : (دوسری ٹانگ جو اصغری کی گرفت سے آزاد ہے، اضطراب کا شدید مظاہرہ کرتی ہے) ٹھیک ہے، ٹھیک ہے!
اصغری : (مجید سے) مجید میاں، آپ جائیں۔ ۔ ۔ منہ ہاتھ دھو آئیں۔ ۔ ۔ گردو غبار سے آپ کا چہرہ بالکل ان دھویا آلو بنا ہوا ہے۔
مجید : (تیزی سے) تم بہت گستاخ ہو گئی ہو۔ ۔ ۔ یہ سب۔ ۔ ۔
اصغری : (مجید کی بات کاٹ کر) دولہن بیگم کا قصور ہیں جنھوں نے مجھے منہ لگا لیا ہے (سعیدہ کے چہرے کی طرف دیکھ کر) ایسا خوبصورت منہ!
(مجید نگاہوں ہی نگاہوں میں غصہ برساتا چلا جاتا ہے۔ )
اصغری : (ہنستی ہے) مجید میاں کی شکل و صورت یوں تو ماشاء اللہ بڑی اچھی ہے۔ ۔ ۔ مگر غصے میں ہمیشہ بگڑ جاتی ہے۔ ۔ ۔ آپ کا کیا خیال ہے۔
سعیدہ :تم مجھ سے ایسی باتیں نہ کیا کرو (اٹھا چاہتی ہے مگر اصغری کی مضبوط گرفت کے باعث نہیں اٹھ سکتی) چھوڑ دو مجھے۔
اصغری : (دباتے ہوئے) میں اس خدمت سے خود کو چھڑانا نہیں چاہتی (سعیدہ کے پاؤں سے سینڈل اتارتی ہے) مجید میاں کہہ رہے تھے، میں گستاخ ہو گئی ہوں۔ ۔ ۔ کیا یہ درست ہے دولہن بیگم۔
سعیدہ :بالکل درست ہے۔
اصغری : (بڑے اطمینان سے سعیدہ کے پاؤں کی انگلیاں چٹخاتے ہوئے) تو یہ بہت بری بات ہے۔ ۔ ۔ نوکرانی کو گستاخ کبھی نہیں ہونا چاہئے۔ ۔ ۔ آپ میرے کان کھینچئے۔
سعیدہ :خاموش رہو!
اصغری :یہ ظلم ہے۔ ۔ ۔ زبان بندی بہت بڑا ظلم ہے دولہن بیگم۔ ۔ ۔ میں نے ایسی کونسی بات کی جو آپ کونا گوار گزری۔
سعیدہ : (اضطراب کے ساتھ) تمہاری سب باتیں مجھے ناگوار گزرتی ہیں۔
اصغری :اصغری بے چاری اب کیا کرے۔ ۔ ۔ (توقف کے بعد) میں تو یہ سمجھتی تھی کہ آپ جیسی لکھی پڑھی بیگم کی نوکری میں اس ایک برس کے اندر اندر ہی مجھے سب کچھ آ گیا ہے۔ ۔ ۔ پر اب ایسا معلوم ہوتا ہے کہ میں غلط سمجھی تھی۔ ۔ ۔ میں نے آپ سے کچھ بھی نہیں سیکھا؟۔ ۔ ۔ لیکن یہ کس کا قصور ہے ؟سیکھنے والے کایا سکھانے والے کا؟
سعیدہ : (اپنی دونوں ٹانگیں ایک طرف سمیٹتے ہوئے فیصلہ کن انداز میں) تم کہنا کیا چاہتی ہو؟
اصغری : (مصنوعی حیرت سے) میں ؟
سعیدہ :ہاں تم۔ ۔ ۔ کیا کہنا چاہتی ہو تم؟
اصغری : (سوچتے ہوئے) کہنے کو تومیں بہت کچھ کہنا چاہتی ہوں۔ ۔ ۔
سعیدہ : (اٹھ کر ننگے پاؤں گھاس پر چلتے ہوئے) تو کہہ ڈالو آج۔ ۔ ۔ مجھے تمہاری ہر روز کی مہین مہین چٹکیاں پسند نہیں۔ ۔ ۔ جو تم کہنا چاہتی ہو، میں سننے کے لئے تیار ہوں۔
اصغری :آپ بڑی ہمت والی ہیں دولہن بیگم۔
سعیدہ :میں ہمت والی ہوں، یا بزدل ہوں، تم اسے چھوڑو۔ ۔ ۔ جو کہنا چاہتی ہو آج اگل ڈالو۔
اصغری :یہ قے آپ کو اور مجھے دونوں کو تکلیف دے گی۔
سعیدہ :میری تکلیف کا تم کچھ خیال نہ کرو۔ ۔ ۔ میں برداشت کر لوں گی۔
اصغری : (سوچتے ہوئے) میں سمجھی تھی۔ میرے دانتوں تلے دبی ہوئی کٹاری دیکھ کر آپ ڈر جائیں گی۔ پر اب ایسا لگتا ہے کہ آپ چلتی چلتی ایسی جگہ پہنچ گئی ہیں جہاں زخموں کی کوئی پروا نہیں رہتی۔ ۔ ۔ اب تو مجھے خوف آنے لگا ہے آپ سے۔
سعیدہ : (اضطراب میں ادھر ادھر ٹہلتے ہوئے) اصغری!
اصغری : (چونک کر) جی؟
سعیدہ :تم مجھے یہ بتاؤ۔ ۔ ۔ اگر امجد میاں گاڑی کے حادثے میں مر جاتے تو میں کیا کرتی؟
اصغری :آپ؟۔ ۔ ۔ مجھے معلوم نہیں آپ کیا کرتیں۔
سعیدہ :میں جوان ہوں، خوبصورت ہوں۔ ۔ ۔ میرے سینے میں ایسے ہزاروں ارمان ہیں جو میں سترہ برس تک اپنے خیالوں کا شہد پلا پلا کر پالتی پوستی رہی ہوں۔ ۔ ۔ میں ان کا گلا نہیں گھونٹ سکتی۔ ۔ ۔ میں نے بہت کوشش کی ہے اصغری۔ ۔ ۔ میرا خدا جانتا ہے، میں نے بہت کوشش کی ہے، لیکن میں اپنے ہاتھوں کو اس قتل پر آمادہ نہیں کر سکی۔ ۔ ۔ تم مجھے کمزور کہہ لو۔ ۔ ۔ بزدل کہہ لو۔ ۔ ۔ اخلاق باختہ کہہ لو۔ ۔ ۔ تم ایک نوکرانی ہو۔ ۔ ۔ میں تمہارے سامنے اعتراف کرتی ہوں کہ میں اپنی جوانی کا باغ، جس کے پتے پتے، بوٹے بوٹے میں میرے کنوارے ارمانوں کا گر م گرم خون دوڑ رہا ہے، اپنے ہاتھوں سے نہیں اجاڑ سکتی۔ ۔ ۔ ویسے میں کسی کو بھی اجازت دے سکتی ہوں کہ وہ میری آنکھیں بند کر کے۔ ۔ ۔ نہیں۔ ۔ ۔ میرے تمام حواس میں تالے لگا کر بڑھاپے اور رنڈاپے کی عمیق ترین گہرائیوں میں اتار دے۔ ۔ ۔ یا ایک ہی بار دھکا دے کر مجھے اپنے ارمانوں کی لرزتی ہوئی چٹانوں کی چوٹیوں پرسے نیچے گرا دے، جن پر میں اس وقت تک دامن سمیٹے تند ہواؤں کا مقابلہ کرتی رہی ہوں۔ ۔ ۔ میں تم کو بھی اس کی اجازت دیتی ہوں۔
اصغری : (شکست خوردہ اٹھتی ہے) بس دولہن بیگم۔
سعیدہ :میں ایک ایسے دورا ہے پر کھڑی ہوں اصغری، جہاں زمین میرے قدموں کے نیچے گھوم رہی ہے۔ میں جس راستے کی طرف منہ کرتی ہوں وہی مجھ سے منہ موڑ لیتا ہے۔ ۔ ۔ میں جو ارادہ کرتی ہوں، مجھ سے اپنا دامن چھڑا کے بھاگ جاتا ہے۔ میں اس کے پیچھے بھاگتی ہوں۔ ۔ ۔ اندھا دھند دوڑتی ہوں اور جب اسے پکڑ لیتی ہوں تو معلوم ہوتا ہے کہ وہ ریت کا بنا تھا۔ میرے پکڑتے پکڑتے ہی ڈھیر ہو جاتا ہے۔ ۔ ۔ اصغری تم نہیں جانتی ہو، میں کتنی دیر سے انگاروں کے بستر پر لوٹ رہی ہوں۔ بجھانے کے لئے میں پر پانی ڈالتی ہوں تو بھاپ کے ایسے بگولے اٹھتے ہیں جو مجھے اپنے ساتھ اونچائیوں میں لے جاتے ہیں اور جھنجھوڑ جھنجھوڑ کر ایک دم نیچے دے پٹکتے ہیں۔ ۔ ۔ میری ہڈی ہڈی، پسلی پسلی چور ہو چکی ہے اصغری۔ ۔ ۔ کیا ہی اچھا ہوتا اگر امجد صاحب کے بدلے میں اپاہج ہوئی ہوئی۔
(طویل وقفہ۔ ۔ ۔ اصغری خاموش کھڑی رہتی ہے۔ ۔ ۔ سعیدہ اضطراب میں ادھر ادھر ٹہلتی رہتی ہے۔ )
سعیدہ :بتاؤ، مجھے کیا کرنا چاہئے۔
اصغری : (محویت کے عالم سے بیدار ہوتی ہے)کیا کرنا چاہئے ؟۔ ۔ ۔ آپ کو۔ ۔ ۔ آپ کو امجد میاں کی موت کا انتظار کرنا چاہئے۔
سعیدہ : (کچھ دیر سوچ کر)تم مجھے انتہا درجے کی سنگدل کہو گی۔ ۔ ۔ لیکن میں پوچھتی ہوں۔ ۔ ۔ انھیں کب موت آئے گی۔
اصغری :جب اللہ میاں کو منظور ہو گا(بڑبڑاتی ہے) لیکن امجد میاں کی دوستی تو ان سے ختم ہو چکی ہے۔
سعیدہ :کیا کہا؟
اصغری :جی، کچھ نہیں۔
(اکھڑے اکھڑے قدم اٹھاتی اصغری چلی جاتی ہے۔ ۔ ۔ سعیدہ ننگے پاؤں گھاس کے ٹھنڈے ٹھنڈے فرش پر اضطراب کی حالت میں ٹہلتی رہتی ہے۔ )
۔ ۔ ۔ پردہ۔ ۔ ۔

چھٹا منظر
(نگار ولا۔ ۔ ۔ ڈرائنگ روم۔ ۔ ۔ وسیع و عریض کمرہ جو پرانی وضع کے ساز و سامان سے آراستہ ہے۔ ہر چیز وزنی اور پائیدار ہے۔ ۔ ۔ دیواروں پر آئل پینٹنگز آویزاں ہیں۔ جو خاندان کے مختلف افراد کی ہیں۔ ایک پینٹنگ بیگم کی ہے جب کہ وہ جوان تھی۔ اس پینٹنگ کے نیچے بیگم ایک صوفے پر بیٹھی تقابل پیش کر رہی ہے۔ تصویر میں وہ بے فکر ہے مگر صوفے میں سخت فکرمند۔ اس کا چہرہ غم و اندوہ کا مجموعہ ہے کوئی رونی چیز بن رہی ہے، مگر ایسا معلوم ہوتا ہے کہ اپنے خیالات و افکار کے الجھے ہوئے دھاگے کبھی لپیٹتی ہے کبھی کھولتی ہے۔ ۔ ۔ اصغری داخل ہوتی ہے۔ )
بیگم :مجید میاں ملے ؟
اصغری :جی ہاں !
بیگم صاحب :کہاں تھے ؟
اصغری :باغیچے میں۔
بیگم صاحب :کیا کر رہے تھے ؟
اصغری :جی؟۔ ۔ ۔ (رک کر) اکیلے بیٹھے تھے۔
بیگم صاحب : (اصغری کی طرف دیکھ کر نگاہیں نیچی کر کے) آ رہے ہیں۔
اصغری : جی ہاں !
بیگم صاحب :تم جاؤ۔
(اصغری چلی جاتی ہے۔ ۔ ۔ مجید ا س کی طرف دیکھتا اندر داخل ہوتا ہے۔ )
مجید :کیا بات ہے !امی جان؟
بیگم صاحب :کچھ نہیں۔ ۔ ۔ بیٹھ جاؤ۔
مجید : (پاس ہی صوفے کی دوسری کرسی پر بیٹھ جاتا ہے) یہاں سردی ہے۔
بیگم صاحب :ہاں۔ ۔ ۔ یہاں سردی ہے۔
(وقفہ)
مجید : (بے چینی محسوس کرتے ہوئے) میرا خیال ہے۔ ۔ ۔ آپ نے مجھے یہاں کچھ کہنے کے لئے بلایا ہے۔
بیگم صاحب :ہاں !
مجید :فرمائیے ؟
بیگم صاحب :میں تمہیں یہاں سے بھیجنا چاہتی ہوں۔
مجید :مجھے ؟(اٹھ کر) کہاں ؟
بیگم صاحب :بیٹھ جاؤ۔
مجید : (بیٹھ جاتا ہے) یہ لیجئے۔
بیگم صاحب :میں نے ابھی امجد سے بات نہیں کی۔
مجید : (پھر اٹھ کر کھڑا ہوتا ہے) کون سی۔
بیگم صاحب :یہی تمہیں یہاں سے بھیجنے کی۔
مجید :لیکن آپ مجھے یہاں سے کیوں بھیج رہی ہیں۔ ۔ ۔ میرا مطلب ہے کوئی خاص کام ہے یا۔ ۔ ۔
بیگم صاحب :بیٹھ جاؤ۔
مجید : (بیٹھ جاتا ہے) کوئی خاص کام ہے ؟
بیگم صاحب :نہیں۔
مجید :تو پھر مجھے یہاں سے کہیں باہر بھیجنے کی ضرورت کیوں محسوس کی گئی ہے۔
بیگم صاحب :کہ میں اسی میں بہتری سمجھتی ہوں۔
مجید :بہتری؟۔ ۔ ۔ کس کی بہتری؟
بیگم صاحب :ہم سب کی۔ ۔ ۔ اس گھرکی۔
مجید : (اٹھ کھڑا ہوتا ہے) آپ پہیلیوں میں بات کر رہی ہیں امی جان۔
بیگم صاحب :مجید تم میرے لڑکے ہو، میں تمہاری ماں ہوں۔ ۔ ۔ میرے تمہارے درمیان کوئی ایسی گفتگو نہیں ہونی چاہئے جواس مقدس رشتے پر ذرا سی بھی کالک لگائے۔ ۔ ۔ میں چاہتی ہوں کہ تم آج ہی کراچی چلے جاؤ اور جب تک میں کہوں وہیں رہو۔
مجید :لیکن امی جان۔ ۔ ۔
بیگم صاحب : (بات کاٹ کر) تمہارے وہاں بے شمار دوست موجود ہیں۔ ۔ ۔ مجھے یقین ہے، تم ان کی مدد سے، یا خود اپنی ہمت سے، اس منجدھار میں سے جسے زندگی کہتے ہیں اپنی کشتی صحیح و سلامت کنارے لے جاؤ گے۔
مجید : (کچھ کہنا چاہتا ہے مگر کہہ نہیں سکتا اور بیٹھ جاتا ہے) بہت بہتر۔ ۔ ۔ میں چلا جاؤں گا۔
بیگم صاحب :تمہارا فیصلہ۔ ۔ ۔
(ایک دم خاموش ہو جاتی ہے۔ )
(کمرے میں امجد اپاہجوں والی کرسی میں داخل ہوتا ہے جسے کریم چلا رہا ہے۔ )
امجد : (مجید سے)یار مجید، تم بھی عجیب آدمی ہو۔ ۔ ۔ میں وہاں کمرے میں بیٹھا تمہارا انتظار کر رہا تھا کہ تم آؤ گے توہم دونوں سعیدہ کی سالگرہ کے تحفے کے متعلق سوچیں گے۔ ۔ ۔ لیکن تم یہاں بیٹھے ہو(بیگم صاحب سے)امی جان۔ ۔ ۔ آپ نے کیا سوچا۔ ۔ ۔ کیسا تحفہ ہونا چاہئے۔ ۔ ۔ میں تو سوچ سوچ کر پاگل ہو گیا ہوں۔
بیگم صاحب :تم سعیدہ سے کیوں نہیں پوچھتے۔
امجد :لو اور سنو(ہنستا ہے) حد کر دی آپ نے امی جان۔ ۔ ۔ اس سے مشورہ لیا تو تحفے کا مزا کیا خاک آئے گا(مجید سے) کیوں مجید؟
(مجید خاموش رہتا ہے۔ )
امجد :بولو یار۔
مجید : (اٹھ کر) آپ امی جان سے پوچھئے۔ ۔ ۔ میں تو جا رہا ہوں۔
امجد : (حیرت سے) جا رہے ہو؟۔ ۔ ۔ کہاں جا رہے ہو؟
مجید :کراچی!
امجد :یقیناً تمہارا دماغ خراب ہو گیا ہے۔ ۔ ۔ کیا کرنے جا رہے ہو کراچی؟
مجید :کیا کرنے جا رہا ہوں، (پھیکی سی مسکراہٹ کے ساتھ) منجدھار میں سے اپنی کشتی نکالنے۔
امجد : (بیگم سے) کیا ہو گیا ہے اسے (مجید سے) بیٹھو یار۔ ۔ ۔ پرسوں اس کی سالگرہ ہے۔ ۔ ۔ ابھی ابھی فیصلہ ہو جانا چاہئے۔
مجید :فیصلہ تو ہو چکا ہے۔
امجد :کیا؟
مجید :کہ میں کراچی جا رہا ہوں اور پھر کبھی واپس نہیں آؤں گا۔
امجد :کیا بکتے ہو(بیگم سے) امی جان، یہ قصہ کیا ہے ؟
بیگم صاحب :کچھ نہیں۔ ۔ ۔ ماں بیٹے میں لڑائی ہو گئی کسی بات پر۔
امجد :کس بات پر؟
بیگم صاحب :تم نہیں پوچھ سکتے۔
امجد :عدول حکمی تو ہوتی ہے۔ ۔ ۔ لیکن مجید میرا بھائی ہے۔ ۔ ۔ آپ کے اور اس کے درمیان اگر کوئی رنجش یا غلط فہمی پیدا ہو گئی ہے تو اسے دور کرنا میرا فرض ہے۔ ۔ ۔ مجید کو میں آپ سے زیادہ جانتا ہوں۔ ۔ ۔ اس سے ایسی کوئی غلطی سر زد نہیں ہو سکتی۔ جو آزار کا موجب ہو۔ ۔ ۔ (مجید سے) ادھر آؤ مجید۔
مجید :بھائی جان، مجھے اپنا اسباب بندھوانا ہے۔
امجد :لاحول ولا۔ ۔ ۔ یہ سب کیا ہے۔ ۔ ۔ (بیگم سے) امی جان۔ ۔ ۔ خدا کے لئے اسے روکئے۔ ۔ ۔ میرے لئے نہیں تو سعیدہ کے لئے روکیے۔ ۔ ۔ اس گھر میں ایک صرف یہی ہے جس نے ابھی تک اسے اداس نہیں ہونے دیا۔ ۔ ۔ میری خاطر اتنی زحمت برداشت کرتا ہے۔ ۔ ۔ اگر آپ نے اسے جانے دیا تو امی جان، میں نہیں جانتا، میرا کیا حال ہو گا۔ ۔ ۔ سعیدہ کو سیر کے لئے لے جاتا ہے تومیں تصور میں یہ سمجھتا ہوں کہ اس کے بدلے میں اس کے ہمراہ ہوں۔ اس کے ساتھ کوئی کھیل کھیلتا ہے تو وہ خلا بہت حد تک پورا ہو جاتا ہے جو قدرت کے بے رحم ہاتھوں نے میری زندگی میں پیدا کر رکھا ہے۔ ۔ ۔ میں تو کئی بار سوچتا ہوں امجد، اگر تیرا بھائی مجید نہ ہوتا تو کیا تیری شکستہ زندگی کا ملبہ تو اس قابل نہیں تھا کہ گھورے پر پڑا ہوتا۔ ۔ ۔ امی جان اسے روکئے۔ ۔ ۔ یہ تو میرا بازو ہے۔ ۔ ۔ کیوں آپ اس کو مجھ سے جدا کر رہی ہیں۔ ۔ ۔ اللہ میاں کی جگہ نہ لیجئے امی جان۔
(رونے لگتا ہے۔ )
مجید :میں جا رہا ہوں امی جان۔
بیگم صاحب :ٹھیرو!
مجید : (رک جاتا ہے۔ )
بیگم صاحب : (اٹھتی ہے اور امجد کے سرپر ہاتھ پھیرتی ہے) امجد بیٹا۔ ۔ ۔ روؤ نہیں جان مادر۔ ۔ ۔ مجید نہیں جائے گا۔ ۔ ۔ جو چیز جہاں ہے وہیں رہے گی۔ ۔ ۔ اس لئے کہ اسے یہی منظور ہے۔ ۔ ۔ (مجید سے) مجید۔ ۔ ۔ بھائی کے پاس بیٹھو اور سعیدہ کی سالگرہ کے متعلق سوچو۔
(چلی جاتی ہے۔ )
(مجید کچھ دیر سوچتا ہے۔ پھر امجد کی کرسی کی طرف بڑھتا ہے۔ )
مجید : (آہستہ) بھائی جان، آپ مجھے جانے دیں۔
امجد : (جھکا ہوا سر اٹھا کر) جانے دوں ؟۔ ۔ ۔ کہاں جانے دوں ؟۔ ۔ ۔ پاگل مت بنو۔
مجید :آپ نہیں سمجھتے بھائی جان۔
امجد :میں سب سمجھتا ہوں۔ ۔ ۔ اپنا رومال نکالو اور ذرا میرے یہ آنسو پونچھ دو۔
مجید : (تھوڑے توقف کے بعد اپنا رومال نکالتا ہے اور امجد کے آنسو پونچھتا ہے۔ ۔ ۔ جلدی جلدی)
امجد :کیا کرتے ہو یار۔ ۔ ۔ تمہیں تو آنسو پونچھنا بھی نہیں آتا۔ ۔ ۔ (مسکراتا ہے)اتنا معمولی سا کام ہے۔
مجید :یہ معمولی کام نہیں بھائی جان۔
امجد : (مسکرا کر) اچھا بھائی بڑا جان جوکھوں کا کام ہے۔ ۔ ۔ آؤ ادھر بیٹھو۔ ۔ ۔ سعیدہ کی سالگرہ کے تحفے کے متعلق سوچیں۔ بیٹھو۔
مجید : (امجد کے پاس کرسی پر بیٹھ جاتا ہے) سوچئے۔
امجد : (آہ بھرکر) سوچتے ہیں بھائی سوچتے ہیں۔ ۔ ۔ سوچنے کے علاوہ اب اور کام ہی کیا ہے۔ لیکن ذرا تم بھی سوچو۔
(مجید اور امجد دونوں سوچ میں مستغرق ہو جاتے ہیں)
۔ ۔ ۔ پردہ۔ ۔ ۔
 
ساتواں منظر
(نگار ولا سے ملحقہ باغیچہ۔ ۔ ۔ شام کا وقت۔ فوارے کا پانی بند ہے۔ جیسے وہ ابل ابل کر عاجز آ چکا ہے۔ پس منظر میں خاکستری پہاڑیاں دھندلکوں میں اپنی سنگینیاں جیسے چھپا رہی ہیں۔ فرش پر سبزہ روندا ہوا سا معلوم ہوتا ہے۔ دائیں طرف، فوارے سے دور ہٹ کر گھنی جھاڑیاں جن کے عقب میں امجد، اپاہجوں والی کرسی میں بیٹھا ہے۔ پشت پر اصغری کرسی کو دونوں ہاتھوں سے پکڑے ہے۔ ۔ ۔ وہ اسے چلانے لگتی ہے۔ )
امجد :نہیں اصغری۔ ۔ ۔ کچھ دیر ٹھہرو۔
اصغری : (ٹھیر جاتی ہے) لیکن امجد میاں۔ ۔ ۔
امجد :میں آج اپنی زندگی کا آخری زخم کھانا چاہتا ہوں۔
اصغری :یہ زخم کھانا اگر آپ ضروری سمجھتے ہیں تو اپنے تصور ہی میں کھا سکتے ہیں۔ ۔ ۔ لیکن۔ ۔ ۔ یہ زخم تو آپ کے لگ چکا ہے۔ ۔ ۔ اسے دوبارہ کیوں کھانا چاہتے ہیں آپ؟
امجد : (مسکرانے کی کوشش کرتے ہوئے) میری حالت میں جو آدمی ہو اس کے بدھو پنے کی کوئی حد نہیں رہتی۔ ۔ ۔ اپنے زخموں کے ٹانکے کھول کھول کر دیکھتا ہے۔ انگوروں کی زبانی ٹیسوں کی داستانیں سنتا ہے اور خود کو بہت بڑا شہید سمجھتا ہے۔ ۔ ۔ (ہنستا ہے) اصغری تمہاری کبھی کوئی چیز ٹوٹی نہیں، اس لئے تم لوگوں کا درد ناک حال نہیں جانتی ہو جو عجز کی انتہا کو پہنچ کر شکست و ریخت میں بلند بام عمارتیں بناتے ہیں۔
اصغری : (مسکراتی ہے)میں تو ان حدوں سے بھی آگے نکل گئی ہوں امجد میاں۔ ۔ ۔ بڑی اونچی اونچی عمارتیں بنا کر خود اپنے ہاتھوں سے ڈھا چکی ہوں۔ ۔ ۔ ایسا کرتے کرتے تو میرے دل میں بھی گٹے پڑ چکے ہیں۔
امجد : (کانپ جاتا ہے) اصغری۔ ۔ ۔ تم بڑی خوفناک ہو۔
اصغری : (ہنستی ہے) ہر اجاڑ خوفناک ہوتی ہے۔ ۔ ۔ حالانکہ بیچاری کیا خوفناک ہو سکتی ہے۔ اسے اپنے ماتم سے اتنی فرصت ہی کہاں ملتی ہے جو دوسروں کو ڈرائے۔ ۔ ۔ وہ تو خود دبکی ہوئی، سہمی ہوئی ہوتی ہے۔
امجد :تمہاری زندگی بھی کسی حادثے سے دوچار ہوئی؟
اصغری :جی نہیں۔ ۔ ۔ اس جی کی زندگی کسی حادثے سے کیا دو چار ہو گی جو کہ خود ایک حادثہ ہے۔
امجد :تمہاری باتوں سے جلے ہوئے گوشت کی بو آتی ہے۔
اصغری :اس لئے کہ اب آپ کی سونگھنے کی حس جاگی ہوئی ہے۔
امجد :پہلے سو رہی تھی۔
اصغری :جی ہاں۔ ۔ ۔ بہت گہری نیند۔
امجد :اسے جگایا کس نے ہے ؟
اصغری :اس گاڑی نے جو پٹری سے اتر گئی۔
امجد : (بڑبڑاتا ہے) اس گاڑی نے۔ ۔ ۔ جو پٹری سے اتر گئی۔ ۔ ۔ (ذرا بلند آواز میں) کیا یہ پھر پٹری سے اترے گی؟
اصغری :جو اللہ میاں کو منظور ہے وہی ہو گا۔
امجد :اللہ میاں کا نام مت لو۔ ۔ ۔ میری اس کی دوستی ختم ہو چکی ہے۔
اصغری :نہیں امجد میاں، اس شخص سے ہم ایسوں کی دوستی کبھی ختم نہیں ہوتی۔ ۔ ۔ ٹوٹ ٹوٹ کے آپ جڑتی رہتی ہے۔
امجد :یہ سب بکو اس ہے۔
(دونوں ایک دم چونکتے ہیں۔ قدموں کی آہٹ سنائی دیتی ہے۔ ۔ ۔ مجید اور سعیدہ ہانپتے ہوئے نمودار ہوتے ہیں۔ ۔ ۔ سعیدہ جو بہت تھکی ہوئی ہے، فوارے کی منڈیر پر بیٹھ جاتی ہے۔ مجید کھڑا رہتا ہے۔ )
سعیدہ :آج تومیں بہت تھک گئی ہوں۔
مجید :حالانکہ ہم زیادہ دور نہیں گئے۔
سعیدہ :ہاں !
(وقفہ)
مجید :کیا ہی اچھا ہوتا، اگر میں کراچی چلا گیا ہوتا۔
سعیدہ :اچھا ہی ہوتا۔
مجید :میری جان عجیب مشکل میں پھنس گئی ہے۔ ۔ ۔ میں کراچی چلا جاتا۔ ۔ ۔ لیکن سوال ہے کیا میں اس منجدھار میں سے اپنی کشتی کھے کر کنارے لے جاتا؟۔ ۔ ۔ نہیں۔ ۔ ۔ میں ضرور ناکام رہتا۔
سعیدہ :مجھے معلوم ہے۔
مجید :تمہیں معلوم ہے۔ ۔ ۔ مجھے معلوم ہے۔ ۔ ۔ سوائے بھائی جان کے اور سب کو معلوم ہے اور یہی اس کہانی کا سب سے المناک حصہ ہے۔
سعیدہ :میں نے کئی بار سوچا ہے کہ ان سے کہہ دوں، لیکن (اٹھ کھڑی ہوتی ہے)مجھے ڈر ہے، وہ اس صدمے کی تاب نہ لا سکیں گے۔
مجید :مجھے خود اسی بات کا ڈر ہے۔ ۔ ۔ ڈاکٹروں نے کہا ہے کہ وہ زیادہ سے زیادہ ایک برس اور زندہ رہیں گے۔ ۔ ۔ غریب سے زندگی کا اتنا مختصر عرصہ چھیننا ظلم ہے۔
(جھاڑیوں کے عقب میں امجد اپنے دانت بھینچ لیتا ہے۔ ۔ ۔ اصغری مضبوطی سے اس کا کندھا پکڑ لیتی ہے۔ )
سعیدہ :ہمیشہ کوشش کرنی چاہئے کہ جب تک وہ زندہ رہیں، خوش رہیں۔ ان کے احساسات کے نازک آبگینوں کو ہلکی سی ٹھیس بھی نہ لگے۔ ۔ ۔
مجید : اور اگر ہمارا کوئی چھالا گڑ کھا کے پھوٹ پڑا تو۔ ۔ ۔
سعیدہ : (قریب قریب چیخ کر)تو قیامت آ جائے گی۔
مجید :اسی لئے میں سوچتا ہوں کہ میں چلا جاؤں۔ ۔ ۔ جب تک بھائی جان۔ ۔ ۔
سعیدہ : (ایک دم بات کاٹ کر)ایسا نہ کہو مجید۔ ۔ ۔ اتنے ظالم مت بنو۔
(امجد، اپاہجوں کی کرسی میں لرز جاتا ہے، اصغری اس کا دوسرا کندھا بھی مضبوطی سے پکڑ لیتی ہے۔ )
مجید :محبت بڑی ظالم اور خودغرض ہوتی ہے سعیدہ۔ ۔ ۔ کم بخت دوسروں کی موت پر ناچنے کی خواہش کرتے ہوئے بھی نہیں شرماتی۔
سعیدہ :ہمیں ایسے خیال اپنے دماغ میں نہیں لانے چاہئیں۔
مجید :ٹھیک ہے۔ ۔ ۔ لیکن آ جائیں تو کیا کریں۔
سعیدہ :کیا کر سکتے ہیں۔ ۔ ۔ چلو۔
(سعیدہ کوٹھی کی جانب چلتی ہے۔ ۔ ۔ مجید اس کے پیچھے آہستہ آہستہ قدم اٹھاتا ہے۔ ۔ ۔ جھاڑیوں کے عقب میں اپاہجوں والی کرسی میں امجد کا سر جھکا ہوا ہے۔ اس کے پیچھے اصغری بت بنی کھڑی ہے)
اصغری :چلیں ؟
امجد : (اسی طرح سر جھکائے)نہیں۔ ۔ ۔ ابھی نہیں۔ ۔ ۔ میں سوچ رہا ہوں۔
اصغری :کیا؟
امجد :معلوم نہیں۔ ۔ ۔ شاید سوچ رہا ہوں کہ مجھے اب کیا سوچنا چاہئے۔
اصغری :ایسی سوچ بچار بالکل فضول ہوتی ہے۔
امجد : (سر اٹھا کر) فضول تو ہوتی ہے۔ ۔ ۔ مگر پھر کیا کروں۔ ۔ ۔ (وقفے کے بعد) وہ اتنے ظالم نہیں ہیں جتنی تم ہو۔ ۔ ۔ تم تو مجھے سوچنے سے بھی منع کرتی ہو۔ ۔ ۔ تم بڑی ظالم ہو اصغری!
اصغری : (مسکرا کر) محبت بڑی ظالم اور خودغرض ہوتی ہے امجد میاں۔ ۔ ۔ کم بخت اپنی موت پربھی ناچنے سے باز نہیں آتی۔
امجد :میرے سامنے آؤ۔
(اصغری، امجد کے سامنے آتی ہے۔ امجد اس کی آنکھوں میں آنکھیں ڈال کر دیکھتا ہے۔ ۔ ۔ کچھ سوچتا ہے اور بڑبڑاتا ہے۔ )
امجد :یہ کتاب اب تک کہاں پڑی تھی۔
اصغری :کہیں ردی کی ٹوکری میں۔ ۔ ۔ اپنی صحیح جگہ!
امجد :چلو۔ ۔ ۔ مجھے لے چلو۔
(اصغری کرسی کھیتی ہے اور کوٹھی کی جانب چلتی ہے۔ )
۔ ۔ ۔ پردہ۔ ۔ ۔

آٹھواں منظر
(وہی کمرہ جو پہلے، دوسرے اور چوتھے منظر میں ہے۔ رات کا وقت۔ ۔ ۔ چھت سے سبز روشنی کی پھوار گر رہی ہے۔ ۔ ۔ ہر شے کا اصل رنگ بدلا ہوا ہے، جیسے اعصاب زدہ مریضوں کا۔ ۔ ۔ مسہری خالی ہے۔ کچھ اس طور پر خالی جیسے وہ کبھی آباد ہی نہیں تھی۔ ۔ ۔ اصغری، امجد کو اپاہجوں والی کرسی میں اندر لاتی ہے۔ )
اصغری :دولہن بیگم، بیگم صاحب کے کمرے میں کیوں چلی گئی؟
امجد :ڈرتی تھی۔
اصغری :آپ سے ؟
امجد : (مسکرا کر) مجھ سے کوئی کیا ڈرے گا۔ ۔ ۔ وہ اپنے آپ سے ڈرتی تھی۔
اصغری :وہ اتنی کمزور نہیں ہیں امجد میاں۔
امجد :وقت بڑے بڑے پہاڑ کھوکھلے کر دیتا ہے۔ ۔ ۔ وہ تو ایک جوان لڑکی ہے۔
اصغری : (توقف کے بعد) آپ سونا چاہیں گے اب؟
امجد :سونا۔ ۔ ۔ (ہنستا ہے) میرا مذاق مت اڑاؤ اصغری۔ ۔ ۔ میرے جلتے ہوئے زخموں کی توہین ہوتی ہے۔
اصغری : (توقف کے بعد) کیا آپ کو سعیدہ سے محبت ہے ؟
امجد :نہیں۔
اصغری :تو پھر یہ جلتے ہوئے زخم کیسے ؟
امجد :مجھے سوچنے دو۔ ۔ ۔ بولو اجازت دیتی ہو سوچنے کی؟
اصغری :آپ سوچئے۔
(طویل وقفہ جس میں امجد سوچ میں غرق رہتا ہے۔ )
امجد :مجھے سعیدہ سے محبت نہیں ہے۔ ۔ ۔ جس طرح مارکٹ سے آدمی اچھی چیز چن کے لاتا ہے۔ ۔ ۔ اسی طرح میں نے سینکڑوں لڑکیوں میں سے اسے انتخاب کر کے اپنی بیوی بنایا تھا۔ ۔ ۔ مجھے اپنے اس انتخاب پر ناز تھا اور بجانا تھا۔ ۔ ۔ سعیدہ مبالغے کی حد تک خوبصورت ہے۔ ۔ ۔ اس پر میرا صرف اتنا حق ہے کہ میں نے اسے چنا اور اپنی رفیقہ حیات بنایا۔ ۔ ۔ اس حیات کا جواب کچلی ہوئی اسی کرسی میں ڈھیر ہے۔ ۔ ۔ جو کسی دوسرے کی مدد کے بغیر ہل نہیں سکتی۔ ۔ ۔ ڈاکٹروں نے مجھے زیادہ سے زیادہ ایک سال اور زندہ رہنے کے لئے دیا ہے۔ ۔ ۔ سمجھ میں نہیں آتا میں کیوں اس عرصے تک اس کو ایسی زنجیروں میں باندھ کے رکھنا چاہتا ہوں جن کا ہر حلقہ میری اپنی زندگی کی طرح غیریقینی ہے۔ ۔ ۔ کچھ سمجھ میں نہیں آتا۔ ۔ ۔ (سوچتے ہوئے)اس کی جوان خوبصورتی ہی ایک وجہ ہو سکتی ہے (ایک دم چونک کر)یہی، یہی۔ ۔ ۔ یہی وجہ ہے اور کوئی نہیں۔ ۔ ۔ (تکلیف محسوس کرتا ہے) اوہ۔ ۔ ۔ اوہ۔ ۔ ۔ وہ نظارہ۔ ۔ ۔ وہ نظارہ۔ ۔ ۔ مجھے بھول سکتا ہے۔ کبھی وہ نظارہ۔ ۔ ۔ اس مسہری میں جوان خوبصورتی اپنی تمام رعنائیوں کے ساتھ لیٹی دنیا کی حسین ترین ملبوسات کو شرمسار کر رہی تھی۔ ۔ ۔ یہ نظارہ میرے ساتھ چمٹ گیا ہے۔ ۔ ۔ نہیں، میں اس کے ساتھ چمٹ گیا ہوں۔ ۔ ۔ (وقفے کے بعد) اصغری!
اصغری : (چونک کر) جی!
امجد :کوئی ایسی صورت ہو سکتی ہے جو یہ چھل کر پخ کر میرے وجود سے علیحدہ ہو جائے۔
اصغری :ہر مشکل کی چولی میں اس کو آسان کرنے کی ترکیب چھپی ہوتی ہے۔
امجد :تو ڈھونڈنی چاہئے۔ ۔ ۔ لیکن۔ ۔ ۔ لیکن مجھے حجاب کیوں محسوس ہوتا ہے۔
اصغری :معلوم نہیں کیوں۔ ۔ ۔ یہ مشکل، آپ ہی کی مشکل ہے۔ اس کے لئے آپ کا ہاتھ کسی نامحرم کا ہاتھ نہیں ہو گا۔
امجد :جانتا ہوں۔ ۔ ۔ میں اپنے دل کی ان تمام نا خلف نسوں سے واقف ہوں جو اس غلط جذبے کی دھڑکنیں پیدا کرتی ہیں۔ ۔ ۔ لیکن آج اس کا فیصلہ ہو جائے گا۔
اصغری :کس کا؟
امجد :میرے سامنے آؤ۔
(اصغری، امجد کے سامنے آ جاتی ہے۔ )
امجد :جاؤ، مسہری میں لیٹ جاؤ۔
اصغری : (ہچکچا کر) امجد میاں۔ ۔ ۔ مجھ میں وہ جوان خوبصورتی نہیں ہے۔ جس کی رعنائیاں دنیا کے حسین ترین ملبوسات کو شرمسار کر سکیں۔ ۔ ۔ میری جوانی تو کھردرے ٹاٹ کی شرمندۂ احسان ہونا چاہتی ہے۔
امجد :مسہری میں لیٹ جاؤ اصغری۔
اصغری : (آنکھوں سے آنسو چھلک پڑتے ہیں) نہیں امجد میاں۔ ۔ ۔ مسہری کو تکلیف ہو گی۔ ۔ ۔ یہ دولہن بیگم کے نرم اور نازک بدن کی عادی ہے۔
امجد :میں تمہیں حکم دیتا ہوں۔
اصغری : (سر جھکا کر) آپ مالک ہیں۔
(مسہری میں لیٹ جاتی ہے۔ ۔ ۔ آنکھیں چھت میں گڑ جاتی ہیں۔ )
امجد :جانتی ہو آج کون سی رات ہے ؟۔ ۔ ۔ وہ رات ہے۔ جب ایک تڑی مڑی جوانی اور زیادہ تڑ مڑ کر سالمیت اختیار کرنے والی ہے۔ ۔ ۔ یہ قیامت کی رات ہے یا فنا کی رات۔ ۔ ۔ اس کے اندھیاروں میں وجود، عدم کی بھٹیوں میں پگھل کر ایک غیر فانی قالب اختیار کرے گا۔ ۔ ۔ یہ وہ رات ہے جس کے بعد اور کوئی رات نہیں آئے گی، اس کی اندھی آنکھوں میں ایسے کاجل سے تحریریں ہوں گی جو انھیں ہمیشہ کے لئے روشن کر دینے کی۔ ۔ ۔ یہ وہ رات ہے، جب موت کے نچھڑے ہوئے تھنوں سے زندگی کے آخری نظر سے ڈر کر خودبخود ہی باہر آ جائیں گے۔ ۔ ۔ یہ وہ رات ہے جب شکستگی اپنی کوکھ سے سربلند ایوانوں کو جنم دے گی۔ ۔ ۔ ایسے سربلند ایوان جن کے کنگروں کو عرش کی بلند ترین اونچائیوں سے ہم کلام ہونے کا شرف حاصل ہو گا۔ یہ وہ رات ہے، جب زم زم کا سارا پانی رینگ رینگ کر زمین کی تہوں میں چھپ جائے گا۔ اس کے بدلے خاک اڑے گی۔ جس سے پاکیزہ روحیں تیمم کریں گی۔ ۔ ۔ یہ وہ رات ہے۔ جب کاتب تقدیر اپنا قلم دان اوندھا کر کے فرش کے کسی کونے میں منہ دے کر روئے گا۔ ۔ ۔ یہ وہ رات ہے جس میں امجد اس دنیا کی تمام خوبصورتیوں کو تین دفعہ طلاق دیتا ہے اور ایک بدصورتی کو اپنے رشتۂ مناکحت میں لاتا ہے۔ ۔ ۔ (ایک دم چیختا ہے) اصغری۔ ۔ ۔ اصغری!
(اس دوران میں اصغری مسہری پرسے اٹھ کر کھڑکی کے پاس پہنچ کر اسے کھول چکی ہے اور اس کی سل پر کھڑی ہو کر نیچے گہرائیوں میں دیکھ رہی ہے۔ )
امجد : (چیخ کر) یہ کیا کر رہی ہو اصغری؟
اصغری : (کھڑکی کی سل پر مڑ کر امجد کو دیکھتی ہے) ایجاب و قبول ضروری ہے میرے مالک!
(نیچے کود جاتی ہے۔ )
امجد : (دونوں ہاتھوں سے آنکھیں ڈھانپ کر) اصغری!۔ ۔ ۔ (ہاتھ ہٹاتا ہے اور چند لمحات کھلی کھڑکی کے اندھیرے کو دیکھتا رہتا ہے جو سبز دیوار میں تاریک زخم کے مانند منہ کھولے ہے) ایجاب و قبول!۔ ۔ ۔ (بڑبڑاتا ہے) ایجاب و قبول واقعی ضروری ہے (زور لگا کر دونوں ہاتھوں سے اپنی کرسی آگے کو کھیتا ہے۔ ۔ ۔ بڑی مشکل سے کھڑکی کے پاس پہنچ جاتا ہے)۔ ۔ ۔ مجھے مشکل کو آسان کرنے کا یہ راستہ معلوم تھا۔ ۔ ۔ مگر شاید کسی انگلی پکڑنے والے کی ضرورت تھی۔ ۔ ۔
(کھڑکی کی سل دونوں ہاتھوں سے مضبوطی کے ساتھ پکڑتا ہے اور اپنا اپاہج جسم بڑی دقتوں سے اوپر اٹھاتا ہے اور دوسری طرف لٹکنا شروع کر دیتا ہے۔ )
امجد :میری پہاڑیاں۔ ۔ ۔ میری پیاری پہاڑیاں۔ ۔ ۔ میری پیاری اصغری!
(اگلا دھڑ نیچے پھسلتا ہے اور ایک دم اس کا سارا وجود اندھیرا کھا جاتا ہے۔ )
۔ ۔ ۔ پردہ۔ ۔ ۔
***
ماخذ: ’’نقوش‘‘ منٹو نمبر ۴۹، ۵۰
مرتب۔ محمد طفیل
 
پطرس بخاری

انجام بخیر

م۔ ۔ ن۔ ۔ ظ۔ ۔ ر : (ایک تنگ و تاریک کمرہ جس میں بجز ایک پرانی سی میز اور لرزہ بر اندام کرسی کے اور کوئی فرنیچر نہیں۔ زمین پر ایک طرف چٹائی بچھی ہے، جس پر بے شمار کتابوں کا انبار لگا ہے، جہاں جہاں کتابوں کی پشتیں نظر آتی ہیں، وہاں شیکسپیئر، ٹالسٹائی، ورڈزورتھ وغیرہ مشاہیر ادب کے نام دکھائی دے جاتے ہیں۔
باہر کہیں پاس ہی کتے بھونک رہے ہیں، قریب ہی ایک برات اتری ہوئی ہے۔ اس کے بینڈ کی آواز بھی سنائی دے رہی ہے جس کے بجانے والے دق، دمہ، کھانسی اور اسی قسم کے دیگر امراض میں مبتلا دکھائی دیتے ہیں۔ ڈھول بجانے والے کی صحت البتہ اچھی ہے۔
پطرس نامی ایک نادر معلم میز پر کام کر رہا ہے، نوجوان ہے لیکن چہرے پر گذشتہ تندرستی اور خوش باشی کے آثار کہیں کہیں باقی ہیں۔ آنکھوں کے گرد سیاہ حلقے پڑے ہوئے ہیں، چہرے سے ذہانت پسینہ بن کر ٹپک رہی ہے، سامنے لٹکی ہوئی جنتری سے معلوم ہوتا ہے کہ مہینے کی آخری تاریخ ہے۔
باہر سے کوئی دروازہ کھٹکھٹاتا ہے، پطرس اٹھ کر دروازہ کھول دیتا ہے۔ تین طالب علم نہایت عمدہ لباس میں زیب تن کئے اندر داخل ہوتے ہیں۔ )
پطرس :حضرات اندر تشریف لائیے، آپ دیکھتے ہیں کہ میرے پاس ایک کرسی ہے، لیکن جاہ و حشمت کا خیال پوچ خیال ہے، علم بڑی نعمت ہے۔ لہٰذا میرے فرزندو اس انبار سے ضخیم کتابیں انتخاب کر لو، اور ان کو ایک دوسرے کے اوپر چن لو، پھر ان پر بیٹھ جاؤ۔ علم ہی تم لوگوں کو اوڑھنا اور علم ہی تم لوگوں کا بچھونا ہونا چاہئے۔
(کمرے میں پراسرار نور سا چھا جاتا ہے، فرشتوں کے پروں کی پھڑپھڑاہٹ سنائی دیتی ہے۔ )
طالب علم : (تینوں مل کر) اے خدا کے برگزیدہ بندے، اے ہمارے محترم استاد، ہم آپ کاحکم ماننے کو تیا رہیں، علم ہی لوگوں کا اوڑھنا ہے اور علم ہی بچھونا ہونا چاہئے۔
(کتابوں کو جوڑ کر ان پر بیٹھ جاتے ہیں۔ )
پطرس :کہو، اے ہندوستان کے سپوتو!آج تم کو کون سے علم کی تشنگی میرے دروازے تک کشاں کشاں لے آئی۔
پہلا طالب علم :اے نیک انسان!ہم آج تیرے احسانوں کا بدلہ اتارنے آئے ہیں۔
دوسرا طالب علم :اے فرشتے !ہم تیری نوازشوں کا ہدیہ پیش کرنے آئے ہیں۔
تیسرا طالب علم :اے ہمارے مہربان!ہم تیری محنتوں کا پھل تیرے پاس لائے ہیں۔
پطرس :یہ نہ کہو، یہ نہ کہو۔ یہ میری محنت کا پھل ہے۔ کالج کے مقررہ اوقات کے علاوہ جو کچھ میں نے تم کو پڑھایا، اس کا معاوضہ مجھے اس وقت وصول ہو گیا جب میں نے تمہاری آنکھوں میں ذکاوت کی چمک دیکھی، آہ!کیا تم جانتے ہو کہ تعلیم و تدریس کیسا آسمانی پیشہ ہے ؟ تاہم تمہارے الفاظ میرے دل میں ایک عجیب مسرت سی بھرگئے ہیں، مجھ پر اعتماد کرو اور بالکل مت گھبراؤ، جو کچھ کہنا ہے تفصیل سے کہو۔
پہلا طالب علم : (سرو قد اور دست بستہ کھڑا ہو کر)اے محترم استاد!ہم علم کی بے بہا دولت سے محروم تھے۔ درس کے مقررہ اوقات سے ہماری پیاس نہ بجھ سکتی تھی، پولیس اور سول سروس کے امتحانات کی آزمائش کڑی ہے، آپ نے ہماری دست گیری کی، اور ہمارے تاریک دماغوں میں اجالا ہو گیا۔ معزز استاد!آپ جانتے ہیں آج مہینے کی آخری تاریخ ہے، ہم آپ کی خدمتوں کا حقیر معاوضہ پیش کرنے آئے ہیں، آپ کے عالمانہ تجربے اور بزرگانہ شفقت کی قیمت کوئی ادا نہیں کر سکتا، تاہم اظہار تشکر کے طور پر جو کم مایہ رقم ہم آپ کی خدمت میں پیش کریں اسے قبول فرمائیں۔ ہماری احسان مندی اس سے کہیں بڑھ کر ہے۔
پطرس :تمہارے الفاظ سے ایک عجیب بے قراری میرے جسم پر طاری ہو گئی ہے۔
(پہلے طالب علم کا اشارہ پا کر باقی دو طالب علم بھی کھڑے ہو جاتے ہیں۔ باہر بینڈیک لخت بجنے لگتا ہے۔ )
پہلا طالب علم : (آگے بڑھ کر)اے مہربان مجھ حقیر کی نذر قبول فرمائیے۔
(بڑے ادب و احترام کے ساتھ اٹھنی پیش کرتا ہے۔ )
دوسرا طالب علم : (آگے بڑھ کر)اے نیک انسان!مجھ ناچیز انسان کو متفّخر فرما۔
(اٹھنی پیش کرتا ہے۔ )
تیسرا طالب علم : (آگے بڑھ کر)اے محترم استاد!مجھ ناچیز انسان کو متفّخر فرما۔
(اٹھنی پیش کرتا ہے۔ )
پطرس : (جذبات سے بے قابو ہو کر)رقت انگیز آواز سے، اے میرے فرزندو! خدا کی رحمت تم پر نازل ہو، تمہاری سعادت مندی اور فرض شناسی سے میں بہت متاثر ہوا ہوں، تم کو اس دنیا میں آرام اور آخرت میں نجات نصیب ہو، اور خدا تمہارے علم کے نور سے سینوں کو منور کرے۔
(تینوں اٹھنیاں اٹھا کر میز پر رکھ لیتا ہے۔ )
طالب علم : (تینوں مل کر)اللہ کے برگزیدہ بندے !ہم فرض سے سبکدوش ہو گئے، اب ہم اجازت چاہتے ہیں کہ گھر پر ہمارے والدین ہمارے لئے بے تاب ہوں گے۔
پطرس :خدا تمہارا حامی و ناصر ہو، اور تمہاری علم کی پیاس اور بھی بڑھتی رہے۔
(طالب علم چلے جاتے ہیں۔ )
پطرس : (تنہائی میں سر بسجود ہو کر)باری تعالیٰ تیرا لاکھ لاکھ شکر ہے کہ تو نے مجھے اپنی ناچیز محنت کے ثمرے کے لئے بہت دنوں انتظار میں رکھا، تیری رحمت کی کوئی انتہا نہ رہی، لیکن ہماری کم مائگی اس سے بھی کہیں بڑھ کر ہے اور یہ تیرا ہی فضل و کرم ہے کہ تیرے وسیلے سے اوروں کو بھی رزق ملتا ہے، اور جو ملازم میری خدمت کرتا ہے اس کا تو کفیل مجھ کو بنا رکھا ہے۔ تیری رحمت کی کوئی انتہا نہیں، اور تیری بخشش ہمیشہ ہمیشہ جاری رہنے والی ہے۔
(کمرے میں ایک بار پھر ایک پر اسرار سی روشنی چھائی ہے اور فرشتوں کے پروں کی پھڑپھڑاہٹ سنائی دیتی ہے۔ کچھ دیر کے بعد پطرس سجدے سے سر اٹھاتا ہے اور ملازم کو آواز دیتا ہے۔ )
پطرس :اے خدا کے دیانت دار اور محنتی بندے !یہاں تو آؤ۔
ملازم : (باہر سے) اے میرے خصال آقا! میں کھانا پکا کر آؤں گا۔ تعمیل شیطان کا کام ہے۔
(ایک طویل وقفہ جس کے دوران درختوں کے سائے دوگنے لمبے ہو گئے ہیں۔ )
پطرس :آہ!انتظار کی گھڑیاں کس قدر شیریں ہیں۔ کتوں کے بھونکنے کی آواز کس خوش اسلوبی سے بینڈ کی آواز کے ساتھ مل رہی ہے۔ ۔ ۔
(سر بسجود گرتا ہے۔ پھر اٹھ کر میز کے سامنے بیٹھ جاتا ہے، اٹھنیوں پر نظر پڑتی ہے، ان کو فوراً کتاب کے نیچے چھپٍا دیتا ہے۔ )
پطرس :آہ!مجھے زر و دولت سے نفرت ہے، خدایا میرے دل کو دنیا کے لالچ سے پاک رکھیو۔
(ملازم اندر آتا ہے۔ )
پطرس :اے مزدور پیشہ انسان۔ ۔ ۔ !مجھے تجھ پر رحم آتا ہے کہ ضیائے علم کی ایک کرن بھی تیرے سینے میں داخل نہ ہوئی۔ خداوند تعالیٰ کے دربار میں تم ہم سب برابر ہیں۔ تو جانتا ہے آج مہینے کی آخری تاریخ ہے، تیری تنخواہ کی ادائیگی کا وقت سر پرآ گیا، خوش ہو کہ آج تجھے تیری مشقت کا معاوضہ مل جائے گا، یہ تین اٹھنیاں قبول کر، اور باقی ساڑھے اٹھارہ روپئے کے لئے کسی لطیفہ غیبی کا انتظار کر۔ ۔ ۔ دنیا امید پر قائم ہے اور مایوسی کفر ہے۔
(ملازم اٹھنیاں زور سے زمین پر پھینک کر گھر سے باہر نکل جاتا ہے۔ )
(بینڈ زور سے بجنے لگتا ہے۔ )
پطرس :خدایا!تکبر کے گناہ سے ہم سب کو بچائے اور ادبی طبقے کے لوگوں کا سا غرور ہم سے دور رکھ۔
(پھر کام میں مشغول ہو جاتا ہے۔ )
(باورچی خانے سے کھانا جلنے کی بو آ رہی ہے۔ ۔ ۔ ایک طویل وقفہ، جس کے دوران میں درختوں کے سائے پہلے سے چوگنے لمبے ہو گئے ہیں۔ بینڈ بدستور بج رہا ہے۔ یک لخت باہر سڑک پر موٹروں کے آ کر رک جانے کی آواز سنائی دیتی ہے۔ تھوڑی دیر بعد کوئی شخص دروازے پر دستک دیتا ہے۔ )
پطرس : (کام پرسے سر اٹھا کر) اے شخص تو کون ہے ؟
ایک آواز : (باہر سے) حضور میں غلاموں کا غلام ہوں، اور باہر دست بستہ کھڑا ہوں کہ اجازت ہو تو اندر آؤں اور عرض حال کروں۔
پطرس : (دل میں) میں اس آواز سے ناآشنا ہوں، لیکن لہجے سے پایا جاتا ہے کہ بولنے والا کوئی شائستہ شخص ہے۔ (بلند آواز سے) اندر آ جائیے۔
(دروازہ کھلتا ہے اور ایک شخص لباس فاخرہ پہنے اندر داخل ہوتا ہے، گو چہرے سے وقار ٹپک رہا ہے لیکن نظریں زمین دوزہیں، اور ادب و احترام سے ہاتھ باندھے کھڑا ہے۔ )
پطرس :آپ دیکھتے ہیں کہ میرے پاس صرف ایک ہی کرسی ہے، لیکن جاہ و حشمت کا خیال بہت ہی پوچ خیال ہے۔ علم بڑی نعمت ہے۔ لہٰذا اے محترم اجنبی! اس انبار میں سے چند ضخیم کتابیں انتخاب کر لو، اور ان کو ایک دوسرے کے اوپر چن کر بیٹھ جاؤ۔ علم ہی لوگوں کا بچھونا اور علم ہی لوگوں کا اوڑھنا ہونا چاہئے۔
اجنبی :اے برگزیدہ شخص! میں تیرے سامنے کھڑے رہنے میں ہی اپنی سعادت سمجھتا ہوں۔
پطرس :تمہیں کون سے علم کی تشنگی میرے دروازے تک کشاں کشاں لے آئی؟
اجنبی :اے ذی محترم!آپ میری صورت سے واقف نہیں، میں محکمہ تعلیم کا افسر اعلیٰ ہوں اور شرمندہ ہوں کہ کبھی آج تک نیاز حاصل کرنے کے لئے حاضر نہ ہوا۔ میری اس کوتاہی اور غفلت کو اپنے علم و فضل کے صدقے معاف کر دو۔
(آبدیدہ ہو جاتا ہے۔ )
پطرس :اے خدا، یہ سب کیا وہم ہے، یا میری آنکھیں دھوکہ کھا رہی ہیں ؟
اجنبی :مجھے تعجب نہیں کہ تم میرے آنے کو وہم سمجھو، کیونکہ آج تک ہم نے تم جیسے برگزیدہ انسان سے اس قدر غفلت برتی کہ مجھے خود اچنبھا معلوم ہوتا ہے۔ لیکن مجھ پر یقین کرو، میں فی الحقیقت یہاں تمہاری خدمت میں کھڑا ہوں اور تمہاری آنکھیں تمہیں ہرگز دھوکہ نہیں دے رہی ہیں، اے شریف اور غمزدہ انسان، اگر یقین نہ ہو تو میرے جسم پر چٹکی لے کر میرا امتحان کر لو۔
(پطرس اجنبی کے چٹکی لیتا ہے، اور اجنبی زور سے چیختا ہے۔ )
پطرس :آپ فرمائیے میں سن رہا ہوں، گو مجھے یقین نہیں ہے کہ یہ عالم بیداری ہے۔
(اجنبی تالی بجاتا ہے، چھ خدام چھ بڑے بڑے صندوق اٹھا کر اندر داخل ہوتے ہیں، اور زمین پر رکھ کر بڑے ادب سے کورنش بجا کر چلے جاتے ہیں۔ )
اجنبی : (صندوقوں کے ڈھکنے کھول کر)’’میں بادشاہ معظم شاہزادہ ویلز‘‘ ویسرائے ہند اور کمانڈر انچیف ان چاروں کے ایماء پر ہدیۂ تحائف آپ کی خدمت میں آپ کے علم و فضل کی قدردانی کے طور پر لے کر حاضر ہوا ہوں۔ (بھرائی ہوئی آواز سے) ان کو قبول کیجئے اور مجھے مایوس نہ کیجئے ورنہ ان سب کا دل ٹوٹ جائے گا۔
پطرس : (صندوقوں کو دیکھ کر) سونا! اشرفیاں !جواہرات!مجھے یقین نہیں آتا۔
(آیۃ الکرسی پڑھنے لگتا ہے۔ )
اجنبی :ان کو قبول کیجئے اور مجھے واپس نہ بھیجئے۔
(آنسو ٹپ ٹپ گرتے ہیں۔ )
گانا۔ ۔ ۔ ’’آج موری انکھیاں پل نہ لاگیں۔ ‘‘
پطرس :اے اجنبی!تیرے آنسو کیوں گر رہے ہیں، اور تو گانا کیوں گا رہا ہے، معلوم ہوتا ہے تجھے اپنے جذبات پر قابو نہیں ہے، یہ تیری کمزوری کی نشانی ہے۔ خدا تجھے تقویت دے اور ہمت دے، میں خوش ہوں کہ تو اور تیرے آقا علم سے اس قدر محبت رکھتے ہیں۔ بس اب ہمارے مطالعے کا وقت ہے کل کالج میں اپنے لیکچر سے ہمیں چار پانچ سو روحوں کو خواب جہالت سے جگانا ہے۔
اجنبی : (سسکیاں بھرتے ہوئے) مجھے اجازت ہو تو میں حاضر ہو کر آپ کے خیالات سے مستفید ہوں ؟
پطرس :خدا تمہاری حامی و ناصر ہو، اور تمہارے علم کی پیاس اور بھی بڑھتی رہے۔
(اجنبی رخصت ہو جاتا ہے، پطرس صندوق کو کھوئی ہوئی نظروں سے دیکھتا رہتا ہے اور پھر یک لخت مسرت کی ایک چیخ مارکر گر پڑتا ہے، اور مر جاتا ہے۔ کمرے میں ایک پر اسرار نور چھا جاتا ہے اور فرشتوں کے پروں کی پھڑپھڑاہٹ سنائی دیتی ہے۔ باہر بینڈ باجہ بج رہا ہے۔ )
***
ماخذ: پطرس کے مضامین
ادبی دنیا، اردو بازار
دہلی۔
 
کرشن چندر

دروازہ

پہلی بار:دہلی ۱۷/اگست ۱۹۴۰ء؁
ڈرامے کے افراد اور اداکار
ماں :چندر کرن چھایا
کانتا:خورشید بیگم
شانتا:سرلا دیوی
مالک مکان:محمد حسین
اجنبی:تاج محمد
زمانہ :حال
(کھڑکی زور سے کھلتی ہے۔ بادل کی گرج ہلکی سی اور ہوا کے فراٹے کے ساتھ بارش کی آواز کمرے کے اندر سنائی دیتی ہے۔ )
ماں :اب تو بارش بھی شروع ہو گئی بیٹی۔ ۔ ۔ (وقفہ)۔ ۔ ۔ اور یہ ہوا کا طوفان۔ ۔ ۔ (وقفہ)۔ ۔ ۔ اب کون آئے گا۔ اس طوفان کے اندھیارے میں۔ ۔ ۔ (وقفہ)۔ ۔ ۔ کانتا بیٹی۔ اب کیا وقت ہو گا؟
کانتا :مجھے نہیں معلوم۔
ماں :بتا بھی دے بیٹی(آبدیدہ ہو کر)اگر آج میری آنکھیں ہوتیں تومیں خود دیکھ لیتی۔
کانتا :گھڑی شانتا کے میز کے اوپر پڑی ہے۔ شانتا میز پرسے ہلے تومیں وقت معلوم کروں۔
ماں :شانتا بیٹی۔
شانتا : (کمرے کے دوسرے کونے سے آواز) ساڑھے آٹھ بجے ہیں۔
(وقفہ)
ماں :ساڑھے۔ ۔ ۔ آٹھ۔ ۔ ۔ رات ہو گئی۔ رات اور طوفان۔ اس طوفان میں اب کون آئے گا؟
شانتا :میں نے ونود سے کہا تھا۔
ماں :ونود کیوں ہمارے گھر آنے لگا۔ ونود کیوں کسی غریب بہن سے راکھی بندھوائے گا۔ شانتا تم نے ونود سے کب کہا تھا؟
شانتا :صبح ہی۔ ابھی وہ پوجا پاٹ سے فارغ ہوا تھا کہ اس کی بہن نے اس کے راکھی باندھ دی تھی اور اس نے اسے ایک پونڈ دیا تھا سچ مچ کا پونڈ سونے کاپونڈ۔ جب میں ونود کے گھر گئی تو اس وقت وہ ہنس ہنس کر اپنی بہن سے باتیں کر رہا تھا۔ لال چندن کا تلک اس کے ماتھے پرتھا۔ بال پانی سے بھیگے ہوئے تھے۔ ہاتھوں پر سنہری تاروں سے گندھی ہوئی راکھی۔ میں نے اس سے کہا بھیا راکھی بندھوا لو(آبدیدہ ہو کر) اس نے کہا شانتا تم گھر چلو میں ابھی چلا آتا ہوں۔ اب ساڑھے آٹھ بجے ہیں۔ ۔ ۔ رات ہو گئی۔
ماں :رات اور طوفان۔
(شانتا سسکیاں لیتی ہے۔ )
ماں :رو نہیں بیٹی۔ ادھر آ میرے پاس۔ اگر اس وقت تیرا بھائی ہوتا میرا پیارا چاند!ہائے برا ہو ان ڈاکوؤں کاجو میرے چاند کو اٹھا کر لے گئے۔ (کھڑکا) کون ہو؟
شانتا :ونود!؟
(بلی کا بولنا۔ )
کانتا : (کمرے کا دروازہ کھول کر)نہیں بلی ہے۔ بارش سے پناہ مانگ رہی ہے۔
(میاؤں میاؤں۔ )
ماں :کانتا اسے اندر لے آ۔
کانتا :لیکن ہم اسے کھلائیں گے کیا۔ گھر میں تواب کچھ بھی نہیں۔
ماں :صبح کی ایک روٹی بچی تھی۔
شانتا : (شرمسار ہو کر)مجھے بھوک لگی تھی ماں، میں نے کھالی۔
(میاؤں میاؤں۔ )
ماں :اگر تمہارے پتا اس وقت زندہ ہوتے۔ ۔ ۔
کانتا : (طنز سے)اگر ۔
ماں :کیا کہا؟
کانتا :کچھ نہیں۔
ماں :کچھ تو کہا بیٹی۔ اندھی ماں کونہ بتاؤ گی؟
کانتا : (چڑ کر) کچھ کہا ہو تو بتاؤں۔ تمہارے کان تو جیسے ہوا میں ہر وقت کسی کی آواز کو سنتے رہتے ہیں۔
ماں :لیکن مجھے وہ آواز کبھی نہیں سنائی دیتی۔ جب میرا پیارا چاند مجھے کہا کرتا تھا ماں۔ ماں۔ مجھے بھوک لگی ہے۔ ماں مجھے ماسٹر نے مارا ہے۔ ماں مجھے پیشہ دو۔ اس کا وہ گورا گورا ہر وقت ہنستا ہوا چہرہ۔
کانتا : (ناراضگی سے) ماں۔
ماں : (ان سنی کر کے)جب وہ ہنستا تھا تو اس کے داہنے گال پر ایک عجیب خم سا پڑتا تھا؟جو مجھے بہت بھلا معلوم ہوتا تھا اور جب ہمیں اس کے بال سنوار کر اسے ٹوپی پہناتی تھی۔ اس وقت میں اندھی نہ تھی بیٹا!
کانتا :ماں !!
ماں :ایک دن وہ سکول سے دوڑتا دوڑتا گھر پہنچا کہنے لگا ماں آج قصبہ میں جگہ جگہ اشتہار لگے ہوئے ہیں۔ کہ آج یہاں ڈا کہ پڑے گا۔ قصبے کے سب لوگ پریشان ہو رہے ہیں۔ ماسٹر جی نے ہمیں جلد چھٹی دے دی ہے۔ پھر کچھ دیر کے بعد چاند کے پتا جی بھی آ گئے۔ انھوں نے بھی یہی بات سنائی۔ وہ دن ہم نے جس پریشانی میں گزارا۔ ۔ ۔ تم تو اس وقت پیدا ہی نہ ہوئی تھیں۔ اچھا ہوا۔ ورنہ ڈاکو تمہیں بھی اٹھا لے جاتے اور پھر وہ رات۔ وہ کالی بھیانک رات۔
کانتا :ماں !!
ماں : (چیخ کر)میرا آٹھ سال کا بچہ۔ پلا پلایا۔ میرا لاڈلا۔ اکلوتا چاند۔ ہائے وہ سب کچھ لے گئے تھے۔ لیکن میرے بچے کو تو نہ لے جاتے۔ میں نے ان کے آگے ہاتھ جوڑے۔ اپنے بال کھول کران کے پاؤں پر دھرے لیکن انھوں نے ایک نہ سنی۔ کہتے تھے۔ کہ ایک مہینہ کے اندر پانچ ہزار روپئے ادا کر دو گے۔ تو تمہارا چاند تمہیں واپس مل جائے گا۔ میری ان آنکھوں کے سامنے وہ میرے لال کو اٹھا کر لے گئے تھے۔ تمہارے پتا رسیوں سے جکڑے ہوئے چارپائی پر پڑے تھے۔ چاند چلا رہا تھا۔ ایک ڈاکو نے اسی کے منہ پر زور سے طمانچہ مارا اور اس کے لبوں سے خون کی دھار پھوٹ کر بہنے لگی۔ وہ میرے سامنے میرے لال کولے گئے۔ کاش میں جنم اندھی ہی پیدا ہوتی۔ ۔ ۔ یوں کڑ کڑ کر میرے نصیبوں میں لکھا تھا۔ تمہارے پتا جی اسی سوچ میں گھل گھل کر مر گئے۔ کہ کہیں سے پانچ ہزار روپیہ اکھٹا نہ ہوا۔
(بادل کی گرج۔ بارش کی آواز تیز ہو جاتی ہے۔ )
کھڑی کی بند کر دو کانتا ہوا کے تیز فراٹے میرے رخساروں کو جیسے چیر رہے ہیں۔
شانتا :شانتا بہن کھڑکی کھلی رہنے دو۔ شاید ونود بھیا آتے ہوں کھڑکی بند دیکھ کر واپس چلے جائیں گے۔
کانتا : (دور سے کھڑکی کے قریب جا کر سر باہر نکالتے ہوئے) کوئی بھی نہیں آ رہا۔ گلی سنسان پڑی ہے۔ چورا ہے پر پولیس کا سپاہی جیپ کے نیچے کھڑا بارش میں بھیگ رہا ہے۔ اب کون آئے گا شانتا بہن تم نے ایک ونود سے کہا تو میں نے کتنوں سے کہا رام بھروسے سے شنکر لال سے ودیا ناتھ سے لیکن سبھی ٹال گئے سبھی کہتے تھے گھر آ کر بندھوائیں گے دیکھو کوئی اس وقت پہنچا؟کون آئے گا؟کسے ضرورت ہے کہ غریب بہنوں کا بھائی بنے۔ مفت کا خرچ اور پھر ہماری راکھی بھی کیا ہے ؟ کچے سوت کا لال دھاگا جس میں نہ زری کے تار نہ موتیوں کی جھلک۔ نہ ریشم کے مسکراتے ہوئے پھول۔ ہماری راکھی بھی ہماری زندگیوں کی طرح پھیکی۔ اداس اور بے رنگ و بو ہے۔ اس راکھی کو کون پسند کرے گا؟ تم ونود پر آس لگائے بیٹھی رہو۔ میں کھڑکی بند کئے دیتی ہوں۔
کانتا : (طنز سے) تو جا کر اس پولیس مین کے راکھی باندھ آؤ جو چورا ہے پر کھڑا ہے۔
ماں :ناحق غصہ کرتی ہو کانتا بیٹی۔
شانتا :آج تمہیں کیا ہوا ہے ؟
کانتا :تمہارے ونود بھیا جو ابھی آ رہے ہیں۔ ہاہاہاہا۔ ونود بھیا۔
ماں :کانتا!کانتا!!
کانتا : (بلند آواز میں) تومیں کیا کروں ؟جیسے میں نے پنڈت بنارسی داس کے بیٹے کو کہا ہی نہیں۔ جیسے میں چترویدی جی کے لڑکے سے ہاتھ جوڑ کر التجا نہیں کی کہ آئے اور ہم سے راکھی بندھوا جائے لیکن کوئی آئے بھی تو۔ اس گھر میں کون آئے گا اور کوئی یہاں آئے بھی کیوں ؟راکھی بندھوا کر اسے کون سی دکشنا مل جاتی۔ یہی سوکھی ہوئی روٹی اور باسی دال اور اب تو یہ گھر بھی ہمارا نہ رہے گا۔ میں نے تمہیں بتایا نہیں کہ مالک مکان آج دوپہر کو مجھے گھر سے باہر ملا تھا۔ کہہ رہا تھا آج تیسرا مہینہ شروع ہو گیا ہے۔ لیکن کرایہ ابھی تک نہیں پہنچا۔ کہتا تھا اگر ایک مہینہ تک کرایہ ادانہ کیا تو اس مکان سے باہر نکلنا ہو گا۔
ماں :ہے بھگوان۔ ان لوگوں کا خون کس قدر سفید ہو گیا ہے لیکن سبھی لوگ تو ایسے نہیں ہوتے۔ سبھی لوگوں کے دل تو ایسے کٹھور نہیں ہوتے۔ راکھی کی کتھا میں شرون کمار کا بھی برنن ہے۔ شرون کمار بھی تو ایک براہمن کے بیٹے تھے۔ لیکن انھوں نے اپنے اندھے ماں باپ کی کتنی سیوا کی دن رات انہیں ڈولی میں اٹھائے کاندھوں پر اٹھائے پھرے اور سارے بھارت ورش کی جاترا کرا دی۔ یہی شرون کمار جینتی کا دن ہے اور آج کوئی غریب بہن کو راکھی بھی نہیں باندھنے دیتا کہ شاید مرجادا کا پالن کرنا پڑے۔ آج راکھی کا پوتر تہوار ہے اور اشنان اور پوجا پاٹ کے بعد وید منتروں کا اچارن اور ہون کے ساتھ لوگ پرانے جنیو بدلتے ہیں۔ گویا زندگی کا ایک نیا چولا، نیا روپ بدلتے ہیں اور میری بچی کی کوئی راکھی قبول نہیں کرتا۔
کانتا : (تلخی سے)یہ بھی تو ایک نیا روپ ہے۔
شانتا :ماں۔ کیوں اپنے جی کا ہلکان کرتی ہو کانتا تو بھی کیوں کچوکے پر کچو کے دئے جاتی ہے۔ ماں !!ا س جی جلانے سے کیا حاصل؟ اب سو جاؤ۔
ماں :میں سوتی رہوں یا جاگتی رہوں۔ میرے سونے اور جاگنے میں فرق ہی کیا ہے۔ میرے لئے توکل دنیا اسی دن ایک کالی رات بن گئی تھی جس دن میرا لال مجھ سے چھینا گیا تھا۔ پھر جب پتی مر گئے تو زندگی کی آخری کرن بھی غائب ہو گئی۔ میرے لئے تو اس جنم میں اندھیارا ہی اندھیارا ہے۔ یہ وہ کالی رات ہے بیٹی جس کی کوئی صبح نہیں۔ وہ درد ہے جس کی کوئی دوا نہیں۔ وہ دکھ ساگر ہے جس کا کوئی کنارہ نہیں۔ (ہوا کا جھونکا روزنوں میں گزر کر ایک دردناک سیٹی پیدا کرتا ہوا گزرتا ہے) یہ کس نے آواز دی؟
شانتا :کوئی نہیں ہے ماں۔ گلی بالکل خالی ہے۔ یہ ہوا روزنوں میں سے آواز پیدا کرتی ہوئی گزر رہی ہے۔
کانتا :سو جاؤ ماں اور اپنے ان گیلے رخساروں کو پونچھ ڈالو۔ اٹھو ماں۔
ماں :بہت اچھا بیٹی۔ بہت اچھا بیٹی۔ چلو مجھے اوپر سونے کے کمرے میں لے چلو۔
(فرش پر لکڑی ٹیکنے کی آواز۔ قدموں کی آواز۔ )
(کانتا گنگناتی ہے اور پھر آہستہ آہستہ پر سوز لے میں گاتی ہے۔ )

نیر بھرے نینن کی پنچھی
کس بدھ پیاس بجھاؤں
من کی بنسیا ٹوٹ چکی
اب کیسے اسے بجاؤں
چھوٹی سی نینن کی نیا
بیچ سمایو ساگر
پلکوں کے پتوار لگا کر
کس بدھ پار لگاؤں
پنچھی کس بدھ پیاس بجھاؤں
ہردے میں دکھ درد بہت ہے
گھاؤ بہت ہیں پیڑ بہت ہے
پھر بھی یہ سونی ہے بستی
کیسے اسے بساؤں
پنچھی کس بدھ پیاس بجھاؤں
پنچھی۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔
شانتا :کانتا بہن تم رو رہی ہو۔
کانتا : (کھڑکی کھول کر) مہینہ تھم گیا ہے۔
(دروازے پر دستک)
کانتا :تمہارے بھیا ونود ہوں گے۔
شانتا :نہیں پنڈت ودیا ناتھ ہوں گے۔
آواز :دروازہ کھولو۔
(دروازہ کھولنے کی آواز)
کانتا :اخاہ، آپ ہیں۔ تشریف رکھئے۔ کہئے اس وقت کیسے آنا ہوا؟غالباً آپ راکھی بندھوانے کے لئے آئے ہیں۔ ذرا ٹھہرئیے میں ابھی لال رنگ کا دھاگا لائی۔
مالک مکان :میں۔ ۔ ۔ ار۔ ۔ ۔ میں۔ ۔ ۔ راکھی۔ ۔ ۔ اور ۔ ۔ ۔ میں حاضر ہوا تھا یہ کہنے کے لئے کہ آپ نے تین ماہ کا کرایہ ادا نہیں کیا ہے۔ ۔ ۔ میں ار۔ ۔ ۔ ار۔ ۔ ۔ راکھی نہیں بندھواؤں گا میں تو کبھی کا بندھوا چکا ہوں۔ بات یہ ہے کہ اگر آپ نے پرسوں تک کرایہ ادانہ کیا تو آپ کو اس مکان سے نکلنا ہو گا۔
کانتا :اچھا یہ بات ہے۔ آج صبح ایک ہفتہ کی میعاد ملی تھی۔ اب دو دن رہ گئے۔ شریمان جی آج راکھی کے دن بھی آپ کو ایسی بات کرتے ہوئے شرم نہیں آئی۔ ٹھہرئیے میں لائی لال سوت لاتی ہوں۔
مالک مکان :ار۔ ار۔ نہیں نہیں میں یہی کہنے کے لئے حاضر ہوا تھا۔ اب میں چلتا ہوں۔ مجھے ضروری کام ہے۔
(دروازہ زور سے بند ہو جاتا ہے۔ )
(وقفہ)
شانتا :گیا!
کانتا :نہیں سمجھو سر پر ایک اور مصیبت آئی۔
شانتا :اب کیا ہو گا۔ ۔ ۔ (وقفہ)۔ ۔ ۔ کانتا بہن۔ ۔ ۔ وقفہ۔ ۔ ۔ کانتا بہن! یہ تم کھڑکی میں کھڑی کسے دیکھ رہی ہو؟
کانتا :اپنے آنے والے دنوں کو۔
شانتا :میں نے جو بستر کی چادر کاڑھ کر دی تھی اس کے مجھے صرف آٹھ آنے ملے ہیں۔
کانتا :دو روپیہ کرایہ کے لئے میں نے بھی بچا رکھے ہیں۔
شانتا :یہ تو اڑھائی روپئے ہوئے۔ ابھی چھ روپئے اور چاہئیں۔
کانتا :ہاں چھ روپئے اور چاہئیں۔
شانتا :اب کیا ہو گا!پرسوں تک چھ روپے کہاں سے آئیں گے ؟مجھے تو کوئی امید نظر نہیں آتی۔ چاروں طرف اندھیارہ ہی اندھیارہ دکھائی دیتا ہے۔
کانتا : (طنز سے) ماں کی اندھی آنکھوں کی طرح؟
شانتا :کانتا بہن تم مذاق کرتی ہو بے ہودہ مذاق۔ مجھے تمہاری یہ عادت مطلق پسند نہیں۔ اپنی ماں کے متعلق یہ الفاظ؟تمہیں کیا ہو گیا ہے۔ میں تو پوچھتی ہوں کہ یہ چھ روپئے ہم پرسوں تک کہاں سے لائیں گے۔
کانتا :سوچو!دماغ پر زور دو۔
شانتا :مجھے تو کچھ نہیں سوجھتا۔
کانتا :جب سب دروازے بند ہو جائیں اس وقت بھی عورت کے لئے ایک دروازہ ہمیشہ کے لئے کھلا رہتا ہے۔
شانتا :تم کیا کہہ رہی ہو؟
کانتا :اس دنیا میں مرد مالک ہیں اور عورتیں غلام۔ مرد خریدار ہوتے ہیں اور عورتیں جنس خرید۔ مرد کتے ہیں اور عورتیں ہڈیاں۔ مرد راکھی بندھوانا پسند نہیں کرتے۔ وہ راکھی توڑنا پسند کرتے ہیں۔
شانتا :کانتا بہن تمہیں کیا ہو گیا ہے۔ تمہیں کیا ہو گیا ہے ؟
کانتا :سنو۔ اس کھڑکی کے ایک دوسری کھڑکی ہے۔ اس میں سے ایک اوباش مزاج نوجوان مجھے اکثر گھورا کرتا ہے۔ وہ ایک لحاظ سے خوبصورت بھی ہے ور دولت مند بھی اور پھر اس مکان کے نیچے گیرج میں اس کی ایک موٹر بھی ہے۔ اس نے کئی بار مجھے پریم پتر لکھے ہیں لیکن میں نے کبھی کسی کا جواب نہیں دیا۔ مجھے اس کی کھڑکی میں سے ابھی تک روشنی نظر آ رہی ہے۔
شانتا :کانتا بہن کھڑکی بند کر لو۔
کانتا :تمہاری سب آشائیں پوری ہو سکتی ہیں۔ سبھی۔ ۔ ۔ چھ روپئے نہیں سینکڑوں روپئے۔ ہزاروں روپئے بولو۔
شانتا :کانتا بہن کھڑکی بند کر دو۔ ۔ ۔ کھڑکی سے پرے ہٹ جاؤ نہیں مجھے خود ہی اسے بند کرنا ہو گا۔
(کھڑکی بند ہونے کی آواز)
کانتا :تم نے کھڑکی بند کر دی۔ بھولی شانتا لیکن میں اس کھڑکی سے باہر تو نہ کود سکتی تھی۔ میں تو جب جاؤں گی سامنے کا دروازہ کھول کر جاؤں گی۔
(فرش پر چلنے کی آواز۔ )
(فرش پر تیز تیز قدموں سے بھاگنے کی آواز کسی جسم کے دروازے سے زور سے لگنے کی آواز۔ )
کانتا :ہٹو مجھے جانے دو۔
شانتا :نہیں، میں نہیں جانے دوں گی۔
کانتا :دروازہ کھول دو۔
شانتا :نہیں میں دروازہ کبھی نہیں کھولوں گی۔
کانتا :میں کہتی ہوں دروازہ کھول دو، دروازہ کھول دو۔
شانتا :نہیں، نہیں۔ کبھی میں۔
کانتا :معلوم ہوتا ہے۔ تم ایسے نہیں ہٹو گی۔
(کشمکش کی آواز۔ شانتا کے منہ سے ایک بلند چیخ نکلتا ہے لیکن کانتا فوراً ہی اس کے منہ پر ہاتھ رکھ دیتی ہے۔)
(وقفہ)
(دروازہ پر دستک۔ زور زور سے دستک)
(وقفہ)
آواز :دروازہ کھولو۔
(وقفہ)
کانتا : (سرگوشی سے) دروازہ کھول دو۔ اب تو۔
(دروازہ کھلنے کی آواز)
(ایک اجنبی اندر داخل ہوتا ہے۔ )
اجنبی :اوہ میں سمجھا۔ کوئی خون خرابہ ہو رہا ہے۔ میں باہر سے گزر رہا تھا کہ میں نے ایک چیخ سنی۔
کانتا :چیخ یا قہقہہ؟
اجنبی :کچھ سمجھ لو بہن۔ لیکن مجھے تو چیخ ہی سنائی دی۔
شانتا :بیٹھ جائیے۔ تشریف رکھئے۔
اجنبی :شکریہ۔ (وقفہ)کیا آپ دونوں بہنیں یہاں اکیلی رہتی ہیں ؟
کانتا :یہ آپ نے کیسے جانا کہ ہم دونوں بہنیں ہیں ؟
اجنبی : (ہنستے ہوئے) آپ کے چہروں سے۔
شانتا :جی ہاں ہم اپنی ماتا جی کے ساتھ یہاں رہتی ہیں۔
اجنبی :اگر آپ برا نہ مانیں۔ پوچھوں کہ جھگڑا کس بات پر ہو رہا تھا؟
کانتا :راکھی تیوہار پر۔
اجنبی :اچھا آج راکھی ہے۔
کانتا :آپ کو معلوم نہیں ؟
اجنبی :میں بہت مدت سے سفر میں ہوں اس جگہ ابھی ابھی وارد ہوا ہوں۔ سفر میں آدمی بہت سی باتیں بھول جاتا ہے۔ ۔ ۔ اچھا تو پھر کیا ہوا؟
کانتا :یہ کانتا کہہ رہی تھی کہ راکھی کا تیوہار اچھا ہے، اور میں کہہ رہی تھی کہ مجھے اتنا پسند نہیں۔ شاید اس کی ایک وجہ یہ بھی تھی کہ ہم دونوں بہنوں کو آج بہت مایوسی ہوئی ہے۔ آپ دیکھئے ہمارا کوئی بھائی نہیں۔
کانتا : اور میں بہن شانتا سے کہہ رہی تھی کہ دروازہ کھول دے سامنے کے مکان۔ ۔ ۔
شانتا :خاموش کانتا!۔ ۔ ۔ تو کیسی بچوں کی سی باتیں کرتی ہے۔ (وقفہ)ہوں۔ یہ بات ہے۔
(وقفہ)
اجنبی :کانتا لاؤ۔ تم۔ مجھے راکھی باندھ دو اور شانتا بہن تم بھی!
کانتا :کیا آپ راکھی بندھوائیں گے سچ مچ؟
شانتا :لیکن آپ تو پردیس میں ہیں۔
اجنبی :پردیسی بھی بھائی بن سکتے ہیں۔ بہن۔
کانتا :میں ابھی لال دھاگا لائی۔
شانتا :آپ کا نام کیا ہے ؟
اجنبی :مجھے اجے کمار کہتے ہیں۔
کانتا :لیجئے ہاتھ بڑھائیے۔ شانتا تم بھی۔ ۔ ۔ دوسری کلائی پر۔
شانتا :اجے بھیا۔
(سیڑھیوں سے اترنے کی آواز)
شانتا :یہ کیا؟پونڈ!سچ مچ کے پونڈ۔ ۔ ۔ سونے کے پونڈ۔
اجنبی :غریب بھائی کی طرف سے یہ نذر قبول ہو۔
(لکڑی ٹیکنے کی آواز قریب ہو جاتی ہے۔ )
شانتا : (سرگوشی سے) ماں جی ہمیں۔
ماں :کون ہے !یہ کیا جھگڑا ہو رہا ہے ؟
شانتا : (سرگوشی سے) آپ ٹکٹکی لگائے ان کی آنکھوں کی طرف کیوں تک رہے ہیں ؟انہیں کچھ دکھائی نہیں دیتا۔
کانتا :ہم راکھی باندھ رہے تھے اور شانتا خوشی سے ناچ رہی تھی۔
ماں :کیا ونود آ گئے ؟
شانتا :نہیں ماں۔ یہ اجے بھیا ہیں (سرگوشی میں) ماتا جی کو پرنام کرو۔
اجنبی :ماتا جی پرنام۔
ماں :جیتے رہو بیٹا۔ تم کون ہو؟ ادھر کیسے آئے ؟
اجنبی :جی میں باہر سے گزر رہا تھا۔ اس کمرے میں ان دونوں بہنوں کے جھگڑنے کی آواز سنی۔ دروازے پر دستک دی اور (ہنس کر) اندر چلا آیا۔ یہاں ان دونوں شریر لڑکیوں نے مجھے راکھی سے باندھ دیا۔
ماں :بہنیں ہیں بیٹا یہ تمہاری بہنیں۔ اس عمر میں راکھی باندھنے کی بہت چاہ ہوتی ہے۔ اچھا بیٹا تم اس شہر میں کیسے آ رہے ہو؟
اجنبی :یونہی ڈھونڈتا ہوا آ رہا ہوں۔ کھوج نکالنے کے لئے نکلا ہوں۔
ماں :کسے ڈھونڈ رہے ہو بیٹا؟
اجنبی :اپنے ماں باپ کو، مدت ہوئی مظفر گڑھ سے مجھے ڈاکو اٹھا لے گئے تھے، بہت مدت تک ان کے ساتھ رہا۔ پھر ایک دن ان کے چنگل سے نکل بھاگا۔ بمبئی جا کر ملازمت اختیار کر لی۔ پھر ماں باپ کا پتہ لگانے نکلا۔ مظفر گڑھ گیا۔ معلوم ہوا!پتا جی کا انتقال ہو گیا ہے پھر اس شہر کا کسی نے پتہ دیا۔ اور میں ادھر سے۔ ۔ ۔
ماں : (اٹھ کر کھڑی ہو جاتی ہے، لکڑی زمین پر گر جاتی ہے۔ )ادھر آؤ بیٹا اجے کمار، ذرا میرے قریب آؤ۔ میں تمہیں اپنی اندھی آنکھوں سے دیکھنا چاہتی ہوں۔ (قدموں کی آواز) اور قریب آؤ بیٹا۔ تمہارا چہرہ کہاں ہے ؟کہاں ہو تم اجے کمار بیٹا۔ یہ آنکھیں تمہیں پہچان نہیں سکتیں۔ لیکن ماں کی انگلیاں تمہیں پہچان لیں گی۔ ہاں یہ وہی ناک ہے وہی ہونٹ یہ کان کے پاس وہی تل میرے لال میرے چاند۔ میری چھاتی سے لگ جاؤ بیٹا۔ تم نے مجھے بہت دکھ دیا ہے۔
(سسکیوں کی آواز۔ )
اجنبی :ماں !
کانتا، شانتا :بھیا!
ماں :ہاں ہاں وہی توہے تمہارا چاند۔ وہی گھنگرالے بال ہیں جن میں کنگھی کر کے تمہیں ٹوپی پہنایا کرتی تھی۔ وہی ابرو اور یہاں زخم کا نشان، بیٹا مجھے اچھی طرح پکڑ لو۔ مجھے گرنے نہ دینا اپنے طاقتور بازوؤں کا سہارا دو۔ میرے چاند۔ میری اندھی آنکھوں کے روشن ستارے۔ میری اجڑی زندگی کے اجیارے۔ ۔ ۔
اجنبی :ماں۔
(پردہ)
***
ماخذ: ’’دروازہ‘‘
آزاد بک ڈپو
پالبازار، امرتسر
 
کرشن چندر
بیکاری

پہلی بار:لا ہور۔ اکتوبر۱۹۳۷ء؁
ڈرامے کے افراد اور اداکار
بھیا لال:کنہیا لال
شیام سندر:کے۔ سی
اظہر:چتر بھج
سپاہی:چودھری
(ہندو ہوسٹل میں ۴۴ نمبر کا کمرہ گندہ، خاک آلودہ، دوچار پائیوں پر میلے بستر، ایک میز پر بہت سی کتابیں، سگریٹوں کا ڈبہ، قلمدان اور تھوڑی سی نقدی۔ ایک چارپائی پر شیام سندر بال بکھیرے غمگین صورت بنائے بیٹھا ہے اور سگریٹ کے کش لگا کر دھوئیں کے مرغولے سے ہوا میں چھوڑ رہا ہے۔ یکایک دروازے سے بھیا لال داخل ہوتا ہے۔ لمبا، دبلا، پتلا، جوان ہے۔ گال اندر پچکے ہوئے، زرد رو، ایم اے پاس)
بھیا لال : (چارپائی پر بیٹھ کر) آج وہ بدلہ لیا کہ ساری عمر یاد رکھے ہی رکھے گی۔ یہ اونچے طبقے کے لوگ نہ جانے ہمیں کیوں کیڑوں مکوڑوں سے بھی بدتر خیال کرتے ہیں۔
شیام سندر : (ایک حزیں مسکراہٹ کے ساتھ) کیا بات ہوئی؟ کس سے بدلہ لیا؟ وہ بدقسمت کون ہے ؟
بھیا لال :وہی توہے ڈاکٹر گھنشیام لال کی بیوی جمنا۔ اوہ مگر تم اسے نہیں جانتے۔ موٹی سانولی سی ہے۔ دو بچے ہو جانے پربھی ایف اے میں پڑھتی ہے۔ میں آج تین مہینے سے اسے تواریخ پڑھا رہا ہوں۔ سمجھ میں نہیں آتا کہ عورتوں کو تواریخ کی کیا ضرورت ہے۔ انہیں تو چاہئے چولہا چاہئے۔ خیر ہمیں تو اپنے پیسوں سے کام ہے۔ دو گھنٹے پڑھاتا ہوں۔ پندرہ روپئے ملتے ہیں۔
شیام سندر :غنیمت جانو۔
بھیا لال : (ایک نقلی آہ بھرکر) ٹھیک ہے مگر ۔ ۔ ۔ میری شکل و صورت میں اسی بارے میں تم سے مشورہ کرنے آیا تھا کہ۔ ۔ ۔
شیام سندر : (بات کاٹ کر)مگر تم سے کس مسخرے نے کہہ دیا کہ میں حسن کا جراح ہوں۔
بھیا لال : (بات ان سنی کر کے)ا وہ!میں اپنی صورت کو کیا کہوں۔ میرا رنگ قدرتی طور پر زرد ہے۔ جس سے ہر شخص کو مجھ پر تپ دق کا مریض ہونے کا شبہ ہوتا ہے۔ اب بتاؤ میں کیا کروں۔ جس دن سنڈے ٹائمز میں اشتہار دیکھا اسی دن عرضی لے کر ڈاکٹر گھنشیام لال کے پاس چلا گیا۔ وہ تو وہاں نہیں تھا اور آخر پڑھنا بھی تو اس کی بیوی ہی کو تھا۔ مجھے دیکھتے ہی گھبرا گئی۔ کہنے لگی آپ کچھ بیمار تو نہیں رہتے اور یہ اس نے کچھ ایسے ہمدردانہ لہجہ میں پوچھا کہ مجھ سے انکار نہ ہو سکا۔ جھوٹ موٹ کہ دیا ’’جی ہاں ‘‘ وہ اس پر کچھ گھبرا سی گئی۔ رکتے رکتے بولی ’’اوہ۔ ۔ ۔ آپ۔ ۔ ۔ آپ کو کیا بیماری تھی۔ میں نے ایک قدم اس کے قریب بڑھ کر کہا ’’تب۔ محرقہ۔ ٹائیفائیڈ‘‘ وہ یہ سن کر دو قدم پیچھے ہٹ گئی۔ کہنے لگی ’’تب محرقہ؟‘‘ گویا اسے اب بھی یقین نہیں آتا تھا کہ میرے جیسا متین صورت بھی کبھی تب محرقہ میں مبتلا ہو سکتا ہے۔ میں نے سوچا بچاری نہایت ہمدرد اور غریب نواز معلوم ہوتی ہے۔ آؤ لگے ہاتھوں اس کا فائدہ اٹھا لیں۔ چنانچہ میں نے اور بھی مسکین بن کر کہا جی ہاں ٹائیفائیڈ۔ پچھلے چار مہینے بستر پر پڑا رہا ہوں۔ اب کہیں جا کر افاقہ ہوا ہے۔ آپ کا اشتہار پڑھا کہ آپ کو ایک استاد کی ضرورت ہے جو دو گھنٹے روزانہ تواریخ کا درس دے سکے۔ اسی لئے حاضر ہوا ہوں۔ فیس وغیرہ طے کر لیجئے یہ رہے سرٹیفکٹ۔ باقی رہی ذہنی قابلیت تو اس کے لئے میرا صرف یہ ہی کہہ دینا مگر وہ جلد ہی یبچ میں بول اٹھی ’’نہیں نہیں ‘‘ اس نے مجھے پریشان نگاہوں سے مجھے دیکھتے ہوئے کہا۔ اتنی جلدی کیا پڑی ہے۔ آپ کو کم از کم دو تین ہفتے آرام کرنا چاہئے۔ آپ۔ ۔ ۔ آپ دو تین ہفتوں کے بعد ضرور تشریف لائیے۔ اے یار خیال یار کیا کرنا تھا اور کیا کر دیا تھا۔ ۔ ۔ میں نے اپنے آپ کو بہت بہت کوسا۔ مگر اب لکیر پیٹنے سے کیا ہوتا تھا۔ ناچار واپس چلا آیا اور پھر دوسرے دن ڈاکٹر گھنشیام لال کے ایک جگری دوست سے سفارش بہم پہنچائی۔
’’مگر وہ تو بیمار معلوم ہوتے تھے۔ ڈاکٹر کی بیوی نے سفارش کے جواب میں کہا۔ انھوں نے مجھے خود بتایا کہ انہیں تب محرقہ تھا۔ ‘‘
میری سفارش کرنے والے نے ہنس کر کہا۔ میں نے اسے آج تک کبھی بیما رہی نہیں دیکھا۔ اس بچارے کی شکل ہی ایسی ہے۔ ۔ ۔ اور یہ ہے بھی ٹھیک۔ ۔ ۔ میں اسے مدت سے جانتا ہوں۔ یہ بھی ٹھیک تھا۔ ۔ ۔
تواب تین مہینے سے اسے پڑھا رہا ہوں۔ بالکل کوڑ مغز ہے۔ دل میں مدت سے کسک تھی کہ اس سے بدلہ لوں۔ سو آج موقع مل گیا۔
شیام سندر :کیا ہوا؟
بھیا لال : (جیسے اس نے سوال سنا ہی نہیں) یوں تو اس میں اب مجھے بھی کچھ شک نہیں کہ صورت سے میں تپدق کا مریض دکھائی دیتا ہوں مگر کیا تم نے وہ انگریزی ضرب المثل نہیں سنی۔ کہ صورتیں اکثر دھوکا دیتی ہیں مجھے اچھی طرح یاد ہے کہ جب میں پانچویں جماعت میں تھا اس وقت بھی ایسا ہی دبلا پتلا تھا ا ور جماعت میں ہمیشہ ہر مضمون میں اول رہا کرتا تھا۔ چنانچہ حسب عادت پانچویں جماعت میں بھی اول ہی رہا۔ جب سالانہ جلسہ پر انعام تقسیم ہونے لگے تو میرے حصہ میں بہت سے انعام آئے۔ ان دنوں میں میری جماعت میں ایک اور لڑکا بشنداس بھی پڑھا کرتا تھا۔ نہایت ہی خوبصورت وجیہہ توانا تھا۔ نہایت اچھا گلا پایا تھا۔ کمبخت نے اسے بھی موسیقی میں اول رہنے پر تمغہ ملا۔ مجھے یاد ہے وہ مجھے تپقی کہا کرتا تھا۔ اس دن جلسہ پر اس کی خوبصورت بہنیں بھی آئی ہوئی تھیں اور میری دبلی پتلی بہنیں بھی اور جب میں بہت سے انعام سمیٹ کر لے گیا تو بشنداس کی بہنوں نے میری بہنوں کو اونچی آواز میں سنا کر کہا آہ بچارا بھیا لال۔ یہ سب انعام اس کے کس کام کے جب کہ اس کو تپدق ہے۔ مجھے یاد ہے میری بہنوں نے بہت برا مانا تھا۔ مگر قسمت کی ستم ظریفی ملاحظہ ہو میں ابھی تک زندہ سلامت ہوں اور بچارا شکیل و توانا بشنداس دو سال ہوئے تپدق سے بیمار ہو کر چل بسا۔ آہ صورتیں کس قدر دھوکا دیتی ہیں۔ وہ بہت اچھا آدمی تھا اور جب کبھی میں پچھلے سالوں میں اپنے گاؤں گیا ہوں۔ وہ ہمیشہ مجھ سے میری صحت، میری کھانسی، میری حرارت عزیزی کے متعلق سوال کیا کرتا تھا اور یہ سوال توہر الو کا پٹھا جو مجھے دیکھ لے ایک دم سے جڑ دیتا ہے۔ مثلاً اگر میں کسی ڈاکٹر کے پاس چلا جاؤں اور اس سے کہوں کہ مجھے خفیف سی کھانسی آتی ہے۔ تو وہ میری شکل دیکھ کر بے اختیار کہہ اٹھتا ہے :
’’آپ کورات کو پسینہ تو نہیں آتا؟‘‘
’’جی نہیں۔ البتہ دن کو ضرور آتا ہے۔ خصوصاً جبکہ ورزش کرتا ہوں۔ ‘‘
’’کیا آپ کو کھانسی کے ساتھ خون بھی آتا ہے ؟‘‘
’’نہیں جی۔ خون تو نہیں۔ مگر بلغم ضرور نکلتا ہے۔ ‘‘
’’اوہ۔ ۔ ۔ بخار؟‘‘
’’ابھی تک تو نہیں۔ ۔ ۔ لیکن اگر آپ کے سوالوں کی یہی رفتار رہی تو عین ممکن ہے کہ جلدی۔ ۔ ۔ ‘‘
ڈاکٹر(قطع کلام کر کے) آپ کمرے سے باہر تشریف لے جائیں۔
بس تقریباً جس ڈاکٹر کے پاس جاؤ یہی ہوتا ہے۔ اب میں صلاح کر رہا ہوں کہ ڈاکٹر یار محمد سے اپنی چھاتی اور پھیپھڑوں کا ایکس رے فوٹو گراف لے کر ہمیشہ پاس رکھوں۔ تا کہ جب کوئی نیا ڈاکٹر یا پرانا حکیم سوال کرے آپ کو پسینہ تو نہیں آتا؟خون نکلتا ہے ؟ بخار کب سے ؟ تو جھٹ یہی ایکسرے فوٹو اس کے ہاتھ میں دے دوں اور کہوں۔ بھلے مانس کل میں نے ذرا آچار زیادہ کھا لیا تھا اس لئے صرف کھانسی کی دوا چاہئے۔
شیام سندر :نیک خیال ہے۔
بھیا لال :بچارے ڈاکٹر لوگ تو الگ رہے۔ خود میرے استاد۔ ۔ ۔ کیا کہوں ؟۔ ۔ ۔ بہت دنوں کی بات ہے۔ میں ان دنوں نئی نئی ورزشیں سیکھ رہا تھا۔ چاہتا تھا کہ اپنے نحیف جسم کو فربہ بنا لوں اور چہرے کی زرد رنگت کو گلاب کی سرخی میں تبدیل کر دوں چنانچہ خوب ڈنڈ پیلتا تھا اور دودھ پیتا تھا۔ تین چار مہینے یہی کیفیت رہی۔ اس کے بعد ہمارا جغرافیہ کا ٹیچر جو ساڑھے تین مہینے کی چھٹی لے کر اپنی لڑکی کا بیاہ کرنے کے لئے جنڈیالہ گیا ہوا تھا۔ واپس آ گیا اور مجھے دیکھتے گراؤنڈ کے قریب ملا۔ مجھے دیکھتے ہی کہنے لگا اوہ تم بہت کمزور ہو گئے ہو۔ کیا بیمار ہو گئے تھے۔ میں نے دل میں سوچا بیمار تو نہیں رہا البتہ ورزش ضرور کرتا رہا ہوں۔ اس دن سے لے کر آج تک میں نے پھر ورزش نہیں کی۔ بھلا ورزش کا فائدہ ہی کیا ہے۔ جب یہ دوسروں کو مغالطہ میں ڈال دے اور پھر مفت میں اپنے جسم کو تکلیف دینا۔ قید با مشقت نہیں تو اور کیا ہے۔
شیام سندر :نہیں آپ ورزش سے اپنے جسم کو صحت ور بنا سکتے ہیں۔ ورزش سے جسم میں چشتی آتی ہے۔ بہت ہلکا پھلکا۔ ۔ ۔
بھیا لال :مجھے بتاتے ہو، شیام سندر؟ تیسری جماعت کا سبق دہرا رہے ہو۔ اس میں تو اور بھی کئی نکمی اور جھوٹی باتیں لکھی ہیں مثلاً ورزش نہایت اچھی ہوتی ہے، جھوٹ بولنا گناہ ہے، دیانتداری بڑی نعمت ہے، دوسرے کی چیز پر نگاہ نہ ڈالو۔ سب بکو اس، سفید جھوٹ۔
شیام سندر :تم ڈاکٹر گھنشیام لال کی بیوی کا ذکر کر رہے تھے۔ جسے تم پڑھاتے رہے ہو۔
بھیا لال :ہاں میں جمنا کا ذکر کر رہا تھا۔ مگر تم نے کبھی سوچا کہ میری بدصورتی میں میرا کتنا قصور ہے۔ میرے ماں باپ بھی ایسے ہی تھے۔ قصور تو ان کا ہے کہ اپنی بدصورتی کو جانتے ہوئے بھی مجھے جنم دیا۔
شیام سندر :یہ تو محض حسن اتفاق تھا۔
بھیا لال :مجھے تو اس میں خاک بھی ’’حسن اتفاق‘‘ نظر نہیں آتا اور یوں دیکھا جائے تو اس میں قباحت ہی کیا ہے۔ ذرا خیال تو کرو۔ قدرت نے دو کان، آنکھ، ہاتھ، پاؤں، نتھنوں اور ہونٹوں کے مجموعہ سے انسانوں کے کتنے نمونے ایجاد کئے ہیں کہ ایک کی شکل دوسرے سے نہیں ملتی۔ بجانے اس کے قدرت کی طباعی اور فنکاری کی داد دی جائے۔ لوگ مجھ پر ہنستے ہیں۔ کتنی بے وقوفی ہے۔ آج انسانوں میں کوئی بڑے سے بڑا آرٹسٹ قدرت کے اس شاندار تنوع کی ایک مثال پیدا کر دے۔ تو میں جانوں۔
شیام سندر :بے شک۔ بے شک، مگر وہ ڈاکٹر کی بیوی۔ ۔ ۔
بھیا لال :ارے بھائی۔ اب اس کی بیوی کی کون سی بات رہ گئی۔ میں اسے تین مہینے سے پڑھا رہا ہوں اور اس عرصہ میں وہ کوئی پندرہ بار بیمار پڑی ہو گی اور کوئی اس دس با رہی اس کے ڈاکٹر خاوند کو موسمی بخار کا شکار ہونا پڑا ہے۔ کبھی دیکھو تو سر میں درد ہے، کبھی پیٹ میں، کبھی بخار، کبھی نزلہ اور مجھ دیکھو تو ان تین مہینوں میں ایک چھینک بھی نہیں آئی۔ آج جب میں پڑھانے گیا تو کل کی طرح پھر کہنے لگی ’’مجھے زکام کی شکایت ہے۔ ‘‘میں نے کہا آپ کی بھی عجیب صحت ہے۔ آپ ڈاکٹر لوگ جب پرہیز نہیں کریں گے تو اور کون کرے گا۔ مجھے دیکھئے اپنی صحت کا خیال رکھتا ہوں۔ کبھی کوئی تکلیف نہیں ہونے پاتی۔
شیام سندر :خوب بدلہ لیا۔
(اظہر کمرے میں داخل ہوتا ہے۔ درمیانہ قد۔ دہرے بدن کا جوان ہے۔ نیلا سوٹ پہن رکھا ہے۔ ہاتھ میں ایک تا رہے۔ )
اظہر :ہیلو شیام! ہیلو تب دق!
شیام سندر :ہیلو اظہر!یہ تار کیسا ہے ؟
اظہر :امجد نے بھیجا ہے۔ لکھا ہے کہ بی ٹی کی ڈگری مل گئی ہے اور اب وہ الہ آباد جا رہا ہے۔ جہاں میونسپل سکول میں اسے پینتیس روپئے کی آسامی مل گئی ہے۔
شیام سندر :مگر ایم اے، بی ٹی اور صرف پینتیس۔
اظہر :میں اسے مبارک باد کا خط لکھ رہا ہوں۔ اس دور مہاجنی میں تم اور کر بھی کیا سکتے ہو۔
بھیا لال :کل مجھے کیلاش ناتھ ملا تھا۔ وہ جو بی اے میں ہمارے ساتھ پڑھا کرتا تھا اور فیل ہو گیا تھا۔ اب اپنے باپ کے کارخانہ میں منیجر ہو گیا ہے اپنی کار میں بیٹھا ہوا تھا۔ میری طرف ترحم آمیز نگاہوں سے دیکھ کر کہنے لگا ’’آج کل کیا کرتے ہو؟۔ ۔ ۔ اور یہ وہی شخص ہے جو انگریزی کا جواب مضمون مجھ سے خوشامدیں کر کے ٹھیک کرایا کرتا تھا۔ ‘‘
شیام سندر : (اداس لہجے میں) جانے دو ان باتوں کو۔ مجھے مسعود کا فکر ہو رہا ہے۔ تم جانتے ہو۔ بچارہ دو مہینے سے میرے پاس رہتا ہے۔ مگر ابھی تک نوکری کہیں نہیں ملی۔ کل سے واپس نہیں آیا۔
اظہر :واپس گاؤں کو چلا گیا ہو گا۔
شیام سندر : (رکتے ہوئے) شاید!مگر اس کا ٹرنک اور بستر یہی ہیں۔
بھیا لال :کوئی ضروری کام ہو گا(زیادہ حوصلہ افزا لہجہ میں)شاید کوئی نوکری مل گئی ہو گی اور آج تمہیں پتہ دینے کے لئے آ جائے۔
شیام سندر : (رکتے ہوئے)شاید۔
اظہر : (سر ہلاتے ہوئے) کتنی بے کاری ہے اور کتنی جہالت ہے ؟کل میں موتی لال میں پروفیسر روچانند کا لیکچر سننے گیا۔ فاضل مقرر جو ایک روئی کے کارخانہ میں تین سو حصوں کا مالک نہایت پر جوش لہجہ میں گریجوٹیوں کی کم عقلی کا ماتم کر رہا ہوں کہ موجودہ بے کاری اقتصادی نہیں بلکہ تعلیم یافتہ طبقہ کی آرام پسندی کا نتیجہ ہے۔ چنانچہ اس نے چند نہایت درد مندانہ تجاویز سامعین کے سامنے پیش کیں۔ مثلاً یہ کہ گریجویٹ چھوٹے موٹے کاروبار کو اپنے ہاتھوں میں لیں۔ بوٹ پالش کرنا، ایک تھوک فروش سے جوتے ادھار لے کر گلیوں میں چکر لگا کر انہیں بیچنا، گھی کی دوکان کھولنا، مونگ پھلی کی تجارت۔ ۔ ۔
شیام سندر : (تلخ لہجہ میں) چنا جور گرم۔
بھیا لال :بے کاری دور کرنے کے ایسے کئی گر مجھے یاد ہیں۔
اظہر :مثلاً۔
بھیا لال : (وا سکٹ کی جیب میں ہاتھ ڈالتے ہوئے)مثلاً تم اور شیام سندر انگریزی میں اچھا لکھ سکتے ہو۔ اخبار نکال لو۔
اظہر، شیام سندر :مگر روپیہ!
بھیا لال :اچھا کچھ اور سہی۔ ایک عمدہ ہوٹل کھول لو۔ نفیس کمرے، عمدہ کھانے، تھوڑا کرایہ، واجبی نرخ۔
شیام، اظہر :مگر روپیہ۔ ۔ ۔ ؟
بھیا لال : (ہنس کر اور وا سکٹ کی جیب سے ہاتھ نکالتے ہوئے) اچھایہ بھی سہی، لو اب میں تمہیں وہ گر بتاتا ہوں جو کبھی خطا نہیں ہو سکتا۔
شیام سندر :وہ کیا ہے ؟
بھیا لال :عورت۔
شیام سندر :عورت؟
بھیا لال :ہاں۔ ہاں، عورت۔ ایک عورت کا انتخاب کر لوجو نہایت جاہل ہو۔ ایک نہایت مالدار آدمی کی اکلوتی بیٹی ہو۔
شیام سندر :پھر؟
بھیا لال :پھر اس سے شادی کر لو۔
اظہر :بھئی کیا خوب۔ تم تو تواریخ جاننے کے علاوہ عقل مند بھی ہو۔
شیام سندر : (دونوں آنکھیں میچ کر)ہوں۔ ۔ ۔ ہوں۔
اظہر، بھیا لال :’’ہوں۔ ہوں ‘‘ کا کیا مطلب ؟
شیام سندر : (آنکھیں بند کئے ہوئے) ایک ایسی عورت بالکل میری نگاہ میں ہے۔
بھیا لال : (گہری دلچسپی سے)کیا وہ ایک مالدار آدمی کی لڑکی ہے ؟
شیام سندر : (سر ہلاتا ہے) ہاں تو۔ ۔ ۔
بھیا لال : اور ۔ ۔ ۔ اور ۔ ۔ ۔ اکلوتی لڑکی۔
شیام سندر :ہاں اکلوتی بیٹی۔ بالکل اکلوتی۔
بھیا لال :ارے یار بتاؤ۔ اس کی شکل کیسی ہے ؟ خوبصورت ہو گی؟
شیام سندر :وہ نہایت خوبصورت ہے، حسین جیسے چاند کی کرن، نازک جیسے کنول کی پتی، حیا پرور جیسے لاجونتی کی ڈالی۔ بس کائی سی صورت ہے۔ میں اس سے محبت کرتا ہوں اور وہ مجھ سے محبت کرتی ہے اور اس کا مالدار باپ اپنی ساری دولت مجھے جہیز میں دے دینا چاہتا ہے۔
بھیا لال : (بہت دلچسپی اور رشک و حسد کے ساتھ) ارے بتاؤ وہ کون ہے ؟ کہاں رہتی ہے ؟ اس کا نام کیا ہے ؟
شیام سندر : (یکایک آنکھیں کھول کر) اوہ وہ کدھر چلی گئی۔ وہ کون تھی؟ اس کا نام کیا تھا؟
(شیام سندر، اظہر، بھیا لال تینوں یکایک قہقہہ لگا کر ہنستے ہیں اور ایک دو منٹ تک ہنستے رہتے ہیں۔ )
(ایک ب اور دی پولیس کا سپاہی آتا ہے۔ )
سپاہی :آپ میں شیام سندر کون ہے ؟
(شیام سندر اٹھ کر کھڑا ہو جاتا ہے۔ )
سپاہی : (ایک لفافہ آگے بڑھاتے ہوئے)سول ہسپتال میں چل کر ایک لاش کی شناخت کر لیجئے۔ وہ ریل گاڑی کے نیچے آ کر مرگیا ہے۔ ا س کی جیب سے آپ کا پتہ نکلا ہے۔
شیام سندر :مسعود۔ ۔ ۔ آہ۔
(اپنے ہاتھوں سے منہ چھپا کر کہتا ہے۔ )
(پردہ گرتا ہے)
***
ماخذ: ’’دروازہ‘‘
آزاد بک ڈپو پالبازار، امرتسر 
راجندر سنگھ بیدی
نقل مکانی

کردار
نفیس:ایک معمولی آدمی جو محکمۂ نہر میں ملازم ہے۔
عذرا:نفیس کی قبول صورت بیوی۔ ۔ ۔ گانے کا شوق رکھتی ہے
مراتب:کاٹھ بازار کا پنواڑی
سیاں :ایک آوارہ اور ذہین طالب علم جس کا اصل نام امجد حسین ہے
بنواری لال:محلہ دار۔
مرزا شوکت :محلہ دار۔
سب انسپکٹر مائکل
دو سپاہی
شیو برت:ایک عیاش رئیس
 
پہلا منظر
(محلہ کاٹھ بازار کا ایک مکان، نفیس اور اس کی بیوی عذرا اس مکان میں نئے آئے ہیں۔ ابھی ان کا سامان ادھر ادھر پڑا ہے جسے دونوں میاں بیوی قرینے سے دھرنے میں مصروف ہیں۔ )
عذرا : (آرام کے لیے رکتے ہوئے) توبہ کتنی خاک چھانی اور جو ملنے کو آیا مکان تو کیسے جھٹ سے مل گیا۔
نفیس : (چارپائی پر بیٹھ کر اپنا نیا جوتا اتار دیتا ہے اور اپنے پاؤں سہلاتا ہے) ہاں اسی بات پر تومیں حیران ہو رہا ہوں۔ دراصل مجھے ابھی تک یقین نہیں آ رہا ہے کہ میں کسی اور مکان میں بیٹھا ہوا ہوں۔ ۔ ۔ پاؤں ابھی تک دکھ رہے ہیں۔ ایک سارے دن کی دوڑ دھوپ، دوسرے نیا جوتا۔ ۔ ۔ (پلٹ کر) عذرا تھوڑا پانی تو گرم کر دوبھائی۔
عذرا :معلوم ہوتا ہے حمام کا پیندا، اس ادلا بدلی میں ٹوٹ گیا ہے۔ لیکن پانی گرم ہو جائے گا۔
نفیس :جب بوجھے کو سر پر سے پھینک دیا جاتا ہے توکتنی دیر یوں معلوم ہوتا ہے جانے کوئی اوپر کی طرف اٹھ رہا ہے۔ اتنی تھکن اور تکلیف کے ہوتے ہوئے بھی ایک طرح کے سبک اپنے۔ ۔ ۔
عذرا :چشم بد دور۔ بس ان ہی دو کمروں کی ضرورت تھی اور اتنا ہی کرایہ دینے کی توفیق۔ مہنگائی کے ان دنوں میں سولہ روپیہ بھی بھلا کوئی کرایہ ہے ؟
(پھر کام میں مشغول ہو جاتے ہیں۔ )
نفیس :اندازہ کرو، وہ حویلی بکائن والے ان کمروں کے پچاس روپیہ بتاتے تھے۔ شاید انھیں سمجھنے والا نہیں کوئی۔ میں نے تو کہہ دیا تھا کہ تنخواہ قرق کر لیا کرو صاحب۔ سوچو اتنے کمروں کی ہمیں ضرورت بھی کیا تھی؟
عذرا : اور جونئی آبادی میں کمرے دیکھے تھے، یاد ہیں ؟سیل کتنی دور چھت کی طرف لپک رہی تھی اور پڑوس کی جرانی بضد تھی کہ ہم اوپلے دیوار پرہی تھاپیں گے۔ ۔ ۔ لے بھئی تواب تھاپلے اوپلے جی بھرکر(رک کر) لیکن اگر میں وہاں رہ جاتی تو اسے بتا دیتی ایک بار۔
نفیس :ہاں وہ تو تمہاری بات ہی ہے۔
عذرا : اور وہ کوڑا کرکٹ جلانے والی چمنی بھولی گئے۔ ۔ ۔ اف۔ ۔ ۔ اوف۔ ۔ ۔ کتنی بو آتی تھی۔ ۔ ۔
(ناک پر دوپٹہ رکھ لیتی ہے۔ )
نفیس :اس پنواڑی نے کس آرام سے چابیاں تھما دیں میرے ہاتھ میں (ایک دم رک کر)مجھے تو کچھ دال میں کالا نظر آتا ہے۔
عذرا : اور کہہ رہا تھا مہینے بھر سے خالی پڑا ہے۔ مکان۔ کوئی گاہک نہیں لگا ہو گا۔ اس مہینہ بھرمیں بھلا؟
نفیس :خدا جانے کیا معاملہ ہے ؟یہ دیواریں کچھ خراب ہیں لیکن۔ ۔ ۔
(دیوار کو چھوتا ہے۔ )
عذرا :کہاں خراب ہیں دیواریں ؟۔ ۔ ۔ بس ذرا سا شک پڑا دیواریں خراب نظر آنے لگیں۔ چھت بھی گرتی ہوئی دکھائی دینے لگی۔ کواڑ بھی پرانے ہیں۔ تم کہنے لگو گے بالکل ٹوٹے ہوئے ہیں۔ ۔ ۔ (پڑھا کے اوپر اور نیچے سیاہ نشان دیکھتے ہوئے) شاید شمع دان بنا رکھا تھا ہم سے پہلے ادھر رہنے والوں نے۔ ۔ ۔ میں کہتی ہوں یہاں بجلی نہیں ہے ؟
نفیس :ہے تو لیکن وہ لوگ شاید استعمال نہ کرتے ہوں۔
عذرا : (ہنس کر) شاید اندھیرا پسند کرتے ہوں۔
نفیس :تمہیں اندھیرے کے معجزوں کا کیا پتہ۔ جب اندھیرا ہوتا ہے تو بہت سی خدائی کا ایک طرح سے دن شروع ہوتا ہے۔ (میز کو کونے کی طرف سرکاتے ہوئے، کونے میں پڑے ہوئے گھنگھرو نفیس کے ساتھ ٹکراتے ہیں)۔ ۔ ۔ ارے یہ کہاں سے آئے۔
عذرا : (میز رکھ کر) دکھاؤ۔
نفیس :ہم سے پہلے رہنے والے انھیں یہیں بھول گئے۔
عذرا :ان میں سے کوئی ناچتا ہو گا۔
نفیس :تمہارے لیے چھوڑ گئے معلوم ہوتے ہیں لیکن انھیں کیا معلوم کہ نئے آنے والوں میں بھی کافی گانے کا شوق رکھتی ہے اور گاہے ما ہے۔
عذرا :گاہے ما ہے کیا؟
نفیس :تھرک بھی جاتی ہے۔
عذرا :اوہو، جانتے ہی نہ ہوں بھلا۔
نفیس :ذرا پاؤں میں باندھو اور ۔ ۔ ۔
عذرا :ہونہہ اسباب جوں کاتوں بکھرا ہوا ہے اور آپ کو اپنی پڑی ہے۔ میں سوچتی ہوں اس شمع دان میں سرسوں کا تیل جلانے والے اتنے با مذاق تھے ؟
نفیس :تو کیا خوش مذاقی کا امیر لوگوں نے اجارہ لے رکھا ہے۔ (عذرا کے سامنے میز پر بیٹھ جاتا ہے) اپنی طرف دیکھو تم۔ ۔ ۔
عذرا : (شرما کر) چلو ہٹو۔
نفیس :بات یہ ہے کہ تم بھی عام آدمیوں کی طرح باہر کی ٹیپ ٹاپ دیکھتی ہو میں اگر اچھی شکل والا ہوتا اور اچھے کپڑے پہنے ہوئے ہوتا تو شاید مکان کے لیے مجھے اتنا پریشان نہ ہونا پڑتا۔ جس کے سامنے جا کر مکان کے لیے سوالی ہوا اس نے پہلے مجھے سر سے پاؤں تک ناپا اور پھر جھٹ سے کہہ دیا کون زمانے کی بات کرتے ہو میاں، راستہ پکڑو۔ ۔ ۔ گویا میں اٹھائی گیرا ہوتا ہوں۔ (غصے کے ساتھ میز پر سے اٹھ کھڑا ہوتا ہے۔ )بعض دفعہ جی چاہتا ہے اٹھائی گیرا ہی تو ہو جائے آدمی۔ ۔ ۔ (عذرا کی طرف دیکھتا ہے تو غصہ اتر جاتا ہے۔ ) دور کیوں جاؤں میں اپنی عذرا کے لیے وامق نہ ہوا۔ ۔ ۔
عذرا :یہ وامق کون احمق تھا؟۔ ۔ ۔ اور پھر اس بات کا تقاضا کرنا بھی تو سنک ہے کہ کوئی آدمی کو اندر سے دیکھے اور باہر سے نہ دیکھے۔ تمہارا کیا خیال ہے۔ روح جسم کو خوبصورت یا بدصورت نہیں بناتی؟
نفیس :یہ الگ بحث ہے عذرا۔ ۔ ۔ لاؤ ذرا ہتھوڑی پکڑانا، کھڑکی پر کیل گاڑ دوں۔ (کھڑکی کی طرف بڑھتے ہوئے) میں یہ کہنا چاہتا ہوں کہ اگر تم کسی کی شکل دیکھ کر اس کی طینت کے متعلق شک کرو تو اس شخص کی بددیانتی پر افسوس نہیں کر سکتیں۔ ۔ ۔
عذرا :دیکھو، دیکھو، دیکھو۔ ۔ ۔ یہ باہر جو کھڑکی کھلتی ہے، پان کی پیک سے بھری ہوئی ہے۔ ادھر ہاتھ مت بڑھانا۔ میں کہتی ہوں۔ ۔ ۔ یہ پان کی پیک، یہ شمع دان۔ ۔ ۔ میرا ما تھا ٹھنکتا ہے۔ ذرا بلانا تو پٹواری کو۔
نفیس :مراتب کو؟۔ ۔ ۔ میں بلاتا ہوں۔ تو بھی دیا جلا دے شام ہو رہی ہے۔
عذرا :دیا تو نہیں ہے لیکن اس کٹوری سے دینے کا کاجل جائے گا۔
نفیس :ہاں، ہاں اس کٹوری کو شمع دان پر رکھ دو۔
عذرا :میں تو نہ رکھوں شمع دان پر کٹوری۔ ۔ ۔ تم مراتب کو بلاؤ۔ یا تو اس جگہ چھوت کی بیماری کا کوئی مریض رہا ہے اور یا۔ ۔ ۔ یا۔ ۔ ۔
نفیس :ورنہ آج کل جنگ کے دنوں میں اتنی دیر مکان خالی رہنے کے کیا معنی؟۔ ۔ ۔ (دروازے سے باہر جھانک کر) مراتب۔ ۔ ۔ میاں مراتب۔ ۔ ۔ ذرا ادھر آنا بھائی۔
پنواڑی :آیا صحیب۔
نفیس : (عذرا سے)جانے کیا ماجرا ہے ؟۔ ۔ ۔ چھوت کی بیماری کے علاوہ کیا اندازہ لگانے لگی تھیں تم؟
عذرا :اس مکان میں کوئی پیر رہتا ہوتا اور یہاں رہنے والے اس کا دیا جلاتے ہونگے اور جہاں تک میرا خیال ہے ہفتہ میں ایک دو دن ضرور پیر کا دیا جلانا پڑتا ہو گا، نہیں تو بجلی والے اس مکان میں سرسوں کا تیل جلانا کیا مطلب رکھتا ہے ؟
نفیس :اب تمہیں بھی اس مکان میں نقص نظر آنے لگے۔ ۔ ۔ ایک برس ہوا ہمیں مکان کی تلاش کرتے ہوئے تب کہیں جا کر یہ دو اچھے کمرے ملے ہیں۔
عذرا :میں خود اسے پسند کرتی ہوں لیکن۔
نفیس :میں لیکن ویکن کچھ نہیں جانتا۔ مجھ سے اب مکان تبدیل نہ ہو گا یہ سمجھ رکھو۔ ۔ ۔ چھوت کا مریض رہا ہو گا تو فرش فنائل سے دھولیں گے۔ سفیدی کروا لیں گے۔ دیواریں کھد وا کر نیا پلسٹر کروا لیں گے۔ ۔ ۔ پیر ہوا تو سرسوں کا دیا جلا لیں گے۔
(دروازے میں مراتب نظر آتا ہے۔ )
مراتب :حکم سرکار؟
نفیس :بڑے میاں، ہمیں ایک بات پوچھنا ہے۔
عذرا : (ڈرتے ہوئے) ہاں بڑے میاں ٹھیک ٹھیک بتا دو۔ تم نہیں بتاؤ گے تو ایک دن ہمیں اپنے آپ پتہ چل جائے گا۔ کیا یہاں کوئی بیمار رہا ہے ؟ یا کوئی پیر ہے جس کا دیا جلانا پڑتا ہے ؟ یا اور کوئی بات ہے۔ دیکھو جھوٹ مت بولنا آخر تم بھی بال بچوں بچے دار ہو۔
پنواڑی :دیکھے سرکار جھوٹ بولنا اپنا اپنا اصول نہیں ہے اور پھر یہ مکان کون میرا اپنا ہے جس کی خاطر ایمان گروی رکھوں۔ ۔ ۔ آپ سے پہلے یہاں شادو رہتی تھی۔
نفیس :شادو رہتی تھی، کون شادو؟
پنواڑی :شادو۔ شمشاد بائی۔(عجیب سی ہنسی ہنستا ہے)آپ اسے نہیں جانتے ؟ واہ اس شہر میں کون بابو لوگ ہے جو شادو کو نہیں جانتا؟
نفیس : (کچھ برہم ہو کر اپنے ہاتھ کوٹ کی جیبوں میں ٹھونس لیتا ہے۔ ) میں جھوٹ تھوڑے ہی کہہ رہا ہوں بڑے میاں۔ ہمیں تمہاری شادو سے کبھی واسطہ نہیں پڑا۔
پنواڑی :اجی بابو صاحب۔ شادو کے قصے اخباروں میں چھپ گئے۔ اس کے نام کے اشتہار بازاروں میں لگ گئے اور آپ کہتے ہیں پتہ ہی نہیں۔ ۔ ۔ نہیں نہیں آپ دراصل مجھے بنا رہے ہیں۔ ۔ ۔ ہیں نا؟شادو یہاں ’’جس طرح مجھ کو لگی ہے میرے اللہ کسو کی‘‘ گایا کرتی تھی اور بڑے بڑے لوگ اس کا مجرا کرواتے تھے وہ بڑی امیر تھی لیکن تھی بڑی کنجوس۔ ۔ ۔ آخر اسے سمجھ آ گئی کہ بنا چوک میں جائے دھندہ نہیں ہو گا۔
عذرا :تو شمشاد بائی کوئی طوائف تھی؟۔ ۔ ۔
پنواڑی :جی ہاں طوائف ہی تو تھی۔ ۔ ۔ اس کے مقدمے کی بابت بھی آپ نے کچھ نہ پڑھا۔ وہ دراصل بہت بڑی رنڈی تھی جو ’’میرے اللہ کسو کی‘‘ گایا کرتی تھی۔ ۔ ۔ شادو!کاٹھ بازار کے بیچ میں سرکار نے بھی پسند نہ کیا اور اسے نوٹس دیا۔ پولیس بھی آئی لیکن شادو کو کوئی ہلا نہ سکا۔ پھر وہ اپنی مرضی سے چلی گئی۔ ۔ ۔
نفیس :تم نے پہلے اس بات کا ذکر نہیں کیا۔
پنواڑی :مجھے اس بات کا خیال ہی نہ آیا اور میرا خیال تھا آپ جانتے ہوں گے۔ دراصل آپ نے اتنی جلدی کی۔ چار بجے شام آپ نے چابیاں لیں اور چھ بجے یہاں آ دھمکے۔ اب کیا بگڑ گیا ہے مکان پر آپ کی مہر تو لگ ہی نہیں گئی۔
عذرا :لیکن اب ہم کہاں جائیں، جو مکان ہم نے خالی کیا اس کے بیسیوں گاہک تھے، ادھر ہم نے سامان نکالا ادھر انھوں نے رکھ لیا۔
نفیس :یہ بات چابیاں دیتے ہی بتا دیتی تھی مراتب صاحب۔
پنواڑی :میں تو سمجھتا تھا آپ اس قصے کو جانتے ہوں گے۔
نفیس : (چمک کر) پھروہی بات۔ کیا ہمیں بھی ایرے غیرے سمجھتے ہو؟ جو یہ جانتے ہوئے بھی چلے آئیں۔ ۔ ۔ جاؤ کتھا چونا لگاؤ اور شادو کے گیت گاؤ۔ ۔ ۔ معلوم ہوتا ہے تمہیں بھی شریف اور بدمعاش میں کوئی فرق نظر نہیں آتا۔
پنواڑی :دیکھئے ذرا سنبھل کر بات کیجئے۔ کسی کے ماتھے پر شریف تھوڑی ہی لکھا ہوتا ہے میں نے جانا جیسے دوسری دنیا ہے ویسے ہی آپ ہوں گے۔
عذرا :اب زیادہ باتیں بنانے کی ضرورت نہیں بڑے میاں۔
پنواڑی :میں نے کوئی بری بات نہیں کہی سرکار۔ دوسرے لوگ کہیں جیب کترے نہیں ہیں۔ آپ کی مرضی ہے آپ رہیں، نہیں مرضی نہ رہیں۔ ۔ ۔ چابیاں میرے والے کر دیں، اور نیا مکان تلاش کر لیں۔ میں جاتا ہوں۔ شام ہی کا وقت تو ہوتا ہے۔ کمانے کا۔ ۔ ۔
(جاتا ہے۔ )
عذرا : (مایوسی سے) اب کیا کریں۔
نفیس : (سرد آہ بھرکر)چلو یہ طلسم بھی ٹوٹ گیا۔ مجھے یقین ہو چلا تھا کہ تمام دنیا ایک سی نہیں ہے۔ کم سے کم ایک ایسا آدمی ہے جس نے ہماری شرافت کی قدر کی ہے۔ ۔ ۔ (کھڑکی کی طرف جاتا ہے۔ )پان کی پیک سے بھری ہوئی یہ کھڑکی بتا رہی ہے کہ شادو اس پنواڑی کی آمدنی کا ذریعہ تھی اور اس کے چلے جانے کا مراتب کو افسوس ہے۔ ۔ ۔ (سوچتا ہے۔ ) عذرا ان گھنگھروؤں کو وہاں رکھ دو اور آؤ بیٹھ جاؤ۔
عذرا : (ادھر ادھر دیکھ کر)خدا جانے یہاں کیا کچھ ہوتا رہا ہے !
(سہم کر نفیس کی بغل میں بیٹھ جاتی ہے۔ )
نفیس :جانے کون کون جاگیریں اجڑتی رہی ہوں گی اور کن کن کے سہاگ کا مذاق اڑایا گیا ہو گا۔
عذرا :بھانت بھانت کے آدمی آتے ہوں گے یہاں۔ ۔ ۔
نفیس :یونہی تھوڑے ہمارا سنگ اسود کالا اور کثیف ہوتا جا رہا ہے۔ لیکن دیکھو عذرا اب جو کچھ ہونا تھا ہو چکا۔ طوائفوں کی بستی جب شہر کے بڑھنے سے باہر چلی جاتی ہے تو ان کی جگہ تمہاری ایسی گرہستنیں ہی تو رہتی ہیں۔
عذرا : (سمٹ کر) یہ تو ٹھیک ہے۔ لیکن مجھے ڈرا سا آتا ہے جیسے میرا دل کسی بات کو مان نہیں رہا۔
نفیس :مجھے تو اس بوڑھے کی بے وقوفی پر ہنسی آتی ہے۔ (ہنس کر)’’تم شادو کو نہیں جانتے ؟لیکن عذرا جب تک اپنا دل صاف ہے ہمیں کسی سے نہیں ڈرنا چاہئے دوسروں کے گنا ہوں کا حساب ہمیں تھوڑا دینا ہے۔ ۔ ۔ میں بستر کھولتا ہوں تم دیا سلائی سے بتی ذرا اوپر کر دو۔ ۔ ۔
عذرا :یاد آیا تم نے گرم پانی کے لیے کہا تھا۔ شاید ٹوکری میں کوئلے ہوں۔ ۔ ۔ مجھے یہ سارا گھر جائے پیاری کے کیڑوں سے پٹا ہوا معلوم ہوتا ہے۔ ۔ ۔ میں کیا کروں میرا دل یونہی کانپ رہا ہے۔
نفیس :عذرا۔ ۔ ۔ میری جان!اب ایک نیا مکان تلاش کرنا خالہ جی کا باڑہ تو ہے نہیں۔ یہاں سب طرح کی صفائی ہو جائے گی۔ ۔ ۔ فنائل سفیدی۔ سب ٹھیک ہو جائے گا اور پھر جس جگہ پر بیٹھ کراللہ کا نام لیں گے وہ جگہ پاک اور صاف ہو جائیں گی۔ میرا مطلب ہے۔ ۔ ۔
(دروازے پر دستک سنائی دیتی ہے۔ )
عذرا :یہ کون ہوا بھلا؟
نفیس :خدا جانے کون ہے۔ اور اسے ہمارے یہاں ہونے کا کیسے پتہ چل گیا؟
عذرا :ذرا دیکھو تو۔ ۔ ۔ کہیں تمہارا بھانجا ہی نہ ہو۔ میں نے کہا تھا ادھر ہم نئے ہیں، ذرا خبر لیتے رہنا اور تمہاری بھانجی کی شادی طے ہو گئی ہو گی۔ ۔ ۔ نصیرہ کی۔ ۔ ۔ دیکھو تو۔ ۔ ۔
(نفیس جاتا ہے اور دروازہ کھولتا ہے۔ )
نفیس :آئیے صاحب۔
سیاں :السلام علیکم۔
نفیس :وعلیکم السلام۔ ۔ ۔ کہئے کیسے تشریف لائے، آپ کا نام۔
(عذرا اندر چلی جاتی ہے۔ )
سیاں :میرا نام؟۔ ۔ ۔ میرا اصلی نام امجد حسین ہے۔ میں یہاں طالب علم ہوں۔ ۔ ۔ یہاں کا مطلب یہ مکان نہیں میری مراد اس شہر سے ہے۔ ۔ ۔ لیکن مجھے سب سیاں کے نام سے پکارتے ہیں۔
نفیس :کہیں آپ اس مکان کے مالک تو نہیں۔
سیاں :نعوذ باللہ۔ ۔ ۔ نہیں !۔ ۔ ۔ لیکن ایک طرح سے مالک ہی سمجھئے۔
نفیس :معاف کیجئے میں آپ کی بات نہیں سمجھ سکا۔ ۔ ۔ اور نہ آپ کے اس وقت تشریف لانے کا مدعا جان سکا ہوں۔
سیاں :دیکھئے ایک وقت میں ایک ہی سوال کیجئے تا کہ نہ آپ کو سوال کرتے ہوئے الجھن ہو اور نہ مجھے جواب دیتے ہوئے کوفت محسوس ہو۔ یہی تو ظلم ہوتا ہے میرے ساتھ کہ ایک سانس میں لوگ مجھ پر بیسیوں سوال کر جاتے ہیں۔ کالج میں، گھر میں، بازار میں ہر جگہ یہی ظلم ہوتا ہے۔ ۔ ۔ تو پہلے آپ میرا نام پوچھ رہے تھے۔
(آگے جانے کی کوشش کرتا ہے لیکن نفیس اسے اشارے سے وہیں چارپائی پر بٹھا دیتا ہے۔ )
نفیس :جی ہاں، نام پوچھ رہا تھا۔ ۔ ۔ اگر آپ کو زحمت نہ ہو۔
سیاں :میں نے عرض کیا نا، میرا اصل نام امجد حسین ہے۔
نفیس :نہیں صاحب اس سے پہلے نام کے بارے میں قطعاً کوئی بات نہیں ہوئی۔
سیاں : (پر شکوک انداز میں) کوئی بات نہیں ہوئی۔ ۔ ۔ مگر اس کا مطلب کیا ہے ؟آج نام کیوں پوچھا جا رہا ہے ؟۔ ۔ ۔ خیر میرا نام امجد حسین ہے لیکن مجھے سب سیاں کے نام سے پکارتے ہیں۔
نفیس :آپ کی ماں بھی آپ کو سیاں کے نام سے پکارتی ہو گی۔
سیاں :جی ہاں (کچھ سمجھتے ہوئے) لیکن۔ ۔ ۔ لیکن۔ ۔ ۔ سو آپ سے درویش صورت انسان بھی یہاں۔ ۔ ۔ سچ ہے بابا سب سچ ہے۔ ۔ ۔
(اٹھ کر اندر جانے کی کوشش کرتا ہے۔ )
نفیس :آپ کو غلط فہمی ہوئی ہے۔ ۔ ۔ دیکھئے آپ زبردستی اندر جا رہے ہیں۔ آپ پئے ہوئے ہیں۔
سیاں :ش ش خاموش۔ میں سیاں ہی تو ہوں، جاؤ اندر جا کر شادو کو اطلاع کر دو۔
نفیس :دیکھئے سیاں صاحب، اب آپ کی شادو یہاں نہیں رہی۔ یہ شریف آدمیوں کے رہنے کی جگہ ہے۔
سیاں :شکل سے تو آپ شریف ہی نظر آتے ہیں اللہ اجی میں ہر روز تھوڑے ہی ادھر آتا ہوں۔ جب ڈپٹی صاحب منی آرڈر بھیجتے ہیں اور امتحان کے دن نزدیک آتے ہیں۔ ۔ ۔ اوہ ڈپٹی صاحب کے نام سے ڈر گئے۔ ارے بھئے کوتوال اب ڈر کا ہے کا تم یہ بازو راستے سے ہٹا دو۔
نفیس :دیکھو، دیکھو، صاحبزادے تم کیا کیا کر رہے ہو۔ ؟
(پکڑ کر چار پائی پر بٹھا دیتا ہے۔ )
سیاں :سو تم ویرکا کے رئیس ہو، تمہی نے شادو کو گھر میں ڈالنے کی کوشش کی ہے۔ لیکن ناکام رہے۔ تم نے اسی گھرکو اپنا گھر بنانا اچھا سمجھا۔ میں سمجھ گیا۔ میں سب کچھ سمجھ گیا۔
نفیس :دیکھو، زیادہ باتیں مت بناؤ کہے دیتا ہوں، فوراً یہاں سے نکل جاؤ۔ ورنہ میں شور مچاؤں گا۔
سیاں :شور مچاؤ گے اور لوگوں کا اکٹھا کرو گے ؟اسی بات سے تمہاری شرافت کا پتہ چلتا ہے۔ کیا تم خود بدنام نہ ہو گے۔ لوگ آٹھ مجھے کہیں گے اور دس تمہیں سنائیں گے۔ لوگوں کو سچ اور جھوٹ کی طرف ہٹ جانے کا ملکہ ہے۔ ارے کبھی شریف لوگ بھی شور مچاتے ہیں، وہ ہر قسم کی ذلت چپکے سے برداشت کر لیتے ہیں کیونکہ وہ شریف ہیں۔ ۔ ۔ (ایک ہچکی آتی ہے نفیس کچھ کہنے کی کوشش کرتا ہے لیکن سیاں اسے روک لیتا ہے۔ )۔ ۔ ۔ میرے باپ کی کچہری میں روز عزت کے لیے مقدمے لڑے جاتے ہیں اور عزت چاہنے والوں کی خوب بے عزتی ہوتی ہے ان کی ماں اور بہن کے متعلق وہ کچھ کہا جاتا ہے کہ سن کر کانوں کے پردے پھٹ جاتے ہیں، اسی لیے شریف آدمی اپنی بیٹی کی بے حرمتی دیکھ کر عدالت کا دروازہ نہیں کھٹکھٹاتے۔
نفیس :میاں صاحبزادے یہ سب درست ہے اسی لیے میں تمہیں منت سے ٹل جانے کے لیے کہتا ہوں۔ ورنہ مجھے شور مچانے کی ضرورت بھی نہ پڑے۔
(سیاں کو دھکیلتا ہے۔ )
سیاں :دیکھو مجھے دھکیلو مت، باتیں کرنے سے تمہیں کوئی نقصان نہیں پہنچ سکتا (قدرے بلند آواز میں) شادو، مجھ سے یہ بدسلوکی دیکھ کر تم چپ بیٹھی ہو(اندر دیکھتے ہوئے)تم اتنی دبلی کیوں ہو شاید میری آنکھوں کا قصور ہے (لرزتی ہوئی آواز میں)مجھے کچھ بھی دکھائی نہیں دیتا۔ ۔ ۔ کتابیں لکھنے والوں نے ایک ہی چیز کے بارے میں متضاد باتیں لکھ کر میرے دماغ کو الجھاؤ میں ڈال دیا ہے۔ ۔ ۔ میری آنکھوں میں نقص ہے۔ (ڈر جاتا ہے۔ )وہی چیز جسے میں دیکھنا چاہتا ہوں نظر نہیں آتی۔ ۔ ۔ اردگرد کی سب چیزیں دکھائی دیتی ہیں لیکن وہ چیز جس پر میں نگاہ ڈالتا ہوں، درمیان سے غائب ہو جاتی ہے۔ ۔ ۔ کیا اس سے بڑی بیماری بھی ہے کہ تم جو چاہو تمہیں دکھائی نہ دے اور جو نہ چا ہو نظر آتا رہے۔ دیکھو تم پھر دھکیلنے لگے۔ باتیں سننے میں کیا حرج ہے بھائی؟شادو!تمہیں ویرکا کے اس رئیس نے گھر ڈال لیا ہے (کیا یہ سچ ہے کہ خبیث تمہیں باہر کی روشنی نہیں دکھاتا اور اسی لیے تم اتنی مریل ہو گئی ہو۔ لیکن تمہارا رنگ اور بھی کھل گیا ہے۔ ۔ ۔ نہیں مجھے کچھ بھی نظر نہیں آ رہا ہے۔ ۔ ۔ تمہیں ویرکا کے اس رئیس نے نہیں تمہیں اس بڑے ویرکا کے رئیس نے مجھ سے چھین لیا ہے۔ ۔ ۔ خدا نے بے رحم خدا نے۔ ۔ ۔
(رونے لگتا ہے۔ )
نفیس :خدا جانے میں تمہاری باتیں کیوں سنتا جا رہا ہوں ؟شکل سے شریف خاندان کے لڑکے نظر آتے ہو شاید اس لیے لیکن تم ہو کہ برابر شور مچائے چلے جا رہے۔ لوگ سن کر کیا کہیں گے ؟
سیاں :لوگ؟لوگ کیا کہیں گے۔ ۔ ۔ دیکھو مجھے گھورو مت ہر جگہ مجھے یہی ’’لوگ‘‘ گھورتے نظر آتے ہیں۔ ان ’’لوگوں ‘‘ نے ہمیں کہیں کا نہیں رکھا۔ انھوں نے میرے ایک دوست کو پاگل کر دیا ہے۔ ذہین تھا۔ بلا کا ذہین۔ ۔ ۔ اسے ’’لوگوں ‘‘ نے بتایا کہ عورت کا ننگا جسم ایک ناپاک شئے ہوتی ہے اسے مت دیکھو۔ اپنی آنکھیں بند کر لو خوبصورت چیز کو دیکھنے کی خواہش کو دبا دو، کچل دو۔ ۔ ۔ انھوں نے کہا پھول کو کپڑے پہنا دو، یہ آرٹ۔ ۔ ۔ میرے دوست نے پانی میں چند کلیوں کو نہاتے دیکھا، اس نے اپنی آنکھیں بند کر لیں۔ ایک درخت کی آڑ میں کھڑے ہو کر اس نے پھر ان کلیوں کو شیتل شبنم میں نہاتے دیکھا، پھر آنکھیں بند کر لیں، دیکھا آنکھیں بند کر لیں۔ ۔ ۔ خواہش نے آنکھیں کھولیں، لوگوں نے بند کیں۔ ۔ ۔ کھولیں بند کیں، کھولیں بند کیں۔ ۔ ۔ اور آج اس کی آنکھیں پل میں سو بار کھلتی اور بند ہوتی ہیں۔ ۔ ۔ وہ ان کا کوئی علاج نہیں کر سکا۔ ۔ ۔ (آناً فاناً)شادو مجھے اس شہدے سے بچاؤ۔ ۔ ۔ مجھے تمہارے پاس نہیں آنے دے رہا ہے۔ پھر تم نہیں گاؤ گی؟
سیاں توری گودی میں گیندا بن جاؤں گی
(نفیس سیاں کو اٹھانے کی کوشش کرتا ہے لیکن سیاں برابر اپنی بات کہے جا رہا ہے۔ )
سیاں :امتحان سے ڈر کر آج میں نے بے انداز پی (لبوں پر زبان پھیرتے ہوئے)شراب میرا کلیجہ چٹ کر رہی ہے۔ میرے ہاتھ پاؤں کانپ رہے ہیں۔ مجھے بھوک لگی ہے۔ ۔ ۔ تم بھول گئیں۔ ۔ ۔
جو تورے سیاں کو بھوک لگے گی
لڈو، پیڑا، جلیبی بن جاؤں گی
سیاں توری گودی میں
(نفیس سیاں کو دروازے تک دھکیلنے میں کامیاب ہو جاتا ہے، لیکن سیاں مضبوطی سے دروازہ پکڑ لیتا ہے۔ )
سیاں :میں کرسی اور پلنگ کے درمیان دیکھ رہا ہوں۔ ۔ ۔ اور تمہاری پرچھائیں نظر آتی ہے۔ مجھ سے اندھا اچھا ہے شادو۔ ہائے یہ سب کچھ نظر آ رہا ہے اور نہیں بھی آ رہا ہے۔ ۔ ۔ میرے اللہ۔ ۔ ۔
نفیس : (دروازے کے ایک طرف منھ نکالتے ہوئے) مراتب۔ ۔ ۔ مراتب میاں۔
(دروازے پر عذرا نمودار ہوتی ہے۔ وہ کچھ دیر کے لئے رک جاتی ہے، لیکن پھر ایک عزم کے ساتھ آگے بڑھتی ہے۔ )
عذرا :صاحب آپ کون ہیں۔ ۔ ۔ آپ باہر کیوں نہیں جاتے۔ یہ شریف آدمیوں کا مکان ہے۔ شادو نے یہاں سے مکان تبدیل کر لیا ہے۔ آپ جائیے فوراً یہاں سے۔ ۔ ۔
سیاں : (پھٹی پھٹی نگاہوں سے دیکھتے ہوئے) یہ آواز بھی گھر اور بازار کی آوازوں میں کھو کر رہ گئی۔ یہ شادو کی آواز نہیں، اس سے اچھی ہو گی لیکن یہ شادو کی آواز نہیں۔ یہ شادو کی آواز نہیں۔ ۔ ۔
مراتب :ابے کون ہے ؟۔ ۔ ۔ نکل باہر شہدے کمینے۔ ۔ ۔
نفیس :گالی مت دوا سے فقط باہر نکال دو۔ ۔ ۔
عذرا :دیکھو مارو نہیں۔ ۔ ۔ گمراہ طالب علم ہے بے چارہ۔
مراتب :کئی بے چارے گمراہ طالب آتے تھے اسی کے یہاں۔ ۔ ۔ نکل باہر چھوکرے۔ ۔ ۔
(کشمکش، مراتب سے دھکا دے کر باہر گرٍا دیتا ہے۔ لڑکے کے گرنے کی آواز کے ساتھ ہی دروازہ بند ہوتا ہے۔ )
پردہ

دوسرا منظر
(اسی مکان کے سونے کا کمرہ۔ رات کا وقت ہے اور نفیس باہر سے آ کر کپڑے بدل رہا ہے۔ عذرا اس کا کوٹ اس کے موزے وغیرہ لے کر مناسب جگہوں پر رکھ رہی ہے۔ )
عذرا :بہت تھکے ہوئے نظر آتے ہو۔ آج بہت کام تھا کیا؟
نفیس :دفتر میں کوئی کام نہیں۔ البتہ دوسری باتیں تھوڑی ہیں پریشانی کے لیے۔
عذرا :دوسری باتیں کوئی اور مکان دیکھا؟
نفیس :مکان کے لیے بہت کوشش کی لیکن کوئی ہو تو بات بنے۔ یہ غریب ہونا بھی تو ایک لعنت ہے ورنہ ایسے ہی دو کمرے پینتیس روپیہ میں ملتے تھے۔
عذرا :پینتیس توہم کسی صورت نہیں دے سکتے۔ ۔ ۔ کھانا؟
نفیس :تمہارا خیال ہے میں ابھی تک بھوکا ہوں گا۔ دفتر کی ٹی شاپ سے بہتر الم غلم کھا لیا اور چائے پی لی۔ اس دفعہ بل بھی بہت بن جائے گا۔ جب کوئی گھبراہٹ ہوتی ہے تومیں کھانے پر زور دیتا ہوں۔
عذرا : اور مجھے کھانا پینا سب بھول جاتا ہے (کچھ یاد کرتے ہوئے) میں نے تو بیس بار کہا ہے پراٹھے ساتھ لے جایا کرو۔
نفیس :کون مصیبت میں پڑے (چارپائی پر بیٹھتے ہوئے) اور پھر دفتر میں لیمو نچوڑ بابو ہے۔
عذرا :لیموں نچوڑ بابو۔
نفیس :ہاں، اپنا ایک لیموں کسی کی دال میں نچوڑ کر برابر کا حصہ بن جاتا ہے۔
(دونوں خفیف سی ہنسی ہنستے ہیں۔ )
عذرا :تو پھر دو باتیں تو ہو نہیں سکتیں کہ بل بھی نہ بنے اور بھوک بھی اتر جائے۔
(نفیس اپنا منھ دونوں ہاتھوں میں دے لیتا ہے۔ )
عذرا :کیوں چپ چاپ بیٹھ گئے ؟
نفیس :تو اور کیا شور مچاؤں۔ دیکھو مجھے یوں تنگ نہ کرو عذرا مجھے آرام سے سو جانے دو۔
عذرا :آئے ہائے۔ ۔ ۔ راستہ دیکھتے دیکھتے آنکھیں پک جاتی ہیں۔ شادو کے گاہکوں کے ڈر کے مارے دن بھر کواڑ بند کیے پڑی رہتی ہوں اور اب۔ ۔ ۔
نفیس : (چڑ کر) نہ اندر پڑی رہا کرو۔ میں دیکھنے آتا ہوں کیا۔ خوب رنگ رلیاں منایا کرو۔ مجھ سے یہ ناز برداری نہیں ہونے کی۔
عذرا : (رونکھی ہو کر)تم بھی یوں کہو گے تو زندہ نہ رہوں گی۔
نفیس : اور میں کون زندوں میں ہوں۔ مردوں سے بدتر ہوں۔ محلہ والے الگ بدنام کرتے ہیں۔ ان کا خیال ہے کہ ایک شادو گئی اور اس کی جگہ دوسری شادو آ گئی۔
عذرا :محلہ والے جو چاہے کہتے پھریں۔ تمہارے سوا میں کسی کے سامنے جوابدہ نہیں ہوں۔ اگر تم بھی ایسی باتیں کرنے لگے تو میرا کون ٹھکانا ہے ؟۔ ۔ ۔ اب جو لوگ آتے ہیں تو اس میں میرا کیا قصور ہے ؟ میں تھوڑے کسی کو بلانے جاتی ہوں۔
نفیس :یہی تمہاری بھول ہے کہ تم میرے آگے جواب دہ ہو۔ تمہارا کیا خیال ہے کہ ہم خودکشی میں حق بجانب ہیں۔ ہم اپنے کو نہیں مار سکتے اگر چہ یہ جسم ہمارا اپنا ہے، اس کے لیے ہم حکومت کے سامنے جواب دہ ہیں۔ ۔ ۔ اس جسم کے علاوہ ہمارا ایک اخلاقی جسم بھی ہوتا ہے جسے پامال کرنے کے لیے ہم گلی کوچے کے ہر کتے، بلی، بچے بوڑھے کے حضور جواب دہ ہیں۔ ۔ ۔
عذرا :لیکن ہم نے کون اخلاقی خودکشی کی ہے۔
نفیس : اور تم تو کچھ بھی نہیں جانتیں۔ تم نے سنا ہے خلق کی آواز خدا کا نقارہ ہوتی ہے۔ بس وہ نقارہ بج رہا ہے اگر تمہارے کانوں میں اس کی آواز نہیں گونجتی تو تم بہری ہو۔ اس میں تمہارے کانوں کا قصور ہے۔
عذرا :اس کا یہ مطلب ہوا کہ چار آدمی تمہیں اٹھ کر برا کہنے لگیں تو تم برے ہو گئے ؟۔ ۔ ۔
نفیس :برا نہیں ہوا لیکن برائی سے آلودہ ضرور ہو گیا۔ میرا ایمان ہے دس آدمی مل کر تمہیں کہیں تمہارے چہرے پر ناک نہیں ہے تو ضرور سمجھ لو خدا نے تمہارا چہرہ بغیر ناک کے بنایا ہے اگر چہ آئینہ اس کے خلاف ہی گواہی دے۔
عذرا : (زہر خند سے) اچھی بات ہے۔ ۔ ۔ اگر ان دس آدمیوں نے کسی کو پاگل کر دینے کی سازش کی ہو تو۔
نفیس :نہیں نہیں، تم اسے مذاق میں ٹالنے کی کوشش نہ کرو۔ جس آدمی کو یہ بات کہنے کے لیے دس آدمی اکٹھے ہوں گے اس آدمی میں ضرور کوئی نہ کوئی نقص ہو گا۔ کم از کم وہ اس قابل ضرور ہو گا اس کا مذاق اڑایا جائے۔ ۔ ۔ اور جب یہ ہو جائے تو پاگل پنے اور ناک کے نہ ہونے میں صرف عقیدے کا فرق ہے نا۔ ۔ ۔ دیکھو تم پھر ہنس رہی ہو۔ ۔ ۔
عذرا :اچھا اگر تمہیں میرا ہنسنا ناگوار گزرتا ہے تومیں نہیں ہنستی لیکن اس میں میرا کیا قصور ہے اور اگر میرا قصور ہے تو تم بھی اس قصور میں برابر کے حصہ دار ہو۔
نفیس :آہ۔ ۔ ۔
(سرد آہ بھرکر لیٹ جاتا ہے۔ )
عذرا :دیکھو اب جانے دو۔
نفیس :نہیں نہیں، میں ہنس نہیں سکتا جب کہ میرا دل رو رہا ہے۔ محلہ والوں نے ہمارے خلاف ایک سازش کر رکھی ہے۔
عذرا :آج کی سازش ہے وہ۔ دو مہینے ہم کو یہاں ہو گئے۔ ۔ ۔ تب سے یہ باتیں ہو رہی ہیں۔
نفیس :تمہارے خیال میں تو صرف باتیں ہو رہی ہیں۔
عذرا : اور نہیں تو کیا ہو رہا ہے ؟
نفیس :چہ میگوئیوں کی حدسے گزر کر محلے کے معتبر آدمیوں نے ایک جلسہ کیا ہے جس میں یہ طے پایا ہے کہ ہمیں یہاں سے چلے جانے کا مشورہ دیا جائے۔
عذرا : (گھبرا کر) سچ۔
نفیس : اور تو کیا میں جھوٹ کہہ رہا ہوں۔
عذرا :نہ جائیں تو وہ کیا کریں گے۔
نفیس :کوئی ایک طریقہ ہے تنگ کرنے کا۔ وہ کئی طریقوں سے ہمیں پریشان کر سکتے ہیں۔
عذرا :مثلاً۔
نفیس :مثلاً۔ ۔ ۔ مثلاً وہ حاکمان شہر سے شکایت کر سکتے ہیں کہ مکان میں در پردہ فحاشی ہوتی ہے جو شادو کا کوئی گاہک آئے تو وہ پولیس کی معرفت ہمیں پکڑوا سکتے ہیں۔ وہ ہمارا حقہ پانی بند کر سکتے ہیں۔
عذرا :حقہ پانی کی تومیں پروا نہیں کرتی ہاں دوسری باتیں البتہ۔ ۔ ۔ لیکن تمہیں ان باتوں کے لیے لڑنا چاہئے۔ میں نہیں مان سکتی، قانون ایسا ہی موم کی ناک ہے کہ ان کی مرضی کے مطابق۔ ۔ ۔
نفیس :دماغ میرا بھی ان باتوں کو نہیں قبول کرتا۔ لیکن جب ٹھنڈے دل سے غور کرتا ہوں تو اس نتیجے پر پہنچتا ہوں کہ اگر دفتر والوں تک بھی یہاں کی باتیں پہنچ گئیں تومیں منھ دکھانے کے قابل نہیں رہوں گا۔ ۔ ۔ کتنے آدمی ہوں گے جو سمجھیں گے کہ یہ شریف انسان ہے زیادہ تعداد ان لوگوں کی ہو گی جو یہی سمجھیں گے کہ اپنی بیوی۔ ۔ ۔
عذرا :بس چپ رہو۔ ۔ ۔ کسی طرح یہاں سے نکل جاؤ خواہ ہمیں کسی چھپر کھٹ کے نیچے ہی کیوں نہ رہنا پڑے۔
نفیس :ہاں میں چلا جاؤں گا۔ میں اپنی عزت کے لیے لڑوں گا نہیں، شور نہیں مچاؤں گا۔ میں شریف انسان ہوں۔ تم جانتی ہو جب ہم نئے نئے اس مکان میں آئے تھے تو اس روز ایک طالب علم۔ ۔ ۔ کیا نام ؟۔ ۔ ۔ نام یاد نہیں رہا۔ بہرحال ایک طالب علم شادو سے ملنے آیا تھا اور اس نے کہا تھا کہ شریف آدمی اپنی بیٹی کی بے حرمتی دیکھ کر بھی عدالت کا دروازہ نہیں کھٹکھٹاتے۔ ۔ ۔ بس اس کے الفاظ میں آدمی کی جگہ خاوند اور بیٹی کی جگہ بیوی کر لو۔ ۔ ۔
عذرا :شرابی چھوکرے کی باتوں پر جاتے ہو؟
نفیس :باتیں بڑے کام کی کرتا تھا وہ شرابی چھوکرا۔
عذرا :اپنی عزت بچانے میں دامن پر جو داغ لگ جاتے ہیں وہ مبارک ہیں۔ ۔ ۔ تم زیادہ پرواہ نہ کیا کرو۔ آؤ میں تمہیں کچھ سنا دوں جی بہل جائے گا ذرا۔ ۔ ۔
نفیس :گویا پڑوسیوں کو اس بات کا ثبوت دیں کہ یہاں یہی دھندہ ہوتا ہے۔
عذرا :آئے ہائے۔ اور تو کیا بالکل گھٹ کے مر جائیں۔
(طنبورہ لے آتی ہے اور اسے چھیڑتی ہے۔ )
نفیس :عذرا تم نہیں سوچتیں ہم یہاں پردیسی ہیں۔ کل کلاں کو کوئی بات ہوئی تو ہماری حمایت میں یہاں ایک آدمی بھی کھڑا نہ ہو گا۔
عذرا :کوئی نہ ہو۔ ۔ ۔ خدا ہمارے ساتھ ہے۔
نفیس :خدا بہت دور کی بات۔ ۔ ۔ عذرا ٹھیرو۔ ۔ ۔ یہ آواز کدھر سے آ رہی ہے ؟
(کھڑکی سے باہر دو آدمی بات کر رہے ہیں۔ ان لوگوں کی شکلیں بھی دھندلی دھندلی نظر آتی ہیں۔ )
بنواری :دیکھ لو میں نہ کہتا تھا صاف آواز آ رہی ہے۔ ۔ ۔ اندر کوئی آدمی بھی ہے۔
مرزا شوکت :ہاں، اور کوئی ساز معلوم ہوتا ہے، ستار کے موافق۔
بنواری :میں نہ کہتا تھا ان کا یہاں ہونا ہماری بہو بیٹیوں کے لیے بہت خراب ہے مشکل سے شادو کو یہاں سے نکالا تھا۔ ۔ ۔ (وقفہ)۔ ۔ ۔ تواب کیا ارادہ ہے ؟
مرزا شوکت :میرے خیال میں اندر چل دو۔ ۔ ۔ جو روکا تو محلے کے نام پر شور مچا دیں گے اور جو نہ روکا تو ہمارا کام بنا بنایا ہے۔ ۔ ۔ عورت اچھی معلوم ہوتی ہے۔ تم نے اس دن اسے لفافہ خریدتے ہوئے دیکھا تھا۔
(مل کر ہنستے ہیں۔ )
مرزا شوکت :اب کرو ذرا ہمت۔ ۔ ۔
(نفیس یہ سن کر کھڑکی کی طرف آتا ہے۔ )
نفیس :خبردار کسی نے کھڑکی پر آنے کی کوشش کی۔ یہاں اب نہ شادو رہتی ہے اور نہ کوئی ایسی عورت۔
بنواری : (آہستہ سے)صاحب ہمیں شادو سے کوئی خاص وہ نہیں ہے۔
مرزا شوکت :ہم تو دو گھڑی۔ ۔ ۔
نفیس :میں کہتا ہوں کہ یہاں سے بھاگ جاؤ۔ ۔ ۔ اب شادو کی جگہ یہاں گرہستی رہتے ہیں اور ان کے متعلق آپ کا اندازہ سراسر غلط ہے۔
بنواری :اماں چلو یار۔ ۔ ۔ چل دو۔ ۔ ۔ جانے کی کیا مصیبت ہے۔
مرزا شوکت :یوں ہی چل دیں ؟اس محلے میں چراغ تلے اندھیرا ہم نہیں دیکھ سکتے۔ بلکہ ہم کل امام صاحب کو بھی ساتھ لے لیں گے، پھر دیکھیں گے لوگ کس طرح محلے میں بدکاری کر سکتے ہیں۔ (کچھ سوچ کر) لیکن یار تم یونہی ڈر گئے۔ جتنا یہ آدمی، اچھل اچھل کر آتا ہے مجھے اتنا ہی دال میں کالا معلوم ہوتا ہے۔ یہ ان لوگوں کا ڈھنگ ہوتا ہے اور میری بات سنو۔
(کانوں میں کچھ کہتا ہے جو نفیس اور عذرا کو سنائی نہیں دیتا۔ )
نفیس :بے ہودہ لوگ ہیں، کب تک ان کی باتیں سنے جائے آدمی؟
عذرا :میں کہتی ہوں سن کر بھی کچھ نہیں سننا چاہئے۔ کسی کا منھ تھوڑے ہی باندھا جاتا ہے۔ چپکے سے سو جاؤ۔
نفیس :ہاں سو جاؤ۔
(آہستہ آہستہ دروازہ کھٹکھٹایا جاتا ہے۔ )
لیکن یہ ہولے ہولے زنجیر ہلا رہا ہے کوئی
عذرا :وہی لوگ ہوں گے۔ ۔ ۔ اور ہوا کریں۔
نفیس :ہاں سو جاؤ۔
عذرا :لیکن مجھے نیند نہیں آتی۔
نفیس :تمہیں فکر کس بات کی ہے ؟گہنا پاترا اپنے پاس نہیں ہے۔ کواڑ بند ہی ہیں کھپ کھپا کر چلے جائیں گے۔
عذرا :خود مریں کھپیں۔ ہمیں ناحق پریشان کرتے ہیں۔ ۔ ۔ جب تک چلے نہ جائیں مجھے تو نیند آنے کی نہیں۔
نفیس :جو تمہارا مطلب ہے کہ فساد بپا کیا جائے تومیں اس کے حق میں نہیں ہوں۔ ۔ ۔ البتہ اسرار کرو گی توسر پھوڑنے کے لیے تیار ہوں۔ ۔ ۔
(اٹھنا چاہتا ہے۔ )
عذرا :نہیں نہیں۔ پڑے رہئے چپکے سے۔ میں تو یونہی کہہ رہی تھی کہ مجھے نیند نہیں آتی۔ آپ تو سارا دن دفتر میں کام کرتے کرتے تھک جاتے ہیں۔ آپ سو جائیں۔ ۔ ۔ (کچھ دیر بعد ڈر کر) میں کہتی ہوں جی۔ کواڑ ہل رہے ہیں جیسے کھل گئے ہیں۔
نفیس :ہیں۔ ۔ ۔ سنو!قدموں کی آوازیں آ رہی ہیں۔ گویا کوئی ڈیوڑھی میں کھڑا ہے، یا۔ ۔ ۔ اندر چلا آ رہا ہے۔ (بلند آواز)۔ ۔ ۔ کون ہے ؟
مرزا شوکت :ہم ہی ہیں صاحب۔ ۔ ۔ آپ کے محلہ دار بنواری لال اور مرزا شوکت۔ ۔ ۔
نفیس :آپ کیسے اندر چلے آئے۔ ۔ ۔ ؟آپ کو یہاں آنے کی اجازت کس نے دی؟۔ ۔ ۔
بنواری لال : (گھبرا کے) ہم کیسے اندر چلے آئے ؟۔ ۔ ۔ ہم یونہی اندر چلے آئے۔
(کھسیانی ہنسی ہنستا ہے۔ )
مرزا شوکت :ہم آپ کے پڑوسی ہیں، ہمیں امام صاحب نے بھیجا ہے۔
نفیس :لیکن یہ کون سا وقت ہے یہاں آنے کا؟۔ ۔ ۔ اور میرے خیال میں دروازہ بند تھا جس کا مطلب ہے آپ دروازہ توڑ کر داخل ہوئے ہیں۔
(عذرا سہمی ہوئی نظر آتی ہے۔ )
بنواری :ہم نے دروازہ توڑا نہیں۔ ۔ ۔ بس دھکیلا تھا کہ وہ باہر آ گیا۔ بات یہ ہے کہ پرانے کواڑ ہیں۔ ۔ ۔
نفیس :آپ محلے دار ہوتے تو ہر گز ایسا نہ کرتے۔ آپ یقیناً چور ہیں۔ ۔ ۔ اور مداخلت بے جا کر رہے ہیں۔ آپ کو کوئی حق نہیں پہنچتا کہ اس وقت کسی شریف آدمی کے مکان پر اجازت کے بغیر چلے آئیں۔ میں نے کھڑکی سے آپ کی گفتگو سن لی تھی۔ ۔ ۔ میں ایک سرکاری ملازم ہوں اور اپنی بیوی کے ساتھ یہاں رہ رہا ہوں۔ ۔ ۔ میری بیوی ایک گرہستن ہے کوئی بھگائی ہوئی عورت نہیں، داشتہ نہیں۔ (قریب پڑی ہوئی لاٹھی اٹھا لیتا ہے۔ ) یہاں سے فوراً چلے جائیے ورنہ مجھ سے برا کوئی نہ ہو گا۔
بنواری :دیکھئے صاحب، ہم یوں چلے جائیں گے، لیکن ہم آپ کی دھمکی سے ڈرنے والے نہیں ہیں۔
مرزا شوکت :بابو صاحب۔ ۔ ۔ ہم سب معاملہ سمجھتے ہیں (ذرا درشت لہجے میں) آپ نے بہو بیٹیوں والے محلے میں یہ اڈا بنا رکھا ہے۔ محلے والے سب آپ کو جانتے ہیں۔ آپ ایسا ہر آدمی یوں اپنے آپ کو گرہستی ہی کہتا ہے۔
عذرا : (گھبرائے ہوئے) اللہ مارو۔ اللہ کے قہر سے ڈرو۔ ہم گرہستی لوگ ہیں ہمیں یوں تو نہ بدنام کرو۔ ۔ ۔ تم لوگوں کے بھی کوئی ماں ہو گی، بہن ہو گی۔ اندازہ کرو اگر کوئی۔ ۔ ۔
مرزا شوکت :اجی ہم خوب سمجھتے ہیں یہ باتیں۔
بنواری :ہم یہاں تھوڑی دیر بیٹھنے کے لئے آئے تھے اور ہمیں کسی چیز کی ضرورت نہ تھی۔
نفیس :میں کہتا ہوں چلے جاؤ یہاں سے نکل جاؤ ورنہ جان سے ہاتھ دھو بیٹھو گے۔
عذرا : (نفیس کو روکتے ہوئے) خدا کے لیے۔ ۔ ۔ پروردگار لیے۔
بنواری اور مرزا شوکت: پہلے یہ لاٹھی رکھ دیجئے پھر ہم سے بات کیجئے۔
(دروازے سے پولیس انسپکٹر مائیکل اور ایک کانسٹبل داخل ہوتے ہیں۔ )
سب انسپکٹر مائیکل: ٹھہر جاؤ، رک جاؤ تم سب لوگ حراست میں ہو۔
نفیس : (لاٹھی چھوڑ کر)مدد۔ ۔ ۔ مدد۔ میں کہیں کا نہ رہا انسپکٹر صاحب۔ (تقریباً روتے ہوئے۔ ) میں منھ دکھانے کے قابل نہیں رہا۔ مجھے اور میری بیوی کو حراست میں لے لیجئے ہم دونوں آپ کی حراست میں اس آزادی سے اچھے رہیں گے۔
عذرا :میں آپ کے پاؤں پڑتی ہوں انسپکٹر صاحب(جھکتی ہے) ہمیں اس مصیبت سے بچائیے۔ ہم بے گناہ ہیں۔
سب انسپکٹر مائیکل: دیکھئے خاموش رہئے۔ میرے پاؤں پڑنے کی ضرورت نہیں ہے۔
کانسٹبل :یہ سب عیاری ہے انسپکٹر صاحب، ا ن سے پوچھئے کہ یہ کون آدمی ہیں۔
سب انسپکٹر مائیکل:پوچھنے کی کیا ضرورت ہے وہ تو صاف ظاہر ہے آج تک میں نے کسی مجرم۔
نفیس : (وحشیانہ انداز میں) کون مجرم انسپکٹر صاحب میں مجرم ہوں اور میری بیوی۔ ۔ ۔
سب انسپکٹر مائیکل:نفیس صاحب آپ ہی ہیں۔
مرزا شوکت :جی ہاں، یہ انہی کی نفاست ہے۔
سب انسپکٹر مائیکل:آپ چپ رہئے۔
نفیس :نفیس میرا ہی نام ہے۔ ۔ ۔ لیکن میں نے کوئی ایسا کام نہیں کیا جس کی رو سے میں مجرم گردانا جاؤں۔ یوں جیسا کہ میں نے غرض کیا آپ کی قید میں آنے کے لیے تیار ہوں۔
بنواری :جھگڑے کی نوبت یہی ہے جناب کہ بہو بیٹیوں کے اس محلے میں۔ ۔ ۔
سب انسپکٹر مائیکل:بکو مت!ان لوگوں کو میں تم سے زیادہ سمجھتا ہوں۔ یہ درست ہے ان لوگوں نے اس مکان کو فحاشی کا اڈہ بنا رکھا ہے۔ لیکن آپ اس وقت یہاں کیسے تشریف لائے ؟کیا آپ دن کے وقت ان لوگوں کو اخلاق کا سبق نہیں پڑھا سکتے تھے ؟
نفیس :فحاشی کا اڈہ۔ ۔ ۔ یہ آپ کہہ رہے ہیں ؟
مرزا شوکت :دن کے وقت؟۔ ۔ ۔ یہ آپ کیا فرما رہے ہیں ؟ہم لوگ دن بھر اپنے کام دھندے میں مشغول رہتے ہیں۔
کانسٹبل :دن کے وقت محلے دار انھیں کس طرح پکڑ سکتے ہیں ؟
سب انسپکٹر مائیکل:اگر اس کمرے میں محلہ داروں کے علاوہ کوئی اور شخص ہوتا جس کی بابت ان لوگوں کو تفصیلات نہ پتہ ہوتیں تو یہ لوگ مجرم لیکن اب یہ محلے دار بغیر کسی بین ثبوت کے اندر چلے آئے ہیں اور مداخلت بے جا کے مرتکب ہوئے ہیں۔
نفیس :جناب والا! میں کچھ عرض کرنا چاہتا ہوں۔
عذرا :ہائے میرے اللہ۔ ۔ ۔
سب انسپکٹر مائیکل: (نفیس اور عذرا سے) میں آپ سے بات کرتا ہوں (بنواری لال سے)آپ کا نام کیا ہے ؟
بنواری لال : (ادھر ادھر دیکھ کر) میرا نام ہے لیکن میں تو۔ ۔ ۔
سب انسپکٹر مائیکل:میں آپ کو نگلے نہیں جا رہا ہوں۔ ۔ ۔ میں صرف نام پوچھ رہا ہوں، اتنا گھبرائیے مت۔
بنواری لال :میرا نام ب۔ ۔ ۔ بنواری لعل ہے۔
سب انسپکٹر مائیکل: (مرزا شوکت سے) آپ کا اسم گرامی؟
مرزا شوکت :لیکن انسپکٹر صاحب ہمارا گناہ کیا ہے ؟طوائف کے دروازے تو خلق خدا کے لیے کھلے ہوتے ہیں۔ ہم جو اندر چلے آئے تو کیا جرم کیا۔ ۔ ۔ ؟
سب انسپکٹر مائیکل:خوب!۔ ۔ ۔ یہ خلق خدا کے الفاظ کا بھی خوب استعمال ہوا ہے۔ لیکن صاحب آپ تو محلے دار کی حیثیت سے تشریف لائے تھے تا کہ یہ اڈا اٹھوا کر محلے کے لوگوں کی بہو بیٹیوں کی آبرو بچائی ہے۔
مرزا شوکت : (گھبرا کر)نہیں میرا مطلب ہے۔ ۔ ۔
سب انسپکٹر مائیکل:آپ اپنا نام بتائیے ؟
بنواری لعل : (ڈرتے ہوئے) مرزا شوکت ہے۔
(مرزا شوکت غصہ سے بنواری لال کی طرف دیکھتا ہے۔ )
مرزا شوکت :لکھ لیجئے۔ میں کوئی ڈرتا تھوڑی ہوں۔ ہمیں امام صاحب نے بھیجا ہے تا کہ اس کی تحقیق کی جائے۔
سب انسپکٹر مائیکل:چلئے اس بات کی بھی تصدیق ہو جاتی ہے (کانسٹبل سے) سردار حسین انھیں باہر لے جاؤتا کہ دوسرے محلہ داروں کے ساتھ ان کی بھی گواہیاں پیش کی جائیں۔
مرزا شوکت :لیکن ایک بات کاخ یال رکھئے۔ ہم با عزت شہری ہیں اور ۔ ۔ ۔
سب انسپکٹر مائیکل:جی ہاں میں جانتا ہوں آپ تشریف لے جائیے۔
(کانسٹبل مرزا شوکت اور بنواری لال کو باہر لے جاتا ہے۔ )
(نفیس سے)۔ ۔ ۔ نفیس صاحب آپ کے آبائی گھر اور دفتر کا پتہ میرے پاس ہے۔ آپ پہلے جس جیوری ڈکشن میں رہتے تھے، وہاں تفتیش کی جا چکی ہے اس جگہ آپ کب سے رہ رہے ہیں۔
نفیس :عرصہ دو ماہ سے۔
سب انسپکٹر :نہیں آپ کو غالباً یہاں آئے دو ماہ اور چودہ دن ہوئے ہیں۔
عذرا :جی ہاں بس اتنے ہی دن ہوئے ہیں۔
سب انسپکٹر مائیکل: (نفیس سے) جب آپ یہاں آئے تھے تو آپ کو پتہ نہیں تھا کہ اس مکان میں شمشاد بائی طوائف رہتی تھی؟
نفیس :نہیں صاحب میں بنا جانے بوجھے اسباب اٹھوا کر ادھر چلا آیا تب سے ہر روز یہی قصہ ہوتا ہے۔ کوئی نہ کوئی ہمارا دروازہ کھٹکھٹاتا ہی رہتا ہے اور محلے والوں کو ہم پر شک کرنے کا موقع دیتا ہے اور یہ چپقلش جاری ہے۔
سب انسپکٹر مائیکل:چپقلش سے آپ کا کیا مطلب ہے ؟
نفیس :یہی۔ ۔ ۔ نیا مکان تلاش کرنے اور نہ ملنے کی مرزا شوکت اور بنواری ایسے لوگوں کے ساتھ جھگڑنے کی۔ آج تک میں یہی سمجھتا آیا تھا کہ ہمیں اپنے ہی گنا ہوں کا حساب دینا ہوتا ہے لیکن نقل مکانی کے اس تجربے بے ثبات کر دیا کہ انسان اپنے بچوں، اپنے ماں باپ، اپنے بھائی بہن، بیوی کے کردار کا بھی ذمہ دار نہیں ہوتا بلکہ اپنے پڑوسیوں کے قول و فعل کے لیے بھی گردن زدنی ہے۔
عذرا :تمام دن ہمارا دروازہ بند رہتا ہے۔ ۔ ۔ ہم ڈر کے مارے کواڑ کھولتے ہی نہیں، آپ کواڑ دیکھ کر پتہ کر لیجئے کہ یہ لوگ دروازہ اکھاڑ کر اندر آئے ہیں یا نہیں۔ ۔ ۔ اور ہم کچھ نہیں کہنا چاہتے۔ ہم کچھ نہیں کہہ سکتے۔ ۔ ۔ جتنا ہم زیادہ بولتے ہیں اتنا ہی گناہگار معلوم ہوتے ہیں۔ ۔ ۔ اگر آپ بھی ہمیں قصوروار سمجھتے ہیں تو جو سلوک آپ چاہیں کریں۔ ۔ ۔
سب انسپکٹر مائیکل:آج کا واقعہ میں نے اپنی آنکھوں سے دیکھا ہے۔ ۔ ۔ میں سب معاملہ کی جانچ پڑتال کر چکا ہوں۔ آپ بے حد شریف ہیں اور یہی آپ کا جرم ہے۔ ۔ ۔ (نفیس سے)کل آپ تھانے میں تشریف لائیے نفیس صاحب اور نیک چلنی کی ضمانت داخل کیجئے۔ ۔ ۔
نفیس :نیک چلنی کی ضمانت؟
عذرا :نیک چلنی کی ضمانت؟۔ ۔ ۔ (روکر) میرے اللہ۔
نفیس :انسپکٹر صاحب!۔ ۔ ۔ مجھے بد چلن ہی سمجھ لیجئے لیکن میں نیک چلنی کی ضمانت نہیں داخل کر سکوں گا۔ اس سے پہلے رشتہ داروں میں یہ بات نہیں پھیلی پھر ان میں بھی پھیل جائے گی۔ آپ مجھے گرفتار کیوں نہیں کر لیتے ؟میں حاضر ہوں (دونوں ہاتھ بڑھا دیتا ہے) میرے پاس کوئی ضامن نہیں۔ اس محلہ میں میرا کوئی واقف نہیں۔ کوئی ہمدرد نہیں۔
(عذرا بدستور رو رہی ہے۔ )
سب انسپکٹر مائیکل:آپ سمجھتے نہیں ہیں۔ ۔ ۔ صرف ایک کاغذی کاروائی مکمل کرنی ہے اگر کوئی ضامن نہ ملا تو میں آپ کو مہیا کر دوں گا۔ ۔ ۔ آپ محلے والوں سے ڈریں نہیں۔ ۔ ۔ میں آپ کی پوزیشن کو خوب سمجھتا ہوں مجھے آج سے اپنا ہی سمجھئے۔
نفیس :یہ آپ کیا کہہ رہے ہیں انسپکٹر صاحب ہم آپ کے قابل نہیں ہیں۔ ۔ ۔ آپ نہیں جانتے ہم آپ کے کتنے ممنون ہیں۔
سب انسپکٹر مائیکل:آپ خوف نہ کھائیے میں ہر طرح سے آپ کی مدد کرنے کو تیار ہوں۔ ۔ ۔ (عذرا سے)میری بیوی بھی آپ کی طرح گانے بجانے کا شوق رکھتی ہے۔ (نفیس سے)کیا آپ دونوں پیر کے روز میرے ساتھ چائے پی سکتے ہیں ؟
عذرا :ہم آپ کے بہت شکر گزا رہیں۔ آپ ان محلے والوں سے ہماری خلاصی کرا دیجئے۔ آپ کو بڑا ثواب ہو گا۔ ۔ ۔ مجھے خود آپ کی بیگم صاحبہ سے ملنے کا اشتیاق پیدا ہو گیا ہے، آپ جب چاہیں گے ہم آپ کے گھر پہنچ جائیں گے۔
سب انسپکٹر مائیکل: (قدرے گھبرا کر) چائے گھر پر ممکن نہ ہو سکے گی۔ ۔ ۔ دیکھئے نا ذرا میری بیوی بیمار رہتی ہیں۔ چائے باہر پی سکیں گے کہیں۔ ۔ ۔ پھر سیر تماشا ہو جائے گا، بہرحال میں عرض کروں گا، کل آپ تھانے تشریف لا رہے ہیں ؟میں چلتا ہوں۔ خدا حافظ!
(جاتا ہے۔ )
نفیس :جی ہاں کل صبح ضرور حاضر ہو جاؤں گا۔ ۔ ۔ خدا حافظ!
(وقفہ)
نیک چلنی کی ضمانت۔ ۔ ۔ چائے کی دعوت۔ ۔ ۔ کہیں اس سے بڑا گڑھا تو نہیں کھودا جا رہا ہے ؟
عذرا :میں کیا جانوں۔ ۔ ۔ ہائے میرے اللہ!
پردہ
تیسرا منظر
(وہی کمرہ جو پہلے منظر میں نظر آتا ہے۔ فرق صرف اتنا ہے کہ اب سب چیزیں قرینے سے رکھی ہیں۔ کونے میں طنبورا پڑا ہے۔ تپائی پر ایک نفیس پاندان رکھا ہے جس کے قریب گھنگرو پڑے ہیں۔ عذرا اس وقت کچھ کپڑے صندوق میں ڈال رہی ہے۔ کپڑے ڈالنے کے بعد وہ صندوق کو چارپائی کے نیچے ڈھکیل دیتی ہے تا کہ جگہ اور کشادہ ہو جائے نفیس ایک کھڑکی کے پاس بیٹھا ہے۔ کبھی کبھی بازار میں جھانک لیتا ہے۔ گویا کسی کے آنے کا منتظر ہے۔ )
عذرا :اب بالکل سر پر آ گئی تمہاری بھانجی کی شادی۔ ۔ ۔
نفیس :ارے ہاں۔ ۔ ۔ میں تو بالکل غافل ہی تھا۔ ۔ ۔ کب بیاہی جا رہی ہے نصیرہ؟
عذرا :ہفتہ اور ہفتہ، آٹھ اور آٹھ اور آٹھ اور سولہ اور تین دن اوپر۔ ۔ ۔ آج سے بیسویں روز شادی ہے بلاوے پر بلاوا آ رہا ہے اور تمہیں کوئی خبر نہیں ہے۔
نفیس :تم نے یہ جتا کر مجھے پھر فکر میں مبتلا کر دیا۔
عذرا :تین سے کم جوڑے دو گے تو عزت نہیں رہے گی اور ایک سوٹ دولہا کے لئے کہیں گے دس بر سے ماموں کما رہا ہے اور اتنا بھی نہ ہوا جو بھانجی کو جوشن ہی بنوا دیتا۔
نفیس :دو جوڑے۔ ایک سوٹ اور پھر ایک جوشن۔ ۔ ۔ یہ کیا بات کر رہی ہو تم۔ ہم مسلمانوں میں۔ ۔ ۔
عذرا :میں ٹھیک کہہ رہی ہوں۔ ہم ٹھیک مسلمان ہیں۔ لیکن راجپوت ہونے کی وجہ ے ہماری تمام رسمیں تو ہندوانہ ہیں نا۔
نفیس :میں کوشش کر رہا ہوں عذرا، لیکن دیکھنے والے اندھے ہیں کیا؟ تمہارے اپنے پہننے کو کپڑا نہیں ہے، اوپر سے سردیاں منھ پھاڑے آ رہی ہیں۔ مجھ سے جوہو گا وہ بنوا دوں گا۔
عذرا :یہ تو ٹھیک ہے لیکن اس سے کم میں عزت نہ رہے گی۔ کہے دیتی ہوں۔ آپا کہے گی۔ ۔ ۔ بھانجی کا بیاہ کب روز روز ہو گا۔ ۔ ۔ اس سلسلے میں تو ہمیں تھوڑے بہت ادھار سے بھی نہیں ڈرنا چاہئے۔ ۔ ۔ بہت نہیں تو گزارے موافق ہی سہی۔
(وقفہ)
نفیس :دیکھو میں کچھ انتظام کرتا ہوں۔ ۔ ۔ دراصل میں تمہارے متعلق ایک عرصے سے سوچ رہا تھا۔
عذرا :میرے متعلق مت سوچو۔ میرا تو گزارہ ہوہی رہا ہے۔ ۔ ۔ میں کہتی ہوں تم بھی بھلا دفتر کے دوسرے لوگوں کی طرح کیوں نہیں ہو جاتے ؟۔ ۔ ۔ اس تنخواہ میں گزارہ تو ہونے سے رہا۔ کبھی کبھار پیسے لے لینے سے کیا ہو جاتا ہے۔ یہ غریبی بھی تو سو گنا ہوں ایک گناہ ہے۔
نفیس :رشوت کے نام پر جسے اسرافیل کا صور سنائی دینے لگے وہ کیا کرے ؟ مر کر ہمیں خدا کو جواب دینا ہے۔
عذرا :تمہارا کیا خیال ہے باقی خدائی تمہاری طرح ہی ہے ؟وہ لوگ آخر کیا جواب دیں گے۔ جو جواب وہ دیں گے وہ تم بھی دے لینا۔ پھر تم اسے اپنی عادت نہ بناؤ ہو ایک آدھ بار کسی سے کچھ لے لیا۔ جب کام نکل گیا پھر منھ نہ لگایا کسی کو۔
نفیس :ہاں عذرا میں تم سے پہلے اس نتیجے پر پہنچ چکا تھا بلکہ ٹھیکیدار عرفانی کا گانٹھ لیا تھا اس نے یہاں چھ بجے آنے کا وعدہ کیا تھا۔ لیکن اس وقت ساڑھے چھ بجے ہیں اور اس کی شکل تک نظر نہیں آتی۔
عذرا : (قدرے آسائش کے ساتھ) کتنے پیسوں کی امید ہے۔
نفیس :یہی سات آٹھ سوکی ارے ایک پل کا ٹھیکہ توہے کہیں بڑے صاحب سے براہ راست نہ لے لے میں نے پہلے نہیں بتایا کہ تم مجھے برا بھلا نہ کہو، بلکہ مجھے یہ فکر دامن گیر تھی کہ تمام بات کھل جانے پر میں کیا منھ دکھاؤں گا۔ ۔ ۔ کچھ تمہیں حیران کر دینے کا ارادہ بھی تھا۔ ۔ ۔ اب تم خود ہی اس کی تعریف کر رہی ہو۔
عذرا : (کھڑکی کی طرف جاتے ہوئے) کس قسم کا آدمی ہے ؟ٹھہرو میں دیکھتی ہوں۔
نفیس :یہی دبلا پتلا سا آدمی ہے۔ ۔ ۔ لوکی سر پر ایک ڈھیلی ڈھالی ڈگمگاتی ہوئی ہیٹ پہنتا ہے۔ اس کی پہچان یہ ہے کہ پائجامہ کے ساتھ ہیٹ۔
عذرا : (کھڑکی سے جھانکتے ہوئے) ابھی تک تو دور گلی سے اس سرے پربھی کوئی نظر نہیں آ رہا ہے۔
نفیس : (سوچتے ہوئے) عذرا تمہاری اس تائید کے بدلے ایک قسم کی تسکین ضرور ہو گئی ہے لیکن مجھے ایک طرح کا رنج بھی ہوا ہے۔
عذرا : (ہنستے ہوئے) نفیس تم ساری زندگی اس قدر شریف رہے، مجھے بتاؤ تمہیں اس سے کیا حاصل ہوا۔ یہاں محلے میں جوہ ماری بدنامی ہوئی ہے اور اب تک رسوائی ہے اس کے لیے ہماری شرافت ہی تو ذمہ دار ہے۔ ۔ ۔ ابھی کل ہی امام باڑے کی ایک عورت سے میری لڑائی ہوئی اس نے جو کچھ کہا۔ ۔ ۔ الٰہی پناہ!اللہ دے اور بندہ لے۔ لیکن اب تو یہ باتیں دل پر اثر ہی نہیں کرتیں۔ ۔ ۔ (پان لگاتے ہوئے) یہاں آ کر ہمیں بھی پان کھانے کی عادت ہو گئی ہے۔
نفیس : (پان لیتے ہوئے) تم نے تو مجھے بتایا ہی نہیں عذرا۔
عذرا :کیا نہیں بتایا؟
نفیس :یہی لڑائی کے متعلق۔
عذرا :تم دفتر سے تھکے ماندے آتے ہو۔ میں نہیں چاہتی کہ تمہیں اس قسم کی باتیں سنا کر پریشان کیا کروں اور وہ عورت خود محلے بھرمیں مشہور ہے پہلے پہل لوگوں نے اس کے متعلق واویلا کیا لیکن جب اس نے سب کی ماں بہن کو دھر لیا تو سب چپ ہو گئے۔ اب اس سے کوئی الف سے ب تک نہیں کہتا۔ ۔ ۔
نفیس :یہ ہم ہی ہیں جنھوں نے سب کچھ شرافت سے سن لیا۔ ۔ ۔ اور اس لیے انھیں ہمارے منھ آنے کا موقع مل گیا۔
عذرا : (کھڑکی سے باہر دیکھتے ہوئے) ٹھہرو گلی میں کوئی آ رہا ہے۔ ۔ ۔ ٹھیکیدار عرفانی۔ ۔ ۔ میں دیکھتا ہوں۔ ۔ ۔ (کھڑکی کی طرف جاتا ہے۔ ) اوں ہوں۔ یہ تو کوئی کبوتر باز ہے۔ دونوں ہاتھوں میں کبوتر تھامے اور گامے شاہی جوتا پہنے جا رہا ہے۔ حمیدو کا پٹھا ہے۔ حمیدو پہلوان کا۔ ۔ ۔ (وقفہ) اب تو کافی دیر ہو گئی۔ عرفانی نے کہا تھا جو میں چھ بجے تک پہنچ گیا تو بہتر ورنہ نہیں آؤں گا(مایوسی سے) شاید بڑے صاحب کومل گیا ہو۔
(مایوسی سے) ہاں شاید بڑے صاحب سے مل گیا ہو گا۔ پیسہ ہماری قسمت میں نہیں ہے۔
نفیس :تواب کیا ہو گا؟۔ ۔ ۔ نصیرہ کی شادی پر۔ ۔ ۔
عذرا : (منھ لمبا کرتے ہوئے) تو گویا اب وہ نہیں آئے گا؟
نفیس :معلوم تو یہی ہوتا ہے۔ ۔ ۔ اچھا اگر کل دفتر میں وہ مجھ سے ملنے آیا تو میں ٹھیکے سے انکار کر دوں گا۔ صاف کہہ دوں گا میں نے ٹھیکہ وکرم سنگھ کو دے دیا ہے۔
عذرا :یہ وکرم سنگھ کون ہے ؟
نفیس :یہ دوسرا ٹھیکیدار ہے۔
عذرا :وہ کچھ نہیں دے گا؟
نفیس :اگر عرفانی نے کچھ نہ دیا تو پھر میں وکرم سنگھ سے کچھ نہیں لوں گا میں ہر ایک آدمی کو نہیں گانٹھ سکتا۔ اس سے میری نوکری خطرے میں پڑ جاتی ہے اور خود بھی میں۔ ۔ ۔
عذرا :ہاں یہ درست ہے۔
نفیس :اچھا وہ کون تھی امام باڑے والی عورت؟
عذرا :اجی وہی قاضی صاحب کی دوسری بیوی تھی۔ گز بھرکی لمبی زبان والی خود گھر گھر جھانکتی پھرے اور میرے منھ آئے۔ ۔ ۔ میں کیا پرواہ کرتی ہوں۔
نفیس :تم نے کچھ سنا دی ہوتیں۔
عذرا : اور تو کیا میں کم کرتی ہوں۔ ۔ ۔ اب نہیں میں ڈرتی کسی سے۔
(دروازے پر دستک سنائی دیتی ہے۔ )
لو تمہارے عرفانی آ گئے۔ ٹھہرو کھڑکی سے دیکھتی ہوں۔
نفیس :نہیں نہیں میں جاتا ہوں۔ ۔ ۔
(جاتا ہے۔ )
عذرا :یہ تمہارا عرفانی نہیں ہے۔ ۔ ۔ یہ تو کوئی اور ہی ہے موٹا سا آدمی سیاہ چشمہ لگائے ہوئے۔
نفیس : (دروازے میں رک کر) ہیں !۔ ۔ ۔ ٹھہرو میں خود دیکھتا ہوں۔ ۔ ۔
(جاتا ہے۔ )
عذرا :جانے یہ کون بلا آ گئی پھر۔ ۔ ۔ ہاں شاید عرفانی نے اپنا کارندہ بھیجا ہو۔ لیکن شکل سے تو کارندہ نہیں دکھائی دیتا۔ ۔ ۔ اوہ یہ چادر کس میلی ہے ؟
(اٹھ کر کمرے کو درست کرنے لگتی ہے۔ جلدی جلدی ایک صاف چادر بچھا دیتی ہے۔ کچھ دیر بعد نفیس گھبرایا سا داخل ہوتا ہے۔ )
نفیس :ارے بھئی یہ کوئی اور ہی صاحب ہیں۔ سیٹھ شیوبرت نام ہے۔
عذرا :عرفانی کے کارندے نہیں ؟
نفیس :نہیں۔ ۔ ۔ کہتے ہیں کہیں ایک برس بعد آتا ہوں۔
عذرا :اس شہر میں ؟
نفیس :ہاں۔ ۔ ۔ اور شادو کے یہاں۔
عذرا :تو آپ نے انھیں بتا دیا ہوتا۔ ۔ ۔
نفیس : (وقفہ)۔ ۔ ۔ (کچھ مجرمانہ انداز میں) میں کہتا ہوں۔ ۔ ۔
عذرا :کہو۔ ۔ ۔
نفیس :ادھر لے آؤں۔ ۔ ۔ دوسرے کمرے میں بٹھا رکھا ہے انھیں۔
عذرا :ادھر کس لیے ؟۔ ۔ ۔ خدا کے لیے یہاں سے مکان تبدیل کرو۔ ۔ ۔ پہلے اسے نکال دو۔
نفیس :اتنا امیر آدمی ہے، میں اسے یوں ہی کیسے نکال دوں۔ ۔ ۔ (ڈرتے ہوئے) سیٹھ کوئی چور تو نہیں ہے۔ اسے کچھ دیر عزت و تکریم سے بٹھاتے ہیں۔ ا س کے بعد خود چلا جائے گا۔
عذرا :تو بٹھا دو یہاں۔ ۔ ۔ میں دوسرے کمرے میں چلی جاتی ہوں۔ ۔ ۔ اول تو تمہیں معلوم ہی ہے محلے میں۔ ۔ ۔
نفیس :تمہیں نے کہا تھا کبھی کبھار رشوت لینے سے کیا ہو جاتا ہے۔ یہ غریبی بھی تو سو گناہوں کا ایک گناہ ہے۔
عذرا :اچھا تو یہ بھی ٹھیکیدار قسم کا آدمی ہے اور اس سے بھی رشوت ممکن ہے۔
نفیس :نہیں ایسی رشوت نہیں۔
عذرا : (گھبرا کر)تو پھر کیا ہے ؟
نفیس :تمہیں نے کہا تھا۔ ’’تم ساری زندگی اس قدر شریف رہے ہو مجھے بتاؤ تمہیں اس سے کیا حاصل ہوا۔ ‘‘محلے میں جو بد نامی ہوئی اس کے لیے ہماری شرافت ہی تو ذمہ دا رہے۔
عذرا :تو پھر تمہارا مطلب کیا ہے ؟
نفیس : (ڈرتے ہوئے)میں کہتا ہوں۔ ۔ ۔ ایک گانا سنا دو۔ سیٹھ صرف گانے کا شوقین ہے، سو ایک روپیہ ہو جائے گا گانا گانے میں کیا حرج ہے ؟
عذرا :یہ تمہیں کیا ہو گیا؟۔ ۔ ۔ لوگ کیا کہیں گے ؟
نفیس :لوگ پہلے کیا کچھ نہیں کہتے ؟۔ ۔ ۔ پھر ابھی تم کہہ رہی تھیں میں کسی سے نہیں ڈرتی۔ آہستہ سے کچھ سنادینا۔
عذرا :نہیں، میں کہتی ہوں تم بھی۔
نفیس :ارے صرف گانا ہی توہے۔ ۔ ۔ دیکھنا پتہ نہ چلے ذرا اچھی طرح پیش آنا (آواز دیتے ہوئے) سیٹھ جی!
(شیوبرت اندر چلے جاتے ہیں۔ )
شوبرت :آداب عرض کرتا ہوں۔
عذرا : (سخت گھبراہٹ میں)آداب عرض۔ ۔ ۔ آپ (کچھ سوچ کر تپائی کی طرف اشارہ کرتے ہوئے) ادھر بیٹھ جائیے۔
نفیس : (پلنگ کی طرف اشارہ کرتے ہوئے) تشریف رکھئے۔
شیوبرت : (بیٹھتے ہوئے)کہئے مزاج اچھے ہیں ؟۔ ۔ ۔ (بغیر جواب کا انتظار کیے) سال میں ایک بار شمشاد کے یہاں آتا ہوں۔ ۔ ۔ اب کے پتہ چلا اس کی جگہ آپ تشریف رکھتی ہیں۔ ۔ ۔ اور آپ کے سازندے کہاں ہیں ؟
نفیس : (مجرمانہ گھبراہٹ کے ساتھ)دراصل ان کی طبیعت اچھی نہ تھی اس لئے سازندوں کو رخصت کر دیا۔ (طنبورہ اٹھا کر عذرا کے ہاتھوں میں تھما دیتا ہے۔ ۔ ۔ عذرا کانپتے ہوئے ہاتھوں سے طنبورہ لے لیتی ہے۔ ) لیکن آپ جب کہ تشریف لے آئے۔ ۔ ۔
عذرا : (گھبرا کر) میں نہیں گا سکوں گی۔
نفیس :ذرا وہ سنا دو۔ ۔ ۔ جلد آ جا کہ جی ترستا ہے
(عذرا بڑی کوشش سے طنبورہ چھیڑتی ہے۔ دروازے میں مراتب نمودار ہوتا ہے۔ )
مراتب : (خفیف سی مسکراہٹ کے ساتھ) پان درکار ہوں گے سرکار کو؟
(پردہ گر جاتا ہے)
***
ماخذ: ’’نئے ڈرامے ‘‘
پروفیسر محمد حسن
انجمن ترقی اردو (ہند)
دہلی
 
ڈاکٹر محمد حسن

محل سرا

افراد :
نواب صاحب:کسی زمانے میں بڑے جاگیردار تھے۔ عمر تقریباً ۶۸ سال۔ چہرے سے وجاہت ٹپکتی ہے۔ رنگ گورا اور نقشہ تیکھا اس عمر میں بھی پوری بتیسی موجود ہے اور تندرستی اچھی ہے۔
منظور:نواب صاحب کا بڑا لڑکا جو جائداد کا سارا کاروبار سنبھالتا ہے۔ جاگیر داری ختم ہونے کے بعد فارم وغیرہ کی نگرانی کرتا ہے اور مکانات اور شہری جائداد کا کرایہ وصول کرتا ہے۔ عمر تقریباً چالیس سال۔ شکل و صورت سے رعب داب ٹپکتا ہے۔ عام طور پر مغربی لباس کا دلدادہ ہے۔
شاہانہ:نواب صاحب کی بڑی بیگم منظور کی ماں۔ بوڑھی ستر سالہ عورت ہے۔ سب بال سفید منھ میں ایک دانت بھی نہیں۔ چھوٹا قد، تندرستی خراب، پتلا دبلا جسم ہے جب بیٹھتی ہے تو بالکل گٹھری سی لگتی ہے۔ لباس میلا ہی پہنے رہتی ہے۔ چہرے پر مظلومیت کا بڑا اثر چھایا رہتا ہے۔
ریحانہ: منظور کی بہن۔ عمر تیس سے پینتیس سال کے درمیان۔ قبول صورت لڑکی ہے۔ لباس میلا اور بے ترتیب۔ قد نکلتا ہوا۔
سلیم:شاہانہ بیگم کا بھانجا۔ مصور ہے اور ان دنوں مہمان آیا ہوا ہے۔ عمر تقریباً تیس سال۔ خاصا وجیہہ نوجوان ہے جسم گٹھا ہوا۔ ناک نقشہ تیکھا ہے۔ اس کی آنکھوں میں ایک خواب آگیں کیفیت ہر وقت چھائی رہتی ہے۔
خادم:ایک بوڑھا۔ مگر تنو مند نوکر جو اس گھرانے کا وفادار اور قدیمی خدمت گا رہے اور جس سے گھر بھر میں کوئی پردہ نہیں کرتا۔
زمانہ:موجودہ
مقام:یو۔پی کا کوئی شہر
اس ڈرامہ کو اسٹیج کرنے میں تقریباً ڈیڑھ گھنٹہ لگے گا اور مخصوص موسیقی، روشنی اور صوتی اثرات کی ضرورت پڑے گی۔
پہلا سین
(پرانے زمانے کے ایک مکان کا وسیع صحن، جس کے ایک طرف دالان کے درد کھائی دے رہے ہیں، اور دوسری طرف باورچی خانہ ہے۔ باورچی خانہ کے کواڑ بند ہیں اور دالان کے باہر چوکی کی پر جانماز بچھی ہوئی ہے۔ ایک دو پلنگ صحن میں پڑے ہوئے ہیں۔ ان پر میلی چادریں بچھی ہوئی ہیں۔ ایک پلنگ پر شاہانہ بیگم بیٹھی ہوئی چھالیہ کتر رہی ہیں۔ بہت بوڑھی عورت ہیں۔ اونچی پیشانی اور کھلتی ہوئی رنگت سے ظاہر ہوتا ہے کہ کبھی خوبصورت رہی ہوں گی۔ )
شاہانہ بیگم :ریحانہ۔ ۔ ۔ ریحانہ(پھر چھالیہ کترنے لگتی ہیں)ریحانہ۔ ۔ ۔ کہاں ہے بیٹی!
ریحانہ : (دور سے آواز آتی ہے) آئی امی جان آئی۔
بیگم :ارے بیٹی منظور آتا ہو گا اور چائے ابھی تک تیار نہیں ہوئی۔
(ریحانہ دالان کی طرف سے صحن میں داخل ہوتی ہے۔ میلے کپڑے، بے دھلا سر جس سے کچھ لٹیں باہر نکلی ہوئی ہیں۔ دوپٹہ آدھے سے سر ہی کو ڈھکے ہوئے۔ ہاتھ میں صرف ایک چوڑی پڑی ہے۔ عمر ڈھلنے لگی ہے، اور چال میں وہ ٹھسک پیدا ہو گئی ہے جو جوانی کے اخیر ایام کی نشانی ہے۔ )
ریحانہ :امی!آج میری آنکھوں میں درد ہے اور ابھی دھوپ بھی نہیں اتری۔
بیگم :نہیں بیٹا منظور اب آتا ہی ہو گا۔ چاہئے تیار نہ ہو گی تو الٹے پاؤں واپس لوٹ جائے گا۔
ریحانہ :امی آخر میری بھی تو طبیعت خراب ہے۔ میں کیا کروں۔
بیگم :میری اچھی بیٹی میں اتنے چائے کے برتن لگاتی ہوں تو پانی رکھ دے۔
(ریحانہ باورچی خانہ میں داخل ہوتی ہے۔ کیتلی اٹھاتی ہے۔ برابر کے نل سے پانی بھرنے لگتی ہے۔ اتنے میں دروازے سے منظور داخل ہوتا ہے۔ یہ اس ویران ماحول میں اجنبی سا لگتا ہے۔ اس وقت ڈریسنگ گاؤن پہنے ہوئے ہے مگر بال ترتیب کے ساتھ بنے ہوئے ہیں۔ آنکھوں پر موٹے فریم کا چشمہ۔ ہاتھ میں اخبار ہے۔ )
منظور :ریحانہ بی!چائے تیار ہو گئی؟
ریحانہ :ابھی لائی بھائی جان۔
منظور : (اخبار پڑھنے لگتا ہے۔ صحن میں پڑے ہوئے تخت پربیتھ جاتا ہے۔ تھوڑی دیر خاموشی کے بعد) امی!(شبانہ بیگم جو برابر پلنگ پر بیٹھی ہیں۔ ۔ ۔ اور اندیشہ کے احساس کے ساتھ متوجہ ہو جاتی ہیں) سنی نواب صاحب کی باتیں۔
بیگم : (گھبرا کر)کیا کہا انھوں نے ؟
منظور :صاف بات ہے۔ کان کھول کر سن لیجئے۔ آپ ہوں یا آپ کے شوہر نامدار۔ میں طعنے تشنے نہیں سنوں گا۔ میں نے جائداد کے کام میں خون پسینہ ایک کر دیا۔ آپ کا ہزاروں کا قرضہ قریب قریب ادا ہی کر چکا ہوں۔ دن رات پلا رہتا ہوں اور پھر بھی مجھ ہی کو برا بھلا سننا پڑتا ہے۔
بیگم :آخر بتاؤ تو سہی اللہ میرے۔ کیا کہہ دیا انھوں نے ؟
منظور :اس جائداد پر قرضہ کرنے کا ذمہ دار کون ہے ؟میں یاوہ؟انھوں نے راتوں مجرے اور دنوں عیاشیاں کی ہیں یا میں نے ؟انھوں نے رام رنگی کی محفلیں اور اندر سبھا کے اکھاڑے سجائے ہیں یا میں نے ؟
بیگم : (ایک آہ سرد کے ساتھ) میں جانتی ہوں۔
منظور : اور میری تعلیم پر ایک پیسہ خرچ کیا گیا ہوتا تو آج میں بھی کسی بڑے عہدے پر ہوتا۔ ۔ ۔ میری پرداخت پر اتنی توجہ ہوتی تو میں بھی یوں تمہاری جائداد کی نچوڑی ہوئی ہڈی کو پھر سے چچوڑنے پر مجبور نہ ہوتا۔ میری تعلیم کے پردے میں ہوس کو پورا کیا گیا۔ میرے لیے جو استانیاں رکھی گئیں ان سے عشق لڑایا گیا اور جب میں جوان ہوا۔ ۔ ۔
بیگم :منظور بیٹا۔ ۔ ۔ ان باتوں سے کیا فائدہ۔ ۔ ۔ ؟
منظور :امی، مجھ سے نہیں سہا جاتا۔ میں اس لیے جوان ہوا تھا کہ تمہاری جائداد کا غم اپنے کمزور کاندھوں پر اٹھا لوں اور اب وہ مجھ سے کہتے ہیں کہ میں انھیں فاقے مار رہا ہوں۔ میں ان کے پھٹے پرانے کپڑوں کو رفو کرانے کے لیے بھی پیسے نہیں دیتا۔ مجھے طعنے دیے جاتے ہیں کہ میں ان کی بیوی اور بیٹی سے پکانے والی اور نوکرانی کا کام لیتا ہوں۔
بیگم :وہی تو کہتے ہیں ہم تو نہیں کہتے۔ میرے لال۔ ان کے کہنے کا کیوں برا مانتا ہے۔
منظور :۲۴ گھنٹے تمہارے کام میں دوڑ دھوپ کرتا ہوں۔ کچہری جاتا ہوں۔ کاغذات سے مغز پچی کرتا ہوں اور اس کا انعام یہ ہے۔ ۔ ۔ (بیگم کی طرف گھورتے ہوئے) میں تمہارے لیے اپنی کھال کی جوتیاں بھی بنوا کر دوں تو بھی یہی انعام ملے گا۔ میں تمہیں فاقے مارتا ہوں میں۔ ۔ ۔
بیگم :ارے توبہ ہے تو بھی کیا قصہ لے کر بیٹھ گیا۔
منظور :نہیں امی وہ ہوں یا تم یا کوئی اور میں کسی کو فاقہ نہیں مارتا۔ میں کسی سے نہیں کہتا کہ نوکرانی مت رکھو اور مجھے کھانا کھلاؤ۔ میں ہی فاقے مر جاؤں گا۔ میں آج ہی فوج میں نام لکھا سکتا ہوں کما کھا سکتا ہوں۔ جائداد کے پیچھے پھرنے والے کتے کوئی اور ہوں گے۔
(ریحانہ چائے لاتی ہے۔ چائے تخت پر رکھ دیتی ہے اور خاموش کھڑی ہو جاتی ہے۔ )
بیگم :اب یہاں کھڑی کیا ہو۔ اگالدان اٹھا کر لاؤ۔ سچ مچ میرا کام سبھی کو بھول جاتا ہے۔ آج انھوں نے کہا ہے کل تم لوگ کہو گے۔ نہیں مجھے منظور نہیں۔
(ریحانہ اگالدان لا کر رکھ دیتی ہے۔ قریب پلنگ پر بیٹھ جاتی ہے۔ )
(سلیم اندر داخل ہوتا ہے۔ آدرش وادی، خواب پرست نوجوان مصوری کا شوقین۔ )
سلیم :ارے کیا ہوا منظور بھائی۔ کیا منظور نہیں آپ کو ہم منظور کیے لیتے ہیں۔
منظور :آؤ بھائی سلیم چائے پیو۔
سلیم :بنائیے۔ شکر ڈیڑھ چمچہ۔ لیکن یہ آپ منظور نا منظور کیا کر رہے تھے۔
منظور :کچھ نہیں، ریحانہ کا ایک رشتہ آیا تھا۔
سلیم :اوہ۔ میں سمجھا۔ آیا تھا یا آیا ہے۔
منظور :تفصیل بتاؤں گا تو ریحانہ ابھی یہاں سے بھاگ جائے گی۔
سلیم :نہیں منظور بھائی مجھے اور کچھ جاننے کی ضرورت بھی نہیں۔ رشتہ آیا تھا ذات پات میں کھوٹ رہی ہو گی۔ آپ نے نامنظور کر دیا ہو گا ا ور بس بہت کافی ہے۔
(شاہانہ مسکراتی ہے۔ پھر چھالیہ کترنے میں مشغول ہو جاتی ہے۔ ریحانہ فیصلہ نہیں کرپاتی ہے کہ بیٹھی رہے یا چلی جائے۔ تھوڑی دیر کے بعد شاہانہ بیگم اٹھ کر چلی جاتی ہیں، اور دالان کی طرف غائب ہو جاتی ہیں)
منظور :آدمی یار تم عقل مند ہو۔ آپ کے شاہکار کاکیا حال ہے۔
سلیم :آپ میری تصویر کے بارے میں پوچھ رہے ہیں۔ اس نمائش سے پہلے ہی مکمل ہو جائے گی۔
منظور :تم نے حسن مغموم کا یہ تصور لیا کہاں سے۔
سلیم :بھائی وہ تصویر پوری ہو جائے تو دیکھئے گا۔ (ریحانہ کی طرف دیکھ کر) خیر یوں حسن مغموم کا تصور تو عام ہے بلکہ حسن بیمار کا بھی۔ ہاں مجھے ان دو آنکھوں سے یہ منظر دیکھنے کا اتفاق ہوا ہے۔ اب اگر ’’موت‘‘ کی تصویر بھی بناؤں گا تو اسے کسی کامنی کی شکل ہی میں تصور کرونگا۔ فانی کا وہ شعر یاد ہے تمہیں :
ادا سے آڑ میں خنجر کا منھ چھپائے ہوئے
مری قضا کو دہ لائے دلہن بنائے ہوئے
منظور :ہاں بہت سنا ہے۔
سلیم :یہ بھی کہہ دو مجروں اور رقص گا ہوں میں۔ بد مذاقی کی حد ہو گئی(رک کر) یاس حسن کی انتہا ہے اور موت زندگی کی یاس اور زندگی حسن اور موت یہی میرا فن ہے۔ تم بہی کھاتوں اور کھتونی والے اسے کیا سمجھو گے۔ ریحانہ بہن تم بہت کچھ سمجھیں اس فلسفے کو۔
ریحانہ : (جواب کھڑی ہوئی مکھیاں جھل رہی ہے بڑی معصومیت سے سر ہلا دیتی ہے)نہیں سلیم بھائی میں نہیں سمجھی۔
سلیم : (اسی طرح ریحانہ کو دیکھتے ہوئے (تم سمجھ سکتی ہو) مگر منظور کی طرف اشارہ کر کے) تم نہیں۔ ہر گز نہیں جس دن تم نے حسن اور غم، محبت اور ایثار کو سمجھ لیا حسن خودکشی کرے گا۔ خوبصورتی اپنے ہاتھ سے اپنا گلا گھونٹ لے گی اور آرٹ دم توڑ دے گا۔
منظور :باتیں کم کیا کرتے ہیں۔ (سگریٹ دیتا ہے) لو سگریٹ لو۔
سلیم : (سگریٹ لیتا ہے اسے جلاتا ہے)شکریہ۔
منظور :جی مگر وہ ہمارے ا سکیچ کا کیا ہوا۔
سلیم :لاؤ ابھی کھینچ دیں۔ طبیعت موزوں ہے۔ لو"Sitting"
منظور :جی نہیں معاف کیجئے آج مجھے کا م ہے۔
سلیم :لعنت ہے تمہارے کام پر۔ سچ کہتا ہوں اس وقت طبیعت رواں ہے۔
منظور :اس وقت تو کسی اور پر مشق ستم کیجئے۔ میں تو یہ چلا۔
(اٹھ کھڑا ہوتا ہے۔ )
سلیم :ریحانہ بہن کی تصویر کھینچ دیں۔
منظور :ہاں بھائی ریحانہ کی تصویر کھینچو۔ مگر ا سکیچ نہیں تصویر، عمدہ، صاف ستھری۔
سلیم :ان سے اچھی ہوئی تو بات ہے۔
ریحانہ :شکریہ، میں نہیں کھنچواتی تصویر۔
سلیم :لیجئے اور سنئے۔
منظور :نہیں ریحانہ کھنچوا بھی لو۔ اس میں حرج ہی کیا ہے۔ ۱۵۔ ۲۰ منٹ کی بات ہے۔
سلیم :ہاں بس خاکہ تیار ہو جائے پھر ہوتا رہے گا۔
ریحانہ :نہیں بھائی ہم سے نہیں بیٹھا جائے گا۔
سلیم :میری اچھی ریحانہ۔
ریحانہ :آپ نہیں سمجھتے کھانے میں دیر ہو جائے گی۔
منظور :ہو جانے دو آج ذرا دیر ہی سے کھالیں گے۔ تم جانتی نہیں ہو، سلیم بھی بہت بڑا آرٹسٹ ہے۔ یہ موقع روز روز تھوڑا ہی آتے ہیں۔
ریحانہ :اللہ، سلیم بھائی۔ آپ کتنا پریشان کرتے ہیں۔ اچھا لیجئے بیٹھ گئی۔
سلیم :شکریہ۔ بھئی منظور نیچے سے میرا کچھ سامان بھجوا دینا۔ اس دن سے وہیں پڑا ہے۔
منظور :اچھا۔
(جاتا ہے۔ )
بیگم : (باہر آتی ہے)ریحانہ۔
ریحانہ : (سلیم سے) دیکھا آپ نے (ذرا زور سے) جی امی۔
بیگم :دال دھو لی ہے نا۔
ریحانہ :ہاں امی۔
بیگم :اچھا تومیں نیچے سے ذرا سا پودینہ توڑ لاؤں۔
(بیگم چلی جاتی ہے۔ خادم سامان لے کر آتا ہے اور سلیم تصویر بنانے کے لیے سامان درست کرتا ہے۔ پنسل اٹھاتا ہے اور خاکہ بنانا شروع کرتا ہے ریحانہ تخت پر بیٹھی ہوئی ہے۔ )
سلیم :بھئی ہلو مت۔ ادھر دیکھو۔ پھر ہلیں۔ تمہیں ڈر لگ رہا ہے کیا؟
ریحانہ :نہیں تو سلیم بھائی۔
سلیم :تو پھر ادھر کیوں نہیں دیکھتیں۔
ریحانہ :میری آنکھوں میں تکلیف ہے میں دھوپ کی طرف نہیں دیکھ سکتی۔
سلیم :اوہ!مگر تم تو ابھی باورچی خانہ میں تھیں۔
ریحانہ :وہ تو کام کی مجبوری تھی۔
سلیم : اور یہ فن کی مجبوری ہے۔ اچھا خیر۔ نہ دیکھو(Profile) ہی سہی میں چاہتا تھا تمہاری تصویر مونا لزا اسٹائل میں بناتا۔
ریحانہ :کیا اسٹائل۔
سلیم :مونالزا اسٹائل۔ یہ ایک بہت بڑے فن کار کی تصویر ہے۔ ایک عورت تھی مونالزا۔ وہ جب تصویر کھنچانے بیٹھتی تو اس کے چہرے کے نقوش میں کوئی بات بھی مصور کوInspire نہ کر سکی مگر جب ایک روز مصور نے اس کے لیے۔ ۔ ۔ بہار کے شاداب ترین تازہ پھول اکٹھے کیے۔ ساون کے سب سے بیٹھے سب سے پیارے گیت صرف کیے تب اس کے لبوں پروہ مسکراہٹ کھیلی جو مصور کو ایک غیر فانی شاہکار کے لیے آمادہ کر سکی اور اس نے اس مسکراہٹ کو اسیر کر دیا۔ بہار کے حسین ترین پھولوں سے پیدا کی ہوئی مسکراہٹ، موسم گل کے سحر آلود نغموں سے جگمگاتی ہوئی مسکان۔
ریحانہ : (وہ بے اختیار ہنس پڑتی ہے اور اس کی آنکھوں سے آنسو کے دو قطرے ٹپک پڑتے ہیں اور اس کے رخسار پر بہنے لگتے ہیں۔ اس کی آواز رندھی ہوئی ہے) میں مسکرا نہیں سکتی سلیم بھائی۔
سلیم : (بے خبری میں تصویر پر نظر جمائے ہوئے) یہ میں جانتا ہوں (پھر نظر اٹھا کر ریحانہ کو دیکھتا ہے اور اب اس کی آواز میں حیرت ہے) مگر یہ تم رو کیوں رہی ہو۔
ریحانہ :آپ جانتے ہیں ؟
سلیم :ہاں جانتا ہوں۔ مگر تم رویا تو نہیں کرتیں۔
ریحانہ :مگر آج۔ ۔ ۔ (سسکی بھرتی ہے) جب آپ میری تصویر کھینچ رہے ہیں۔ یہ میری خوبصورت یا بدصورت شکل کو محفوظ کر رہے ہیں، تو سوچتی ہوں میں بھی ایک عورت تھی۔ میں بھی ایک انسان تھی اور میں بھی زندہ رہنا چاہتی تھی۔
سلیم :تم کو زندہ نہیں رہنے دیا گیا۔ میری تصویر ’’گلفام‘‘ دیکھی ہے تم نے، وہ جسے کنویں میں قید کر دیا گیا تھا۔
ریحانہ :میں تصویروں کی زبان نہیں سمجھتی اپنی آواز پہچانتی ہوں۔ پیدائش سے لے کر آج تک میں اس گھرکے قید خانے میں سزا بھوگ رہی ہوں عمر قید کی سزا۔ میرے ہاتھوں پر مصالحے کی مہندی رچی ہے۔ میرا سر ابابیل کا گھونسلا بنا ہوا ہے اور میرے کپڑے صافی کی رنگت کے ہیں۔ میرے کندھوں پر رات دن پکانے کا بوجھ ہے اور خوراک میں وہ سڑی دالیں اور جو ملے ہوئے آٹے کی روٹی۔ میں بھی پہننا چاہتی تھی۔ میں بھی ہنسنا چاہتی تھی۔ میں جینا چاہتی تھی اور مجھے زندہ دیوار میں چن دیا گیا کہ میں ایک بڑے جاگیردار کے گھرانے کی بیٹی ہوں۔
سلیم : (ایک برش اٹھاتا ہے اور اسے اپنے گال سے لگا کر بیٹھا ہوا ریحانہ کو تکتا رہتا ہے پھر زیرِ لب کہتا ہے) حسن مغموم۔ یاس اور حسن۔ ۔ ۔
ریحانہ : (اپنی بات جاری رکھتے ہوئے)سلیم بھائی آپ میری تصویر بنا رہے ہیں اس دنیا کے لیے جسے میں نے نہیں دیکھا۔ جس کی سیر نہیں کی (اس کی آواز میں تندی ابھر آئی ہے) میں اس دنیا میں اپنی یادگار بھی کیوں رہنے دوں۔ ریحانہ کوئی نہیں تھی۔ وہ کبھی پیدا نہیں ہوئی۔ اس نے دنیا میں قدم نہیں رکھا۔
سلیم :ریحان بہن۔ میں تمہاری یہ تصویر بناؤں گا۔ ۔ ۔ ضرور بناؤں گا۔
ریحانہ :نہیں سلیم بھائی۔ آپ کی تصویر پوری نہیں ہو گی(اٹھتی ہے اور سروتے سے کنویس کو چیر ڈالتی ہے) نہیں سلیم بھائی نہیں ! ریحانہ کا کوئی نشان باقی نہیں رہے گا۔ میں نہیں چاہتی کوئی مجھے دیکھے ریحانہ کو جو وہ تھی اور اس ریحانہ کو نہ دیکھ سکے جو وہ بننا چاہتی تھی۔
(اپنا چہرہ ہاتھوں میں چھپا لیتی ہے اور دالان کی طرف دوڑتی ہوئی چلی جاتی ہے اور ایک سسکی کے ساتھ پلنگ پر گر پڑتی ہے اور تکیے میں منہ چھپا کر رونے لگتی ہے۔ )
سلیم : (گھبرایا ہوا کچھ دیر اپنے کنویس کو دیکھتا رہتا ہے۔ پھر سگریٹ کا ایک کش لیتا ہے اور دالان کی طرف جاتا ہے۔ ادھر سے شاہانہ بیگم آ جاتی ہیں۔ سلیم بھی دالان میں جا کر پنکھے سے ہوا کرنے لگتا ہے۔ )
بیگم ریحانہ بیٹی!
سلیم :خالہ جان ادھر آئیے۔
بیگم :کیا ہوا؟
سلیم :ریحانہ بہن کی طبیعت یکایک خراب ہو گئی ہے۔
بیگم :اوہ، میری بچی کو پھر دورہ پڑ گیا۔ بیٹا سلیم۔ سلیم۔ تم ذرا پانی لیتے آؤ۔ میں گلاب چھڑکتی ہوں۔ پنکھا کہاں ہے۔ اے ہے خدایا اپنا فضل کیجیو۔
(سلیم پانی لاتا ہے بیگم پانی کے دو ایک چھینٹے اس کے منھ پر دیتی ہیں اور گلاب سنگھاتی ہیں۔ سلیم پنکھا جھلتا ہے۔ )
(اتنے میں قدموں کی چاپ سنائی دیتی ہے۔ نواب صاحب داخل ہوتے ہیں۔ ایک کالی ریشمی شال اوڑھے ہوئے آنکھوں پر سونے کے فریم کا چشمہ ہے۔ آواز میں شاہانہ وقار ہے۔ )
نواب : (دروازے ہی سے) بیگم، بیگم، کہاں ہو۔
(سلیم کے ہاتھ پنکھا ایک لمحہ کے لیے رک جاتا ہے۔ بیگم صاحبہ اپنے ہوش و حواس کو پھر یک جا کر لیتی ہیں اور ریحانہ کی طرف سے بے خبر ہو کر نواب صاحب کی طرف متوجہ ہو جاتی ہیں جیسے ریحانہ کو کچھ ہوا ہی نہیں ہے اور نواب صاحب کی آمد اس سے کہیں زیادہ اہم بات ہے۔ چہرے پر گھبراہٹ کے آثار نمایاں ہیں۔ آخر گھبرا کر پلنگ سے اٹھ جاتی ہیں اور نواب صاحب کی طرف چلتی ہیں۔ )
نواب :بیگم یہ لو عظیمہ کا خط آیا ہے۔ اس نے لکھا ہے کہ اسے تمہارے ہاتھ کا بنا ہوا حلوہ بہت پسند آیا ہے۔
بیگم : (اس طرح جیسے سنا ہی نہیں)ریحانہ کی طبیعت یکایک خراب ہو گئی ہے۔
نواب :ریحانہ کیسی ہے ریحانہ؟وہی دورہ پڑ گیا ہو گا۔
بیگم :ہاں میں نیچے پودینہ لینے گئی تھی اسے میرے پیچھے ہی دورہ پڑ گیا۔ آپ کے پاس کوئی مجرب دوا ہو گی۔
نواب :ہاں بھتیجا ہوں۔ ۔ ۔ (ہاتھ میں جو خط ہے اسے پڑھتے ہیں) مگر دیکھو یہ عظیمہ نے لکھا ہے کہ مجھے تمہاری بیگم کے ہاتھ کا بنا ہوا حلوہ بہت ہی پسند آیا دیکھا تم نے بڑی ہی شریر ہے یہ تمہاری بیگم کے ہاتھ بنا ہوا، گویا تم اس کی کچھ ہوہی نہیں۔ اس نے لکھا ہے۔ ہمارے علاقہ میں ان دنوں شکار کی بڑی کثرت ہے۔ تمہیں بھی تو شکار کو گئے ہوئے بہت دن ہو گئے ہیں، ادھر آ جاؤ تو بہت اچھا ہو تمہارے ساتھ ہی چلی چلوں گی۔ اب تو منظور میاں کا غصہ بھی اتر گیا ہو گا۔
بیگم :ریحانہ کو ابھی تک ہوش نہیں آیا۔ تم ذرا جلدی جا کر کوئی۔ دوا بھیج دو۔
نواب :ہاں بیگم۔ مگر تم نے یہ خلوص کسی میں نہ پایا ہو گا۔ لاکھ تمہاری سوکن ہے مگر تمہارے حلوے کی کتنی تعریف لکھی ہے اس نے تمہاری طبیعت کو پوچھا ہے اور لکھا ہے کہ :
(خط دیکھنے لگتے ہیں۔ )
(اتنے میں سلیم پانی لینے کے لیے باہر آتا ہے۔ )
سلیم : (پانی کا گلاس ہاتھ میں اور کچھ گھبرایا ہوا ہے) خالو میاں آداب۔ (بیگم سے) خالہ ریحانہ ابھی تک بے دم پڑی ہوئی ہے اس کی طبیعت ٹھیک نہیں ہوئی آپ۔ ۔ ۔ !
نواب :ارے میاں سلیم جیتے رہو۔ بھئی یہ تمہاری دوسری خالہ کا خط آیا ہے۔ ایک رشتہ سے تو عظیمہ بھی تمہاری خالہ ہی ہوئی۔ تمہاری ماں کے رشتے سے نہ سہی ہمارے رشتے سے سہی۔ دیکھو تو سہی اسے تم ابھی تک یاد ہو۔ لکھا ہے کہ سلیم میاں نے ابھی تک میری تصویر نہیں بنائی۔
سلیم :نواب صاحب بناؤں گا ضرور تصویر بناؤں گا۔
(پانی لے کر چلا جاتا ہے۔ )
نواب :سنو تو میاں سلیم(سلیم چلا جاتا ہے) اس نے یہ ایک تصویر بھی بھیجی ہے۔ لو جی بیگم تم دے دینا سلیم کو میں جاتا ہوں۔ خط لانے والا جواب کے انتظار میں بیٹھا ہے اور سنو۔ ریحانہ کی دوا بھیجوں۔
بیگم :ہاں ضرور۔ ۔ ۔ !
(چلے جاتے ہیں۔ )
(ریحانہ کو بھی ہوش آ گیا ہے اور اب وہ دو تکیوں سے لگی بیٹھی ہے۔ )
سلیم :ریحانہ اب کیسی ہو۔
ریحانہ :آپ پریشان نہ ہوں سلیم بھائی۔ یہ دورہ مجھے کبھی کبھی پڑ جاتا ہے۔ ابھی ٹھیک ہوئی جاتی ہوں۔
سلیم :خالہ جان اس کو باقاعدہ علاج کی ضرورت ہے۔
بیگم : (تھوڑی دیر چپ رہتی ہے) جانتی ہوں مگر دیکھا نہیں تم نے۔ تم نے کچھ نہیں سنا۔ بیٹی بے ہوش پڑی تھی اور ابا اپنی نئی نویلی دلہن کا خط سناتے پھر رہے تھے اور ہاں (میز پرسے تصویر اٹھاتی ہیں) میں تو بھول ہی گئی۔ ان کی تصویر بنانی ہے تمہیں۔
سلیم : (تصویر لے لیتا ہے اور اسے غور سے دیکھتا ہے)تصویر بنانا ہی میرا پیشہ ہے مگر خالہ اس صورت میں کون سی ایسی دلکشی ہے جو بوڑھے دل سے اولاد کی مامتا چھین سکتی ہو۔
ریحانہ : (مسکراتی ہے) سلیم بھائی۔ تصویر بنانے والوں پریہ باتیں اچھی نہیں لگتیں۔ یہ بات دیکھنے والوں پر چھوڑئیے۔
بیگم :ایک اولاد کی مامتا کیا؟گھر کا چین زندگی کا سکھ اور ۔ ۔ ۔ !
ریحانہ :آپ ٹھیک نہیں کر رہی ہیں امی۔ ایک کو سارا الزام دے کر باقی سب کو بے گناہ ٹھہرانا ٹھیک نہیں۔ یہ عظیمہ ہے۔ اس سے پہلے صغیرن، مشتری اور ۔ ۔ ۔ اور ۔ ۔ ۔
(انگلی کاٹ لیتی ہے۔ )
بیگم :ٹھیک ہے میاں سلیم۔ جب اپنے ہی گھر کو آگ لگی ہو تو بجلی کو کیوں کوسیں۔ ان کا ہی دماغ ٹھیک نہیں۔ انھیں رنگ رلیوں سے فرصت نہیں۔ نہیں تو۔
سلیم : (دہراتا ہے)نہیں تو۔ ۔ ۔ !
بیگم :نہیں تو میرے گھر میں بھی شہنائیاں بجتیں۔ میری لڑکی کے ہاتھ پیلے ہوتے۔ میں بھی منظور کی بہو اور بیٹوں کو دیکھتی۔ اپنے آنگن میں نواسوں اور پوتوں سے گود بھرے بیٹھتے اس گھرکی نیو کس منحوس گھڑی پڑی تھی کہ یہاں اندھیرا منڈلاتا ہے۔ دکھ اور درد کے سوا۔ ۔ ۔ !
ریحانہ :امی ہم نے ایک مرگھٹ میں جنم لیا ہے۔
سلیم :مگر جائیداد کا انتظام تو منظور کے ہاتھ میں ہے ؟
(ریحانہ کی آنکھیں چھلک جاتی ہیں۔ )
بیگم :ہاں۔ ۔ ۔ اسی لیے جائیداد کی آمدنی اسی کے لیے ہے۔
سلیم : اور وہ چاہیں۔
بیگم :مگر وہ کیوں چاہیں۔ وہ جو چاہتے ہیں انھیں ملتا ہے اچھے سے اچھے کپڑے اور پوشاک سواری کو بگھی اور عیاشی کے لیے روپیہ اور ہمارے لیے بس ان کے پاس فصل میں بھروا دینے کے لیے جنس ہے اور گیہوں چنے کی ملی ہوئی روٹی۔
سلیم :آپ ان سے کہتی کیوں نہیں ہیں۔
بیگم :تم ابھی یہاں نئے نئے ہو۔ جو کچھ ملتا ہے وہ بھی بے مانگے نہیں ملتا۔ (کھانسی اٹھ جاتی ہے اور دیر تک کھانستی رہتی ہیں) ایک نوکرانی نہیں جو کھانا پکا سکے۔
سلیم : (خالی نظروں سے گھرکی اونچی دیواروں کو دیکھنے لگتا ہے) مجھے یقین نہیں آتا۔
(ریحانہ ہنس پڑتی ہے۔ )
بیگم :تم ابھی بچے ہو سلیم، مگر ایک کام یاد رکھنا۔
سلیم :کیا؟
(ریحانہ اٹھنے لگتی ہے۔ )
سلیم :ریحانہ تم کہاں جا رہی ہو؟
ریحانہ :اب رات کی دیگچیوں کے لیے مصالحہ پیسوں گی۔
سلیم :خالہ انھیں مت جانے دیجئے۔ طبیعت زیادہ خراب ہو جائے گی۔
بیگم :بیٹی میں پیس لوں گی تو مت جا۔ ٹھہر جا۔ ابھی۔
ریحانہ :امی ٹھنڈے پانی میں ہاتھ کروں گی تو تمہاری کھانسی پر زور ہو جائے گا۔
(امی منھ پھیر کر سلیم سے باتیں کرنے لگتی ہیں اور سلیم ریحانہ کو باورچی خانے کی طرف جاتے دیکھتا رہتا ہے۔ )
بیگم :ہاں بیٹا سلیم ایک کام یاد رکھنا۔ یہ تصویر عظیمہ کی ضرور بنا دینا۔ جلدی بنا دینا۔ وہ تم ہی سے نہیں مجھ سے بھی خفا ہو جائیں گے۔
سلیم :کیوں ؟
بیگم :کہ شاید میں نے ہی تم کو بنانے سے روکا ہو گا۔
سلیم :آپ۔ ۔ ۔ انہیں شادی کرنے سے نہ روک سکیں (گھنٹہ پانچ بجاتا ہے)تو مجھے تصویر بنانے سے کیوں روکیں گی؟
بیگم :وہ اسے نہ سمجھیں گے۔
سلیم :وہ تو وہ، میں بھی اسے نہیں سمجھ سکتا۔
بیگم :تم ابھی یہاں نئے نئے ہو۔
سلیم :خالہ جان۔ خدا نہ کرے میں کبھی اس دیس میں پرانا ہو جاؤں۔ آپ خالو جان کی حالت دیکھتی ہیں اور انھیں خوش رکھنے کی کوشش کرتی ہیں۔ ان کی آگ میں جلتی ہیں اور ان پر پھول چڑھاتی ہیں۔ ان کے زہر کو اپنے ہی میں نہیں۔ اس کی ایک ایک اینٹ میں سموتی ہیں اور ان کی پوجا کرتی ہیں۔ اس مندر کو مرگھٹ بنانے کی ذمہ دار آپ ہیں خالہ جان آپ۔
بیگم : (چہرے پر غصہ کے آثار پیدا ہوتے ہیں، مگر ضبط کرتی ہیں۔ برابر سے پاندان اٹھا لیتی ہیں اور پان لگانے میں دھیان لگاتی ہیں) مجھے چھوٹوں کی زبان سے طعنے سننے کی عادت نہیں سلیم۔ ہمدردی کرنے سے گئے اور میرے ہی کلیجے میں کچوکے لگانے آئے ہو۔
سلیم :خالہ جان۔ میں یہ سب کچھ نہیں جانتا، ہو سکتا ہے میں ہی غلط کہتا ہوں۔
بیگم :بالکل، تم عورت کا فرض نہیں جانتے ؟
سلیم :نہیں جانتا، پتھروں کے سامنے انسانوں کے سر کاٹ کر چڑھا دینے کا رواج زمانہ ہوا اٹھ گیا۔ آپ اسے فرض کہتی ہیں یہ فریب ہے، بہت بڑا فریب جس کے آسرے پر پچھلی نسل نے آنے والی نسل کی جوان ہڈیوں پر اپنا محل چنا اور آج یہ نسل پھر اسی فریب کو دہرانا چاہتی ہے۔ لفظ انسان کا ایجاد کیا ہوا سب سے بڑا فریب ہے۔ محبت؟فرض؟؟ اور قربانی؟؟؟لفظوں کے رنگین جال!مجھے ان بے ہودگیوں سے نفرت ہے، ہمدردی نہیں۔ آپ نہیں جانتیں خالہ جان، مگر میرے آرٹ کی یہی پرتگیا ہے کہ وہ انسان کو ان لغو توہمات سے آزاد کرائے۔ انسان آزاد پیدا ہوا ہے اور اسے ساری ہی زنجیریں شکست کرنی ہیں۔
(خادم داخل ہوتا ہے۔ بوڑھا نوکر ہے۔ قمیض اور پاجامے میں ملبوس ہے جو زیادہ صاف ستھرے نہیں ہیں۔ اس بات کا خاص خیال رکھا جائے کہ خادم کوکسی طرح مضحک کردار نہ بنایا جائے۔ نہ اس کی شکل پر غریبی، نفاست یا زیادہ سے زیادہ بڑھاپے کے آثار پیدا کر کے اسے قابل رحم بنانے کی کوشش کی جائے۔ یہ ایک معمولی نوکر ہے جس میں مضحکہ یا ہمدردی پیدا کرنے والی کوئی صفت نہیں ہے۔ خادم کے ہاتھ میں دوا کا پیکٹ اور شیشی ہے۔ )
خادم :بیگم صاحب۔ نواب صاحب نے دوا بھیجی ہے۔
(بیگم دوا لے لیتی ہے۔ )
خادم : (سلیم سے) آپ کو منظور میاں بلا رہے ہیں۔
سلیم :ابھی آتا ہوں۔
خادم :انھوں نے کہا ہے کہ ساتھ ہی لے کر آنا۔
سلیم :اچھا۔
(سلیم چلا جاتا ہے۔ )

دوسرا سین
(منظور کی اسٹڈی کا کمرہ۔ نہایت آراستہ و پیراستہ۔ لکھنے کی بھاری میز کے سامنے گھومنے والی کرسی پر منظور بیٹھا ہوا ہے۔ دونوں طرف مختلف فائل اور کاغذات ہیں جن پر خوش رنگ پیپرویٹ ہیں، بیچ میں نیلے رنگ کے شیڈ کا ایک ٹیبل لیمپ رکھا ہے۔ اس کے برابر قلم دان اور دوسری مختلف چیزیں آفس کی گھنٹی وغیرہ ہیں۔ برابر ہی چھوٹا سا شلف کتابوں سے پر ہے۔ دوسری طرف ایک چھوٹی سی میز پر مختلف کتابیں جن میں دو ایک کھلی ہوئی رکھی ہیں۔ یہ سب کتابیں بہت ضخیم ہیں اور قانون کے مختلف موضوعات پر ہیں۔ جس وقت سلیم داخل ہوتا ہے منظور کا ٹیبل لیمپ روشن ہو چکا ہے اور وہ اپنے ہاتھ میں ایک قلم لیے ہوئے ہے اور اس کا اوپری حصہ اس کے گال کو چھو رہا ہے۔ اس کے سامنے ایک فائل ہے۔ کپڑے اس وقت سادہ پہنے ہوئے ہے۔ اسٹیر پہن رکھا ہے نائٹ کیپ برابر میز پر رکھی ہے۔ چشمہ لائبرتری ریم کا لگا ہوا ہے۔
میز کے سامنے دو کرسیاں پڑی ہوئی ہیں اور ایک کرسی دائیں طرف اور اوپر سے روشن دانوں میں ہلکی روشنی ہے جواس اثنا میں مدھم ہو جاتی ہے اور بعد کو بجلی اور بارش کے اثرات انھیں کے ذریعہ دکھائی دیتے ہیں۔ قدموں کی چاپ ہوتے ہی منظور فائل سے نظریں اٹھاتا ہے، چشمہ اتارتا ہے۔ )
منظور :اما آدمی ہویا افلاطون۔ ڈیڑھ گھنٹے سے تمہیں بلا رہے ہیں۔ ایک بڑا با ذوق آدمی آیا تھا۔ تمہاری کچھ تصویروں کا سودا کر دیتے۔
سلیم :مگر مجھے تو ابھی اطلاع ملی۔
منظور :خیر جانے دو۔ تمہاری قسمت؟میں نے تو اسے اتنی دیر روکے رکھا کہ شاید تم آ جاؤ۔ بھئی بات یہ ہے کہ یہ ہیں شہر کے مشہور رئیس بابو جگن ناتھ شراب کی ہول سیل کی دکان ہے۔ درآمد برآمد کاروبار ہے۔ اس قصبے سے گزر رہے تھے مجھ سے ملنے چلے آئے تھے۔ بڑا خوش مزاج آدمی ہے یار۔
سلیم :سچ؟
منظور :اس کا ڈرائنگ روم دیکھو گے تو طبیعت خوش ہو جائے گی۔ بڑے بڑے فن کاروں کے شاہکار ملیں گے۔ میں نے ’’امرت سہگل‘‘ کی سب سے پہلی تصویر اسی کے ڈرائنگ روم میں دیکھی تھی اور ہاں ریحانہ کی تصویر بنائی تم نے ؟
سلیم : (سگریٹ منھ کو لگاتے ہوئے) نہیں۔
(بادل کی گرج اور کڑک سنائی دیتی ہے۔ روشن دانوں سے یہ باہر کا سماں دکھائی دیتا ہے۔ بارش ہونے لگتی ہے اور اس کی بوندیں روشندانوں کے ذریعہ اندر بھی آنے لگتی ہیں۔ )
منظور :کیوں ؟
سلیم :منظور سن رہے ہو بادل کس زور و شور سے گرج رہے ہیں۔
منظور :روشن دان بند کر دوں۔
(خادم دوڑتا ہوا اندر آتا ہے۔ )
خادم :حضور، حضور۔
منظور : (اس سے پہلے کہ خادم کچھ کہے)روشن دان بند کرو خادم۔
(خادم ڈوری کھینچ دیتا ہے اور روشن دان بند کر دیتا ہے۔ )
خادم :حضور سونے کے کمرے کی چھت ٹپکنے لگی ہے۔
منظور :بے وقوف کہیں کے، اس وقت کیا کیا جا سکتا ہے۔ ضروری چیزیں اس جگہ سے ہٹا دو(خادم جانے لگتا ہے) اور سنو(سلیم کی طرف مخاطب ہو کر) میں سمجھتا ہوں ٹھنڈ کافی ہے ہاتھ تمہارے بھی ٹھٹھر رہے ہیں۔
سلیم :کیوں ؟
منظور :ہاں دو پیالی چائے چاہئے۔ تم یہ کام کرو۔ ریحانہ بی بی سے کہہ دینا دے جائیں گی۔
خادم :بہت اچھا حضور۔
(جاتا ہے۔ )
(سلیم کے چہرے کے سامنے سے گویا ایک سایہ گزر جاتا ہے۔ )
منظور :ہاں تو سلیم صاحب۔ آپ نے وہ تصویر نہیں بنائی وہ بات ادھوری رہ گئی۔
سلیم :جی نہیں۔
منظور :مگر کیوں نہیں بنائی؟یہی تو پوچھتا ہوں۔
سلیم : (لائٹر سے سگریٹ جلاتا ہے) تمہیں معلوم نہیں ریحانہ بہن کی طبیعت خراب ہو گئی تھی۔
منظور : (ایک خشونت کے ساتھ)وہی دورہ پڑ گیا ہو گا۔ یہی بات ہے نا؟
سلیم :ہاں وہ کافی دیر تک بے ہوش رہیں۔ تمہیں کوئی فکر نہیں۔
منظور : (سامنے لگے ہوئے کلنڈر کو دیکھتے ہوئے) نہیں کنواری لڑکیوں کے اختلاج کے دورے ڈھکوسلے ہوتے ہیں۔ نرے ڈھکوسلے۔
سلیم :تم یہ کہہ رہے ہو منظور؟
منظور :ہاں سلیم۔ تم اس گھر کو پہچانتے نہیں۔
سلیم :یہ بات تو اس سے پہلے بھی سن چکا ہوں۔ تم پہچانتے ہو شاید۔ میں تم سے پوچھتا ہوں آخر تم اس کی شادی کیوں نہیں کر دیتے ؟
منظور :میں ؟اونہہ، میں شادی کرنے والا کون؟تم نواب صاحب کو فراموش کر رہے ہو سلیم۔
سلیم :جی نہیں۔ تم ہر ایک بات میں اپنے اختیار پر ناز کرتے ہو۔ یہ اعلیٰ سگرٹوں کے ٹن، یہ سگاروں کے ڈبے۔ یہ تکلفات کے انبار، تمہاری ڈنر پارٹیاں اور شکار کی ضیافتیں تم با اختیار ہو مگر جب ایک لڑکی کو اس کا حق دینے کا سوال اٹھتا ہے تو۔ ۔ ۔
منظور :میں اس کے حق سے انکاری نہیں۔
سلیم :میں اقرار انکار کا سوال نہیں کرتا۔ میں مسئلے پر جذباتی بن کر غور نہیں کر رہا ہوں۔ جذباتی کو میں اندھا سمجھتا ہوں۔
منظور :اخلاقی نقطہ نظر سے ؟
سلیم : (بات کاٹ کر) نہیں میں تمہاری اخلاقی قدروں کو تسلیم نہیں کرتا۔ آگ لگاؤ ان اخلاقی قدروں کو ایک بچے کی نازک پیٹھ پر باپ کے بیجا حق کا بوجھ رکھتی ہیں اور اسے قربان کر دیتی ہیں۔ چھوٹے کو بڑے کی قربان گاہ پر نذر کر دیتی ہیں۔ میں سیدھی بات جانتا ہوں کہ انسان آزادی کا حق رکھتا ہے اور عورت انسان ہے اسے تم ہاتھ پیر باندھ کر رکھ رہے ہو۔
منظور :نہیں سلیم، میں نے کسی کے ہاتھ پیر نہیں باندھے۔
سلیم : (سگریٹ کا ایک کش لیتا ہے) سوال یہ ہے کہ تم ریحانہ کی شادی کیوں نہیں کرتے ؟
منظور :بات یہ ہے سلیم۔ تم نے جب تذکرہ چھیڑا ہے توسنو۔
سلیم :کہو۔
منظور :پہلی بات تو یہ ہے کہ اس کا کوئی ڈھنگ کا پیام ہی نہیں آتا۔ تم چاہتے ہو کہ میں بھائی ہو کر کسی ایسے ویسے جاگیردار کے ہاتھ سونپ دوں جس کی آمدنی کا کوئی بھروسہ نہ ہو، جس کی ذات پات میں کھوٹ ہو اور جو ہماری سی عزت وقار نہ رکھتا ہو۔
سلیم : (ہنس کر) نہیں۔ منظور بھائی تمہارے ذات پات کے ڈھکوسلے نہ جائیں گے۔
منظور :میں سماج میں رہ کر باغی نہ ہو سکوں گا۔ میں تمہاری طرح عورت کی بے راہ روی اور مزاج کا قائل نہیں ہوں۔ عورت ایک ہیرا ہے اور اسے محفوظ ہونا چاہئے۔
سلیم :الفاظ۔ محض الفاظ۔
منظور :اس کے علاوہ تم میری مالی حالت دیکھتے ہو۔ شادی وہ چیز ہے جس کے لیے وافر روپیہ کی ضرورت ہوتی ہے اور میرے پاس روپیہ نہیں۔ شاید تم کہہ دوکہ اپنے خرچ کے لیے میرے پاس روپیہ ہے مگر ریحانہ کے لیے نہیں کہہ سکتے ہو۔ مگر مجھے ایک گھرکی ناموس برقرار رکھنا ہے۔ آج بگھی بیچ ڈالوں قصبہ بھرمیں نوابوں کے گھرانے کا نام ڈوب جائے گا آج کوٹھی کے ساز و سامان پروہ ویرانی رکھو جو حرم سرا میں ہے تو لوگ میرے گریبان میں تھوکیں۔
سلیم : اور اگر زہرہ سے۔
منظور :میں بھولا۔ تم میرے اس راز سے بھی واقف ہو۔ (مسکراتا ہے مگر یہ فکر آلود ہے)ہاں اگر زہرہ کے پاس نہ جاؤں تو میرا دماغ اس پاگل خانے میں کس طرح کام کرے۔ ایک ستر سالہ بوڑھا جو ایک نئے رومان میں مبتلا ہے۔ عظیمہ کا خط تم نے بھی سنا ہو گا اور ایک ۶۵ سالہ بڑھیا جو دمے کے دائمی اور مہلک مرض میں مبتلا ہے اور ایک اختلاجی لڑکی۔ ۔ ۔ اور زہرہ میری زندگی کا اکیلا راز ہے۔ وہ گاتی ہے۔ وہ ناچتی ہے۔ وہ مجھے سکون اور محبت کے سارے خزانے بخش دیتی ہے اور کچھ نہیں لیتی۔ وہ مجھ پر اپنی کوئی ذمہ داری نہیں ڈالتی روپیہ اور صرف۔ اس کے سوا کچھ نہیں۔ اگر وہ مجھے نہ ملی ہوتی تو اس جاگیر میں کتے لوٹتے اور اس محل میں لاشیں سڑا کرتیں۔
سلیم :میں جانتا ہوں۔ تم جاگیردار ہو۔ پھر کیوں گھر والوں کو سالہا سال سے دالیں کھانا پڑ رہی ہیں اور یہ گیہوں چنے کی روٹیاں، تم دو بندوں کو اچھی طرح نہیں رکھ سکتے۔ تم ایک ماں کو تندرستی نہیں دے سکتے۔ تم ایک لڑکی کو مسرت نہیں دے سکتے (پھر کچھ سوچ کر وہی سلسلہ شروع کر دیتا ہے)مگر ریحانہ کا وہ سوال ہے جس کا تم نے جواب نہیں یا۔
منظور : اور کیا جواب دوں۔
سلیم : اور اگر میں یہ کہہ دوں کہ تم ذات کی کھوٹ اور خاندان کی عزت کے لیے نہیں بلکہ۔
منظور : اور کیا چیزہو سکتی ہے ؟
سلیم :اس لیے کہ تمہاری جاگیر کا حصہ تقسیم ہو جائے گا۔ تمہیں کھانے پکانے لیے ماما اور کام کاج کے لیے نوکرانی رکھنا پڑے گی، تم خالص لالچ اور ذاتی نفع کے خیال سے اس کی شادی نہیں کر رہے ہو۔
منظور : (ہنس دیتا ہے) کہہ سکتے ہو۔
(اتنے میں قدموں کی چاپ ہوتی ہے اور ریحانہ چائے کی ٹرے لیے داخل ہوتی ہے۔ کپڑے اور حلیہ وہی ہے جو پہلے ایکٹ میں تھا۔ صرف ذرا بھیگ گئی ہے بالوں میں پانی کے قطرے چمک رہے ہیں۔ منظور اسی طرح بیٹھا رہتا ہے۔ صرف ذرا فائل کی طرف توجہ کرنے لگتا ہے۔ سلیم کے چہرے سے رنگ اڑ جاتا ہے۔ وہ آتی ہے۔ )
ریحانہ :بھائی جان چائے کہاں رکھوں ؟چاروں طرف تو کتابیں بکھیر رکھی ہیں آپ نے۔
منظور : (دو تین فائلیں ہٹا لیتا ہے) یہاں رکھ دو۔
(چائے رکھ دیتی ہے اور برابر والی کرسی پر بیٹھ جاتی ہے۔ )
سلیم :ریحانہ بہن کیا بارش ابھی تک ہو رہی ہے۔
ریحانہ :اوہ!کچھ نہ پوچھئے۔ قیامت کا طوفان ہے۔
سلیم :سچ۔
ریحانہ :آپ بال دیکھ رہے ہیں میرے، ان میں تمام پانی بھر گیا ہے، اب جا کر چائے پیوں گی۔
سلیم :یہیں کیوں نہیں پی لیتیں۔
منظور : (جیسے بات سنی ہی نہ ہو)بھئی ریحانہ تمہاری خاطر کے لیے تو یہ کیک اور بسکٹ بھی لے آئیں۔
ریحانہ :مجھے تو معلوم بھی نہ تھا کہ سلیم بھائی یہاں ہیں۔
سلیم :ہاں بھئی بارش کی وجہ سے اتنی دیر رکنا پڑا۔ جب چائے آ گئی تو تکلف کیسا ’’لیڈیز ٹو سرو‘‘۔
منظور : (ہنس پڑتا ہے) تم ابھی یورپ سے نہیں لوٹے سلیم۔ میں چائے بناتا ہوں۔
سلیم : (خاموش ہو جاتا ہے اور ایک نظر اور پھر ریحانہ کی طرف دیکھتا ہے۔ )
منظور : (چائے بنا کر دیتے ہوئے)لو(چائے کی پیالی سلیم کو دیتا ہے اور پھر کیک کی پلیٹ سلیم کی طرف بڑھاتا ہے) آج تو تم سے بہت دنوں بعد اتنی باتیں ہوئیں۔ ہاں یار یہ تو بتاؤ تم اپنی شادی کب کر رہے ہو؟
سلیم :میں تمہارا مطلب نہیں سمجھا؟
منظور :میں نے کہا تم شادی کب کر رہے ہو؟
سلیم :ہونہہ۔ ضروری ہے کہ شادی کروں۔
منظور :قطعی۔
سلیم :میں ان ڈھکوسلوں میں یقین نہیں رکھتا۔ اگر شادی سے مراد نکاح بیاہ ہے جس میں چغد کی طرح بیٹھ کر میں بھی فلاں بنت فلاں کو اتنے معجل اور اتنے غیر معجل کے عوض منظور کروں تومیں کبھی شادی نہیں کروں گا۔
منظور : اور کیا کرو گے ؟
سلیم :ہاں اگر شادی سے مراد ایک عورت کا ہم رفیق ہوتا ہے تو ایک عورت میرے ساتھ ضرور رہے گی۔ تم اسے بھابی بھی کہہ سکتے ہو۔
منظور :پاگل ہو گئے ہو سلیم۔
سلیم :نہیں کوئی غیر معمولی بات تو نہیں۔
منظور :بہت غیر معمولی بات ہے۔ یہاں نہ رہنے پاؤ گے۔
سلیم :نہ رہوں گا، میں ٹوٹ سکتا ہوں، جھک نہیں سکتا۔
(باہر بجلی کی کڑک تیز ہو جاتی ہے اور خادم اندر داخل ہوتا ہے دروازے کا پٹ چھوڑ دیتا ہے جو زور سے بند ہو جاتا ہے۔ )
خادم :حضور۔ حضور۔ گاؤں سے منشی جی آئے ہیں۔
منظور :اچھا۔ ان سے کہو بیٹھیں۔ میں ابھی آتا ہوں۔
خادم :بہت اچھا۔
(جاتا ہے۔ )
منظور : (چائے کی پیالی ختم کر کے میز پر رکھ دیتا ہے۔ منھ رومال سے پونچھتا ہے)اچھا بھائی سلیم تم چائے پیو، میں اتنے منشی جی سے بات کر آؤں۔
سلیم :ضرور۔
(منظور اٹھ کر چلا جاتا ہے۔ بارش کے قطرے بڑی تیزی سے روشن دان سے ٹکرا رہے ہیں۔ )
سلیم :آج بارش نہیں طوفان ہے۔
ریحانہ :سلیم بھائی۔ کیا شادی کے بارے میں آپ کا سچ مچ وہی خیال ہے جو آپ ابھی کہہ رہے تھے۔
سلیم :ہاں ریحانہ میں کہتا ہوں کہ!!۔ ۔ ۔ نکاح کے دو بولوں میں آخر رکھا ہی کیا ہے۔ شاید تم سے مجھ کو یہ باتیں نہیں کہنا چاہئیں۔
ریحانہ :نہیں سلیم بھائی۔ اب مجھ عورت پر لڑکیوں جیسی شرم نہیں پھبتی۔
سلیم :شادی یا بے شادی۔ انسان، مرد اور عورت کی آزادی بڑا مسئلہ ہے اسے کردار کی نشو و نما کا موقع ملنا چاہئے۔ اپنے کو بنانے اور طاقتوں کو آزمانے کا موقع ملنا چاہئے۔ تم چائے پیو ریحانہ۔ اب تو ایک پیالہ بھی خالی ہو گیا ہے میں ابھی اسے دھوئے دیتا ہوں۔
(اسے گلاس میں رکھے ہوئے پانی سے دھو لیتا ہے۔ پھر چائے بنانے لگتا ہے۔ اس عرصے میں ریحانہ اس کو خاموش نظروں سے دیکھتی رہتی ہے۔ )
ریحانہ :سلیم بھائی۔
سلیم :کیوں ریحانہ۔
(چائے دیتا ہے، وہ پیالی بے خیالی میں تھام لیتی ہے۔ )
ریحانہ :کیا واقعی دنیا بہت بڑی ہے ؟
سلیم :ہاں ریحانہ بہت بڑی ہے۔ ۔ ۔ تم نے الف لیلیٰ پڑھی ہے ؟
ریحانہ :نہیں، کچھ کہانیاں سنی ہیں۔
سلیم :سند باد کا سفر سنا ہے۔
ریحانہ :نہیں۔
سلیم :سند باد بہت بڑا سیاح گزرا ہے۔
ریحانہ :کیا گزرا ہے ؟
سلیم :سیاح!ملکوں ملکوں گھومتا پھرتا تھا۔ وہ ایک ویران پہاڑی پر اترا۔ جہاں روزانہ ایک بہت بڑا ہیبت ناک جانور آیا کرتا تھا۔ رخ۔ یہ رخ جانور بہت بڑا تھا۔ جب وہاں سے نکلنے کی کوئی تدبیر نہ بن پڑی۔ ۔ ۔ تو سندباد نے ایک گوشت کے ٹکڑے میں خود کو لپیٹ لیا اور وہ رخ اسے گوشت سمجھ کر اڑا لے گیا اور اسے آبادی میں اتار دیا۔
ریحانہ :پوری کہانی سنائیے۔
سلیم :کہانی پوری ہو گئی ریحانہ۔ میرا جی چاہتا ہے ریحانہ کہ میں بھی ایک رخ بن جاؤں۔
ریحانہ : (ہنس پڑتی ہے) آپ واقعی بچے ہیں۔
سلیم :ہاں۔
ریحانہ :الف لیلیٰ کی کہانیاں کوئی بڑے سنا کرتے ہیں۔
سلیم :ہاں۔ مگر تم سند باد بننا نہیں چاہتیں۔ تم ایک ویران پہاڑی پر پڑی ہو۔ اس پہاڑی کی وادیوں میں لاشیں سڑ رہی ہیں اور گدھ منڈلا رہے ہیں۔
ریحانہ : اور رخ؟
سلیم :ہاں ریحانہ میں رخ بننا چاہتا ہوں۔ میں چاہتا ہوں کہ تم میرے ساتھ چلو۔ میں تمہیں دنیا دکھاؤں گا۔ میں بہتے ہوئے آبشاروں اور کھلتے ہوئے پھولوں کے پس منظر میں تمہاری تصویریں بناؤں گا۔ وہ تصویریں۔ ۔ ۔ جنھیں تم چاک نہ کر سکو گی اور تم دنیا پر بہار کے گیت کی طرح چھا جاؤ گی۔ ۔ ۔ اوہ!اس دن میں کتنا خوش ہوں گا۔
ریحانہ :کیا آپ سچ کہہ رہے ہیں ؟
سلیم :ہاں ریحانہ چلو گی میرے ساتھ۔
ریحانہ :یہ بھی کوئی کہانی ہے۔ بھلا آپ میرے ساتھ اپنی زندگی کیوں خراب کرنے لگے۔
سلیم :نہیں ریحانہ سچ۔
ریحانہ :کیا آپ مجھ سے شادی۔ ۔ ۔ ؟
سلیم :شادی نہیں۔ شادی نہیں۔ تمہیں میرے ساتھ بھاگ کر چلنا ہو گا۔
ریحانہ :یہ کیوں۔ وہ راضی ہو جائیں گے۔
سلیم :ہرگز راضی نہ ہوں گے۔ تم ابھی ان لوگوں کو نہیں جانتیں۔ میرے ساتھ صرف وہی عورت خوش رہ سکے گی جو آگ میں تپ کر آئے گی، جو جہنم پارکر کے آئے گی۔ تم انسان ہو طوفان سے ٹکرا سکتی ہو۔ اگر ٹکرانے کے لیے کچھ نہ ہو تو انسان فولاد نہ بنے موم بن کر پگھل جائے اور اگر ٹکرانے والی چیز طاقتور نہ ہو تو ٹکرانے والے کی توہین ہے۔ میں چاہتا ہوں کہ تم سر بلند ہو۔ تم سر اٹھاؤ بادلوں سے اونچا۔ ستاروں سے بھی بلند۔ تم آخر کس لیے ڈرتی ہو۔
ریحانہ :خاندان کی عزت سے۔
سلیم :میں جانتا ہوں خاندان نے تمہیں کون سی عزت دی ہے جس کی عزت کا تم کو اتنا پاس ہو۔ ڈرپوک نہ بنو ریحانہ۔ ظالم اور مظلوم میں کوئی رشتہ نہیں ہوتا اور بزدل کی سزا ہے عمر قید۔ ان ہی بے رحم دیواروں سے راستہ مانگتے مانگتے مر جاؤ گی اور یہ ایک انچ نہ ہٹیں گی۔ اسی قید خانے میں تمہاری جوانی دم توڑ دے گی اور خاندان کی عزت کا دامن بھیگے گا بھی نہیں۔
ریحانہ :اوہ میرے خدا!
سلیم :آج کی رات، اور آج ہی کی رات اس کا فیصلہ ہونا ہے میں آج رات کے دو بجے یہاں سے چلا جاؤں گا۔ میں چور دروازے پر تمہارا انتظار کروں گا، بولو تمہارا کیا فیصلہ ہے ؟
ریحانہ : (سراسیمہ ادھر ادھر دیکھتی ہے، پھر نیچی نظریں کر لیتی ہے) مجھے سوچ لینے دیجئے۔ خدارا مجھے سوچ لینے دیجئے۔
(منظور کا داخلہ)
منظور :کوڑی کام کے نہیں۔ حرام خور کہیں کے۔ جس کام کو بھیجو بہانہ بنا کر لے آتے ہیں۔
سلیم :کیا بات ہوئی؟
منظور :ریحانہ تم جاؤ۔
(ریحانہ جو چائے کے برتن اکٹھا کر رہی تھی چلی جاتی ہے۔ )
منظور :بارے میاں وہی الو کے پٹھے منشی جی ہیں ان سے کہا تھا ذرا زہرہ کو بلا لاؤ۔ سوچا تھا تم آئے ہو۔ آج کی رات جشن رہے گا۔
سلیم :پھر کیا خبر لائے ؟
منظور :کہتے ہیں گوٍا لیار گئی ہوئی ہے۔ لاحول ولاقوۃ جی چاہتا ہے ان سب کو گولی ماردی جائے۔
(نواب صاحب داخل ہوتے ہیں۔ )
(ہاتھ میں تسبیح ہے۔ گھبرائے ہوئے ہیں، بال سونے کی عینک کی گرفت میں پھڑک رہا ہے وہی قیمتی شال اوڑھے ہوئے ہیں۔ )
نواب :ارے میاں سلیم تم یہاں بیٹھے ہو۔
سلیم :منظور نے بلٍا لیا تھا۔
نواب : اور وہ عظیمہ کی تصویر بنائی تم نے۔
سلیم : (حیرت سے ان کا منھ تکتا ہے) جی، جی، ابھی تو نہیں۔
نواب :لاحول ولاقوۃ۔ توبہ۔ اس وقت سے بے کار وقت ضائع کر رہے ہو، تصویر ہی بنا لیتے۔
منظور :ابا جان۔ خادم نے سونے والے کمرے سے کچھ سامان ہٹا دیا تھا۔ کمرہ ٹپک رہا ہے۔
نواب : (گرج کر) میرا اس گھر میں کوئی سامان نہیں (سلیم سے) عظیمہ کی تصویر کہاں ہے سلیم۔
(سلیم میز سے تصویر اٹھا کر دیتا ہے وہ تسبیح والے ہاتھ سے تصویر سنبھال لیتے ہیں۔ )
نواب :بس اب مجھے کچھ نہیں چاہئے۔
(باہر چلے جاتے ہیں۔ بادل کی گرج اور بجلی کی کڑک اور بھی تیز ہو جاتی ہے۔ )
تیسرا سین
(رات کی تاریکی چھا گئی ہے۔ دالان کے اندر کا کمرہ جس پر ایک پلنگ پر شاہانہ بیگم سو رہی ہے اور دوسرے پلنگ پر ریحانہ لیٹی ہوئی ہے، سرہانے بڑا مدھم اور دھندلا بلب روشن ہے، کمرہ سیلا ہوا ہے ایک طرف مچان پر کچھ صندوق اور کپڑے اور گٹھریاں ہیں۔ ایک طرف نماز پڑھنے کی چوکی بچھی ہوئی ہے اور اس پر ایک لوٹا رکھا ہوا ہے دوسری طرف کپڑے ٹانگنے کی کھونٹیاں ہیں اوپر ایک چھوٹے سے مچان پر قرآن مجید رکھا ہوا ہے، ریحانہ کے پلنگ کے ایک طرف وہ تصویر پھٹی پڑی ہوئی ہے جو سلیم نے بنائی تھی۔ ریحانہ صاف شفاف کپڑے پہنے ہوئے، بال بھی سلیقے کے ساتھ بنے گئے ہیں، بیگم صاحبہ کو کبھی کبھی رہتی ہے تو ریحانہ کروٹ بدلتی ہے۔ ایک طرف سنگھار میز اور اس پر ایک بڑا آئینہ رکھا ہوا ہے۔ )
بیگم :ابھی بجلی بند نہیں کی ریحانہ بیٹی!
ریحانہ :امی تمہیں کھانسی بہت اٹھ رہی ہے نا۔ اسی سے جلتی رہنے دی۔ تم آرام سے سو جاؤ۔
بیگم :اری پگلی۔ کھانسی تو دم کے ساتھ ہے۔ تو ابھی تک سوئی نہیں۔
ریحانہ :مجھے نیند نہیں آتی امی۔
بیگم :سو جا بیٹی تیری طبیعت خراب ہو جائے گی۔ آج صبح ہی دورہ پڑ چکا ہے۔
(رضائی میں منھ لپیٹ کر کروٹ بدل لیتی ہے۔ دورے کے لفظ پر پس منظر کی چونکا دینے والی موسیقی شروع ہوتی ہے۔ )
ریحانہ :دورہ پڑ جائے گا۔ دورہ پڑ جائے گا(آہستہ سے پلنگ سے اٹھتی ہے اور بڑے آئینے کے سامنے جا کر کھڑی ہو جاتی ہے اور غور سے اپنی شکل آئینے میں دیکھنے لگتی ہے۔ پیچھے سے آواز آتی ہے۔ )ریحانہ تمہارے پاس رکھا ہی کیا ہے۔ تندرستی مٹ چکی ہے۔ جوانی ختم ہو گئی۔ خوبصورتی (ہنستی ہے)خوبصورتی نے بدصورتی اور بڑھاپے کا روپ لے لیا۔ کس بھروسے پر کسی کے ہاتھ میں ہاتھ دو گی۔ کس آسرے پر۔
بیگم : (پھر کروٹ لیتی ہے) ریحانہ بیٹی۔ دروازہ بند کرنا نہ بھول جانا۔
ریحانہ :اچھا امی۔ بھلا میں کبھی دروازہ بند کرنا بھولتی ہوں۔
بیگم :نہیں بھولتی تو نہیں کبھی۔ پر یاد دلا دینا تو اچھا ہوتا ہے۔ خدا تجھے خوش رکھے۔
(رضائی میں منھ لپیٹ کر دوسری کروٹ بدل لیتی ہیں۔ پس منظر میں ہلکی سی موسیقی ابھرتی ہے جس میں شہنائی کی آواز بھی شامل ہے جو کہیں دور بج رہی ہے۔ )
ریحانہ : (بڑبڑاتی ہے)تجھے اچھا رکھے خوش رکھے۔
(ہلکے قدم اٹھاتی ہوئی اپنے پلنگ پر آتی ہے۔ وہ تصویر اٹھا لیتی ہے جو ادھوری رہ گئی ہے اور جسے اس نے سروتے سے چیر دیا تھا۔ پھر آپ ہی آپ ہنستی ہے۔ پس منظر کی آواز پرچھا جاتی ہے۔ )
آواز :یہ تم نے کیا کیا سلیم۔ اتنی بڑی دولت بے کہے بے مانگے میری گود میں ڈال دی۔ ساری دنیا کے دروازے میرے لیے کھول دیے۔ میرے در پر پہلی بار اور آخری بار محبت نے دستک دی۔ میں بھی جیوں گی میں بھی زندگی کو خوشیوں سے بھر دوں گی۔ کوئی کچھ بھی کہے مجھے کیا! میں جاؤں گی۔ میں اس بار دروازہ بند نہیں کروں گی۔ ہر رات میں دروازہ بند کرتی رہی ہوں۔ آج نہیں۔ آج ہرگز نہیں۔
(پس منظر کی موسیقی چھناکے کے ساتھ ختم ہو جاتی ہے۔ )
بیگم :آج تو سوئے گی نہیں ؟
ریحانہ :نیند نہیں آ رہی تھی میں نے سوچا ذرا منھ دھولوں طبیعت ٹھیک ہو جائیگی!
بیگم :جب تک تو نہیں سوتی مجھے بھی نیند نہیں آتی۔
ریحانہ :مجھے کب تک ساتھ باندھے باندھے پھرو گی امی۔ مجھ سے اتنی محبت نہ کرو کہ مجھے جینا دو بھر ہو جائے۔
بیگم :ٹھیک ہی تو کہتی ہے مجھے تو کتنا ارمان تھا کہ تجھے پیار سے رخصت کرتی مگر کیا کروں بچی، قسمت کا کس سے بس چلا ہے (کھانسی دیر تک) میری زندگی میں خوشی کہاں۔
ریحانہ :ٹھیک ہی توہے امی۔ عورت سب کچھ قربان کرنے کے لیے ہی تو بنی ہے وہ خود کوئی قربانی نہیں مانگتی۔
بیگم :کیا الٹی سیدھی باتیں سوچنے لگی۔ جا۔ سوجا۔ میں بھی سوتی ہوں۔
(پھر رضائی سے منھ لپیٹ کر کروٹ لے لیتی ہے۔ )
ریحانہ :امی۔
بیگم :کیا ہے ؟پھر باتیں شروع کر دیں۔
ریحانہ :آج رات سلیم بھائی جا رہے ہیں۔
بیگم :ہاں شام کو رخصت لینے آیا تھا۔ بڑا اچھا لڑکا ہے میرے دل سے سدا اس کے لیے دعا نکلتی ہے۔ خدا کرے ہمیشہ خوش رہے۔ خدا کرے اسی کی طرح کوئی قابل اور خوبصورت بیوی ملے۔
ریحانہ : اور انھوں نے قابل اور خوبصورت کی جگہ پھوہڑ، بدصورت اور جاہل لڑکی کو پسند کیا تو؟
بیگم :خدا نہ کرے وہ کوئی پاگل ہے۔
ریحانہ :تم نے سنا نہیں۔ فاروقی صاحب کا لڑکا تو ولایت پاس کر کے آیا تھا۔ پانسو۔ سات سو روپیہ کی آمدنی بھی ہے اس نے تو اپنی رفو سے شادی کی ہے۔
بیگم :رفو کی عمر کیا ہو گی؟
ریحانہ :میری سی عمر ہو گی اس کی۔ پڑھی لکھی تو بس یونہی سی ہے قرآن مجید تو اسے تم ہی نے ختم کرایا تھا امی، کچھ یونہی سی اردو لکھ پڑھ لیتی ہے۔
بیگم :ہاں بیٹی قسمت کے کھیل ہیں۔
ریحانہ : اور رفو کو کوئی کہتا ہے مرگی کے دورے پڑتے ہیں۔
بیگم :ہاں جج صاحب کے لڑکے کے ساتھ بڑا ظلم ہوا۔ اپنی رفو کو ایسا نہ چاہئے تھا۔ وہ لڑکا اس کا اتنا خیال رکھتا تھا تو اس کی زندگی اس طرح تباہ نہ کرنی تھی۔
ریحانہ :مگر امی اس لڑکے نے تو خود کہا تھا۔
بیگم :اس نے اچھا کیا تھا مگر رفو کا بھی کچھ فرض تھا۔ اسے تو کچھ سوچنا چاہئے تھا۔
ریحانہ : (اعصابی تسبیح کے آثار، آواز کچھ بلند) کیا سوچنا چاہئے تھا اسے یہی کہ وہ آرام سے زندگی نہ گزارے، وہ عمر بھرتڑپ تڑپ کر، بلک بلک کر جان دیتی رہے۔ وہ آزادی کا سانس نہ لے۔ وہ کبھی تازہ ہوا کا سانس نہ لے۔ اس نے بڑا پاپ کیا تا کہ جج صاحب کے لڑکے کے ساتھ بھاگ گئی۔ جیتے جی گھرکی دیواروں میں چنی رہتی تو بڑا ثواب ہوتا۔
بیگم : (حیرت سے)بیٹی۔
ریحانہ :ٹھیک کہہ رہی ہوں نا؟
بیگم :نہیں میں تو یہ کہہ رہی تھی کہ اسے لڑکے کا بھی دھیان کرنا چاہئے تھا۔
ریحانہ :کیا دھیان کرنا چاہئے تھا۔
بیگم :رفو ادھیڑ تھی۔ بیمار تھی۔ ان پڑھ تھی۔ اس کے لڑکے نے اپنی شرافت میں اسے پسند کیا اور اپنا سکھ چین رفو پر قربان کرنے پر راضی ہو گیا۔
ریحانہ :توا س میں رفو کا کیا قصور ہے ؟
بیگم :اس نے اپنی خوشی کے لیے جج صاحب کے لڑکے کی خوشی قربان کر دی نا، تو سمجھتی ہے وہ اس کے ساتھ خوش رہ سکے گا۔ وہ ان پڑھ، بیمار، بوڑھی بیوی کو گلے میں باندھ کر کب تک خوش رہ سکے گا۔ رفو گردن کا طوق بن جائے گی۔ وہ پاؤں کی بیڑی بن جائے گی۔ یہ بات ٹھیک ہے نا؟
ریحانہ :میری سمجھ میں کچھ نہیں آتا۔ میری کچھ بھی سمجھ میں نہیں آتا۔
بیگم :اچھا اب بہت باتیں ہو چکیں اب مجھے سونے دے۔
(پھر رضائی میں منہ لپیٹ کر کروٹ لے لیتی ہے۔ ریحانہ پھر آہستہ آہستہ پلنگ سے اٹھتی ہے اور آئینہ کے سامنے دوبارہ آ کر کھڑی ہو جاتی ہے وہ دیر تک اسے گھورتی رہتی ہے۔ پیچھے سے اس کے لہجے میں، مگر ذرا بھاری آواز میں کوئی کہتا ہے۔ )
آواز :بوڑھی۔
(ریحانہ تکلیف سے اثبات میں سر ہلا دیتی ہے۔ )
آواز :بیمار۔
(ریحانہ پھر سر ہِلا دیتی ہے۔ )
آواز :وہ دورے جو تمہیں بار بار پڑتے ہیں اور سارے گھرکو پریشان کر دیتے ہیں وہ تمہاری زندگی کے ساتھ ہیں۔
(ریحانہ بے قراری اور کرب کی حالت میں اسی طرح کھڑی رہتی ہے۔ )
آواز :ان پڑھ۔ جاہل۔ ۔ ۔ ایک کمزور لمحے میں اس نے تمہیں بلایا۔ اس کا مطلب یہ تو نہیں کہ تم اپنے بیمار۔ بدصورت اور ان پڑھ وجود سے اس کی زندگی تباہ کر دو۔ تم اسے کیا دے سکو گی۔ اسے اتنی بڑی سزا نہ دو۔ خدارا اسے پیار کی اتنی بڑی سزا نہ دو۔ (ریحانہ دونوں ہاتھوں سے کان بند کر لیتی ہے)تم تو انھیں دیواروں میں گھٹ گھٹ کر مر جانے کے لیے پیدا ہوئی ہو۔ تم ایک لاش ہو۔ لاشوں کو یہ حق نہیں پہنچتا کہ وہ زندہ انسانوں کے گلے کا طوق بن جائیں۔
(تھوڑی دیر تک ریحانہ اپنے پلنگ پر دونوں ہاتھوں سے اپنا منھ چھپا کر بیٹھی رہتی ہے۔ سسکی کی آواز کبھی کبھی سنائی دیتی ہے شاہانہ بیگم اسی طرح بے خبر پڑی رہی ہیں۔ پھر ذرا ہمت اور عزم کے ساتھ چہرے سے دونوں ہاتھ ہٹاتی ہے۔ سفید دوپٹے کے آنچل سے آنسو پونچھتی ہے۔ بستر میں تکیے کے نیچے سے کنجی نکالتی ہے اور ارادہ اور قوت کے ساتھ قدم اٹھاتی ہے۔ اتنے میں گھنٹہ دو بجاتا ہے جس کی جھن جھناہٹ دیر تک قائم رہتی ہے۔
آہستہ آہستہ قدم بڑھاتی ہوئی دہ کمرے سے باہر نکلتی ہے۔ ہر قدم پر پیانو کے مدھم سر سنائی دیتے ہیں۔ دالان والے دروازے کی بجلی ابھی تک جل رہی ہے۔ آہستہ آہستہ چلتی ہوئی اس دروازے تک پہنچتی ہے۔ آنچل سے دوبارہ آنسو خشک کرتی ہے۔ آنگن اور دالان کی طرف نگاہ واپسیں ڈالتی ہے۔ دروازے کے اندر داخل ہو کر دو قدم آگے بڑھتی ہے اور لوٹ آتی ہے۔ ایسے قدموں سے جیسے کوئی مردہ چل رہا ہو۔ بجلی بجھاتی ہے۔ دروازہ بند کرتی ہے اور اس کی گنڈی میں پڑے ہوئے نالے کو اٹھا کر بند کر دیتی ہے۔ پھر چند لمحے کے لیے اس سے سہارا لے کر روتی رہتی ہے۔ پس منظر میں غمناک موسیقی اور دالان کے اندر والے کمرے سے آتی ہوئی مدھم روشنی اس منظر کو اور زیادہ ویران و المناک بنا دیتی ہے۔
پھر آہستہ آہستہ پلنگ پر واپس آتی ہے۔ پلنگ پر بیٹھتی ہے اتنے میں شاہانہ بیگم کی آنکھ کھل جاتی ہے۔ )
بیگم :کیا ہے ریحانہ۔ کیا ہے بیٹی؟
ریحانہ : (رندھی ہوئی آواز میں) کچھ نہیں امی دروازہ بند کرنے گئی تھی۔ میں نے بند کر دیا دروازہ۔
(دور بگھی کے پہیوں کی آواز سنائی دیتی ہے اور اسٹیج روشنیاں بجھنی شروع ہو جاتی ہیں۔ پردہ آہستہ آہستہ گرتا ہے اور سارا اسٹیج اندھیرے میں دفن ہو جاتا ہے۔
***
ماخذ: ’’میرے اسٹیج ڈرامے ‘‘
ادارۂ فروغ اردو نمبر
۳۷ امین آباد پارک
لکھنؤ
 
ڈاکٹر محمد حسن
سچ کا زہر

کورس :سچ مرا دیوتا
سچ ہے انجیل، قرآن، گیتا، خدا
سچ ہے سقراط، عیسیٰ، محمدؐ
سچ شہیدوں کا خوں پیار کا حوصلہ!
سچ ہے خون کا وہ قطرہ جو مصلوب ہے جس کا سر سولیوں پر چڑھا
بے گناہی کی پاداش میں
زندگی!زندگی!! چیختا
مر رہا ہے
سچ ہے زہریلی ناگن جو ڈستی ہے انسان کے صبر و سکون کو کہ پھر زندگی بھر تڑپتے گزرتی ہے اور ایک کانٹا نہیں ایک بھالا۔ نہیں ایک تلوا رہے جس کو تم نے پکارا ضمیر اس کو مانو
سچ وہ بچہ ہے جس کا سر و سینہ نیزوں کی نوکوں سے مجروح ہے پھر بھی ہونٹوں پہ ایک ہلکی مسکان سی ناچتی ہے
وہ سچ اب کہاں ہے
چلو ہم اسے آج دنیا میں ڈھونڈھیں کہیں دیکھو سقراط کی طرح وہ قید خانے میں بیٹھا
زہر کا پیالہ پیتا نہ ہو
کہیں شاہراہوں پہ وہ
کسی تنگ و تاریک چورا ہے پر
پرانی سولی پر لٹکا نہ ہو اور
اس کی ہتھیلی میں کیلوں کے سوراخ ہوں
وہ شاید کسی کربلا میں
کسی شمر کے خنجروں کے تلے
خون میں لتھڑا ہوا
زندگی کے لئے خون بہا دے رہا ہو
جسے آج سچ سے محبت ہو اب بھی
مرے ساتھ آئے
قبل اس کے کہ جھوٹ آئے اور
ہم سب کو نگل لے
ہیرا لال :مجھے سزا دیجئے سپرنٹنڈنٹ صاحب۔ مجھے سزا دیجئے۔ آپ نہیں جانتے میں کون ہوں۔ میرا نام ہے ہیرا لال میں آپ کے شہر کے ہر چورا ہے پر پچھلے دس سال سے زہر بیچ رہا ہوں۔ جی ہاں زہر!ہر روز چورا ہے پر سیکڑوں آدمی میری چکنی چپڑی باتیں سنتے رہتے ہیں۔ میں کبھی تو لکڑ توڑ چورن کے نام پر لسوڑھے کی پسی ہوئی پتیاں بیچتا ہوں۔ کبھی دانتوں کو ہر مرض سے بچانے اور ہر درد کو دور کرنے کا منجن بیچتا ہوں۔ جس میں پسی ہوئی کھریا کے سوا اور کچھ نہیں ہوتا۔ کبھی ریلوے یارڈ کی مٹی کی پڑیاں باندھ باندھ کر آنکھوں کا سرمہ کہہ کر بیچتا ہوں۔ میں کہتا ہوں میں مجرم ہوں میں نے جنتا کی تندرستی برباد کر کے اپنی جیبیں بھری ہیں۔ مجھے کڑی سے کڑی سزا ملنی چاہئے۔ میں نے پاپ کیا ہے سپرنٹنڈنٹ صاحب! میں پاپی ہوں۔ آپ سن رہے ہیں سپرنٹنڈنٹ صاحب میں سچ کہتا ہوں۔
سپرنٹنڈنٹ :سن رہا ہوں۔
ہیرا لال :تو پھر مجھے ہتھکڑی پہنائیے۔ جیل خانے بھیجئے۔ مجھے اپنے پاپ کی سزا ملنی چاہئے۔
سپرنٹنڈنٹ : (گھنٹی بجاتا ہے) ارے کوئی ہے ؟
اردلی :سرکار!
سپرنٹنڈنٹ :انھیں باہر نکال دو!
ہیرا لال :آپ کیا کر رہے ہیں ؟میں اپنے جرم کی سزا مانگتا ہوں اور آپ مجھے پھر جرم کرنے کے لئے آزاد چھوڑ رہے ہیں۔ میں سچ کہتا ہوں۔ میں پاپی ہوں۔ دھوکے باز ہوں مجھے سزا دیجئے۔
سپرنٹنڈنٹ :دیکھتے کیا ہو۔ ۔ ۔ لے جاؤ!
اردلی :چلئے !
ہیرا لال :میری بات توسن لیجئے !
سپرنٹنڈنٹ :کیا کوئی اور بات بھی کہنا چاہتے ہو؟
ہیرا لال :جی ہاں ؟کیا آپ کے خیال میں یہ کوئی سنگین جرم نہیں ہے۔ لوگوں کو دھوکا دینا، ان کی آنکھوں میں دھول جھونکنا، انھیں طرح طرح کے بھلاوے دینا، کوڑا کرکٹ کو مرہم اور منجن کا نام دے کر انھیں بیوقوف بنانا، ان کی تندرستی تباہ کرنا دھوکا نہیں ہے ؟
سپرنٹنڈنٹ :ہے۔ ضرور ہے۔
ہیرا لال :تو آپ کے خیال میں میں سچ نہیں بول رہا ہوں۔
سپرنٹنڈنٹ :سچ کا نام نہ لیجئے۔ میرے سامنے یہ لفظ بھی زبان سے مت نکالئے۔ آپ جانتے ہیں اس شہر میں تین دن سے ہر مرد عورت بچے جوان بوڑھے کو سچ کا بخار چڑھا ہوا ہے۔ ہر آدمی سچ بول رہا ہے۔ اپنے زندگی بھرکے گناہ بیان کر کے ہم سے سزا چاہ رہا ہے آپ جانتے ہیں اس کا کیا نتیجہ ہوا ہے ؟
ہیرا لال :کیا کوئی بہت برا نتیجہ نکلا ہے ؟
سپرنٹنڈنٹ :جی ہاں۔ برا اور بہت برا!اس کا نتیجہ یہ ہوا ہے ہیرا لال جی کہ ہماری جیل اور حوالات میں تل رکھنے کی جگہ نہیں ہے۔ عدالتوں میں مقدموں کی تعداد دس گنی ہو گئی ہے۔ اسٹامپ اور واٹر مارک بازار سے غائب ہو گئے ہیں اور آپ مجھ سے کہتے ہیں کہ میں آپ کو جیل بھیج دوں۔
ہیرا لال :کیا ہمارا شہر پاپیوں اور مجرموں سے بھرا ہوا تھا؟
سپرنٹنڈنٹ :جی ہاں !ایسا ہی معلوم ہوتا ہے۔ کسی کو گمان بھی ہو سکتا تھا کہ اس شہر کا ہر دسواں آدمی پاپی ہے !اس کا نتیجہ ہے کہ ہمارے شہر کی عزت آبرو مٹی میں مل گئی ہے۔ سارا ملک بلکہ یوں کہئے ساری دنیا اسے پاپیوں کا شہر سمجھتی ہے۔ اس سچ نے ہمیں غارت کر دیا ہے۔ جائیے ہیرا لال جی جائیے اس سچ کے چکر میں نہ پڑئیے۔
ہیرا لال :ہری اوم!ہری اوم!!ہری اوم!!!
سپرنٹنڈنٹ :ہری اوم کیا ہنومان چالیسا پڑھئے ہنومان چالیسا!اگر اسی طرح سچ بولتی رہی جنتا تو مجھے بتائیے کہ دنیا کا کاروبار کیسے چلے گا۔
ہیرا لال :تو آپ کے خیال میں دنیا جھوٹ کے سہارے چلتی ہے ؟
سپرنٹنڈنٹ :جی ہاں، بالکل یہی خیال ہے میرا۔ دیکھئے جب سے اس شہر پر سچ بولنے کا دورہ پڑا ہے وکیلوں کے گھر فاقے ہو رہے ہیں۔ ان کے بیوی بچے بھوک سے تڑپ رہے ہیں۔
ہیرا لال :کیوں ؟
سپرنٹنڈنٹ :اس لئے کہ ان کے گھر والے جھوٹ بولنے کو تیار نہیں ہیں۔ ان کے موکل جھوٹ بولنے کو تیار نہیں ہیں۔
ہیرا لال :ہری اوم!ہری اوم!!
سپرنٹنڈنٹ :اس لئے کہتا ہوں ہیرا لال جی، رام رام کیجئے اور اپنے گھر جائیے۔
ہیرا لال :نہیں سپرنٹنڈنٹ صاحب۔ میری آتما کو شانتی نہیں ملے گی۔ مجھے سزا دیجئے۔ مجھے جیل بھیج دیجئے۔
سپرنٹنڈنٹ :جیل میں جگہ نہیں ہے۔ ایسے چھوٹے چھوٹے مجرم کے لئے بالکل جگہ نہیں ہے۔
ہیرا لال :سزا مجرم کا پیدائشی حق ہے۔ میں واپس جانے سے انکار کرتا ہوں۔ آپ مجھے اردلیوں سے اٹھوا کر باہر بھی پھنکوا دیں گے تومیں پھر لوٹ آؤں گا۔
سپرنٹنڈنٹ :میں پھر باہر پھنکوا دوں گا۔
ہیرا لال :ایسا کیجئے میں انتظار کرتا ہوں۔ مجھے یہیں بیٹھا رہنے دیجئے گا۔ جب حوالات میں جگہ خالی ہو جائے مجھے بھیج دیجئے گا۔
سپرنٹنڈنٹ :کوئی امید نہیں۔
ہیرا لال :اس میں آپ کا کیا نقصان ہے۔ مجھ پر آپ کی بڑی کرپا ہو گی۔ میں پھر دھوکا دینے کے لئے سزا کے بغیر دنیا میں واپس جانا نہیں چاہتا۔
سپرنٹنڈنٹ :اچھا آپ کی مرضی۔ بیک روم میں بیٹھ جائیے۔
ہیرا لال :شکریہ۔
سپرنٹنڈنٹ :اردلی۔ ۔ ۔ دیکھو اب کسی کو اندر مت آنے دینا۔
اردلی :جو حکم سرکار!
سپرنٹنڈنٹ :چاہے کوئی کتنا ہی سچ بولے۔ ڈنڈے مار مارکر سب کا سچ نکال دو۔ خبردار جو کسی کو اندر گھسنے دیا!
(تھوڑی دیر بعد اردلی گھبرایا ہوا داخل ہوتا ہے۔ )
اردلی :صاحب!صاحب ڈاکٹر شرما!
ڈاکٹر شرما :معاف کیجئے گا سپرنٹنڈنٹ صاحب بغیر اطلاع کے آنا پڑا۔
سپرنٹنڈنٹ :ڈاکٹر صاحب۔ آپ شرمندہ کر رہے ہیں۔ آپ کے خادم ہیں۔ فرمائیے کیسے تکلیف فرمائی۔ میں آپ کی کیا سیوا کر سکتا ہوں۔
ڈاکٹر :پہلی سیوا تو یہ ہے سپرنٹنڈنٹ صاحب کہ مجھے آج سے ڈاکٹر نہ کہئے۔
سپرنٹنڈنٹ :تو کیا آپ بھی۔ ۔ ۔
ڈاکٹر :آپ جانتے ہیں آج تک میں نے کیا کیا ہے۔
سپرنٹنڈنٹ :میں کیا سارا شہر جانتا ہے۔ ڈاکٹر صاحب ۔ آپ نے اس شہر کے بے شمار آدمیوں کو شفا دی ہے۔ اس شہر میں کیا آس پاس کے کئی شہروں میں آپ سے بڑا ڈاکٹر۔ ۔ ۔
ڈاکٹر :مگر اصلیت یہ ہے کہ میں انسانوں کے دکھ درد سے ان کی بیماری آزاری سے چاندی بناتا رہا ہوں میں نے انسان کے دک درد کی تجارت کی ہے۔
سپرنٹنڈنٹ :یہ آپ کیسی باتیں کر رہے ہیں ؟
ڈاکٹر :میری بغل میں آئیڈیل فارمیسی کے نام سے دواؤں کی جو دوکان ہے وہ بھی میری ہی ہے آپ جانتے ہیں کیوں ؟اس لئے کہ میں اس دوکان کے ذریعے ذخیرہ اندوزی اور نفع بازی کرنا چاہتا ہوں اس دوکان کو ہر قسم کی دواؤں کے لائسنس مل گئے ہیں اس دوکان کی ساری دوائیں جعلی ہیں ان میں ملاوٹ ہے۔ اسٹرپٹومائی سین میں کھریا پیس کر ملائی گئی ہے۔ اصلی شیشیاں خالی کر کے ان شیشیوں میں ملاوٹ والی دوائیں انجکشن کی سوئی کے ذریعے داخل کی گئی ہیں۔ میں نے اس بے ایمانی کے دھندے سے جنتا کو دھوکا دیا ہے۔
سپرنٹنڈنٹ :ناممکن ہے آپ ایسا دھر ماتما یہ سب نہیں کر سکتا۔ آپ نے شہر کی دھرم شالا بنوائی ہے داؤ جی کے مندر کے لئے سب سے بڑا دان آپ ہی نے دیا تھا۔ مجھے وشواس نہیں ہوتا۔
ڈاکٹر :میں سچ کہتا ہوں بھگوان کی سوگند کھا کر کہتا ہوں۔
سپرنٹنڈنٹ :آپ جانتے ہیں یہ جرم ہے بہت بڑا جرم ہے۔
ڈاکٹر :جانتا ہوں اور اس جرم کی سزا پانے کے لئے تمہارے پاس آیا ہوں۔
سپرنٹنڈنٹ :سوچ لیجئے ڈاکٹر صاحب۔
ڈاکٹر :اچھی طرح سوچ لیا وشواس کرو۔ ۔ ۔ میں وہی ڈاکٹر شرما ہوں جس نے ایک ہزار روپیہ لے کر سیٹھ دلی چند کی بیوی کو زہر کے انجکشن لگائے تھے۔ کیونکہ اس کی زندگی کا بیمہ ہو چکا تھا اور سیٹھ دلی چند میری مدد سے اسے موت کے گھاٹ اتار کر انشورنس کی ساری رقم وصول کرنا چاہتا تھا۔
سپرنٹنڈنٹ :آپ کیا کہہ رہے ہیں ؟
ڈاکٹر :جو کچھ کہہ رہا ہوں خدا کو حاضر ناظر جان کر کہہ رہا ہوں۔
سپرنٹنڈنٹ :یہ تو سراسر قتل ہے !
ڈاکٹر :میں نے قتل کیا ہے !
سپرنٹنڈنٹ :تو مجھے آپ کو گرفتار کرنا پڑے گا۔
ڈاکٹر :گرفتار کرو ضرور کرو!بلکہ مجھے پھانسی پر چڑھا دو۔ جب ہی میرا ضمیر تسکین پائے گاجو زندگی جنتا کی سیوا میں کٹنی چاہئے تھی وہ دھوکا اور جعل سازی میں کٹ گئی۔ کتنے جھوٹے سرٹیفکٹ لکھے۔ کتنے جھوٹے پوسٹ مارٹم کی رپورٹیں بنائیں۔ کتنوں کو جان بوجھ کر موت کے گھاٹ اتار دیا۔ مجھے پھانسی ہی ہونی چاہئے۔
سپرنٹنڈنٹ :یہ میرے اختیار میں نہیں ہے۔ ۔ ۔ یہ تو بتائیے سیٹھ دلی چند کہاں ہیں ؟
ڈاکٹر :اس نے خودکشی کر لی۔
سپرنٹنڈنٹ :چلئے اچھا ہی ہوا۔ (گھنٹی بجاتا ہے) اردلی! ہتھکڑی لاؤ!
اردلی :یہ لیجئے حضور!
سپرنٹنڈنٹ :مجھے بہت افسوس ہے ڈاکٹر شرما(ہتھکڑی پہناتا ہے) اردلی! سپاہیوں کو بھیجو حوالات سے لے جائیں۔
اردلی :بہت اچھا۔ حضور!
سپرنٹنڈنٹ : اور دیکھو۔ ایک سپاہی کو ہماری کوٹھی پر بھیجو۔ یہ معلوم کر کے آئے کہ میم صاحب مسوری سے آ گئیں یا نہیں۔ وہ اپنے بیٹے نریندر سے ملنے مسوری گئی تھیں۔ آج آتی ہوں گی۔
اردلی :بہت اچھا حضور!
(ٹیلیفون کی گھنٹی بجتی ہے، بجتی رہتی ہے سپرنٹنڈنٹ اس کا جواب دیتا ہے۔ )
سپرنٹنڈنٹ :ہیلو!۔ ۔ ۔ بول رہا ہوں۔ ۔ ۔ کیا کہا۔ ۔ ۔ دودھ والے تھانے کو گھیرے کھڑے ہیں۔ ۔ ۔ ؟کیا کہتے ہیں۔ ۔ ۔ ؟(ہنستا ہے) سزا چاہتے ہیں۔ دودھ میں پانی ملانے کی۔ ۔ ۔ کیا کہا؟۔ ۔ ۔ نہیں نہیں۔ ۔ ۔ جیل میں بالکل جگہ نہیں ہے۔ ۔ ۔ پچاس پچاس جوتے لگاؤ اور چھوڑ دو۔ (غصے سے ٹیلیفون کا ریسیور رکھ دیتا ہے) کم بخت سب کے سب اسی مرض میں مبتلا ہیں سچ بولنے کی بیماری!ہونہہ!!بڑے آئے ایماندار کہیں کے !
(باہر سے شور کی آواز آتی ہے۔ )
اردلی :نہیں جا سکتے !صاحب کا حکم ہے۔
پرنسپل :مجھے کوئی نہیں روک سکتا!
اردلی :نہیں جانے دوں گا۔ منع کر دیا ہے سنتے نہیں ؟
پرنسپل :جانتا ہے کس سے بات کر رہا ہے ؟کالج کے پرنسپل کا راستہ روکتا ہے۔ نالائق!
سپرنٹنڈنٹ :اندر آنے دو۔ پرنسپل صاحب کو اندر آنے دو۔
پرنسپل :نمستے سپرنٹنڈنٹ صاحب!
سپرنٹنڈنٹ :معاف کیجئے گا پرنسپل صاحب میرا اردلی نرا اجڈ ہے۔ بڑا جنگلی ہے کمبخت۔ آدمی دیکھ کے بات نہیں کرتا۔ میں تو خود آپ کے پاس آنے والا تھا۔
پرنسپل :لیجئے میں آ گیا اور آگیا لایا گیا ہوں۔
سپرنٹنڈنٹ :پرسوں سے جو واقعات اس شہر میں ہو رہے ہیں۔ ان سے میری عقل چکرا گئی ہے۔ میں آپ جیسے کسی عالم فاضل سے یہ پوچھنا چاہتا ہوں کہ آخر سچ کیا ہے۔ وہ جو مصیبت میں ڈالے یا انسانوں کو مصیبت سے نکالے۔
پرنسپل :یہ میں کچھ نہیں جانتا کپتان صاحب۔ میں تو صرف اتنا جانتا ہوں کہ ضمیر کے اندرجو کالا ناگ چھپا رہتا ہے۔ آتما کا جو زہر ہے وہی سچ ہے اور آج وہی کالا ناگ مجھے آپ کے پاس تک کھینچ لایا ہے۔
سپرنٹنڈنٹ :تو کیا آپ بھی؟
پرنسپل :میں نہیں جانتا آپ کیا کہنا چاہتے ہیں۔ مجھے جاننے کی ضرورت بھی نہیں ہے۔ میں تو یہ بتانے آیا ہوں کہ جسے آپ عالم فاضل کہتے ہیں۔ علم کا اوتار اور گیان کا دیوتا جانتے ہیں وہ ایک فریبی ہے فراڈ ہے !
سپرنٹنڈنٹ :میں آپ کا مطلب نہیں سمجھا۔
پرنسپل :آج تک میرے کالج میں جتنے لیکچر ر رکھے گئے ہیں۔ سب کے سب میرے رشتے دا رہیں یا میرے کسی رشتے دار کے رشتہ دار ہیں۔ ہر جگہ کے لئے ایک سے ایک قابل آدمی نے درخواست دی لیکن کوئی ہماری کسوٹی پرپورا نہیں اترا۔
سپرنٹنڈنٹ :لیکن اس میں آپ کا کیا قصور ہے۔ تقرر سلیکشن کمیٹی کرتی ہے۔
پرنسپل : اور سلیکشن کمیٹی ہم مقرر کرتے ہیں۔ اس کے ممبروں میں ہمیشہ میں نے ان لوگوں کو رکھا ہے جو میری ہاں میں ہاں ملا سکیں جنھیں آموں کے زمانے میں آٹھ دس ٹوکرے آم بجھوا سکوں یا ان سے وصول کر سکوں۔ جن کی کمیٹیوں میں خود جا کر ان کی ہاں میں ہاں ملا سکوں۔ ان سب کو میں نے رشوت سے زیر کر رکھا تھا۔ کنبہ پروری اور جعل سازی کیا پاپ نہیں ہے ؟
سپرنٹنڈنٹ :ضرور ہے۔ لیکن آپ نے انٹرویو کر کے تقرر کئے ہیں۔
پرنسپل :انٹرویو بھی فراڈ ہے جس کو لینا ہوتا ہے۔ اس کے ہر جواب پر پورا بورڈ جھوم جاتا ہے۔ میرے کالج کے استاد اس کے نام سے مقالہ لکھتے اور چھپواتے۔ اس کے لئے ریسرچ کا خاکہ تیار کرتے اور کہہ سن کر (Examiner) سے اسے پی ایچ ڈی کی ڈگری دلواتے تھے۔ یہی نہیں ہماری سانٹھ گانٹھ اوپر بورڈ تک رہتی تھی۔ ہم دوسرے تیسرے سال نصاب کی نئی کتاب اپنے ہی ذمے لے لیتے اور بک سیلروں سے رشوت لے کر پرانی کتاب کی جگہ ان کی کتابیں نصاب میں داخل کر دی جاتی تھیں اور ہمارے وارے نیارے ہو جاتے تھے۔ کیا آپ کے نزدیک یہ پاپ نہیں ہے ؟
سپرنٹنڈنٹ :آپ مجھ سے کیا چاہتے ہیں ؟
پرنسپل :میں آپ سے سزا چاہتا ہوں۔ کپتان صاحب!سخت سے سخت سزا چاہتا ہوں۔ میں مجرم ہوں۔ میں نے کنبہ پروری نفع خوری اور بے ایمانی ہی نہیں کی ہے۔ میں نے قوم کی امانت میں خیانت کی ہے۔ میں نے آنے والی نسل کی زندگی برباد کر دی ہے۔ انھیں اپنی سیاست میں استعمال کرنے کی غرض سے ان کے گروہ بنا کر انھیں غنڈہ گردی سکھائی۔ انھیں اپنے گروہ کی طاقت بڑھانے کے لئے استعمال کیا ہے۔ میں نے انھیں صرف خود غرضی ہوس اور غنڈہ گردی کی تعلیم دی ہے۔ میں نے انھیں گیان کے نور کے بجائے جہالت کا اندھیرا ہی دیا ہے۔ کیا قوم مجھے سزا نہ دے گی؟مجھے سزا دیجئے کپتان صاحب سزا دیجئے ؟
سپرنٹنڈنٹ :سزا دینا میرے اختیار میں نہیں ہے۔ میں صرف آپ کو گرفتار کر سکتا ہوں۔
پرنسپل :شکریہ! آپ نے میرے دل کا بہت بڑا بوجھ دور کر دیا!
سپرنٹنڈنٹ : (گھنٹی بجاتا ہے) اردلی! ہتھکڑی لگا کے حوالات لے جاؤ!
اردلی :جو حکم حضور!
(پچھلے کمرے سے ہیرا لال کی آواز آتی ہے۔ )
ہیرا لال :میرے لئے کوئی جگہ خالی ہوئی کپتان صاحب؟
سپرنٹنڈنٹ :سن رہے ہو ہیرا لال!غضب خدا کا انصاف اور تعلیم ہی پورے سماج میں سب سے اعلیٰ محکمے تھے۔ ان کا یہ حال ہے۔ اے خدا۔ ہے بھگوان!
ہیرا لال :تو پھر میرے لئے کیا حکم ہے ؟
سپرنٹنڈنٹ :بیٹھے رہئے خاموشی سے۔
(باہر سے کار کا ہارن سنائی دیتا ہے۔ )
اردلی :صاحب!صاحب!!
سپرنٹنڈنٹ :کوئی بھی ہو کسی کو اندر مت آنے دو!
اردلی :مگر صاحب سیٹھ چھبیل داس جی ہیں۔
سپرنٹنڈنٹ :وہ خود!؟
اردلی :جی ہاں وہ خود آئے ہیں اپنی کار میں بیٹھ کر۔ بلا لاؤں سرکار؟!
سپرنٹنڈنٹ :بلا لو۔
سیٹھ :نمسکار۔ کپتان صاحب۔ کہئے کیا حال ہیں ؟
سپرنٹنڈنٹ :نمسکار۔ آپ کی کرپا ہے سیٹھ جی۔ آپ نے کیسے تکلیف کی؟
سیٹھ :آپ کو ذرا سی تکلیف دینی ہے۔
سپرنٹنڈنٹ :جی فرمائیے میں کیا سیوا کر سکتا ہوں ؟
سیٹھ :آپ کے پاس دیا سلائی ہو گی؟
سپرنٹنڈنٹ :دیا سلائی؟جی ہاں یہ لیجئے۔ یہ رہی دیا سلائی!
سیٹھ :میں اپنا آخری سگار جلانا چاہتا ہوں۔ اصلی کرونا ہے۔ آپ بھی پی لیجئے۔
سپرنٹنڈنٹ :شکریہ!
سیٹھ :یہاں نہیں ملنا۔ خاص کیوبا کا بنا ہوا ہے بلکہ اسپیشل میرے ہی لئے بنتا ہے اور خاص میرے لئے اسمگل ہوتا ہے۔ ورنہ آپ کی سرکار درآمد کرنے دیتی ہے کسی اچھی چیز کو؟
سپرنٹنڈنٹ :اسمگل؟
سیٹھ :جی ہاں۔ سیٹھ چھبیل داس جس نے دھرم شالائیں۔ تین ودھوا آشرم اور پانچ اناتھ آشرم کھولے ہیں۔ آپ کے ملک کے اسمگلر کنگ ہے۔ اسمگلر کنگ!!بڑی حیرانی ہو رہی ہے آپ کو۔ جی ہاں آپ سوچتے ہوں گے جس کے دو روز نامے نکلتے ہیں۔ تین ہفتہ وار اخبار اور پچیس اخبار جس کی تعریف میں روز کوئی نہ کوئی خبر چھاپتے ہیں۔ کیونکہ وہ سب اس کے کارخانوں کے اشتہاروں پر چلتے ہیں۔ وہ شخص جس کے اشارے پر پارلیمنٹ کے ایک دو نہیں دس بارہ ممبر ناچتے ہیں۔ بھلا ایسا آدمی اسمگلر کیسے ہو سکتا ہے ؟
سپرنٹنڈنٹ :سگاروں کی اسمگلنگ خاصی بے ضر ر چیز ہے !
سیٹھ :جی نہیں صرف سگاروں کی کیوں ؟کوکین کی اسمگلنگ، افیم کی اسمگلنگ، غرض ہراس چیز کی اسمگلنگ، اناج اور چاول کی اسمگلنگ، دواؤں کی اسمگلنگ غرض ہر چیز کی اسمگلنگ جس کا کاروبار ہو سکتا ہے۔ جو فارن ایکسینج پورے ملک نے خون پسینہ ایک کر کے جمع کیا تھا۔ وہ میں نے پانی کی طرح بہا دیا۔ اگر آپ آج پتہ لگانا چاہیں تو نیویارک، لندن، سوئزر لینڈ کے بنکوں میں میرا حساب ایک نہیں کئی کئی ناموں سے ملے گا۔ یہ سب روپیہ چوری کا ہے۔ یہ سب کھلم کھلا دھوکے بازی کا روپیہ ہے !
سپرنٹنڈنٹ :آپ ٹھیک کہتے ہیں۔
سیٹھ :میرے ذخیروں میں آج بھی لاکھوں من اناج لاکھوں من شکر اور لاکھوں من دوسری ضرورت کی چیزیں جمع ہیں۔ ۔ ۔ ان کی قیمتیں چڑھ رہی ہیں۔ جنتا فاقوں سے مر رہی ہے۔ میں اس کے خون سے سونا بنا رہا ہوں۔ مجھے دکھائی دے رہا ہے کہ بنگال کا سا قحط ایک بار پھر پڑنے والا ہے۔ مہنگائی اپنے پورے زور پر ہے۔ میں لکھ پتی سے کروڑ پتی اور کروڑ پتی سے ارب پتی ہونے والا ہوں۔ لیکن میں باپ کی کمائی کھانا نہیں چاہتا۔ آج میں اپنے گوداموں کی کنجیاں آپ کے حوالے کرنے آیا ہوں۔ یہ لیجئے !!
(کنجیاں دیتا ہے۔ )
سپرنٹنڈنٹ :دھنیہ واد!آج میرے دل میں انصاف آ ہی گیا۔
سیٹھ :آج میرے دل کے انصاف سے کیا ہوتا ہے میری پچھلی زندگی کے پاپ تو اس سے نہیں دھل سکتے۔ آپ جانتے ہیں۔ میں نے آج تک کبھی انکم ٹیکس کی پوری کیا آدھی رقم بھی ادا نہیں کی۔ میں مجرم ہوں۔ پاپی ہوں۔ میرے سارے بہی کھاتے جعلی حساب بنانے میں ماہر ہیں۔
سپرنٹنڈنٹ :آپ کو خوشی ہو گی کہ وہ سب ماہرین اپنے آپ کو گرفتاری کے لئے پیش کر چکے ہیں۔
سیٹھ :مجھے معلوم ہے۔ لیکن آپ کو سب معلوم نہیں ہے۔ آپ کو معلوم ہے کہ میری پندرہ بڑی بڑی ملیں اور کارخانے ہیں۔ ان میں پانچ ہزار سے زیادہ مزدور کام کرتے ہیں۔ ان کو اور ان کی یونینوں کو قابو میں رکھنے کے لئے میرے پاس غنڈوں کی ایک فوج ہے۔ جس سے کبھی کبھی میں ہندو مسلم فسادات بھی کراتا ہوں۔ ان ہی غنڈوں میں بعض مشہور ڈکیت ہیں جن کی ڈکیتوں میں مجھے بھی حصہ ملتا ہے۔
سپرنٹنڈنٹ :وہ سب ڈکیت خود کو گرفتار کرا چکے ہیں۔
سیٹھ :مجھے معلوم ہے۔ جس انکم ٹیکس آفیسر نے میرے حسابات کی جانچ پڑتال کر کے بلیک کے روپیہ کی رپورٹ لکھی تھی اور ایک لاکھ روپیہ انکم ٹیکس کی بقایا نکالی تھی۔ آپ جانتے ہیں میں نے اس کاکیا کیا؟
سپرنٹنڈنٹ :رشوت دی؟
سیٹھ :مگر اس نے رشوت نہیں لی۔
سپرنٹنڈٹ :اسے ڈرایا دھمکایا!
سیٹھ :وہ پھر بھی نہیں مانا۔ میں نے اسے چلتی گاڑی میں قتل کرا دیا۔ مجھے اس طرح نہ دیکھو میں نے اسے قتل کرا دیا۔ سنتے ہو میں نے اسے قتل کرا دیا! میں قاتل ہوں !سیٹھ چھبیل داس قاتل ہے۔ اسے گولی ماردو !!
سپرنٹنڈنٹ :آپ کیا کہہ رہے ہیں ؟آپ جانتے ہیں اسے اقبال جرم سمجھا جائے گا۔
سیٹھ :اچھی طرح جانتا ہوں۔ لیکن میں تمہیں رشوت نہیں دوں گا۔ میرے چار بنک ہیں۔ ان میں سے ایک کا دیوالہ میں نے جان بوجھ کر نکالا تھا۔ ان سب کا روپیہ جمع کرنے والوں سے لیتا ہوں اور اپنے بزنس میں لگاتا ہوں۔ لیکن اب میں اس رقم میں سے ایک پیسے کا بھی حقدار نہیں ہوں۔ میں تمہیں رشوت نہیں دوں گا۔ میرا اقبال جرم لکھو۔ میرے اوپر مقدمہ چلاؤ۔ میں ذلت و رسوائی اور موت کا مستحق ہوں۔ مجھے موت دے دو۔ میرے دل پرسے یہ بوجھ اسی وقت اٹھے گا۔
سپرنٹنڈنٹ : (زور سے کئی بار گھنٹی بجاتا ہے)اردلی!سیٹھ جی کا بیان لکھواؤ اور ان کی کار گیراج میں بند کر دو!
اردلی :جو حکم سرکار!
سپرنٹنڈنٹ :تم سے کتنی بار کہا جائے کسی کو مت آنے دو سمجھے ؟!
اردلی :جی سرکار۔
سپرنٹنڈنٹ :جی سرکار!جی سرکار!!کیا لگا رکھی ہے۔ اب میں کسی سے نہیں ملوں گا۔ ہر گز ہر گز نہیں ملوں گا!!
اردلی :مگر سرکار۔ ۔ ۔
سپرنٹنڈنٹ :اگر مگر کیا کرتا ہے ؟
اردلی :حضور میم صاحب!
سپرنٹنڈنٹ :آ گئی ہیں ؟
اردلی :جی سرکار!
سپرنٹنڈنٹ :تو بھیجو انھیں جلدی اندر بھیجو۔
اردلی :بہت اچھا سرکار!
سپرنٹنڈنٹ :اوہ ڈارلنگ!شما کرنا اس گدھے اردلی کوتو تم جانتی ہو۔ بالکل بیوقوف ہے۔ آج کام بہت تھا۔ میں نے کہہ دیا تھا آج میں کسی سے نہیں ملوں گا۔ اس کم بخت نے تمہیں بھی روک لیا۔ تم اتنی خاموش کیوں ہو۔ سفر کی تکان ہے۔ شاید چائے پیو گی؟
بیوی :نہیں۔
سپرنٹنڈنٹ :تم اتنی اداس کیوں ہو؟خیریت توہے نریندر تو اچھا ہے ؟
بیوی :ہاں۔ اچھا ہے۔
سپرنٹنڈنٹ :پھر کیا بات ہے ؟
بیوی : (پھوٹ پھوٹ کر روتے ہوئے) نریندر کامنی سے شادی کر رہا ہے ؟
سپرنٹنڈنٹ :ہمارا بیٹا نریندر شادی کر رہا ہے ؟
بیوی :کامنی سے !
سپرنٹنڈنٹ :کامنی؟ارے وہی اپنے یار جوگندر سنگھ کی لڑکی؟نریندر اس سے شادی کر رہا ہے تو کرنے دو۔ اس میں ایسی گھبرانے کی کیا بات ہے ڈارلنگ! میں تو ڈر گیا تھا۔
بیوی :بڑا انیائے ہو جائے گا۔
سپرنٹنڈنٹ :تمہارا مطلب ہے ذات برادری کا فرق ہے۔ میں نہیں مانتا ذات برادری کے ڈھکوسلوں کو۔
بیوی :نہیں !تم سمجھتے کیوں نہیں۔ وہ دونوں سگے بہن بھائی ہیں ؟
سپرنٹنڈنٹ :کیا کہا؟تو کیا نریندر میرا بیٹا نہیں ہے۔ اس کا مطلب ہے کہ تم بھی مجھ سے دغا بازی کرتی رہی ہو۔ تم میرے دوست جوگندر سنگھ کے ساتھ گلچھرے اڑاتی رہی ہو!میں برداشت نہیں کر سکتا۔ (چیخ کر) نکل جاؤ! نکل جاؤ!میرے سامنے سے دور ہو جاؤ!میں کہتا ہوں چلی جاؤ!!
بیوی :میں تم سے کچھ بھی چھپانا نہیں چاہتی۔ میں اور جوگندر کالج کے زمانے سے ایک دوسرے سے پریم کرتے تھے۔
سپرنٹنڈنٹ : (بات کاٹ کر) بند کرو، پریم کہانی۔ میں کچھ سننا نہیں چاہتا۔ نکل جاؤ!
بیوی :میں سچ کہہ رہی ہوں۔ میں نے زندگی میں کبھی تم سے محبت نہیں کی۔ میں تمہاری محبت کے قابل نہیں تھی۔ میں نے ہر بار تمہیں فریب دینے کی کوشش کی۔ میں نے جوگندر سے پریم کیا۔ میں نے تمہیں دھوکا دیا ہے۔ میں نے ایک لمحے کے لئے بھی تمہیں نہیں چاہا۔ میں دھوکے باز ہوں مجھے سزا دو!بھگوان کی قسم میں سچ کہہ رہی ہوں۔ بالکل سچ کہہ رہی ہوں۔
سپرنٹنڈنٹ :سچ سے مجھے نفرت ہے سنا تم نے ؟مجھے سچ سے نفرت ہے۔ سچ بولنے والوں سے نفرت ہے۔ سچ زہریلا ناگ ہے جو زندگی بھر کے سکھ اور شانتی کو ڈسے لے رہا ہے (زور سے گھنٹی بجاتا ہے اور چیختا ہے) اردلی! اردلی!!
اردلی :جی سرکار!
سپرنٹنڈنٹ :میم صاحب کولے جاؤ۔ ان کا بیان قلم بند کراؤ۔ ۔ ۔ لے جاؤ!!
اردلی :بہت اچھا حضور!
(دونوں چلے جاتے ہیں)
سپرنٹنڈنٹ :تو یہ ہے اس ڈرامے کا انجام!میں یہ توہین برداشت نہیں کروں گا۔ اس کا علاج موت ہے صرف موت!!
(وقفہ)
ہیرا لال :حوالات میں کوئی جگہ خالی ہوئی کپتان صاحب!(گولی کی آواز ہوتی ہے۔ )ارے یہ کیا؟کپتان صاحب!آپ نے یہ کیا کیا۔ آتم ہتیا۔ ۔ ۔ اردلی!سپاہیو!کپتان صاحب نے خودکشی کر لی۔ ۔ ۔ پستول سے گولی مار لی!!دیکھتے ہو سچائی کیسی بھیانک ہے ؟کیسی خطرناک ہے۔ ۔ ۔ اعلان کر دو آج سے کوئی سچ نہ بولے۔ ۔ ۔ آج سے کوئی جھوٹ کو برا نہ کہے۔ ۔ ۔ سچائی بڑی بھیانک ہے !!
(پردہ)
***
ماخذ: ’’مورپنکھی‘‘ ( اور دوسرے ڈرامے)
مکتبۂ دین و ادب
لکھنو
 
ڈاکٹر محمد حسن

تماشا اور تماشائی (غالبؔ پر ایک اسٹیج ڈرامہ)

(غالب کی غزلوں کے مختلف ٹکڑے گاتے ہوئے مختلف لوگ اسٹیج سے گزرتے ہیں ان میں کوئی ٹکڑا کتھک کے رقص کا ہے تو کوئی فلمی موسیقی کا۔ کوئی قوالی کا ہے تو کوئی کسی ڈرامے کا۔ )
(دروازے پر دستک۔ غالب دروازے کے قریب جاتے ہیں۔ غالب دروازہ کھولنے لگتے ہیں۔ )
مرزا : (اسٹیج کے بازو سے آواز دیتے ہیں نظر نہیں آتے) دروازہ مت کھولو۔
غالب :آخر کیوں ؟دیکھتا ہوں کون لوگ ہیں ؟
مرزا : (آواز) مجھے معلوم ہے۔
(دستک پھر ہوتی ہے۔ )
غالب :تو بتاتے کیوں نہیں ؟یہ سلسلہ کیا ہے ؟
مرزا : (آواز) یہ لوگ برسی منا رہے ہیں۔
غالب : (پھر دروازے کی طرف بڑھتا ہے) تو پھرکیا حرج ہے ؟
مرزا : (entry) (پھر ٹوک لیتے ہیں) پہلے یہ معلوم ہونا چاہئے کہ یہ لوگ کس کی برسی منا رہے ہیں۔ میری یا تمہاری؟
غالب :ظاہر ہے برسی غالب کی منائی جا رہی ہے شاعر غالب کی۔
مرزا :نہیں۔ برسی مرزا اسداللہ خاں عرف مرزا نوشہ کی ہے، ۱۰۵ سال پہلے میری موت ہوئی تھی۔
غالب :تم سے کسی کو کیا دلچسپی ہے۔ تم تو محض ایک امیر زادے تھے۔
مرزا : اور تم؟
غالب :میں شاعر غالب۔ میرا ایک ایک شعر آج بھی زندہ ہے۔
مرزا :کس کی بدولت؟میری اور صرف میری۔
غالب :یہ جھوٹ ہے۔ شاعر امیر زادے کے محتاج نہیں۔ تم فقط میرا جسم تھے۔ میری روح میری شاعری تھی۔
مرزا :مت بھولو، میں نے تمہیں نام دیا، ہستی دی، ہنستے ہوئے ہونٹ، روتی ہوئی آنکھیں دیں۔ ترستا ہوا دل اور آسمانوں سے بھی زیادہ بلند پرواز کرنے والا دماغ دیا۔
غالب :سارے امیر زادے اسی طرح بول بولا کرتے ہیں۔ یہ صحیح ہے مرزا نوشہ مرے تم تھے زندگی بھر مرے، کبھی کسی کو مار رکھا، کبھی خود مر گئے۔
مرزا :تمہاری قسمت میں موت کہاں ؟
غالب :میں بے چارا اپنا آپ تماشائی تھا، لے دے کے زندگی میں کوئی آرزو کی بھی تو صرف اتنی:
تھالے دے کے زندگی میں کوئی آرزو کی بھی تو
مرزا :تو گویا میرے بغیر تمہاری ہستی، تمہاری حسرتیں اور ارمان تمہاری شاعری باقی رہتی؟
غالب :نہیں۔ لیکن تمہارے گناہ میرے نام کیوں لکھے جائیں۔
مرزا :ٹھیک کہتے ہو، لوگ آج کل میرے پیچھے پڑے ہیں۔ مرزا نوشہ کہاں پیدا ہوا اس نے اپنے سالے کی موت پر خوشی کاکیوں اظہار کیا، اس مغل بادشاہ بہادر شاہ ظفر کا قصیدہ کیوں لکھا۔ انگریزوں کی مدح سرائی کیوں کی اس نے اپنے دوست صدر الدین آرزدؔ کی بیوی کی پنشن رکوا کر نواب رام پور سے اپنے لئے پنشن حاصل کرنے کی کوشش کیوں کی؟
غالب :یہی نہیں اور سنو۔ مولوی ذکاء اللہ نے لکھا:
’’غالب کا حال یہ ہے کہ سوائے شاعر ہونے کے کوئی خوبی اس میں نہ تھی۔ حسد اس قدر تھا کہ کسی کی عزت کو دیکھ نہ سکتا۔ تنگ دل ایسا کہ سارے بھائی بندوں کا حق مارنے میں اس کی عار نہ تھا۔ ذوقؔ مرگیا تو خوش ہو کر کہتا تھا آج بھٹیاروں کی بولی بولنے والا مرا۔ شرابی ایسا کہ کہا کرتا تھا صہبائیؔ شعر کہنا کیا جانے، نہ اس نے شراب پی، نہ معشوقوں کے ہاتھ سے جوتیاں کھائیں، نہ جیل خانے میں پڑا۔ لالچی ایسا کہ ایک ایسا قصیدہ دس دس جگہ بیچتا تھا۔ ‘‘
مرزا : (دروازے سے لگ کر کھڑا ہو جاتا ہے اور دستک ہونے پربھی غالب کو دروازہ کھولنے نہیں دیتا)نہیں دروازہ مت کھولو۔ پہلے یہ طے ہو جائے کہ وہ کس کی برسی منانا چاہتے ہیں۔ وہ کہتے ہیں کہ مرزا نوشہ خودغرض تھا۔ لالچی تھا تنگ دل تھا۔
غالب :کیا غلط کہتے ہیں۔
مرزا :لو وہ بھی کہہ رہے ہیں کہ بے ننگ و نام ہے :
یہ جانتا تو آگ لگاتا نہ گھر کو میں
غالب :گھر، میرا کوئی گھر نہیں۔
مرزا :نہیں، غالب بھولتے ہو۔ غالب کے نام سے پہچانے جانے سے پہلے صرف میں تھا مرزا اسداللہ بیگ اور میں نے آگرے میں آنکھیں کھولی ہیں ۱۷۹۸ء کا آگرہ۔ یہاں نظیر اکبر آبادی کے ’’شہر آشوب‘‘ کا آگرہ۔ جہاں میری خاندانی حویلی تھی اور دیوان خانے میں راجہ بنسی دھر کے ساتھ شطرنج کی بازی جمتی تھی۔
 
FLASH BACK - I
بنسی :چال چلو مرزا۔
مرزا :چلتا ہوں بنسی دھر۔
بنسی :جی ہاں شطرنج ہے، بچوں کا کھیل نہیں ہے۔
مرزا :ہمارے لئے تو بچوں کا کھیل ہی ہے۔ لیجئے فرزیں تو گیا۔
بنسی :میاں صاحبزادے ہوا بھی، کچھ خاندان کی پرانی رسم و راہ کا پاس کرتا ہوں۔ ورنہ مات پلا کر نوشیرواں بنٍا دیتا۔ سوچتا ہوں تمہارے نانا ہمارے نانا ایک ساتھ فوج میں نوکر ہوئے۔ ایک ساتھ نوکری چھوڑی، ایک ساتھ زندگی گزاری۔ اگر دوچار مات پلا دی تو کہو گے کہ پشتوں پرانی دوستی کا پاس نہ کیا۔
مرزا :واہ۔ ۔ ۔ واہ۔ ۔ ۔ میاں بنسی دھر کیا کہنے ہیں عمر میں مجھ سے دو ایک برس بڑے یا چھوٹے ہی ہو گے باتیں کرتے ہو تو نانا دادا سے کم نوالہ نہیں توڑتے۔
بنسی :خیر جی مرزا۔ یہ بازی تمہیں اٹھا لو۔ ہمیں مانے لیتے ہیں اچھا چلو دوسرے بازی لگاتے ہیں۔
مرزا :بس جناب۔ دوسری بازی نہیں۔ آج بلوان سنگھ سے پتنگ کے پیچ لڑانا ہے۔
بنسی :کون؟راجہ بلوان سنگھ وہی گڈریوں کے کٹرے والا وہ بھی عمر بھر بچہ رہے گا اور تمہارا بھی یہی حال ہے۔
مرزا :جی بس شطرنج کے سوا تو سارے کھیل گویا لڑکپن ٹھہرے تم بھی ذرا پیچ لڑاؤ تو جانیں۔
بنسی :اماں توبہ کرو۔ میری سنو تو لعنت بھیجو پتنگ بازی پر۔ راجہ بلاس رائے کی حویلی میں مشاعرہ ہے، چلے چلتے ہیں۔ بھئی میری تو جان جاتی ہے ان مشاعروں پر۔ اکبر آباد کے شاعر ایران کے شاعروں کو شرماتے ہیں اور اپنے میاں نظیرؔ کا کلام بچہ بچہ کی زبان پر ہے۔
مرزا :کہو گے خودستائی کر رہا ہے۔ بخدا دوچار شعر تو ریختے میں ہم نے بھی کہنے شروع کر دئیے ہیں۔
بنسی :سچ۔
مرزا :پتنگ پر ایک قطعہ لکھا ہے۔ بخدا داد دینے میں کنجوسی نہ کرنا۔ عرض کیا ہے :
ایک دن مثل پتنگ کاغذی
لے گے دل سر رشتہ آزادگی
خود بخود کچھ ہم سے کنیانے لگا
اس قدر بگڑا کہ سر کھانے لگا
میں کہا اے دل ہوائے دل براں
بسکہ تیرے حق میں رکھتی ہے زیاں
دل یہ سن کر کانپ کر کہا پیچ و تاب
غوطے میں جا کر دیا کٹ کر جواب
(شعر کے بیچ ہی میں بول اٹھتے ہیں۔ )
غالب :یہی لمحہ میری پیدائش کا تھا مرزا نوشہ سے غالب بننے کا لمحہ جب پہلی بار شاعر بیدار ہوا تھا۔
مرزا :مگر اس لمحے کی سالگرہ کوئی نہیں مناتا۔ میری برسی سب مناتے ہیں۔
غالب :شاید اس کی ضرورت بھی نہیں۔ شمع روشنی دیتی ہے اور جل بجھتی ہے اس کی سالگرہ کون مناتا ہے۔
مرزا :احساس فراموش ہو۔
غالب :میں۔
مرزا :ہاں تم، میرا احسان نہیں مانتے کہ غالب کے لئے مرزا نوشہ نے کیا کیا نہیں کیا، ذلتیں سہیں، ہر کس و ناکس کے آگے دامن پسارا، خوشامدیں کیں دست طلب دراز کیا، اپنوں کو اپنا نہیں سمجھا، تا کہ شاعر غالب کو فرصت کا ایک سانس میسر آ جائے، تم فکر سخن کے لئے ذرا سی آسودگی پا سکو۔
غالب :آسودگی اور چین اور تم سے ؟تم نے مجھے زندگی بھر بے قرار رکھا۔ وہ دن یاد نہیں تمہیں۔
مرزا :کون سادن۔
غالب :جب مدتوں بعد میرے بچپن کا یار بنسی دھر گلی قاسم جان کے چورا ہے پر پتہ پوچھتے پوچھتے میرے گھر پہنچا تھا۔

FLASH BACK - II
(گلی قاسم جان کے قریب ایک چوراہا، رات کا وقت مشعلیں روشن ہیں، بنسی دھرکی عمر اب ۳۵۔ ۳۰ برس کی ہے۔ غالب ان سے پانچ سات سال بڑے ہیں۔ داستان گو داستان سنا رہا ہے۔ )
داستان گو :جب شہر کے دروازے پر آیا ایک نعرہ لگایا قفل کو تبر سے توڑا اور نگہبانوں کو ڈپٹ کر للکارا کہ اپنے خاوند کو جا کر کہو کہ بہزاد خان ملکہ مہر نگار اور شہزادہ کامگار کو جو تمہارا داماد ہے، ہانکے پکارے کے لئے جاتا ہے اگر مردمی کا کچھ نشہ ہے تو باہر نکلو اور ملکہ کو چھین لو۔ یہ نہ کہو کہ چپ چاپ لے گیا نہیں تو قلعے میں بیٹھے آرام کیا کرو۔
(چاوش اور چوب دار اور کچھ سپاہی آگے آگے دوڑے آتے ہیں۔ بر قندازوں کے ہاتھوں میں مشعلیں ہیں ’’ہٹو بچو۔ دور باش فرنگی ریزیڈنٹ بہادر کی سواری آتی ہے۔ ‘‘ کئی آوازیں لگاتے ہیں۔ بگھی گزرنے کی آواز آتی ہے۔ داستان کا سلسلہ ٹوٹ جاتا ہے۔ )
مجمع سے ایک مولانا:صاحبو ملاحظہ فرمایا آپ نے۔ فرنگی نے جو اشقلہ اٹھایا اور قلیم میں جو غضب ڈھایا ہے آپ حضرات نے اپنی آنکھوں سے دیکھا۔ دن رات نہ جانے کتنے ہندو مسلمان بے دین ہو رہے ہیں۔ مدرسے تباہ، خانقاہیں ویران، دہلی کالج میں علم دین کی جگہ گٹ پٹ سکھائی جا رہی ہے۔
بنسی دھر : (ایک تماشائی سے)مجھے نواب اسداللہ بیگ کا مکان پوچھنا ہے۔
ایک اور تماشائی:اماں یہ اسداللہ بیگ کون ہوئے۔
داستان گو :اماں وہی، مرزا الٰہی بخش معروف کے داماد اسداللہ خاں۔ گلی میں سیدھے جا کر الٹے ہاتھ کو مڑ جانا، وہیں سب پتہ و نشان معلوم ہو جائے گا۔ وہی تو ہیں جن کا ایک بھائی یوسف مرزا پاگل ہو گیا ہے۔ آگرے سے دہلی آئے ہیں۔
(دہلی کے لفظ پر مجمع سے اچانک یوسف مرزا اٹھ کھڑے ہوتے ہیں۔ )
یوسف مرزا :دلی مر گئی، مر گئی دلی۔ اب صرف میرا بھائی اسداللہ دلی ہے۔ تم سب باطل ہو۔ کاغذی تصویر و زمانہ تم سب کو مٹا ڈالے۔ (بنسی دھر کو شاید پہچان کران کو کندھوں سے پکڑ لیتا ہے۔ )تم کون ہو؟
بنسی :میرا نام بنسی دھر ہے۔
یوسف مرزا :پھر تمہاری بنسی کہاں ہے ؟برادرم، یہ دلی ہے۔ دلی جو ایک شہر تھا عالم میں انتخاب۔ یہاں دن رات کٹھ پتلی کا تماشہ ہوتا ہے۔ سب ناچتے ہیں۔ لال قلعہ بھی ناچتا ہے اس کے اندر بیٹھا ہوا عالم پناہ بھی ناچتا ہے فرنگی فرنگن بھی ناچتے ہیں۔ کون نچاتا ہے ؟خاموش یہ مت پوچھو۔ آؤ ہم تم بھی ناچیں۔
(اتنے میں چوبدار یوسف مرزا کو تلاش کرتے ہوئے نکل آتے ہیں۔ )
چوبدار :چھوٹے مرزا، چھوٹے مرزا چلئے گھر چلئے۔
یوسف :ہمیں چھوڑ دو۔ ہم جا رہے ہیں۔
(چلے جاتے ہیں۔ )
بنسی دھر :اسداللہ کہاں ہیں ؟
چوبدار :لمبی کہانی ہے۔ سب بتاؤں گا۔ دوپہر رات گئی۔ انگریزی عملداری ہے دلی کی حالت خراب ہے، گھر چلئے۔
بنسی :میں اس طرح گھر نہیں جانے کا۔ مجھے بتاؤ اسداللہ کہاں ہے ؟ کس حال میں ہے ؟
چوبدار :کیا عرض کروں بندہ پرور، دلی اس خاندان کو راس نہ آئی۔ پورا خاندان تباہی میں آ گیا۔ سوچا تو یہ تھا کہ مرزا نوشہ رسالداری پائیں گے شادی کے بعد آل اولاد کا سکھ ملے گا تو باپ اور چچا کا غم بھی جی سے دھل جائے گا۔
بنسی :کیا ہوا جلد بیان کرو۔ مرزا نوشہ خیریت سے تو ہیں ؟
چوبدار :پہلے سرکار فرنگی سے حکم ہوا دس ہزار سالانہ مرحوم رسالدار نصراللہ بیگ کے عزیزوں کو ملا کر لے۔ پھر حکم ہوا فقط پانچ ہزار سالانہ ملے اور اس میں سب وارث شریک ہوں۔ اتنا بڑا خاندان اور اتنی تھوڑی رقم کیسے پورا ہوتا۔ پھر ایک نہیں دو نہیں سات اولادیں ہوئیں مگر کوئی ڈیڑھ سال سے زیادہ نہ جیا۔ بہو بیگم کیا کیا تڑپی ہیں کہ دیکھانہ جاتا تھا۔ پھر چھوٹے بھائی نواب یوسف مرزا کی شادی ہوئی مگر سکھ دیکھنا نصیب نہ ہوا۔ بچارے مصیبتیں جھیلتے جھیلتے پاگل ہو گئے۔
بنسی : اور مرزا نوشہ کیسے ہیں ؟
چوبدار :نہ پوچھو سرکار۔ شاعری ہے اور وہ ہیں۔ مشاعرے پڑھتے ہیں۔ غزلیں کہتے ہیں۔ گلی گلی کوچے کوچے شاعر مشہورہیں اور بس۔ اب کیا کہوں۔ آخر سرکار کا پرانا نمک خوار ہوں۔
بنسی :کہو۔ تمہیں قسم دیتا ہوں، مجھ سے کچھ نہ چھپانا۔
چوبدار :دکھ سہا نہیں گیا ان سے۔ بس اب شراب منہ کو لگی ہے اور سنتا ہوں کہ ایک ڈومنی بچی پرفریفتہ ہو گئے ہیں۔ اب دیکھو دوپہر رات گئی ابھی واپس گھر نہیں پہنچے ہیں۔
(اسی اثنا میں غالب ہوا دار میں سوار نشے کی حالت میں گنگناتے ہوئے گزرتے ہیں۔ کہاروں کے ہاتھ میں مشعلیں ہیں۔ غالب چوبدار کی آواز کو پہچان لیتے ہیں۔ )
غالب :ہوادار یہیں رکھ دو۔ (چوبدار سے) اتنی رات گئے یہاں کیا کر رہے ہو۔
چوبدار :ناظر بنسی دھر بھیا اکبر آباد سے آئے ہیں۔
غالب :بنسی دھر تم ہو تو پھر آؤ میرے ساتھ ہوا دار میں بیٹھ جاؤ(کہاروں کو اشارہ کرتے ہیں۔ بنسی دھر بیٹھ جاتے ہیں)بنسی دھر دلی لٹ گئی۔ اب یہاں مرزا نوشہ کا کلام سمجھنے والا کوئی نہیں۔ بڑے بڑے سخن سنج طرہ و دستار والے کہتے ہیں مرزا نوشہ مہمل بکتا ہے کس کے دل میں اپنا دل ڈالوں کہ میری دھڑکنیں سمجھے۔ میرے لفظوں کی تہہ تک پہنچے۔ میرے خون جگر کی تراوش پاوے۔ چلو گھر چلیں۔ تم بھی ان باتوں کو نہیں سمجھو گے۔ میری جان انھیں سمجھنے کے لئے پتھر کا کلیجہ چاہئے۔ زندگی بڑی ظالم ہے دوست اور اس سے نکل بھاگنے کے لئے کوئی نہ کوئی پناہ، کوئی نہ کوئی چور دروازہ تو چاہئے :
کچھ تو دے اے فلک نا انصاف
آہ و فریاد کی فرصت ہی سہی

FLASH BACK - III
(نسوانی آواز ابھرتی ہے۔ )
رہئے اب ایسی جگہ چل کر جہاں کوئی نہ ہو
ہم سخن کوئی نہ ہو اور ہم زباں کوئی نہ ہو
بے در و دیوار سا اک گھر بنایا چاہئے
کوئی ہم سایہ نہ ہو اور پاسباں کوئی نہ ہو
پڑئیے گر بیمار تو کوئی ہو تیمار دار
اور اگر مر جائیے تو نوحہ خواں کوئی نہ ہو
(نو وارد دروازہ کھٹکھٹاتا ہے۔ گانا بند ہو جاتا ہے۔ آداب تسلیم کے بعد نو وارد ایک دم ماں سے مخاطب ہو جاتا ہے اور لڑکی کو نظر انداز کر دیتا ہے۔ )
نو وارد :میں کہتا ہوں اب انتہا ہو چکی۔ بات گھر سے نکلی کوٹھوں چڑھی۔ شہر میں بدنامی ہو رہی ہے۔ بچے بچے کی زبان پر تمہاری بیٹی اور مرزا نوشہ کے قصے ہیں۔ توبہ توبہ، اب میری بات مانو اس کے ہاتھ پیلے کر دو۔ )
ماں :کیا کروں بیرن؟کچھ بس نہیں چلتا، تم جانو پھوٹی آنکھ کا دیدہ ایک ہی تو بچی ہے، اس کا دل بھی نہیں توڑا جاتا۔ اتی بڑی ہو گئی ہیں، میں نے کبھی جواس کا جی میلا کیا ہو۔ اچھے سے اچھا کھلایا، اچھے سے اچھا پہنایا۔ کبھی اس کا کہا نہ ٹالا۔ اس بڑھاپے میں چونڈے میں کالک لگتی تھی۔
نو وارد :ہر گھر میں ایسے قصے ہو جاتے ہیں بہن مگر آخر بزرگ کس دن کے لئے ہوتے ہیں۔ بچی ناسمجھ ہے۔ جوانی دیوانی ہوتی ہے۔ ذرا خبر کرنا پڑے گا۔ سب ٹھیک ہو جائے گی۔
ماں : اور جو میری چاند سی بیٹی کو کچھ ہو گیا؟
نو وارد :بہن کیسی باتیں ارے شادی بیاہ کے بعد ارمانوں میں لگ جائے گی۔ یاد بھی نہیں رہے گا کہ تھے کوئی مرزا نوشہ بھی۔ اپنی آنکھوں کے سامنے ایسے ہزاروں نہیں تو سینکڑوں تماشے دیکھ لئے اور پھر ذرا دل میں سوچو ڈومنی ذات ہمیشہ سے عزت دار، غیرت والی مشہور ہے۔ ہم کوئی نیچ ذات ہیں کہ جس نے چاہا ہاتھ ڈال دیا۔ یہ قصہ ہو گیا تو ہمیشہ کے لئے ڈومنی ذات بھی کسی باجنے لگے گی۔
ماں :تم میری بٹیا کو نہیں جانتے۔ وہ بڑی ہٹیلی ہے وہ چاند کے لئے بھی مچلے گی تو اسے لے کر چھوڑے گی یا اپنا جی کھو دے گی۔
نو وارد :بالک ہٹ ہے مگر ہٹ کے آگے ہار گئیں تو سر پکڑ کر روؤ گی، بچی ہاتھ سے نکل جائے گی۔ ذرا سوچو مرزا نوشہ اچھے گھرانے کا نواب زادہ، جیب میں کوڑی نہیں، خرچ لمبا، بیوی ہے، گھربار ہے، شاعری سے تو پیٹ پلتا نہیں۔ اول تو وہ گھر ڈالے گا کیسے اور گھر ڈال بھی لے تو یہ ننھے والی بات نہیں۔ آخر اس کی بیوی بھی نواب الٰہی بخش کی بیٹی، نواب لوہارو کی بھتیجی ہے، ناک چنے چبوا دے گی۔
ماں :میری تو کچھ سمجھ میں نہیں آتا۔
نو وارد :میرا کہا مانو تو اس جوکھم سے نکلو گی(جیب سے سونے کی مہریں نکال کر رکھتا ہے)یہ دو توڑے سونے رکھ لو۔ بڑی قسمت والی ہے تمہاری بیٹی۔ کوتوال کی نظروں میں ایسی جچی ہے کہ نہ پوچھو، بولو منظور ہے ؟باقی میں نمٹ لوں گا۔ تم ایک ذرا حامی بھر لو اور پھر دیکھو چٹکی بجاتے ہی سب تصفیہ ہو جائے گا۔ شام ہوتے ہوتے منگنی کا جوڑا آ جائے گا۔
ماں :میں اتنی جلدی کیسے حامی بھروں۔
(لڑکی کی سب کچھ سن لیتی ہے، غصے میں بھری ہوئی جالی تک آئی ہے۔ )
لڑکی :اماں !ان سے کہئے یہاں سے چلے جائیں۔
ماں :بیٹی!تیرے ماموں ہیں، ان کی اس طرح توہین نہیں کرتے۔
لڑکی :میں کوئی کارچوب کی گڑیا نہیں ہوں کہ دو توڑے سونے میں بک جاؤں گی۔ یہ کون ہیں میرا مول لگانے والے، مجھے نیلام پر چڑھانے والے۔
نو وارد :بیٹی!میری بات سنو۔ تمہاری بھلائی کے لئے کہتے ہیں۔
لڑکی :خبردار جو مجھے بیٹی کہا۔ میں آپ کے کوتوال صاحب کو تلووں سے مسل کر پھینک دوں ان سے کہہ دیجئے گا۔
نو وارد :میں کچھ نہیں کہوں گا۔ بڑھاپے نے کبھی جوانی سے قول نہیں ہارا۔ تم غصے میں ہو، جوش ٹھنڈا ہو جائے۔ ذرا معاملے پر غور کر لو، میں تھوڑی دیر بعد آؤں گا۔ سوچ لو، اچھی طرح سوچ لو۔
لڑکی :مجھے نہیں سوچنا۔ آپ کو تکلیف کرنے کی ضرورت نہیں۔
نو وارد : (ہنستا ہے) بچی نادان ہو۔ میں ان باتوں کا برا نہیں مانتا۔ سوچنے سے کبھی کسی کا کچھ نہیں بگڑا۔
(چلا جاتا ہے۔ )
لڑکی : (جالی کے دوسری طرف آ کر) یہ آپ کیا کھچڑی پکایا کرتی ہیں اماں ؟ ہر وقت شادی، ہر وقت منگنی بیاہ۔ آپ کے نزدیک دنیا میں اس کے سوا اور کچھ ہے ہی نہیں۔ آپ سمجھتی کیوں نہیں ؟آپ مجھے جان بوجھ کر کیوں تڑپاتی ہیں۔ (رونے لگتی ہے) جائیے میں آپ سے نہیں بولوں گی۔
ماں : (گلے لگا کر) بوڑھی گئی ہوں سٹھیا گئی ہوں بھول جاتی ہو، تو کچھ خیال مت کیا کرو۔
لڑکی :بہت بڑی بھول ہے اماں۔ تم نے سوچا یہ بات انھیں معلوم ہو گئی تو ان کا دل ٹکڑے ٹکڑے ہو جائے گا شاعر کا دل ہے اماں۔ صدیوں میں ایسا انمول دل کسی کو ملتا ہے۔ دولت نہیں، حکومت نہیں، مشاعرے کی واہ واہ تک نہیں شیشے سے زیادہ نازک اور ہیرے سے زیادہ انمول دل کو تم چاہتی ہو کہ میں بھی ٹکڑے کر ڈالوں۔ یہ بہت بڑا پاپ ہے ماں۔
بنسی دھر :اس طرح بے اطلاع اندر چلا آیا، معاف کیجئے گا۔ مجھے دو باتیں کرنی ہیں میرا نام بنسی دھر ہے اکبر آباد سے آیا ہوں۔ مرزا نوشہ کا بچپن کا دوست ہوں۔
لڑکی : (بے قرار ہو کر جالی کی دوسری طرف آ جاتی ہے ماں اٹھ کر چلی جاتی ہے)فرمائیے، کیا مرزا صاحب نے کوئی پیغام بھیجا ہے ؟کیا کہا ہے انھوں نے ؟کیسے ہیں وہ؟خود ہی کیوں نہ چلے آئے۔
بنسی :آتے ہوں گے۔
لڑکی :تشریف رکھئے۔
بنسی :بہن!مرزا کے بچپن کے دوست ہوں۔ ساتھ شطرنج کھیلنے میں راتیں سیاہ کی ہیں، باہم قصے کہانیاں کہی سنی ہیں۔ پتنگیں لڑائیں اور بازیاں ہاری جیتی ہیں۔ اس خاندان کو اپنی نظروں کے سامنے پامال ہوتے دیکھا ہے اکبر آباد میں آج بھی عبداللہ بیگ خاں اور مرزا کے چچا نصر اللہ بیگ خاں اور مرزا کے نانا غلام حسین خاں کا نام باجتا ہے۔ کوئی رسالدار، کوئی میدان میں نے اس خاندان کا وقار اپنی آنکھوں سے دیکھا ہے ان کی آن بان کا سورج میرے سامنے ڈوبا ہے۔
لڑکی :میں کچھ سمجھی نہیں۔
بنسی :آپ کو ایک نظر دیکھا تو مرزا کے حسن نظر کی داد دی۔ بخدا خالق نے اپنے ہاتھ سے نور کے پتلے میں جان ڈال دی ہے اور جادو بھری آواز بخشی ہے پھر مرزا نوشہ نے جان نچھاور کر دی تو کیا تعجب۔ اس کی جگہ کوئی اور ہوتا تو کئی جانیں نچھاور کر ڈالتا۔ مجھے یہ بھی بھروسہ ہے کہ اس نورانی پیکر میں ایسا ہی نازک، لطیف اور ہمدرد دل بھی ہے جو دوسروں کے درد سے تڑپ اٹھتا ہو گا۔
لڑکی :میں کچھ نہیں سمجھی۔ آپ کہنا کیا چاہتے ہیں ؟
بنسی :میں نہیں مانتا۔ مرزا نوشہ کے شعر سمجھنے والی اتنی سیدھی سی بات نہ سمجھے میں نہ مانوں گا۔
لڑکی :خدارا پہیلیاں نہ پوچھئے۔
بنسی :لے دے کے اس گھرانے کے پاس تھوڑی سی آن بان بچی ہے آپ چاہیں تو یہ آن بان قائم رہ جائے۔
لڑکی :میں چا ہوں ؟میرے چاہنے سے کیا ہوتا ہے بھائی صاحب۔ دنیا میری مرضی پر چلتی تو مرزا صاحب کا نام آفتاب و ماہتاب کی طرح رات دن عالم پر چمکتا۔ انھیں اپنے کلام کی داد ملتی، ان کی صداؤں پر لوگ سر دھنتے میرے بس میں تو کچھ بھی نہیں۔
بنسی :میں آپ ہی سے کچھ مانگنے آیا ہوں۔ آپ اس گھرانے کی آبرو بچا سکتی ہیں آپ نے مرزا نوشہ کو دیکھا مگر اس گھرکی خوشی، اس خاندان کی آبرو مندی، اس کے گھربار کی ذمہ داریوں کا خیال نہیں کیا۔ مرزا نوشہ نے اپنا سب کچھ آپ پر وار دیا مگر آپ نے کبھی یہ بھی سوچا ہے کہ کوئی اور عورت آپ ہی کی طرح نازک، آپ ہی کی طرح دردمند عورت اپنا سب کچھ مرزا پر وار چکی ہے اور اسے وہ پیار بھی نہیں ملا جو خوش قسمتی سے آپ کومل گیا۔
لڑکی :میں بھی انسان ہوں، میرے سینے میں بھی دل ہے، پتھر نہیں ہے بھائی صاحب۔ مجھے بھی جینے کا حق ہے۔
بنسی :میں نے سنا تھا محبت قربانی دیتی ہے قربانی لیتی نہیں۔
لڑکی : (غصے سے) آپ نے غلط سنا تھا، بالکل غلط سنا تھا آپ نے۔ عورت بھی انسان ہوتی ہے ہم گانے وٍا لیاں بھی انسان کا دل رکھتی ہیں۔
بنسی :آپ ٹھیک فرماتی ہیں مگر بڑی بیگم بھی عورت ہیں اور ان کا دل بھی انسان کا دل ہے۔
لڑکی :میں کچھ نہیں جانتی۔ میں نے صرف اتنا سوچا تھا کہ درد سے چور شاعر کے دل کو اپنے پیار سے بھر دوں۔ پھر دل سوچا سمجھا کہاں مانتا ہے اس کی تو اپنی ڈگر ہے اپنی راہ ہے۔ پھر میں اسے سمجھانے والی کون؟ یہ سب مقدر کا پھیر ہے بھلا کبھی خواب میں بھی سوچا تھا کہ جس شاعر کے کلام کو اس طرح جی جان سے گاتی رہی ہوں کبھی اسے دیکھ بھی پاؤں گی، کبھی اس سے بات بھی کرپاؤں گی۔ ہائے کیسے اچنبھے کی بات ہے۔
بنسی :ذرا سوچئے، ایک گھر تباہ ہو جائے گا۔ آپ پسند کریں گی یہ تباہی آپ کے نام لکھی جائے۔ ایک نامور گھرانا تاراج ہو جائے اور اس تباہی کی لپٹوں میں ایک عورت کا دل، اس کا سہاگ ہی نہیں اجڑے گا بلکہ ایک ہونہار شاعر کا مستقبل بھی جل جائے گا۔
لڑکی :یہ سب مجھ سے کیوں کہتے ہیں آپ اپنے دوست کو سمجھائیے۔
بنسی :وہ نہیں سمجھے گا اسی لئے تو آپ کو زحمت دینے حاضر ہوا ہوں، ذرا سوچئے پورے خاندان کا دار و مدار مرزا نوشہ پر ہے۔ وہ جوانی دیوانی کے نذر ہو گئے تو یہ با عزت خاندان بھیک مانگے گا۔ سرکار انگریزی میں پینشن کے کاغذات پیش ہیں وہاں اس قصبے کی سن گن پہنچی تو کیا ہو گا سرکار بھی یہی سوچے گی کہ نصراللہ بیگ کی پنشن الللے تللوں میں اڑائی جاتی ہے اب میں اس میں اضافہ بے محل ہے جسے آپ حافظ و خیام کے مرثیے پر دیکھنا چاہتی ہیں۔ وہ ایک انسان بھی توہے ایک مفلوک الحال امیرزادہ بھی توہے۔ میں آپ سے اس کے وقار، اس کی زندگی کی بھیک مانگتا ہوں۔
(دامن پھیلا دیتا ہے۔ تھوڑی دیر خاموشی رہتی ہے لڑکی چلی جاتی ہے اسٹیج پر ذرا دیر تاریکی۔ جب دوبارہ روشنی ہوتی ہے تو بنسی دھر جا چکے ہیں اور لڑکی ستار لئے خاموش سوچ میں گم سم بیٹھی ہے۔ )
(بہت دیر تک خاموش بیٹھی کچھ سوچ رہی ہے اسی عالم میں ماں پکارتی ہے تو چونک پڑتی ہے۔ )
ماں :بیٹی!اب ستار رکھ دو چلو کھانا کھا لیں۔ دیر ہو رہی ہے۔
لڑکی : (ایک دم چونک کر) اماں۔
ماں :ہاں بیٹی! ڈر گئی۔
لڑکی :اماں میں نے شادی کا فیصلہ کر لیا ہے۔
ماں :بیٹی!!
(خوشی سے)
لڑکی :ماموں ٹھیک کہتے ہیں۔ انھیں بلاؤ ان سے کہو کہ منگنی کا جوڑا لائیں میں اس جوڑے میں کیسی لگوں گی۔ اماں تم نے میری شادی کے جوڑے تو سیئے ہیں میری بات مانوں گی؟
ماں :کہو بیٹی۔
لڑکی :مجھے دلہن بنا دو۔ مجھے شادی کا جوڑا پہناؤ، میرے ہاتھ چوڑیوں سے بھر دو، میری مانگ میں افشاں چن دو، آج سے میں نئی زندگی شروع کروں گی۔ چلو اماں چلو۔
(ماں کو گھسیٹتی ہوئی لے جاتی ہے۔ )
ماں :پاگل ہوئی ہے۔ ذرا دم لے۔
لڑکی :میری اچھی اماں اب دیر نہ کر۔ میری اچھی اماں۔
(دونوں چلی جاتی ہے۔ )
ماں :ارے دوڑو۔ ۔ ۔ لوگو میں لٹ گئی۔ ارے لوگو میری بچی۔ ۔ ۔ ارے کوئی آؤ دیکھو میری چاند سی بٹیا کو کیا ہوا۔ ارے لوگو!میں لٹ گئی۔ ۔ ۔ ارے لوگو میں لٹ گئی۔ میں کیا جانتی تھی کہ میری بچی اس لئے دلہن بن رہی ہے۔ میں رنڈیا باتوں میں آ گئی۔ ۔ ۔ ہائے میں کیا کروں، کہاں جاؤں۔ ہیرے کی انگوٹھی میں زہر چھپا رکھا تھا۔ زہر کھٍا لیا میری بلو نے۔ ۔ ۔ ہائے، تیرے وارے جاؤں میری لاڈلی۔ تیرے بدلے مجھے کیوں نہ موت آئی۔
غالب :تم امیر زادے تھے۔ عورت کی محبت کو بھی کھیل جانتے تھے۔
مرزا :نہیں، تم محض شاعر تھے اور شعر میں گرمی اور سوز پیدا کرنے کے لئے تم نے ایک عورت کی جان لے لی۔
غالب :یہ غلط ہے۔
مرزا :یہ بالکل صحیح ہے۔
خواہش کو احمقوں نے پرستش دیا قرار
کیا پوجتا ہوں اس بت بیداد گر کو میں
غالب :چلو، اس بہانے تمہیں شعر تو یاد آنے لگے۔
مرزا :تمہارے شعروں میں کیا؟میری زندگی ہی توہے۔ مجھے یاد نہ ہوں گے تو کسے یاد ہوں گے۔
غالب :توسنو، تم نے اس عورت کو چاہا امیر زادے کے دل سے۔ تم نے اسے داشتہ کی نظر سے دیکھا یا نہیں یہ میں نہیں جانتا مگر تم جیسے امیر زادے فقط آج کے نہیں بلکہ ابھی کے لمحے میں زندہ رہتے ہیں۔ زخم نہیں کھاتے فقط پھول چنتے ہیں۔
مرزا : اور آپ؟
(انتہائی طنز سے۔ )
غالب :شاعر کے دل نے اس سے درد کی دوا پائی، درد لا دوا پایا۔ میں نے اسے چاہا اور اس میں زندگی کا ایک نیا روپ دیکھا۔ میں نے اسے نہ چاہا ہوتا اس کا سہارا نہ ڈھونڈا ہوتا تو میں پاگل ہو جاتا۔
مرزا :معلوم ہے ان دنوں سخت پریشانی تھی۔ پنشن تھوڑی رہ گئی تھی۔ ایک دو نہیں سات بچے پے درپے مر چکے تھے۔ چھوٹے بھائی یوسف پاگل ہو چکے تھے اور ان کے گھربار کا بوجھ بھی میرے سر تھا۔
غالب :اس وقت اس لڑکی نے مجھے سہارا دیا میری غزلوں کو گنگنایا اور میرے شاعرانہ وجود کو ہلا ڈالا۔
مرزا :اسی زمانے سے شراب منہ کو لگی اور انہی دنوں جوئے کی عادت ہوئی۔
(لڑکی کی قریب آ جاتی ہے اور ان دونوں کو الزام دینے کی نظر سے دیکھتی ہے جیسے گریبان پکڑنا چاہتی ہو۔ )
لڑکی :تم دونوں میں سے مرزا نوشہ کون ہے ؟
غالب :
پوچھتے ہیں وہ کہ غالب کون ہے
کوئی بتلاؤ کہ ہم بتلائیں کیا
مرزا :اچھا ہوا تم خود آ گئیں، ہم تمہارے پاس آ رہے تھے۔
لڑکی :کیوں ؟
مرزا :کچھ پوچھنا تھا۔
لڑکی :۔ ۔ ۔ آپ دونوں میں سے مرزا نوشہ کون ہیں ؟
مرزا :جی فرمائیے مجھے مرزا نوشہ کہتے ہیں۔
غالب :تم غلط آدمی کو پوچھ رہی ہو، شاید تم غالب سے ملنا چاہتی ہو۔ شاعر غالب جس کی غزلیں تم نے گنگنائیں۔ جس کی زندگی میں تم نے تھوڑی دیر کے لئے سکون کی چاندنی فراہم کر دی۔
لڑکی :بولو۔ میرے قتل کا ذمہ دار کون ہے۔ میرا خون کس کی گردن پر ہے ؟
غالب :شاید وہ شاعر جس کا قتل زمانے کی گردن پر ہے۔
لڑکی :میں کہتی ہوں تم دونوں میرے قاتل ہو۔ ۔ ۔ میرے قاتل!ایک نے میری آواز کا سودا کیا دوسرے نے میری خوب صورتی کا اور تم سے کسی نے بھی اس عورت کو نہیں دیکھا جو قربانی دے کر صرف محبت کی طلب گار تھی۔ میں کہتی ہوں تم نے مجھے کیا دیا؟
غالب :محبت سودا نہیں۔
لڑکی :تمہارے لئے سودا ہی تو تھی۔ شاعر، تم کو پناہ چاہئے تھی۔ کٹھور زندگی سے اپنے خیالوں میں پناہ چاہئے تھی وہ تم نے ڈھونڈ نکالی اور تم یہ نہ دیکھ پائے کہ میرے سینے میں بھی دل تھا، میں بھی آرزوؤں کی جھولی پھیلائے کھڑی تھی۔ مگر تم کو میری نہیں اپنے تصور کی ضرورت تھی اور اپنے تصور کی چاہت میں تم نے مجھے روند ڈالا۔
غالب :یہ جھوٹ ہے۔
لڑکی :شاعروں کو اکثر جھوٹ سے پیار ہوتا ہے مگر عورت ایسی سچائی ہے جسے شاعروں نے اپنی شاعری کے ذریعے جھوٹ بنا دیا ہے۔ میں بھی عورت ہوں۔ میں آج تم سے انصاف مانگنے آئی ہوں۔
غالب :انصاف اور مجھ سے ؟جو زندگی بھر بے انصافی کا شکار رہا۔
لڑکی :ہاں تم سے، میرے شاعر۔ آج جب دنیا تمہاری شہرت سے گونج رہی ہے۔ کیا کوئی ایک لمحے کے لئے بھی مجھے یاد کرتا ہے، جس کی پوری ہستی ایک کسک بن کر تمہاری شاعری کو جاوداں بنا گئی۔ ۔ ۔ بتاؤ میری فریاد کون سنے گا؟
مرزا :تم دونوں مجھے الزام دو۔ سب مجھے الزام دیتے ہیں۔ تم میں سے کوئی مجھے نہیں جانتا۔ دس بارہ سال کی عمر میں ایک امیرزادہ دہلی آیا اور اس کے اوپر آسمان ٹوٹ پڑا۔ ایک دم پورے خاندان کا بوجھ سرپر، پھر ایک نہیں دو نہیں سات بچوں کا انتقال، چھوٹے بھائی پران حالات نے وہ ستم توڑا کہ پاگل ہو گیا۔ میں بھی خوان اور خوبصورت آدمی تھا۔ اگر شاعری، عشق و قمار بازی میں پناہ ڈھونڈی تو کیا گناہ ہو گیا اور اسی بے قراری میں تمہارا دامن پکڑا اور نتیجہ رسوائی، بے عزتی اور بے اندازہ غم۔
لڑکی :میں جانتی تھی۔
غالب :تم شرم اور رسوائی سے خاک میں جا چھپیں، جس کا آسرا میں نے ڈھونڈا وہ موت کے پردے میں چھپ گیا۔ تم نے موت کی پناہ ڈھونڈ لی، مجھے یہ پناہ بھی نہ ملی۔ تم میری شاعری میں درد بن کر زندہ رہیں اور اس درد کو مجھ سے کوئی نہ چھین سکا۔
لڑکی :میں نے بھی کبھی کبھی یہی سوچا ہے کہ میں شاعری کا ایک تصور تھی۔ محض ایک تصور جس سے تم نے پیار کیا وہ تمہارا تصور، تمہارا تخیل، تمہاری اپنی تصویر تھی اسی لئے تم نے مجھے کوئی نام دیا اور وہ درد شاعری بن کر بکھر گیا۔ یاد رکھنا میں حشر میں دامن گیر ہوں گی۔ میرا خون فریادی ہو گا اور یہ فریاد زمین و آسمان کو نہیں عرش معلیٰ کو ہلا ڈالے گی۔ انصاف کی پکار تمہاری شہرت کے سارے فانوس گل کر دے گی۔
(ایک لمحے کے لئے اسٹیج کی ساری روشنیاں گل ہو جاتی ہیں۔ )
مرزا :سنا تم نے ؟
غالب :سن تومیں نے بھی لیا، لیکن وہ یہ سب کچھ تم سے کہہ رہی تھی۔
مرزا :میں اس کا قاتل نہیں ہوں۔
غالب :ہاں، تم صرف اسی کے نہیں ہم دونوں کے قاتل ہو۔ امیر زادے کے ہاتھوں وہ نازک سی لڑکی بھی قتل ہوئی اور شاعر غالب بھی۔
مرزا :اپنے سارے الزام میرے سر منڈھ دو۔
غالب :تم کس کس سے انکار کرو گے۔ تمہیں وہ دن یاد ہے جب شاعر نے مالی مشکلات کا حل نکال لیا تھا اور تم نے مجھے روک دیا۔
مرزا :میں نے روک دیا!
غالب :ہاں، امیر زادے۔ تمہیں نے مجھے روکا تھا!

(۴)
(پردہ اٹھتا ہے غالب دیوان خانے میں مسہری پر نیم دراز ہیں جیسے غم و اندوہ سے بے حال ہو گئے ہیں اچانک یوسف مرزا سرہانے جا پہنچتے ہیں۔ )
یوسف مرزا :جہان آباد کا شاعر اعظم اسداللہ غالب۔ سرکاری بولی باسٹھ روپئے، ہے کوئی لینے والا۔ باسٹھ روپئے ایک، باسٹھ روپئے دو۔ ۔ ۔
غالب : (چونک کر) یوسف مرزا، تم کب آئے، آؤ بیٹھو۔
یوسف مرزا :بہت تکلیف ہے کیا؟
غالب :تکلیف! کیسی تکلیف؟
یوسف مرزا :ہم سب جانتے ہیں۔ جو جانتے ہیں وہ بولتے نہیں، جو بولتے ہیں وہ جانتے نہیں۔
(پس منظر سے ایک فقیر کی آواز ابھرتی ہے آہستہ آہستہ یہ فقیر کھڑکی کے پاس آ جاتا ہے۔ ہاتھ پھیلاتا ہے مرزا خالی صندوقچے سے دوچار پیسے نکال کراس کی ہتھیلی پر رکھ دیتے ہیں۔ فقیر یہ غزل گا رہا ہے :)

دل ہی تو ہے نہ سنگ و خشت درد سے بھر نہ آئے کیوں
روئیں گے ہم ہزار بار، کوئی ہمیں سنائے کیوں
دیر نہیں، حرم نہیں، در نہیں، آستاں نہیں
بیٹھے ہیں رہ گزر پہ ہم غیر ہمیں اٹھائے کیوں
قید حیات و بند غم اصل میں دونوں ایک ہیں
موت سے پہلے آدمی غم سے نجات پائے کیوں
(مرزا فقیر کے ہاتھ پر پیسے رکھ دیتے ہیں۔ )
فقیر : (دعا دیتے ہوئے)بابا۔ اقبال بلند، دولت زیادہ!!
(مرزا کھڑکی بند کر دیتے ہیں۔ یوسف مرزا جو ابھی تک پھٹی پھٹی آنکھوں سے یہ منظر دیکھ رہے تھے اچانک قہقہہ مارکر ہنس پڑتے ہیں اور طنز سے دہراتے ہیں اور باہر نکل جاتے ہیں۔ )
یوسف مرزا :اقبال بلند، دولت زیادہ!!اقبال بلند، دولت زیادہ!!
غالب : (خودکلامی)اقبال بلند، دولت زیادہ، خوب!!اقبال اتنا بلند کہ بھکاری غزلیں گائیں اور عالم، فاضل، امیر، بادشاہ ہمت افزائی سے باز رہیں۔ رہی دولت تو اس کا یہ حال کہ ساری دنیا کا قرضدار متھرا داس درباری مل، خوب چند جین، سب تمسک مہری لے کر چاٹیں۔ ایک دن قرض خواہوں کا ہاتھ ہے اور یہ گردن۔ انجام موت ہے یا بھیک مانگنا کسی دکان سے دھتکارے گئے۔ کسی دروازے سے کوڑی پیسہ مل گیا۔ (اچانک نظر بیگم پر پڑتی ہے جو دیوان خانے میں آ گئی ہیں) بیگم، تم!دیوان خانے میں !!
بیگم :آپ کو محل سرا میں آنے کی فرصت کہاں !مجھی کو آنا پڑا۔
غالب :کہو۔
بیگم :کیا کہوں ؟
غالب :کہو گھر میں خرچ کی تکلیف ہے۔
بیگم :ہاں۔
غالب :کہو کہ قرض خواہوں کے تقاضوں سے تنگ آ گئی ہوں کہ پنشن کے باسٹھ روپیوں میں مہینے کا خرچ پورا نہیں ہوتا۔ اس طرح کب تک کام چلے گا گھرکا۔
بیگم :پھر اس کا کچھ انتظام؟
غالب :مجبوری۔
بیگم :تو پھر اس امیر الامرائی کو سلام کیجئے، آن بان ختم کیجئے، محنت مزدوری ہی سہی گزر بسر تو ہو۔
غالب :اسی لئے پنشن کی وا گزاری کے لئے کلکتے کا سفر کیا۔ کمپنی کو درخواست دی، سرکار دربار میں صدا لگائی مگر ن تیجہ کچھ نہیں۔
بیگم :آخر کام کیسے چلے گا؟قرضہ دار سود جدا، چوبدار، نوکرانی، یوسف مرزا کی دوا دارو، کھانا پینا، مکان کا کرایہ۔ یہ سب کہاں سے آئے گا۔
غالب :کہاں سے گنجائش نکالوں۔ سنو صبح کی تبرید موقوف، رات کی شراب گلاب موقوف، چاشت کا گوشت آدھا۔
بیگم :اس طرح پیٹ کاٹ کر کیا ملے گا؟
غالب :جو ملے غنیمت ہے۔
بیگم :خدا جانے میرے نصیبوں کا سکھ چین کہاں چلا گیا۔ گھر میں نہ اچھا پہننے کو نہ اچھا کھانے کو۔ نہ اولاد کا سکھ نہ دل کا چین۔
غالب :کوئی تدبیر بن نہیں پڑتی۔ میں نے خود کو اپنا غیر تصور کر لیا ہے جو دکھ مجھے پہنچتا ہے کہتا ہوں لو غالب کے ایک جوتی اور لگی۔ بہت اتراتا تھا کہ میں بڑا شاعر اور فارسی داں ہوں۔ آج دور تک میرا جواب نہیں۔ لے اب قرض داروں کو جواب دے۔ ایک قرض خواہ کا گریبان ہاتھ میں ایک بھوک سنا رہا ہے میں اس سے پوچھ رہا ہوں اجی حضرت نواب صاحب آپ سلجوقی اور افراسیابی ہیں یہ کیا بے حرمتی ہو رہی ہے کچھ تو اکسو کچھ تو بولو۔
بیگم :تم اپنے کو غیر تصور کر لو میں تم کو غیر تصور نہیں کر سکتی۔
غالب :میں تمہارا مطلب نہیں سمجھا۔
بیگم :کوئی مطلب نہیں ہے۔ کبھی تم نے یہ بھی سوچا ہے کہ تمہاری زندگی میں میں بھی شریک ہوں۔
غالب :کیا کہہ رہی ہو بیگم؟
بیگم :میں بھی انسان ہوں، تمہارے دکھ سکھ کی ساتھی ہوں۔ کیا میرا صرف اتنا ہی حق ہے کہ تم سے روٹی روزی، نان نفقہ چاہوں اور بس اس کے سوا میرا کوئی حق نہیں ؟
غالب ۔ :کون ساحق چاہتی ہو تم؟
بیگم :تمہیں کیا بتاؤں۔ کبھی تم نے یہ بھی سوچا ہے کہ تمہاری شاعری میں کوئی ایک شعر ایسا بھی ہے جو میرے لئے کہا گیا ہو۔ اصلی اور فرضی محبوباؤں کے ذکر ہیں، ہجر اور فراق کے چرچے ہیں۔ میں پوچھتی ہوں کہ وہ عورت ان شعروں میں کہاں ہے جس نے ہر دکھ سکھ میں تمہارا ساتھ دیا اور کچھ نہیں مانگا۔ کیا اس کا تمہاری شاعری پر کچھ حق نہیں ہے۔
غالب :یہ اشعار کس کام کے ؟یہ شہرت کس گون کی۔ عاشقوں میں کوئی مجنوں اور فرہاد کی سی شہرت پالے تو کیا۔ شاعروں میں کوئی حافظ اور خیام سے زیادہ مشہور ہو جائے تو کیا۔ آخر کو تو مسئلہ وہی دو سانس چین سے گزار لینے کا ہے۔
یوسف مرزا : (ایک دم داخل ہوتے ہیں۔ دیوانہ وار قہقہہ) جمشید کی میراث جمشید کی اولاد کو۔ آدم کی میراث رسوائی، اندوہ اور بہشت اور گناہ۔ ہم سب نیلام پر چڑھاتے ہیں اور گیہوں کا ایک دانا چاہتے ہیں۔ کوئی ہے جو اس ایک دانے کا سودا کر لے ؟
غالب :یوسف مرزا خدا کے لئے خاموش ہو جاؤ۔
یوسف مرزا : (بہت آہستہ سے)میں خاموش ہوں۔ لو میں خاموش ہو جاتا ہوں۔ اب چراغوں کا خدا حافظ۔
(چلے جاتے ہیں۔ )
غالب :گھبراؤ نہیں بیگم!جلد کوئی صورت نکلے گی۔ کوئی صورت نکالنی پڑے گی۔
کاظم علی :قبلہ حاضر ہو سکتا ہوں ؟(آواز سن کر بیگم اندر محل سرا کی طرف جاتی ہیں انتظام الدولہ کا داخلہ۔ )غلام کاظم علی کورنش بجا لاتا ہے، مرزا صاحب۔ نصیب دشمنان مزاج تو بخیر ہے کہ حضور نیم دراز ہیں۔
غالب :آؤ کاظم علی، کیسے آنا ہوا؟
کاظم :غلام کا کیا آنا جانا۔ حضور کو سلام کرنے کبھی کبھار چلا آتا ہوں اور جائیں بھی کہاں۔ اب تو دہلی وہ اندھیر نگری ہے کہ خدا کی پناہ۔ اپنی قسم کھا کر عرض کرتا ہوں مرزا صاحب کہ قدم قدم پر تو جاسوس ہیں۔ فرنگیوں کے جاسوس، مرہٹوں کے جاسوس، روہیلوں کے جاسوس اور خدا معلوم کہاں کہاں کے کس کس کے جاسوس۔ پھر وہابیوں نے غدر مچا رکھا ہے۔ ذرا ملاحظہ فرمائیے حکیم مومن خاں جیسا رند با صفا جہاد کی باتیں کرنے لگا۔ اب آپ سے بھی کیا چوری ہے مرزا صاحب قبلہ، میں نے تو یہاں تک سنا ہے کہ وہابیوں سے فرنگی حکومت تک پریشان ہے۔ خفیہ خفیہ کمپنی بہادر کو پرچہ لگا ہے کہ یہ لوگ انگریزوں کے خلاف جہاد بولنے والے ہیں۔ حکم ہوا ہے کہ ان کی نگرانی رکھی جائے۔
غالب :باتیں کرتے کرتے کبھی دم بھی لے لیا کرو۔
کاظم :آپ تو ناچیز کو شرمندہ کرتے ہیں مرزا صاحب۔
غالب :اپنی کہو، کیسی گزر رہی ہے ؟
کاظم :کچھ نہ پوچھئے مرزا صاحب قبلہ، حال پتلا ہے۔ ہمارا دھندا تو آپ جانتے ہیں امیر زادوں کے ساتھ بندھا ہوا اترا ہے۔ کچھ سیر و تفریح، کچھ عیش و نشاط کا چرچا ہو تو بندۂ درگاہ کے ہاتھ بھی کچھ لگ جاتا ہے۔ ادھر اس کم بخت کوتوال شہر نے وہ ناک میں دم کر رکھا ہے کہ توبہ بھلی۔ دہلی کے شریفوں کودو چار پانسے پھینکنے اور دوچار بازیاں تک لگانا محال ہو گیا ہے پھر اپنی پتی کہاں ؟
غالب :تمہیں بھلا اس کاروبار میں کیا مل جاتا ہے ؟
کاظم :ہم بھی پچھ لگوؤں میں ہیں حضور والا۔ مگر اصل حصہ تو اس کا ہے جس کے گھر پر جمے اس کی چاندی ہے۔ آپ کا محلہ ماشاء اللہ کوتوال کی نظروں سے بچا ہوا ہے اگر یہاں کوئی ٹھکانہ مل جائے تو بگڑی بن جائے۔
غالب : (ڈر کر) کیسی باتیں کرتے ہو کاظم علی۔
کاظم :ڈرنے کی کوئی بات نہیں ہے۔ آخر اپنی عمر بھی اسی کاروبار میں گزری ہے اگر کسی کو کانوں کان خبر ہو جائے تو قبلہ کاظم علی انتظام الدولہ کا سر قلم کرا دیجئے گا۔ بس ایک بار ہاں، کر دیجئے۔ سب انتظامات چٹکی بجاتے میں مکمل کرا دوں گا۔ سچ پوچھئے تو مرزا صاحب، اب دھندا ہی کونسا رہ گیا ہے۔ دربار سے خلعت اور منصب بند ہیں جاگیریں ختم ہو چکیں، نوکری ملتی نہیں۔ اب آخر گزارا چلے تو کیسے چلے۔ آپ ذرا اشارہ کیجئے واللہ سارے قرضے ایک ہی مرتبہ ادا ہو جائیں گے، پھر آپ دوسروں کے قصیدے نہیں لکھیں گے دوسرے آپ کے قصیدے پڑھتے پھریں گے۔
غالب :انتظام الدولہ!!
کاظم :بس میری خاطر، ایک بار!
غالب :نہیں۔ ۔ ۔ اب تم جاؤ، مجھے بھی ایک جگہ جانا ہے۔
کاظم :بہت بہتر، حضور۔ بندہ پھر حاضر ہو گا۔ آداب بجا لاتا ہوں۔
غالب : (چوبدار کو آواز دیتے ہیں)ارے کوئی ہے، ہوا دار تیار کراؤ۔
چوبدار :کہاں جانا ہے ؟
غالب :دلی کالج۔

(۵)
مرزا : (قہقہہ لگاتا ہے۔ )
غالب :ہنستے ہو۔
مرزا :آگے کی داستان مجھے معلوم ہے۔
غالب :کیا جانتے ہو تم؟
مرزا :یہی کہ تم ہوا دار میں سوار ہو کر دلی کالج پہنچے۔ تمہیں نوکری کا پروانہ مل چکا تھا۔ دلی کالج میں فارسی پڑھانے کی خدمت تمہارے سپرد ہو چکی تھی۔ تم نوکری کرنے گئے تھے اور اس امید پر ہوادار میں بیٹھے رہے کہ کالج کا سربراہ تمہارے استقبال کو آئے گا۔ تمہارے استقبال کو کوئی نہیں آیا اور تم واپس چلے آئے۔
(ہنستا ہے۔ )
غالب :جانتے ہو کیوں ؟
مرزا :تم نے یہی کہا تھا کہ نا کہ ’’نوکری اس لئے کرنا چاہی تھی کہ عزت بڑھے۔ اس لئے نہیں کہ عزت اور کم ہو جائے۔ ‘‘
غالب :جانتے ہو یہ لفظ کس کے ہیں ؟
مرزا :کہو۔
غالب :یہ لفظ تمہارے تھے۔ شاعر قصیدے لکھ کر پیٹ پال سکتا ہے۔ بہت آگے بڑھے تو مدرسی کر کے پڑھا لکھا کر جی سکتا ہے میں نے نوکری کرنی چاہی اور امیر زادے نے میرے پاؤں میں بیڑیاں ڈال دیں۔ تم نے مجھے عزت کا واسطہ دیا جھوٹی عزت کا واسطہ، تم نے خاندانی شان کی قسمیں دلائیں۔ جھوٹی شان کی جھوٹی قسمیں۔ امیر زادے تم نے مجھے دلی کالج کے دروازے سے واپس لوٹا دیا۔
مرزا :میں نے روکا تھا تمہیں۔ تم نے دلی کالج کے سربراہ انگریز کی شان میں زوردار قصیدہ پڑھا ہوتا۔
غالب :تم میرے ہمزاد تھے میری ذات کا حصہ تھا تمہیں کس طرح اپنے وجود سے کاٹ پھینکتا۔ تم نے میرے دل پروہ گھونسا مارا کہ میں جھوٹی عزت کی خاطر دلی کالج کی نوکری کا خیال چھوڑ کر گھر لوٹ آیا۔ پھر وہی کنج قفس۔

(۶)
غالب : (چغہ اتار کر چوبدار کو دیتے ہیں۔ نظر انتظام الدولہ کاظم علی پر پڑتی ہے۔ )
کاظم :قبلہ، آداب بجا لاتا ہوں۔ کب سے آپ کے انتظار میں بیٹھا ہوں ؟
غالب :کیوں ؟میں نے تم سے انتظار کرنے کوکب کہا تھا؟
کاظم :آپ نے تو نہیں فرمایا تھا مگر میرا دل کہتا تھا کہ مجھے انتظار کرنا چاہئے۔
غالب :کیا کہنا چاہتے ہو؟
کاظم :وہی پرانی بات ہے قبلہ، اپنا نہیں تو میرا خیال کیجئے آخر ایک مدت سے آپ کانیاز مند ہوں۔ ایک بار ’ہاں‘ کر دیجئے۔ وارا نیارا ہو جائے گا۔ کوتوال شہر کی کیا مجال ہے کہ آپ کی حویلی کی طرف آنکھ اٹھا کر دیکھ لے۔ اس کے فرشتوں کو خبر تک نہ ہو گی۔
غالب :میں مجبور ہوں کاظم علی۔ مجھے منظور ہے۔
کاظم : (خوشی سے اچھل پڑتا ہے۔ ) مبارک ہو۔ مرزا صاحب، بس اب آپ کے سارے قرضے بے باق ہو جائیں گے۔ بس اب تو چاندی ہے چاندی۔ آج شام تک پانسہ پلٹ جائے گا۔
شرابی :اپنا میر کاظم علی بھی خدا کی قسم۔ برق ہے۔ کیا جگہ ڈھونڈ نکالی ہے۔ کوتوال شہر کے خواب و خیال میں بھی نہیں گزر سکتی۔
دوسرا جواری :بس اب بات چیت موقوف، نقدی نکالو اور بازی سنبھالو۔
تیسرا جواری :نال کی رقم مرزا صاحب کی۔
کاظم علی :مرزا صاحب قبلہ، گستاخی معاف۔ سنتا ہوں آپ بھی بے نظیر کھیلتے ہیں اجازت ہو تو دو بازیاں ذرا بد کے ہو جائیں۔
غالب :اچھا، یوں ہی سہی۔
دوسرا جواری :اچھا تو بازی شروع، نقدی نکالو یارو نقدی!
شرابی :نقدی، یہ لو نقدی، ہر جگہ نقدی کی پکا رہے۔ نقدی نہ ہوئی نعوذ باللہ خدا ہو گئی۔
جواری :اجی حضرت، اسی کی دھن پر خدائی ناچتی ہے۔
شرابی :ناچتی ہے تو ناچے ہم ایسی کو ٹھوکر مارتے ہیں۔
(دستک)
غالب :کون، اس وقت کون ہے ؟
باہر سے آواز :سواریاں آئی ہیں۔
کاظم :کوئی بات نہیں آپ اطمینان سے دروازہ کھول دیں اور کھیل جاری رکھیں۔
(دروازہ کھلتا ہے۔ )
کوتوال :خبردار میں کوتوال شہر کی حیثیت سے تم سب کو قمار بازی کے جرم میں گرفتار کرتا ہوں۔ مرزا صاحب قبلہ مجھے افسوس ہے۔ سپاہیو سب کو حراست میں لے (ڈانٹتا ہے۔ ) لے چلو۔
یوسف مرزا : (اچانک داخلہ) خبردار!جو کسی نے آگے قدم بڑھایا۔ میرے بھائی کو چھوڑ دو۔ نہیں تو ایک ایک کو قتل کر دوں گا۔ (لوگ ان کا ہاتھ پکڑ لیتے ہیں۔ )تم سب دیوانے ہو۔ میرا ہاتھ روکتے ہو۔ انھیں کچھ نہیں کہتے جو ہاتھ قلم کرتے ہیں اور منصف کہلاتے ہیں۔ جو گلے میں پھانسی کا پھندا ڈالتے ہیں اور خداوند کہے جاتے ہیں۔ میرا کیا ہے۔ آفتاب کو قتل کر دو، ماہتاب کو زنجیریں پہنا دو، پھولوں کو شاخوں سے نوچ لو۔ نسیم سحر کو پاؤں میں گھنگھرو پہنا کر نچاؤ، شاہراہوں پر خون دل کا چھڑکاؤ کرو، لبوں پر مہریں لگا دو، آنکھوں میں دہکتی ہوئی سلاخیں ڈال دو۔ میرا کیا ہے میں اپنے رستے جاتا ہوں۔
(چلے جاتے ہیں۔ )
غالب :تمہارے ہاتھوں مجھے پہلی شکست ہوئی۔ ایک امیر زادے نے شاعر کو ہرا دیا۔
مرزا :امیر زادے ہمیشہ شاعروں کو ہراتے ہیں۔
غالب : اور آج۔ جب میرا جشن منایا جا رہا ہے امیرزادہ کہاں ہے، آج نجم الدولہ دبیر الملک مرزا اسداللہ خان بیگ سب مر گئے ہیں، ان کی ہڈیاں گل سڑ کر خاک میں مل گئیں۔ صرف غالب زندہ ہے۔ صرف غالب۔
مرزا :چلو جیل خانے کا تجربہ بھی اچھا تھا۔
غالب :ہاں تمہارے کپڑے میلے کچیلے تھے کھانے میں مٹی اور کنکر تھے مگر میرے ہونٹوں پر شعرتھے تمہاری روح زخمی تھی اور میرے لبوں پر نغمہ تھا۔
مرزا : اور وہاں سے واپسی پر تم نے مجھ سے انتقام لے لیا۔
غالب :یعنی آخر مغل بادشاہ بہادر شاہ نے مجھے اپنا استاد مقرر کر کے تمہیں زک دے دی۔
مرزا :یوں پوچھتے ہو جیسے تمہیں اس کی خبر ہی نہیں ؟
غالب :مجھے خبر ہے میں نے ہی تو کہا تھا:
غالب وظیفہ خوار ہو دو بادشاہ کو دعا
وہ دن گئے کہ کہتے تھے نوکر نہیں ہوں میں
مرزا :مٹتی ہوئی دلی میں مٹتے ہوئے شہنشاہ کے استاد۔
(طنزیہ ہنسی)
غالب :امیرزادہ ہار گیا، شاعر جیت گیا۔
مرزا :میرے اوپر طنز کرتے ہو۔
غالب :لوگوں کو زمین کے کونے، کھنڈروں میں خزانے ملتے ہیں۔ مجھے یہ خزانہ قید خانے کے ایک گوشے میں ملا۔
مرزا :خزانہ؟
غالب :ہاں خزانہ یہ تھا کہ سرشاری اور سرخوشی وہ ہے جو دکھ درد سے ڈر کر نہیں اس کے باوجود حاصل ہو نسان، وہ غم ساری تلخی اور ترشی کو زندگی کا حصہ سمجھ کر اسے نشاط و کیف کا جزو بنا لے میں نے اپنا ساغر سرشار صبح محشر کی ہل چل سے ڈھال لیا۔ میں نے اپنی محرومیوں پر ہنسنے کا حوصلہ پایا اس کے بعد سب کچھ ہیچ تھا۔
مرزا :پھر یہ قصیدہ نگاری؟
غالب :یہ بھی ہیچ تھی قصیدہ بھی اک طرح کا جوا تھا محض بھیک کا پیالہ۔
مرزا : اور اسی لئے ایک نام کاٹ کر دوسرے ممدوح کا نام لکھتے رہے۔
غالب : (طنزیہ ہنسی) مٹتی ہوئی دلی کے ایک مفلس شاعر کو اتنی آزادی بھی نہ دو گے۔ میں نے اسی خزانے کے پا لینے کے بعد ہنسنا سیکھ لیا۔
مرزا :تم بہادر شاہ کے مورخ بنے۔ ۱۸۵۷ء کے ہنگامے میں تم نے اپنا روزنامچہ لکھا۔ دستنبو نام اچھا تھا مگر تم نے اپنے بھائی کے ساتھ نا انصافی کی۔
غالب :کیسی بے انصافی؟
مرزا :کیا تمہیں معلوم نہ تھا کہ تمہارا بھائی بخار میں مبتلا ہو کر نہیں مرا فرنگی سپاہیوں نے اسے گولی کا نشانہ بنایا۔
غالب :معلوم ہے۔
مرزا :تو پھر؟
غالب :جو کچھ ہوا تم دیکھو گے سنو گے۔
مرزا :ضرور۔
(غالب دیوان خانے میں بیٹھے ہیں کہ یکایک شور و غوغا سنائی دیتا ہے۔ توپوں کی گھن گرج، شور، نالہ و فریاد رونے چیخنے کی آوازیں۔ غالب کا چوبدار گھبرایا ہوا داخل ہوتا ہے اور دروازہ بند کرنا چاہتا ہے۔ )
غالب :کیا ہوا؟
چوبدار :غضب ہو گیا حضور، فرنگی سپاہی شہر میں گھس آئے ہیں۔ شہر میں فرنگیوں اور باغیوں کے بیچ ہنگامہ مچا ہوا ہے، مکان لوٹے جا رہے ہیں، لوگ مارے جا رہے ہیں۔
(شور پھر بڑھتا ہے۔ دین دین۔ دھرم دھرم کی آوازیں، ایک انگریز کی آواز Fire گولیوں کی آوازیں۔ )
یوسف مرزا : (ایک دم آگے بڑھتے ہیں اور دروازہ کھول کر باہر جانا چاہتے ہیں۔ )
غالب :یوسف مرزا کیا کرتے ہو، باہر جانے میں خطرہ ہے۔
یوسف مرزا :اب آئے ہیں کھیلن ہوری (گاتے ہوئے) اب آئے ہیں کھیلن ہوری۔ ۔ ۔
غالب : (دوبارہ روکتے ہوئے) یوسف مرزا۔
یوسف مرزا :وہ سب بلا رہے ہیں دلی مجھے بلا رہی ہے، کب سے چلا چلا کر بلا رہی ہے، دلی کی فریاد کوئی نہیں سنتا۔ کوئی بھی نہیں سنتا۔ (یہ کہتے ہوئے ایک دم دروازہ کھول کر باہر چلے جاتے ہیں۔ ) ملک خدا کا، خلق غالب کی، حکیم یوسف مرزا بہادر کا فرنگی مرگیا، دلی جاگ گئی۔
(Fire) کی آواز کے ساتھ یوسف مرزا کی بھیانک چیخ اور شور)
غالب : (دروازہ کھول کر دیکھتے ہیں۔ چوبدار یوسف مرزا کی لاش کو اندر لاتا ہے خون بہہ رہا ہے۔ ) گولی ماردی۔ اسے کیوں گولی ماردی؟وہ کون سے ملک کا بادشاہ تھا۔ کیا کیا تھا اس نے۔ میرے دیوانے بھائی نے ان ظالموں کا کیا بگاڑا تھا۔ (بیگم لاش پر آہ و بکا کرنے لگتی ہیں۔ غالب انھیں روکتے ہیں۔ ) نہ روؤ بیگم۔ اب رونے سے کیا ہو گا۔ میرا دیوانہ بھائی اب اس دنیا میں نہیں۔ سب کچھ لٹ گیا۔ خدا نے اسے ایک زندگی دی تھی وہ بھی لوٹ لی۔ ایک بار اس دنیا میں آنا اور اس قدر ناکامی و نامرادی سے رخصت ہونا، زندگی کا ایسا انمول تحفہ اور اتنی بڑی سزا۔ ایسا بیش بہا موتی اور اس طرح کیچڑ میں بہا دیا جائے۔
مرزا :مگر پھر تم نے ۱۸۵۸ء کے اپنے فارسی روزنامچے میں یہ سب کیوں نہیں لکھا۔
غالب :تم نے مجھے کہاں لکھنے دیا امیر زادے نے میرے ہاتھ سے قلم چھین لیا۔ شاعر تو مجاہد بھی بن سکتا تھا مگر امیر زادہ بزدل ہوتا ہے اسے تو اپنے حلوے مانڈے سے کام تھا اسے تو انگریزوں کے دربار کی اگلی صف میں جگہ چاہئے تھی خطاب درکار تھا جھوٹی عزت چاہئے تھی تم میری کمزوری تھے اور میں نے جھوٹ لکھ دیا کہ میرا دیوانہ بھائی بخار میں مبتلا ہو کر مرگیا۔ میں یہ نہ دیکھ سکا کہ انگریز سپاہیوں نے اسے گولی ماردی تھی۔ یہ بھی نہ لکھ سکا کہ میں نے بہادر شاہ کی حکومت دوبارہ قائم ہو جانے پر ’’سکہ‘‘ کہہ کر دیا تھا۔
مرزا :الزام میرے سر رکھتے ہو تمہیں اندازہ نہیں تھا کہ حالات اس طرح پلٹا کھائیں گے۔
غالب :امیر زادے کو ان حالات کا پتہ ہونا چاہئے تھا۔ شاعر تو اپنی دنیا آپ ہے میں صرف شعر گنگنا کر خاموش ہو گیا:
دل ہی تو ہے نہ سنگ و خشت درد سے بھر نہ آئے کیوں
روئیں گے ہم ہزار بار کوئی ہمیں ستائے کیوں
دیر نہیں حرم نہیں در نہیں آستاں نہیں
بیٹھے ہیں رہ گزر پہ ہم، کوئی ہمیں اٹھائے کیوں
قید حیات و بند غم اصل میں دونوں ایک ہیں
موت سے پہلے آدمی غم سے نجات پائے کیوں
مرزا :شاعر اچھے ہو غالب۔
غالب :قدر افزائی کا شکریہ ظل سبحانی نے بھی ایک بار غزل سن کر فرمایا، مرزا پڑھتے خوب ہو۔
مرزا :یہ بتاؤ کہ زندگی ایسی بے دردی سے گزارنے کے بعد ایسے بے پناہ شعر کیسے کہہ لئے تم نے مجھے خبر بھی نہیں دی۔
غالب :امیر زادوں کوکس کی خبر ہوتی ہے، تم جانتے نہیں یا جان بوجھ کر انجان بنتے ہو میں اگر کامیاب ہو جاتا پنشن پا لیتا، خلعت اور منصب مجھے مل جاتا میں بھی اپنے باپ چچا کی طرح رسالدار ہو جاتا۔ ۔ ۔ ۔ ۔ ۔ تومیں امیر زادوں ہی کی باتیں کرتا کھوکھلی بے سر و پا سطحی، مگر درد نے مجھے اس دلدل سے نکال کر پورے زمانے کے انسانوں کی صف میں لا کھڑا کیا میں نے اپنے زمانے کا درد لے لیا میں اپنے دور کے سبھی انسانوں کو عبرت اور عظمت کا مرقع بن گیا میں نے کہا ہے۔
مرزا :پھر شعر سناؤ گے۔
غالب :نہیں، شعر فہمی تم میں کہاں، تمہیں ترجمہ سناتا ہوں۔ ’’اس نے چہرہ بے نقاب کر دیا۔ میرے بے ہودہ بکنے والے ہونٹوں پر مہر لگا دی ہے میرا دل لے لیا اور دیکھنے والی دو آنکھیں دے دیں میرے ہاتھ سے بادشاہان عجم کا نشان لے لیا گیا اور اس کے بدلے میں خزانے بخشنے والا قلم دے دیا۔ ‘‘یہ شاعری جس کی تم کبھی کبھی تعریف کرتے ہو اور سمجھتے ہو کہ اس کا حق ادا ہو گیا ہے یہ شاعری میری پوری زندگی کے دکھ درد کا مول ہے۔
مرزا :دکھ درد کی بات نہ کرو۔ مزے سے شراب پیتے ہو، چین سے خط لکھتے ہو، بڑھاپے میں بھی تمہارے اوپر جان چھڑکنے والے دوست اور شاگرد سبھی موجود ہیں۔
غالب : اور قاطع برہان کے ہنگامے پر گالیاں دینے والے ؟
مرزا :اس ہنگامے میں تم خواہ مخواہ پڑ گئے اپنا علم و فضل جتانے کے لئے۔
غالب :شاعر کو لفظ اور لغت پر اظہار خیال کی آزادی نہیں دو گے۔
مرزا :تمہاری اکثر رائیں غلط تھیں۔
غالب :کیا مجھے غلط رائے رکھنے کا حق نہیں تھا۔
مرزا :ہو گا، میں کہہ رہا تھا کہ بڑھاپے میں تمہیں سبھی عیش مل گئے تھے شہرت بچوں کا سکھ، عارف کے بچے کیا کیا مزے کرتے تھے۔ پلنگ کی صاف چادروں پر میلے میلے پاؤں لے کر چڑھتے، کیا کیا تنگ کرتے تھے۔
غالب :ہاں انھیں کو تو میں نے اپنے خطوں میں ہتھکڑیاں کہا ہے۔ انھوں نے زندگی کا موہ پیدا کر دیا۔
مرزا :پھر نواب رام پور جیسے قدردان جو برابر سے ملتے تھے اور سلوک کرتے تھے۔
غالب :میری مسرتوں کو روپے پیسے، دوستوں اور خاندان کے دکھ سکھ سے ناپتے ہو، بڑے نادان ہو۔
مرزا :احسان فراموش ہو، امیر زادے نہ ہوتے تو زندگی سے پیار کرنا سیکھتے، عیش کا مطلب نہ سمجھتے، عزت کی تڑپ سے واقف نہ ہوتے۔
غالب : اور ان نعمتوں کے لئے جب تڑپتا ہوں تو تم ہنستے ہو، زندگی بھرمیں روتا رہا اور تم ہنستے رہے۔ ۔ ۔ تم نے زندگی سے بے پناہ پیار سکھایا مگر فقط اس کا لالچ دیا، اس کا عرفان نہیں دیا۔ شاعری کیا ہے مرزا، صرف زندگی اور حسن سے بے پناہ پیار۔ اس کی لذت، اس کی بے پناہ خوبصورتی سے لگاؤ۔ پھر اپنی تنگ دامنی کو دیکھتا ہوں تو تڑپتا ہوں، اپنی مجبوری پر روتا ہوں، اپنی نارسائی پر اگر کوئی مستی اور محرومی کا شاعری ہو سکتا ہے تو میں ہوں، مرزا۔ اور محرومی کے اس دورا ہے پر بانکپن سے اپنی ٹوپی ٹیڑھی کرتا ہوں اور غم پر قہقہہ لگاتا ہوں، درد کے زہر کو مسکراتے مسکراتے شراب ناب کی طرح پی جاتا ہوں۔ میں نے آبگینے کے ٹکڑے گلا کر شراب میں ڈال لئے ہیں کہ سینہ زخمی ہوا اور لب مسکراتے رہیں۔
مرزا :یہ ہمت!
غالب :یہ ہمت ہی میرے اور تمہارے درمیان مشترک ہے۔ یہ ہمت ہی میرے اور آج کے زمانے کے درمیان ہے۔ یہ ہمت ہی مجھے زندہ رکھتی ہے میں دیکھتا ہوں آج کے نوجوان کے چہرے مرجھائے ہوئے اور اداس ہیں مگر میں نے دیکھا ہے کہ جب میرا دیوان پڑھتے ہیں۔
مرزا :وہی چھوٹا سا رد دیوان!
غالب :جی ہاں وہ پڑھتے ہیں تو ان کے چہروں پراک حوصلہ ابھرتا ہے یہ کہ وہ زندگی سے ہاریں گے نہیں، یہ کہ وہ آرزومندی کی تڑپ سے دامن نہیں بچائیں گے، وہ پھر چاہیں گے دل کی گہرائیوں سے، پھر تمنا کریں گے اور پھر ٹوٹتی آرزوؤں کی جہنموں سے گزریں گے۔
مرزا :تمہارا شکوہ پورا ہوا مگر میں۔
غالب :تمہارا کیا ہے تم ہزاروں لاکھوں امیر زادوں کی طرح ایک امیر زادے تھے عیش کئے یا عیش کی تمنا کی اور واپس چلے گئے۔
مرزا :ہر وجود ایک سوال ہے، میرا وجود ایک ایسے زمانے میں جب تمام چیزیں جو مجھے عزیز تھیں مٹ رہی تھیں۔ بہت بڑا سوال تھا۔ تمہیں کیا حق تھا کہ اس طرح مجھ سے کھیلو، جو مجھے عزیز تھا وہ مجھ سے چھین لیا اور جو کچھ آنے والا ہے اسے قبول کرنے پر مجھے مجبور کرو۔ صبح کے وقت تم نے کبھی چراغوں کی بے بسی دیکھی ہے۔ تم تو شاعر ہو۔ ۔ ۔ کیا تم بھی اس ادھورے پن کو محسوس نہ کر سکے اور آج اس ادھورے انسان پر رونے والا بھی کوئی نہیں ہے۔ تمہارے سب پجاری ہیں شاعر غالب کے سب شیدائی ہیں لیکن مرزا نوشہ کا کوئی ہمدم، کوئی دوست، کوئی آشنا نہیں۔
(دروازے پر دستک ہوتی ہے۔ غالب کھولنے جاتے ہیں۔ اس بار مرزا نوشہ نہیں روکتے۔ دروازہ کھولنا چاہتے ہیں پھر کچھ سوچ کر خود ہی دروازہ کھولنے کا ارادہ ملتوی کر دیتے ہیں۔ )
(پس منظر سے غزل کے اشعار ابھرتے ہیں۔ )
آہ کو چاہئے اک عمر اثر ہونے تک
کون جیتا ہے تری زلف کے سر ہونے تک
عاشقی صبر طلب اور تمنا بے تاب
دل کا کیا رنگ کروں خون جگر ہونے تک
غم ہستی کا اسدؔ کس سے ہو جز مرگ علاج
شمع ہر رنگ میں جلتی ہے سحر ہونے تک
(پردہ گرتا ہے۔ )
***
ماخذ: ادارۂ تصنیف
ڈی!۷، ماڈل ٹاؤن
دہلی
۱۹۷۵ء؁


ڈاکٹر محمد حسن

خوابوں کا سوداگر

(بس تیزی سے قریب آنے اور گزر جانے کی آواز)
نرمل :خواہ مخواہ دوڑ رہے ہیں لوگ۔ نہیں رکے گی۔
گردھاری : (دوڑنے کی آواز) کنڈکٹر بس روکو۔ بس روکو۔
(بس گزر جاتی ہے۔ )
نرمل :میں نے کہا تھا نہیں رکے گی۔
گردھاری :روکو!روکو!!
(دور تک دوڑتا چلا جاتا ہے بس گزر جاتی ہے۔ گردھاری ہانپتا ہوا واپس آتا ہے۔ )
گردھاری :دیکھا آپ نے۔ کیسے لا پرواہ ہوتے ہیں یہ ڈرائیور۔
مولانا :اجی قبلہ۔ آپ نے ناحق زحمت کی۔ پہلے ہی عرض کیا جا رہا تھا کہ نہیں رکے گی۔
نرمل :ہاں جی۔ بڑے ظالم ہوتے ہیں کسی کی جان بھی چلی جائے تو گاڑی نہیں روکیں گے۔
گردھاری :مجا آتا ہے ستانے میں۔
مولانا :اجی حضرت دراصل یہ سواری ہی نہایت نامعقول ہے۔ واللہ ایسی سواری پر بزرگ لعنت بھیج گئے ہیں جس کی باگ ڈور اپنے ہاتھ میں نہ ہو گویا ہماری آپ کی سب کی جان نعوذ باللہ اس کنڈیکٹر بلکہ کیا کہتے ہیں اس ڈرائیور کے ہاتھ میں ہے چاہے ٹکر مار دے۔ یہ بھی کوئی سواری ہے۔
گردھاری :مگر جناب۔
مولانا :قطع کلام معاف۔ پھر یہ بھی کیا بات ہوئی کہ استغفراللہ عورتیں تک شرفا کے کندھے سے کندھا ملا کر بیٹھی ہیں۔ ڈوب مرنے کا مقام ہے شریفوں کے لئے۔
گردھاری :تو پھر جناب بس میں سفر کرنا۔
مولانا :جی ہاں سراسر ظلم ہے، ستم ہے۔
گردھاری :مگر مولانا!بس میں نہ بیٹھیں تو روز پندرہ میل آنا اور پندرہ میل جانا! پیدل آتے جاتے جوتیاں خود گھس کر آدھے رہ جائیں گے۔
مولانا :ہاں صاحب یہ بات بھی ٹھیک ہے۔ سفر نہ کرے تو کیا کرے۔ ٹیکسی والوں کے دماغ نہیں ملتے۔ موٹر اسکوٹر ہمارے آپ کے پاس ہونے سے رہا لے دے کے غریبوں کی چشم و چراغ یہی ایک بس ہے۔
نرمل :یہ بھی ٹھیک ہے۔ مزا یہی ہے یارو کہ اس زندگی کی ہر بات ٹھیک بھی ہے اور غلط بھی۔ چلو چھوڑو یارو۔ بس تو گزر گئی کوئی زندگی تو نہیں گزر گئی۔
گردھاری :واہ صاحب واہ!یہاں دوڑتے دوڑتے پلیتھن نکل گیا اور آپ کے نزدیک کچھ ہوا ہی نہیں۔ آخر ذرا دھیان کیجئے کہ کوئی ایسا ہی ضرور کام رہا ہو گا۔ نہیں تومیں بھی انتظار کر سکتا تھا۔
نرمل :ہاں صاحب یہ توہے۔
مولانا :جی ہاں جناب کوئی اپنے اختیار سے راستے کی دھول پھانکنے آتا ہے۔ مجبوری نہ ہو تو اپنا گھر کسے برا لگتا ہے۔ مجبوری نہ ہو تو کوئی اس نامعقول سواری میں قدم رکھے۔ بے بس کر دیتی ہے کمبخت اور لطف یہ ہے کہ نام رکھا ہے بس۔ قدرت کی ستم ظریفی ہے۔ شاعر کہہ گیا ہے :
لائی حیات آئے قضا لے چلی چلے
اپنی خوشی نہ آئے نہ اپنی خوشی چلے
نرمل :تو گویا بس نہ ہوئی دنیا ہو گئی۔ کوئی اپنی خوشی سے آتا ہے ؟
مولانا :واہ برخوردار!کیا بات پیدا کی ہے۔ کوئی اپنی خوشی سے نہیں آتا اور واپس جانے کے لئے بہت انتظار کرنا پڑتا ہے۔
نرمل :مگر واپس تو خود بھی جا سکتا ہے۔
مولانا :بے اس کے حکم کے پتا نہیں ہل سکتا جس کی جس وقت لکھی ہے اس وقت آئے گی۔
نرمل :میں آج خودکشی کرنے کا ارادہ کر لوں تو سامنے قطب مینار سے ایک چھلانگ لگا کر ہمیشہ کے لئے !
مولانا :خدا نہ کرے۔ برخوردار ایسی باتیں کیوں زبان سے نکالتے ہو۔ توبہ توبہ!!
گردھاری :آپ لوگوں کو شاعری سوجھ رہی ہے۔ وہ دیکھئے دوسری بس آنے والی ہے۔
جی نہیں موبائل کورٹ ہے۔
مولانا :یعنی۔
نرمل :چلتی پھرتی عدالت۔ بس میں بلا ٹکٹ سفر کرنے والوں کا چالان کیا جاتا ہے۔
مولانا :بہت خوب۔ گویا پہلے تو بس میں سفر کرنے پر مجبور کئے جاتے ہیں۔ پھر بلا ٹکٹ سفر کرنے کی گنجائش پیدا کی جاتی ہے۔ پھر چالان کر کے کیفر کردار تک پہنچائے جاتے ہیں :
قرباں ہجوم رحمت پروردگار کے
(بس قریب سے گزر جاتی ہے۔ )
گردھاری :ہماری بس ابھی تک نہیں آئی۔
نرمل :اجی اتنی جلدی بھی کیا ہے۔ بس آتے آتے ہی آئے گی ذرا دم لیجئے۔
گردھاری :میں زندگی بھر دم لینے کو تیار ہوں۔ مگر کوئی دم لینے تو دے۔ بچے کی دوا آنی ہے۔ پھر سودا سلف لے جا کر گھر والی کے حوالے کرنا ہے۔ پھر دفتر کی راہ لینی ہے۔ ذرا سا وقت ہے اس میں اتنے بہت سے کام کیسے ہوں گے۔
نرمل :سچ کہتا ہوں (مسکرا کر)مجھ سے زندگی بدل لیجئے۔ میرے پاس وقت ہے۔ وقت بے کراں سمندر ہے۔ بے اور چھور کا ریگستان ہے۔ خرید لیجئے۔ میں وقت بیچتا ہوں اور اب تک کسی نے یہ بے بہا خزانہ خریدا نہیں ہے۔ میں ابھی تک بیکار ہوں۔
مولانا :خدا نے چاہا تو نوکری مل جائے گی۔
نرمل :نہیں مولانا۔ میں اب زیادہ انتظار نہیں کر سکتا۔ بہت دیر ہو چکی ہے۔
گردھاری :آپ بھاگیہ وان ہیں بھائی!یہاں ایک طرف دفتر کا چکر ہے۔ پانچ منٹ دیر ہو گئی تو ہیڈ کلرک آنکھیں نکال رہا ہے۔ ساتھی سنگی چغلی کھا رہے ہیں۔ گھر پہنچو تو نون، تیل، لکڑی کا چکر۔ گھر والی منہ پھلائے بیٹھی ہے۔ ایک بچہ بیمار ہے۔ پچھلے ہفتے دوسرا جھولے سے نیچے گر پڑا ہے۔ اس سے پچھلے ہفتے سب سے چھوٹے کو دانت نکلنے میں بخار آ گیا۔
مولانا :تو آپ کے چار بچے ہیں۔
گردھاری :جی آپ کی کرپا سے۔
مولانا :ارے بھائی۔ میں نام بھولا آپ کا۔
گردھاری :گردھاری لال۔
مولانا :ارے بھائی گردھاری لال جی!پہلے سے کیوں نہیں بتایا آپ نے۔ پچھلے تین دن سے پریشان ہو رہا ہوں۔ بیس ہزار کا معاملہ ہے کسی ایسے شخص کی تلاش ہے جس کے چار بچے ہوں۔
گردھاری :بیس ہزار کا!
مولانا :جی ہاں جناب بیس ہزار کا۔ اچھا تو جناب یہ بتائیے کہ جن والدین کے چار بچے ہوتے ہیں ان کی پانچویں بچے سے کیا ہوتی ہے ؟!
گردھاری :میں آپ کا مطلب نہیں سمجھا؟
مولانا :اوہو۔ عاقل بالغ ہیں آپ ماشاء اللہ۔ سیدھی سی بات ہے۔ یہ بتائیے کہ آپ کو اپنے پانچویں بچے سے کیا ہے۔ نفرت، محبت، چاہت، ہیبت، راحت، مروت۔
گردھاری :میں نے کہاتا کہ میرے چار بچے ہیں۔
مولانا :وہ تومیں سمجھ گیا۔ میں پوچھتا ہوں آپ کو پانچویں بچے سے کیا ہے ؟
گردھاری :مجھے کچھ سمجھ نہیں آتی۔
مولانا :نہیں سمجھے آپ۔ ارے بھائی معمے کا اشارہ ہے۔ آپ سے بہتر بھلا کون بتا سکتا ہے۔ ذرا دماغ پر زور ڈالے۔ ذرا دھیان سے سوچئے۔ یعنی آپ کو اپنے پانچویں بچے سے کیا ہے۔ آ پ نے ٹھیک ٹھیک بتا دیا تو بخدا اول انعام کہیں نہیں گیا ہے۔ صاف بیس ہزار روپے ہاتھ جائے گا۔ ہاں تو کیا ہوتی ہے ؟
گردھاری :مجھے کچھ نہیں ہوتی پانچویں بچے سے، اور ہوتی بھی ہے تو نہیں بتاتا۔
مولانا :اوہ آپ تو نا حق ناراض ہو گئے۔ بھائی، گردھاری لال صاحب۔ واللہ آپ کا بڑا احسان ہو گا آخر آپ کا حرج ہی کیا ہے بتانے میں۔
گردھاری : اور جو میں نہ بتانا چاہوں۔
مولانا :تو نا حق آپ کے سر بہت سی ذمہ داریاں آ جائیں گی آپ کے نہ بتانے سے بیس ہزار روپیہ کا نقصان ہو گا۔ میرے قرض خواہوں کا قرضہ ادا نہ ہو گا۔ مالک مکان سال بھرکا کرایہ نہ لے سکے گا۔ بیوی کے زیور گروی پڑے رہیں گے اور آپ جانتے ہیں اس سارے عذاب کی ذمہ داری آپ کی گردن پر ہو گی۔
گردھاری :یہ تو آپ سراسر انیائے کر رہے ہیں۔
مولانا :کاش مجھے صحیح اشارہ معلوم ہوتا۔
گردھاری : اور باقی اشارے۔
مولانا :باقی سب اشارے مجھے معلوم ہیں اور ان تک کوئی دوسرا نہیں پہنچ سکتا۔
نرمل :مولانا!معمہ جیتنا بہت ضروری ہے۔ لیکن کبھی کبھی ہار میں بھی مزا ہوتا ہے۔
مولانا :نہایت ضروری ہے برخوردار۔ نہایت ضروری ہے۔ میں سارے اشارے حل کر چکا ہوں۔
نرمل :دنیا کا ہر مذہب، ہر فلسفہ یہی کہتا آیا ہے کہ مولانا کہ اسے زندگی کے معمے کے سارے اشارے معلوم ہیں اور ان تک دوسرا کوئی نہیں پہنچ سکتا مگر ایک آخری اشارہ پھر بھی باقی رہ جاتا ہے اسے کوئی نہیں جانتا۔ وہ لفظ کسے معلوم ہے جو زندگی کے معمے کو حل کر سکے شاید اس لفظ کو کوئی نہیں جانتا۔ یہی ایک لفظ ہم سب کی تقدیر ہے۔
مولانا :حضرت!آپ خواہ مخواہ دخل در معقولات کر رہے ہیں۔
گردھاری :وہ ٹھیک کر رہے ہیں۔ مجھے کوئی اشارہ نہیں آتا۔ مجھے آتا تو میں اس طرح بس کے پیچھے دوڑ دوڑ کر ہلکان ہوتا۔ میرے پاس بھی کار ہوتی۔ میں بھی آرام سے رہتا اور آپ سب پر ہنستا ہوا زوں سے کار میں گزر جاتا۔
مولانا :دھول اڑاتا ہوا!
گردھاری :جی؟
مولانا :تو کیا سچ مچ کوئی ایسا نہیں ہے جو یہ اشارہ حل کر سکے۔
نرمل :شاید کوئی نہیں۔ کوئی بھی نہیں۔
گردھاری :اس ۱۷ نمبر بس کی سروس نہایت خراب ہے بہت دیر سے آتی ہے اور جب آتی ہے تو بھری ہوتی ہے۔
مولانا :بسیں کم ہیں مسافر زیادہ ہیں۔
گردھاری :اس لئے برتھ کنٹرول پر زور دیا جا رہا ہے کہ بسیں زیادہ اور آدمی کم ہو جائیں گے۔ تب سب آرام سے سفر کر سکیں گے۔
نرمل :اجی سب بکو اس ہے گردھاری لال جی۔ پیدائش پر کنٹرول۔ مگر زندہ رکھنے پر اصرار۔ میں کہتا ہوں کروڑوں اربوں انسان جن کی زندگی کے مسئلوں کی کوئی ذمہ داری لینے کو تیار نہیں ہے انھیں مرنے کی آزادی کیوں نہیں دی جا سکتی۔
مولانا :میاں صاحبزادے !تم بہت خوفناک باتیں کرتے ہو۔ مجھے موت سے نہایت ڈر معلوم ہوتا ہے۔
نرمل :اس میں ڈرنے کی کیا بات ہے مولانا۔ ہم سب بچے جواں، بوڑھے، مرد، عورت سب کے سب ایسے مجرم ہیں جنھیں سزائے موت دی جا چکی ہے۔ مگر پھانسی کی تاریخ مقرر نہیں ہوئی ہے جس دن وہ تاریخ آ جائے گی جلاد ہماری کوٹھری میں چپکے سے داخل ہو کر ہمیں ساتھ لے جائے گا اور پھر ایک لمحے میں سب کچھ ختم ہو جائے گا۔ پانی پانی میں، ہوا ہوا میں، مٹی مٹی میں، آگ آگ میں مل جائے گی۔ اس میں ڈرنے کی کیا بات ہے۔
مولانا :موت کا نام نہ لو برخوردار۔
گردھاری :کچھ اور باتیں کرو بھائی۔
نرمل :موت سے بڑی اور کوئی بات اس زندگی میں نہیں ہو سکتی۔ آپ اتنے گھبراتے کیوں ہیں۔ موت کی بھی ایک خوشبو ہوتی ہے جو انسان کو اختیار کا سبق سکھاتی ہے، بتاتی ہے کہ اس کے لئے بس کا انتظار کرنا ضروری نہیں ہے۔
مولانا : (غصے سے) لاحول و لا قوت میاں صاحبزادے تم اس نامراد ذکر سے باز نہیں آؤ گے۔
نرمل : (لطف لے کر) مجھے اس ذکر میں مزا آتا ہے۔
مولانا :لاحول ولاقوۃ۔ بلکہ استغفراللہ۔ میاں جوانی میں لوگ عشق و عاشقی کی باتیں کیا کرتے ہیں۔ مرتے تو ہیں مگر کسی پر مرتے ہیں۔
نرمل :جی، آج کے زمانے میں ؟!
مولانا :میاں، ہر زمانے میں۔ آج زمانے میں کیا سرخاب کے پر لگے ہوئے ہیں ہر زمانے میں نوجوان عشق کرتے رہے ہیں اور جب تک دنیا قائم ہے کرتے رہیں گے۔
نرمل :آپ بھولتے ہیں مولانا!آج کا نوجوان عشق اور پریم سے بے خبر ہے اسے آپ نے روزگار، تعلیم اور گھربار کے جنجال میں اس طرح پھنسا دیا ہے کہ اس کے لئے زندگی کی ساری برکتیں بے معنی ہو کر رہ گئیں ہیں۔ وہ بس اسٹاپ پر چند لمحوں کی نظر بازی یا ایک مسکراہٹ ہی کو سب سے بڑی دولت جان کر خوش ہو لیتا ہے۔ اسے عشق کی آگ میں تپنے کا مزا معلوم ہی نہیں۔ اس کے لئے یہ دلاسا ہی بہت ہے۔
مولانا :دنیا اب بھی بہت رنگین ہے صاحبزادے۔
گردھاری :یہ تو ٹھیک کہہ رہے ہو مولانا!میں نے تو اپنی زندگی میں کبھی لڑکیوں کو بے آستین کے قمیض پہنے نہیں دیکھا تھا۔
مولانا :تو صاحبزادے مہرولی جا کر قیام کرنے کا ارادہ ہے یا قطب مینار کی لاٹ پر رہائش اختیار کرو گے۔
نرمل :ابھی میں نے کچھ طے نہیں کیا ہے۔ آپ کے پاس قلم ہو گا۔
گردھاری :ہاں یہ لیجئے۔
نرمل :مجھے ایک ضروری خط لکھنا ہے۔
مولانا :عجیب آدمی ہو، استاد!بس اسٹاپ پر خط و کتابت یعنی چہ معنی دارد؟
(تھوڑی دیر خاموشی رہتی ہے۔ )
نرمل :آپ دونوں مجھے اس طرح گھور گھور کر کیوں دیکھ رہے ہیں۔
(خاموشی قائم رہتی ہے۔ )
نرمل : (ایک دم چیخ کر)آپ کیا جاننا چاہتے ہیں۔ میں خودکشی کر رہا ہوں میں پاگل ہوں۔ میری زندگی اکارت ہے اور میرے اس ارادے سے مجھے کوئی بھی روک نہیں سکے گا۔ جائیے آپ پولیس کو اطلاع کر دیجئے، قانون سے کہئے وہ جس بیکار نوجوان کو جینے حق نہ دے سکا اس سے مرنے کا حق بھی چھین لے۔ آپ کیا کہنا چاہتے ہیں ؟
مولانا :کچھ نہیں !
گردھاری :کچھ بھی تو نہیں !
نرمل :آپ یہ چاہتے ہیں کہ میں اپنا دل چیر کر اپنے زخم آپ کو گنواؤں۔ آپ کو دلیل اور ثبوت سے سمجھاؤں کہ میرے لئے موت کیوں ضروری ہے۔ میں کوئی دلیل نہیں دوں گا۔ میرے دل کے ناسور، میرے ساتھ چتا میں جل جائیں گے آپ ان کونہ دیکھ سکیں گے۔ آپ مجھ سے دلیل مانگتے ہیں میں آپ سے اس سوال کا جواب چاہتا ہوں ’’آپ کیوں زندہ ہیں ؟‘‘، ’’آپ کو اس طرح زندہ رہنے کا کیا حق ہے ؟‘‘بولئے جواب دیجئے۔
مولانا :ہم مر نہیں سکتے۔
گردھاری :موت بھیانک ہے۔
نرمل :زندگی اس سے کہیں زیادہ بھیانک ہے۔
گردھاری:کمبخت یہاں کوئی نلکا بھی نہیں ہے سخت پیاس لگی ہے۔
مولانا :یہیں کہیں ہوا کرتا تھا نل۔ حلق تو میرا بھی خشک ہو رہا ہے۔ چلئے دیکھتے ہیں۔
گردھاری :چلئے۔ مگر چلنے سے پہلے۔
مولانا : (نرمل سے)دیکھو میاں صاحبزادے ہم لوگوں کی موجودگی میں تم نہ مر سکو گے۔ ابھی ہمارے اندر اتنا دم ہے کہ ایک آدمی کو مجبوراً زندہ رکھ سکیں۔
نرمل :بہتر ہو اگر آپ میری فکر چھوڑ دیں۔
مولانا :نہیں چھوڑیں گے۔
ایک آواز : (دور سے)مولانا۔ مولانا۔
مولانا :افوہ۔ برے پھنسے۔
گردھاری :کیا ہوا۔
مولانا :مالک مکان کا کارندہ۔
منشی :کیا خوب آپ کو ڈھونڈتے ڈھونڈتے آنکھیں پتھرا گئیں۔ آج صبح سے آپ کے گھر پر پہرہ دے رہا ہوں بس جناب ہو چکی یاری۔ سیدھے ہاتھ سے سال بھرکا کرایہ نکالئے۔ ورنہ چل کر مکان خالی کر دیجئے۔
مولانا :بات تو سنئے۔
منشی :میں نہیں سنتا بات وات۔ سال بھر سے آپ ٹالے بالے بتا رہے ہیں۔ بس اب میری رقم ڈھیلی کیجئے۔ مالک مکان نے صاف صاف کہہ دیا کہ یا تو رقم وصول کر کے لاؤ یا سامان مکان سے باہر پھینک دو۔
گردھاری :دیکھئے۔
منشی :آپ خواہ مخواہ بولنے کی کوشش کر رہے ہیں۔ آپ سے کیا مطلب ہے۔
گردھاری :اب اس وقت بس اسٹاپ پر جیب میں کوئی کرایہ لئے پھر رہے ہیں۔
منشی :میں کچھ نہیں جانتا۔ مجھے جواب چاہئے۔
مولانا :پھروہی مرغے کی ایک ٹانگ۔
منشی :مرغے ہو گے تم۔ میں کہوں ہونے لگا مرغا۔ میاں سیدھے سادے کرایہ ادا کر دو۔
مولانا :مجھ سے ہتھیلی پر سرسوں نہیں جمائی جائے گی۔ آپ کر لیجئے جوہو سکے۔
منشی :اچھا تو آج ہی لو۔ ابھی لو۔ سامان گھرکے باہر پھنکوائے دیتا ہوں۔ تم جیسے کرایہ داروں سے بھگتنا میں خوب جانتا ہوں۔
نرمل :ادھر بات سنو منشی۔
منشی :ہم پہ نیلی پیلی آنکھیں نکالنے والا کون ہوتا ہے تو۔
نرمل :مولانا جائیے آپ پانی پی آئیے (کارندے سے) سنئے منشی جی۔ مجھے سمجھائیے معاملہ۔
منشی :اجی معاملہ کیا ہے۔ سال بھرکا کرایہ ان کے ذمہ نکلتا ہے۔ کرایہ دلوا دیجئے۔
نرمل :اچھا رسید بک نکالئے۔ میں دیتا ہوں ان کی طرف سے پورا کرایہ۔
منشی :آپ۔ آپ کون صاحب ہیں۔ خیر کوئی ہوں۔ مجھے کرایہ چاہئے۔
نرمل :رسید نکالئے اور سنئے آپ ریس کھیلنے کب سے نہیں گئے۔
منشی :آپ نے کیسے جانا کہ میں ریس کھیلتا ہوں۔
نرمل :مجھے آپ کے ماتھے پر سب کچھ پڑھنا آتا ہے۔
منشی :سچ۔ تو آپ بتا سکتے ہیں۔
نرمل :سب کچھ بتا سکتا ہوں۔
منشی :کیا جیتنے والے گھوڑے کے نمبر بھی۔
نرمل :ہاں۔ مگر اسے ہر ایک کو نہیں بتایا جاتا۔
منشی :بڑی مہربانی ہو گی آپ کی۔ مجھے بتا دیجئے۔ میری بگڑی بن جائے گی۔ میں آپ کا زندگی بھراحسان مند رہوں گا۔ تا عمر آپ کو یاد کروں گا۔
(سپیرے کے بین کی آواز)
نرمل :سپیرے، سپیرے۔
سپیرا :جی حضور۔ ہم کا بلاوا کا؟
نرمل :دیکھو سپیرے۔ ہمارا کوٹ پہن لو۔
سپیرا :ہم سے کا مسخری کرت ہو صاحب۔ ہم دو کوڑی کے منئی کیا صاحب لوگ کا کوٹ پہن سکت ہیں۔
نرمل :لے جاؤ۔ خوشی سے لے جاؤ۔ پہن لو۔ میرے لئے بیکا رہے۔
سپیرا : (ہنستا ہے) اچھا تو پہن دیکھت ہیں۔
نرمل : (ہنس کر)تم تو سچ مچ جنٹلمین لگ رہے ہو۔ اچھا اسی بات پر ذرا سانپ کا تماشا بھی دکھا دو۔
سپیرا :ارے ہم کا حضور اس دفعہ کا سانپ ذرا بکٹ رہے۔
نرمل :ہمیں اب کسی بکٹ وکٹ سے ڈر نہیں لگتا۔ کھولو۔ پٹاری کھولو۔ تنک دم لو۔
(بین کا نغمہ)
سپیرا :اے کا کرت ہو صاحب۔ اے کا کرت ہو۔ سانپ کونہ پکڑو کاٹ لئے ٹھور مر جات۔
نرمل : (قہقہہ لگاتا ہے) ہمیں موت سے ڈر نہیں لگتا۔
سپیرا :رکھدو صاحب۔ سانپ کو نیچے رکھ دو صاحب۔
نرمل :نہیں میں اسے منشی جی کے گلے میں ڈالنا چاہتا ہوں۔
منشی :ارے۔ یہ کیا آپ غضب کر رہے ہیں۔ اسے پیچھے ہٹائیے (چیخ کر) پیچھے ہٹائیے۔
نرمل :میں اسے آپ کی گردن میں ڈالے بغیر نہ چھوڑوں گا۔ (قہقہہ لگا کر) آپ بھی کسی سانپ سے کم نہیں ہیں۔ میں دیکھنا چاہتا ہوں کہ دو زہریلے سانپ جب ایک دوسرے کو ڈستے ہیں تو کیا ہوتا ہے۔
منشی :رحم کیجئے میں مر جاؤں گا۔
نرمل :رحم آپ کو کرنا ہے منشی جی۔ میری طرف دیکھئے مجھے موت سے ڈر نہیں لگتا۔ مجھے اپنی زندگی پیاری نہیں ہے۔ ایسا آدمی سب سے زیادہ خطرناک ہوتا ہے۔ مجھے رسید چاہئے۔ آپ سمجھ گئے۔
منشی :جی سمجھ گیا۔ رسید دینے کو میں منع تھوڑے ہی کرتا ہوں۔ لیکن رقم۔
نرمل :مجھے آپ کی دستخطی سال بھرکے کرایہ کی رشید درکا رہے۔
منشی : اور اگر میں نہ دوں تو۔
نرمل :میں ڈال دوں گا۔ پھر یہ کبھی نہ اترے گا۔
(منشی چیختا ہے۔ )
نرمل :رسید۔
منشی :نہیں۔
(چیختا ہے۔ )
نرمل :رسید۔
منشی :اچھا بابا۔ ذرا دم لیجئے میں رسید بھی دیئے دیتا ہوں۔ آپ تو واقعی بڑے خطرناک ہیں۔ آپ تو آدمی کی جان بھی لے سکتے ہیں۔
نرمل :میں تمہیں راز کی بات بتاتا ہوں۔ اب سے کچھ دیر بعد ایک آدمی کی جان لینی ہے اور اس آدمی کا نام ہے نرمل کمار۔
منشی :یہ لیجئے رسید۔
نرمل :ٹکٹ، دستخط۔
منشی :سب موجود ہے جناب۔ اچھا اب مجھے اجازت ہے۔ اب میں چلوں۔
نرمل :ہر طرف خاموشی۔ زندگی تیرا بندھن کتنا کمزور اور کیسا مضبوط ہے۔
ولی چند :رام رام۔ یاں کوئی گردھاری لال تو نہ آیو؟
نرمل :گردھاری لال۔
ولی چند :ہاں جی۔ ٹھگنا سا ہے۔ یہی ہو گا۵۰۔ ۴۵ ورش کا۔ بڑے دفتر میں کلرک لگا ہوا ہے۔ ابھی گھر سے پتہ لگا سی کہ بس اسٹاپ پر گیا ہوا سی۔
نرمل :میرا نام تو گردھاری لال نہیں ہے۔
ولی چند :بس سے چلا گیا معلوم پڑے ہے آگے کو۔
نرمل :کام کیا ہے آپ کو۔
ولی چند :کام۔ اجی کام ہی کیا ہے دہی اپنا دھندا ہے اپنی بہن کے بیاہ میں کچھ روپیہ سود پر لیا سی اس نے۔ اب تک اس کا بھگتان نہیں کیا سی۔ اب بولو بھلا کوئی کب تک انتظار کر سکے سی۔ روپیہ والا تو سر پر ڈنڈا مار وصول کرے گا وہی سی۔
نرمل :ٹھیک ہے۔
ولی چند : اور میری سنو تو بیاج کے روپے سے جو بیاہ کرو وہ کبھی پروان نہ چڑھے سی۔ گردھاری لال کا اس بیاہ میں بھٹا بیٹھ گیا سی۔ پرنتو اس کی بہن کی اپنے پتی سے بن کے ہی نادی۔
نرمل : اور آپ کا بیاج پھر بھی گردھاری لال کو دینا ہے۔
ولی چند :بروبر۔ جو روپیہ دیتا ہے میں نے کہا نا سی وہ تو مار ڈنڈا سر توڑ وصول کر لے گا ہی سی۔
نرمل :آپ مت کیجئے۔ گردھاری لال غریب کلرک ہے۔
ولی چند :اجی ہمیں سنت سادھوؤں کی باتیں مت سمجھاؤ سی۔ اچھا توہم اب چلے۔
نرمل :جانے کا آپ کو اختیار ہے۔ مگر گردھاری لال یہاں موجود ہیں ذرا پانی پینے چلے گئے ہیں۔
ولی چند :تو پھر ایسا بولو سی۔
نرمل :میں چاہتا ہوں کہ اس کا سارا قرضہ ادا ہو جائے۔
ولی چند :ہم بھی یہی چاہتے ہیں جی۔ اصل تو سارا ادا کر دیا سی پرنتو بیاج بھی تو کوئی بھرے گاجی۔
نرمل :تو بیاج آپ معاف کر دیجئے نا۔ آپ لکھ پتی آدمی ہیں۔ آپ کے لئے کیا فرق پڑتا ہے۔
ولی چند :یہ کیسی بات کرتے ہو۔ ہم بیاج معاف کرنے لگیں تو پھر کھائیں گے کیا جی۔
نرمل :میں اس کا بھی انتظام کر دوں گا۔ آپ کچھ نہیں جانتے۔ میں نے اس دنیا کو دیکھا اور برتا ہے۔ مجھے اب سے آدھ گھنٹہ کے اندر اندر مر جانا ہے اور آپ نے سنا ہو گا کہ مرنے سے پہلے آدمی کی آنکھ دنیا کے آنے والے واقعات پڑھ سکتی ہے۔ میں بھی اس وقت آپ کی قسمت کا لکھا آئینہ کی طرح دیکھ سکتا ہوں۔
ولی چند :سچ۔
نرمل :ہاں اس لئے کہ میں اپنی موت کے لئے تیار ہوں۔ میں اس سے آنکھیں چار کر سکتا ہوں۔
ولی چند :تو پھر مجھے کچھ بتائیے مہاراج۔
نرمل :جو بتاتا ہے وہ کچھ نہیں جانتا۔ جو جانتا ہے وہ کچھ نہیں بتاتا۔
ولی چند :تو پھر، ہمیں کی فائدہ سی۔
نرمل :میں آپ کی قسمت میں روپیہ ہی روپیہ دیکھ رہا ہوں۔ مگر اس کے لئے راستہ کٹھن ہے۔
ولی چند :کٹھن ہے۔
نرمل :ہاں !مایا آپ کی تلاش میں ہے۔ ساکشات لکشمی آپ کے گھر کا راستہ ڈھونڈ رہی ہے مگر آپ کی لالسا نے اس کا راستہ روک لیا ہے۔
ولی چند :تو پھر۔
نرمل :مشکل کام ہے مگر میں اس کام کو پورا کر سکتا ہوں۔ آپ کے مکان کے بہت پاس ایک ایسی جگہ ہے جہاں دولت گڑی ہوئی ہے۔ ہر رات کو دو بجے کے قریب اس دولت کے اوپر بیٹھا ہوا سانپ دولت پانے والے کو آواز دیتا ہے اور ہر رات کو تھک کر واپس لوٹ جاتا ہے۔
ولی چند :انداز سے بھلا کتنی دولت ہو گی۔
نرمل :لاکھوں میں بلکہ اس سے بھی زیادہ۔
ولی چند :سچی۔
نرمل :مجھے اس جگہ کا پورا پورا پتہ نشان معلوم ہے مگر وہ ایسے سیٹھ کے ہاتھ آ سکتی ہے جو دیالو ہو۔
ولی چند :یہ تو بڑی کٹھنائی ہے بھئی۔
نرمل :گردھاری لال کا قرضہ معاف کر دیجئے تومیں آپ کو اس کا پتہ بتاتا ہوں۔
ولی چند : اور یدی وہاں نہ نکلی مایا۔
نرمل :تومیں اس کا ذمہ دار ہوں۔ گردھاری لال کا قرضہ میں دوں گا۔
ولی چند :تو پھر لکھ دو تحریر۔
نرمل :ہاں۔ اس میں مجھے کوئی اعتراض نہیں ہے۔ میں گردھاری لال کا سارا قرضہ اپنے ذمہ لیتا ہوں۔ اب آپ کا ایک پیسہ بھی گردھاری لال کے ذمہ باقی نہیں رہا ٹھیک ہے نا۔
ولی چند :ہاں بالکل ٹھیک ہے اور یدی مایا نہ نکلی تو۔
نرمل :میرا گیان دھیان کبھی غلطی نہیں نکلتا۔ مایا نکلے گی۔ جائیے جا کر اپنے مکان کا سامنے والے میدان کا دکھنی کنارہ کھودئیے۔ جائیے !دیر نہ کیجئے مایا آپ کا انتظار کر رہی ہے۔
ولی چند :اچھا تو میں چلوں تنک، گردھاری لال سے کہہ دیجئے گا کہ مجھ سے مل لیں۔
نرمل :اب ان کے ملنے کی کوئی ضرورت نہیں۔ آپ قرض دار میں ہوں۔ گردھاری لال نہیں ہے۔ اگر مایا نہ ملے تومیں رقم ادا کروں گا۔ مل جائے تو قرضہ بے باق۔
ولی چند :یہ ٹھیک سی۔
نرمل :اچھا نمسکار۔
ولی چند :نمسکار۔
نرمل : (ہنستا ہے)پاگل کتے ہڈی کے پیچھے بھاگ رہے ہیں اور اسے زندگی سمجھتے ہیں (ہنستا ہے) ہر ایک پرچھائیں کو چھونا چاہتا ہے اور اسے مسرت کہتا ہے۔ انسان تو قدرت کا سب سے بڑا عجوبہ ہے۔
نرملا :معاف کیجئے گا ۱۷ نمبر کا بس اسٹاپ یہی ہے۔
نرمل :جی ہاں۔
نرملا :کیا بس بہت دیر میں آتی ہے۔ مجھے بہت جلدی ہے کیا یہاں کوئی اور سواری نہیں مل سکتی۔
نرمل :نہیں۔ اس وقت یہاں اور کوئی سواری نہیں ملے گی آپ اس قدر گھبرائی ہوئی کیوں ہیں۔
نرملا :کچھ نہیں۔ کچھ بھی تو نہیں۔ گرمی بہت زیادہ ہے۔ یہاں ٹیکسی اسٹینڈ بھی نہیں ہے کہیں ؟!
نرمل :نہیں۔ یہاں کے لوگ شارٹ کٹ پر یقین نہیں کرتے۔ یہاں سب کام سیدھے سادے راستوں سے ہوتے ہیں۔ بے ایمانی بھی اور ایمانداری بھی۔
نرملا :آپ شاعر ہیں۔
نرمل :نہیں فقط انسان ہوں اور وہ بھی پتہ نہیں کب تک۔
نرملا :میں پریشانی میں ہوں۔ آپ میری مدد کیجئے۔
نرمل :کیا پریشانی ہے آپ کو۔ ویسے میں اتنا پریشان رہ چکا ہوں کہ مجھے دوسروں کی پریشانیوں میں مزا آنے لگا ہے۔
نرملا :بھگوان کے لئے مجھ سے انکار نہ کیجئے۔ اس بچے کو گود میں لے لیجئے۔
نرمل :جی بچے کو گود میں لے لوں۔
نرملا :جی ہاں !بچہ کس آرام سے سو رہا ہے۔
نرمل :لائیے۔ مجھے دے دیجئے۔
نرملا :وہ میرا پیچھا کر رہے ہیں۔ وہ مجھ سے پوچھتے ہیں اس بچے کا باپ کون ہے۔ انھوں نے میری نیند حرام کر دی ہے۔ میں ہسپتال سے بھاگ آئی ہوں۔
نرمل :اچھا اوہوہ۔ یہ بات ہے اور تمہارے پتا جی!
نرملا :پتا جی نے مجھے گھر سے نکال دیا۔ عزیز رشتے دار، سب مجھے کلموہی، کلنکنی کہتے ہیں۔ آپ ہی کہئے سچ مچ میں نے پاپ کیا ہے ؟
نرمل :اس بچے کو دیکھو کیسا پھول ایسا خوب صورت ہے۔ کیا پاپ اتنا سندر ہوتا ہے۔
نرملا : (روتے ہوئے) میں لٹ گئی، برباد ہو گئی، برباد ہو گئی۔ میں نہیں جانتی کہاں جاؤں۔ بھگوان مجھے موت بھی نہیں دیتا۔ میرا کوئی سہارا نہیں۔
نرمل :زندگی کے تجربات بڑے ستم ظریف ہیں۔ کسی کو پاگل، کسی کو مسخرا، کسی کو صرف تماشا بنا کر چھوڑ دیتے ہیں۔ ہم میں سے ہر ایک تماشا بھی ہے تماشائی بھی۔
نرملا :یہ باتیں میری سمجھ میں نہیں آتیں۔ وہ آئیں گے وہ آپ سے پوچھیں گے اس بچے کا باپ کو ن ہے۔
نرمل :تو کیا مجھے سچ بولنے کی اجازت ہے۔
نرملا :سچ میرے بھگوان!کیا آپ مجھے دھوکہ دے کر چلے جائیں گے۔
نرمل :ہاں سچ تو یہی ہے کہ میں اس بچے کا باپ نہیں ہوں بلکہ اس بچے کے باپ کو جانتا بھی نہیں۔ مگر اتنی بات جانتا ہوں کہ تم پاپن نہیں ہو۔ مجھے نہیں معلوم پاپ کیا ہے۔ بدی کسے کہتے ہیں۔ کیا من کی بات ماننا پاپ ہے۔
نرملا :ایشور کرے جلدی سے بس آ جائے۔
نرمل :ڈرو مت۔ مجھے ڈرپوک آدمیوں سے نفرت ہے۔
نرملا :مگر بس آ بھی جائے گی تو بے کا رہے۔ میں کہاں جاؤں گی جہاں جاؤں گی وہ مجھے ڈھونڈ نکالیں گے۔
نرمل :ایسی باتیں مت کرو۔
نرملا :میرا کوئی سہارا نہیں ہے۔ کہاں جاؤں گی۔ اس بھری دنیا میں میں اکیلی ہوں۔
نرمل :یہاں سب اکیلے ہیں۔
نرملا :میرا بچہ کس کے سہارے جئے گا۔ اس کا کیا ہو گا؟
نرمل :میں نے کہانا ایسی باتیں مت کرو۔ کیا تم میرے اندر پھر زندگی کی خواہش کو جگانا چاہتی ہو۔
نرملا :آپ نے مجھ سے کچھ کہا!
نرمل :ہاں تم سے کہا آنسو پونچھ ڈالو۔
نرملا :میرا دل بہت دکھی ہے بابو۔
نرمل :مجھے بابو مت کہو۔ میرا نام نرمل ہے۔
نرملا :میں سچ مچ بہت دکھی ہوں۔ اس پتھروں کے شہر میں کوئی ایک بھی ایسا نہیں جو میری مدد کر سکے۔ سب کی نظریں مجھے اس طرح گھورتے ہیں جیسے مجھے کھالیں گے۔ نگل لیں گے۔ کیا یہاں انسانوں کی کوئی بستی نہیں ہے۔
نرمل :کبھی تھی، مگر اب وہ سب پتھر ہو گئے ہیں۔
نرملا : (سسکنے لگتی ہے۔ )
نرمل :روؤ نہیں۔ میں تمہاری مدد کر سکتا تو ضرور کرتا۔ میں تمہارا درد بانٹ لیتا۔ مگر میرے پاس بہت کم وقت ہے۔
نرملا :کسی کے پاس وقت نہیں ہے۔ یہ لو وہ آ گئے۔
نرملا کا باپ : (ہانپتے کانپتے ہوئے) یہ کون ہے ؟
نرمل :آپ کس کو ڈھونڈ رہے ہیں۔
نرملا کا باپ :اس بچے کا باپ کون ہے ؟میں اس کا سر توڑ دوں گا۔ جس نے ہمارے خاندان کی عزت پر بٹہ لگا دیا۔ جس نے اس بھولی بھالی لڑکی کو دھوکا دے کر اپنے پاپ کا پھل اس کے سر تھوپ دیا۔ میں اس کا خون پی لوں گا۔
نرملا :پتا جی!
نرمل :کہنے دو انھیں۔ بزرگوں کے کہنے کا برا نہیں مانتے۔ پتا جی۔
نرملا کا باپ :خبردار جو مجھے پتا جی کہا۔ تجھے شرم نہیں آتی پاپی۔
نرمل :اس بچے کی طرف دیکھئے۔ کیا پاپ اتنا سندر ہو سکتا ہے !
نرملا کا باپ :میں بچے کو نہیں دیکھ سکتا۔ میں صرف تیرے پاپ کو دیکھتا ہوں۔ میں تجھے اس پاپ کا مزا چکھانے آیا ہوں۔
نرمل :یہاں سڑک پر؟!
نرملا کا باپ :تو نے بھی تو ہماری عزت سڑک پر نیلام کی ہے۔ ہم آج تیری آبرو مٹی میں ملا دیں گے۔ پھر کسی کو ایسا پاپ کرنے کی ہمت نہیں ہو گی۔
نرمل : (شانتی سے) ایک بات پہلے سمجھ لیجئے۔ میں اسے اپنی دھرم پتنی بنانے کو تیار ہوں۔ یہ بچہ میرا بچہ ہے۔ ہمارا ایک چھوٹا سا گھر ہو گا۔ جس کے کچے آنگن میں یہ بچہ پل کر بڑا ہو گا۔ لیکن اگر آپ نے ایک قدم بھی آگے بڑھایا تو سمجھ لیجئے۔ جاپانی کشتی جو جت سوکے پینترے مجھے یاد ہیں کہ آپ ابھی زمین پر الٹے پڑے نظر آئیں گے۔
نرملا کا باپ :دھمکی دیتا ہے۔ بدمعاش کہیں کا۔
نرملا :پتا جی اب جانے دیجئے۔ غصہ تھوک دیجئے۔ یہ اپنی غلطی مان رہے ہیں۔
نرملا کا باپ :تو چپ رہ کلموہی۔ تیری ہی وجہ سے ہمارا منہ پہ کالک پتی۔ تو ہی بڑھ بڑھ کر باتیں بنا رہی ہے۔
نرملا :آپ ان پر ہاتھ اٹھائیں گے۔ یہ پاپی نہیں دھرماتما ہیں۔
نرملا کا باپ :دھرماتما(طنزیہ ہنسی) میں ابھی اس دھرماتما کی مرمت کرتا ہوں۔ دھرماتما دیکھتے کیا ہو پکڑ لو اسے۔
نرملا :میں ہرگز ان ہر پاتھ نہیں اٹھانے دوں گی میں جان دے دوں گی پتا جی آپ کو بچے کا واسطہ۔
(بچہ رونے لگتا ہے۔ ہنگامہ شروع ہو جاتا ہے۔ )
نرمل :خبردار جو آپ آگے بڑھے۔ میں آخری بار آپ کو ہوشیار کرتا ہوں۔
نرملا کا باپ :ایسی تیسی تیری ہوشیاری کی۔ تو نے سمجھا کیا ہے ؟
نرملا :پتا جی! انھیں چھوڑ دیجئے۔
نرملا کا باپ : (لپٹ جاتا ہے) خون پی کر چھوڑ دوں گا۔ دوسروں کی عزت پہ ہاتھ ڈالتے تجھے غیرت نہیں آئی۔
نرمل :جو جت سو کا ہاتھ سنبھالو۔
نرملا کا باپ :ہائے۔
(گر پڑتا ہے۔ )
گردھاری :یار نل کا پانی پی تو لیا پر اچھا نہیں کیا اور بس بھی آ کر نکل گئی ہو گی۔
مولانا :کنوئیں پرجاؤ پانی پیو گے تو یہی انجام ہو گا۔
گردھاری :ابلا ہوا پانی مل جاتا تو اچھا تھا۔
مولانا :اماں لعنت بھیجو اخبار والوں پریہ بھی کوئی بات ہوئی کہ زندگی ابلا ہوا پانی پیتے پیتے گزر جائے۔
گردھاری :مگر مولانا۔
مولانا :اگر مگر کیا ہوتی ہے۔ خدا کے فضل سے چونچال بلکہ کیا کہتے ہیں ہٹے کٹے رہو گے کیا بیکار کے شک شبہے دل میں لاتے ہو۔ کنوئیں سے نکال کروہ ڈگ ڈگا کے پانی پیا کہ واللہ مزا آ گیا۔ بڑے زور کی پیاس لگی ہوئی تھی۔
گردھاری :ہم تو صاحب اب کبھی بے ابلا پانی نہ پیں گے یہ بڑا خطرہ مول لینا ہے اور ابلنے میں لگتا ہی کیا ہے۔ دمڑی کی لکڑی ہی کاتو خرچہ ہے۔ کب تک ابلا پانی پینا ہو گاہے رام۔
مولانا :ماشاء اللہ اب ہم ہندوستانی بھی خاصے لا مذہب ہوتے جا رہے ہیں آج پانی ابال کر پینے لگے ہیں۔ کل حکم ہو گا کہ ہوا کو بھی چھان کر استعمال کرو۔ یعنی جو ہمارے پرکھے دندناتے ہوئے زندگی گزار گئے۔ تو صاحب کیا یہ سب ابلا ہوا پانی پیتے تھے کہ سو سو سوا سو برس کی عمریں پائیں اور قوت کا یہ حال کہ زمین پر ٹھوکر ماریں تو خدا کی قسم پانی نکل آئے۔ مجھے اب کوئی بتا دے کہ انھیں کنوئیں کے پانی نے کیا نقصان کیا جو ہمیں کرے گا۔
گردھاری :آپ بے کار کی بات کر رہے ہیں مولانا۔ ہمیں آگاہی دی گئی ہے کہ پانی ابال کر پئیں تو ہماری ذمہ داری ہے۔
مولانا :اجی ہم نہیں جانتے ذمہ داری ومہ داری سب بکو اس ہے۔ میاں آگاہی تو ہمیں یہ بھی دی گئی ہے کہ شیطان ہمارا دشمن ہے، آرزو شیطان کی خالہ ہے۔ مگر سارے پیر پیغمبر، پولیس، فوج، ملا، برہمن، قانون، عدالتیں کوئی بھی آدمی کی آرزو کے چنگل سے بچا پاتا ہے۔ ہمیں بھیا سیدھے سادے جینے میں مزا آتا ہے۔
گردھاری :جلدی قدم بڑھاؤ۔ پتہ نہیں بس آ گئی ہے کہ نہیں۔
مولانا :اجی تمہیں بس کی پڑی ہوئی ہے۔ مجھے اس سرپھرے لونڈے کی فکر ہے کہیں سچ مچ وہ قطب مینار سے پھاند نہ پڑا ہو۔
گردھاری :اجی نہیں مولانا۔ جان دینا ایسا کوئی سہل ہے ہاتھ بھر کا کلیجہ چاہئے۔
مولانا :تم نے ناپا ہے اس کا کلیجہ۔ بے ڈھب لونڈا ہے لالہ جی! یہ آج کل کی نسل ہماری تمہاری طرح نہیں ہے۔ ان کی کھوپڑی میں اول تو کچھ بات آتی نہیں ہے اور جو گھس جاوے ہے تو پھر نکلنا مشکل ہی ہے۔
گردھاری :تو چلئے ذرا قدم بڑھاتے ہوئے چلئے۔
(لڑائی کا شور شغب سنائی دیتا ہے۔ )
مولانا :ارے غضب یہ کیا قصہ ہے۔ ارے ٹھہرو! روکو ذرا دم لو۔ اس ایک بے گناہ پرکیوں ٹوٹ پڑے ہو۔
گردھاری :کیا قصہ ہے ؟
نرملا کا باپ :قصہ کیا ہے میں اس کا آج سارا حساب چکا کر دم لوں گا۔
گردھاری :الگ ہٹ جائیے۔
نرملا کا باپ :نہیں۔ دیکھتا ہوں کون مائی کا لال مجھے الگ ہٹاتا ہے۔
مولانا :گردھاری آؤ ہم دونوں مل کر پکڑ کر انھیں ایک طرف ہٹا دیں۔
گردھاری :خبردار جو ہاتھ اٹھایا ٹھا کر صاحب۔ لو بس اب شانت ہو جائیے۔
مولانا :بتائیے تو قصہ کیا ہے۔ بیٹی تم بھی ایک طرف بیٹھ جاؤ۔ بچہ روتا ہے۔ اسے دودھ دے دو۔
نرملا :ان کی تو خیر خبر لیجئے۔
مولانا :تم فکر مت کرو۔ ہم سب ٹھیک کر لیں گے۔ معلوم ہوتا ہے ہمارے پیچھے بہت کچھ ہو گزرا۔
گردھاری :بس تو نہیں آئی تھی۔
نرملا :نہیں۔ ابھی بس نہیں آئی۔
مولانا :برخوردار آخر بتاؤ تو سہی قصہ کیا ہے ؟
نرمل :کچھ نہیں مولانا ساری ذمہ داری، سارا قصور میرا ہے۔ مجھ سے کسی کو بے آسرا نہیں دیکھا جاتا مولانا۔ ایک بے آسرا عورت نے پھر میرے دل میں جینے کی امنگ پیدا کر دی۔ یہ میری بیوی ہے اور یہ میرا بچہ ہے۔
نرملا کا باپ :جھوٹا ہے یہ۔ اس نے میری بچی کو دھوکہ دیا ہے۔
گردھاری :آپ ٹھہر جائیے۔ جھوٹ سچ کا فیصلہ ہوتا رہے گا۔
نرمل :میرے دل میں پھر امنگ جاگی کہ اس بے آسرا عورت کو پناہ دوں۔ میرا بھی ایک گھر ہو۔ میرا بھی ایک کچا آنگن ہو۔ میری بھی زندگی کا ایک مقصد ہو۔ میرا پھر زندہ رہنے کو جی چاہنے لگا۔ میں زندہ رہوں گا۔
مولانا :تم سچ کہہ رہے ہو نرمل۔
نرمل :ہاں۔ سچ اب ہم کبھی جدا نہ ہوں گے۔
نرملا کا باپ :یہ انیائے رہتی دنیا تک نہیں ہو گا۔ نرملا!ابھی میرے ساتھ جائے گی۔
گردھاری :بس آنے والی ہے مولانا۔ بس آ رہی ہے۔
مولانا :اس دفعہ خالی معلوم ہوتی ہے۔ اس دفعہ یہاں ضرور رکے گی۔
نرملا کا باپ :جائے گی کیسے نہیں۔ تجھے میرے ساتھ جانا ہو گا۔
نرملا :میں کہیں نہیں جاؤں گی۔ مجھے کہیں نہیں جانا۔
نرملا کا باپ :جائے گی کیسے نہیں۔ تجھے میرے ساتھ جانا ہو گا۔
نرملا :مجھے مجبور نہ کرو پتا جی۔ تم مجھے اپنے گھر سے نکال چکے تو پھر میرے راستے میں کیوں آتے ہو۔ میں نرمل کے ساتھ جاؤں گی۔
نرملا کا باپ :خبردار اس کا نام نہ لینا۔
نرمل :مولانا یہ لو تمہاری رسید۔
مولانا :یہ کیا؟
نرمل :ملک الموت سے رہائی۔ تمہارا مالک مکان سال بھرکے کرائے کی وصولی کی رسید دے گیا ہے۔
مولانا :سچ!
نرمل :اب تم آرام سے معمے کا آخری اشارہ حل کر سکتے ہو۔
مولانا :یہ تو معجزہ کر دکھایا استاد تم نے۔ مان گئے قسم خدا کی۔ حد ہو گئی۔
نرمل :گردھاری، یہ تمہارے قرضے کی بیباقی کی تحریر۔
گردھاری :کیا، وہ کمبخت یہاں بھی آیا تھا۔
نرمل :ہاں، اور اس نے تمہارا سارا قرضہ بیباق کر دیا اب تم دونوں نمبر ۱۷ بس میں سوار ہو سکتے ہو۔
(بس آہستہ آہستہ آتی ہے اور تھوڑی دیر کے لئے رک جاتی ہے۔ )
نرملا کا باپ :نرملا پاگل ہو گئی ہے۔ اس فریبی کے ساتھ جائے گی؟
نرملا :ہاں میں انھیں کے ساتھ جاؤں گی۔
نرملا کا باپ :ہاں۔ اچھا۔ تومیں بچے کو لئے جاتا ہوں۔
(نرملا اور اس کے باپ میں کشمکش۔ بچے کی رونے کی آواز)
نرملا :ایسا نہ کرو پتا جی!ایسا نہ کرو پتا جی!!
نرملا کا باپ : (بچے کولے کر) بچہ میں نے لے لیا اب جا تو جہاں تیرا جی چاہے۔
نرملا : (روتے ہوئے) نہیں پتا جی!میں آپ کے ساتھ چلتی ہوں۔ میں چلتی ہوں۔
(بس چلتی ہے۔ )
نرمل :نرملا۔ نرملا۔ کنڈکٹر۔ کنڈکٹر۔ بس روکو۔ روکو۔
(بس چلتی رہتی ہے۔ )
نرملا :نرمل نرمل(خوفزدہ آوازیں) ٹرک، ٹرک، بچو، بچو۔
نرمل : (بھاگتے ہوئے) روکو، روکو۔
(تصادم کی آواز)
(نرملا کی چیخ) بس ایک ساتھ جھٹکے سے رکتی ہے۔
گردھاری :نرمل ٹرک کے نیچے آ گیا۔
دوسری آواز :بھیجا پاش پاش ہو گیا۔ او بھگوان دیکھا نہیں جاتا۔
تیسری آواز :زمین خون سے رنگ گئی۔
(نرملا کے رونے کی آواز ابھرتی ہے۔ )
مولانا :دیکھتے کیا ہو؟چہرے پر چادر ڈھک دو!آج ایک بڑا آدمی گیا!! ایک عظیم الشان !!!
***
ماخذ:’’مور پنکھی‘‘( اور دوسرے ڈرامے)
مکتبۂ دین و ادب
لکھنو
 
اوپندر ناتھ اشک

پڑوسن کا کوٹ

مقام :دلی کی ایک ’’پاش‘‘ کالونی میں شری سی بی کے بنگلے کا ڈرائنگ روم۔ جس میں کھانے کی میز کرسیاں، سائڈ بورڈ بھی ہے، ریفریجریٹر بھی رکھا ہے۔ کوچ، سنٹر ٹیبل اور کوچوں کے ساتھ چھوٹی تپائی وغیرہ۔ دو دروازے ہیں۔ ایک برآمدے میں کھلتا ہے۔ دوسرا کچن میں جاتا ہے۔
وقت :۱۹۷۸ء۔ سردیوں کی ایک شام۔
کردار
نیلما :مرکزی وزارت عوامی فلاح و بہبود کے جوائنٹ سکریٹری شری سی بی کھیڑا کی بیوی۔ عمر ۳۵ سال، نہ زیادہ موٹی نہ پتلی دبلی، درمیانہ قد، گورا رنگ، کٹے ہوئے بال، بتیسی ذرا سی باہر کو نکلی ہوئی۔ مسکراتی ہے تو خوبصورت لگتی ہے۔ غصے میں چہرہ بناتے ہوئے چلاتی ہے تو چہرے پر دانت ہی دانت ابھر آتے ہیں اور اسے خوفناک بنا دیتے ہیں۔
مسز گنجو :عمر ۳۵ سال۔ لیکن ۴۰ کی لگتی ہے۔ تیکھے ناک نقشے والی۔ گوری چٹی، گورے بدن کی کشمیری خاتون۔
مسز حنیف :گنجو کی سہیلی۔ گول مٹول۔ ہلکے سانولے رنگ کی۔
مسز سلوجا :نیلما کی سہیلی۔ اوپر سے اعلیٰ اور جدید طبقے سے متعلق خاتون کا خول چڑھائے ہوئے، لیکن باطن میں پرانے خیالات کی عورت۔
پاروتی :اسی عمر کی گوری چٹی خادمہ۔
سی۔ بی :شری چندر بدن کھیڑا، نیلما کے آئی اے ایس شوہر۔ عمر ۴۵ سال۔ دوست احباب اور بیوی صرف سی بی کہتے ہیں۔ فربہی کی طرف مائل بدن کے دنیا دار اور ملنسار آدمی۔ چہرے پر کچھ ایسا جذبہ جو امیر باپ کی بیٹیوں کے زن مرید شوہروں کے چہروں پر آ جاتا ہے۔
رام ادھار :چپراسی۔ عمر چالیس سال۔
خانساماں :جیسا کہ سخت گیر مالکن کے خانساماں کو سنجیدہ ہونا چاہئے۔

منظر : (پردہ اٹھتے وقت مسز نیلما کھیڑا جو اپنی سہیلیوں میں نیلو یا نیلی کے نام سے پکاری جاتی ہے، ڈرائنگ روم میں بیٹھی سوئیٹر بن رہی ہے۔ جبھی چپراسی ایک ہاتھ میں ٹفن کیریر اور دوسرے میں اپنے صاحب کا ہینڈ بیگ لئے ہوئے داخل ہوتا ہے۔ )
نیلما :سی بی نہیں آئے رام ادھار۔
رام ادھار :آئن ہن میم صاحیب ملا رستوا ماں اتر گئن۔
نیلما :راستے میں !کہاں ؟
رام ادھار :پی سی صاحب آپن بنگلا کے گیٹ پر کھڑا رہن۔ انہی صاحب کے بلائی لیہن۔ ایہی سے اوہی اتر گئن۔ آؤر ہم کا ڈرائبر کے سنگ پٹھائے دہن۔
نیلما :آنے کے بارے میں۔ ۔ ۔
رام ادھار :ہم سے تو کچھؤ ناہیں کہن میم صاحب!
نیلما : اور میں یہاں چائے کا پانی چڑھائے بیٹھی ہوں۔ (بنا ہوا سوئیٹر کوچ پر پٹک کر اٹھ کھڑی ہوتی ہے۔ ) سی بی یہی خامی ہے۔ اتنے بڑے افسر ہیں اور ٹائم سنس ذرا نہیں۔
(بے چینی سے کمرے میں گھومنے لگتی ہے۔ اسی وقت ٹیلی فون کی گھنٹی بجتی ہے۔ )
نیلما :دیکھو رام ادھار کون ہے۔
رام ادھار : (ٹیلیفون کا ریسیور اٹھاتے ہوئے) ڈبل سک نین نین نین جی میں رام ادھار بول رہا ہوں۔ ۔ ۔ جی ہیں۔ ۔ ۔ جی دیتا ہوں۔ (نیلما کی طرف دیکھ کر) صاحیب کے فون ہے میم صاحب۔
(نیلما تنتناتی ہوئی دوہی قدموں میں بڑھ کر چپراسی سے ریسیور جھٹک لیتی ہے۔ رام ادھار ٹفن اور ہینڈ بیگ کچن اور سٹڈی میں رکھنے کے لئے چلا جاتا ہے۔ )
نیلما : (غصے سے) سی بی تم وہیں راستے میں رک گئے اور میں چائے کا پانی چڑھائے تمہاری راہ تک رہی ہوں۔ یہ کیا وتیرہ ہے تمہارا کہ دفتر سے گھر آتے آتے راستے ہی میں دوستوں کے ہاں جا بیٹھے ہو۔ چائے ناشتے کے بعد شام کو غپ نہیں ہو سکتی؟۔ ۔ ۔ ہاں ہاں سن رہی ہوں۔ ۔ ۔ اچھا۔ ۔ ۔ (نرمی سے اکساتے ہوئے) تم تو ذرا دھیرا سے کہنا کہ خود ہی نہیں، بلکہ اپنی پڑوسنوں سے بھی کہہ دیں کہ وہ کلب کے سالانہ چناؤ میں ہمارا ساتھ دیں۔ ۔ ۔ ہاں ہاں کیا حرج ہے۔ گرین پارک کی لیڈیز کیوں ممبر نہیں بن سکتیں ؟تم پی سی سے کہنا کہ دھیرا اگر ہماری مدد کرے گی تومیں اپنی جگہ سکریٹری شپ کے لئے اس کے نام پر زور دوں گی۔ ا بار شہلا کا جادو توڑ دینا ہے۔ ۔ ۔ ہاں !۔ ۔ ۔ تم انھیں سمجھانا کہ شہلا صدر ہے اور نیلما سکریٹری دونوں میں پٹتی نہیں اور کلب کا کام سفر (Suffer) کرتا ہے نیلما صدر ہو جائے اور دھیرا سکریٹری تو کام مزے میں چلے گا۔ ۔ ۔ وہ تو ہئی ہے۔ وہ تو ہئی ہے۔ تم ذرا اپنی طرف سے دونوں کو اچھی طرح سے سمجھا دینا۔ ۔ ۔ پی سی ان لوگوں کے بھی تو دوست ہیں۔ شہلا کے لئے ان کے دل میں وہ کچھ ذرا نازک سا۔ ۔ ۔ (ہنستی ہے)۔ ۔ ۔ اسی لئے، سمجھتے ہونا۔ ۔ ۔ ہاں ہاں !۔ ۔ ۔ (ذرا ہنس کر) میں نے تمہیں کتنی بار کہا ہے کہ مجھے محترمہ وحترمہ مت کہا کرو۔ ۔ ۔ دوستوں میں ایسا دکھاتے ہو کہ جیسے میرے بغیر۔ ۔ ۔ کیا گھر جلدی آنے کا ارادہ نہیں ہے جو اتنا مکھن لگا رہے ہو۔ ۔ ۔ ہاں ہاں چائے تو تم وہیں پیو گے۔ ۔ ۔ میں جانتی تھی۔ ۔ ۔ مسز گنجو اور بیگم حنیف کا انتظار کر رہی تھی۔ ۔ ۔ نہیں۔ ۔ ۔ اب اکیلے ہی پی لوں گی!
(چپراسی ٹفن کیریر اور ہینڈ بیگ رکھ آتا ہے اور چپ چاپ دروازے کی طرف جانے لگتا ہے کہ فون پر بات کرتے کرتے نیلما ٹوکتی ہے۔ ۔ ۔ )
نیلما :ٹھہرو!تم سے ذرا بات کرنی ہے۔ (فون میں) نہیں۔ ۔ ۔ نہیں۔ ۔ ۔ تم سے نہیں کہا سی بی میں چپراسی سے کہہ رہی تھی۔ ۔ ۔ اچھا تواب تم وہیں نہ بیٹھ رہنا۔ ۔ ۔ بات کر کے جلدی آنا۔ ذرا پاراشرز کے ہاں ہو آئیں گے۔ ۔ ۔ ہاں کیا حرج ہے۔ ۔ ۔ موہن بھائی کو میری یاد دلانا اور ساتھ لانا۔ (فون رکھ دیتی ہے۔ ۔ ۔ رام ادھار سے) خانساماں سے کہو۔ صاحب نہیں آئیں گے۔ چھوٹی کیتلی میں دو پیالی چائے میرے لئے بنا لائے !
(چپراسی چلا جاتا ہے۔ نیلما ریفریجریٹر سے ایک سیب نکالتی ہے اور سائڈ بورڈ سے پلیٹ لے کراس پر رکھ دیتی ہے۔ سائڈ بورڈ کے خانے سے بسکٹوں کا ڈبہ نکال کراس میں سے کچھ بسکٹ دوسری پلیٹ میں رکھتی ہے اور دونوں پلیٹیں کھانے کی میز پر سجاتی ہے۔ پھر ایک کرسی پر بیٹھ جاتی ہے۔
اسی وقت آگے آگے رام ادھار اور پیچھے پیچھے خانساماں چائے کی ٹرے لے آتا ہے۔ خالی ٹرے میز پر رکھتا ہے۔ چپراسی ادب سے ایک طرف کھڑا ہو جاتا ہے۔ خانساماں ایک پیالی میں چائے انڈیلتا ہے۔ )
نیلما : (غصے بھرے لہجے میں)یہ شکر دانی پوری کی پوری بھر لائے ہو۔ تم سے کہا نہیں رام ادھار نے کہ صرف میں چائے پیوں گی۔
خانساماں :وہ جی۔ ۔ ۔ جی وہ صاحب آنے والے تھے۔
نیلما :ہاں صاب آنے والے تھے، لیکن جب نہیں آئے اور صرف مجھے ہی چائے پینا تھی تو شکر واپس نہیں رکھی جا سکتی۔ ہزار بار تم سے کہا ہے کہ جتنے چمچے درکار ہوں، اتنے ہی گن کر شکر دانی میں ڈالا کرو۔ خانساماں کے ہاتھوں کی چابکدستی اڑانے میں ہی نہیں، بچانے میں بھی ہوتی ہے۔
(چائے کی پیالی اپنے سامنے کرتی ہے۔ خانساماں واپس کچن کی طرف چلا جاتا ہے۔ نیلما پلیٹ سے ایک بسکٹ اٹھا کر کترتی ہے اور چائے کی چسکی لیتی ہے۔ پھر چپراسی کی طرف مڑتی ہے۔ )
نیلما :تم نے پاروتی سے باتیں کیں رام ادھار؟
رام ادھار :کرے رہن میم صاحب!
نیلما :تو؟
رام ادھار :او بات ای ہے میم صاحیب کہ سیلا میم صاحیب اوکے چھوڑے کا تیار ناہیں ہیں۔
نیلما : (قہر و غضب سے)چھوڑنے کو تیار نہیں۔ کیا شہلا نے خرید لیا ہے اسے۔ جب وہ کام کرنا نہیں چاہے گی تو وہ اسے کیسے زبردستی رکھ لے گی۔
رام ادھار :بات ای ہے میم صاحیب کہ پاربتی کے اوہاں نوکری کرت بہت دن ہوئے گئن۔ ٹکو بابا او سے بہت ملے ہن۔ اوہو کے من ماں ممتا ہے۔ آپ جیسے سمجھائے رہن وئیسے ہم پاربتی کے سیلا میم صاحیب سے بات کرئے بدلے کہے رہے۔
نیلما : (بے خبری سے)پھر؟
رام ادھار :او او کے پندرہ روپیہ کی ترکی دے دہن۔
نیلما : (قدرے جھٹکا لگتا ہے) ایک ساتھ۔
رام ادھار :جی میم صاحیب!
نیلما :لیکن پاروتی نے مجھے کیوں نہ بتایا۔ میں دھیرا سے کہہ کر دو روپے زیادہ ہی دلا دیتی۔
رام ادھار :جی میم صاحیب! او دھیر میم صاحیب کے ایہاں ناہیں چائے چاہت۔
نیلما :کیوں ؟
رام ادھار :پتہ نہیں اوسے کے کہہ دہس کہ دھیرا میم صاحیب بہت کھٹ کھٹ کرت ہیں۔
نیلما : (چمک کر) آیا نے کہا ہو گا۔ وہ آیا ایک ہی بد ذات ہے۔ اسی کی جگہ تو وہ پاروتی کو رکھنا چاہتی ہیں۔
رام ادھار :بات ای ہے میم صاحیب، پاربتی عورت جات ہے، او کرے من ماں بھئے بیٹھ گاہے۔ سیلا میم صاحیب آپ کے سامنے تو رہت ہن۔ روج آپ سے ملت ہن۔ آپ ہی کا ہے ناہیں کہہ دیتن کہ اوکے چھوڑے دیں۔
نیلما :تم تو احمق ہو۔ میں شہلا سے کیسے کہہ سکتی ہوں۔
(چائے کی پیالی وہیں چھوڑ کر کمرے میں چکر لگاتی ہے۔ پھر چپراسی کے سامنے آ کر کھڑی ہو جاتی ہے۔ )
نیلما :دیکھو رام ادھار۔ ۔ ۔ ایک بات سمجھ لو۔ ۔ ۔ اگر تمہاری بیوی شہلا کے گھر کام کرنا نہیں چھوڑتی تو تم نہ صاحب کے دفتر میں کام کر سکتے ہو نہ ہمارے بنگلے میں رہ سکتے ہو۔
(رام ادھار چپ رہتا ہے۔ )
نیلما :تم فاقے کرتے تھے، جب میں نے تمہیں اپنے کالج میں چپراسی رکھوا دیا۔ یاد ہے ؟
(رام ادھار کوئی جواب نہیں دیتا۔ )
نیلما :جب تین سال بعد صاحب سے میری شادی ہو گئی اور ہم دلی سے جانے لگے تومیں نے تمہیں ساتھ چلنے کے لئے کہا تھا یاد ہے ؟
(رام ادھار صرف خاموش رہتا ہے۔ )
نیلما :لیکن تم پاربتی کے چکر میں پڑے تھے، نہیں گئے اور نہ ڈپٹی کلکٹروں اور کلکٹروں کے چپراسی مالکوں سے زیادہ مزے کرتے ہیں۔ لیکن میری بات تمہاری سمجھ میں نہیں آئی۔ تم یہاں رہ گئے، بیمار پڑ گئے۔ گاؤں چلے گئے۔ چھے مہینے وہاں پڑے رہے۔ پیچھے تمہاری نوکری چھوٹ گئی۔ واپس دلی آئے۔ پھر تمہاری کوئی پکی نوکری نہیں لگی۔ جب تین سال پہلے صاحب جوائنٹ سکریٹری ہو کر یہاں آئے اور تم ایک دن اچانک کناٹ پیلیس میں سامنے پڑ گئے تومیں تمہیں پہچان تک نہ سکی۔ اتنی بری حالت تھی تمہاری۔ تمہیں نے پہچانا یاد ہے ؟۔ ۔ ۔ ارے بولتا کیوں نہیں۔
(رام ادھار بدستور خاموش رہتا ہے۔ )
نیلما :لگتا تھا جیسے ہفتوں سے تمہارے منھ میں دانا نہیں گیا۔ میں نے صاحب سے کہہ کر تمہیں ان کے دفتر چپراسی بھرتی کرا دیا۔ کوئی پوسٹ نہیں تھی۔ پھر بھی عارضی طور پر تم چپراسی بنے چلے آ رہے ہو۔ وہاں نہال چند کے کتنی گندی غلیظ اندھیری اور رسیلی کوٹھری میں تم لوگ رہتے تھے۔ وہاں سے لا کر تمہیں بنگلے میں جگہ دی۔
رام ادھار : (عاجزی آمیز سختی سے)سبتے یاد ہے میم صاحیب۔ ہمؤ آپ کے سیوا ماں کوتوں کسر ناہیں اٹھاوت رہے۔ تنکھا دپتر سے پائت ہے، لیکن سبیرے چارے بجے سے دس بجے راتے تک آپے کا ڈیوٹی وئیت ہے۔ پاربتی سیلا میم صاحیب کے ایہاں پورے مہینہ کی تنکھا پاوت ہے۔ تبھؤ جب آپ کا کام پڑت ہے، دوڑی آوت ہے۔
نیلما :وہ سب ٹھیک ہے، لیکن میں کب سے کہہ رہی ہوں کہ پاروتی کو کسی اور جگہ نوکری کرنے کے لئے کہو۔ دھیرا کے یہاں نہ سہی، دوسرے دس گھروں میں اسے اتنے پر، بلکہ اس سے بھی کچھ زیادہ پر۔ ۔ ۔
رام ادھار : (پیترا بدل کر)ہم تو مناؤت رہت ہیں میم صاحیب کہ بھگوان آپے کا گودی بھرے اور پاربتی آپ کے بچوا کے کھلا وے۔ آپ دس دیئیں یا کچھو نہ دیتیں۔
نیلما :تم باتیں بہت کرنا سیکھ گئے ہو رام ادھار۔ دیکھو اگر پاروتی سامنے کے گھر میں کام چھوڑ دے گی، تو جیسے بھی ہو گا میں تمہاری نوکری پکی کرا دوں گی۔ نہیں چھوڑے گی تو تم لوگ مجھے جانتے ہو۔ ۔ ۔ (باہر کال بل بجتی ہے) دیکھو کون ہے ؟بنا مجھ سے پوچھے مت بول دینا کہ۔ ۔ ۔ (آ کر پھر ڈرائنگ ٹیبل پر بیٹھ جاتی ہے۔ ۔ ۔ زور سے آواز دیتی ہے۔ ) خانساماں !
خانساماں : (کچن سے) جی میم صاب!
نیلما :یہ پیالی ٹھنڈی ہو گئی۔ ایک پیالی اور بناؤ۔
(پیالی کی چائے واش بیسن میں گراتا ہے۔ تھوڑا سا چائے کا پانی ڈال کر کر پیالی گرم کرتا ہے، پھر تازہ چائے ڈالتا ہے۔ رام ادھار باہر کے دروازے سے داخل ہوتا ہے۔ )
رام ادھار :میم صاحب!گنجو میم صاحیب اور بیگم حنیف ہئین۔
نیلما :انھیں ادھر بھیج دو اور تم جاؤ اور پاروتی کو سمجھاؤ۔ (خانساماں سے) چائے کا پانی اور چڑھا دینا۔
(خانساماں چلا جاتا ہے۔ نیلما جلدی جلدی ہاتھ کا بسکٹ ایک ساتھ کھا کر چائے پیتی ہے۔ رام ادھار کے پیچھے پیچھے مسز گنجو اور مسز حنیف آتی ہیں۔ )
نیلما :یہ ساڑھے پانچ بجے شام آئی ہو۔ پورا آدھا گھنٹہ انتظار کر کے اکیلی چائے پینے لگی تھی۔ (رام ادھار کو واپس جاتے دیکھ کر) رام ادھار میری بات یاد رکھنا۔ (مہمانوں سے) آؤ۔ آؤ۔ ادھر ہی آ جاؤ (پلیٹ آگے کر کے) لو، اتنے میں ایک ایک بسکٹ لو۔
(اٹھ کر ریفریجریٹر سے دو سیب اور نکال کر، ایک پلیٹ میں کچھ دال موٹھ دوسری میں نمک پارے اور تیسری میں ریفریجریٹر سے رس گلے نکال کر پلیٹیں اپنی سہیلیوں کے آگے رکھتی ہے۔ )
مسز گنجو :ہم تو عین وقت پر پہنچ جاتے کہ تم سے وعدہ کیا تھا، لیکن سوچا راستے میں ذرا پاراشرز کے یہاں ہوتے چلیں۔
نیلما :میں خود سوچ رہی تھی کہ سی بی آ جائیں تومیں بھی مسز پاراشر کے یہاں ہو آؤں (سرگوشی میں) کچھ اندازہ کیا، ہوا کا رخ کدھر ہے ؟
مسز گنجو :ہم تو دو تین دن سے گھوم رہے ہیں۔ جو سب کا حال ہے وہی مسز پاراشر کا ہے۔
نیلما :کیا مطلب؟
مسز گنجو :مطلب یہی کہ کچھ پتہ نہیں چلتا۔ کہتی سب یہی ہیں کہ آپ جو کہیں گی، ویسے ہی کریں گی، لیکن کسی کی بات چیت اور اشارے کنائے سے ان کے من کا اندازہ نہیں ہوتا۔ چناؤ کے سلسلے میں لوگ بہت چالاک ہو گئے ہیں۔
مسز حنیف :کسی نے جواب میں بھی خیال نہیں کیا تھا کہ ۷۷ میں اندرا ہار جائیں گی اور اس بری طرح ہار جائیں گی۔ رشیدہ کانگریس میں ہے۔ ان دنوں کنویسنگ کرتی تھی۔ اسی سے معلوم ہوا کہ کنویسر جب پہنچتے تو تو لوگ دانت نکال کر سر ہلا دیتے کہ جیسا آپ کہتی ہیں ویسا ہی ہو گا۔ کہ ہم بھی یہی سوچتے ہیں۔ نتیجہ کیا نکلا، یکدم نیچے کا اوپر ہو گیا۔
مسز گنجو :اب بھئی بات یہ ہے کہ وہ لوگ بھی چپ نہیں بیٹھے ہیں۔ سنہا اور شیلا۔
نیلما :شہلا کہو شہلا۔ سنہا کو یہی نام پسند ہے اور تو اور اب شیلا بھی اپنے آپ کو شہلا کہنے لگی ہے۔
مسز حنیف :شہلا یا شیلا؟ لکھتی تو وہ ایس۔ ایچ۔ ای۔ آئی۔ ایل۔ اے ہے۔
نیلما :کوئی شہلا کہتا ہے، کوئی شیلا، کوئی شیلا مگر ہمارے پڑوسی کی بیوی تو اسے ہمیشہ سیلا کہتی ہے۔
(تینوں تکلف سے تھوڑا ہنستی ہیں۔ )
مسز گنجو :میں تو اسے شیلا ہی پکارتی ہوں اور میرے سامنے تو اس نے کبھی یوں بننے کی کوشش نہیں کی۔ بہرحال میں کہہ یہ رہی تھی کہ وہ دونوں پھرکی طرح گھوم رہے ہیں۔
مسز حنیف :اب میاں بیوی کے پاس اپنی اپنی کار ہے تو۔ ۔ ۔ ہماری طرح تو نہیں کہ میاں دفتر سے آئیں تو کار میں جانا نصیب ہو۔
مسز گنجو :سنہا صاحب کی اتنی بڑی فرم ہے۔ چار ہزار ان کی تنخواہ مکان اور کار اور دو نوکر کمپنی کی طرف سے۔ پھر واہی تباہی منافع۔ شیلا کا دل بھی دریا ہے۔ اتنے تحفے تحائف بانٹتی رہتی ہے کہ پچھلے دس برس سے کلب کی ممبر بنی چلی آ رہی ہے۔
نیلما : (مسکراتے ہوئے۔ ذرا طنز سے) اپنا روپیہ کون اڑاتا ہے۔ ہزاروں روپیہ چندے میں اکٹھا ہوتا ہے۔ ہزاروں کی سرکار سے مدد ملتی ہے۔ سماج سیوا بھی ہو جاتی ہے اور بزنس بھی بڑھتا ہے۔ ایسے ہی تو پھرکی کی طرح ان کی کاریں نہیں گھوم رہی ہیں۔
مسز حنیف : (سرگوشی سے) آپ تومسز کھیڑا سال بھر سے کلب کی سکریٹری ہیں۔ دیکھا کچھ ادھر ادھر کرتے شہلا کو؟
نیلما : (ہاتھ چمکا کر) میرے رہتے کچھ ایسا ویسا ہو سکتا ہے کیا؟اسی لئے تو میں شہلا کو ایک آنکھ نہیں بھاتی(جھلا کر اٹھتی ہے) اس خانساماں کمبخت کو کیا ہو گیا ہے۔ ابھی تک چائے نہیں لایا۔
مسز گنجو :ارے نیلو! تم بیکار تکلف کرتی ہو۔ چائے توہم پاراشرز کے۔ ۔ ۔
نیلما :چائے پر جب میں نے بلایا تھا تو وہاں کیسے پی آئیں۔ رکو میں منٹ بھر میں آئی۔
(خانساماں !خانساماں !پکارتی ہوئی کچن کی طرف نکل جاتی ہے۔ )
مسز گنجو : (آنکھوں کی بھویں اوپر اٹھا کر، دھیرے سے) مسز پاراشر کیا کہتی تھیں۔ ۔ ۔
مسز حنیف :یہی کہ کب کا روپیہ خرد برد کرنا چاہتی ہے۔ شہلا نے ساتھ نہیں دیاتو اس کے پیچھے پڑ گئی ہاتھ دھوکر۔ اب اس کا مالک اتنا کماتا ہے۔ بڑے باپ کی بیٹی ہے، اسے کیا ضرورت ہے کلب کا روپیہ ہڑپنے کی۔
مسز گنجو : (سرگوشی سے) دیکھو بانو!تم اپنی طرف سے کچھ نہ کہنا۔ بس ۷۷ کے و وٹروں کی طرح سر ہلا دینا۔ (ہنستی ہے) میں تو اس کے ساتھ پڑھتی تھی۔ یہ سخت کینہ پرور عورت ہے۔ کھیڑا یوں بھی خاصے بدنام آدمی ہیں۔ دلی آنے سے پہلے جہاں تھے وہاں ان پر رشوت کے بڑے الزامات تھے۔ انکوائری تک بیٹھ گئی تھی۔ سرکار نے بال اور پر نوچ کر سنٹر میں بٹھا دیا۔
مسز حنیف :ہاں بھائی اپنی عزت اپنے ہاتھ!بغیر کچھ کئے ہاتھ چلتے یں۔ کرنے پر تو۔ ۔ ۔
مسز گنجو :ارے ہم کچھ کیوں کریں گے۔ باڑھ کے دکھیاروں کے لئے دن رات ایک کر کے روپیہ اکٹھا کیا ہے۔ ہمارے لئے تو کانی کوڑی بھی حرام ہے۔
(آگے آگے نیلما پیچھے پیچھے چائے کی ٹرے لئے خانساماں داخل ہوتا ہے۔ نیلما پیالوں میں چائے ڈالتی ہے۔)
نیلما :چینی گنجو؟
مسز گنجو :میرے پیالے میں چینی نہیں۔
نیلما :سیکرین کی گولی ڈال دوں۔ کھیڑا صاحب کے بلڈ میں ڈاکٹر نے کچھ شک ظاہر کیا تھا سو۔ ۔ ۔
مسز گنجو :نہیں نہیں، اس کا ذائقہ مجھے اچھا نہیں لگتا۔ اب تو بغیر چینی کے پینے کی عادت ہو گئی ہے۔
نیلما : اور آپ بانو؟
مسز حنیف :بس ڈیڑھ چمچ۔
نیلما :تم تو گنجو میٹھا لو گی نہیں۔ یہ نمک پارے اور دال موٹھ لو(دونوں پلیٹ مسز گنجو کے آگے کرتی ہے)تمہارے لئے میں بانو سیب چھیلتی ہوں۔ اتنے میں تم بسکٹ یا رس گلے لو۔
مسز گنجو :ارے تم فکر نہ کرو۔ ہم لے لیں گے۔
(فون کی گھنٹی بجتی ہے۔ )
نیلما : (زور سے چلا کر) خانساماں ذرا فون دیکھو۔
(خانساماں بھاگا بھاگا آتا ہے اور فون اٹھاتا ہے۔ )
خانساماں :ہیلو!جی کھیڑا صاحب کے بنگلے سے بول رہے ہیں۔ ۔ ۔ نہیں صاحب گھر پر نہیں ہیں۔ ۔ ۔ کون صاحب بول رہے ہیں۔ ۔ ۔ ذرا رکئے بتاتے ہیں۔ (ریسیور پر ہاتھ رکھ کر) میم صاحب کوئی آر بی کھیڑا ہیں۔ آپ کو پوچھ رہے ہیں۔
نیلما :کہو وہ نہیں ہیں۔
خانساماں :میم صاحب یہیں تھیں۔ پڑوس کے بنگلے میں چلی گئی ہیں۔ آپ نمبر دے دیجئے۔
(خانساماں فون رکھ دیتا ہے۔ )
نیلما :فون نمبر وہاں پیڈ پر نوٹ کر دو۔
خانساماں :انھوں نے کہا وہ پھر فون کریں گے۔
(واپس چلا جاتا ہے۔ )
نیلما : (سیب چھیل کر پلیٹ مسز حنیف کے سامنے رکھتے ہوئے) دیکھو گنجو! تم سے کوئی پردہ نہیں۔ تم میری کلاس فیلو رہی ہو۔ پھر گنجو صاحب اور کھیڑا صاحب اکٹھے کام کرتے ہیں۔ تم پر میرا حق ہوتا ہے۔
مسز گنجو :کیوں نہیں۔ ۔ ۔ کیوں نہیں۔ !
نیلما :میں یہ جانتی ہو ں کہ شہلا سے آپ لوگوں کی اچھی راہ و رسم ہے۔ لیکن میں یہی کہنا چاہتا ہوں کہ میں بھی آپ سے دور نہیں۔ یوں دوستی کی شرط میں یہ مانتی ہوں کہ دوست آپ کے لئے کچھ کرے۔ اتنے برسوں سے شہلا صدر بنی ہوئی چلی آ رہی ہے، اس نے تمہیں گنجو ایگزیکٹیو میں تو نہیں لیا۔ ۔ ۔
مسز گنجو :میں نے کبھی چاہا بھی نہیں۔
نیلما :تمہارے نہ چاہنے سے کیا ہوتا ہے۔ میں صدر ہو جاؤں تو دیکھوں تم کیسے میری ایگزیکٹیو میں نہیں آتیں بلکہ میں تو تمہارا نام سکریٹری کے طور پر پروپوز کرنے کی سوچتی ہوں۔ کیوں گنجو کیا ایسا نہیں ہو سکتا کہ تم صدارت کے لئے میرے نام کی۔ ۔ ۔
مسز گنجو :بھائی دیکھو تم مجھ سے اپنا نام پروپوز وروپوز، مت کراؤ باقی ہم تمہارے ساتھ ہیں۔
نیلما :آپ بانو!(فون کی گھنٹی بجتی ہے۔ زور سے آواز دیتی ہے)خانساماں !
(خانساماں بھاگا بھاگا آتا ہے۔ فون اٹھاتا ہے۔ )
خانساماں :ہیلو۔ ۔ ۔ جی ہاں۔ ۔ ۔ میں خانساماں بول رہا ہوں۔ ۔ ۔ ابھی دیکھ کر بناتا ہوں۔ کچھ مہمان آئے ہوئے ہیں۔ ۔ ۔ (ریسیور پر ہاتھ رکھ کر) کانتا میم صاب کا فون ہے۔
نیلما :کہدو میم صاحب ابھی پانچ منٹ میں آپ کو فون کریں گی۔
خانساماں :میم صاب، ابھی پانچ منٹ میں آپ کو فون کرتی ہیں۔
(خانساماں ریسیور رکھ دیتا ہے۔ )
مسز گنجو :اچھا تو نیلو ہم چلتے ہیں۔
نیلما :ارے بیٹھو پانچ منٹ۔ ہاں تو بانو صاحبہ۔ ۔ ۔ میں کچھ امید کروں۔
مسز حنیف :ہم تو خادم ہیں۔
نیلما :کلب کی ایگزیکٹیو میں مائنورٹی کمیونٹی کی نمائندگی بہت کم ہے۔ میں صدر بنی تو آپ کو میرے ساتھ ایگزیکٹیو میں کام کرنا ہو گا۔
مسز گنجو :تم بانو کی طرف سے بے فکر رہو۔ یہ دوستوں کی دوست ہیں۔ (اٹھتی ہے۔ مسز حنیف بھی اٹھتی ہیں) اچھا تو نیلو، اب اجازت دو۔
مسزحنیف :یہ کوٹ تو آپ نے مسز کھیڑا بہت شاندار بنوایا ہے۔ کیا ولایتی کپڑا ہے ؟
نیلما :نہیں۔ او سی ایم کا ہے۔ انھوں نے ولایت والوں کی طرز پر لیڈیز کوٹنگ کا یہ ڈیزائن نکالا ہے۔ کھنہ کہتا تھا کہ طرح طرح کی شالیں چل جانے سے کوٹوں کا رواج کم ہو رہا ہے۔ اس لئے انھوں نے ایک ہی تھان منگایا تھا۔ گرمیوں میں پہاڑ پر جاتے ہیں۔ کوٹ کے بغیر کام تھوڑی چلتا ہے۔
مسز حنیف : (چلتے چلتے) کتنے میں بن گیا ہو گا؟
نیلما :یوں تو ڈھائی پونے تین سو میں بن جانا چاہئے۔ لیکن اس کی لائننگ ذرا قیمتی ہے۔ این ایس احمد آباد کی۔ کھنہ کہتا تھا کہ درزی تو اتنی مہنگی لائننگ لگاتے نہیں اور لائننگ کو خرید کر درزی کو دینے کی زحمت کوئی مول لیتا نہیں۔ سو دو تھان انھوں نے اپنے ہی لئے منگائے تھے۔ میرے زور دینے پر کھنہ نے کوٹ کو لائننگ دے دی۔ پچاس زیادہ لگ گئے۔ (کوٹ کے بٹن کھول کر اندر کی لائننگ دکھاتی ہے۔ ) دیکھو نا کتنی شاندار ہے، کتنی ملائم اور پھر رنگ اور ڈیزائن کیسا خوبصورت ہے۔
مسزحنیف : (کوٹ کے کپڑے اور لائننگ پر ہاتھ پھیرتے ہوئے) جی چاہتا ہے کہ مل جائے تو ایک کوٹ ایسا ہی میں بھی بنوا لوں۔ (اٹھتی ہے۔ نیلما بھی اٹھتی ہے) نہیں نہیں اب آپ بیٹھئے۔
نیلما :ذرا خیال رکھئے گا اور اپنی سہیلیوں سے بھی کہئے گا۔ تم بھی گنجو۔
مسز گنجو :ضرور ضرور!(چلتی ہیں۔ نیلما دروازے تک چھوڑنے جاتی ہے۔ نیلما کو وہیں۔ روک کر) اب تم بیٹھو۔ بائی۔ ۔ ۔ بائی۔ ۔ ۔
(نیلما ہاتھ اٹھا کر بائی کہتی ہے۔ دونوں سہیلیاں چلی جاتی ہیں۔ نیلما دروازہ بند کر کے پلٹتی ہے۔ فون کی گھنٹی پھر بجتی ہے۔ )
خانساماں : (اندر سے آ کر فون اٹھاتا ہے) جی میں خانساماں بول رہا ہوں۔ ۔ ۔ جی ذرا رکئے (ریسیور کے آگے ہاتھ رکھ کر) کانتا میم صاحب کا فون ہے۔
نیلما :بولو، آتی ہیں۔
خانساماں :جی آ رہی ہیں۔
(ریسیور تپائی پر رکھ دیتا ہے۔ کچھ لمحے بعد نیلما ریسیور اٹھاتی ہے۔ خانساماں کچن میں چلا جاتا ہے۔ )
نیلما :میں تمہیں فون کرنے ہی والی تھی کانتا۔ ۔ ۔ ارے نہیں سچ!گنجو اور بانو آ گئی تھیں۔ ۔ ۔ اب کیا بتا سکتی ہوں۔ انھیں کہہ دیا ہے اور انھوں نے وعدہ بھی کر لیا ہے لیکن میں ان پر بینک نہیں کر سکتی۔ بینک تومیں تم پر، دھیرا پر اور دوسری دوستوں پر کرتی ہوں۔ ۔ ۔ ہاں میرے ساتھ پڑھی ہے گنجو۔ ۔ ۔ لیکن شہلا سے بھی اس کا بہت میل جول ہے۔ اب بھئی شہلا اتنی پڑھی لکھی نہیں۔ ۔ ۔ ہاں۔ ۔ ۔ ہاں۔ ۔ ۔ بی اے ہے۔ لیکن بی اے تو آج کل چپراسی بھی ہوتے ہیں۔ یہ ڈی فل اور ڈی لٹ قسم کی چیزیں شہلا کے لئے بہت بڑی توپ ہیں۔ یہ اس کے ہاں جاتی ہیں تو ان کی بڑی خاطر تواضع کرتی ہے۔ خودی عزت اور آبرو کا خیال اور سوفسکیشن تو شہلا میں ہے نہیں۔ ان کے آگے بچھ بچھ جاتی ہے۔ ان کی انا کو بھی تسکین ملتی ہے۔ میرے تو برابر کی ہے گنجو میں تو وہ سب نہیں کر سکتی۔ ۔ ۔ ہاں ہاں وہ توہے۔ ۔ ۔ وہ توہے۔ ۔ ۔ وہ کہہ تو گئی ہے کہ ہم آپ کے ساتھ ہیں۔ ۔ ۔ نہیں، پروپوز، وہ نہیں کرے گی۔ ۔ ۔ (باہر کے دروازے پر کال بل بجتی ہے) ایک منٹ رکو کانتا باہر کوئی آیا ہے۔ (فون کے آگے ہاتھ رکھ کر خانساماں سے جو کچن سے آ گیا ہے) دیکھو خانساماں کون ہے ؟(خانساماں دروازے کی طرف جاتا ہے) اور سنو کوئی صاحب کو پوچھ رہا ہو تو نام پتہ لے لینا اور چلتا کر دینا۔ کوئی مجھ سے ملنے والا ہو تو ادھر برآمدے میں بٹھانا۔ ۔ ۔ اور دیکھو مجھے بات کرتے ہوئے ڈسٹرب مت کرنا۔ ۔ ۔
خانساماں : (تسلیم کرتے ہوئے سر ہلا کر) جی میم صاب۔
(چلا جاتا ہے۔ )
نیلما : (ریسیور سے ہاتھ ہٹا کر) تومیں کہہ رہی تھی کہ ’’پروپوز‘‘ تو میرا نام تم کو یا دھیرا کو کرنا پڑے گا۔ اب تم دونوں مل کر طے کر لو۔ (قدرے دھیمی آواز میں)دیکھو کانتا۔ ہم کو گٹ تو بنانا ہی پڑے گا۔ جب ملک کی سیاسی پارٹیوں کا، ملک کی سرکار کا کام گٹوں کے بغیر نہیں چلتا تو ہمارا ہی کیسے چلے گا۔ ہم ایک دوسرے کو سپورٹ کریں گے، جبھی کچھ کر سکیں گے۔ میں چاہتی ہوں کہ تم خزانچی بنو۔ ۔ ۔ ارے نہیں کیا۔ ۔ ۔ بینک کے منیجر کی بیوی ہو اور خزانچی بننے سے گھبراتی ہو۔ ہم سارا اکاؤنٹ تمہارے مہروترا صاحب کے بنک میں ٹرانسفر کر دیں گے۔ مانو نہ مانو۔ بناگٹ بنائے۔ بنا ایک جٹ ہوئے کام چلے گا نہیں۔ ۔ ۔ سی بی بتاتے تھے کہ سماجی فلاح و بہبود کے شعبے میں بہت سی ایسی ا سکیمیں ہیں جن سے غریبوں کو راحت پہنچانے کے لئے سرکار روپیہ دیتی ہے۔ ۔ ۔ اب یہ تو صدر اور خزانچی کوہی معلوم ہونا چاہئے کہ کہاں کتنا خرچ ہوا۔ (طنز سے) کون کتنا رکھتا ہے یہ۔ ۔ ۔ (فوراً لہجہ بدل کر) نہیں نہیں میں یہ نہیں کہتی کہ شہلا ایسا کرتی ہے۔ ۔ ۔ لیکن بغیر کسی فائدہ کے وہ یوں ہی تو اس عہدے سے نہیں چمٹی ہوئی۔ ۔ ۔ ہاں۔ ۔ ۔ ہاں۔ ۔ ۔ ہزار دو ہزار اپنے پاس سے بھی خرچ کر دیتی ہو گی۔ ۔ ۔ لیکن یہ تو دیکھو کہ جن غریبوں میں وہ روپیہ بانٹتی ہے ان کے ووٹ کنٹرول کرتی ہے۔ ۔ ۔ اور سیاست میں اس کی بڑی اہمیت ہے۔ ۔ ۔ ہاں ہاں میں نے بھی سنا ہے کہ سنہا صاحب کارپوریشن کے چناؤ میں کھڑے ہونا چاہتے ہیں۔ ۔ ۔ تو بس تم خود ہی سوچ لو۔ ۔ ۔ ہاں ہاں اثر و رسوخ کی بات بھی ہے ہی۔
(خانساماں چپ چاپ کھڑا ہو جاتا ہے کہ نیلما اپنی بات ختم کرے تو وہ اپنی کہے۔ )
نیلما :تومیں تم پر بینک کروں۔ یقین رکھو اگر میں صدر ہوتی ہوں، دھیرا سکریٹری، تم خزانچی اور ایگزیکٹیو میں ہماری اکثریت ہوتی ہے تو مہروترا صاحب کا بھی اس میں یقیناً بہت فائدہ ہو گا۔ ٹھیک ہے تم سوچ لینا میں کل شام چھ بجے تمہاری طرف آؤں گی(ہنستی ہے) سعیدہ بانو! ارے وہ تو مسز گنجو کی ضمیمہ ہے۔ گنجو جو کرے گی وہی بانو کرے گی۔ ۔ ۔ میرے کوٹ کی بڑی تعریف کر رہی تھی اور خود بھی بنوانا چاہتی ہے۔ ۔ ۔ ہاں ہاں۔ ۔ ۔ تم نے بھی کی تھی۔ ۔ ۔ دیکھوں گی اگر کپڑا مل گیا تو تمہارے لئے ایک کوٹ کا ضرور لاؤں گی۔ ۔ ۔ اچھا بائی۔ ۔ ۔ کوئی باہر ملنے کے لئے آیا ہوا ہے۔ او۔ کے۔
(ریسیور رکھ دیتی ہے۔ )
نیلما :کو ن ہے ؟
خانساماں :سلوجا میم صاب ہیں۔
نیلما :سرلا!۔ ۔ ۔ ارے تولے آتے۔
خانساماں :آپ ہی نے کہا تھا کہ آپ سے کوئی ملنے آئے تو۔ ۔ ۔
نیلما اسے ادھر بٹھانے کو تھوڑی کہا تھا۔ مگر ٹھیک ہے ادھر کے برآمدے میں سبھی آ جاتے ہیں اور میں نہیں چاہتی کہ سلوجا کو شہلا کی کوئی دوست یا پڑوسن یہاں دیکھے۔ کوئی آئے تو باہر بٹھانا۔ یہ مت کہنا کہ ادھر بیٹھی ہوں۔ کہنا کہ دیکھ کر بتاتا ہوں۔ پڑوس میں نہ نکل گئی ہوں۔
خانساماں :جی بہتر میم صاب۔
(نیلما باہر جاتی ہے۔ خانساماں دروازے کی چٹخنی چڑھا کر کھانے کی میز صاف کرتا ہے۔ پھلوں اور رس گلوں کی پلیٹیں ریفریجریٹر میں اور نمکین وغیرہ کی طشتریاں سائڈ بورڈ پر ٹکا کر چائے کی پیالی اور ٹی پاٹ وغیرہ ٹرے میں رکھ کچن کو لے جاتا ہے۔ کچھ لمحوں کے بعد کال بل بجتی ہے۔ خانساماں باورچی خانے سے بھاگا آتا ہے اور دروازہ کھولتا ہے۔ جناب چندر بدن کھیڑا جو دوست احباب اور قریبی رشتے داروں اور عزیزوں میں سی بی کے نام مشہور ہیں داخل ہوتے ہیں۔ )
سی بی : (بیوی کو آواز دیتے ہوئے) محترمہ نیلما جی!
خانساماں :میم صاب سلوجا میم صاب کے ساتھ ادھر کے برآمدے میں بیٹھی ہیں۔ بلا لاؤں صاب؟
سی بی :انہیں بیٹھنے دو۔ تم پانی کا ایک گلاس لے آؤ(پیچھے کی طرف مڑ کر) آؤ موہن آؤ۔
(موہن ایک خوش پوش نوجوان۔ سی بی صاحب کے پیچھے داخل ہوتا ہے۔ ٹھیکے دا رہے۔ قومی فلاح و بہبود کے ڈپارٹمنٹ سے ٹھیکے لیتا ہے۔ تاہم سی بی صاحب سے عمر میں دس سال چھوٹا ہے۔ لیکن ان سے خاصا بے تکلف ہے۔ )
سی بی : (موہن سے)محترمہ نیلما جی تو ادھر برآمدے میں اپنی اس چڑیا کی بیگم جیسی سہیلی کے ساتھ بیٹھی ہیں۔ تم آرام سے بیٹھو موہن۔ میں بہت تھک گیا ہوں، ذرا لیٹوں گا۔
موہن : (جو کوچ پر بیٹھ گیا تھا مگر سی بی صاحب کی بات سن کر ذرا سا اٹھتا ہے اور دونوں ہاتھ بڑھا کر کہتا ہے) ہاں ہاں آپ آرام کیجئے۔
(سی بی صاحب لمبے کوچ پر لیٹ جاتے ہیں اور لیٹنے سے پہلے تپائی سے ویکلی اٹھا کر موہن کی طرف پھینکتے ہیں۔ )
سی بی :تم ذرا ویکلی دیکھو۔ خشونت سنگھ کاتو پتا کٹ گیا۔ تازہ سنڈے میں اس کے بیٹے راہل کا بیان چھپا ہے کہ مالکوں نے کیسے ان سیریمونئیلی اس کو چلتا کر دیا اور یہ لوگ کہتے ہیں کہ ایمرجنسی میں جو آواز بند ہو گئی تھی، اسے آزاد کر دیا گیا ہے اور سنسر شپ ہٹا دی گئی ہے۔
(بغل سے گڈی اٹھا کرسر کے نیچے رکھتے ہیں اور سر کو ذرا سا ٹھیک کر کے آرام سے لمبے کوچ پر دراز ہو جاتے ہیں اور اخبار پڑھنے لگتے ہیں۔ )
موہن :تب تو ایک ورگھیز کو لے کر ہائے توبہ مچی تھی۔ اب تو تین تین ایڈیٹروں کو ہٹا دیا گیا ہے۔ مزے کی بات تو یہ ہے کہ ہندی روزنامے کے جس ایڈیٹر کو عمر کی بنا پر ریٹائر کیا گیا ہے، ایڈیٹر اس سے کئی سال بڑا ہے۔
(سی بی فرمائشی قہقہہ لگاتے ہیں۔ موہن ویکلی کے صفحے پلٹتا ہے۔ خانساماں پانی کا گلاس لے کر آتا ہے تپائی رکھ جاتا ہے۔ اسی وقت نیلما کے تیز تیز چلنے اور چلانے کی آواز آتی ہے۔ دوسرے لمحے دروازہ پٹاخ سے کھلتا ہے۔ پاروتی کا بازو پکڑے چلاتی ہوئی آگے آگے نیلما، پیچھے رام ادھار اور سرلا داخل ہوتے ہیں۔ نیلما پاروتی کو گھسیٹتی ہوئی کمرے کے عین وسط میں آ جاتی ہے۔ ۔ ۔ پاروتی خوبصورت ہے، جس نے بالکل نیلما جیسا کوٹ پہن رکھا ہے۔ پانوں میں اس کے آلتا ہے۔ چاندی کی پازیب اور صاف ستھری سوتی ساڑی پہنے ہے۔ لیکن اس کے باوجود اس کا سارا وجود اس کے نوکرانی ہونے کی چغلی کھاتا ہے۔ رام ادھار وہاں دروازے کے پاس رک جاتا ہے۔ سرلا بڑھ کر دوسرے سنگل کوچ پر بیٹھ جاتی ہے۔ )
نیلما :تیری جرأت ہوئی کیسے، میرے بنگلے میں رہ کر میرا مقابلہ کرنے کی!
(نوکرانی کا بازو چھوڑ کر کمرے کا چکر لگاتی ہے۔ معاً اس کی نگاہ کوچ پر لیٹے اپنے شوہر پر جاتی ہے جو اچھل کر اٹھ بیٹھتا ہے۔ )
نیلما :اچھا ہوا سی بی تم آ گئے۔ تم ہمیشہ اس پاروتی کی طرف داری کرتے ہو اور مجھ پر الزام لگاتے ہو۔ دیکھو ذرا اس بدتمیز عورت کی حرکت۔
(پھر پاگلوں کی طرح کمرے میں چکر لگاتی ہے۔ )
سی بی :ہوا کیا محترمہ؟
نیلما : (بالکل شوہر کے پاس جا کر جیسے اس کے سر پر سوار ہو کر گرجتے ہوئے) ہوا میرا سر۔ کبھی توسیریس رہ کر بات کیا کرو۔ تمہیں ہر وقت مذاقی سوجھتا ہے۔
سی بی : ( اور بھی گھبراتے ہوئے) کچھ بتاؤ بھی!
موہن :کیا ہوا بھابی؟
نیلما : (ذرا سا مڑ کر دونوں کو سناتے ہوئے) میں کانتا سے بات کر رہی تھی کہ سرلا نے کال بیل بجائی۔ مجھے ڈسٹرب نہ کرنے کے خیال سے خانساماں اسے ادھر کے برآمدے میں لے گیا۔
سی بی : (سرلا کی طرف دیکھتے ہوئے) عجب احمق ہے۔
نیلما : (جیسے سرلا کو صفائی دیتے ہوئے) میں نے ہی کہا تھا کہ وہ مسز پلے آئے تو ادھر کے برآمدے میں بٹھانا۔ یہ سرلا کو ہی ادھر بٹھا آیا۔ فون رکھنے پر جب مجھے پتہ چلا تو میں بھاگی گئی۔ ابھی ٹھیک سے بیٹھی بھی نہ تھی کہ پاروتی سجی بجی رام ادھار کے ساتھ کوٹھری سے نکلی اور میرے سامنے سے ہو کر گیٹ کی طرف۔ ۔ ۔
رام ادھار :باہر جائے کے دوسر کونو رستہ ناہنا میم صاحب۔
نیلما :سوال دوسرے راستے کا نہیں۔ سوال یہ ہے کہ اس نے یہ کوٹ سلایا کیسے ؟
(پھر کمرے میں گھومنے لگتی ہے۔ )
رام ادھار : (صفائی دیتے ہوئے) میم صاحیب!پاربتی ناہیں۔ ۔ ۔
سی بی :کون سا کوٹ؟
نیلما : (پلٹ کر) تم نے کیا آنکھیں بند کر رکھی ہیں سی بی۔ (پاروتی کے پاس جا کراس کے کوٹ کا دامن کھینچ کر شوہر کو دکھاتے ہوئے) یہ۔ ۔ ۔ یہ۔ ۔ ۔ یہ!دیکھتے نہیں، عین مین میرا والا کپڑا ہے۔ اسے یہ سلانے کی ہمت کیسے ہوئی؟
سی بی :تم نے پیسے دیئے تھے ؟
نیلما : (بے طرح چڑ کر) تمہیں کیا ہو گیا ہے سی بی اس نے اپنے پیسے خرچ کئے ہوں تو بھی کیا اسی کپڑے کا کوٹ اسے سلانا چاہئے، جواس کی مالکن پہنتی ہے۔ ۔ ۔ کیوں سرلا۔ ۔ ۔ موہن؟
سرلا : (جیسے شاستروں میں لکھی ہوئی کوئی صداقت بیان کر رہی ہو) نوکروں کو اپنی اوقات میں رہنا چاہئے۔۔ ۔
نیلما : اور کیا!
موہن :لیکن بھابی۔ ۔ ۔
رام ادھار : (صفائی دیتے ہوئے) میم صاحب پاربتی۔ ۔ ۔
نیلما : (جا کر جیسے ان کو اپنے وجود سے چھاتے ہوئے)میم صاب پاروتی۔ ۔ ۔ میم صاب پاروتی۔ ۔ ۔ میم صاب پاروتی۔ ۔ ۔ کیا!۔ ۔ ۔ تیری یہ اوقات ہے کہ تو اپنی بیوی کو اپنی مالکن جیسا کوٹ پہنچائے۔ اسی کے بنگلے میں رہ کر!۔ ۔ ۔ دن تو سارا اس کا برتن مانجھنے، بچہ کھلاتے، کپڑے دھوتے گزرتا ہے، اور چلی ہے مقابلہ کرنے اپنی مالکن کا۔ (منھ بچکا کر) بانڈی بستیاں شہیتروں سے گل بہیاں۔
سی بی :محترمہ نیلما جی۔ ۔ ۔
موہن : (سمجھانے اور پھسلانے کے انداز میں) بھابی!۔ ۔ ۔
(لیکن نیلما نہیں سنتی، غصے میں کمرے کا چکر لگاتی ہے۔ )
رام ادھار :میم صاحب!اسی خودے ناہی سیائس۔ ۔ ۔
نیلما : (بیچ ہی سے مڑ کر) اس نے نہیں سلایا تو کیا آسمان سے ٹپک پڑا؟
رام ادھار :سیلا میم صاحب سیائے دہن۔
نیلما :کیا کہتے ہو۔ او سی ایم کا کپڑا اور این ایس احمد آباد کی لائننگ۔ ۔ ۔ دو سو روپئے تو کپڑے پر لگ جاتے ہں اور شہلا نے اسے سلا دیا۔
رام ادھار :آپ کھانساماں کو بھیج کے پچھوایٔ لیؤ۔ پچھلا مہینہ جب آپ نوا کوٹ بنوائے رہن۔ ہم کہے رہے کہ ہجواری پران والا پاربتی کے دے دیؤ۔ تب آپ منع کر دہن کہ تینو برس ناہیں بھوا اے کے سیائے۔
پاروتی :ہم سیلا میم صاحیب سے کہا کہ سردی آئے گئی با۔ کونو پران دھران کوٹ دے دیؤ۔ تب سیلا میم صاحیب کہن پران دھران کا، تے پہن تو نوا سلائے دیئی۔ ہم ناہیں چاہت تے پران دھران کوٹ پہن کے ٹکو بابا کے کھلاوت پھرے۔ اور بچہ کے جنم دن پر۔ ۔ ۔
نیلما : (گرج کر) اس نے تین سو کا کوٹ سلا دیا۔
رام ادھار :آپ کھانساماں کا بھیج کے پچھوائی لیؤ۔
نیلما :لیکن جب انھوں نے کپڑا پسند کیا تھا تو تم سے کہا نہیں گیا کہ اس کپڑے کا کوٹ میم صاحب پہنتی ہیں۔ آپ کوئی دوسرا لے دیجئے۔
پاروتی :اون کپڑے دکھائے ناہیں میم صاحب۔ درجی کے بلائی کے ناپ لے لیہن۔ اور کوٹ بن کے آئی تو پہرائی دہن۔
نیلما :تو جاؤ، اسے ابھی جا کر شہلا کو واپس کر کے آؤ۔
موہن :بھابی! اس میں اس بے چاری کا کیا قصور ہے ؟
نیلما :قصور۔ ۔ ۔ اس کاکیوں نہیں ہے ؟
سی بی :محترمہ نیلما جی! آپ زیادتی کرتی ہیں۔
نیلما :تم چپ رہو سی پی۔ ۔ ۔ جو بات تم نہیں سمجھتے اس میں ٹانگ مت اڑاؤ۔
موہن :لیکن بھابی! یہ کوٹ واپس دینے جائے گا تو اس میں شہلا کی بے عزتی نہیں ہو گی۔
نیلما :یہی تومیں چاہتی ہوں۔
سی بی :لیکن۔ ۔ ۔
نیلما : (غصے سے) تم یہ نہیں سمجھتے کہ پاروتی یہ کوٹ پہنے گی تومیں کیسے پہن سکتی ہوں۔ تم ہی نے اسے اتنی لفٹ دے رکھی ہے کہ آج یہ میرے مقابلے پرآ کھڑی ہوئی ہے۔ اسے میرے بنگلے میں رہنا ہے تو اسے کوٹ ابھی اسی وقت جا کر واپس کرنا ہو گا۔
پاروتی :ہم تو میم صاحب کہے رہے سیلا میم صاحیب سے کہ ہم گریب متئی ہئی سرکار، برتن بھانڈا کرت ہے، اتنا مہنگا کوٹ ناہیں پہر سکت۔ میم صاحیب بولیں :نوکر مالک میں کونو پھرک ناہیں۔ کل تور تین لاکھ کی لاٹری نکل آوے توکاتے برھیا کوٹ نہ سلوائے لیبے۔ تے محنت کرت ہے۔ کونوکھیرات ناہیں پاوتے۔ ٹکو بابا کے ساتھ جاوا کرتوالے ہی ہی کوٹ پہرا کر۔ ہم لاکھ کہامیم صاحیب لیکن او ایکو نہ سنائن۔ ۔ ۔ ہم ابہن ٹکو بابا کے ہی کھلاوے جات رہے۔
نیلما :تو جاؤ، انھیں کے گھر جا کر رہو۔
(نہ پاور تی ہلتی ہے نہ رام ادھار۔ ایک لمحے کی خاموشی)
نیلما : (زور سے چلا کر) تم تو یہ کوٹ واپس نہیں کرو گی(دونوں میں کوئی نہیں ہلتا) رام ادھار!میں نے تم سے پہلے ہی کہا تھا کہ پاروتی سامنے کے بنگلے کا کام نہیں چھوڑ سکتی تو تم یہاں نہیں رہ سکتے۔ تم دونوں اسی وقت میرا بنگلہ خالی کر دو۔ جاؤ۔ ۔ ۔ جاؤ(پاروتی تذبذب میں ہے) جاؤ۔ ۔ ۔
رام ادھار :چلو پاربتی۔
(اچانک رام ادھار بڑھ کراس کا بازو پکڑتا ہے اور اسے لے جاتا ہے۔ )
نیلما : (اس وقت جب وہ دروازے میں ہی ہوتے ہیں) اور سی بی تم نے اس احسان فراموش کو اگر کل دفتر سے نہ نکالا تو مجھ سے برا کوئی نہ ہو گا۔
سی بی :میں نے تمہارے ہی زور دینے پر اسے رکھا تھا(کندھے جھٹکاتے ہوئے) تم کہتی ہو تو کل نکال دوں گا۔ لیکن سوچ لو۔ آج کلاس فور کے افسر۔ ۔ ۔ یعنی یہ چپراسی۔ ۔ ۔ اپنے آپ کو کلاس ون کے افسروں سے کم نہیں سمجھتے۔ رام ادھار جیسا بھلا چپراسی جلدی میں نہیں مل سکتا۔
نیلما :میں اور اب کچھ برداشت کر سکتی ہوں لیکن احسان فراموشی برداشت نہیں کر سکتی۔ اک دم بیکار اور بھوکا مرتا تھا۔ جب میں نے کالج میں اسے نوکری دی تھی۔ پھر جب اس کی نوکری چھوٹ گئی اور یہ کناٹ پلیس میں۔ ۔ ۔
سی بی :لیکن محترمہ نیلما جی، وہ صبح سے رات گیارہ بجے تک ہماری خدمت اسی لئے تو کرتا ہے۔ صبح سویرے اٹھ کر ایک میل جا کر وہ بھینس کا دودھ دوا کر لاتا ہے۔ مارکیٹ میں جا کر سبزی ترکاری لاتا ہے۔ کمرے صاف کرتا ہے۔ مہمان آ جاتے ہیں تو گیارہ گیارہ بجے رات بیرے کا۔ ۔ ۔
نیلما :مجھ سے بحث مت کرو سی بی اس نے میری بات نہیں مانی اور وہ میرے بنگلے میں نہیں رہ سکتا۔
موہن :لیکن بھابی اتنے ون ان لوگوں نے آپ کی خدمت کی ہے۔ مکان پڑے ہوئے نہیں ملتے۔ یہ کہاں جائیں گے۔ بے چارے۔ ۔ ۔
نیلما :میری طرف سے جہنم میں جائیں۔ ایسے احسان فراموشوں کو میں اپنے بنگلے میں نہیں رہنے دوں گی۔
سرلا : (سی بی سے) نیلما ٹھیک کہتی ہے بھائی صاحب۔ جب شہلا سے اس کی ٹھن گئی ہے تو اگر آپ کو نوکر یا اس کی بیوی اس کے ہاں کام کرتے ہیں تو سمجھئے اس کا ایک جاسوس دن رات آپ کے ہاں رہتا ہے۔ پھر سرکاری نوکری بھائی صاحب آج کل گری پڑی نہیں مل جاتی۔ بی اے، ایم اے پڑھے چپراسی ہونے کے لئے مارے مارے پھرتے ہیں۔ دو مہینے بے کار رہے گا تو آٹے دال کا بھاؤ معلوم ہو جائے گا اور پھر آ کر آپ کے پاؤں پرسر رگڑے گا۔
(خانساماں کچن سے تیز تیز داخل ہوتا ہے۔ )
خانساماں :صاحب وہ رام ادھار اور پاربتیا اپنا سارا سامان اٹھا کر سامنے کے بنگلے میں جا رہے ہیں۔
نیلما : (غصے اور حیرت سے) کیا۔ ۔ ۔ !
خانساماں :رام ادھار کہتا گیا ہے کہ میم صاب ہماری نوکری لیوا چاہت ہیں۔ ہماری نوکری کی کونو کمی ناہیں نا۔
سرلا : (اک دم اٹھ کر) میں کہتی ہوں یہ سب شہلا کی سازش ہے۔ اس کا خانساماں دیس جا رہا ہے۔ اسے یقیناً رام ادھار کی ضرورت ہو گی اور اس نے۔ ۔ ۔
موہن :چناؤ سر پر ہے۔ بھابی آپ نے نوکروں کو نکال کر اچھا نہیں کیا۔ نہ جانے یہ ساری لوکیلیٹی میں کیا کیا کہتے پھریں گے۔ ۔ ۔
سی بی :محترمہ نیلما جی، مجھے تو ایسا معلوم ہوتا ہے کہ تمہاری پڑوسن نے صرف ایک گرم کوٹ سلوا کر تمہارے دونوں نوکر چھین لئے۔ میں نہ کہتا تھا کہ۔ ۔ ۔
نیلما : (غصے سے بے قابو ہو کر) تم چپ رہو سی بی!تم چپ رہو!
(لاچار سی ہو کر کرسی میں دھنس جاتی ہے۔ اچانک سی بی کی نظر پانی کے گلاس پر جاتی ہے۔ وہ چپ چاپ گلاس اٹھا کر پانی پینے لگتے ہیں۔ جب فوراً پردہ گرتا ہے۔ )
’’پڑوسن کا کوٹ اور دوسرے یک بابی ڈرامے ‘‘
نیا ادارہ
الہ آباد

***
تشکر: مصنف اور ڈاکٹر شرف الدین ساحل جن کے توسط سے ان پیج فائل فراہم ہوئی۔
ان پیج سے تبدیلی اور تدوین: اعجاز عبید