اردو رباعیات

مختلف شعرا کی رباعیات

  مختصر تعارف

اصنافِ سخن میں رباعی ایک خاصے کی چیز ہے، چار مصرعوں میں جامع سے جامع مضمون کو خوبصورتی سے مکمل کر دینا دریا کو کوزے میں بند کر دینے کے مترادف ہے۔
رباعی عربی لفظ رُبَع سے ہے جسکا مطلب چار ہے یعنی اس میں چار مصرعے ہوتے ہیں، رباعی کو دو بیتی اور ترانہ وغیرہ بھی کہا جاتا ہے۔ اردو شاعری فارسی سے اور فارسی شاعری عربی شاعری سے نکلی ہے لیکن رباعی خالصتاً فارسی شعراء کی ایجاد ہے۔ رباعی کی ابتدا کے متعلق بہت سی ابحاث، واقعات اور حکایات ملتی ہیں، جنہیں طوالت کے خوف سے چھوڑتا ہوں۔
رباعی کے اوزان مخصوص ہیں، بحر ہزج کے چوبیس وزن رباعی کے لیئے مخصوص ہیں، جن میں غزل، نظم وغیرہ کہنا بھی جائز ہے، لیکن ان اوزان کے علاوہ اگر دو یا زیادہ شعر کسی اور وزن میں ہوں تو وہ رباعی نہیں بلکہ قطعہ کہلاتے ہیں، یہ تھریڈ ان اوزان کی تفصیل کا متحمل نہیں ہو سکتا سو انہیں بھی چھوڑتا ہوں۔ رباعی کا پہلا، دوسرا، اور چوتھا مصرع ہم قافیہ ہوتے ہیں، تیسرے مصرعے میں بھی قافیہ لایا جا سکتا ہے۔ رباعی کی خوبصورتی کا دار و مدار چوتھے مصرعے پر ہوتا ہے جس کے حسن اور برجستگی سے پہلے تین مصرعوں کو بھی چار چاند لگ جاتے ہیں۔
رباعی کا کوئی مخصوص موضوع نہیں ہوتا، لیکن شعراء کرام کی روایت رہی ہے کہ رباعی میں زیادہ تر پند و نصائح، تصوف، حمد، نعت، منقبت، فلسفہ، اخلاقیات اور دنیا کی بے ثباتی وغیرہ کے موضوع بیان کرتے ہیں۔ عشقیہ رباعیاں خال خال ہی ملتی ہیں۔
فارسی شاعری کا باوا آدم، رودکی، رباعی کا اولین شاعر مانا جاتا ہے، رودکی کے علاوہ بابا طاہر عریاں، سرمد، ابوسعید ابوالخیر، فرید الدین عطار، حافظ شیرازی اور شیخ سعدی وغیرہ معروف و مشہور رباعی گو ہیں لیکن فارسی شاعری میں جس شاعر کا نام رباعی گو کی حیثیت سے امر ہو گیا ہے وہ عمر خیام ہے۔
فارسی شعرا کے تتبع میں اردو شعرا نے بھی رباعی گوئی میں اپنی اپنی طبع کی جولانیاں دکھائی ہیں۔ مشہور اردو رباعی گو شعرا میں میر تقی میر، سودا، میر درد، میر انیس، غالب، ذوق، مومن، حالی، اکبر الہ آبادی وغیرہ شامل ہیں۔ لیکن جس شاعر نے صحیح معنوں میں اردو رباعی سے کام لیا ہے وہ علامہ اقبال ہیں۔ غالب کی طرح علامہ نے بھی اردو اور فارسی میں رباعیاں کہی ہیں اور کیا کمال کہی ہیں۔
اقبال کی کئی رباعیات، رباعی کے مروجہ اوزان کی قید میں نہیں ہیں، لیکن اقبال نے اپنی کتب میں انہیں رباعی ہی کہا ہے، اسطرف ایک اشارہ سید قدرت اللہ نقوی نے کیا ہے لیکن اس موضوع پر باوجود تلاش کے مجھے مواد نہیں مل سکا۔ میری ناقص سمجھ میں یہی آتا ہے کہ اقبال نے اس سلسلے میں بابا طاہر عریاں کا تتبع کیا ہے۔ بابا طاہر کی دوبیتیاں عموماً رباعیات ہی سمجھی جاتی ہیں لیکن ان کے اوزان بھی رباعی کے مروجہ اوزان سے مختلف ہیں۔
اقبال کے بعد، افسوس، اردو رباعی کا چلن بہت کم رہ گیا ہے۔ اسکی ایک وجہ یہ بھی ہوئی کہ ترقی پسند تحریک اور "جدیدیت" کی لہر میں جب نئے اردو شعرا نے شاعری میں تجربات کیے اور آزاد نظم کا چلن عام ہوا تو اس سے کلاسیکی اصنافِ سخن پیچھے چلی گئیں، نہ صرف انکا رواج کم ہو گیا بلکہ ایک طرح سے ان سے نفرت بھی کی گئی۔ مشہور ناقد سلیم احمد نے اس کلاسیکیت کی مخالفت میں غزل کو بھی "وحشی صنفِ سخن" کہہ دیا۔ اور اب بھی ڈاکٹر وزیر آغا اپنی " انتہائی ذاتی" رائے کے مطابق غزل کا کوئی مستقبل نہیں سمجھتے۔ اقبال کے بعد کے معروف رباعی گو شعرا میں جوش، فانی، فراق، شمس الرحمن فاروقی اور صبا اکبر آبادی وغیرہ کے نام ہیں۔ احمد فراز نے بھی چند ایک رباعیاں کہی ہیں لیکن جو شاعر اس وقت بھی بالالتزام رباعیاں کہتا ہے وہ عبدالعزیز خالد ہے۔
یہاں پر میں اپنی پسند کے اردو رباعیات پیش کر رہا ہوں، اس کا ایک مقصد یہ بھی ہے کہ اسطرح اردو رباعیات، جنہیں ہم بھولتے جا رہے ہیں اور وہ ادھر ادھر بکھری ہوئی پڑی ہیں، نہ صرف یکجا ہو جائیں بلکہ نیٹ کی دنیا میں محفوظ بھی ہو جائیں۔

محمد وارث  

سب سے پہلے غالب کی ایک انتہائی مشہور اور متنازع اور اپنی پسند کی رباعی پیش کرتا ہوں۔ سید حیدر نظم طباطبائی نے سب سے پہلے اپنی کتاب 'شرح دیوانِ غالب' میں اس پر اعتراض کیا تھا کہ اسکا دوسرا مصرع رباعی کے وزن سے خارج ہے، پھر تو اس پر خوب خوب بحثیں ہوئیں اور اب بھی ہوتی ہیں۔ ناقدینِ غالب اور "قتیلانِ غالب" اسے پر بہت سر پھٹول کر چکے، قتیلِ غالب ہوں سو سید قدرت اللہ نقوی کی بات سے اتفاق کرتا ہوں جنہوں نے اس مصرعے کو با وزن ثابت کیا ہے۔

دُکھ جی کے پسند ہو گیا ہے غالب
دل رک رک کر بند ہو گیا ہے غالب
واللہ کہ شب کو نیند آتی ہی نہیں
سونا سوگند ہو گیا ہے غالب

رباعی کے بارے میں ایک بات یہ بھی کہی جاتی ہے کہ اسکا خاص وزن "لا حَولَ و لا قُوّۃَ الّا باللہ" ہے، یہ بات درست ہے لیکن فقط اتنی کہ رباعی کے اوزان کا دار و مدار اس آیہ کریمہ کے ٹکڑے پر نہیں ہے بلکہ رباعی کے چوبیس اوزان میں سے ایک وزن پر یہ ٹکڑا بھی پورا اترتا ہے۔ مثلاً:
عاشق میں ہوا ہوں اک بُت کا ناگاہ
کچھ کام نہیں ہے مجھ کو جز نالہ و آہ
اب کفر سے مطلب ہے نہ اسلام سے کام
لا حَولَ و لا قُوّۃَ الّا باللہ
(یہ رباعی شاید حکیم نیر واسطی کی ہے کہ بحر الفصاحت جہاں سے یہ رباعی لی ہے شاعر کا نام صرف "واسطی" لکھا ہے)

عزّت رہے یارو آشنا کے آگے
محجوب نہ ہوں شاہ و گدا کے آگے
یہ پاؤں چلیں تو راہِ مولا میں چلیں
یہ ہاتھ جب اٹھیں تو خدا کے آگے

(میر انیس)

عشرت کا ثمر تلخ سوا ہوتا ہے
ہر قہقہہ پیغامِ بُکا ہوتا ہے
جس قوم کو عیش دوست پاتا ہوں
کہتا ہوں کہ اب دیکھیے کیا ہوتا ہے

(الطاف حسین حالی)

بے سود ہے گنج و مال و دولت کی تلاش
ذلّت ہے دراصل جاہ و شوکت کی تلاش
اکبر تو سرورِ طبع کو علم میں ڈھونڈ
محنت میں کر سکون و راحت کی تلاش

(اکبر الٰہ آبادی)

تحقیق کو بے سود سمجھنے والو
انسان کو بے سود سمجھنے والو
تقدیر و توکل سے عمل بہتر ہے
اے وہم کو معبود سمجھنے والو

(احسان دانش)

ہم حسن پرستی کے قرینوں کے لیے
ہو جاتے ہیں معتکف مہینوں کے لیے
تصویر بناتے ہیں خود اپنی خاطر
اور شاعری کرتے ہیں حسینوں کے لیے

(صادقین) (احمد نقوی)

کیا فائدہ فکرِ بیش و کم سے ہوگا
ہم کیا ہیں جو کوئی کام ہم سے ہوگا
جو کچھ ہوا، ہوا کرم سے تیرے
جو کچھ ہوگا، ترے کرم سے ہوگا

(ابراہیم ذوق)

 
عاشق کے لیے رنج و الم رکھے ہیں
شاہوں کے لیے تاج و علم رکھے ہیں
میرے لیے کیا چیز ہے؟ میں نے پوچھا
آئی یہ صدا لوح و قلم رکھے ہیں

(صادقین)

پیدا کرے ہر چند تقدّس بندا
مشکل ہے کہ حرص سے ہو دل بَرکندا
جنّت میں بھی اکل و شرب سے نہیں نجات
دوزخ کا، بہشت میں بھی ہوگا دھندا

(میر درد)

بالفرض حیاتِ جاودانی تم ہو
بالفرض کہ آبِ زندگانی تم ہو
ہم سے نہ ملو تو خاک سمجھیں تم کو
لیں نام نہ پیاس کا جو پانی تم ہو

(امیر مینائی)

ٹُوٹا ہے پڑا ایک طرف پیمانہ
لَوٹے ہے کوئی ایک طرف مستانہ
نہ ذکر ہے یاں نماز نہ روزے کا
مسجد نہ ہوئی، ہوا یہ قہوہ خانہ

(غلام ہمدانی مصحفی)

 
غفلت کی ہنسی سے آہ بھرنا اچھّا
افعالِ مضر سے کچھ نہ کرنا اچھّا
اکبر نے سنا ہے اہلِ غیرت سے یہی
جینا ذلّت سے ہو تو مرنا اچھّا

(اکبر الٰہ آبادی)

کیا پاس تھا قولِ حق کا، اللہ اللہ
تنہا تھے، پہ اعدا سے یہ فرماتے تھے شاہ
میں اور اطاعتِ یزیدِ گمراہ
لا حَولَ و لا قُوّۃَ الّا باللہ

(حالی)

 
بچپن میں تجھے یاد کیا تھا میں نے
جب شعر کا کب لفظ سنا تھا میں نے
اس پر نہیں موقوف رباعی تجھ کو
ہر روز ہی تختی پہ لکھا تھا میں نے

(صادقین)

تھا جوش و خروش اتّفاقی ساقی
اب زندہ دِلی کہاں ہے باقی ساقی
میخانے نے رنگ و روپ بدلا ایسا
میکش میکش رہا، نہ ساقی ساقی

(مولانا ابوالکلام آزاد)

 
رتبہ جسے دنیا میں خدا دیتا ہے
وہ دل میں فروتنی کو جا دیتا ہے
کرتے ہیں تہی مغز ثنا آپ اپنی
جو ظرف کہ خالی ہو صدا دیتا ہے

(میر انیس)

وہ موجِ حوادث کا تھپیڑا نہ رہا
کشتی وہ ہوئی غرق، وہ بیڑا نہ رہا
سارے جھگڑے تھے زندگی کے انیس
جب ہم نہ رہے تو کچھ بکھیڑا نہ رہا

(میر انیس)

 
اب ہم پہ جو ہر گھڑی وہ جھنجھلاتے ہیں
الطافِ قدیم آہ یاد آتے ہیں
تھا یا تو وہ لطف یا یہ نفرت، اللہ
لوگ ایسے بھی دنیا میں بدل جاتے ہیں

(مومن خان مومن)

کچھ عشق میں تو مزہ نہ پایا ہم نے
اس دل ہی کو مفت گنوایا ہم نے
اور جس کے لیے گنوایا دل کو جرأت
اس کو اپنا کبھی نہ پایا ہم نے

(قلندر بخش جرأت)

 
مجھ کو نہیں ہے دل میں ترے راہ، کیا کروں
پر بے اثر ہے عشق مرا، آہ کیا کروں
سُن کر ہزار شکل مرا حال، یوں کہا
تُو تو کسی طرح نہیں دل خواہ، کیا کروں

(مرزا رفیع سودا)

آرام نہ دن کو بے قراری کے سبب
نے رات کو چین آہ و زاری کے سبب
واقف نہ تھے ہم تو ان بلاؤں سے کبھو
یہ کچھ دیکھا، سو تیری یاری کے سبب

(میر درد)

انسانِ کبیر کیسے ہے کائنات؟
یا مجبورِ محض مثلِ ما دن اور رات
سر پٹکا بہت مگر نہ پایا یہ راز
اب کھول خدایا تُو ہی مجھ پر سچ بات

(محمد وارث اسد)

لفظوں میں فسانے ڈھونڈتے ہیں ہم لوگ
لمحوں میں زمانے ڈھونڈتے ہیں ہم لوگ
تُو زہر ہی دے شراب کہہ کر ساقی
جینے کے بہانے ڈھونڈتے ہیں ہم لوگ

(احمد فراز)

 
ہر چند کہ موت کا طلب گار ہوں میں
رنج و الم و غم سے گرانبار ہوں میں
پر زندگی اپنی کہہ چکا ہوں تجھ کو
کس منہ سے کہوں زیست سے بیزار ہوں میں

(عبدالعلیم آسی غازی پوری)

اے ذوق کبھی تُو نہ خوش اوقات ہوا
اک دم نہ ترا صرفِ مناجات ہوا
تھا جب کہ جواں، تھا جوانِ بدمست
جب پیر ہوا، پیرِ خرابات ہوا

(ابراہیم ذوق)

 
دنیا میں رسول اور بھی لاکھ سہی
زیبا ہے مگر حضور کو تاجِ شہی
ہے خاتمۂ حسنِ عناصر ان پر
ہیں مصرعۂ آخر اس رباعی کے وہی

( حامد حسین قادری)

پہلے مصرعے میں حسن کا خطہ جبیں
اور دوسرے میں لٹوں کی تزئیں
چوتھا ہو نکلتا ہوا یوں تیسرے سے
جیسے بھیگی مسیں ہوں ابرو سے حسیں

(فراق گورکھپوری)

مومن لازم ہے وضع مرغوب بنے
جو رنگ ہو آدمی خوش اسلوب بنے
کیا خرقہ و عمامہ ہے اللہ اللہ
جب شکل بگڑ گئی تو تم خوب بنے

(مومن خان مومن)

جس جانِ جہاں کی تھی زمانے کو تلاش
مقتولِ پس و پیش ہے، مصلوبِ معاش
ہیں عزم کی لاشوں کے دو رویہ انبار
از چوکِ 'اگر' تا بہ عزا خانۂ 'کاش'

(عبدالعزیز خالد)

 
اُڑتے پنچھی شکار کرنے والو
گلزار میں گیر و دار کرنے والو
کتنی کلیاں مَسل کے رکھ دیں تم نے
تزئینِ گُل و بہار کرنے والو

(احمد فراز)

جن لوگوں کو ہے مجھ سے عداوت گہری
کہتے ہیں مجھے وہ رافضی و دھری
دھری کیوں کر ہو جو کہ ہووے صوفی
شیعی کیوں کر ہو ماوراء النّہری

(غالب)

 
اے درد اگرچہ مے میں ہے جوش و خروش
رہتے ہیں ولے اہلِ تامّل خاموش
موجوں کو شراب کی وہ پی جاتے ہیں
گرداب کی مانند جو ہیں دریا نوش

(خواجہ میر درد)

افسوس کہ دل کی بے قراری نہ گئی
فریاد و فغان و آہ و زاری نہ گئی
وہ کونسا روز ہے کہ تجھ بن جوں شمع
روتے ہوئے مجھ کو رات ساری نہ گئی

(مصحفی)

 
مفہومِ عزا جاننے والے کم ہیں
احسان کو گرداننے والے کم ہیں
شبّیر ترے ماننے والے ہیں بہت
لیکن ترے پہچاننے والے کم ہیں

(نجم آفندی)

بندوں کو ضرور اپنے صلہ دیتا ہے
دیتا ہے، طلَب سے بھی سوا دیتا ہے
تُو مانگنے والوں کی طرح مانگ کے دیکھ
ہر مانگنے والے کو خدا دیتا ہے

(نثار اکبر آبادی)

 
جو اشک ان آنکھوں سے جدا ہوتا ہے
مژگاں تلک آیا کہ فنا ہوتا ہے
نظروں سے گرے نہ کوئی(1) کسی کی یارب
نظروں سے گرا بہت برا ہوتا ہے

(مصحفی)

1- کوئی بروزن 'فع' باندھا ہے (کلیاتِ مصحفی، دیوانِ اول، مجلس ترقی ادب، لاہور 1968ء)

ہر لحظہ جلاتا ہے، کُڑھاتا ہے مجھے
ہر آن ستاتا ہے کھپاتا ہے مجھے
کل میں نے جو کہا، "رنج سے حاصل مرے؟"
بولا، ترا آزار خوش آتا ہے مجھے

(میر تقی میر)

 
کر کر کے اِس در پہ آہ و نالے کتنے
مر مر گئے ہم سے مرنے والے کتنے
اچھی طرح اُس نے منہ دکھایا کِس کو
ترسا ترسا کے مار ڈالے کتنے

(مصحفی، غلام ہمدانی)

خاموشی میں یاں لذّتِ گویائی ہے
آنکھیں جو ہیں بند، عین بینائی ہے
نے دوست کا جھگڑا ہے نہ دشمن کا فساد
مرقد بھی عجب گوشۂ تنہائی ہے

(میر انیس)

 
ظلمات کو موجِ نور کیسے سمجھیں
پھر برق کو برقِ طور کیسے سمجھیں
مانا کہ یہی مصلحت اندیشی ہے
ہم لوگ مگر حضور کیسے سمجھیں

(احمد فراز)

آتش بازی ہے جیسے شغلِ اطفال
ہے سوزِ جگر کا بھی اُسی طَور کا حال
تھا موجدِ عشق بھی قیامت کوئی
لڑکوں کے لیے گیا ہے کیا کھیل نکال

(غالب)

 
کرتے ہیں طلبِ جوع و خیانت سے پناہ
قوموں کو کیا کثرتِ عصیاں نے تباہ
ہوتی نہیں فاسق کی مناجات قبول
رستے میں دعا کو روک لیتے ہیں گناہ

(عبدالعزیز خالد)

مستوں میں نہیں وہ عشق و مستی باقی
وہ پیرِ مغاں ہے اور نہ ساقی باقی
مے خانہ میں مے حافظ و رومی کی نہیں
باقی ہے برانڈی اور وسکی باقی

(خوشی محمد ناظر - نغمۂ فردوس)

 
اے درد، اگرچہ مے میں ہے جوش و خروش
رہتے ہیں ولے اہلِ تامّل خاموش
موجوں کو شراب کی وہ پی جاتے ہیں
گرداب کی مانند جو ہیں دریا نوش

(خواجہ میر درد)

ر جلوہ سے اِک درسِ نَمُو لیتا ہوں
چھلکے ہوئے صد جام و سبو لیتا ہوں
اے جانِ بہار تجھ پہ پڑتی ہے جب آنکھ
سنگیت کی سرحدوں کو چُھو لیتا ہوں

(فراق گورکھپوری)

گر یار کے سامنے میں رویا تو کیا
مژگاں میں جو سخت دل پرویا تو کیا
یہ دانۂ اشک سبز ہو نامعلوم
اس شور زمیں میں تخم بویا تو کیا

(مرزا رفیع سودا)

پہنچا جو کمال کو وطن سے نکلا
قطرہ جو گہر بنا عدن سے نکلا
تکمیلِ کمال کی غریبی ہے دلیل
پختہ جو ثمر ہوا چمن سے نکلا

(میر انیس)

دل سخت نژند ہو گیا ہے گویا
اُس سے گلہ مند ہو گیا ہے گویا
پر یار کے آگے بول سکتے ہی نہیں
غالب، منہ بند ہو گیا ہے گویا

(غالب)

سبطینِ نبی یعنی حَسن اور حُسین
زہرا و علی کے دونوں نور العین
عینک ہے تماشائے دو عالم کے لئے
اے ذوق لگا آنکھوں سے انکی نعلین

(ابراہیم ذوق)

 
گر مہ سے بلندی میں ہوا تو دہ چند
پستوں کی طرف دیکھ کے مت ہو خورسند
جتنے کہ بلندوں کی ہیں نظروں میں پست
پستوں کی بھی نظروں میں ہیں اتنے ہی بلند

(مرزا رفیع سودا)

کی کوہ کنی تو کس نے دیکھا
اور قیس کا بن میں شور کس نے دیکھا
کرنا ہے جو کچھ کریں گے ان کے در پر
ناچا جنگل میں مور کس نے دیکھا

(شاہ نصیر)

 
تُو ہاتھ کو جب ہاتھ میں لے لیتی ہے
دکھ درد زمانے کے مٹا دیتی ہے
سنسار کے تپتے ہوئے ویرانے میں
سکھ شانت کی گویا تو ہری کھیتی ہے

(فراق گورکھپوری)

کی کوہ کنی تو کس نے دیکھا
اور قیس کا بن میں شور کس نے دیکھا
کرنا ہے جو کچھ کریں گے ان کے در پر
ناچا جنگل میں مور کس نے دیکھا

(شاہ نصیر)

 
تھا ہم سے بھی ربط یا کہ نہ تھا
ایسی ہوئی کچھ کبھی بھی گویا کہ نہ تھا
یاروں میں تمہارے ہم بھی تھے یا کہ نہ تھے
دیکھو تو ادھر کو کبھی کچھ تھا کہ نہ تھا

(مومن)

اے نیرِ برجِ آسمانِ اقبال
ان رنگتروں پہ غور سے کیجے گا خیال
یہ نذرِ فقیر ہو قبولِ خاطر
پردے میں شفق کے ہیں یہ گلرنگ ہلال

(شاہ نصیر)

 
جو اشک کہ آنکھوں سے جدا ہوتا ہے
مژگاں تلک آیا کہ فنا ہوتا ہے
آنکھوں سے کسی کی کوئی یا رب نہ گرے
آنکھوں کا گرا بہت برا ہوتا ہے

(شاہ نصیر)

جب سے وہ گئے ادھر نہیں‌یاد کیا
بھیجی نہیں کچھ خبر، نہیں یاد کیا
ہم یاد میں جس کی آہ سب کچھ بھولے
اُس نے ہمیں بھول کر نہیں‌ یاد کیا

(مومن)

لفظِ "اقوام" میں کوئی جان نہیں
اک نوع میں ہو دوئی، یہ امکان نہیں
جو مشرکِ یزداں ہے وہ ناداں ہے فقط
جو مشرکِ انساں ہے وہ انسان نہیں

(جوش ملیح آبادی)

دیکھا ہے مَیں زندگی کا جب سے سپنا
جلنا ہی سدا ہے مجھ کو، نِت ہے کھپنا
تقصیر معاف تب ہی ہوگی اے درد
جوں شمع کروں گا جب قدم بوس اپنا

(خواجہ میر درد)

 
مضمون نہ فیض یاب معنی تو ہے
ہر نقطے کا اک کتاب معنی تو ہے
کہتے ہیں جسے صحیفۂ عشق نصیر
وہ نسخۂ انتخاب معنی تو ہے

(شاہ نصیر)

زردار کا خنّاس نہیں جاتا ہے
ہر آن کا وسواس نہیں جاتا ہے
ہوتا ہے جو شدّتِ ہوس پر مبنی
تا مرگ وہ افلاس نہیں جاتا ہے

(جوش ملیح آبادی)

 
بعد از تمامِ بزمِ عیدِ اطفال
ایّامِ جوانی، رہے ساغر کشِ حال
آ پہنچے ہیں ، تا سوادِ اقلیمِ عدم
اے عمرِ گذشتہ یک قدم استقبال!

(غالب)

دل صحبتِ بزم نشیناں سے ہے تنگ
پایا نہ کوئ نصیر ہم نے یک رنگ
شطرنج کے مہروں کی طرح سے ہیہات
تھوڑی سی بساط پر ہیں باہم در جنگ

(شاہ نصیر)

 

آوازِ قَلَم کو بانگِ نَے کہتے ہیں
خوننابۂ دل کو موجِ مَے کہتے ہیں
لا شَی کو مجسّم و مصوّر کر کے
ہم صورت گر 'نہیں' کو 'ہے' کہتے ہیں

(عبدالعزیز خالد)

ایوانِ عدالت میں تمھارے اے بادشاہ
کیا ظلم کو ہے دخل عیاذًا باللہ
شیشے کا جو واں طاق سے رپٹے بھی پاؤں
پتھّر سے نکلتی ہے صدا، بسم اللہ

(مرزا رفیع سودا)

 
تجھ مُکھ کا ہے یہ پھول چَمَن کی زینت
تجھ شمع کا شعلہ ہے اَگَن کی زینت
فردوس میں نرگس نے اشارے سوں کہا
"یہ نور ہے عالم کے نَیَن کی زینت"

(ولی دکنی)

دل صحبتِ بزم نشیناں سے ہے تنگ
پایا نہ کوئ نصیر ہم نے یک رنگ
شطرنج کے مہروں کی طرح سے ہیہات
تھوڑی سی بساط پر ہیں باہم در جنگ

(شاہ نصیر)
 
جب روح کسی بوجھ سے تھک جاتی ہے
احساس کی لَو اور بھڑک جاتی ہے
میں بڑھتا ہوں زندگی کی جانب لیکن
زنجیر سی پاؤں میں چھنک جاتی ہے

(احمد فراز)

ہے عشق طبیب دل کے بیماروں کا
یا گھر ہے وہ خود ہزار آزاروں کا
ہم کچھ نہیں جانتے پہ اتنی ہے خبر
اک مشغلہ دلچسپ ہے بیکاروں کا

(مولانا الطاف حسین حالی)

 
تُو ہی تھا کہ جاں تھا اور تُو ہی دل تھا
تُو ہی تھا کہ کہیں حق تھا کہیں باطل تھا
تُو ہی تھا کہ جس کو میں کہے تھا میں ہوں
پر حیف کہ اس بھید سے میں غافل تھا

(قائم چاند پوری)

 
تُو ہی تھا کہ جاں تھا اور تُو ہی دل تھا
تُو ہی تھا کہ کہیں حق تھا کہیں باطل تھا
تُو ہی تھا کہ جس کو میں کہے تھا میں ہوں
پر حیف کہ اس بھید سے میں غافل تھا

(قائم چاند پوری)

بُلبُل کی چمَن میں ہم زبانی چھوڑی
بزم شعرا میں شعر خوانی چھوڑی
جب سے دلِ زندہ تُو نے ہم کو چھوڑا
ہم نے بھی تری رام کہانی چھوڑی

(مولانا الطاف حسین حالی)

آئندہ نہ آنکھوں سے اُتاروں کا غلاف
کر دے یہ خطا اے مرے اللہ معاف
یہ دیکھ مرے ماتھے پہ تازہ اک زخم
بولا ہوں میں فرسودہ رواجوں کے خلاف

(قتیل شفائی)

مارے تپِ غم کے میں گلا جاتا ہوں
اس داغِ جگر سے سب جلا جاتا ہوں
موقوف بہ خس نہیں ہے جلنا میرا
جوں شمع کھڑا ہوں اور جلا جاتا ہوں

(غلام ہمدانی مصحفی)

 
دن رات اسے ہے دال روٹی کا دھیان
رہنے کو مکاں نہ خواب و خور کا سامان
مفلس کا شباب ایسا بے قدر ہوا
جیسے ہو ذلیل بے بلایا مہمان

(یگانہ چنگیزی)

 
جو لوگ ہیں نیکیوں میں مشہور بہت
ہوں نیکیوں پر اپنے نہ مغرور بہت
نیکی ہی خود اک بدی ہے گر ہو نہ خلوص
نیکی سے بدی نہیں ہے کچھ دُور بہت

(خواجہ الطاف حسین حالی)

راتیں یونہی کٹ جاتی ہیں روتے روتے
دن جاتے ہیں منہ اشکوں سے دھوتے دھوتے
دامن کو چھڑا کر وہ گیا ہے جب سے
ہاتھوں کے اسی دن سے اڑے ہیں توتے

(یگانہ)

 

دریافت کرے وزن ہوا کا مجھ سے
پوچھے وہ کبھی رنگ صدا کا مجھ سے
ڈرتا ہوں وہ معلوم نہ کر بیٹھے کہیں
کیا ناطہ ہے ساون کی گھٹا کا مجھ سے

(قتیل شفائی)

پچھتائے ہیں خضر بھی کچھ ایسے پی کر
آئے نہ پلٹ کے پھر کبھی اپنے گھر
روپوش ہوئے ہیں دامنِ صحرا میں
اے آبِ حیات، خاک تیرے سر پر

(یگانہ)

 
اک راہِ طویل اک کڑی ہے یارو
افتاد عجیب آ پڑی ہے یارو
کس سمت چلیں کدھر نہ جائیں آخر
دوراہے پہ زندگی کھڑی ہے یارو

(احمد فراز)

 

انجام کے آغاز کو دیکھا میں نے
ماضی کے ہر انداز کو دیکھا میں نے
کل نام ترا لیا جو بُوئے گُل نے
تا دیر اس آواز کو دیکھا میں نے

(جوش ملیح آبادی)

رخ مہر ہے ، قد خطِ شعاعی کی طرح
وہ گلّہ امت میں ہے راعی کی طرح
اس خاتمِ انبیاء کا آخر میں ظہور
ہے مصرعہ آخرِ رباعی کی طرح

(حکیم الشعراء امجد حیدر آبادی)
 
سینے میں یہ دم شمعِ سحر گاہی ہے
جو ہے اس کارواں میں وہ راہی ہے
پیچھے کبھی قافلہ سے رہتا نہ انیس
اے عمرِ دراز تیری کوتاہی ہے

(میر انیس)

اِس گل میں ہے رنگِ گُلسِتانی کیا کیا
ہے خاک میں آبِ زندگانی کیا کیا
انساں کی نظر ہی سطح بیں ہے ورنہ
ہر شے میں ہیں اسرارِ نہانی کیا کیا

(خوشی محمد ناظر)

دل کی جانب، رجوع ہوتا ہوں میں
سر تا بقدم، خضوع ہوتا ہوں میں
جب مہرِ مُبیں غروب ہو جاتا ہے
پیمانہ بکف، طلوع ہوتا ہوں میں

(جوش ملیح آبادی)

گوہر کو صَدَف میں آبرو دیتا ہے
بندے کو بغیر جستجو دیتا ہے
انسان کو رزق، گُل کو بُو، سنگ کو لعل
جو کچھ دیتا ہے جس کو، تُو دیتا ہے

(میر انیس)

 
تیزی نہیں منجملۂ اوصافِ کمال
کچھ عیب نہیں اگر چلو دھیمی چال
خرگوش سے لے گیا ہے کچھوا بازی
ہاں راہِ طلب میں شرط ہے استقلال

(مولوی محمد اسمٰعیل میرٹھی)

کہتے ہیں "کہ اب وہ مَردم آزار نہیں
عشّاق کی پرسش سے اسے عار نہیں"
جو ہاتھ کے ظلم سے اٹھایا ہوگا
کیوں کر مانوں کہ اُس میں تلوار نہیں

(مرزا غالب)
یہ رباعی صنعتِ ایہام (ایہام گوئی) کی بہترین مثال ہے، اس صنعت میں شاعر کوئی ذو معنی لفظ استعمال کر کے دو معنی بیان کرتا ہے اور دونوں صحیح ہوتے ہیں، ایک سامنے ہوتا اور فوری سمجھ میں آ جاتا ہے، دوسرا بعید اور کچھ تامل سے سمجھ میں آتا ہے۔ اور شاعر کی مراد عموماً بعید معنی ہوتے ہیں۔
اس رباعی میں ہاتھ اٹھانا ذو معنی ہے، ظلم کرنے کے لیئے ہاتھ اٹھانا سامنے ہے اور کسی کام سے ہاتھ اٹھا لینا بعید۔

یاروں میں نہ پایا جب کوئی عیب و گناہ
کافر کہا واعظ نے انہیں اور گمراہ
جھوٹے کو نہیں ملتی شہادت جس وقت
لاتا ہے خدا کو اپنے دعوے پہ گواہ

(مولانا الطاف حسین حالی)

ہر دم اس کی عنایت تازہ ہے
اس کی رحمت بغیر اندازہ ہے
جتنا ممکن ہے کھٹکھٹاتے جاؤ
یہ دستِ دعا خدا کا دروازہ ہے

۔۔ امجد حیدر آبادی

کاش اہلِ چمن یہ باغباں کو سمجھائیں
جھونکوں کو یہ حکم دے کہ دھومیں نہ مچائیں
تا صبح کو غنچوں کے چٹکنے کی صدا
مرجھائے ہوئے پھول نہ سننے پائیں

(جوش ملیح آبادی)

ہم نے بھی کبھو جام و سبو دیکھا تھا
جو کچھ کہ نہیں ہے رو بہ رو، دیکھا تھا
اُن باتوں کو اب جو غور کریے اے درد
کچھ خواب سا تھا کہ وہ کبھو دیکھا تھا

(خواجہ میر درد)

بچپن ہی کے پہلو میں جوانی بھی تو ہے
باقی ہی کی آغوش میں فانی بھی تو ہے
سمجھے ہو غلط روح جدا، جسم جدا
جو برف کی شکل ہے، وہ پانی بھی تو ہے

۔۔ امجد حیدر آبادی

مشکل ہے ز بس کلام میرا، اے دِل
سُن سُن کے اسے سخنورانِ کامِل
آساں کہنے کی کرتے ہیں فرمائش
گویم مشکل، و گر نہ گویم مشکِل

(غالب)
 
سرمایۂ غفلت ہے تماشائے جہاں
بینا ہے وہ جو نہ وا کرے آنکھ یہاں
ہر پردۂ دید ہے حجابِ غفلت
عارف ہی کو کھلتا ہے یہ رازِ پنہاں

(عزیز بریلوی)

کم ظرف اگر دولت و زر پاتا ہے
مانند حباب ابھر کر اتراتا ہے
کرتے ہیں ذرا سی بات میں فخر خسیس
تنکا تھوڑی سی ہوا سے اُڑ جاتا ہے

۔۔ امجد حیدر آبادی

 
ادیان و مذاہب و ملل کی جنگیں
شائد ہی قیامِ حشر سے پہلے رکیں
بندے ترے اے ربِ توانا! کس سے
اس تاخت و تاراج کی فریاد کریں

(عبدالعزیز خالد)

اس نام کی زندگی میں کچھ جان تو ہو
گر بن نہ سکے فرشتہ، انسان تو ہو
نیکی نہ ہوئی ، نہ ہو، بدی بھی نہ کر
صوفی نہ ہوا، نہ ہو، مسلمان تو ہو

۔۔ امجد حیدر آبادی
 

اک اک کی تاک میں لگا رہتا ہے
خوں ایک کا اک کے ہاتھ سے بہتا ہے
انسان کے خبثِ باطنی کے آگے
شیطان بھی لاحول ولا پڑھتا ہے

۔۔ امجد حیدر آبادی

اے داورِ بے نیاز اے ایزدِ پاک
کرتا ہوں گلہ تجھ سے (مرے منہ میں خاک)
کیوں اس قدر اندھیر تری دنیا میں
کیوں انسان اتنا شقی، اتنا سفاک؟

(عبدالعزیز خالد)

 
دونوں یک جا مگر ملاقات نہیں
باہم کوئی گفتگو نہیں بات نہیں
تو مجھ سے قریب تر میں تجھ سے قریب
کیا بات ہے، ہم دونوں میں کیوں بات نہیں

۔۔ امجد حیدر آبادی

لبیک سے معمور ہے کعبے کی فضا
دن رات رہے اس میں بپا آہ و بکا
آئے کوئی اندر سے نہ اوپر سے ندا
دے منتظروں کو جو قبولی کا پتا

(عبدالعزیز خالد)

 
ہے جسم مرا اور نہ جاں ہے باقی
تربت میں نہ کوئی استخواں ہے باقی
کرتا ہے خدا تو امتحاں تا دمِ زیست
پر بت کا ہنوز امتحاں ہے باقی

(ناسخ)

سانپوں کی طرَح شُوک رہا ہے واعظ
ہے گھاگ مگر چُوک رہا ہے واعظ
خاموش رہو اور تماشہ دیکھو
سورج پہ اگر تُھوک رہا ہے واعظ

(قتیل شفائی)  

بجتا ہو ستار اور مضراب نہ ہو
پھیلی ہوئی چاندنی ہو، مہتاب نہ ہو
میں، میں نہیں ہو سکتا نہ ہو تو جب تک
ممکن ہی نہیں، حباب ہو، آب نہ ہو

۔۔ امجد حیدر آبادی

تازیست وہ محوِ نقشِ موہوم رہے
جو طالبِ دوستانِ معصوم رہے
اصحاب سے بات بات پر جو بگڑے
صحبت کی وہ برکتوں سے محروم رہے

(مولانا الطاف حسین حالی)

 
مفلس ہوں نہ مال ہے نہ سرمایہ ہے
کیا پوچھتا ہے مجھ سے تو کیا لایا ہے
امجد تیری رحمت کے بھروسے یارب
بند آنکھ کیے یوں ہی چلا آیا ہے

(امجد حیدر آبادی)

ساقی مجھے پھر فکرِ جہاں نے گھیرا
میخانہ سلامت رہے دائم تیرا
تجھ سا کوئی ساقی ہے نہ مجھ سا میخوار
بھر دے بھر دے پیالہ بھر دے میرا

(ناصر کاظمی)
 
آتش بازی ہے جیسے شغلِ اطفال
ہے سوزِ جگر کا بھی اسی طور کا حال
تھا موجدِ عشق بھی قیامت کوئی
لڑکوں کیلئے گیا ہے کیا کھیل نکال

(غالب)

ضائع فرما نہ سرفروشی کو مری
مٹی میں ملا نہ گرم جوشی کو مری
آیا ہوں کفن پہن کے اے ربِّ غفور
دھبّا نہ لگے سفید پوشی کو مری

۔۔ امجد حیدر آبادی
 
میخانہ بدوش ہیں گھٹائیں ساقی
پیمانہ فروش ہیں فضائیں ساقی
اک جام پلا کے مست کر دے مجھ کو
غارت گرِ ہوش ہیں ہوائیں ساقی

(اختر شیرانی)

بے خود میں رہوں تو وہ قریں آتا ہے
پردے ہی میں وہ پردہ نشیں آتا ہے
وہ جب آتا ہے، میں نہیں رہتا
میں جب رہتا ہوں، وہ نہیں آتا ہے

امجد حیدر آبادی

 
نہ شکوہ دورِ آسمانی کیجئے
نہ ذکرِ شہاں نہ پاسبانی کیجئے
اے مصحفی اب تو اس زمانے کے بیچ
جس طرح سے ہووے زندگانی کیجئے

(غلام ہمدانی مصحفی)

ہر ذرہ پہ فضلِ کبریا ہوتا ہے
ایک چشم زدن میں کیا سے کیا ہوتا ہے
اصنام دبی زبان سے یہ کہتے ہیں
وہ چاہے تو پتھر بھی خدا ہوتا ہے

۔۔ امجد حیدر آبادی

 
آتش دلِ زار میں لگائی اس نے
برسوں جانِ حزیں جلائی اس نے
پھینکا مجھ پر کل اختلاطاً پانی
بھڑکی ہوئی کیا آگ بجھائی اس نے

(مومن)

کیا فائدہ فکرِ بیش و کم سے ہوگا
ہم کیا ہیں جو کوئی کام ہم سے ہوگا
جو کچھ ہوا ، ہوا کرم سے تیرے
جو کچھ ہوگا ، ترے کرم سے ہوگا

(ذوق)

 
اعلیٰ جو علی کی ہے امامت کا مقام
رکھتے ہیں خبر اُس سے یہاں خاص و عام
جو لوگ صف اول میثاق میں تھے
پوچھے کوئی اُن سے کہ وہ کیسا تھا امام

(ذوق)

ہر چیز مسبّبِ سبب سے مانگو
منت سے، خوشامد سے، ادب سے مانگو
کیوں غیر کے آگے ہاتھ پھیلاتے ہو
بندے ہو اگر رب کے تو رب سے مانگو

۔۔ امجد حیدر آبادی
 
سبطین نبی یعنی حسن ا و ر حسین
زہرا و علی کے دونوں وہ نور العین
عینک ہے تماشائے دو عالم کے لئے
اے ذوق لگا آنکھوں سے اُنکی نعلین

(ذوق)

کس متن کی تفسیر ہوں، معلوم نہیں
کس ہاتھ کی تحریر ہوں معلوم نہیں
میں ہوں کہ مرے پردے میں ہے اور کوئی
صورت ہوں کہ تصویر ہوں، معلوم نہیں

۔۔امجد حیدر آبادی
 
دُنیا کے الم ذوق اُٹھا جائیں گے
ہم کیا کہیں کیا آئے تھے کیا جائیں گے
جب آئے تھے روتے ہوئے آپ آئے تھے
اب جائیں گے اوروں کو رُلا جائیں گے

(ذوق)

پہنچا ہے سرِ عرش مقدر میرا
مرکز پہ ہوا ہے ختم چکر میرا
ہے سارے جہاں کا سر میرے قدموں پر
تیرے قدموں پہ جب سے ہے سر میرا

۔۔امجد حیدر آبادی
 

اے ذوق فرشتے ہیں یہ کہہ کر روتے
اے کاش کہ انسان ہی ہم بھی ہوتے
غفلت میں یہ رہتا ہے یہاں تک ہشیار
شیطان کے چلا دیتا ہے سوتے سوتے

(ذوق)

صورت تک رہی نہیں میری آنکھیں
جلوے سے چمک رہی ہیں میری آنکھیں
تیرے چہرے پہ میری آنکھوں کی نظر
آنکھوں میں کھٹک رہی ہیں میری آنکھیں

۔۔امجد حیدر آبادی

 
اے زاہدو تم سے کیا جھگڑ کر لوں میں
غصہ سے کروں کس لئے دل کو خوں میں
مے خوار و صنم پرست کہتے ہو مجھے
تم ہو تم ہو جو کچھ کہ ہوں میں ہوں میں

(ذوق)

جن کو اس وقت میں اسلام کا دعویٰ ہے کمال
غور سے دیکھا تو اے ذوق ہے اُن کا یہ حال
جیسے محفل میں ہنسانے کو مسلمانوں پر
نقل کرتا ہو مسلماں کی کافر نقال

(ذوق)

 
گردش کیوں کو بکو ہے، معلوم نہیں
دل کی کیا آرزو ہے، معلوم نہیں
جب دیکھئے جستجو میں سر گرداں ہوں
کس چیز کی جستجو ہے معلوم نہیں

۔۔امجد حیدر آبادی

اے ذوق کرے گا کوئی دنیا کیا ترک
دنیا ہے بری بلا ارے کیا ترک
کیا دخل کہ ہو ترک کسی سے دنیا
جب تک نہ کرے آپ اُسے دنیا ترک

(ذوق)

 
جو ہے سو پست سب سے عالی تو ہے
شایاں صفاتِ ذوالجلالی تو ہے
ناقص ہے ہر اک کمال تیرے آگے
سب کو ہے زوال یا یزالی تو ہے

(میر مہدی مجروح)

تن کی ہستی کو ’چھو‘ نہ کر دوں تو سہی
میدانِ ہوا کو ہو نہ کر دوں تو سہی
ملتا نہیں مجھ سے اگر خیر نہ مل
میں بھی اس ’مَیں‘ کو ’توٗ‘ نہ کر دوں تو سہی

۔۔امجد حیدر آبادی
 
ارب تو گناہوں کو چھپانا میرے
اس حالِ زبوں پہ رحم کھانا میرے
محشر میں نہ ہوگی منہ دکھانے کی جگہ
جو میں نے کیا ، نہ منہ پہ لانا میرے

(مہدی مجروح)

غم سے ترے اپنا دل نہ کیوں شاد کروں
جب تو سنتا ہے، کیوں فریاد کروں
میں یاد کروں تو توٗ مجھے یاد کرے
توٗ یاد کرے تو میں نہ کیوں یاد کروں

۔۔امجد حیدر آبادی
 

اسباب ہیں ایسے کہ پراگندہ ہوں
اور شرم معاصی سے سرافگندہ ہوں
یا ارحم الراحمین کرم کی ہو نگاہ
گو غرقِ گناہ ہوں پر ترا بندہ ہوں

(مہدی مجروح)

یوں زیست نہ اپنی ہم کو بھاری ہوتی
کلفت بھی ، خوشی بھی، باری باری ہوتی
ہوتے نہ اگر، ہم آپ اپنے دشمن
یُوں تلخ نہ زندگی، ہماری ہوتی

(سید جعفر علی لکھنوی رواں)
 
کچھ اپنا پتا اس نے بتایا تو نہیں
اب تک اس کا سراغ پایا تو نہیں
ملتی ہوئ ہے دل کی کھٹک آہٹ سے
دیکھو۔۔ دیکھو۔۔ کہیں وہ آیا تو نہیں

امجد حیدر آبادی

دولت وہ ہے جو عقل و محنت سے ملے
لذت وہ ہے کہ جوش صحت سے ملے
ایمان کو ہو نور دل میں وہ راحت ہے
عزت وہ ہے جو اپنی ملت سے ملے

(اکبر الہ آبادی)
 
اونچا نیت کا اپنی زینہ رکھنا
احباب سے صاف اپنا سینہ رکھنا
غصہ آنا تو نیچرل ہے اکبر
لیکن ہے شدید عیب کینہ رکھنا

(اکبر الہ آبادی)

ہو علم اگر نصیب تو تعلیم بھی کر
دولت جو ملے اُسے تقسیم بھی کر
اللہ عطا کرے جوعظمت تجھ کو
جو اہل ہیں اس کے ان کی تعظیم بھی کر

(اکبر الہ آبادی)

 

یہ رُوح نہ بندِ غم سے آزاد ہوئی
دم بھر بھی نہ طبعِ مضمحلِ شاد ہوئی
خالی نہ رہی ہمارے دل کی بستی
امید گئی تو یاس آباد ہوئی

(رواں)

غافل یہ نشاطِ زندگانی کب تک
ہنگامۂ کیفِ نوجوانی کب تک
اس شورش بیجا کی کوئی حد بھی ہے
آخر کب تک یہ لن ترانی کب تک

(عرش ملیح آبادی)

 

پیری آئی اعضا سب چور ہوئے
یارانِ شباب پاس سے دور ہوئے
رہتی ہے کفن کی یاد ہر وقت انیس
جو مشک سے بال تھے وہ کافور ہوئے

(میر انیس)

نیرنگی قدرت کے تماشے دیکھے
کیا کیا تری صنعت کے تماشے دیکھے
اک شکل کی لاکھوں میں نہیں دو شکلیں
کثرت میں بھی دیکھے وحدت کے تماشے

(عرش ملیح آبادی)

دُنیا میں نفاق کا ہے شکوہ کیسا
ہے کوشش اتفاق سعئ بیجا
شکلیں ہیں جدا رنگ طبائع بھی الگ
انساں میں ہے اختلاف ازل سے پیدا

(محشر)

کیا پایا اگر کوئے صنم میں بیٹھے
کیا مل گیا جا کر جو حرم میں بیٹھے
دل مطمئن اُس وقت ہوا اے محشر
جس وقت کے آخرت کے غم میں بیٹھے

(محشر)

حاکم کیسا اگر عدالت نہ ہوئی
محکوم وہ کیا اگر اطاعت نہ ہوئی
کس کام کی آنکھ اگر مروت نہ ہوئی
وہ آدمی کیا گر آدمیت نہ ہوئی

(محشر)

ہم عمرِ عزیز اس طرح کھوتے ہیں
سب جاگتے اور ہم پڑے سوتے ہیں
تدبیرِ ترقی میں ہے عالم مصروف
بیٹھے ہوئے تقدیر کو ہم روتے ہیں

(محشر)

دو دن کی حیات اور عشرت طلبی
درگاہ ہوس سے ہے مصیبت طلبی
غافل یہ کہے دیتے ہیں آگے تو جان
دنیا طلبی ہے عین آفت طلبی

(محشر)

دل میں ہوسِ درہم و دینار نہ رکھ
خم پشت ہے عصیاں کا بہت بار نہ رکھ
پیری میں سر اِس غرض سے ہلتا ہے صفی
یعنی دنیا سے اب سروکار نہ رکھ

(مولانا صفی لکھنوی)

 
ملتا ہوں تو سر پہلے جھکا لیتا ہوں
پھر فرشِ دل و چشم بچھا لیتا ہوں
کچھ ایسی ہے افتادِ طبیعت اپنی
دشمن کو بھی میں دوست بنا لیتا ہوں

(نجم ندوی)

قائل ہم بھی ہیں دوزخ و جنت کے
معنی کے ہیں معتقد نہیں صورت کے
دوزخ؟ تاریکیاں تری دوری کی
جنت انوار ہیں تری قربت کے

(تلوک چند محروم)

 
غافل جو شباب میں نہیں دانا ہے
اپنا جو اُسے کہے وہ دیوانہ ہے
رہتی ہی نہیں سبزۂ عارض کی بہار
یہ رنگ ہے عارضی وہ بیگانہ ہے

(ناظر حسین خاں)

کیا افسرِ جمشید ہے کیا دولت کَے
بیکار ہے زر فشانیِ حاتم طَے
میں بادہ گسار ہوں مجھے کافی ہے
یا ساغر ماہتاب یا ساغر مَے

(عابد لاہوری)

 
نظارہ بیدار بھی مہمل ٹھہرا
ہے ایک سے بڑھ کے ایک پردہ گہرا
افسانۂ شاہدِ حقیقت باطل
کہتا گونگا ہے اور سُنتا بہرا!

(مرزا یگانہ چنگیزی لکھنوی)

پیری سے بدن زار ہوا زاری کر
دنیا سے انیس اب تو بیزاری کر
کہتے ہیں زبانِ حال سے موئے سپید
ہے صبحِ اجل کوچ کی تیاری کر

(میر انیس)

 
آغوشِ لحد میں جبکہ سونا ہوگا
جُز خاک نہ تکیہ نہ بچھونا ہوگا
تنہائی میں آہ کون ہووے گا انیس
ہم ہووینگے اور قبر کا کونا ہوگا

(میر انیس)

نافہم سے کب دادِ سخن لیتا ہوں
دشمن ہو کہ دوست سب کی سُن لیتا ہوں
چھپتی نہیں بوئے دوستاں یک رنگ
کانٹوں کو ہٹا کے پھول چُن لیتا ہوں

(میر انیس)

 
کس مُنہ سے کہوں لائق تحسیں میں ہوں
کیا لطف جو گُل کہے کہ رنگیں میں ہوں
ہوتی ہے حلاوتِ سخن خود ظاہر
کہتی ہے کہیں شکر کہ شیریں میں ہوں؟

(میر انیس)

بے قیدِ زمانی و مکانی کوئی
دل میں ہے دمکتی راجدھانی کوئی
اِمکان و مُحال کے مباحث سے وَرا
اے مُطربِ جاں ، رام کہانی کوئی!

(ٍ حبیب الرحمٰن)

 

خاموشی میں یاں لذتِ گویائی ہے
آنکھیں ہیں بند عین ِ بینائی ہے
نہ دوست کا جھگڑا ہے نہ دشمن کا فساد
مرقد بھی عجب گوشۂ تنہائی ہے

(میر انیس)

محفل میں پہن آبِ رواں کی پوشاک
یوں رقص کرے اب وہ شوخ و بے باک
تیرے ہے شمار دم سے دریا میں کھڑا
ہاتھ اپنے اٹھا کے دونوں جیسے تیراک

(شاہ نصیر)

بدلی ہے زمانے کی ہوا و تاثیر
صد چاک کروں کیوں نہ گریباں کو نصیر
آنسو کو سمجھتا تھا میں نور دیدہ
آخر کو ہوا یہ بھی مرا دامن گیر

(شاہ نصیر)

شب ، خواب میں کیا عِقدِ ثُریّا ڈولے!
صبح آئے تو تعبیر کی نیّا ڈولے
رفتار کی تیزی نے سنبھالا ہُوا ہے
ممکن نہیں تقدیر کا پیّا ڈولے

(قاضی حبیب الرحمٰن)

غائب بہت اے جان جہاں رہتے ہو
مانند نظر ہم سے نہاں رہتے ہو
ہر چند کہ آنکھوں میں ہو تم، دل میں ہو تم
معلوم نہیں پر کہ کہاں رہتے ہو

(امیر مینائی)

ہر شاخ پہ یہ شورِ عنادل کیا ہے؟
ہر موجِ صبا ، موجِ سلاسل ، کیا ہے؟
ہر منظرِ خوش دیکھ کے غمگیں رہنا
کُھلتا نہیں کچھ کہ یہ مرا دل ، کیا ہے!

(قاضی حبیب الرحمٰن)

مسجد میں تو شیخ کو خروشاں دیکھا
میخانہ میں جوشِ بادہ نوشاں دیکھا
یک گوشۂ عافیت جہاں میں ہم نے
دیکھا سو محلّۂ خموشاں دیکھا

(میر تقی میر)

کیا تیری جدائی میں ستم دیکھتے ہیں
دیکھے نہ وہ دشمن بھی جو ہم دیکھتے ہیں
اس ظلم پہ اس جور پہ خاموش رہے
ایسا تو جہاں میں کوئی کم دیکھتے ہیں

(امیر مینائی)
٭٭٭
ترتیب: محمد وارث، کاشفی، نوید صادق، اعجاز عبید، فرخ منظور اور دوسرے
http://www.urduweb.org/mehfil/showthread.php?12129-اردو-رباعیات/
تدوین اور ای بک کی تشکیل: اعجاز عبید