رنگ برنگ طلسم

رفیق سندیلوی

جمع و ترتیب: اعجاز عبید

کسی رُخ کی سمت نہیں اُڑا

گُلِ اِنفصال پذیر ہوں
مَیں نے تیری شاخ سے ٹوٹ کر
کسی اور باغ کا رُخ کیا
تو کھُلا کہ خو شبو جو مجھ میں تھی
بڑے خاص طرز و حساب کی
کسی آبِ جذب میں تیرتے ہوئے خواب کی
مرے رنگ و روغنِ جسم میں
جو عمیق نوع کا درد تھا
مَیں کہیں کہیں سے جو سُرخ تھا
مَیں کہیں کہیں سے جو زرد تھا
مرے زرد و سُرخ کے درمیاں
وہ جو اِک حرارتِ لمس تھی
وہ فنا ہوئی
!مری پتّی پتّی بکھر گئی

وہ دھُندَلکا تھا کسی صبح کا یا کہ شام کا
مَیں پڑا تھا خشک زمین پر
تری شاخِ سبز کے دھیان میں
کہ عجیب واقعہ ہو گیا اُسی آن میں
مری پتّی پتّی جو اِنقطاع کے دُکھ میں تھی
وہ ہوائے غیب کے زور سے
اُسی ضبط و بست میں آ گئی
وُہی ضبط و بست جو مجھ میں تھا
وُہی کیفِ ہست جو مجھ میں تھا
مَیں دوبارہ جمع ہوا تو پھر
تری شاخِ تَر کی طرف اُڑا
عجب اِک نشاطِ مراجعت مرے دِل میں تھی
مرے زرد و سُرخ کے درمیان کے تِل میں تھی
یہ خیال تھا
فقط ایک دِن کی مَسافرت پہ تو وصل ہے
مری اصل ہے
مگر اب کے بیچ کا فاصلہ
کئی نوری سال میں طے ہوا
وہاں پہنچا، دیکھا تو اُس جگہ
تری شاخ تھی نہ ہی باغ تھا
وہ جو تھی نشاطِ مراجعت
وہ جو اِنسِلاک کی تھی خوشی
وہ فنا ہوئی
مری پتّی پتّی جو جُڑ گئی تھی
! پھر ایک بار بکھر گئی

وہ دھُندَلکا تھا کسی صبح کا یا کہ شام کا
مَیں اُسی طرح ہی پڑا تھا خشک زمین پر
تری شاخِ تَر، تری شاخِ سبز کے دھیان میں
کہ عجیب واقعہ ہو گیا اُسی آن میں
مری پتّی پتّی
جو اِنقطاع کے دُہرے غم میں نڈھال تھی
وہ ہوائے غیب کے زور سے
پھر اُسی طرح ہی کے ضبط و بست میں آ گئی
وُ ہی ضبط و بست جو مجھ میں تھا
وُ ہی کیفِ ہست جو مجھ میں تھا
مگر اَب کے یک جا ہوا تو مَیں
کسی رُخ کی سمت نہیں اُڑا
وہیں اَپنے روغنِ حُسن میں
وہیں اَپنے حجلۂ رنگ میں
وہیں اَپنے مرکزِ درد میں
وہیں اَپنے سُرخ میں، زرد میں
وہیں اَپنے مُشکِ وُجود ہی میں پڑا رہا
کسی رُخ کی سمت نہیں اُڑا!!
٭٭٭

یہ ماتم کی شبِ سوئم

یہ ماتم کی شبِ سوئم
تھکا ماندا،جنازہ گاہ سے لوٹا ہوا چہرہ
لہو،جیسے کسی کائی زدہ تالاب کو
جاتا ہُوا زینہ
فسردہ نیم روشن صحن میں
روتی ہوئی مدقوق آنکھیں
دھُول سے لتھڑی ہوئی سانسیں
بَرہنہ پاؤں کے تلوے میں چبھتا
درد پہنچاتا
کوئی خارِ حزیں پیہم
یہ ماتم کی شبِ سوئم

شبِ سوئم
یہ کیا کھانے سجا کر لائے ہو تم طَشتری میں
سوگ میں کھایا نہیں جاتا
غذا توہین ہے غم کی
قسم لے لو جو میں نے تین دِن سے
گھونٹ بھر پانی پیا ہو
اک نوالہ حلق سے نیچے نہیں اُترا
مجھ ایسے سوگ واروں سے تمہیں ملنا نہیں آیا
اُٹھا لو یہ مُزین طشتری
مشروب کا کوزہ ہٹا لو میرے آگے سے
ابھی کچھ تھوڑا سا گیہوں مرے گھر میں پڑا ہے
اور چوکی پر رکھی کچی صراحی میں
ابھی سوکھا نہیں
چشمے کا نتھرا شہد سا پانی
ابھی محرابِ دل کے بیچ
روشن ہے چراغِ زندگانی
٭٭٭

مراتبِ وجود بھی عجیب ہیں

اچانک اِک شبیہ
بے صدا سی جَست بھر کے
آئنے کے پاس سے گزر گئی
سیاہ زرد دھاریاں
کھ جیسے لہر ایک لہر سے جڑی ہوئی
سنگار میز ایک دم لرز اُٹھی
کلاک کا طلائی عکس بھی دہل گیا
بدن جو تھا بخار کے حصار میں پگھل گیا

مراتبِ وجود بھی عجیب ہیں
لہو کی کونیات میں
صفات اور ذات میں
عجب طرح کے بھید ہیں
یقین و ظن کی چھلنیوں میں
سو طرح کے چھید ہیں
ابھی تو جاگتا تھا میں
عمیق درد میں کراہتا تھا مَیں
پھر آنکھ کیسے لگ گئی
ابھی تہ سو رہا تھا مَیں
پھر آنکھ کیسے کھُل گئی
بدن سے یہ لحاف کا پہاڑ کیسے ہَٹ گیا
خبر نہیں کہ ہڈیوں کے جوڑ کس طرح کھلے
دَہن فراخ ہو کے، پیچھے کیسے کھنچ گیا
نکیلے دانت کس طرح نکل پڑے
نگاہیں کیسے شعلہ رُو ہوئیں
نہ جانے کیسے دَست و پا کی انگلیاں مُڑیں
کمر،لچک سی کھا کے کیسے پھیلتی گئی
یہ جلد کیسے سخت کھال میں ڈھلی
یہ گھُپے دار دُم کہاں سے آ گئی

وجود کے کچھار میں
دہاڑتا ہوا
زقند بھر کے میں کہاں چلا گیا
مجھے تو کچھ پتا نہیں
مراتِبِ وجود بھی عجیب ہیں
٭٭٭

عجب پانی ہے

عجب ملاح ہے
سوراخ سے بے فکر
آسن مار کے
کشتی کے اِک کونے میں بیٹھا ہے
عجب پانی ہے
جو سوراخ سے داخِل نہیں ہوتا
کوئی موجِ نہفتہ ہے
جو پیندے سے
کسی لکڑی کے تختے کی طرح چِپکی ہے
کشتی چل رہی ہے
سر پھری لہروں کے جھولے میں
ابھی اوجھل ہے
جیسے ڈوبتی ،اب ڈوبتی ہے
اب نظر کے سامنے ہے
جیسے بطنِ آب سے
جیسے تلاطم کی سیاہی سے
ابھی نکلی ہے
جیسے رات دن
بس ایک ہی عا لَم میں
کشتی چل رہی ہے

کیا عجب کشتی ہے
جس کے دم سے یہ پانی رواں ہے
اور اس ملاح کا دل نغمہ خواں ہے
کتنے ٹاپُو راہ میں آئے
مگر ملاح
خشکی کی طرف کھنچتا نہیں
نظارۂ رقصندگیِ خواب میں
شامل نہیں ہوتا
عجب پانی ہے
جو سوراخ سے داخل نہیں ہوتا
٭٭٭

خواب مزدور ہے

خواب مزدور ہے
رات دن سر پہ بھاری تغاری لئے
سانس کی
بانس کی
ہانپتی کانپتی سیڑھیوں پر
اُترتا ہے
چڑھتا ہے
رُو پوش معمار کے حکم پر
ایک لا شکل نقشے پہ اُٹھتی ہوئی
اوپر اٹھتی ہوئی
گول دیوار کے
خِست در خِست چکر میں محصور ہے
خواب مزدور ہے

ایک مُشقت زدہ آدمی کی طرح
میں حقیقت میں یا خواب میں
روز معمول کے کام کرتا ہوں
کچھ دیر آرام کرتا ہوں
کانٹوں بھری کھاٹ میں
پیاس کے جام پیتا ہوں
اور سوزنِ ہجر سے
اپنی ادھڑی ہوئی تن کی پوشاک سیتا ہوں
جیتا ہوں
کیسی انوکھی حقیقت ہے
کیسا عجب خواب ہے
ایک مشقت زدہ آدمی کی طرح
اپنے حصے کی بجری اٹھانے پہ مامور ہے
خواب مزدور ہے
٭٭٭

اگر میں آگ ہوتا

اگر میں آگ ہوتا
سرخ شعلوں کی لپک سے
جست بھرتا
نیل گوں ہالہ بنا کے
موج میں آ کے
تپش کی نرم انگلی لب پہ رکھتا
ایک انگارے کا بوسہ ثبت کرتا
دستِ حدت سے ترا شانہ تھپکتا
گرم پوروں سی بنفشی لاٹ سے
زلفوں کو سہلاتا
تمازت کے دہکتے بازوؤں میں
تجھ کو بھر لیتا
شراروں کا تنفس پھونکتا
لو کی ہتھیلی سے
ترے رخسار چھوتا،تھپتھپاتا
آگ کے سارے کرشمے آزماتا
راکھ کرتا
راکھ ہوتا
تیرے سینے سے لپٹ کر
فجر تک روتا
اگر میں آگ ہوتا
٭٭٭

میں نے دروازہ نہیں کھولا تھا

میرے دروازے پہ سہ بار ہوئی تھی دستک
میں نے دروازہ نہیں کھولا تھا
ایک بھی لفظ نہیں بولا تھا
پہلی دستک میں
کوئی بھید نہیں تھا لیکن
دوسری مرتبہ دستک میں
چھپی تھی حیرت
تیسری بار کی دستک سے
عیاں ہوتا تھا
کوئی دہشت زدہ مفرور کھڑا ہو جیسے
اک جنازہ میری چوکھٹ پہ پڑا ہو جیسے
ایسے آواز میں تھیں
درد و الم کی لہریں
جس طرح کوئی پنہ گاہ کے بالکل نزدیک
زہر میں ڈوبے ہوئے تیر سے
چھلنی ہو کر
آخری سانس کو
سینے میں سنبھالے پھر بھی
جسم ،بے انت اندھیرے کے سمندر میں گِرے
اور اک بپھری ہوئی
موجِ کفِ مرگ کے ہمراہ بہے
جس طرح کوئی گھِرا ہوتا ہے
آگ کے دشتِ خطرناک میں
سر سے پا تک
میرے دروازے پہ سہ بار ہوئی تھی دستک
میں نے دروازہ نہیں کھولا تھا
ایک بھی لفظ نہیں بولا تھا
٭٭٭

کہانی علامت بنے گی

کہانی علامت بنے گی
کہ پچھلا زمانہ
ہماری جبینوں پہ
شکنوں کی صورت میں لکھا ہوا ہے
بہت ہی پرانی کسی داستاں میں
شجاعت کے قصے
بدوشِ ہوا اک پری کا
منقش سبک نقرئی تخت پر
بیٹھ کر سیر کرنا
طلسمی کنویں میں
اسیری کی راتیں
اناروں سے شوخ اور رنگین چڑیوں کا
اک ساتھ باہر نکلنا
گھنی آگ کے بیچ
فرشِ مدور پہ رقصِ شبانہ
وہ چوتھی جہت مشکی گھوڑا بھگانا
کہانی علامت بنے گی
کہ پچھلا زمانہ
مکانِ فسوں ارضِ حیرت سرا ہے
سوارِ جواں پر
کوئی کارِ رفتہ نہیں کھل رہا ہے
نہ سیمرغ کا رازِ خفتہ
نہ کوہِ ندا کا فسانہ
کہانی علمت بنے گی
کہ پچھلا زمانہ
کسی سنت سادھو کی
لمبی جٹاؤں میں الجھا ہوا ہے
٭٭٭

اسے پکارو

اسے پکارو جو نیند موسم میں سوئے چہرے جگا گیا تھا
وہ جس کی سانسیں طویل راتوں کی ہمسفر تھیں
اسے پکارو کہ پھر سے آنکھوں کو خواب سانپوں نے ڈس لیا ہے
بدن کے گنبد میں خواہشوں کا لہو کبوتر پھڑک رہا ہے
نگاہیں اپنے پھٹے دوپٹے کے زرد پلو میں زہر باندھے
رگوں میں کھوئے ہوئے مناظر کی جستجو میں بھٹک رہی ہیں
اسے پکارو جو ذات کشتی کا بادباں تھا
وجود ساحل پہ جس کے ہاتھوں کی خوشبوئیں تھیں
اسے پکارو کہ کشتِ جاں پہ عذاب بادل برس رہا ہے
زبان تختی پہ ذائقوں کے قلم نے پھر سے
کسیلی کڑوی رتوں کا قانون لکھ دیا ہے
سماعتوں میں حروف جنگل جھلس رہا ہے
اداس جذبوں کی کوٹھڑی میں اندھیرا بڑھتا ہی جا رہا ہے
اسے پکارو کہ سانس خیمہ اکھڑ رہا ہے
بدن حرم سے ستون چہرہ بچھڑ رہا ہے
اسے پکارو جو نیند موسم میں سوئے چہرے جگا گیا تھا
٭٭٭

نیند کی جانب قدم

گنگ سانسیں
پتھروں کا ایک ڈھیر
بیلچے ہاتھوں میں تھامے بانجھ موسم کی پکار
روشنی دیوار کے اندر گئی
واپس ہوئی
ہم نشینی،رات کا پچھلا پہر
نیند کی جانب قدم
میں سمندر اوڑھ کر ساحل پہ ہوں
آنکھ کو دیمک لگی
بانس کے ویران جھنڈ
گیدڑوں کی ہاؤ ہو
بکریوں کے پیٹ سے
میمنے پیدا ہوئے اور مر گئے
بارش شب سے کلس نہلا گیا
کہکشاں رونے لگی
بد دعائیں منتقل ہونے کی گھنٹی بج گئی
سر خمیدہ شہر سیدھا ہو گیا
شاہ رگ سے دھڑکنیں رسنے لگیں
میں نے اپنے آپ سے وعدہ کیا
اور سمندر اوڑھ کر پھر سو گیا
٭٭٭

ہونے کا خدشہ

ڈرو کہ سب خاکروب ہاتھوں میں گرد لے کر
گلاب ہاتھوں،بہار چہروں کو ڈھونڈتے ہیں
ڈرو کہ مکتب کے راستے پر
جلوس نا خواندگاں کتابوں کو برچھیوں میں پرو رہا ہے
تمام بچوں کو خندقوں میں چھپا کے مکتب کے سب معلم
نئی کتابوں میں اقتباس محافظت کو تلاش کرنے میں منہمک ہیں
ڈرو کہ پکی حویلیوں کو اکھاڑ دینے کا عزم لے کر
ہزاروں خانہ بدوش تیشوں سے چوکھٹوں پر توانا ضربیں لگا رہے ہیں
ڈرو کہ اب اونٹ اپنی کروٹ بدل رہا ہے
٭٭٭

ماتھوں پہ سینگ

وہ طلسم تھا جو تمام بستی پہ قہر تھا
کوئی زہر تھا جو رگوں میں سب کی اتر گیا
تو بکھر گیا وہ جو بوریوں میں اناج تھا
کوئی ڈاکو لوٹ کے لے گیا جو دلہن کا قیمتی داج تھا
وہ سماج تھا کہ سبھی کے دل میں یتیم ہونے کا خوف تھا
کوئی ضعف تھا کہ جو آنگنوں میں مقیم تھا
وہ رجیم تھا کہ تمام بستی پہ آگ تھا
کوئی راگ تھا جو سماعتوں پہ عذاب تھا
وہ عتاب تھا کہ سبھی کے ماتھوں پہ سینگ تھے
٭٭٭

انتباہ

میں اپنے وطن سے بغاوت کروں تو
مجھے قتل کرنا
اگر اپنے بھائی کے ورثے کو لوٹوں
تو تم میری آنکھوں میں کانٹے چبھونا
خمیدہ کمر بوڑھے ماں باپ کو میں سہارا نہ دوں تو
مجھے قید کرنا، زد و کوب کرنا
اگر میرا ہمسایہ بھوکا رہے تو
مجھے فاقہ زدگی سے دوچار کرنا
اگر میرے بیٹے کو میری وجہ سے برائی لگے تو
سلاخوں کے پیچھے مجھے بیڑیوں میں جکڑ کر مشقت کرانا
میں سب کچھ سمجھتے ہوئے بھی
اگر اپنی بیٹی کی خوشیوں کا قاتل بنوں تو
مجھے بد دعاؤں سے محصور کرنا
مجھے ٹکٹکی پر چڑھانا
میں چوری کروں تو
میرے ہاتھ تلوار سے کاٹ دینا
میں عورت کی عصمت دریدہ کروں تو
زمیں میں مجھے گاڑ دینا
مجھے سنگساری سے معتوب کرنا
اگر جرم ہو جائیں ثابت تو مجھ پر
بھیانک سزاؤں کا اطلاق کرنا
مگر یاد رکھنا
مری بے گناہی کی تصدیق کر کے
اگر تم نے مجھ کو صلیبوں پہ کھینچا
تو میں آخری سانس تک تم سے لڑتا رہوں گا
٭٭٭

تم بھی جاناں کیسے ہو

تم بھی جاناں کیسے ہو
پل پل ڈرتے رہتے ہو
پردہ دار بدن کے اندر
آگے پیچھے سوچ سمندر
ریت کنارے بیٹھے ہو
تم بھی جاناں کیسے ہو
چادر ڈال کے چہرے پر
شب کی اوٹ میں چلتے ہو
خواب دلہن کی ڈولی میں
اپنے لمس کی جھولی میں
خود کو چومتے رہتے ہو
تم بھی جاناں کیسے ہو
خوب نہا کر پانی سے
کپڑے اوڑھ کے دھانی سے
اپنے آپ کو تکتے ہو
تم بھی جاناں کیسے ہو
لیکن رات کو بستر میں
تنہا ذات کے مندر میں
سن کر بھجن اندھیرے کے
دھاڑیں مار کے روتے ہو
اپنے حسن کے سونے کو
بھربھری مٹی کہتے ہو
تم بھی جاناں کیسے ہو
٭٭٭

ٹیلے سے قبرستان تک

میتوں کے زرد چہروں پر جمی تھی
موٹے بھدے چاند کی مریل نکھٹو روشنی
ایک ماتم تھا کہ جس میں منہمک اشجار تھے
صحن تھے خاموش ،سکتے میں درو دیوار تھے
ایک کالی رات تھی جو شہر میں آباد تھی
اپنی اپنی موت ہی ہر ذی نفس کو یاد تھی
راستہ بے ہوش تھا ٹیلے سے قبرستان تک
گورکن نوحہ کناں تھے، زندگی نرغے میں تھی
الوؤں کے غول اڑتے تھے دریچوں کی طرف
شہر سے باہر سمندر گونجنے میں محو تھا
٭٭٭

اس رات بڑی خاموشی تھی

میں اس کو ڈھونڈنے نکلا تو
اس رات دریچے خالی تھے
اور سڑکوں پر ویرانی تھی
آکاش کے نیلے ماتھے سے
مہتاب کا جھومر غائب تھا
اس رات بڑی خاموشی تھی
میں اس کو ڈھونڈنے نکلا تو
رستے کے بیچ سمندر تھا
اور اس کے پار پہاڑی تھی
مرے سر پر بوجھ تھا صدیوں کا
اور ہاتھوں میں کلہاڑی تھی
کچھ دور کنارے جوہڑ کے
بس مینڈک ہی ٹراتے تھے
اور پیڑ کے پتوں سے کیڑے
اک ساعت میں گر جاتے تھے
میں اس کو ڈھونڈنے نکلا تو
اس رات بڑی خاموشی تھی
٭٭٭

جب پوَ پھٹی

ابھی کچھ دیر تھی پوَ پھوٹنے میں
گرم بستر چھوڑ کر
جب گھر کی چوکھٹ پار کی میں نے
تو سارا شہر سویا تھا
کہ جیسے اک کویا تھا
جس کی تہ میں ہست و بود کا ریشم
سیاہی کے عجب اسرار میں لپٹا ہوا تھا
اک قدیمی دشت کی مہکار میں لپٹا ہوا تھا
ایسے لگتا تھا
کہ جیسے راستوں،
کھیتوں،مکانوں اور درختوں پر
فُسوں پھونکا گیا ہو
وقت جیسے
اک خُمارِ رَفت میں ڈوبا ہوا ہو
شش جِہَت پر رنگ اِستمرار کا پھیلا ہُوا ہو
لا مَکاں کی کُہنگی میں
دھُند کی لَب بستگی میں
خَلق اَپنی خواب گاہوں میں
دبک کر سو رہی تھی
آسماں پر
چاند کی ضَو ماند پڑتی جا رہی تھی
ایک سناٹے کا عالَم تھا
چراغوں کی لَویں بجھنے کو تھیں
اِمکانِ باراں تھا
گلی کے عَین اُوپر ابَر کے ٹکڑے
فضا میں تیرتے تھے
میں زَمستانی ہوَا میں کپکپاتا
بار بار اپنے سیہ کمبل کے گِرتے پلوؤں کو
پُشت و سینہ پر جماتا
پُر سُکوں اَنداز میں خوابیدہ
بچوں کے ہیوُلے
اشک بار آنکھوں کے پَردوں سے ہٹاتا
لَب ہی لَب میں بَڑبَڑاتا
ساحِل دریا پہ پُہنچا
ناؤ میں بیٹھا!
ابھی کچھ دیر تھی پَو پھُوٹنے میں
دوسرے ساحِل پہ جانے کی کشش نے
موج کے ریلے نے
میری ناؤ کو آگے بڑھایا
صبح کا تارا اَچانک جھِلملایا
ناؤ،پانی،بادباں،چپو،اندھیرا
اور غُنُودہ جسم میرا
سب عناصِر ایک عُنصر میں ڈھلے
دل میں کچھ پُرانی یاد کے پھُول
شاخوں پر کھِلے
پھر پَو پھٹی
پھر دوپہَر کی دھُوپ پھیلی
سہ پہَر کے سایے رینگے
شام دھل آئی
اَندھیرا چھا گیا
اور سینکڑوں راتوں کے
اِک لمبے سفر کے بعد
ساحِل آگیا!

جب اگلے دن کی پَو پھٹی گھر میں صفِ ماتم بچھی ٭٭٭

اسی آگ میں

اسی آگ میں
مجھے جھونک دو
وہی آگ جس نے بلایا تھا
مجھے ایک دن
دمِ شعلگی
دمِ شعلگی میرا انتظار کیا بہت
کئی خشک لکڑیوں شاخچوں کے حصار میں
جہاں برگ و بار کا ڈھیر تھا
دمِ شعلگی
مجھے ایک پتے نے یہ کہا تھا گھمنڈ سے
ادھر آ کے دیکھ
کھ اس تپیدہ خمار میں
ہمیں ہم ہیں
لکڑیوں شاخچوں کے حصار میں
یہاں اور کون وجود ہے
یہاں صرف ہم ہیں رکے ہوئے
کہیں آدھے اور
کہیں پورے پورے جلے ہوئے
دمِ شعلگی ہمیں جو مسرتِ رقص تھی
تمہیں کیا خبر
اگر آگ تم کو عزیز تھی
تو یہ جسم کونسی چیز تھی
جسے تم کبھی نہ جلا سکے
وہ جو راز تھا پسِ شعلگی نہیں پا سکے
سو کہا تھا میں نے یہ ایک ادھ جلے برگ سے
مجھے دکھ بہت ہے کہ آگ نے
میرا انتظار کیا بہت
مگر ان دنوں کسی اور طرز کی آگ میں
میرا جسم جلنے کی آرزو میں اسیر تھا
مگر ان دنوں میں نہ جل سکا
میں نہ جون اپنی بدل سکا
مگر اب وہ آگ
کہ جس میں تم نے پناہ لی
جہاں تم جلے
جہاں تم کھلے
جہاں تم عجیب سی لذتوں سے گلے ملے
اسی آگ میں مجھے جھونک دو
٭٭٭

رنگ برنگ طلسم

چاند ستارے
پھول بنفشی پتے
ٹہنی ٹہنی جگنو بن کر
اڑنے والی برف
لکڑی کے شفاف ورق پر
مور کے پر کی نوک سے لکھے
کالے کالے حرف
اجلی دھوپ میں
ریت کے روشن ذرے
اور پہاڑی درے
ابر سوار سہانی شام
اور سبز قبا میں
ایک پری کا جسم
سرخ لبوں کی شاخ سے جھڑتے
پھولوں جیسے اسم
رنگ برنگ طلسم
جھیل کی تہ میں
ڈوبتے چاند کا عکس
ڈھول کی وحشی تال پہ ہوتا
نیم برہنہ رقص
کیسے کیسے منظر دیکے
ایک کروڑ برس پہلے کے
غار میں بیٹھا شخص
٭٭٭

کیک کا ایک ٹکڑا

کہنہ تر زین بدلی گئی
پھر نئی نعل بندی ہوئی
اور فرس ہنہنایا
سوار اب سواری پر مجبور تھا
میں اکیلا عزا دار
کتنے یگوں سے
اٹھائے ہوئے
جسم کا تعزیہ
خود ہی اپنے جنم دن پہ مسرور تھا
کپکپاتی چھری
کیک کو وسط تک
چیر کر رک گئی
دل لرزنے لگا
ضعف کی ماری پھونکوں نے
ایک ایک کر کے
بھڑکتی لووں کو بجھایا
عزیزوں نے
بچوں نے
تالی بجائی
مبارک مبارک ہوئی
کیک کا ایک ٹکڑا
مرے منھ میں ٹھو نسا گیا
نعل کی شکل کا
٭٭٭

جیسے کوزہ نہیں جانتا

جیسے کوزے پہ جھک کر
کبھی روشنی کی مرصع صراحی نے
دو گھونٹ امرت انڈیلا نہیں
جیسے کوزہ نہیں جانتا
اک جھری
نوک سوزن سی پتلی لکیر
اس کے پیندے پہ ہے
کیسے محفوظ رکھے گا پانی
جو اندھے کنووں سے
ہوا کھانستی ٹونٹیوں
بے نمو گھاٹیو ںسے
چٹانوں کی باریک درزوں
تڑختی زمیں کی دراڑوں سے
قطرہ بہ قطرہ
اکٹھا ہوا

جیسے کوزہ نہیں جانتا
آب زر
منبع نور سے
اک تسلسل کے عالَم میں
بوندوں کی صورت
ٹپکتا ہے
تر کرتا رہتا ہے

پیاسوں کے لب
پر بُجھاتا نہیں ایک دم تشنگی
ایک میقات ہوتی ہے
کوزے کی
بھرنے کے رسنے کے مابین
اک را ت ہوتی ہے
٭٭٭

بڑا چکر لگائیں

کسی دن آ
پرانی کھائیوں کو پار کر کے
دلدلوں میں پاؤں رکھیں
نرسلوں کو کاٹ ڈالیں
پیش منظر کے لیے رستہ بنائیں
آ کسی دن
دھند میں جکڑی ہوئی
کانٹوں بھری یہ باڑ
جس میں وقت کی بجلی رواں ہے

جو زمین و آسماں کو کاٹتی ہے بیچ سے

اس کو ہٹائیں
آ کسی دن
جھولتے پُل سے اتر کر
نقشۂ تقویم میں
پُر پیچ کہساروں کے اندر
جھاگ اُڑاتی
شور کرتی
بَل پہ بَل کھاتی ندی میں
غوطہ زن ہوں
تیرتے جائیں

کسی دِن آ
بڑا چکّر لگائیں!
٭٭٭

جاؤ اب روتے رہو

تم نہیں جانتے
اس دھند کا قصہ کیا ہے
دھند جس میں کئی زنجیریں ہیں
ایک زنجیر
کسی پھول،کسی شبد
کسی طائر کی
ایک زنجیر کسی رنگ،کسی برق
کسی پانی کی
زلف و رخسار
لب و چشم کی،پیشانی کی
تم نہیں جانتے
اس دھند کا زنجیروں سے رشتہ کیا ہے
یہ فسوں کار تماشا کیا ہے!

تم نے بس دھند کے اس پار سے
تیروں کے نشانے باندھے
اور ادھر میں نے تمھارے لیے
جھنکار میں دل رکھ دیا
کڑیوں میں زمانے باندھے
جاؤ اب روتے رہو
وقت کے محبس میں
خود اپنے ہی گلے سے لگ کر
تم مرے سینۂ صد رنگ کے
حق دار نہیں
اب تمھارے مرے مابین
کسی دید کا
نا دید کا اسرار نہیں!
٭٭٭

٭٭٭
ماخذ:
http://www.freeurdupoetry.com/Urdu-Poetry-Of-Rafiq-Sandeelvi
http://esbaatpublications.com/esbaatmag/2011/11/
تدوین اور ای بک کی تشکیل: اعجاز عبید